(1)

Id-Direttiva tal-Kummissjoni 2007/25/KE (2) daħħlet il-metribużin bħala sustanza attiva fl-Anness I tad-Direttiva tal-Kunsill 91/414/KEE (3).

(2)

Is-sustanzi attivi inklużi fl-Anness I tad-Direttiva 91/414/KEE jitqiesu li ġew approvati skont ir-Regolament (KE) Nru 1107/2009 u huma elenkati fil-Parti A tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (4).

(3)

L-approvazzjoni tas-sustanza attiva metribużin, kif stipulata fil-Parti A tal-Anness tar-Regolament ta’ Implimentazzjoni (UE) Nru 540/2011, tiskadi fil-15 ta’ Frar 2025.

(4)

F’konformità mal-Artikolu 1 tar-Regolament ta’ Implimentazzjoni tal-Kummissjoni (UE) Nru 844/2012 (5) u fil-perjodu ta’ żmien previst f’dak l-Artikolu, ġiet sottomessa applikazzjoni għat-tiġdid tal-approvazzjoni tas-sustanza attiva metribużin lill-Estonja, l-Istat Membru relatur, u lill-Ġermanja, l-Istat Membru korelatur.

(5)

L-applikant ippreżenta l-fajls supplimentari lill-Istat Membru relatur, lill-Istat Membru korelatur, lill-Kummissjoni u lill-Awtorità Ewropea dwar is-Sigurtà fl-Ikel (“l-Awtorità”) f’konformità mal-Artikolu 6 tar-Regolament ta’ Implimentazzjoni (UE) Nru 844/2012. L-Istat Membru relatur sab li l-applikazzjoni kienet ammissibbli.

(6)

L-Istat Membru relatur ħejja abbozz tar-rapport ta’ valutazzjoni tat-tiġdid b’konsultazzjoni mal-Istat Membru korelatur u bagħtu lill-Awtorità u lill-Kummissjoni fit-30 ta’ Settembru 2019. Fl-abbozz tar-rapport ta’ valutazzjoni tat-tiġdid tiegħu, l-Istat Membru relatur ippropona li l-approvazzjoni tal-metribużin ma tiġġeddidx.

(7)

L-Awtorità għamlet il-fajl tas-sommarju supplimentari disponibbli għall-pubbliku. Barra minn hekk, l-Awtorità ċċirkolat ukoll l-abbozz tar-rapport ta’ valutazzjoni tat-tiġdid lill-applikant u lill-Istati Membri biex jagħtu l-kummenti tagħhom u nediet konsultazzjoni pubblika dwaru. L-Awtorità għaddiet il-kummenti li rċeviet lill-Kummissjoni.

(8)

Fil-25 ta’ Lulju 2023, l-Awtorità kkomunikat lill-Kummissjoni l-konklużjoni tagħha (6) dwar jekk jistax ikun mistenni li l-metribużin jissodisfa l-kriterji ta’ approvazzjoni previsti fl-Artikolu 4 tar-Regolament (KE) Nru 1107/2009.

(9)

L-Awtorità identifikat tħassib. B’mod partikolari, hija kkonkludiet li l-metribużin jissodisfa l-kriterji biex jiġi identifikat bħala interferent endokrinali għall-modalità tat-tirojde (T) għall-bnedmin u li ma ntweriex li l-esponiment tal-bnedmin għal dik is-sustanza attiva fi prodott għall-protezzjoni tal-pjanti, f’kundizzjonijiet ta’ użu proposti realistiċi, huwa negliġibbli. Barra minn hekk, l-Awtorità kkonkludiet li l-istimi tal-esponiment għal min ikun fil-qrib u għar-residenti jaqbżu l-valur limitu stabbilit għall-użi rappreżentattivi kollha evalwati, u li l-istudji disponibbli ma kinux biżżejjed biex jeskludu riskju għoli għan-naħal.

(10)

L-awtorità evalwat jekk il-metribużin huwiex meħtieġ għall-kontroll ta’ periklu serju għas-saħħa tal-pjanti li ma jistax jitrażżan b’mezzi disponibbli oħra inklużi metodi mhux kimiċi. Din l-evalwazzjoni kienet tinkludi biss każijiet fejn il-metribużin jintuża għall-kontroll tal-ħaxix ħażin għall-applikazzjonijiet ta’ erbiċidi qabel u wara li jitfaċċa. L-Awtorità kkonkludiet li kien hemm għadd insuffiċjenti ta’ alternattivi kimiċi disponibbli fiż-żmien tal-valutazzjoni għall-għelejjel kollha evalwati u għalhekk li f’dak ir-rigward id-deroga hija appoġġata xjentifikament fl-għelejjel kollha evalwati. Il-valutazzjoni ta’ alternattivi mhux kimiċi għall-użi ppreżentati kkonkludiet li firxa wiesgħa ta’ metodi mhux kimiċi huma disponibbli, minkejja l-fatt li dawn il-metodi jista’ ma jkollhomx l-istess effikaċja bħall-metodi kimiċi jew jista’ jkollhom limitazzjonijiet ekonomiċi. Għalhekk, il-Kummissjoni hija tal-fehma li l-kundizzjonijiet għall-applikazzjoni tad-deroga fl-Artikolu 4(7) tar-Regolament (KE) Nru 1107/2009 mhumiex issodisfati.

(11)

Il-Kummissjoni ppreżentat rapport ta’ tiġdid u abbozz ta’ dan ir-Regolament lill-Kumitat Permanenti dwar il-Pjanti, l-Annimali, l-Ikel u l-Għalf fit-22 ta’ Mejju 2024 u fl-10 ta’ Lulju 2024 rispettivament.

(12)

Il-Kummissjoni stiednet lill-applikant jippreżenta l-kummenti tiegħu dwar il-konklużjoni tal-Awtorità. Barra minn hekk, f’konformità mal-Artikolu 14(1), it-tielet subparagrafu, tar-Regolament ta’ Implimentazzjoni (UE) Nru 844/2012, il-Kummissjoni stiednet lill-applikant biex jippreżenta l-kummenti tiegħu dwar ir-rapport ta’ tiġdid. L-applikant ressaq il-kummenti tiegħu, li ġew eżaminati bir-reqqa.

(13)

Minkejja l-argumenti li ressaq l-applikant, it-tħassib rigward is-sustanza attiva metribużin ma setax jiġi eliminat.

(14)

B’konsegwenza ta’ dan, fir-rigward ta’ użu rappreżentattiv wieħed jew aktar ta’ mill-inqas prodott wieħed għall-protezzjoni tal-pjanti li fih il-metribużin, ma ġiex stabbilit li l-kriterji għall-approvazzjoni previsti fl-Artikolu 4 tar-Regolament (KE) Nru 1107/2009 huma ssodisfati. Jixraq għalhekk li ma tiġġeddidx l-approvazzjoni tas-sustanza attiva metribużin f’konformità mal-Artikolu 20(1), il-punt (b), ta’ dak ir-Regolament.

(15)

Għalhekk, jenħtieġ li r-Regolament ta’ Implimentazzjoni (UE) Nru 540/2011 jiġi emendat kif xieraq.

(16)

Ir-Regolament ta’ Implimentazzjoni tal-Kummissjoni (UE) 2015/408 (7) elenka l-metribużin bħala kandidat għas-sostituzzjoni. Fid-dawl tan-nuqqas ta’ tiġdid tal-approvazzjoni tal-metribużin, dak l-elenkar ma għadux rilevanti. Għaldaqstant, jenħtieġ li s-sustanza attiva metribużin titħassar mill-Anness tar-Regolament ta’ Implimentazzjoni (UE) 2015/408.

(17)

Jenħtieġ li l-Istati Membri jingħataw żmien biżżejjed biex jirtiraw l-awtorizzazzjonijiet tal-prodotti għall-protezzjoni tal-pjanti li fihom il-metribużin.

(18)

Fir-rigward tal-prodotti għall-protezzjoni tal-pjanti li fihom il-metribużin, meta l-Istati Membri jagħtu perjodu ta’ grazzja f’konformità mal-Artikolu 46 tar-Regolament (KE) Nru 1107/2009, dak il-perjodu jenħtieġ li ma jaqbiżx it-12-il xahar mid-data tad-dħul fis-seħħ ta’ dan ir-Regolament.

(19)

Ir-Regolament ta’ Implimentazzjoni tal-Kummissjoni (UE) 2023/918 (8) estenda l-perjodu ta’ approvazzjoni tal-metribużin sal-15 ta’ Frar 2025 sabiex il-proċess ta’ tiġdid ikun jista’ jitlesta qabel ma jiskadi l-perjodu ta’ approvazzjoni ta’ dik is-sustanza attiva. Madankollu, peress li ttieħdet deċiżjoni dwar in-nuqqas ta’ tiġdid tal-approvazzjoni qabel dik id-data ta’ skadenza ta’ dak il-perjodu ta’ approvazzjoni estiż, jenħtieġ li dan ir-Regolament japplika qabel dik id-data.

(20)

Dan ir-Regolament ma jwaqqafx is-sottomissjoni ta’ applikazzjoni oħra għall-approvazzjoni tal-metribużin skont l-Artikolu 7 tar-Regolament (KE) Nru 1107/2009.

(21)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,