DEĊIŻJONI TAL-KUMMISSJONI (UE) 2024/2099

tal-31 ta’ Lulju 2024

li tikkonferma l-parteċipazzjoni tal-Irlanda fir-Regolament (UE) 2024/1347 tal-Parlament Ewropew u tal-Kunsill dwar standards għall-kwalifika ta’ ċittadini ta' pajjiżi terzi jew persuni mingħajr stat bħala benefiċjarji ta’ protezzjoni internazzjonali, għal status uniformi għal refuġjati jew għal persuni eliġibbli għall-protezzjoni sussidjarja u għall-kontenut tal-protezzjoni mogħtija

IL-KUMMISSJONI EWROPEA,

Wara li kkunsidrat il-Protokoll Nru 21 dwar il-pożizzjoni tar-Renju Unit u l-Irlanda fir-rigward tal-Ispazju ta’ Libertà, Sigurtà u Ġustizzja, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, u b’mod partikolari l-Artikolu 4 tiegħu,

Wara li kkunsidrat in-notifika mill-Irlanda dwar ix-xewqa tagħha li taċċetta u tkun marbuta bir-Regolament (UE) 2024/1347 tal-Parlament Ewropew u tal-Kunsill tal-14 ta’ Mejju 2024 dwar standards għall-kwalifika ta’ ċittadini ta’ pajjiżi terzi jew persuni apolidi bħala benefiċjarji ta’ protezzjoni internazzjonali, għal status uniformi għar-rifuġjati jew għal persuni eliġibbli għal protezzjoni sussidjarja u għall-kontenut tal-protezzjoni mogħtija, li jemenda d-Direttiva tal-Kunsill 2003/109/KE u li jħassar id-Direttiva 2011/95/UE tal-Parlament Ewropew u tal-Kunsill (1).

Billi:

(1)	Ir-Regolament (UE) 2024/1347 ġie adottat fl-14 ta’ Mejju 2024 u daħal fis-seħħ fil-11 ta’ Ġunju 2024. Id-dispożizzjonijiet tiegħu għandhom japplikaw mill-1 ta’ Lulju 2026.

(2)	Permezz ta’ ittra tas-27 ta’ Ġunju 2024, l-Irlanda nnotifikat ix-xewqa tagħha li taċċetta u tkun marbuta bir-Regolament (UE) 2024/1347.

(3)	Jeħtieġ li l-parteċipazzjoni tal-Irlanda fir-Regolament (UE) 2024/1347 għalhekk tiġi kkonfermata.

(4)	Peress li l-Irlanda ma tipparteċipax fid-Direttiva tal-Kunsill2003/109/KE (2), jenħtieġ li ma tkunx marbuta bid-dispożizzjoni fir-Regolament (UE) 2024/1347 li jemenda dik id-Direttiva.

(5)	Ma hemm l-ebda kundizzjoni speċifika marbuta mal-parteċipazzjoni tal-Irlanda fir-Regolament (UE) 2024/1347 u l-ebda miżura tranżitorja mhi meħtieġa,

ADOTTAT DIN ID-DEĊIŻJONI: