(1)

Il-miżuri dettaljati għall-implimentazzjoni tal-istandards bażiċi komuni msemmija fl-Artikolu 4(3) tar-Regolament (KE) Nru 300/2008 tal-Parlament Ewropew u tal-Kunsill (2) jinkludu proċeduri għall-approvazzjoni u għall-użu tat-tagħmir tas-sigurtà tal-avjazzjoni ċivili.

(2)

Ir-Regolament ta’ Implimentazzjoni (UE) 2015/1998 stabbilixxa reġim armonizzat għall-approvazzjoni tat-tagħmir tas-sigurtà tal-avjazzjoni ċivili.

(3)

Id-Deċiżjoni tal-Kummissjoni (UE) 2021/2147 (3) tistabbilixxi lista konsolidata tat-tagħmir tas-sigurtà tal-avjazzjoni ċivili approvat bl-istatus tal-marka “Timbru tal-UE” għat-tagħmir ikkonfermat permezz tal-proċess tal-evalwazzjoni komuni tal-Konferenza Ewropea tal-Avjazzjoni Ċivili, għall-fini tal-installazzjoni u tal-użu mal-Unjoni kollha.

(4)

F’konformità mar-Regolament ta’ Implimentazzjoni (UE) 2015/1998 u b’mod partikolari l-punt 12.0.4.1 tal-Anness ta’ dak ir-Regolament ta’ Implimentazzjoni, il-Kummissjoni adottat id-Deċiżjoni (UE) 2024/1177 (4) li ssospendiet l-istatus tal-marka “Timbru tal-UE” ta’ konfigurazzjoni speċifika tat-tagħmir tas-sistema tad-detezzjoni tal-isplussivi għall-bagalji tal-kabina (EDSCB) tal-istandard C3, abbażi ta’ informazzjoni li tindika li l-prestazzjoni tagħha ma kinitx tissodisfa l-istandard li għalih kienet ġiet approvata.

(5)

Id-Deċiżjoni (UE) 2024/1177 ipprevediet il-possibbiltà li biċċiet tal-konfigurazzjoni diġà installati jitħaddmu f’konformità mal-kunċett tal-operazzjonijiet għat-tagħmir tal-EDSCB tal-istandard C3, b’limitu tal-iskrinjar tal-volum massimu ta’ kontenituri individwali tal-LAGs li ma jaqbiżx it-330 ml.

(6)

Ir-Regolament ta’ Implimentazzjoni tal-Kummissjoni (UE) 2024/2108 (5), applikabbli mill-1 ta’ Settembru 2024, jintroduċi miżura ta’ prekawzjoni fil-forma ta’ limitazzjoni għall-volum massimu ta’ kontenituri tal-LAGs individwali li jistgħu jiġu skrinjati permezz ta’ kwalunkwe waħda mill-konfigurazzjonijiet approvati attwalment tat-tagħmir tal-EDSCB tal-istandard C3 sabiex tinżamm is-sigurtà tal-ivvjaġġar bl-ajru.

(7)

Għalhekk, id-Deċiżjoni (UE) 2024/1177 jenħtieġ li titħassar, peress li t-tagħmir ikkonċernat minn hawn ’il quddiem se jitħaddem f’konformità mar-Regolament ta’ Implimentazzjoni (UE) 2024/2108 li jemenda r-Regolament ta’ Implimentazzjoni (UE) 2015/1998.

(8)

Il-bażi tad-data kkonsolidata tal-Unjoni li telenka t-tagħmir permess għall-installazzjoni u għall-użu mal-Unjoni kollha jenħtieġ li tiġi aġġornata skont dan,