(1)

Fl-4 ta’ Ottubru 2023, il-Kummissjoni Ewropea (“il-Kummissjoni”) bdiet, fuq inizjattiva proprja, investigazzjoni antisussidji fir-rigward tal-importazzjonijiet fl-Unjoni ta’ vetturi elettriċi ġodda bil-batterija (“BEVs”) iddisinjati għat-trasport ta’ persuni, li joriġinaw mir-Repubblika tal-Poplu taċ-Ċina (“il-pajjiż ikkonċernat”, “ir-RPĊ”, jew “iċ-Ċina”) skont l-Artikolu 10(8) tar-Regolament (UE) 2016/1037 tar-Regolament bażiku”). Din ippubblikat Notifika tal-Bidu f’Il-Ġurnal Uffiċjali tal-Unjoni Ewropea (2) (“in-Notifika tal-Bidu”).

(2)

Il-Kummissjoni bdiet l-investigazzjoni fuq il-bażi li l-importazzjonijiet ta’ BEVs li joriġinaw mir-RPĊ qegħdin jiġu ssussidjati u b’hekk qegħdin jikkawżaw dannu (3) lill-industrija tal-Unjoni.

(3)

Wara analiżi fil-fond tal-iżviluppi reċenti tas-suq u meta wieħed iqis is-sensittività tas-settur tal-vetturi elettriċi u l-importanza strateġika tiegħu għall-ekonomija tal-UE f’termini ta’ innovazzjoni, valur miżjud u impjiegi, il-Kummissjoni ġabret informazzjoni dwar is-suq minn diversi sorsi indipendenti. Din l-informazzjoni kellha t-tendenza li turi l-eżistenza ta’ sussidjar mir-RPĊ li jaffettwa b’mod negattiv is-sitwazzjoni tal-industrija tal-BEV tal-Unjoni.

(4)

Abbażi ta’ informazzjoni faċilment disponibbli, kien hemm biżżejjed evidenza li turi li l-importazzjonijiet tal-BEVs li joriġinaw mir-RPĊ jibbenefikaw minn sussidji kumpensatorji pprovduti mill-Gvern tar-Repubblika tal-Poplu taċ-Ċina (“il-GTĊ”). Dawk is-sussidji ppermettew li l-importazzjonijiet issussidjati jżidu malajr is-sehem tagħhom mis-suq fl-Unjoni għad-detriment tal-industrija tal-Unjoni.

(5)

L-evidenza disponibbli wriet il-probabbiltà ta’ żieda sostanzjali fl-importazzjonijiet issussidjati bi prezzijiet baxxi, li tkun ta’ theddida imminenti ta’ dannu għall-industrija tal-Unjoni li hija diġà vulnerabbli. Tali żieda f’daqqa fl-importazzjonijiet bi prezz baxx, li jirbħu sehem sinifikanti mis-swieq f’suq li qiegħed jikber b’rata mgħaġġla li fih hija meħtieġa rata sinifikanti u sostnuta ta’ investimenti hekk kif is-suq tal-Unjoni jagħmel tranżizzjoni għall-elettrifikazzjoni totali, twassal lill-industrija tal-Unjoni biex iġġarrab telf finanzjarju kbir li malajr jista’ jsir wieħed mhux sostenibbli.

(6)

F’dawn iċ-ċirkostanzi speċjali, billi l-Kummissjoni kellha biżżejjed evidenza li għandha t-tendenza li turi l-eżistenza ta’ sussidjar, theddida ta’ dannu u rabta kawżali meħtieġa għall-bidu ta’ investigazzjoni antisussidji, hija ddeċidiet, f’konformità mal-Artikolu 10(8) tar-Regolament bażiku, li tipproċedi b’tali bidu mingħajr ma tkun irċeviet ilment bil-miktub mill-industrija tal-Unjoni jew f’isimha.

(7)

Qabel il-bidu tal-investigazzjoni antisussidji, il-Kummissjoni nnotifikat lill-GTĊ li hija kienet iddeċidiet li tibda proċediment ex officio dwar l-importazzjonijiet ta’ BEVs ġodda mir-RPĊ u stiednet lill-GTĊ għal konsultazzjonijiet f’konformità mal-Artikolu 10(7) tar-Regolament bażiku. Il-GTĊ aċċetta l-offerta għal konsultazzjonijiet, li saru fit-2 ta’ Ottubru 2023. Matul il-konsultazzjonijiet, ġew ikkunsidrati l-kummenti sottomessi mill-GTĊ. Madankollu, ma setgħet tinstab l-ebda soluzzjoni li fuqha jkun hemm qbil reċiproku.

(8)

Kif stabbilit fil-premessa (8) tar-Regolament ta’ Implimentazzjoni tal-Kummissjoni (UE) 2024/1866 (4) (“ir-Regolament provviżorju”), il-Kummissjoni, fuq inizjattiva tagħha stess, għamlet l-importazzjonijiet ta’ BEVs ġodda mfassla għat-trasport ta’ persuni, li joriġinaw miċ-Ċina, soġġetti għal reġistrazzjoni mis-7 ta’ Marzu 2024 bir-Regolament ta’ Implimentazzjoni tal-Kummissjoni (UE) 2024/785 (5) (“ir-Regolament tar-reġistrazzjoni”).

(9)

F’konformità mal-Artikolu 29a tar-Regolament bażiku, fit-12 ta’ Ġunju 2024, il-Kummissjoni pprovdiet lill-partijiet sommarju tad-dazji provviżorji proposti u dettalji dwar il-kalkolu tar-rati ta’ sussidju. Il-partijiet interessati ġew mistiedna jikkummentaw dwar l-akkuratezza tal-kalkoli fi żmien 3 ijiem xogħol. Waslu kummenti mingħand il-produtturi Ċiniżi inklużi fil-kampjun, il-Grupp BYD, l-Grupp SAIC, u l-Grupp Geely, u mingħand il-produtturi esportaturi Great Wall Motor Co. Ltd. (“GWM”), Spotlight Automotive Co. Ltd. (“Spotlight”), u Volkswagen (Anhui) Automotive Co. Ltd. (“Volkswagen (Anhui)”).

(10)

Fl-4 ta’ Lulju 2024, il-Kummissjoni imponiet miżuri kumpensatorji provviżorji fuq l-importazzjonijiet ta’ BEVs li joriġinaw miċ-Ċina bir-Regolament ta’ Implimentazzjoni (UE) 2024/1866.

(11)

Wara d-divulgazzjoni tal-fatti u l-kunsiderazzjonijiet essenzjali li abbażi tagħhom ġew imposti miżuri kumpensatorji provviżorji (“divulgazzjoni provviżorja”), il-Grupp BYD, il-Grupp SAIC, u s-sussidjarji tal-Grupp Geely, Polestar Performance AB (“Polestar”) u Volvo Car Cooperation, il-produtturi esportaturi l-Grupp Dongfeng, GWM, NIO Holding (“NIO”), Spotlight, Tesla (Shanghai) Co. Ltd. (“Tesla (Shanghai)”), Volkswagen (Anhui), il-Gvern taċ-Ċina (“GTĊ”), il-Kamra tal-Kummerċ taċ-Ċina għall-Importazzjoni u l-Esportazzjoni ta’ Makkinarju u Prodotti Elettroniċi (“CCCME”), l-Assoċjazzjoni taċ-Ċina ta’ Manifatturi tal-Vetturi (“CAAM”), il-produtturi tal-Unjoni l-Kumpanija 18, il-Kumpanija 22 u l-Kumpanija 24, u l-assoċjazzjoni Ġermaniża Verband der Automobilindustrie e.V. issottomettew kummenti.

(12)

Mill-bidu nett, il-Kummissjoni nnotat li s-CCCME u l-GTĊ ikkummentaw fid-dettall dwar il-valutazzjonijiet li saru mill-Kummissjoni fir-Regolament provviżorju dwar id-dannu u l-kawżalità, spiss mingħajr ma rrikonoxxew is-sejbiet u l-ġustifikazzjoni tagħhom ipprovduti mill-Kummissjoni fir-Regolament provviżorju. Bl-istess mod, is-CCCME u l-GTĊ tennew għadd kbir ta’ kummenti li tqajmu fis-sottomissjonijiet ta’ wara l-bidu tagħha mill-ġdid mingħajr ma indirizzaw l-ispjegazzjonijiet u r-referenza speċifiċi għall-evidenza rilevanti pprovduta mill-Kummissjoni fir-Regolament provviżorju. Il-Kummissjoni nnotat ukoll li s-CCCME u l-GTĊ prinċipalment ikkritikaw l-analiżi li saret mill-Kummissjoni mingħajr ma ppreżentaw evidenza ġdida f’dan ir-rigward jew mingħajr ma appoġġaw id-dikjarazzjonijiet li saru bi kwalunkwe evidenza. Fit-taqsimiet ta’ hawn taħt, il-Kummissjoni indirizzat fid-dettall il-kummenti li tqajmu mis-CCCME mingħajr, madankollu, ma tenniet kummenti identiċi li tqajmu f’taqsimiet varji.

(13)

Il-partijiet li talbu li jinstemgħu ngħataw din l-opportunità. Saru seduti ta’ smigħ mal-Grupp BYD, mas-CCCME, mal-Grupp Geely, mal-GTĊ, ma’ Polestar, mal-Grupp SAIC, ma’ Spotlight, ma’ Volkswagen (Anhui), mal-Kumpanija 22, mal-Kumpanija 24, u mal-Kumpanija 27.

(14)

Il-Kummissjoni kompliet tfittex u tivverifika l-informazzjoni kollha li qieset meħtieġa għas-sejbiet definittivi tagħha. Meta waslet għas-sejbiet definittivi tagħha, il-Kummissjoni kkunsidrat il-kummenti sottomessi mill-partijiet interessati u rrevediet il-konklużjonijiet provviżorji tagħha meta kien xieraq. Sabiex ikollha għad-dispożizzjoni tagħha data aktar komprensiva dwar il-prezzijiet tal-bejgħ, il-kost tal-produzzjoni u l-profittabbiltà tal-Unjoni fil-perjodu ta’ wara l-investigazzjoni, il-produtturi tal-Unjoni inklużi fil-kampjun intalbu jipprovdu data addizzjonali. Il-produtturi kollha tal-Unjoni inklużi fil-kampjun issottomettew l-informazzjoni mitluba.

(15)

Fl-20 ta’ Awwissu 2024, il-Kummissjoni infurmat lill-partijiet interessati kollha bil-fatti u bil-kunsiderazzjonijiet essenzjali li abbażi tagħhom kellha l-ħsieb li timponi dazju kumpensatorju definittiv fuq l-importazzjonijiet ta’ BEVs li joriġinaw mir-RPĊ (“divulgazzjoni finali”). Il-partijiet kollha ngħataw perjodu li fih setgħu jikkummentaw dwar id-divulgazzjoni finali.

(16)

Il-partijiet li għamlu din it-talba ngħataw ukoll opportunità li jinstemgħu wara d-divulgazzjoni finali. Saret seduta mal-Grupp SAIC, mal-Kumpanija 27, mal-Grupp BYD, mas-CCCME, mal-GTĊ, ma’ Tesla (Shanghai), mal-Grupp Geely, mal-Kumpanija 22 u ma’ Polestar.

(17)

Wara d-divulgazzjoni finali waslu kummenti mingħand il-Grupp BYD, is-CATL, il-GTĊ, Tesla (Shanghai), il-GWM, is-CCCME, is-CAAM, il-Grupp SAIC, il-Grupp Geely, il-VDA, l-Eurofer, il-Kumpanija 27, il-Kumpanija 18, il-Kumpanija 24, il-Kumpanija 22 u Polestar.

(18)

Fid-9 ta’ Settembru 2024, abbażi ta’ dawn il-kummenti, il-Kummissjoni rrevediet xi wħud mis-sejbiet provviżorji tagħha, immodifikat xi wħud mill-kunsiderazzjonijiet li abbażi tagħhom kellha l-ħsieb li timponi dazju kumpensatorju definittiv u infurmat lill-partijiet interessati kollha b’dan (“divulgazzjoni finali addizzjonali”).

(19)

Il-kummenti dwar id-divulgazzjoni finali addizzjonali waslu mingħand il-GTĊ, is-CCCME, BYD, Tesla, Smart u l-Kumpanija 18 (f’verżjoni kunfidenzjali biss). Barra minn hekk, il-Kumpanija 18 ukoll issottomettiet kummenti, f’verżjoni kunfidenzjali, wara l-iskadenza għal kummenti dwar id-divulgazzjoni addizzjonali. Il-biċċa l-kbira tal-kummenti diġà kienu indirizzati fid-divulgazzjoni kunfidenzjali speċifika indirizzata lill-kumpanija.

(20)

Wara d-divulgazzjoni provviżorja, is-CCCME u l-GTĊ asserew, minn naħa waħda, li l-kampjun tal-produtturi tal-Unjoni ma kienx magħruf u ma kienx rappreżentattiv u, min-naħa l-oħra, li l-partijiet interessati ma setgħux jivvalutaw ir-rappreżentattività tal-kampjun. Is-CCCME u l-GTĊ asserew ulterjorment li ma kienx magħruf jekk il-produtturi OEM tal-Unjoni kinux inklużi fil-kampjun, jekk il-kumpaniji kollha fil-kampjun humiex l-OEMs/il-kumpaniji tal-Unjoni li qegħdin jaqilbu mill-produzzjoni tal-ICEs għal BEVs jew jekk kienx hemm produtturi oħrajn tal-BEV fil-kampjun, minħabba li l-produtturi tal-Unjoni li jkunu qegħdin jaqilbu mill-ICEs għal BEVs jistgħu jkunu f’pożizzjoni ekonomika agħar minn produtturi oħrajn tal-Unjoni. Is-CCCME u l-GTĊ asserew ukoll li l-kampjun tal-produtturi tal-Unjoni ma kienx rappreżentattiv peress li l-Kummissjoni ma applikatx il-prinċipju ta’ entità ekonomika unika għall-produtturi tal-Unjoni li ġew inklużi fil-kampjun, minkejja li dan ġie applikat fir-rigward tal-produtturi esportaturi inklużi fil-kampjun. Is-CCCME u l-GTĊ asserew ukoll li l-prinċipju ta’ entità ekonomika unika ġie applikat għall-industrija tal-Unjoni f’investigazzjoni preċedenti dwar id-difiża tal-kummerċ bħall-Metall tas-siliċju miċ-Ċina (6) fejn żewġ entitajiet tal-produzzjoni (FerroPem u FerroAtlantica) tal-grupp ta’ produtturi tal-Unjoni, il-grupp Ferroglobe, tqiesu bħala partijiet relatati u l-produzzjoni tal-produttur tal-Unjoni miż-żewġ entitajiet ta’ produzzjoni tqiesu flimkien. Is-CCCME u l-GTĊ asserew ukoll li l-prinċipju ta’ entità ekonomika unika kien rilevanti għall-istabbiliment tal-prezzijiet tal-bejgħ tal-industrija tal-Unjoni li huma mqabbla mal-prezz tal-esportazzjoni għall-analiżi tat-twaqqigħ tal-prezz u tat-trażżin tal-prezz.

(21)

Kif ġie spjegat fil-premessa (12) tar-Regolament provviżorju, ingħatat l-anonimità lill-produtturi tal-Unjoni minħabba riskju ta’ effett negattiv sinifikanti fil-forma ta’ azzjonijiet ta’ ritaljazzjoni. Għalhekk, il-Kummissjoni ma tistax tiddivulga l-identità tal-produtturi tal-Unjoni inklużi fil-kampjun. Madankollu, l-anonimità mogħtija lill-produtturi tal-Unjoni inklużi fil-kampjun ma tagħmilx il-kampjun wieħed mhux rappreżentattiv. Kif ġie spjegat fil-premessa (26) tar-Regolament provviżorju, l-għażla tal-kampjun kienet ibbażata fuq l-akbar volum rappreżentattiv ta’ bejgħ u produzzjoni fl-Unjoni tal-prodott simili matul il-perjodu ta’ investigazzjoni (7). Il-Kummissjoni qieset ukoll il-medda ġeografika tal-produtturi tal-Unjoni fl-Unjoni kif ukoll żgurat l-inklużjoni ta’ medda wiesgħa ta’ mudelli ta’ BEVs. Il-produtturi tal-Unjoni inklużi fil-kampjun kienu jirrappreżentaw 38 % tal-bejgħ u 34 % tal-volum tal-produzzjoni totali tal-industrija tal-Unjoni fil-perjodu ta’ investigazzjoni. Barra minn hekk, wara ż-żjara ta’ verifika tal-produtturi tal-Unjoni inklużi fil-kampjun, fl-4 ta’ Ġunju 2024 il-Kummissjoni żiedet Nota fil-fajl (8) u kkonfermat li l-produtturi tal-Unjoni inklużi fil-kampjun kienu jirrappreżentaw 32 % tal-bejgħ fl-Unjoni u 30 % tal-produzzjoni fl-Unjoni fil-perjodu ta’ investigazzjoni. Barra minn hekk, id-divulgazzjoni dwar jekk il-kumpaniji kollha inklużi fil-kampjun kinux OEMs li pproduċew vetturi ICE u li qegħdin jipproduċu l-BEVs, bl-istess mod, tiddivulga b’mod involontarju l-identità ta’ ċerti produtturi tal-Unjoni u għalhekk il-Kummissjoni tikser l-obbligu legali tagħha li żżomm l-anonimità mogħtija lill-produtturi tal-Unjoni. Għalhekk, it-talba għad-divulgazzjoni ta’ din l-informazzjoni ġiet miċħuda.

(22)

Finalment, is-CCCME fixklet il-prinċipju ta’ entità ekonomika unika mal-kampjunar fil-livell tal-grupp. Għal raġunijiet ta’ ċarezza, il-prinċipju ta’ entità ekonomika unika jiġi applikat f’ċerti kundizzjonijiet għall-kalkolu tal-prezz tal-esportazzjoni fil-livell mill-fabbrika (jiġifieri fuq bażi ta’ kif joħroġ mill-fabbrika tal-produttur) għall-kalkoli tal-marġni tad-dumping. F’din l-investigazzjoni antisussidji, il-Kummissjoni ma kellhiex bżonn tikkalkula prezz tal-esportazzjoni mill-fabbrika u għalhekk dan il-prinċipju ma huwiex applikat fl-investigazzjoni kurrenti. Fir-rigward tal-kampjunar tal-produtturi tal-Unjoni, il-Kummissjoni infurmat lill-partijiet interessati fil-bidu tal-investigazzjoni li se ssir fil-livell tal-entità tal-produzzjoni u mhux fil-livell tal-grupp (9). Din hija l-prattika komuni tal-Kummissjoni għall-kampjunar tal-produtturi tal-Unjoni u ma kien hemm l-ebda informazzjoni disponibbli li setgħet tissuġġerixxi li kien iġġustifikat approċċ differenti f’din l-investigazzjoni. Barra minn hekk, is-CCCME u l-GTĊ ma pprovdew l-ebda evidenza f’dan ir-rigward. Barra minn hekk, fl-investigazzjoni tal-Metall tas-siliċju miċ-Ċina, għall-kuntrarju tal-asserzjoni tas-CCCME u tal-GTĊ, il-Kummissjoni ma applikatx il-prinċipju ta’ entità ekonomika unika iżda investigat żewġ produtturi mill-istess grupp. Fl-aħħar nett, fl-investigazzjoni kurrenti, il-kalkolu tal-marġni tat-twaqqigħ tal-prezz sar fil-livell tal-prezz għal negozjant fl-Unjoni kif ġie spjegat fil-premessa (1023) tar-Regolament provviżorju, li huwa differenti mil-livell mill-fabbrika.

(23)

Għalhekk, il-konklużjonijiet fil-premessi minn (24) sa (45) tar-Regolament provviżorju ġew ikkonfermati.

(24)

Minħabba li ma sar ebda kumment fir-rigward tal-kampjunar tal-importaturi, il-konklużjonijiet stabbiliti fil-premessi minn (46) sa (47) tar-Regolament provviżorju ġew ikkonfermati.

(25)

Wara d-divulgazzjoni provviżorja, il-Grupp BYD sostna li l-għażla tal-kampjun fixklet is-sejbiet li jirriżultaw, peress li Tesla (Shanghai) ma kinitx inkluża fil-kampjun minkejja l-volum kbir tagħha ta’ esportazzjonijiet ta’ BEVs lejn is-suq tal-Unjoni, u li kważi f’kull investigazzjoni ta’ rimedju kummerċjali, il-Kummissjoni għażlet il-kampjun abbażi tal-volum tal-esportazzjonijiet. Il-Grupp BYD asserixxa wkoll li l-Kummissjoni ma pprovdietx spjegazzjoni ċara għaliex ma inkludietx lil Tesla (Shanghai) fil-kampjunar u għal liema raġuni l-Kummissjoni aċċettat it-talba ta’ Tesla (Shanghai) għal eżami individwali.

(26)

Wara d-divulgazzjoni finali, il-GTĊ u s-CCCME tennew l-asserzjoni tagħhom li l-kampjun tal-produtturi esportaturi Ċiniżi magħżul kien orjentat lejn ir-riżultati, preġudikat u inkonsistenti mal-Artikolu 27(1) tar-Regolament bażiku. B’mod partikolari, in-nuqqas ta’ inklużjoni ta’ Tesla (Shanghai) fil-kampjun tal-produtturi esportaturi Ċiniżi jmur kontra l-iskop innifsu tal-kampjunar, ir-Regolament bażiku, u rrifletta l-approċċ diskriminatorju tal-Kummissjoni. Skont il-GTĊ u s-CCCME, in-nuqqas ta’ inklużjoni ta’ Tesla (Shanghai) għamel il-kampjun mhux rappreżentattiv, u Tesla (Shanghai) tista’ tiġi investigata b’mod raġonevoli fil-perjodu ta’ żmien. Barra minn hekk, il-Kummissjoni kellha ż-żmien u r-riżorsi biex tivverifika din il-kumpanija u tistabbilixxi r-rata tas-sussidju tagħha u għalhekk setgħet tiġi inkluża fil-kampjun mill-bidu nett. Billi ma inkludietx lil Tesla (Shanghai) fil-kampjun, il-Kummissjoni żiedet b’mod artifiċjali d-dazju medju ponderat applikabbli għall-produtturi esportaturi Ċiniżi mhux inklużi fil-kampjun li kkooperaw, u dan wera approċċ immirat u selettiv.

(27)

Il-Kummissjoni enfasizzat li allegazzjonijiet simili kienu diġà indirizzati fil-premessi (54) u (55) tar-Regolament provviżorju. L-għażla tal-kampjun kienet konformi bis-sħiħ mad-dispożizzjonijiet tal-Artikolu 27 tar-Regolament bażiku, meta jitqiesu l-ispeċifiċitajiet tal-każ, u b’hekk ġiet ikkunsidrata bħala rappreżentattiva tas-settur Ċiniż tal-esportazzjoni tal-BEVs. Il-Kummissjoni ma kellhiex approċċ immirat u selettiv fl-istabbiliment tal-kampjun. Ir-raġunijiet għaliex il-Kummissjoni aċċettat it-talba għal eżami individwali huma spjegati fil-premessa (30) ta’ dan ir-Regolament. Il-fatt li l-Kummissjoni tista’ tipprovdi rata ta’ sussidju individwali lil Tesla (Shanghai) ma jfissirx li, fiż-żmien tal-għażla tal-kampjun, l-inklużjoni ta’ dan l-esportatur kienet possibbli jew xierqa.

(28)

Għalhekk, il-konklużjonijiet fil-premessi minn (48) sa (76) tar-Regolament provviżorju ġew ikkonfermati.

(29)

Tesla (Shanghai), produttur esportatur fir-RPĊ, talbet u ngħatat eżami individwali skont l-Artikolu 27(3) tar-Regolament bażiku.

(30)

Il-Kummissjoni aċċettat it-talba għal eżami individwali ta’ Tesla (Shanghai) minħabba l-istruttura korporattiva sempliċi tal-kumpanija, li ppermettiet lill-Kummissjoni jkollha biżżejjed żmien u riżorsi biex teżamina l-kumpanija. Ma waslet l-ebda talba għal eżami individwali ieħor.

(31)

Wara d-divulgazzjoni provviżorja, il-Grupp BYD, is-CAAM, is-CCCME, il-Grupp Geely, il-GTĊ, il-Grupp SAIC u NIO ikkummentaw dwar kwistjonijiet proċedurali.

(32)

Wara d-divulgazzjoni finali, is-CCCME u l-GTĊ ikkummentaw dwar kwistjonijiet proċedurali.

(33)

Wara d-divulgazzjoni provviżorja, is-CAAM sostniet li l-Kummissjoni eżiġiet li l-kumpaniji jipprovdu informazzjoni, dettalji u “sigrieti kummerċjali” lil hinn mill-ambitu tal-investigazzjoni.

(34)

Il-Kummissjoni ma qablitx mal-asserzjoni. Il-Kummissjoni qieset l-informazzjoni mitluba mill-produtturi esportaturi inklużi fil-kampjun u l-partijiet relatati tagħhom meħtieġa biex tiġi vvalutata l-eżistenza ta’ sussidji kumpensatorji fir-rigward tal-BEVs u l-partijiet u l-komponenti tagħhom. Barra minn hekk, kif diġà ġie ddikjarat fil-premessa (284) tar-Regolament provviżorju, hija l-Kummissjoni li għandha tiddetermina liema informazzjoni titqies neċessarja għall-investigazzjoni, u ma għandhiex tkun parti li tagħmel dik id-determinazzjoni. Il-Kummissjoni tfakkar ukoll li, skont l-Artikolu 29(6) tar-Regolament bażiku, l-informazzjoni li rċeviet fil-qafas ta’ din l-investigazzjoni ntużat biss għall-fini tal-valutazzjoni tal-eżistenza ta’ sussidju kumpensatorji f’konformità mar-Regolament bażiku u mal-Ftehim SCM. Għalhekk, l-asserzjoni ġiet miċħuda.

(35)

Wara d-divulgazzjoni provviżorja, il-Grupp BYD sostna li l-bidu ex officio tal-investigazzjoni ma kienx ġustifikat. Il-Grupp BYD asserixxa li l-formulazzjoni ta’ “ċirkostanzi speċjali” li tinsab fl-Artikolu 10(8) tar-Regolament bażiku trid tagħti xi informazzjoni aktar minn dik li jipprevedi l-paragrafu 2 tal-Artikolu 10 tar-Regolament bażiku, u li l-ispjegazzjonijiet mogħtija fin-Notifika tal-Bidu jiddeskrivu sitwazzjoni mhux differenti minn bidu tal-investigazzjoni bbażata fuq ilment bil-miktub.

(36)

Il-Grupp BYD żied li l-evidenza li fuqha l-Kummissjoni bdiet l-investigazzjoni kienet ġabra ta’ sussidji allegati bbażati fuq rapporti tal-media, rapporti finanzjarji awditjati disponibbli pubblikament ta’ ċerti kumpaniji azzjonarji ta’ kumpaniji li ma jipproduċux biss il-BEVs u lista ta’ politiki u referenzi minn investigazzjonijiet preċedenti dwar importazzjonijiet ta’ prodotti li jinvolvu setturi differenti tal-industrija miċ-Ċina, u li elenkar ta’ serje ta’ politiki u sussidji minn każijiet preċedenti ma setgħux jitqiesu konformi mad-dispożizzjonijiet tal-Artikolu 11(2) tal-Ftehim SCM u li jissodisfaw l-istandard ta’ suffiċjenza ta’ evidenza rigward is-settur tal-BEV.

(37)

Barra minn hekk, il-Grupp BYD sostna li l-allegazzjonijiet dwar it-theddida ta’ dannu materjali u b’mod partikolari t-tranżizzjoni tal-istrutturi tal-produzzjoni tal-industrija tal-karozzi tal-Unjoni ma setgħux jiġġustifikaw bidu ex officio tal-investigazzjoni, peress li l-prestazzjoni ekonomika ġenerali tal-industrija tal-Unjoni wriet momentum ’il quddiem pjuttost b’saħħtu.

(38)

Il-Kummissjoni fakkret li d-Dokument ta’ Bidu u l-memorandum kien fihom biżżejjed evidenza li għandha t-tendenza li turi l-eżistenza ta’ sussidjar, theddida ta’ dannu u rabta kawżali meħtieġa għall-bidu ta’ investigazzjoni antisussidji, skont l-Artikolu 10(8) tar-Regolament bażiku, u li ċ-ċirkostanzi speċjali għall-bidu ta’ dan il-proċediment ġew spjegati f’dettall kbir kemm fid-dokument ta’ bidu (10), kif ukoll fin-Notifika tal-Bidu (11). Barra minn hekk, kif diġà huwa indirizzat fil-premessa (119) tar-Regolament provviżorju, għall-iskemi differenti kollha allegati fid-Dokument ta’ Bidu, il-Kummissjoni pprovdiet il-bażi legali, l-ispeċifiċità ta’ dawn l-iskemi ta’ sussidju lis-settur tal-BEV, u, sal-punt li l-Kummissjoni kellha aċċess għaliha, informazzjoni dettaljata minn sorsi disponibbli pubblikament dwar l-ammonti ta’ sussidji pprovduti mill-GTĊ lill-produtturi esportaturi tal-BEV. Għalhekk, il-Kummissjoni qieset li kellha biżżejjed evidenza ta’ sussidju kumpensatorji f’konformità mar-Regolament bażiku u mal-Ftehim tad-WTO dwar is-Sussidji u l-Miżuri Kumpensatorji (“il-Ftehim SCM”). Il-Kummissjoni nnotat li l-Grupp BYD ma jikkontestax l-eżistenza ta’ politiki, iżda biss il-punt sa fejn dawn huma vinkolanti għall-industrija tal-BEV. Il-Kummissjoni osservat ulterjorment li l-informazzjoni disponibbli faċilment ipprovdiet evidenza li tindika li s-settur tal-BEV huwa msemmi f’diversi dokumenti tal-gvern. Il-Grupp BYD naqas milli jipproduċi xi evidenza li turi li dawk id-dokumenti ma jkunux applikabbli għall-prodott ikkonċernat. Għalhekk, l-argumenti tqiesu bħala irrilevanti.

(39)

Barra minn hekk, fil-premessa (117) tar-Regolament provviżorju, ġie spjegat li fid-Dokument ta’ Bidu, il-Kummissjoni ġġustifikat biżżejjed il-bidu ex officio. B’mod partikolari, il-Kummissjoni qieset il-penetrazzjoni rapida fis-suq mill-importazzjonijiet Ċiniżi bi prezz baxx u ssussidjati tal-BEVs, li thedded li tagħmel ħsara irreparabbli lill-industrija tal-Unjoni, bħala waħda ta’ natura speċjali li tiġġustifika l-bidu ta’ investigazzjoni ex officio. Is-sussidjar tas-settur tal-BEV Ċiniż ikkawża influss kbir u aċċellerat ta’ importazzjonijiet tal-BEVs prodotti miċ-Ċina fis-suq tal-Unjoni bi prezzijiet li jbaxxu l-prezzijiet jew li jipprevjenu żidiet fil-prezzijiet li kieku kienu jseħħu, u heddew li jikkawżaw dannu materjali lill-industrija tal-BEVs tal-Unjoni, li tista’ tkun irrevokabbli minħabba l-iżvilupp teknoloġiku u l-livell ta’ finanzjament tar-R&Ż meħtieġ. Għalhekk, l-asserzjonijiet ġew miċħuda.

(40)

Wara d-divulgazzjoni provviżorja, il-Grupp SAIC u NIO asserew li peress li n-Notifika tal-Bidu tal-investigazzjoni li għaddejja ġiet ippubblikata fl-4 ta’ Ottubru 2023, skont l-Artikolu 12(1) tar-Regolament bażiku, kien jenħtieġ li l-Kummissjoni timponi dazji provviżorji sal-4 ta’ Lulju 2024 u mhux sal-5 ta’ Lulju 2024, jiġifieri “mhux aktar tard minn 9 xhur mill-bidu tal-proċedimenti”.

(41)

Madankollu, skont l-Artikolu 3.1 tar-Regolament (KEE, Euratom) Nru 1182/71 tal-Kunsill (12) li jiddetermina r-regoli applikabbli għal perjodi, dati u limiti ta’ żmien, “fejn perjodu li hemm referenza għalih bil-ġranet, ġimgħat jew snin għandu jiġi kkalkulat mill-mument li fih tiġri ġrajja jew isseħħ azzjoni, il-ġurnata li tulha tiġri l-ġrajja jew isseħħ l-azzjoni ma għandhiex tingħadd bħala parti mill-perjodu inkwistjoni”. Dan ifisser li d-data tal-bidu għall-komputazzjoni tal-iskadenza ta’ 9 xhur kienet il-jum wara l-pubblikazzjoni tan-Notifika tal-Bidu, jiġifieri l-5 ta’ Ottubru 2023, u skadiet fil-5 ta’ Lulju 2024, f’konformità mal-Artikolu 3(2)(c) tar-Regolament (KEE, Euratom) Nru 1182/71. Il-Kummissjoni qieset li hija kienet ikkonformat mad-dispożizzjonijiet rilevanti tar-Regolament bażiku u l-asserzjoni ġiet miċħuda.

(42)

Wara d-divulgazzjoni provviżorja, il-Grupp Geely asserixxa li l-fluss kontinwu ta’ kwestjonarji u talbiet għal kjarifika addizzjonali tal-Kummissjoni poġġew piż irraġonevoli fuq il-Grupp, bi ksur tad-drittijiet tiegħu ta’ proċess ġust, jiġifieri, intalab jipprovdi ammont kbir ta’ informazzjoni ġimgħa biss wara l-kampjunar, qabel il-perjodu minimu ta’ 30 jum għall-produtturi esportaturi inklużi fil-kampjun biex jirrispondu għall-kwestjonarju, kif meħtieġ skont il-Ftehim SCM u r-Regolament bażiku.

(43)

Il-Kummissjoni kkunsidrat li t-talbiet tagħha għal informazzjoni kienu raġonevoli, u hija involviet ruħha mal-Grupp Geely b’rispett sħiħ tad-drittijiet proċedurali tagħha. Il-Kummissjoni rrikonoxxiet l-isforzi li saru mill-Grupp Geely biex iwieġeb għall-kwestjonarji tal-Kummissjoni u għat-talbiet għal nuqqasijiet, li qisithom bħala proporzjonali għad-daqs u għall-kumplessità tal-Grupp Geely innifsu. Hija nnotat li t-tweġibiet kollha pprovduti mill-Grupp ġew analizzati u vverifikati, fejn possibbli, u b’hekk ġie żgurat li l-informazzjoni pprovduta mill-Grupp Geely kienet tikkorrispondi mal-isforzi tal-Grupp u rriżultat f’sejbiet li kienu l-eqreb tas-sitwazzjoni tal-Grupp matul il-PI. Għalhekk, l-asserzjoni ġiet miċħuda.

(44)

Il-Grupp Geely asserixxa ulterjorment li wara li ġew ippubblikati l-kwestjonarju u d-deċiżjoni dwar il-kampjunar, il-Kummissjoni espandiet l-ambitu tal-entitajiet rispondenti (13). Il-Grupp Geely ġabar u ssottometta informazzjoni għal aktar minn 120 entità, għalkemm ħafna minn dawn is-sottomissjonijiet ma kinux direttament rilevanti għall-investigazzjoni. Dan il-piż mhux raġonevoli kiser id-drittijiet tal-proċess dovut tal-parti.

(45)

Il-Kummissjoni nnotat li l-ambitu tal-entitajiet rispondenti ma ġiex estiż bl-ittra fir-referenza. Il-kumpaniji relatati fil-grupp bl-attivitajiet speċifikati fl-ittra tal-Kummissjoni kienu kritiċi fl-istabbiliment tal-fatti tas-sussidjar tal-grupp fi kwalunkwe investigazzjoni dwar is-sussidji, filwaqt li n-numru ta’ entitajiet li wieġbu kien proporzjonali għad-daqs u għall-kumplessità ta’ kwalunkwe grupp ta’ esportaturi investigat. Għaldaqstant, l-informazzjoni pprovduta minn dawn il-kumpaniji relatati tejbet biss is-sejbiet adegwati tal-Grupp Geely, li kienu l-eqreb għas-sitwazzjoni tal-grupp matul il-perjodu ta’ investigazzjoni, u b’hekk żgurat li d-drittijiet tal-Grupp Geely ġew irrispettati. Għalhekk, l-asserzjoni ġiet miċħuda.

(46)

Il-Grupp Geely asserixxa ulterjorment li l-investigazzjoni poġġiet piż estrem fuq il-Grupp, b’mod partikolari huwa ssottometta aktar minn 280 tweġiba, fejn spiss kellu jissodisfa skadenzi qosra ħafna, ġestixxa 14-il ġimgħa ta’ verifika fuq il-post fuq tliet postijiet, u pproduċa aktar minn 880 wirja ta’ verifika. Minkejja t-talbiet ripetuti (14) skont l-Artikolu 12.11 tal-Ftehim SCM, dawn it-talbiet ġew miċħuda mill-Kummissjoni.

(47)

Il-Kummissjoni osservat li t-talbiet kollha sottomessi mill-Grupp Geely tqiesu kif xieraq matul l-investigazzjoni. Madankollu, l-elementi nieqsa meħtieġa biex jitlestew is-sejbiet tal-Grupp kienu meħtieġa u użati f’konformità mal-Artikolu 28 tar-Regolament bażiku, kif allinjati mal-proċeduri standard tal-investigazzjonijiet antisussidji kif stipulat fl-Artikolu 10(8) tar-Regolament bażiku. Għalhekk, l-asserzjoni ġiet miċħuda.

(48)

Wara d-divulgazzjoni provviżorja, il-Grupp Geely argumenta li minħabba l-anonimità mogħtija lill-produtturi, lill-fornituri u lill-importaturi tal-Unjoni (i), il-Kummissjoni ttrattat id-data li tappartjeni għall-industrija tal-Unjoni bħala kunfidenzjali, u b’hekk affettwat materjalment id-divulgazzjoni tal-informazzjoni essenzjali dwar il-valutazzjoni tad-dannu li kisret l-eżerċizzju tajjeb tad-dritt ta’ difiża tal-Grupp Geely, (ii) kellu ftit viżibbiltà tal-informazzjoni miġbura mill-industrija tal-Unjoni mill-Kummissjoni, u (iii) il-Kummissjoni applikat kunfidenzjalità wiesgħa ħafna għas-sottomissjonijiet kollha mill-partijiet tal-Unjoni.

(49)

Il-Kummissjoni ma ttrattatx l-informazzjoni kollha relatata mal-industrija tal-Unjoni bħala kunfidenzjali iżda biss l-informazzjoni li setgħet tiddivulga l-identità tal-industrija tal-Unjoni. Kif ġie spjegat fil-premessa (16) tar-Regolament provviżorju, minħabba l-għadd baxx ta’ gruppi li jimmanifatturaw il-BEVs fis-suq tal-Unjoni u l-ammont sinifikanti ta’ informazzjoni pubblika u bbażata fuq l-abbonament disponibbli dwar dawn il-gruppi, il-Kummissjoni ma setgħetx tiddivulga ċerta informazzjoni relatata mal-produtturi tal-Unjoni inklużi fil-kampjun peress li tali informazzjoni setgħet tiżvela l-identità tal-produtturi tal-Unjoni inklużi fil-kampjun. Fit-Taqsima 4 tar-Regolament provviżorju, il-Kummissjoni analizzat l-indikaturi kollha tad-dannu mitluba mir-Regolament bażiku. Barra minn hekk, il-Kummissjoni żiedet mal-fajl mhux kunfidenzjali tal-investigazzjoni, it-tweġibiet għall-kwestjonarju mhux kunfidenzjali tal-erba’ produtturi tal-Unjoni inklużi fil-kampjun, l-ittri ta’ qabel il-verifika mhux kunfidenzjali għaż-żjara ta’ verifika fuq il-post kif ukoll ir-rapporti tal-missjoni mhux kunfidenzjali bħal fi kwalunkwe investigazzjoni oħra. Minkejja l-asserzjoni tal-Grupp Geely, il-Kummissjoni ma applikatx trattament ta’ kunfidenzjalità wiesa’ ħafna għas-sottomissjonijiet kollha mill-partijiet tal-Unjoni. Il-verżjonijiet mhux kunfidenzjali xierqa ta’ tali sottomissjonijiet żdiedu mal-fajl mhux kunfidenzjali tal-investigazzjoni u l-Grupp Geely ma semmiex dak li kien nieqes eżattament f’dawn is-sottomissjonijiet. Għalhekk, dawn l-asserzjonijiet ġew miċħuda.

(50)

Wara d-divulgazzjoni provviżorja, is-CCCME, il-GTĊ, il-Grupp Geely u l-Grupp SAIC asserew li, fir-rigward tal-kalkoli tal-marġni tat-twaqqigħ tal-prezz, il-Kummissjoni pprovdiet spjegazzjoni u dettalji fattwali insuffiċjenti lis-CCCME u lill-GTĊ u, għalhekk, ma setgħetx tifhem il-kalkoli u tagħmel kummenti sinifikanti. B’mod partikolari, is-CCCME, il-GTĊ u l-Grupp SAIC argumentaw li l-Kummissjoni ma kienet ipprovdiet l-ebda spjegazzjoni motivata dwar kif id-deskrizzjoni tan-Numri ta’ Kontroll tal-Prodott (“PCNs”, Product Control Numbers) u l-prezzijiet u l-volumi aggregati unitarji fil-livell tal-PCN tal-industrija tal-Unjoni setgħu jirriżultaw fid-divulgazzjoni tal-identitajiet tal-produtturi tal-Unjoni inklużi fil-kampjun minħabba li d-data hija aggregata għall-erba’ produtturi inklużi fil-kampjun. Din l-asserzjoni ġiet imtennija wkoll mis-CCCME u mill-GTĊ wara d-divulgazzjoni finali.

(51)

Għalhekk, is-CCCME, il-GTĊ u l-Grupp SAIC talbu lill-Kummissjoni tiddivulga: (i) il-PCNs tal-produtturi esportaturi Ċiniżi u tal-produtturi tal-Unjoni użati għall-komparabbiltà tal-prezzijiet; (ii) il-kwantità u l-valur tal-PCN tas-seba’ PCNs tal-industrija tal-Unjoni użati għat-tqabbil. Is-CCCME u l-GTĊ talbu lill-Kummissjoni tiddivulga (i) il-marġni tat-twaqqigħ tal-prezz tal-ħames PCNs komparabbli, jiġifieri, minbarra l-PCNs li jixxiebhu, u l-perċentwal tal-bejgħ li jaqbel tal-esportaturi Ċiniżi inklużi fil-kampjun u l-produtturi tal-Unjoni inklużi fil-kampjun li kieku kellhom jiġu esklużi ż-żewġ PCNs li jixxiebhu; (ii) id-differenza fl-elementi tal-PCN u jekk sarux aġġustamenti biex jitqiesu d-differenzi. Saret ukoll talba simili mill-Grupp SAIC. Il-Grupp SAIC talab ukoll lill-Kummissjoni biex tiddivulga: (i) kemm inbiegħu PCNs mill-produtturi tal-Unjoni inklużi fil-kampjun, (ii) il-PCNs mibjugħa mill-produtturi tal-Unjoni inklużi fil-kampjun matul il-perjodu ta’ investigazzjoni b’kollox u (iii) il-kwantità u l-valur tas-seba’ PCNs imqabbla mal-PCNs Ċiniżi bħala perċentwal tal-bejgħ totali tal-Unjoni tal-produtturi tal-Unjoni inklużi fil-kampjun. Barra minn hekk, is-CCCME u l-GTĊ argumentaw li kien magħruf li l-bejgħ tal-produtturi tal-BEV tal-Unjoni kien prinċipalment relatat mas-segmenti ta’ lussu/primjum li fihom il-produtturi Ċiniżi għandhom bejgħ negliġibbli jekk xejn u għalhekk kienet meħtieġa l-kwantistika tal-bejgħ tal-Unjoni komparabbli mal-bejgħ tal-produtturi esportaturi Ċiniżi inklużi fil-kampjun biex wieħed jifhem ir-rappreżentattività tal-kalkolu.

(52)

Il-Kummissjoni ddivulgat il-kalkolu tal-marġni medju ponderat tat-twaqqigħ tal-prezz għat-tliet produtturi esportaturi Ċiniżi inklużi fil-kampjun biss. Madankollu, jidher li dawn il-kumpaniji pprovdew dawn il-fajls lis-CCCME u lill-GTĊ għalkemm din l-informazzjoni ma ġietx iddivulgata lis-CCCME u lill-GTĊ. Barra minn hekk, is-CCCME kienet qed tirrappreżenta wkoll lill-produtturi esportaturi Ċiniżi li ma kinux inklużi fil-kampjun u għalhekk ma rċevietx, mingħand il-Kummissjoni, il-kalkolu tal-marġni medju ponderat tat-twaqqigħ tal-prezz. Barra minn hekk, it-tliet produtturi esportaturi Ċiniżi inklużi fil-kampjun irċevew ukoll, mingħand il-Kummissjoni, il-kalkoli dettaljati tagħhom tal-prezz tal-bejgħ lin-negozjant għal kull tranżazzjoni ta’ bejgħ tagħhom. Għalhekk, kien raġonevoli li jiġi konkluż li l-produtturi esportaturi Ċiniżi inklużi fil-kampjun ipprovdew ukoll lis-CCCME u lill-GTĊ dawn il-fajls u, għalhekk, is-CCCME u l-GTĊ setgħu jikkalkulaw il-volum u l-prezzijiet tal-bejgħ għal kull PCN għat-tliet produtturi esportaturi Ċiniżi inklużi fil-kampjun. Barra minn hekk, peress li l-Kummissjoni ddivulgat ukoll il-volum u l-valur totali tal-bejgħ tal-produtturi esportaturi Ċiniżi inklużi fil-kampjun, is-CCCME u l-GTĊ jistgħu jivverifikaw din id-data kif xieraq. Barra minn hekk, il-Kummissjoni ddivulgat il-perċentwal korrispondenti għall-bejgħ tal-produtturi esportaturi Ċiniżi (jiġifieri l-perċentwal tal-bejgħ tal-produtturi esportaturi Ċiniżi inklużi fil-kampjun li kien imqabbel mal-bejgħ tal-produtturi tal-Unjoni inklużi fil-kampjun). Peress li t-tqabbil kien għoli ħafna b’mod ġenerali u għal kull produttur esportatur Ċiniż inkluż fil-kampjun, u kull PCN inbiegħ f’volumi differenti, is-CCCME u l-GTĊ jistgħu jifhmu perfettament liema PCNs tal-produtturi esportaturi Ċiniżi ntużaw fil-kalkolu tal-marġni tat-twaqqigħ tal-prezz.

(53)

Barra minn hekk, fid-divulgazzjoni individwali mibgħuta lill-produtturi esportaturi Ċiniżi inklużi fil-kampjun, il-Kummissjoni spjegat li l-PCNs, il-kwantità u l-prezzijiet tal-industrija tal-Unjoni fil-livell tal-PCN ma setgħux jiġu ddivulgati peress li jistgħu jiżvelaw l-identità tal-produtturi tal-Unjoni inklużi fil-kampjun. Barra minn hekk, fil-premessa (95) tar-Regolament provviżorju, il-Kummissjoni spjegat li s-suq tal-BEV tal-Unjoni kien magħmul minn għadd żgħir ta’ gruppi ta’ produtturi. Hemm ammont sinifikanti ta’ informazzjoni pubblika kif ukoll informazzjoni dettaljata ħafna disponibbli abbażi ta’ abbonament imħallas fir-rigward tal-industrija tal-BEV tal-Unjoni li s-CCCME, il-Grupp Geely u l-Grupp SAIC seta’ kellhom aċċess għaliha. Pereżempju, id-deskrizzjonijiet tekniċi ta’ kull BEV mibjugħa mill-industrija tal-Unjoni kienu disponibbli pubblikament jew fil-katalgu/fuljett tal-produtturi jew tan-negozjanti tal-Unjoni kif ukoll f’ċerti bażijiet tad-data bħall-Bażi tad-Data dwar il-Vetturi Elettriċi (15). Għalhekk, kwalunkwe parti interessata tista’ toħloq il-PCNs għall-mudelli kollha ta’ BEVs mibjugħa mill-industrija tal-Unjoni u mill-produtturi esportaturi Ċiniżi fis-suq tal-Unjoni. Barra minn hekk, abbażi tal-informazzjoni pubblika ppubblikata mill-Aġenzija Ewropea għall-Ambjent (“EEA”, European Environment Agency) jew l-abbonament imħallas minn S&P Global Mobility, is-CCCME, il-GTĊ, il-Grupp SAIC u l-Grupp Geely jistgħu jifhmu l-volum ta’ bejgħ ta’ kull mudell ta’ BEVs fis-suq tal-Unjoni. Minn dan isegwi li billi jiġu divulgati l-PCNs tal-industrija tal-Unjoni u/jew il-volum ta’ bejgħ tal-industrija tal-Unjoni fil-perjodu ta’ investigazzjoni kif ukoll il-kwantità u l-valur tal-PCN tas-seba’ PCNs tal-industrija tal-Unjoni użati għat-tqabbil, fid-dawl tal-informazzjoni kbira disponibbli pubblikament u l-abbonament imħallas, hemm riskju kbir ħafna li l-identità tal-produtturi tal-Unjoni inklużi fil-kampjun tiġi żvelata.

(54)

Fir-rigward tad-divulgazzjoni tal-marġni tat-twaqqigħ tal-prezz tal-ħames PCNs komparabbli, il-Kummissjoni nnotat li hija ddivulgat il-marġni tat-twaqqigħ tal-prezz għal kull PCN li kien jaqbel mal-PCNs Ċiniżi (7 PCNs minn 17-il PCN esportati mill-produtturi esportaturi Ċiniżi matul il-perjodu ta’ investigazzjoni). Madankollu, il-Kummissjoni ma qisitx il-punt tad-divulgazzjoni ta’ tali kalkoli, peress li l-produtturi esportaturi Ċiniżi b’mod ċar ma esportawx biss dawn il-ħames PCNs fis-suq tal-Unjoni fil-perjodu ta’ investigazzjoni.

(55)

Fir-rigward tad-differenza fl-elementi tal-PCN u jekk sarux aġġustamenti biex jitqiesu dawn id-differenzi, il-Kummissjoni b’dan iċċarat li d-differenza fil-PCN u l-PCN li tixxiebah ħafna magħha kienet tikkonċerna biss il-qawwa tal-BEVs, jiġifieri BEV Ċiniża aktar b’saħħitha tqabblet ma’ BEV tal-Unjoni inqas b’saħħitha. Il-Kummissjoni ma għamlet l-ebda aġġustament għad-differenza fl-enerġija, peress li BEV aktar b’saħħitha kienet aktar għalja minn BEV inqas b’saħħitha u l-karatteristiċi l-oħra kollha tal-PCNs kienu l-istess.

(56)

Barra minn hekk, in-numru ta’ PCNs mibjugħa mill-industrija tal-Unjoni huwa irrilevanti għall-kalkolu tat-twaqqigħ tal-prezz. Barra minn dan, kif ġie spjegat fil-premessa (53) ta’ dan ir-Regolament, il-Kummissjoni ma tistax tiddivulga l-PCNs mibjugħa mill-produtturi tal-Unjoni inklużi fil-kampjun matul il-perjodu ta’ investigazzjoni.

(57)

Fir-rigward tal-kwantità u l-valur tas-seba’ PCNs imqabbla mal-PCNs Ċiniżi bħala perċentwal tal-bejgħ totali tal-Unjoni tal-produtturi tal-Unjoni inklużi fil-kampjun, fil-premessa (1044) tar-Regolament provviżorju, il-Kummissjoni ddikjarat li t-tqabbil bejn il-PCNs Ċiniżi u l-PCN tal-Unjoni kien għoli ħafna bħala medja, u dan it-tqabbil jikkorrispondi għal 88 % tal-bejgħ totali tal-produtturi tal-Unjoni inklużi fil-kampjun. Il-Kummissjoni nnotat li kien hemm żball tipografiku fil-premessa (1044) tar-Regolament provviżorju, it-tqabbil kien jikkorrispondi għal 83 % u mhux għal 88 % tal-produtturi tal-Unjoni inklużi fil-kampjun. Li kieku kellhom jiġu esklużi l-PCNs li jixxiebhu, it-tqabbil ikun ta’ 61 %. Dan il-kalkolu sar għall-volum ta’ bejgħ. Kalkolu bbażat fuq il-valur tal-bejgħ huwa irrilevanti f’dan ir-rigward peress li l-prezzijiet tal-PCNs huma differenti u għalhekk ir-riżultat ikun qarrieqi.

(58)

Barra minn hekk, kif ġie enfasizzat fil-premessa (1042) tar-Regolament provviżorju ma kien hemm l-ebda segmentazzjoni aċċettata b’mod universali għall-karozzi tal-passiġġieri u ma kienx ċar x’kienu jfissru marki ta’ “dħul”, “nofs”, “primjum” u “lussu” peress li kien hemm marġni wiesa’ ta’ interpretazzjoni. Madankollu, għall-finijiet ta’ kjarifika, ma huwiex fattwalment korrett li l-bejgħ tal-produtturi tal-BEV tal-Unjoni kien jappartjeni prinċipalment għas-segmenti ta’ lussu/primjum li fihom il-produtturi Ċiniżi għandhom bejgħ negliġibbli. Pereżempju, skont LMC Automotive jew S&P Global Mobility, produtturi tal-Unjoni bħal e.Go Mobile, Hyundai, Renault, Stellantis, u Volkswagen ibigħu marki li ma jitqisux bħala marki ta’ lussu/primjum. Barra minn hekk, Geely biegħ fl-Unjoni l-marka Polestar 2 li hija meqjusa bħala marka primjum minn LMC Automotive jew S&P Global Mobility.

(59)

Finalment, il-Kummissjoni mmitigat l-impatt tad-divulgazzjoni mhux sħiħa billi pprovdiet valutazzjoni dettaljata ħafna tal-metodoloġija użata u analiżi tad-diversi atturi, kanali tal-bejgħ u mudelli tal-bejgħ użati fil-perjodu ta’ investigazzjoni. Kif ġie spjegat hawn fuq, ma setgħux jiġu ddivulgati dettalji ulterjuri minħabba r-riskju li jiġu żvelati l-identitajiet tal-produtturi tal-Unjoni. Dan l-approċċ huwa ġġustifikat minħabba li s-suq tal-BEV tal-Unjoni huwa miftuħ u trasparenti u l-atturi kollha fis-suq żviluppaw sew kapaċitajiet ta’ kummerċjalizzazzjoni biex jeżaminaw il-mudelli tal-kompetituri tagħhom. Huwa minħabba dawn ir-raġunijiet li ma jistgħux jiġu ddivulgati dettalji ulterjuri tal-kalkolu tat-twaqqigħ tal-prezz bħall-PCNs.

(60)

Għalhekk, dawn it-talbiet ġew miċħuda.

(61)

Wara d-divulgazzjoni provviżorja, il-Grupp SAIC iddikjara li ma ngħatax kalkolu individwali tal-marġni tat-twaqqigħ tal-prezz.

(62)

Ma hemm l-ebda obbligu legali għall-Kummissjoni li tikkalkula marġni tat-twaqqigħ tal-prezz għal kull produttur esportatur inkluż fil-kampjun. Il-marġni tat-twaqqigħ tal-prezz huwa indikatur tad-dannu u għalhekk il-kalkolu ta’ marġni medju ponderat tat-twaqqigħ tal-prezz huwa biżżejjed għall-valutazzjoni tad-dannu. Dan huwa differenti mill-marġni tad-dannu (marġni tal-bejgħ bil-prezz imwaqqa’) li jrid jiġi kkalkolat għal kull produttur esportatur meta d-dazju jkun ibbażat fuq il-marġni tal-bejgħ bil-prezz imwaqqa’. Għalhekk, din l-asserzjoni ġiet miċħuda.

(63)

Wara d-divulgazzjoni provviżorja, il-Grupp Geely asserixxa li fil-kalkoli tat-twaqqigħ tal-prezz, il-Kummissjoni użat PCNs distinti minn dawk li l-Grupp Geely ingħata struzzjonijiet biex juża mill-Kummissjoni u ma ngħatat l-ebda spjegazzjoni tal-ambitu tal-PCNs il-ġodda mill-Kummissjoni.

(64)

Madankollu, il-Kummissjoni ma użatx PCNs differenti għall-kalkolu tal-marġni tat-twaqqigħ tal-prezz minn dawk li talbet biex jintużaw mill-produtturi esportaturi inklużi fil-kampjun u mill-produtturi tal-Unjoni inklużi fil-kampjun. Il-Kummissjoni sempliċiment issostitwiet kull PCN b’PCN1, b’PCN2 eċċ. sabiex ma tiddivulgax il-PCNs eżatti użati fil-kalkolu tat-twaqqigħ tal-prezz peress li setgħet tiżvela l-identità tal-produtturi tal-Unjoni inklużi fil-kampjun kif ġie spjegat fil-premessa (53) ta’ dan ir-Regolament. Għalhekk, din l-asserzjoni ġiet miċħuda.

(65)

Wara d-divulgazzjoni finali, il-GTĊ u s-CCCME argumentaw li d-divulgazzjoni finali naqset milli tipprovdi l-fatti essenzjali li fuqhom huma bbażati s-sejbiet tal-Kummissjoni dwar is-sussidjar u t-theddida ta’ dannu kkawżat b’dan, speċjalment fir-rigward (i) l-allegat self preferenzjali, (ii) l-allegat forniment ta’ inputs u (iii) id-drittijiet tal-użu tal-art b’remunerazzjoni anqas minn adegwata, (iv) il-bażi fattwali għad-dikjarazzjoni tal-Kummissjoni fil-premessa (771) ta’ dan ir-Regolament li l-kwantitajiet tal-bejgħ tal-produtturi tal-Unjoni kienu jkunu ferm differenti u kbar fin-nuqqas ta’ importazzjonijiet Ċiniżi tal-BEVs, (v) kif il-Kummissjoni ffiltrat id-data tal-EEA u qasmitha f’importazzjonijiet u f’awtoimportazzjonijiet ta’ BEVs minn marki Ċiniżi u vvalutat l-oriġini tal-BEVs; il-bażi għas-segregazzjoni tad-data tal-EEA skont jekk tikkonċernax il-prodott jew le; il-bażi għall-qsim tal-produzzjoni tal-Mudell Y tal-UE u mhux tal-UE ta’ Tesla, (vi) il-bażi fattwali għad-determinazzjoni tal-Kummissjoni li “is-sitwazzjoni tal-industrija tal-Unjoni se taqleb għall-agħar peress li l-importazzjonijiet sussidjati miċ-Ċina bi twaqqigħ tal-prezz se jiżdiedu fil-futur prevedibbli”, (vii) il-bażi fattwali li fuqha bbażat il-Kummissjoni fl-analiżi ta’ nonattribuzzjoni tagħha meta ma kkunsidratx (a) l-awtoimportazzjonijiet mill-industrija tal-Unjoni, (b) il-kompetizzjoni tal-industrija intra-Unjoni, u (c) it-tranżizzjoni tal-industrija tal-Unjoni minn ICEs għal BEVs kif ukoll fatturi oħrajn magħrufa li għandhom impatt negattiv fuq il-qagħda tal-industrija tal-Unjoni, u (viii) il-bażi fattwali għall-konklużjoni tal-Kummissjoni li kwalunkwe żieda fil-kost minħabba kwistjonijiet regolatorji kienet taffettwa l-industrija tal-Unjoni biss fil-passat.

(66)

Fid-divulgazzjoni finali, il-Kummissjoni infurmat lill-partijiet interessati kollha bis-sejbiet tagħha f’Dokument ta’ Divulgazzjoni Ġenerali u pprovdiet informazzjoni dettaljata dwar il-metodoloġija u l-kalkoli li saru fir-rigward tar-rati ta’ sussidju tal-kumpaniji inklużi fil-kampjun u eżaminati fuq bażi individwali, inklużi dettalji dwar l-għażla tal-kampjun, is-self preferenzjali, il-forniment ta’ inputs u drittijiet tal-użu tal-art għal remunerazzjoni anqas minn adegwata. Ħarsa ġenerali dettaljata lejn il-kummenti li waslu dwar dawn l-iskemi ta’ sussidju hija stabbilita fit-Taqsimiet 3.5 u 3.7 ta’ hawn taħt.

(67)

Fir-rigward tal-punt (iv), fil-premessa (771) ta’ dan ir-Regolament, il-Kummissjoni ddikjarat li ma qablitx li t-trażżin tal-prezzijiet kien iseħħ fin-nuqqas ta’ importazzjonijiet Ċiniżi u li, b’mod ċar, is-suq tal-Unjoni kien ikun differenti ħafna kieku ma kinux preżenti kwantitajiet kbar ta’ importazzjonijiet Ċiniżi ssussidjati fis-suq tal-Unjoni bi prezzijiet li jwaqqgħu l-prezzijiet tal-Unjoni. Fil-fatt, fin-nuqqas ta’ kompetizzjoni Ċiniża inġusta, l-industrija tal-Unjoni kienet tbigħ ħafna aktar BEVs fis-suq tal-Unjoni (ta’ min jinnota li l-importazzjonijiet sussidjati kisbu sehem mis-suq b’mod inġust matul il-perjodu kkunsidrat askapitu tal-bejgħ mill-industrija tal-Unjoni, l-industrija Ċiniża biegħet BEVs simili għal dawk tal-industrija tal-Unjoni peress li t-tqabbil bejn il-PCNs Ċiniżi u l-PCNs tal-Unjoni fil-perjodu ta’ investigazzjoni kien ogħla minn 90 % għal kull wieħed mill-produtturi esportaturi, kif ġie spjegat fil-premessa (1031) tar-Regolament provviżorju), li kien jippermetti lill-industrija tal-Unjoni tnaqqas il-kostijiet unitarji billi tieħu vantaġġ minn kapaċità ħafna aħjar li tifrex il-kostijiet fissi tagħha fuq aktar bejgħ. Dan kien jippermetti lill-produtturi tal-Unjoni jistabbilixxu prezzijiet f’livelli aktar profittabbli fil-kuntest tat-tranżizzjoni tas-suq minn vetturi ICE għal BEVs.

(68)

Fir-rigward tal-punt (v), dawn ġew indirizzati fil-premessi minn (716) sa (717) ta’ dan ir-Regolament.

(69)

Fir-rigward tal-punt (vi), kif huwa spjegat fil-premessa (1023) ta’ dan ir-Regolament, il-Kummissjoni kkonkludiet li l-importazzjonijiet miċ-Ċina se jiżdiedu wara l-valutazzjoni ta’ diversi miżuri li jindikaw il-probabbiltà ta’ żieda sostanzjali ulterjuri fl-importazzjonijiet fil-premessi minn (1113) sa (1118) tar-Regolament provviżorju, l-attraenza tal-industrija tal-Unjoni fil-premessi minn (1119) sa (1129) tar-Regolament provviżorju, u l-evoluzzjoni probabbli tal-ishma mis-suq tal-importazzjonijiet Ċiniżi fis-suq tal-Unjoni fil-premessi minn (1130) sa (1137) tar-Regolament provviżorju. Barra minn hekk, fil-premessa (1138) tar-Regolament provviżorju, il-Kummissjoni kkonkludiet li aktarx li jkun hemm żieda fl-ishma mis-suq prinċipalment minn marki Ċiniżi fil-futur prevedibbli billi vvalutat l-għadd kbir ta’ tħabbiriet magħmula mill-produtturi esportaturi Ċiniżi għat-tnedija ta’ mudelli ġodda tal-BEVs fis-suq tal-Unjoni kif ġie spjegat fil-premessi minn (1126) u (1127) tar-Regolament provviżorju, filwaqt li l-OEMs tal-ICE tal-Unjoni li qegħdin jagħmlu tranżizzjoni għall-produzzjoni tal-BEVs ma ħabbru l-ebda pjan maġġuri biex jimportaw BEVs miċ-Ċina u l-biċċa l-kbira tagħhom kellhom mudell wieħed jew marka waħda ta’ BEVs importata miċ-Ċina f’volumi iżgħar b’mod sinifikanti b’paragun mal-produzzjoni tagħhom fl-Unjoni. Barra minn hekk, l-istokkijiet tal-BEVs fl-Unjoni tal-BEVs Ċiniżi kif stabbilit fil-premessi minn (1157) sa (1159) tar-Regolament provviżorju huma indikatur rilevanti għall-pressjoni futura eżerċitata mill-BEVs Ċiniżi fuq l-industrija tal-Unjoni peress li dawn il-kwantitajiet huma maħsuba b’mod ċar prinċipalment għall-bejgħ fis-suq tal-Unjoni.

(70)

Barra minn hekk, żieda fis-sehem mis-suq tal-importazzjonijiet Ċiniżi rriżultat fi tnaqqis fis-sehem mis-suq tal-industrija tal-Unjoni, li jissarraf f’volum ta’ produzzjoni aktar baxx għall-industrija tal-Unjoni, u għalhekk f’kostijiet unitarji ogħla. Min-naħa l-oħra, sabiex tkun tista’ tikkompeti mal-BEVs Ċiniżi, l-industrija tal-Unjoni jkollha tnaqqas il-prezzijiet u għalhekk it-telf finanzjarju tagħha jiżdied. Barra minn hekk, industrija li titlef kontinwament is-sehem mis-suq u tirreġistra telf finanzjarju dejjem jiżdied la se tkun tista’ tkompli tinvesti u lanqas tniedi mudelli ġodda ta’ BEVs fis-suq tal-Unjoni. Għalhekk, is-sitwazzjoni tal-industrija tal-Unjoni se tmur għall-agħar hekk kif l-importazzjonijiet sussidjati miċ-Ċina bi prezzijiet mwaqqa’ se jiżdiedu fil-futur prevedibbli.

(71)

Fir-rigward tal-punt (vii), l-awtoimportazzjonijiet tal-industrija tal-Unjoni bħala fattur li jikkawża theddida ta’ dannu lill-industrija tal-Unjoni ġie vvalutat fil-premessa (1213) tar-Regolament provviżorju u fil-premessa (1218) ta’ dan ir-Regolament. B’mod partikolari, fil-premessa (1218) ta’ dan ir-Regolament, il-Kummissjoni ddikjarat li hija wettqet analiżi tal-hekk imsejħa awtoimportazzjonijiet fil-premessi minn (1212) sa (1214) tar-Regolament provviżorju u pprovdiet diżaggregazzjoni tas-sehem mis-suq tal-importazzjonijiet ta’ (i) produtturi esportaturi Ċiniżi relatati mal-OEMs tal-ICE tal-Unjoni li qegħdin jagħmlu tranżizzjoni għall-produzzjoni ta’ BEVs, (ii) Tesla u (iii) l-importazzjonijiet Ċiniżi l-oħrajn kollha fit-Tabelli 12a u 12b tar-Regolament provviżorju skont il-premessi (1132) u (1134) rispettivament. Il-Kummissjoni spjegat ukoll li din l-analiżi jenħtieġ li titqies flimkien mad-data fit-Tabella 13 ta’ dan ir-Regolament. Barra minn hekk, il-Kummissjoni ddikjarat li l-istandard legali dwar il-kawżalità jenħtieġ li l-importazzjonijiet kollha li joriġinaw mill-pajjiż ikkonċernat jiġu vvalutati b’mod kollettiv. Dan huwa fil-fatt dak li għamlet il-Kummissjoni fit-Taqsima 6.1 tar-Regolament provviżorju. Barra minn hekk, il-Kummissjoni, għamlet diżaggregazzjoni tal-importazzjonijiet Ċiniżi, billi użat fost l-oħrajn, it-Tabelli 12a u 12b tar-Regolament provviżorju u t-Tabella 13 ta’ dan ir-Regolament, sabiex tiddetermina l-iżviluppi fil-profil tal-importazzjonijiet Ċiniżi. Il-Kummissjoni kkonkludiet li l-importazzjonijiet tal-marki Ċiniżi kienu qegħdin jiżdiedu fl-importanza u li l-bejgħ fis-suq tal-Unjoni kien mistenni li jiżdied, minħabba d-disponibbiltà tal-istokkijiet u t-tħabbiriet li saru dwar iż-żieda fl-importazzjonijiet fis-suq tal-Unjoni wara l-PI u lil hinn fis-snin li ġejjin. Din il-konklużjoni ġiet ikkonfermata wkoll mid-data ta’ wara l-PI li wriet li l-importazzjonijiet tal-marki Ċiniżi żdiedu b’mod sinifikanti għal 14,1 % fit-tieni trimestru tal-2024, filwaqt li l-importazzjonijiet l-oħrajn kollha miċ-Ċina naqsu kif muri fit-Tabella 10 ta’ dan ir-Regolament. Għalhekk, il-Kummissjoni wettqet b’mod xieraq analiżi tal-hekk imsejħa awtoimportazzjonijiet u kkonkludiet li dawk l-importazzjonijiet x’aktarx ma kienux se jikkontribwixxu għat-theddida ta’ dannu materjali.

(72)

Barra minn hekk, il-kompetizzjoni tal-industrija intra-Unjoni bħala fattur li jikkawża theddida ta’ dannu għall-industrija tal-Unjoni ġiet indirizzata fil-premessi minn (1225) u (1227) ta’ dan ir-Regolament. B’mod partikolari, il-Kummissjoni spjegat li filwaqt li s-CCCME u l-GTĊ ma ppreżentaw l-ebda evidenza dwar kif il-kompetizzjoni tal-industrija intra-Unjoni kien qed ikollha jew seta’ jkollha effett negattiv fuq il-produtturi tal-Unjoni, fi kwalunkwe każ, l-għan tal-investigazzjoni kien li tivvaluta jekk l-importazzjonijiet ta’ BEVs miċ-Ċina kinux issussidjati, kinux qegħdin jheddu lill-industrija tal-Unjoni u jekk kienx fl-interess tal-Unjoni li timponi miżuri kumpensatorji jekk jiġu ssodisfati l-kundizzjonijiet legali. Il-Kummissjoni spjegat ukoll li l-investigazzjoni sabet li fil-każ tal-industrija tal-Unjoni, is-sitwazzjoni tagħha li kienet qiegħda sejra għall-agħar kienet ir-riżultat tal-kompetizzjoni inġusta minn barra mill-importazzjonijiet Ċiniżi ssussidjati li jhedduha b’dannu materjali. Din l-investigazzjoni ma vvalutatx il-kompetizzjoni bejn il-produtturi tal-Unjoni fis-suq tal-Unjoni peress li s-sejbiet jikkonċernaw l-industrija tal-Unjoni kollha kemm hi. Barra minn hekk, il-Kummissjoni nnotat li s-CCCME u l-GTĊ ma ppreżentaw l-ebda evidenza li l-kompetizzjoni tal-industrija intra-Unjoni kienet qiegħda tikkontribwixxi għal xi dannu lill-industrija tal-Unjoni, jew fi kwalunkwe każ, naqqset ir-rabta bejn l-importazzjonijiet sussidjati miċ-Ċina u t-theddida ta’ dannu.

(73)

Barra minn hekk, it-tranżizzjoni tal-industrija tal-Unjoni minn ICEs għal BEVs ġiet spjegata fil-premessi minn (1232) sa (1234) ta’ dan ir-Regolament. B’mod partikolari, il-Kummissjoni ddikjarat li t-tranżizzjoni minn vetturi ICE għal BEVs kienet tifforma kuntest ta’ sfond ewlieni għall-analiżi sħiħa tat-theddida ta’ dannu, tal-kawżalità u tal-interess tal-Unjoni. Din it-tranżizzjoni għadha għaddejja u hija ppjanata li tkompli sal-2035. It-tranżizzjoni kienet parti ewlenija mill-Patt Ekoloġiku tal-Kummissjoni sabiex jintlaħqu l-miri tal-emissjonijiet tas-CO2. Il-produtturi tal-Unjoni żviluppaw strateġiji dettaljati, li jinvolvu l-implimentazzjoni ta’ pjanijiet ta’ investiment enormi, sabiex jikkonformaw mal-leġiżlazzjoni rilevanti għall-ilħuq ta’ dawn il-miri. Għalhekk, it-tranżizzjoni hija essenzjali għall-futur tal-industrija tal-Unjoni. Barra minn hekk, it-tranżizzjoni tas-suq tal-Unjoni minn vetturi ICE għal BEVs hija parti mill-qafas regolatorju tal-industrija tal-karozzi fl-Unjoni. Il-produtturi tal-vetturi tal-Unjoni jeħtiġilhom jikkonformaw ma’ dan il-qafas regolatorju kif ukoll ma’ leġiżlazzjonijiet oħrajn. Dan il-qafas regolatorju ma jistax jitqies li jikkawża theddida ta’ dannu skont it-tifsira tal-Artikolu 8(8) tar-Regolament bażiku. Għall-kuntrarju, dan jikkostitwixxi l-qafas li fih titwettaq il-valutazzjoni tat-theddida ta’ dannu skont it-tifsira tal-Artikolu 8(8) tar-Regolament bażiku. Fil-fatt, il-Kummissjoni sabet li t-theddida imminenti għall-industrija tal-Unjoni ma kinitx it-tranżizzjoni nnifisha, iżda l-importazzjonijiet Ċiniżi ssussidjati li jheddu t-twettiq tal-proċess ta’ tranżizzjoni.

(74)

Fir-rigward tal-punt (viii), fil-premessa (1229) ta’ dan ir-Regolament, il-Kummissjoni ddikjarat li hija qieset li kwalunkwe żieda fil-kost minħabba kwistjonijiet regolatorji kienet taffettwa lill-industrija tal-Unjoni. Ma ġiet ipprovduta l-ebda evidenza li din il-kwistjoni tkun theddida ta’ dannu għall-industrija tal-Unjoni fis-snin ta’ wara l-perjodu ta’ investigazzjoni. Barra minn hekk, filwaqt li xi produtturi tal-Unjoni bdew jinvestu fil-produzzjoni tal-BEVs qabel il-perjodu kkunsidrat kif ġie spjegat fil-premessa (996) tar-Regolament provviżorju, l-akbar investimenti fil-produzzjoni tal-BEVs bdew jimmaterjalizzaw wara l-pubblikazzjoni tar-Regolament (UE) 2019/631 tal-Parlament Ewropew u tal-Kunsill (16), li aktar tard ġie emendat bir-Regolament (UE) 2023/851 tal-Parlament Ewropew u tal-Kunsill (17). Kif muri fit-Tabella 1 tar-Regolament provviżorju, fil-bidu tal-perjodu kkunsidrat (jiġifieri l-2020) 5,4 % biss tas-suq tal-vetturi tal-passiġġieri tal-Unjoni għamel it-tranżizzjoni għall-BEVs. Ir-Regolament (UE) 2019/631 talab lill-manifatturi tal-karozzi tal-passiġġieri tal-Unjoni jżidu l-produzzjoni tal-BEVs u jnaqqsu l-produzzjoni ta’ vetturi ICE li se jinbiegħu fis-suq tal-Unjoni. Kif ġie ddikjarat fil-premessa (1229) ta’ dan ir-Regolament, filwaqt li t-tranżizzjoni għall-elettrifikazzjoni hija meħtieġa bil-liġi, din fiha nnifisha ma toħloqx theddida għall-industrija tal-Unjoni skont it-tifsira tal-Artikolu 8(8) tar-Regolament bażiku, peress li bħal kwalunkwe industrija, il-produtturi tal-BEVs iridu jadattaw għall-qafas regolatorju eżistenti. Fil-fatt, il-qafas regolatorju jikkostitwixxi l-qafas li fih titwettaq il-valutazzjoni tat-theddida ta’ dannu skont it-tifsira tal-Artikolu 8(8) tar-Regolament bażiku. Barra minn hekk, filwaqt li l-konformità ma’ diversi regolamenti tkompli wara l-PI, is-CCCME u l-GTĊ ma identifikaw l-ebda regolament importanti ġdid li jhedded li jikkawża dannu lill-industrija tal-Unjoni skont it-tifsira tal-Artikolu 8(8) tar-Regolament bażiku. Minflok, il-Kummissjoni stabbiliet li huma l-importazzjonijiet sussidjati li jheddu l-vijabbiltà tal-industrija tal-BEVs tal-Unjoni. Mingħajr kundizzjonijiet tas-suq ġusti, il-produtturi tal-Unjoni mhux se jkunu jistgħu jilħqu l-ekonomiji ta’ skala meħtieġa.

(75)

Wara d-divulgazzjoni finali, is-CCCME asseriet li l-Kummissjoni ma indirizzatx il-bażijiet fattwali li l-Kummissjoni bbażat fuqhom għaċ-ċaħda u/jew għan-nuqqas ta’ kunsiderazzjoni u għan-nuqqas ta’ indirizzar taż-żewġ analiżijiet ekonomiċi mħejjija mill-professuri tal-Katholieke Universiteit Leuven u taċ-Ċentru tar-Riċerka dwar il-Politika Ekonomika ppreżentati mis-CCCME fl-20 ta’ Diċembru 2023 u fid-19 ta’ Lulju 2024.

(76)

Fil-premessa (1252) tar-Regolament provviżorju, il-Kummissjoni spjegat li r-rapport ippreżentat fl-20 ta’ Diċembru 2023 ikkonkluda li l-importazzjonijiet Ċiniżi tal-BEVs kienu indispensabbli għas-suq tal-Unjoni tal-BEVs, għall-produtturi u għall-konsumaturi tal-Unjoni tal-BEVs, u għall-Unjoni kollha kemm hi minħabba li dawn l-importazzjonijiet huma meħtieġa biex tinżamm il-kompetizzjoni u l-innovazzjoni fl-Unjoni u biex titħaffef id-disponibbiltà ta’ BEVs affordabbli għall-konsumaturi medji u biex jiġi żgurat li jintlaħqu l-għanijiet klimatiċi tal-Unjoni. Barra minn hekk, fil-premessa (1253) tar-Regolament provviżorju, il-Kummissjoni ddikjarat li irrispettivament mill-valur awtorevoli u oġġettiv tar-rapport ippreżentat fl-20 ta’ Diċembru 2023, il-Kummissjoni nnotat li l-iskop tad-dazji kumpensatorji ma kienx li jwaqqfu l-importazzjonijiet tal-BEVs miċ-Ċina, iżda li jirrestawraw il-kundizzjonijiet ekwi fis-suq tal-Unjoni distorti mill-importazzjonijiet sussidjati miċ-Ċina bi prezzijiet baxxi. Għalhekk, il-Kummissjoni indirizzat l-għan ewlieni tar-rapport. Barra minn hekk, ir-rapport sħiħ ġie ppreżentat f’verżjoni sensittiva u sommarju tiegħu biss ġie ppreżentat f’verżjoni mhux kunfidenzjali. Fl-aħħar nett, ir-rapport jippreżenta l-opinjoni taż-żewġ professuri u jirreferi għal diversi artikli akkademiċi u kotba mħejjija fil-perjodu 1951 – 2020. L-ebda wieħed minn dawn l-artikli jew kotba ma jirreferi speċifikament għall-industrija tal-BEVs fl-Unjoni u fiċ-Ċina matul il-perjodu kkunsidrat.

(77)

Il-Kummissjoni qieset li kienet eżaminat u indirizzat b’mod suffiċjenti l-argumenti inklużi f’dawk ir-rapporti, anke jekk f’ħafna każijiet dawk l-argumenti ma kinux sostanzjati b’xi evidenza jew ma kienu jirreferu għall-ebda sors rilevanti. Minħabba raġunijiet ta’ ċarezza, f’livell aktar granulari, ir-rapport jiddikjara li t-tkabbir fl-importazzjonijiet tal-BEVs Ċiniżi fl-Unjoni ma huwiex minħabba allegati sussidji peress li (a) il-biċċa l-kbira tal-importazzjonijiet ta’ BEVs fl-UE huma “awtoimportazzjonijiet” minn marki attivi fl-industrija tal-UE, (b) iċ-Ċina għandha esperjenza twila fil-batteriji għall-elettronika għall-konsumatur, (c) l-importazzjonijiet miċ-Ċina jirriflettu l-istat fiċ-ċiklu tat-teknoloġija, (d) il-prominenza tal-produzzjoni tal-batteriji għas-suċċess fl-industrija tal-BEVs hija temporanja.

(78)

Fit-Taqsima 3 tar-Regolament provviżorju u fit-Taqsima 3 ta’ dan ir-Regolament, il-Kummissjoni wriet li l-BEVs miċ-Ċina huma ssussidjati. Fir-rigward tal-punt (a), fil-premessa (998) tar-Regolament provviżorju, il-Kummissjoni spjegat li wħud mill-produtturi tal-Unjoni kienu qegħdin jimportaw BEVs miċ-Ċina. Barra minn hekk, l-awtoimportazzjonijiet bħala fattur li jikkawża theddida ta’ dannu għall-industrija tal-Unjoni ġie vvalutat fil-premessa (1213) tar-Regolament provviżorju u fil-premessa (1183) ta’ dan ir-Regolament. B’mod partikolari, fil-premessa (1183) ta’ dan ir-Regolament, il-Kummissjoni ddikjarat li hija wettqet analiżi tal-hekk imsejħa awtoimportazzjonijiet fil-premessi minn (1212) sa (1214) tar-Regolament provviżorju u pprovdiet diżaggregazzjoni tas-sehem mis-suq tal-importazzjonijiet ta’ (i) produtturi esportaturi Ċiniżi relatati mal-OEMs tal-ICE tal-Unjoni li qegħdin jagħmlu tranżizzjoni għall-produzzjoni ta’ BEVs, (ii) Tesla u (iii) l-importazzjonijiet Ċiniżi l-oħrajn kollha fit-Tabelli 12a u 12b tar-Regolament provviżorju skont il-premessi (1132) u (1134) rispettivament. Il-Kummissjoni spjegat ukoll li din l-analiżi jenħtieġ li titqies flimkien mad-data fit-Tabella 13 ta’ dan ir-Regolament. Barra minn hekk, il-Kummissjoni ddikjarat li l-istandard legali dwar il-kawżalità jenħtieġ li l-importazzjonijiet kollha li joriġinaw mill-pajjiż ikkonċernat jiġu vvalutati b’mod kollettiv. Dan huwa fil-fatt dak li għamlet il-Kummissjoni fit-Taqsima 6.1 tar-Regolament provviżorju. Barra minn hekk, il-Kummissjoni, għamlet diżaggregazzjoni tal-importazzjonijiet Ċiniżi, billi użat fost l-oħrajn, it-Tabelli 12a u 12b tar-Regolament provviżorju u t-Tabella 13 ta’ dan ir-Regolament, sabiex tiddetermina l-iżviluppi fil-profil tal-importazzjonijiet Ċiniżi. Il-Kummissjoni kkonkludiet li l-importazzjonijiet tal-marki Ċiniżi kienu qegħdin jiżdiedu fl-importanza u li l-bejgħ fis-suq tal-Unjoni kien mistenni li jiżdied, minħabba d-disponibbiltà tal-istokkijiet u t-tħabbiriet li saru dwar iż-żieda fl-importazzjonijiet fis-suq tal-Unjoni wara l-PI u lil hinn fis-snin li ġejjin. Din il-konklużjoni ġiet ikkonfermata wkoll mid-data ta’ wara l-PI li wriet li l-importazzjonijiet tal-marki Ċiniżi żdiedu b’mod sinifikanti għal 14,1 % fit-tieni trimestru tal-2024, filwaqt li l-importazzjonijiet l-oħrajn kollha miċ-Ċina naqsu kif muri fit-Tabella 10 ta’ dan ir-Regolament. Għalhekk, il-Kummissjoni wettqet b’mod xieraq analiżi tal-hekk imsejħa awtoimportazzjonijiet u kkonkludiet li dawk l-importazzjonijiet x’aktarx ma kienux se jikkontribwixxu għat-theddida ta’ dannu materjali.

(79)

Fir-rigward tal-punti (b), (c) u (d), huwa irrilevanti li ċ-Ċina għandha esperjenza twila fil-batteriji għall-elettronika għall-konsumatur. Kif ġie spjegat fit-Taqsima 3 tar-Regolament provviżorju u f’dan ir-Regolament, il-batteriji għall-BEVs ġew issussidjati mill-GTĊ.

(80)

Barra minn hekk, ir-rapport jiddikjara li ma kien hemm l-ebda theddida ta’ dannu peress li (a) il-każijiet temporanji ta’ produzzjoni eċċessiva huma okkorrenza naturali, (b) peress li l-kapaċità tal-BEVs hija dinamika, ma tistax titqies b’mod separat mill-kapaċità tal-ICE, (c) il-preżenza ta’ segmentazzjoni konsiderevoli tas-suq tnaqqas kwalunkwe effett kompetittiv, (d) id-differenzi fil-prezzijiet bejn il-mudelli huma r-riżultat ta’ għadd kbir ta’ fatturi, iżda l-prezzijiet tal-BEVs importati miċ-Ċina ma humiex sistematikament aktar baxxi mill-prezzijiet tal-BEVs prodotti fl-UE, (e) il-penetrazzjoni tas-suq tal-BEVs issegwi xejriet prevedibbli ta’ teknoloġiji ġodda u fl-aħħar mill-aħħar tirriżulta f’investimenti Ċiniżi fl-Ewropa, (f) l-effetti sostanzjali tan-network fl-infrastruttura tal-irriċarġjar jirrikjedu adozzjoni rapida tal-BEVs, (g) minħabba l-ktajjen tal-valur mondjali fil-komponenti tan-NEV, il-produtturi tal-UE jibbenefikaw minn suq Ċiniż żviluppat.

(81)

Fit-Taqsima 5 tar-Regolament provviżorju u fit-Taqsima 5 ta’ dan ir-Regolament, il-Kummissjoni wriet li fil-fatt hemm theddida ta’ dannu. Din il-konklużjoni ntlaħqet billi ġew ivvalutati l-fatturi stipulati fl-Artikolu 8(8), it-tieni subparagrafu tar-Regolament bażiku kif ġie spjegat fil-premessa (1105) tar-Regolament bażiku.

(82)

Barra minn hekk, il-Kummissjoni indirizzat il-kwistjoni tal-kapaċità, is-segmentazzjoni, id-differenza fil-prezzijiet (jiġifieri l-marġni tat-twaqqigħ tal-prezz) fir-Regolament provviżorju u f’dan ir-Regolament. Barra minn hekk, il-Kummissjoni ma tqisx li l-kapaċità ta’ riżerva għolja fiċ-Ċina hija temporanja, u ma ġiet ippreżentata l-ebda evidenza mis-CCCME f’dan ir-rigward. Barra minn hekk, il-Kummissjoni ma qisitx il-kapaċità tal-BEVs b’mod separat mill-kapaċità tal-ICE kif ġie spjegat fil-premessa (1142) tar-Regolament provviżorju. Barra minn hekk, l-investimenti futuri tal-produtturi esportaturi Ċiniżi fl-Unjoni ma humiex aspett kopert minn din l-investigazzjoni peress li l-għan ta’ din l-investigazzjoni huwa li jkun hemm kundizzjonijiet ekwi fis-suq tal-Unjoni. Il-Kummissjoni indirizzat ukoll il-kwistjoni tal-infrastruttura tal-irriċarġjar fit-Taqsima 7 tar-Regolament provviżorju. Fl-aħħar nett, l-impożizzjoni tal-miżuri mhux se twaqqaf l-importazzjonijiet miċ-Ċina la tal-BEVs u lanqas tal-parts meħtieġa mill-industrija tal-Unjoni.

(83)

Finalment, ir-rapport jgħid li l-miżuri biex jiġu limitati l-importazzjonijiet ta’ BEVs Ċiniżi ma jkunux fl-interess tal-Unjoni peress li l-limitar tal-importazzjonijiet ta’ BEVs (a) jirrinunzja benefiċċji ambjentali importanti, (b) jimplika tnaqqis fil-kompetizzjoni bi prezz statiku, (c) jimplika tnaqqis fil-kompetizzjoni dinamika u (d) jillimita l-inċentivi għall-marki biex jinnovaw.

(84)

Kif ġie spjegat fil-premessa (81) ta’ dan ir-Regolament, l-impożizzjoni tal-miżuri kumpensatorji mhux se twaqqaf l-importazzjonijiet miċ-Ċina. Din se twassal biss għal kundizzjonijiet ekwi fis-suq tal-Unjoni.

(85)

Ir-rapport tad-19 ta’ Lulju 2024 ikkummenta dwar is-sejbiet tar-Regolament provviżorju. Ir-rapport jikkwota tliet referenzi, jiġifieri r-rapport tal-20 ta’ Diċembru 2023 u żewġ artikli akkademiċi mħejjija fl-2016 u fl-2023 rispettivament.

(86)

Ir-rapport jiddikjara li d-diskrepanza fil-prezz kienet esaġerata u ma timplikax twaqqigħ tal-prezz minħabba (a) id-differenzi fil-karatteristiċi osservabbli, (b) is-segmenti differenti tas-suq, (c) il-valur tal-marka għall-marki tal-Unjoni, (d) il-valur tad-distribuzzjoni tal-legat għall-marki tal-Unjoni, (e) l-ipprezzar introduttorju minn parteċipanti ġodda fis-suq, (f) id-differenzi fil-kost tal-produzzjoni, (g) il-kampjunar selettiv.

(87)

Il-punti (a), (b), (c) u (d) ġew indirizzati fil-premessi minn (1022) sa (1049) tar-Regolament provviżorju u fil-premessi minn (748) sa (831) ta’ dan ir-Regolament. Barra minn hekk, fir-rigward tal-punt (e), il-fatt li l-parteċipanti l-ġodda ġeneralment jidħlu f’suq bi prezzijiet aktar baxxi minn dawk stabbiliti huwa irrilevanti. Fir-realtà, il-BEVs miċ-Ċina huma ssussidjati u huma ta’ theddida għas-suq tal-Unjoni. Barra minn hekk, il-fatt li l-BEVs Ċiniżi għandhom kost tal-produzzjoni aktar baxx huwa irrilevanti wkoll peress li l-kost aktar baxx jidher li huwa relatat mas-sussidju rċevut. Fl-aħħar nett, ma kien hemm l-ebda kampjunar selettiv applikat għall-produtturi esportaturi Ċiniżi u din il-kwistjoni kienet diġà ġiet indirizzata kemm-il darba fir-Regolament provviżorju u f’dan ir-Regolament.

(88)

Ir-rapport jiddikjara wkoll li t-tkabbir fl-importazzjonijiet miċ-Ċina huwa esaġerat u mhux se jkompli jiżdied. Il-Kummissjoni ma qablitx ma’ din l-asserzjoni. Kif ġie spjegat fit-Tabella 13 ta’ dan ir-Regolament, fit-tieni trimestru tal-2024, l-importazzjonijiet ta’ BEVs ta’ marki Ċiniżi diġà laħqu sehem mis-suq ta’ 14,1 %.

(89)

Barra minn hekk, ir-rapport jiddikjara li l-argument dwar il-kapaċità żejda huwa irrilevanti peress li (a) kemm il-produtturi tal-Unjoni kif ukoll dawk Ċiniżi għandhom kapaċità ta’ riżerva, iżda dan ma jaffettwax id-deċiżjonijiet dwar l-ipprezzar u l-esportazzjoni, (b) kemm għall-produtturi tal-Unjoni kif ukoll għal dawk Ċiniżi, il-kapaċità fuq terminu medju, li tgħaqqad l-ICEs u l-BEVs, hija virtwalment bla limitu meta mqabbla mad-daqs tas-suq tal-BEVs.

(90)

Il-Kummissjoni ma qablitx bil-qawwi li l-kapaċità żejda tal-produtturi esportaturi Ċiniżi hija irrilevanti. Barra minn hekk, il-fatt li l-industrija tal-Unjoni għandha allegata kapaċità żejda (asserzjoni li ġiet miċħuda mill-Kummissjoni fil-premessa (845) ta’ dan ir-Regolament) huwa irrilevanti peress li l-industrija tal-Unjoni ma hijiex qiegħda thedded li tagħmel dannu lill-industrija domestika Ċiniża. L-esportazzjonijiet ta’ BEVs tal-industrija tal-Unjoni lejn iċ-Ċina huma baxxi ħafna. Barra minn hekk, peress li l-investigazzjoni tkopri biss il-BEVs, il-Kummissjoni hija legalment obbligata li tinvestiga l-BEVs u mhux il-vetturi ICE. Il-Kummissjoni indirizzat il-kapaċità tal-produzzjoni tal-vetturi ICE fiċ-Ċina bħala kalkolu alternattiv għall-kapaċità ta’ riżerva tal-BEVs (ara l-premessa (1142) fir-Regolament provviżorju).

(91)

Barra minn hekk, ir-rapport jiddikjara wkoll li (a) l-esportazzjonijiet Ċiniżi tal-BEVs ma humiex partikolarment għoljin, (b) il-produtturi tal-Unjoni jirreġistraw tkabbir kbir fl-esportazzjoni, (c) il-produtturi Ċiniżi ma humiex qegħdin jimmiraw lejn is-swieq tal-esportazzjoni.

(92)

Il-Kummissjoni ma qablitx ma’ dawn l-asserzjonijiet. B’mod ċar, sehem mis-suq ta’ 25,0 % tal-importazzjonijiet Ċiniżi fil-perjodu ta’ investigazzjoni kif huwa ddikjarat fit-Tabella 2a tar-Regolament provviżorju huwa sinifikanti. L-esportazzjonijiet tal-industrija tal-Unjoni ġew indirizzati fit-Taqsima 6.2.2 tar-Regolament provviżorju. Barra minn hekk, il-fatt li ċ-Ċiniżi qegħdin jimmiraw lejn is-suq tal-esportazzjoni wkoll ġie indirizzat fil-premessi minn (1114) sa (1118) tar-Regolament provviżorju u fil-premessi minn (1031) sa (1043) ta’ dan ir-Regolament.

(93)

Ir-rapport jiddikjara wkoll li (a) is-sussidji possibbli lill-marki Ċiniżi jenħtieġ li jitqabblu ma’ sussidji possibbli lill-marki tal-Unjoni u (b) is-sussidji lill-produtturi Ċiniżi tal-BEVs x’aktarx li huma sopravalutati.

(94)

Il-punt (a) ġie indirizzat fil-premessa (1262) tar-Regolament provviżorju. Fir-rigward tal-punt (b), fit-Taqsima 3 tar-Regolament provviżorju u fit-Taqsima 3 ta’ dan ir-Regolament, il-Kummissjoni spjegat fid-dettall kif ġew ikkalkolati s-sussidji, u l-kalkoli dettaljati ġew iddivulgati lill-produtturi esportaturi Ċiniżi inklużi fil-kampjun li kellhom l-opportunità li jissottomettu kummenti.

(95)

Barra minn hekk, ir-rapport itenni l-argumenti dwar l-interess tal-Unjoni ddikjarati fil-premessa (83) ta’ dan ir-Regolament.

(96)

Is-CCCME ma enfasizzatx liema punti partikolari ppreżentati f’dawn ir-rapporti ma ġewx indirizzati direttament jew indirettament mill-Kummissjoni la fir-Regolament provviżorju u lanqas f’dan ir-Regolament. Għalhekk, fid-dawl tal-ispjegazzjonijiet mogħtija fil-premessi minn (76) sa (95) ta’ dan ir-Regolament, il-Kummissjoni qieset li l-punti ewlenin taż-żewġ rapporti ġew indirizzati direttament jew indirettament jew fir-Regolament provviżorju u/jew f’dan ir-Regolament.

(97)

Wara d-divulgazzjoni finali, is-CCCME u l-GTĊ asserew ukoll li ma kienx ċar kif il-Kummissjoni kkalkolat il-volum tal-produzzjoni għall-perjodu ta’ investigazzjoni peress li d-data fi Prodcom ma ġietx irrapportata fuq bażi ta’ kull xahar. Barra minn hekk, is-CCCME u l-GTĊ asserew li ma ngħata l-ebda dettall dwar is-sorsi disponibbli pubblikament imsemmija mill-Kummissjoni.

(98)

Din l-asserzjoni ġiet indirizzata fil-premessa (689) ta’ dan ir-Regolament. Barra minn hekk, il-Kummissjoni ma setgħetx tiddivulga liema sit web tal-produttur tal-Unjoni użat f’dan ir-rigward peress li kieku tiddivulga liema produttur tal-Unjoni kkoopera fl-investigazzjoni. Għalhekk, l-asserzjoni ġiet miċħuda.

(99)

Wara d-divulgazzjoni finali, is-CCCME u l-GTĊ asserew ukoll li matul l-investigazzjoni, il-Kummissjoni naqset milli tagħmel l-informazzjoni pprovduta mill-partijiet interessati disponibbli għal partijiet interessati oħrajn b’mod immedjat u f’waqtu.

(100)

Il-Kummissjoni ma qablitx ma’ din l-asserzjoni. Minħabba l-anonimità mogħtija lil ċerti partijiet, il-Kummissjoni kellha bżonn tivverifika bir-reqqa l-informazzjoni sottomessa mill-partijiet biex tiżgura li l-identità tal-produtturi tal-Unjoni ma tkunx ġiet iddivulgata b’mod involontarju. Dan il-proċess ħa ħafna ħin. Barra minn hekk, sa meta l-Kummissjoni ddivulgat is-sejbiet tagħha, il-fajl mhux kunfidenzjali tal-investigazzjoni ġie aġġornat bis-sħiħ u s-CCCME u l-GTĊ kellhom ħafna żmien biex jissottomettu kummenti. Dan jista’ jiġi osservat ukoll mill-għadd konsiderevolment kbir ta’ kummenti mressqa mis-CCCME u mill-GTĊ wara divulgazzjonijiet kemm provviżorji kif ukoll definittivi.

(101)

Wara d-divulgazzjoni finali, is-CCCME u l-GTĊ tennew l-asserzjoni li l-Kummissjoni tat kunfidenzjalità eċċessiva lill-produtturi tal-Unjoni. Huma asserew ukoll li (i) is-sommarji mhux kunfidenzjali tad-data ta’ wara l-PI sottomessa mill-produtturi tal-Unjoni inklużi fil-kampjun ma humiex disponibbli fil-fajl mhux kunfidenzjali u (ii) minflok, tħejja sommarju mhux kunfidenzjali konsolidat tar-risposti għall-kwestjonarji ta’ wara l-PI mill-Kummissjoni.

(102)

Il-kwestjonarju ta’ wara l-PI ma kienx jinkludi kwestjonarju narrattiv bħall-kwestjonarju oriġinali. Barra minn hekk, f’konformità mat-tabelli tal-Excel tar-risposta mhux kunfidenzjali tal-kwestjonarju oriġinali, sabiex tiġi protetta l-anonimità tal-identità tal-produtturi tal-Unjoni inklużi fil-kampjun, il-Kummissjoni ddeċidiet li tinkludi fil-fajl mhux kunfidenzjali tal-investigazzjoni l-verżjoni mhux kunfidenzjali tal-informazzjoni ewlenija mitluba fit-tabelli tal-Excel tal-kwestjonarju fuq bażi konsolidata (jiġifieri d-data tal-produtturi kollha tal-Unjoni inklużi fil-kampjun ġiet aggregata) bl-użu ta’ indiċijiet.

(103)

Is-CCCME u l-GTĊ argumentaw ukoll li l-Kummissjoni ma pprovdietx biżżejjed dettalji u spjegazzjonijiet dettaljati biżżejjed dwar kwistjonijiet materjali ewlenin ta’ fatt u ta’ dritt dwar is-sejbiet ta’ sussidjar dannuż u ma weġbitx għall-kummenti tas-CCCME jew ipprovdiet raġunijiet għar-rifjut tal-argumenti mressqa. Skont is-CCCME, il-kwistjonijiet li ġejjin ma ġewx indirizzati jew ma ġiet ipprovduta l-ebda evidenza jew spjegazzjoni suffiċjenti: (i) ir-raġunijiet għad-deċiżjoni li Tesla (Shanghai) ma tiġix inkluża fil-kampjun tal-produtturi esportaturi Ċiniżi u li tiġi aċċettata t-talba tagħha għal eżami individwali fi stadju tard tal-proċediment, (ii) il-kompożizzjoni tal-industrija tal-BEVs tal-Unjoni, il-livell ta’ kooperazzjoni tal-industrija tal-Unjoni, xi tfisser u r-rilevanza tal-produtturi OEM fil-kuntest tal-industrija tal-Unjoni, kif ukoll il-grad ta’ tranżizzjoni tad-diversi produtturi tal-Unjoni minn ICEs għal BEVs, (iii) ir-rwol u r-rilevanza tal-analiżi tat-twaqqigħ tal-prezz u l-valutazzjoni tal-prezzijiet Ċiniżi tal-BEVs huma 30 % anqas mill-kost tal-produzzjoni tal-industrija tal-Unjoni fid-determinazzjoni tat-trażżin tal-prezz.

(104)

Ir-raġunijiet għan-nuqqas ta’ inklużjoni ta’ Tesla (Shanghai) fil-kampjun u għall-fatt li sarilha eżami individwali huma stabbiliti fit-Taqsimiet 1.5.3 u 1.6 ta’ hawn fuq.

(105)

Il-punti (ii) u (iii) ġew indirizzati fil-premessi (682) u (793) ta’ dan ir-Regolament.

(106)

Wara d-divulgazzjoni finali, il-GTĊ asserixxa li d-drittijiet tad-difiża tal-partijiet interessati ma ġewx irrispettati. B’mod partikolari, huwa asserixxa li l-Kummissjoni kienet injorat l-argumenti u l-evidenza sottomessi mill-GTĊ u minn partijiet oħrajn.

(107)

Il-Kummissjoni nnotat li l-allegazzjoni ma kinitx issostanzjata u kienet tikkostitwixxi kumment ġenerali mingħajr evidenza speċifika. Il-Kummissjoni tenniet li kienet indirizzat il-kummenti kollha li għamlu l-partijiet. L-investigazzjoni kollha twettqet bi trasparenza sħiħa, bil-partijiet kollha jkollhom diversi opportunitajiet biex jippreżentaw data, argumenti u evidenza matul il-proċedura. Il-Kummissjoni talbet id-data meħtieġa, ħarġet ittri ta’ nuqqasijiet, wettqet spezzjonijiet fuq il-post f’aktar minn mitt kumpanija u ddivulgat il-kalkoli rilevanti kollha. Tqiesu l-kummenti mill-partijiet u dawn ippermettew lill-Kummissjoni taġġusta s-sejbiet tagħha fejn dan kien debitament iġġustifikat. Għalhekk, l-asserzjoni, li ma kinitx issostanzjata, ġenerali u mhux konformi mar-realtà tal-proċediment, ġiet miċħuda.

(108)

Wara divulgazzjoni finali addizzjonali, il-GTĊ asserixxa li ma kien hemm l-ebda evidenza ta’ kwalunkwe komunikazzjoni bejn il-Kummissjoni u l-industrija tal-Unjoni fil-fajl miftuħ fir-rigward tat-talbiet imġedda tal-Kummissjoni għad-data tat-T1 tal-2024 u biex tirċeviha. Il-GTĊ argumenta wkoll li kien sorpriż li l-industrija tal-Unjoni kellha l-privileġġ li tipprovdi informazzjoni sal-aħħar minuta u li d-data tagħha ġiet aċċettata fi stadju tant tard fl-investigazzjoni, li kien f’kuntrast qawwi mar-rifjut ċar u mhux spjegat mill-Kummissjoni tat-talba sostanzjata sew tal-GTĊ sabiex is-smigħ jiġi skedat għal wara s-sottomissjoni tal-kummenti bil-miktub u l-impożizzjoni stretta tal-iskadenza ta’ 10 ijiem fuq il-GTĊ biex jikkummenta dwar id-Dokument ta’ Divulgazzjoni Ġenerali ta’ 177 paġna, iressaq il-preżentazzjoni tas-seduta u jorganizza s-seduta. Il-fatti ta’ hawn fuq jissostanzjaw ukoll li l-partijiet interessati min-naħa Ċiniża ġew mċaħħda illegalment u b’mod diskriminatorju opportunità sħiħa u xierqa biex jeżerċitaw id-drittijiet tad-difiża tagħhom bi ksur tal-Artikoli 12.1, 12.1.2, 12.3 u 12.4.1 tal-Ftehim dwar is-Sussidji u l-Miżuri Kumpensatorji.

(109)

L-informazzjoni rispettiva ġiet sottomessa fid-29 ta’ Awwissu 2024, (18) jiġifieri malli d-data kollha mitluba kienet disponibbli għall-Kummissjoni. Barra minn hekk, fid-9 ta’ Settembru 2024 fil-fajl mhux kunfidenzjali tal-investigazzjoni, il-Kummissjoni aġġornat in-Nota għall-fajl bid-data trimestrali għal wara l-PI (19).

(110)

Barra minn hekk, il-Kummissjoni setgħet taċċetta d-data nieqsa mill-produttur rispettiv tal-Unjoni peress li l-informazzjoni ma kinitx tfixkel it-tlestija tal-investigazzjoni sal-iskadenzi legali. Dan kien differenti b’mod sinifikanti milli jintlaħaq qbil biex jiġi estiż il-perjodu għall-organizzazzjoni tas-seduti. Barra minn hekk, għalkemm il-GTĊ ilmenta li l-perjodu ta’ 10 ijiem biex isiru kummenti dwar id-Dokument ta’ Divulgazzjoni Ġenerali ma kienx biżżejjed, il-Kummissjoni nnotat li l-GTĊ irnexxielu jissottometti kummenti pjuttost estensivi (is-sottomissjoni tal-GTĊ kienet tinkludi 151 paġna ta’ kummenti). Il-GTĊ naqas milli juri kif, li kieku pprovda l-kummenti tiegħu fil-perjodu ta’ żmien mitlub, kien jipprevjenih milli jeżerċita d-dritt ta’ difiża tiegħu. Għalhekk, il-Kummissjoni ma qablitx li l-partijiet interessati Ċiniżi ġew miċħuda b’mod illegali u diskriminatorju opportunità sħiħa u xierqa biex jeżerċitaw id-drittijiet tad-difiża tagħhom.

(111)

Wara d-divulgazzjoni provviżorja, is-CCCME, il-GTĊ u l-Grupp Geely asserew li l-ambitu tal-investigazzjoni ġie estiż b’mod illegali u tard billi ġew inklużi vetturi elettriċi b’estensur tal-awtonomija ta’ kombustjoni interna mingħajr ma l-partijiet interessati ngħataw avviż jew opportunità li jikkummentaw dwar il-modifika maħsuba, u dan affettwa d-drittijiet tal-proċess dovut tal-partijiet interessati. Is-CCCME u l-GTĊ asserew ulterjorment li (i) ma kien hemm l-ebda referenza għal estensur tal-awtonomija fin-Notifika tal-Bidu jew fid-Dokument tal-Bidu għalkemm kien hemm referenza ċara għall-iċċarġjar/irriċarġjar tal-vetturi fid-Dokument ta’ Bidu, (ii) il-BEVs b’estensur tal-awtonomija għandhom awtonomija ta’ sewqan komparabbli ma’ dik ta’ magna b’kombustjoni interna (“ICE”) filwaqt li l-BEVs mingħajr estensur tal-awtonomija għandhom awtonomija ta’ sewqan ħafna aktar baxxa mill-vetturi ICE, (iii) in-numru ta’ kontroll tal-prodott (“PCN”) u l-karatteristiċi tal-prodott ipprovduti fil-kwestjonarju għall-esportaturi Ċiniżi u l-industrija tal-Unjoni ma kinux jinkludu referenza għall-estensur tal-awtonomija u ma qisux l-ispeċifiċitajiet ta’ dawn il-vetturi, (iv) ma hemm l-ebda informazzjoni dwar kif il-Kummissjoni kisbet jew stmat id-data għal dawn il-BEVs peress li l-ebda wieħed mill-produtturi esportaturi Ċiniżi inklużi fil-kampjun ma pproduċa u ma esporta dawn it-tipi ta’ BEVs, billi la Prodcom u lanqas S&P Mobility Data ma jipprovdu tali informazzjoni għal dan it-tip ta’ BEVs. Għalhekk, is-CCCME u l-GTĊ argumentaw li l-BEVs b’estensur tal-awtonomija jenħtieġ li jiġu esklużi mill-ambitu ta’ din l-investigazzjoni minħabba li minbarra l-esportazzjonijiet tassew limitati ta’ tali vetturi miċ-Ċina lejn l-UE, huma wkoll kompletament differenti mill-BEVs standard f’termini tal-karatteristiċi fiżiċi u tekniċi, tal-kostijiet u l-prezzijiet tal-produzzjoni, u tal-perċezzjoni tal-konsumatur u ma humiex f’kompetizzjoni diretta mal-BEVs standard.

(112)

Il-Kummissjoni nnotat li filwaqt li s-CCCME u l-GTĊ sempliċiment spjegaw dawn l-argumenti, huma ma pprovdew l-ebda evidenza sottostanti f’dan ir-rigward.

(113)

Fin-Notifika tal-Bidu, il-prodott soġġett għal din l-investigazzjoni ġie definit bħala vetturi elettriċi ġodda bil-batterija, prinċipalment imfassla għat-trasport ta’ disa’ persuni jew inqas, inkluż is-sewwieq, li jaħdmu biss b’mutur elettriku wieħed jew aktar. In-Notifika tal-Bidu speċifikat ukoll il-kodiċi NM għall-prodott soġġett għall-investigazzjoni li kien 8703 80 10 . Id-deskrizzjoni tal-prodott soġġett għall-investigazzjoni ma għandhiex bżonn tinkludi l-karatteristiċi kollha tal-prodott soġġett għall-investigazzjoni. Barra minn hekk, in-Notifika tal-Bidu ma speċifikatx li l-BEVs b’estensur tal-awtonomija ġew esklużi mill-ambitu tal-investigazzjoni.

(114)

Fir-rigward ta’ kif il-Kummissjoni kisbet id-data, peress li tali BEVs huma importati wkoll permezz tal-kodiċi NM kopert mill-investigazzjoni, l-importazzjonijiet ta’ tali BEVs miċ-Ċina jew minn pajjiżi terzi oħrajn matul il-perjodu kkunsidrat, jekk kien hemm, kienu koperti mid-data koperta mill-Kodiċi NM 8703 80 10 . S&P Mobility Data u l-EEA rrappurtaw tali BEVs u matul il-PI, fis-suq tal-Unjoni ma ġiet irreġistrata ebda tali BEV miċ-Ċina. L-unika evidenza fil-fajl turi li wara l-perjodu ta’ investigazzjoni, il-produttur esportatur Ċiniż Seres ħabbar tali BEVs għas-suq tal-Unjoni (Seres 7 b’estensur tal-awtonomija (20)) u għadd immaterjali ta’ tali BEVs ġew irreġistrati wara l-perjodu ta’ investigazzjoni.

(115)

Barra minn hekk, fir-rigward tal-industrija tal-Unjoni, l-evidenza fil-fajl turi li kien hemm bejgħ immaterjali ta’ dan il-prodott matul il-perjodu kkunsidrat.

(116)

Ta’ min jinnota li l-BEVs b’estensur tal-awtonomija huma differenti mill-vetturi elettriċi plug-in (“PHEVs”, plug-in electric vehicles). Fil-BEVs b’estensur tal-awtonomija, il-magna tal-kombustjoni interna tirriċċarġja biss il-batterija, filwaqt li f’PHEV, il-magna tal-kombustjoni interna tħaddem ir-roti waħidha. Il-PHEVs jiġu importati wkoll permezz ta’ kodiċi NM differenti mill-kodiċi NM kopert mill-investigazzjoni kurrenti. Għalhekk, għall-kuntrarju tal-BEVs b’estensur tal-awtonomija, il-PHEV tabilħaqq ma kinux koperti mill-ambitu tal-investigazzjoni.

(117)

Fir-rigward tal-PCN, filwaqt li tabilħaqq l-estensur tal-awtonomija ma kienx speċifikat fil-PCN bħala tali, il-PCN speċifika l-awtonomija tal-vettura, u l-iskop tal-estensur tal-awtonomija huwa li tiżdied l-awtonomija tal-karozza.

(118)

Barra minn hekk, filwaqt li prattikament ma kien hemm l-ebda importazzjoni miċ-Ċina ta’ BEVs b’estensur tal-awtonomija matul il-perjodu kkunsidrat u prattikament l-ebda bejgħ mill-produtturi tal-Unjoni fis-suq tal-Unjoni, ma jistax jiġi eskluż li fil-futur dan it-tip ta’ BEV se jiġi esportat fi kwantitajiet sinifikanti u prodott mill-produtturi tal-Unjoni fis-suq tal-Unjoni, fid-dawl tal-fatt li l-BEVs huma bbażati fuq teknoloġija li qiegħda tevolvi kontinwament. F’dan ir-rigward, il-Kummissjoni qieset li l-BEVs mingħajr estensur tal-awtonomija u l-BEVs b’estensur tal-awtonomija huma simili ħafna għall-BEVs, id-differenza teknika żgħira ewlenija hija l-estensur tal-awtonomija u l-komponenti relatati u għalhekk huma b’mod ċar parti mill-istess prodott kopert mill-ambitu tal-investigazzjoni.

(119)

Għalhekk, il-BEVs b’estensur tal-awtonomija huma koperti mill-ambitu tal-investigazzjoni.

(120)

Barra minn hekk, fir-Regolament provviżorju, il-Kummissjoni eskludiet mill-ambitu tal-investigazzjoni, il-kategoriji L6 u L7 ta’ vetturi skont ir-Regolament (UE) Nru 168/2013 tal-Parlament Ewropew u tal-Kunsill (21). Il-Kummissjoni b’dan tiċċara li l-kategoriji kollha minn L1 sa L7 ta’ vetturi skont ir-Regolament (UE) Nru 168/2013 ġew esklużi mill-ambitu tal-investigazzjoni.

(121)

Fin-nuqqas ta’ kwalunkwe kumment ieħor fir-rigward tal-prodott taħt investigazzjoni, il-prodott ikkonċernat u l-prodott simili, is-sejbiet fil-premessi minn (184) sa (195) huma kkonfermati.

(122)

Wara d-divulgazzjoni provviżorja, il-Grupp BYD, is-CAAM, il-Grupp Geely, id-Dongfeng Group, il-GTĊ, NIO, il-Grupp SAIC, u Tesla (Shanghai) ikkummentaw dwar is-sejbiet tas-sussidju provviżorju. Xi kummenti mqajma minn Tesla (Shanghai) ġew indirizzati f’bgħit separat minħabba n-natura kunfidenzjali tagħhom.

(123)

Fin-nuqqas ta’ kummenti dwar l-eżistenza ta’ dawk il-pjanijiet, il-proġetti u d-dokumenti, il-premessi minn (196) sa (206) tar-Regolament provviżorju ġew ikkonfermati.

(124)

Fin-nuqqas ta’ kummenti dwar il-pjanijiet u l-politiki eżistenti tal-gvern biex tiġi appoġġata l-industrija tal-BEV, il-premessi minn (207) sa (253) tar-Regolament provviżorju ġew ikkonfermati.

(125)

Wara d-divulgazzjoni provviżorja, il-GTĊ oppona l-applikazzjoni mill-Kummissjoni tal-fatti disponibbli fir-rigward ta’ materjali ta’ finanzjament preferenzjali billi argumenta li, bħala l-awtorità investigattiva, huwa d-dmir tal-Kummissjoni li tinvestiga u tibgħat il-kwestjonarju lill-istituzzjonijiet finanzjarji li jitolbu kooperazzjoni. Il-GTĊ żied li l-fatti disponibbli setgħu jiġu applikati biss fin-nuqqas ta’ ċerta informazzjoni “meħtieġa”; jiġifieri informazzjoni “meħtieġa” minn awtorità biex tlesti d-determinazzjoni(jiet) tagħha (22).. B’mod aktar speċifiku, il-GTĊ żied li l-informazzjoni dwar l-ishma tal-istituzzjonijiet finanzjarji hija disponibbli pubblikament u li ma kien hemm l-ebda bażi biex il-Kummissjoni tuża l-fatti disponibbli.

(126)

Barra minn hekk, il-GTĊ żied li l-Kummissjoni kienet invertiet b’mod illegali l-piż investigattiv u rreferiet għall-Artikolu 12 tal-Ftehim SCM u l-ġurisprudenza relatata li biha ċerti obbligi huma allegatament ir-responsabbiltà tal-awtorità tal-investigazzjoni u ma jistgħux jiġu ttrasferiti lill-“Membru interessat” (il-GTĊ) (23). Konsegwentement, il-GTĊ ikkunsidra li r-rikors għall-fatti disponibbli kien illegali peress li l-Kummissjoni ma kinitx innotifikat kif xieraq lill-intimat bl-informazzjoni meħtieġa minnu. Il-GTĊ ikkummenta wkoll li awtorità ma tistax iġġiegħel lill-gvern esportatur (“il-Membru interessat”) “jagħmel ix-xogħol għall-awtorità tal-investigazzjoni”.

(127)

Il-GTĊ innota li hemm obbligi distinti u mhux funġibbli imposti fuq l-awtorità tal-investigazzjoni u l-Membru interessat. U, kif ukoll kopert mill-Bord f’Mexico – Anti-Dumping Measures on Rice: “awtorità tal-investigazzjoni ma hijiex permessa li tibbaża fuq l-inizjattiva tal-partijiet interessati għat-twettiq tal-obbligi li huma verament tagħha”.

(128)

Il-Kummissjoni, kif deskritt fil-premessi minn (266) sa (268) tar-Regolament provviżorju, innotat li l-informazzjoni mitluba kienet disponibbli għall-GTĊ għall-entitajiet kollha fejn il-GTĊ huwa l-azzjonista ewlieni jew maġġuri. Bl-istess mod, għall-istituzzjonijiet finanzjarji mhux tal-istat, il-GTĊ, bħala l-korp regolatorju għandu l-awtorità li jirrikjedi li l-istituzzjonijiet finanzjarji kollha stabbiliti fir-Repubblika tal-Poplu taċ-Ċina jissottomettu informazzjoni, kif ukoll li jagħti struzzjonijiet lill-istituzzjonijiet finanzjarji biex jiddivulgaw informazzjoni lill-pubbliku. Sussegwentement, il-Kummissjoni enfasizzat li l-GTĊ ma jistax jevita r-responsabbiltajiet tiegħu billi jżomm informazzjoni li, bis-saħħa tal-awtorità u tar-rwol regolatorju tiegħu, hija effettivament fil-pussess tiegħu.

(129)

Għall-finijiet ta’ konvenjenza amministrattiva, bil-għan li tinkiseb l-informazzjoni b’mod aktar effiċjenti, il-Kummissjoni talbet lill-GTĊ biex jgħaddi kwestjonarji speċifiċi lill-istituzzjonijiet finanzjarji relevanti kollha, ħaġa li ma għamilx, waqt li l-GTĊ huwa l-awtorità kompetenti biex titlob tweġibiet għall-mistoqsijiet speċifiċi mill-istituzzjonijiet finanzjarji li pprovdew finanzjament lill-produtturi esportaturi inklużi fil-kampjun. Barra minn hekk, instab li ma kienx raġonevoli li jiġi argumentat li kien il-kompitu tal-Kummissjoni li tikkuntattja lill-istituzzjonijiet finanzjarji rilevanti, b’mod partikolari minħabba li l-lista ta’ istituzzjonijiet finanzjarji rilevanti tkun magħrufa biss mill-Kummissjoni wara li tirċievi t-tweġibiet għall-kwestjonarju tal-produtturi esportaturi inklużi fil-kampjun. Barra minn hekk, il-fatt li l-bank EXIM informa lill-Kummissjoni fuq inizjattiva proprja u l-fatt li fl-investigazzjoni antisussidji preċedenti, waslu tweġibiet għall-kwestjonarju minn diversi istituzzjonijiet finanzjarji, juri li l-GTĊ seta’ jibgħat il-kwestjonarju. Is-sit web ipprovdut mill-GTĊ li kien fih l-ishma tal-istituzzjonijiet finanzjarji ma kienx fih l-informazzjoni kollha meħtieġa mitluba mill-Kummissjoni fit-tweġiba għall-kwestjonarju fir-rigward tas-self preferenzjali. Konsegwentement, il-Kummissjoni ċaħdet l-asserzjoni.

(130)

Fin-nuqqas ta’ kwalunkwe kumment ieħor, il-premessi minn (255) sa (273) tar-Regolament provviżorju huma kkonfermati.

(131)

Wara d-divulgazzjoni provviżorja, il-GTĊ tenna l-asserzjoni tiegħu dwar l-applikazzjoni mill-Kummissjoni tal-fatti disponibbli fir-rigward tal-materjali tal-input billi argumenta li, bħala l-awtorità investigattiva, huwa d-dmir tal-Kummissjoni li tinvestiga u tibgħat il-kwestjonarju lill-fornituri tal-input li titlobhom biex jikkooperaw. Il-GTĊ żied li kien tal-fehma li l-informazzjoni mitluba u l-informazzjoni li l-SAIC naqset milli tipprovdi bħala li ma hijiex meħtieġa għall-investigazzjoni u ma hijiex meħtieġa f’investigazzjoni antisussidji regolari, u li l-informazzjoni dwar il-fornituri u l-kundizzjonijiet tas-suq setgħet inkisbet mill-kumpaniji inklużi fil-kampjun.

(132)

Il-Kummissjoni nnotat li l-argumenti ġew indirizzati fit-Taqsima 3.3.1.2 tar-Regolament provviżorju. L-ewwel, il-Kummissjoni nnotat li hija l-Kummissjoni li għandha tiddetermina liema informazzjoni titqies bħala meħtieġa għall-investigazzjoni u mhux għal parti li tagħmel dik id-determinazzjoni. Barra minn hekk, il-Kummissjoni enfasizzat li, għall-kuntrarju ta’ xi investigazzjonijiet preċedenti (24), il-GTĊ ma pprovdiex il-kwestjonarju lil partijiet terzi. CATL intalbet ukoll, permezz tal-kumpaniji inklużi fil-kampjun li kienu relatati magħha, tissottometti kwestjonarju u dan ma għamlitux. Barra minn hekk, il-GTĊ għandu wkoll l-awtorità meħtieġa biex jinteraġixxi mal-produtturi tal-input, kemm jekk ikunu tal-istat kif ukoll jekk le. Barra minn hekk, il-GTĊ naqas milli jipprovdi informazzjoni rilevanti dwar ċerti swieq bħall-batteriji u l-litju. Għalhekk, il-Kummissjoni kellha tibbaża fuq il-fatti disponibbli. Fir-rigward tal-informazzjoni mitluba, ta’ min jinnota li l-Kummissjoni talbet biss informazzjoni li kienet meħtieġa biex tivvaluta l-eżistenza u l-livell ta’ sussidjar disponibbli għall-prodott ikkonċernat. Għalhekk, l-asserzjonijiet ġew miċħuda.

(133)

Wara d-divulgazzjoni finali, is-CATL sostniet li l-Kummissjoni setgħet tikseb kwalunkwe informazzjoni meħtieġa dwar ix-xiri ta’ batteriji mill-gruppi ta’ kumpaniji inklużi fil-kampjun, u li n-nuqqas ta’ kooperazzjoni tas-CATL ma seta’ fl-ebda każ jipprovdi bażi għal “inferenzi u konġettura bla limitu li jibbażaw fuq fatti distorti”.

(134)

L-asserzjonijiet imqajma mis-CATL kienu ġenerali u mhux sostanzjati. Il-Kummissjoni enfasizzat li, kif kopert qabel fil-premessa (810) tar-Regolament provviżorju, għalkemm ikkuntattjata minn tnejn mill-gruppi inklużi fil-kampjun li magħhom kellha impriżi konġunti, is-CATL irrifjutat li tipprovdi risposta għall-kwestjonarju u b’hekk il-Kummissjoni ma kellhiex informazzjoni kruċjali sabiex tivvaluta s-sitwazzjoni tas-CATL abbażi tad-data tagħha stess. Barra minn hekk, il-fatti disponibbli dwar il-forniment tal-batteriji ġew applikati wkoll għall-Grupp SAIC (il-premessi (338) u (860) tar-Regolament provviżorju), li huwa waħda mill-kumpaniji li magħhom is-CATL għandha impriża konġunta. Għalhekk, din l-asserzjoni ġiet miċħuda.

(135)

Fin-nuqqas ta’ kwalunkwe kumment ieħor, il-premessi minn (274) sa (286) tar-Regolament provviżorju huma kkonfermati.

(136)

Wara d-divulgazzjoni provviżorja, il-GTĊ tenna l-asserzjoni tiegħu dwar in-nuqqas ta’ eżistenza ta’ informazzjoni dwar it-tħejjija, il-monitoraġġ u l-implimentazzjoni tal-iskema, kif ukoll statistika dwar il-vetturi konċernati. Konsegwentement, il-GTĊ ma setax jipprovdi informazzjoni li ma kellux, u kwalunkwe użu tal-fatti disponibbli ma jkunx ġustifikat u jkun illegali.

(137)

Il-Kummissjoni nnotat, kif deskritt fil-premessi (297) u (298) tar-Regolament provviżorju, li l-informazzjoni dwar it-tħejjija, il-monitoraġġ u l-implimentazzjoni tal-iskema, kif ukoll l-istatistika dwar vetturi affettwati minn programm li ilu fis-seħħ għal diversi snin u li kien jinvolvi riżorsi finanzjarji sinifikanti mill-baġit ċentrali ġestit mill-GTĊ, kienet rilevanti u meħtieġa biex il-Kummissjoni tasal għall-konklużjoni tagħha. Fin-nuqqas ta’ din l-informazzjoni, li ma ġietx ipprovduta mill-GTĊ, il-Kummissjoni kienet intitolata, fejn xieraq, li tuża l-fatti disponibbli. Għalhekk, l-asserzjoni ġiet miċħuda.

(138)

Fin-nuqqas ta’ kwalunkwe kumment ieħor, il-premessi minn (287) sa (299) tar-Regolament provviżorju ġew ikkonfermati.

(139)

Fin-nuqqas ta’ kummenti, il-premessi minn (300) sa (305) tar-Regolament provviżorju ġew ikkonfermati.

(140)

Fin-nuqqas ta’ kummenti, il-premessi minn (306) sa (317) tar-Regolament provviżorju ġew ikkonfermati.

(141)

Wara d-divulgazzjoni provviżorja, il-Grupp SAIC issottometta li b’mod ġenerali, il-Kummissjoni injorat l-informazzjoni pprovduta mill-entitajiet tal-Grupp SAIC li qieset li hija nieqsa f’xi aspetti u minflok użat sorsi alternattivi ta’ informazzjoni. Il-Grupp SAIC qies li l-Kummissjoni kellha twettaq eżami konkret tan-nuqqasijiet għal kull kumpanija, tivvaluta l-firxa ta’ dawk in-nuqqasijiet u tuża l-informazzjoni li kellha rreġistrata għal kull kumpanija tal-grupp. Barra minn hekk, il-Grupp SAIC argumenta li skont ir-regoli tad-WTO, it-terminu “fatti disponibbli” f’dan il-kuntest jenħtieġ li jiġi interpretat bħala “l-aħjar fatti disponibbli” kif qal il-Korp tal-Appell f’US — Hot Rolled Steel, awtorità tal-investigazzjoni hija “intitolata li tirrifjuta l-informazzjoni sottomessa mill-partijiet interessati” biss meta l-informazzjoni ma tkunx (i) verifikabbli, (ii) ġiet sottomessa kif xieraq sabiex tkun tista’ tintuża fl-investigazzjoni mingħajr diffikultajiet mhux dovuti, (iii) ġiet ipprovduta f’waqtha, u (iv) ġiet ipprovduta b’mezz jew b’lingwa tal-kompjuter mitluba mill-awtoritajiet. L-awtoritajiet tal-investigazzjoni ma jistgħux jiddisponu minn informazzjoni li “ma hijiex ideali f’kull rigward” jekk “il-parti interessata aġixxiet bl-użu tal-aħjar kapaċità possibbli tagħha”. Minflok, meta awtorità tal-investigazzjoni ma tkunx sodisfatta bl-informazzjoni sottomessa minn parti interessata, il-Korp tal-Appell tad-WTO qal li jrid jeżamina dawk l-elementi tal-informazzjoni li ma jkunx issodisfat bihom.

(142)

Fir-rigward tal-allegata “bona fide” murija mill-Grupp SAIC dwar il-kooperazzjoni tiegħu ma’ din l-investigazzjoni, il-Kummissjoni nnotat li f’diversi każijiet, li kollha ġew irreġistrati kif xieraq fi tmiem kull żjara ta’ verifika kemm mit-tim tal-investigazzjoni kif ukoll mir-rappreżentanti tal-kumpaniji, il-kumpaniji li jappartjenu għall-Grupp SAIC irrifjutaw li jissottomettu jew li jagħtu aċċess għal informazzjoni kruċjali lit-tim tal-investigazzjoni għalkemm din kienet disponibbli faċilment u setgħet tiġi pprovduta, li kieku l-Grupp SAIC aġixxa bl-aħjar abbiltà tiegħu li jagħmel dan. Għalhekk, il-Kummissjoni ddeċidiet li tirrifjuta l-informazzjoni parzjali li tqieset bħala defiċjenti jew mhux kompluta u ma setgħetx tiġi vverifikata bis-sħiħ. F’konformità mal-kundizzjonijiet stabbiliti fl-Artikolu 28(3) tar-Regolament bażiku, din l-informazzjoni parzjali ma ġietx ikkunsidrata minħabba li l-Grupp SAIC ma aġixxiex deliberatament fl-aħjar kapaċità tiegħu kif muri mill-annessi mhux ikkontestati msemmija hawn fuq għar-rapporti ta’ verifika fuq il-post li jelenkaw dawk id-dokumenti li l-entitajiet, parti mill-Grupp SAIC, irrifjutaw li jipprovdu b’mod sħiħ jew li għalihom ċerti partijiet rilevanti ġew approvati mill-ġdid, għalkemm kienu disponibbli faċilment. Għalhekk, l-asserzjoni ġiet miċħuda.

(143)

Wara d-divulgazzjoni provviżorja, il-Grupp SAIC asserixxa li s-sejbiet provviżorji ma kinux jirriflettu l-fatt li “dejjem ikkoopera mal-investigazzjoni b’bona fide u ġġieled konsistentement biex jiffaċilita l-ħidma tal-Kummissjoni”. Barra minn hekk, il-Grupp SAIC allega li ma setax iġiegħel lill-entitajiet legali li huma parti minn strutturi ta’ impriżi konġunti jikkooperaw fl-investigazzjoni.

(144)

F’dan ir-rigward, il-Kummissjoni tirreferi għaż-żewġ ittri tal-“Artikolu 28” mibgħuta lill-Grupp SAIC malli rċeviet it-tweġiba tiegħu għall-kwestjonarju u wara l-verifika fuq il-post, li t-tnejn li huma elenkaw il-bosta oqsma fejn il-Grupp SAIC kien naqas milli jipprovdi informazzjoni kruċjali mitluba fil-qafas ta’ din l-investigazzjoni, u b’hekk impedixxa l-investigazzjoni. Barra minn hekk, il-Kummissjoni infurmat b’mod estensiv lill-Grupp SAIC dwar il-konsegwenzi tal-applikazzjoni tal-fatti disponibbli fir-rigward tal-Grupp SAIC, inkluż għall-entitajiet legali relatati li huma parti mill-istrutturi ta’ impriżi konġunti. Il-Kummissjoni tenniet li minħabba r-rabtiet eżistenti f’termini ta’ parteċipazzjoni azzjonarja u/jew in-natura tal-attivitajiet tagħhom, kellhom jipprovdu tweġiba għall-kwestjonarju li tippermetti lill-Kummissjoni tivverifika l-informazzjoni u eventwalment titlob evidenza ulterjuri. Fin-nuqqas ta’ kooperazzjoni minn xi wħud mill-entitajiet legali ta’ impriża konġunta relatati, il-Kummissjoni kienet intitolata, fejn xieraq, li tuża l-fatti disponibbli. Għalhekk, l-asserzjoni ġiet miċħuda.

(145)

Wara d-divulgazzjoni provviżorja, il-Grupp SAIC argumenta li l-Kummissjoni ma kienx imissha applikat l-Artikolu 28 tar-Regolament bażiku għal xi kumpaniji fil-Grupp SAIC u finalment għall-Grupp SAIC.

(146)

Kif imsemmi fil-premessi minn (318) sa (371) tar-Regolament provviżorju, it-tweġibiet li waslu mill-entitajiet differenti parti mill-Grupp SAIC instabu li kellhom ħafna nuqqasijiet. Konsegwentement, is-sejbiet provviżorji tal-investigazzjoni kellhom ikunu parzjalment ibbażati fuq il-fatti disponibbli, skont l-Artikolu 28 tar-Regolament bażiku. Tabilħaqq, il-Grupp SAIC naqas milli jiddivulga l-eżistenza ta’ kumpaniji relatati jew milli jipprovdi tweġibiet għall-kwestjonarju għal kumpaniji relatati oħrajn. Minkejja evidenza eżistenti possibbli ta’ deċiżjonijiet konġunti meħuda mit-tliet azzjonisti ta’ kumpanija waħda fil-Grupp SAIC, il-Grupp SAIC allega li wieħed mit-tliet azzjonisti ma kienx relatat direttament mal-Grupp SAIC, iżda biss ma’ kumpanija barranija u għalhekk ma seta’ jeżerċita l-ebda kontroll u lanqas ma seta’ jġiegħel lil din il-kumpanija tipprovdi kwestjonarju. Din l-informazzjoni dehret li ma kinitx korretta abbażi ta’ rapporti finanzjarji disponibbli pubblikament u ma setgħetx tiġi vverifikata peress li l-kumpanija neħħiet xi partijiet mill-minuti tal-laqgħa tal-Bord tad-Diretturi fejn setgħu kienu preżenti rappreżentanti tat-tliet azzjonisti tagħha.

(147)

Jibqa’ li minkejja t-talbiet indirizzati lill-Grupp SAIC biex jipprovdi tweġiba għall-kwestjonarju dwar diversi entitajiet relatati tiegħu, din il-kumpanija għażlet li ma tikkooperax u għalhekk esponiet il-kumpaniji relatati tagħha għall-użu tal-fatti disponibbli f’konformità mal-Artikolu 28 tar-Regolament bażiku.

(148)

Il-Grupp SAIC argumenta ulterjorment li l-Kummissjoni kienet użat informazzjoni dwar titoli garantiti b’assi maħruġa minn kumpanija relatata waħda li għaliha qatt ma talbet lill-Grupp SAIC jipprovdi tweġiba għall-kwestjonarju. Tabilħaqq, din l-entità hija waħda mill-kumpaniji l-ġodda msemmija fil-premessa (329) tar-Regolament provviżorju, li skont sorsi disponibbli pubblikament, instab li kienu relatati u kienu involuti f’diversi relazzjonijiet kuntrattwali ewlenin li jinvolvu attivitajiet bħall-forniment ta’ materjali ta’ input, kapital, self, garanziji u tipi oħrajn ta’ finanzjament fi ħdan il-Grupp SAIC. Billi l-Grupp SAIC ma pprovda l-ebda informazzjoni dwar l-eżistenza ta’ din il-kumpanija, il-Kummissjoni ma setgħetx tkun fil-pożizzjoni li titlob tweġiba għall-kwestjonarju. Kieku din il-kumpanija pprovdiet tweġiba għall-kwestjonarju, il-Kummissjoni setgħet tistabbilixxi l-eżistenza, l-attivitajiet u r-rabtiet preċiżi bejn id-diversi kumpaniji relatati. Fin-nuqqas ta’ tali tweġiba għall-kwestjonarju u informazzjoni rilevanti, il-Kummissjoni kellha tirrikorri għall-fatti disponibbli biex tistabbilixxi s-sejbiet tagħha, li kienu jinkludu informazzjoni relatata mat-titoli garantiti b’assi maħruġa minn din il-kumpanija, li tqiesu bħala sors ta’ finanzjament preferenzjali kif ġie spjegat fil-premessi (368) u (369). Għal dawn ir-raġunijiet, din l-asserzjoni ġiet miċħuda.

(149)

Fin-nuqqas ta’ kwalunkwe kumment ulterjuri rigward l-applikazzjoni tad-dispożizzjonijiet tal-Artikolu 28(1) tar-Regolament bażiku dwar l-Grupp SAIC, il-premessi minn (318) sa (371) tar-Regolament provviżorju ġew ikkonfermati.

(150)

Wara d-divulgazzjoni provviżorja, il-Grupp Geely issottometta kummenti dwar l-applikazzjoni tal-fatti disponibbli.

(151)

L-ewwel nett, il-Grupp Geely tenna l-asserzjoni tiegħu li l-inabbiltà tiegħu li jeżerċita kontroll fuq CATL iwaqqfu milli jġiegħel lil din il-parti terza tipprovdi informazzjoni. Argumenta wkoll li meta produttur esportatur u parti terza jkunu marbutin biss permezz ta’ impriża konġunta, l-informazzjoni mill-parti terza ma tistax tissostanzja l-użu tal-fatti disponibbli.

(152)

Kif ġie ddikjarat fil-premessa (376) tar-Regolament provviżorju, il-Kummissjoni nnotat li CATL u l-Grupp Geely kienu stabbilew impriża konġunta għall-iżvilupp, il-produzzjoni u l-bejgħ ta’ ċelluli, moduli u pakketti tal-batteriji. Konsegwentement, dawn ġew rikonoxxuti legalment bħala sħab kummerċjali. Skont it-tifsira tal-Artikolu 127 tar-Regolament ta’ Implimentazzjoni tal-Kummissjoni (UE) 2015/2447 (25), dawn tqiesu bħala partijiet relatati u għalhekk iż-żewġ partijiet intalbu jissottomettu tweġiba għall-kwestjonarju dwar is-sussidji. Konsegwentement, l-asserzjoni ġiet miċħuda.

(153)

It-tieni, il-Grupp Geely asserixxa li t-talba għal informazzjoni dwar il-kumpaniji fi ħdan il-grupp li jipparteċipaw fil-finanzjament tal-BEV waslet fi stadju avvanzat tal-investigazzjoni u kienet nieqsa mill-ispeċifiċità.

(154)

Madankollu, il-Kummissjoni nnotat li l-kwestjonarju għall-produtturi esportaturi, li kien disponibbli mill-bidu tal-investigazzjoni f’Ottubru, diġà kien jinkludi talba għal informazzjoni dwar il-kumpaniji involuti f’attivitajiet ta’ finanzjament. Barra minn hekk, l-ittra tal-Kummissjoni datata s-6 ta’ Marzu 2024, speċifikament indikat lill-entitajiet li setgħu ġabru fondi permezz ta’ titoli garantiti b’assi (inklużi titoli ekoloġiċi garantiti b’assi), u mezzi oħrajn. Il-Kummissjoni tat ukoll estensjoni tal-iskadenza għall-għoti ta’ tali informazzjoni. Konsegwentement, l-asserzjoni ġiet miċħuda.

(155)

It-tielet, fir-rigward tal-għotjiet, il-Grupp Geely asserixxa li pprovda l-informazzjoni kollha disponibbli fit-tweġiba għall-kwestjonarju u matul il-verifiki fuq il-post. Il-fini tal-għotjiet ġie indikat fuq rendikonti bankarji, li ġew diskussi bir-reqqa matul iż-żjarat fuq il-post. Asserixxa wkoll li l-għotjiet relatati mal-assi jkopru esklużivament l-assi rilevanti, filwaqt li l-għotjiet mhux relatati mal-assi jappoġġaw l-operazzjonijiet ta’ kuljum kemm għall-BEVs kif ukoll għal dawk mhux BEVs.

(156)

Il-Kummissjoni nnotat, kif deskritt fil-premessi (300) u (380) tar-Regolament provviżorju, li abbażi tal-informazzjoni limitata disponibbli mir-rendikonti bankarji, ma setgħetx taċċerta l-iskemi ta’ sussidju sottostanti għall-programmi ta’ għotjiet relatati mal-prodott investigat. Barra minn hekk, il-GTĊ ma pprovdiex dettalji dwar l-għotjiet ad hoc mogħtija lill-gruppi inklużi fil-kampjun. Konsegwentement, l-asserzjoni tal-grupp ġiet miċħuda.

(157)

Il-Grupp Geely asserixxa wkoll li pprovda l-informazzjoni meħtieġa fi stadju bikri tal-investigazzjoni u li wera trasparenza sħiħa billi ddivulga l-istruttura u l-organizzazzjoni tal-operazzjonijiet tiegħu u spjegahom.

(158)

Il-Kummissjoni rrikonoxxiet l-isforzi tal-Grupp Geely biex iwieġeb għat-talba għal informazzjoni tagħha. Madankollu, il-Kummissjoni nnotat ukoll, kif deskritt fil-premessa (384) tar-Regolament provviżorju, li s-sottomissjoni tard ta’ ċerta informazzjoni fixklet il-kapaċità tagħha li tivverifika l-kompletezza u l-akkuratezza tagħha. B’mod partikolari, il-Kummissjoni ma setgħetx tivvalida l-provvisti ta’ input meta mqabbla mal-volum tal-produzzjoni u l-kostijiet tal-BEVs peress li l-informazzjoni dwar il-kostijiet ipprovduta kienet nieqsa mid-dettalji meħtieġa mitluba mill-entitajiet produtturi fil-kwestjonarju. Għalhekk, l-asserzjoni ġiet miċħuda.

(159)

Fir-rigward tad-drittijiet tal-użu tal-art, il-Grupp Geely asserixxa li l-kwartieri ġenerali tiegħu ma humiex relatati mal-produzzjoni u l-bejgħ tal-BEV, u dan jagħmilhom irrilevanti għall-investigazzjoni. Dan asserixxa wkoll li pprovda l-informazzjoni mitluba.

(160)

Kif ġie nnotat fil-premessa (387) tar-Regolament provviżorju, ġie stabbilit li l-kwartieri ġenerali jintużaw parzjalment għal attivitajiet relatati mal-BEVs. Konsegwentement, l-asserzjoni ġiet irrifjutata.

(161)

Fil-kummenti tiegħu dwar id-divulgazzjoni provviżorja, il-Grupp Geely tenna l-asserzjoni tiegħu li t-talbiet dwar proġetti futuri marbuta mal-produzzjoni tal-BEVs jaqbżu l-ambitu tal-investigazzjoni. Madankollu, il-Kummissjoni ċaħdet din l-asserzjoni bħala inkonsistenti, peress li, fl-istess ħin, f’waħda mis-sottomissjonijiet tagħha, entità tal-manifattura tal-grupp intalbet li tiżdied mal-lista tal-entitajiet produtturi tal-Grupp Geely (26) wara l-bidu tal-manifattura u l-esportazzjoni ta’ mudell ġdid tal-BEV wara l-perjodu ta’ investigazzjoni kif definit fil-premessa (9) tar-Regolament provviżorju.

(162)

Fin-nuqqas ta’ kwalunkwe kumment ulterjuri rigward l-applikazzjoni tad-dispożizzjonijiet tal-Artikolu 28(1) tar-Regolament bażiku dwar il-Grupp Geely, il-premessi minn (372) sa (387) tar-Regolament provviżorju ġew ikkonfermati.

(163)

Wara d-divulgazzjoni provviżorja, il-Grupp BYD ikkontesta l-applikazzjoni tal-Artikolu 28 dwar in-nuqqas ta’ risposta għall-kwestjonarju mill-fornitur LFP relatat tiegħu, Hunan Yuneng New Energy Materials Co. Ltd, abbażi tal-fatt li dan il-fornitur kien jaqa’ fid-definizzjoni ta’ “kumpanija relatata” lill-Grupp BYD għal parti biss tal-perjodu ta’ investigazzjoni. Il-Grupp BYD talab lill-Kummissjoni tinkludi l-kwantitajiet u l-prezzijiet ipprovduti mill-fornitur inkwistjoni fil-kalkolu tal-benefiċċju għal-LFP b’remunerazzjoni inqas minn adegwata. Din it-talba ġiet imtennija wara d-divulgazzjoni finali. Il-Grupp BYD tenna wkoll il-kummenti tiegħu li jikkontestaw l-applikazzjoni tal-Artikolu 28 għal kumpanija tal-Grupp BYD meqjusa bħala mhux relatata, filwaqt li qal ukoll li l-Ftehim konkluż bejn iż-żewġ partijiet kien jikkonċerna l-kapaċità tal-produzzjoni, u mhux l-iffissar tal-prezzijiet, u li l-prezzijiet tax-xiri ġew stabbiliti skont il-forzi tal-provvista u tad-domanda tas-suq. Il-Grupp BYD issottometta wkoll kopja ta’ tliet ordnijiet ta’ xiri f’perjodi ta’ żmien differenti bħala evidenza addizzjonali għall-asserzjonijiet tiegħu.

(164)

Il-Kummissjoni fakkret li l-ftehimiet dwar ix-xiri bejn il-Grupp BYD u Hunan Yuneng New Energy Materials Co., Ltd. sottomessi mill-Grupp BYD saru qabel il-bidu tal-perjodu ta’ investigazzjoni, u li x-xiri għalhekk sar bi prezzijiet li ġew stabbiliti meta l-Grupp BYD kien kumpanija relatata mal-fornitur tal-LFP tiegħu. Fir-rigward tal-allegazzjonijiet mill-Grupp BYD li l-ftehimiet bejn iż-żewġ partijiet stabbilew biss il-kapaċità tal-produzzjoni, u mhux il-prezzijiet, il-Kummissjoni tfakkar li, kif diġà ġie kopert fil-premessa (892) tar-Regolament provviżorju, dawn kien fihom dispożizzjonijiet relatati mal-prezz li jiżguraw li dan jibbenefika mill-provvista l-aktar favorevoli; jiġifieri li ma kienx iħallas prezz ogħla minn kwalunkwe klijent ieħor ta’ Hunan Yuneng New Energy Materials Co. Ltd., kif ukoll formula għall-iffissar tal-prezzijiet. Fir-rigward tal-allegazzjonijiet li dawk it-tranżazzjonijiet saru skont id-dinamika tas-suq, kif ġie nnotat fil-premessa (864) tar-Regolament provviżorju, is-suq Ċiniż tqies bħala distort minħabba l-politiki nazzjonali u speċifiċi għas-settur promulgati mill-fornituri domestiċi tal-batteriji u tal-LFP, b’mod partikolari dawk li jappartjenu għall-istrutturi tal-ipprezzar. Barra minn hekk, minħabba n-nuqqas ta’ kooperazzjoni mill-fornitur tal-materja prima, il-Kummissjoni ma setgħetx tivvaluta jekk il-prezz li bih il-Grupp BYD xtara l-LFP setax jitqies bħala prezz ta’ distakkament u, kif ġie spjegat fil-premessa (928) tar-Regolament provviżorju, il-Kummissjoni għalhekk issostitwiet dan il-prezz bil-prezz medju tax-xiri tal-LFP minn fornituri mhux relatati. Fid-dawl ta’ dan, peress li ma ġiet ipprovduta l-ebda informazzjoni verifikabbli, il-Kummissjoni ċaħdet din l-asserzjoni.

(165)

Fin-nuqqas ta’ kwalunkwe kumment ulterjuri rigward l-applikazzjoni tad-dispożizzjonijiet tal-Artikolu 28(1) tar-Regolament bażiku dwar il-Grupp BYD, il-premessi minn (388) sa (400) tar-Regolament provviżorju ġew ikkonfermati.

(166)

Fin-nuqqas ta’ kummenti, il-premessi minn (401) sa (406) tar-Regolament provviżorju ġew ikkonfermati.

(167)

Fin-nuqqas ta’ kwalunkwe kumment dwar is-sussidji u l-programmi ta’ sussidju kif ippreżentati fit-Taqsima 3.4 tar-Regolament provviżorju, il-premessa (407) tar-Regolament provviżorju ġiet ikkonfermata.

(168)

Wara d-divulgazzjoni provviżorja, il-GTĊ asserixxa li l-Kummissjoni kienet meħtieġa tanalizza l-karatteristiċi ewlenin, il-funzjonijiet, u r-relazzjoni mal-gvern ta’ kull entità (“fuq il-mertu tagħha stess”, kif kien) u tiddetermina jekk kull entità (individwalment; mhux bħala grupp) tistax tiġi kklassifikata bħala korp pubbliku (27).

(169)

F’dan ir-rigward, asserixxa li, ħlief għall-bank EXIM, il-Kummissjoni ma wettqitx tali valutazzjoni fuq bażi individwali iżda allegatament ibbażat fuq investigazzjonijiet tal-passat u dokumenti oħra disponibbli pubblikament u bbażat fuq valutazzjoni tal-ogħla livell tal-bank EXIM u xi banek oħrajn allegatament involuti fl-għoti ta’ finanzjament lill-industrija tal-BEV. Asserixxa ulterjorment li l-bank EXIM ma jwettaqx “funzjoni governattiva” (28) u li l-GTĊ ma jeżerċita l-ebda kontroll fuq il-bank EXIM. Abbażi ta’ dan, il-GTĊ ikkonkluda li l-Kummissjoni ma kinitx ibbażat il-konklużjonijiet tagħha fuq evidenza robusta u raġunament xieraq.

(170)

Il-Kummissjoni analizzat mhux biss is-sitwazzjoni tal-bank EXIM, iżda wkoll dik tal-banek kummerċjali Ċiniżi l-oħrajn kollha tal-Istat (“SOCBs”) li pprovdew finanzjament preferenzjali lis-settur tal-BEV, u li ma kkooperawx. Fin-nuqqas ta’ kooperazzjoni minn SOCBs oħrajn, il-Kummissjoni kellha terġa’ lura għall-fatti disponibbli biex tagħmel is-sejbiet tagħha f’dan ir-rigward kif konkluż fil-premessa (460) tar-Regolament provviżorju. Għal dawn ir-raġunijiet, kif ġie spjegat fil-premessa (464) tar-Regolament provviżorju, il-Kummissjoni ddeċidiet li tuża l-fatti disponibbli biex tiddetermina jekk dawk l-istituzzjonijiet finanzjarji tal-istat kinux jikkwalifikaw bħala korpi pubbliċi. Abbażi ta’ dan, l-asserzjoni ġiet miċħuda u l-konklużjonijiet misluta fil-premessi minn (466) sa (467) tar-Regolament provviżorju ġew ikkonfermati.

(171)

L-ewwel nett, il-Kummissjoni ddeterminat is-sjieda tal-Istat f’kull wieħed mill-ħmistax-il SOCB li pprovdew finanzjament preferenzjali lill-gruppi inklużi fil-kampjun individwalment, wara li rreferiet għall-qafas normattiv eżistenti li fih joperaw l-SOCBs fil-premessi (461) u (462) tar-Regolament provviżorju. Eżempji speċifiċi f’dan ir-rigward issemmew fil-premessi (430) u (431) tar-Regolament provviżorju, għal dawk il-banek li flimkien kienu jirrappreżentaw sehem kbir ħafna mis-settur finanzjarju tar-RPĊ f’termini ta’ assi sa tmiem l-2021/2022. Barra minn hekk, fil-premessa (463) tar-Regolament provviżorju, il-Kummissjoni pprovdiet evidenza tas-sjieda tal-Istat għall-SOCBs l-oħrajn li pprovdew finanzjament lis-settur tal-BEV abbażi ta’ informazzjoni disponibbli pubblikament, bħal rapporti annwali riċenti.

(172)

Wara d-divulgazzjoni finali, il-GTĊ argumenta li d-determinazzjoni tal-Kummissjoni dwar il-parteċipazzjoni azzjonarja (tal-Istat) kif elaborata fil-premessi (430) u (431) tar-Regolament provviżorju u fil-premessa (170) ta’ dan ir-Regolament ma kinitx ekwivalenti għal valutazzjoni ta’ entità għal kull entità u ma kinitx biżżejjed biex jiġi konkluż li l-istituzzjonijiet finanzjarji inkwistjoni huma tal-Istat. Il-GTĊ asserixxa wkoll li l-Kummissjoni kienet allegatament ikkonkludiet li l-GTĊ ma kellu parteċipazzjoni azzjonarja fl-ebda istituzzjoni finanzjarja (SOCBs).

(173)

Fin-nuqqas ta’ elementi ta’ sostenn ġodda li jmorru kontra l-konklużjoni tal-Kummissjoni dwar il-parteċipazzjoni azzjonarja tal-Istat, il-Kummissjoni żammet il-konklużjoni tagħha li hija bbażata fuq analiżi bir-reqqa tal-informazzjoni fil-fajl. Madankollu, il-ġbir tal-informazzjoni ġie affettwat min-nuqqas ta’ kooperazzjoni mill-istituzzjonijiet finanzjarji Ċiniżi ħlief għall-bank EXIM li kkoopera parzjalment biss u b’hekk il-Kummissjoni kellha tibbaża fuq il-fatti disponibbli. Barra minn hekk, il-Kummissjoni ma qablitx mal-asserzjoni tal-GTĊ li l-Kummissjoni kienet allegatament ammettiet li l-GTĊ ma kienx se jkollu parteċipazzjoni azzjonarja fil-banek kummerċjali kollha tal-Istat. L-inferenza tal-GTĊ ma hijiex appoġġata u tmur kontra l-prinċipju li l-SOCB, essenzjalment, huwa tal-Istat.

(174)

Imbagħad, il-Kummissjoni stabbiliet kontroll sinifikanti tal-GTĊ fuq l-SOCBs. Ġiet ipprovduta evidenza ta’ indikazzjonijiet formali ta’ kontroll fuq l-SOCBs permezz tal-istruttura ta’ governanza tal-banek. Tabilħaqq, kif imsemmi fil-premessi minn (431) sa (432) tar-Regolament provviżorju, mill-2017 l-Artikoli ta’ Assoċjazzjoni tal-SOCBs kollha integraw rwol ċar għall-Partit Komunista Ċiniż (“CCP”, Chinese Communist Party) fil-proċess ta’ superviżjoni u teħid ta’ deċiżjonijiet tal-istituzzjonijiet finanzjarji. Fl-aħħar nett, l-evidenza dwar il-kontroll sinifikanti tal-GTĊ permezz tal-qafas regolatorju ġiet stabbilita fit-Taqsima 3.5.1.5 tar-Regolament provviżorju. Il-Kummissjoni nnotat li l-SOCBs kollha joperaw taħt l-istess struttura ta’ governanza u qafas regolatorju bħall-bank EXIM.

(175)

Fin-nuqqas ta’ tweġiba mill-GTĊ dwar l-istruttura tal-governanza, il-valutazzjoni tar-riskju jew eżempji relatati ma’ self speċifiku lill-industrija tal-BEV, il-Kummissjoni kellha wkoll tirrikorri għal fatti disponibbli. Għall-kuntrarju tal-asserzjoni tal-GTĊ, il-Kummissjoni ma rreferietx biss għal investigazzjonijiet tal-passat iżda wkoll għal rapporti bir-reqqa (29) maħruġa matul il-perjodu ta’ investigazzjoni jew ftit wara u kkonfermat il-konklużjonijiet misluta f’investigazzjonijiet preċedenti. Fi kwalunkwe każ, sa fejn huma kkonċernati s-sejbiet tal-investigazzjonijiet tal-passat, il-Kummissjoni qieset li dawn kienu għadhom validi, u li l-GTĊ ma pprovda l-ebda element li jikkontradixxi tali konklużjonijiet. Abbażi ta’ dawn l-elementi kollha, il-Kummissjoni ċaħdet din l-asserzjoni u kkonfermat is-sejbiet tagħha.

(176)

Barra minn hekk, sa fejn hija kkonċernata l-analiżi superfiċjali allegata tas-sjieda, il-Kummissjoni rreferiet għall-informazzjoni pprovduta mill-GTĊ matul iż-żjara ta’ verifika meta allegatament ma kienx f’pożizzjoni li jipprovdi informazzjoni dwar l-azzjonist li għandu qrib id-90 % tal-kapital imħallas tal-bank EXIM; jiġifieri Wutongshu Investment Platform Co., Ltd. Skont l-informazzjoni tal-Kummissjoni, abbażi ta’ informazzjoni disponibbli pubblikament (30), tali pjattaforma ta’ investiment hija 100 % proprjetà mill-awtoritajiet Ċiniżi permezz tal-Amministrazzjoni tal-istat tal-Kambju (“SAFE”) taċ-Ċina. F’dan il-kuntest, il-Kummissjoni kellha wkoll tirrikorri għall-fatti disponibbli biex tistabbilixxi s-sejbiet tagħha u “timla l-lakuni” li tħallew min-nuqqas ta’ kooperazzjoni mill-GTĊ. Fuq din il-bażi, din l-asserzjoni ġiet miċħuda.

(177)

Wara d-divulgazzjoni finali, il-GTĊ asserixxa wkoll li l-Kummissjoni ma kinitx analizzat jekk il-gvern kienx iddelega awtorità governattiva lill-entitajiet inkwistjoni u rrefera għall-ġurisprudenza tad-WTO (31). F’dan ir-rigward, il-Kummissjoni kkunsidrat il-ġurisprudenza applikabbli li tgħid li, “Is-sjieda tal-Istat, filwaqt li ma hijiex kriterju deċiżiv, tista’ sservi bħala evidenza li tindika, flimkien ma’ elementi oħrajn, id-delegazzjoni tal-awtorità governattiva.” ikkonfermat li hija kienet aġixxiet skont il-qafas legali applikabbli billi analizzat is-sjieda tal-Istat u elementi oħrajn bħall-indizji formali ta’ kontroll u l-qafas regolatorju.

(178)

Wara d-divulgazzjoni provviżorja, il-GTĊ indika wkoll li l-kapaċità ta’ gvern li jinnomina jew li jimpjega uffiċjali jew persunal f’entità ma hijiex biżżejjed biex juri kontroll u li jenħtieġ li juri jekk dawn in-“nomini” jaġixxux b’mod indipendenti. Barra minn hekk, żied li d-dikjarazzjonijiet tal-Kummissjoni li l-“l-GTĊ kien jibbaża fuq dan il-qafas normattiv sabiex jeżerċita kontroll b’mod sinifikattiv fuq l-imġiba tal-bank tal-Istat li kkoopera kull meta kien qed jipprovdi self lill-industrija tal-BEVs” u l-atti tal-bank EXIM b’“mod preskritt mill-GTĊ” huma nieqsa minn evidenza ta’ sostenn.

(179)

Fir-rigward tal-asserzjonijiet ta’ hawn fuq, il-Kummissjoni rreferiet għall-premessi (426) u (427) tar-Regolament provviżorju, li jipprevedu li “l-Istat jinnomina direttament il-maniġment tal-bank EXIM. Il-Bord tas-Superviżuri jinħatar mill-Kunsill” u li “l-Kumitat tal-Partit tal-bank EXIM għandu rwol ewlieni u politiku kruċjali sabiex jiżgura li l-politiki u l-iskjerament maġġuri tal-Partit u tal-istat jiġu implimentati mill-bank EXIM. It-tmexxija tal-Partit hija integrata fl-aspetti kollha tal-governanza korporattiva”. F’dan il-kuntest strett, il-Kummissjoni qieset li l-membri tal-maniġment u tal-bord tas-superviżuri nnominati jew maħtura mill-Istat jingħataw struzzjonijiet biex iwettqu azzjoni tal-gvern f’konformità mal-politiki tal-Partit u mal-iżviluppi ewlenin. Barra minn hekk, jenħtieġ li jiġi nnotat li l-Kummissjoni ma bbażatx biss fuq il-kapaċità tal-GTĊ li jinnomina persunal f’entità biex turi li l-GTĊ eżerċita kontroll fuq l-SOCBs.

(180)

Wara d-divulgazzjoni finali, il-GTĊ argumenta li l-Kummissjoni ma wettqitx valutazzjoni ta’ entità b’entità fir-rigward tal-ġestjoni tal-istituzzjonijiet finanzjarji, għajr il-bank EXIM.

(181)

F’dan ir-rigward, il-Kummissjoni rreferiet għall-premessi (431) sa (433) tar-Regolament provviżorju li ma japplikawx esklużivament għall-bank EXIM iżda għall-istituzzjonijiet finanzjarji kollha tal-Istat fir-RPĊ. Minħabba din ir-raġuni, valutazzjoni ta’ entità b’entità bħal din ma kinitx meqjusa neċessarja. Fuq din il-bażi, din l-asserzjoni ġiet miċħuda.

(182)

Wara d-divulgazzjoni provviżorja, il-GTĊ qal ukoll li l-Kummissjoni ma tistax tibbaża fuq l-Artikolu 34 tal-Liġi tal-banek biex tikkonkludi li l-banek huma meħtieġa jaġixxu b’ċertu mod jew li l-bank EXIM huwa kkontrollat b’mod sinifikanti mill-GTĊ u li jenħtieġ li jkollu qari aktar komprensiv tal-Liġi tal-Banek kollha, u l-Artikolu 4, 5 u 41 tagħha, li jipprojbixxi lill-GTĊ milli jeżerċita kwalunkwe forma ta’ kontroll fuq id-deċiżjonijiet tal-banek u jiżgura li l-banek joperaw b’mod indipendenti.

(183)

Il-GTĊ irrefera wkoll għall-Artikolu 15 tar-Regoli Ġenerali dwar is-Self li jistipula li “f’konformità mal-politika tal-istat, id-dipartimenti rilevanti jistgħu jissussidjaw l-imgħaxijiet fuq is-self, bil-ħsieb li jippromwovu t-tkabbir ta’ ċerti industriji u l-iżvilupp ekonomiku f’xi oqsma” u indika li tali dispożizzjoni ma wrietx kontroll sinifikanti tal-gvern jew l-eżerċitar ta’ awtorità governattiva.

(184)

Il-GTĊ ikkummenta wkoll li d-Deċiżjoni 40 kienet aktar bħal dokument ta’ gwida u li l-Artikolu 17 ta’ din id-Deċiżjoni “jirrikjedi li l-banek jirrispettaw il-prinċipji tal-kreditu” u li l-appoġġ ta’ kreditu huwa limitat “biss għal proġetti ta’ investiment li jappartjenu għall-kategorija mħeġġa” fejn il-Kummissjoni għandha l-obbligu legali li turi li “tali bonds” huma relatati mal-proġetti ta’ investiment allegatament imħeġġa.

(185)

Il-GTĊ irrefera wkoll għall-Miżuri Provviżorji dwar l-Amministrazzjoni tas-Self Kapitali tax-Xogħol kif ipprovduti fit-tweġiba tiegħu għall-kwestjonarju u indika l-fatt li l-aċċettazzjoni rilevanti tal-applikazzjonijiet għas-self, il-verifika, l-eżami u l-approvazzjoni ma jirreferu għall-ebda rekwiżit dwar il-kunsiderazzjoni tal-politiki industrijali allegati.

(186)

Il-GTĊ indika wkoll li l-Kummissjoni ma tistax tibbaża fuq l-“għanijiet ġenerali” tal-GTĊ (li jikkwota l-Pjan ta’ Azzjoni ta’ 3 Snin tas-CBIRC għas-snin 2020 sal-2022) u hija meħtieġa turi li xi azzjoni konkreta tal-gvern tirriżulta fil-kontroll tiegħu tal-entità (korp pubbliku) inkwistjoni u ma tistax tibbaża fuq il-fatt li istituzzjoni finanzjarja ssegwi jew tikkonforma mal-liġi tal-art bħala ekwivalenti għall-kontroll tal-gvern.

(187)

Il-GTĊ indika wkoll li l-qari tal-Kummissjoni tar-rapport annwali tal-bank EXIM għall-2022 kien selettiv u li ċerti partijiet ittieħdu barra mill-kuntest u jikkonċernaw kunsiderazzjonijiet ta’ stabbiltà ekonomika ġenerali tal-pajjiż mhux konnessi mill-avvanz tal-politika industrijali li biha l-bank EXIM ipprovda finanzjament lil diversi setturi.

(188)

Sa fejn huma kkonċernati n-natura u l-effett legali tal-Artikoli 4, 5, 31, u 41 tal-Liġi tal-Banek, l-Artikolu 15 tar-Regoli Ġenerali dwar is-Self, l-Artikolu 19 tad-Deċiżjoni 40, u l-Miżuri Provviżorji dwar l-Amministrazzjoni ta’ Self ta’ Kapital Operatorju, il-Kummissjoni rreferiet għall-premessi (449) u (450) tar-Regolament provviżorju fejn diġà indirizzat dawn l-asserzjonijiet. Fin-nuqqas ta’ elementi ġodda, l-asserzjonijiet ta’ hawn fuq ġew irrifjutati.

(189)

Il-GTĊ ipprovda wkoll li s-sjieda tal-istat ma kinitx ugwali għall-kunċett ta’ “korp pubbliku” u li l-kapaċità tal-gvern li jaħtar uffiċjali jeħtieġ li tiġi kkomplementata sabiex dawn il-persuni maħtura mill-gvern ma jaġixxux b’mod indipendenti. F’dan ir-rigward, il-GTĊ irrefera għall-Artikolu 5 tar-“Regolamenti Interim tal-Bord tas-Superviżuri tal-Istituzzjonijiet Finanzjarji tal-Istat Ewlenin” u indika għall-fatt li l-Bord tas-Superviżuri “ma għandux jipparteċipa fl-attivitajiet tat-teħid ta’ deċiżjonijiet kummerċjali u tal-ġestjoni tan-negozju tal-istituzzjoni finanzjarja tal-istat” biex jenfasizza li ma hemm l-ebda kontroll istituzzjonali.

(190)

Il-Kummissjoni ma qablitx ma’ din l-asserzjoni u rreferiet għall-premessa (178) ta’ dan ir-Regolament li biha l-Kummissjoni qieset li l-membri tal-maniġment u tal-bord tas-superviżuri nnominati jew maħtura mill-Istat jingħataw struzzjonijiet biex iwettqu azzjoni tal-gvern f’konformità mal-politiki tal-Partit u mal-iżviluppi ewlenin. Fuq din il-bażi, din l-asserzjoni ġiet miċħuda.

(191)

Wara d-divulgazzjoni finali, il-GTĊ argumenta li n-nomina tal-maniġment u tal-bord tas-superviżuri tal-bank EXIM mill-Istat ma kinitx timplika li dawn l-individwi ngħataw struzzjonijiet biex iwettqu azzjoni tal-gvern f’konformità mal-politiki u mal-iżviluppi ewlenin tal-Partit. Il-GTĊ argumenta wkoll li l-Kummissjoni injorat evidenza dokumentata li allegatament turi li l-istituzzjonijiet finanzjarji u l-membri tal-maniġment tagħhom huma meħtieġa jaġixxu b’mod indipendenti. Bl-istess mod, il-GTĊ argumenta li l-evidenza dokumentata uriet li skont il-liġi, il-Bord tas-Superviżuri ma għandux jinterferixxi fit-teħid tad-deċiżjonijiet tal-istituzzjonijiet finanzjarji tal-Istat.

(192)

F’dan ir-rigward, il-Kummissjoni rreferiet għall-premessa (178) ta’ dan ir-Regolament li biha l-Kummissjoni qieset li l-membri tal-maniġment u tal-bord tas-superviżuri nnominati jew maħtura mill-Istat jingħataw struzzjonijiet biex iwettqu azzjoni tal-gvern f’konformità mal-politiki tal-Partit u mal-iżviluppi ewlenin. Barra minn hekk, il-Kummissjoni qieset ukoll li s-superviżuri jwettqu azzjoni tal-gvern f’konformità mal-politiki tal-Partit u mal-iżviluppi ewlenin fil-qafas tal-funzjonijiet u tar-responsabbiltajiet tagħhom. Abbażi ta’ dan, dawn l-asserzjonijiet ġew miċħuda.

(193)

Wara d-divulgazzjoni provviżorja, il-GTĊ ipprovda wkoll li l-Pjan ta’ Żvilupp tal-Industrija tal-Vetturi bl-Enerġija Ġdida 2012-2020 (“il-pjan tal-2012-2020”) ma jispeċifika l-ebda ammont ta’ finanzjament li jrid jingħata lis-setturi konċernati u li ma kienx operazzjonali matul il-perjodu ta’ investigazzjoni.

(194)

Il-Kummissjoni qieset il-fatt li l-pjan ma jispeċifika l-ebda ammont ta’ finanzjament irrilevanti. Il-Kummissjoni nnotat ukoll li l-pjan tal-2012-2020 huwa l-predeċessur tal-Pjan ta’ Żvilupp tal-Industrija tal-Vetturi bl-Enerġija Ġdida (2021-2035), li sussegwentement segwa u li ż-żewġ pjanijiet jirrelataw mas-settur inkluż il-prodott taħt investigazzjoni. Fi kwalunkwe każ, kif jista’ jidher mit-Taqsima 3.2 tar-Regolament provviżorju, il-pjan tal-2012-2020 ma huwiex l-uniku wieħed li jipprevedi finanzjament preferenzjali lill-industriji mħeġġa bħall-industrija tal-BEV.

(195)

Il-GTĊ indika wkoll li l-Kummissjoni indikat biss ċerti elementi tal-Avviż tal-Ministeru tal-Finanzi dwar il-metodu ta’ evalwazzjoni tal-prestazzjoni tal-Banek kummerċjali, maħruġ fil-15 ta’ Diċembru 2020 u injorat il-fatt li dan l-Avviż jirreferi wkoll għal aspetti bħal: li “jagħti lok għar-rwol deċiżiv tal-mekkaniżmu tas-suq” biex jappoġġa l-asserzjoni tiegħu li l-istituzzjonijiet finanzjarji ma humiex meħtieġa jagħtu attenzjoni lill-kunsiderazzjonijiet tal-politika tal-industrija, għall-esklużjoni ta’ kunsiderazzjonijiet kummerċjali (orjentati lejn is-suq).

(196)

Abbażi ta’ dan, il-GTĊ ikkonkluda li l-Kummissjoni ma kinitx uriet li l-“qafas normattiv ma kien iħalli l-ebda marġni ta’ manuvrar lill-maniġers u lis-superviżuri tal-bank dwar jekk kellhomx isegwu dan il-qafas jew le fir-rigward tal-produtturi esportaturi fil-kampjun, li għalhekk kien ipoġġi l-ġestjoni ta’ dan il-bank f’pożizzjoni ta’ dipendenza”.

(197)

Jekk il-Kummissjoni xorta tikkonkludi li l-istituzzjonijiet finanzjarji huma tabilħaqq korpi pubbliċi, il-GTĊ sostna li l-Kummissjoni ma kinitx stabbiliet x’funzjoni governattiva (jekk kien hemm) kienu jeżerċitaw.

(198)

Fl-istess kuntest, il-GTĊ asserixxa li s-self ta’ politika ma jeżistix u li ma hemm l-ebda interferenza tal-GTĊ fil-proċess tal-għoti ta’ self li permezz tiegħu, il-banek joperaw b’mod indipendenti u abbażi ta’ prinċipji orjentati lejn is-suq. Il-GTĊ irrepeta wkoll l-asserzjonijiet tiegħu li jiċħdu d-determinazzjoni tal-Kummissjoni li s-SOCBs huma korpi pubbliċi.

(199)

Barra minn hekk, il-GTĊ irrefera għas-sejbiet tal-Kummissjoni li l-produtturi tal-BEV irċevew self b’“rati tal-imgħax taħt jew qrib ir-Rata Prima tas-Self (“LPR”, Loan Prime Rate)” (ara l-premessa (486) tar-Regolament provviżorju) u argumenta li tali rata hija attwalment ibbażata fuq kwotazzjoni ta’ banek abbażi tar-rati tas-self attwali implimentati għall-klijenti tal-ogħla kwalità billi jitqiesu l-kost tal-fondi, il-provvista u d-domanda tas-suq, il-primjums tar-riskju u fatturi oħrajn.

(200)

Il-Kummissjoni qieset li kienet stabbiliet liema funzjonijiet governattivi kienu eżerċitati mill-SOCBs; jiġifieri l-għoti ta’ finanzjament preferenzjali lil settur imħeġġeġ; jiġifieri s-settur tal-BEV f’konformità mal-pjanijiet nazzjonali applikabbli kif definit fit-Taqsima 3.2 tar-Regolament provviżorju. Barra minn hekk, fin-nuqqas ta’ kooperazzjoni minn kwalunkwe bank, ħlief għall-kooperazzjoni parzjali mill-bank EXIM, il-Kummissjoni ma kinitx f’pożizzjoni li tivverifika l-asserzjonijiet li għamel il-GTĊ fir-rigward ta’ elementi importanti bħall-valutazzjoni tal-affidabbiltà kreditizja.

(201)

Għall-kuntrarju, kif innotat fil-premessa (453) tar-Regolament provviżorju, il-Kummissjoni stabbiliet li t-tliet gruppi ta’ produtturi esportaturi inklużi fil-kampjun kienu bbenefikaw minn self b’rati tal-imgħax taħt jew qrib ir-Rata Prima tas-Self (“LPR”), rata li suppost kienet disponibbli għall-klijenti tal-ogħla kwalità, filwaqt li tqiesu l-kost tal-fondi, il-provvista u d-domanda tas-suq, il-primjums tar-riskju u fatturi oħrajn (32). Il-fatt li t-tliet produtturi inklużi fil-kampjun ibbenefikaw minn rati saħansitra aktar baxxi minn dawk disponibbli għall-klijenti “tal-ogħla kwalità” ikkonferma li l-eżistenza ta’ qafas normattiv li fih l-istituzzjonijiet finanzjarji ma jaħdmux b’mod indipendenti iżda jingħataw struzzjonijiet biex jimplimentaw politiki nazzjonali billi jipprovdu finanzjament preferenzjali lill-industrija tal-BEV kif deskritt fil-premessa (455) tar-Regolament provviżorju. Abbażi ta’ dan, l-asserzjonijiet ta’ hawn fuq ġew miċħudin.

(202)

Wara d-divulgazzjoni finali, il-GTĊ argumenta li l-Kummissjoni kienet għażlet b’mod selettiv informazzjoni minn diversi dokumenti biex tappoġġa l-fehma tagħha li l-GTĊ kien ħoloq qafas normattiv sabiex jeżerċita kontroll sinifikattiv fuq l-istituzzjonijiet finanzjarji. Fl-indirizzar tal-asserzjoni tal-GTĊ, il-GTĊ argumenta li l-Kummissjoni sempliċement affermat mill-ġdid l-argumenti tal-GTĊ iżda injorat l-evidenza dokumentata.

(203)

Il-Kummissjoni ma qablitx ma’ din l-asserzjoni. Essenzjalment, il-Kummissjoni qieset li kienet indirizzat l-asserzjoni tal-GTĊ u ma kinitx “għażlet” b’mod selettiv informazzjoni biex tappoġġa l-konklużjoni tagħha relatata mal-qafas normattiv iżda minflok ibbażat tali konklużjoni fuq analiżi bir-reqqa tal-elementi dokumentati li rriżultaw mid-dokumenti li jappartjenu għall-qafas legali li fih joperaw l-istituzzjonijiet finanzjarji, id-dokumenti ta’ politika nazzjonali u settorjali, l-informazzjoni miġbura mill-produtturi tal-BEVs li kkooperaw, is-sejbiet mill-investigazzjonijiet preċedenti u l-fatti disponibbli fid-dawl tan-nuqqas ta’ kooperazzjoni mill-banek Ċiniżi. Fin-nuqqas ta’ kooperazzjoni mill-istituzzjonijiet finanzjarji Ċiniżi wara li l-GTĊ ma pprovdiex il-kwestjonarju ad hoc lill-istituzzjonijiet finanzjarji kkonċernati, il-Kummissjoni ma kinitx f’pożizzjoni li tikkonferma l-allegata “evidenza bil-miktub” sottomessa mill-GTĊ. Abbażi ta’ dan, dawn l-asserzjonijiet ġew miċħuda.

(204)

Wara d-divulgazzjoni provviżorja, is-CAAM argumentat li l-banek kummerċjali ma jistgħux jitqiesu bħala istituzzjonijiet pubbliċi, peress li l-banek iwettqu operazzjonijiet orjentati lejn is-suq bl-għan li jiggwadanjaw profitti, u li l-kumpaniji tal-karozzi jwettqu finanzjament permezz ta’ dawn il-banek kummerċjali f’konformità mal-mekkaniżmi tas-suq.

(205)

Kif deskritt fit-Taqsima 3.5.1.1 tar-Regolament provviżorju, il-Kummissjoni kkonkludiet li l-istituzzjonijiet finanzjarji tal-istat huma korpi pubbliċi skont it-tifsira tal-Artikolu 2(b) moqri flimkien mal-Artikolu 3(1)(a)(i) tar-Regolament bażiku u li, fi kwalunkwe każ, huma meqjusa bħala inkarigati jew mogħtija direzzjonijiet mill-GTĊ biex iwettqu funzjonijiet normalment mogħtija lill-gvern skont it-tifsira tal-Artikolu 3(1)(a)(iv) tar-Regolament bażiku. Fit-Taqsima 3.5.1.9 tar-Regolament provviżorju, il-Kummissjoni kkonkludiet li l-istituzzjonijiet finanzjarji privati huma wkoll inkarigati u mogħtija direzzjonijiet mill-gvern. Barra minn hekk, is-sejbiet ta’ din l-investigazzjoni, kif ukoll is-sejbiet tal-Kummissjoni f’investigazzjonijiet preċedenti (33) dwar l-istess programm ta’ sussidju ma appoġġawx l-asserzjoni li l-banek joperaw skont il-mekkaniżmi tas-suq u ma jqisux il-politika u l-pjanijiet tal-gvern meta jagħmlu deċiżjonijiet dwar self. Għalhekk, l-asserzjoni ġiet miċħuda.

(206)

Fin-nuqqas ta’ kummenti ulterjuri, il-konklużjonijiet misluta fil-premessi minn (409) sa (467) tar-Regolament provviżorju ġew ikkonfermati.

(207)

Wara d-divulgazzjoni provviżorja, il-GTĊ sostna li l-Kummissjoni kienet ibbażat fuq l-istess elementi biex turi li l-istituzzjonijiet finanzjarji ġew inkarigati u mogħtija direzzjonijiet mill-GTĊ u ċaħad tali sejba. Dan irrefera għall-ġurisprudenza tad-WTO biex jasserixxi li l-inkarigu/id-direzzjoni u l-analiżijiet tal-korpi pubbliċi jvarjaw u li l-kunċett ta’ delega (fil-każ ta’ inkarigu) jew ta’ kmand (fil-każ ta’ direzzjoni) irid jieħu l-forma ta’ att affermattiv (34). Innota wkoll li l-inkarigu u d-direzzjoni (i) ma jistgħux ikunu prodott sekondarju tar-regolamentazzjoni tal-gvern; (ii) jimplikaw rwol aktar attiv minn sempliċi atti ta’ inkoraġġiment; u (iii) jeħtieġ li jintwerew abbażi ta’ evidenza li gvern “jagħti responsabbiltà” f’każ ta’ inkarigu jew “jeżerċita l-awtorità tiegħu fuq korp privat biex iwettaq kontribuzzjoni finanzjarja” fil-kuntest tad-direzzjoni (35). F’dan ir-rigward, il-GTĊ asserixxa li l-Kummissjoni kienet naqset milli tidentifika kwalunkwe “funzjoni normalment mogħtija lill-gvern” li l-istituzzjonijiet finanzjarji qegħdin jiġu fdati biha/mogħtija direzzjonijiet biex iwettqu. Barra minn hekk, il-GTĊ indika l-valutazzjoni ta’ jekk (u kif) il-GTĊ “[ta] responsabbiltà lil korp privat – jew eżerċita l-awtorità tiegħu fuq korp privat – sabiex jagħmel kontribuzzjoni finanzjarja” u n-nuqqas ta’ “konnessjoni li tista’ tintwera” bejn il-GTĊ u l-imġiba tal-atturi privati. Il-GTĊ sostna wkoll li l-Kummissjoni ma kinitx wettqet valutazzjoni ta’ entità b’entità ta’ inkarigu/direzzjoni għall-istituzzjonijiet finanzjarji.

(208)

F’dan ir-rigward, il-Kummissjoni qieset li l-elementi li jippermettu li jiġi konkluż li l-banek tal-Istat kienu korpi pubbliċi, iġġustifikaw ukoll l-eżistenza ta’ inkarigu u ta’ direzzjoni fil-livell ta’ istituzzjoni finanzjarja privata. B’mod partikolari, kif ġie spjegat fil-premessi minn (471) sa (473) tar-Regolament provviżorju, il-Kummissjoni stabbiliet l-eżistenza ta’ qafas normattiv li japplika għall-istituzzjonijiet finanzjarji kollha fir-RPĊ, kemm jekk privati kif ukoll jekk tal-Istat u li rriżulta f’kundizzjonijiet simili. Tali sejbiet huma wkoll f’konformità ma’ dawk milħuqa f’investigazzjonijiet preċedenti.

(209)

Fir-rigward tal-valutazzjoni ta’ entità b’entità, il-Kummissjoni fakkret li ma rċeviet l-ebda tweġiba għall-kwestjonarju minn istituzzjonijiet finanzjarji privati għalhekk kellha tibbaża fuq il-fatti disponibbli.

(210)

Il-GTĊ sostna wkoll li l-fatt li kundizzjonijiet simili applikaw għal kuntratti ta’ self ma’ istituzzjonijiet finanzjarji privati bħal fil-każ ta’ istituzzjonijiet finanzjarji sjieda tal-Istat juri li s-suq huwa kompetittiv u li l-banek kollha huma soġġetti għall-istess trattament.

(211)

Il-Kummissjoni fakkret li fin-nuqqas ta’ kooperazzjoni mill-banek, kemm privati kif ukoll tal-istat, il-Kummissjoni kellha tibbaża fuq il-fatti disponibbli. Il-fatt li kien hemm trikkib fir-rati juri li l-banek privati pprovdew ukoll self taħt it-termini tas-suq, u mhux l-oppost.

(212)

Wara d-divulgazzjoni finali, il-GTĊ tenna l-asserzjoni tiegħu li l-konklużjoni tal-Kummissjoni relatata ma’ kundizzjonijiet ta’ self simili kif żviluppat fil-premessa (472) tar-Regolament provviżorju kienet żbaljata, peress li l-fatti effettivament urew li s-suq finanzjarju taċ-Ċina kien kompletament kompetittiv.

(213)

Il-Kummissjoni kkonfermat il-valutazzjoni tagħha u qieset li l-eżistenza ta’ kundizzjonijiet simili fil-fatt turi li l-SOCBs u l-istituzzjonijiet finanzjarji privati qegħdin joperaw fl-istess qafas normattiv u jingħataw struzzjonijiet u jiġu fdati biex jipprovdu finanzjament preferenzjali lill-industrija tal-BEVs, li tagħmel parti minn settur imħeġġeġ. Fi kwalunkwe każ, fin-nuqqas ta’ kooperazzjoni mill-istituzzjonijiet finanzjarji ħlief għall-bank EXIM li kkoopera parzjalment biss, il-Kummissjoni kellha tibbaża fuq il-fatti disponibbli, li jikkonfermaw il-valutazzjoni tal-Kummissjoni filwaqt li l-GTĊ ma ssottomettiex evidenza ta’ sostenn li tindika bil-kontra, li tista’ tiġi vverifikata fil-qafas ta’ din l-investigazzjoni. Fuq din il-bażi, din l-asserzjoni ġiet miċħuda.

(214)

Wara d-divulgazzjoni finali, il-GTĊ argumenta li l-Kummissjoni kienet naqset milli tissodisfa l-istandard legali għall-inkarigu/għad-direzzjoni, u ma wrietx li l-GTĊ kien ta r-responsabbiltà lill-istituzzjonijiet finanzjarji privati, jew eżerċita l-awtorità tiegħu fuq l-istituzzjonijiet finanzjarji privati, biex jipprovdi finanzjament lill-produtturi tal-BEVs. B’mod partikolari, huwa argumenta li l-konklużjoni tal-Kummissjoni dwar l-eżistenza ta’ qafas normattiv hija bbażata fuq informazzjoni magħżula b’mod selettiv u mhux fuq l-evidenza kollha dokumentata. Huwa argumenta wkoll li, minbarra l-valutazzjoni tal-korp pubbliku tagħha li tibbaża fuq in-natura ta’ entità u fuq ir-relazzjoni tagħha ma’ gvern, il-Kummissjoni kellha wkoll turi rabta bejn l-imġiba tal-entità privata u tal-gvern (36).

(215)

Il-Kummissjoni rreferiet għall-premessa (203) ta’ dan ir-Regolament fejn diġà indirizzat l-asserzjoni relatata mal-allegata “għażla b’mod selettiv” fir-rigward tal-qafas normattiv. Fir-rigward tar-rabta bejn l-imġiba tal-entità privata u tal-gvern, il-Kummissjoni rreferiet għall-eżistenza ta’ qafas normattiv applikabbli għall-SOCBs kif huwa deskritt fil-premessa (445) tar-Regolament provviżorju, li japplika wkoll għall-banek privati (ara l-premessa (208) ta’ dan ir-Regolament). Permezz tal-eżistenza ta’ tali qafas, l-istituzzjonijiet finanzjarji privati huma fdati jew mogħtija struzzjonijiet biex isegwu mġiba partikolari; jiġifieri l-għoti ta’ finanzjament preferenzjali lill-industrija tal-BEVs. Abbażi ta’ dan, dawn l-asserzjonijiet ġew miċħuda.

(216)

Fin-nuqqas ta’ kummenti ulterjuri, il-konklużjonijiet misluta fil-premessi minn (467) sa (473) tar-Regolament provviżorju ġew ikkonfermati.

(217)

Wara d-divulgazzjoni provviżorja u definittiva, il-GTĊ argumenta li l-informazzjoni użata mill-Kummissjoni biex tinjora l-klassifikazzjonijiet tal-kreditu Ċiniżi ma kinitx għadha tgħodd u ma qisitx l-iżviluppi reċenti fis-suq Ċiniż tal-klassifikazzjoni tal-kreditu. Tabilħaqq, iċ-Ċina ħarġet regolamenti ġodda biex tirregola s-suq, inklużi Miżuri Amministrattivi għan-Negozju tal-Klassifikazzjoni tal-Kreditu fis-Suq tat-Titoli fl-2021. Iċ-Ċina fetħet ukoll b’mod attiv is-suq tal-klassifikazzjoni tal-kreditu tagħha għall-aġenziji barranin u pprovdiet trattament nazzjonali f’konformità mar-regoli u mar-regolamenti kurrenti tal-awtoritajiet amministrattivi u tal-ġestjoni tan-negozju kompetenti tal-industrija tal-klassifikazzjoni tal-kreditu. Kemm S&P Global Ratings Inc. kif ukoll Fitch Ratings ilhom joperaw fiċ-Ċina. Għalhekk, il-Kummissjoni ma setgħetx tqis li s-suq Ċiniż tal-klassifikazzjoni tal-kreditu huwa magħluq jew distort.

(218)

Il-Kummissjoni ma tikkontestax il-fatt li ċerti aġenziji barranin qegħdin joperaw fis-suq Ċiniż. Madankollu, il-GTĊ injora l-evidenza pprovduta mill-Kummissjoni fil-premessi (474), (475) u (477) tar-Regolament provviżorju, li turi li tali aġenziji barranin jirrappreżentaw biss frazzjoni żgħira tal-klassifikazzjonijiet imwettqa fis-suq Ċiniż tal-klassifikazzjoni tal-kreditu, li jsegwu l-istess skali ta’ klassifikazzjoni bħall-aġenziji Ċiniżi u li japplikaw żieda fil-klassifikazzjoni tagħhom f’termini tal-importanza strateġika tal-kumpaniji għall-GTĊ u l-garanziji impliċiti tal-Istat.

(219)

Fir-rigward tan-natura allegatament skaduta tal-evidenza pprovduta mill-Kummissjoni, il-Kummissjoni nnotat li l-GTĊ għażel b’mod selettiv l-eqdem elementi ta’ evidenza sottomessi mill-Kummissjoni, u injorat diversi referenzi mis-snin 2021-2022 użati fil-premessi (474), (478) u (479) tar-Regolament provviżorju, kif ukoll ir-referenza għad-Dokument ta’ Ħidma tal-Persunal tal-Kummissjoni dwar distorsjonijiet sinifikanti fl-ekonomija tar-Repubblika tal-Poplu taċ-Ċina, li nħareġ f’April 2024. Dawn ir-referenzi juru b’mod ċar li s-sitwazzjoni tas-suq Ċiniż tal-klassifikazzjoni tal-kreditu ma nbidlitx b’mod sinifikanti matul il-perjodu ta’ investigazzjoni. Għalhekk, dawn l-asserzjonijiet ġew miċħuda.

(220)

Wara d-divulgazzjoni provviżorja, il-Grupp BYD sostna li l-analiżi tal-valutazzjoni tal-klassifikazzjoni tal-kreditu li wettqet il-Kummissjoni ma pprovdietx evidenza dwar għaliex il-klassifikazzjoni tal-Grupp BYD tnaqqset għall-klassifikazzjoni B. Din l-asserzjoni ġiet imtennija wara d-divulgazzjoni finali.

(221)

Il-Kummissjoni nnotat li minħabba n-nuqqas ta’ valutazzjoni tal-affidabbiltà kreditizja mill-istituzzjonijiet finanzjarji ta’ self Ċiniżi, kif imsemmi fil-premessa (492) tar-Regolament provviżorju, hija wettqet evalwazzjoni tal-klassifikazzjoni tal-kreditu tal-Grupp BYD fil-premessi minn (495) sa (498) tar-Regolament provviżorju.

(222)

Kif sar f’każijiet preċedenti, il-Kummissjoni naqqset il-klassifikazzjoni Ċiniża AAA għal klassifikazzjoni BB, filwaqt li qieset iċ-ċirkostanzi attwali ta’ kull grupp. Madankollu, tali klassifikazzjoni timplika livell relattivament baxx ta’ dejn. Kif muri fil-premessa (498) tar-Regolament provviżorju, il-Grupp BYD kellu proporzjon għoli ħafna ta’ dejn għal ekwità ta’ 0,78 ibbażat fuq il-kontijiet konsolidati tal-Grupp BYD u ta’ BYD Finance. Peress li livell ta’ dejn ta’ kważi 80 % ma jistax jitqies bħala baxx, il-klassifikazzjoni tal-kreditu kompliet titnaqqas għal B. Il-kalkolu tal-proporzjonijiet imsemmi fil-premessi minn (495) sa (498) tar-Regolament provviżorju kien parti mid-dokument ta’ divulgazzjoni finali.

(223)

Il-GTĊ ikkontesta wkoll it-tnaqqis fil-grad ta’ BYD għal B. L-asserzjoni ġiet miċħuda minħabba li l-GTĊ qabbel il-klassifikazzjoni ta’ bond partikolari maħruġ mill-Grupp BYD u ċerti kumpaniji individwali. L-informazzjoni pprovduta mill-GTĊ ma hijiex komparabbli. Bond partikolari maħruġ minn kumpanija ma jfissirx li l-klassifikazzjoni għal dak il-bond tapplika wkoll għall-Grupp BYD bħala tali. Konsegwentement, l-asserzjoni ġiet miċħuda.

(224)

Wara d-divulgazzjoni finali, il-Grupp BYD talab li jintbagħtulu l-kriterji jew il-metodu li jikklassifika l-Grupp BYD bħala kumpanija bi klassifikazzjoni B billi argumenta li jrid ikun hemm regoli standard rikonoxxuti fuq livell internazzjonali jew aċċettati b’mod ġenerali biex jiġu stabbiliti l-klassifikazzjonijiet differenti li jintużaw mill-Kummissjoni. Huwa argumenta wkoll li l-metodoloġija użata mill-Kummissjoni kellha tkun parti mill-fatti essenzjali li ma ġewx iddivulgati.

(225)

Il-Kummissjoni nnotat li ma hemm l-ebda kriterju speċifiku rikonoxxut fuq livell internazzjonali biex jiġu stabbiliti klassifikazzjonijiet differenti. Kull aġenzija tal-klassifikazzjoni għandha l-metodoloġija speċifika tagħha stess, li ma tkunx magħmula disponibbli pubblikament. Madankollu, l-aġenziji tal-klassifikazzjoni jsegwu ċerti prinċipji ġenerali, kif enfasizzat minn S&P fil-gwida tagħha dwar l-elementi essenzjali tal-klassifikazzjoni tal-kreditu: “Meta jiffurmaw l-opinjonijiet tagħhom dwar ir-riskju ta’ kreditu, l-aġenziji tal-klassifikazzjoni ġeneralment jużaw analisti jew mudelli matematiċi, jew taħlita tat-tnejn. […] Għadd żgħir ta’ aġenziji tal-klassifikazzjoni tal-kreditu jiffokaw kważi esklużivament fuq data kwantitattiva, li jinkorporawha f’mudell matematiku. […] Fil-klassifikazzjoni ta’ korporazzjoni jew muniċipalità, l-aġenziji li jużaw l-approċċ immexxi mill-analisti ġeneralment jassenjaw analista, spiss flimkien ma’ tim ta’ speċjalisti, biex jieħu t-tmexxija fl-evalwazzjoni tal-affidabbiltà kreditizja tal-entità. Ġeneralment, l-analisti jiksbu informazzjoni minn rapporti ppubblikati, kif ukoll minn intervisti u diskussjonijiet mal-maniġment tal-emittent. Huma jużaw dik l-informazzjoni u japplikaw il-ġudizzju analitiku tagħhom biex jivvalutaw il-kundizzjoni finanzjarja tal-entità, il-prestazzjoni operattiva, il-politiki u l-istrateġiji tal-ġestjoni tar-riskju (37).”

(226)

L-istess dokument jenfasizza wkoll li “l-analiżi tal-kreditu ta’ emittent korporattiv ġeneralment tqis ħafna fatturi finanzjarji u mhux finanzjarji, inklużi l-indikaturi ewlenin tal-prestazzjoni, l-influwenzi ekonomiċi, regolatorji u ġeopolitiċi, l-attributi ta’ ġestjoni u governanza korporattiva u l-pożizzjoni kompetittiva (38)”.

(227)

Il-Kummissjoni użat l-istess prinċipji bħal dawk applikati mill-aġenziji tal-klassifikazzjoni tal-kreditu, kif enfasizzat fiż-żewġ premessi preċedenti, biex tifforma opinjoni dwar il-kumpaniji inklużi fil-kampjun. Tabilħaqq, minn naħa waħda, il-Kummissjoni kkalkolat u interpretat għadd ta’ indikaturi finanzjarji għal kull grupp ta’ kumpaniji inkluż fil-kampjun. Kif imsemmi fil-premessa (222) ta’ hawn fuq, dawn il-proporzjonijiet kienu parti mid-dokument ta’ divulgazzjoni finali. Min-naħa l-oħra, il-Kummissjoni użat is-sett kollu ta’ informazzjoni ppreżentat mill-kumpaniji matul il-proċess ta’ investigazzjoni, bħar-rapporti finanzjarji, il-prospetti tal-bonds, id-dettalji pprovduti dwar it-tranżazzjonijiet ta’ finanzjament u dwar is-sitwazzjoni tas-suq kollu kemm hu biex tagħmel ġudizzju analitiku tal-kundizzjoni finanzjarja speċifika tal-kumpanija, iżda wkoll tal-kundizzjonijiet ekonomiċi, regolatorji u tas-suq ġenerali li topera fihom.

(228)

Għalhekk, f’dan ir-rigward, il-Kummissjoni qieset il-kuntest li l-kumpaniji joperaw fih flimkien mas-sitwazzjoni finanzjarja speċifika ta’ BYD. Il-Kummissjoni nnotat li l-kumpaniji tal-BEVs joperaw f’ambjent tas-suq intensiv ħafna fil-kapital u volatili, b’bidliet teknoloġiċi u b’innovazzjonijiet rapidi, b’kompetizzjoni ħarxa bejn l-operaturi Ċiniżi, u fejn il-kumpaniji jkollhom jinvestu u jadattaw fuq bażi kontinwa għaċ-ċirkostanzi tas-suq li qegħdin jinbidlu. Fil-qosor, dan huwa simili ħafna għal ambjent innovattiv għall-prodotti ġodda, li ġeneralment jinvolvi riskji ġenerali ogħla u b’hekk jirriżulta fi klassifikazzjonijiet tal-kreditu ġenerali aktar baxxi għall-kumpaniji li joperaw f’dak is-suq.

(229)

Fl-aħħar nett, il-Kummissjoni tinnota li skont S&P, klassifikazzjoni B tikkorrispondi għal sitwazzjoni li fiha kumpanija hija “Aktar vulnerabbli għal kundizzjonijiet kummerċjali, finanzjarji u ekonomiċi negattivi iżda bħalissa għandha l-kapaċità li tissodisfa l-impenji finanzjarji (39)”. Fid-dawl tal-proporzjonijiet finanzjarji speċifiċi kkalkolati għal BYD, flimkien mar-riskji tal-ambjent tas-suq li topera fih, il-Kummissjoni għalhekk iżżomm il-pożizzjoni tagħha dwar il-klassifikazzjoni tal-kreditu ta’ BYD. Għalhekk, din l-asserzjoni ġiet miċħuda.

(230)

Wara d-divulgazzjoni provviżorja, il-Grupp Geely argumenta li kien ġie ppenalizzat inġustament bit-tnaqqis fil-grad tal-klassifikazzjoni tal-kreditu tiegħu minn AAA għal B.

(231)

Il-Kummissjoni nnotat, li minħabba n-nuqqas ta’ valutazzjoni tal-affidabbiltà kreditizja minn istituzzjonijiet finanzjarji ta’ self Ċiniżi, kif imsemmi fil-premessa (518) tar-Regolament provviżorju, hija wettqet evalwazzjoni tal-klassifikazzjoni tal-kreditu tal-Grupp Geely fil-premessi minn (506) sa (517) tar-Regolament provviżorju.

(232)

Il-Kummissjoni analizzat proporzjonijiet speċifiċi tal-likwidità fuq terminu qasir, inkluż il-proporzjon kurrenti medju, il-proporzjon ta’ malajr, u l-proporzjon tal-flus. Il-valutazzjoni indikat li l-Grupp iffaċċja sfidi ta’ likwidità fuq terminu qasir, li rriżultaw fi profil ta’ debitur tar-riskju. Barra minn hekk, il-Kummissjoni analizzat id-djun fit-tul bl-użu ta’ proporzjonijiet bħall-proporzjon tad-Dejn mal-Assi u l-proporzjon tad-Dejn mal-Ekwità, u kkonkludiet li l-grupp jiffinanzja l-attività tiegħu prinċipalment permezz ta’ dejn.

(233)

Meta wieħed iqis il-kwistjonijiet ta’ likwidità identifikati fuq terminu qasir u d-dipendenza tal-grupp fuq il-finanzjament tad-dejn, il-Kummissjoni kkonkludiet li l-għoti tal-klassifikazzjoni tal-kreditu AAA mogħtija għall-Grupp ma kinitx iġġustifikata, iżda pjuttost jenħtieġ li tkun BB.

(234)

Barra minn hekk, fil-premessi minn (510) sa (512) tar-Regolament provviżorju, il-Kummissjoni identifikat riskji addizzjonali assoċjati mal-Grupp Geely. Dawn ir-riskji kienu jinkludu l-ħruġ ta’ bonds għar-ristrutturar tad-dejn, l-ikkuntrattar ta’ self speċifikament biex jissostitwixxi dak eżistenti, u arranġament ta’ skambju ta’ dejn ma’ ekwità.

(235)

Sabiex titqies l-iskopertura għar-riskju akbar li qegħdin jaffaċċjaw il-banek, b’mod partikolari minħabba kwistjonijiet ta’ likwidità u sfidi ta’ finanzjament kemm għal terminu qasir kif ukoll għal terminu twil, il-Kummissjoni naqqset il-klassifikazzjoni tar-riskju b’livell wieħed u għażlet li tuża bonds korporattivi B (minflok BB) bħala l-bażi għad-determinazzjoni tal-parametru referenzjarju bbażat fuq is-suq. Abbażi ta’ dan, l-asserzjoni ġiet miċħuda.

(236)

Il-GTĊ ikkontesta wkoll it-tnaqqis fil-grad tal-Grupp Geely għal B. Il-Kummissjoni nnotat li l-GTĊ ipprovda biss referenza fuq il-web bi klassifikazzjoni tal-kreditu biex jappoġġa dan l-argument, li minnha ma kienx possibbli li jiġi aċċertat jekk kienx hemm referenza għal ċerti kumpaniji individwali jew għall-grupp kollu kemm hu. Lanqas ma kien ċar mill-informazzjoni pprovduta għal liema perjodu kienet qiegħda tirreferi l-klassifikazzjoni. Barra minn hekk, il-klassifikazzjoni mogħtija fuq is-sit web għal Geely kienet ta’ BBB- bi prospettiva negattiva. Din l-informazzjoni tindika d-distorsjoni tal-klassifikazzjoni tal-kreditu fiċ-Ċina, fejn il-grupp ingħata l-klassifikazzjoni ta’ AAA, u ma hijiex differenti wisq mill-istandard BB użat mill-Kummissjoni. Minħabba n-nuqqas ta’ informazzjoni u argumenti mhux sostanzjati, il-Kummissjoni ċaħdet l-asserzjoni.

(237)

Wara d-divulgazzjoni finali, il-Grupp Geely argumenta li l-Kummissjoni naqset milli tqis il-fatt li waħda mill-kumpaniji tal-Grupp, Genius Auto Finance Co. Ltd (“GAF”) ingħatat klassifikazzjoni tal-kreditu AAA minn S&P. Il-Kummissjoni nnotat li l-klassifikazzjoni tal-kreditu, li l-Grupp kien qiegħed jirreferi għaliha, ingħatat lill-fiduċjarju tat-titolu ta’ ABS, jiġifieri lil Shanghai International Trust Co. Ltd., iżda mhux lil GAF (il-fornitur tas-servizz tas-self ipotekarju ta’ ABS). Għalhekk, l-argument ġie miċħud.

(238)

Wara d-divulgazzjoni provviżorja, il-Grupp SAIC argumenta li kien ġie ppenalizzat b’mod inġust, l-ewwel minħabba t-tnaqqis tiegħu minn klassifikazzjoni tal-kreditu AAA għal klassifikazzjoni tal-kreditu B u t-tieni, bl-applikazzjoni tal-firxa għar-Rata Normattiva tas-Self tal-Bank tal-Poplu taċ-Ċina (“PBOC”, People’s Bank of China) (jew ir-Rata Prima tas-Self taċ-Ċentru ta’ Finanzjament Interbankarju Nazzjonali (“NIFC”, National Interbank Funding Centre)) fid-data meta ngħata s-self u għad-durata ta’ kull self inkwistjoni, minflok għar-rata li kienet applikabbli għall-Grupp SAIC.

(239)

Fin-nuqqas ta’ valutazzjoni tal-affidabbiltà kreditizja mill-istituzzjonijiet finanzjarji ta’ self Ċiniżi, kif imsemmi fil-premessa (518) tar-Regolament provviżorju, il-Kummissjoni vvalutat il-klassifikazzjoni tal-kreditu tal-Grupp SAIC fil-premessi minn (519) sa (527) tar-Regolament provviżorju. F’dawn il-premessi l-ewwel ivvalutat ċerti proporzjonijiet relatati mal-profittabbiltà, il-proporzjon kurrenti medju, il-proporzjon malajr, il-proporzjon tal-flus, id-Dejn mal-Assi, id-Dejn mal-Ekwità u qieset li tali proporzjonijiet ma kinux jiġġustifikaw il-klassifikazzjoni AAA allegata msemmija fil-premessa (238) ta’ dan ir-Regolament u l-premessa (524) tar-Regolament provviżorju, iżda pjuttost klassifikazzjoni BB. Barra minn hekk, kif ġie nnotat fil-premessi (522) u (523), ċerti produtturi esportaturi tal-BEV fi ħdan il-Grupp SAIC kellhom jirrikorru għal skambji ta’ dejn ma’ ekwità jew injezzjoni ta’ ekwità biex jiżguraw li l-operazzjonijiet tagħhom ikomplu b’mod sostenibbli. Barra minn hekk, il-Kummissjoni kienet osservat ukoll li l-grupp kien ikkuntratta self bl-iskop speċifiku li jissostitwixxi s-self eżistenti. Abbażi ta’ dan, il-Kummissjoni ddeċidiet li tnaqqas il-grad tal-Grupp SAIC minn BB għal B biex tirrifletti r-riskji addizzjonali relatati mal-problemi finanzjarji u ta’ likwidità tiegħu.

(240)

Barra minn hekk, il-Kummissjoni ma qisitx li l-Grupp SAIC kien ġie ppenalizzat b’mod inġust. Sabiex tivvaluta l-livell tas-sussidju li rċieva, il-Kummissjoni qabblet l-imgħaxijiet li jridu jitħallsu fil-perjodu ta’ investigazzjoni kif irrapportat mill-Grupp SAIC mal-imgħax li kien jenħtieġ li tħallas f’suq mingħajr distorsjoni, li kieku ġiet applikata klassifikazzjoni tal-kreditu mingħajr distorsjoni.

(241)

F’dan ir-rigward, użat l-LPR, jiġifieri r-rata normattiva ffurmata minn banek Ċiniżi ewlenin fejn ikkwotat ir-rati ta’ self attwali implimentati għall-klijenti tal-ogħla kwalità, filwaqt li qieset il-kost tal-fondi, il-provvista u d-domanda tas-suq, il-primjums tar-riskju u fatturi oħrajn (40). Meta jitqies li l-Grupp SAIC ibbenefika minn rati ta’ benefiċċju aktar mir-rata medja offruta lill-klijenti tal-ogħla kwalità użati għall-formazzjoni tal-LPR, il-Kummissjoni qieset li l-bażi għal rata normattiva mingħajr distorsjoni jenħtieġ li tiġi stabbilita, tal-anqas, fil-livell tal-LPR. F’tieni pass, sabiex tiġi riflessa l-affidabbiltà kreditizja tal-Grupp SAIC, ġiet applikata medda bbażata fuq id-differenza bejn il-klassifikazzjoni tal-kreditu AA u B kif ġie spjegat fil-premessa (504) tar-Regolament provviżorju.

(242)

Il-GTĊ ikkontesta wkoll it-tnaqqis fil-grad tal-Grupp SAIC għal B. Il-Kummissjoni nnotat li b’appoġġ ta’ dan l-argument, il-GTĊ ipprovda referenza tal-web bi klassifikazzjoni tal-kreditu ta’ produttur ewlieni tal-Amerka Latina ta’ prodotti tal-ħelu u tal-biskuttini. Il-Kummissjoni naqset milli tara r-rabta bejn iċ-ċikkulata tal-Arġentina u l-industrija Ċiniża tal-BEV. Għalhekk, il-Kummissjoni ċaħdet dan l-argument.

(243)

Fuq din il-bażi, din l-asserzjoni ġiet miċħuda. Fin-nuqqas ta’ kwalunkwe asserzjoni oħra f’dan ir-rigward, il-konklużjonijiet misluta fil-premessi minn (474) sa (481) u minn (491) sa (527) tar-Regolament provviżorju ġew ikkonfermati.

(244)

Wara d-divulgazzjoni provviżorja, il-Grupp SAIC sostna li l-ammont ta’ benefiċċju ġġenerat mis-self f’munita barranija ma kienx imissu ġie allokat biss fuq il-bażi tal-fatturat mill-esportazzjoni tal-prodott li qiegħed jiġi investigat (“PUI”), iżda fuq il-fatturat totali mill-esportazzjoni. Wara d-divulgazzjoni finali, l-SAIC ipprovdiet argumenti addizzjonali, li fihom asseriet li l-Kummissjoni kellha biżżejjed informazzjoni dokumentata verifikata rigward il-fatturat mill-esportazzjoni dderivat mill-bejgħ lejn l-Unjoni u barra mill-Unjoni. Huwa nnota wkoll li l-kuntratti ta’ self ma jispeċifikawx l-iskop jew l-użu ta’ dan is-self. Minflok, dawn il-kuntratti indikaw li kienu relatati mal-kapital operatorju biss. Għalhekk, kien jenħtieġ li dan is-self f’muniti barranin jiġi ttrattat bħala self fis-CNY u jiġi allokat fuq il-fatturat totali tal-grupp.

(245)

Il-Kummissjoni aċċettat l-asserzjoni rigward l-allokazzjoni tal-ammont ta’ benefiċċju ġġenerat mis-self f’munita barranija u rrevediet il-kalkolu kif xieraq. Fin-nuqqas ta’ tranżazzjonijiet f’muniti barranin relatati ma’ elementi oħrajn minbarra l-bejgħ ta’ prodotti lesti, il-Kummissjoni qieset li s-self f’muniti barranin kien relatat esklużivament mal-attivitajiet ta’ bejgħ għall-esportazzjoni.

(246)

Wara d-divulgazzjoni provviżorja, il-Grupp SAIC sostna li għadd ta’ self bejn il-kumpaniji fis-CNY kienu jenħtieġu li jitneħħew mill-kalkolu tas-sussidju. Għaldaqstant, il-Grupp SAIC issuġġerixxa metodu ta’ kalkolu modifikat fir-rigward tal-ammont ta’ sussidju.

(247)

Din l-asserzjoni ġiet aċċettata parzjalment sa fejn l-evidenza ta’ sostenn kienet disponibbli għall-Kummissjoni. L-evidenza ta’ sostenn rigward l-obbligazzjonijiet mhux kurrenti dovuti fi żmien sena minn kumpanija waħda fil-Grupp SAIC li ġiet ipprovduta mill-Grupp SAIC bħala parti mill-kummenti tagħha, wasslet ukoll għall-identifikazzjoni ta’ finanzjament preferenzjali fil-forma ta’ bonds li qabel ma kinux magħrufa mill-Kummissjoni. Il-kalkolu tal-ammont ta’ sussidju ġie rivedut skont dan.

(248)

Wara d-divulgazzjoni provviżorja, il-Grupp SAIC sostna li self interbankarju wieħed ta’ kumpanija waħda fil-Grupp SAIC kien fundamentalment differenti minn self u għalhekk ma kienx imissu ġie ttrattat bħala tali. Madankollu, jekk il-Kummissjoni xorta tittratta dan is-self interbankarju bħala analogu għal self, ir-rata normattiva tal-imgħax applikabbli jenħtieġ li tkun dik għal self fuq medda ta’ terminu qasir b’terminu ta’ 3 xhur minn Diċembru 2022 (jiġifieri 3,65 %), peress li t-terminu ta’ self interbankarju għall-kumpaniji tal-awtofinanzjament kien legalment limitat għal 3 xhur.

(249)

Il-Kummissjoni rrifjutat l-asserzjoni tal-Grupp SAIC u tqis li l-aċċess tal-kumpanija għas-self interbankarju fi ħdan il-Grupp SAIC b’rati eċċezzjonalment baxxi jikkostitwixxi finanzjament preferenzjali. Għalhekk, il-Kummissjoni qieset dan is-self interbankarju bħala analogu għal self. Fin-nuqqas ta’ kwalunkwe informazzjoni pprovduta mill-Grupp SAIC dwar is-self interbankarju jew l-eżistenza potenzjali ta’ self simili ieħor, il-Kummissjoni tkompli tibbaża fuq il-fatti disponibbli biex tivvaluta l-benefiċċju relatat ma’ dan is-self interbankarju.

(250)

Fin-nuqqas ta’ kummenti ulterjuri dwar it-tipi ta’ self, il-konklużjonijiet misluta fil-premessi minn (482) sa (485) tar-Regolament provviżorju ġew ikkonfermati.

(251)

Wara d-divulgazzjoni provviżorja, il-GTĊ asserixxa li l-Kummissjoni kienet naqset milli twettaq analiżi xierqa tal-ispeċifiċità għad-diversi programmi ta’ finanzjament preferenzjali allegati li juru li hemm limitazzjoni “mhux ambigwa” u limitazzjoni “ċara” fuq l-aċċess għall-allegat sussidju inkwistjoni, limitazzjoni li “tesprimi distintivament dak kollu li tfisser; u ma tħalli xejn sempliċiment impliċitu jew issuġġerit” (41).

(252)

Il-GTĊ żied ukoll li l-Kummissjoni kienet naqset b’mod konsistenti milli tispeċifika liema parti mid-dokumenti inkwistjoni tagħti mandat għall-għoti espliċitu ta’ finanzjament preferenzjali lill-produtturi tal-BEVs.

(253)

Il-GTĊ sostna wkoll li l-Kummissjoni kienet naqset milli turi kwalunkwe limitazzjoni espliċita tal-allegat self preferenzjali lil ċerti intrapriżi jew setturi peress li s-self preferenzjali ma kellux fil-mira grupp limitat biżżejjed fis-sens li s-sussidju allegat ma kienx limitat biss għall-industrija tal-BEV iżda għall-hekk imsejħa industriji “mħeġġa”.

(254)

Kif stabbilit fil-premessa (486) tar-Regolament provviżorju, diversi dokumenti legali, li huma mmirati speċifikament lejn kumpaniji fis-settur tal-BEV, jidderieġu lill-istituzzjonijiet finanzjarji biex jipprovdu self b’rati preferenzjali lill-industrija tal-BEV. Skont l-Artikolu 4(2) tar-Regolament bażiku, ma huwiex meħtieġ li s-sussidju jkun limitat biss għall-industrija tal-BEV biex jitqies bħala speċifiku, iżda huwa biżżejjed li l-aċċess għas-sussidju jkun limitat b’mod espliċitu għal ċerti intrapriżi. Il-grupp ta’ industriji mħeġġa jitqies li huwa ta’ natura limitata espliċita. Għalhekk, l-asserzjonijiet ġew miċħuda.

(255)

Wara d-divulgazzjoni finali, il-GTĊ tenna li l-Kummissjoni kienet naqset milli tissostanzja d-determinazzjoni tagħha relatata mal-ispeċifiċità bbażata fuq evidenza pożittiva u bbażat fuq dokumenti li “allegatament” juru li l-istituzzjonijiet finanzjarji “jipprovdu biss finanzjament preferenzjali lil għadd limitat ta’ intrapriżi jew industriji, li jikkonformaw mal-politiki rilevanti tal-GTĊ”. B’mod aktar speċifiku, huwa argumenta li l-industriji mħeġġa, b’mod ġenerali, ma jikkostitwux segment diskret biżżejjed tal-ekonomija sabiex jikkostitwixxu “ċerti industriji” skont it-tifsira tal-Artikolu 4(2)(a) tar-Regolament bażiku u l-Artikolu 2(1)(a) tal-Ftehim SCM. B’mod partikolari, il-GTĊ argumenta li l-wisa’ tal-hekk imsejħa industriji “mħeġġa” tirriżulta fil-fatt li l-allegati sussidji jkunu disponibbli b’mod wiesa’ fl-ekonomija taċ-Ċina kollha b’tali mod li ma jistax jiġi kkunsidrat b’mod loġiku li huma espliċitament speċifiċi. Il-GTĊ argumenta wkoll li l-Kummissjoni ma kinitx uriet li tali speċifiċità “ma kinitx ambigwa” u “ċara” (42) u li d-dokumenti li l-Kummissjoni bbażat fuqhom (ara l-premessa (254) ta’ dan ir-Regolament) kienu jew irrilevanti għall-industrija tal-BEVs jew mhux vinkolanti.

(256)

Il-Kummissjoni qieset li s-sett ta’ dokumenti msemmija fil-premessa (486) tar-Regolament provviżorju bħall-Artikolu 15 tar-Regoli Ġenerali dwar is-Self (implimentati mill-Bank tal-Poplu taċ-Ċina) u l-Artikolu 34 tal-Liġi tal-Bank kienu jikkostitwixxu evidenza pożittiva li turi b’mod ċar u mhux ambigwu li l-forniment ta’ finanzjament preferenzjali kien speċifiku għall-industrija tal-BEVs. Barra minn hekk, kif diġà ġie spjegat fil-premessi (253) u (254) ta’ dan ir-Regolament, il-Kummissjoni qieset li d-dokumenti li ntużaw bħala bażi espliċitament illimitaw dan il-programm għal ċerti intrapriżi u ma humiex disponibbli b’mod wiesa’ fl-ekonomija Ċiniża kollha. Fil-fatt, il-Kummissjoni nnotat li l-industrija tal-BEVs hija industrija mħeġġa u li tali status ma huwiex ġeneralment disponibbli fis-sens li huwa limitat għal għadd ristrett ta’ industriji li huma elenkati f’katalogu deżinjat, kif ġie spjegat fil-premessa (711) tar-Regolament provviżorju. Barra minn hekk, l-industrija tal-BEVs hija wkoll settur li tfasslu pjanijiet pluriennali nazzjonali jew sottonazzjonali dedikati għalih, u b’hekk ġie indikat b’mod ċar li ma hijiex industrija kwalunkwe iżda industrija li hija intitolata għal trattament preferenzjali f’għajnejn il-GTĊ u li tali status se jingħaqad ma’ ċerti politiki preferenzjali kif żviluppati fid-diversi dokumenti ta’ politika msemmija fit-Taqsima 3.2 tar-Regolament provviżorju. Abbażi ta’ dan, dawn l-asserzjonijiet ġew miċħuda.

(257)

Wara d-divulgazzjoni finali, il-GTĊ irrefera wkoll għall-fatt li l-Kummissjoni kienet talbet lill-GTĊ biex jibgħat kwestjonarji lill-istituzzjonijiet finanzjarji rilevanti u asserixxa li l-ġbir tal-informazzjoni jenħtieġ li jitwettaq mill-awtorità investigattiva u l-piż jenħtieġ li ma jingħaddiex lill-partijiet rispondenti. Barra minn hekk, il-GTĊ argumenta li ma jistax jiġi preżunt li impriża bbenefikat minn vantaġġ “sempliċement abbażi ta’ preżunzjoni negattiva, ibbażata fuq l-assenza ta’ informazzjoni li tippermetti li tasal għal konklużjoni kuntrarja, fl-assenza ta’ elementi oħra ta’ natura li jistabbilixxu pożittivament l-eżistenza ta’ tali vantaġġ”.

(258)

Kif ġie spjegat fil-premessa (129) ta’ dan ir-Regolament, il-Kummissjoni talbet lill-GTĊ biex jibgħat kwestjonarji speċifiċi li l-Kummissjoni kienet ħejjiet għall-istituzzjonijiet finanzjarji rilevanti kollha għall-konvenjenza amministrattiva u għall-amministrazzjoni tajba, bil-għan li l-informazzjoni tinkiseb b’mod aktar effettiv. Tali talba fl-ebda każ ma tista’ tkun ekwivalenti għat-trasferiment tar-responsabbiltà għall-ġbir tal-informazzjoni. Billi ma kkooperax, il-GTĊ ma ppermettiex lill-Kummissjoni tivvaluta dokumenti addizzjonali li allegatament kienu juru n-nuqqas ta’ speċifiċità, quod non, u b’hekk il-Kummissjoni kellha tibbaża fuq l-informazzjoni fil-fajl li tappoġġa l-konklużjonijiet tagħha. Tali raġunament ma huwiex ekwivalenti għal preżunzjoni negattiva peress li l-Kummissjoni bbażat fuq elementi dokumentati fid-dawl tar-rifjut tal-GTĊ li jikkoopera li huwa f’kuntrast mal-imġiba tiegħu f’investigazzjonijiet preċedenti li fihom l-istituzzjonijiet finanzjarji kkooperaw u ppermettew lill-Kummissjoni tipproċedi bil-ħidma investigattiva tagħha, tiġbor u tivverifika l-informazzjoni li qieset neċessarja sa fejn hija kkonċernata l-industrija tal-BEVs u b’mod partikolari l-produtturi inklużi fil-kampjun. Abbażi ta’ dan, dawn l-asserzjonijiet ġew miċħuda.

(259)

Il-GTĊ argumenta wkoll li l-Kummissjoni kien jenħtieġ li tivvaluta l-ispeċifiċità għal kull allegat programm jew strument li hija kkumpensat u li l-Kummissjoni ma tistax tistabbilixxi li d-diversi forom ta’ finanzjament huma speċifiċi minħabba li l-partijiet interessati ma pprovdewx evidenza li turi bil-kontra. Huwa kompla jargumenta li l-partijiet interessati wrew li dawn l-istrumenti huma disponibbli għall-entitajiet kollha fis-setturi kollha tal-ekonomija taċ-Ċina.

(260)

Kif muri fid-diversi taqsimiet tar-Regolament provviżorju, il-Kummissjoni vvalutat l-ispeċifiċità għal kull programm li hija kkumpensat abbażi ta’ evidenza pożittiva li ma ġiet ikkontestata b’ebda asserzjoni sostanzjata sottomessa minn xi parti. L-asserzjoni li l-partijiet interessati wrew li dawn l-istrumenti kienu disponibbli għall-entitajiet kollha fis-setturi kollha tal-ekonomija taċ-Ċina nstabet li kienet vaga u mhux issostanzjata. Abbażi ta’ dan, dawn l-asserzjonijiet ġew miċħuda. Fin-nuqqas ta’ kummenti ulterjuri rigward l-ispeċifiċità, il-konklużjonijiet misluta fil-premessa (486) tar-Regolament ġew ikkonfermati.

(261)

Wara d-divulgazzjoni provviżorja u definittiva, il-GTĊ asserixxa li l-Kummissjoni rrikorriet għal parametru referenzjarju barra mill-pajjiż mingħajr ma pprovdiet biżżejjed evidenza li s-suq fiċ-Ċina huwa distort, u li din id-distorsjoni twassal biex ir-rati fil-pajjiż ma jistgħux jintużaw bħala parametru referenzjarju, f’konformità mal-ġurisprudenza applikabbli tad-WTO (43).

(262)

Il-Kummissjoni ma qablitx ma’ din l-asserzjoni u argumentat li l-asserzjoni tal-GTĊ kienet vaga peress li kienet tirreferi għall-parametri referenzjarji użati għall-finanzjament preferenzjali b’mod ġenerali iżda kienet tirreferi wkoll għal-linji ta’ kreditu b’mod partikolari (il-premessa (117) tar-Regolament provviżorju). Barra minn hekk, il-Kummissjoni rrimarkat għal darba oħra li l-GTĊ deher li kien qiegħed jinjora li l-parametru referenzjarju użat għas-self fis-CNY, l-injezzjonijiet ta’ ekwità, il-bonds u l-abbozzi ta’ aċċettazzjoni bankarja kienu bbażati fuq parametru referenzjarju Ċiniż jiġifieri l-LPR. L-unika parti tal-parametru referenzjarju barra mill-pajjiż kienet tikkonsisti mill-primjum tar-riskju ta’ kreditu miżjud mal-LPR. F’dan il-kuntest, il-Kummissjoni pprovdiet evidenza estensiva fit-Taqsima 3.5.1.10 tar-Regolament provviżorju li turi li l-klassifikazzjonijiet tal-kreditu u, għalhekk, il-primjums tar-riskju ta’ kreditu kienu distorti fir-RPĊ, u b’hekk ma setgħux jintużaw biex jiġi stabbilit parametru referenzjarju.

(263)

Fir-rigward tal-analiżi tal-eżistenza ta’ distorsjonijiet fir-RPĊ, il-Kummissjoni rreferiet ukoll għall-premessa (471) tar-Regolament provviżorju li tikkonferma l-eżistenza ta’ qafas normattiv u l-premessa (473) tar-Regolament provviżorju li tikkonkludi li l-istituzzjonijiet finanzjarji kollha (inklużi l-istituzzjonijiet finanzjarji privati) li joperaw fiċ-Ċina taħt is-superviżjoni tal-NFRA ġew inkarigati jew ordnati mill-Istat biex isegwu politiki governattivi u jipprovdu self b’rati preferenzjali lill-industrija tal-BEV. Fi kwalunkwe każ, fin-nuqqas ta’ kooperazzjoni sħiħa minn kwalunkwe istituzzjoni finanzjarja li tikkoopera, ma seta’ jiġi stabbilit l-ebda parametru referenzjarju ieħor. Fuq din il-bażi, din l-asserzjoni ġiet miċħuda.

(264)

Wara d-divulgazzjoni finali, il-GTĊ asserixxa wkoll li l-Kummissjoni ma kinitx wieġbet għall-kummenti tiegħu dwar l-għażla ta’ firxa relattiva aktar milli firxa assoluta biex tiġi stabbilita d-differenza bejn bonds korporattivi kklassifikati bħala AA u bonds korporattivi kklassifikati bħala B. Skont il-kummenti pprovduti wara d-divulgazzjoni provviżorja, il-GTĊ argumenta li l-użu ta’ firxa relattiva ma kellu l-ebda sens ekonomiku u li l-Kummissjoni ma spjegatx kif iż-żieda tal-firxa relattiva hija simili għal “self kummerċjali komparabbli li d-ditta setgħet fil-fatt tikseb fis-suq” skont it-tifsira tal-Artikolu 14(b) tal-Ftehim SCM; u għaliex il-Kummissjoni qieset li ma kien meħtieġ l-ebda aġġustament għall-parametru referenzjarju fir-rigward taż-żieda tal-firxa (relattiva).

(265)

Il-Kummissjoni l-ewwel innotat li l-GTĊ għamel biss xi dikjarazzjonijiet ġenerali dwar l-użu tal-firxa relattiva fid-divulgazzjoni provviżorja. Huwa ma pprovdiex ir-raġunament tiegħu għaliex il-firxa relattiva għandha titqies bħala ekonomikament illoġika, ir-raġunijiet għaliex firxa assoluta għandha titqies bħala aktar xierqa, jew l-aġġustamenti għall-parametru referenzjarju li jqis meħtieġa. Barra minn hekk, il-GTĊ lanqas ma pprovda evidenza biex jappoġġa d-dikjarazzjonijiet tiegħu jew biex jirribatti l-pożizzjoni tal-Kummissjoni.

(266)

Fir-rigward tal-użu tal-firxa relattiva bħala tali, fil-premessa (490) tar-Regolament provviżorju, il-Kummissjoni enfasizzat b’mod ċar li kienet segwiet l-istess metodoloġija ta’ kalkolu għall-finanzjament preferenzjali permezz ta’ self stabbilita fl-investigazzjoni antisussidji dwar fojl tal-aluminju għall-modifikazzjoni li joriġina mir-RPĊ, kif ukoll l-investigazzjoni antisussidji dwar il-prodotti tal-azzar ċatti llaminati bis-sħana li joriġinaw mir-RPĊ, l-investigazzjonijiet antisussidji dwar it-tajers li joriġinaw mir-RPĊ, ċerti materjali tal-fibra tal-ħġieġ minsuġa u/jew meħjuta li joriġinaw mir-RPĊ u kejbils fibrottiċi li joriġinaw mir-RPĊ, u pprovdiet ir-referenzi rilevanti għal dawn ir-Regolamenti, fejn ir-raġunament għall-użu tal-firxa rilevanti ġie spjegat fit-tul. L-applikazzjoni ta’ din il-metodoloġija ta’ kalkolu għal kull grupp individwali ta’ kumpaniji inklużi fil-kampjun ġiet spjegata ulterjorment f’aktar dettall fid-divulgazzjoni speċifika tal-kumpaniji individwali. Il-GTĊ ma pprovda l-ebda argument ġdid li kien jiġġustifika bidla fil-prattika li ilha teżisti tal-Kummissjoni dwar l-użu tal-firxa relattiva.

(267)

Madankollu, għall-finijiet ta’ kompletezza, il-Kummissjoni tfakkar lill-GTĊ li fil-prinċipju, l-għan tal-firxa relattiva kien li jinbena primjum tar-riskju ta’ kreditu għal kull kumpanija, li għandu jiġi applikat għar-rata ta’ mingħajr riskju sabiex tintlaħaq rata ta’ mgħax referenzjarja. F’dan il-kuntest, hija tfakkar fl-osservazzjonijiet li ġejjin li saru fir-rigward tas-sens ekonomiku tal-firxa relattiva, u l-fatt li hija qrib self kummerċjali, fil-premessa (256) tar-Regolament Definittiv tal-investigazzjoni antisussidji dwar it-tajers li joriġinaw mir-RPĊ:

(268)

Il-GTĊ ma pprovda l-ebda element li jiġġustifika rieżami ta’ dawn l-osservazzjonijiet, u l-Kummissjoni lanqas ma sabet xi elementi ġodda f’din l-investigazzjoni li jwasslu għal bidla fil-valutazzjoni preċedenti tagħha.

(269)

Fl-aħħar nett, l-implikazzjoni tal-GTĊ li ma sar l-ebda aġġustament għall-firxa relattiva hija żbaljata. Tabilħaqq, ir-rata Ċiniża tal-LPR tintuża bħala punt tat-tluq għall-kalkolu. Barra minn hekk, l-użu tal-firxa relattiva jinkludi bidliet fil-kundizzjonijiet tas-suq sottostanti speċifiċi għall-pajjiż li ma humiex espressi meta tiġi segwita l-loġika ta’ firxa assoluta, kif huwa spjegat fil-premessa (267) aktar ’il fuq. Barra minn hekk, il-premessi (504), (516) u (526) tar-Regolament provviżorju jenfasizzaw b’mod ċar li l-firxa relattiva ġiet stabbilita fuq bażi individwali għal kull self ipprovdut lill-grupp ta’ kumpaniji, skont id-data meta ngħata s-self u d-durata tas-self inkwistjoni. Għalhekk, l-ispeċifiċitajiet ta’ kull self individwali tqiesu wkoll fl-użu tal-firxa relattiva. Għalhekk, l-asserzjonijiet tal-GTĊ ġew miċħuda.

(270)

Wara d-divulgazzjoni finali, il-GTĊ argumenta li l-Kummissjoni ħawdet l-obbligu tagħha li tistabbilixxi l-eżistenza ta’ kontribuzzjoni finanzjarja minn gvern mal-eżistenza ta’ benefiċċju permezz ta’ tali kontribuzzjoni finanzjarja minħabba li hemm differenza bejn l-ammont li jħallas ir-riċevitur u dak li jkun pagabbli fuq self kummerċjali komparabbli li l-kumpanija tista’ tikseb fis-suq.

(271)

Il-Kummissjoni qieset li kienet stabbiliet l-eżistenza ta’ kontribuzzjoni finanzjarja u l-eżistenza ta’ benefiċċju meta vvalutat din l-iskema. B’mod partikolari, il-premessa (487) tar-Regolament provviżorju ddefiniet il-bażi li fuqha l-produtturi tal-BEVs irċevew benefiċċju bbażat fuq id-differenza bejn l-ammont ta’ mgħax li l-kumpanija kienet ħallset fuq is-self preferenzjali u l-ammont li l-kumpanija kienet tħallas għal self kummerċjali komparabbli, li l-kumpanija setgħet kisbet fis-suq. Fir-rigward tal-kontribuzzjoni finanzjarja, il-Kummissjoni qieset li l-għoti ta’ finanzjament preferenzjali permezz ta’ self jew strumenti finanzjarji oħrajn kien jikkonsisti f’kontribuzzjoni finanzjarja għall-GTĊ minħabba li l-istituzzjonijiet finanzjarji li jaġixxu bħala korpi pubbliċi jew li jkunu fdati / mogħtija struzzjonijiet mill-GTĊ talbu rata tal-imgħax jew tariffa ogħla għal kumpaniji attivi f’settur ieħor għajr is-settur tal-BEVs jew settur ieħor imħeġġeġ li jibbenefika minn trattament favorevoli simili. Għalhekk, l-asserzjoni ġiet miċħuda.

(272)

Il-Grupp Geely asserixxa li jenħtieġ li l-Kummissjoni ma tużax data dwar il-bonds korporattivi biex tistabbilixxi parametru referenzjarju għas-self, minħabba d-differenzi sinifikanti relatati mar-riskji assoċjati, in-negozjabbiltà, il-perjodi u l-kundizzjonijiet ta’ ħlas lura (inklużi l-opzjonijiet ta’ ħlas lura bikri), u r-ristrutturar tad-dejn. Huwa argumenta li dawn id-differenzi jwasslu għal differenzi fir-rati tal-imgħax.

(273)

Il-Kummissjoni ma qablitx mal-asserzjoni tal-Grupp Geely minħabba li ma użatx bonds korporattivi biex tistabbilixxi parametru referenzjarju għas-self. Minflok, kif ġie spjegat fil-premessa (526) tar-Regolament provviżorju, il-Kummissjoni bbażat fuq ġabra ta’ bonds korporattivi AA u B biex tistabbilixxi l-firxa li trid tiżdied mar-Rata ta’ Referenza tas-Self tal-PBOC, jew wara l-20 ta’ Awwissu 2019, mar-Rata Prima tas-Self kif imħabbra mill-NIFC, biex tiġi stabbilita rata tal-imgħax mingħajr distorsjoni bbażata fuq is-suq. Fuq din il-bażi, din l-asserzjoni ġiet miċħuda.

(274)

Il-Grupp Geely asserixxa li kien hemm żbalji speċifiċi relatati mal-kalkolu tas-self għal ċerti kumpaniji fi ħdan il-grupp. Il-Kummissjoni rrikonoxxiet din l-asserzjoni u sussegwentement irrevediet il-kalkolu.

(275)

Fin-nuqqas ta’ kummenti ulterjuri dwar il-kalkolu tal-ammont ta’ sussidju, il-konklużjonijiet misluta fil-premessi minn (487) sa (490) tar-Regolament provviżorju ġew ikkonfermati.

(276)

Il-konklużjonijiet misluta fil-premessi minn (528) sa (529) tar-Regolament provviżorju ġew ikkonfermati u r-rati tas-sussidju stabbiliti b’mod definittiv fir-rigward tal-finanzjament preferenzjali permezz ta’ self matul il-perjodu ta’ investigazzjoni għall-gruppi ta’ kumpaniji inklużi fil-kampjun ammontaw għal:

Finanzjament preferenzjali: self

(277)

Wara d-divulgazzjoni provviżorja, il-Grupp BYD ikkontesta l-valutazzjoni tal-Kummissjoni dwar il-linji ta’ kreditu, billi argumenta li kemm il-banek Ċiniżi kif ukoll dawk internazzjonali li pprovdew linji ta’ kreditu lill-kumpaniji fi ħdan il-Grupp BYD (it-tnejn li huma jinsabu fiċ-Ċina u barra miċ-Ċina) ma kinux jitolbu tariffi tal-ftuħ.

(278)

Madankollu, l-evidenza sottomessa mill-Grupp BYD, li kienet tikkonsisti fi ftehimiet ta’ linja ta’ kreditu ma’ istituzzjonijiet barranin għall-kumpaniji tal-Grupp BYD li jinsabu barra miċ-Ċina, uriet li t-tariffi tal-kummissjoni, l-arranġamenti u t-tariffi ta’ emenda kienu parti mill-ftehimiet, jew li l-ebda tariffa ta’ impenn ma ġiet imposta mill-bank peress li ma pprovdiex impenji biex joħroġ finanzjament għall-kumpanija. B’hekk, l-evidenza addizzjonali sottomessa mill-Grupp BYD uriet li normalment tħallset tariffa ta’ impenn għall-impenn ta’ xi banek li jwarrbu l-flus għall-klijenti tagħhom. Għalhekk, l-asserzjoni ġiet miċħuda.

(279)

Wara d-divulgazzjoni finali, il-Grupp BYD ikkontesta l-analiżi mwettqa mill-Kummissjoni, u tenna li ma ġiet imposta l-ebda tariffa għall-immaniġġar/għall-ftuħ ta’ linji ta’ kreditu, u li l-Kummissjoni ffukat minflok fuq dak li kien relatat ma’ operazzjonijiet bankarji sussegwenti bħal self.

(280)

Il-Kummissjoni fakkret li l-ewwel nett, kif ġie spjegat fil-premessa (530) tar-Regolament provviżorju, l-għan ta’ linja ta’ kreditu huwa li tistabbilixxi limitu ta’ self li l-kumpanija tista’ tuża fi kwalunkwe ħin biex tiffinanzja l-operazzjonijiet kurrenti tagħha, permezz ta’ self b’terminu qasir, abbozzi ta’ aċċettazzjoni bankarja eċċ., u b’hekk il-finanzjament tal-kapital operatorju jsir flessibbli u disponibbli immedjatament meta jkun meħtieġ. Bħala tali, is-self huwa tabilħaqq wieħed mill-operazzjonijiet bankarji konnessi mal-linji ta’ kreditu. It-tieni, il-Kummissjoni ma qablitx mad-dikjarazzjoni li ma ġiet imposta l-ebda tariffa għal-linji ta’ kreditu, peress li mit-tliet dokumenti sottomessi, wieħed semma b’mod ċar kummissjoni li trid titħallas, ieħor irrefera għal ftehim ta’ terminu ta’ kreditu ieħor, u għalhekk il-kumpanija ma ssottomettietx id-dokumentazzjoni sħiħa, u t-tielet wieħed kien jikkonċerna linja ta’ kreditu mhux impenjata. Għalhekk, il-Kummissjoni ċaħdet dawn l-asserzjonijiet.

(281)

Wara d-divulgazzjoni provviżorja, il-Grupp Geely asserixxa wkoll li l-eżistenza ta’ linja ta’ kreditu ma kinitx meħtieġa meta jsir kuntratt għal self individwali. Fin-nuqqas ta’ evidenza ta’ sostenn f’dan ir-rigward, din l-asserzjoni ġiet miċħuda. Fin-nuqqas ta’ kummenti ulterjuri dwar il-valutazzjoni ġenerali tal-linji ta’ kreditu, il-konklużjonijiet misluta fil-premessa (530) tar-Regolament provviżorju ġew ikkonfermati.

(282)

Fin-nuqqas ta’ kummenti rigward is-sejbiet tal-investigazzjoni, il-konklużjonijiet misluta fil-premessi minn (531) sa (533) tar-Regolament provviżorju ġew ikkonfermati.

(283)

Wara d-divulgazzjoni provviżorja, il-Grupp BYD iddikjara li l-linji ta’ kreditu ma humiex speċifiċi skont it-tifsira tal-Artikolu 4(2)(a) tar-Regolament bażiku peress li l-intrapriżi kollha fiċ-Ċina, irrispettivament minn x’inhu t-tip ta’ industrija tagħhom, huma ugwalment eliġibbli biex jiksbu linji ta’ kreditu, u li d-Deċiżjoni Nru 40 ma fiha l-ebda espressjoni li tillimita l-aċċess għal-linji ta’ kreditu.

(284)

Il-Kummissjoni ma qablitx mal-asserzjoni tal-Grupp BYD li l-linji ta’ kreditu ma humiex speċifiċi. F’dan ir-rigward, il-Kummissjoni nnotat li l-Grupp BYD naqas milli juri li l-kumpaniji fir-RPĊ jistgħu ugwalment jibbenefikaw mill-kondizzjonijiet preferenzjali osservati fir-rigward tal-industrija tal-BEV. Barra minn hekk, minħabba li l-linji ta’ kreditu huma intrinsikament marbuta ma’ tipi oħrajn ta’ self preferenzjali, bħal self, u minħabba li huma parti mill-appoġġ ta’ kreditu pprovdut speċifikament lill-industriji mħeġġa, l-analiżi tal-ispeċifiċità għas-self żviluppata fit-Taqsima 3.5.2.2 tar-Regolament provviżorju hija applikabbli wkoll għal-linji ta’ kreditu. Għaldaqstant, din l-asserzjoni ġiet miċħuda.

(285)

Fin-nuqqas ta’ kummenti ulterjuri rigward l-ispeċifiċità, il-konklużjonijiet misluta fil-premessi minn (534) sa (535) tar-Regolament provviżorju ġew ikkonfermati.

(286)

Wara d-divulgazzjoni provviżorja, il-Grupp SAIC asserixxa li kien jenħtieġ li jintuża parametru referenzjarju alternattiv fir-rigward tat-tariffi applikabbli għal-linji ta’ kreditu tal-Grupp SAIC peress li dawk imsemmija fil-premessa (537) tar-Regolament provviżorju ma kinux xierqa. Fil-fehma tas-SAIC, l-użu tar-rati mill-Metrobank tar-Renju Unit ma kienx xieraq peress li kienu rati applikati għal linji ta’ kreditu taħt GBP 60 000, filwaqt li l-linji ta’ kreditu tal-entitajiet fil-Grupp SAIC kienu għoljin daqs bosta biljuni ta’ euro u għalhekk ma kinux komparabbli mas-self miksub mill-Grupp SAIC. Il-Grupp Geely asserixxa wkoll li l-parametru referenzjarju użat ma kienx xieraq. Wara d-divulgazzjoni finali, il-Grupp BYD sostna li l-Kummissjoni bbażat b’mod mhux xieraq fuq linji ta’ kreditu f’GBP maħruġa minn bank żgħir biex tikkonkludi li n-nuqqas ta’ tariffi imposti għall-ftuħ ta’ linji ta’ kreditu mill-banek fiċ-Ċina kien jikkostitwixxi sussidju.

(287)

Il-GTĊ asserixxa li l-valur referenzjarju barra mill-pajjiż użat mill-Kummissjoni kien għoli b’mod mhux raġonevoli (1,25 % sa 1,75 %) meta mqabbel ma’ informazzjoni oħra disponibbli pubblikament (0,25 % sa 1 %) (45). Wara d-divulgazzjoni provviżorja u definittiva, il-GTĊ ikkunsidra li d-daqs tal-bank u tal-linja ta’ kreditu magħżula (sa GBP 60 000) kienu problematiċi. Huwa argumenta wkoll li l-kumpaniji ma kinux qegħdin joperaw f’GBP. Wara d-divulgazzjoni finali, il-GTĊ asserixxa wkoll li l-Artikolu 14(b) tal-Ftehim SCM kien jirrikjedi li l-awtorità investigattiva taġġusta l-parametru referenzjarju biex ikun simili għas-self kummerċjali komparabbli ta’ gvern (46). Il-GTĊ irrefera wkoll għal informazzjoni disponibbli pubblikament (47) li allegatament turi rati applikabbli aktar baxxi, u anke kampjun ta’ banek li allegatament jimponu tariffi ta’ impenn jew arranġament li normalment ivarjaw bejn 0,25 % u 1 %. Barra minn hekk, il-GTĊ asserixxa li r-rati ta’ mgħax referenzjarji użati f’din l-investigazzjoni kienu ogħla b’mod mhux ġustifikat meta mqabbla ma’ investigazzjonijiet preċedenti u li l-Kummissjoni ma kinitx spjegat għaliex dawn ir-rati kienu ogħla milli f’investigazzjonijiet preċedenti.

(288)

Il-Kummissjoni ma qablitx mal-asserzjonijiet ta’ hawn fuq. L-informazzjoni sottostanti li tappartjeni għall-parametru referenzjarju użat f’din l-investigazzjoni ma tipprevedix tariffa differenti skont il-valur tal-linja ta’ kreditu. Fir-rigward tar-rati msemmija mill-GTĊ, dawn ma kinux appoġġati b’informazzjoni oriġinali li tirriżulta minn banek speċifiċi jew li tindika ċerti kundizzjonijiet. Barra minn hekk, il-parametru referenzjarju użat f’din l-investigazzjoni kien f’konformità mal-parametri referenzjarji użati fl-investigazzjonijiet preċedenti li għalihom ma ġie stabbilit l-ebda ammont ta’ limitu superjuri u li rriżulta minn bank internazzjonali ewlieni (48). Għalhekk, l-asserzjonijiet ġew miċħuda. Il-Kummissjoni qieset ukoll li l-parametru referenzjarju li użat kien jirrifletti biżżejjed il-kundizzjonijiet finanzjarji li abbażi tagħhom tingħata linja ta’ kreditu skont kundizzjonijiet normali tas-suq fil-pajjiż fejn kienu joperaw il-kumpaniji. Fi kwalunkwe każ, il-GTĊ ma pprovdiex informazzjoni addizzjonali fir-rigward tal-aġġustamenti li kienu jkunu meħtieġa jew ir-raġunijiet speċifiċi għat-twettiq ta’ tali aġġustament.

(289)

Fir-rigward tal-informazzjoni disponibbli pubblikament, il-Kummissjoni qieset li l-GTĊ ma indikax b’mod ċar elementi speċifiċi fuq is-sit web li rrefera għalih. Fi kwalunkwe każ, l-informazzjoni li tinsab fuq is-sit web ipprovdut b’appoġġ għal din l-asserzjoni ma kinitx meqjusa konklużiva peress li rreferiet għal tariffi ta’ arranġament/impenn li jilħqu sa 4-5 % u/jew irreferiet għal tariffa ta’ impenn applikabbli matul l-hekk imsejjaħ “perjodu ta’ grazzja” mingħajr ma pprovdiet aktar informazzjoni dwar għal xiex jikkorrispondi tali perjodu ta’ grazzja.

(290)

Il-Kummissjoni ma qisitx li l-parametru referenzjarju użat kien ogħla b’mod mhux ġustifikabbli. Fil-fatt, kien simili ħafna għal dak użat f’investigazzjonijiet preċedenti u bbażat fuq informazzjoni disponibbli pubblikament. Il-fatt li l-produtturi tal-BEVs ma joperawx f’GBP ma kienx ikkunsidrat rilevanti għall-adegwatezza tal-parametru referenzjarju magħżul, fejn dak li huwa importanti huma l-kundizzjonijiet tas-suq offruti għas-self tal-flus (irrispettivament mill-munita). Fi kwalunkwe każ, meta titqies ir-rata tal-imgħax LIBOR applikabbli fil-PI, li kienet aktar baxxa minn rata komparabbli applikabbli fir-RPĊ, tali parametru referenzjarju tqies bħala konservattiv. Abbażi ta’ dan, din l-asserzjoni ġiet miċħuda.

(291)

Il-GTĊ żied li l-Kummissjoni kienet naqset milli tiġġustifika kif il-parametru referenzjarju magħżul qarreb linja ta’ kreditu disponibbli għall-kumpaniji ewlenin tal-karozzi Ċiniżi u li dan ma huwiex konness mal-kundizzjonijiet prevalenti tas-suq fir-RPĊ. Il-GTĊ argumenta wkoll li kumpaniji kbar bħall-produtturi tal-BEV normalment jistgħu jinnegozjaw tariffi aktar favorevoli. Fin-nuqqas ta’ evidenza ta’ sostenn, din l-asserzjoni ġiet miċħuda.

(292)

Il-GTĊ argumenta wkoll li hija prattika komuni fiċ-Ċina li l-banek ma jitolbux ħlas għal-linji ta’ kreditu sakemm ma jitteħidx kreditu u jinħareġ self fuqu. F’dan ir-rigward, huwa rrefera għall-Artikolu 1.1 taċ-Ċirkolari tal-Kummissjoni Regolatorja dwar l-Attività Bankarja u l-Assigurazzjoni taċ-Ċina, il-Ministeru tal-Industrija u t-Teknoloġija tal-Informazzjoni, il-Kummissjoni Nazzjonali għall-Iżvilupp u r-Riforma, il-Ministeru tal-Finanzi, il-Bank tal-Poplu taċ-Ċina u l-Amministrazzjoni tal-Istat għar-Regolamentazzjoni tas-Suq dwar ir-Regolamentazzjoni Ulterjuri tal-Imposti ta’ Kreditu u Finanzjament għat-Tnaqqis tal-Kostijiet Ġenerali tal-Finanzjament għall-Intrapriżi fejn “[ma għandha tiġi imposta l-ebda tariffa għall-ġestjoni] [għall-proċedimenti tal-kreditu ttrasferiti iżda li jkunu għadhom ma ntużawx mill-intrapriża]”. Il-GTĊ irrefera wkoll għat-tweġibiet ta’ Zhihu li jsostni li “ma tiġi imposta l-ebda tariffa għal-linji ta’ kreditu”.

(293)

Il-Kummissjoni ma qablitx ma’ tali sejba u rreferiet għas-sit web tal-Bank taċ-Ċina li jindika l-impożizzjoni ta’ tariffi għall-eżistenza ta’ linji ta’ kreditu (49) fil-perjodu ta’ investigazzjoni. Abbażi ta’ dan, il-Kummissjoni rrifjutat ukoll l-asserzjoni tal-GTĊ li tindika struzzjonijiet biex ma tiġi imposta l-ebda tariffa għall-ġestjoni tal-fondi. Fi kwalunkwe każ, il-GTĊ ma pprovdiex evidenza li t-“tariffi tal-ġestjoni tal-fondi” jikkorrispondu għat-tariffi tal-arranġament jew tat-tiġdid. Eventwalment, l-asserzjoni relatata ma’ Zhihu ma ġietx issostanzjata u ma kellhiex leġittimità. Fuq din il-bażi, din l-asserzjoni ġiet miċħuda.

(294)

Fin-nuqqas ta’ kwalunkwe kumment ieħor, il-premessi (536) sa (538) tar-Regolament provviżorju ġew ikkonfermati.

(295)

Wara d-divulgazzjoni provviżorja, il-GTĊ u l-Grupp Geely indikaw li l-abbozzi ta’ aċċettazzjoni bankarja ma humiex forma ta’ finanzjament preferenzjali li jenħtieġ li jiġu kkumpensati. Huma asserew li l-abbozzi ta’ aċċettazzjoni bankarja jippermettu lill-kumpaniji “jixtru bi kreditu” mill-bejjiegħ tal-oġġetti b’garanzija mehmuża. Huma argumentaw li l-banek ipprovdew garanzija għall-ħlas tax-xerrej iżda l-ebda finanzjament. Il-GTĊ argumenta wkoll li, kieku l-Kummissjoni kellha ssib li din l-operazzjoni tikkostitwixxi sussidju, jenħtieġ li tikkalkula l-benefiċċju biss għall-għoti tal-garanzija kif previst mill-kundizzjonijiet tal-banek fuq abbozzi ta’ aċċettazzjoni bankarja (50).

(296)

Il-GTĊ asserixxa wkoll li l-Kummissjoni bbażat fuq is-sejbiet minn investigazzjonijiet tal-passat li ma jikkoinċidux (51) u ma stabbilietx li l-abbozzi ta’ aċċettazzjoni bankarja fiċ-Ċina jirriżultaw f’finanzjament preferenzjali lill-produtturi tal-BEV u li l-Kummissjoni injorat li l-abbozzi ta’ aċċettazzjoni bankarja jaħdmu b’mod differenti minn pajjiż għal ieħor.

(297)

Il-Kummissjoni ma qablitx ma’ dawn l-asserzjonijiet. Hija argumentat li, fin-nuqqas ta’ kooperazzjoni mill-istituzzjonijiet finanzjarji Ċiniżi, il-Kummissjoni kellha tirrikorri għall-fatti disponibbli. F’dan il-kuntest, kellha tibbaża parzjalment fuq is-sejbiet mhux ikkontestati minn investigazzjonijiet tal-passat inklużi dawk relatati ma’ allegati differenzi bejn il-pajjiżi. Fi kwalunkwe każ, il-Kummissjoni bbażat ukoll fuq il-fatti miġbura f’din l-investigazzjoni meta kkonkludiet li s-sistema ta’ aċċettazzjoni bankarja stabbilita fir-RPĊ ipprovdiet lill-produtturi esportaturi kollha inklużi fil-kampjun b’finanzjament liberu tal-operazzjonijiet kurrenti tagħhom, li ta benefiċċju kumpensatorju kif deskritt fil-premessi minn (562) sa (566) tar-Regolament provviżorju. Fuq din il-bażi, din l-asserzjoni ġiet miċħuda.

(298)

Il-GTĊ argumenta wkoll li l-Kummissjoni kienet naqset milli tqis is-sistema ta’ kumpens għall-aċċettazzjoni bankarja stabbilita ma’ banek differenti kif ippreżentata fil-premessa (557) tar-Regolament provviżorju. Fin-nuqqas ta’ elementi ġodda mressqa mill-GTĊ jew mill-produtturi esportaturi inklużi fil-kampjun f’dan ir-rigward, din l-asserzjoni ġiet miċħuda.

(299)

Wara d-divulgazzjoni provviżorja, il-Grupp BYD argumenta li ma ngħata l-ebda benefiċċju mill-aċċettazzjonijiet bankarji, minħabba l-perċentwal ta’ depożiti jew wegħdiet ekwivalenti lill-banek, u talab lill-Kummissjoni tirrevedi l-kalkolu tal-benefiċċji, filwaqt li argumenta li d-depożiti jew il-wegħdiet ipprovduti mill-Grupp BYD lill-banek, u l-introjtu mill-imgħax li jirriżulta minnhom, ikkumpensaw għar-riskji bis-sħiħ u l-kostijiet tal-imgħax imġarrba mill-banek, b’hekk ma taw l-ebda benefiċċju.

(300)

Kif ikkonkludiet il-Kummissjoni f’investigazzjonijiet preċedenti (52), l-ewwel jenħtieġ li jiġi nnotat li hija prattika komuni li l-banek jitolbu garanziji u kollaterali mingħand il-klijenti tagħhom meta jagħtuhom finanzjament. Barra minn hekk, jenħtieġ li jiġi nnotat li tali garanziji jintużaw biex jiżguraw li l-produttur esportatur iġorr ir-responsabbiltà finanzjarja tiegħu fil-konfront tal-bank u mhux fil-konfront tal-fornitur. L-investigazzjoni żvelat ukoll li dawn il-garanziji ma jintalbux b’mod sistematiku mill-banek Ċiniżi u mhux dejjem ikunu marbuta ma’ abbozzi ta’ aċċettazzjoni bankarja speċifiċi. F’dan ir-rigward, id-depożiti allegati ma jammontawx għal pagament bil-quddiem mit-traent lill-banek iżda sempliċement garanzija addizzjonali mitluba mill-banek u li ma għandha l-ebda impatt fuq id-deċiżjoni tal-bank li joħroġ abbozzi ta’ aċċettazzjoni bankarja mingħajr imgħax addizzjonali għas-self fuq it-traent. Barra minn hekk, dawn jistgħu jieħdu diversi forom li jinkludu depożiti b’terminu u rahan. Id-depożiti jistgħu jġorru mgħax favur it-traent, u għalhekk ma jirrappreżentawx kost għat-traent tal-abbozz ta’ aċċettazzjoni bankarja. B’mod simili, kif deskritt fit-Taqsima 3.5.3.2 tar-Regolament provviżorju, l-abbozzi ta’ aċċettazzjoni bankarja effettivament għandhom l-istess skop u effetti bħas-self ta’ kapital operatorju fuq medda ta’ terminu qasir, minħabba li dawn jintużaw mill-kumpaniji biex jiffinanzjaw l-operazzjonijiet kurrenti tagħhom minflok jużaw self ta’ kapital operatorju fuq terminu qasir u li, konsegwentement, jenħtieġ li jġarrbu kost ekwivalenti għal finanzjament ta’ self ta’ kapital operatorju fuq medda ta’ terminu qasir. Fuq din il-bażi, din l-asserzjoni ġiet miċħuda.

(301)

F’dan il-każ, il-Grupp SAIC asserixxa li l-aċċettazzjonijiet bankarji jenħtieġ li jitqiesu bħala metodu ta’ pagament minħabba li l-banek ma pprovdew l-ebda kontribuzzjoni finanzjarja peress li l-banek sempliċiment assumew l-obbligi legali għall-pagament kif ġew ordnati jagħmlu mix-xerrejja li, min-naħa tagħhom, aġixxew skont il-kuntratti tax-xiri u tal-provvista sottostanti. Barra minn hekk, dan il-metodu ma kienx speċifiku għall-produtturi tal-BEVs iżda kien disponibbli wkoll għal kwalunkwe kumpanija oħra fiċ-Ċina.

(302)

Il-Kummissjoni ċaħdet l-asserzjoni tal-Grupp SAIC li l-banek ma pprovdew l-ebda kontribuzzjoni finanzjarja minħabba li l-banek fil-fatt jieħdu f’idejhom l-ammonti pagabbli tal-kont tal-Grupp SAIC u jipprevedu terminu ta’ pagament estiż lill-Grupp SAIC mingħajr ma jitolbu l-pagament ta’ kwalunkwe forma ta’ mgħax, li normalment ikun dovut. Fin-nuqqas ta’ evidenza dwar id-disponibbiltà ta’ abbozzi ta’ aċċettazzjoni bankarja offruti b’kundizzjonijiet simili għal kwalunkwe parti oħra fiċ-Ċina, din l-asserzjoni ġiet miċħuda.

(303)

Wara d-divulgazzjoni finali, il-Grupp Geely asserixxa li qatt ma uża l-fondi tal-bank matul il-PI, minħabba li ma kellu ebda istanza fejn naqas milli jħallas mal-maturità. Il-Kummissjoni ċaħdet din l-asserzjoni fuq il-bażi li ma jingħatax benefiċċju meta l-kumpaniji jonqsu milli jħallsu lura l-fondi li huma jkunu ssellfu iżda pjuttost abbażi tas-self b’terminu qasir mingħajr ħlas li hija tirċievi permezz tal-eżistenza ta’abbozzi ta’ aċċettazzjoni bankarja. Fuq din il-bażi, din l-asserzjoni ġiet miċħuda.

(304)

Wara d-divulgazzjoni finali, il-GTĊ tenna li l-Kummissjoni ma kellhiex tittratta l-abbozzi ta’ aċċettazzjoni bankarja b’mod simili għal self b’terminu qasir peress li huma forma differenti ta’ finanzjament.

(305)

Minħabba r-raġunijiet imsemmija fit-Taqsima 3.5.3.2 tar-Regolament provviżorju, il-Kummissjoni qieset li l-abbozzi ta’ aċċettazzjoni bankarja huma ekwivalenti għal self b’terminu qasir u ċaħdet din l-asserzjoni.

(306)

Fin-nuqqas ta’ kummenti ulterjuri dwar il-valutazzjoni ġenerali tal-abbozzi ta’ aċċettazzjoni bankarja, il-konklużjonijiet misluta fil-premessi minn (539) sa (557) tar-Regolament provviżorju ġew ikkonfermati.

(307)

Wara d-divulgazzjoni provviżorja, f’dak li jirrigwarda l-abbozzi ta’ aċċettazzjoni bankarja, il-GTĊ indika li l-Kummissjoni kienet invertiet l-oneru tal-provi billi asseriet li kwalunkwe impriża fir-RPĊ (minbarra fl-industriji mħeġġa) tista’ tibbenefika minn abbozzi ta’ aċċettazzjoni bankarja taħt l-istess termini u kundizzjonijiet preferenzjali.

(308)

Il-GTĊ argumenta li l-Kummissjoni kienet naqset milli twettaq analiżi tal-ispeċifiċità u li kienet ibbażat fuq il-valutazzjoni tagħha fir-rigward tas-self, li ma huwiex biżżejjed.

(309)

Il-GTĊ, il-Grupp BYD u l-Grupp SAIC sostnew ukoll li l-aċċettazzjonijiet bankarji ma humiex speċifiċi skont it-tifsira tal-Artikolu 4 tar-Regolament bażiku u l-Artikolu 2 tal-Ftehim SCM, peress li l-entitajiet legali Ċiniżi kollha huma intitolati għal aċċettazzjonijiet bankarji, ma jingħata l-ebda limitu u restrizzjoni lill-kumpaniji dwar kif jużawhom għall-finijiet ta’ tranżazzjonijiet kummerċjali, u l-kundizzjonijiet għall-applikazzjoni għal aċċettazzjonijiet bankarji huma newtrali, mingħajr ma jiġu ċirkoskritti għal tip speċifiku ta’ intrapriżi. Il-GTĊ indika wkoll li l-Kummissjoni kienet invertiet l-oneri tal-provi billi sostniet li ma kien hemm l-ebda evidenza li xi impriża fir-RPĊ (minbarra fl-industriji mħeġġa) setgħet tibbenefika minn abbozzi ta’ aċċettazzjoni bankarja taħt l-istess termini u kundizzjonijiet preferenzjali.

(310)

Dawn l-asserzjonijiet kellhom jiġu miċħuda. L-asserzjoni tal-Grupp SAIC ma ġietx issostanzjata. Minkejja l-fatt li l-BYD issottometta l-Miżuri għall-Amministrazzjoni tal-Aċċettazzjoni, l-Iskont, u l-Iskont tal-Bank Ċentrali tal-Abbozzi Kummerċjali (id-Digriet Nru 4 [2022] tal-Bank tal-Poplu taċ-Ċina u l-Kummissjoni Regolatorja dwar l-Attività Bankarja u l-Assigurazzjoni taċ-Ċina) (53) u l-Miżuri għall-Implimentazzjoni tal-Amministrazzjoni ta’ Strumenti Negozjabbli (54) bħala leġiżlazzjoni applikabbli għall-aċċettazzjonijiet bankarji, l-evidenza sottomessa naqset milli turi li xi impriża fir-RPĊ (għajr fl-industriji mħeġġa) setgħet tibbenefika minn abbozzi ta’ aċċettazzjoni bankarja bl-istess termini u kundizzjonijiet preferenzjarji osservati fir-rigward tal-industrija tal-BEV. Barra minn hekk, anke jekk forma ta’ finanzjament tista’ fil-prinċipju tkun disponibbli għal kumpaniji f’industriji oħrajn, il-kundizzjonijiet konkreti, li taħthom tali finanzjament jiġi offrut lil kumpaniji minn ċerta industrija, bħar-remunerazzjoni tal-finanzjament u l-volum ta’ finanzjament, jistgħu jagħmluha speċifika. Ma ġiet sottomessa l-ebda evidenza minn xi waħda mill-partijiet interessati li turi li l-finanzjament preferenzjali permezz ta’ abbozzi ta’ aċċettazzjoni bankarja tal-kumpaniji fl-industrija tal-BEV huwa bbażat fuq kriterji jew kundizzjonijiet oġġettivi skont l-Artikolu 4(2)(b) tar-Regolament bażiku. Sa fejn huma kkonċernat l-oneru tal-provi, il-Kummissjoni rreferiet għas-sejbiet tagħha kif miġbura fil-qosor fil-premessi (555) u (558) sa (560) tar-Regolament provviżorju, li jistabbilixxu li l-produtturi esportaturi kollha inklużi fil-kampjun ibbenefikaw minn finanzjament liberu tal-operazzjonijiet kurrenti tagħhom u li tali benefiċċju huwa marbut ma’ deċiżjonijiet nazzjonali bħad-Deċiżjoni Nru 40 jew l-avviż tas-CBIRC imsemmi fil-premessa (560). Barra minn hekk, fin-nuqqas ta’ kooperazzjoni sħiħa minn kwalunkwe istituzzjoni finanzjarja Ċiniża, il-Kummissjoni rrikorriet għall-fatti disponibbli. F’dan il-kuntest, il-Kummissjoni ma kkunsidratx li hija invertiet l-oneru tal-prova, iżda li l-GTĊ u l-istituzzjonijiet finanzjarji Ċiniżi ma ssottomettew l-ebda element li jikkonfuta s-sejbiet stabbiliti mill-Kummissjoni. Fuq din il-bażi, din l-asserzjoni ġiet miċħuda.

(311)

Fin-nuqqas ta’ kummenti ulterjuri rigward l-ispeċifiċità, il-konklużjonijiet misluta fil-premessi minn (558) sa (561) tar-Regolament provviżorju ġew ikkonfermati.

(312)

Wara d-divulgazzjoni provviżorja, il-Grupp SAIC oġġezzjona għall-fatt li għal bosta entitajiet, numru ta’ ġranet li jiddekorru wara t-tmiem tal-perjodu ta’ investigazzjoni ġew ikkunsidrati fil-kalkolu tas-sussidju. Barra minn hekk, l-aċċettazzjonijiet bankarji bejn il-kumpaniji mogħtija lil kumpanija finanzjarja fil-Grupp SAIC kienu jenħtieġu li jitneħħew peress li ma kienitx benefiċjarja ta’ din l-iskema. Bħala kumpanija finanzjarja din l-entità kienet qiegħda tagħti u mhux tirċievi aċċettazzjonijiet bankarji.

(313)

Il-Kummissjoni nnotat li ċerti kumpaniji ma kienux ipprovdew l-informazzjoni b’mod konformi mal-istruzzjonijiet li jinsabu fil-kwestjonarju peress li l-abbozzi ta’ aċċettazzjoni bankarja li bdew qabel il-perjodu ta’ investigazzjoni ma kienux ġew irrapportati u b’hekk l-ebda kalkolu ma seta’ jiġi bbażat fuq dawk l-abbozzi neqsin. Madankollu, bi qbil ma’ ċerti kumpaniji u kif ġie spjegat fid-divulgazzjoni speċifika, il-kumpaniji tal-Grupp SAIC ma ntalbux jissottomettu mill-ġdid dik l-informazzjoni dettaljata minħabba l-piż li dan kien joħloq iżda qablu dwar il-fatt li l-benefiċċju xorta jkun ibbażat fuq abbozzi ta’ aċċettazzjoni bankarja li jkunu għadhom għaddejjin wara l-perjodu ta’ investigazzjoni. Għal kumpaniji oħrajn li magħhom ma ntalabx li jsir qbil, il-Kummissjoni applikat l-istess approċċ li huwa bbażat fuq l-informazzjoni ppreżentata mill-kumpaniji u kkunsidrat li l-użu ta’ dik l-informazzjoni kien raġonevoli peress li kien ikopri perjodu nett ta’ 12-il xahar meta nħarġu l-abbozzi ta’ aċċettazzjoni bankarja. Fuq din il-bażi, din l-asserzjoni ġiet miċħuda.

(314)

F’dak li għandu x’jaqsam mal-abbozzi ta’ aċċettazzjoni bankarja interkorporattivi, il-Kummissjoni aċċettat l-asserzjonijiet u rriflettiet dan fil-kalkolu rivedut tagħha tal-ammont ta’ sussidju.

(315)

Il-Grupp Geely asserixxa li l-benefiċċju jenħtieġ li jkun ibbażat fuq it-tariffa għall-kreditu, mhux fuq ir-rata tal-imgħax tal-bank u li jenħtieġ li l-ebda benefiċċju ma jiġi kkalkolat għall-abbozzi ta’ aċċettazzjoni bankarja koperti bis-sħiħ minn depożitu ta’ flus jew minn garanzija bankarja u li t-tariffi mħallsa mill-Grupp Geely jenħtieġ li jitnaqqsu mill-kalkolu tal-benefiċċju.

(316)

Il-Kummissjoni ma qablitx mal-asserzjonijiet tal-Grupp Geely. Meta wieħed iqis in-natura tal-abbozzi ta’ aċċettazzjoni bankarja li jipprevedu terminu ta’ pagament estiż permezz ta’ self b’terminu qasir bla ħlas, il-Kummissjoni qieset li l-benefiċċju jenħtieġ li jiġi kkalkolat abbażi ta’ parametru referenzjarju mingħajr distorsjoni. Barra minn hekk, kif stabbilit f’investigazzjonijiet preċedenti, il-fatt li l-abbozzi ta’ aċċettazzjoni bankarja huma koperti minn depożitu ta’ flus jew garanzija huwa irrilevanti għall-kalkolu tal-benefiċċju. Il-benefiċċju ġie kkalkolat bħala d-differenza bejn l-ammont li l-kumpanija kienet fil-fatt ħallset bħala remunerazzjoni tal-finanzjament permezz ta’ abbozzi ta’ aċċettazzjoni bankarja u l-ammont li jenħtieġ li tħallas billi tiġi applikata rata tal-imgħax ta’ self b’terminu qasir. Tabilħaqq, hija prattika komuni għall-banek li jitolbu diversi forom ta’ garanziji meta jipprovdu self. L-eżistenza ta’ garanzija ma timplikax li l-fondi ngħataw b’self skont it-termini tas-suq. Bl-istess mod, il-Kummissjoni ma qisitx li t-tariffa mħallsa mal-ħruġ tal-abbozz ta’ aċċettazzjoni bankarja hija komparabbli mal-pagament tal-imgħax. Għalhekk, il-Kummissjoni ma qisitx li din it-tariffa jenħtieġ li titnaqqas. Abbażi ta’ dan, dawn l-asserzjonijiet ġew miċħuda.

(317)

Wara d-divulgazzjoni finali, il-GTĊ argumenta li l-parametru referenzjarju użat jenħtieġ li jkollu l-istess struttura bħall-kontribuzzjoni finanzjarja li qiegħda titqabbel f’konformità mal-Artikoli 14(b) u (c) tal-Ftehim SCM. Il-Kummissjoni ċaħdet din l-asserzjoni minħabba li l-parametru referenzjarju użat u l-metodoloġija applikata jikkorrispondu għall-istrument finanzjarju inkwistjoni fejn il-produtturi tal-BEVs, li jibbenefikaw minn abbozzi ta’ aċċettazzjoni bankarja, irċevew finanzjament preferenzjali permezz ta’ self b’terminu qasir mingħajr ħlas. Għalhekk, il-Kummissjoni qieset li l-użu ta’ rata tal-imgħax għal terminu qasir applikabbli għad-durata tas-self kien bażi xierqa biex jiġi kkalkolat il-benefiċċju mogħti lir-riċevitur. Fuq din il-bażi, din l-asserzjoni ġiet miċħuda.

(318)

Fin-nuqqas ta’ kwalunkwe kumment ieħor, il-konklużjonijiet stabbiliti fil-premessi minn (562) sa (566) tar-Regolament provviżorju ġew ikkonfermati.

(319)

Wara d-divulgazzjoni provviżorja, il-GTĊ argumenta li jenħtieġ li l-Kummissjoni ma tibbażax fuq investigazzjonijiet tal-passat biex tistabbilixxi s-sejbiet tagħha u li l-Kummissjoni naqset milli turi li l-kontijiet skontati huma forma ta’ finanzjament preferenzjali.

(320)

Kif deskritt fil-premessi minn (567) sa (570) tar-Regolament provviżorju, permezz tal-użu ta’ kontijiet skontati, l-intermedjarji finanzjarji pprovdew ammonti ta’ riċevibbli qabel id-data ta’ maturità tagħhom. Il-kumpaniji inkwistjoni rċevew fondi bikrin billi ttrasferew id-drittijiet ta’ riċevibbli futuri lil istituzzjonijiet finanzjarji wara t-tnaqqis ta’ tariffi u tar-rati ta’ skont applikabbli. Ir-rata ta’ skont applikabbli nstabet li kienet f’livell preferenzjali. Il-benefiċċju b’hekk ikkonferit lir-riċevituri huwa d-differenza bejn ir-rata ta’ skont applikata mill-istituzzjonijiet finanzjarji Ċiniżi u r-rata ta’ skont applikabbli għal operazzjoni komparabbli fis-suq. Fin-nuqqas ta’ kooperazzjoni mill-istituzzjonijiet finanzjarji Ċiniżi, il-Kummissjoni kkonfermat is-sejba tagħha li l-kontijiet skontati pprovdew finanzjament b’rata preferenzjali. Il-Kummissjoni opponiet l-asserzjoni tal-GTĊ li hija tibbaża fuq is-sejbiet f’investigazzjonijiet tal-passat. Fuq din il-bażi, din l-asserzjoni ġiet miċħuda.

(321)

Il-Grupp BYD sostna li kien jenħtieġ li l-kontijiet skontati intragrupp b’perċentwal ta’ depożitu speċifiku jiġu esklużi mill-kalkolu tal-benefiċċju, abbażi tal-fatt li l-Grupp BYD ma ttrasferiex ir-riċevibbli immaturi lill-banek, iżda kiseb mill-ġdid id-depożiti pprovduti lill-banek.

(322)

Il-Kummissjoni ma aċċettatx l-asserzjoni minħabba li t-tranżazzjoni tal-kont skontat ma ssirx bejn partijiet relatati iżda bejn ir-riċevitur tal-kont u bank. Il-fatt li l-aċċettazzjoni bankarja oriġinali, li wara ġiet skontata, inizjalment inħarġet minn kumpanija relatata huwa irrilevanti u ma jbiddilx il-fatt li l-kumpanija bbenefikat minn rata ta’ skont baxxa meta mqabbla mar-rata ta’ skont applikabbli għal operazzjoni komparabbli fis-suq.

(323)

Fin-nuqqas ta’ kummenti ulterjuri dwar il-valutazzjoni ġenerali tal-kontijiet skontati, il-konklużjonijiet li saru fil-premessi minn (567) sa (570) tar-Regolament provviżorju ġew ikkonfermati.

(324)

Wara d-divulgazzjoni provviżorja, il-GTĊ u l-Grupp BYD sostnew li l-kontijiet skontati ma humiex speċifiċi iżda huma disponibbli għas-setturi kollha. Il-Grupp BYD irrefera għad-dispożizzjonijiet li jinsabu fl-Artikolu 15 tal-Miżuri għall-Amministrazzjoni tal-Aċċettazzjoni, tal-Iskont u tal-Iskont tal-Banek Ċentrali tal-Abbozzi Kummerċjali (55).

(325)

Kif stabbilit fil-premessa (572) tar-Regolament provviżorju, il-kontijiet skontati, bħala forma ta’ finanzjament, huma parti mis-sistema ta’ appoġġ finanzjarju preferenzjali mill-istituzzjonijiet finanzjarji lill-industriji mħeġġa, bħall-industrija tal-BEV, u l-evidenza sottomessa mill-Grupp BYD naqset milli turi li kwalunkwe impriża fir-RPĊ (għajr fi ħdan l-industriji mħeġġa) tista’ tibbenefika minn kontijiet skontati bl-istess termini u kundizzjonijiet preferenzjali osservati fir-rigward tal-industrija tal-BEV. Għalhekk, l-asserzjonijiet ġew miċħuda.

(326)

Fin-nuqqas ta’ kwalunkwe kumment ieħor relatat mal-ispeċifiċità, il-konklużjonijiet stabbiliti fil-premessi minn (571) sa (573) tar-Regolament provviżorju huma b’dan ikkonfermati.

(327)

Fin-nuqqas ta’ kwalunkwe kumment fir-rigward tal-kalkolu tal-ammont tas-sussidju, il-konklużjonijiet li saru fil-premessi minn (574) sa (576) tar-Regolament provviżorju ġew ikkonfermati.

(328)

Fin-nuqqas ta’ kwalunkwe kumment rigward il-valutazzjoni ġenerali ta’ konverżjonijiet ta’ dejn f’ekwità, il-konklużjonijiet li saru fil-premessi minn (577) sa (580) tar-Regolament provviżorju ġew ikkonfermati.

(329)

Fin-nuqqas ta’ kwalunkwe kumment rigward l-ispeċifiċità, il-konklużjonijiet li saru fil-premessa (581) tar-Regolament provviżorju ġew ikkonfermati.

(330)

Wara d-divulgazzjoni provviżorja skont il-GTĊ, peress li l-entitajiet involuti f’konverżjoni ta’ dejn f’ekwità huma intitolati għal drittijiet tal-azzjonisti, l-investiment kapitali ma kienx jenħtieġ li jiġi ttrattat bħala self mingħajr imgħax għall-kalkolu tal-benefiċċji.

(331)

Il-Kummissjoni qieset li l-benefiċċju tal-konverżjoni ta’ dejn f’ekwità jenħtieġ li jiġi ttrattat mill-perspettiva tal-benefiċjarju tas-sussidju, jiġifieri NHBGAP. Madankollu, id-drittijiet tal-azzjonisti meqjusa mill-GTĊ kienu jikkonċernaw l-investituri, mhux lil NHBGAP, u għalhekk ma humiex rilevanti biex jiġi kkalkolat il-benefiċċju riċevut minn NHBGAP. Għall-kuntrarju, il-Kummissjoni nnotat li l-benefiċċju kien ekwivalenti għal self mingħajr imgħax peress li, mill-perspettiva ta’ NHBGAP, id-dejn b’ċerta rata ta’ imgħax dovuta lid-debitur ġie kkonvertit f’tip ieħor ta’ dejn subordinat lill-istess debitur, iżda mingħajr ma jkunu involuti aktar pagamenti ta’ imgħax. B’hekk, din l-asserzjoni ġiet miċħuda.

(332)

Fin-nuqqas ta’ kummenti ulterjuri fir-rigward tal-kalkolu tal-benefiċċju, il-konklużjonijiet li saru fil-premessi minn (582) sa (583) tar-Regolament provviżorju ġew ikkonfermati.

(333)

Wara d-divulgazzjoni provviżorja, il-GTĊ argumenta li l-Kummissjoni ma analizzatx jekk id-diversi injezzjonijiet ta’ kapital kinux aktar ta’ benefiċċju minn injezzjoni ta’ kapital privata.

(334)

Il-Kummissjoni ma taqbilx ma’ din il-valutazzjoni. Għal kull wieħed mill-każijiet, il-Kummissjoni spjegat in-natura ta’ benefiċċju tat-tranżazzjoni bħal pereżempju fil-premessi (579) u (582) tar-Regolament provviżorju għall-konverżjoni ta’ dejn f’ekwità msemmija hawn fuq, jew fil-premessi minn (585) sa (587) tar-Regolament provviżorju għall-injezzjoni ta’ kapital tal-Grupp Geely.

(335)

Barra minn hekk, għall-injezzjoni ta’ kapital li tikkonċerna lil SAIC, il-valutazzjoni tal-Kummissjoni kellha tkun ibbażata bis-sħiħ fuq il-fatti disponibbli, kif enfasizzat fil-premessi minn (600) u (605) tar-Regolament provviżorju, u għalhekk il-kundizzjonijiet sottostanti preċiżi tat-tranżazzjoni ma kinux magħrufa. Min-naħa l-oħra, abbażi tal-informazzjoni disponibbli għall-pubbliku stabbilita fil-premessi minn (601) sa (606) tar-Regolament provviżorju, fil-premessa (607) tar-Regolament provviżorju l-Kummissjoni kkonkludiet li l-parteċipanti fit-tranżazzjoni aġixxew bħala korpi pubbliċi f’konformità mal-qafas leġiżlattiv applikabbli biex jipprovdu kapital addizzjonali lil SAIC mingħajr ebda kost.

(336)

Finalment, il-Kummissjoni nnotat li, minbarra stqarrija ġenerali, il-GTĊ ma ġab l-ebda element ġdid fil-fajl biex jikkontradixxi s-sejbiet tal-Kummissjoni. Għalhekk, din l-asserzjoni ġiet miċħuda.

(337)

Wara d-divulgazzjoni provviżorja, il-Grupp Geely asserixxa li l-Hubei Jiyuan Yangtze River Industrial Fund Partnership la hija korp pubbliku u lanqas ma hija vestita b’awtorità governattiva. Barra minn hekk, minħabba t-trasferiment tal-ishma tagħha lil entità privata fl-2024, huwa jargumenta li l-parametru referenzjarju jenħtieġ li jiġi mmodifikat.

(338)

Il-Kummissjoni nnotat, kif deskritt fil-premessa (590) tar-Regolament provviżorju, li l-Yangtze River Industrial Fund, Fond ta’ Gwida tal-Gvern Ċiniż mill-2017, jiffoka fuq l-iżvilupp ta’ industriji emerġenti strateġiċi fil-provinċja ta’ Hubei, inkluż il-BEVs. Il-fond jallinja mal-istrateġiji nazzjonali għal raggruppamenti industrijali moderni, filwaqt li jenfasizza r-rwol tiegħu fl-implimentazzjoni ta’ proġetti industrijali ewlenin tal-gvern fir-reġjun. Fir-rigward tal-asserzjoni li l-fond ittrasferixxa l-ishma tiegħu lil entità privata wara l-perjodu ta’ investigazzjoni, dan ma jmurx kontra s-sejba li l-GTĊ ittrasferixxa direttament fondi lill-Grupp Geely permezz ta’ dan il-fond matul il-PI. Għaldaqstant, dawn l-asserzjonijiet ġew miċħuda.

(339)

Wara d-divulgazzjoni provviżorja, il-Grupp SAIC sostna li l-ammont kollu tal-benefiċċju tal-injezzjoni ta’ ekwità li jinstab fil-premessa (598) tar-Regolament provviżorju ma kienx jenħtieġ li jiġi allokat fuq il-fatturat totali tal-PUI. Il-Grupp SAIC allega li l-informazzjoni disponibbli għall-pubbliku li l-Kummissjoni bbażat fuqha ma indikatx b’mod ċar x’kien speċifikament għall-BEVs u x’kien għal skopijiet oħrajn jew dak li ma kienx speċifiku għall-PUI.

(340)

Il-Kummissjoni aċċettat parzjalment din l-asserzjoni sa fejn l-informazzjoni disponibbli għall-pubbliku msemmija fil-premessa (339) ta’ dan ir-Regolament indikat li l-injezzjoni ta’ kapital ma kinitx relatata bis-sħiħ mal-BEVs u rrevediet il-kalkolu. Fin-nuqqas ta’ informazzjoni vverifikata, li ma ġietx ipprovduta mill-Grupp SAIC, il-Kummissjoni kienet intitolata, fejn xieraq, li tuża l-fatti disponibbli. Għalhekk, il-bqija tal-asserzjoni ġiet miċħuda. Fin-nuqqas ta’ kwalunkwe kumment ieħor dwar il-valutazzjoni ġenerali tal-injezzjonijiet ta’ dejn f’ekwità, is-sejbiet tal-investigazzjoni, il-benefiċċju, l-ispeċifiċità u l-kalkolu tal-benefiċċju, il-konklużjonijiet misluta fil-premessi minn (584) sa (610) tar-Regolament provviżorju ġew ikkonfermati.

(341)

Wara d-divulgazzjoni finali, il-GTĊ ssottometta mill-ġdid l-asserzjonijiet tiegħu li l-mistoqsijiet li għamlet il-Kummissjoni dwar is-suġġett tal-bonds ekoloġiċi kienu wesgħin wisq biex il-GTĊ jipprovdi kwalunkwe informazzjoni sinifikanti, u li n-nuqqas ta’ kooperazzjoni tal-GTĊ allegat mill-Kummissjoni kien fil-fatt ikkawżat mill-Kummissjoni nnifisha.

(342)

Il-Kummissjoni terġa’ tfakkar, kif huwa enfasizzat fil-premessa (270) tar-Regolament provviżorju, li matul l-investigazzjoni, il-Kummissjoni ppreżentat serje ta’ mistoqsijiet dettaljati, iddefiniti sew u relevanti lill-GTĊ fl-ittra ta’ nuqqasijiet, talba addizzjonali għall-informazzjoni, u matul iż-żjara ta’ verifika fl-uffiċċji tal-GTĊ, li għalihom dan tal-aħħar naqas milli jipprovdi l-informazzjoni meħtieġa. Barra minn hekk, fit-talba tagħha għal informazzjoni, il-Kummissjoni ċċitat diversi dokumenti uffiċjali speċifiċi li għandhom x’jaqsmu ma’ bonds ekoloġiċi u ma’ kumpaniji ta’ finanzjament tal-karozzi. Billi l-GTĊ jinsisti fuq il-fatt li għandhom jissemmew xi wħud minn dawn id-dokumenti, huwa biżżejjed li jingħad li dawn id-dokumenti kienu jinkludu pereżempju l-Linji Gwida dwar il-Ħruġ ta’ Bonds Ekoloġiċi maħruġa mill-NDRC, l-Opinjonijiet ta’ Gwida dwar l-Appoġġ tal-Iżvilupp ta’ Bonds Ekoloġiċi maħruġa mis-CSRC, l-Avviż dwar il-Ħruġ tal-Katalgu tal-Proġetti Approvati tal-Bonds Ekoloġiċi (Edizzjoni 2021), maħruġ mill-PBOC, mill-NDRC u mis-CSRC, l-Għodda ta’ Finanzjament mill-Ekwità Ambjentali ppubblikata mill-PBoC, u l-Programm ta’ Evalwazzjoni Finanzjarja Ekoloġika għall-Istituzzjonijiet Finanzjarji Bankarji, maħruġ mill-PBoC. Dawn huma dokumenti essenzjali, li jiffurmaw il-bażi tal-qafas legali u regolatorju għall-ħruġ ta’ bonds ekoloġiċi u finanzjament ekoloġiku f’sens usa’. Mingħajr dawn id-dokumenti, il-Kummissjoni b’mod ċar ma kellhiex l-informazzjoni bażika biex tiddetermina jekk il-finanzjament preferenzjali kienx ipprovdut permezz tal-ħruġ ta’ bonds ekoloġiċi. Madankollu, il-GTĊ ma pprovdiex dawn id-dokumenti, u lanqas ma spjega l-qafas legali u regolatorju, jew ma offra spjegazzjoni ta’ x’jikkostitwixxi bond ekoloġiku minkejja li dan jissemma fid-dokumenti uffiċjali. Għalhekk, l-asserzjoni ġiet miċħuda.

(343)

Wara d-divulgazzjoni provviżorja u definittiva, il-GTĊ oppona r-referenzi għall-Artikolu 16 tal-Liġi dwar it-Titoli tar-RPĊ. Il-GTĊ innota li l-Artikolu 16 kien ġie mibdul fl-2019. Huwa ddikjara wkoll li l-Artikolu 12 tar-Regolamenti dwar l-Amministrazzjoni tal-Bonds Korporattivi, li jirrikjedi li l-għan tal-fondi miġbura jeħtieġ li jikkonforma mal-politiki industrijali tal-Istat, huwa biss rekwiżit għall-emittent tal-bonds tal-intrapriżi, jiġifieri, l-intrapriżi, iżda mhux rekwiżit għall-investituri. Barra minn hekk, dan jirregola biss l-użu tal-kapital miġbur; ma jirrikjedix li xi istituzzjoni tinvesti fil-bonds tal-impriża.

(344)

Barra minn hekk, il-GTĊ għal darb’oħra argumenta li l-industrija tal-BEV ma hijiex industrija mħeġġa, li l-istituzzjonijiet finanzjarji ma humiex qed jaġixxu bħala korpi pubbliċi u li l-klassifikazzjonijiet tal-kreditu huma affidabbli.

(345)

Wara d-divulgazzjoni provviżorja, il-GTĊ argumenta wkoll li l-Kummissjoni ma pprovdiet l-ebda evidenza li “l-biċċa l-kbira mill-investituri huma investituri istituzzjonali, inklużi istituzzjonijiet finanzjarji”, minbarra artikolu ta’ Bloomberg “ta’ sentejn ilu”. U fi kwalunkwe każ, dan l-artikolu jkun kapaċi biss juri l-kompożizzjoni tal-investituri tal-bonds Ċiniżi b’mod ġenerali, mhux l-investituri speċifiċi tal-bonds maħruġa mill-produtturi esportaturi inklużi fil-kampjun. Wara d-divulgazzjoni finali, il-GTĊ sostna mill-ġdid l-argumenti tiegħu u insista li, fi kwalunkwe każ, benefiċċju jenħtieġ li jiġi kkalkolat biss għal dawk il-bonds speċifiċi fejn il-Kummissjoni setgħet turi li ġew investiti minn korpi pubbliċi.

(346)

Il-Kummissjoni żżomm il-pożizzjoni tagħha wara d-divulgazzjoni provviżorja. Il-Kummissjoni rrikonoxxiet li l-Artikolu 16 tal-Liġi dwar it-Titoli tar-RPĊ ġie emendat fl-2019. Madankollu, il-Kummissjoni ma taqbilx mal-interpretazzjoni tal-GTĊ tal-Artikolu 12 tar-Regolamenti dwar l-Amministrazzjoni tal-Bonds Korporattivi. Tabilħaqq, il-fatt li l-emittent tal-bond irid jikkonforma mal-politiki industrijali tal-Istat sabiex ikun jista’ jkollu aċċess għas-suq tal-bonds juri li dawn il-mezzi addizzjonali ta’ finanzjament permezz tas-suq tal-bonds huma disponibbli biss għal ċerti intrapriżi mħeġġa u għal dawk l-użi mħeġġa mill-Istat biss.

(347)

Dan il-fatt, flimkien mas-sejbiet ġenerali l-oħrajn kollha tal-Kummissjoni dwar il-finanzjament preferenzjali f’dan il-każ, li ġew deskritti b’mod estensiv fit-Taqsima 3.5.1 tar-Regolament provviżorju u kkonfermati fit-Taqsima 3.5.1 hawn fuq, bħall-fatt li l-istituzzjonijiet finanzjarji qed jaġixxu bħala korpi pubbliċi, u l-fatt li l-klassifikazzjonijiet tal-kreditu huma distorti, intużaw flimkien fil-valutazzjoni tal-Kummissjoni tal-finanzjament preferenzjali fuq is-suq tal-bonds.

(348)

Barra minn hekk, il-Kummissjoni nnotat li l-hekk imsejjaħ “artiklu” ta’ Bloomberg fil-fatt huwa rapport ta’ 74 paġna mill-2022 dwar is-suq tal-bonds Ċiniż. Peress li n-negozju ewlieni ta’ Bloomberg huwa l-analiżi tad-data u x-xejriet fis-swieq kapitali, il-Kummissjoni temmen li dan l-istudju jista’ jitqies bħala evidenza affidabbli li tkopri l-PI. Barra minn hekk, dan ir-rapport jikkorrobora informazzjoni miġbura matul investigazzjonijiet preċedenti u jikkonferma li s-sitwazzjoni ma kinitx inbidlet matul il-perjodu ta’ investigazzjoni.

(349)

Biex tikkomplementa, il-Kummissjoni tiġbed l-attenzjoni għal xi rapporti reċenti ulterjuri, li jikkonfermaw is-sejbiet tar-rapport ta’ Bloomberg. Fil-fatt, skont l-informazzjoni disponibbli għall-Kummissjoni, l-istruttura tal-investituri fis-suq tal-bonds Ċiniż għadha ddominata ħafna mill-istituzzjonijiet finanzjarji, li huma wkoll is-sottoskritturi tal-biċċa l-kbira tal-bonds (56). Il-banek huma wkoll l-akbar detenturi ta’ bonds korporattivi, segwiti minn istituzzjonijiet ta’ fondi (57). Barra minn hekk, l-investituri internazzjonali kellhom anqas minn 3 % tas-suq tal-bonds Ċiniż fl-2021 (58).

(350)

Fir-rigward tal-bonds maħruġa mill-produtturi esportaturi inklużi fil-kampjun, il-Kummissjoni sabet li ċertu numru ta’ bonds inħarġu fis-suq interbankarju, li skont id-definizzjoni, huwa miftuħ biss għal investituri istituzzjonali/istituzzjonijiet finanzjarji. Jenħtieġ li jiġi mfakkar ukoll li ħlief għall-bank EXIM, l-ebda waħda mill-istituzzjonijiet finanzjarji ma kkooperat f’din l-investigazzjoni.

(351)

Barra minn hekk, il-GTĊ jinjora l-fatti enfasizzati mill-Kummissjoni fil-premessa (620) tar-Regolament provviżorju, jiġifieri li l-bonds maħruġa mill-kumpaniji inklużi fil-kampjun għandhom rata tal-imgħax qrib jew taħt l-LPR, li jfisser li r-redditu ta’ dawn il-bonds għall-investituri huwa qrib jew anqas mir-rata li biha l-istituzzjonijiet finanzjarji jistgħu jiksbu fondi huma stess minn istituzzjonijiet finanzjarji oħrajn. Fi kliem ieħor, dawn il-bonds huma operazzjoni li tagħmel telf għall-banek. Dan juri b’mod ċar li l-istituzzjonijiet finanzjarji qegħdin jaġixxu bħala korpi pubbliċi li qegħdin iqisu kunsiderazzjonijiet oħrajn għajr investitur li jkun qiegħed jopera fil-kundizzjonijiet tas-suq.

(352)

Il-GTĊ jinjora wkoll l-evidenza speċifika pprovduta għall-bonds ekoloġiċi fil-premessa (617) tar-Regolament provviżorju, fejn il-Kummissjoni nnotat li f’konformità mal-“Programm ta’ Evalwazzjoni Finanzjarja Ekoloġika għall-Istituzzjonijiet Finanzjarji Bankarji” tal-PBOC, il-banek Ċiniżi jridu jissottoskrivu għal strumenti ta’ dejn ekoloġiku sabiex jilħqu limitu partikolari fil-bażi tal-assi finanzjarji tagħhom u dan jikkontribwixxi għal valutazzjoni pożittiva tal-prestazzjoni tagħhom mill-awtorità regolatorja tal-banek. Barra minn hekk, skont l-“Għodda tal-politika monetarja għall-appoġġ tal-proġetti għat-tnaqqis tal-emissjonijiet tal-karbonju” tal-PBOC, l-istituzzjonijiet finanzjarji jridu jipprovdu finanzjament b’appoġġ għall-attivitajiet industrijali ekoloġiċi lill-kumpaniji b’rati tal-imgħax preferenzjali qrib il-livell tar-rata prima tas-self tal-pajjiż. Min-naħa tiegħu, il-PBOC jipproponi rati ta’ rifinanzjament preferenzjali lill-banek għall-fondi ekoloġiċi żborżati. Huwa għal darb’oħra ċar li dan jenfasizza li l-istituzzjonijiet finanzjarji kienu qegħdin jaġixxu bħala korpi pubbliċi b’referenza għall-bonds ekoloġiċi maħruġa mill-kumpaniji inklużi fil-kampjun.

(353)

Fl-aħħar nett, il-GTĊ ma pprovda l-ebda evidenza biex jissostanzja l-allegazzjonijiet tiegħu li l-investituri fis-suq tal-bonds Ċiniż ma humiex prinċipalment istituzzjonijiet finanzjarji.

(354)

Għalhekk, il-Kummissjoni kkonfermat il-konklużjoni tagħha li hemm koinċidenza sinifikanti bejn il-kredituri li jipprovdu kapital fis-suq tal-bonds u dawk li jipprovdu kapital fil-forma ta’ self, u li bħala tali, il-bonds huma sa ċertu punt sempliċiment mezz ieħor biex jipprovdu self korporattiv. Għalhekk, il-Kummissjoni ċaħdet dawn l-asserzjonijiet.

(355)

Fin-nuqqas ta’ kwalunkwe kumment rigward il-bażi legali u s-sejba li l-istituzzjonijiet finanzjarji jaġixxu bħala korpi pubbliċi, il-konklużjonijiet li saru fil-premessi minn (611) sa (630) tar-Regolament provviżorju ġew ikkonfermati.

(356)

Fir-rigward tal-bonds, il-GTĊ innota li l-hekk imsejħa “strumenti ta’ dejn ekoloġiku” kienu disponibbli għal għadd ta’ industriji. Huwa argumenta wkoll li dawn il-bonds ma setgħux jitqiesu bħala speċifiċi jew limitati għal għadd ta’ industriji minħabba li “l-bonds ma jistgħux jinħarġu mingħajr approvazzjoni mill-awtoritajiet tal-gvern”.

(357)

B’mod aktar ġenerali, il-GTĊ argumenta li d-Deċiżjoni 40 dwar l-industriji mħeġġa ma tapplikax għal bonds, peress li l-kelma “kreditu” f’din id-Deċiżjoni tirreferi biss għal self f’sens ristrett. Wara d-divulgazzjoni finali, il-GTĊ ipprovda dokumenti Ċiniżi addizzjonali, li fihom it-terminu “kreditu” intuża flimkien mat-terminu “bonds”. Il-GTĊ asserixxa wkoll li l-liġijiet u r-regolamenti ewlenin li l-Kummissjoni bbażat fuqhom biex tappoġġa l-konklużjoni tagħha fit-Taqsima 3.5.1 tar-Regolament provviżorju japplikaw biss għas-self iżda mhux għall-bonds. Barra minn hekk, wara d-divulgazzjoni provviżorja, il-Grupp Geely asserixxa li l-Kummissjoni kienet naqset milli tipprovdi kjarifika suffiċjenti dwar l-ispeċifiċità.

(358)

Dwar is-suġġett tal-bonds ekoloġiċi, il-Kummissjoni enfasizzat fil-premessa (632) tar-Regolament provviżorju li dawn il-bonds huma speċifiċi peress li jistgħu jinħarġu biss minn kumpaniji attivi f’ċerti attivitajiet industrijali elenkati fil-katalogu ta’ attivitajiet industrijali ekoloġiċi. Il-fatt li dan il-katalogu jinkludi aktar minn industrija waħda huwa irrilevanti f’dan ir-rigward u ma jmurx kontra l-konklużjoni tal-Kummissjoni.

(359)

Il-Kummissjoni kkonfermat ukoll li ma kinitx taqbel mal-interpretazzjoni restrittiva tal-GTĊ tal-kelma “kreditu” fid-Deċiżjoni 40 u minflok tkompli tinterpreta dan it-terminu bħala “finanzjament” f’sens usa’. Il-GTĊ ma kkontestax l-osservazzjoni tal-Kummissjoni fid-divulgazzjoni finali, jiġifieri l-fatt li l-Artikolu 12 tar-Regolamenti dwar l-Amministrazzjoni tal-Bonds Korporattivi jagħmel ir-rabta mal-politiki industrijali tal-Istat, li huma ggwidati mid-Deċiżjoni 40. Barra minn hekk, il-GTĊ għażel li jiffoka esklużivament fuq id-Deċiżjoni 40, u injora l-evidenza addizzjonali dwar l-ispeċifiċità pprovduta mill-Kummissjoni fit-Taqsima 3.5.1.5 tar-Regolament provviżorju. Pereżempju, il-premessa (435) tar-Regolament provviżorju rreferiet għall-Pjan ta’ Żvilupp tal-Industrija tal-Vetturi Effiċjenti fl-Enerġija u li Jaħdmu b’Enerġija Ġdida (2012-2020) li jipprevedi “inċentivi ta’ politika permezz ta’ appoġġ ta’ servizz finanzjarju”, u li huwa b’mod ċar speċifiku għas-settur industrijali inkwistjoni. Eżempju ieħor ġie ċċitat fil-premessa (444) tar-Regolament provviżorju, fejn il-Kummissjoni nnotat li l-kriterji tal-evalwazzjoni tal-prestazzjoni tal-NFRA għall-banek kummerċjali jqisu kif l-istituzzjonijiet finanzjarji “jaqdu l-objettivi nazzjonali tal-iżvilupp u l-ekonomija reali”, u b’mod partikolari kif “iservu l-industriji strateġiċi u emerġenti”.

(360)

Għalhekk, dawn l-asserzjonijiet ġew miċħuda.

(361)

Fin-nuqqas ta’ kwalunkwe kumment fir-rigward tal-ispeċifiċità, il-konklużjonijiet fil-premessi minn (631) sa (632) tar-Regolament provviżorju ġew ikkonfermati.

(362)

Wara d-divulgazzjoni provviżorja, il-Grupp SAIC allega li mhux il-bonds kollha maħruġa minn xi wħud mill-entitajiet jenħtieġ li jitqiesu bħala “Bonds Ekoloġiċi”. Fil-fatt, skont il-Prinċipji tal-Bonds Ekoloġiċi taċ-Ċina ta’ Lulju 2022, hemm erba’ komponenti ewlenin relatati mal-bonds ekoloġiċi kif ġej:

(363)

Skont il-Grupp SAIC, dawn l-erba’ komponenti jiddistingwu bejn bonds ekoloġiċi u bonds korporattivi fiċ-Ċina, u dan huwa rifless fid-dokumenti ta’ divulgazzjoni ta’ bonds ekoloġiċi u li huma ġeneralment disponibbli fid-dominju pubbliku, eż. is-siti web tas-swieq jew tar-regolaturi tal-kambju ta’ titoli. Madankollu, filwaqt li l-bonds ekoloġiċi ġeneralment ikollhom it-tikketta “ekoloġiku” fl-ismijiet tagħhom, bonds mhux ekoloġiċi ma humiex permessi li jkollhom it-tikketti ekoloġiċi minħabba li ma jistgħux jissodisfaw ir-rekwiżiti tal-ħruġ ta’ Bonds Ekoloġiċi stabbiliti mill-Bank tal-Poplu taċ-Ċina. Dan ifisser li mhux il-bonds kollha jistgħu jiġu ttrattati bħala bonds ekoloġiċi mill-Kummissjoni sempliċiment minħabba li l-attivitajiet li kienu relatati magħhom dehru fil-Katalogu ta’ Proġetti ta’ Appoġġ tal-Bonds Ekoloġiċi (Edizzjoni tal-2021) imsemmi fil-premessa (263) tar-Regolament provviżorju. Barra minn hekk, għal dawk il-bonds li ma kinux ekoloġiċi, kien jenħtieġ li l-Kummissjoni talloka l-ammont ta’ benefiċċju fuq il-fatturat totali tal-kumpanija, aktar milli fuq il-fatturat tal-PUI.

(364)

Il-Kummissjoni ma kkontestatx il-fatt li mhux il-bonds kollha fil-Grupp SAIC kienu bonds ekoloġiċi. Madankollu, il-Kummissjoni tixtieq tenfasizza li l-użu tal-fatturat tal-PUI għall-kalkolu tal-benefiċċju fuq il-bonds ma kienx neċessarjament ibbażat fuq il-kwalifika ta’ bond bħala “bond ekoloġiku”. Bonds Normali, meta destinati għall-finijiet kollha ġew allokati fuq il-fatturat totali. Il-bonds korporattivi tqiesu wkoll bħala relatati mal-PUI jekk tkun saret rabta fid-dokumenti tal-ħruġ ma’ oqsma li huma speċifiċi għall-BEVs, bħal pereżempju l-finanzjament tar-R&Ż għal teknoloġiji ġodda, li aktarx li jkunu aktar ta’ benefiċċju għall-vetturi elettriċi milli għall-magni tal-kombustjoni. Meta l-bonds kienu destinati għall-BEVs, dawk il-bonds ġew allokati fuq il-fatturat tal-BEV. Il-bonds ekoloġiċi kollha ġew allokati għall-fatturat tal-BEV. Il-Kummissjoni tixtieq tfakkar ukoll li l-maġġoranza l-kbira tal-ammont ta’ benefiċċju relatat mal-bonds kienet tikkonċerna diversi kumpaniji finanzjarji fil-grupp li qatt ma kienu pprovdew tweġiba għall-kwestjonarju, bħal SFMH, VW Finance u GMAC. Fin-nuqqas ta’ informazzjoni vverifikata, li ma ġietx ipprovduta mill-Grupp SAIC, il-Kummissjoni użat il-fatti disponibbli. B’mod partikolari, il-kalkolu tal-ammont tas-sussidju kien ibbażat fuq l-informazzjoni relatata mal-ammonti, id-dati tal-bidu u tat-tmiem u r-rati tal-imgħax tal-bonds, misjuba jew fi stqarrijiet finanzjarji disponibbli pubblikament jew f’informazzjoni maħruġa lill-investituri fil-boroż. F’xi każijiet, dawn ġew ikklassifikati bħala bonds ekoloġiċi. Għalhekk, l-asserzjoni ġiet miċħuda.

(365)

Kif issemma fil-premessa (147) ta’ dan ir-Regolament, il-Grupp Group argumenta li l-Artikolu 28 ma kienx imissu ġie applikat biex l-assi garantiti b’assi (“ABS”) kollha maħruġa minn entità waħda li ma kkooperatx jiġu attribwiti lil wieħed mill-produtturi u finalment lill-Grupp SAIC kollu. L-ewwel nett, il-Grupp SAIC asserixxa li l-entità inkwistjoni qatt ma kienet meħtieġa tipprovdi tweġiba għall-kwestjonarju. It-tieni, il-Grupp SAIC argumenta li ma kellu l-ebda kontroll sinifikanti fuq din l-entità, peress li din kienet parti minn ftehim ta’ impriża konġunta. It-tielet, jekk il-Kummissjoni insistiet fuq din l-attribuzzjoni, kien jenħtieġ li tikkalkula liema proporzjon tal-benefiċċju kien attribwibbli għal dan il-produttur.

(366)

Dwar l-ewwel argument, il-Kummissjoni nnotat li l-kumpaniji relatati kollha li jipprovdu finanzjament lil jew f’isem il-produtturi jenħtieġ li jwieġbu għat-Taqsimiet A u E tal-kwestjonarju. L-entità inkwistjoni qatt ma pprovdiet tweġiba għall-kwestjonarju, għalkemm b’mod ċar kienet involuta f’servizzi ta’ finanzjament f’isem wieħed mill-produtturi, u l-eżistenza ta’ dawn is-servizzi saret biss apparenti pjuttost tard fil-proċedura, eżatt qabel il-pubblikazzjoni tar-Regolament provviżorju.

(367)

Rigward it-tieni punt, l-entità relatata inkwistjoni kienet kompletament proprjetà tas-sieħeb f’impriża konġunta tal-Grupp SAIC u pprovdiet servizzi finanzjarji għal wieħed mill-produtturi fil-Grupp SAIC, koproprjetà ta’ SAIC u s-sieħeb f’impriża konġunta. Bħala tali, ma kien hemm l-ebda dubju għall-Kummissjoni li dan kien jikkonċerna entità relatata li kien jenħtieġ li tipprovdi tweġiba għall-kwestjonarju.

(368)

Rigward it-tielet punt, fin-nuqqas ta’ informazzjoni vverifikata, li ma ġietx ipprovduta mill-Grupp SAIC, il-Kummissjoni kienet intitolata, fejn xieraq, li tuża l-fatti disponibbli. Skont l-informazzjoni disponibbli, l-entità inkwistjoni pprovdiet servizzi finanzjarji għal wieħed mill-produtturi fil-Grupp SAIC, u ma setgħux jiġu ddeterminati attivitajiet oħrajn. Għalhekk, l-asserzjoni ġiet miċħuda.

(369)

Wara d-divulgazzjoni finali, il-Grupp SAIC issottometta mill-ġdid il-kummenti tiegħu dwar l-entità li ma kkooperatx u li kienet ħarġet ABS. Il-kumpanija asseriet li l-attribuzzjoni tal-ABS lill-entità li pprovdiet servizzi finanzjarji għal wieħed mill-produtturi fil-Grupp SAIC ma kinitx konformi mal-prattika tal-Kummissjoni. Il-Grupp SAIC speċifika li l-Kummissjoni jenħtieġ li tibbaża fuq il-perċentwal tal-parteċipazzjoni azzjonarja tal-produttur esportatur fil-kumpanija riċeventi, u li f’konformità mal-ġurisprudenza tad-WTO, l-applikazzjoni tal-Artikolu 28 hija strettament limitata għall-informazzjoni nieqsa, jiġifieri f’dan il-każ l-ammont tal-benefiċċju, u jenħtieġ li ma tiġix estiża aktar minn hekk. Tabilħaqq, f’dan il-każ, l-istruttura tal-parteċipazzjoni azzjonarja tal-kumpanija riċeventi kienet disponibbli pubblikament, u r-relazzjoni tagħha mal-Grupp ġiet deskritta b’mod ċar fis-sottomissjonijiet tal-Grupp SAIC.

(370)

Il-Grupp SAIC iddikjara wkoll li l-“attivitajiet l-oħra” tal-kumpanija riċeventi kienu ċari u disponibbli għall-Kummissjoni u li f’ċerti ċirkostanzi l-attribuzzjoni tal-Kummissjoni lil entità tal-produzzjoni waħda fil-Grupp twassal għal għadd doppju.

(371)

Il-Kummissjoni ma taqbilx ma’ dawn l-asserzjonijiet. L-ewwel nett, il-Kummissjoni ma kellhiex informazzjoni mhux biss fir-rigward tal-ammont tal-benefiċċju, iżda wkoll fir-rigward ta’ liema entità/entitajiet tal-grupp dan il-benefiċċju jenħtieġ li jiġi attribwit. Il-fatt li l-kumpanija li ma kkooperatx kienet l-ewwel riċevitur dirett fil-grupp tal-finanzjament preferenzjali pprovdut minn partijiet esterni ma jfissirx li kienet ukoll l-uniku benefiċjarju fil-grupp ta’ dan il-finanzjament preferenzjali. Għalhekk, kienet meħtieġa l-applikazzjoni tal-Artikolu 28 għad-determinazzjoni tal-attribuzzjoni tal-benefiċċju.

(372)

It-tieni, għall-kuntrarju ta’ dak li ġie ddikjarat mill-Grupp SAIC, din l-attribuzzjoni twettqet f’konformità mal-prattika tal-passat tal-Kummissjoni. Tabilħaqq, l-eżempju mill-prattika tal-passat iċċitata mill-Grupp SAIC kien jikkonċerna entità azzjonarja li pprovdiet servizzi finanzjarji lis-sussidjarji tagħha, li kienu jinkludu lill-produtturi esportaturi. Abbażi tas-sitwazzjoni fattwali f’dak il-każ speċifiku ġie deċiż li l-proporzjon ta’ investiment tal-entità azzjonarja fis-sussidjarji tagħha (li huwa marbut mal-ammont ta’ ekwità u għalhekk il-parteċipazzjoni azzjonarja f’kull sussidjarja) kien indikatur raġonevoli għall-proporzjon ta’ finanzjament preferenzjali li jibbenefika lil kull sussidjarja, u għalhekk koeffiċjent ta’ allokazzjoni xieraq għall-attribuzzjoni tal-benefiċċju lill-produtturi esportaturi. Madankollu, f’dan il-każ, il-kumpanija li ma kkooperatx tal-Grupp SAIC ma għandha l-ebda sussidjarja magħrufa. Sa fejn taf il-Kummissjoni, ma hemm ukoll l-ebda rabta bejn l-istruttura organizzazzjonali formali taż-żewġ sħab ta’ impriżi konġunti u l-proporzjon reali tas-servizzi finanzjarji pprovduti mill-kumpanija li ma kkooperatx lid-diversi entitajiet fil-grupp.

(373)

It-tielet, kif enfasizzat fil-premessa (368) ta’ hawn fuq, peress li l-kumpanija li ma kkooperatx ma kinitx ipprovdiet risposta għall-kwestjonarju, ma kienx possibbli li jiġu stabbiliti l-ambitu u l-istruttura eżatti tal-attivitajiet finanzjarji tagħha. Ma hemm ukoll l-ebda rabta bħala tali bejn is-sid tal-kollateral sottostanti għall-ABS maħruġa, u l-benefiċjarju reali tal-fondi miġbura permezz tal-ABS. Għalhekk, il-Kummissjoni ċaħdet dawn l-asserzjonijiet.

(374)

Wara d-divulgazzjoni provviżorja, il-Grupp Geely asserixxa li l-produtturi ma bbenefikawx mill-ABS minħabba li t-tranżazzjonijiet baqgħu bejn l-entità ta’ finanzjament u l-mutwatarju fil-livell tal-konsumatur.

(375)

Il-Kummissjoni nnotat li, taħt dawn l-operazzjonijiet, il-l-Grupp Geely ibbenefika minn finanzjament preferenzjali. Kif deskritt fil-premessa (619) tar-Regolament provviżorju, l-ABS ippermetta lill-Grupp jissostitwixxi riċevibbli ta’ nofs it-terminu fuq self għall-karozzi b’likwiditajiet li kienu immedjatament aċċessibbli, u b’hekk iffaċilitaw il-prefinanzjament tal-operazzjonijiet ta’ self tagħhom fuq bażi vantaġġjuża ħafna. Il-benefiċċji ġew allokati kif xieraq. Għalhekk, l-asserzjoni ġiet miċħuda.

(376)

Il-Grupp Geely oppona l-użu tal-istess parametru referenzjarju għall-bonds bħal dak applikat għas-self peress li l-bonds u s-self huma strumenti finanzjarji differenti.

(377)

F’dan ir-rigward, il-Kummissjoni rrimarkat li s-self u l-bonds huma strumenti ta’ dejn finanzjarju simili. Fil-fatt, bond huwa tip ta’ self użat minn entitajiet kbar biex jinġabar il-kapital. Kemm is-self kif ukoll il-bonds jiġu kkuntrattati/jinħarġu għal ċertu perjodu ta’ żmien u għandhom rata tal-imgħax/kupun. Il-fatt li l-finanzjament permezz ta’ self jiġi pprovdut minn istituzzjoni finanzjarja u li l-finanzjament permezz ta’ bond korporattiv jiġi pprovdut minn investituri, li fil-biċċa l-kbira tal-każijiet huma wkoll istituzzjonijiet finanzjarji, huwa irrilevanti għad-determinazzjoni tal-karatteristiċi ewlenin taż-żewġ strumenti. Tabilħaqq, iż-żewġ strumenti jservu biex jiffinanzjaw l-operazzjonijiet tan-negozju, għandhom l-istess tip ta’ remunerazzjoni u għandhom termini u kundizzjonijiet simili ta’ pagament lura. Barra minn hekk, ma ġie propost l-ebda parametru referenzjarju alternattiv, u ma setgħet tiġi identifikata l-ebda informazzjoni disponibbli pubblikament ulterjuri biex jiġi pprovdut parametru referenzjarju aktar akkurat. Konsegwentement, l-asserzjoni ġiet miċħuda.

(378)

Fin-nuqqas ta’ kwalunkwe kumment ieħor, il-konklużjonijiet fil-premessi minn (633) sa (635) tar-Regolament provviżorju huma b’dan ikkonfermati.

(379)

Fin-nuqqas ta’ kwalunkwe kumment rigward il-konklużjoni dwar tipi oħrajn ta’ finanzjament, il-konklużjonijiet li saru fil-premessi minn (636) sa (637) tar-Regolament provviżorju ġew ikkonfermati.

(380)

Ir-rata ta’ sussidju stabbilita fir-rigward tat-tipi oħrajn ta’ finanzjament preferenzjali matul il-perjodu ta’ investigazzjoni għall-gruppi ta’ kumpaniji inklużi fil-kampjun ammontat għal:

Finanzjament preferenzjali: tipi oħrajn ta’ finanzjament

(381)

Wara d-divulgazzjoni provviżorja, il-GTĊ u l-Grupp SAIC asserew li l-ispeċifiċità għall-għotjiet riċevuti minn Geely u SAIC ma kellhiex determinazzjoni każ b’każ ibbażata fuq evidenza pożittiva. Bl-istess mod, il-Grupp Geely asserixxa li kien jenħtieġ li l-għotjiet jiġu allokati għall-fatturat totali (BEV u mhux BEV), biex jirriflettu b’mod korrett li l-għotjiet kienu relatati mal-attivitajiet ġenerali tal-entitajiet riċeventi.

(382)

Il-GTĊ asserixxa li l-Kummissjoni użat il-fatti disponibbli b’mod punittiv meta vvalutat l-għotjiet riċevuti minn Geely u SAIC u li l-Kummissjoni tat struzzjonijiet mhux ċari li fixklu valutazzjoni xierqa mill-kumpaniji inklużi fil-kampjun. Skont il-GTĊ, il-Kummissjoni ma wettqitx valutazzjoni dettaljata tal-evidenza kollha ddokumentata biex tagħżel l-aktar fatti ta’ sostituzzjoni xierqa u jenħtieġ li s-sussidji allegati ma jiġux attribwiti lill-esportaturi li ma bbenefikawx.

(383)

Kif ġie spjegat fil-premessa (364) tar-Regolament provviżorju, il-Grupp SAIC asserixxa li ma kienx essenzjali li jintużaw “l-ammonti individwali riċevuti għal kull għotja, il-ħin tal-wasla tal-għotjiet, id-deskrizzjoni tal-għotjiet, in-notifiki korrispondenti tal-gvern li jispeċifikaw in-natura tal-għotjiet u informazzjoni oħra meħtieġa” u rrifjuta li jipprovdi din l-informazzjoni sabiex il-Kummissjoni ma setgħetx tiddetermina l-iskemi ta’ sussidju sottostanti, l-ammont ta’ għotjiet riċevuti matul il-perjodu ta’ investigazzjoni, kif ukoll jekk dawn l-għotjiet humiex relatati ma’ assi fissi jew le. Bl-istess mod, kif ġie spjegat fil-premessa (372) tar-Regolament provviżorju, l-ebda waħda mill-kumpaniji tal-Grupp Geely ma pprovdiet informazzjoni sħiħa dwar in-natura tal-programmi ta’ għotja li taħthom irċevew appoġġ, kif mitlub fil-kwestjonarju sabiex il-Kummissjoni ma kinitx f’pożizzjoni li tiddetermina l-iskemi ta’ sussidju sottostanti għall-programmi ta’ għotja fir-rigward tal-prodott li qiegħed jiġi investigat.

(384)

Barra minn hekk, kif ġie spjegat fit-Taqsima 3.3.1.4 tar-Regolament provviżorju, il-GTĊ naqas milli jipprovdi kwalunkwe informazzjoni fir-rigward tal-għotjiet li ġew żborżati lill-gruppi inklużi fil-kampjun sabiex il-Kummissjoni ma setgħetx timla l-lakuni b’informazzjoni li kienet tikseb minn sors ieħor. Għall-kuntrarju, il-Kummissjoni nnotat li l-Grupp BYD ipprovda l-informazzjoni rilevanti mitluba sabiex il-Kummissjoni setgħet tivvaluta d-diversi aspetti tal-għotjiet riċevuti u tqis jekk kinux kumpensatorji.

(385)

Abbażi ta’ dan u fin-nuqqas ta’ informazzjoni vverifikata li tindika l-kuntrarju, il-Kummissjoni bbażat is-sejbiet tagħha fuq il-fatti disponibbli u qieset li l-għotjiet kollha riċevuti minn dawn il-gruppi kienu speċifiċi u relatati mal-prodott li qiegħed jiġi investigat. Abbażi ta’ dan, dawn l-asserzjonijiet ġew miċħuda.

(386)

Wara d-divulgazzjoni finali, il-GTĊ tenna li d-determinazzjoni tal-Kummissjoni li l-għotjiet ikkumpensati kienu speċifiċi hija bbażata fuq suppożizzjonijiet, u mhux fuq evidenza pożittiva, għall-kuntrarju tal-Artikolu 2.4 tal-Ftehim SCM. Huwa argumenta li l-Kummissjoni kellha evidenza li l-allegati għotjiet inkwistjoni kienu ta’ benefiċċju għal diversi prodotti u għalhekk applikat il-fatti disponibbli b’mod punittiv. Minflok, il-Kummissjoni assumiet li l-għotjiet riċevuti minn dawk il-produtturi esportaturi kienu speċifiċi peress li l-Grupp SAIC u l-Grupp Geely ma pprovdewx lill-Kummissjoni b’dak li hija qieset bħala informazzjoni suffiċjenti. Barra minn hekk, il-GTĊ argumenta li l-Kummissjoni naqset milli tiddivulga biżżejjed fatti sottostanti għad-determinazzjoni tagħha li l-għotjiet kienu speċifiċi.

(387)

Il-Grupp SAIC argumenta wkoll li pprovda evidenza lill-Kummissjoni li l-għotjiet riċevuti mill-GTĊ kienu maħsuba għal skopijiet lil hinn mill-prodott ikkonċernat u li l-informazzjoni fil-pussess tal-Kummissjoni, inklużi l-materjali sottomessi mill-Grupp SAIC u l-informazzjoni disponibbli pubblikament, tindika bil-qawwi li l-għotjiet riċevuti kienu maħsuba għall-BEVs u għal dawk mhux BEVs. Għalhekk, ma jistax jiġi argumentat li l-allokazzjoni mill-Kummissjoni tal-għotjiet riċevuti lill-fatturat tal-prodott ikkonċernat għandha xi bażi fattwali. Barra minn hekk, il-Grupp SAIC argumenta li l-Kummissjoni ma pprovdiet l-ebda evalwazzjoni jew raġunament dwar il-fatti multipli dokumentati—speċifikament, ir-rapporti tal-awditjar, il-bilanċ ta’ tqabbil preliminari u r-ritratti tal-iskrin tal-kontijiet li jżommu rendikont tal-għotjiet—li jissuġġerixxu li l-għotjiet riċevuti ma kinux biss għall-prodott li qiegħed jiġi investigat.

(388)

Il-Kummissjoni ddikjarat mill-ġdid li l-Grupp SAIC naqas milli jipprovdi informazzjoni kompluta dwar in-natura tal-programmi ta’ għotjiet li taħthom irċieva appoġġ, kif mitlub, u b’hekk il-Kummissjoni ma kinitx f’pożizzjoni li tistabbilixxi liema programmi ta’ għotjiet kienu relatati mal-prodott li qiegħed jiġi investigat. Il-Kummissjoni nnotat li l-informazzjoni kienet disponibbli faċilment għall-kumpaniji iżda li huma ma tawx aċċess sħiħ għaliha. Il-fatt li kumpanija tippermetti lill-Kummissjoni tara ċerti dokumenti u tipprovdi ritratti tal-iskrin mingħajr ma tipprovdi l-informazzjoni mitluba rilevanti ma jista’, fl-ebda każ, ikun ekwivalenti għall-għoti tal-informazzjoni mitluba fil-forma ta’ wirja li tiżgura li l-informazzjoni tkun ġiet ivverifikata kif xieraq. Din l-informazzjoni lanqas ma tipprovdi assigurazzjoni li l-għotjiet riċevuti qabel il-perjodu ta’ investigazzjoni ma kinux ta’ benefiċċju għall-produzzjoni tal-BEVs matul il-perjodu ta’ investigazzjoni. Il-Kummissjoni enfasizzat ukoll kemm-il darba li informazzjoni pprovduta biss fil-forma ta’ ritratti tal-iskrin, inkluża data limitata jew li turi xi eżempji, ma tippermettix il-verifika u r-rikonċiljazzjoni ta’ ċifri essenzjali.

(389)

Fin-nuqqas ta’ informazzjoni vverifikata li tindika l-kuntrarju, il-Kummissjoni bbażat is-sejbiet tagħha fuq il-fatti disponibbli u qieset li l-għotjiet kollha riċevuti minn dawn il-gruppi kienu speċifiċi u relatati mal-prodott li qiegħed jiġi investigat. Abbażi ta’ dan, dawn l-asserzjonijiet ġew miċħuda.

(390)

Wara d-divulgazzjoni provviżorja, il-Grupp SAIC argumenta li peress li l-għotjiet riċevuti kienu soġġetti għal taxxa fuq l-introjtu korporattiv, l-ammont taxxabbli jenħtieġ li jitnaqqas mill-ammont totali ta’ għotjiet riċevuti. Il-Kummissjoni qieset li l-Grupp SAIC kien naqas milli jipprovdi evidenza pożittiva li t-taxxa mħallsa kienet marbuta direttament mal-għotjiet riċevuti. Barra minn hekk, l-Artikoli 6 u 7 tar-Regolament bażiku ma jipprevedux it-tnaqqis tat-taxxa fuq l-introjtu korporattiv sa fejn huwa kkonċernat il-kalkolu tal-benefiċċju jew tas-sussidju kumpensatorju. Għalhekk, dan l-argument ġie miċħud.

(391)

Ir-rata ta’ sussidju tal-Grupp SAIC u tal-Grupp Geely rigward l-għotjiet ġiet aġġornata bħala konsegwenza tal-korrezzjoni deskritta fil-premessi minn (652) u (654) ta’ dan ir-Regolament rispettivament.

(392)

B’konsegwenza ta’ dan, il-metodoloġija għad-determinazzjoni tal-ammont ta’ sussidju kif deskritt fil-premessa (650) tar-Regolament provviżorju hija kkonfermata u ġiet applikata għall-produttur esportatur li ngħata eżaminazzjoni individwali.

(393)

Wara d-divulgazzjoni finali, Tesla Shanghai sostniet li kien hemm tliet żborżi għal waħda mill-għotjiet li rċeviet il-kumpanija, u wieħed minn dawn l-iżborżi seħħ matul il-perjodu ta’ investigazzjoni. Il-kumpanija sostniet li, peress li l-ammont riċevut matul il-perjodu ta’ investigazzjoni jikkonċerna għotja relatata ma’ assi fissi, li l-iżborżi tagħhom saru taħt l-istess skema, il-Kummissjoni kellha tnaqqas l-ammont riċevut mill-kumpanija matul il-perjodu ta’ investigazzjoni.

(394)

Il-Kummissjoni tirrikonoxxi li, abbażi tal-Linji Gwida għall-Kalkolu tal-Ammont ta’ Sussidju fl-Investigazzjonijiet dwar id-Dazju Kumpensatorju (59), “jew [għal] sussidji mhux rikorrenti, li jistgħu jkunu marbuta mal-akkwist ta’ assi fissi, il-valur totali tas-sussidju għandu jitqassam tul il-ħajja normali tal-assi (l-Artikolu 7(3) tar-Regolament tal-Kunsill (KE) Nru 2026/97 (60))”. Madankollu, il-linji gwida jipprevedu wkoll li “Bħala eċċezzjoni għal [il-punt ta’ hawn fuq], is-sussidji mhux rikorrenti li jammontaw għal anqas minn 1 % ad valorem normalment jiġu inklużi, anke jekk ikunu marbuta max-xiri ta’ assi fissi”. Minħabba li l-iżborż għall-għotja inkwistjoni kien jammonta għal anqas minn 1 % ad valorem, il-Kummissjoni qieset li l-pagament riċevut matul il-perjodu ta’ investigazzjoni ma kienx sinifikanti u li kien raġonevoli li jiġi allokat biss għall-perjodu ta’ investigazzjoni. Dan il-metodu ta’ allokazzjoni huwa kompletament konformi mar-rapport tad-WTO mill-grupp informali ta’ esperti li jipprevedi li jenħtieġ li jingħataw għotjiet li l-iskop tagħhom huwa li jinxtraw assi fissi filwaqt li “tqies xieraq, primarjament mill-perspettiva ta’ konvenjenza amministrattiva, li jiġu inklużi sussidji żgħar ħafna irrispettivament mit-tip jew minn kunsiderazzjonijiet oħrajn. Huwa rrakkomandat livell ta’ anqas minn 0,5 fil-mija tal-bejgħ għal kwalunkwe sussidju individwali għal dan il-limitu”. (61) Għalhekk, il-Kummissjoni ċaħdet din l-asserzjoni.

(395)

Fin-nuqqas ta’ kwalunkwe kumment ieħor, il-konklużjonijiet fil-premessi minn (638) sa (651) tar-Regolament provviżorju huma b’dan ikkonfermati.

(396)

Ir-rata ta’ sussidju stabbilita fir-rigward tal-għotjiet kollha matul il-perjodu ta’ investigazzjoni għall-produtturi esportaturi inklużi fil-kampjun u għall-produttur esportatur eżaminat individwali kienet kif ġej:

L-għotjiet

(397)

Wara d-divulgazzjoni provviżorja, xi partijiet interessati bħall-Grupp SAIC, is-CAAM, il-Grupp BYD, il-GTĊ u l-Grupp Geely, asserew li l-konsumatur kien il-benefiċjarju aħħari ta’ din l-iskema ta’ sussidju. B’mod speċifiku, ġie argumentat li l-manifatturi javvanzaw is-sussidji lill-konsumaturi f’isem il-gvern meta jbigħu l-vetturi billi jnaqqsu l-prezz li għandu jitħallas mill-klijent. F’dan ix-xenarju, il-klijent suppost qed iħallas prezz imraħħas, li aktar tard il-kumpanija tiġi rimborżata għalih mill-gvern.

(398)

Bl-istess mod, xi partijiet asserew li l-fatt li l-prezzijiet tal-BEVs ma żdidux wara t-tneħħija tas-sussidju ma jagħtix prova tal-eżistenza ta’ benefiċċju. Ġie argumentat li l-prezzijiet tas-suq huma influwenzati minn diversi fatturi, inklużi l-kostijiet tal-produzzjoni, id-dinamika tal-provvista u tad-domanda, l-aspettattivi tal-konsumatur u s-sostituzzjoni bejn mudelli qodma u ġodda. B’riżultat ta’ dan, il-prezzijiet tal-BEVs mibjugħin f’perjodi ta’ żmien differenti jistgħu ma jkunux direttament komparabbli.

(399)

Barra minn hekk, ġie argumentat li f’każijiet fejn il-konsumaturi ma ssodisfawx il-kundizzjonijiet għas-sussidju, il-produtturi rkupraw is-sussidju mill-konsumaturi, u b’hekk qajmu dubji dwar il-benefiċċju għall-produtturi.

(400)

Il-Kummissjoni nnotat li ma ġiet ipprovduta l-ebda evidenza li turi li l-programm kien imfassal biex jipprovdi sussidji lill-konsumaturi, bl-użu tal-produtturi tal-BEV bħala għodda sempliċi biex jiġu ttrasferiti dawk is-sussidji. Fil-fatt, l-evidenza wriet l-oppost. Kif deskritt fil-premessi minn (666) sa (671) tar-Regolament provviżorju, l-iżborżi pprovduti mill-GTĊ lill-produtturi tal-BEV fil-forma ta’ trasferimenti diretti ta’ flus kontanti kienu benefiċċju ċar u tanġibbli għall-produtturi tal-BEV, peress li kienu jikkostitwixxu trasferiment dirett ta’ riżorsi monetarji abbażi tal-attivitajiet ekonomiċi tal-produtturi. Għalkemm dan diġà ta benefiċċju minnu nnifsu, l-investigazzjoni żvelat ukoll li s-sussidju ma influwenzax il-prezzijiet finali tal-konsumatur. Minkejja li għadd ta’ fatturi seta’ kellhom rwol, l-analiżi wriet li l-prezz baqa’ l-istess fil-perjodu immedjat wara t-tneħħija tas-sussidju. Dan jindika li s-sussidju ma kellux impatt li seta’ jidher fuq il-prezz finali mħallas mill-klijenti sabiex is-sussidju nżamm mill-produtturi tal-BEV. Għaldaqstant, dawn l-asserzjonijiet ġew miċħuda.

(401)

Fir-rigward ta’ każijiet fejn il-produtturi setgħu rkupraw sussidji minħabba nuqqas ta’ konformità, il-Kummissjoni nnotat li, kif deskritt fil-premessi minn (665) sa (670) tar-Regolament provviżorju, il-produtturi stabbilew prezzijiet li ppermettewlhom jaqbdu s-sussidju sħiħ u l-konsumaturi ma bbenefikawx fil-forma ta’ prezzijiet aktar baxxi, u b’hekk għamlu l-asserzjoni irrilevanti. Barra minn hekk, din is-sitwazzjoni tagħti eżempju tal-istruttura fundamentali tal-iskema, li tqiegħed lill-produtturi fiċ-ċentru tal-politika u tipprijoritizza l-interessi tagħhom, bl-għan aħħari li tipprovdi appoġġ finanzjarju lil dawn l-entitajiet. Bl-istess mod, jekk il-benefiċjarju maħsub ikun il-konsumatur, ikun il-gvern li jkun responsabbli għall-irkupru tal-fondi. Ma ġiet ipprovduta l-ebda evidenza li fil-qafas legali rilevanti ta’ dan il-programm, il-produtturi tal-BEV jintużaw mill-gvern bħala għodda biex jiġu pprovduti jew irkuprati l-ammonti mħallsa mill-gvern lill-produtturi tal-BEV. Konsegwentement, l-asserzjoni ġiet miċħuda.

(402)

Wara d-divulgazzjoni finali, is-CAAM tenniet li l-konsumaturi kienu l-benefiċjarji finali tal-iskema ta’ sussidju. Ġie argumentat li l-BEVs bi prezz stabbli wara t-tneħħija tas-sussidju ma jindikawx benefiċċju. Hija qalet b’mod speċifiku li ż-żamma tal-prezzijiet kif inhuma għal perjodu wara l-irtirar tas-sussidji għall-konsumatur hija prattika komuni. Barra minn hekk, hija nnotat li anke meta l-Gvern Ċiniż naqqas it-taxxi fuq l-akkwist tal-vetturi għall-konsumaturi, kienet prattika komuni għall-manifatturi li jkomplu jirreklamaw is-sussidji għal perjodu wara li kienu skadew l-inċentivi tal-gvern.

(403)

Il-Kummissjoni nnotat li l-argumenti tas-CAAM appoġġaw is-sejbiet tal-Kummissjoni, peress li pprovdew argument addizzjonali li l-ipprezzar tal-vetturi mill-manifatturi ma huwiex influwenzat mis-sussidju peress li l-prezzijiet jibqgħu l-istess, jiġifieri s-sussidju ma għandu l-ebda impatt evidenti fuq il-prezz finali mħallas mill-klijenti, u għalhekk is-sussidju jinżamm mill-produtturi tal-BEVs u ma jingħadda l-ebda benefiċċju lill-konsumaturi. Konsegwentement, l-asserzjoni ġiet miċħuda.

(404)

Wara d-divulgazzjoni finali, il-GTĊ tenna l-asserzjoni tiegħu li l-konsumaturi huma l-benefiċjarji finali tal-iskema ta’ sussidju u enfasizza li l-konsumaturi huma fiċ-ċentru tal-programm. B’mod partikolari, il-GTĊ asserixxa li dan kien stipulat fil-leġiżlazzjoni. It-tfassil tal-programm, li jinvolvi l-iżborżi ta’ flus direttament lill-produtturi, iqis il-kundizzjonijiet speċjali tas-suq fiċ-Ċina. Barra minn hekk, il-GTĊ innota li jekk il-kundizzjonijiet stabbiliti fil-programm ma jiġux issodisfati, l-ammont tal-pagament jitnaqqas kif xieraq.

(405)

Fir-rigward tal-kummenti tal-GTĊ, u fin-nuqqas ta’ kwalunkwe informazzjoni sostanzjata oħra, il-Kummissjoni tenniet il-konklużjoni preċedenti tagħha, kif stabbilit fil-premessi minn (656) sa (661) tar-Regolament provviżorju u l-premessa (400) ta’ hawn fuq, li, filwaqt li jitqiesu n-natura, id-disinn u l-operat tal-iskema, il-produtturi huma r-riċevituri intenzjonati ta’ dan is-sussidju. Fir-rigward tat-tnaqqis fl-iżborżi f’każ ta’ nuqqas ta’ konformità mal-kundizzjonijiet stipulati, il-Kummissjoni għamlet referenza għall-premessa (401) imsemmija hawn fuq ta’ dan ir-Regolament. Barra minn hekk, il-Kummissjoni osservat li s-sempliċi fatt ta’ nuqqas ta’ konformità mal-kundizzjonijiet inkwistjoni ma jimplikax bidla fil-benefiċjarji. Għalhekk, l-asserzjoni ġiet miċħuda.

(406)

Wara d-divulgazzjoni provviżorja, wara l-impożizzjoni ta’ miżuri provviżorji, is-CAAM ikkontestat it-trattament tas-sussidji għall-konsum bħala sussidji għall-produzzjoni, billi asseriet li l-Unjoni adottat standard doppju biex tiddefinixxi s-sussidji taċ-Ċina lill-konsumaturi bħala sussidji biex tippromwovi l-industrija tal-karozzi b’mod esaġerat.

(407)

L-asserzjoni mressqa mis-CAAM kienet ġenerika u mhux issostanzjata. Għalhekk, din ġiet miċħuda.

(408)

Wara d-divulgazzjoni provviżorja, Tesla (Shanghai) u l-GTĊ asserew li l-programm kien diġà ġie tterminat f’Diċembru 2022 u, għalhekk, il-Kummissjoni ma għandha l-ebda bażi legali biex timponi dazju antisussidji provviżorju għal din l-iskema.

(409)

Il-Kummissjoni nnotat, kif deskritt fil-premessi minn (662) sa (664) tar-Regolament provviżorju, li l-produtturi Ċiniżi tal-BEV komplew jibbenefikaw minn din l-iskema ta’ sussidju matul il-perjodu kollu ta’ investigazzjoni u se jkomplu jibbenefikaw minn trasferiment dirett ta’ flus kontanti taħt din l-iskema għal perjodu ta’ żmien estiż wara l-perjodu ta’ investigazzjoni. Konsegwentement, il-Kummissjoni kkonkludiet li l-kundizzjonijiet għall-kumpens ta’ din l-iskema huma ssodisfati. Għalhekk, dawn l-asserzjonijiet ġew miċħuda.

(410)

Wara d-divulgazzjoni finali, Tesla (Shanghai) tenniet li l-iskema ġiet itterminata u jenħtieġ li ma tiġix ikkumpensata. Bħala alternattiva, il-kumpanija sostniet li l-ammont massimu li l-Kummissjoni tista’ tikkumpensa għal Tesla Shanghai huwa l-ammont li l-kumpanija tista’ (potenzjalment) tirċievi fil-futur. Barra minn hekk, ġie argumentat li l-eżistenza ta’ skemi lokali simili għall-politika nazzjonali dwar is-sussidju fiskali ma għandha l-ebda effett fil-valutazzjoni tal-benefiċċju għal Tesla (Shanghai).

(411)

Il-Kummissjoni nnotat li l-benefiċċju kkumpensat huwa l-ammont reali ta’ sussidji żborżati mill-GTĊ lill-produtturi esportaturi matul il-PI, u tenniet il-konklużjoni preċedenti tagħha, kif stabbilit fil-premessi minn (662) sa (664) tar-Regolament provviżorju u l-premessa (409) ta’ hawn fuq. Fir-rigward tan-nuqqas ta’ valutazzjoni ta’ skemi simili għas-sussidju nazzjonali, il-Kummissjoni nnotat, kif huwa deskritt fil-premessa (664) tar-Regolament provviżorju li l-investigazzjoni żvelat li l-awtoritajiet lokali, taħt il-gwida diretta jew indiretta tal-GTĊ, stabbilew għadd kbir ta’ programmi simili, li wħud minnhom jixbhu ħafna l-iskema nazzjonali. Dawn l-inizjattivi lokali għandhom l-objettiv komuni li jinċentivaw il-produzzjoni tal-BEVs, li se jwassal għal appoġġ kontinwat lill-produtturi Ċiniżi tal-BEVs.

(412)

Wara d-divulgazzjoni provviżorja, il-Grupp Geely u Tesla (Shanghai) asserew li l-fondi riċevuti matul il-perjodu ta’ investigazzjoni kienu assoċjati mal-bejgħ qabel il-perjodu ta’ investigazzjoni u, għalhekk, ma kinux soġġetti għal miżuri kumpensatorji. Jekk din l-iskema titqies bħala kumpensatorja, il-bażi għal din id-determinazzjoni jenħtieġ li tkun il-bejgħ relatat direttament mal-perjodu ta’ investigazzjoni.

(413)

Il-Kummissjoni nnotat, kif deskritt fil-premessa (672) tar-Regolament provviżorju, li d-diskrepanza temporali bejn il-bejgħ tal-BEVs u l-iżborż ta’ fondi tal-gvern, li l-produtturi ma jistgħux jipprevedu, toħloq inċertezza rigward iż-żmien tal-iżborżi. Din l-inċertezza tista’ testendi sa massimu ta’ 4 snin. B’riżultat ta’ dan, il-produtturi jirrealizzaw bis-sħiħ il-benefiċċju biss meta jirċievu l-iżborżi. Għalhekk, dawn l-asserzjonijiet ġew miċħuda.

(414)

Wara d-divulgazzjoni finali, il-Grupp SAIC asserixxa li l-Kummissjoni la indirizzat il-kummenti tiegħu rigward il-perjodu dwar l-attribuzzjoni tal-programm, u lanqas ma wieġbet għall-proposta tiegħu għal kalkolu alternattiv.

(415)

Il-Kummissjoni nnotat li l-istess kummenti ġew sottomessi minn partijiet differenti u ġew konfutati fil-premessi minn (412) sa (413) ta’ hawn fuq. Dawn il-premessi jipprovdu r-raġunament għat-twarrib tal-metodoloġija ta’ kalkolu proposta. Għaldaqstant, iż-żewġ asserzjonijiet ġew miċħuda.

(416)

Wara d-divulgazzjoni finali, Tesla (Shanghai) tenniet l-asserzjoni tagħha li l-bażi għall-kalkolu tal-benefiċċju hija l-bejgħ ikkonċernat matul il-perjodu ta’ investigazzjoni u pprovdiet metodoloġija għalih.

(417)

Il-Kummissjoni, fin-nuqqas ta’ kwalunkwe informazzjoni sostanzjata oħra, tenniet il-konklużjoni preċedenti tagħha, kif stabbilit fil-premessa (413) ta’ hawn fuq. Għalhekk, l-asserzjoni ġiet miċħuda.

(418)

Wara d-divulgazzjoni provviżorja, il-GTĊ u Geely asserew li l-benefiċċji li jirriżultaw minn din l-iskema ta’ sussidju, jenħtieġ li ma jiġux allokati għall-esportazzjonijiet fuq il-premessa li s-sussidji ġew ipprovduti speċifikament għall-produzzjoni u għall-bejgħ tal-prodott li qiegħed jiġi investigat, limitati għas-suq Ċiniż.

(419)

Il-Kummissjoni nnotat li, taħt din l-iskema, il-produtturi bbenefikaw minn trasferiment dirett ta’ fondi, li pprovda lill-kumpaniji b’riżorsi sostanzjali fil-forma ta’ flus kontanti li kienu kompletament għad-dispożizzjoni tagħhom. Il-pagamenti tal-GTĊ kienu speċifikament ibbażati fuq il-bejgħ tal-BEVs taħt programm imfassal biex jappoġġa l-iżvilupp tal-industrija tal-BEV u indirizzat għall-produtturi tal-BEV. Konsegwentement, l-allokazzjoni ta’ dawn il-benefiċċji kienet ibbażata fuq il-fatturat totali tal-BEV. Għalhekk, dawn l-asserzjonijiet ġew miċħuda.

(420)

Tesla (Shanghai) sostniet li, peress li l-ammont irreġistrat riċevut mill-kumpanija taħt din l-iskema huwa ttrattat bħala dħul taxxabbli, u għalhekk soġġett għat-taxxa korporattiva fuq l-introjtu ta’ 15 % applikabbli għal Tesla (Shanghai) fl-2022, ikun hemm għadd doppju sal-punt li dan il-benefiċċju jitqies kemm taħt dan il-programm kif ukoll taħt il-programm ta’ taxxa fuq l-introjtu preferenzjali.

(421)

Il-kumpanija naqset milli tipprovdi evidenza pożittiva li t-taxxa mħallsa kienet marbuta direttament mar-rimborż riċevut taħt din l-iskema. Barra minn hekk, l-Artikoli 6 u 7 tar-Regolament bażiku ma jipprevedux għat-tnaqqis tat-taxxa fuq l-introjtu f’dak li għandu x’jaqsam mal-kalkolu tal-benefiċċju jew tas-sussidju kumpensatorju. Għaldaqstant, l-argument li dan jikkostitwixxi għadd doppju tqies irrilevanti.

(422)

Wara d-divulgazzjoni finali, Tesla (Shanghai) tenniet li t-taxxa fuq l-introjtu ta’ 15 % jenħtieġ li titnaqqas mill-benefiċċju totali peress li ttrattat id-dħul mis-sussidju fiskali bħala introjtu taxxabbli, soġġett għat-taxxa fuq l-introjtu korporattiva ta’ 15 % applikabbli matul il-perjodu ta’ investigazzjoni (PI). Tesla argumentat li kien hemm għadd doppju, peress li dan il-benefiċċju kien ikkunsidrat kemm taħt dan il-programm kif ukoll taħt il-programm ta’ taxxa fuq l-introjtu preferenzjali.

(423)

Il-Kummissjoni nnotat li t-tnaqqis mitlub ma jaqa’ taħt l-ebda waħda mill-kategoriji eliġibbli għat-tnaqqis mill-kalkolu tas-sussidju kif ġie spjegat fid-dettall fl-Artikolu 7 tar-Regolament bażiku (62). Barra minn hekk, ir-rata tat-taxxa fuq l-introjtu ma tapplikax fuq l-introjtu iżda pjuttost fuq l-introjtu taxxabbli kif ipprovdut mill-EIT, jiġifieri “l-introjtu totali tal-intrapriża f’kull sena tat-taxxa li minnu jitnaqqas l-introjtu mhux taxxabbli, l-introjtu eżentat mit-taxxa, tnaqqis varju u l-ammont permess ta’ telf fis-snin preċedenti li sar tajjeb għalih” (63). Dan it-tnaqqis jinkludi “Il-kostijiet, l-ispejjeż, it-taxxi, it-telf u nefqa raġonevoli oħra mġarrba fir-rigward tal-introjtu riċevut minn intrapriża jistgħu jitnaqqsu meta jiġi kkalkolat l-ammont taxxabbli tal-introjtu” (64). Barra minn hekk, ċerti spejjeż bħall-ispejjeż għar-R&Ż jibbenefikaw minn tnaqqis addizzjonali taħt ċerti kundizzjonijiet. Minħabba din ir-raġuni, introjtu speċifiku bħad-dħul mis-sussidju fiskali ma jistax jiġi separat mill-kalkolu tal-introjtu taxxabbli li jqis elementi oħrajn. Barra minn hekk, il-Kummissjoni qieset li r-rata tat-taxxa fuq l-introjtu ta’ 15 % kienet tapplika biss meta jkun hemm introjtu taxxabbli pożittiv. Konsegwentement, l-asserzjoni ġiet miċħuda.

(424)

Wara d-divulgazzjoni provviżorja, il-Grupp BYD sostna li l-proporzjon tas-sussidju fiskali għall-BEVs mas-sussidju fiskali totali riċevut matul il-perjodu ta’ investigazzjoni użat biex jiġi allokat il-prepagament lill-BEVs kien jenħtieġ li jiġi mmodifikat wara d-deċiżjonijiet ta’ saldu finali tal-Ministeru għall-Industrija u t-Teknoloġija tal-Informazzjoni (“MIIT”) u tal-Ministeru għall-Finanzi (“MIF”). Il-Kummissjoni aċċettat din l-asserzjoni u rrevediet il-kalkolu.

(425)

Il-Grupp Geely asserixxa li xi sussidji attribwiti lil waħda mill-kumpaniji fil-grupp kienu diġà ġew ikkumpensati. Il-Kummissjoni aċċettat din l-asserzjoni u rrevediet il-kalkolu.

(426)

B’konsegwenza ta’ dan, il-metodoloġija għad-determinazzjoni tal-ammont ta’ sussidju kif deskritt fil-premessa (675) tar-Regolament provviżorju hija kkonfermata u ġiet applikata għall-produttur esportatur li ngħata eżaminazzjoni individwali.

(427)

Fin-nuqqas ta’ kwalunkwe kumment ieħor, il-konklużjonijiet fil-premessi minn (652) sa (676) tar-Regolament provviżorju huma b’dan ikkonfermati.

(428)

Ir-rata ta’ sussidju tal-Grupp SAIC u tal-Grupp Geely dwar il-politika tas-sussidju fiskali ġiet aġġornata bħala konsegwenza tal-korrezzjoni deskritta fil-premessi (652) u (654) ta’ dan ir-Regolament rispettivament.

(429)

Ir-rata ta’ sussidju stabbilita fir-rigward ta’ din l-iskema matul il-perjodu ta’ investigazzjoni għall-produtturi esportaturi inklużi fil-kampjun u għall-produttur esportatur eżaminat individwali kienet kif ġej:

(430)

Wara d-divulgazzjoni provviżorja, il-GTĊ, il-Grupp BYD, il-Grupp Geely u l-Grupp SAIC ma qablux mal-valutazzjoni tal-Kummissjoni li l-produtturi Ċiniżi tal-BEV ibbenefikaw mill-forniment tal-art għal remunerazzjoni anqas minn dik adegwata.

(431)

Il-GTĊ allega li l-Kummissjoni sempliċiment stqarret li l-art fiċ-Ċina kontinentali hija proprjetà tal-Istat jew proprjetà kollettiva, u dan ma huwiex prova tal-eżistenza ta’ kontribuzzjoni u benefiċċju finanzjarji. Barra minn hekk, għall-kuntrarju tal-fehim ta’ “kollettiv” innotat mill-Kummissjoni fil-premessa (677) tar-Regolament provviżorju, “kollettiv” ma jfissirx li huwa magħmul minn villaġġi jew bliet żgħar, iżda minn persuni li jaħdmu.

(432)

Fil-premessa (677) tar-Regolament provviżorju, il-Kummissjoni pprovdiet introduzzjoni għas-sistema tad-drittijiet tal-użu tal-art użata fir-RPĊ. Għall-kuntrarju tal-kummenti mill-GTĊ, din il-parti ma hijiex maħsuba biex turi waħedha l-eżistenza ta’ kontribuzzjoni finanzjarja u benefiċċju. Fi kwalunkwe każ, il-GTĊ ma pprovda l-ebda evidenza li tikkontradixxi l-istqarrijiet magħmula fil-premessa (677) tar-Regolament provviżorju, jiġifieri li l-art kollha fir-RPĊ hija proprjetà jew tal-Istat jew ta’ kollettiv.

(433)

Wara d-divulgazzjoni provviżorja, il-GTĊ allega li huwa biss meta jiġi stabbilit li l-prezzijiet fil-pajjiż tal-għoti tad-drittijiet tal-użu tal-art huma distorti minħabba intervent governattiv, li l-Kummissjoni tista’ tirrikorri għal parametru referenzjarju barra mill-pajjiż. Skont il-GTĊ, diversi mid-dokumenti leġiżlattivi ma kinux fis-seħħ fil-perjodu ta’ investigazzjoni. Għalhekk, il-Kummissjoni bbażat fuq bażi legali mhux korretta u ma bbażatx id-“determinazzjoni tagħha fuq evidenza pożittiva”.

(434)

L-ewwel nett, il-Kummissjoni nnotat li l-GTĊ ma pprovda l-ebda evidenza li d-dokumenti leġiżlattivi msemmija ma kinux effettivi matul il-perjodu ta’ investigazzjoni. It-tieni, il-GTĊ lanqas ma wera li s-sustanza ta’ dawn id-dokumenti li allegatament ġew sostitwiti nbidlet. It-tielet, il-GTĊ ma qajjimx dubju dwar l-applikazzjoni tal-Liġi dwar l-Amministrazzjoni tal-Artijiet tar-Repubblika tal-Poplu taċ-Ċina msemmija fil-premessa (679) tar-Regolament provviżorju.

(435)

Wara d-divulgazzjoni finali, il-GTĊ allega li wera li l-liġijiet li l-Kummissjoni użat bħala bażi ma kinux fis-seħħ matul il-perjodu ta’ investigazzjoni. Għalhekk, l-asserzjoni tal-Kummissjoni li l-GTĊ ma pprovdiex evidenza li dawk id-dokumenti ma kinux effettivi matul il-perjodu ta’ investigazzjoni hija fattwalment żbaljata.

(436)

Madankollu, il-Kummissjoni ssostni li ma ġiet ipprovduta l-ebda evidenza biex turi li t-testi inkwistjoni ma kinux fis-seħħ. Fi kwalunkwe każ, il-Kummissjoni fuq inizjattiva proprja sabet evidenza li l-Liġi dwar il-Proprjetà fil-fatt ġiet irrevokata fl-2021. (65) Madankollu, id-dispożizzjonijiet tagħha ġew inkorporati fl-Artikoli 205-462 tal-Kodiċi Ċivili li daħal fis-seħħ f’Jannar 2021. Il-Kodiċi Ċivili ma introduċa l-ebda tibdil sostanzjali fir-rigward tad-drittijiet tal-użu tal-art (ara b’mod partikolari l-Artikoli 246, 260-261 u 330-361 tal-Kodiċi Ċivili). Għalhekk, l-argument li sar mill-GTĊ kien purament formalistiku. Konsegwentement, din l-asserzjoni ġiet miċħuda.

(437)

Wara d-divulgazzjoni provviżorja skont il-GTĊ, ma tressqet l-ebda evidenza mill-Kummissjoni f’każijiet preċedenti li s-sistema tal-irkant fiċ-Ċina kontinentali ma kinitx trasparenti u mhux ċara u li bbażat fuq każijiet antiki u prodotti kompletament differenti mingħajr ma pprovdiet l-ebda spjegazzjoni jew evidenza tad-distorsjoni preżunta. Il-Kummissjoni allegatament użat l-istess stqarrija u bniet linja ta’ ġurisprudenza fin-nuqqas ta’ evidenza. Il-GTĊ allega wkoll li l-Kummissjoni la spjegat dak li investigat fir-rigward tas-suq tad-drittijiet tal-użu tal-art fiċ-Ċina kontinentali, u lanqas il-bidliet li sabet. Barra minn hekk, id-dikjarazzjoni tal-Kummissjoni li l-prezzijiet tad-drittijiet tal-użu tal-art ġew stabbiliti b’mod arbitrarju mill-awtoritajiet ma kienet appoġġata minn ebda evidenza b’mod ġenerali u minn każijiet li jappartjenu għall-produtturi esportaturi inklużi fil-kampjun. Għall-GTĊ, il-prezz miksub eventwalment fil-proċess tal-offerti jirrifletti kemm id-domanda kif ukoll il-provvista.

(438)

Il-Grupp Geely allega li r-Regolament provviżorju ma jinkludi l-ebda indikazzjoni jew raġunament ċar dwar għaliex jew kif it-Taipei Ċiniż huwa valur referenzjarju xieraq ħlief biex jinnota li ntuża f’ċerti investigazzjonijiet preċedenti.

(439)

Madankollu, il-Kummissjoni nnotat li s-sejbiet li saru f’investigazzjonijiet antisussidji preċedenti u reċenti kienu ssostanzjati b’mod adegwat u huma relatati mal-istess programmi ta’ sussidju bħal dawk imsemmija f’din l-investigazzjoni. Pereżempju, il-Kummissjoni sabet fil-każ tal-AFC li għall-biċċiet ta’ art li ġew ipprovduti permezz ta’ offerti, kien hemm offerent wieħed biss għall-art f’kull każ, u l-prezz imħallas kien jikkorrispondi għall-prezz tal-bidu tal-proċess tal-offerti. F’kull waħda minn dawn l-investigazzjonijiet preċedenti, il-Kummissjoni bbażat fuq qafas ġuridiku simili li jirregola d-drittijiet tal-użu tal-art fir-RPĊ u b’mod partikolari fuq il-fatt li l-awtoritajiet lokali jistabbilixxu l-prezzijiet tal-art skont is-sistema ta’ evalwazzjoni tal-art urbana u l-politika industrijali tal-gvern. Fil-premessa (682) tar-Regolament provviżorju, il-Kummissjoni fakkret li l-investigazzjoni kurrenti ma wriet l-ebda bidla notevoli f’dan ir-rigward. Il-Kummissjoni fakkret ukoll li l-GTĊ naqas milli jipprovdi evidenza li turi kontinwazzjoni ta’ din il-politika. Għall-kuntrarju, il-Kummissjoni sabet li għall-Grupp BYD, għall-Grupp Geely, għall-Grupp SAIC u għal Tesla (Shanghai), it-tranżazzjonijiet tad-drittijiet tal-użu tal-art kienu jikkorrispondu għal: (i) tranżazzjonijiet, allokazzjonijiet jew trasferimenti b’xejn, (ii) prezzijiet tat-tranżazzjonijiet li jikkorrispondu għall-prezz tal-bidu tal-offerti, (iii) prezzijiet tat-tranżazzjonijiet li jikkorrispondu għall-garanzija li trid titħallas biex entità tieħu sehem fl-offerti jew (iv) ftehimiet ta’ investiment speċifiċi mal-muniċipalità(jiet) lokali li kienu jinkludu dispożizzjonijiet speċifiċi dwar l-allokazzjoni tal-art. Għalhekk, abbażi tal-informazzjoni disponibbli f’din l-investigazzjoni, il-Kummissjoni ċaħdet dawk l-asserzjonijiet.

(440)

Il-GTĊ argumenta li l-istqarrija tal-Kummissjoni fil-premessa (682) tar-Regolament provviżorju li l-produtturi esportaturi inklużi fil-kampjun kisbu drittijiet tal-użu tal-art bil-prezzijiet stabbiliti mill-awtoritajiet lokali fil-proċeduri tal-offerti, hija nieqsa minn bażi fattwali.

(441)

Madankollu, kif diġà ssemma fil-premessa (438) ta’ dan ir-Regolament, il-Kummissjoni għandha evidenza ta’ din l-istqarrija permezz tad-dokumenti ta’ tranżazzjoni tal-Grupp BYD, tal-Grupp Geely, tal-Grupp SAIC u ta’ Tesla (Shanghai).

(442)

Skont il-GTĊ, hemm suq sekondarju tad-drittijiet tal-użu tal-art fiċ-Ċina kontinentali li l-Kummissjoni ma investigatx.

(443)

Madankollu, il-GTĊ ma kellu l-ebda evidenza li xi suq allegat tad-drittijiet tal-użu tal-art sekondarja ntuża mill-kumpaniji inklużi fil-kampjun.

(444)

Il-GTĊ qies li s-sejba tal-Kummissjoni dwar l-ispeċifiċità hija inkoerenti minħabba li jekk l-analiżi tal-ispeċifiċità tal-Kummissjoni kellha tkun korretta u kienu biss il-produtturi minn xi industriji li kisbu drittijiet tal-użu tal-art bi prezzijiet preferenzjali, allura kien jenħtieġ li l-Kummissjoni tuża l-prezzijiet tad-drittijiet tal-użu tal-art ta’ kumpaniji minn setturi oħrajn biex tivvaluta l-eżistenza tal-allegat sussidju. Barra minn hekk, il-Kummissjoni naqset milli tagħmel valutazzjoni motivata u oġġettiva tal-ispeċifiċità skont l-Artikoli 4.2(a) u 4.2(c) tar-Regolament bażiku minħabba li ma stabbilietx kif l-aċċess għall-forniment preferenzjali allegat tad-drittijiet tal-użu tal-art huwa espliċitament limitat għal ċerti intrapriżi jew setturi.

(445)

F’dan ir-rigward, il-Kummissjoni tinnota li l-ebda parti ma pprovdiet evidenza ta’ parametru referenzjarju għall-prezzijiet tad-drittijiet tal-użu tal-art għal setturi ħielsa minn intervent mill-Istat. Barra minn hekk, il-Kummissjoni pprovdiet il-qafas leġiżlattiv li skontu, l-awtoritajiet lokali jistabbilixxu l-prezz tal-art skont is-sistema ta’ evalwazzjoni tal-art urbana li tiġi aġġornata kull 3 snin, u l-politika industrijali tal-gvern. Barra minn hekk, il-Kummissjoni tista’ tikkonferma din is-sejba abbażi tad-dokumenti tat-tranżazzjoni pprovduti mill-Grupp SAIC li skonthom “il-kundizzjoni ta’ aċċess industrijali tappartjeni għall-industrija tal-manifattura tal-karozzi; din hija konformi mal-proġetti mħeġġa u permessi fil-Katalogu ta’ Gwida għall-Aġġustament tal-Istruttura Industrijali”. Għalhekk, id-dokumenti disponibbli għall-Kummissjoni jikkonfermaw li l-appartenenza għall-industrija tal-manifattura tal-karozzi hija kundizzjoni biex entità tipparteċipa fil-proċedura ta’ offerti għad-drittijiet tal-użu tal-art.

(446)

Wara d-divulgazzjoni finali, il-GTĊ ikkummenta li huwa f’idejn il-Kummissjoni bħala l-awtorità investigattiva li tistabbilixxi l-ispeċifiċità, u mhux għall-GTĊ u għal partijiet interessati oħrajn li jirribattu preżunzjoni negattiva. Huwa rrefera wkoll għall-Kawża C-559/12 P (66) u ddikjara li l-Kummissjoni hija meħtieġa tiġbor l-informazzjoni kollha li għandha bżonn biex tinforma bil-valutazzjoni tagħha dwar jekk l-allegat sussidju huwiex speċifiku.

(447)

Għall-kuntrarju tal-allegazzjonijiet li saru mill-GTĊ, il-Kummissjoni ma għamlet l-ebda preżunzjoni negattiva biex tistabbilixxi l-ispeċifiċità tal-iskema. Kif huwa ddikjarat b’mod ċar fil-premessa (686) tar-Regolament provviżorju, l-iskema titqies speċifika minħabba li d-dispożizzjoni preferenzjali dwar l-art hija limitata għal kumpaniji li jappartjenu għal ċerti industriji, f’dan il-każ, l-industrija tal-BEVs. Għalhekk, l-asserzjoni ġiet miċħuda.

(448)

Wara d-divulgazzjoni finali, il-GTĊ sostna wkoll li l-analiżi tal-benefiċċji tal-Kummissjoni ma hijiex iġġustifikata u hija bbażata fuq parametru referenzjarju mhux xieraq. Skont il-GTĊ, il-Kummissjoni hija inkoerenti meta tikkonferma li d-dispożizzjoni ta’ drittijiet tal-użu tal-art huwa speċifiku u, fl-istess ħin, tirrifjuta l-argument li l-Kummissjoni setgħet użat parametri referenzjarji fil-pajjiż li jirriżultaw mill-prezzijiet tad-drittijiet tal-użu tal-art ta’ kumpaniji minn setturi oħrajn li ma jibbenefikawx minn dan l-allegat sussidju, li hemm ħafna x’tagħżel minnhom.

(449)

Madankollu, il-Kummissjoni tonqos milli tara l-inkoerenza msemmija mill-GTĊ. Kif intqal fil-premessa (445) hawn fuq, il-Kummissjoni sempliċement stqarret li l-ebda parti ma pprovdiet evidenza ta’ parametru referenzjarju għall-prezzijiet tad-dritt tal-użu tal-art għal setturi ħielsa minn intervent mill-Istat. Minbarra li sempliċiment iddikjara li hemm ħafna parametri referenzjarji minn liema wieħed jista’ jagħżel, il-GTĊ naqas milli jirribatti s-sejbiet tal-Kummissjoni. Barra minn hekk, jidher li l-GTĊ iħawwad l-analiżi tal-ispeċifiċità tal-Kummissjoni, li permezz tagħha, il-Kummissjoni wriet li l-industrija tal-BEV qiegħda tibbenefika minn drittijiet tal-użu tal-art b’remunerazzjoni anqas minn adegwata u mill-analiżi tal-benefiċċju skont l-Artikolu 6(d) tar-Regolament bażiku li permezz tiegħu, il-Kummissjoni qieset li l-leġiżlazzjoni Ċiniża li tirregola l-użi tal-art qiegħda tfixkel is-suq tad-drittijiet tal-użu tal-art u ma hijiex soġġetta għall-kundizzjonijiet tas-suq. Il-fatt li s-sistema tad-drittijiet tal-użu tal-art kollha kemm hi ma hijiex qiegħda tiffunzjona bħala suq ħieles ma jwaqqafx lill-GTĊ milli jagħti lil industriji speċifiċi drittijiet tal-użu tal-art b’remunerazzjoni anqas minn dik adegwata. Għalhekk, l-asserzjoni ġiet miċħuda.

(450)

Il-kummenti tal-GTĊ dwar il-konklużjoni li l-għoti tad-dritt għall-użu tal-art mill-GTĊ jenħtieġ li jitqies bħala sussidju ġew indirizzati flimkien mal-kummenti dwar is-sejbiet tal-investigazzjoni fil-premessi minn (437) sa (442) ta’ dan ir-Regolament.

(451)

Wara d-divulgazzjoni provviżorja, il-GTĊ allega li l-valutazzjoni tal-Kummissjoni li t-Taipei Ċiniż huwa valur referenzjarju estern xieraq ma hijiex ibbażata fuq evidenza pożittiva u li l-prezzijiet tal-art fit-Taipei Ċiniż ma humiex relatati “mal-kundizzjonijiet prevalenti tas-suq fil-pajjiż ta’ provvista”. Il-GTĊ stqarr li l-Kummissjoni sempliċiment telenka ċerti indikaturi mingħajr data jew evidenza ta’ sostenn u talab lill-Kummissjoni tipprovdi data addizzjonali dwar il-livell ta’ żvilupp ekonomiku, il-grad ta’ infrastrutturi industrijali, id-densità tal-popolazzjoni u s-similaritajiet bejn it-tip ta’ art u t-tranżazzjonijiet użati għall-bini tal-valur referenzjarju rilevanti, fiċ-Ċina u fit-Taipei Ċiniż. Huwa jsemmi wkoll li d-densitajiet tal-popolazzjoni fiċ-Ċina kontinentali u fit-Taipei Ċiniż huma differenti ħafna.

(452)

Fir-rigward tal-livell ta’ żvilupp ekonomiku u l-grad ta’ infrastrutturi industrijali, il-Kummissjoni sabet li l-biċċa l-kbira tal-entitajiet fi ħdan il-gruppi ta’ produtturi esportaturi inklużi fil-kampjun kienu jinsabu fil-parti tal-Lvant tar-RPĊ, f’żoni żviluppati b’PDG għoli fi provinċji b’densità għolja ta’ popolazzjoni madwar Shanghai u Shenzhen, li kienu simili għal dawk tat-Taipei Ċiniż.

(453)

Fir-rigward tas-similaritajiet bejn it-tip ta’ art u t-tranżazzjonijiet użati għall-kostruzzjoni tal-parametru referenzjarju rilevanti, il-Kummissjoni enfasizzat f’dan ir-rigward li fiż-żewġ każijiet, it-tranżazzjonijiet jikkonċernaw art industrijali ta’ ċertu daqs li tinsab f’żoni industrijali.

(454)

Fir-rigward tad-densità tal-popolazzjoni, il-Kummissjoni nnotat li l-GTĊ qabbel iċ-ċifri tad-densità tal-popolazzjoni fil-livell tal-pajjiż kollu. Meta wieħed iħares aktar mill-qrib lejn id-densità tal-popolazzjoni tal-postijiet attwali tal-produtturi esportaturi, jidher li ċ-ċifri tad-densità tal-popolazzjoni huma fil-fatt pjuttost simili jew ogħla, pereżempju għar-reġjun ta’ Shanghai fejn jinsabu xi wħud mill-entitajiet tal-gruppi ta’ produtturi esportaturi inklużi fil-kampjun u Tesla (Shanghai), id-densità hija aktar minn 3 900 abitant/km kwadru (67) li hija kważi sitt darbiet aktar mid-densità tal-popolazzjoni tat-Taipei Ċiniż.

(455)

Wara d-divulgazzjoni finali, il-GTĊ iddikjara, l-ewwel nett, li diversi entitajiet fi ħdan il-gruppi ta’ produtturi esportaturi inklużi fil-kampjun ma jinsabux fil-parti tal-Lvant taċ-Ċina kontinentali. Pereżempju, xi wħud jinsabu f’Xi’an u f’Hunan. Billi għażlet lil Shanghai u lil Shenzhen, il-Kummissjoni tirreferi għal tnejn mill-ibliet l-aktar żviluppati fiċ-Ċina kontinentali, li ma humiex komparabbli mal-parti l-kbira tal-provinċji fejn jinsabu l-produtturi tal-BEV. It-tieni, il-GTĊ jinnota li l-provinċji l-oħrajn kollha fejn jinsabu l-produtturi tal-BEV, minn Shanghai, huma ferm inqas popolati mit-Taipei Ċiniż. Il-GTĊ ikkummenta wkoll li hemm differenzi kbar bejn il-prezz tad-drittijiet tal-użu tal-art bejn provinċji u bliet speċifiċi fiċ-Ċina kontinentali u li, minbarra l-kwistjoni tan-nuqqas ta’ komparabbiltà, prezz referenzjarju medju wieħed għall-art fit-Taipei Ċiniż ma jistax ikun relatat mas-suq prevalenti fiċ-Ċina kontinentali kollha.

(456)

Madankollu, il-Kummissjoni qatt ma asseriet li l-produtturi kollha tal-BEV kienu jinsabu fil-parti tal-Lvant tar-RPĊ. Minflok, il-Kummissjoni spjegat li l-biċċa l-kbira tal-entitajiet fi ħdan il-gruppi ta’ produtturi esportaturi inklużi fil-kampjun kienu jinsabu fil-parti tal-Lvant tar-RPĊ, f’żoni żviluppati b’PDG għoli fi provinċji b’densità għolja ta’ popolazzjoni madwar Shanghai u Shenzhen. Pereżempju, minn seba’ faċilitajiet ta’ produzzjoni tal-Grupp Geely, erbgħa jinsabu f’Zhejiang, u waħda f’Jiangsu, żewġ provinċji kostali qrib Shanghai. Bl-istess mod, mit-tmien faċilitajiet ta’ produzzjoni tal-grupp BYD, faċilità ta’ produzzjoni minnhom tinsab fi Guangdong, waħda f’Jiangsu, waħda f’Anhui, waħda f’Shandong u waħda f’Fujian. Fl-aħħar nett, mill-anqas tlieta mill-faċilitajiet ta’ produzzjoni tal-SAIC jinsabu direttament f’Shanghai. Il-biċċa l-kbira ta’ dawn il-provinċji għandhom PDG per capita għoli u livelli ta’ densità li huma komparabbli ma’ dawk tat-Taipei Ċiniż. Id-densità tal-popolazzjoni ta’ Jiangsu, Guangdong, Shandong hija saħansitra superjuri għal dik tat-Taipei Ċiniż. Barra minn hekk, il-Kummissjoni tenfasizza li l-faċilitajiet ta’ produzzjoni tal-BEV spiss ikunu jinsabu fi bliet li għandhom livell ferm ogħla ta’ PDG per capita u densità mill-medja tal-provinċja. Għalhekk, dawn l-asserzjonijiet huma miċħuda.

(457)

Il-GTĊ u l-Grupp Geely allegaw ukoll li t-Taipei Ċiniż ma huwiex valur referenzjarju xieraq minħabba li, fost l-oħrajn, fiċ-Ċina kontinentali, jiġi ttrasferit biss dritt għall-użu tal-art filwaqt li fit-Taipei Ċiniż tiġi ttrasferita wkoll is-sjieda attwali tal-art. Barra minn hekk, skont il-GTĊ, il-Kummissjoni tidher li tirrikonoxxi li d-densità tal-popolazzjoni u l-grad tal-infrastruttura industrijali ma humiex kompletament komparabbli bejn iċ-Ċina kontinentali u t-Taipei Ċiniż. Għalhekk, bħala medja, il-prezz referenzjarju għall-art fit-Taipei Ċiniż ma jistax jirrelata u ma huwiex relatat mas-suq prevalenti fiċ-Ċina kontinentali. Barra minn hekk, il-prezzijiet tal-art użati għat-Taipei Ċiniż użati mill-Kummissjoni jinkludu kemm il-prezzijiet tal-art kummerċjali kif ukoll dawk industrijali.

(458)

Il-Grupp SAIC argumenta li t-Taipei Ċiniż ma kienx parametru referenzjarju estern xieraq għad-drittijiet tal-użu tal-art u minflok ippropona li jintużaw il-parametri referenzjarji fil-Malażja u fit-Tajlandja. Il-Grupp SAIC sostna li fir-rigward tat-Taipei Ċiniż:

(459)

Il-Grupp Geely allega li r-rilevanza ta’ fatturi bħall-prossimità fiżika u d-demografija kondiviża bejn iċ-Ċina u t-Taipei Ċiniż għall-għażla tal-parametru referenzjarju ma hijiex ċara. Barra minn hekk, l-implikazzjoni li l-iżvilupp ekonomiku, il-PDG u l-istruttura tat-Taipei Ċiniż huma komparabbli ma’ ħafna provinċji u bliet fiċ-Ċina hija nieqsa mill-kredibbiltà minħabba differenzi sinifikanti bejniethom, b’mod partikolari fir-rigward tal-bliet fejn joperaw il-produtturi esportaturi tal-Grupp Geely. Fl-aħħar nett, skont il-Grupp Geely, il-kalkoli ma qisux id-differenzi sinifikanti fil-prezzijiet f’żoni differenti tat-Taipei Ċiniż u kif dawn kellhom impatt fuq il-parametraġġ referenzjarju.

(460)

F’dan ir-rigward, il-Kummissjoni nnotat li l-għażla tat-Taipei Ċiniż bħala parametru referenzjarju kienet ibbażata fuq l-eżami ta’ diversi fatturi elenkati fil-premessa (688) tar-Regolament provviżorju. Madankollu, il-Kummissjoni qieset li anke li kieku kien hemm ċerti differenzi fil-kundizzjonijiet tas-suq bejn id-drittijiet tal-użu tal-art fiċ-Ċina kontinentali u l-bejgħ tal-art fit-Taipei Ċiniż, dawn ma jkunux ta’ tali natura li jinvalidaw l-għażla tat-Taipei Ċiniż bħala parametru referenzjarju validu.

(461)

Wara d-divulgazzjoni finali, il-GTĊ iddikjara li l-Kummissjoni injorat distinzjoni kritika li taffettwa l-komparabbiltà, jiġifieri li fiċ-Ċina kontinentali, id-dritt tal-użu tal-art biss jiġi ttrasferit għal snin speċifiċi filwaqt li fit-Taipei Ċiniż, is-sjieda tal-art nnifisha tiġi ttrasferita. Il-GTĊ ikkummenta wkoll li ma hemm l-ebda evidenza li l-Kummissjoni qieset (jiġifieri, evalwat) dawn id-differenzi u l-impatt tagħhom fuq il-prezzijiet tad-drittijiet tal-użu tal-art.

(462)

Madankollu, il-Kummissjoni bbażat fuq il-parametru referenzjarju li kien meqjus bħala l-aktar xieraq, anke meta jitqiesu d-differenzi bejn il-kundizzjonijiet tas-suq. Matul l-investigazzjoni, il-Kummissjoni ma setgħetx tidentifika xi parametru referenzjarju jew metodu ta’ aġġustament adegwat ieħor li jkun jirrifletti b’mod adegwat dawn id-differenzi fil-kundizzjonijiet tas-suq. Hija tinnota wkoll li l-GTĊ ma setax ukoll jippreżenta parametru referenzjarju affidabbli li jirrifletti d-differenza bejn id-drittijiet tal-użu tal-art u d-drittijiet tal-proprjetà. Għalhekk, dan l-argument ġie miċħud.

(463)

Minflok, il-Grupp SAIC ippropona li juża l-prezzijiet tal-art tal-Malażja jew tat-Tajlandja bħala għażliet alternattivi ta’ parametru referenzjarju minħabba l-adegwatezza tagħhom fuq it-Taipei Ċiniż għar-raġunijiet li ġejjin:

(464)

Wara kunsiderazzjoni tal-asserzjoni, il-Kummissjoni qieset li l-għażla tat-Taipei Ċiniż bħala parametru referenzjarju estern xieraq kienet ibbażata fuq l-eżaminazzjoni ta’ diversi fatturi elenkati fil-premessa (688) tar-Regolament provviżorju li ġġustifika l-għażla tagħha bħala parametru referenzjarju validu. Barra minn hekk, għall-kuntrarju tal-istqarrija magħmula minn SAIC, il-Kummissjoni ma użatx il-prezzijiet tal-2013, iżda minflok użat il-prezzijiet annwali attwali mill-2013. Għas-snin ta’ qabel l-2013, il-Kummissjoni għamlet aġġustament għad-data tal-2013 abbażi tat-tkabbir ekonomiku fit-Tajwan. B’kuntrast għal dan, id-data tas-SAIC tkopri biss sena iżolata mill-bogħod (2010) għat-Tajlandja u s-sena 2022 għall-Malażja. Il-Kummissjoni teħtieġ data storika biex tivvaluta l-prezzijiet tad-dritt għall-użu tal-art u ma tistax tibbaża fuq sena waħda minħabba li d-drittijiet kollha għall-użu tal-art ma ġewx akkwistati fuq sena waħda. Fl-aħħar nett, fir-rigward tal-livell ta’ żvilupp ekonomiku, SAIC qabblet biss it-Tajlandja, il-Malażja u ċ-Ċina mal-pajjiż kollu. Minflok, il-Kummissjoni qabblet iż-żoni industrijali fit-Tajwan mal-provinċji industrijali rilevanti fiċ-Ċina. Abbażi ta’ dan, din l-asserzjoni kellha tiġi miċħuda.

(465)

B’konsegwenza ta’ dan, il-metodoloġija għad-determinazzjoni tal-ammont ta’ sussidju kif deskritta fil-premessi minn (687) sa (689) tar-Regolament provviżorju ġiet ikkonfermata u ġiet applikata għall-produttur esportatur li ngħata eżaminazzjoni individwali.

(466)

Ir-rata ta’ sussidju tal-Grupp SAIC u tal-Grupp Geely rigward il-forniment mill-gvern ta’ drittijiet għall-użu tal-art għal remunerazzjoni anqas minn dik adegwata ġiet aġġornata bħala konsegwenza tal-korrezzjoni deskritta fil-premessi (652) u (654) ta’ dan ir-Regolament rispettivament.

(467)

Ir-rata ta’ sussidju stabbilita fir-rigward ta’ dan is-sussidju matul il-perjodu ta’ investigazzjoni għall-produtturi esportaturi inklużi fil-kampjun u għall-kumpanija li rċeviet eżami individwali tammonta għal:

(468)

Fin-nuqqas ta’ kwalunkwe kumment, is-sejbiet fil-premessi minn (691) sa (695) tar-Regolament provviżorju ġew ikkonfermati.

(469)

Il-kummenti riċevuti mill-GTĊ u mill-Grupp SAIC dwar in-nuqqas ta’ kooperazzjoni u l-użu tal-fatti disponibbli ġew indirizzati fit-Taqsima 3.3.1.2. Ma wasal l-ebda kumment ulterjuri f’dan ir-rigward biex b’hekk il-konklużjonijiet li saru fil-premessi minn (696) sa (700) tar-Regolament provviżorju ġew ikkonfermati.

(470)

Wara d-divulgazzjoni provviżorja, il-GTĊ sostna li ma kienet teżisti l-ebda liġi jew li ma kien jeżisti l-ebda regolament li jirrikjedi l-provvista ta’ batteriji jew LFP għal LTAR. Barra minn hekk, il-GTĊ żied li kważi d-dokumenti kollha ċċitati mill-Kummissjoni huma pjanijiet mhux obbligatorji li ma fihomx mezzi speċifiċi għall-implimentazzjoni, li l-Kummissjoni ħadet il-kontenut tal-liġijiet u l-pjanijiet tal-GTĊ, kif ukoll rapporti tal-aħbarijiet, barra mill-kuntest, u li għalhekk ma hemm l-ebda leġiżlazzjoni jew kriterju biex jagħti prova tal-eżistenza ta’ sussidju kumpensatorju. Dawn l-asserzjonijiet ġew imtennija wara d-divulgazzjoni finali.

(471)

Il-Kummissjoni l-ewwel fakkret li, minħabba r-rifjut mill-GTĊ li jikkoopera dwar l-elementi rilevanti elenkati fit-Taqsima 3.3.1.2 tar-Regolament provviżorju, il-Kummissjoni kellha tibbaża fuq il-fatti disponibbli għas-sejbiet tagħha dwar il-materjali ta’ input.

(472)

Kif diġà spjegat fid-dettall fil-premessi minn (197) sa (203) u fit-Taqsima 3.7.2.1.2(a) tar-Regolament provviżorju, l-Istat u s-CCP jeżerċitaw influwenza deċiżiva fuq l-allokazzjoni tar-riżorsi u fuq il-prezzijiet tagħhom, u jistgħu jagħmlu dan permezz ta’ kontroll sħiħ fuq il-fergħat leġiżlattivi, eżekuttivi, kif ukoll ġudizzjarji tal-apparat tal-Istat (il-premessa (201) tar-Regolament provviżorju), u permezz ta’ sistema elaborata ta’ pjanijiet li jistabbilixxu prijoritajiet u jippreskrivu l-għanijiet li l-gvernijiet ċentrali u lokali jridu jiffokaw fuqhom (il-premessa (202) tar-Regolament provviżorju). L-asserzjoni tal-GTĊ li kważi d-dokumenti kollha ċċitati mill-Kummissjoni ma humiex obbligatorji tmur kontra l-fatt li l-objettivi stabbiliti mill-istrumenti ta’ ppjanar huma, fil-fatt, ta’ natura vinkolanti u l-awtoritajiet f’kull livell amministrattiv jimmonitorjaw l-implimentazzjoni tal-pjanijiet mil-livell aktar baxx korrispondenti tal-gvern, u b’hekk jixprunaw ir-riżorsi għal setturi ddeżinjati bħala strateġiċi jew inkella politikament importanti mill-gvern, minflok ma jiġu allokati f’konformità mal-forzi tas-suq. Kif diġà spjegat fil-premessa (202) tar-Regolament provviżorju, l-objettivi stabbiliti mill-istrumenti tal-ippjanar huma ta’ natura vinkolanti u l-awtoritajiet f’kull livell amministrattiv jimmonitorjaw l-implimentazzjoni tal-pjanijiet mil-livell korrispondenti aktar baxx tal-gvern. In-natura vinkolanti tal-pjanijiet hija koperta wkoll b’mod estensiv fit-Taqsima 4.3.1 tar-Rapport dwar iċ-Ċina (68); L-Artikolu 89 tal-Kostituzzjoni Ċiniża (69) jirrikjedi li l-Kunsill tal-Istat ifassal u jimplimenta pjanijiet għall-iżvilupp ekonomiku u soċjali nazzjonali u għall-baġits tal-Istat, filwaqt li l-Liġi Organika tal-Kungressi Lokali tal-Poplu u tal-Gvernijiet Lokali tal-Poplu tar-RPĊ (70) tobbliga lill-awtoritajiet imsemmija jimplimentaw il-Pjanijiet ta’ 5 Snin (l-Artikoli 11, 12, 50, 73 u 76). Għalhekk, l-asserzjoni li, pereżempju, il-Pjan ta’ Azzjoni dwar il-Batteriji tal-2017 huwa sempliċiment pjan ta’ għan ta’ żvilupp, u mhux politika ta’ kontroll tal-prezzijiet, tqieset bħala fattwalment mhux korretta, peress li l-Pjan ta’ Azzjoni dwar il-Batteriji tal-2017 huwa l-ewwel u qabel kollox adottat biex jimplimenta l-“Avviż tal-Kunsill tal-Istat dwar il-Ħruġ tal-Pjan ta’ Żvilupp għall-Industrija tal-Vetturi li Jiffrankaw l-Enerġija u tal-Vetturi li Jaħdmu bl-Enerġija Ġdida (2012-2020)” (Guofa [2012] Nru 22) u l-“Opinjonijiet ta’ Gwida tal-Uffiċċju Ġenerali tal-Kunsill tal-Istat dwar l-Aċċellerazzjoni tal-Promozzjoni u l-Applikazzjoni ta’ Vetturi li Jaħdmu bl-Enerġija Ġdida” (Guobanfa [2014] Nru 35), u fih ukoll dispożizzjonijiet speċifiċi dwar l-ipprezzar ta’ batteriji għal kull kw/h (il-premessi (710) u (746) tar-Regolament provviżorju).

(473)

Il-Kummissjoni ma qablitx mal-istqarrija tal-GTĊ li hija ħadet il-kontenut tal-liġi, tal-pjanijiet u tar-rapporti tal-aħbarijiet barra mill-kuntest. Is-sejbiet dwar il-korp pubbliku u dwar l-inkarigu u d-direzzjoni huma r-riżultat ta’ analiżi fil-fond ibbażata fuq il-fatti ta’ evidenza oġġettiva estensiva, inklużi leġiżlazzjoni, regolamenti u dokumenti oħrajn ta’ politika uffiċjali ppubblikati mill-GTĊ, rapporti minn organizzazzjonijiet internazzjonali, u sorsi indipendenti affidabbli oħrajn, li ġew irreferenzjati u appoġġati kif xieraq minn kwotazzjonijiet li jikkuntestwalizzaw il-kontenut tad-dokumenti. Il-GTĊ asserixxa li l-Liġi dwar ir-Riżorsi Minerali u r-Regoli għall-Implimentazzjoni tagħha huma rekwiżiti ġenerali u jipprovdu biss gwida lill-GTĊ fil-formulazzjoni tal-politiki, iżda ma jagħtux lill-GTĊ setgħa bla limitu fuq ir-riżorsi proprji tiegħu; madankollu, dan jikkontradixxi l-kontenut proprju tal-Artikolu 3, li jgħid verbatim li “l-Kunsill tal-Istat jirrappreżenta lill-Istat biex jesegwixxi s-sjieda fuq ir-riżorsi minerali. Il-Kunsill tal-Istat jawtorizza lid-dipartiment kompetenti tal-Kunsill tal-Istat għall-ġeoloġija u l-minerali biex jimponi kontroll unifikat fuq l-allokazzjoni tar-riżorsi minerali fil-pajjiż kollu” (71). Barra minn hekk, il-GTĊ asserixxa li l-istqarrijiet tal-istampa mogħtija mill-MIIT imsemmija fil-premessa (751) tar-Regolament provviżorju ttieħdu barra mill-kuntest, peress li l-GTĊ ma interveniex fl-iffissar tal-prezzijiet, peress li pprova biss jindirizza l-ogħla livell fil-prezzijiet globali tal-joni tal-litju billi espanda l-provvista upstream u ġġieled il-kompetizzjoni inġusta. Madankollu, bħalma l-GTĊ ammetta hu stess fl-istqarrija tiegħu, l-għan li “jiggwida b’mod konġunt il-prezz tal-melħ tal-litju biex jerġa’ lura għal livell razzjonali” ma huwiex sempliċiment prinċipju ta’ gwida ġenerali, iżda intervent għall-iffissar tal-prezzijiet maħsub biex iġib lura l-prezzijiet tal-litju għal “livell razzjonali”, peress li l-MIIT u assoċjazzjonijiet oħrajn tal-industrija kienu allegatament involuti bis-sħiħ fl-ilħuq ta’ dan l-għan. Għalhekk, dawn l-asserzjonijiet ġew miċħuda.

(474)

Wara d-divulgazzjoni finali, il-GTĊ sostna li l-Kummissjoni rrappreżentat ħażin l-argumenti tagħha, billi fil-premessa (473) ta’ dan ir-Regolament, il-GTĊ ma ammettiex li l-għan li “jiggwida b’mod konġunt il-prezz tal-melħ tal-litju biex jerġa’ lura għal livell razzjonali” kien l-iffissar tal-prezzijiet. Il-GTĊ iddikjara li “fil-kuntest tal-ogħla livell fil-prezzijiet globali tal-joni tal-litju f’dak iż-żmien, kif ukoll fl-attivitajiet ta’ kompetizzjoni inġusta bħal xiri spekulattiv, akkwist għaż-żamma preventiva... il-GTĊ ipprova jindirizza l-problema billi espanda l-provvista upstream, u ġġieled il-kompetizzjoni inġusta, iżda ma intervjeniex fl-iffissar tal-prezzijiet”. Barra minn hekk, il-GTĊ qal ukoll li l-Kummissjoni ma kkwotat l-ebda evidenza biex tappoġġa l-fehma tagħha li kien hemm “intervent għall-iffissar tal-prezzijiet maħsub biex ireġġa’ lura l-livell razzjonali”, u li l-Kummissjoni ma kkwotat l-ebda bażi fattwali jew legali biex tappoġġa l-asserzjoni tagħha li “l-MIIT u assoċjazzjonijiet oħrajn tal-industrija kienu allegatament involuti bis-sħiħ fil-kisba ta’ dan l-għan” (il-premessa (473) ta’ dan ir-Regolament).

(475)

Il-Kummissjoni ma qablitx ma’ dawn id-dikjarazzjonijiet. Kif kopert fil-premessa (751) tar-Regolament provviżorju, l-MIIT, li huwa d-dipartiment taħt il-Kunsill tal-Istat responsabbli għall-amministrazzjoni tal-fergħat industrijali taċ-Ċina u l-industrija tal-informazzjoni (72), afferma huwa stess li “aħna se nimbuttaw [il-prezzijiet tal-materja prima] lura lejn il-livell raġonevoli mill-aktar fis possibbli” , li “il-ministeru se jgħin biex jaċċellera l-iżvilupp tar-riżorsi lokali fiċ-Ċina” u li “l-operazzjoni tas-settur qiegħda tiffaċċja pressjoni kbira li tirrikjedi li l-partijiet rilevanti kollha jkampaw magħha flimkien”  (73) . Fir-rigward tal-allegazzjonijiet li l-Kummissjoni ma kkwotat l-ebda bażi fattwali jew legali biex tappoġġa xi wħud mill-implikazzjonijiet tagħha, il-Kummissjoni fakkret li s-sorsi kollha użati fir-Regolament provviżorju kienu referenzjati kif xieraq, u li l-prova tal-involviment mill-MIIT u minn assoċjazzjonijiet oħrajn tal-industrija hija msemmija fin-noti ta’ qiegħ il-paġna 310 u 311 tar-Regolament provviżorju. Għalhekk, dawn l-asserzjonijiet ġew miċħuda.

(476)

Wara d-divulgazzjoni provviżorja, is-CAAM argumentat li l-fornituri tal-batteriji u tal-materja prima ma jistgħux jiġu kklassifikati bħala “istituzzjonijiet pubbliċi” u li l-Kummissjoni ma tistax timponi tariffi għoljin fuq il-fornituri tal-batteriji.

(477)

Il-Kummissjoni nnotat li, għall-kuntrarju ta’ dak li asseriet is-CAAM, id-dazji imposti japplikaw għall-produtturi esportaturi Ċiniżi tal-BEV, u mhux għall-fornituri tagħhom tal-batteriji u tal-materja prima. Barra minn hekk, l-asserzjoni tas-CAAM dwar il-fatt li l-batteriji u l-materja prima ma jistgħux jiġu kklassifikati bħala korpi pubbliċi kienet ġenerika u mhux issostanzjata. Għalhekk, għar-raġunijiet imsemmija fil-premessi (821) u (899) tar-Regolament provviżorju, l-asserzjoni ġiet miċħuda.

(478)

Wara d-divulgazzjoni finali, is-CAAM sostniet li l-Kummissjoni kklassifikat b’mod żbaljat l-intrapriżi tal-batteriji, l-intrapriżi tal-materja prima, u l-assoċjazzjonijiet bħala entitajiet pubbliċi li jeżerċitaw funzjonijiet governattivi, filwaqt li żiedet li l-Kummissjoni kkonkludiet b’mod żbaljat li l-gvern Ċiniż jintervjeni fl-iffissar tal-prezzijiet, u li bi żball ikkonkludiet li l-gvern Ċiniż jeżerċita kontroll komprensiv fuq l-assoċjazzjonijiet tal-industrija u l-kumpaniji permezz ta’ korpi ta’ ħidma tal-partit.

(479)

Il-kummenti sottomessi mis-CAAM kienu ġenerali u mhux sostanzjati, u għalhekk il-Kummissjoni ċaħdithom.

(480)

Wara d-divulgazzjoni provviżorja, il-GTĊ u l-Grupp Geely ikkontestaw il-klassifikazzjoni tal-fornituri tal-inputs bħala korpi pubbliċi. Il-GTĊ ippreżenta l-asserzjonijiet li ġejjin:

(481)

Il-Grupp Geely sostna li l-evidenza li bbażat fuqha l-Kummissjoni naqset milli turi li s-CBIA u s-CIAPS huma mogħtija awtorità governattiva u li l-Kummissjoni kkonkludiet b’mod żbaljat li l-membri kollha tagħhom huma mogħtija wkoll awtorità governattiva. Barra minn hekk, il-Grupp Geely sostna li, peress li mhux il-fornituri kollha tal-batteriji huma membri ta’ assoċjazzjonijiet, ma jistax jiġi konkluż li dawn il-fornituri huma mogħtija awtorità governattiva. Fl-aħħar nett, il-Grupp Geely sostna li s-sjieda parzjali mill-Istat ta’ ċerti fornituri tal-batteriji ma turix li dawn il-kumpaniji jistgħu jitqiesu bħala korpi pubbliċi.

(482)

Il-Kummissjoni ma qablitx mal-asserzjoni mill-GTĊ li l-assoċjazzjonijiet tal-industrija huma organizzazzjonijiet awtonomi li jaġixxu liberament fis-suq. Kif diġà ġie stabbilit mill-Kummissjoni fil-premessa (779) tar-Regolament provviżorju, filwaqt li l-Opinjonijiet tal-NDRC formalment ipprevedew separazzjoni bejn l-assoċjazzjonijiet tal-industrija u l-gvern, huma żguraw ukoll mhux biss dipendenza finanzjarja kontinwa tal-assoċjazzjonijiet industrijali fuq l-awtoritajiet tal-gvern iżda anke l-kontroll sħiħ kontinwu tas-CCP fuqhom permezz ta’ korpi ta’ ħidma tal-bini tal-partit fi ħdan l-organizzazzjonijiet soċjali. L-analiżi mwettqa mill-Kummissjoni fil-premessi minn (780) sa (785) tar-Regolament provviżorju kkonfermat ukoll din il-preżenza tas-CCP fit-teħid tad-deċiżjonijiet u fl-operazzjonijiet ta’ kuljum tal-assoċjazzjonijiet tal-industrija, kif stabbilit fl-Artikoli ta’ Assoċjazzjoni tas-CBIA u s-CIAPS. Ma ġiet ipprovduta l-ebda informazzjoni mill-GTĊ jew minn kwalunkwe parti oħra li tikkontradixxi dawn is-sejbiet. Barra minn hekk, ir-riċerka mwettqa mill-Kummissjoni wara l-istadju provviżorju kkonfermat ukoll li l-assoċjazzjonijiet tal-industrija ma jaħdmux b’mod indipendenti bħala operaturi tas-suq ħieles iżda huma taħt il-kontroll sħiħ tas-CCP u jimplimentaw politiki b’mandat mill-gvern. Dan huwa muri mill-aħħar stqarrijiet ta’ Ge Honglin, is-Segretarju tal-Partit u President tal-Assoċjazzjoni tal-Industrija tal-Metalli li ma Fihomx Ħadid taċ-Ċina (“CNMIA”) (74), li fiha wkoll sottoassoċjazzjoni dwar il-litju. Kif diġà kopert mill-premessa (94) tar-Regolament ta’ Implimentazzjoni tal-Kummissjoni (UE) 2023/1618 (75), is-CNMIA hija assoċjazzjoni tal-industrija fejn is-CCP jintervjeni fit-teħid ta’ deċiżjonijiet operazzjonali. Filwaqt li s-CNMIA, li fiha wkoll sottotaqsima dwar l-industrija tal-litju, ma kinitx assoċjazzjoni tal-industrija analizzata mill-Kummissjoni fl-istadju provviżorju, l-aħħar stqarrijiet tagħha jikkontradixxu dak li qed jallega l-GTĊ. F’din l-“organizzazzjoni soċjali”, bħal f’diversi assoċjazzjonijiet tal-industrija, l-organizzazzjonijiet tal-bini tal-partit huma inkorporati fl-istruttura tagħha (76). Skont is-Segretarju tal-Partit tagħha, “għalkemm l-assoċjazzjonijiet tal-industrija huma organizzazzjonijiet soċjali, ir-rekwiżiti għall-bini tal-Partit huma konsistenti ma’ dawk tal-Organi Ċentrali u tal-Istat”, u li s-CNMIA “implimentat bir-reqqa d-deċiżjonijiet u l-arranġamenti tal-Kumitat Ċentrali CPC u tal-Kunsill tal-Istat, u kkooperat mad-dipartimenti rilevanti biex tifformula, tippubblika u tinterpreta politiki industrijali bħal-‘Linji Gwida għall-Aġġustament tal-Istruttura Industrijali’, ‘Pjan ta’ ħidma għall-istabbilizzar tat-tkabbir fl-industrija tal-metalli li ma fihomx ħadid’ u ‘Metodi ta’ Ġbir tal-Introjtu għat-Trasferiment tad-Drittijiet ta’ Estrazzjoni’”. Barra minn hekk, kemm is-CBIA kif ukoll is-CIAPS huma taħt il-ġestjoni tal-Kunsill tal-Istat. Għalhekk, din l-asserzjoni ġiet miċħuda.

(483)

Fit-tieni punt li tqajjem mill-GTĊ, kif innotat fil-premessa (864) tar-Regolament provviżorju, is-suq Ċiniż tqies bħala distort minħabba l-politiki nazzjonali u speċifiċi għas-settur promulgati mill-fornituri domestiċi tal-batteriji, b’mod partikolari dawk li jappartjenu għall-istrutturi tal-ipprezzar. Konsegwentement, minkejja l-fatt li ċerti fornituri tal-batteriji jew tal-LFP jistgħu jitolbu prezzijiet differenti, l-akkwiżizzjonijiet kollha tal-batteriji mill-kumpaniji inklużi fil-kampjun matul il-perjodu ta’ investigazzjoni jitqiesu bħala affettwati mill-politiki u l-miżuri tal-Istat fis-seħħ li jsegwu l-objettivi ta’ politika ddikjarati. Din il-valutazzjoni tirriżulta mill-fehim li l-fornituri kollha joperaw domestikament, fl-istess kundizzjonijiet tas-suq. Is-setgħa li l-assoċjazzjonijiet għandhom fuq il-membri tagħhom u fuq il-politiki tal-ipprezzar diġà ġiet ippreżentata fil-fond fit-Taqsima 3.7.2.1.1(b) tar-Regolament provviżorju. Madankollu, il-GTĊ ma ssottometta l-ebda evidenza biex jissostanzja l-asserzjoni tiegħu. Għalhekk, l-asserzjoni ġiet miċħuda.

(484)

Fir-rigward tat-tielet punt, l-asserzjonijiet imqajma mill-GTĊ kienu ġenerali, u l-parti ma pprovdiet l-ebda evidenza biex turi l-punt li tqajjem. Il-Kummissjoni tfakkar li saret riċerka estensiva dwar l-assoċjazzjonijiet tal-industrija Ċiniżi u l-membri tagħhom, u l-mekkaniżmi ta’ kontroll tal-prezzijiet fis-seħħ, kif koperti mill-premessi (748), (751), (792) – (799) u (807) – (809) tar-Regolament provviżorju. Għalhekk, l-asserzjoni ġiet miċħuda.

(485)

L-asserzjoni mressqa mill-Grupp Geely dwar l-awtorità governattiva tal-assoċjazzjonijiet tal-industrija u l-membri tagħhom ma kinitx issostanzjata, u għalhekk ġiet miċħuda. Fir-rigward tat-tielet asserzjoni sottomessa mill-Grupp Geely, il-Kummissjoni tfakkar li, kif asserit fil-premessa (767) tar-Regolament provviżorju, la s-CBIA u lanqas is-CIAPS ma jippubblikaw il-lista sħiħa tal-membri tagħhom. Il-Kummissjoni tfakkar li, kif diġà kopert fil-premessa (282) tar-Regolament provviżorju, il-GTĊ allega li ma kellu l-ebda kontroll fuq is-CBIA, li ma hijiex formalment affiljata mal-GTĊ. Dan ġie miċħud mis-sejbiet fil-premessi (777) u (778) tar-Regolament provviżorju, li juru li l-GTĊ jeżerċita kontroll sħiħ fuq is-CBIA. L-ewwel u qabel kollox, l-assoċjazzjoni hija taħt il-ġestjoni diretta tal-Kunsill tal-Istat (il-premessa (777) tar-Regolament provviżorju), u l-GTĊ jibqa’ responsabbli għall-amministrazzjoni tal-assoċjazzjoni u għall-ħatra ta’ individwi ewlenin inkarigati mill-ħidma tagħha (il-premessa (780) tar-Regolament provviżorju). Matul iż-żjara ta’ verifika fil-GTĊ, il-Kummissjoni talbet lista tal-membri kollha tas-CBIA, li l-GTĊ irrifjuta li jipprovdi. Fin-nuqqas ta’ informazzjoni pprovduta mill-GTĊ kif ukoll ta’ data pubblika uffiċjali li tkopri l-lista sħiħa tal-membri tas-CBIA u s-CIAPS, il-Kummissjoni għamlet inferenzi li saħansitra aktar fornituri ta’ batteriji jistgħu jkunu membri ta’ dawn l-assoċjazzjonijiet. Barra minn hekk, is-sħubija fl-assoċjazzjonijiet tal-batteriji hija waħda mid-diversi elementi vvalutati mill-Kummissjoni. L-evidenza miġbura wriet sitwazzjoni fejn il-GTĊ jeżerċita l-influwenza tiegħu fuq is-suq tal-batteriji u l-LFP. Barra minn hekk, fir-rigward tal-aħħar asserzjoni mressqa mill-Grupp Geely dwar is-sjieda parzjali tal-Istat, il-Kummissjoni tfakkar li r-relazzjoni bejn il-fornituri tal-input u l-GTĊ hija biss waħda mid-diversi elementi li analizzat, jiġifieri l-ambjent legali u ekonomiku prevalenti fir-RPĊ, l-objettivi ta’ politika tal-GTĊ biex jiżviluppa l-industrija tal-BEV, u l-karatteristiċi u l-funzjonijiet ewlenin tal-fornituri tal-input. Għalhekk, dawn l-asserzjonijiet ġew miċħuda.

(486)

Wara d-divulgazzjoni finali, is-CATL sostniet li l-Kummissjoni naqset milli turi li l-GTĊ għandu kwalunkwe sjieda fi, jew jeżerċita kwalunkwe kontroll sinifikanti fuq is-CATL, lil hinn mill-influwenza normali tal-gvern fi kwalunkwe pajjiż, li s-CATL hija mingħajr dubju kumpanija bi sjieda privata, u li s-sħubijiet li s-CATL daħlet fihom ma’ Intrapriżi tal-Istat huma biss għal finijiet kummerċjali. Is-CATL enfasizzat ukoll li l-ftehimiet ta’ kooperazzjoni li daħlet għalihom mal-gvernijiet lokali, jew il-ħolqien taċ-Ċentru Nazzjonali tar-Riċerka fl-Inġinerija għat-Teknoloġija tal-Ħżin tal-Enerġija Elettrokimika ma jissuġġerixxu l-ebda influwenza mill-GTĊ fis-CATL. Il-kumpanija żiedet ukoll li l-iffissar tal-prezzijiet tagħha għall-batteriji huwa kompletament ibbażat fuq is-suq u mingħajr ebda influwenza tal-gvern.

(487)

Is-CATL issottomettiet ukoll xi kummenti dwar l-assoċjazzjonijiet tal-industrija, billi sostniet li s-sħubija tas-CATL fi kwalunkwe assoċjazzjoni ma kinitx rilevanti għall-investigazzjoni dwar il-BEV, u li tali sħubija ma tistax titqies bħala li hija marbuta biex tiġi implimentata kwalunkwe deċiżjoni mill-assoċjazzjoni. Il-kumpanija żiedet ukoll li l-Kummissjoni ma indikat l-ebda evidenza li tindika li s-CATL hija sfurzata tagħmel dan taħt theddida ta’ sanzjonijiet.

(488)

L-asserzjonijiet imqajma mis-CATL kienu ġenerali u mhux sostanzjati. Il-Kummissjoni enfasizzat li r-relazzjoni bejn il-GTĊ u s-CATL kienet koperta b’mod estensiv fil-premessi (786) - (788) tar-Regolament provviżorju, u li jeżistu diversi dokumenti provinċjali li jappoġġaw b’mod espliċitu l-iżvilupp u juru kif dan huwa marbut mat-twettiq ta’ kompiti nazzjonali importanti (il-premessi (731), (732), (803), (804) tar-Regolament provviżorju). Fir-rigward tal-ipprezzar, il-Kummissjoni fakkret li dan kien diġà kopert fil-premessi (802) u (805) tar-Regolament provviżorju, u fil-premessa (484) ta’ dan ir-Regolament.

(489)

Fir-rigward tal-asserzjonijiet dwar is-sħubija tal-assoċjazzjonijiet, il-Kummissjoni fakkret li twettqet riċerka estensiva dwar l-assoċjazzjoni tal-industrija u l-membri tagħha, u li s-CATL ma ssottomettiet l-ebda evidenza biex tissostanzja l-asserzjonijiet tagħha li jenħtieġ li ma titqiesx bħala “korp pubbliku”. Barra minn hekk, il-Kummissjoni diġà indirizzat asserzjonijiet simili fil-premessi (482) u (485) ta’ dan ir-Regolament. Fir-rigward tal-aħħar punt li tqajjem mis-CATL, il-Kummissjoni fakkret li l-premessa (834) tar-Regolament provviżorju diġà kopriet l-evidenza li turi li l-membri jridu jirrispettaw id-direzzjonijiet tal-assoċjazzjoni mmirati lejn ir-regolamentazzjoni tal-imġiba ekonomika tal-membri tagħhom sabiex jikkonformaw mal-politiki tal-GTĊ, sabiex jiġu evitati konsegwenzi li jiġu imposti fuqhom mis-CBIA. Għalhekk, dawn l-asserzjonijiet ġew miċħuda.

(490)

Wara d-divulgazzjoni provviżorja, il-Kummissjoni ġabret informazzjoni addizzjonali dwar LG Chem Nanjing New Energy Solutions (“LG Nanjing”), produttur tal-batteriji bi sjieda barranija fiċ-Ċina li jforni diversi mill-produtturi esportaturi investigati. Fir-rigward ta’ LG Nanjing, il-Kummissjoni sabet evidenza addizzjonali li tikkorrobora s-sejbiet tagħha li l-produtturi tal-batteriji fiċ-Ċina huma korpi pubbliċi, li turi li l-kostruzzjoni ta’ LG Nanjing qdiet l-għan li tipprovdi batteriji bi prezzijiet baxxi għall-benefiċċji tal-produtturi tal-BEV. Il-kumpanija ġiet stabbilita fl-2015 minn LG Chem, is-sottodiviżjoni kimika ta’ LG Corp. u l-kumpanija omm ta’ LG Nanjing (77). Fl-2014, LG Chem tal-Korea t’Isfel iffirmat memorandum ta’ qbil dwar il-kooperazzjoni mal-Gvern Muniċipali ta’ Nanjing. Il-fabbrika stabbilita f’Nanjing irċeviet “assistenza varja mill-Gvern Muniċipali ta’ Nanjing, u għalhekk il-batteriji prodotti [ikollhom jew] għandhom vantaġġi fil-prezz” (78). Barra minn hekk, LG Chem fl-2014 stabbiliet impriża konġunta ma’ żewġ sħab Ċiniżi tal-Istat (jiġifieri Nanjing Zijin Technology Incubation Special Park Construction Development u Nanjing New Industrial Investment Group), biex tibni l-ewwel fażi tal-fabbrika tal-batteriji f’Nanjing, u b’hekk uriet li l-Istat kien involut fl-istabbiliment tal-fabbrika, u li l-provvista ta’ LG ta’ batteriji bi prezzijiet aktar baxxi għall-benefiċċju tal-manifatturi tal-karozzi kienet waħda minn dawn l-għanijiet.

(491)

Wara d-divulgazzjoni finali, u abbażi ta’ eżami ulterjuri tas-sehem mis-suq attwali tal-importazzjonijiet Ċiniżi fis-swieq tal-UE u tal-Istati Uniti, kif ukoll l-effetti tal-politiki ġenerali tal-GTĊ favur l-industrija tal-BEV fis-swieq tal-esportazzjoni, il-Kummissjoni emendat il-premessa (813) u (814) tar-Regolament provviżorju kif ġej:

(492)

Id-data tal-BMI tippreżenta valutazzjonijiet tal-prezz ta’ kull xahar taċ-ċelluli tal-batterija tal-joni tal-litju għas-suq Ċiniż, Ewropew, Asjatiku (minbarra r-RPĊ) u tal-Amerika ta’ Fuq espressi fuq bażi mill-fabbrika. Fir-rigward tal-perjodu ta’ investigazzjoni, dan juri li l-prezz taċ-ċellola mill-fabbrika tal-NMC għal kull kW/h kien mill-anqas 10 % u sa 30 % ogħla fis-swieq tal-UE, tal-Amerka ta’ Fuq jew tal-Asja milli fis-suq Ċiniż irrispettivament mill-kimiki speċifiċi tal-NMC (111, 523, 622 jew 811). Fin-nuqqas ta’ valutazzjoni tal-prezz taċ-ċelluli disponibbli pubblikament għaċ-ċelluli LFP u fin-nuqqas ta’ kooperazzjoni mill-GTĊ, id-differenza fil-prezz bejn is-suq Ċiniż u swieq oħrajn tqieset bħala valida wkoll għaċ-ċelluli LFP. Tali tqabbil jenħtieġ li jitqies fl-isfond li fl-2023, is-sehem mis-suq tal-produtturi Ċiniżi tal-batteriji fl-UE kien qrib l-40 % (79). Il-Kummissjoni ma setgħetx issib data granulari biżżejjed dwar is-sehem mis-suq tal-produtturi Ċiniżi tal-batteriji fl-Amerka ta’ Fuq. Madankollu, id-data doganali tal-Istati Uniti (80) turi li fl-2023, l-Istati Uniti waħedhom importaw direttament 13,1-il biljun USD f’batteriji tal-joni tal-litju miċ-Ċina, li jammontaw għal 70 % tal-importazzjonijiet kollha tal-batteriji tal-joni tal-litju fl-Istati Uniti fl-2023. Barra minn hekk, l-Unjoni Ewropea u l-Amerika ta’ Fuq huma l-aqwa żewġ destinazzjonijiet għall-esportazzjonijiet Ċiniżi tal-joni tal-litju. Minħabba l-evidenza ta’ hawn fuq, il-Kummissjoni ma setgħetx teskludi li l-produtturi Ċiniżi tal-batteriji jikkostitwixxu wkoll perċentwal sinifikanti tas-sehem mis-suq tal-Amerika ta’ Fuq. Dan huwa kkonfermat ukoll mid-data tal-BMI li turi li s-suq tal-UE kif ukoll tal-Amerika ta’ Fuq kienu dipendenti fuq l-importazzjonijiet fil-perjodu ta’ investigazzjoni peress li l-provvisti domestiċi kienu jammontaw rispettivament għal 26 u 34 % biss tad-domanda. B’mod parallel, ir-RPĊ kellha biżżejjed provvista żejda ta’ batteriji biex timla tali lakuna. Fin-nuqqas ta’ elementi li juru l-kuntrarju, il-Kummissjoni qieset li l-importazzjonijiet tal-batteriji tar-RPĊ setgħu jimlew tali lakuna u kellhom sehem mis-suq ta’ mhux aktar minn madwar 70 % f’dawn iż-żewġ swieq. Filwaqt li dan it-tqabbil tal-prezzijiet juri li l-prezzijiet fis-swieq mhux Ċiniżi huma sistematikament ogħla, il-Kummissjoni qieset ukoll li din l-analiżi saret fuq bażi konservattiva peress li l-kwotazzjonijiet tal-prezzijiet saru fuq bażi mill-fabbrika sabiex ma jiġux ikkunsidrati l-kostijiet tat-tbaħħir mir-RPĊ lejn dawn is-swieq. Li kieku kellhom jiġu inklużi l-kostijiet tat-tbaħħir u meta jitqies is-sehem mis-suq tal-produtturi Ċiniżi tal-batteriji f’dawn is-swieq, id-differenza fil-prezz tkun saħansitra ogħla.

(493)

Fir-rigward tas-CATL, fin-nuqqas ta’ data aktar preċiża, il-Kummissjoni analizzat ir-rapporti annwali tas-CATL għall-perjodu 2021-2022. Ir-rapporti wrew deterjorament tal-profittabbiltà fis-suq domestiku Ċiniż li kien ikkumpensat minn profitti ogħla rreġistrati min-naħa tal-esportazzjoni. Filwaqt li l-kumpanija rrapportat marġni ta’ profitt gross għoljin kemm fis-suq domestiku kif ukoll f’dak barrani għall-batteriji f’Diċembru tal-2021, din ix-xejra nqalbet f’Ġunju tal-2022, meta l-kumpanija bdiet titlef il-profittabbiltà fis-suq domestiku Ċiniż, filwaqt li żiedet il-marġni ta’ profitt tagħha min-naħa tal-esportazzjoni. Fin-nuqqas ta’ kooperazzjoni mis-CATL jew permezz tan-nuqqas ta’ kooperazzjoni tal-GTĊ jew tar-rifjut tas-CATL li tipprovdi risposta għall-kwestjonarju fil-kwalità tagħha ta’ fornitur relatat ta’ batteriji lil żewġ gruppi inklużi fil-kampjun, il-Kummissjoni bbażat fuq il-fatti disponibbli u kkonkludiet li t-tnaqqis fil-profittabbiltà fis-suq domestiku Ċiniż għall-batteriji kien ir-riflessjoni tal-politiki governattivi li għandhom l-għan li jipprovdu batteriji lill-produtturi tal-BEV fis-suq domestiku għal remunerazzjoni anqas minn dik adegwata. B’kuntrast għal dan, fis-swieq tal-esportazzjoni, is-CATL kienet kapaċi titlob prezzijiet ogħla u tikseb profitti ogħla, filwaqt li xorta waħda bbenefikat mill-appoġġ li rċeviet mill-GTĊ. Id-differenza fil-livelli ta’ profittabbiltà fis-suq tal-esportazzjoni u dak domestiku turi b’mod ċar li s-CATL ma setgħetx timmassimizza l-profitti tagħha fiċ-Ċina u ma setgħetx tieħu deċiżjonijiet razzjonali dwar in-negozju bħala attur tas-suq normali li jopera f’ekonomija tas-suq miftuħa. Minflok, is-CATL ġiet imġiegħla mill-politiki tal-GTĊ biex tipprovdi batteriji bi prezzijiet orħos lill-industrija domestika tal-BEV. Tali prattika hija kkonfermata wkoll mid-dispożizzjonijiet li jinsabu fl-Artikoli ta’ Assoċjazzjoni u fis-Sistema ta’ Ġestjoni tat-Tranżazzjonijiet Relatata tas-CATL, kif ġie spjegat fil-premessa (801) tar-Regolament provviżorju, li jipprevedu li l-prezzijiet ta’ kwalunkwe tip ta’ tranżazzjoni ma’ entitajiet relatati għandhom jiġu stabbiliti mill-Istat.

(494)

Għalhekk, b’paragun mal-premessi (813) u (814) tar-Regolament provviżorju, il-Kummissjoni emendat il-perċentwal tas-sehem mis-suq tal-produtturi Ċiniżi tal-batteriji fis-suq tal-UE u tal-Amerika ta’ Fuq, billi ffukat l-aktar fuq l-analiżi tas-suq tal-UE (il-premessa (492) ta’ dan ir-Regolament), u l-analiżi tal-profittabbiltà tas-CATL fis-swieq domestiċi kontra s-swieq tal-esportazzjoni (il-premessa (493) ta’ dan ir-Regolament).

(495)

Fin-nuqqas ta’ kummenti ulterjuri u fid-dawl tas-sejbiet addizzjonali mill-Kummissjoni, il-konklużjonijiet li saru fil-premessi minn (702) sa (821) tar-Regolament provviżorju ġew ikkonfermati.

(496)

Wara d-divulgazzjoni provviżorja, il-GTĊ u l-Grupp Geely ikkontestaw is-sejba li l-fornituri tal-batteriji u tal-LFP ġew inkarigati jew ordnati mill-GTĊ. B’mod partikolari, il-GTĊ sostna li:

(497)

Il-Grupp Geely sostna li (a) is-sħubija fl-assoċjazzjonijiet ma hijiex biżżejjed biex turi li l-fornituri tal-batteriji huma inkarigati jew ordnati mill-GTĊ; (b) ma hemm l-ebda evidenza li l-fornituri tal-batteriji li huma ta’ sjieda barranija u/jew li ma humiex membri tas-CBIA jew tas-CIAPS jew tal-Istat huma inkarigati jew ordnati mill-gvern biex jipprovdu batteriji lil LTAR; (c) l-evidenza li bbażat fuqha l-Kummissjoni dwar l-inkarigu u l-ordni ma tappoġġax is-sejba li l-GTĊ inkariga jew ordna lis-CBIA u lis-CIAPS jew lill-membri tagħhom biex jipprovdu batteriji lil LTAR.

(498)

Fil-bidu, il-Kummissjoni fakkret li s-sejbiet tagħha kienu bbażati fuq il-fatti disponibbli skont l-Artikolu 28 tar-Regolament bażiku peress li l-GTĊ irrifjuta li jipprovdi l-informazzjoni meħtieġa u jidħol f’diskussjonijiet dwar din il-kwistjoni.

(499)

Fis-sustanza, fir-rigward tal-ewwel asserzjoni mqajma mill-GTĊ, il-Kummissjoni fakkret fis-sejbiet fit-Taqsima 3.7.2.1.1 tar-Regolament provviżorju, u enfasizzat li skont il-punt (1) (il-premessi (760) sa (789) tar-Regolament provviżorju), li jkopri r-relazzjoni bejn il-fornituri tal-input u l-GTĊ, il-Kummissjoni stabbiliet preżenza mifruxa tal-GTĊ fil-ġestjoni ta’ kuljum kemm fl-assoċjazzjonijiet tal-industrija kif ukoll fil-kumpaniji privati. Fir-rigward tal-ipprezzar, il-prezzijiet domestiċi mhux biss ivarjaw minn dawk tal-esportazzjoni jew minn dawk internazzjonali iżda nstabu wkoll li kienu konsistentement aktar baxxi mill-prezzijiet tal-esportazzjoni minħabba l-politiki settorjali stabbiliti mill-GTĊ fiċ-Ċina (ara l-premessi (816) u (920) tar-Regolament provviżorju għas-sejbiet dwar id-differenzi bejn il-prezzijiet domestiċi u tal-esportazzjoni Ċiniżi). Id-differenza bejn il-prezzijiet domestiċi Ċiniżi u l-prezzijiet dinjin, minbarra ċ-Ċina, hija koperta fil-premessi minn (858) sa (860) tar-Regolament provviżorju.

(500)

Fir-rigward tat-traduzzjoni tal-Artikolu 46 tal-Artikoli ta’ Assoċjazzjoni tas-CATL, anke billi tiżdied “fejn” fis-sentenza “l-ipprezzar ta’ tranżazzjonijiet ta’ partijiet relatati huwa stipulat mill-Istat”, dan ma jaffettwax il-kontenut tas-sejbiet mill-Kummissjoni. Tabilħaqq, it-test fih b’mod inekwivoku dispożizzjonijiet li ċertament hemm każijiet fejn l-ipprezzar ta’ tranżazzjonijiet ta’ partijiet relatati huwa stipulat mill-Istat. Barra minn hekk, il-GTĊ ma kkontestax il-formulazzjoni tal-Artikolu 22 tas-Sistema ta’ Ġestjoni tat-Tranżazzjonijiet tal-Partijiet Relatati tas-CATL li fih dispożizzjoni simili. Barra minn hekk, il-GTĊ allega li dan l-iffissar tal-prezzijiet jappartjeni għal ħames xenarji differenti, iżda ma ġiet sottomessa l-ebda evidenza li tappoġġa din l-istqarrija. Fi kwalunkwe każ, is-sejbiet huma bbażati fuq il-fatti disponibbli peress li l-GTĊ irrifjuta li jikkoopera, u kumment dwar element ta’ traduzzjoni speċifiku meħud barra mill-kuntest tal-bqija tal-elementi u l-evidenza li fuqha bbażat il-Kummissjoni ma jistgħux jinvalidaw is-sejbiet dwar dan il-punt. Għalhekk, l-asserzjoni ġiet miċħuda.

(501)

L-asserzjonijiet imqajma mill-Grupp Geely kienu ġenerali u mhux issostanzjati. Il-Kummissjoni tfakkar li twettqet riċerka estensiva dwar l-assoċjazzjoni tal-industrija u l-membri tagħha, u li l-Grupp Geely ma ssottometta l-ebda evidenza biex jissostanzja l-asserzjonijiet tiegħu li l-produtturi tal-batteriji ma humiex inkarigati u ordnati mill-GTĊ. Barra minn hekk, il-Kummissjoni tenfasizza li s-CBIA u s-CIAPS ma ppubblikawx il-lista sħiħa ta’ membri (il-premessa (767) tar-Regolament provviżorju) u għalhekk, kif diġà huwa spjegat fil-premessa (485) ta’ dan ir-Regolament, saħansitra aktar fornituri ta’ batteriji jistgħu jkunu parti minn dawn l-assoċjazzjonijiet. Barra minn hekk, il-fatt li tkun impriża ta’ sjieda barranija ma jipprekludix li din tkun korp pubbliku (jekk tkun vestita b’awtorità pubblika) u, b’mod alternattiv, inkarigata u ordnata mill-GTĊ. Kif huwa kopert fil-premessa (485) ta’ dan ir-Regolament, anke produtturi ta’ batteriji bi sjieda barranija wrew l-istess aġir bħall-produtturi tal-batteriji bi sjieda Ċiniża. Abbażi ta’ dan, dawn l-asserzjonijiet ġew miċħuda.

(502)

Wara d-divulgazzjoni finali, il-GTĊ sostna li ma kienx jaqbel mal-analiżi li twettqet mill-Kummissjoni fil-premessi minn (499) sa (501) hawn fuq, billi semma li (a) il-Kummissjoni naqset milli tipprovdi evidenza tal-preżenza mifruxa tal-GTĊ fl-operazzjonijiet ta’ kuljum tal-fornituri tal-input; (b) il-fatt li l-prezzijiet domestiċi tal-inputs huma aktar baxxi mill-prezzijiet tal-esportazzjoni huwa r-riżultat ta’ kompetizzjoni sħiħa fis-suq Ċiniż, li għandu domanda akbar għal dawk l-inputs; u (c) fit-traduzzjoni tal-Artikolu 46 tal-Artikoli ta’ Assoċjazzjoni tas-CATL u l-Artikolu 22 tas-Sistema ta’ Ġestjoni tat-Tranżazzjonijiet Relatata tas-CATL, il-kelma “fejn” hija essenzjali biex jinftiehem b’mod korrett il-kontenut ta’ din id-dispożizzjoni. F’dan ir-rigward, il-GTĊ sostna li t-terminu “stipulat mill-Istat” jenħtieġ li jinftiehem bħala li jeżisti f’sitwazzjoni ipotetika, u mhux bħala indikazzjoni li jeżisti l-ipprezzar stabbilit mill-Istat, billi ssottometta l-Liġi dwar il-prezzijiet tar-Repubblika tal-Poplu taċ-Ċina (81) u l-Katalogu Ċentrali tal-Ipprezzar (82) bħala evidenza ta’ dan biex jenfasizza li l-batteriji ma humiex inklużi fil-kamp ta’ applikazzjoni. Is-CATL ukoll issottomettiet kummenti dwar dan, billi spjegat li l-Artikolu 46 tal-Artikoli ta’ Assoċjazzjoni tas-CATL u l-Artikolu 22 tas-Sistema ta’ Ġestjoni tat-Tranżazzjonijiet Relatata tas-CATL jippreskrivu ċ-ċirkostanzi fejn ma tkun meħtieġa l-ebda approvazzjoni għal tranżazzjonijiet ta’ partijiet relatati mil-laqgħa tal-Azzjonisti, u l-fatt li l-laqgħa tal-Azzjonisti ma jkollhiex bżonn tapprova l-iffissar tal-prezzijiet għal tranżazzjonijiet ta’ partijiet relatati jekk dawk ikunu bbażati fuq prezz stabbilit mill-Istat ma jimplikax li dan tal-aħħar attwalment iseħħ, wisq anqas b’mod rilevanti għall-investigazzjoni dwar il-BEV. Il-kumpanija żiedet li l-Kummissjoni naqset milli turi li kien hemm xi każ attwali ta’ iffissar tal-prezzijiet xprunat mill-gvern.

(503)

Il-Kummissjoni ma qablitx ma’ dawn l-asserzjonijiet. Fir-rigward tal-ewwel u t-tieni asserzjonijiet, iż-żewġ kummenti kienu ġenerali u mhux sostanzjati, u l-Kummissjoni enfasizzat li tali kummenti kienu diġà indirizzati t-tnejn li huma fil-premessa (499) ta’ dan ir-Regolament kif ukoll fil-premessa (751) tar-Regolament provviżorju. Fir-rigward tat-tielet waħda dwar l-Artikoli ta’ Assoċjazzjoni tas-CATL, il-Kummissjoni analizzat l-evidenza sottomessa mill-GTĊ. Filwaqt li l-Katalogu Ċentrali tal-Ipprezzar sottomess mill-GTĊ ma fihx b’mod espliċitu dispożizzjonijiet dwar il-batteriji, dan ma jinvalidax il-korp ta’ evidenza miġbur mill-Kummissjoni. L-ewwel u qabel kollox, ma jkun hemm l-ebda raġuni għaliex tali dispożizzjoni tkun meħtieġa jekk ma jkun hemm l-ebda każ ta’ prezzijiet iffissati mill-Istat f’din l-industrija u/jew influwenza tal-Istat f’dan. It-tieni, l-interferenza tal-gvern fl-iffissar tal-prezzijiet diġà kienet koperta b’mod estensiv fit-Taqsima 3.7.2.1.1(b) tar-Regolament provviżorju. It-tielet nett, l-evidenza tal-influwenza tal-gvern fl-iffissar tal-prezzijiet hija evidenti mhux biss minn korp wiesa’ ta’ evidenza fir-Regolament provviżorju, iżda wkoll minn sorsi oħrajn, bħall-“Opinjonijiet ta’ Implimentazzjoni dwar l-Aċċellerazzjoni tal-Iżvilupp ta’ Kwalità Għolja tal-Batterija tal-Litju, l-Enerġija l-Ġdida u l-Industrija tal-Materjali l-Ġodda” (83) tal-NDRC, fejn jinsabu l-kwartieri ġenerali tas-CATL, li jipprevedu li d-dipartimenti rilevanti u l-istituzzjonijiet affiljati tal-gvern għandhom “jiksbu tnaqqis kontinwu fil-kostijiet tal-prodott [tal-batteriji tal-litju, tal-enerġija l-ġdida u tal-materjali l-ġodda]” . Il-Kummissjoni fakkret li, filwaqt li dan kien jikkostitwixxi evidenza addizzjonali ta’ kontrolli fuq il-kostijiet, il-premessa (751) tar-Regolament provviżorju diġà kopriet il-kontroll tal-gvern tal-prezzijiet tal-materja prima tal-batteriji. Għalhekk, il-Kummissjoni ċaħdet dawn l-asserzjonijiet.

(504)

Il-kummenti preċedenti tal-GTĊ dwar il-korp pubbliku fil-premessa (474) ta’ dan ir-Regolament u l-kummenti ta’ hawn fuq fil-premessa (502) ta’ dan ir-Regolament kif ukoll ir-rifjuti tagħhom japplikaw ukoll għall-fornituri tal-LFP li jaġixxu bħala korpi privati fdati jew ordnati mill-GTĊ.

(505)

Fin-nuqqas ta’ kummenti ulterjuri, il-konklużjonijiet li saru fil-premessi minn (822) sa (840) tar-Regolament provviżorju ġew ikkonfermati.

(506)

Fin-nuqqas ta’ kummenti dwar il-benefiċċju, is-sejbiet li hemm fil-premessi minn (841) sa (855) tar-Regolament provviżorju ġew ikkonfermati.

(507)

Wara d-divulgazzjoni provviżorja, il-Grupp Geely allega li l-forniment ta’ batteriji ma huwiex speċifiku għall-manifatturi tal-BEV, fejn argumenta li ma hemm l-ebda limitazzjoni fuq lil min jistgħu jinbiegħu l-batteriji, peress li jibqgħu disponibbli għax-xiri fost industriji u swieq, u li l-Kummissjoni ma eżaminatx jekk l-iskema ta’ sussidju hijiex ibbażata fuq kriterji jew fuq kundizzjonijiet oġġettivi fis-sens tal-Artikolu 4(2)(b) tar-Regolament bażiku. Fl-aħħar nett, il-Grupp Geely sostna li l-produzzjoni tal-batteriji ma hijiex esklussivament jew primarjament immirata lejn l-industrija tan-NEV/BEV.

(508)

Il-Kummissjoni l-ewwel fakkret li s-sett ta’ miżuri tal-GTĊ kien immirat biex jibbenefika biss lil ċerti industriji, inkluż l-industrija domestika tal-BEV. Tabilħaqq, minkejja li d-distorsjonijiet fuq il-batteriji huma ta’ benefiċċju wkoll għall-prodotti għajr il-BEVs, il-benefiċċju huwa limitat b’mod espliċitu minħabba li huwa disponibbli biss għal ċerti industriji fiċ-Ċina, peress li huma biss dawk fil-katina tal-valur tal-batteriji. Għalhekk, il-miżuri huma speċifiċi skont l-Artikolu 4(2)(a) tar-Regolament bażiku. Barra minn hekk, il-Grupp Geely ma indika l-ebda element u lanqas ma pprovda evidenza li turi li l-kundizzjonijiet skont l-Artikolu 4(2)(b) tar-Regolament bażiku u l-Artikolu 2.1(a) tal-Ftehim SCM jiġu ssodisfati f’dan il-każ. Billi s-sett ta’ miżuri mill-GTĊ issodisfa r-rekwiżiti tal-Artikolu 4(2)(a) tar-Regolament bażiku, l-asserzjonijiet ġew miċħuda.

(509)

Wara d-divulgazzjoni finali, il-Grupp Geely sostna li l-analiżi tal-Kummissjoni kienet kontradittorja u ma kellhiex biżżejjed evidenza, peress li (a) il-Kummissjoni ma kellhiex aċċess għas-sett sħiħ ta’ informazzjoni dwar is-sħubija ta’ kumpaniji fis-CBIA u fis-CIAPS; u (b) fl-istabbiliment tal-ispeċifiċità de jure, il-Kummissjoni ma pprovdietx spjegazzjoni motivata u adegwata tas-sejbiet tagħha, u li fil-konklużjonijiet tagħha, il-Kummissjoni rrikonoxxiet b’mod espliċitu li d-distorsjonijiet fil-provvista tal-batteriji huma ta’ benefiċċju wkoll għall-produtturi tal-BEV, u ma kkontestatx li l-batteriji jibqgħu disponibbli għax-xiri f’diversi industriji u swieq. Għar-raġunijiet ta’ hawn fuq, il-Grupp Geely isostni li l-Kummissjoni ma setgħetx tikkonkludi kif xieraq li l-forniment ta’ batteriji huwa de jure speċifiku, u ma hemm l-ebda evidenza li turi li l-awtorità awtorizzanti, jew il-leġiżlazzjoni li skontha topera l-awtorità awtorizzanti, tillimita b’mod espliċitu l-aċċess għal sussidju kif issuġġerit mill-Kummissjoni.

(510)

Fir-rigward tal-ewwel asserzjoni mressqa mill-Grupp Geely, il-Kummissjoni enfasizzat li kif ġie rikonoxxut fil-premessa (485) ta’ dan ir-Regolament, matul iż-żjara ta’ verifika fil-GTĊ, il-Kummissjoni talbet lista tal-membri kollha tas-CBIA, li l-GTĊ irrifjuta li jipprovdi. Fin-nuqqas ta’ informazzjoni pprovduta mill-GTĊ kif ukoll ta’ data pubblika uffiċjali li tkopri l-lista sħiħa tal-membri tas-CBIA u s-CIAPS, il-Kummissjoni għamlet inferenzi li saħansitra aktar fornituri ta’ batteriji jistgħu jkunu membri ta’ dawn l-assoċjazzjonijiet. Barra minn hekk, il-Kummissjoni wettqet analiżi dettaljata tal-parteċipazzjoni tal-kumpaniji fl-assoċjazzjonijiet tal-industrija, minkejja n-nuqqas ta’ kooperazzjoni mill-GTĊ u n-nuqqas ta’ trasparenza mill-assoċjazzjonijiet tal-industrija; kif ġie spjegat fil-premessa (767) tar-Regolament provviżorju, il-Kummissjoni setgħet taċċerta l-parteċipazzjoni tal-kumpaniji fis-CBIA, fis-CIAPS, u f’assoċjazzjonijiet oħrajn tal-industrija billi eżaminat ir-rapporti annwali tagħhom u informazzjoni oħra disponibbli online, bħal-lista ta’ membri tal-korpi eżekuttivi tagħhom. Fir-rigward tat-tieni asserzjoni li ressaq il-Grupp Geely, il-Kummissjoni diġà indirizzatha fil-premessa (508) ta’ dan ir-Regolament. Għalhekk, iż-żewġ asserzjonijiet ġew miċħuda.

(511)

Fin-nuqqas ta’ aktar kummenti, is-sejbiet li saru fil-premessi minn (856) sa (857) tar-Regolament provviżorju ġew ikkonfermati.

(512)

Wara d-divulgazzjoni provviżorja l-GTĊ sostna li l-parametru referenzjarju jenħtieġ li ma jeskludix il-prezzijiet tas-suq Ċiniżi, abbażi tal-fatt li:

(513)

Fir-rigward tal-asserzjoni mill-GTĊ u minn Geely, li l-kummenti tagħhom huma miġbura fil-qosor hawn taħt fil-premessa (515) ta’ dan ir-Regolament, li l-parametru referenzjarju użat jenħtieġ li jkun relatat mal-kundizzjonijiet prevalenti tas-suq għall-prodotti inkwistjoni fil-pajjiż tal-forniment, il-Kummissjoni nnotat li, fl-analiżi tagħha tal-korp pubbliku u tal-inkarigu u tad-direzzjoni, hija qieset il-politiki settorjali rilevanti, speċjalment dwar il-prezzijiet, fit-Taqsima 3.7.2.1.1 tar-Regolament provviżorju, u b’mod partikolari taħt il-punt (3)(b). Barra minn hekk, riċerka addizzjonali li tappoġġa l-evidenza tal-kontroll tal-prezzijiet tal-gvern hija koperta fil-premessi minn (541) sa (542) ta’ dan ir-Regolament. Fid-dawl tas-sejbiet fit-Taqsima 3.7.2.1 u l-premessi (846) u (918) tar-Regolament provviżorju, il-Kummissjoni stabbiliet li l-politiki settorjali applikabbli fis-seħħ fiċ-Ċina jfixklu l-prezzijiet tal-batteriji fis-suq domestiku kollu. B’riżultat ta’ dan, il-Kummissjoni stabbiliet li t-termini u l-kundizzjonijiet prevalenti fiċ-Ċina ma setgħux jiġu aġġustati, abbażi tal-kostijiet, il-prezzijiet u fatturi oħrajn attwali disponibbli f’dak il-pajjiż, b’ammont xieraq li jirrifletti t-termini u l-kundizzjonijiet normali tas-suq. Għalhekk, il-Kummissjoni kellha tirrikorri għall-prezzijiet ta’ referenza tas-suq dinji, skont l-Artikolu 6(d)(ii) tar-Regolament bażiku.

(514)

Barra minn hekk, għall-kuntrarju ta’ dak li ddikjara l-GTĊ fit-tieni punt tiegħu, il-prezz tal-batteriji tal-NMC ma ntużax għall-prezz tal-batteriji tal-LFP. Kif ġie spjegat fil-premessi (847) u (859) tar-Regolament provviżorju, id-data tal-BMI ppermettiet il-kalkolu tal-parametri referenzjarji għall-perjodu ta’ investigazzjoni għal kull kimika, jiġifieri l-LFP u l-NMC. Barra minn hekk, kif ġie nnotat fl-istess premessa, f’termini ta’ kimiki, tqies ukoll il-piż tas-sottokimiki differenti tal-batteriji tal-NMC (111, 523, 622, 811). It-tieni, kif ġie spjegat fil-premessi minn (843) sa (855) tar-Regolament provviżorju, il-prezzijiet domestiċi Ċiniżi tqiesu bħala distorti mill-Kummissjoni, skont l-Artikolu 6(d)(ii) tar-Regolament bażiku. Fi kwalunkwe każ, il-prezzijiet medji Ċiniżi rrapportati fil-BMI jinkisbu mill-atturi fis-suq Ċiniżi. Għal din ir-raġuni, kif ġie spjegat fil-premessa (859) tar-Regolament provviżorju, il-prezzijiet medji Ċiniżi ġew esklużi mill-prezz ta’ referenza fil-BMI. Konsegwentement, il-parametru referenzjarju tal-BMI użat irrifletta l-prezzijiet medji madwar id-dinja għal kull kw/h taċ-ċelloli għal-LPF u għall-NMC rispettivament. Jekk il-Kummissjoni tibbaża fuq il-parametri referenzjarji inklużi (ukoll) il-prezzijiet Ċiniżi affettwati mid-distorsjonijiet minħabba l-intervent tal-GTĊ, dawn il-parametri referenzjarji, skont id-definizzjoni, ma jkunux xierqa biex jiġi kkalkolat il-benefiċċju. Fl-aħħar nett, il-GTĊ ma pprovda l-ebda evidenza dwar kif il-kwantità u l-kundizzjonijiet tax-xiri tal-batteriji taċ-Ċina jistgħu jkunu differenti minn dawk irrapportati fil-BMI. Konsegwentement, l-asserzjoni ġiet miċħuda.

(515)

Il-Grupp Geely sostna li:

(516)

Fir-rigward tal-asserzjonijiet l-oħrajn imqajma minn Geely, il-Kummissjoni enfasizzat li:

(517)

Fir-rigward tal-asserzjonijiet li tqajmu dwar l-aġġustamenti, l-ewwel nett, kif innotat fil-premessi (858) u (859) tar-Regolament provviżorju u d-divulgazzjoni speċifika tal-Grupp Geely, il-Kummissjoni analizzat l-informazzjoni fil-fajl relatata mal-prezz tat-trasferiment sabiex tiddetermina jekk it-tranżazzjonijiet tax-xiri ta’ batteriji jistgħux jitqiesu bħala magħmula f’kundizzjonijiet ta’ kompetizzjoni ġusta. Madankollu, l-informazzjoni fil-fajl, jiġifieri l-ftehimiet dwar il-prezzijiet sottomessi u l-kuntratti mill-Grupp Geely, ma kienet tinkludi l-ebda informazzjoni f’dan ir-rigward, li setgħet uriet il-prezzijiet mitluba mill-fornituri relatati lill-Grupp Geely u lil klijenti indipendenti oħrajn. Għalhekk, il-Kummissjoni ma kinitx f’pożizzjoni li tiddetermina li l-prezzijiet imħallsa lill-fornituri relatati kienu f’kundizzjonijiet ta’ kompetizzjoni ġusta jew li tuża dawn il-prezzijiet. B’riżultat ta’ dan, il-Kummissjoni ssostitwiet dawk il-prezzijiet relatati bil-prezz imħallas għal kull kw/h għal tip simili ta’ batterija lil fornituri mhux relatati. Għalkemm il-Grupp Geely implika li pprovda eżempju ta’ kuntratt għax-xiri ta’ batteriji bejn entitajiet relatati ta’ Geely li rreferenzjaw il-prezz tas-suq tal-materja prima, kuntratt bħal dan ma weriex li l-prezzijiet imħallsa bejn dawn l-entitajiet relatati għall-akkwist tal-batteriji kienu f’kundizzjonijiet ta’ kompetizzjoni ġusta, u lanqas ma inkluda xi valutazzjonijiet indipendenti ta’ dawn il-prezzijiet tas-suq.

(518)

It-tieni, fir-rigward tax-xiri mill-Grupp Geely minn fornitur relatat CATL, minħabba l-eżistenza ta’ impriżi konġunti bejn il-Grupp Geely u CATL, dawn iż-żewġ kumpaniji tqiesu bħala relatati fil-qafas ta’ dan il-proċediment, għalhekk ix-xiri li sar minn Geely minn dan il-fornitur tqies bħala tranżazzjonijiet bejn partijiet relatati.

(519)

It-tielet, l-implikazzjoni li l-Kummissjoni sempliċiment issostitwiet il-prezzijiet għall-fornituri relatati bil-prezz għal kull kilowatt fis-siegħa (kW/h) imħallas lil fornituri mhux relatati ma hijiex akkurata. Skont il-premessa (859) tar-Regolament provviżorju, il-prezzijiet bejn il-partijiet relatati fi ħdan il-Grupp Geely ġew issostitwiti bil-prezz imħallas għal kull kW/h għal prodotti komparabbli minn fornituri mhux relatati. Dan ifisser li l-prezz imħallas minn entità speċifika ta’ Geely lill-fornitur mhux relatat tagħha stess intuża għall-kimika xierqa tal-batteriji (LFP u NMC) u għat-tip ta’ batterija (ċellola, modulu jew pakkett). F’każijiet fejn l-istess entità ta’ Geely ma xtrat minn ebda fornitur mhux relatat, kif iddikjarat fil-premessa (859) tar-Regolament provviżorju, intuża l-prezz medju ponderat għal kull kW/h għal prodotti simili fil-livell tal-Grupp Geely. Dan l-approċċ ġie applikat b’mod konsistenti fuq bażi ta’ kW/h, filwaqt li tqiesu kemm il-kimika tal-batteriji (LFP u NMC) kif ukoll it-tip ta’ batterija (ċellola, modulu jew pakkett).

(520)

Ir-raba’, il-Kummissjoni ma llimitatx lilha nnifisha għall-użu ta’ prezz ta’ referenza medju fit-tipi kollha ta’ batteriji. Meta l-Grupp Geely irrapporta xiri ta’ batteriji b’kapaċitajiet differenti ta’ kW/h (eż., 143/120/88 kW/h), il-Kummissjoni qieset l-ogħla kapaċità, li kienet l-aktar approċċ konservattiv. Barra minn hekk, la s-sottokimiki differenti tal-batteriji tal-NMC (111, 523, 622, 811) u lanqas il-forom tal-batteriji (eż. borża) ma ġew irrapportati sistematikament mill-kumpaniji tal-Grupp Geely, u dawn id-dettalji lanqas ma kienu pprovduti fil-kummenti provviżorji. Konsegwentement, il-Kummissjoni ma setgħetx tapplika dawn l-ispeċifiċitajiet għall-Grupp Geely. Fi kwalunkwe każ, l-implikazzjoni li l-batteriji tal-NMC (tat-tip NCM111) u l-batteriji tal-borża ma jintużawx fil-BEVs tal-Grupp Geely destinati għall-UE u kien jenħtieġ li jiġu esklużi mill-kalkoli hija irrilevanti. Peress li l-forniment ta’ batteriji b’remunerazzjoni anqas minn dik adegwata kien ta’ benefiċċju għall-produzzjoni sħiħa tal-BEVs u mhux biss għall-esportazzjonijiet lejn l-Unjoni, il-benefiċċju kkalkolat għax-xiri tal-batteriji huwa espress fuq il-BEVs prodotti mill-grupp, irrispettivament mid-destinazzjoni tagħhom, f’konformità mal-Artikolu 7(2) tar-Regolament bażiku.

(521)

Il-ħames, fir-rigward tal-asserzjoni li wħud mill-batteriji ma ntużawx fil-produzzjoni ta’ BEVs jew mhux f’BEVs għall-esportazzjoni lejn l-Unjoni, u li għalhekk kien jenħtieġ li jiġu esklużi, il-Kummissjoni nnotat li l-produtturi esportaturi inklużi fil-kampjun ingħataw struzzjonijiet biex jirrapportaw ix-xiri kollu tagħhom ta’ batteriji għall-produzzjoni ta’ BEVs. B’mod speċifiku, minbarra d-dettalji ta’ kull tranżazzjoni ta’ xiri, l-esportaturi kienu meħtieġa jindikaw il-mudell tal-BEV li għalih intużat kull batterija. Konsegwentement, tqiesu t-tranżazzjonijiet kollha tax-xiri tal-batteriji, u l-benefiċċju kkalkolat ġie espress abbażi tan-numru totali ta’ BEVs prodotti, irrispettivament mid-destinazzjoni tagħhom. Il-Grupp SAIC sostna li f’konformità mal-Artikolu 28(3) tar-Regolament bażiku, l-informazzjoni dwar ix-xiri ta’ batteriji li hija sottomessa f’forma fil-qosor kien jenħtieġ li ma tiġix injorata mill-Kummissjoni, li minflok ibbażat fuq l-informazzjoni pprovduta minn produttur esportatur ieħor bħala fatti disponibbli.

(522)

Kif imsemmi fil-premessa (348) tar-Regolament provviżorju, il-Kummissjoni qieset li l-Grupp SAIC deliberatament żamm informazzjoni li kienet faċilment disponibbli u għalhekk ikkawża diffikultajiet bla bżonn biex il-Kummissjoni tasal għal sejba raġonevolment preċiża. Barra minn hekk, kif ġie nnotat fil-premessa (349), il-Kummissjoni kienet ikkonkludiet li l-akkuratezza tal-informazzjoni limitata pprovduta mill-Grupp SAIC fir-rigward tal-valur jew tal-kwantità ma setgħetx tiġi vverifikata. Għal dawn ir-raġunijiet, u f’konformità mal-Artikolu 28(3), il-Kummissjoni ma setgħetx tibbaża fuq l-informazzjoni pprovduta mill-Grupp SAIC. Għalhekk, din l-asserzjoni ġiet miċħuda.

(523)

Il-Grupp SAIC asserixxa wkoll li l-konklużjonijiet implikati fil-premessa (700) tar-Regolament provviżorju ma kinux iġġustifikati kif xieraq peress li l-Kummissjoni ma spjegatx ir-raġunijiet għaliex kien raġonevoli li tintuża l-informazzjoni ta’ grupp ta’ produtturi esportaturi ieħor fir-rigward tax-xiri ta’ batteriji. B’mod aktar speċifiku, huwa rrefera għall-premessa (811) tar-Regolament provviżorju fejn il-Kummissjoni kkonkludiet li l-informazzjoni relatata mal-Grupp Geely “ma tqisitx waħedha suffiċjenti biex jinsiltu konklużjonijiet sinifikanti fir-rigward tal-effett tal-kontroll governattiv fuq l-assoċjazzjoni tal-industrija tal-batteriji tal-enerġija fuq il-prezzijiet tal-batteriji imposti fuq il-produtturi tal-BEV”. B’riżultat ta’ dan, il-Grupp SAIC qies li din l-iskema ta’ sussidju rriżultat fl-ogħla marġni ta’ sussidju kkalkolat għal skema ta’ sussidju waħda għall-Grupp SAIC li għandha konsegwenzi finanzjarji potenzjali severi.

(524)

Kif imsemmi fil-premessa (318) tar-Regolament provviżorju, il-Grupp SAIC ipprovda biss informazzjoni parzjali relatata max-xiri tiegħu ta’ batteriji, li l-akkuratezza tagħhom kemm f’termini ta’ valur kif ukoll ta’ kwantità ma setgħetx tiġi vverifikata mill-Kummissjoni. Konsegwentement, il-Kummissjoni informat lill-Grupp SAIC bl-intenzjoni tagħha li tapplika l-fatti disponibbli skont it-tifsira tal-Artikolu 28 tar-Regolament bażiku u stiednet lill-Grupp SAIC biex jipprovdi kummenti. Il-kummenti sottomessi mill-Grupp SAIC ma kinux ta’ natura li jibdlu l-valutazzjoni tal-Kummissjoni biex b’hekk il-Kummissjoni kellha tirrikorri għall-fatti disponibbli.

(525)

F’dan ir-rigward, il-Kummissjoni użat informazzjoni li kienet disponibbli fil-fajl; jiġifieri informazzjoni minn grupp mhux integrat ieħor ta’ produtturi esportaturi li xtraw batteriji simili u mmanifatturaw mudelli simili tal-BEV. Dan kien l-uniku grupp inkluż fil-kampjun mhux integrat li xtara batteriji u li kellu bejgħ domestiku u ta’ esportazzjoni sinifikanti tal-BEV fil-perjodu ta’ investigazzjoni. Il-fatt li l-informazzjoni relatata mal-Grupp Geely fir-rigward tal-effett tal-kontroll tal-gvern fuq l-assoċjazzjoni tal-industrija tal-batteriji tal-enerġija fuq il-prezzijiet tal-batteriji mitluba lill-produtturi tal-BEV ma tqisitx minnha nnifisha suffiċjenti ma jiskwalifikax l-użu tal-informazzjoni dwar ix-xiri ta’ batteriji tal-Grupp Geely f’termini ta’ prezzijiet u kalkolu tal-benefiċċji korrispondenti bħala fatti rilevanti disponibbli fil-fajl. B’mod partikolari, il-premessa (811) tar-Regolament provviżorju tikkonċerna l-kwistjoni differenti li jiġi stabbilit l-effett tal-kontroll tal-gvern fuq il-prezzijiet tal-batteriji. L-unika konklużjoni f’dik il-premessa kienet li fid-dawl tas-sehem aktar baxx tas-suq u tal-volum tal-bejgħ tal-batteriji tal-Grupp Geely, ma kienx possibbli li jiġi stabbilit dak il-kontroll fuq dik il-bażi biss. Din il-premessa ma kinitx tittratta l-affidabbiltà tal-prezzijiet tal-batteriji tal-Grupp Geely, u wisq anqas ma kkonkludiet li dawn il-prezzijiet tal-batteriji ma kinux rappreżentattivi tal-prezzijiet tas-suq domestiku Ċiniż tal-batteriji. Fil-fatt, dawn il-prezzijiet tal-batteriji mill-Grupp Geely kienu l-aktar parametru referenzjarju xieraq fil-fajl minħabba l-livell ta’ integrazzjoni tal-grupp u t-tipi ta’ batteriji involuti, f’konformità mal-Artikolu 28 tar-Regolament bażiku. Barra minn hekk, kif imsemmi fil-premessa (860) tar-Regolament provviżorju u biex tirrifletti s-sitwazzjoni tal-Grupp SAIC, il-Kummissjoni eskludiet ċerti batteriji maħsuba għall-mudelli tal-BEV li ma kinux simili għal dawk mibjugħa mill-Grupp SAIC mill-kalkolu tal-benefiċċju.

(526)

Barra minn hekk, il-Grupp SAIC sar konxju, fil-bidu tal-investigazzjoni u matul l-iskambji rigward l-applikazzjoni possibbli tal-fatti disponibbli, li, wara l-applikazzjoni tal-fatti disponibbli, ir-riżultat tal-investigazzjoni jista’ jkun anqas favorevoli għall-parti milli kieku din kienet ikkooperat. Fi kwalunkwe każ, il-Grupp SAIC ma ppropona l-ebda sors alternattiv ta’ informazzjoni f’dan ir-rigward. Fuq din il-bażi, din l-asserzjoni ġiet miċħuda. Abbażi ta’ dan ta’ hawn fuq u tad-dispożizzjonijiet li jinsabu fil-premessi (700) u (860) tal-miżuri provviżorji, il-Kummissjoni qieset li l-informazzjoni dwar il-Grupp Geely ammontat għal sostituzzjoni raġonevoli tal-informazzjoni meħtieġa sabiex tagħmel sejbiet għall-Grupp SAIC u spjegat ir-raġunijiet għaliex kien raġonevoli li tintuża l-informazzjoni ta’ grupp ta’ produtturi esportaturi ieħor dwar ix-xiri ta’ batteriji.

(527)

Fil-kummenti tagħha wara l-pubblikazzjoni tar-Regolament provviżorju, Tesla (Shanghai) argumentat li ma kien jeżisti l-ebda benefiċċju dwar il-forniment ta’ batteriji u l-inputs ewlenin tagħhom, minħabba sitwazzjoni speċifika ta’ akkwist li għal raġunijiet ta’ kunfidenzjalità ma setgħetx tiġi żvelata fir-Regolament. Għar-raġunijiet spjegati f’divulgazzjoni speċifika lil dan il-produttur esportatur, l-asserzjoni ġiet miċħuda.

(528)

Wara d-divulgazzjoni finali, Tesla Shanghai ssottomettiet kummenti dwar l-allokazzjoni tal-benefiċċju għall-batteriji. Dawn il-kummenti ġew parzjalment aċċettati u indirizzati f’divulgazzjoni speċifika għall-kumpanija.

(529)

Diversi produtturi esportaturi li kkooperaw għamlu asserzjonijiet dwar l-ammont ta’ sussidju abbażi tad-data tal-BMI użata mill-Kummissjoni, inklużi l-għażla metodoloġika u l-eżistenza ta’ żbalji klerikali. Minbarra dawn l-asserzjonijiet, il-Kummissjoni analizzat id-data rilevanti disponibbli fil-BMI aktar mill-qrib, kif ukoll il-metodoloġija użata biex jiġi ddeterminat il-parametru referenzjarju xieraq biex jiġi kkwantifikat l-ammont ta’ sussidju li jirriżulta minn dan il-programm.

(530)

B’mod partikolari, il-Kummissjoni sabet li, skont id-data tal-BMI, matul il-PI, id-domanda lokali Ċiniża għaċ-ċelluli tal-batteriji kienet ħafna aktar baxxa mill-produzzjoni Ċiniża fis-suq. Fil-fatt, is-surplus taċ-Ċina kien jammonta għal 43 % matul il-PI. Tali provvista żejda Ċiniża ta’ batteriji Ċiniżi kienet ir-riżultat tal-politiki speċifiċi u tal-interventi tal-GTĊ kif ġew iddettaljati fit-Taqsima 3.7.2.1. tar-Regolament provviżorju, li rriżultaw fi produzzjoni żejda u l-ħtieġa li jiġu esportati bi prezzijiet baxxi biex tali produzzjoni żejda tiġi allokata fi swieq oħrajn sabiex jiġu koperti d-defiċits f’dak l-input. Fil-fatt, analiżi aktar dettaljata tas-settijiet ta’ data disponibbli fil-BMI, jiġifieri d-data dwar il-provvista u d-domanda taċ-ċelluli tal-batteriji f’żoni ġeografiċi differenti, uriet li matul il-PI kien hemm defiċit ta’ madwar 300 % fl-Ewropa u ta’ madwar 200 % fl-Amerika ta’ Fuq (jiġifieri f’dawk is-swieq id-domanda għaċ-ċelluli tal-batteriji kienet ferm ogħla mill-provvista domestika attwali). Dan id-defiċit imtela mill-esportazzjonijiet Ċiniżi (85) ta’ parti mill-produzzjoni żejda tagħhom li kienet saħansitra akbar mid-defiċit taż-żoni ġeografiċi kollha. Minn analiżi dettaljata tad-data dwar il-provvista tal-BMI u dwar id-domanda fiż-żoni ġeografiċi differenti, jidher li s-suq tal-Asja u l-Paċifiku (minbarra d-data Ċiniża) (data tal-APAC (dik li kienet iċ-Ċina)) kellu l-iżgħar defiċit, jiġifieri 9 % matul il-PI. Barra minn hekk, id-data f’dak is-suq uriet surplus ta’ 24 % fl-2022 u defiċit ta’ 21 % fl-2023. L-analiżi wriet ulterjorment li l-prezzijiet fir-reġjuni l-oħrajn fejn kien hemm preżenza sinifikanti ta’ esportazzjonijiet Ċiniżi kienu ferm aktar baxxi milli fir-reġjun tal-APAC (dik li kienet iċ-Ċina). Dan jissuġġerixxi li aktar ma jkunu għoljin il-perċentwal u l-preżenza ta’ batteriji żejda tas-suq Ċiniż fis-swieq reġjonali, aktar ikunu baxxi l-prezzijiet tas-settijiet tad-data korrispondenti għal tali swieq fil-PI.

(531)

Għalhekk, il-Kummissjoni sabet li huwa xieraq li tintuża d-data mis-suq tal-APAC (dik li kienet iċ-Ċina) għall-kuntrarju tad-data mis-swieq kollha, li hija affettwata mill-esportazzjonijiet sussidjati Ċiniżi. B’mod partikolari, fid-dawl tan-nuqqas ta’ kooperazzjoni mill-GTĊ u mill-produtturi Ċiniżi tal-batteriji u fin-nuqqas ta’ informazzjoni affidabbli oħra, il-Kummissjoni użat il-prezzijiet tal-BMI fir-reġjun tal-APAC (dik li kienet iċ-Ċina). Il-parametru referenzjarju użat kien fih il-prezzijiet attwali għall-aħħar trimestru tal-2022 minħabba s-surplus osservat f’dik is-sena. B’kuntrast għal dan, meta wieħed iżomm f’moħħu li fl-2023, il-kundizzjonijiet tas-suq urew defiċit f’dak is-suq, għall-ewwel tliet trimestri tal-2023, il-prezzijiet referenzjarji fil-BMI ġew aġġustati bid-differenza fil-prezz bejn ir-reġjun tal-APAC (dik li kienet iċ-Ċina) u ċ-Ċina għall-aħħar trimestru tal-2022 li tammonta għal medja ta’ 12 %.

(532)

Barra minn hekk, fil-premessa (813) tar-Regolament provviżorju, il-Kummissjoni indikat li l-parametru referenzjarju użat fl-istadju provviżorju ġie kkalkulat fuq bażi konservattiva minħabba li l-prezzijiet tal-BMI ġew ikkwotati fuq bażi “mill-fabbrika” u għalhekk ma inkludewx il-kostijiet tat-trasport. Din is-sejba hija kkonfermata fuq bażi tal-pajjiż kollu, billi l-evidenza fil-fajl turi li l-parti l-kbira tal-batteriji mixtrija jsiru fuq bażi mill-fabbrika. Madankollu, fejn applikabbli, il-Kummissjoni żiedet il-kostijiet reali tat-tbaħħir imġarrba mill-produtturi esportaturi li xtraw il-batteriji abbażi ta’ termini ta’ kunsinna għajr dawk mill-fabbrika.

(533)

Wara d-divulgazzjoni mill-ġdid, Tesla Shanghai ma qablitx mar-raġunament li jispjega d-data referenzjarja riveduta tal-BMI. B’mod partikolari, Tesla ma qablitx mal-konklużjoni tal-Kummissjoni, jiġifieri, aktar ma jkunu għoljin il-perċentwal u l-preżenza ta’ batteriji żejda tas-suq Ċiniż fis-swieq reġjonali, aktar ikunu baxxi l-prezzijiet tas-settijiet tad-data korrispondenti għal tali swieq fil-PI, filwaqt li asseriet li d-data dwar il-prezz u d-domanda tal-BMI ma tikkonfermax din is-suppożizzjoni.

(534)

Madankollu, il-Kummissjoni kkonfermat mill-ġdid il-konklużjoni tagħha abbażi tad-data tal-BMI. Fil-perjodu ta’ investigazzjoni, id-defiċit għall-batteriji fl-Ewropa u fl-Amerika ta’ Fuq kien ta’ madwar 200 % - 300 %, u l-prezz medju tal-batterija tal-NMC f’dawn ir-reġjuni kien ta’ madwar 130 – 134 USD/kowd. Min-naħa l-oħra, id-defiċit għall-batteriji fir-reġjun tal-APAC (dik li kienet iċ-Ċina) kien biss ta’ madwar 9 %, u l-prezz medju kien ogħla minn dak fl-Ewropa u fl-Amerika ta’ Fuq. Il-kumpanija interpretat ir-raġunament tal-Kummissjoni b’mod ħażin billi implikat li “d-data tikkontradixxi li d-differenza fil-prezz kbira ħafna bejn il-prezzijiet reġjonali u l-prezzijiet taċ-Ċina tkun iżgħar kull meta jkun hemm defiċit”. Id-determinazzjoni tal-Kummissjoni li tuża d-data mis-suq tal-APAC (minbarra ċ-Ċina), aktar milli data mis-swieq kollha—li hija kompromessa mill-esportazzjonijiet sussidjati Ċiniżi — ma kinitx ibbażata fuq id-differenza fil-prezz kbira ħafna bejn il-prezzijiet Ċiniżi u dawk ta’ reġjuni oħrajn. Barra minn hekk, id-differenza fil-prezz kbira ħafna bejn is-suq Ċiniż u s-swieq Ewropej jew tal-Amerika ta’ Fuq matul il-perjodi kollha disponibbli titqies bħala mhux affidabbli, peress li ġiet affettwata b’mod sinifikanti minn defiċits sostanzjali fil-provvista tal-batteriji u miż-żieda fil-preżenza li tirriżulta tal-esportazzjonijiet Ċiniżi.

(535)

Tesla Shanghai ma qablitx ukoll mal-aġġustament mill-Kummissjoni tal-prezzijiet fir-reġjun tal-APAC (dik li kienet iċ-Ċina) matul l-ewwel tliet trimestri tal-2023 (il-Kummissjoni qieset li dawn il-prezzijiet kienu diġà affettwati mill-kundizzjonijiet tas-suq, li wrew defiċit f’dak is-suq matul dan il-perjodu). Il-kumpanija asseriet li l-aġġustament kellu jiġi applikat ’il fuq fir-rigward tal-prezzijiet tal-batteriji fiċ-Ċina.

(536)

Il-Kummissjoni ma qablitx ma’ tali suġġeriment, billi matul l-analiżi tagħha f’din l-investigazzjoni, affermat b’mod konsistenti li l-prezzijiet Ċiniżi tal-batteriji kienu ssussidjati sostanzjalment u, konsegwentement, ma setgħux iservu bħala bażi affidabbli għal tali aġġustament.

(537)

Il-Kummissjoni identifikat il-prezz attwali tal-batterija fir-reġjun tal-APAC (minbarra ċ-Ċina), matul l-aħħar trimestru tal-2022 bħala l-aktar parametru referenzjarju affidabbli li fuqu kien ibbażat l-aġġustament, minħabba s-surplus osservat f’dan ir-reġjun fl-2022. Għalhekk, l-argumenti tal-kumpanija ġew miċħuda.

(538)

Ir-rata ta’ sussidju stabbilita fir-rigward ta’ dan is-sussidju matul il-perjodu ta’ investigazzjoni għall-produtturi esportaturi inklużi fil-kampjun u għall-kumpanija li rċeviet eżami individwali tammonta għal:

Il-forniment ta’ batteriji għal remunerazzjoni anqas minn dik adegwata

(539)

Kif ġie spjegat fil-premessa (470) ta’ dan ir-Regolament, il-kummenti sottomessi mill-GTĊ dwar il-fornituri tal-input li jaġixxu bħala “korpi pubbliċi” kienu jappartjenu kemm għall-produtturi tal-batteriji kif ukoll għal dawk tal-LFP. Il-Kummissjoni indirizzat dawn il-kummenti fil-premessi (471) u (472), (480), u (482) sa (484) ta’ dan ir-Regolament.

(540)

Wara d-divulgazzjoni provviżorja, il-Grupp BYD sostna li l-analiżi dwar il-fornituri tal-LFP kienet nieqsa minn evidenza fattwali, u li l-ebda dokument ma wera li l-fornituri tal-LFP biegħu l-prodotti lill-Grupp BYD biex jintlaħqu l-objettivi ta’ politika. Il-Grupp BYD issottometta mill-ġdid ir-reġistru tax-xiri għal-LFP bħala evidenza ta’ appoġġ. Il-Grupp BYD żied li l-investigazzjoni ma wrietx li l-assoċjazzjonijiet jidderieġu lill-membri tagħhom biex jadottaw id-deċiżjonijiet ekonomiċi tagħhom għall-benefiċċju tal-industrija tal-BEV. Skont il-Grupp BYD, il-Kummissjoni naqset milli tippreżenta evidenza li l-Istat speċifikament għandu “setgħa akkwiżita” fl-assoċjazzjoni. Fuq il-bażi ta’ dan, il-Grupp BYD argumenta li għalhekk ma hemm l-ebda evidenza stabbilita sew biex jiġi konkluż li l-fornituri tal-LFP jaġixxu bħala “korpi pubbliċi” u l-provvisti tagħhom ta’ merkanzija jaqgħu taħt l-umbrella ta’ merkanzija għal LTAR, u għalhekk ma hemm l-ebda raġuni biex ma jiġux aċċettati prezzijiet fil-pajjiż.

(541)

Kif ġie nnotat fil-premessa (864) tar-Regolament provviżorju, is-suq Ċiniż tqies bħala distort minħabba l-politiki nazzjonali u speċifiċi għas-settur fis-seħħ u l-miżuri relatati, b’mod partikolari dawk li jappartjenu għall-istrutturi tal-ipprezzar. Konsegwentement, l-akkwiżizzjonijiet kollha tal-LFP mill-Grupp BYD matul il-perjodu ta’ investigazzjoni jitqiesu bħala affettwati. Din il-valutazzjoni tirriżulta mill-fehim li l-fornituri kollha joperaw domestikament skont il-politiki u forom oħrajn ta’ interferenza mill-GTĊ, fl-istess kundizzjonijiet distorti tas-suq. Għalhekk, il-kundizzjonijiet prevalenti tas-suq fiċ-Ċina tqiesu bħala distorti, u l-applikazzjoni tal-Artikolu 6(d)(ii) kienet iġġustifikata. Barra minn hekk, il-Kummissjoni tfakkar li, minħabba n-nuqqas ta’ kooperazzjoni mill-GTĊ (it-Taqsima 3.3.1.2 tar-Regolament provviżorju), il-Kummissjoni ma rċeviet l-ebda informazzjoni dwar il-karatteristiċi tas-suq domestiku Ċiniż tal-inputs u għalhekk kellha tirrikorri għall-fatti disponibbli. Barra minn hekk, id-differenzi fil-prezzijiet bejn il-fornituri tal-LFP ta’ BYD ma għandhom l-ebda effett fuq il-valutazzjoni tal-Kummissjoni; kif diġà ġie rikonoxxut fil-premessa (891) tar-Regolament provviżorju, il-prezzijiet tal-LFP fornuti lill-Grupp BYD segwew xejriet kompletament differenti mill-prezzijiet tal-esportazzjoni Ċiniżi matul il-perjodu ta’ investigazzjoni (il-premessa (920) tar-Regolament provviżorju). Għalhekk, l-asserzjoni ġiet miċħuda.

(542)

Kif diġà kopert fil-punt (a)(3)(b) tat-Taqsima 3.7.2.1.1 u l-premessi minn (744) sa (757) tar-Regolament provviżorju, il-Kummissjoni sabet li l-forniment ta’ batteriji u l-inputs tagħhom huwa regolat mill-GTĊ bil-għan li jitnaqqsu l-prezzijiet għall-benefiċċju tal-industrija tal-BEV. Evidenza addizzjonali ta’ kontrolli tal-prezzijiet ordnati mill-GTĊ dwar l-inputs tal-batteriji hija disponibbli fil-“MIIT Work plan for stabilizing growth in the nonferrous metals industry” (86) ippubblikat f’Settembru 2023. Fil-fatt, wieħed mill-għanijiet ewlenin huwa li “tissaħħaħ il-provvista u l-istabbiltà tal-prezzijiet tal-prodotti ewlenin” permezz tal-“bini ta’ pjattaforma upstream u downstream għad-dokkjar tal-provvista u tad-domanda, jiġu ggwidati l-impriżi tal-iżvilupp u tat-tidwib tar-riżorsi tal-metall li ma fihx ħadid biex jiġu ffirmati ftehimiet ta’ akkwist fuq terminu twil ma’ utenti downstream, u tiġi stabbilizzata l-provvista ta’ prodotti ewlenin bħar-ram, l-aluminju, il-litju [u] t-titjib tal-mekkaniżmu ta’ twissija bikrija “ħamra, safra u kaħla” għall-provvista ta’ materja prima sfuża, tiġi msaħħa l-gwida tal-aspettattiva, u jiġu pprevenuti flutwazzjonijiet kbar fil-prezz u spekulazzjoni malizzjuża […] jiġu appoġġati impriżi ewlenin biex iwettqu riżervi kummerċjali, u tiġi regolata xjentifikament u b’mod ordnat ir-relazzjoni bejn il-provvista u d-domanda tas-suq” (87). Il-kooperazzjoni bejn l-atturi upstream u downstream biex jiġu stabbilizzati l-provvista u d-domanda, is-superviżjoni tal-provvista u l-flutwazzjonijiet tal-kontroll tal-prezzijiet huma kollha struzzjonijiet li diġà jinsabu fi pjanijiet preċedenti, bħall-Pjan ta’ Azzjoni dwar il-Batteriji u l-Avviż dwar l-industrija tal-batteriji tal-2017 (ara l-premessi (746) sa (750) tar-Regolament provviżorju). Dan mhux biss jikkonferma li l-GTĊ eżerċita l-kontroll tiegħu fuq il-prezzijiet diġà mill-2017, iżda anke li dawn l-isforzi għadhom sostnuti matul il-perjodu ta’ investigazzjoni u lil hinn.

(543)

Minbarra l-pjanijiet ċentrali li jikkonfermaw il-kontrolli tal-ipprezzar eżerċitati u ordnati mill-GTĊ diġà koperti fil-punt (2) tat-Taqsima 3.7.2.1.1, u b’mod partikolari l-premessa (751) tar-Regolament provviżorju, il-Kummissjoni sabet evidenza addizzjonali tal-assoċjazzjonijiet tal-industrija li fformolaw politiki industrijali u li wettqu kompiti tal-gvern bħall-istabbilizzazzjoni tal-aspettattivi tal-provvista u tad-domanda u tal-fluttwazzjonijiet tal-prezz ta’ kontroll. Dan huwa muri mill-aħħar stqarrijiet ta’ Ge Honglin, is-Segretarju tal-Partit u President tal-Assoċjazzjoni tal-Industrija tal-Metalli li ma Fihomx Ħadid taċ-Ċina(“CNMIA”) (88). Kif diġà kopert mill-premessa (94) tar-Regolament ta’ Implimentazzjoni tal-Kummissjoni (UE) 2023/1618 , is-CNMIA hija assoċjazzjoni tal-industrija fejn is-CCP jintervjeni fit-teħid ta’ deċiżjonijiet operazzjonali. F’din l-“organizzazzjoni soċjali”, bħal f’diversi assoċjazzjonijiet tal-industrija, l-organizzazzjonijiet tal-bini tal-partit huma inkorporati fl-istruttura tagħha (89) (kif kopert mill-premessa (779) tar-Regolament provviżorju). Is-CNMIA “implimentat bir-reqqa d-deċiżjonijiet u l-iskjeramenti tal-Kumitat Ċentrali tas-CCP u tal-Kunsill tal-Istat, u kkooperat mad-dipartimenti rilevanti biex tifformula u tirreklama u tinterpreta politiki industrijali bħall-“Linji Gwida għall-Aġġustament tal-Istruttura Industrijali”, “Pjan ta’ ħidma għall-istabbilizzazzjoni tat-tkabbir fl-industrija tal-metalli li ma fihomx ħadid”, u “Metodi ta’ Ġbir tal-Introjtu mit-Trasferiment tad-Drittijiet tal-Estrazzjoni”; […] b’reazzjoni għaċ-ċaqliq ’il fuq u ’l isfel fil-prezzijiet ta’ varjetajiet strateġiċi tal-metall bħal-litju u s-siliċju, għenet lid-dipartimenti tal-gvern biex isaħħu l-komunikazzjoni ma’ impriżi upstream u downstream u biex jiġu stabbilizzati l-aspettattivi tas-suq; […] iffirmat ftehimiet ta’ kooperazzjoni strateġika ma’ aktar minn għaxar gvernijiet lokali bħal Anhui, Jiangxi, Gansu u Guangxi, u effettivament ippromwoviet it-tqassim razzjonali tal-industriji reġjonali u l-iżvilupp reġjonali kkoordinat, u appoġġat bis-sħiħ it-trasformazzjoni u t-titjib tal-industriji lokali”. [l-enfasi miżjuda]

(544)

Wara d-divulgazzjoni finali, il-GTĊ sostna li d-dikjarazzjoni tas-CNMIA li l-Kummissjoni bbażat fuqha fil-premessa (543) ta’ dan ir-Regolament hija irrilevanti, peress li hija relatata ma’ assoċjazzjoni kompletament differenti, u fi kwalunkwe każ hija inkonsistenti mal-evidenza rreġistrata. Barra minn hekk, il-GTĊ argumenta li l-Kummissjoni ma weġbitx għall-kummenti dwar il-fornituri tal-materja prima bħala korpi pubbliċi permezz tal-parteċipazzjoni tagħhom fl-assoċjazzjonijiet industrijali. Il-GTĊ tenna li l-parteċipazzjoni ta’ dawn il-fornituri fl-assoċjazzjonijiet tal-industrija ma tagħmilhomx korpi pubbliċi, u li l-Kummissjoni ma spjegatx kif dawn l-assoċjazzjonijiet jikkontrollaw u jintervjenu fl-iffissar tal-prezzijiet.

(545)

Il-Kummissjoni fakkret li l-kwotazzjoni mis-CNMIA ntużat biex tappoġġa s-sejbiet tal-Kummissjoni li l-assoċjazzjonijiet tal-industrija ma humiex korpi indipendenti ħielsa mill-kontroll tal-Istat, u għalhekk rilevanti għal din l-investigazzjoni. Fir-rigward tal-allegazzjonijiet mill-GTĊ li l-Kummissjoni ma weġbitx għall-kumment tiegħu dwar il-korpi pubbliċi, il-Kummissjoni kienet diġà spjegat fil-premessa (539) ta’ dan ir-Regolament, li l-kummenti sottomessi mill-GTĊ dwar il-fornituri tal-input li jaġixxu bħala “korpi pubbliċi” kienu jappartjenu kemm għall-produtturi tal-batteriji kif ukoll għal dawk tal-LFP. Il-Kummissjoni indirizzat dawn il-kummenti fil-premessi (471) u (472), (480), u minn (482) sa (484) ta’ dan ir-Regolament. Għalhekk, l-asserzjonijiet tqiesu bħala irrilevanti.

(546)

Wara d-divulgazzjoni finali, il-Grupp BYD issottometta mill-ġdid il-kummenti tiegħu li jiddikjaraw li l-analiżi tal-Kummissjoni kienet nieqsa minn evidenza fattwali biex turi li l-operazzjonijiet kummerċjali tal-fornituri tal-LFP u l-imġiba tagħhom fis-suq kienu strutturati u żviluppati biex jitwettqu l-objettivi tal-politika tal-GTĊ, filwaqt li qal ukoll li l-fatt li huwa membru ta’ assoċjazzjoni industrijali jew li għandu organizzazzjoni tal-partit fi ħdan kumpanija ma jfissirx li l-fornituri tal-LFP jitilfu l-kapaċitajiet ta’ teħid ta’ deċiżjonijiet indipendenti, is-setgħat korporattivi, u l-awtorità finanzjarja ġenerali tagħhom, li kollha huma pprovduti bil-liġijiet Ċiniżi applikabbli. Barra minn hekk, il-Grupp BYD enfasizza li l-fatt li l-prezzijiet tal-LFP fornut lill-Grupp BYD segwew xejriet kompletament differenti meta mqabbla mal-prezzijiet tal-esportazzjoni huwa irrilevanti, peress li swieq differenti għandhom prezzijiet differenti. Fl-aħħar nett, il-Grupp BYD argumenta li l-fatt li l-prezzijiet tal-LFP varjaw abbażi tal-fornitur kien jindika li l-iffissar tal-prezzijiet jaħdem skont id-domanda u l-provvista tas-suq u ma għandu l-ebda rilevanza mal-objettivi tal-politika tal-GTĊ.

(547)

Il-Kummissjoni diġà indirizzat parti minn dawn il-kummenti fid-divulgazzjoni finali fil-premessi minn (541) sa (543) ta’ dan ir-Regolament. Fir-rigward tal-allegazzjonijiet dwar it-teħid ta’ deċiżjonijiet indipendenti tal-fornituri tal-LFP, dan huwa miċħud mill-evidenza li tinsab fir-Regolament provviżorju (il-premessi (779), (786), (787), (877)), filwaqt li x-xejriet fil-prezzijiet domestiċi tal-LFP meta mqabbla mal-prezzijiet tal-esportazzjoni ġew indirizzati fil-premessi (905) u (920) tar-Regolament provviżorju, li jikkonferma li l-fornituri tal-LFP ma humiex qegħdin jaġixxu bħala operaturi tas-suq ħieles fis-suq domestiku Ċiniż u ma humiex qegħdin jieħdu deċiżjoni ekonomikament razzjonali. Għalhekk, il-Kummissjoni ċaħdet dawn l-asserzjonijiet.

(548)

Wara d-divulgazzjoni provviżorja, il-Kummissjoni sabet evidenza addizzjonali ta’ Hunan Yuneng New Energy Materials Co., Ltd. u s-sussidjarji tagħha li jimplimentaw politiki nazzjonali u li jaġixxu bħala korpi pubbliċi, kif kopert fit-Taqsima 3.7.2.2.1(a) tar-Regolament provviżorju. L-ewwel nett, l-istqarrijiet reċenti mill-Gvern Muniċipali tal-Poplu ta’ Xiangtan (90) jikkonfermaw li Hunan Yuneng New Energy Materials titqies mhux biss ġestita bħala impriża parzjalment proprjetà tal-Istat (ara l-premessa (881) tar-Regolament provviżorju), iżda anke bħala impriża li tmexxi ’l quddiem l-iżvilupp ta’ Xiangtan u, fl-aħħar mill-aħħar, tal-Istat. Taħt it-taqsima ffokata fuq “[o]ttimizzazzjoni u integrazzjoni ta’ pjattaformi ta’ impriżi tal-Istat”, il-Gvern ta’ Xiangtan qed jagħmel ħiltu biex “[j]integra l-Grupp ta’ Investiment Industrijali u l-Grupp Elettrokimiku biex jifformaw il-Grupp ta’ Investiment Industrijali Elettrokimiku, jibni b’mod attiv impriża orjentata lejn is-suq tal-ewwel klassi li jkollha żewġ kumpaniji elenkati, u jagħmel ħiltu biex ikun minn ta’ quddiem nett fil-materjali tal-batteriji tal-enerġija ġdida taċ-Ċina. Fi Frar [2023], Hunan Yuneng New Energy Company, li fiha l-Grupp Elettrokimiku investa u kellu sehem, ġiet elenkata b’suċċess fis-Suq tal-Impriżi tat-Tkabbir tal-Borża tal-Shenzhen” (91). Xiangtan Electrochemical hija impriża muniċipali tal-Istat taħt il-ġestjoni tas-SASAC ta’ Xiangtan. Barra minn hekk, l-iżvilupp ta’ Hunan Yuneng u l-azzjonist tal-Istat tagħha, il-Xiangtan Electrochemical Group, huma marbuta mal-għanijiet tal-Gvern ta’ Xiangtan li jibni grupp ta’ impriżi b’introjtu operatorju ta’ 10 biljuni, permezz ta’ “implimentazzjoni ta’ “impriża waħda, politika waħda”, u jiffokaw fuq l-appoġġ tal-Kumpanija Hunan Yuneng New Energy Battery Materials Co., Ltd., Harbin Electric Wind Energy Co., Ltd. u impriżi oħrajn biex jilħqu l-livell ta’ 10 biljuni [ta’ introjtu operatorju]” u biex “jappoġġaw lil […] Xiangtan Electrochemical Group Co., Ltd. u impriżi ewlenin oħrajn fl-industrija biex jespandu negozji relatati u jwessgħu l-ambitu tan-negozju tagħhom, [u] jintegraw ir-riżorsi upstream u downstream permezz ta’ fużjonijiet, akkwiżizzjonijiet u riorganizzazzjoni” (92).

(549)

Fil-provinċja ta’ Kunming, fejn hemm Yunnan Yuneng New Energy Materials Co., Ltd, sussidjarja ta’ Hunan Yuneng, il-gvern tal-Belt ta’ Anning innegozja ma’ Yunnan Yuneng għall-istabbiliment ta’ proġett ta’ investiment ta’ aktar minn biljun CNY. Skont il-gvern tal-Belt ta’ Anning, il-ġestjoni tal-belt “tgħaqqad il-bini tal-partit mal-iżvilupp industrijali, filwaqt li tiffoka fuq il-promozzjoni tal-membri u l-uffiċjali tal-partit biex jissodisfaw ir-responsabbiltajiet tagħhom, u taqdi bis-sħiħ lill-impriżi u lill-proġetti” (93). B’mod partikolari, il-proġett ta’ Yunnan Yuneng New Energy Battery Materials huwa meqjus bħala “manifestazzjoni qawwija tal-awtoskoperti tal-organizzazzjonijiet tal-partit fil-livelli kollha u l-maġġoranza tal-membri u l-uffiċjali tal-partit” (94) [l-enfasi miżjuda]. Ir-rabtiet profondi bejn il-kumitat tal-bini tal-partit fil-livelli ċentrali u lokali u l-impriżi, huma kkonfermati mill-evidenza li “[i]l-Kumitat ta’ Ħidma tal-Partit tal-Park Industrijali ta’ Anning iggwida lil Yunnan Yuneng biex tistabbilixxi fergħa tal-partit. […] F’Mejju [2023], il-fergħa tal-partit tal-kumpanija ssieħbet ukoll fil-kumitat tal-partit tal-katina tal-industrija tal-materjal tal-batteriji tal-enerġija ġdida tal-park. Permezz ta’ skambji fuq il-pjattaforma tal-bini tal-partit, din laħqet kooperazzjoni fl-akkwist tal-perossidu tal-idroġenu ma’ Yunnan Yuntian Petrochemical Co., Ltd., impriża li tinsab fil-park, biex issolvi l-problema tal-passat ta’ kost għoli għax-xiri tal-perossidu tal-idroġenu minn barra l-provinċja” (95). Għalhekk, il-bini tal-partit għandu rwol ċentrali fl-iżvilupp tal-impriżi u b’hekk javvanza l-iżvilupp tal-politiki nazzjonali ordnati mill-GTĊ. Eżempju ta’ dan huwa pprovdut mill-gvern ta’ Kunming, li jirrapporta li l-kumitati tal-bini tal-partit fil-Park Industrijali ta’ Anning għenu biex jiġu stabbiliti ftehimiet ta’ xiri bejn il-kumpaniji li jinsabu fil-park, u ftehimiet ta’ servizzi finanzjarji bejn il-banek u l-kumpaniji, “marbuta mil-“linja ħamra” tal-bini tal-partit fil-Park Industrijali ta’ Anning” (96). Ir-rwol tal-bini tal-partit fuq entitajiet privati kien kopert b’mod estensiv fil-premessa (787) tar-Regolament provviżorju, u l-evidenza ta’ hawn fuq tikkonferma li s-CCP jeżerċita influwenza fuq it-tipi kollha ta’ kumpaniji fiċ-Ċina, u li jista’ juża unitajiet ta’ ħidma tal-bini tal-partit fin-negozji u fil-gvernijiet lokali biex jeżerċita l-influwenza tiegħu. Kif diġà ġie kopert fil-premessa (885) tar-Regolament provviżorju, l-iżvilupp tal-Park Industrijali ta’ Anning kien maħsub ukoll biex jintlaħqu l-għanijiet li jinsabu fil-Pjan ta’ Azzjoni ta’ Yunnan. Għalhekk, is-sejbiet ta’ hawn fuq jikkonfermaw li wieħed mill-akbar atturi tas-suq fiċ-Ċina għal-LFP, Hunan Yuneng New Energy Materials, huwa impriża tal-Istat li l-iżvilupp tagħha huwa marbut ħafna mal-ilħuq tal-għanijiet lokali u nazzjonali (il-premessa (548)), u jkomplu jżidu mal-korp ta’ evidenza li l-fornituri tal-LFP jirrispettaw u jimplimentaw l-objettivi ta’ politika tal-GTĊ u b’hekk iwettqu funzjonijiet governattivi.

(550)

Wara d-divulgazzjoni finali, il-GTĊ sostna li l-evidenza koperta hawn fuq fil-premessi (548) u (549) ta’ dan ir-Regolament ma tappoġġax il-konklużjonijiet tal-Kummissjoni, peress li:

(551)

Il-Kummissjoni ma qablitx ma’ dawn l-asserzjonijiet. Il-formazzjoni tal-Grupp ta’ Investiment Industrijali Elettrokimiku hija maħsuba biex “tibni b’mod attiv intrapriża orjentata lejn is-suq tal-ewwel klassi li jkollha żewġ kumpaniji elenkati”. Il-Kummissjoni tfakkar li, mhux biss il-Grupp Elettrokimiku investa f’Hunan Yuneng New Energy Materials, iżda l-kumpanija tal-aħħar ġiet elenkata wkoll fil-Borża ta’ Shenzhen fi Frar tal-2023, u li l-iżvilupp ta’ Hunan Yuneng New Energy Materials iservi l-għanijiet tal-Gvern ta’ Xiangtan li jibni grupp ta’ intrapriżi b’introjtu operatorju ta’ 10 biljuni, filwaqt li l-evidenza fil-fajl dwar Yunnan Yuneng New Energy Materials Co. torbot b’mod espliċitu l-kisbiet tal-kumpanija mal-kisbiet ta’ organizzazzjoni tal-partit. Għalhekk, dawn l-asserzjonijiet ġew miċħuda.

(552)

Fin-nuqqas ta’ kummenti ulterjuri u fid-dawl tas-sejbiet addizzjonali mill-Kummissjoni, il-konklużjonijiet li saru fil-premessi minn (861) sa (912) tar-Regolament provviżorju ġew ikkonfermati.

(553)

Kif ġie spjegat fil-premessa (496) ta’ dan ir-Regolament, il-kummenti sottomessi mill-GTĊ dwar l-inkarigu u l-ordni kienu rilevanti kemm għall-produtturi tal-batteriji kif ukoll għal dawk tal-LFP. Il-Kummissjoni indirizzat dawn il-kummenti fil-premessa (498) ta’ dan ir-Regolament.

(554)

Wara d-divulgazzjoni finali, il-Grupp BYD argumenta li l-fatt li matul il-perjodu ta’ investigazzjoni, il-prezzijiet tax-xiri varjaw fost il-fornituri tal-LFP jikkontradixxi s-sejbiet tal-Kummissjoni dwar l-inkarigu u d-direzzjoni, peress li jrid jintwera mill-Kummissjoni li l-iffissar tal-prezzijiet huwa rispons għall-għanijiet ta’ politika stabbiliti mill-GTĊ.

(555)

Il-Kummissjoni indikat li l-asserzjonijiet dwar il-kontroll tal-prezzijiet kienu diġà ġew indirizzati fil-premessi (541) u (542) ta’ dan ir-Regolament. Varjazzjoni fil-prezzijiet hija irrilevanti jekk dawk il-prezzijiet ikunu taħt it-termini tas-suq u tali livell ikun ir-riżultat tal-intervent tal-GTĊ fis-suq. Għalhekk, dawn l-asserzjonijiet ġew miċħuda.

(556)

Wara d-divulgazzjoni provviżorja, il-BYD Group argumenta li l-Kummissjoni kkalkolat il-benefiċċju darbtejn għal xi xiri bejn il-kumpaniji ta’ pakketti ta’ batteriji. L-asserzjoni ġiet aċċettata u l-kalkoli ġew riveduti bix-xieraq.

(557)

Il-GTĊ sostna li l-użu tal-prezz FOB tal-esportazzjoni taċ-Ċina bħala l-parametru referenzjarju estern ma jiżgurax li l-parametru referenzjarju li jirriżulta huwa relatat jew jirreferi għal, jew huwa konness ma’, il-kundizzjonijiet prevalenti tas-suq fil-pajjiż tal-provvista, u li konsegwentement dan jistma żżejjed il-prezz normali tas-suq domestiku, minħabba li l-produzzjoni globali tal-LFP hija kkonċentrata fiċ-Ċina, il-kwantità tal-LFP esportata miċ-Ċina hija limitata, u dawn l-esportazzjonijiet ma humiex neċessarjament għall-produzzjoni tal-batteriji tal-enerġija.

(558)

Fid-dawl tas-sejbiet fit-Taqsima 3.7.2.1 u l-premessi (846) u (918) tar-Regolament provviżorju, il-Kummissjoni stabbiliet li l-politiki settorjali applikabbli fis-seħħ fiċ-Ċina jfixklu l-prezzijiet kemm tal-batteriji kif ukoll tal-LFP fis-suq domestiku kollu. B’riżultat ta’ dan, il-Kummissjoni stabbiliet li t-termini u l-kundizzjonijiet prevalenti fiċ-Ċina ma setgħux jiġu aġġustati, abbażi tal-kostijiet, il-prezzijiet u fatturi oħrajn attwali disponibbli f’dak il-pajjiż, b’ammont xieraq li jirrifletti t-termini u l-kundizzjonijiet normali tas-suq. Kif imfakkar fil-premessa (924) tar-Regolament provviżorju, minħabba l-kundizzjonijiet dominanti eżistenti dwar dan it-tip speċifiku ta’ litju, u n-nuqqas ta’ kwalunkwe parametru referenzjarju raġonevoli ieħor, il-Kummissjoni kellha tirrikorri għall-prezzijiet tal-esportazzjoni Ċiniżi lejn il-bqija tad-dinja.

(559)

Il-kummenti tal-GTĊ dwar il-parametri referenzjarji esterni koperti fil-premessa (512) ta’ dan ir-Regolament koprew kemm il-fornituri tal-batteriji kif ukoll tal-LFP. Il-Kummissjoni indirizzat dawn l-asserzjonijiet fil-premessa (513) ta’ dan ir-Regolament.

(560)

Fin-nuqqas ta’ kummenti ulterjuri, il-konklużjonijiet li saru fil-premessi minn (913) sa (929) tar-Regolament provviżorju dwar il-benefiċċju, l-ispeċifiċità u l-kalkolu tal-ammont ta’ sussidju ġew ikkonfermati.

(561)

Ir-rata ta’ sussidju stabbilita fir-rigward ta’ dan is-sussidju matul il-perjodu ta’ investigazzjoni għall-produtturi esportaturi inklużi fil-kampjun tammonta għal:

Il-forniment tal-litju għall-produzzjoni tal-batteriji għal remunerazzjoni anqas minn dik adegwata

(562)

Fin-nuqqas ta’ kummenti, il-Kummissjoni kkonfermat is-sejbiet tagħha fir-rigward tal-bażi legali, il-kontribuzzjoni finanzjarja u l-benefiċċju ta’ dan il-programm kif previst fil-premessi minn (931) sa (940) tar-Regolament provviżorju.

(563)

Wara d-divulgazzjoni provviżorja, il-GTĊ argumenta li t-tnaqqis tal-EIT għal Impriżi tat-Teknoloġija Avvanzata u Ġdida u t-tnaqqis preferenzjali qabel it-taxxa tal-programmi tal-ispejjeż tar-riċerka u l-iżvilupp ma humiex limitati għal segment diskret biżżejjed tal-ekonomija Ċiniża sabiex jikkwalifikaw bħala “speċifiċi” skont it-tifsira tal-Artikolu 2.1(a) tal-Ftehim SCM. F’dan ir-rigward, huwa rrefera għall-fatt li mhux il-produtturi kollha tal-BEV ibbenefikaw mill-allegat tnaqqis fit-taxxa għal impriżi ta’ teknoloġija avvanzata u ġdida (HNTEs).

(564)

Il-GTĊ argumenta wkoll li l-Kummissjoni kienet naqset milli tistabbilixxi speċifiċità b’mod oġġettiv abbażi ta’ evidenza fattwali, peress li l-bażi legali li fuqha bbażat ruħha għal produttur esportatur wieħed ma kinitx ċara; jiġifieri l-Kummissjoni ma indikatx jekk il-benefiċċju kienx ġej minn sussidju reġjonali skont it-tifsira tal-Artikolu 2.2 tal-Ftehim SCM u l-Artikolu 4(3) tar-Regolament bażiku minħabba l-post fejn jinsab dan l-esportatur jew mill-Artikolu 4(2)(a) kif imsemmi fir-Regolament provviżorju minħabba l-istatus tiegħu bħala HNTE.

(565)

Il-GTĊ argumenta wkoll li dan il-programm allegat ta’ sussidju ma kienx speċifiku peress li l-leġiżlazzjoni li skontha topera l-awtorità awtorizzanti, tistabbilixxi kriterji jew kundizzjonijiet oġġettivi li jirregolaw l-eliġibbiltà, u l-ammont tat-tnaqqis fit-taxxa, u li l-eliġibbiltà hija awtomatika u li l-kriterji u l-kundizzjonijiet tal-kwalifika huma strettament irrispettati. B’mod aktar speċifiku, il-GTĊ argumenta li r-rata tat-taxxa aktar baxxa hija disponibbli għall-impriżi kollha li jissodisfaw il-kundizzjonijiet u ma tiffavorixxix lil ċerti impriżi fuq oħrajn minħabba li l-kumpaniji mis-setturi kollha, li jkopru l-ekonomija kollha huma eliġibbli biex jiksbu ċertifikat tal-HNTE.

(566)

Bl-istess mod, il-GTĊ argumenta li l-Kummissjoni bbażat fuq l-ispeċifiċità de jure billi analizzat il-“leġiżlazzjoni li skontha topera l-awtorità awtorizzanti” mingħajr ma vvalutat il-kundizzjonijiet ta’ eliġibbiltà tas-sussidju u jekk il-limitazzjoni fuq l-aċċess għas-sussidju lil ċerti impriżi hijiex espliċita, mhux ambigwa jew ċara mill-istrument legali jew mill-istqarrijiet rilevanti tal-awtorità awtorizzanti (97). Il-GTĊ argumenta wkoll li l-Kummissjoni kienet iffokat b’mod uniku fuq il-produtturi tal-BEV li suppost ibbenefikaw mill-allegat trattament tat-taxxa preferenzjali mingħajr ma investigat, “l-impriżi jew l-industriji kollha eliġibbli biex jirċievu dak l-istess sussidju” (98).

(567)

Il-Kummissjoni ma qablitx ma’ dawn l-asserzjonijiet għaliex hija qieset l-iskemi tat-taxxa deskritti fit-Taqsimiet 3.8.1 sa 3.8.2 tar-Regolament provviżorju bħala speċifiċi skont l-Artikolu 4(2)(a) tar-Regolament bażiku, li jgħid li “fejn l-awtorità li tagħtihom, jew il-leġiżlazzjoni li taħtha topera l-awtorità li tagħtihom, tillimita espliċitament l-aċċess għal sussidju lil ċerti intrapriżi, tali sussidju għandu jkun speċifiku”. Tabilħaqq, l-iskemi ta’ sussidju inkwistjoni għandhom il-bażi legali tagħhom fil-Kapitolu IV “Preferenzi tat-Taxxa” tal-EIT. Bl-isem u l-kontenut tiegħu, dan il-kapitolu jipprevedi b’mod espliċitu trattament preferenzjali speċifiku li “jillimita b’mod espliċitu l-aċċess għal sussidju għal ċerti impriżi”. B’mod aktar speċifiku, kif indikat fil-premessa (934) tar-Regolament provviżorju, l-Artikolu 93 tar-Regoli ta’ Implimentazzjoni għal-Liġi dwar it-Taxxa fuq l-Introjtu tal-Impriżi jiċċara li “L-impriżi importanti tat-teknoloġija avvanzata u ġdida li se jiġu appoġġati mill-Istat [għandhom jissodisfaw ċerti] kundizzjonijiet”, bħal “1. Jikkonformaw mal-ambitu tal-Oqsma Ewlenin ta’ Teknoloġija Avvanzata u Ġdida Appoġġati mill-Istat”. Kif jidher ċar minn dan ta’ hawn fuq, l-impriżi jew l-industriji kollha ma humiex eliġibbli li jibbenefikaw mill-istess trattamenti tat-taxxa preferenzjali. Konsegwentement, is-sussidji pprovduti taħt dawn l-iskemi tat-taxxa kienu meqjusin speċifiċi skont l-Artikolu 4(2)(a) tar-Regolament bażiku.

(568)

Barra minn hekk, kif imsemmi fil-premessa (942) tar-Regolament provviżorju, ċerti kumpaniji bbenefikaw minn rata mnaqqsa ta’ taxxa fuq l-introjtu fuq il-bażi ta’ kriterji relatati mal-post fiżiku tagħhom, b’mod partikolari jekk impriża tkun tinsab fir-reġjun tal-Punent. F’każ bħal dan, il-Kummissjoni qieset li l-iskema tat-taxxa kienet speċifika skont l-Artikolu 4(3) tar-Regolament bażiku peress li kienet limitata għal ċerti impriżi li jinsabu f’reġjun ġeografiku magħżul. Konsegwentement, is-sussidji pprovduti taħt dawn l-iskemi tat-taxxa kienu meqjusin speċifiċi skont l-Artikolu 4(3) tar-Regolament bażiku.

(569)

Fir-rigward tar-referenza għal ċerti kumpaniji li ma bbenefikawx mir-rata mnaqqsa tat-taxxa fuq l-introjtu, il-Kummissjoni qieset li kien meħtieġ li jiġu ssodisfati ċerti kundizzjonijiet sabiex ikunu eliġibbli għaċ-ċertifikat HNTE. Il-fatt li ċerti produtturi tal-BEV ma ssodisfawx il-kundizzjonijiet kollha jew ma talbux iċ-ċertifikat HNTE ma jurix li din l-iskema ma hijiex speċifika.

(570)

Wara d-divulgazzjoni finali, il-GTĊ asserixxa wkoll li l-Kummissjoni ma indirizzatx l-argument tal-GTĊ li t-tnaqqis tat-taxxa fuq l-introjtu għall-HNTEs ma huwiex limitat għal segment diskret biżżejjed tal-ekonomija Ċiniża sabiex jikkwalifika bħala “speċifiku” skont it-tifsira tal-Artikolu 2.1(a) tal-Ftehim SCM.

(571)

Il-Kummissjoni enfasizzat li indirizzat l-istess kumment dwar l-ispeċifiċità fil-premessi (567) u (568) ta’ dan ir-Regolament.

(572)

Fin-nuqqas ta’ kummenti ulterjuri dwar l-ispeċifiċità, il-Kummissjoni kkonfermat is-sejbiet tagħha fil-premessi minn (941) sa (943) tar-Regolament provviżorju.

(573)

Wara d-divulgazzjoni finali, il-Grupp SAIC argumenta li għal din l-iskema ta’ sussidju kienet ġiet irrapportata rata ta’ sussidju b’mod mhux xieraq. Din l-asserzjoni ġiet aċċettata.

(574)

Fin-nuqqas ta’ kummenti oħrajn, il-Kummissjoni kkonfermat is-sejbiet tagħha fir-rigward tal-kalkolu tal-ammont ta’ sussidju għal dan il-programm kif previst fil-premessi (944) u (945) tar-Regolament provviżorju.

(575)

Ir-rata ta’ sussidju stabbilita fir-rigward ta’ dan is-sussidju matul il-perjodu ta’ investigazzjoni għall-produtturi esportaturi inklużi fil-kampjun tammonta għal:

Tnaqqis tat-Taxxa fuq l-Introjtu tal-Impriżi (“EIT”) għal Impriżi ta’ Teknoloġija Avvanzata u Ġdida

(576)

Fin-nuqqas ta’ kummenti, il-Kummissjoni kkonfermat is-sejbiet tagħha fir-rigward tal-bażi legali kif previst fil-premessa (949) tar-Regolament provviżorju.

(577)

Wara d-divulgazzjoni provviżorja, il-Grupp SAIC indika li huwa ċaħad is-suppożizzjoni tal-Kummissjoni li l-proġetti kollha ta’ riċerka u żvilupp u l-eżenzjonijiet mit-taxxa relatati ma’ waħda mill-entitajiet tiegħu kienu jikkonċernaw biss il-PUI. Il-Grupp SAIC asserixxa li ma ngħatat l-ebda informazzjoni jew spjegazzjoni fir-rigward tal-applikazzjoni tal-Artikolu 28 u kif il-kalkolu tal-ammont ta’ sussidju ġie sussegwentement ikkalkolat fir-rigward tal-Grupp SAIC innifsu.

(578)

Il-Grupp SAIC argumenta li l-entità inkwistjoni ssottomettiet rapport dwar l-ispejjeż fuq ir-riċerka u l-iżvilupp u tal-aġent tat-taxxa tal-kumpanija bħala prova matul iż-żjara ta’ verifika u li r-rapport tal-aġent tat-taxxa ma semmiex li l-ispejjeż fuq ir-riċerka u l-iżvilupp imġarrba kienu speċifiċi għall-prodott taħt investigazzjoni. Il-Grupp SAIC fakkar li s-sehem ta’ vetturi ICE fil-fatturat ta’ din l-entità kien jenħtieġ li jiġi rifless fil-kalkolu tal-marġni tas-sussidju.

(579)

Il-Kummissjoni ma qablitx mal-asserzjoni tal-Grupp SAIC u nnotat li l-kumpanija inkwistjoni kienet ipprovdiet biss parti mill-informazzjoni mitluba, għalkemm faċilment disponibbli. Għalhekk, hija ma pprovdietx kopja sħiħa tar-rapport tal-aġent tat-taxxa mitlub li kien fih informazzjoni relatata mal-ispejjeż u mal-proġetti tar-riċerka u l-iżvilupp li kien jirreferi għalihom it-tnaqqis. B’mod aktar speċifiku, il-Grupp SAIC irrifjuta li jipprovdi l-informazzjoni mitluba kif innotat fil-lista ta’ dokumenti ffirmata b’mod konġunt li ma ġewx ipprovduti matul iż-żjara ta’ verifika.

(580)

Barra minn hekk, għall-kuntrarju tal-asserzjoni tal-Grupp SAIC, il-Kummissjoni pprovdiet l-ispjegazzjoni meħtieġa fid-dokumenti speċifiċi ta’ qabel id-divulgazzjoni, u spjegat li, fin-nuqqas ta’ informazzjoni verifikata li tindika l-fatt li l-ispejjeż u l-proġetti tar-riċerka u l-iżvilupp kienu relatati ma’ prodotti oħrajn u ma kinux relatati mal-prodott taħt investigazzjoni, hija kienet allokat il-benefiċċju fuq il-fatturat tal-BEV. Konsegwentement, il-Kummissjoni qieset li kienet ipprovdiet biżżejjed informazzjoni dwar ir-raġunijiet sottostanti dwar għaliex u kif applikat il-fatti disponibbli. Għalhekk, l-asserzjoni ġiet miċħuda u s-sejbiet kif ippreżentati fil-premessa (950) tar-Regolament provviżorju huma b’dan ikkonfermati.

(581)

Fin-nuqqas ta’ kummenti, il-Kummissjoni kkonfermat is-sejbiet tagħha fir-rigward tal-benefiċċju kif previst fil-premessa (951) tar-Regolament provviżorju.

(582)

Wara d-divulgazzjoni provviżorja, il-Grupp BYD ikkontesta s-sejba tal-Kummissjoni fil-premessa (952) tar-Regolament provviżorju li t-tpaċija tat-taxxa għar-riċerka u l-iżvilupp tikkostitwixxi trattament tat-taxxa preferenzjali bbażat fuq il-fatt li l-leġiżlazzjoni nnifisha tillimita l-applikazzjoni ta’ din il-miżura biss għal intrapriżi li jġarrbu spejjeż tar-riċerka u l-iżvilupp f’ċerti oqsma ta’ prijorità ta’ teknoloġija avvanzata stabbiliti mill-Istat, bħas-settur tal-BEV. Il-Grupp BYD argumenta li fil-każ tal-ispejjeż tar-riċerka u l-iżvilupp imġarrba minn intrapriża meta twettaq attivitajiet ta’ riċerka u żvilupp, 100 % addizzjonali tal-ammont tal-ispejjeż fuq ir-riċerka u l-iżvilupp effettivament imġarrba għandu jitnaqqas qabel il-ħlas tat-taxxa, u li l-intrapriżi tal-persuni ġuridiċi kollha fiċ-Ċina jistgħu jibbenefikaw mit-tpaċija.

(583)

Wara d-divulgazzjoni finali, il-Grupp BYD u l-GTĊ tennew li t-tnaqqis tat-taxxa fuq l-introjtu għal tnaqqis preferenzjali qabel it-taxxa għall-iskemi tal-ispejjeż tar-riċerka u l-iżvilupp ma huwiex speċifiku skont l-Artikolu 2.1(b) tal-Ftehim SCM peress li l-kriterji ta’ eliġibbiltà għat-tnaqqis tat-taxxa fuq l-introjtu għall-HNTEs huma bbażati fuq kriterji oġġettivi li huma awtomatiċi u mħarsa strettament sabiex il-limitazzjonijiet spjegati fil-Kapitolu IV tal-EIT ma jkunux speċifiċi. Iż-żewġ partijiet argumentaw ukoll li, fid-dawl tal-Artikolu 30 tal-EIT, l-Artikolu 95 tar-Regolament ta’ Implimentazzjoni tat-Taxxa fuq l-Introjtu tal-Intrapriżi, kif ukoll l-Artikolu 4 tal-Avviż dwar it-Titjib tat-Tnaqqis tal-Ispejjeż tal-Iżvilupp tar-Riċerka u l-Iżvilupp, din l-iskema hija applikabbli għat-tipi kollha ta’ industriji tal-manifattura.

(584)

Il-Kummissjoni ma qablitx mal-interpretazzjoni tal-liġijiet u tal-miżuri ta’ implimentazzjoni mill-GTĊ u l-Grupp BYD, li juru li l-programm huwa limitat għal ċerti setturi u intrapriżi appoġġati mill-GTĊ abbażi ta’ kriterji li ma jidhrux oġġettivi jew newtrali, bħal li jikkonfermaw mal-ambitu tal-“Oqsma ta’ Teknoloġija Avvanzata u Ġdida b’Appoġġ Importanti mill-Istat”. Kif diġà ġie ddikjarat fil-premessa (941) tar-Regolament provviżorju, dan is-sussidju huwa speċifiku skont it-tifsira tal-Artikolu 4(2)(a) tar-Regolament bażiku, minħabba li japplika biss għall-intrapriżi li joperaw f’ċerti oqsma ta’ teknoloġija avvanzata, bħall-industrija tal-BEV. Barra minn hekk, l-Artikolu 30 tal-Liġi dwar it-Taxxa fuq l-Introjtu tal-Intrapriżi taċ-Ċina jipprevedi li l-ispejjeż tar-riċerka u l-iżvilupp imġarrba mill-intrapriżi fil-qasam tal-iżvilupp ta’ teknoloġiji ġodda, ta’ prodotti ġodda u ta’ tekniki ġodda jistgħu jitnaqqsu wkoll meta jiġi kkalkulat l-introjtu taxxabbli, l-Artikolu 95 tar-Regoli ta’ Implimentazzjoni għal-Liġi dwar it-Taxxa fuq l-Introjtu tal-Intrapriżi jispjega minn xiex jikkonsisti t-tnaqqis, filwaqt li l-Artikolu 4 tal-Avviż dwar it-Titjib tat-Tnaqqis tal-Ispejjeż tal-Iżvilupp tar-Riċerka u l-Iżvilupp jelenka l-industriji li t-tnaqqis qabel it-taxxa ma japplikax għalihom (bħall-manifattura tat-tabakk, l-akkomodazzjoni u s-settur tal-ikel u tax-xorb, il-bejgħ bl-ingrossa u l-bejgħ bl-imnut, il-proprjetà immobbli, il-lokazzjoni u s-servizzi kummerċjali, id-divertiment u kwalunkwe industrija oħra stipulata mill-Ministeru tal-Finanzi u l-Amministrazzjoni Statali tat-Tassazzjoni). Il-Kummissjoni tfakkar li (a) diġà analizzat ir-Regoli ta’ Implimentazzjoni għal-Liġi dwar it-Taxxa fuq l-Introjtu tal-Intrapriżi għall-valutazzjoni tagħha tal-ispeċifiċità fil-premessa (934) tar-Regolament provviżorju u l-premessa (567) ta’ dan ir-Regolament; (b) l-evidenza li tinsab fl-Artikoli speċifiċi u fid-dokumenti sottomessi mill-Grupp BYD ma tibdilx is-sejbiet tal-Kummissjoni dwar l-ispeċifiċità, u fil-fatt issaħħaħ il-fatt li din l-iskema ma hijiex applikabbli għall-industriji kollha. B’mod partikolari, l-Artikolu 30 tal-Liġi Ċiniża dwar l-EIT u l-Artikolu 4 tal-Avviż dwar it-Titjib tat-Tnaqqis tal-Ispejjeż tar-Riċerka u l-Iżvilupp juru li dan is-sussidju huwa speċifiku, peress li huwa applikabbli biss għal ċertu għadd ta’ industriji, jiġifieri dawk li joperaw fl-iżvilupp ta’ teknoloġiji ġodda, ta’ prodotti ġodda u ta’ tekniki ġodda, u mhux il-kumpaniji kollha jistgħu jibbenefikaw minnu. Għalhekk, il-Kummissjoni qieset li dan is-sussidju huwa kumpensatorji. Għalhekk, din l-asserzjoni ġiet miċħuda.

(585)

Konsegwentement, fin-nuqqas ta’ kummenti addizzjonali, il-Kummissjoni kkonfermat is-sejbiet tagħha fir-rigward tal-ispeċifiċità kif previst fil-premessa (952) tar-Regolament provviżorju.

(586)

Ir-rata ta’ sussidju tal-Grupp SAIC rigward it-tnaqqis qabel it-taxxa tal-ispejjeż fuq ir-riċerka u l-iżvilupp ġiet aġġornata bħala konsegwenza tal-korrezzjoni deskritta fil-premessa (652) ta’ dan ir-Regolament.

(587)

Fin-nuqqas ta’ kwalunkwe kumment ieħor, il-Kummissjoni kkonfermat is-sejbiet tagħha fir-rigward tal-kalkolu tal-ammont ta’ sussidju kif previst fil-premessi (953) u (954) tar-Regolament provviżorju.

Tnaqqis preferenzjali qabel it-taxxa tal-ispejjeż fuq ir-riċerka u l-iżvilupp

(588)

Fin-nuqqas ta’ kummenti, il-Kummissjoni kkonfermat is-sejbiet tagħha fir-rigward tal-bażi legali kif previst fil-premessi (956) u (957) tar-Regolament provviżorju.

(589)

Wara d-divulgazzjoni provviżorja, il-GTĊ, il-Grupp Geely u l-Grupp SAIC argumentaw li ma kien hemm l-ebda kontribuzzjoni finanzjarja f’termini ta’ dħul mitluf minħabba li skont l-Artikolu 10(1) tal-liġi tal-EIT taċ-Ċina, l-introjtu minn investimenti ta’ ekwità mħallsa lill-investituri bħal dividendi u bonusijiet għandu jitnaqqas meta jiġi kkalkolat l-introjtu taxxabbli sabiex tiġi evitata t-taxxa doppja. Konsegwentement, l-eżenzjoni mit-taxxa inkwistjoni ma tikkostitwix dħul tal-gvern mitluf u ma hemm l-ebda sussidju skont it-tifsira tal-Artikolu 1.1 tal-Ftehim SCM. Barra minn hekk, il-GTĊ indika li l-Kummissjoni ma kinitx indirizzat din il-kwistjoni fattwali fl-analiżi tagħha. B’mod parallel, il-Grupp Geely indika wkoll li s-sistema tat-taxxa taċ-Ċina hija mfassla biex twaqqaf it-taxxa doppja u biex tallinja man-normi internazzjonali.

(590)

Għalkemm il-Kummissjoni qablet li l-eliminazzjoni tat-taxxa doppja hija prattika tat-taxxa rikonoxxuta fuq livell internazzjonali, din ma tapplikax bl-istess mod fil-pajjiżi kollha. Il-GTĊ naqas milli juri kif it-tnaqqis inkwistjoni jevita t-taxxa doppja b’mod speċifiku (jiġifieri billi juri li d-dividendi soġġetti għall-eżenzjoni huma ntaxxati xi mkien ieħor u r-regola tkopri biss sitwazzjonijiet ta’ impożizzjoni doppja). Barra minn hekk, il-Kummissjoni diġà kkonkludiet ukoll fil-premessa (959) tar-Regolament provviżorju li din l-iskema kienet sussidju skont l-Artikolu 3(1)(a)(ii) u l-Artikolu 3(2) tar-Regolament bażiku minħabba li hemm kontribuzzjoni finanzjarja fil-forma ta’ dħul mitluf mill-GTĊ ugwali għat-tnaqqis fit-taxxa perċepiti, li jagħti benefiċċju lill-kumpaniji kkonċernati. Il-benefiċċju għar-riċevituri huwa ugwali għall-iffrankar tat-taxxa.

(591)

Wara d-divulgazzjoni finali, il-GTĊ tenna l-asserzjoni tiegħu li ma kien hemm l-ebda dħul mitluf u rrefera għar-risposta tiegħu għall-kwestjonarju u l-Artikolu 10(1) tal-EIT fejn indika li “id-dividendi u l-bonusijiet imħallsa lill-investituri ma jistgħux jitnaqqsu mill-introjtu taxxabbli” u li “s-sussidjarja diġà ħallset it-taxxa fuq l-introjtu mill-intrapriżi korrispondenti” qabel ma qassmet id-dividendi. Għal dawn ir-raġunijiet, il-GTĊ argumenta li “sabiex tiġi evitata t-tassazzjoni doppja, id-dividendi, u l-introjtu tal-bonus ma jiġux soġġetti għal taxxa fuq l-introjtu korporattiv għat-tieni darba” peress li “d-dividendi u l-bonusijiet jitqassmu minn intrapriżi residenti wara li t-taxxa fuq il-profitti tkun diġà tħallset.”

(592)

Wara analiżi ulterjuri, il-Kummissjoni kkonfermat il-valutazzjoni tagħha li jeżisti sussidju fil-forma ta’ dħul mitluf. F’dan ir-rigward, reġgħet lura għall-Artikolu 6(4) u 7 tal-EIT. Filwaqt li l-Artikolu 6(4) tal-EIT jipprevedi li d-dividendi, il-ħruġ ta’ ishma bonus jew redditi oħrajn fuq l-investiment ta’ ekwità huma parti mill-introjtu totali ta’ intrapriża, l-Artikolu 7 ma jelenkax il-qligħ mid-dividendi, mill-ħruġ ta’ ishma bonus jew minn redditi oħrajn fuq l-investiment ta’ ekwità bħala parti mill-introjtu mhux taxxabbli skont l-EIT. Għalhekk, l-evitar tat-tassazzjoni doppja ma huwiex awtomatiku; jiġifieri d-dividendi huma parti mill-introjtu taxxabbli sakemm ma jkunux applikabbli d-dispożizzjonijiet tal-Kapitolu IV “Inċentivi tat-taxxa” li jiddefinixxi l-kriterji ta’ eliġibbiltà għal tali eżenzjoni. Abbażi ta’ dan, il-Kummissjoni qieset li l-Artikolu 26 tal-EIT iwassal għall-eżistenza ta’ dħul mitluf għall-GTĊ u ċaħdet din l-asserzjoni.

(593)

Konsegwentement, il-Kummissjoni kkonfermat il-konklużjoni tagħha deskritta fil-premessa (958) tar-Regolament provviżorju.

(594)

Fin-nuqqas ta’ kummenti, il-Kummissjoni kkonfermat is-sejbiet tagħha fir-rigward tal-benefiċċju kif previst fil-premessa (959) tar-Regolament provviżorju.

(595)

Wara d-divulgazzjoni provviżorja, il-GTĊ u l-Grupp SAIC argumentaw li l-Kummissjoni ma kinitx stabbiliet li l-allegat sussidju kien limitat għal ċerti intrapriżi. Huma argumentaw ukoll li dan l-allegat programm ma kienx speċifiku peress li l-kriterji għall-eliġibbiltà għall-programm huma oġġettivi u japplikaw orizzontalment fir-rigward tal-intrapriżi residenti kollha irrispettivament mill-industriji/prodotti jew mill-postijiet ġeografiċi involuti. Il-GTĊ u l-Grupp SAIC tennew li l-Kummissjoni tikkorrelata b’mod żbaljat l-Artikoli 25 u 26(2) tal-Liġi taċ-Ċina dwar it-Taxxa fuq l-Introjtu tal-Intrapriżi iżda, kif ġie spjegat ukoll fit-tweġiba għall-kwestjonarju tal-GTĊ, l-Artikolu 26(2) jopera indipendentement mill-Artikolu 25. Il-Grupp SAIC oppona s-sejbiet imsemmija fil-premessa (960) tar-Regolament provviżorju fejn iddikjara li l-eżenzjoni tad-dividendi bejn l-intrapriżi residenti kwalifikati kienet de facto speċifika u għalhekk l-iskema ta’ sussidju ma kinitx de jure speċifika. Huwa argumenta wkoll li l-Artikolu 83 tar-Regolamenti ta’ Implimentazzjoni għal-Liġi dwar it-Taxxa Korporattiva fuq l-Introjtu jiċċara li dan il-programm huwa miftuħ għall-intrapriżi kollha, sakemm dawn il-gwadanji jiġu minn intrapriża residenti permezz ta’ investiment dirett f’intrapriża residenti oħra. Wara d-divulgazzjoni finali, il-GTĊ tenna l-istess asserzjoni u indika li l-programm ma jissodisfax ir-rekwiżit ta’ speċifiċità tal-Artikolu 2.1 tal-Ftehim SCM minħabba li l-kumpaniji ma għandhomx bżonn jissodisfaw ir-rekwiżit tal-Artikolu 25 tal-EIT.

(596)

Il-Grupp SAIC asserixxa wkoll li l-ġurisprudenza tal-Qorti tal-Kummerċ Internazzjonali tal-Istati Uniti kienet ikkonfermat li l-programm ta’ eżenzjonijiet tad-dividendi bejn l-intrapriżi residenti kwalifikati huwa miftuħ għall-intrapriżi u għall-industriji kollha li jagħmlu gwadanji mill-investiment li ġejjin minn investiment f’intrapriżi residenti oħrajn u ma huwiex limitat b’mod espliċitu għal lista ta’ kumpaniji (99).

(597)

Il-Kummissjoni ma qablitx mal-asserzjonijiet tal-GTĊ u tal-Grupp SAIC u asseriet li l-Artikolu 26(2) tal-EIT huwa parti mill-Kapitolu IV “Preferenzi tat-Taxxa”, li jipprevedi għadd ta’ trattamenti tat-taxxa preferenzjali li huma eżenzjonijiet għar-regoli ġenerali tat-tassazzjoni. Barra minn hekk, kif ġie spjegat fil-premessa (957), l-Artikolu 25 tal-EIT, li huwa introduzzjoni għall-Kapitolu IV “Politiki ta’ Taxxa Preferenzjali”, jipprevedi li “L-Istat se joffri preferenzi tat-taxxa fuq l-introjtu lil Intrapriżi involuti f’industriji jew proġetti li l-iżvilupp tagħhom huwa appoġġat u mħeġġeġ b’mod speċjali mill-Istat”. Barra minn hekk, l-Artikolu 26(2) jispeċifika li l-eżenzjoni mit-taxxa hija applikabbli għal introjtu minn investimenti ta’ ekwità bejn “intrapriżi residenti eliġibbli”, li jidher li jillimita l-kamp ta’ applikazzjoni tagħha għal ċerti intrapriżi residenti biss. Għalhekk, il-Kummissjoni qieset li tali politika ta’ taxxa preferenzjali hija limitata għal ċerti industriji, li huma appoġġati u mħeġġa speċifikament mill-Istat, bħall-industrija tal-BEVs u, għalhekk, hija speċifika skont it-tifsira tal-Artikolu 4(2)(a) tar-Regolament bażiku. Dan huwa kkonfermat ukoll mill-kopja Ingliża tad-dikjarazzjoni tat-taxxa fuq l-introjtu (il-formola A107010, il-linja 3) sottomessa minn diversi Gruppi inklużi fil-kampjun li tgħid “(II) Dividendi, bonusijiet u introjtu ieħor minn investimenti ta’ ekwità bejn intrapriżi residenti kwalifikati hija eżentata mit-taxxa fuq l-introjtu tal-intrapriżi (4 + 8+6 + 7+5)” fil-verżjoni Ċiniża tad-dikjarazzjoni tat-taxxa, f’dan ir-rigward.

(598)

F’dak li għandu x’jaqsam mar-referenza għall-Qorti tal-Kummerċ Internazzjonali tal-Istati Uniti, il-Kummissjoni rrifjutat tali ċaħda minħabba li tali ġuriżdizzjoni ma hijiex parti mill-ordni ġuridiku tal-UE. Il-Kummissjoni nnotat ukoll li wara din il-pubblikazzjoni, l-US DOC għadu jsib l-Artikolu 26(2) tal-Liġi dwar l-Introjtu tal-Intrapriżi speċifiku kemm de jure kif ukoll de facto (100).

(599)

Abbażi ta’ dan, dawn l-asserzjonijiet ġew miċħuda u l-konklużjonijiet misluta fil-premessa (960) tar-Regolament provviżorju ġew ikkonfermati.

(600)

Ir-rata ta’ sussidju tal-Grupp SAIC u tal-Grupp Geely dwar l-eżenzjoni tad-dividendi bejn l-intrapriżi residenti kwalifikati ġiet aġġornata bħala konsegwenza tal-korrezzjoni deskritta fil-premessi (652) u (654) ta’ dan ir-Regolament rispettivament.

(601)

Fin-nuqqas ta’ kwalunkwe kumment ieħor, il-konklużjonijiet misluta fil-premessi (961) u (962) tar-Regolament provviżorju ġew ikkonfermati.

Eżenzjoni tad-dividendi bejn intrapriżi residenti kwalifikati

(602)

Fin-nuqqas ta’ kummenti relatati ma’ din l-iskema, il-konklużjonijiet misluta fil-premessi minn (963) sa (967) ġew ikkonfermati.

(603)

Wara d-divulgazzjoni provviżorja f’kumment ġenerali dwar it-tnaqqis tad-dħul mit-trasferiment tat-teknoloġija, il-GTĊ indika li l-Kummissjoni ma pprovdietx lill-GTĊ bl-opportunità li jissottometti kwalunkwe informazzjoni jew kumment dwar dan il-programm matul il-fażijiet ta’ investigazzjoni u verifika tal-proċedura.

(604)

Madankollu, il-Kummissjoni ma tqisx dan it-tnaqqis bħala skema ġdida ta’ sussidju. Huwa wieħed mill-eżempji ta’ tnaqqis fit-taxxa previsti fil-Liġi tal-EIT għall-intrapriżi tat-teknoloġija avvanzata u ġdida. It-tnaqqis kollu fit-taxxa skont il-liġijiet tal-EIT kien parti mill-proċess ta’ investigazzjoni peress li kien kopert min-Notifika tal-Bidu u mid-Dokument ta’ Bidu u mill-memorandum.

(605)

Fin-nuqqas ta’ kummenti, il-konklużjonijiet misluta fil-premessi minn (969) sa (971) tar-Regolament provviżorju huma b’dan ikkonfermati.

(606)

Wara d-divulgazzjoni provviżorja, il-GTĊ asserixxa li l-Kummissjoni ma speċifikatx il-bażi li fuqha tqis li dan is-sussidju huwa speċifiku bħall-Artikoli 4(2)(a) u 4(4)(a) tar-Regolament bażiku invokat, u stabbiliet kriterji ta’ speċifiċità kompletament distinti.

(607)

Il-GTĊ indika ulterjorment li dan is-sussidju ma jistax jitqies bħala sussidju għall-esportazzjoni skont it-tifsira tal-Artikolu 4(4)(a) tar-Regolament bażiku u l-Artikolu 3.1(a) tal-Ftehim SCM peress li ma huwiex kontinġenti fuq l-esportazzjoni tal-oġġetti li qegħdin jiġu investigati, u marbut magħha.

(608)

Barra minn hekk, il-GTĊ argumenta li l-Kummissjoni ma kienet ipprovdiet l-ebda evidenza li t-tnaqqis inkwistjoni kien limitat għal intrapriżi speċifiċi jew għal ċerti industriji. Wara d-divulgazzjoni finali, huwa qal ukoll li dan il-programm la kien de jure u lanqas de facto speċifiku peress li l-intrapriżi involuti fit-trasferiment tat-teknoloġiji fl-ekonomija Ċiniża kollha huma eleġibbli.

(609)

Il-GTĊ argumenta li l-Kummissjoni ma kinitx uriet li t-tnaqqis fid-dħul mit-trasferiment tat-teknoloġija kien kontinġenti fuq il-prestazzjoni tal-esportazzjoni u li kienet naqset milli tindirizza l-kummenti tal-GTĊ li l-iskema ma hijiex kontinġenti fuq u marbuta mal-esportazzjoni tal-merkanzija li qiegħda tiġi investigata fil-prim’istanza. Barra minn hekk, il-GTĊ argumenta li l-Artikolu 3.1(a) tal-Ftehim SCM ma jkoprix servizzi, jiġifieri teknoloġija, li jaqgħu barra mill-kamp ta’ applikazzjoni tal-Ftehim SCM.

(610)

L-ewwel nett, il-Kummissjoni qieset dan it-tnaqqis speċifiku abbażi tal-Artikolu 4(2)(a) tar-Regolament bażiku peress li dan it-tnaqqis huwa espliċitament limitat għall-intrapriżi involuti fit-trasferiment tat-teknoloġiji.

(611)

Barra minn hekk, l-Avviż Nru 212 rispettiv tal-2009 (101) ma jipprevedix kriterji oġġettivi ta’ eliġibbiltà stabbiliti b’mod ċar mil-liġi u li jistgħu jiġu vverifikati li jkunu newtrali, ekonomiċi fin-natura u orizzontali fl-applikazzjoni. L-Avviż jirreferi għal kriterji diskrezzjonali addizzjonali ta’ eliġibbiltà bħal:

(612)

Il-Kummissjoni rreferiet ukoll għall-Artikolu 4(4)(a) tar-Regolament bażiku u għall-ispeċifiċità de jure peress li l-Kummissjoni tista’ tistabbilixxi li bħal fil-każ tal-kumpaniji fejn it-tnaqqis fit-taxxa inkwistjoni kien ikkumpensat, il-benefiċċju kien kontinġenti fuq il-prestazzjoni tal-esportazzjoni tal-kumpaniji.

(613)

Il-Kummissjoni rreferiet għall-premessa (968) tar-Regolament provviżorju billi stabbiliet li t-tpaċija tat-taxxa għat-trasferiment tat-teknoloġija kienet tintitola lil kumpaniji għal trattament tat-taxxa preferenzjali għall-attivitajiet ta’ esportazzjoni tagħhom. Tali fatt huwa bbażat ukoll fuq l-informazzjoni kondiviża mill-kumpanija inkwistjoni, jiġifieri “It-tnaqqis fit-teknoloġija ta’ trasferiment huwa għat-teknoloġija ttrasferita barra mill-pajjiż.”, kif ġie rrapportat fir-rapport tal-missjoni kondiviż ma’ din il-kumpanija u li ma ġiex ikkontestat. Fuq din il-bażi, din l-asserzjoni ġiet miċħuda.

(614)

Abbażi ta’ dan, dawn l-asserzjonijiet ġew miċħuda u l-konklużjonijiet misluta fil-premessa (972) tar-Regolament provviżorju ġew ikkonfermati.

(615)

Wara d-divulgazzjoni provviżorja, il-Grupp Geely indika żball possibbli fil-kalkolu tar-rata ta’ sussidju li jikkonċerna dan it-tnaqqis. B’mod speċifiku, il-kumpanija asseriet li l-benefiċċju jenħtieġ li jiġi kkalkolat għall-perjodu ta’ investigazzjoni, u mhux għas-sena finanzjarja 2022.

(616)

Kif sar għal skemi oħrajn tat-taxxa fuq l-introjtu, il-Kummissjoni, fil-kalkolu tal-benefiċċji kollha tad-dħul mit-taxxa, ibbażat fuq id-dikjarazzjoni tat-taxxa fuq l-introjtu tal-2022 peress li l-benefiċċju derivat minn tali programmi naqas fil-perjodu ta’ investigazzjoni u d-dokumenti relatati mas-sena 2022 kienu dawk l-aktar reċenti disponibbli għall-Grupp Geely sa tmiem il-proċess ta’ verifika. Għalhekk, l-asserzjoni ġiet miċħuda u l-konklużjonijiet misluta fil-premessi minn (973) sa (974) tar-Regolament provviżorju ġew ikkonfermati.

It-tnaqqis tad-dħul mit-trasferiment tat-teknoloġija

(617)

Fin-nuqqas ta’ kummenti dwar il-bażi legali, il-konklużjonijiet misluta fil-premessi minn (976) sa (978) ġew ikkonfermati.

(618)

Fin-nuqqas ta’ kummenti dwar is-sejbiet ta’ din l-investigazzjoni, il-konklużjoni misluta fil-premessa (979) ġiet ikkonfermata.

(619)

Wara d-divulgazzjoni provviżorja, il-GTĊ allega li l-Kummissjoni ma stabbilietx l-eżistenza ta’ kontribuzzjoni finanzjarja skont it-tifsira tal-Artikolu 1.1(a)(1)(ii) tal-Ftehim SCM, u li ma ntilef l-ebda dħul minħabba l-fatt li hija norma ġenerali li ma tiġix applikata taxxa fuq il-konsum fuq firxa wiesgħa ta’ prodotti fiċ-Ċina. Din l-asserzjoni ġiet imtennija wara d-divulgazzjoni finali, meta l-GTĊ semma r-Rapport tal-Korp tal-Appell dwar US - FSC, il-punt 90, li jiddikjara li l-bażi għat-tqabbil ta’ dak li kieku kien ikun dovut “trid tkun ir-regoli tat-taxxa applikati mill-Membru inkwistjoni”. Il-GTĊ spjega li f’dan il-kuntest, peress li subsett żgħir biss ta’ prodotti ta’ lussu u li jniġġsu huma soġġetti għat-taxxa fuq il-konsum skont ir-regoli tat-taxxa taċ-Ċina, u għalhekk il-batteriji huma esklużi, ma hemm l-ebda obbligu tat-taxxa fl-ewwel wieħed, u għalhekk l-ebda eżenzjoni mit-taxxa.

(620)

Il-Kummissjoni ma qablitx ma’ dawn id-dikjarazzjonijiet. L-asserzjoni tal-GTĊ li “hija n-norma ġenerali” li t-taxxa fuq il-konsum ma tiġix imposta fuq firxa wiesgħa ta’ prodotti kienet ġenerali u mhux issostanzjata. B’kuntrast għal dan, kif ġie spjegat fil-premessa (976) tar-Regolament provviżorju, il-programm għandu l-bażi tiegħu fuq regoli speċifiċi dwar il-batteriji u l-kisjiet. Il-GTĊ naqas milli juri li l-istess eżenzjoni mit-taxxa tingħata abbażi ta’ kriterji oġġettivi, u ma ssottometta l-ebda evidenza biex jikkorrobora d-dikjarazzjonijiet tiegħu. Fi kwalunkwe każ, il-fatt li t-taxxa fuq il-konsum fiċ-Ċina tinkludi biss prodotti ta’ lussu u li jniġġsu ma jmurx kontra l-konklużjonijiet tal-Kummissjoni. Barra minn hekk, il-bażi legali għal din l-eżenzjoni tipprovdi b’mod espliċitu l-impożizzjoni tat-taxxa fuq il-konsum fuq xi tipi ta’ batteriji, iżda dan ma japplikax għat-tipi kollha, peress li teskludi minnha l-batteriji primarji tal-litju u l-batteriji tal-jon tal-litju (il-premessa (977) tar-Regolament provviżorju). Għalhekk, il-Kummissjoni qieset li kien hemm bosta evidenza li turi li dan is-sussidju huwa speċifiku. Għalhekk, din l-asserzjoni ġiet miċħuda.

(621)

Fin-nuqqas ta’ kummenti dwar is-sejbiet ta’ din l-investigazzjoni, il-konklużjoni misluta fil-premessa (980) ġiet ikkonfermata.

(622)

Minħabba l-istess raġunijiet bħal dawk imsemmija fil-premessa (619) ta’ dan ir-Regolament, il-GTĊ argumenta li ma setax ikun hemm speċifiċità skont it-tifsira tal-Artikolu 2.1 tal-Ftehim SCM. Wara d-divulgazzjoni finali, il-GTĊ qal ukoll li, għar-raġunijiet elenkati fil-premessa (619) ta’ dan ir-Regolament, ma jista’ jkun hemm l-ebda speċifiċità, u li l-Kummissjoni ma wrietx li dan is-sussidju jiġi pprovdut biss lil grupp limitat biżżejjed ta’ intrapriżi jew industriji.

(623)

Il-Kummissjoni qieset li l-bażi legali tal-programm kopert fit-Taqsima 3.8(6)(a) turi li l-batteriji huma soġġetti għal taxxa fuq il-konsum ta’ 4 %, iżda l-batteriji primarji tal-litju u l-batteriji tal-joni tal-litju huma eżentati mill-ġbir tat-taxxa fuq il-konsum, u jissodisfaw kemm il-kriterji stabbiliti fl-Artikolu 1.1(a)(1)(ii) kif ukoll fl-Artikolu 2.1 tal-Ftehim SCM. Għalhekk, il-Kummissjoni qieset dan is-sussidju bħala speċifiku.

(624)

Fin-nuqqas ta’ kummenti ulterjuri, il-konklużjoni misluta fil-premessa (981) ġiet ikkonfermata.

(625)

Wara d-divulgazzjoni provviżorja, il-BYD Group argumenta li l-Kummissjoni kkalkolat il-benefiċċju darbtejn għal xi xiri bejn il-kumpaniji ta’ pakketti ta’ batteriji. L-asserzjoni ġiet aċċettata u l-kalkoli nbidlu bix-xieraq.

(626)

Ir-rata ta’ sussidju riveduta stabbilita għal din l-iskema speċifika kienet ta’ 1,33 % għall-Grupp BYD.

(627)

Fin-nuqqas ta’ kummenti ulterjuri, il-konklużjonijiet misluta fil-premessi minn (982) sa (983) ġew ikkonfermati.

L-eżenzjoni mit-taxxa fuq il-konsum tal-batteriji

(628)

L-eżaminazzjoni individwali ta’ Tesla (Shanghai) wriet li jeżisti tnaqqis fl-EIT għall-industriji ewlenin, li jikkostitwixxi sussidju fil-forma ta’ dħul mitluf mill-GTĊ.

(629)

Il-bażi legali ta’ dan il-programm hija t-tħabbira tal-Amministrazzjoni Statali tat-Taxxa tal-Uffiċċju Muniċipali tal-Finanzi ta’ Shanghai tal-Kummissjoni Muniċipali Ekonomika u tat-Teknoloġija tal-Informazzjoni ta’ Shanghai, (Nru 70 tal-2020).

(630)

It-tħabbira tispeċifika b’mod ċar li r-rata mnaqqsa tat-taxxa fuq l-introjtu tal-intrapriżi hija riżervata għal intrapriżi industrijali ewlenin.

(631)

Wara l-eżaminazzjoni individwali ta’ Tesla (Shanghai), il-Kummissjoni sabet li Tesla (Shanghai) ikkwalifikat bħala intrapriża industrijali ewlenija matul il-perjodu ta’ investigazzjoni u kellha rata mnaqqsa ta’ EIT ta’ 15 %.

(632)

Il-Kummissjoni kienet tal-fehma li t-tpaċija tat-taxxa inkwistjoni hija sussidju skont it-tifsira tal-Artikolu 3(1)(a)(ii) u tal-Artikolu 3(2) tar-Regolament bażiku, minħabba li hemm kontribuzzjoni finanzjarja fil-forma ta’ dħul mitluf mill-GTĊ li tagħti benefiċċju lill-kumpaniji kkonċernati. Il-benefiċċju għar-riċevituri huwa ugwali għall-iffrankar tat-taxxa.

(633)

Tesla (Shanghai) asseriet li l-programm li jagħti rata tat-taxxa preferenzjali ta’ 15 % lil Tesla (Shanghai) issa ġie tterminat u li, għalhekk, ma jistax jiġi kkumpensat. Il-bażi legali sottostanti, u d-dikjarazzjoni tat-taxxa trimestrali tal-pagament antiċipat mill-ewwel trimestru tal-2023 u mill-ewwel trimestru tal-2024 ġew sottomessi bħala evidenza ta’ sostenn.

(634)

Il-Kummissjoni tenfasizza li, filwaqt li d-dikjarazzjoni trimestrali dwar it-taxxa fuq il-pagament antiċipat mill-ewwel trimestru tal-2024 turi li l-kumpanija hija soġġetta għal rata tat-taxxa ta’ 25 %, id-dikjarazzjonijiet tat-taxxa trimestrali ma humiex definittivi u huma relatati biss mal-prepagamenti. Għalhekk, dan ma jippreġudikax il-fatt li Tesla (Shanghai) tista’ terġa’ tingħata, fi stadju aktar tard u fuq bażi retroattiva, ir-rata tat-taxxa preferenzjali ta’ 15 %. Fil-fatt, l-evidenza sottomessa għall-għoti ta’ rata tat-taxxa preferenzjali ta’ 15 % lil Tesla (Shanghai) ġiet datata d-19 ta’ Jannar 2021, iżda kienet applikabbli b’mod retroattiv għal Tesla (Shanghai) mill-1 ta’ Jannar 2020 (102). Għalhekk, huwa raġonevoli li wieħed jassumi li Tesla (Shanghai) tista’ sussegwentement tingħata r-rata tat-taxxa preferenzjali ta’ 15 % b’applikazzjoni retroattiva. Minħabba n-nuqqas ta’ evidenza konklużiva li Tesla (Shanghai) ma terġax tkun eliġibbli għal din ir-rata tat-taxxa preferenzjali, l-asserzjoni ġiet miċħuda. Barra minn hekk, ir-rata tat-taxxa preferenzjali ta’ 15 % ingħatat f’konformità mad-dispożizzjonijiet inklużi fl-“Avviż tal-MIIT u l-Amministrazzjoni Statali tat-Tassazzjoni dwar il-Politiki tat-Taxxa Korporattiva fuq l-Introjtu għall-Industriji Ewlenin fiż-Żona l-Ġdida ta’ Lingang taż-Żona Pilota ta’ Kummerċ Ħieles taċ-Ċina (Shanghai)” (103) u f’konformità mar-rekwiżiti tal-“Miżuri Amministrattivi għar-Rikonoxximent tal-Kwalifiki tal-Politiki Preferenzjali tal-Introjtu għall-Industriji Ewlenin fiż-Żona l-Ġdida ta’ Lingang taż-Żona Pilota ta’ Kummerċ Ħieles taċ-Ċina (Shanghai)” (104). Ma hemm l-ebda evidenza li turi li Tesla (Shanghai) ma għadhiex tikkwalifika bħala industrija ewlenija fiż-Żona ta’ Lingang u li għalhekk ma tkunx eliġibbli għal ċikli sussegwenti ta’ politiki fiskali preferenzjali.

(635)

Wara d-divulgazzjoni finali, Tesla Shanghai sostniet li l-analiżi tal-Kummissjoni mwettqa fil-premessa (460) tad-Dokument ta’ Divulgazzjoni Ġenerali kienet bla bażi, peress li r-rata tat-taxxa preferenzjali ta’ 15 % ingħatat f’konformità mad-dispożizzjonijiet li jinsabu fl-“Avviż tal-MIIT u l-Amministrazzjoni Statali tat-Tassazzjoni dwar il-Politiki tat-Taxxa Korporattiva fuq l-Introjtu għall-Industriji Ewlenin fiż-Żona l-Ġdida ta’ Lingang taż-Żona Pilota ta’ Kummerċ Ħieles taċ-Ċina (Shanghai)”, li jiddikjaraw li l-intrapriżi legali kwalifikati huma soġġetti għal rata tat-taxxa preferenzjali ta’ 15 % għal 5 snin mid-data tal-istabbiliment. Peress li Tesla Shanghai ġiet stabbilita fl-2018, ir-rata tat-taxxa preferenzjali kienet applikabbli sal-2023. Fid-dawl ta’ dan, il-kumpanija sostniet li kien hemm evidenza konklużiva li l-kumpanija ma kinitx se terġa’ tkun eliġibbli għar-rata tat-taxxa preferenzjali skont l-iskema ta’ tnaqqis tal-EIT.

(636)

Il-Kummissjoni ma qablitx ma’ dawn l-asserzjonijiet u enfasizzat li l-kumpanija ma ssottomettiet l-ebda evidenza li turi li ma kinitx se terġa’ tibbenefika, fi kwalunkwe forma, minn politiki fiskali preferenzjali. Kif intwera matul l-investigazzjoni, il-kumpaniji differenti fil-kampjun ibbenefikaw minn skemi differenti tat-taxxa preferenzjali, bħat-tnaqqis tat-Taxxa fuq l-Introjtu tal-Intrapriżi (“EIT”, Enterprise Income Tax) għall-Intrapriżi tat-Teknoloġija Avvanzata u Ġdida (HNTEs, High and New Technology Enterprises) għall-BYD. Barra minn hekk, il-Kummissjoni fakkret li fl-investigazzjonijiet tal-passat, sabet li qegħdin jiġu estiżi ulterjorment każijiet ta’ skemi tat-taxxa simili (105). Għalhekk, l-asserzjoni ġiet miċħuda.

(637)

Barra minn hekk, Tesla Shanghai żiedet li, jekk din l-iskema tiġi kkumpensata, il-kalkolu jenħtieġ li jibbaża fuq id-dikjarazzjoni tat-taxxa matul il-perjodu ta’ investigazzjoni, minflok fuq id-dikjarazzjonijiet tat-taxxa tal-2022. Tesla Shanghai enfasizzat li, fil-perjodu ta’ investigazzjoni, kienu sootomessi d-dikjarazzjonijiet tat-taxxa qabel il-ħlas għall-ewwel tliet trimestri tal-2023 f’evidenza preċedenti, u għalhekk il-Kummissjoni jenħtieġ li tuża dik l-informazzjoni biex tikkalkula l-benefiċċju.

(638)

Il-Kummissjoni enfasizzat li, kif ġie spjegat fil-premessa (442) tad-Dokument ta’ Divulgazzjoni Ġenerali, fil-kalkolu tal-benefiċċji kollha tad-dħul mit-taxxa, il-Kummissjoni bbażat fuq id-dikjarazzjoni tat-taxxa fuq l-introjtu tal-2022, peress li l-benefiċċju derivat minn tali programmi jaqa’ fil-perjodu ta’ investigazzjoni (li jinkludi l-aħħar trimestru tal-2022). Dan sar ukoll għal skemi oħrajn tat-taxxa. Approċċ differenti kien iwassal ukoll għal diskriminazzjoni bejn il-produtturi esportaturi inklużi fil-kampjun u Tesla Shanghai, li ngħatat eżami individwali, u li ż-żjara ta’ verifika tagħha saret xhur wara ż-żjarat ta’ verifika tal-produtturi esportaturi inklużi fil-kampjun. Barra minn hekk, il-Kummissjoni fakkret li ż-żjarat ta’ verifika tal-produtturi esportaturi inklużi fil-kampjun saru qabel il-verifika f’Tesla Shanghai, u għalhekk id-dikjarazzjonijiet tat-taxxa definittivi tagħhom għall-2023 kienu għadhom ma humiex disponibbli. Għalhekk, l-asserzjoni ġiet miċħuda.

(639)

Dan is-sussidju huwa speċifiku skont it-tifsira tal-Artikolu 4(2)(a) tar-Regolament bażiku minħabba li l-leġiżlazzjoni nnifisha tillimita l-applikazzjoni ta’ din l-iskema għal ċerti intrapriżi ewlenin biss li jkunu qegħdin joperaw f’ċertu qasam stabbilit mill-Istat. Tesla (Shanghai) ġiet identifikata b’mod ċar fil-lista ta’ kumpaniji eliġibbli.

(640)

Għalhekk, il-leġiżlazzjoni li skontha topera l-awtorità awtorizzanti, tillimita b’mod espliċitu l-aċċess għal sussidju għal ċertu settur u reġjun ġeografiku.

(641)

L-ammont ta’ sussidju kumpensatorji ġie kkalkolat f’termini tal-benefiċċju mogħti lir-riċevituri matul il-perjodu ta’ investigazzjoni. Dan il-benefiċċju ġie kkalkolat bħala d-differenza bejn it-taxxa totali pagabbli skont ir-rata normali tat-taxxa u t-taxxa totali pagabbli skont ir-rata mnaqqsa tat-taxxa.

(642)

Ir-rata ta’ sussidju stabbilita għal din l-iskema speċifika kienet ta’ 0,66 % għal Tesla (Shanghai).

It-tnaqqis fl-EIT għall-industriji ewlenin

(643)

Wara d-divulgazzjoni provviżorja, il-Grupp SAIC ma qabilx mal-applikazzjoni tal-Artikolu 28 tar-Regolament bażiku għall-kumpaniji tar-riċerka u l-iżvilupp li ma pprovdewx risposti għall-kwestjonarju kif imsemmi fil-premessi minn (985) sa (988) tar-Regolament provviżorju. Huwa argumenta li l-applikazzjoni tal-fatti disponibbli kien jenħtieġ li tkun ibbażata fuq kumpanija tar-riċerka u l-iżvilupp tal-Grupp SAIC. B’mod partikolari, huwa argumenta li l-kumpanija vverifikata tal-Grupp SAIC ma kinitx ibbenefikat mill-istess skemi ta’ sussidju bħall-kumpaniji tal-Grupp Geely li l-Kummissjoni użat bħala fatti disponibbli. Huwa argumenta wkoll li l-kumpanija tal-Grupp SAIC li pprovdiet tweġiba għall-kwestjonarju rrapportat kif xieraq l-ammont ta’ programmi ta’ għotja bbażati fuq il-kontijiet tagħha.

(644)

Fir-rigward tal-fornitur tal-input li naqas milli jipprovdi tweġiba għall-kwestjonarju, il-Grupp SAIC argumenta wkoll li l-Kummissjoni jenħtieġ li ssegwi approċċ simili għall-kumpaniji tar-riċerka u l-iżvilupp kif stabbilit fil-premessa (989) tar-Regolament provviżorju, jiġifieri li taġġusta l-ammonti tas-sussidju (i) għall-finanzjament preferenzjali; (ii) għall-programmi ta’ għotjiet; u (iii) għall-għoti ta’ drittijiet għall-użu tal-art għal remunerazzjoni anqas minn adegwata.

(645)

Kif diġà ntqal fil-premessa (988) tar-Regolament provviżorju, il-Kummissjoni setgħet tivverifika biss parzjalment l-informazzjoni sottomessa mill-kumpanija relatata tar-riċerka u l-iżvilupp li pprovdiet tweġiba għall-kwestjonarju. Għalhekk, il-Kummissjoni qieset li din l-informazzjoni ma kinitx affidabbli biex tintuża bħala bażi għall-applikazzjoni tal-fatti disponibbli fir-rigward tal-kumpaniji l-oħrajn tar-riċerka u l-iżvilupp. Il-Kummissjoni ddeċidiet li tibbaża fuq l-ammont ta’ sussidjar stabbilit għall-kumpaniji verifikati tar-riċerka u l-iżvilupp fi ħdan il-Grupp Geely bħala fatti raġonevoli disponibbli. B’hekk, hija qieset li jekk wieħed jibbaża fuq l-informazzjoni parzjalment verifikata ta’ kumpanija waħda biss tar-riċerka u l-iżvilupp fil-Grupp SAIC mingħajr ma jkollu informazzjoni dwar il-kumpaniji tar-riċerka u l-iżvilupp li ma pprovdewx tweġiba għall-kwestjonarju, dan ma jkunx rappreżentattiv biex jiġi stabbilit l-ammont ta’ sussidjar. Il-Grupp SAIC ma weriex kif l-użu ta’ dawk il-fatti jkun manifestament mhux xieraq. Għalhekk, din l-asserzjoni ġiet miċħuda. Minħabba dawn l-istess raġunijiet, il-Kummissjoni ċaħdet ukoll id-dikjarazzjoni tal-Grupp SAIC rigward dan il-fornitur tal-input.

(646)

Fin-nuqqas ta’ kummenti ulterjuri, il-Kummissjoni kkonfermat is-sejbiet tagħha kif ippreżentati fil-premessi minn (985) sa (989) tar-Regolament provviżorju.

(647)

Ir-rata ta’ sussidju stabbilita għal din l-iskema speċifika kienet ta’ 0,62 % għall-Grupp SAIC.

(648)

Fin-nuqqas ta’ elementi ġodda rigward il-programmi elenkati fil-premessa (990) tar-Regolament provviżorju, u bħala kwistjoni ta’ ekonomija amministrattiva, il-Kummissjoni ma qisitx li huwa xieraq li tikkonkludi dwar il-kumpensabbiltà ta’ dawn il-programmi. Dan huwa mingħajr preġudizzju għall-eżaminazzjoni tal-Kummissjoni ta’ dawk il-miżuri fl-okkażjoni ta’ rieżamijiet futuri.

(649)

Wara d-divulgazzjoni provviżorja, il-Grupp SAIC asserixxa li l-Kummissjoni kienet iddevjat mill-prattika stabbilita tagħha meta allokat 100 % tal-allegati skemi ta’ sussidju pprovduti mill-kumpaniji azzjonarji/finanzjarji u minn ċerti entitajiet ta’ bejgħ domestiku biex tikkalkula l-ammont totali tal-benefiċċju.

(650)

Il-Grupp SAIC iddikjara li l-awtorità investigattiva kellha r-responsabbiltà li twettaq valutazzjonijiet pass-through akkurati u realistiċi biex tiżgura, f’konformità mal-Artikolu 1 tar-Regolament bażiku, li “jista’ jkun impost dazju kumpensatorju għat-tpaċija ta’ kwalunkwe sussidju mogħti, direttament jew indirettament, għall-manifattura, il-produzzjoni, l-esportazzjoni jew it-trasport ta’ kwalunkwe prodott li r-rilaxx tiegħu għaċ-ċirkolazzjoni libera fl-Unjoni jikkawża dannu”. Tabilħaqq, kwalunkwe sussidju mogħti għall-manifattura, għall-produzzjoni, għall-esportazzjoni jew għat-trasport ta’ kwalunkwe prodott li ma ġiex rilaxxat għaċ-ċirkolazzjoni libera fl-UE ma jistax jiġi kkumpensat. Dan kien jirrikjedi li l-Kummissjoni tistabbilixxi liema parti minn allegat sussidju kienet ta’ benefiċċju għall-prodott esportat u liema parti mill-allegat sussidju kienet ta’ benefiċċju għal prodotti oħrajn, u li turi wkoll li r-riċevitur tas-sussidju (fejn huwa differenti mill-produttur esportatur) għadda l-benefiċċju lill-produttur esportatur matul il-perjodu ta’ investigazzjoni (106). Il-Grupp SAIC stqarr b’mod partikolari li l-ammont mgħoddi jenħtieġ li jkun limitat għall-perċentwal tal-parteċipazzjoni azzjonarja li finalment għandu l-Grupp SAIC. Konsegwentement, il-Grupp SAIC asserixxa li l-kontribuzzjonijiet finanzjarji mogħtija lil:

(651)

Wara d-divulgazzjoni finali, il-Grupp SAIC tenna li l-analiżi dwar l-impriżi konġunti u l-valutazzjonijiet tal-kumpaniji relatati jenħtieġ li tiġi evalwata mill-ġdid. Qal ukoll li l-Kummissjoni jenħtieġ li l-ewwel tiddetermina x’inhi l-“informazzjoni nieqsa” u tapplika l-fatti disponibbli skont l-Artikolu 28 tal-BASR. F’dan ir-rigward, il-Grupp SAIC talab li jsir eżami tal-livell ta’ nuqqasijiet fuq bażi ta’ kumpanija b’kumpanija. Imbagħad, il-Kummissjoni jenħtieġ li tiddetermina l-ammont ta’ benefiċċju mgħoddi.

(652)

Il-Kummissjoni kkonfermat il-valutazzjoni tagħha li saret fl-istadju provviżorju. L-ewwel nett, kif issemma fil-premessa (337) u (338) tar-Regolament provviżorju u kif intwera fl-ittra mibgħuta lill-Grupp SAIC fl-ittra tal-15 ta’ Frar 2024 (107), il-Kummissjoni pprovdiet valutazzjoni ta’ kumpanija b’kumpanija tal-informazzjoni li kienet nieqsa u tat lill-Grupp SAIC l-opportunità li jipprovdi l-informazzjoni nieqsa. Madankollu, il-Grupp SAIC qagħad lura milli jipprovdi tali informazzjoni nieqsa. Barra minn hekk, il-Kummissjoni qieset li, fid-dawl tar-relazzjoni fost il-kumpaniji fi ħdan il-Grupp SAIC, ma kinitx meħtieġa analiżi “pass through”; minflok, il-Kummissjoni kellha bżonn tuża metodu ta’ allokazzjoni kif suppost fir-rigward tas-sussidji minħabba li l-flus huma funġibbli u jistgħu jiġu ttrasferiti minn entità relatata għal oħra irrispettivament mis-suq fejn ikun qiegħed isir il-bejgħ. Barra minn hekk, fil-kalkolu tal-perċentwal ta’ sussidjar allokat għall-prodott ikkonċernat (skema ta’ allokazzjoni), il-Kummissjoni fil-fatt diġà eżaminat is-sitwazzjoni individwali ta’ kull kumpanija fil-grupp. Għall-kumpaniji li jipprovdu servizzi finanzjarji fi ħdan il-Grupp SAIC, il-Kummissjoni qieset l-attivitajiet ta’ dawn il-kumpaniji finanzjarji fi ħdan il-grupp. Fir-rigward tat-tranżazzjonijiet domestiċi, il-Kummissjoni qieset il-fatturat rilevanti korrispondenti li kien jinkludi wkoll il-fatturat ta’ kumpaniji li joperaw esklużivament fis-suq domestiku Ċiniż. Fuq din il-bażi, din l-asserzjoni ġiet miċħuda.

(653)

Wara d-divulgazzjoni provviżorja, il-Kummissjoni kkoreġiet il-fatturat tal-Grupp SAIC użat għall-allokazzjoni xierqa tas-sussidji li nstabu sabiex tikkalkula l-ammont ta’ sussidjar tal-Grupp. Id-dettalji ġew ipprovduti fid-divulgazzjoni speċifika tal-20 ta’ Awwissu 2024 lill-kumpanija.

(654)

Wara d-divulgazzjoni finali, il-Kummissjoni kkoreġiet ulterjorment il-fatturat tal-Grupp SAIC billi inkludiet il-fatturat iġġenerat minn fergħat oħrajn f’waħda mill-kumpaniji esportaturi. Id-dettalji ġew ipprovduti fid-divulgazzjoni speċifika tad-9 ta’ Settembru 2024 lill-kumpanija.

(655)

Wara d-divulgazzjoni provviżorja, il-Kummissjoni kkoreġiet il-valur tal-bejgħ tal-Grupp Geely lill-Unjoni użat għall-allokazzjoni xierqa tas-sussidji li nstabu sabiex jiġi kkalkolat l-ammont ta’ sussidjar tal-Grupp. Id-dettalji ġew ipprovduti fid-divulgazzjoni speċifika lill-kumpanija.

(656)

Wara d-divulgazzjoni provviżorja, il-Grupp Geely implika li l-fatturat tal-fornituri, tal-kumpaniji tar-riċerka u l-iżvilupp, tal-kumpaniji tal-bejgħ u tal-kumpaniji ta’ finanzjament jenħtieġ li jiġi inkluż fil-fatturat totali biex jiġi stabbilit l-ammont totali tal-benefiċċju.

(657)

Il-Kummissjoni, kif ġie spjegat fid-divulgazzjoni provviżorja, innotat li bħala l-ewwel pass, l-ammont ikkalkolat ta’ sussidjar għal kull kumpanija relatata kien ġie allokat għall-prodott ikkonċernat abbażi tal-kategorija tal-kumpanija jew tal-ispeċifiċità tal-linja ta’ sussidju. Konsegwentement, ġie applikat il-proporzjon tal-fatturat għas-subassemblaturi, għall-kumpaniji tar-riċerka u l-iżvilupp u għall-kumpaniji tal-bejgħ. Fit-tieni pass, il-benefiċċju għall-Grupp Geely ġie espress f’termini tal-fatturat tal-BEVs tal-produtturi esportaturi/domestiċi fil-Grupp Geely—speċifikament, il-fatturat tal-BEVs lil klijenti mhux relatati mibjugħa permezz ta’ entitajiet relatati tal-Grupp Geely. Għalhekk, l-asserzjoni ġiet miċħuda.

(658)

Wara d-divulgazzjoni finali, il-GTĊ u l-GWM indikaw li r-rata tad-dazju applikabbli għal kumpaniji mhux inklużi fil-kampjun li kkooperaw żdiedet wara d-divulgazzjoni provviżorja, filwaqt li r-rati tad-dazju għall-kumpaniji inklużi fil-kampjun naqsu.

(659)

Wara d-divulgazzjoni provviżorja, il-Kummissjoni nnotat li l-kalkolu tar-rata tad-dazju medja ponderata applikabbli għal kumpaniji mhux inklużi fil-kampjun li kkooperaw ma kienx korrett peress li ma qiesx il-kumpaniji li kkooperaw inklużi fil-kampjun kif xieraq għal ċerti skemi. Konsegwentement, il-Kummissjoni lestiet korrezzjoni teknika li wasslet għal żieda fid-dazju applikabbli għal kumpaniji mhux inklużi fil-kampjun li kkooperaw (kumpaniji oħrajn li kkooperaw).

(660)

Wara d-divulgazzjoni finali, il-GTĊ talab lill-Kummissjoni tiddivulga l-bażi fattwali sottostanti għar-rata ta’ sussidju stabbilita għall-kumpaniji li kkooperaw mhux inklużi fil-kampjun meta jitqies li l-fatti disponibbli ġew applikati għall-kalkolu tal-ammont ta’ sussidjar għas-SAIC.

(661)

F’konformità mal-Artikolu 15(3) tar-Regolament bażiku, l-ammont ta’ sussidju totali għall-produtturi esportaturi li kkooperaw mhux inklużi fil-kampjun ġie kkalkulat abbażi tal-ammont medju ponderat totali ta’ sussidji kumpensatorji stabbiliti għall-produtturi esportaturi li kkooperaw fil-kampjun bl-esklużjoni ta’ ammonti negliġibbli kif ukoll l-ammonti ta’ sussidji stabbiliti fiċ-ċirkostanzi msemmija fl-Artikolu 28(1) tar-Regolament bażiku. Madankollu, il-Kummissjoni ma injoratx is-sejbiet parzjalment ibbażati fuq il-fatti disponibbli biex tiddetermina dawk l-ammonti. Tabilħaqq, il-Kummissjoni tqis li l-fatti disponibbli użati f’dawk il-każijiet ma affettwawx sostanzjalment l-informazzjoni meħtieġa biex jiġi ddeterminat l-ammont ta’ sussidjar b’mod raġonevoli, sabiex l-esportaturi li ma kinux mitluba jikkooperaw fl-investigazzjoni ma jiġux preġudikati bl-użu ta’ dan l-approċċ (108). B’mod partikolari, il-Kummissjoni osservat li l-istrumenti finanzjarji bħall-ABS jew il-bonds li bbażat fuqhom biex tikkalkula l-benefiċċju derivat minn tali skemi ntużaw b’mod wiesa’ mill-industrija tal-BEV b’mod ġenerali u mhux eċċezzjonali. Li kieku l-produtturi esportaturi rrapportaw tali informazzjoni lill-Kummissjoni meta kkooperaw bis-sħiħ, il-Kummissjoni kienet tittratta l-informazzjoni b’mod simili f’termini ta’ kalkolu tal-marġni ta’ sussidju.

(662)

Dan ifisser li biex tiġi kkalkulata r-rata ta’ sussidju għall-produtturi esportaturi li kkooperaw mhux inklużi fil-kampjun, ir-rati ta’ sussidju stabbiliti għall-forniment ta’ batteriji għal remunerazzjoni anqas minn dik adegwata, u s-sussidjar fir-rigward ta’ kumpaniji li ma kkooperawx għall-Grupp SAIC, u l-għotjiet diretti pprovduti lill-Grupp Geely u lill-Grupp SAIC ma ġewx ikkunsidrati.

(663)

Wara d-divulgazzjoni finali, il-Kumpanija 24, il-GTĊ u l-VDA argumentaw li r-rata ta’ sussidju medja ponderata stabbilita għall-kumpaniji li kkooperaw mhux inklużi fil-kampjun jenħtieġ li tinkludi wkoll ir-rata ta’ sussidju ta’ Tesla (Shanghai), minħabba li kienet l-akbar produttur esportatur tal-BEVs Ċiniżi matul u wara l-PI. Skont il-GTĊ, l-inklużjoni tar-rata ta’ sussidju ta’ Tesla (Shanghai) fil-kalkolu tar-rata tad-dazju tas-sussidju medja ponderata għall-kumpaniji li kkooperaw mhux inklużi fil-kampjun ma tkunx inkonsistenti mal-Artikolu 15(3) tar-Regolament bażiku.

(664)

Il-Kumpanija 24 argumentat b’mod partikolari li d-dispożizzjonijiet tal-Artikolu 27(1) tar-Regolament bażiku ma jeskludux li l-fatt li produttur esportatur ma jintgħażilx inizjalment jista’ sussegwentement jifforma parti mill-kampjun. Din il-parti argumentat li l-kampjunar jiġi applikat biex l-investigazzjoni tiġi limitata għal għadd raġonevoli ta’ partijiet, prodotti jew tranżazzjonijiet jew għall-akbar volum rappreżentattiv ta’ produzzjoni, bejgħ jew esportazzjonijiet li jista’ jiġi investigat b’mod raġonevoli fiż-żmien disponibbli. Skont din il-parti, meta jingħata eżami individwali skont l-Artikolu 27(3) tar-Regolament bażiku, il-Kummissjoni tista’ tistabbilixxi s-sejbiet tagħha fir-rigward tal-akbar volum possibbli ta’ produzzjoni, bejgħ jew esportazzjonijiet li jistgħu jiġu investigati fiż-żmien disponibbli u b’hekk tinkludi lil Tesla (Shanghai) fil-kalkolu tal-marġni tas-sussidju medju ponderat.

(665)

Il-Kummissjoni ma kkontestatx il-fatt li Tesla (Shanghai) kienet wieħed mill-akbar produtturi esportaturi. Madankollu, kif huwa stabbilit fil-premessi (57) u (59) tar-Regolament provviżorju, il-Kummissjoni qieset l-għażla tagħha tal-kampjun ta’ tliet gruppi esportaturi differenti bħala l-akbar volum rappreżentattiv li jista’ jiġi investigat b’mod raġonevoli fiż-żmien disponibbli, li għalih ma eżaminatx biss iċ-ċifri assoluti tal-produzzjoni, tal-bejgħ, u tal-esportazzjonijiet, iżda qieset għadd ta’ elementi addizzjonali biex tivvaluta r-rappreżentattività tal-kampjun, inklużi l-varjetà ta’ mudelli ta’ BEV mibjugħa f’segmenti tas-suq differenti, ir-rappreżentattività tal-kumpaniji/gruppi f’termini ta’ eliġibbiltà potenzjali tal-iskemi inklużi fil-Memorandum dwar is-suffiċjenza ta’ evidenza, u l-kapaċità ta’ produzzjoni ġenerali inkluża l-kapaċità ta’ riżerva abbażi tal-informazzjoni pprovduta fil-formola ta’ kampjunar. Minn dan isegwi li għall-kuntrarju ta’ dak li asserixxa l-GTĊ, il-kampjun fl-investigazzjonijiet dwar is-sussidji b’mod ġenerali u f’din l-investigazzjoni speċifika huwa bbażat ukoll fuq fatturi oħrajn għajr il-volumi tal-produzzjoni jew tal-esportazzjoni bħar-rappreżentattività tas-sussidjar u mhux (biss jew prinċipalment) fuq il-volumi. Din l-investigazzjoni kkonfermat li Tesla (Shanghai) hija kumpanija unika li ma hijiex rappreżentattiva tal-livell ta’ sussidjar ta’ produtturi oħrajn tal-BEV fiċ-Ċina.

(666)

Fir-rigward tal-asserzjoni speċifika tal-Kumpanija 24, il-Kummissjoni qieset li l-Artikolu 27(1) jipprevedi li l-kampjunar jista’ jiġi applikat meta l-għadd ta’ esportaturi jkun kbir, li kien il-każ abbażi tal-għadd ta’ risposti li waslu meta ntgħażel il-kampjun. Barra minn hekk, kif stabbilit fil-premessi (57) u (59) tar-Regolament provviżorju, il-Kummissjoni qieset l-għażla tagħha tal-kampjun ta’ tliet gruppi esportaturi differenti bħala l-akbar volum rappreżentattiv li seta’ jiġi investigat b’mod raġonevoli fiż-żmien disponibbli. Il-fatt li Tesla (Shanghai), l-unika kumpanija li talbet dan, ingħatat eżami individwali skont l-Artikolu 27(3), minħabba li l-eżami tagħha ma kienx meqjus bħala ta’ piż mhux xieraq, ma jibdilx il-konklużjoni li l-kampjunar kien rappreżentattiv. Barra minn hekk, id-dispożizzjonijiet tal-Artikolu 27(3) ma jipprevedux l-inklużjoni fil-kampjun ta’ kumpaniji li ngħataw eżami individwali.

(667)

Abbażi ta’ dan, din qieset li l-kampjun kien ukoll l-aktar wieħed rappreżentattiv li għandu jintuża biex jiġi kkalkulat id-dazju għall-partijiet li kkooperaw mhux inklużi fil-kampjun, f’konformità mal-Artikolu 15(3) tar-Regolament bażiku u ċaħdet l-asserzjoni.

(668)

Abbażi tal-informazzjoni disponibbli, il-Kummissjoni kkalkulat l-ammont ta’ sussidji kumpensabbli għall-produtturi esportaturi inklużi fil-kampjun f’konformità mad-dispożizzjonijiet tar-Regolament bażiku billi eżaminat kull sussidju jew programm ta’ sussidju, u għamlet total ta’ dawn iċ-ċifri biex tikkalkula ammont totali ta’ sussidjar għal kull grupp ta’ produtturi esportaturi għall-perjodu ta’ investigazzjoni. Biex tikkalkula s-sussidjar ġenerali ta’ hawn taħt, il-Kummissjoni l-ewwel ikkalkulat il-perċentwal ta’ sussidjar, li huwa l-ammont ta’ sussidju bħala perċentwal tal-fatturat totali tal-kumpanija. Imbagħad, dan il-perċentwal intuża biex jiġi kkalkulat is-sussidju allokat għall-esportazzjonijiet tal-prodott ikkonċernat lejn l-Unjoni matul il-perjodu ta’ investigazzjoni. Imbagħad ġie kkalkulat l-ammont ta’ sussidju għal kull biċċa tal-prodott ikkonċernat esportat lejn l-Unjoni matul il-perjodu ta’ investigazzjoni, u r-rati ta’ hawn taħt ġew ikkalkulati bħala perċentwal tal-valur tal-Kostijiet, tal-Assigurazzjoni u tal-Merkanzija (“CIF”) tal-istess esportazzjonijiet għal kull biċċa.

(669)

F’konformità mal-Artikolu 15(3) tar-Regolament bażiku, l-ammont ta’ sussidju totali għall-produtturi esportaturi li kkooperaw mhux inklużi fil-kampjun ġie kkalkulat abbażi tal-ammont medju ponderat totali ta’ sussidji kumpensatorji stabbiliti għall-produtturi esportaturi li kkooperaw fil-kampjun bl-esklużjoni ta’ ammonti negliġibbli kif ukoll l-ammonti ta’ sussidji stabbiliti fiċ-ċirkostanzi msemmija fl-Artikolu 28(1) tar-Regolament bażiku. Madankollu, il-Kummissjoni ma inkludietx l-ammont ta’ sussidji kumpensatorji fil-kalkolu medju ponderat għal dawk l-iskemi u l-kumpaniji fejn is-sejbiet kienu parzjalment ibbażati fuq il-fatti disponibbli biex jiġu ddeterminati dawk l-ammonti, kif ġie stabbilit fil-premessa (661) ta’ dan ir-Regolament.

(670)

Wara d-divulgazzjoni finali, il-GTĊ talab lill-Kummissjoni tiddivulga l-bażi sottostanti għar-rata ta’ sussidju għall-kumpaniji li kkooperaw mhux inklużi fil-kampjun. Il-Kummissjoni spjegat il-kalkolu tagħha tal-medja ponderata fil-premessa (661) ta’ dan ir-Regolament. Barra minn hekk, il-Kummissjoni pprovdiet ukoll verżjoni mhux kunfidenzjali tal-kalkolu sottostanti. F’konformità mal-Artikolu 29(4), il-Kummissjoni użat meded għall-valuri CIF sabiex tipproteġi l-kunfidenzjalità tad-data pprovduta mill-produtturi esportaturi inklużi fil-kampjun.

(671)

Fuq il-bażi ta’ dak li ntqal hawn fuq, ir-rati tad-dazji kumpensatorji definittivi, espressi fuq il-prezz CIF tal-fruntiera tal-Unjoni, bid-dazju doganali mhux imħallas, jenħtieġ li jkunu kif ġej: