1.   Il-membri għandhom ikunu individwi maħtura biex jirrappreżentaw interess komuni, organizzazzjonijiet, awtoritajiet tal-Istati Membri, jew entitajiet pubbliċi oħra.

2.   Il-grupp għandu jkun magħmul minn massimu ta’ 250 membru.

3.   Il-membri maħtura biex jirrappreżentaw interess komuni ma għandhomx jirrappreżentaw parti kkonċernata individwali, iżda orjentazzjoni ta’ politika komuni għal organizzazzjonijiet differenti tal-partijiet ikkonċernati.

4.   L-awtoritajiet, l-organizzazzjonijiet u entitajiet pubbliċi oħra tal-Istati Membri għandhom jaħtru r-rappreżentanti tagħhom u għandhom ikunu responsabbli biex jiżguraw li r-rappreżentanti tagħhom jagħtu għarfien espert ta’ livell għoli.

5.   Il-membri li ma jibqgħux f’pożizzjoni li jikkontribwixxu b’mod effettiv għad-deliberazzjonijiet tal-grupp, li, fl-opinjoni tas-servizzi responsabbli tal-Kummissjoni, ma jikkonformawx mal-kundizzjonijiet stabbiliti fl-Artikolu 339 tat-Trattat dwar il-Funzjonament tal-Unjoni Ewropea jew li jirriżenjaw, ma għandhomx jibqgħu jiġu mistiedna jipparteċipaw fil-laqgħat tal-grupp u jistgħu jiġu sostitwiti għall-bqija tal-mandat tagħhom. Is-servizzi responsabbli tal-Kummissjoni kkonċernati jistgħu wkoll itemmu s-sħubija ta’ dawn il-membri.

1.   L-għażla ta’ individwi maħtura biex jirrappreżentaw interess komuni u ta’ organizzazzjonijiet bħala membri tal-grupp għandha titwettaq permezz ta’ sejħa pubblika għall-applikazzjonijiet li tkun kontinwament miftuħa, li għandha tiġi ppubblikata fir-Reġistru tal-gruppi ta’ esperti tal-Kummissjoni u entitajiet oħra simili (“ir-Reġistru tal-gruppi ta’ esperti”). Barra minn hekk, is-sejħa għall-applikazzjonijiet tista’ tiġi ppubblikata permezz ta’ mezzi oħra, inkluż fuq siti web apposta. Is-sejħa għall-applikazzjonijiet għandha tiddeskrivi b’mod ċar il-kriterji tal-għażla li jinkludu l-livell ta’ għarfien espert neċessarju u l-interessi li għandhom ikunu rappreżentati rigward il-ħidma li trid titwettaq.

2.   Ir-reġistrazzjoni fir-Reġistru tat-Trasparenza hija meħtieġa sabiex jinħatru l-individwi li jirrappreżentaw interess komuni u l-organizzazzjonijiet.

3.   Il-membri tal-grupp għandhom jinħatru mis-servizzi responsabbli tal-Kummissjoni, minn fost applikanti b’kompetenzi fl-oqsma msemmija fl-Artikolu 2 u l-Artikolu 3.

4.   Il-membri għandhom jinħatru għal perjodu ta’ 5 snin, li għandu jiġġedded awtomatikament, sakemm is-servizzi responsabbli tal-Kummissjoni ma jiddeċidux mod ieħor. Il-membri għandhom jibqgħu fil-kariga sakemm jiġu sostitwiti.

1.   Il-grupp għandu jaġixxi fuq talba tas-servizzi responsabbli tal-Kummissjoni, f’konformità mar-regoli orizzontali dwar il-gruppi ta’ esperti (6) (“ir-regoli orizzontali”).

2.   Fil-prinċipju, il-laqgħat tal-grupp għandhom isiru f’bini tal-Kummissjoni jew virtwalment, skont iċ-ċirkostanzi.

3.   Is-servizzi responsabbli tal-Kummissjoni għandhom jipprovdu s-servizzi segretarjali. Uffiċjali minn dipartimenti oħra tal-Kummissjoni b’interess fil-proċedimenti jistgħu jattendu l-laqgħat tal-grupp u tas-sottogruppi tiegħu.

4.   Bi qbil mal-President, il-grupp jista’, b’maġġoranza sempliċi tal-membri tiegħu, jiddeċiedi li d-deliberazzjonijiet għandhom ikunu pubbliċi.

5.   Il-minuti dwar id-diskussjoni ta’ kull punt fuq l-aġenda u dwar l-opinjonijiet mogħtija mill-grupp għandhom ikunu siewja u sħaħ. Il-minuti għandu jħejjihom is-segretarjat taħt ir-responsabbiltà tal-President.

6.   Sa fejn ikun possibbli, il-grupp għandu jadotta l-opinjonijiet, ir-rakkomandazzjonijiet jew ir-rapporti tiegħu b’kunsens. F’każ ta’ vot, ir-riżultat tal-vot għandu jkun deċiż b’maġġoranza sempliċi tal-membri. Il-membri li jkunu vvutaw kontra jew li jkunu astjenew għandhom id-dritt li jkollhom dokument li jiġbor fil-qosor ir-raġunijiet għall-pożizzjoni tagħhom mehmuż mal-opinjonijiet, ir-rakkomandazzjonijiet jew ir-rapporti.

1.   Għandu jiġi stabbilit sottogrupp magħmul minn esperti maħtura mill-Istati Membri (“Grupp ta’ Esperti tal-Istati Membri”).

2.   Is-servizzi responsabbli tal-Kummissjoni jistgħu jistabbilixxu sottogruppi addizzjonali bl-għan li jeżaminaw mistoqsijiet speċifiċi abbażi ta’ termini ta’ referenza li jiddefinixxu huma stess. Dawn is-sottogruppi addizzjonali għandhom joperaw f’konformità mar-regoli orizzontali u għandhom jirrapportaw lill-grupp. Dawn għandhom jiġu xolti malli jintlaħaq l-għan tal-mandat tagħhom.

3.   Il-membri tas-sottogruppi li ma jkunux membri tal-grupp għandhom jintagħżlu permezz ta’ sejħa pubblika għall-applikazzjonijiet, f’konformità mal-Artikolu 5 mar-regoli orizzontali.

1.   Individwi, organizzazzjonijiet, u entitajiet pubbliċi għajr l-awtoritajiet tal-Istati Membri, jistgħu jingħataw status ta’ osservatur, f’konformità mar-regoli orizzontali, bi stedina diretta jew b’riżultat ta’ sejħa għall-applikazzjonijiet.

2.   L-organizzazzjonijiet u l-entitajiet pubbliċi maħtura bħala osservaturi għandhom jinnominaw ir-rappreżentanti tagħhom.

3.   L-osservaturi u r-rappreżentanti tagħhom jistgħu jkunu awtorizzati mill-President biex jieħdu sehem fid-diskussjonijiet tal-grupp u tas-sottogruppi tiegħu u jipprovdu għarfien espert. Madankollu, ma għandhomx ikollhom id-dritt tal-vot u ma għandhomx jipparteċipaw fit-tfassil ta’ rakkomandazzjonijiet jew pariri tal-grupp u tas-sottogruppi tiegħu.

1.   Il-grupp u s-sottogruppi tiegħu għandhom jiġu rreġistrati fir-Reġistru tal-gruppi ta’ esperti tal-Kummissjoni u entitajiet oħra simili (“ir-Reġistru tal-gruppi ta’ esperti”).

2.   Rigward il-kompożizzjoni tal-grupp u tas-sottogruppi, għandha tiġi ppubblikata d-data li ġejja fir-Reġistru tal-gruppi ta’ esperti:

3.   Id-dokumenti rilevanti kollha, inklużi l-aġendi, il-minuti u s-sottomissjonijiet tal-parteċipanti, għandhom ikunu disponibbli fuq ir-Reġistru tal-gruppi ta’ esperti. B’mod partikolari, l-aġenda u dokumenti ta’ sfond rilevanti oħra għandhom jiġu ppubblikati fi żmien xieraq qabel il-laqgħa, segwiti minn pubblikazzjoni f’waqtha tal-minuti. L-eċċezzjonijiet għall-pubblikazzjoni għandhom ikunu possibbli biss fejn jitqies li l-iżvelar ta’ dokument idgħajjef il-protezzjoni ta’ interess pubbliku jew privat kif definit fl-Artikolu 4 tar-Regolament (KE) Nru 1049/2001 tal-Parlament Ewropew u tal-Kunsill (9).

1.   Il-parteċipanti fl-attivitajiet tal-Forum dwar l-Ekodisinn u s-sottogruppi ma għandhomx jitħallsu għas-servizzi li joffru.

2.   L-ispejjeż tal-ivvjaġġar u tas-sussistenza mġarrba fl-attivitajiet tal-Forum dwar l-Ekodisinn u tas-sottogruppi għandhom jiġu rimborżati mill-Kummissjoni għal rappreżentant wieħed għal kull Stat Membru u għall-esperti mistiedna f’konformità mal-Artikolu 9. Ir-rimborż għandu jsir f’konformità mad-dispożizzjonijiet fis-seħħ fil-Kummissjoni u fil-limiti tal-approprjazzjonijiet disponibbli allokati lid-dipartimenti tal-Kummissjoni skont il-proċedura annwali għall-allokazzjoni tar-riżorsi.