(1)

Ir-rekwiżiti tar-rappurtar għandhom rwol ewlieni fl-iżgurar tal-monitoraġġ kif suppost u l-infurzar korrett ta’ atti legali tal-Unjoni. Madankollu, huwa importanti li tali rekwiżiti jiġu ssimplifikati sabiex jiġi żgurat li jissodisfaw l-iskop li kienu maħsuba għalih u sabiex jiġi limitat il-piż amministrattiv.

(2)

Id-Direttiva 2007/2/KE tal-Parlament Ewropew u tal-Kunsill (3) tistabbilixxi regoli ġenerali maħsuba għall-istabbiliment tal-Infrastruttura għall-Informazzjoni Ġeografika fil-Komunità Ewropea (INSPIRE) għall-finijiet tal-politiki ambjentali tal-Unjoni u tal-politiki jew tal-attivitajiet li jista’ jkollhom impatt fuq l-ambjent. Dik id-Direttiva tirrikjedi li l-Istati Membri jaġġornaw, jekk ikun meħtieġ, u jippubblikaw rapport li jinkludi, fost affarijiet oħra, deskrizzjoni fil-qosor tal-ispejjeż u l-benefiċċji tal-implimentazzjoni ta’ dik id-Direttiva sal-31 ta’ Marzu ta’ kull sena.

(3)

Filwaqt li tqiesu r-riżultati tar-rapport tal-Kummissjoni tad-9 ta’ Ġunju 2017 dwar Azzjonijiet għas-Simplifikazzjoni tar-Rappurtar Ambjentali u l-Kontroll tal-Idoneità dwar ir-Rappurtar u l-Monitoraġġ tal-Politika Ambjentali tal-UE li jakkumpanjah, id-Direttiva 2007/2/KE ġiet emendata bir-Regolament (UE) 2019/1010 tal-Parlament Ewropew u tal-Kunsill (4) sabiex jitnaqqas il-kamp ta’ applikazzjoni tar-rappurtar għall-governanza għall-implimentazzjoni tagħha u għall-użu mill-ġdid tad-data ġeografika pubblika. Fl-evalwazzjoni tagħha tad-Direttiva 2007/2/KE, li ġiet konkluża fl-2022, il-Kummissjoni sabet li l-qafas legali jista’ jsir aktar effiċjenti permezz ta’ aktar tnaqqis fil-piż amministrattiv.

(4)

Sabiex jitnaqqas il-piż amministrattiv tar-rekwiżiti tar-rappurtar skont id-Direttiva 2007/2/KE, huwa meħtieġ li l-frekwenza u l-ħinijiet tar-rappurtar dwar l-implimentazzjoni u l-użu tal-infrastrutturi tal-Istati Membri għall-informazzjoni ġeografika jiġu allinjati ma’ atti legali orizzontali aktar reċenti dwar id-data diġitali. Għalhekk huwa xieraq li l-frekwenza tar-rappurtar skont id-Direttiva 2007/2/KE titnaqqas għal darba kull sentejn.

(5)

Minħabba li l-emenda li għandha ssir fid-Direttiva 2007/2/KE tikkonċerna l-għoti ta’ informazzjoni lill-Kummissjoni mill-Istati Membri, ma hemm l-ebda obbligu fuq l-Istati Membri li jittrasponuha. Huwa xieraq għalhekk li f’din is-sitwazzjoni partikolari tintuża deċiżjoni għal tali emenda.

(6)

Minħabba li l-objettiv ta’ din id-Deċiżjoni, jiġifieri li jiġu ssimplifikati r-rekwiżiti ta’ rappurtar stabbiliti fid-Direttiva 2007/2/KE, ma jistax jinkiseb biżżejjed mill-Istati Membri iżda jista’ pjuttost, minħabba l-iskala u l-effetti tiegħu, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat tal-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, din id-Deċiżjoni ma tmurx lil hinn minn dak li huwa meħtieġ sabiex jikseb dak l-objettiv.

(7)

Għaldaqstant jenħtieġ li d-Direttiva 2007/2/KE tiġi emendata skont dan,