(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali, kif ukoll ir-raġunijiet u l-proċeduri għall-għoti u għat-tiġdid ta’ din l-awtorizzazzjoni.

(2)

Il-preparat ta’ Enterococcus lactis NCIMB 10415 (li qabel kien identifikat b’mod tassonomiku bħala Enterococcus faecium NCIMB 10415) kien awtorizzat għal perjodu ta’ 10 snin bħala addittiv tal-għalf għall-qtates u għall-klieb bir-Regolament ta’ Implimentazzjoni tal-Kummissjoni (UE) Nru 1061/2013 (2).

(3)

F’konformità mal-Artikolu 14(1) tar-Regolament (KE) Nru 1831/2003, tressqet applikazzjoni għat-tiġdid tal-awtorizzazzjoni tal-preparat ta’ Enterococcus lactis NCIMB 10415 bħala użu fl-għalf għall-qtates u għall-klieb, bit-talba li l-addittiv jiġi kklassifikat fil-kategorija tal-addittivi “addittivi żootekniċi” u fil-grupp funzjonali “stabilizzaturi tal-flora intestinali” għall-qtates, u “addittivi żootekniċi oħra” għall-klieb. Flimkien ma’ dik l-applikazzjoni ntbagħtu d-dettalji u d-dokumenti meħtieġa skont l-Artikolu 14(2) tar-Regolament (KE) Nru 1831/2003.

(4)

Fl-opinjoni tagħha tat-30 ta’ Jannar 2024 (3), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li l-applikant ipprovda evidenza li l-preparat ta’ Enterococcus lactis NCIMB 10415 għadu sikur għall-klieb u għall-qtates skont il-kundizzjonijiet tal-użu awtorizzati bħalissa. Ikkonkludiet ukoll li ma ntweriex li l-addittiv huwa irritant tal-ġilda u tal-għajnejn, iżda li jenħtieġ li jitqies bħala sensitizzatur respiratorju, filwaqt li ma setgħet tinsilet l-ebda konklużjoni dwar is-sensitizzazzjoni tal-ġilda. L-Awtorità indikat ukoll li ma kienx hemm bżonn li tiġi vvalutata l-effikaċja tal-preparat ta’ Enterococcus lactis NCIMB 10415 fil-kuntest tat-tiġdid tal-awtorizzazzjoni peress li l-applikazzjoni għat-tiġdid ma tinkludix proposta biex jiġu emendati jew issupplimentati l-kundizzjonijiet tal-awtorizzazzjoni oriġinali li jkollhom impatt fuq l-effikaċja tal-addittiv. Ma kinitx tal-fehma li hemm ħtieġa għal rekwiżiti speċifiċi ta’ monitoraġġ ta’ wara l-introduzzjoni fis-suq.

(5)

Il-Laboratorju ta’ Referenza stabbilit bir-Regolament (KE) Nru 1831/2003 qies li l-konklużjonijiet u r-rakkomandazzjonijiet milħuqa fil-valutazzjoni preċedenti dwar l-istess addittiv fir-rigward tal-metodu ta’ analiżi huma validi u applikabbli għall-applikazzjoni attwali. Għalhekk, f’konformità mal-Artikolu 5(4), il-punt (c) tar-Regolament tal-Kummissjoni (KE) Nru 378/2005 (4), mhuwiex meħtieġ rapport ta’ evalwazzjoni tal-Laboratorju ta’ Referenza.

(6)

Fid-dawl ta’ dan ta’ hawn fuq, il-Kummissjoni tqis li l-preparat ta’ Enterococcus lactis NCIMB 10415 jissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-awtorizzazzjoni ta’ dak l-addittiv tiġġedded. Għal raġunijiet ta’ kontroll, huwa xieraq li jiġi allokat numru ta’ identifikazzjoni speċifiku għal dak il-preparat għall-qtates u għall-klieb biex tkun tista’ ssir distinzjoni mill-forom l-oħra ta’ dak il-preparat awtorizzat bir-Regolament ta’ Implimentazzjoni tal-Kummissjoni (UE) 2024/1161 (5) għal speċijiet oħra. Barra minn hekk, il-Kummissjoni hija tal-fehma li jenħtieġ li jittieħdu miżuri protettivi xierqa sabiex jiġu evitati effetti avversi fuq is-saħħa tal-utenti tal-addittivi. Jenħtieġ li dawk il-miżuri protettivi jkunu mingħajr preġudizzju għal rekwiżiti oħra tas-sikurezza tal-ħaddiema skont id-dritt tal-Unjoni.

(7)

B’konsegwenza tat-tiġdid tal-awtorizzazzjoni tal-preparat ta’ Enterococcus lactis NCIMB 10415 bħala addittiv tal-għalf għall-klieb u għall-qtates, jenħtieġ li r-Regolament ta’ Implimentazzjoni (UE) Nru 1061/2013 jitħassar.

(8)

Billi l-applikazzjoni immedjata tal-modifiki tal-kundizzjonijiet tal-awtorizzazzjoni tal-preparat ta’ Enterococcus lactis NCIMB 10415 bħala addittiv tal-għalf għall-qtates u għall-klieb mhijiex meħtieġa minħabba raġunijiet ta’ sikurezza, jixraq li jiġi previst perjodu tranżizzjonali biex il-partijiet interessati jħejju ruħhom biex jissodisfaw ir-rekwiżiti l-ġodda li jirriżultaw mit-tiġdid tal-awtorizzazzjoni.

(9)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,