(1)

Ir-Regolament (UE) 2019/1009 jistabbilixxi regoli dwar it-tqegħid fis-suq ta’ prodotti fertilizzanti tal-UE. Wara l-iżviluppi fl-implimentazzjoni tar-Regolament u l-ħidma ta’ standardizzazzjoni rilevanti, huma meħtieġa adattamenti tekniċi għall-Annessi I, II u III tar-Regolament (UE) 2019/1009 biex jiġi ffaċilitat il-moviment liberu ta’ prodotti fertilizzanti tal-UE sikuri u agronomikament effiċjenti fis-suq intern.

(2)

L-ewwel nett, l-Anness I tar-Regolament (UE) 2019/1009 jistabbilixxi valuri ta’ limitu massimi għall-Enterococcaceae għal diversi kategoriji funzjonali ta’ prodotti u l-Anness II ta’ dak ir-Regolament jistabbilixxi valuri ta’ limitu għall-istess patoġenu għall-prodotti fertilizzanti tal-UE li jkun fihom ċerti materjali komponenti. L-Enterococcaceae hija familja ta’ batterji ta’ spiss preżenti f’ambjenti li huma rikki fin-nutrijenti. Mid-diversi batterji li jappartjenu għal din il-familja, l-enterococci huma l-aktar perikolużi, minn perspettiva tas-saħħa, peress li ħafna drabi huma assoċjati ma’ infezzjonijiet tal-bniedem u tal-annimali. Matul il-ħidma mwettaq mill-Kumitat Ewropew għall-Istandardizzazzjoni (CEN) biex jiġu żviluppati standards armonizzati b’appoġġ għal dawk ir-rekwiżiti fir-Regolament (UE) 2019/1009, is-CEN informa lill-Kummissjoni li ma hemm l-ebda metodu ta’ ttestjar biex jiġi determinat il-kontenut ta’ Enterococcaceae, minħabba l-varjetà wiesgħa ta’ batterji kkonċernati. Il-metodi ta’ ttestjar eżistenti jiddeterminaw il-kontenut ta’ enterococci. Għalhekk, ir-Regolament (UE) 2019/1009 jenħtieġ li jiġi emendat biex jiġu stabbiliti rekwiżiti li jistgħu jiġu ttestjati fil-prattika. Dan jiffaċilita l-valutazzjoni tal-konformità tal-prodotti u jipprovdi ċarezza kemm dwar l-obbligi tal-manifatturi kif ukoll dwar il-mod kif jenħtieġ li jitwettqu l-verifiki tas-sorveljanza tas-suq.

(3)

It-tieni, skont il-Parti II, il-punt 4, tal-Anness I tar-Regolament (UE) 2019/1009, meta l-konformità ma’ rekwiżit partikolari fl-Anness I (bħan-nuqqas ta’ kontaminant partikolari) issegwi b’mod ċert u li ma jistax jiġi kontestat min-natura jew il-proċess ta’ manifattura ta’ prodott fertilizzanti tal-UE, dik il-konformità tista’ tiġi preżunta fil-proċedura tal-valutazzjoni tal-konformità mingħajr verifika (bħall-ittestjar), fejn ir-responsabbiltà tkun f’idejn il-manifattur. Dispożizzjoni simili hija stabbilita għall-valuri ta’ limitu tal-kontaminanti fit-Taqsima CMC 15, il-punt (6), għall-materjali ta’ purità għolja rkuprati. Għar-raġunijiet ta’ koerenza u sabiex jiġi evitat piż amministrattiv bla bżonn, jenħtieġ li jiġu introdotti dispożizzjonijiet simili fil-Parti II, it-Taqsimiet CMC 3, CMC 5, CMC 12, CMC 13 u CMC 14 tal-Anness II tar-Regolament (UE) 2019/1009. Dawk id-dispożizzjonijiet jiffaċilitaw il-valutazzjoni tal-konformità tal-prodotti fertilizzanti tal-UE li fihom materjali bħal dawn u, fl-aħħar mill-aħħar, il-moviment liberu tagħhom fis-suq intern.

(4)

It-tielet, il-Parti III tal-Anness III tar-Regolament (UE) 2019/1009 tistabbilixxi regoli ta’ tolleranza għal diversi parametri li għandhom jiġu inklużi fuq it-tikketta tal-prodotti fertilizzanti tal-UE. Il-valur iddikjarat fuq it-tikketta jista’ jiddevja mill-valur reali, biss fi ħdan il-valuri ta’ limitu stabbiliti b’dak ir-Regolament. Fir-rigward tal-kwantità ta’ fertilizzanti inorganiċi, huma stabbiliti żewġ tolleranzi (1 % u 5 %). Huwa meħtieġ li jiġu identifikati s-sitwazzjonijiet li fihom japplika kull wieħed miż-żewġ valuri. Għalhekk, il-kwantità ddikjarata ta’ fertilizzanti inorganiċi ta’ makronutrijenti jenħtieġ li tiddevja biss b’massimu ta’ 1 %, minħabba li tali prodotti normalment jinbiegħu f’pakketti akbar jew jinxtraw fi kwantitajiet akbar. Il-fertilizzanti inorganiċi ta’ mikronutrijenti normalment jinbiegħu f’pakketti iżgħar u għalhekk jenħtieġ li jikkonformaw ma’ tolleranza ta’ 5 %.

(5)

Ir-raba’, il-Parti III tal-Anness III tar-Regolament (UE) 2019/1009 jistabbilixxi tolleranza ta’ 0,3 punt perċentwali f’termini assoluti għall-kontenut ta’ komposti inibituri li jaqbżu konċentrazzjoni ta’ inibituri ta’ 2 %, l-istess bħal dik applikabbli għall-fertilizzanti b’komposti inibituri. Skont il-grupp ta’ koordinazzjoni tal-korpi notifikati stabbilit skont l-Artikolu 36 tar-Regolament (UE) 2019/1009, dik it-tolleranza hija restrittiva ħafna għall-inibituri, peress li l-komposti inibituri normalment ikunu preżenti f’konċentrazzjonijiet kbar f’tali prodotti, u mhux biss f’konċentrazzjonijiet żgħar bħal fil-każ tal-fertilizzanti. Sabiex jitqiesu d-devjazzjonijiet tal-manifattura u l-akkuratezza tal-metodu ta’ ttestjar disponibbli u b’hekk tiġi ffaċilitata l-valutazzjoni tal-konformità tal-inibituri, jenħtieġ li r-Regolament (UE) 2019/1009 jiġi emendat biex tiġi introdotta tolleranza aktar permissiva għall-kontenut ta’ komposti inibituri fl-inibituri.

(6)

Għalhekk, jenħtieġ li r-Regolament (UE) 2019/1009 jiġi emendat skont dan,

(1)

l-Anness I huwa emendat f’konformità mal-Anness I ta’ dan ir-Regolament;

(2)

l-Anness II huwa emendat f’konformità mal-Anness II ta’ dan ir-Regolament;

(3)

l-Anness III huwa emendat f’konformità mal-Anness III ta’ dan ir-Regolament.