(1)

Ir-Regolament (UE) 2015/2283 jipprevedi li l-ikel il-ġdid awtorizzat u inkluż fil-lista tal-Unjoni tal-ikel ġdid biss jista’ jiġi introdott fis-suq fl-Unjoni.

(2)

Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni tal-ikel ġdid.

(3)

Il-lista tal-Unjoni stabbilita fl-Anness tar-Regolament ta’ Implimentazzjoni (UE) 2017/2470 tinkludi t-trab tal-faqqiegħ li fih il-vitamina D2 bħala ikel ġdid awtorizzat.

(4)

Ir-Regolament ta’ Implimentazzjoni tal-Kummissjoni (UE) 2021/2079 (3) awtorizza l-introduzzjoni fis-suq tat-trab tal-faqqiegħ li fih il-vitamina D2 bħala ikel ġdid biex jintuża f’għadd ta’ tipi ta’ ikel.

(5)

Fid-29 ta’ Marzu 2024, il-kumpanija MBio, Monaghan Mushrooms (“l-applikant”) issottomettiet applikazzjoni lill-Kummissjoni f’konformità mal-Artikolu 10(1) tar-Regolament (UE) 2015/2283 biex jinbidlu l-ispeċifikazzjonijiet tal-ikel ġdid trab tal-faqqiegħ li fih il-vitamina D2. L-applikant talab li tiġi estiża l-medda awtorizzata ta’ konċentrazzjonijiet ta’ vitamina D2 fit-trab tal-faqqiegħ li fih il-vitamina D2 biex jiġu inklużi konċentrazzjonijiet aktar baxxi u biex jiġu riveduti l-livelli awtorizzati ta’ karboidrati, jitħassru l-livelli massimi differenti għall-“karboidrati” u l-“fibri totali” u jiġi stabbilit livell massimu uniku għall-karboidrati totali.

(6)

L-applikant iġġustifika t-talba għal din ir-reviżjoni billi indika li l-livelli attwali awtorizzati ta’ kontenut ta’ vitamina D2 (580-595 μg/g ta’ trab tal-faqqiegħ) huma ristretti ħafna. Bħala riżultat tal-esperjenza kummerċjali sussegwenti u l-fehim tal-ħtiġijiet tal-klijenti, deher ċar li fil-prattika huma meħtieġa formulazzjonijiet inqas konċentrati, peress li jippermettu l-inklużjoni aktar faċli fl-applikazzjonijiet tal-prodotti finali. Il-medda mitluba ta’ vitamina D2, jiġifieri 137,5-595 μg/g ta’ piż xott, se tiffaċilita ż-żieda affidabbli ma’ varjetà ta’ ikel u se tippermetti li l-vitamina D tiżdied b’mod aktar preċiż fil-konċentrazzjonijiet finali meħtieġa. Il-proċess tal-produzzjoni jibqa’ l-istess fir-rigward tal-karatteristiċi fundamentali tiegħu: it-tul tal-mewġa ta’ dawl UV jibqa’ fil-medda awtorizzata; il-konċentrazzjoni ta’ vitamina D fit-trab hija ddeterminata mid-durata tal-esponiment għad-dawl UV. Il-produzzjoni ta’ konċentrazzjonijiet aktar baxxi tinvolvi inqas esponiment għad-dawl UV mill-konċentrazzjoni ogħla eżistenti. Biex jiġu ssodisfati l-ħtiġijiet tal-klijenti u tal-utenti finali dwar iż-żieda preċiża u konsistenti tal-vitamina D mal-prodotti tal-ikel finali, il-konsistenza tat-trab ittrattat hija żgurata permezz ta’ taħlit bir-reqqa ma’ proporzjonijiet xierqa ta’ trab tal-faqqiegħ li ma jkunx ġie trattat bil-UV. It-trab tal-faqqiegħ mhux ittrattat użat għal dan l-għan huwa identiku għat-trab ittrattat, għajr għan-nuqqas ta’ vitamina D, u b’hekk jiġi eliminat kwalunkwe riskju possibbli li kieku jista’ jiġi assoċjat mal-użu ta’ materjal ta’ taħlit li ma jkunx faqqiegħ. Fir-rigward tat-talba biex jiġi stabbilit livell massimu uniku għall-karboidrati totali, l-applikant jindika li dan il-livell ikun jinkludi ż-żewġ livelli separati speċifikati fl-awtorizzazzjoni attwali, b’mod partikolari “karboidrati” u “fibri totali” li għandhom limiti stretti ħafna. Għalhekk, l-applikant jipproponi li l-limiti eżistenti tal-kontenut ta’ karboidrati u fibri totali jiġu sostitwiti b’limitu uniku għall-karboidrati totali ta’ mhux aktar minn 60 %. Barra minn hekk, l-applikant iqis li dan l-approċċ ikollu benefiċċji prattiċi li jeliminaw l-inċertezza madwar id-determinazzjoni separata tal-fibri totali u l-karboidrati. L-applikant jindika wkoll li trabijiet oħra simili u approvati tal-faqqiegħ li fihom il-vitamina D2 għandhom limiti inqas ristrettivi fuq il-karboidrati. F’dak il-kuntest, il-limitu propost ta’ mhux aktar minn 60 % tal-karboidrati totali, ma huwiex mingħajr preċedent.

(7)

Il-Kummissjoni tqis li l-aġġornament mitlub tal-lista tal-Unjoni dwar il-bidla tal-ispeċifikazzjonijiet tat-trab tal-faqqiegħ li fih il-vitamina D2 proposta mill-applikant, mhuwiex mistenni li jkollu effett fuq is-saħħa tal-bniedem u li mhijiex meħtieġa evalwazzjoni tas-sikurezza mill-Awtorità Ewropea dwar is-Sigurtà fl-Ikel (“l-Awtorità”) f’konformità mal-Artikolu 10(3) tar-Regolament (UE) 2015/2283. Il-bidla mitluba tal-ispeċifikazzjonijiet tikkonċerna livelli aktar baxxi tal-kontenut ta’ vitamina D2 minn dawk ivvalutati preċedentament mill-Awtorità bħala sikuri u li appoġġaw l-awtorizzazzjoni tat-trab tal-faqqiegħ li fih il-vitamina D2 skont ir-Regolament (UE) 2021/2079. Barra minn hekk, il-bidliet fil-proċess tal-produzzjoni ma jaffettwawx is-sikurezza tal-ikel ġdid. Barra dan, il-bidla mitluba li tikkonsisti fl-iffissar ta’ limitu uniku għall-karboidrati totali, tikkombina biss tnejn mill-parametri li huma attwalment awtorizzati u għalhekk ma taffettwax is-sikurezza tal-ikel ġdid.

(8)

L-informazzjoni pprovduta fl-applikazzjoni tagħti biżżejjed raġunijiet biex jiġi stabbilit li l-bidliet fl-ispeċifikazzjonijiet tal-ikel ġdid huma f’konformità mal-kundizzjonijiet tal-Artikolu 12 tar-Regolament (UE) 2015/2283 u jenħtieġ li jiġu approvati.

(9)

Għalhekk, jenħtieġ li l-Anness tar-Regolament ta’ Implimentazzjoni (UE) 2017/2470 jiġi emendat kif xieraq.

(10)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,