(1)

Permezz tar-Regolament (UE) Nru 1039/2012 (2), il-Kunsill impona dazji anti-dumping fuq l-importazzjonijiet tar-radjaturi tal-aluminju li joriġinaw mir-Repubblika tal-Poplu taċ-Ċina (“il-miżuri oriġinali”). L-investigazzjoni li wasslet għall-impożizzjoni tal-miżuri oriġinali minn hawn ’il quddiem se tissejjaħ “l-investigazzjoni oriġinali”.

(2)

Permezz tar-Regolament (UE) 2019/59 (3) il-Kummissjoni Ewropea (“il-Kummissjoni”) estendiet il-miżuri anti-dumping definittivi fuq l-importazzjonijiet tar-radjaturi tal-aluminju li joriġinaw mir-Repubblika tal-Poplu taċ-Ċina (“iċ-Ċina”) wara rieżami ta’ skadenza (ir-“rieżami ta’ skadenza preċedenti”).

(3)

Id-dazji anti-dumping fis-seħħ bħalissa huma f’rati li jvarjaw bejn it–12,6 % u s–56,2 %, fuq importazzjonijiet mill-produtturi esportaturi inklużi fil-kampjun, 21,2 % fuq il-kumpaniji li kkooperaw li ma kinux inklużi fil-kampjun u 61,4 % fuq il-kumpaniji l-oħrajn kollha fiċ-Ċina.

(4)

Wara l-pubblikazzjoni ta’ notifika ta’ skadenza imminenti (4), il-Kummissjoni irċeviet talba għal rieżami skont l-Artikolu 11(2) tar-Regolament bażiku.

(5)

It-talba għal rieżami ġiet ippreżentata fis-17 ta’ Ottubru 2023 mill-Assoċjazzjoni Internazzjonali tal-Manifatturi tar-Radjaturi tal-Aluminju (“l-applikant”) f’isem l-Unjoni tal-industrija tar-radjaturi tal-aluminju skont l-Artikolu 5(4) tar-Regolament bażiku. It-talba għal rieżami kienet ibbażata fuq il-bażi li l-iskadenza tal-miżuri x’aktarx twassal għal rikorrenza ta’ dumping u għal rikorrenza ta’ dannu għall-industrija tal-Unjoni.

(6)

Billi ddeterminat, wara konsultazzjoni mal-Kumitat stabbilit bl-Artikolu 15(1) tar-Regolament bażiku, li kienet teżisti biżżejjed evidenza għall-bidu ta’ rieżami ta’ skadenza, fit-12 ta’ Jannar 2024 il-Kummissjoni bdiet rieżami ta’ skadenza fir-rigward tal-importazzjonijiet lejn l-Unjoni tar-radjaturi tal-aluminju li joriġinaw miċ-Ċina abbażi tal-Artikolu 11(2) tar-Regolament bażiku. Hija ppubblikat Notifika tal-Bidu f’Il-Ġurnal Uffiċjali tal-Unjoni Ewropea (“in-Notifika tal-Bidu”). (5)

(7)

L-investigazzjoni ta’ kontinwazzjoni jew ta’ rikorrenza tad-dumping kopriet il-perjodu mill-1 ta’ Jannar 2023 sal-31 ta’ Diċembru 2023 (“il-perjodu ta’ investigazzjoni tar-rieżami”). L-eżaminazzjoni tax-xejriet rilevanti għall-valutazzjoni tal-probabbiltà ta’ kontinwazzjoni jew ta’ rikorrenza tad-dannu kopriet il-perjodu mill-1 ta’ Jannar 2020 sa tmiem il-perjodu ta’ investigazzjoni tar-rieżami (“il-perjodu kkunsidrat”).

(8)

Fin-Notifika tal-Bidu, il-partijiet interessati ġew mistiedna jikkuntattjaw lill-Kummissjoni sabiex jieħdu sehem fl-investigazzjoni. Barra minn hekk, il-Kummissjoni speċifikament informat lill-applikant, lil produtturi tal-Unjoni magħrufa oħrajn, lill-produtturi magħrufa fiċ-Ċina, lill-awtoritajiet taċ-Ċina u lil importaturi magħrufa dwar il-bidu tal-iskadenza u stednithom jipparteċipaw.

(9)

Il-partijiet interessati kellhom l-opportunità li jikkummentaw dwar il-bidu tar-rieżami ta’ skadenza u li jitolbu seduta ta’ smigħ mal-Kummissjoni u/jew mal-Uffiċjal tas-Seduta fil-proċedimenti relatati mal-kummerċ.

(10)

Fin-Notifika tal-Bidu, il-Kummissjoni ddikjarat li hemm mnejn li hija tieħu kampjun tal-partijiet interessati f’konformità mal-Artikolu 17 tar-Regolament bażiku.

(11)

Fin-Notifika tal-Bidu, il-Kummissjoni ddikjarat li kienet għażlet b’mod provviżorju kampjun ta’ produtturi tal-Unjoni.

(12)

Skont l-Artikolu 17(1) tar-Regolament bażiku dwar l-anti-dumping, il-kriterju użat għall-għażla tal-kampjun kien ir-rappreżentattività f’termini tal-volum tal-produzzjoni u tal-bejgħ tal-prodott simili fl-Unjoni bejn l-1 ta’ Ottubru 2022 u t-30 ta’ Settembru 2023.

(13)

Dan il-kampjun kien jikkonsisti minn tliet produtturi tal-Unjoni, li kollha jinsabu fl-Italja, u kien jammonta għal aktar minn 65 % tal-produzzjoni totali stmata tal-prodott simili fl-Unjoni.

(14)

Il-Kummissjoni stiednet lill-partijiet interessati jikkummentaw fuq il-kampjun provviżorju. Billi ma wasal l-ebda kumment, il-Kummissjoni kkonfermat il-kampjun magħżul b’mod provviżorju bħala l-kampjun definittiv.

(15)

Sabiex tiddeċiedi jekk il-kampjunar kienx meħtieġ u, jekk iva, sabiex tagħżel kampjun, il-Kummissjoni stiednet lil importaturi mhux relatati u lill-assoċjazzjonijiet rappreżentattivi tagħhom biex jippreżentaw ruħhom u biex jipprovdu l-informazzjoni speċifikata fin-Notifika tal-Bidu. Ma ppreżenta ruħu l-ebda importatur mhux relatat.

(16)

Sabiex tiddeċiedi jekk il-kampjunar kienx meħtieġ u, jekk iva, biex tagħżel kampjun, il-Kummissjoni talbet lill-produtturi kollha fiċ-Ċina sabiex jipprovdu l-informazzjoni speċifikata fin-Notifika tal-Bidu. Barra minn hekk, il-Kummissjoni talbet lill-Missjoni tar-Repubblika tal-Poplu taċ-Ċina tidentifika u/jew tikkuntattja lil produtturi oħrajn, jekk ikun hemm, li jistgħu jkunu interessati jipparteċipaw fl-investigazzjoni. Ma waslet l-ebda tweġiba.

(17)

Konsegwentement, il-Kummissjoni informat lill-awtoritajiet taċ-Ċina li fin-nuqqas ta’ kooperazzjoni, hija kienet beħsiebha tirrikorri għall-użu tal-fatti disponibbli skont l-Artikolu 18 tar-Regolament bażiku meta teżamina l-kontinwazzjoni jew ir-rikorrenza tad-dumping. Ma waslet l-ebda reazzjoni.

(18)

Il-kwestjonarji għall-produtturi tal-Unjoni, kif ukoll dawk għall-importaturi, l-utenti u l-produtturi fiċ-Ċina saru disponibbli online fil-jum tal-bidu. (6)

(19)

Il-Kummissjoni bagħtet kwestjonarju dwar l-eżistenza ta’ distorsjonijiet sinifikanti fiċ-Ċina skont it-tifsira tal-Artikolu 2(6a)(b) tar-Regolament bażiku lill-Gvern tar-Repubblika tal-Poplu taċ-Ċina (“GTĊ”).

(20)

Tweġibiet għall-kwestjonarju waslu mingħand it-tliet produtturi tal-Unjoni inklużi fil-kampjun.

(21)

La l-GTĊ u lanqas kwalunkwe produttur fiċ-Ċina ma pprovda tweġiba għall-kwestjonarju.

(22)

Il-Kummissjoni fittxet u vverifikat l-informazzjoni kollha meqjusa meħtieġa għad-determinazzjoni tal-probabbiltà ta’ kontinwazzjoni jew ta’ rikorrenza ta’ dumping u dannu u tal-interess tal-Unjoni.

(23)

Il-Kummissjoni wettqet żjarat ta’ verifika skont l-Artikolu 16 tar-Regolament bażiku fil-bini ta’ tliet produtturi tal-Unjoni inklużi fil-kampjun:

(24)

Fit-8 ta’ Awwissu 2024, il-Kummissjoni ddivulgat il-fatti u l-kunsiderazzjonijiet essenzjali li abbażi tagħhom kienet beħsiebha żżomm id-dazji anti-dumping fis-seħħ. Il-partijiet kollha ngħataw perjodu li fih setgħu jikkummentaw dwar id-divulgazzjoni.

(25)

Il-kummenti li għamlu l-partijiet interessati ġew ikkunsidrati mill-Kummissjoni u dawn tqiesu, fejn xieraq. L-ebda parti ma talbet seduta ta’ smigħ.

(26)

Il-prodott taħt rieżami huwa l-istess bħal fl-investigazzjoni oriġinali u fir-rieżami ta’ skadenza preċedenti, jiġifieri radjaturi tal-aluminju u elementi jew partijiet li minnhom hu magħmul radjatur bħal dan, sew jekk dawn l-elementi huma assemblati fi blokok u sew jekk le, għajr radjaturi u elementi u partijiet tagħhom tat-tip tal-elettriku, li bħalissa jaqgħu taħt il-kodiċijiet NM ex 7615 10 10 , ex 7615 10 80 , ex 7616 99 10 u ex 7616 99 90 (kodiċi TARIC 7615 10 10 10, 7615 10 80 10, 7616 99 10 91, 7616 99 90 01 u 7616 99 90 91) (“il-prodott taħt rieżami”).

(27)

Kif stabbilit fl-investigazzjoni oriġinali, kif ukoll fir-rieżami ta’ skadenza preċedenti, din l-investigazzjoni tar-rieżami ta’ skadenza kkonfermat li l-prodotti li ġejjin għandhom l-istess karatteristiċi fiżiċi u tekniċi bażiċi, kif ukoll l-istess użi bażiċi:

(28)

Għalhekk, dawk il-prodotti huma meqjusa bħala prodotti simili skont it-tifsira tal-Artikolu 1(4) tar-Regolament bażiku.

(29)

F’konformità mal-Artikolu 11(2) tar-Regolament bażiku, il-Kummissjoni eżaminat jekk kienx qed iseħħ dumping matul il-perjodu ta’ investigazzjoni tar-rieżami u jekk kienx probabbli li d-dumping ikompli jew jerġa’ jseħħ jekk il-miżuri fis-seħħ jitħallew jiskadu.

(30)

Kif imsemmi fil-premessa (16), l-ebda wieħed mill-produtturi miċ-Ċina ma kkoopera fl-investigazzjoni. Għalhekk, fil-21 ta’ Frar 2024, il-Kummissjoni informat lill-awtoritajiet Ċiniżi u lill-partijiet interessati kollha li minħabba n-nuqqas ta’ kooperazzjoni, il-Kummissjoni kienet beħsiebha tapplika l-Artikolu 18 tar-Regolament bażiku dwar is-sejbiet fir-rigward taċ-Ċina. Il-Kummissjoni ma rċeviet l-ebda kumment jew talba għal intervent tal-Uffiċjal tas-Seduta f’dan ir-rigward.

(31)

Konsegwentement, f’konformità mal-Artikolu 18 tar-Regolament bażiku, is-sejbiet fir-rigward tal-probabbiltà ta’ kontinwazzjoni jew rikorrenza ta’ dumping kienu bbażati fuq il-fatti disponibbli, b’mod partikolari l-informazzjoni fit-talba għal rieżami, u l-informazzjoni miksuba mill-partijiet li kkooperaw matul l-investigazzjoni tar-rieżami (b’mod partikolari, l-applikant) u informazzjoni minn sorsi oħrajn disponibbli għall-pubbliku, b’mod partikolari l-Global Trade Atlas (“GTA”) (7).

(32)

Skont l-Artikolu 2(1) tar-Regolament bażiku, “il-valur normali għandu normalment ikun ibbażat fuq il-prezzijiet imħallsa jew pagabbli, fil-kors ordinarju tal-kummerċ, minn klijenti indipendenti fil-pajjiż esportatur”.

(33)

Madankollu, skont l-Artikolu 2(6a)(a) tar-Regolament bażiku, “[f]‘każ li jiġi stabbilit […] li ma huwiex xieraq li jintużaw prezzijiet u kostijiet domestiċi fil-pajjiż esportatur minħabba l-eżistenza f’dak il-pajjiż ta’ distorsjonijiet sinifikanti fis-sens tal-punt (b), il-valur normali għandu jiġi kkalkolat esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri ta’ riferiment mingħajr distorsjoni”, u “għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti” (“kostijiet amministrattivi, tal-bejgħ u ġenerali” minn hawn ’il quddiem “SG&A”).

(34)

Kif spjegat ulterjorment hawn taħt, f’din l-investigazzjoni l-Kummissjoni kkonkludiet li, abbażi tal-evidenza disponibbli, u fid-dawl tan-nuqqas ta’ kooperazzjoni tal-GTĊ u tal-produtturi esportaturi, l-applikazzjoni tal-Artikolu 2(6a) tar-Regolament bażiku kienet xierqa.

(35)

F’investigazzjonijiet reċenti dwar is-settur tal-aluminju fiċ-Ċina (8), il-Kummissjoni sabet li kien hemm distorsjonijiet sinifikanti skont l-Artikolu 2(6a)(b) tar-Regolament bażiku.

(36)

F’dawk l-investigazzjonijiet, il-Kummissjoni sabet li hemm intervent sostanzjali tal-gvern fiċ-Ċina u li dan jirriżulta f’distorsjoni tal-allokazzjoni effettiva tar-riżorsi f’konformità mal-prinċipji tas-suq (9). B’mod partikolari, il-Kummissjoni kkonkludiet li fis-settur tal-aluminju, mhux biss għad hemm grad sostanzjali ta’ sjieda mill-GTĊ skont l-Artikolu 2(6a)(b), l-ewwel inċiż, tar-Regolament bażiku (10), iżda l-GTĊ huwa wkoll f’pożizzjoni li jinterferixxi fil-prezzijiet u fil-kostijiet permezz tal-preżenza tal-Istat fid-ditti skont l-Artikolu 2(6a)(b), it-tieni inċiż, tar-Regolament bażiku (11). Il-Kummissjoni sabet ukoll li l-preżenza u l-intervent tal-Istat fis-swieq finanzjarji, kif ukoll fil-provvista tal-materja prima u tal-inputs, iħallu effett ta’ distorsjoni addizzjonali fuq is-suq. Tabilħaqq, b’mod ġenerali, is-sistema tal-ippjanar fiċ-Ċina tirriżulta fil-konċentrazzjoni tar-riżorsi f’setturi ddeżinjati bħala strateġiċi jew inkella bħala politikament importanti mill-GTĊ, aktar milli fl-allokazzjoni tagħhom f’konformità mal-forzi tas-suq (12). Barra minn hekk, il-Kummissjoni kkonkludiet li l-liġijiet Ċiniżi dwar il-falliment u l-proprjetà ma jaħdmux kif suppost skont l-Artikolu 2(6a)(b), ir-raba’ inċiż, tar-Regolament bażiku, u b’hekk jiġu ġġenerati distorsjonijiet b’mod partikolari meta jiġu miżmuma ħajjin ditti insolventi u meta jiġu allokati d-drittijiet għall-użu tal-art fiċ-Ċina (13). Bl-istess mod, il-Kummissjoni sabet distorsjonijiet tal-kostijiet tal-pagi fis-settur tal-azzar skont l-Artikolu 2(6a)(b), il-ħames inċiż, tar-Regolament bażiku (14), kif ukoll distorsjonijiet fis-swieq finanzjarji skont l-Artikolu 2(6a)(b), is-sitt inċiż, tar-Regolament bażiku, b’mod partikolari fir-rigward tal-aċċess għall-kapital għall-atturi korporattivi fiċ-Ċina (15).

(37)

Bħal fl-investigazzjonijiet preċedenti dwar is-settur tal-aluminju fiċ-Ċina, f’din l-investigazzjoni l-Kummissjoni eżaminat jekk kienx xieraq jew le li jintużaw il-prezzijiet u l-kostijiet domestiċi fiċ-Ċina, minħabba l-eżistenza ta’ distorsjonijiet sinifikanti skont il-punt (b) tal-Artikolu 2(6a) tar-Regolament bażiku. Il-Kummissjoni għamlet dan abbażi tal-evidenza disponibbli fil-fajl, inkluża l-evidenza li tinsab fit-talba, kif ukoll fid-Dokument ta’ Ħidma tal-Persunal tal-Kummissjoni dwar Distorsjonijiet Sinifikanti fl-Ekonomija tar-Repubblika tal-Poplu taċ-Ċina għall-Finijiet tal-Investigazzjonijiet dwar id-Difiża tal-Kummerċ (16) (“ir-Rapport”) kif ukoll il-verżjoni aġġornata tiegħu (“ir-Rapport aġġornat”) (17), li jibbaża fuq sorsi disponibbli għall-pubbliku. Dik l-analiżi kopriet l-eżaminazzjoni tal-interventi sostanzjali tal-gvern fl-ekonomija taċ-Ċina b’mod ġenerali, iżda anke s-sitwazzjoni speċifika tas-suq fis-settur rilevanti, inkluż il-prodott taħt rieżami.

(38)

It-talba allegat li minħabba l-eżistenza ta’ distorsjonijiet sinifikanti fiċ-Ċina, il-prezzijiet domestiċi u l-kostijiet tal-industrija tal-aluminju Ċiniża ma jistgħux jintużaw f’dan il-każ. Biex jappoġġa l-pożizzjoni tiegħu, l-applikant irrefera għar-Rapport, speċjalment it-taqsimiet li jikkonċernaw is-settur tal-aluminju (18), għal investigazzjonijiet preċedenti tal-Kummissjoni dwar l-aluminju u l-prodotti downstream (19), għal-leġiżlazzjoni Ċiniża, kif ukoll għal studji addizzjonali.

(39)

B’mod partikolari, l-applikant ikkummissjona studju, “China Household Aluminium Radiators Industry Market Research Report” (“l-Istudju”), aġġornat f’Ottubru 2023. L-Istudju wera li ċ-Ċina ma hijiex biss l-akbar produttur dinji tal-boksajt, is-sors ewlieni tal-aluminju, iżda wkoll l-akbar produttur dinji tal-aluminju, u “skont id-data rilaxxata mill-Assoċjazzjoni Internazzjonali tal-Aluminju u l-Użu Internazzjonali tal-Enerġija, fl-2020, il-produzzjoni tal-aluminju taċ-Ċina żdiedet b’5 % sena wara sena, filwaqt li tal-bqija tad-dinja żdiedet biss b’0,3 %, u saħansitra naqset f’xi wħud mir-reġjuni. Iċ-Ċina tirrappreżenta 57,2 fil-mija tal-produzzjoni globali tal-aluminju. B’mod ġenerali, il-produzzjoni tal-aluminju taċ-Ċina wriet xejra ta’ żieda. Il-produzzjoni tal-aluminju taċ-Ċina għall-2022 laħqet 40 miljun tunnellata, li għal darb’oħra tammonta għal aktar minn nofs il-produzzjoni globali tal-aluminju. Iċ-Ċina hija wkoll wieħed mill-akbar konsumaturi tal-aluminju fid-dinja”.

(40)

Barra minn hekk, l-applikant sostna li ż-żieda qawwija li l-industrija tal-aluminju esperjenzat fiċ-Ċina kienet immexxija minn politiki favorevoli tal-gvern li jħeġġu lill-Intrapriżi tal-Istat (“SOEs”) jidħlu fis-settur tal-produzzjoni tal-aluminju primarju u lill-intrapriżi privati biex jidħlu fis-setturi tal-manifattura tal-aluminju.

(41)

B’mod aktar speċifiku, it-talba indikat li inizjattivi ta’ għajnuna reġjonali mill-Istat sinifikanti mill-gvern taċ-Ċina jikkonfermaw ukoll in-natura distortiva tal-interventi tal-gvern taċ-Ċina, li jappoġġaw lis-settur tal-aluminju fil-provinċji kif ġej:

(42)

Bħala konklużjoni, it-talba ħadet il-pożizzjoni li l-prezzijiet jew il-kostijiet ma humiex ir-riżultat ta’ forzi tas-suq ħieles minħabba li huma affettwati minn intervent sostanzjali min-naħa tal-gvern skont l-Artikolu 2(6a)(b) tar-Regolament Bażiku. Fuq dik il-bażi, skont it-talba, f’dan il-każ ma huwiex xieraq li jintużaw prezzijiet u kostijiet domestiċi sabiex jiġi stabbilit il-valur normali.

(43)

Il-GTĊ la kkummenta u lanqas ma pprovda evidenza li jappoġġa jew li jirribatti l-evidenza eżistenti fil-fajl tal-każ, inkluż ir-Rapport u l-evidenza addizzjonali pprovduta mill-applikant, dwar l-eżistenza ta’ distorsjonijiet sinifikanti u/jew dwar l-adegwatezza tal-applikazzjoni tal-Artikolu 2(6a) tar-Regolament bażiku fil-każ inkwistjoni.

(44)

Konsegwentement, meta f’din l-investigazzjoni kienet qed teżamina jekk kienx xieraq li jintużaw prezzijiet u kostijiet domestiċi fiċ-Ċina, minħabba l-eżistenza ta’ distorsjonijiet sinifikanti skont il-punt (b) tal-Artikolu 2(6a) tar-Regolament bażiku, il-Kummissjoni għamlet hekk abbażi tal-evidenza disponibbli fil-fajl, inkluża l-evidenza li tinsab fit-talba, kif ukoll fir-Rapport aġġornat. Il-Kummissjoni ssupplimentat ulterjorment dawn l-elementi evidenzjarji bir-riċerka tagħha stess dwar id-diversi kriterji rilevanti sabiex tikkonferma l-eżistenza ta’ distorsjonijiet sinifikanti fiċ-Ċina, kif stabbilit ukoll mill-investigazzjonijiet preċedenti tagħha f’dan ir-rigward.

(45)

Fis-settur tal-prodott taħt rieżami, għad hemm grad sostanzjali ta’ sjieda, kontroll, superviżjoni politika jew gwida mill-GTĊ skont l-Artikolu 2(6a)(b), l-ewwel inċiż, tar-Regolament bażiku. Fiċ-Ċina, l-intrapriżi li joperaw taħt is-sjieda, il-kontroll u/jew is-superviżjoni politika jew il-gwida tal-Istat jirrappreżentaw parti essenzjali mill-ekonomija. Il-GOĊ u l-Partit Komunista Ċiniż (is-“CCP”) iżommu strutturi li jiżguraw l-influwenza kontinwa tagħhom fuq l-intrapriżi, u b’mod partikolari l-SOEs (20). Madankollu, l-interventi tas-CCP fit-teħid ta’ deċiżjonijiet operazzjonali saru n-norma mhux biss fl-SOEs, iżda anke f’kumpaniji privati (21), bis-CCP jasserixxi tmexxija fuq prattikament kull aspett tal-ekonomija tal-pajjiż.

(46)

Billi ma kien hemm l-ebda kooperazzjoni mill-esportaturi Ċiniżi tal-prodott taħt rieżami, il-proporzjon eżatt tal-produtturi privati u tal-Istat ma setax jiġi ddeterminat. Madankollu, l-investigazzjoni stabbiliet li s-settur tal-prodott taħt rieżami huwa moqdi kemm mill-SOEs kif ukoll mill-kumpaniji privati (22). Pereżempju, bosta produtturi huma privati, inkluż l-Unbeatable Group (“Unbeatable”) (23), Zhejiang Navas Industry and Trade, li qabel kien magħruf bħala Yongkang Sanghe Radiator (24) (“Zhejiang Navas”), China Botai (25) u China Flyhigh (26), filwaqt li l-akbar produttur tal-aluminju taċ-Ċina, China Aluminum Corporation (“Chinalco”) (27), huwa SOE, b’aktar minn 35 % tas-sjieda pubblika (28).

(47)

Barra minn hekk, il-GTĊ jeżerċita gwida fuq l-intrapriżi wkoll billi jistabbilixxi objettivi u politiki speċifiċi għas-settur, li l-parteċipanti kollha tal-industrija, irrispettivament min-natura privata jew pubblika tagħhom, huma obbligati jikkonformaw magħhom.

(48)

Biex nagħtu eżempju, il-Kundizzjonijiet Standard Applikabbli għall-Industrija tal-Aluminju (“Kundizzjonijiet Standard”) (29), maħruġa mill-Ministeru tal-Industrija u t-Teknoloġija tal-Informazzjoni (“MIIT”) fl-2020, stabbilew il-qafas ġenerali għall-operat tal-industrija tal-aluminju fil-livell ċentrali. B’mod nominali, il-Kundizzjonijiet Standard isegwu l-objettiv li: “jippromwovu r-riforma strutturali min-naħa tal-provvista tal-industrija tal-aluminju, jippromwovu l-iżvilupp teknoloġiku tal-industrija u jippromwovu l-iżvilupp ta’ kwalità għolja tal-industrija” u jistipulaw li: “l-estrazzjoni tal-boksajt, il-produzzjoni tal-alumina, tal-aluminju elettroliku u l-produzzjoni sekondarja tal-aluminju jridu jikkonformaw mal-politiki industrijali nazzjonali u lokali, mal-pjanijiet dwar ir-riżorsi minerali, mal-liġijiet dwar il-protezzjoni ambjentali u l-konservazzjoni tal-enerġija, mar-regolamenti u mal-politiki, mal-liġijiet, mar-regolamenti u mal-politiki dwar l-estrazzjoni, mal-liġijiet tal-produzzjoni sikura, mar-regolamenti u mal-politiki, mal-pjanijiet tal-iżvilupp tal-industrija u ma’ rekwiżiti oħrajn” (30).

(49)

L-14-il Pjan ta’ 5 Snin (“FYP”) tal-Provinċja ta’ Shandong dwar l-Iżvilupp tal-Industrija tal-Aluminju (“il-Pjan ta’ Shandong”) (31) jelenka l-miri li ġejjin: “[s]al-2025, il-valur tal-output tal-industrija tal-aluminju se jilħaq it-800 biljun RMB, id-daqs tas-suq tal-prodotti finali se jkompli jespandi, bi prodotti b’valur miżjud għoli li jammontaw għal aktar minn 60 %, u l-proporzjon tal-volum tal-produzzjoni tal-materjal tal-aluminju/il-volum tal-produzzjoni tal-aluminju elettroliku se jkun ogħla mill-medja nazzjonali[…]. Il-provinċja se tevolvi f’raggruppament industrijali ewlieni tal-aluminju b’influwenza domestika u barranija sinifikanti” (32).

(50)

F’Settembru 2022, il-Kumitat Permanenti tal-Kungress tal-Poplu tar-Reġjun Awtonomu ta’ Guangxi Zhuang ħareġ id-Deċiżjoni dwar il-Promozzjoni tal-Iżvilupp ta’ Kwalità Għolja tal-Industrija tal-Aluminju (“id-Deċiżjoni ta’ Guangxi”) (33) u speċifika l-għanijiet rigward il-kultivazzjoni ta’ intrapriżi ewlenin u t-tmexxija tal-perkors ta’ żvilupp tal-SOEs fil-provinċja: “Il-kultivazzjoni u l-introduzzjoni ta’ grupp ta’ intrapriżi ewlenin b’kompetittività ewlenija. “Il-kultivazzjoni u l-introduzzjoni ta’ grupp ta’ intrapriżi ewlenin b’kompetittività ewlenija. L-istabbiliment ta’ sistema ta’ “mexxej tal-katina industrijali” fl-industrija tal-aluminju, għall-intrapriżi li jmexxu l-ktajjen industrijali tal-alumina u tal-aluminju elettroliku, biex jiġi implimentat mekkaniżmu komprensiv ta’ evalwazzjoni u inċentiv tal-effiċjenza enerġetika li jkopri l-industrija kollha […] It-tisħiħ tal-isforzi biex jitrawmu intrapriżi żgħar u ta’ daqs medju fl-industrija tal-aluminju, l-enfasi fuq il-bini ta’ grupp ta’ intrapriżi “żgħar iżda potenti” speċjalizzati, professjonali, speċjali u ġodda fil-qasam tal-ipproċessar fil-fond tal-aluminju, kif ukoll il-promozzjoni intrapriżi fil-qasam tal-industrija tal-manifattura tal-aluminju; u aktar promozzjoni tal-marka Guangxi Aluminium. It-titjib tal-kwalità tal-iżvilupp u l-effiċjenza tal-intrapriżi tal-Istat relatati mal-aluminju, l-appoġġ lil Guangxi Investment Group u lil intrapriżi oħrajn tal-Istat biex jottimizzaw u jintegraw in-negozju intern tal-aluminju tagħhom; it-teħid u l-użu tal-kapital biex tiġi skjerata l-katina tal-industrija tal-aluminju fil-provinċji u fil-pajjiżi permezz ta’ fużjonijiet u akkwiżizzjonijiet, parteċipazzjoni jew kontroll tal-interess tal-ekwità jew metodi oħrajn, sabiex jiġi implimentat żvilupp ikkoordinat tal-katina industrijali kollha u jinbnew intrapriżi ewlenin fl-industrija tal-aluminju b’influwenza nazzjonali u kompetittività internazzjonali” (34).

(51)

Mhux biss, il-kontroll tal-gvern u s-superviżjoni ta’ politika jistgħu jiġu osservati wkoll fil-livell tal-assoċjazzjonijiet tal-industrija rilevanti. Tabilħaqq, l-assoċjazzjonijiet tal-industrija Ċiniżi għandhom jiggarantixxu li l-industrija timplimenta l-politiki tal-GTĊ. Din ir-responsabbiltà hija kkonfermata mill-fatt li fl-attività tagħhom, huma jikkollaboraw mill-qrib mal-awtoritajiet tal-Istat, li huwa rifless fl-istatuti tagħhom.

(52)

Pereżempju, l-Assoċjazzjoni tal-Industrija tal-Fabbrikazzjoni ta’ Metalli li ma Fihomx il-Ħadid taċ-Ċina (“CNFA”) (35) tiddikjara b’mod partikolari fl-Artikolu 3 tal-Artikoli ta’ assoċjazzjoni tagħha li l-organizzazzjoni “taderixxi mat-tmexxija ġenerali tal-Partit Komunista taċ-Ċina, tistabbilixxi organizzazzjoni tal-Partit Komunista taċ-Ċina, twettaq attivitajiet tal-Partit u tipprovdi l-kundizzjonijiet meħtieġa għall-attivitajiet tal-organizzazzjoni tal-Partit” u “taċċetta l-gwida professjonali, is-superviżjoni u l-ġestjoni mill-entitajiet inkarigati mir-reġistrazzjoni u l-ġestjoni, minn entitajiet inkarigati mill-bini tal-Partit, kif ukoll mid-dipartimenti amministrattivi rilevanti inkarigati mill-ġestjoni tal-industrija” (36). Skont l-Artikolu 6, l-ambitu tan-negozju tal-Assoċjazzjoni huwa, inter alia, dan li ġej: “f’konformità mal-politika ġenerali u l-kompitu ġenerali li tiġi stabbilita sistema ekonomika tas-suq soċjalista imressqa mill-Parti u mill-Istat, u fid-dawl tas-sitwazzjoni attwali tal-industrija, jitressqu b’mod attiv suġġerimenti u opinjonijiet dwar l-iżvilupp tal-industrija, il-politiki, il-liġijiet u r-regolamentazzjoni tal-industrija” (37). Barra minn hekk, il-kundizzjonijiet biex wieħed ikun eliġibbli bħala rappreżentant tal-Assoċjazzjoni jinkludu l-adeżjoni għat-tmexxija tal-Partit Komunista taċ-Ċina, l-appoġġ tas-soċjaliżmu b’karatteristiċi Ċiniżi, l-implimentazzjoni b’mod determinat tal-linja, tal-prinċipji u tal-politiki tal-Partit, u l-pussess ta’ kwalitajiet politiċi tajbin (38).

(53)

Fir-rigward tal-fatt li l-GTĊ huwa f’pożizzjoni li jinterferixxi mal-prezzijiet u mal-kostijiet permezz tal-preżenza tal-Istat f’ditti skont l-Artikolu 2(6a)(b), it-tieni inċiż, tar-Regolament bażiku, iċ-ċelloli tas-CCP fl-intrapriżi, kemm tal-Istat kif ukoll dawk privati, jirrappreżentaw kanal importanti li minnu l-Istat jista’ jinterferixxi ma’ deċiżjonijiet tan-negozju. Matul l-investigazzjoni, il-Kummissjoni stabbiliet l-eżistenza ta’ konnessjonijiet personali bejn il-produtturi tal-prodott taħt rieżami u s-CCP, bħall-membri tas-CCP fost il-maniġment superjuri jew il-membri tal-bord tad-diretturi f’għadd ta’ kumpaniji li jimmanifatturaw il-prodott taħt rieżami.

(54)

Pereżempju, il-president ta’ Chinalco u d-direttur u l-maniġer ġenerali ta’ Chinalco, huma rispettivament is-segretarju tal-partit u l-viċi segretarju tal-partit tal-organizzazzjoni tal-partit ta’ Chinalco. Mhux biss, fl-2024, l-unitajiet kollha ta’ Chinalco Group nedew l-Istudju u l-Edukazzjoni tad-Dixxiplina tal-Partit: “il-laqgħa ta’ skjerament tal-Istudju u l-Edukazzjoni tad-Dixxiplina tal-Partit ta’ Chinalco Group enfasizzat li l-organizzazzjonijiet tal-partit fil-livelli kollha għandhom isaħħu l-kombinazzjoni tal-apprendiment u l-applikazzjoni, jikkombinaw l-Istudju u l-Edukazzjoni tad-Dixxiplina tal-Partit mal-implimentazzjoni tas-sistema ta’ implimentazzjoni annwali tal-ippjanar strateġiku tal-“proġetti ewlenin annwali 4 + 4+N+” ta’ Chinalco Group, u jistinkaw biex jilħqu għanijiet u kompiti annwali, u effettivament jittrasformaw ir-riżultati ta’ apprendiment fi xprun ineżawribbli għall-aċċelerazzjoni tal-bini ta’ kumpanija tal-aluminju eċċellenti ta’ klassi mondjali b’vantaġġi kompetittivi komprensivi sodi, u jipprovdu garanziji politiċi sodi għall-isforz biex jinkiteb kapitolu ġdida tal-modernizzazzjoni ta’ Chinalco” (39).

(55)

Barra minn hekk, l-intrapriżi privati fl-industrija tar-radjaturi tal-aluminju huma soġġetti għal interferenza mill-partit. Pereżempju, il-President u Segretarju tal-Fergħa tal-Partit ta’ Jiangsu Unbeatable Group Co., Ltd., inħatar fl-2021 fost l-aqwa 100 membru tas-CCP fil-Muniċipalità ta’ Nantong (40). Barra minn hekk, il-Muniċipalità ta’ Qidong (li tinsab fit-territorju ta’ Nantong, fil-provinċja ta’ Jiangsu) organizzat sessjonijiet ta’ tagħlim tas-CCP ma’ Unbeatable Group: “Fid-diskors tagħha, […] qalet li l-bini tal-Punt ta’ Tagħlim fuq il-Post ta’ Unbeatable Group fiż-Żona ta’ Teknoloġija Avvanzata huwa marbut mill-qrib mas-sitwazzjoni attwali tad-distrett u tal-belt, f’konformità mal-karatteristiċi tal-intrapriża, u jirrifletti bis-sħiħ it-tema tal-bini tal-partit ta’ livell għoli li jmexxi żvilupp ta’ kwalità għolja.” (41).

(56)

Barra minn hekk, fis-settur tal-prodott taħt rieżami hemm stabbiliti politiki li jiddiskriminaw favur il-produtturi domestiċi jew li b’xi mod ieħor jinfluwenzaw is-suq skont l-Artikolu 2(6a)(b), it-tielet inċiż, tar-Regolament bażiku.

(57)

L-industrija tal-aluminju tibqa’ titqies bħala industrija ewlenija mill-GTĊ (42). Dan huwa kkonfermat fil-bosta pjanijiet, direttivi u dokumenti oħrajn iffokati fuq l-aluminju, maħruġa fil-livell nazzjonali, provinċjali u muniċipali, li ġew iddokumentati fid-dettall mill-Kummissjoni f’investigazzjonijiet preċedenti tas-settur (43), kif ukoll fir-Rapport Aġġornat (44).

(58)

Fil-livell nazzjonali, pereżempju, l-14-il FYP dwar l-Iżvilupp tal-Industrija tal-Materja Prima (45) jinkludi dispożizzjonijiet li jiżguraw id-disponibbiltà tal-aluminju bħala materja prima: “L-implimentazzjoni ta’ azzjonijiet biex jingħelbu n-nuqqasijiet f’materjali ewlenin; […] L-implimentazzjoni ta’ azzjonijiet biex jikkonsolidaw u jtejbu l-materjali bażiċi bl-ingrossa u, abbażi ta’ proċessi ta’ produzzjoni ottimizzati, jiġu ggwidati l-intrapriżi biex jużaw it-teknoloġiji tal-informazzjoni tal-ġenerazzjoni l-ġdida bħall-Internet tal-industrija sabiex itejbu l-kompetittività ġenerali ta’ […], liga tal-aluminju ta’ saħħa kbira, […]”. Il-pjan jappella wkoll għall-kontroll tal-kapaċità fis-settur tal-aluminju: “Il-kontroll strett taż-żieda fil-kapaċità tal-produzzjoni It-titjib u l-implimentazzjoni b’mod strett tal-politiki ta’ sostituzzjoni tal-kapaċità tal-produzzjoni[…] għas-settur tal-aluminju elettroliku, il-prevenzjoni tal-iżvilupp diżorganizzat ta’ […] u tal-ossidu tal-aluminju”. Il-pjan jinvolvi wkoll id-distribuzzjoni ġeografika ta’ industriji differenti fiċ-Ċina, taħt il-kapitolu “L-iżgurar ta’ gwida lejn tqassim raġonevoli”. Il-kapitolu jgħid dan li ġej: “It-tqassim tal-kapaċità l-ġdida tal-produzzjoni se jittejjeb. […] L-implimentazzjoni ta’ strateġiji nazzjonali u reġjonali ewlenin, strateġiji ta’ żvilupp ta’ koordinazzjoni reġjonali, u strateġiji ewlenin taż-żoni funzjonali, u l-inkoraġġiment lill-industrija tal-materja prima biex tottimizza u taġġusta t-tqassim spazjali tagħha. […] L-iżgurar tat-tqassim ordnat taż-żoni kostali bi proġetti li jużaw riżorsi barranin bħall-ossidu tal-aluminju”. Il-pjan ikompli jiddiskuti l-ħolqien ta’ raggruppamenti industrijali: “It-trawwim ta’ raggruppamenti industrijali standardizzati. […], it-trawwim tal-bidla fit-tqassim tas-settur tal-aluminju elettroliku mill-“faħam — l-elettriku — l-aluminju” għal “enerġija nadifa, bħall-enerġija idroelettrika, l-enerġija mir-riħ — l-aluminju”. Fl-aħħar nett, il-pjan jipprevedi l-promozzjoni ta’ teknoloġiji avvanzati fis-settur tal-aluminju, il-promozzjoni tat-trasformazzjoni tas-settur. Kif jista’ jidher mil-lista ta’ hawn fuq, is-settur tal-aluminju huwa mmonitorjat mill-qrib u mmexxi mill-gvern ċentrali u s-settur huwa fil-biċċa l-kbira msawwar minn intervent tal-gvern aktar milli minn forzi tas-suq ħieles.

(59)

Fil-livell lokali, il-firxa tal-interferenza taċ-Ċina fl-industrija tal-aluminju hija aktar evidenti. Eżempju wieħed ta’ dan huwa l-Pjan ta’ Shandong, li, flimkien mal-għanijiet deskritti fil-premessa (49) hawn fuq jistabbilixxi miżuri ta’ appoġġ għall-intrapriżi lokali tal-aluminju fit-termini li ġejjin: “Iż-żieda tal-appoġġ politiku u regolatorju. L-implimentazzjoni attiva ta’ diversi politiki ta’ appoġġ fil-livell nazzjonali u provinċjali, l-għoti ta’ appoġġ lil raggruppamenti industrijali eliġibbli, prodotti ewlenin u teknoloġiji ewlenin. L-appoġġ lill-intrapriżi li jwettqu proġetti nazzjonali u provinċjali ewlenin. Użu tajjeb mill-pakkett ta’ politiki li jappoġġaw proġetti ewlenin ta’ tranżizzjoni tal-enerġija, it-trawwim ta’ intrapriżi pijunieri billi jiġi pprovdut appoġġ minn aspetti inklużi inċentivi fiskali, provvista tal-art, allokazzjoni tal-enerġija ekoloġika, tnaqqis fit-taxxa u innovazzjonijiet teknoloġiċi, u l-implimentazzjoni ta’ inċentivi tat-taxxa għar-riċiklaġġ tal-aluminju. L-inkoraġġiment ta’ fondi ta’ investiment ta’ ekwità fil-livell provinċjali biex isir investiment fir-riċerka u l-iżvilupp u fl-industrijalizzazzjoni ta’ prodotti ewlenin ġodda, u biex jiġi attirat investiment mill-kapital soċjali” (46).

(60)

F’Yunnan, il-Pjan ta’ Azzjoni tal-Provinċja ta’ Yunnan dwar it-Tfassil mill-Ġdid tal-Katina Kollha tal-Metalli li ma Fihomx Ħadid u tal-Industriji tal-Materjali Ġodda b’Vantaġġi Ġodda 2021-2023 (“il-Pjan ta’ Yunnan”) (47) fih, inter alia, miżuri biex jitnaqqsu l-kostijiet operatorji tal-industrija tal-aluminju permezz ta’ politiki tat-taxxa preferenzjali: “L-implimentazzjoni ta’ politiki tat-taxxa preferenzjali għall-iżvilupp tar-reġjun tal-Punent, u t-twettiq kif xieraq ta’ investigazzjoni u reġistrazzjoni ta’ intrapriżi rilevanti għall-industrija tas-siliċju ekoloġiku, l-industrija tal-aluminju ekoloġiku u l-industrija tal-ipproċessar fil-fond tal-metall li ma fihx ħadid elenkati fil-katalogu tal-industriji mħeġġa fir-reġjun tal-Punent; għoti ta’ pariri u servizzi mhux mitluba biex jgħinu lill-intrapriżi jnaqqsu l-piż tat-taxxa tagħhom” (48).

(61)

Id-Deċiżjoni ta’ Guangxi, kif diġà ntwera fil-premessa (50) tistabbilixxi diversi objettivi għall-iżvilupp tal-industrija tal-aluminju fil-provinċja. Barra minn hekk, tirrakkomanda li: “sal-2030, il-proporzjon tal-produzzjoni tal-aluminju għall-produzzjoni elettrolitika tal-aluminju se jaqbeż it-2:1, u l-proporzjon ta’ prodotti tal-aluminju pproċessati rfinati u fondi fi prodotti tal-aluminju se jaqbeż is-60 %. Il-korpi tal-gvern għandhom jorganizzaw u jimplimentaw proġetti biex jestendu u jsaħħu l-katina tal-industrija u joħolqu industrija tal-ipproċessar profond tal-aluminju profittabbli li għandha kemm kwantità kif ukoll kwalità, u jiffokaw fuq l-iżvilupp u l-ħolqien ta’ vantaġġi fis-setturi li ġejjin: aluminju għal karozzi ħfief, aluminju għal sorsi ġodda ta’ enerġija bħall-fotovoltajċi u l-batteriji, aluminju użat għall-enerġija, aluminju użat għall-imballaġġ tal-ikel u tal-mediċina, aluminju għal apparati elettroniċi u aluminju għall-kostruzzjoni u t-tagħmir domestiku. Għandu jiġi pprovdut appoġġ kontinwat għall-iżvilupp ta’ prodotti ta’ livell għoli bħall-aluminju għall-ajruspazju, għall-bastimenti u għall-ferroviji […] (49)”.

(62)

Minbarra dan ta’ hawn fuq, il-produtturi tar-radjaturi tal-aluminju bbenefikaw ukoll minn miżuri ta’ appoġġ finanzjarju, li juru b’mod ċar l-interess tal-Istat f’dan is-settur. Pereżempju, Zhejiang Navas ibbenefikat mill-Garanzija Pubblika ta’ Yongkang Municipality State Owned Capital Investment holding, għal self ta’ RMB 10 miljun li kien għadu pendenti fl-2022 (50).

(63)

Fil-qosor, il-GTĊ għandu miżuri fis-seħħ sabiex iħeġġeġ lill-operaturi jikkonformaw mal-objettivi tal-ordni pubbliku li jappoġġaw lill-industriji mħeġġa, inkluża l-produzzjoni tal-inputs ewlenin li jintużaw fil-manifattura tal-prodott taħt rieżami. Dawn il-miżuri jimpedixxu l-forzi tas-suq milli joperaw b’mod ħieles.

(64)

L-investigazzjoni attwali ma żvelat l-ebda evidenza li l-applikazzjoni diskriminatorja jew l-infurzar inadegwat tal-liġijiet dwar il-falliment u l-proprjetà skont l-Artikolu 2(6a)(b), ir-raba’ inċiż, tar-Regolament bażiku fis-settur tal-aluminju ma jaffettwax lill-manifatturi tal-prodott taħt rieżami.

(65)

Il-prodott taħt rieżami huwa affettwat ukoll mid-distorsjonijiet tal-kostijiet tal-pagi skont l-Artikolu 2(6a)(b), il-ħames inċiż, tar-Regolament bażiku, kif imsemmi wkoll hawn fuq fil-premessa (35). Dawk id-distorsjonijiet jaffettwaw lis-settur kemm direttament (waqt il-produzzjoni tal-prodott taħt rieżami jew tal-inputs ewlenin), kif ukoll indirettament (waqt li jkun hemm aċċess għall-inputs minn kumpaniji soġġetti għall-istess sistema lavorattiva fiċ-Ċina).

(66)

Barra minn hekk, ma ġiet ippreżentata l-ebda evidenza fl-investigazzjoni attwali li turi li s-settur tal-prodott taħt rieżami ma huwiex affettwat mill-intervent tal-gvern fis-sistema finanzjarja skont l-Artikolu 2(6a)(b), is-sitt inċiż, tar-Regolament bażiku, kif imsemmi wkoll hawn fuq fil-premessa (35). Anke fil-livell ta’ politika, il-gvern jirregola fil-fond il-miżuri finanzjarji. Pereżempju, id-Deċiżjoni ta’ Guangxi tirrakkomanda: “l-istabbiliment ta’ fond speċjali għall-iżvilupp ta’ kwalità għolja tal-industrija tal-aluminju u ż-żieda tal-appoġġ għat-trasformazzjoni u għat-titjib tal-industrija tal-aluminju. L-għoti ta’ sehem sħiħ lir-rwol ta’ gwida tal-Fond għall-Iżvilupp ta’ Kwalità Għolja Industrijali ta’ Guangxi kif ukoll tal-fondi ta’ investiment tal-industrija tal-gvern fil-livelli kollha; l-inkoraġġiment lill-intrapriżi ewlenin fl-industrija tal-alumina u tal-aluminju elettrolitiku u fil-kapital soċjali biex jipparteċipaw fl-istabbiliment ta’ fondi ta’ investiment industrijali tal-aluminju biex jiffokaw fuq l-appoġġ għall-ipproċessar fil-fond tal-aluminju u proġetti tal-industrija tal-aluminju b’valur miżjud għoli. L-inkoraġġiment lill-istituzzjonijiet finanzjarji biex jinnovaw u jiżviluppaw il-finanzjament tal-katina tal-provvista tal-aluminju, il-finanzjament tat-teknoloġija u l-finanzjament ekoloġiku għall-industrija tal-aluminju, u biex jimplimentaw politiki differenzjati ta’ appoġġ għall-kreditu għal proġetti tal-alumina u tal-aluminju elettrolitiku bħall-konservazzjoni tal-enerġija u t-tnaqqis tal-emissjonijiet, it-trasformazzjoni teknoloġika, l-estensjoni u t-tiswija tal-katina industrijali, u l-użu komprensiv ta’ riżorsi. L-appoġġ lil kumpaniji tal-aluminju kkwalifikati li jridu jiġu elenkati fil-boroż domestiċi u barranin, u li jridu jiġu elenkati fit-Tielet Bord il-Ġdid u fis-swieq reġjonali tan-negozjar tal-ekwità. L-iggwidar tal-intrapriżi tal-aluminju biex jirċievu finanzjament dirett permezz tas-suq tal-bonds. L-appoġġ lit-titolizzazzjoni tal-assi ta’ dejn tal-intrapriżi tal-aluminju permezz ta’ lokazzjoni finanzjarja. L-aġġustament u l-ottimizzazzjoni tal-politiki ta’ appoġġ fiskali u tat-tassazzjoni għall-industrija tal-aluminju; l-aġġustament tal-fokus tal-appoġġ għal oqsma ewlenin tal-katina tal-industrija bħall-ipproċessar fil-fond tal-aluminju, ir-riċerka u l-iżvilupp tat-teknoloġija, is-sigurtà tal-katina tal-provvista, il-konservazzjoni tal-enerġija u t-tnaqqis tal-emissjonijiet, kif ukoll l-iżvilupp tal-aluminju rriċiklat (51).”

(67)

Għalhekk, l-intervent sostanzjali tal-gvern fis-sistema finanzjarja jwassal biex il-kundizzjonijiet tas-suq jiġu affettwati b’mod serju fil-livelli kollha.

(68)

Finalment, il-Kummissjoni tfakkar li sabiex jiġi manifatturat il-prodott taħt rieżami, huma meħtieġa għadd ta’ inputs. Meta l-produtturi tal-prodott taħt rieżami jixtru/jikkuntrattaw dawn l-inputs, il-prezzijiet li dawn iħallsu (u li jiġu rreġistrati bħala l-kostijiet tagħhom) huma esposti b’mod ċar għall-istess distorsjonijiet sistemiċi msemmija qabel. Pereżempju, il-fornituri tal-inputs iħaddmu manodopera li hija soġġetta għad-distorsjonijiet. Huma jistgħu jissellfu flus li huma soġġetti għad-distorsjonijiet fis-settur finanzjarju/l-allokazzjoni tal-kapital. Minbarra dan, huma soġġetti għas-sistema ta’ ppjanar li tapplika fil-livelli kollha tal-gvern u tas-setturi.

(69)

B’konsegwenza ta’ dan, mhux biss il-prezzijiet tal-bejgħ domestiku tal-prodott taħt rieżami ma humiex xierqa għall-użu skont l-Artikolu 2(6a)(a) tar-Regolament bażiku, iżda l-kostijiet tal-inputs kollha (inklużi l-materja prima, l-enerġija, l-art, il-finanzjament, il-manodopera, eċċ.) huma wkoll affettwati minħabba li l-formazzjoni tal-prezzijiet tagħhom hija affettwata minn intervent sostanzjali mill-gvern, kif deskritt fil-Partijiet I u II tar-Rapport aġġornat. Tabilħaqq, l-interventi tal-gvern deskritti fir-rigward tal-allokazzjoni tal-kapital, tal-art, tal-manodopera, tal-enerġija u tal-materja prima huma preżenti fiċ-Ċina kollha kemm hi. Dan ifisser, pereżempju, li input li minnu nnifsu kien immanifatturat fiċ-Ċina permezz tal-kombinazzjoni ta’ firxa ta’ fatturi tal-produzzjoni huwa espost għal distorsjonijiet sinifikanti. L-istess japplika għall-input tal-input u l-bqija.

(70)

Fil-qosor, l-evidenza disponibbli wriet li l-prezzijiet jew il-kostijiet tal-prodott taħt rieżami, inklużi l-kostijiet tal-materja prima, tal-enerġija u tal-manodopera, ma humiex ir-riżultat ta’ forzi tas-suq ħielsa minħabba li huma affettwati minn intervent sostanzjali tal-gvern skont l-Artikolu 2(6a)(b) tar-Regolament bażiku kif muri mill-impatt reali jew potenzjali ta’ wieħed jew aktar mill-elementi rilevanti elenkati fih. Abbażi ta’ dan, u fin-nuqqas ta’ kwalunkwe kooperazzjoni mill-GTĊ, il-Kummissjoni kkonkludiet li ma huwiex xieraq li jintużaw prezzijiet u kostijiet domestiċi biex jiġi stabbilit il-valur normali f’dan il-każ. Konsegwentement, il-Kummissjoni pproċediet sabiex taħdem il-valur normali esklużivament abbażi tal-kostijiet tal-produzzjoni u tal-bejgħ, li jirriflettu prezzijiet jew parametri referenzjarji mingħajr distorsjoni, jiġifieri, f’dan il-każ, abbażi tal-kostijiet korrispondenti tal-produzzjoni u l-bejgħ f’pajjiż rappreżentattiv xieraq, f’konformità mal-Artikolu 2(6a)(a) tar-Regolament bażiku, kif deskritt fit-taqsima li ġejja.

(71)

L-ebda evidenza jew argument għall-kuntrarju ma tressaq mill-GTĊ f’din l-investigazzjoni.

(72)

L-għażla tal-pajjiż rappreżentattiv kienet ibbażata fuq il-kriterji li ġejjin, skont l-Artikolu 2(6a) tar-Regolament bażiku:

(73)

Il-Kummissjoni ħarġet Nota dwar is-sorsi biex jiġi stabbilit il-valur normali. Din in-Nota ddeskriviet il-fatti u l-evidenza li fuqhom huma bbażati l-kriterji rilevanti, u indirizzat il-kummenti li waslu mill-partijiet dwar dawk l-elementi u dwar is-sorsi rilevanti. Fin-Nota, il-Kummissjoni informat lill-partijiet interessati dwar l-intenzjoni tagħha li tuża lit-Turkija bħala pajjiż rappreżentattiv xieraq f’dan il-każ.

(74)

Fin-Nota, il-Kummissjoni identifikat lit-Turkija bħala pajjiżi b’livell simili ta’ żvilupp ekonomiku bħaċ-Ċina skont il-Bank Dinji, jiġifieri t-tnejn huma kklassifikati mill-Bank Dinji bħala pajjiżi “b’introjtu medju superjuri” fuq bażi tal-introjtu nazzjonali gross fejn kien magħruf li jiġi mmanifatturat il-prodott taħt rieżami.

(75)

Qabel il-pubblikazzjoni tan-Nota, il-Kummissjoni rċeviet kummenti dwar il-pajjiż rappreżentattiv mill-applikant li kien issuġġerixxa wkoll li t-Turkija tkun pajjiż rappreżentattiv xieraq.

(76)

Fin-Nota, il-Kummissjoni indikat li għat-Turkija, id-data fir-rigward tad-data finanzjarja mill-produtturi tar-radjaturi tal-aluminju kif ukoll l-importazzjonijiet għall-materja prima, l-enerġija u x-xogħol rilevanti huma disponibbli għall-pubbliku.

(77)

Għalhekk, il-Kummissjoni fittxet fuq Orbis għad-disponibbiltà ta’ data finanzjarja tal-kumpaniji produtturi fit-Turkija (54). Instabet data disponibbli faċilment għal żewġ produtturi ta’ radjaturi tal-aluminju fit-Turkija: Sanica Isi Sanayi Anonim Sirketi u Peksa Profil Sanayi Ve Ticaret Anonim Sirketi. L-aktar rendikonti finanzjarji reċenti ta’ dawn il-kumpaniji jkopru s-sena finanzjarja li tintemm fl-2022. Barra minn hekk, it-Turkija għandha data disponibbli dwar l-importazzjoni dwar il-fatturi meħtieġa tal-produzzjoni, tal-elettriku u tal-kostijiet lavorattivi.

(78)

B’hekk, il-Kummissjoni informat lill-partijiet interessati bin-Nota li hija kellha l-ħsieb li tuża lit-Turkija bħala pajjiż rappreżentattiv xieraq u d-data taż-żewġ kumpaniji msemmija hawn fuq, f’konformità mal-Artikolu 2(6a)(a), l-ewwel inċiż, tar-Regolament bażiku sabiex tikseb prezzijiet jew parametri referenzjarji mingħajr distorsjoni għall-kalkolu tal-valur normali.

(79)

Il-partijiet interessati ġew mistiedna jikkummentaw dwar l-adegwatezza tat-Turkija bħala pajjiż rappreżentattiv u ta’ dawk iż-żewġ kumpaniji bħala produtturi fil-pajjiż rappreżentattiv.

(80)

Il-Kummissjoni ma rċeviet l-ebda kumment wara l-pubblikazzjoni tan-Nota.

(81)

Wara li ġie stabbilit li t-Turkija kienet l-uniku pajjiż rappreżentattiv xieraq disponibbli, abbażi tal-elementi kollha ta’ hawn fuq, ma kienx hemm bżonn li titwettaq valutazzjoni tal-livell ta’ protezzjoni soċjali u ambjentali f’konformità mal-aħħar sentenza tal-Artikolu 2(6a)(a), l-ewwel inċiż, tar-Regolament bażiku.

(82)

Fid-dawl tal-analiżi ta’ hawn fuq, it-Turkija ssodisfat il-kriterji stabbiliti fl-Artikolu 2(6a)(a), l-ewwel inċiż, tar-Regolament bażiku sabiex titqies bħala pajjiż rappreżentattiv xieraq.

(83)

Fin-Nota, il-Kummissjoni elenkat il-fatturi tal-produzzjoni bħall-materjali, l-enerġija u l-manodopera użati fil-produzzjoni tal-prodott taħt rieżami skont il-metodoloġija spjegata mill-applikant u li tirrifletti l-proċess tal-manifattura użat fl-Unjoni. Il-Kummissjoni ddikjarat ukoll li, sabiex taħdem il-valur normali f’konformità mal-Artikolu 2(6a)(a) tar-Regolament bażiku, hija se tuża l-GTA (55) biex tistabbilixxi l-kost mingħajr distorsjoni tal-biċċa l-kbira tal-fatturi tal-produzzjoni, b’mod partikolari l-materja prima. Barra minn hekk, il-Kummissjoni ddikjarat li se tuża l-Istitut Tork tal-Istatistika biex tistabbilixxi l-kost mingħajr distorsjoni tal-manodopera, (56) u l-Awtorità Regolatorja tas-Suq tal-Enerġija tat-Turkija biex tistabbilixxi l-kost mingħajr distorsjoni tal-enerġija. (57)

(84)

Il-Kummissjoni stiednet lill-partijiet interessati jikkummentaw u jipproponu informazzjoni pubblikament disponibbli dwar valuri mingħajr distorsjoni għal kull wieħed mill-fatturi tal-produzzjoni msemmija f’dik in-nota. Il-Kummissjoni ma rċeviet l-ebda kumment dwar il-lista ta’ fatturi tal-produzzjoni wara l-pubblikazzjoni tan-Nota.

(85)

Meta titqies l-informazzjoni kollha bbażata fuq it-talba u l-informazzjoni sussegwenti analizzata mill-Kummissjoni, il-fatturi tal-produzzjoni li ġejjin u s-sorsi tagħhom ġew identifikati sabiex jiġi ddeterminat il-valur normali f’konformità mal-Artikolu 2(6a)(a) tar-Regolament bażiku:

Tabella 1

Il-fatturi tal-produzzjoni tar-radjaturi tal-aluminju

(86)

Radjatur tal-aluminju jista’ jsir bl-użu ta’ diversi metodi, bl-aktar mod komuni jkun l-ikkastjar u l-estrużjoni. Radjatur tal-aluminju huwa rikonoxxut b’mod komuni bħala wieħed li fih il-metall użat huwa aluminju jew liga tal-aluminju, jew b’mod aktar ġenerali meta l-metall użat ikun l-aktar aluminju.

(87)

Biex jiġi stabbilit il-prezz mingħajr distorsjoni tal-materja prima kif ikkonsenjata sal-bieb ta’ produttur rappreżentattiv tal-pajjiż, il-Kummissjoni użat bħala bażi l-prezz medju ponderat ta’ importazzjoni fil-pajjiż rappreżentattiv kif irrapportat fil-bażi tad-data tal-GTA li miegħu żdiedu d-dazji fuq l-importazzjoni u l-kostijiet tat-trasport. Prezz tal-importazzjoni fil-pajjiż rappreżentattiv ġie ddeterminat bħala medja ponderata tal-prezzijiet ta’ unità tal-importazzjonijiet mill-pajjiżi terzi kollha, minbarra ċ-Ċina u l-pajjiżi li ma humiex membri tad-WTO, elenkati fl-Anness I tar-Regolament (UE) 2015/755 tal-Parlament Ewropew u tal-Kunsill (60). Il-Kummissjoni ddeċidiet li teskludi l-importazzjonijiet miċ-Ċina lejn il-pajjiż rappreżentattiv peress li fil-premessa (70) u t-Taqsima 3.3 kkonkludiet li ma huwiex xieraq li jintużaw il-prezzijiet u l-kostijiet domestiċi fiċ-Ċina minħabba l-eżistenza ta’ distorsjonijiet sinifikanti f’konformità mal-Artikolu 2(6a)(b) tar-Regolament bażiku. Minħabba li ma hemm l-ebda evidenza li turi li l-istess distorsjonijiet ma jaffettwawx bl-istess mod il-prodotti maħsuba għall-esportazzjoni, il-Kummissjoni qieset li l-istess distorsjonijiet affettwaw il-prezzijiet tal-esportazzjoni tal-materja prima. Wara li ġew esklużi l-importazzjonijiet miċ-Ċina lejn il-pajjiż rappreżentattiv, il-volum tal-importazzjonijiet minn pajjiżi terzi oħrajn baqa’ rappreżentattiv.

(88)

L-Istitut Tork tal-Istatistika jippubblika informazzjoni dettaljata dwar il-pagi f’setturi ekonomiċi differenti fit-Turkija (61). Il-Kummissjoni stabbiliet il-parametru referenzjarju għall-perjodu ta’ investigazzjoni abbażi tal-kost lavorattiv medju fis-siegħa għas-settur tal-manifattura (62) fl-2020, indiċjat għall-2023.. Il-kost lavorattiv medju fis-siegħa għal kull FTE (63) jammonta għal 35,02 CNY għal kull siegħa.

(89)

Il-prezz tal-elettriku għall-kumpaniji (l-utenti industrijali) fit-Turkija huwa ppubblikat mill-Awtorità Regolatorja tas-Suq tal-Enerġija tat-Turkija (64). Il-Kummissjoni użat id-data dwar il-prezzijiet tal-elettriku industrijali kif ippubblikata fil-15 ta’ Lulju 2024. Din l-istatistika tindika tariffa industrijali medja għall-2023 ta’ 1,12 CNY għal kull kWh.

(90)

Skont l-Artikolu 2(6a)(a) tar-Regolament bażiku, “il-valur normali maħdum għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”. Barra minn hekk, jeħtieġ li jiġi stabbilit valur għall-kostijiet ġenerali tal-manifattura biex ikopri l-kostijiet mhux inklużi fil-fatturi tal-produzzjoni msemmija hawn fuq.

(91)

Sabiex tistabbilixxi valur mingħajr distorsjoni tal-ispejjeż ġenerali tal-manifattura, tal-SG&A u tal-profitt u minħabba n-nuqqas ta’ kooperazzjoni mill-produtturi esportaturi Ċiniżi, il-Kummissjoni użat il-fatti disponibbli f’konformità mal-Artikolu 18 tar-Regolament bażiku.

(92)

Bl-użu tad-data minn żewġ produtturi Torok tar-radjaturi tal-aluminju (Sanica Isi Sanayi Anonim Sirketi u Peksa Profil Sanayi Ve Ticaret Anonim Sirketi (65)), il-Kummissjoni kkalkolat l-SG&A (10,33 %) u l-profitt (9,12 %) bħala perċentwal tal-kost tal-prodotti mibjugħa.

(93)

Il-Kummissjoni użat l-informazzjoni pprovduta mill-applikant fit-talba għal rieżami biex jiġu kkalkulati l-kostijiet ġenerali tal-manifattura. Dawn il-kostijiet ġew iddeterminati bħala perċentwal, billi l-kostijiet ġenerali tal-manifattura ġew diviżi bil-kostijiet diretti u indiretti. Imbagħad, dan il-perċentwal (15,6 %) ġie applikat għall-valur mingħajr distorsjoni tal-kost tal-manifattura biex jinkiseb il-valur mingħajr distorsjoni tal-kostijiet ġenerali tal-manifattura.

(94)

Abbażi ta’ dak li ntqal hawn fuq, il-Kummissjoni ħadmet il-valur normali fuq bażi ex-works f’konformità mal-Artikolu 2(6a)(a) tar-Regolament bażiku.

(95)

L-ewwel nett, il-Kummissjoni stabbiliet il-kostijiet mingħajr distorsjoni tal-manifattura. Fin-nuqqas ta’ kooperazzjoni mill-produtturi esportaturi, il-Kummissjoni bbażat fuq l-informazzjoni pprovduta mill-applikant fit-talba għal rieżami dwar l-użu ta’ kull fattur (il-materjali u l-manodopera) għall-produzzjoni tar-radjaturi tal-aluminju. Il-Kummissjoni mmultiplikat il-proporzjonijiet tal-konsum bil-kostijiet mhux distorti għal kull unità osservati fil-pajjiż rappreżentattiv, it-Turkija, kif deskritt fit-Taqsima 3.3.2.

(96)

Ladarba ġew stabbiliti l-kostijiet mingħajr distorsjoni tal-manifattura, il-Kummissjoni żiedet il-kostijiet ġenerali tal-manifattura, l-SG&A u l-profitt, kif innotat fit-Taqsima 3.3.2.5:

(97)

Abbażi ta’ dan, il-Kummissjoni ħadmet il-valur normali fuq bażi ex-works f’konformità mal-Artikolu 2(6a)(a) tar-Regolament bażiku.

(98)

Matul il-perjodu taħt kunsiderazzjoni u, b’mod partikolari, matul il-perjodu ta’ investigazzjoni tar-rieżami, l-importazzjonijiet ta’ radjaturi tal-aluminju miċ-Ċina kienu negliġibbli. Skont il-Eurostat, il-volum tal-importazzjonijiet tar-radjaturi tal-aluminju miċ-Ċina ammonta għal 159 913-il element (66) fil-PIR, u dan kien ugwali għal sehem mis-suq tal-UE fil-medda ta’ 0,5 – 1 %. B’paragun ma’ dan, is-sehem mis-suq tal-importazzjonijiet Ċiniżi ammonta għal 24 % fil-perjodu ta’ investigazzjoni oriġinali u għal 3 % fil-perjodu ta’ investigazzjoni tar-rieżami preċedenti.

(99)

Dan il-volum negliġibbli ma setax jifforma l-bażi għall-analiżi tal-kontinwazzjoni tad-dumping. Għalhekk, il-Kummissjoni analizzat il-probabbiltà ta’ rikorrenza ta’ dumping fit-taqsima li jmiss.

(100)

Il-Kummissjoni investigat, f’konformità mal-Artikolu 11(2) tar-Regolament bażiku, il-probabbiltà ta’ rikorrenza ta’ dumping, f’każ li l-miżuri jitħallew jiskadu. Ġew analizzati l-elementi li ġejjin: il-prezzijiet tal-esportazzjoni lejn pajjiżi terzi, il-kapaċità tal-produzzjoni u l-kapaċità ta’ riżerva fiċ-Ċina, l-attraenza tas-suq tal-Unjoni u l-kapaċità ta’ assorbiment possibbli tas-swieq ta’ pajjiżi terzi fid-dawl tal-miżuri anti-dumping fis-seħħ f’dawn il-pajjiżi.

(101)

Il-Kummissjoni analizzat ix-xejra tal-prezzijiet tal-esportazzjonijiet Ċiniżi lejn pajjiżi terzi matul il-perjodu ta’ investigazzjoni tar-rieżami.

(102)

Il-Kummissjoni l-ewwel analizzat id-data dwar l-esportazzjoni miċ-Ċina lejn pajjiżi terzi fil-livell tal-kodiċi doganali ta’ 8 ċifri fl-Atlas tal-Kummerċ globali matul il-perjodu ta’ investigazzjoni tar-rieżami. Madankollu, dawn il-prezzijiet tal-esportazzjoni ma tqisux li jirrappreżentaw b’mod akkurat il-prezzijiet tar-radjaturi tal-aluminju minħabba li l-klassifikazzjonijiet f’dak il-livell inkludew firxa wiesgħa ta’ prodotti apparti l-prodott ikkonċernat, b’hekk inqabeż bi kbir (mill-inqas 100 darba) il-volum tal-importazzjonijiet ta’ radjaturi tal-aluminju. Għalhekk, l-istatistiki tal-esportazzjoni Ċiniżi ma jipprovdux evidenza konklużiva dwar il-prezzijiet tal-esportazzjoni Ċiniżi fi swieq oħra.

(103)

Min-naħa tagħha, bħala konsegwenza tan-nuqqas ta’ kooperazzjoni tal-produtturi esportaturi miċ-Ċina, l-istima tal-prezzijiet tal-esportazzjoni miċ-Ċina lejn pajjiżi terzi kienet ibbażata fuq l-informazzjoni disponibbli għall-Kummissjoni, jiġifieri, l-informazzjoni pprovduta fit-talba għal rieżami, jiġifieri l-kwotazzjonijiet bil-prezzijiet Ċiniżi lill-importaturi f’pajjiżi terzi. B’mod partikolari, l-applikant ipprovda diversi offerti ta’ prezzijiet lil pajjiżi fil-prossimità tal-Unjoni, bħall-Moldova, ir-Russja u l-Ażerbajġan, kif ukoll kwotazzjonijiet minn pjattaformi ta’ bejgħ online.

(104)

Il-Kummissjoni aġġustat il-prezz stmat tal-esportazzjoni lejn pajjiżi terzi kif deskritt fil-premessa (103) għad-differenzi li jaffettwaw il-prezzijiet u l-komparabbiltà tal-prezzijiet, f’konformità mal-Artikolu 2(10) tar-Regolament bażiku. F’dan ir-rigward, l-Artikolu 2(10) tar-Regolament bażiku jirrikjedi li l-Kummissjoni tagħmel paragun ġust bejn il-valur normali u l-prezz tal-esportazzjoni fl-istess livell ta’ kummerċ u tagħmel provvedimenti għad-differenzi fil-fatturi li jaffettwaw il-prezzijiet u l-komparabbiltà tal-prezzijiet. F’dan il-każ, il-Kummissjoni aġġustat il-prezz tal-esportazzjoni għal-livell ex-works billi neħħiet il-kost tat-trasport domestiku (67).

(105)

Il-prezz medju tal-esportazzjoni lejn pajjiżi terzi stmat kif deskritt fil-premessa (103) kien ta’ EUR 3,68/element espress fil-FOB, jew EUR 3,52/element meta aġġustat għal-livell ex-works.

(106)

Il-prezz medju tal-esportazzjoni lejn pajjiżi terzi li jirriżulta li nstab matul il-perjodu ta’ investigazzjoni tar-rieżami kien 34,4 % inqas mill-valur normali stabbilit abbażi tal-kriterji indikati fit-taqsimiet 3.2 u 3.3 hawn fuq. Għalhekk, tqies probabbli li, kieku l-miżuri kurrenti kellhom jiġu revokati, il-produtturi esportaturi Ċiniżi jibdew jbigħu lill-Unjoni f’livelli inqas mill-valur normali.

(107)

Wara d-divulgazzjoni, l-applikant indika li kien hemm diskrepanza fil-prezz tal-esportazzjoni ex-works u fil-marġni tad-dumping li jirriżulta bejn id-Dokument ta’ Divulgazzjoni u l-fajl tal-kalkolu tad-dumping. Peress li d-diskrepanza kienet dovuta għal żball klerikali fil-fajl tal-kalkolu tad-dumping, il-Kummissjoni kkoreġietu.

(108)

Fir-rigward tal-kapaċità tal-produzzjoni u l-kapaċità ta’ riżerva fiċ-Ċina, minħabba n-nuqqas ta’ kooperazzjoni tal-produtturi Ċiniżi, is-sejbiet kienu bbażati fuq l-informazzjoni pprovduta fit-talba għal rieżami ta’ skadenza. L-applikant ipprovda evidenza li s-suq tal-aluminju Ċiniż kien qed jespandi u li se jkompli jespandi anki wara l-2026. Abbażi ta’ din l-informazzjoni, fis-sena sħiħa 2022, il-produzzjoni tal-aluminju taċ-Ċina kienet l-ogħla li qatt ġiet irreġistrata (68). Barra minn hekk, f’Settembru 2023 ġie rrapportat li “iċ-Ċina tixpruna l-output globali tal-aluminju għal ammont rekord” (69). Fl-aħħar nett, studju indipendenti mitlub mill-applikant, “China Household Aluminium Radiators Industry Market Research Report” (70), aġġornat f’Ottubru 2023, jipprovdi data sinifikanti u riċenti dwar il-kapaċità żejda Ċiniża.

(109)

B’mod partikolari, l-istudju jistma l-kapaċità tal-produzzjoni Ċiniża tar-radjaturi tal-aluminju għal madwar 240 miljun element fis-sena fl-2023, żieda ta’ 35 miljun element meta mqabbla mal-2021. Din iż-żieda fil-kapaċità taqbeż iż-żieda fil-produzzjoni, li żdiedet minn 188 miljun għal 217-il miljun element matul l-istess perjodu, żieda ta’ 29 miljun element.

(110)

Kemm iż-żieda fil-produzzjoni kif ukoll iż-żieda fil-kapaċità tal-produzzjoni bejn l-2021 u l-2023 kienu ogħla b’mod sinifikanti miż-żieda fil-konsum domestiku fiċ-Ċina, li żdied biss minn 19-il miljun għal 23 miljun element, żieda ta’ 4 miljun element biss.

(111)

B’konsegwenza ta’ dan, il-kapaċità ta’ riżerva kibret minn 17-il miljun għal 23 miljun element bejn l-2021 u l-2023, kważi daqs il-konsum totali tal-Unjoni ta’ 23-25 miljun element matul il-PIR.

(112)

Barra minn hekk, la l-istudju u lanqas l-investigazzjoni ma xeħtu dawl fuq xi elementi li jistgħu jindikaw kwalunkwe żieda sinifikanti fl-esportazzjonijiet Ċiniżi lejn pajjiżi terzi oħra minħabba li ma hemm l-ebda informazzjoni disponibbli li tindika kwalunkwe żieda sinifikanti fid-domanda għar-radjaturi tal-aluminju madwar id-dinja.

(113)

Għalhekk, fin-nuqqas ta’ kwalunkwe informazzjoni oħra, il-Kummissjoni qieset li la d-domanda domestika Ċiniża u lanqas id-domanda dinjija ma huma se jkunu jistgħu jassorbu l-kapaċità ta’ riżerva sinifikanti disponibbli fiċ-Ċina.

(114)

Dan jikkonferma l-konklużjonijiet tal-Kummissjoni mir-rieżami ta’ skadenza preċedenti (71) li l-produtturi Ċiniżi għandhom biżżejjed kapaċità ta’ riżerva biex ifornu lis-suq tal-Unjoni jekk il-miżuri jitħallew jiskadu.

(115)

Is-suq tal-Unjoni għal radjaturi tal-aluminju, li huwa 23-25 miljun element fil-PIR, huwa wieħed mill-akbar swieq fid-dinja. Għalkemm il-konsum tal-Unjoni ta’ radjaturi tal-aluminju naqas bi 22 % matul il-perjodu kkunsidrat minħabba tnaqqis fl-industrija tal-kostruzzjoni spjegat fil-premessa (132), għadu suq b’saħħtu xprunat minn regolamenti stretti dwar l-effiċjenza enerġetika u r-rinnovazzjoni ta’ bini antik sabiex jiġu ssodisfati standards ġodda u jitnaqqsu l-emissjonijiet tal-karbonju.

(116)

Sabiex ikollha indikazzjoni tal-prezzijiet probabbli għall-Unjoni fin-nuqqas ta’ miżuri, il-Kummissjoni analizzat il-prezzijiet tal-esportazzjoni tar-radjaturi tal-aluminju li joriġinaw miċ-Ċina lejn swieq oħra tal-esportazzjoni barra mill-Unjoni. Kif spjegat fil-premessi (102) u (103), minħabba li l-istatistiki tal-esportazzjoni bil-kodiċi doganali ta’ 8 ċifri ma jipprovdux valuri akkurati u minħabba n-nuqqas ta’ kooperazzjoni, il-Kummissjoni stabbiliet prezzijiet tal-esportazzjoni bl-użu ta’ fatturi u kwotazzjonijiet attwali mill-produtturi esportaturi Ċiniżi lejn swieq terzi, kif ipprovdut mill-applikant (ara wkoll il-premessa (103) hawn fuq).

(117)

Fil-PIR, il-prezz medju tal-bejgħ tal-industrija tal-Unjoni kien ta’ EUR 8,56/element. Dan huwa 82 % ogħla mill-prezz medju tal-bejgħ tar-radjaturi tal-aluminju Ċiniżi (jiġifieri EUR 4,70/element), ikkalkolat bl-użu tal-kwotazzjonijiet magħmula mill-produtturi esportaturi Ċiniżi lill-klijenti fil-Moldova, fir-Russja u fl-Ażerbajġan, kif ukoll kwotazzjonijiet minn pjattaformi tal-bejgħ online, li ġew ipprovduti fit-talba għal rieżami.

(118)

Dawn il-prezzijiet tal-esportazzjoni kienu ferm aktar baxxi meta mqabbla mal-prezzijiet tal-industrija tal-Unjoni u għalhekk, is-suq tal-Unjoni, f’termini ta’ prezzijiet, jibqa’ attraenti għall-produtturi Ċiniżi.

(119)

Qabel l-impożizzjoni tal-miżuri fl-2012, l-importazzjonijiet Ċiniżi fl-Unjoni ammontaw għal 10,6 miljun element fis-sena. Minbarra l-miżuri imposti fuq l-importazzjonijiet Ċiniżi li huma soġġetti għal dan ir-rieżami, ġew imposti miżuri anti-dumping fuq importazzjonijiet ta’ radjaturi tal-aluminju miċ-Ċina minn ħafna pajjiżi terzi oħrajn (72), u dan jagħmilha aktar diffiċli għall-produtturi esportaturi Ċiniżi li jesportaw lejn dawn is-swieq u jkompli jżid l-attraenza tas-suq tal-Unjoni f’dak li għandu x’jaqsam ma’ fejn dawn l-esportazzjonijiet jistgħu jiġu ridiretti.

(120)

Skont l-informazzjoni tal-bażi tad-data tad-WTO (73), il-Kummissjoni sabet li d-dazji anti-dumping u d-dazji kumpensatorji kienu applikabbli fl-2023 fuq l-importazzjonijiet ta’ radjaturi tal-aluminju Ċiniżi fl-Arġentina u fir-Renju Unit (74). Dawn ir-restrizzjonijiet jikkostitwixxu fattur ta’ limitazzjoni tal-esportazzjoni għal produtturi Ċiniżi ta’ radjaturi tal-aluminju. Madankollu, abbażi tat-talba għal rieżami (75) u l-konklużjonijiet fil-premessi (108) u (109), il-produtturi Ċiniżi huma orjentati b’mod sinifikanti lejn l-esportazzjoni, peress li l-konsum intern taċ-Ċina tar-radjaturi tal-aluminju huwa stmat li huwa biss wieħed minn għaxra tal-volum tal-produzzjoni totali tagħha.

(121)

Minħabba d-diffikultajiet tal-esportaturi Ċiniżi biex ibigħu lil dawn is-swieq minħabba l-miżuri imposti minn dawk il-pajjiżi terzi l-oħrajn fuq l-importazzjonijiet ta’ radjaturi tal-aluminju miċ-Ċina, jekk il-miżuri kurrenti jitħallew jiskadu, is-suq tal-Unjoni jsir saħansitra aktar attraenti għall-esportaturi Ċiniżi li jfittxu li jesportaw il-produzzjoni żejda tagħhom u jużaw il-kapaċità ta’ riżerva.

(122)

Fil-kummenti tagħhom dwar id-Dokument ta’ Divulgazzjoni Ġenerali, l-applikant fakkar li fl-2024, l-Ukrajna bdiet investigazzjoni anti-dumping dwar l-importazzjonijiet ta’ radjaturi tal-aluminju miċ-Ċina.

(123)

Abbażi ta’ dan ta’ hawn fuq, b’mod partikolari minħabba l-kapaċità żejda sinifikanti disponibbli fiċ-Ċina u l-attraenza tas-suq tal-Unjoni, il-Kummissjoni tistenna li revoka tal-miżuri x’aktarx li tirriżulta f’li jerġa’ jkun hemm dumping, u li l-esportazzjonijiet li huma l-oġġett ta’ dumping se jidħlu fis-suq tal-Unjoni fi kwantitajiet sinifikanti. Għalhekk jitqies li jkun hemm probabblità ta’ rikorrenza ta’ dumping f’każ li l-miżuri antidumping kurrenti jitħallew jiskadu.

(124)

Il-prodott simili kien immanifatturat minn 11-il produttur fl-Unjoni matul il-perjodu kkunsidrat. Huma jikkostitwixxu l-“industrija tal-Unjoni” skont it-tifsira tal-Artikolu 4(1) tar-Regolament bażiku.

(125)

Il-Kummissjoni stabbiliet il-produzzjoni tal-Unjoni abbażi tal-informazzjoni kollha disponibbli li tikkonċerna l-industrija tal-Unjoni bħal:

(126)

Sabiex tipproteġi l-kunfidenzjalità tad-data ta’ FIR, il-Kummissjoni ma setgħetx tiżvela ċ-ċifri eżatti miksuba bl-għaqid tad-data tal-FIR mad-data pprovduta minn Airal għal produtturi oħrajn tal-Unjoni. Għalhekk, il-Kummissjoni pprovdiet din l-informazzjoni f’firxiet u f’indiċijiet, fejn ipprovdiet informazzjoni suffiċjenti lill-partijiet interessati kollha biex jifhmu l-analiżi u l-konklużjonijiet tal-Kummissjoni u jipprovdu kummenti f’dan ir-rigward.

(127)

Il-produzzjoni totali tal-Unjoni matul il-perjodu ta’ investigazzjoni tar-rieżami ġiet stabbilita għal madwar [30-32] miljun tunnellata. Kif indikat fil-premessa (13), il-produtturi tal-Unjoni inklużi fil-kampjun irrappreżentaw 65 % tal-produzzjoni totali tal-Unjoni tal-prodott simili.

(128)

Il-Kummissjoni stabbiliet il-konsum tal-Unjoni abbażi tal-bejgħ totali tal-industrija tal-Unjoni fl-Unjoni u l-importazzjonijiet totali minn pajjiżi terzi lejn l-Unjoni.

(129)

Il-bejgħ tal-industrija tal-Unjoni fl-Unjoni nkiseb mill-bejgħ ivverifikat fl-Unjoni tal-produtturi tal-Unjoni inklużi fil-kampjun, mid-data pprovduta mill-applikant fil-kwestjonarju makroekonomiku u mid-data riċevuta separatament minn FIR.

(130)

Għall-importazzjonijiet, il-Kummissjoni bbażat fuq il-bażi tad-data Sorveljanza (76). Billi l-bażi tad-data Sorveljanza pprovdiet biss il-piż u mhux l-għadd ta’ elementi importati, kien meħtieġ li l-piż jiġi kkonvertit f’elementi billi jintuża fattur ta’ konverżjoni bbażat fuq id-data vverifikata tat-tliet produtturi tal-Unjoni inklużi fil-kampjun indikati fil-premessa (23) hawn fuq.

(131)

Il-konsum tal-Unjoni żviluppa kif ġej:

Tabella 2

Il-konsum tal-Unjoni

(132)

Il-konsum tal-Unjoni tar-radjaturi tal-aluminju naqas bi 22 % matul il-perjodu taħt kunsiderazzjoni. Analiżi minn sena għal sena turi żieda ta’ 18 % mill-2020 sal-2021, segwita minn tnaqqis gradwali fil-konsum fis-sentejn ta’ wara.

(133)

Iż-żieda qawwija fid-domanda għal radjaturi tal-aluminju mill-2020 sal-2021 kienet xprunata prinċipalment mit-tkabbir esperjenzat fl-attivitajiet ta’ kostruzzjoni residenzjali u kummerċjali wara t-tnedija ta’ diversi pakketti ta’ stimolu ekonomiku biex tingħata spinta lill-ekonomija wara t-tifqigħa tal-COVID-19. Fl-Italja, pereżempju, fejn huma bbażati l-produtturi tal-Unjoni inklużi fil-kampjun, ’l hekk imsejjaħ “Digriet ta’ tnedija mill-ġdid (77) ipprovda inċentivi għar-rinnovazzjoni ta’ bini residenzjali u t-titjib tal-effiċjenza enerġetika.

(134)

Madankollu, id-domanda għar-radjaturi tal-aluminju bdiet tonqos fl-2022 bil-bidu tal-kriżi tal-enerġija u ż-żieda rapida fil-prezzijiet tal-materja prima u fir-rati tal-imgħax. Ix-xejra negattiva kompliet fil-PIR, bil-konsum jonqos minn [36-38] miljun element għal [23-25] miljun element, kważi l-istess livelli tal-2014.

(135)

Il-Kummissjoni stabbiliet il-volum tal-importazzjonijiet ta’ radjaturi tal-aluminju miċ-Ċina abbażi tal-bażi tad-data Sorveljanza, ikkonvertiti f’elementi bl-użu bħala fattur ta’ konverżjoni abbażi tad-data vverifikata tat-tliet produtturi tal-Unjoni inklużi fil-kampjun, kif iddikjarat fil-premessa (130). Is-sehem mis-suq tal-importazzjonijiet ġie stabbilit billi tqabblu l-volumi tal-importazzjonijiet mal-konsum tal-Unjoni kif muri fit-Tabella 2.

(136)

L-importazzjonijiet fl-Unjoni miċ-Ċina żviluppaw kif ġej:

Tabella 3

Volum tal-importazzjonijiet u sehem mis-suq

(137)

Matul il-perjodu kkunsidrat, l-importazzjonijiet tar-radjaturi tal-aluminju miċ-Ċina kienu limitati fil-kwantitajiet u naqsu b’mod stabbli b’61 %, u laħqu l-aktar punt baxx fil-PIR. Is-sehem mis-suq tal-importazzjonijiet miċ-Ċina naqas bi 38 % fl-2021 u mbagħad baqa’ stabbli mill-2021 sal-PIR minħabba l-konsum aktar baxx.

(138)

Il-Kummissjoni stabbiliet il-prezzijiet tal-importazzjonijiet abbażi tal-bażi tad-data Sorveljanza.

(139)

Il-prezz medju tal-importazzjonijiet lejn l-Unjoni miċ-Ċina żviluppa kif ġej:

Tabella 4

Prezzijiet medji tal-importazzjoni

(140)

Il-prezzijiet tal-importazzjoni miċ-Ċina żdiedu f’konformità max-xejriet tas-suq. Dawn laħqu l-ogħla livell tagħhom fl-2022, meta kienu saħansitra ogħla mill-prezz medju tal-kumpaniji inklużi fil-kampjun, iżda naqsu b’25 % fil-PIR. B’mod ġenerali, dawn żdiedu b’117 % matul il-perjodu kkunsidrat.

(141)

Il-prezzijiet tal-importazzjoni miċ-Ċina żdiedu f’konformità max-xejriet tas-suq bejn l-2020 u l-2022. Fil-PIR, il-prezz medju tal-importazzjoni għal kull unità miċ-Ċina lejn l-Unjoni naqas u kien aktar baxx kemm mill-prezz medju tal-bejgħ għal kull unità kif ukoll mill-kost medju tal-produzzjoni għal kull unità fl-Unjoni, kif irrapportat fit-Tabella 9 hawn taħt.

(142)

L-importazzjonijiet tar-radjaturi tal-aluminju minn pajjiżi terzi għajr iċ-Ċina kienu prinċipalment mill-Iran u mit-Turkija.

(143)

Il-volum tal-importazzjonijiet fl-Unjoni kif ukoll is-sehem mis-suq u x-xejriet fil-prezzijiet għall-importazzjonijiet tar-radjaturi tal-aluminju minn pajjiżi terzi oħrajn żviluppaw kif ġej:

Tabella 5

Importazzjonijiet minn pajjiżi terzi

(144)

L-importazzjonijiet minn pajjiżi terzi żdiedu bi 19 % matul il-perjodu kkunsidrat, u laħqu l-ogħla livell tagħhom fl-2022, iżda essenzjalment is-sehem mis-suq baqa’ stabbli. Il-prezz medju tal-importazzjonijiet minn pajjiżi terzi żdied b’aktar mid-doppju matul il-perjodu kkunsidrat.

(145)

Wara d-divulgazzjoni, l-applikant talab lill-Kummissjoni biex turi separatament il-volumi, l-ishma mis-suq u l-prezz medju tal-importazzjonijiet mill-Iran u mit-Turkija. Il-Kummissjoni aġġornat it-Tabella 5 hawn fuq skont dan.

(146)

Il-valutazzjoni tas-sitwazzjoni ekonomika tal-industrija tal-Unjoni inkludiet evalwazzjoni tal-indikaturi ekonomiċi kollha li influwenzaw l-istat tal-industrija tal-Unjoni matul il-perjodu kkunsidrat.

(147)

Kif imsemmi fil-premessa (11), il-kampjunar intuża għall-valutazzjoni tas-sitwazzjoni ekonomika tal-industrija tal-Unjoni.

(148)

Biex tiddetermina d-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi.

(149)

Il-Kummissjoni evalwat l-indikaturi makroekonomiċi abbażi tad-data li tinsab fit-talba għal rieżami, fit-tweġibiet ivverifikati għall-kwestjonarju tal-produtturi tal-Unjoni inklużi fil-kampjun kif ukoll fid-data makroekonomika pprovduta minn AIRAL u minn FIR. Id-data tinkludi l-produtturi kollha tal-Unjoni.

(150)

Il-Kummissjoni evalwat l-indikaturi mikroekonomiċi abbażi tad-data vverifikata inkluża fit-tweġibiet għall-kwestjonarju mill-produtturi tal-Unjoni inklużi fil-kampjun. Id-data kienet relatata mal-produtturi tal-Unjoni inklużi fil-kampjun.

(151)

Iż-żewġ settijiet ta’ data nstabu li kienu rappreżentattivi tas-sitwazzjoni ekonomika tal-industrija tal-Unjoni.

(152)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, it-tkabbir, l-impjiegi u l-produttività, u l-irkupru minn dumping tal-passat.

(153)

L-indikaturi mikroekonomiċi huma: il-prezzijiet medji ta’ unità, il-kost unitarju, il-kostijiet lavorattivi, l-inventarji, il-profittabilità, il-fluss tal-flus, l-investimenti, ir-redditu fuq l-investimenti, u l-kapaċità li jiġi ġġenerat il-kapital.

(154)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu kkunsidrat:

Tabella 6

Il-produzzjoni, il-kapaċità tal-produzzjoni u l-użu tal-kapaċità fl-Unjoni

(155)

Il-volum tal-produzzjoni tal-industrija tal-Unjoni naqas b’21 % matul il-perjodu kkunsidrat. Analiżi minn sena għal sena turi żieda ta’ 20 % mill-2020 sal-2021, segwita minn tnaqqis gradwali mill-2021 sal-PIR. Dan huwa konsistenti max-xejra fid-domanda għar-radjaturi tal-aluminju fl-Unjoni, kif muri fit-Tabella 2.

(156)

Il-kapaċità tal-produzzjoni naqset b’9 % matul il-perjodu taħt kunsiderazzjoni. Din baqgħet relattivament stabbli mill-2020 sal-2022 u mbagħad naqset b’6 %, u dan juri li l-industrija tal-Unjoni kienet kapaċi tnaqqas parzjalment il-kapaċità biex tindirizza t-tnaqqis fil-produzzjoni fil-PIR.

(157)

L-użu tal-kapaċità naqas bi 13 % matul il-perjodu taħt kunsiderazzjoni, u dan jirrifletti x-xejra ta’ tnaqqis fil-produzzjoni minkejja l-kapaċità ta’ produzzjoni mnaqqsa.

(158)

Il-volum tal-bejgħ u s-sehem mis-suq tal-industrija tal-Unjoni żviluppaw kif ġej matul il-perjodu kkunsidrat:

Tabella 7

Il-volum tal-bejgħ u s-sehem mis-suq

(159)

Il-volum tal-bejgħ tal-industrija tal-Unjoni fis-suq tal-Unjoni naqas bi 23 % matul il-perjodu kkunsidrat. Ix-xejra tal-bejgħ irriflettiet ix-xejriet fil-konsum tal-Unjoni u fil-volum tal-produzzjoni. Il-bejgħ żdied bi 17 % mill-2020 sal-2021 biex jissodisfa ż-żieda fid-domanda fis-suq tal-Unjoni, kif spjegat fil-premessa (133), imbagħad naqas gradwalment fl-2022 u fil-PIR minħabba tnaqqis fid-domanda kkawżat minn prezzijiet u rati tal-imgħax ogħla, kif spjegat fil-premessa (134).

(160)

Is-sehem mis-suq tal-industrija tal-Unjoni baqa’ stabbli matul il-perjodu kkunsidrat, wara t-tnaqqis kemm fil-konsum kif ukoll fil-volum tal-bejgħ tal-Unjoni u t-tnaqqis fl-importazzjonijiet.

(161)

Minħabba t-tnaqqis fil-konsum fil-PIR, il-volum tal-bejgħ tal-industrija tal-Unjoni naqas iżda l-industrija tal-Unjoni żammet is-sehem mis-suq tagħha fis-suq tal-Unjoni. Il-produzzjoni, l-impjiegi, l-investiment żviluppaw b’xejra simili ta’ tnaqqis bħall-volumi tal-bejgħ.

(162)

L-impjiegi u l-produttività żviluppaw kif ġej matul il-perjodu kkunsidrat:

Tabella 8

Impjiegi u produttività

(163)

L-impjiegi tal-industrija tal-Unjoni naqsu wkoll bi 18 % matul il-perjodu taħt kunsiderazzjoni, f’konformità mal-bidliet fil-volumi tal-produzzjoni. Madankollu, l-industrija tal-Unjoni tista’ tinkludi t-tnaqqis fil-produttività għal 4 %.

(164)

Kif spjegat fil-premessa (99), ma kienx possibbli li tiġi stabbilita determinazzjoni affermattiva tad-dumping matul il-perjodu ta’ investigazzjoni tar-rieżami. Għalhekk, ma seta’ jiġi stabbilit l-ebda marġni ta’ dumping. Għalhekk, l-investigazzjoni ffokat fuq il-probabbiltà ta’ rikorrenza ta’ dumping f’każ li l-miżuri anti-dumping jiġu revokati.

(165)

Il-miżuri anti-dumping imposti wara l-investigazzjoni oriġinali ppermettew lill-industrija tal-Unjoni tirkupra minn dumping tal-passat, kif jidher mid-data għall-perjodu ta’ investigazzjoni tar-rieżami.

(166)

Il-prezzijiet medji tal-bejgħ unitarji tal-produtturi tal-Unjoni inklużi fil-kampjun lil klijenti mhux relatati fl-Unjoni żviluppaw kif ġej matul il-perjodu taħt kunsiderazzjoni:

Tabella 9

Prezzijiet tal-bejgħ u kost tal-produzzjoni fl-Unjoni

(167)

Il-prezz medju tal-industrija tal-Unjoni żdied bi 48 % matul il-perjodu kkunsidrat, wara ż-żieda fil-kost tal-produzzjoni.

(168)

Il-kost medju tal-produzzjoni żdied b’47 % matul il-perjodu taħt kunsiderazzjoni. Dan żdied drastikament diġà fl-2022 (+ 45 % mill-2020) u laħaq il-massimu tiegħu fl-2022. Iż-żieda fil-kost kienet xprunata l-aktar miż-żieda qawwija fil-kostijiet tal-enerġija u fil-prezz tal-aluminju, il-materja prima ewlenija.

(169)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 10

Kostijiet lavorattivi medji għal kull impjegat

(170)

Il-kost lavorattiv medju għal kull impjegat tal-industrija tal-Unjoni żdied bi 11 % matul il-perjodu taħt kunsiderazzjoni. Fl-2021, dan żdied bi 13 %, u baqa’ relattivament stabbli minn hemm ’il quddiem.

(171)

Il-livelli tal-istokk tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 11

Inventarji

(172)

L-inventarji żdiedu b’24 % matul il-perjodu kkunsidrat. Il-livell tal-istokkijiet tal-għeluq żdied minn 4,5 miljun element għal 6,1 miljun element fl-2021, imbagħad għal 6,2 miljun element fl-2022 qabel ma naqas għal 5,5 miljun element fil-PIR. B’reazzjoni għall-konsum ogħla fl-2021 u biex jiġi ottimizzat il-proċess tal-produzzjoni tagħhom, l-industrija tal-Unjoni żiedet il-livelli tal-ħażniet. Madankollu, quddiem domanda aktar baxxa fl-2022, l-industrija tal-Unjoni ma setgħetx tnaqqas dawn l-istokkijiet malajr.

(173)

Fir-rigward tal-produzzjoni, l-istokkijiet tal-għeluq bħala perċentwal tal-produzzjoni żdiedu b’47 %.

(174)

Il-profittabilità, il-fluss ta’ flus, l-investimenti u r-redditu fuq l-investimenti tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 12

Profittabbiltà, fluss ta’ flus, investimenti u redditu fuq l-investimenti

(175)

Il-Kummissjoni stabbiliet il-profittabilità tal-produtturi tal-Unjoni inklużi fil-kampjun billi esprimiet il-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni bħala perċentwal tal-fatturat ta’ dak il-bejgħ.

(176)

Il-profittabbiltà tal-industrija tal-Unjoni żdiedet b’punt perċentwali wieħed matul il-perjodu kkunsidrat. Analiżi minn sena għal sena turi li l-profittabbiltà kienet fl-ogħla livell fl-2021, meta laħqet livell ta’ 10 %, fejn irdoppjat ir-riżultati tas-sena ta’ qabel, iżda mbagħad reġgħet naqset drastikament fl-2022 għal 4 % minħabba l-kundizzjonijiet deterjorati tas-suq. Din reġgħet telgħet għal 6 % fil-PIR peress li l-kost tal-aluminju naqas matul il-PIR filwaqt li l-prezzijiet tal-bejgħ tar-radjaturi ġew aġġustati ’l isfel biss b’dewmien.

(177)

Il-fluss ta’ flus nett huwa l-kapaċità tal-produtturi tal-Unjoni li jiffinanzjaw huma stess l-attivitajiet tagħhom. Ix-xejra fil-fluss ta’ flus nett żviluppat ’l fuq b’żieda b’85 % matul il-perjodu kkunsidrat.

(178)

L-investimenti annwali tal-industrija tal-Unjoni naqsu bi 15 % matul il-perjodu kkunsidrat. Filwaqt li fl-2021 u fl-2022 l-investimenti kienu madwar 40 % ogħla milli fl-2020, dawn naqsu fil-PIR minn madwar EUR 14-il miljun għal EUR 8,5 miljun u kienu fil-biċċa l-kbira limitati għas-sostituzzjoni ta’ tagħmir eżistenti.

(179)

Ir-redditu fuq l-investimenti huwa l-profitt f’perċentwal tal-valur kontabilistiku nett tal-investimenti. Dan żviluppa b’xejra simili għall-profittabbiltà, li kienet fl-ogħla livell fl-2021, naqset fl-2022 u mbagħad tjiebet mill-ġdid fl-2023, b’żieda ġenerali ta’ seba’ punti perċentwali matul il-perjodu kkunsidrat.

(180)

L-investigazzjoni wriet li l-biċċa l-kbira tal-indikaturi mikroekonomiċi żviluppaw b’mod pożittiv u li s-sitwazzjoni ekonomika u finanzjarja tal-industrija tal-Unjoni tjiebet matul il-perjodu kkunsidrat.

(181)

L-industrija tal-Unjoni kienet kapaċi żżid is-sehem tagħha fis-suq b’miżuri fis-seħħ u kienet kapaċi tirkupra l-fluss tal-flus u r-redditu fuq l-investimenti.

(182)

Il-profittabilità tal-industrija tal-Unjoni żdiedet matul il-perjodu kkunsidrat iżda baqgħet taħt il-profitt fil-mira stabbilit fl-investigazzjoni oriġinali.

(183)

Madankollu, l-industrija tal-Unjoni naqqset il-produzzjoni, l-impjiegi u kompliet topera b’użu b’kapaċità baxxa, l-aktar minħabba t-tnaqqis sinifikanti fid-domanda għal radjaturi tal-aluminju.

(184)

Id-deterjorament tal-indikaturi makroekonomiċi, flimkien ma’ tnaqqis fl-investimenti netti u żieda fl-inventarji, jissuġġerixxu dgħufijiet sottostanti tal-industrija tal-Unjoni. Tħassib ewlieni jinkludi l-kapaċità tal-industrija tal-Unjoni li żżomm il-profittabbiltà tagħha f’kuntest ta’ kostijiet dejjem jiżdiedu u domanda li qed tonqos, kif ukoll l-implikazzjonijiet fit-tul ta’ investiment nett imnaqqas. Filwaqt li l-likwidità u l-profittabbiltà fuq terminu qasir huma stabbli, l-istabbiltà u t-tkabbir futuri jistgħu jkunu f’riskju.

(185)

Minkejja dan, il-Kummissjoni kkonkludiet li, wara valutazzjoni ġenerali tal-fatturi tad-dannu, l-industrija tal-Unjoni ma sofrietx dannu materjali fis-sens tal-Artikolu 3(5) tar-Regolament bażiku matul il-perjodu tal-investigazzjoni tar-rieżami.

(186)

Il-Kummissjoni kkonkludiet fil-premessa (185) li l-industrija tal-Unjoni ma ġarrbitx dannu materjali minn importazzjonijiet li joriġinaw fiċ-Ċina matul il-perjodu ta’ investigazzjoni tar-rieżami. Għalhekk, il-Kummissjoni vvalutat, f’konformità mal-Artikolu 11(2) tar-Regolament bażiku, jekk ikunx hemm probabbiltà ta’ rikorrenza ta’ dannu kkawżat mill-importazzjonijiet oġġett ta’ dumping miċ-Ċina jekk il-miżuri jitħallew jiskadu.

(187)

Sabiex tistabbilixxi jekk kienx hemm probabbiltà ta’ rikorrenza ta’ dannu jekk il-miżuri kontra ċ-Ċina jiġu revokati, il-Kummissjoni eżaminat (i) il-kapaċità tal-produzzjoni u l-kapaċità ta’ riżerva fiċ-Ċina u l-attraenza tas-suq tal-Unjoni; u (ii) il-livelli probabbli tal-prezzijiet tal-importazzjonijiet miċ-Ċina u l-impatt tagħhom fuq is-sitwazzjoni tal-industrija tal-Unjoni f’każ li l-miżuri jitħallew jiskadu.

(188)

Kif stabbilit fit-Taqsima 3.3.5.2, il-kapaċità tal-produzzjoni fiċ-Ċina qabżet sostanzjalment kemm il-volumi tal-produzzjoni kif ukoll id-domanda fis-suq domestiku Ċiniż matul il-PIR. Barra minn hekk, ma kien hemm l-ebda element li jista’ jindika xi żieda sinifikanti fid-domanda domestika fiċ-Ċina jew fi kwalunkwe suq ta’ pajjiż terz ieħor fil-futur qrib. Hija u tagħti l-konklużjonijiet tagħha dwar l-attraenza tas-suq tal-Unjoni kif deskritt fit-Taqsima 3.3.5.3, il-Kummissjoni kkonkludiet li huwa probabbli ħafna li tali kapaċità ta’ riżerva tintuża għall-forniment tas-suq tal-Unjoni, f’każ li l-miżuri jiskadu.

(189)

Kif stabbilit fil-premessa (103), il-Kummissjoni qieset il-fatturi u l-kwotazzjonijiet ipprovduti fit-talba għal rieżami, aġġustati għall-kostijiet tat-trasport, għall-kostijiet tal-ħatt l-art u għad-dazji doganali tal-UE, bħala indikaturi għall-prezzijiet potenzjali tal-bejgħ lill-Unjoni. Abbażi ta’ dawn il-prezzijiet tal-esportazzjoni, l-importazzjonijiet miċ-Ċina lejn l-Unjoni, minbarra d-dazju anti-dumping, iwaqqgħu l-prezz tal-bejgħ tal-Unjoni b’45 % fil-PIR. Dan jindika li l-importazzjonijiet Ċiniżi, f’volumi miżjuda, jimponu pressjoni sostanzjali fuq il-prezzijiet fuq l-industrija tal-Unjoni fin-nuqqas ta’ miżuri.

(190)

F’każ li l-miżuri jiġu revokati, meta jitqiesu l-livelli ta’ prezzijiet probabbli, l-industrija tal-Unjoni ma tkunx tista’ żżomm il-volum tal-bejgħ u s-sehem mis-suq tagħha kontra importazzjonijiet bi prezzijiet orħos miċ-Ċina. Huwa probabbli ħafna li s-sehem mis-suq Ċiniż jiżdied malajr jekk il-miżuri jitħallew jiskadu, anki fid-dawl tal-miżuri eżistenti imposti minn pajjiżi terzi oħra fuq l-importazzjonijiet ta’ radjaturi tal-aluminju, imsemmija hawn fuq fil-premessi (119) u (120).

(191)

It-telf fil-volum tal-bejgħ iwassal għal rata ta’ utilizzazzjoni saħansitra aktar baxxa u għal żieda fil-kost medju tal-produzzjoni, u dan iwassal għal deterjorament tas-sitwazzjoni finanzjarja tal-industrija tal-Unjoni u għal żieda fir-riskju li l-industrija tiġi xprunata f’sitwazzjoni li tagħmel telf.

(192)

F’każ li l-industrija tal-Unjoni tiddeċiedi li tnaqqas il-livelli tal-prezzijiet tagħha f’tentattiv li żżomm il-volum tal-bejgħ u s-sehem mis-suq tagħha, is-sitwazzjoni finanzjarja tagħha tmur għall-agħar kważi immedjatament, u huwa probabbli li timmaterjalizza sitwazzjoni li tagħmel telf.

(193)

Taħt iż-żewġ xenarji, l-impatt tal-iskadenza tal-miżuri huwa probabbli li jkollu impatt negattiv fuq l-industrija tal-Unjoni.

(194)

Abbażi ta’ dan, ġie konkluż li n-nuqqas ta’ miżuri jirriżulta, bil-probabbiltà kollha, f’żieda sinifikanti fl-importazzjonijiet li huma l-oġġett ta’ dumping miċ-Ċina bi prezzijiet dannużi u li huwa probabbli li jerġa’ jseħħ dannu materjali.

(195)

F’konformità mal-Artikolu 21 tar-Regolament bażiku, il-Kummissjoni eżaminat jekk iż-żamma tal-miżuri anti-dumping eżistenti tmurx kontra l-interess tal-Unjoni b’mod ġenerali. Id-determinazzjoni tal-interess tal-Unjoni kienet ibbażata fuq apprezzament tal-interessi varji kollha involuti, inklużi dawk tal-industrija, tal-importaturi u tal-utenti tal-Unjoni.

(196)

Id-dazji anti-dumping li bħalissa huma fis-seħħ li ġew imfakkra fil-premessa (3) ippermettew lill-industrija tal-Unjoni żżomm is-sehem mis-suq tagħha fis-suq tal-Unjoni u ttejjeb is-sitwazzjoni finanzjarja tagħha, iżda li l-industrija għadha ma tistax iżżid l-użu tal-kapaċità u tilħaq il-profitt fil-mira.

(197)

Fl-istess waqt, il-Kummissjoni kkonkludiet ukoll li l-industrija tal-Unjoni hija probabbli li tesperjenza deterjorament tas-sitwazzjoni tagħha jekk il-miżuri eżistenti kontra ċ-Ċina jitħallew jiskadu.

(198)

Għalhekk, il-Kummissjoni kkonkludiet li ż-żamma tal-miżuri anti-dumping eżistenti tkun favur l-industrija tal-Unjoni.

(199)

L-ebda importatur ma kkoopera f’din l-investigazzjoni. Fir-rieżami ta’ skadenza preċedenti, instab li l-impatt tal-impożizzjoni tal-miżuri fuq l-importaturi ma jkunx sinifikanti.

(200)

Fin-nuqqas ta’ evidenza li tissuġġerixxi mod ieħor, il-Kummissjoni kkonkludiet li l-miżuri kurrentament fis-seħħ ma kellhom l-ebda effett negattiv sostanzjali fuq l-importaturi u li ż-żamma tal-miżuri ma kinitx se taffettwahom bla bżonn.

(201)

L-ebda utent ma ppreżenta ruħu u ma kkoopera mal-investigazzjoni. Ir-radjaturi tal-aluminju huma prodott għall-konsumatur; l-utenti huma distributuri u organizzazzjonijiet kbar tal-bejgħ bl-imnut li mbagħad jerġgħu jbigħu r-radjaturi.

(202)

Fl-investigazzjoni oriġinali u fir-rieżami ta’ skadenza preċedenti (78), instab li l-utenti kienu f’pożizzjoni li jgħaddu ż-żieda kollha jew kważi kollha fil-prezzijiet li tirriżulta mid-dazju lill-utenti finali, filwaqt li jitqies li għal dawn tal-aħħar, l-impatt ta’ tali miżuri ma kienx sinifikanti.

(203)

Dawn is-sejbiet ġew ikkonfermati fir-rieżami ta’ skadenza kurrenti peress li l-investigazzjoni ma żvelat l-ebda indikazzjoni li tikkontradixxi s-sejbiet oriġinali.

(204)

Abbażi ta’ dan, u f’konformità mal-konklużjoni li waslet għaliha fl-investigazzjonijiet preċedenti, il-Kummissjoni kkonkludiet li ż-żamma tal-miżuri ma jkollhiex impatt sinifikanti fuq l-utenti.

(205)

Abbażi ta’ dan ta’ hawn fuq, il-Kummissjoni kkonkludiet li ma kienx hemm raġunijiet konvinċenti tal-interess tal-Unjoni kontra ż-żamma tal-miżuri eżistenti fuq l-importazzjonijiet tar-radajturi tal-aluminju li joriġinaw fiċ-Ċina.

(206)

Abbażi tal-konklużjonijiet milħuqa mill-Kummissjoni dwar il-kontinwazzjoni ta’ dumping, ir-rikorrenza ta’ dannu u l-interess tal-Unjoni, il-miżuri anti-dumping dwar ir-radajturi tal-aluminju miċ-Ċina jenħtieġ li jinżammu.

(207)

Sabiex jiġu minimizzati r-riskji ta’ ċirkomvenzjoni minħabba d-differenza fir-rati tad-dazju, huma meħtieġa miżuri speċjali sabiex tiġi żgurata l-applikazzjoni tad-dazji anti-dumping individwali. L-applikazzjoni ta’ dazji anti-dumping individwali hija applikabbli biss mal-preżentazzjoni ta’ fattura kummerċjali valida lill-awtoritajiet doganali tal-Istati Membri. Il-fattura trid tkun konformi mar-rekwiżiti stabbiliti fl-Artikolu 1(3) ta’ dan ir-Regolament. Sakemm tiġi ppreżentata tali fattura, l-importazzjonijiet jenħtieġ li jkunu soġġetti għad-dazju anti-dumping applikabbli għall-“importazzjonijiet l-oħrajn kollha li joriġinaw miċ-Ċina”.

(208)

Filwaqt li l-preżentazzjoni ta’ din il-fattura hija meħtieġa sabiex l-awtoritajiet doganali tal-Istati Membri jkunu jistgħu japplikaw ir-rati tad-dazju anti-dumping individwali fuq l-importazzjonijiet, ma hijiex l-uniku element li jrid jitqies mill-awtoritajiet doganali. Tabilħaqq, anke jekk jiġu ppreżentati b’fattura li tissodisfa r-rekwiżiti kollha stabbiliti fl-Artikolu 1(3) ta’ dan ir-Regolament, l-awtoritajiet doganali tal-Istati Membri jridu jwettqu l-kontrolli tas-soltu tagħhom u jistgħu, bħal fil-każijiet l-oħrajn kollha, jirrikjedu dokumenti addizzjonali (dokumenti tat-trasport bil-baħar, eċċ.) biex ikunu jistgħu jivverifikaw l-akkuratezza tad-dettalji li jkun hemm fid-dikjarazzjoni u jiżguraw li l-applikazzjoni sussegwenti tar-rata aktar baxxa tad-dazju tkun iġġustifikata, f’konformità mal-liġi doganali.

(209)

F’każ li l-esportazzjonijiet minn waħda mill-kumpaniji li jibbenefikaw minn rati tad-dazju individwali aktar baxxi jiżdiedu b’mod sinifikanti fil-volum wara l-impożizzjoni tal-miżuri kkonċernati, tali żieda fil-volum tista’ titqies bħala waħda li fiha nnifisha tikkostitwixxi bidla fix-xejra tal-kummerċ minħabba l-impożizzjoni ta’ miżuri skont it-tifsira tal-Artikolu 13(1) tar-Regolament bażiku. F’ċirkostanzi bħal dawn u dment li jiġu ssodisfati l-kundizzjonijiet, tista’ tinbeda investigazzjoni kontra ċ-ċirkomvenzjoni. Din l-investigazzjoni tista’, fost l-oħrajn, teżamina l-ħtieġa tat-tneħħija ta’ rata/i tad-dazju individwali u l-impożizzjoni konsegwenti ta’ dazju għall-pajjiż kollu.

(210)

Ir-rati tad-dazju anti-dumping tal-kumpaniji individwali speċifikati f’dan ir-Regolament japplikaw biss għall-importazzjonijiet tal-prodott soġġett għal rieżami li joriġina fiċ-Ċina u manifatturat mill-entitajiet legali msemmijin. L-importazzjonijiet tal-prodott taħt rieżami prodotti minn kwalunkwe kumpanija oħra mhux imsemmija b’mod speċifiku fil-parti operattiva ta’ dan ir-Regolament, inklużi entitajiet relatati ma’ dawk speċifikament imsemmija, jenħtieġ li jkunu soġġetti għar-rata ta’ dazju applikabbli għall-“importazzjonijiet l-oħrajn kollha li joriġinaw fiċ-Ċina”. Jenħtieġ li ma jkunu soġġetti għall-ebda waħda mir-rati tad-dazju anti-dumping individwali.

(211)

Kumpanija tista’ titlob l-applikazzjoni ta’ dawn ir-rati tad-dazju anti-dumping individwali jekk hija sussegwentement tbiddel l-isem tal-entità tagħha. It-talba trid tkun indirizzata lill-Kummissjoni. It-talba jrid ikun fiha l-informazzjoni rilevanti kollha li turi li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax id-dritt tagħha li tibbenefika mir-rata tad-dazju li tapplika għaliha, se jiġi ppubblikat regolament dwar il-bidla tal-isem f’Il-Ġurnal Uffiċjali tal-Unjoni Ewropea.

(212)

Esportatur jew produttur li ma esportax il-prodott ikkonċernat lejn l-Unjoni matul il-perjodu li kien intuża sabiex jiġi stabbilit il-livell tad-dazju applikabbli bħalissa għall-esportazzjonijiet tiegħu jista’ jitlob lill-Kummissjoni biex isir soġġett għar-rata tad-dazju anti-dumping għall-kumpaniji li kkooperaw u li ma kinux inklużi fil-kampjun. Jenħtieġ li l-Kummissjoni tilqa’ talba bħal din dment li jiġu ssodisfati tliet kundizzjonijiet. Il-produttur esportatur il-ġdid ikollu juri li: (i) ma esportax il-prodott ikkonċernat lejn l-Unjoni matul il-perjodu li ntuża sabiex jiġi stabbilit il-livell tad-dazju applikabbli għall-esportazzjonijiet tiegħu; (ii) ma huwiex relatat ma’ kumpanija li għamlet dan u, għalhekk, huwa soġġett għad-dazji anti-dumping; u (iii) esporta l-prodott ikkonċernat wara dan jew daħal f’obbligu kuntrattwali irrevokabbli sabiex jagħmel dan fi kwantitajiet sostanzjali.

(213)

Fid-dawl tal-Artikolu 109 tar-Regolament (UE, Euratom) 2018/1046 tal-Parlament Ewropew u tal-Kunsill (79) meta jkollu jiġi rrimborżat ammont wara sentenza tal-Qorti tal-Ġustizzja tal-Unjoni Ewropea, l-imgħax li jrid jitħallas jenħtieġ li jkun ir-rata applikata mill-Bank Ċentrali Ewropew għall-operazzjonijiet ta’ rifinanzjament tal-kapital tiegħu, kif ippubblikata fis-serje C ta’ Il-Ġurnal Uffiċjali tal-Unjoni Ewropea fl-ewwel jum kalendarju ta’ kull xahar.

(214)

Il-miżuri previsti f’dan ir-Regolament huma f’konformità mal-opinjoni tal-Kumitat stabbilit bl-Artikolu 15(1) tar-Regolament (UE) 2016/1036.