(1)

Matul is-sajf tal-2024, il-Bulgarija kienet affettwata minn avvenimenti klimatiċi avversi ta’ kobor bla preċedent, jiġifieri temperaturi sħan mhux tas-soltu flimkien ma’ kundizzjonijiet persistenti ta’ nixfa li affettwaw b’mod sever il-produzzjoni tal-għelejjel miżrugħa fir-rebbiegħa, speċjalment il-qamħirrum u l-ġirasol, kif ukoll nirien bla preċedent li affettwaw il-produzzjoni agrikola fiż-żoni milquta.

(2)

Matul it-tieni nofs tax-xahar ta’ April 2024, partijiet mill-Ġermanja kienu affettwati minn avveniment klimatiku avvers ta’ kobor bla preċedent, jiġifieri l-ġlata, li għamlet ħsara sinifikanti lill-ġonna bis-siġar tal-frott u lid-dwieli u għalhekk il-produzzjoni ta’ ċertu frott u nbid.

(3)

Matul ix-xahar ta’ Lulju u fil-bidu tax-xahar ta’ Awwissu 2024, partijiet mill-Estonja kienu affettwati minn avvenimenti klimatiċi avversi ta’ kobor bla preċedent, jiġifieri avvenimenti estremament intensi ta’ xita u għargħar, li kienu preċeduti minn kundizzjonijiet klimatiċi avversi straordinarji matul ix-xitwa u r-rebbiegħa tal-2024. Il-ġlata u l-kesħa kbira, b’temperaturi kesħin rekord matul ix-xhur ta’ Diċembru 2023 u Jannar 2024, kienu segwiti minn temperaturi sħan mhux tas-soltu minn Marzu 2024, li wasslu għal kundizzjonijiet ta’ nixfa, u wara minn avvenimenti ta’ ġlata fil-bidu ta’ Mejju 2024 u silġ fil-bidu ta’ Ġunju 2024. Dawn il-kundizzjonijiet klimatiċi straordinarji li jvarjaw affettwaw il-produzzjoni tal-għelejjel, b’mod partikolari l-patata, iż-żerriegħa tal-kolza u l-frott u l-ħxejjex.

(4)

Matul l-ewwel nofs tal-2024, partijiet tal-Italja kienu affettwati minn kundizzjonijiet klimatiċi avversi ta’ kobor bla preċedent. Ġew irreġistrati temperaturi sħan mhux tas-soltu u kundizzjonijiet ta’ nixfa fil-parti tan-Nofsinhar tal-pajjiż u fil-gżejjer li affettwaw b’mod sever il-produzzjoni tal-frott u l-ħxejjex, l-inbid u l-uċuħ tar-raba’, b’mod partikolari s-setturi taċ-ċereali.

(5)

Matul ix-xahar ta’ Lulju 2024, partijiet mir-Rumanija kienu affettwati minn avvenimenti klimatiċi avversi ta’ kobor bla preċedent, jiġifieri mewġiet ta’ sħana, akkumpanjati minn maltempati vjolenti u silġ qawwi, li kienu segwiti minn temperaturi sħan mhux tas-soltu u kundizzjonijiet ta’ nixfa, u kkawżaw ħsara sinifikanti lill-produzzjoni tal-uċuħ tar-raba’. Dawn l-avvenimenti straordinarji tat-temp affettwaw b’mod sever il-produzzjoni taż-żrieragħ żejtnin u s-settur taċ-ċereali.

(6)

Filwaqt li hemm indikazzjonijiet li avvenimenti klimatiċi avversi simili jseħħu madwar l-Unjoni f’kuntest ġenerali ta’ żieda fir-riskji għall-agrikoltura relatati mat-tibdil fil-klima, l-intensità ta’ dawk l-avvenimenti fil-Bulgarija, fil-Ġermanja, fl-Estonja, fl-Italja u fir-Rumanija kienet straordinarja, u affettwat żona kbira u sehem tal-produzzjoni sinifikanti.

(7)

Il-ħsarat sinifikanti għall-produtturi agrikoli kkawżati minn dawn l-avvenimenti klimatiċi avversi u t-telf ta’ introjtu li jirriżulta għall-produtturi affettwati fil-Bulgarija, fil-Ġermanja, fl-Estonja, fl-Italja u fir-Rumanija jipperikolaw il-vijabbiltà ekonomika tal-azjendi agrikoli.

(8)

Għalhekk jenħtieġ li tiġi adottata miżura eċċezzjonali biex tikkontribwixxi għall-indirizzar tal-problemi speċifiċi wara dawn l-avvenimenti klimatiċi avversi fil-Bulgarija, fil-Ġermanja, fl-Estonja, fl-Italja u fir-Rumanija.

(9)

Il-ħsarat sinifikanti u t-telf ekonomiku mġarrbin mill-produtturi agrikoli minħabba avvenimenti klimatiċi avversi jikkostitwixxu problema speċifika skont it-tifsira tal-Artikolu 221 tar-Regolament (UE) Nru 1308/2013 li ma tistax tiġi indirizzata faċilment mill-miżuri meħuda skont l-Artikoli 219 jew 220 ta’ dak ir-Regolament. Is-sitwazzjoni mhijiex marbuta speċifikament ma’ disturb uniku identifikat fis-suq jew ma’ theddida preċiża assoċjata miegħu. Mhijiex marbuta lanqas ma’ miżuri li jikkombattu t-tixrid tal-mard tal-annimali jew mat-telf fil-fiduċja tal-konsumaturi minħabba r-riskji għas-saħħa pubblika, tal-annimali jew tal-pjanti.

(10)

Jenħtieġ li l-ammonti magħmula disponibbli għall-Bulgarija, għall-Ġermanja, għall-Estonja, għall-Italja u għar-Rumanija jiġu ddeterminati, filwaqt li jitqies, b’mod partikolari, il-piż rispettiv ta’ dawk l-Istati Membri fis-settur agrikolu tal-Unjoni, abbażi tal-limiti massimi netti għall-pagamenti diretti stabbiliti fl-Anness V tar-Regolament (UE) 2021/2115 tal-Parlament Ewropew u tal-Kunsill (2), kif ukoll l-impatt tal-avvenimenti klimatiċi avversi f’dawk l-Istati Membri.

(11)

Il-Bulgarija, il-Ġermanja, l-Estonja, l-Italja u r-Rumanija jenħtieġ li jqassmu l-għajnuna permezz tal-aktar mezzi effettivi abbażi ta’ kriterji oġġettivi u nondiskriminatorji li jqisu l-kobor tad-diffikultajiet u d-danni ekonomiċi attwali li jiffaċċaw il-bdiewa kkonċernati. Jenħtieġ li jiżguraw li l-bdiewa jkunu l-benefiċjarji aħħarin tal-għajnuna u jevitaw kwalunkwe distorsjoni tas-suq jew tal-kompetizzjoni.

(12)

Billi l-ammonti allokati lill-Bulgarija, lill-Ġermanja, lill-Estonja, lill-Italja u lir-Rumanija jindirizzaw biss b’mod parzjali d-diffikultajiet ekonomiċi mġarrba mill-bdiewa, jenħtieġ li l-Istat Membru jitħalla jagħti appoġġ nazzjonali addizzjonali lill-bdiewa, skont il-kundizzjonijiet stabbiliti b’dan ir-Regolament.

(13)

Sabiex il-Bulgarija, il-Ġermanja, l-Estonja, l-Italja u r-Rumanija jingħataw il-flessibbiltà biex iqassmu l-għajnuna skont il-ħtieġa taċ-ċirkustanzi tal-bdiewa kkonċernati, jenħtieġ li l-Istat Membru jkun jista’ jakkumula dik l-għajnuna ma’ appoġġ ieħor iffinanzjat mill-Fond Agrikolu Ewropew ta’ Garanzija u mill-Fond Agrikolu Ewropew għall-Iżvilupp Rurali, mingħajr ma jagħtu kumpens żejjed lill-bdiewa.

(14)

Sabiex jiġi evitat kumpens żejjed, jenħtieġ li l-Bulgarija, il-Ġermanja, l-Estonja, l-Italja u r-Rumanija jqisu l-appoġġ mogħti fil-qafas ta’ strumenti oħra ta’ appoġġ nazzjonali jew tal-Unjoni jew skemi privati bħala rispons għat-telf ekonomiku mġarrab.

(15)

Peress li l-għajnuna tal-Unjoni hija stabbilita bl-euro, u sabiex tkun żgurata l-applikazzjoni uniformi u simultanja, jeħtieġ li tiġi ffissata data għall-konverżjoni tal-ammont allokat lill-Istati Membri li ma adottawx l-euro bħala l-munita nazzjonali tagħhom, kif inhu l-każ għall-Bulgarija u r-Rumanija. Billi dan ir-Regolament ma jipprevedix skadenza għas-sottomissjoni tal-applikazzjonijiet għall-għajnuna, jixraq li, għall-finijiet tal-Artikolu 30(3) tar-Regolament Delegat tal-Kummissjoni (UE) 2022/127 (3), titqies id-data tad-dħul fis-seħħ ta’ dan ir-Regolament bħala l-avveniment operattiv għar-rata tal-kambju fir-rigward tal-ammonti stabbiliti f’dan ir-Regolament.

(16)

Għal raġunijiet baġitarji, jenħtieġ li n-nefqa mġarrba mill-Bulgarija, mill-Ġermanja, mill-Estonja, mill-Italja u mir-Rumanija, l-Unjoni tiffinanzjaha skont din il-miżura eċċezzjonali biss meta tali nefqa ssir sa ċerta data ta’ eliġibbiltà. Għalhekk, jenħtieġ li l-appoġġ għal din il-miżura eċċezzjonali jitħallas sat-30 ta’ April 2025.

(17)

Peress li ma għandhomx isiru pagamenti wara t-30 ta’ April 2025, ma għandux japplika l-Artikolu 5(2) tar-Regolament Delegat (UE) 2022/127, li jipprevedi tnaqqis proporzjonali tal-pagamenti ta’ kull xahar li jsiru wara l-iskadenza.

(18)

Il-Bulgarija, il-Ġermanja, l-Estonja, l-Italja u r-Rumanija jenħtieġ li jikkomunikaw lill-Kummissjoni informazzjoni dettaljata dwar l-implimentazzjoni ta’ dan ir-Regolament, sabiex l-Unjoni tkun tista’ timmonitorja l-effiċjenza tal-miżura introdotta b’dan ir-Regolament.

(19)

Sabiex ikun żgurat li l-bdiewa jirċievu l-għajnuna malajr kemm jista’ jkun, il-Bulgarija, il-Ġermanja, l-Estonja, l-Italja u r-Rumanija jenħtieġ li jkunu jistgħu jimplimentaw dan ir-Regolament mingħajr dewmien. Għalhekk jenħtieġ li dan ir-Regolament jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(20)

Il-miżuri previsti f’dan ir-Regolament huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,