EMENDI TAR-REGOLI TAL-PROĊEDURA TAL-QORTI ĠENERALI

[2024/2095]

IL-QORTI ĠENERALI

Wara li kkunsidrat it-Trattat dwar il-Funzjonament tal-Unjoni Ewropea u, b’mod partikolari, il-ħames paragrafu tal-Artikolu 254 tiegħu,

Wara li kkunsidrat it-Trattat li jistabbilixxi l-Komunità Ewropea tal-Enerġija Atomika u, b’mod partikolari, l-Artikolu 106a(1) tiegħu,

Wara li kkunsidrat il-Protokoll Nru 3 dwar l-Istatut tal-Qorti tal-Ġustizzja tal-Unjoni Ewropea u, b’mod partikolari, l-Artikolu 63 tiegħu,

Billi tqis li r-Regolament (UE, Euratom) 2024/2019 tal-Parlament Ewropew u tal-Kunsill tal-11 ta’ April 2024, li jemenda l-Protokoll Nru 3 dwar l-Istatut tal-Qorti tal-Ġustizzja tal-Unjoni Ewropea (1), jintroduċi fl-Istatut Artikolu 50b ġdid, li jipprevedi li l-Qorti tal-Ġustizzja għandha tittrasferixxi lill-Qorti Ġenerali t-talbiet għal deċiżjoni preliminari li jikkonċernaw esklużivament is-sistema komuni ta’ taxxa fuq il-valur miżjud, id-dazji tas-sisa, il-Kodiċi Doganali, il-klassifikazzjoni tariffarja tal-oġġetti skont in-Nomenklatura Magħquda, il-kumpens u l-assistenza għal passiġġieri fil-każ ta’ dewmien, ta’ kanċellazzjoni ta’ servizzi ta’ trasport jew ta’ rifjut ta’ imbark, kif ukoll is-sistema ta’ skambju ta’ kwoti ta’ emissjonijiet ta’ gassijiet serra,

Billi tqis li r-Regoli tal-Proċedura tal-Qorti Ġenerali għandhom jiġu emendati sabiex jiġu previsti l-modalitajiet li bihom it-talbiet għal deċiżjoni preliminari ttrasferiti mill-Qorti tal-Ġustizzja ser jiġu ttrattati mill-Qorti Ġenerali, u li, sabiex isir dan u sabiex il-qrati nazzjonali kif ukoll il-partijiet interessati msemmija fl-Artikolu 23 tal-Istatut jingħataw l-istess garanziji bħal dawk applikati mill-Qorti tal-Ġustizzja għat-trattament tat-talbiet għal deċiżjoni preliminari, għandhom jiġu introdotti fir-Regoli tal-Proċedura tal-Qorti Ġenerali d-dispożizzjonijiet tar-Regoli tal-Proċedura tal-Qorti tal-Ġustizzja applikabbli għat-talbiet għal deċiżjoni preliminari mressqa quddiem din tal-aħħar, bla ħsara għal aġġustamenti intiżi għaż-żamma tal-koerenza globali tad-dispożizzjonijiet proċedurali li japplikaw għall-Qorti Ġenerali,

Billi tqis li r-Regolament (UE, Euratom) 2024/2019 jipprevedi, permezz tal-emenda tal-Artikolu 50 tal-Istatut, li l-Qorti Ġenerali tista’ tiltaqa’ wkoll f’awla intermedja bejn l-awli b’ħames Imħallfin u l-Awla Manja u li l-Qorti Ġenerali għandha tiltaqa’ f’awla intermedja meta dan jintalab minn Stat Membru jew minn istituzzjoni li jkunu parti fil-kawża,

Billi tqis li r-Regoli tal-Proċedura tal-Qorti Ġenerali għandhom jiġu emendati sabiex jiġu previsti l-kompożizzjoni kif ukoll iċ-ċirkustanzi u l-kundizzjonijiet li fihom il-Qorti Ġenerali tiltaqa’ f’awla intermedja,

Billi tqis li r-Regolament (UE, Euratom) 2024/2019 jipprevedi, bl-introduzzjoni tal-Artikolu 49a fl-Istatut, li l-Qorti Ġenerali għandha tkun assistita minn Avukat Ġenerali wieħed jew iktar għat-trattament tat-talbiet għal deċiżjoni preliminari li jiġu ttrasferiti lilha,

Billi tqis li għandhom jiġu speċifikati r-regoli li japplikaw għall-elezzjoni tal-Avukati Ġenerali, għan-nomina tagħhom sabiex jittrattaw talbiet għal deċiżjoni preliminari u għall-eżerċizzju tal-funzjonijiet tagħhom,

Billi tqis li, sabiex il-qrati u ċ-ċittadini tal-Unjoni jkollhom stampa sħiħa tat-tifsira u tal-portata tar-risposti mogħtija mill-Qorti Ġenerali għad-domandi preliminari li jkunu sarulha, għandu jiġi żgurat it-tqegħid online, fi żmien raġonevoli wara l-għeluq tal-kawża, tal-osservazzjonijiet bil-miktub ippreżentati mill-partijiet interessati msemmija fl-Artikolu 23 tal-Istatut, kemm-il darba dawn tal-aħħar ma jkunux joġġezzjonaw għall-pubblikazzjoni tal-osservazzjonijiet tagħhom,

Billi tqis li għandhom jiġu ssemplifikati u ċċarati ċerti dispożizzjonijiet tar-Regoli tal-Proċedura li ma humiex intiżi li japplikaw speċifikament għat-talbiet għal deċiżjoni preliminari, b’mod partikolari sabiex jitnaqqas il-ħin iddedikat għal ċerti fażijiet tal-proċedura u sabiex jinkiseb il-benefiċċju sħiħ tad-dematerjalizzazzjoni tal-proċedura,

Bil-kunsens tal-Qorti tal-Ġustizzja,

Bl-approvazzjoni tal-Kunsill, mogħtija fil-21 ta’ Ġunju 2024,

TADOTTA L-EMENDI SEGWENTI TAR-REGOLI TAL-PROĊEDURA TAGĦHA:

Artikolu 1

Ir-Regoli tal-Proċedura tal-Qorti Ġenerali tal-4 ta’ Marzu 2015 (2) huma emendati kif ġej:

L-Artikolu 1(2) huwa emendat kif ġej:

Punt ġdid, il-punt (e), huwa miżjud. It-test huwa s-segwenti:

“(e)	‘partijiet interessati msemmija fl-Artikolu 23 tal-Istatut’ tfisser il-partijiet, l-Istati, l-istituzzjonijiet, il-korpi u l-organi kollha awtorizzati, skont dan l-artikolu, jippreżentaw noti jew osservazzjonijiet fil-kuntest ta’ rinviju għal deċiżjoni preliminari;”

b)	Il-punti (e) sa (k) attwali huma nnumerati mill-ġdid bħala l-punti (f) sa (l);

c)	Il-punt (i), li sar il-punt (j), huwa emendat kif ġej: “ ‘rikorsi diretti’ tfisser ir-rikorsi kollha li jistgħu jiġu ppreżentati quddiem il-Qorti Ġenerali, ħlief għat-talbiet għal deċiżjoni preliminari;”

2)	L-Artikolu 3(3) huwa emendat kif ġej: “3. Kull Imħallef, bl-eċċezzjoni tal-President, tal-Viċi President u tal-Presidenti ta’ awla tal-Qorti Ġenerali, jista’ jeżerċita l-funzjonijiet ta’ Avukat Ġenerali fil-kundizzjonijiet iddefiniti fl-Artikoli 30 sa 31b.”

L-Artikolu 11 huwa emendat kif ġej:

a)	It-test tal-paragrafu 4 huwa ssostitwit bit-test segwenti: “4. L-Awla Intermedja, imsemmija fl-Artikolu 15a, għandha tkun ippresjeduta mill-Viċi President. F’dan il-każ, għandu jkun applikabbli l-Artikolu 19.”

b)	Il-paragrafu 4, attwalment fis-seħħ, huwa nnumerat mill-ġdid u jsir il-paragrafu 5.

4)	L-Artikolu 14(2) huwa kkompletat kif ġej: “2. Il-kawżi jistgħu jiġu deċiżi mill-Awla Manja jew mill-Awla Intermedja fil-kundizzjonijiet stabbiliti fl-Artikolu 28.”

Artikolu ġdid, l-Artikolu 15a intitolat “Kompożizzjoni tal-Awla Intermedja”, huwa miżjud wara l-Artikolu 15. It-test huwa s-segwenti:

“Artikolu 15a

Kompożizzjoni tal-Awla Intermedja

“1. L-Awla Intermedja hija komposta minn disa’ Mħallfin.

2. Il-Qorti Ġenerali għandha tiddeċiedi dwar il-mod tan-nomina tal-Imħallfin li jikkomponu l-Awla Intermedja. Din id-deċiżjoni għandha tiġi ppubblikata f’Il-Ġurnal Uffiċjali tal-Unjoni Ewropea.”

L-Artikolu 17 huwa emendat kif ġej:

It-test tal-paragrafu 2 huwa ssostitwit bit-test segwenti:

“2. Jekk, fl-Awla Intermedja, in-numru ta’ Mħallfin previst fl-Artikolu 15a ma jintlaħaqx minħabba impediment ta’ Mħallef li jseħħ qabel ma l-kawża titħalla għad-deliberazzjoni jew għat-trattazzjoni, din l-awla għandha tiġi kkompletata permezz ta’ Mħallef innominat mill-President tal-Qorti Ġenerali sabiex jintlaħaq mill-ġdid in-numru previst ta’ Mħallfin.”

b)	Il-paragrafi 2 u 3, attwalment fis-seħħ, huma nnumerati mill-ġdid u jsiru l-paragrafi 3 u 4.

7)	L-Artikolu 20 huwa emendat kif ġej: “Bla ħsara għall-Artikolu 10(5) u għall-Artikolu 11(5), fil-każ ta’ impediment tal-President ta’ awla, il-funzjonijiet tiegħu għandhom jiġu eżerċitati minn Imħallef tal-kulleġġ ġudikanti skont l-ordni stabbilit fl-Artikolu 8.”

L-Artikolu 23(3) huwa kkompletat kif ġej:

“3. Jekk il-kworum jintilef wara li tkun inżammet is-seduta għas-sottomissjonijiet orali, is-sostituzzjoni għandha ssir skont il-kundizzjonijiet previsti fil-paragrafu 2 u għandha tiġi organizzata seduta ġdida fuq talba ta’ parti prinċipali jew ta’ parti interessata msemmija fl-Artikolu 23 tal-Istatut. Is-seduta tista’ tiġi organizzata wkoll ex officio mill-Qorti Ġenerali. Iż-żamma ta’ seduta ġdida hija obbligatorja meta jkunu twettqu miżuri istruttorji skont l-Artikolu 91(a) u (d) u skont l-Artikolu 96(2). L-Artikolu 21(2) ma huwiex applikabbli meta ma tiġix organizzata seduta ġdida.”

Artikolu ġdid, l-Artikolu 23a intitolat “Kworum tal-Awla Intermedja”, huwa miżjud wara l-Artikolu 23. It-test huwa s-segwenti:

“Artikolu 23a

Kworum tal-Awla Intermedja

“1. Id-deliberazzjonijiet tal-Awla Intermedja jkunu validi biss jekk ikunu preżenti seba’ Mħallfin.

2. Jekk, minħabba impediment, dan il-kworum ma jintlaħaqx, il-President tal-Qorti Ġenerali għandu jinnomina Mħallef ieħor sabiex jintlaħaq il-kworum tal-Awla Intermedja.

3. Jekk il-kworum jintilef wara li tkun inżammet is-seduta għas-sottomissjonijiet orali, is-sostituzzjoni għandha ssir skont il-kundizzjonijiet previsti fil-paragrafu 2 u għandha tiġi organizzata seduta ġdida fuq talba ta’ parti prinċipali jew ta’ parti interessata msemmija fl-Artikolu 23 tal-Istatut. Is-seduta tista’ tiġi organizzata wkoll ex officio mill-Qorti Ġenerali. Iż-żamma ta’ seduta ġdida hija obbligatorja meta jkunu twettqu miżuri istruttorji skont l-Artikolu 91(a) u (d) u skont l-Artikolu 96(2). L-Artikolu 21(2) ma huwiex applikabbli meta ma tiġix organizzata seduta ġdida.”

10)

L-Artikolu 24(3) huwa kkompletat kif ġej:

“3. Jekk il-kworum ma jkunx għadu stabbilit wara li tkun inżammet is-seduta għas-sottomissjonijiet orali, is-sostituzzjoni għandha ssir skont il-kundizzjonijiet previsti fil-paragrafu 2 u għandha tiġi organizzata seduta ġdida fuq talba ta’ parti prinċipali jew ta’ parti interessata msemmija fl-Artikolu 23 tal-Istatut. Is-seduta tista’ tiġi organizzata wkoll ex officio mill-Qorti Ġenerali. Iż-żamma ta’ seduta ġdida hija obbligatorja meta jkunu twettqu miżuri istruttorji skont l-Artikolu 91(a) u (d) u skont l-Artikolu 96(2). Iż-żamma ta’ seduta ġdida hija obbligatorja meta tkun meħtieġa s-sostituzzjoni ta’ iktar minn Imħallef wieħed li jkun ipparteċipa fis-seduta inizjali. L-Artikolu 21(2) ma huwiex applikabbli meta ma tiġix organizzata seduta ġdida.”

11)

L-Artikolu 25(1) huwa kkompletat kif ġej:

“1. Il-Qorti Ġenerali għandha tistabbilixxi l-kriterji li jirregolaw it-tqassim tal-kawżi bejn l-awli. Il-Qorti Ġenerali tista’ tinkariga lil awla waħda jew iktar sabiex jittrattaw kawżi f’oqsma speċifiċi. Il-Qorti Ġenerali għandha tagħżel awla waħda jew iktar li jkunu responsabbli għat-trattament tat-talbiet għal deċiżjoni preliminari.”

12)

L-Artikolu 26(1) huwa kkompletat kif ġej:

“1. Fl-iqsar żmien possibbli wara l-preżentata tal-att promotur, il-President tal-Qorti Ġenerali għandu jassenja l-kawżi lil awla skont il-kriterji stabbiliti mill-Qorti Ġenerali skont l-Artikolu 25. It-talbiet għal deċiżjoni preliminari għandhom jiġu assenjati lil awla kkostitwita minn ħames Imħallfin sedenti.”

13)

L-Artikolu 27 huwa emendat kif ġej:

Il-paragrafu 5 huwa emendat kif ġej:

“5. Fil-każ li tinbidel il-kompożizzjoni tal-awli minħabba deċiżjoni tal-Qorti Ġenerali dwar l-assenjazzjoni tal-Imħallfin lill-awli, il-kawża għandha tiġi deċiża mill-awla li minnha jagħmel parti l-Imħallef Relatur wara din id-deċiżjoni jekk il-fażi orali tal-proċedura ma tkunx infetħet jew id-deċiżjoni li l-kawża tinqata’ mingħajr il-fażi orali tal-proċedura ma tkunx ġiet adottata.”

Il-paragrafu 6 huwa emendat kif ġej:

“6. Bla ħsara għad-dispożizzjonijiet previsti fil-paragrafu 5, f’kawża dwar talba għal deċiżjoni preliminari jew f’kawża li tikkonċerna qasam speċifiku fis-sens tal-Artikolu 25, fil-każ li l-fażi orali tal-proċedura ma tkunx infetħet jew id-deċiżjoni li l-kawża tinqata’ mingħajr il-fażi orali tal-proċedura ma tkunx ġiet adottata meta tiġi adottata d-deċiżjoni tal-Qorti Ġenerali dwar l-assenjazzjoni tal-Imħallfin lill-awli, għandu jiġi nnominat Imħallef Relatur ġdid fi ħdan awla li tkun ser tittratta t-talbiet għal deċiżjoni preliminari jew dan il-qasam jekk l-Imħallef Relatur inizjali jiġi assenjat lil awla li ma tittrattax tali talbiet jew dan il-qasam.”

Paragrafu ġdid, il-paragrafu 7, huwa miżjud wara l-paragrafu 6:

“7. Meta l-Imħallef Relatur innominat sabiex jittratta talba għal deċiżjoni preliminari jiġi elett sabiex jeżerċita l-funzjonijiet ta’ Avukat Ġenerali għat-trattament tat-talbiet għal deċiżjoni preliminari, għandu jiġi nnominat Imħallef Relatur ġdid fi ħdan awla magħżula sabiex tieħu konjizzjoni tat-talbiet għal deċiżjoni preliminari sabiex jittratta t-talba li fir-rigward tagħha l-fażi orali tal-proċedura ma tkunx infetħet jew li fir-rigward tagħha d-deċiżjoni li l-kawża tinqata’ mingħajr il-fażi orali tal-proċedura ma tkunx ġiet adottata fid-data tal-elezzjoni.”

14)

L-Artikolu 28 huwa emendat kif ġej:

Il-paragrafu 1 huwa kkompletat kif ġej:

“1. Meta dan ikun iġġustifikat minħabba d-diffikultà legali jew l-importanza tal-kawża jew minħabba ċirkustanzi partikolari, kawża tista’ tintbagħat quddiem l-Awla Manja, quddiem l-Awla Intermedja jew quddiem awla kkostitwita min-numru differenti ta’ Mħallfin sedenti.”

Il-paragrafu 3 huwa kkompletat kif ġej:

“3. Il-President tal-Qorti Ġenerali jew il-Viċi President tal-Qorti Ġenerali jistgħu jipproponu lil-laqgħa plenarja li l-kawża tintbagħat skont il-paragrafu 1 sal-għeluq tal-fażi orali tal-proċedura jew, fil-każ li japplikaw l-Artikolu 106(3) jew l-Artikolu 213(2), qabel id-deċiżjoni tal-awla li lilha tkun assenjata l-kawża li taqta’ l-kawża mingħajr il-fażi orali tal-proċedura.”

c)	Il-paragrafu 5 huwa emendat kif ġej: “5. Id-deċiżjoni li rikors dirett jintbagħat quddiem awla kkostitwita min-numru iżgħar ta’ Mħallfin sedenti għandha tittieħed mil-laqgħa plenarja wara li jinstemgħu l-partijiet prinċipali.”

Paragrafu ġdid, il-paragrafu 6, huwa miżjud wara l-paragrafu 5:

“6. Fl-assenza ta’ diffikultà tal-punti ta’ liġi mqajma minn talba għal deċiżjoni preliminari, l-awla kkostitwita minn ħames Imħallfin sedenti adita b’din it-talba tista’ tiddeċiedi li tibgħatha quddiem awla kkostitwita minn tliet Imħallfin sedenti. Il-Qorti Ġenerali għandha tiddeċiedi dwar il-mod tan-nomina tat-tliet Imħallfin li jikkostitwixxu din l-awla. Din id-deċiżjoni għandha tiġi ppubblikata f’Il-Ġurnal Uffiċjali tal-Unjoni Ewropea.”

e)	Il-paragrafu 6, attwalment fis-seħħ, huwa nnumerat mill-ġdid u jsir il-paragrafu 7; [il-bidla fit-test bil-Franċiż ma taffettwax it-test bil-Malti]

Paragrafu ġdid, il-paragrafu 8, huwa miżjud wara l-paragrafu 7:

“8. L-Awla Intermedja għandha tagħti d-deċiżjoni dwar talba għal deċiżjoni preliminari meta dan jintalab minn Stat Membru jew minn istituzzjoni tal-Unjoni li jkunu parti fl-istanza skont ir-raba’ paragrafu tal-Artikolu 50 tal-Istatut.”

15)

L-Artikolu 30 huwa emendat kif ġej:

a)	Il-paragrafu uniku attwali jsir il-paragrafu 1 u huwa kkompletat kif ġej: “1. Għat-trattament tar-rikorsi diretti, il-Qorti Ġenerali tista’ tkun assistita minn Avukat Ġenerali meta tqis li dan ikun meħtieġ minħabba d-diffikultà legali jew il-kumplessità fattwali tal-kawża.”

b)	Paragrafu ġdid, il-paragrafu 2, huwa miżjud. It-test huwa s-segwenti: “2. Għat-trattament tat-talbiet għal deċiżjoni preliminari, il-Qorti Ġenerali għandha tkun assistita minn Avukat Ġenerali.”

16)

L-Artikolu 31 huwa emendat kif ġej:

a)	It-titolu huwa emendat kif ġej: “ Modalitajiet tan-nomina tal-Avukati Ġenerali għat-trattament tar-rikorsi diretti ”

b)	Il-paragrafu 1 huwa emendat kif ġej: “1. Id-deċiżjoni li jiġi nnominat Avukat Ġenerali għat-trattament ta’ rikors dirett għandha tittieħed mil-laqgħa plenarja fuq it-talba tal-awla li lilha l-kawża tkun ġiet assenjata jew li quddiemha tkun intbagħtet.”

c)	Il-paragrafu 3 huwa kkompletat kif ġej: “3. Wara din in-nomina, l-osservazzjonijiet tal-Avukat Ġenerali għandhom jinstemgħu qabel ma jittieħdu d-deċiżjonijiet previsti fl-Artikoli 16, 28, 45, 55, 68, 70, 83, 87, 90, 92, 98, 103, 105, 106, 110a, 113, 126 sa 132, 144, 151, 165, 168 u 169.”

17)

Huwa miżjud artikolu ġdid, l-Artikolu 31a, wara l-Artikolu 31. It-test huwa s-segwenti:

“Artikolu 31a

Elezzjoni tal-Avukati Ġenerali għat-trattament tat-talbiet għal deċiżjoni preliminari

“1. L-Imħallfin għandhom jeleġġu minn fosthom, skont l-Artikolu 49a tal-Istatut u b’applikazzjoni tal-Artikolu 9(3) ta’ dawn ir-Regoli, l-Imħallfin mitluba jeżerċitaw il-funzjonijiet ta’ Avukat Ġenerali għat-trattament tat-talbiet għal deċiżjoni preliminari, kif ukoll l-Imħallfin mitluba jissostitwixxuhom fil-każ ta’ impediment.

2. L-elezzjoni tal-Imħallfin mitluba jeżerċitaw dawn il-funzjonijiet għandha tinżamm immedjatament wara l-elezzjonijiet tal-President u tal-Viċi President tal-Qorti Ġenerali previsti fl-Artikolu 9 u wara l-elezzjonijiet tal-Presidenti ta’ awla previsti fl-Artikolu 18.

3. Fil-każ li l-mandat tal-Imħallef mitlub jeżerċita dawn il-funzjonijiet jintemm qabel ma jispiċċa t-terminu normali tal-imsemmija funzjonijiet, huwa għandu jiġi ssostitwit fl-eżerċizzju ta’ dawn il-funzjonijiet għall-perijodu li jkun fadal, skont il-modalitajiet previsti fl-Artikolu 9(3).

4. L-ismijiet tal-Imħallfin mitluba jeżerċitaw dawn il-funzjonijiet eletti skont dan l-artikolu għandhom jiġu ppubblikati f’Il-Ġurnal Uffiċjali tal-Unjoni Ewropea.”

18)

Artikolu ġdid, l-Artikolu 31b, huwa miżjud wara l-Artikolu 31a. It-test huwa s-segwenti:

“Artikolu 31b

Modalitajiet tan-nomina tal-Avukati Ġenerali għat-trattament tat-talbiet għal deċiżjoni preliminari

“1. Il-President tal-Qorti Ġenerali għandu jiddeċiedi dwar l-assenjazzjoni tal-kawżi għal deċiżjoni preliminari lill-Avukati Ġenerali. Konformement mat-tielet paragrafu tal-Artikolu 49a tal-Istatut, l-Avukat Ġenerali għandu jintgħażel minn fost l-Imħallfin eletti sabiex jeżerċitaw din il-funzjoni li jifformaw parti minn awla differenti minn dik li lilha tkun ġiet assenjata l-kawża.

2. Wara n-nomina tiegħu, l-osservazzjonijiet tal-Avukat Ġenerali għandhom jinstemgħu qabel ma jittieħdu d-deċiżjonijiet previsti fl-Artikoli 16 u 28, kif ukoll fil-każijiet previsti fit-Titolu II u fit-Titolu VI.”

19)	L-Artikolu 32(5) huwa kkompletat kif ġej: “5. Ir-Reġistratur għandu jieħu, quddiem il-Qorti Ġenerali, il-ġurament previst fl-Artikolu 5 u għandu jiffirma d-dikjarazzjoni prevista fl-Artikolu 6.”

20)	L-Artikolu 37 huwa emendat kif ġej: “Kull persuna tista’ tikkonsulta r-reġistru li jinżamm fir-Reġistru u tista’ tikseb kopji jew estratti tar-reġistru.”

21)

L-Artikolu 38(1) huwa emendat kif ġej:

“1. Bla ħsara għad-dispożizzjonijiet tal-Artikolu 68(4), tal-Artikoli 103 sa 105 kif ukoll tal-Artikolu 144(7), kull parti fl-istanza jista’ jkollha aċċess għall-proċess tal-kawża u tista’ tikseb kopji tal-atti proċedurali kif ukoll kopji awtentikati tad-digrieti u tas-sentenzi.”

22)

L-Artikolu 42(1) huwa emendat kif ġej:

“1. Id-deċiżjonijiet dwar kwistjonijiet amministrattivi u d-deċiżjonijiet imsemmija fl- Artikoli 7, 9, 11, 13, 15, 15a, 16, 18, 25, 28, 31, 31a, 32, 33, 41, 56a, 207 u 243 għandhom jittieħdu mill-Qorti Ġenerali fil-laqgħa plenarja, li fiha għandhom jipparteċipaw, bi dritt ta’ vot, l-Imħallfin kollha, bla ħsara għal dispożizzjonijiet kuntrarji ta’ dawn ir-Regoli. Ir-Reġistratur għandu jkun preżenti sakemm il-Qorti Ġenerali ma tiddeċidix mod ieħor u sakemm ma jkunux involuti d-deċiżjonijiet imsemmija fl-Artikolu 32.”

23)

L-Artikolu 45 huwa emendat kif ġej:

a)	Il-paragrafu 2 huwa mħassar.

b)	Il-paragrafi 3 u 4 attwali jsiru l-paragrafi 2 u 3.

It-test tal-paragrafu 4 l-ġdid huwa s-segwenti:

“4. Fil-proċeduri għal deċiżjoni preliminari, il-lingwa tal-kawża għandha tkun il-lingwa tal-qorti tar-rinviju. Fuq talba debitament ġustifikata ta’ waħda mill-partijiet fil-kawża prinċipali, u wara li jinstemgħu l-parti l-oħra fil-kawża prinċipali u l-Avukat Ġenerali, l-użu ta’ lingwa oħra minn fost dawk imsemmija fl-Artikolu 44 jista’ jiġi awtorizzat għall-fażi orali tal-proċedura. Meta tingħata, l-awtorizzazzjoni li tintuża din il-lingwa l-oħra tapplika għall-partijiet interessati kollha msemmija fl-Artikolu 23 tal-Istatut.”

Paragrafu ġdid, il-paragrafu 5, huwa miżjud. It-test huwa s-segwenti:

“5. Id-deċiżjoni dwar it-talbiet imsemmija fil-paragrafi 1 u 4 għandha tittieħed mill-President; meta jkollu l-intenzjoni li jilqa’ t-talba mingħajr il-kunsens tal-partijiet kollha, huwa għandu jgħaddi t-talba quddiem il-Qorti Ġenerali.”

24)

L-Artikolu 46 huwa emendat kif ġej:

Il-paragrafu 4 huwa kkompletat kif ġej:

“4. B’deroga mid-dispożizzjonijiet preċedenti, l-Istati Membri huma awtorizzati jużaw il-lingwa uffiċjali tagħhom meta jipparteċipaw fi proċedura għal deċiżjoni preliminari jew meta jagħmlu intervent f’kawża pendenti quddiem il-Qorti Ġenerali. Din id-dispożizzjoni hija applikabbli kemm għad-dokumenti miktuba u kemm għad-dikjarazzjonijiet orali. F’kull każ, it-traduzzjoni fil-lingwa tal-kawża għandha tiġi żgurata mir-Reġistratur.”

Il-paragrafu 5 huwa kkompletat kif ġej:

“5. L-Istati parti fil-Ftehim ŻEE, minbarra l-Istati Membri, kif ukoll l-Awtorità ta’ Sorveljanza EFTA, huma awtorizzati jużaw waħda mil-lingwi msemmija fl-Artikolu 44, li tkun differenti mil-lingwa tal-kawża, meta jipparteċipaw fi proċedura għal deċiżjoni preliminari jew meta jagħmlu intervent f’kawża pendenti quddiem il-Qorti Ġenerali. Din id-dispożizzjoni hija applikabbli kemm għad-dokumenti miktuba u kemm għad-dikjarazzjonijiet orali. F’kull każ, it-traduzzjoni fil-lingwa tal-kawża għandha tiġi żgurata mir-Reġistratur.”

It-test tal-paragrafu 6 huwa ssostitwit bit-test segwenti:

“6. L-Istati terzi li jipparteċipaw fi proċedura għal deċiżjoni preliminari, skont ir-raba’ paragrafu tal-Artikolu 23 tal-Istatut, huma awtorizzati jużaw waħda mil-lingwi msemmija fl-Artikolu 44, li tkun differenti mil-lingwa tal-kawża. Din id-dispożizzjoni hija applikabbli kemm għad-dokumenti miktuba u kemm għad-dikjarazzjonijiet orali. F’kull każ, it-traduzzjoni fil-lingwa tal-kawża għandha tiġi żgurata mir-Reġistratur.”

d)	Il-paragrafi 6 u 7, attwalment fis-seħħ, huma nnumerati mill-ġdid u jsiru l-paragrafi 7 u 8.

25)	L-Artikolu 50 huwa emendat kif ġej: “Id-dispożizzjonijiet ta’ dan it-Titolu huma applikabbli għar-rikorsi diretti fis-sens tal-Artikolu 1, bla ħsara għad-dispożizzjonijiet partikolari tat-Titolu IV u tat-Titolu V fir-rigward tal-proċeduri rregolati minn dawn it-titoli.”

26)

L-Artikolu 56a(4) huwa emendat kif ġej:

“4. Jekk att proċedurali jiġi ppreżentat permezz ta’ e-Curia qabel ma jiġu prodotti d-dokumenti ta’ sostenn meħtieġa sabiex jiġi vvalidat il-kont ta’ aċċess, dawn id-dokumenti għandhom jaslu fir-Reġistru tal-Qorti Ġenerali f’verżjoni stampata jew permezz ta’ mezz ta’ trażmissjoni elettronika użat mill-Qorti Ġenerali f’terminu ta’ għaxart’ijiem mill-preżentata tal-att. Dan it-terminu ma jistax jiġi estiż u l-Artikolu 60 ma huwiex applikabbli. Fl-assenza tar-riċezzjoni tad-dokumenti ta’ sostenn fit-terminu mogħti, il-Qorti Ġenerali għandha tiddikjara inammissibbli l-att proċedurali ppreżentat permezz ta’ e-Curia.”

27)	L-Artikolu 57(1) huwa emendat kif ġej: “1. Bla ħsara għall-Artikolu 80(1), għall-Artikolu 148(9) u għall-Artikolu 178(2), in-notifiki previsti fl-Istatut u f’dawn ir-Regoli għandhom isiru, taħt ir-responsabbiltà tar-Reġistratur, permezz ta’ e-Curia.”

28)	It-tieni sentenza tal-Artikolu 68(4) hija emendata kif ġej: “Madankollu, fuq talba ta’ parti, il-President jista’ jeskludi minn din in-notifika ċerta informazzjoni li tkun tinsab fil-proċess tal-kawża u li fir-rigward tagħha jkun allegat li hija ta’ natura kunfidenzjali.”

29)

L-Artikolu 86(1) huwa emendat kif ġej:

“1. Meta att li jkun qiegħed jintalab l-annullament tiegħu jiġi ssostitwit jew emendat b’att ieħor li jkollu l-istess suġġett, ir-rikorrent jista’, sa mhux iktar tard minn ġimagħtejn wara n-notifika ta’ deċiżjoni li tistabbilixxi d-data tas-seduta għas-sottomissjonijiet orali jew qabel in-notifika tad-deċiżjoni tal-Qorti Ġenerali li l-kawża tinqata’ mingħajr il-fażi orali tal-proċedura, jadatta r-rikors sabiex jittieħed inkunsiderazzjoni dan l-element ġdid. Dan it-terminu jista’ jiġi pprorogat mill-President fuq talba motivata tar-rikorrent. L-Artikolu 60 ma huwiex applikabbli.”

30)

L-Artikolu 87(2) huwa kkompletat kif ġej:

“2. Ir-rapport preliminari għandu jinkludi analiżi tal-kwistjonijiet rilevanti ta’ fatt u ta’ liġi mqajma mir-rikors, kif ukoll proposti dwar il-kwistjoni jekk il-kawża teħtieġx miżuri ta’ organizzazzjoni tal-proċedura jew miżuri istruttorji, dwar iż-żamma tal-fażi orali tal-proċedura, dwar il-possibbiltà li l-kawża tintbagħat quddiem l-Awla Manja, quddiem l-Awla Intermedja jew quddiem awla kkostitwita min-numru differenti ta’ Mħallfin sedenti, u dwar il-possibbiltà li l-kawża tingħadda lill-Imħallef uniku.”

31)

L-Artikolu 92(3) huwa emendat kif ġej:

“3. Miżura istruttorja msemmija fl-Artikolu 91(b) tista’ tiġi ordnata meta:

(a)	il-parti kkonċernata mill-miżura jew ma tkunx issodisfat miżura ta’ organizzazzjoni tal-proċedura adottata preċedentement għal dan il-għan jew titlob speċifikament li tiġi ordnata tali miżura filwaqt li tiġġustifika l-ħtieġa li tali miżura tiġi ordnata fil-forma ta’ digriet istruttorju;

(b)

l-adozzjoni ta’ miżura ta’ organizzazzjoni tal-proċedura ma tidhirx li tkun ġustifikata fid-dawl taċ-ċirkustanzi tal-każ.

Id-digriet istruttorju jista’ jipprevdi li r-rappreżentanti tal-partijiet ikunu jistgħu jikkonsultaw biss fir-Reġistru l-informazzjoni u l-annessi miksuba mill-Qorti Ġenerali wara dan id-digriet, mingħajr ma jkunu jistgħu jsiru kopji.”

32)

Artikolu ġdid, l-Artikolu 110a, huwa miżjud. It-test huwa s-segwenti:

“Artikolu 110a

Xandir tas-seduti

1. Is-seduti tal-Qorti Ġenerali jistgħu jixxandru. Dan ix-xandir għandu jsir f’ħin reali fil-każ tal-għoti ta’ sentenzi jew tal-preżentazzjoni ta’ konklużjonijiet, u għandu jsir f’ħin iddifferit fil-każ tas-sottomissjonijiet orali tal-partijiet f’kawża mibgħuta quddiem l-Awla Manja, l-Awla Intermedja, jew, meta dan ikun iġġustifikat mill-interess fil-kawża, quddiem awla kkostitwita minn ħames Imħallfin sedenti, jew, f’każijiet eċċezzjonali, quddiem awla kkostitwita minn tliet Imħallfin sedenti.

2. Meta l-Qorti Ġenerali jkollha l-intenzjoni xxandar seduta għas-sottomissjonijiet orali, il-partijiet għandhom jiġu informati dwar dan mir-Reġistratur, flimkien mas-sejħa għal din is-seduta.

3. Jekk parti tqis li s-seduta li għaliha ssejħet ma għandhiex tixxandar, hija għandha tinforma b’dan lill-Qorti Ġenerali fl-iqsar żmien possibbli filwaqt li tispjega, fid-dettall, iċ-ċirkustanzi ta’ natura li jiġġustifikaw l-assenza ta’ xandir.

4. Il-Qorti Ġenerali għandha tiddeċiedi dwar din it-talba fl-iqsar żmien possibbli.

5. Ir-reġistrazzjoni video tas-seduti għas-sottomissjonijiet orali li jkunu s-suġġett ta’ xandir għanda tibqa’ disponibbli fis-sit internet tal-Qorti tal-Ġustizzja tal-Unjoni Ewropea għal perijodu ta’ mhux iktar minn xahar wara l-għeluq tas-seduta għas-sottomissjonijiet orali.

6. Jekk parti tqis li r-reġistrazzjoni video ta’ seduta għas-sottomissjonijiet orali li fiha tkun ipparteċipat għandha titneħħa mis-sit internet imsemmi iktar ’il fuq, hija għandha tinforma b’dan lill-Qorti Ġenerali fl-iqsar żmien possibbli filwaqt li tispjega ċ-ċirkustanzi ta’ natura li jiġġustifikaw din it-tneħħija.

7. Il-President għandu jiddeċiedi dwar din it-talba fl-iqsar żmien possibbli.

8. Il-Qorti Ġenerali għandha tistabbilixxi, permezz ta’ deċiżjoni, ir-regoli u l-modalitajiet ta’ implimentazzjoni tax-xandir tas-seduti. Din id-deċiżjoni għandha tiġi ppubblikata f’Il-Ġurnal Uffiċjali tal-Unjoni Ewropea.”

33)

L-Artikolu 112 huwa emendat kif ġej:

“1. Meta, f’kawża, jiġi nnominat Avukat Ġenerali u tinżamm seduta għas-sottomissjonijiet orali, il-konklużjonijiet tal-Avukat Ġenerali għandhom jiġu ppreżentati wara l-għeluq ta’ din is-seduta, fid-data mħabbra mill-Avukat Ġenerali.

2. Fil-każ li ma tinżammx seduta għas-sottomissjonijiet orali, il-konklużjonijiet tal-Avukat Ġenerali għandhom jiġu ppreżentati fid-data mħabbra mill-Avukat Ġenerali.

3. Meta l-Avukat Ġenerali jippreżenta l-konklużjonijiet tiegħu bil-miktub, huwa għandu jiddepożitahom fir-Reġistru, li għandu jikkomunikahom lill-partijiet.

4. Il-preżentazzjoni tal-konklużjonijiet tal-Avukat Ġenerali tagħlaq il-fażi orali tal-proċedura.”

34)

L-Artikolu 113 huwa emendat kif ġej:

a)	Il-paragrafu 1 huwa emendat kif ġej: “1. Il-Qorti Ġenerali għandha tiftaħ mill-ġdid il-fażi orali tal-proċedura meta jkunu sodisfatti l-kundizzjonijiet stabbiliti fl-Artikolu 23(3) jew fl-Artikolu 24(3).”

b)	L-ewwel subparagrafu tal-paragrafu 2 huwa emendat kif ġej: “2. Il-Qorti Ġenerali tista’ tiftaħ mill-ġdid il-fażi orali tal-proċedura:”

35)

L-Artikolu 130(7) huwa emendat kif ġej:

“7. Il-Qorti Ġenerali għandha tiddeċiedi fl-iqsar żmien possibbli dwar it-talba permezz ta’ digriet jew, meta jkun ġustifikat minħabba ċirkustanzi partikolari, għandha tinkludi, permezz ta’ deċiżjoni, l-eżami ta’ din it-talba mad-deċiżjoni fil-mertu. Il-Qorti Ġenerali għandha tirreferi l-kawża lill-Qorti tal-Ġustizzja jekk din tkun taqa’ fil-kompetenza tagħha.”

36)

L-Artikolu 139 huwa emendat kif ġej:

a)	il-punt (b) huwa mħassar;

il-punt (c) isir il-punt (b) u huwa emendat kif ġej:

“(b)

fil-każ ta’ nuqqas irrepetut ta’ osservanza tar-rekwiżiti ta’ dawn ir-Regoli jew tad-dispożizzjonijiet prattiċi, imsemmija fl-Artikolu 243, li jkunu jeħtieġu talba għal regolarizzazzjoni, ir-Reġistratur għandu jitlob ir-rimbors tal-ispejjeż marbuta mat-trattament min-naħa tal-Qorti Ġenerali mingħand il-parti kkonċernata, skont it-tariffa tar-Reġistru stabbilita fl-imsemmija dispożizzjonijiet prattiċi.”

37)

L-Artikolu 162 huwa emendat kif ġej:

a)	Il-paragrafu 1 huwa kkompletat kif ġej: “1. It-talbiet imsemmija f’dan il-kapitolu, ħlief għal dawk imressqa abbażi tal-Artikolu 170, għandhom jiġu assenjati lill-kulleġġ ġudikanti li ta d-deċiżjoni kkonċernata mit-talba.”

Il-paragrafu 2 huwa emendat kif ġej:

“2. Jekk il-kworum imsemmi fl-Artikoli 23 u 24 ma jintlaħaqx, it-talba għandha tiġi assenjata lil kulleġġ ġudikanti ieħor ikkostitwit mill-istess numru ta’ Mħallfin sedenti u li jkun jagħmel parti minnu l-Imħallef Relatur li jkun ittratta l-kawża kkonċernata mit-talba jew, fil-każ ta’ impediment tal-Imħallef Relatur, lil kulleġġ ġudikanti ieħor ikkostitwit mill-istess numru ta’ Mħallfin sedenti u li fost il-membri tiegħu jkun hemm mill-inqas wieħed mill-Imħallfin tal-kulleġġ ġudikanti li jkun ta d-deċiżjoni kkonċernata mit-talba. Jekk id-deċiżjoni tkun ingħatat minn Imħallef li ddeċieda bħala Mħallef uniku u jekk huwa jkun impedit, it-talba għandha tiġi assenjata lil Imħallef ieħor.”

Paragrafu ġdid, il-paragrafu 3, huwa miżjud. It-test huwa s-segwenti:

“3. It-talbiet imressqa abbażi tal-Artikolu 170 għandhom jiġu assenjati lil kulleġġ ġudikanti ikkostitwit minn tliet Imħallfin sedenti u li jkun jagħmel parti minnu l-Imħallef Relatur li jkun ittratta l-kawża kkonċernata mit-talba jew, fil-każ ta’ impediment tal-Imħallef Relatur, lil kulleġġ ġudikanti ikkostitwit minn tliet Imħallfin sedenti u li fost il-membri tiegħu jkun hemm mill-inqas wieħed mill-Imħallfin tal-kulleġġ ġudikanti li jkun ta d-deċiżjoni kkonċernata mit-talba. Jekk id-deċiżjoni tkun ingħatat minn Imħallef li ddeċieda bħala Mħallef uniku u jekk huwa jkun impedit, it-talba għandha tiġi assenjata lil Imħallef ieħor.”

38)

L-Artikolu 178 huwa emendat kif ġej:

Il-paragrafu 1 huwa emendat kif ġej:

“1. Ir-Reġistratur għandu jinforma lill-konvenut u lill-partijiet kollha fil-proċedimenti quddiem il-Bord tal-Appell dwar il-preżentata tar-rikors skont il-mod previst fl-Artikolu 80(1). Huwa għandu jinnotifika r-rikors wara li tiġi ddeterminata l-lingwa tal-kawża, skont l-Artikolu 45(3), u, jekk ikun il-każ, għandu jinnotifika t-traduzzjoni tar-rikors fil-lingwa tal-kawża.”

Il-paragrafu 2 huwa mħassar u ssostitwit bit-test segwenti:

“2. Meta l-indirizz ta’ parti oħra fil-proċedimenti quddiem il-Bord tal-Appell, indikat skont l-Artikolu 177(2) jew, fin-nuqqas ta’ din l-indikazzjoni, l-indirizz ta’ din il-parti l-oħra indikat fid-deċiżjoni kkontestata tal-Bord tal-Appell jikkorrispondi għal dak ta’ detentur ta’ kont ta’ aċċess għal e-Curia, ir-rikors għandu jiġi nnotifikat permezz ta’ e-Curia. Jekk dan ma jkunx il-każ, ir-rikors għandu jiġi nnotifikat billi tintbagħat kopja awtentikata tar-rikors permezz ta’ ittra rreġistrata, b’dikjarazzjoni ta’ rċevuta, jew billi din il-kopja tingħata direttament bl-għoti ta’ rċevuta, f’dan l-indirizz.”

c)	Il-paragrafu 3 huwa mħassar.

d)	Il-paragrafi 4 u 5 jsiru l-paragrafi 3 u 4.

39)	L-Artikolu 191, intitolat “Dispożizzjonijiet oħra applikabbli”, huwa mħassar.

40)

It-Titolu V, intitolat “Fuq l-appelli mid-deċiżjonijiet tat-Tribunal għas-Servizz Pubbliku” huwa mħassar u t-Titolu VI attwali, intitolat “Fuq il-proċeduri wara annullament fl-appell u wara li l-kawża tintbagħat lura” huwa nnumerat mill-ġdid bħala t-Titolu V. L-artikoli huma nnumerati mill-ġdid kif ġej:

a)	L-Artikolu 215, attwalment fis-seħħ, huwa nnumerat mill-ġdid u jsir l-Artikolu 191.

b)	L-Artikolu 216, attwalment fis-seħħ, huwa nnumerat mill-ġdid u jsir l-Artikolu 192.

c)	L-Artikolu 217, attwalment fis-seħħ, huwa nnumerat mill-ġdid u jsir l-Artikolu 193.

d)	L-Artikolu 218, attwalment fis-seħħ, huwa nnumerat mill-ġdid u jsir l-Artikolu 194.

e)	L-Artikolu 219, attwalment fis-seħħ, huwa nnumerat mill-ġdid u jsir l-Artikolu 195.

41)	L-Artikolu 192(2) il-ġdid huwa emendat kif ġej: “2. Meta l-Qorti tal-Ġustizzja tannulla sentenza jew digriet mogħtija mill-Awla Manja jew mill-Awla Intermedja tal-Qorti Ġenerali, il-kawża għandha tiġi assenjata lil kulleġġ ġudikanti kkostitwit mill-istess numru ta’ Mħallfin sedenti.”

42)	Fl-Artikolu 194 il-ġdid, ir-riferiment għall-“Artikolu 217” huwa ssostitwit b’riferiment għall-“Artikolu 193”.

43)

Titolu ġdid, it-Titolu VI intitolat “Fuq ir-rinviji għal deċiżjoni preliminari”, huwa miżjud wara t-Titolu V l-ġdid. It-test huwa s-segwenti:

“Kapitolu I

DISPOŻIZZJONIJIET ĠENERALI

Artikolu 196

Kamp ta’ applikazzjoni

Il-proċedura għandha tiġi rregolata mid-dispożizzjonijiet ta’ dan it-Titolu fil-każijiet imsemmija fl-Artikolu 50b tal-Istatut.

Artikolu 197

Dispożizzjonijiet applikabbli

Bla ħsara għad-dispożizzjonijiet partikolari ta’ dan it-Titolu, l-Artikoli 52 sa 56, 58, 60 sa 62, 67 u 75 huma applikabbli għar-rinviji għal deċiżjoni preliminari.

Artikolu 198

Notifiki

1. L-atti proċedurali u l-annessi kif ukoll id-deċiżjonijiet meħuda fil-mori tal-kawża inklużi fil-proċess tal-kawżi li jaqgħu taħt dan it-Titolu għandhom jiġu nnotifikati lill-qorti tar-rinviju u lill-partijiet interessati msemmija fl-Artikolu 23 tal-Istatut taħt ir-responsabbiltà tar-Reġistratur.

2. Dawn in-notifiki għandhom isiru permezz ta’ e-Curia, skont il-modalitajiet previsti fl-Artikoli 56a u 57, meta d-destinatarju tan-notifiki jkollu kont ta’ aċċess għal e-Curia.

3. Fil-każ li d-destinatarju tan-notifiki ma jkollux kont ta’ aċċess għal e-Curia, in-notifiki għandhom jsiru jew billi tintbagħat kopja tal-att li għandu jiġi nnotifikat permezz ta’ ittra rreġistrata, b’dikjarazzjoni ta’ rċevuta, jew billi din il-kopja tingħata direttament bl-għoti ta’ rċevuta, jew permezz ta’ mezz ta’ trażmissjoni elettronika użat mill-Qorti Ġenerali, meta d-destinatarju jkun ta l-kunsens tiegħu sabiex in-notifiki jsirulu permezz ta’ tali mezz.

Kapitolu II

FUQ IL-FAŻI BIL-MIKTUB TAL-PROĊEDURA

Artikolu 199

Kontenut tat-talba għal deċiżjoni preliminari

Minbarra t-test tad-domandi preliminari magħmula, it-talba għal deċiżjoni preliminari għandha tinkludi:

(a)	espożizzjoni fil-qosor tas-suġġett tal-kawża kif ukoll tal-fatti rilevanti, kif ġew ikkonstatati mill-qorti tar-rinviju jew, minn tal-inqas, espożizzjoni tal-informazzjoni fattwali li fuqha jkunu bbażati d-domandi;

(b)	il-kontenut tad-dispożizzjonijiet nazzjonali li jistgħu japplikaw għall-kawża ineżami u, jekk ikun il-każ, il-ġurisprudenza nazzjonali rilevanti;

(c)

espożizzjoni tar-raġunijiet li wasslu lill-qorti tar-rinviju sabiex ikollha dubji dwar l-interpretazzjoni jew il-validità ta’ ċerti dispożizzjonijiet tad-dritt tal-Unjoni, kif ukoll il-konnessjoni li hija tistabbilixxi bejn dawn id-dispożizzjonijiet u l-leġiżlazzjoni nazzjonali applikabbli għall-kawża prinċipali.

Artikolu 200

Avviż f’Il-Ġurnal Uffiċjali tal-Unjoni Ewropea

Għandu jiġi ppubblikat avviż f’Il-Ġurnal Uffiċjali tal-Unjoni Ewropea li jindika d-data tal-preżentata tat-talba għal deċiżjoni preliminari, il-qorti tar-rinviju, id-domandi magħmula u, bla ħsara għall-Artikolu 201, l-isem tal-partijiet fil-kawża prinċipali.

Artikolu 201

Anonimizzazzjoni u ommissjoni ta’ data

1. Meta l-qorti tar-rinviju tkun anonimizzat it-talba għal deċiżjoni preliminari jew tkun iddeċidiet li tħalli barra data dwar persuni fiżiċi jew dwar entitajiet ikkonċernati mill-kawża prinċipali, kemm jekk dawn ikunu partijiet jew terzi f’din il-kawża, il-Qorti Ġenerali għandha tosserva din l-anonimizzazzjoni jew din l-ommissjoni fil-kuntest tal-proċedura pendenti quddiemha.

2. Fuq talba tal-qorti tar-rinviju, ta’ parti fil-kawża prinċipali jew ex officio, il-Qorti Ġenerali tista’ barra minn hekk tanonimizza t-talba għal deċiżjoni preliminari jew tiddeċiedi li tħalli barra data personali dwar persuna fiżika waħda jew iktar ikkonċernati mill-kawża prinċipali, kemm jekk dawn ikunu partijiet jew terzi f’din il-kawża.

Artikolu 202

Parteċipazzjoni fil-proċedura għal deċiżjoni preliminari

1. Skont l-Artikolu 23 tal-Istatut, dawn li ġejjin huma awtorizzati jippreżentaw noti jew osservazzjonijiet bil-miktub:

(a)	il-partijiet fil-kawża prinċipali,

(b)	l-Istati Membri,

(c)	il-Kummissjoni Ewropea,

(d)	il-Parlament Ewropew, il-Kunsill u l-Bank Ċentrali Ewropew, meta jqisu li għandhom interess partikolari fil-kwistjonijiet imqajma mit-talba għal deċiżjoni preliminari,

(e)	l-istituzzjoni li adottat l-att li l-validità jew l-interpretazzjoni tiegħu jkunu qegħdin jiġu kkontestati,

(f)	l-Istati parti fil-Ftehim ŻEE, minbarra l-Istati Membri, kif ukoll l-Awtorità ta’ Sorveljanza EFTA, meta d-domanda preliminari tkun tikkonċerna wieħed mill-oqsma koperti minn dan il-ftehim,

(g)	l-Istati terzi parti fi ftehim li jkopri qasam partikolari konkluż mill-Kunsill, meta l-ftehim jipprevedi dan u meta qorti ta’ Stat Membru tagħmel domanda preliminari dwar il-qasam kopert minn dan il-ftehim.

2. In-nuqqas ta’ parteċipazzjoni fil-fażi bil-miktub tal-proċedura ma jipprekludix parteċipazzjoni fil-fażi orali tal-proċedura.

3. In-noti jew l-osservazzjonijiet bil-miktub ippreżentati skont dan l-artikolu għandhom jiġu ppubblikati fis-sit internet tal-Qorti tal-Ġustizzja tal-Unjoni Ewropea wara l-għeluq tal-proċedura għal deċiżjoni preliminari sakemm waħda mill-partijiet interessati msemmija fl-Artikolu 23 tal-Istatut ma toġġezzjonax għall-pubblikazzjoni tan-nota jew tal-osservazzjonijiet tagħha. Din l-oġġezzjoni, li ma huwiex meħtieġ li tkun motivata u li ma tistax tiġi kkontestata quddiem il-Qorti tal-Ġustizzja jew il-Qorti Ġenerali, għandha tiġi kkomunikata lir-Reġistru, permezz ta’ att separat, sa mhux iktar tard minn tliet xhur wara l-informazzjoni li ma saret ebda proposta ta’ eżami mill-ġdid mill-Avukat Ġenerali Ewlieni, jew wara n-notifika tad-deċiżjoni tal-Qorti tal-Ġustizzja li ma teżaminax mill-ġdid id-deċiżjoni tal-Qorti Ġenerali, jew wara l-għoti tas-sentenza ta’ eżami mill-ġdid. Fit-tali każ, din l-oġġezzjoni għandha tiġi indikata fis-sit imsemmi iktar ’il fuq u n-nota jew l-osservazzjonijiet ikkonċernati ma jiġux ippubblikati, lanqas b’mod parzjali. Jekk il-parti interessata sussegwentement tirtira l-oġġezzjoni tagħha għall-pubblikazzjoni tan-nota tagħha jew tal-osservazzjonijiet tagħha, din in-nota jew dawn l-osservazzjonijiet għandhom jiġu ppubblikat fis-sit hekk kif tiġi rtirata din l-oġġezzjoni. Jekk l-oġġezzjoni tiġi kkomunikata lir-Reġistru wara l-iskadenza tat-terminu msemmi iktar ’il fuq, in-nota jew l-osservazzjonijiet ippubblikati għandhom jitneħħew mis-sit.

Artikolu 203

Partijiet fil-kawża prinċipali

1. Il-partijiet fil-kawża prinċipali huma dawk identifikati bħala tali mill-qorti tar-rinviju skont ir-regoli proċedurali nazzjonali.

2. Meta din il-qorti tinforma lill-Qorti Ġenerali li tkun ġiet ammessa parti ġdida fil-kawża prinċipali, fi stadju fejn il-proċedura quddiem il-Qorti Ġenerali tkun diġà pendenti, din il-parti tidħol fil-kawża in statu et terminis fil-mument ta’ din l-informazzjoni. L-atti proċedurali kollha li jkunu diġà ġew innotifikati lill-partijiet interessati msemmija fl-Artikolu 23 tal-Istatut għandhom jiġu kkomunikati lil din il-parti.

3. Fir-rigward tar-rappreżentanza u tad-dehra tal-partijiet fil-kawża prinċipali, il-Qorti Ġenerali għandha tieħu inkunsiderazzjoni r-regoli proċedurali fis-seħħ quddiem il-qorti tar-rinviju. Fil-każ ta’ dubju dwar jekk persuna tistax tirrappreżenta parti fil-kawża prinċipali jew dwar jekk tali parti tistax taġixxi mingħajr rappreżentant skont id-dritt nazzjonali, il-Qorti Ġenerali tista’ titlob informazzjoni mingħand il-qorti tar-rinviju dwar ir-regoli proċedurali applikabbli. Meta, skont ir-regoli proċedurali nazzjonali applikabbli, il-partijiet fil-kawża prinċipali huma awtorizzati jidhru quddiem qorti mingħajr l-assistenza ta’ avukat jew ikunu rrappreżentati minn persuna awtorizzata sabiex tirrappreżentahom, għandhom japplikaw ir-regoli previsti fit-Taqsima 2 tal-Kapitolu I tat-Titolu III.

Artikolu 204

Traduzzjoni u notifika tat-talba għal deċiżjoni preliminari

1. It-talba għal deċiżjoni preliminari ittrasferita lill-Qorti Ġenerali mill-Qorti tal-Ġustizzja għandha tiġi nnotifikata lill-Istati Membri fil-verżjoni oriġinali, flimkien ma’ traduzzjoni fil-lingwa uffiċjali tal-Istat destinatarju. Jekk ikun xieraq fid-dawl tat-tul tat-talba, din it-traduzzjoni għandha tiġi ssostitwita bi traduzzjoni, fil-lingwa uffiċjali tal-Istat destinatarju, ta’ sunt ta’ din it-talba, li għandu jservi bħala bażi għat-teħid ta’ pożizzjoni minn dan l-Istat. Is-sunt għandu jinkludi t-test sħiħ tad-domanda jew domandi preliminari magħmula. Dan is-sunt għandu jinkludi wkoll, b’mod partikolari, sa fejn dawn l-elementi jkunu jinsabu fit-talba għal deċiżjoni preliminari, is-suġġett tal-kawża prinċipali, l-argumenti essenzjali tal-partijiet fil-kawża prinċipali, espożizzjoni fil-qosor tal-motivazzjoni tar-rinviju, kif ukoll il-ġurisprudenza u d-dispożizzjonijiet tad-dritt nazzjonali u tad-dritt tal-Unjoni invokati.

2. Fil-każijiet imsemmija fit-tielet paragrafu tal-Artikolu 23 tal-Istatut, it-talbiet għal deċiżjoni preliminari għandhom jiġu nnotifikati lill-Istati parti fil-Ftehim ŻEE, minbarra l-Istati Membri, kif ukoll lill-Awtorità ta’ Sorveljanza EFTA, fil-verżjoni oriġinali, flimkien ma’ traduzzjoni tat-talba, jew, jekk ikun il-każ, ta’ sunt, f’waħda mil-lingwi msemmija fl-Artikolu 44, skont l-għażla tad-destinatarju.

3. Meta Stat terz ikollu d-dritt li jipparteċipa fi proċedura għal deċiżjoni preliminari skont ir-raba’ paragrafu tal-Artikolu 23 tal-Istatut, it-talba għal deċiżjoni preliminari għandha tiġi nnotifikata lilu fil-verżjoni oriġinali, flimkien ma’ traduzzjoni tat-talba, jew, jekk ikun il-każ, ta’ sunt, f’waħda mil-lingwi msemmija fl-Artikolu 44, skont l-għażla tal-Istat terz ikkonċernat.

Artikolu 205

Preżentata tal-atti proċedurali

1. L-atti proċedurali previsti f’dan it-Titolu jistgħu jiġu ppreżentati fir-Reġistru permezz ta’ e-Curia, skont il-modalitajiet previsti fl-Artikoli 56a u 72, meta l-awturi ta’ dawn l-atti jkollhom kont ta’ aċċess għal e-Curia.

2. Fil-każ li l-awtur tal-att ma jkollux kont ta’ aċċess għal e-Curia, l-att proċedurali, flimkien mal-annessi kollha msemmija fih u ma’ skeda li telenka dawn l-annessi, għandu jiġi ddepożitat fir-Reġistru f’verżjoni stampata. L-oriġinal ta’ dan l-att għandu jkun iffirmat bl-idejn mir-rappreżentant tal-parti interessata msemmija fl-Artikolu 23 tal-Istatut li tippreżentah jew, meta r-regoli proċedurali nazzjonali applikabbli għal din il-kawża jippermettu dan, mill-parti fil-kawża prinċipali.

3. Kull att proċedurali għandu jkollu data. Għall-finijiet tat-termini proċedurali, huma biss id-data u s-siegħa tal-preżentata tal-oriġinal fir-Reġistru li għandhom jittieħdu inkunsiderazzjoni.

4. B’deroga mit-tieni sentenza tal-paragrafu 3, id-data u s-siegħa li fihom kopja sħiħa tal-oriġinal iffirmat ta’ att proċedurali, inkluża l-iskeda bil-lista tal-annessi msemmija fil-paragrafu 2, tasal fir-Reġistru permezz ta’ mezz ta’ trażmissjoni elettronika użat mill-Qorti Ġenerali, għandhom jittieħdu inkunsiderazzjoni għall-finijiet tal-osservanza tat-termini proċedurali jekk l-oriġinal tal-att, flimkien mal-annessi, jiġi ppreżentat fir-Reġistru sa mhux iktar tard minn għaxart ijiem wara. L-Artikolu 60 ma huwiex applikabbli għal dan it-terminu ta’ għaxart ijiem.

5. Barra minn dan, l-istituzzjonijiet għandhom jipproduċu, fit-termini ffissati mill-Qorti Ġenerali, it-traduzzjonijiet ta’ kull att proċedurali fil-lingwi l-oħra kollha msemmija fl-Artikolu 1 tar-Regolament Nru 1 tal-Kunsill.

Kapitolu III

FUQ IR-RAPPORT PRELIMINARI

Artikolu 206

Rapport preliminari

1. Ladarba tingħalaq il-fażi bil-miktub tal-proċedura, il-President għandu jiffissa d-data li fiha l-Imħallef Relatur għandu jippreżenta rapport preliminari lill-Qorti Ġenerali.

2. Ir-rapport preliminari għandu jinkludi analiżi tal-kwistjonijiet rilevanti mqajma mit-talba għal deċiżjoni preliminari, proposti dwar l-eventwali riferiment tal-kawża lill-Qorti tal-Ġustizzja skont it-tieni subparagrafu tal-Artikolu 256(3) TFUE, dwar il-kwistjoni jekk il-kawża teħtieġx miżuri ta’ organizzazzjoni tal-proċedura, miżuri istruttorji jew talbiet għal kjarifiki mingħand il-qorti tar-rinviju, kif ukoll dwar l-eventwalità li l-kawża tintbagħat quddiem l-Awla Manja, quddiem l-Awla Intermedja jew quddiem kulleġġ ġudikanti kkostitwit min-numru differenti ta’ Mħallfin sedenti. Ir-rapport għandu jinkludi wkoll il-proposta tal-Imħallef Relatur dwar l-eventwali dispensa mis-seduta għas-sottomissjonijiet orali kif ukoll dwar il-possibbiltà li l-kawża tinqata’ mingħajr konklużjonijiet tal-Avukat Ġenerali skont il-ħames paragrafu tal-Artikolu 20 tal-Istatut.

3. Il-Qorti Ġenerali, wara li jinstema’ l-Avukat Ġenerali, għandha tiddeċiedi dwar il-provvedimenti li għandhom jittieħdu fuq il-proposti tal-Imħallef Relatur u, jekk ikun il-każ, dwar il-ftuħ tal-fażi orali tal-proċedura.

Kapitolu IV

FUQ IL-MIŻURI LI JISTGĦU JIĠU ADOTTATI MILL-QORTI ĠENERALI

Artikolu 207

Riferiment ta’ talba lill-Qorti tal-Ġustizzja

1. Jekk talba għal deċiżjoni preliminari titressaq direttament quddiem il-Qorti Ġenerali b’nuqqas ta’ osservanza tat-tielet paragrafu tal-Artikolu 50b tal-Istatut, ir-Reġistratur tal-Qorti Ġenerali għandu jgħaddiha immedjatament lir-Reġistratur tal-Qorti tal-Ġustizzja.

2. Id-deċiżjonijiet ta’ riferiment, imsemmija fit-tieni paragrafu tal-Artikolu 54 tal-Istatut, għandhom jittieħdu mill-Qorti Ġenerali, fuq proposta tal-Imħallef Relatur u wara li jinstema’ l-Avukat Ġenerali, permezz ta’ digriet motivat, li ma jistax jiġi kkontestat.

3. L-awla adita bil-kawża tista’, f’kull stadju tal-proċedura u wara li jinstema’ l-Avukat Ġenerali, tipproponi lil-laqgħa plenarja r-riferiment previst fit-tieni subparagrafu tal-Artikolu 256(3) TFUE. Id-deċiżjoni ta’ riferiment għandha tittieħed mil-laqgħa plenarja.

4. Il-President u l-Viċi President tal-Qorti Ġenerali jistgħu wkoll, wara li jinstema’ l-Avukat Ġenerali, jipproponu lil-laqgħa plenarja r-riferiment previst fil-paragrafu preċedenti sal-għeluq tal-fażi orali tal-proċedura jew, jekk ikunu ġew ippreżentati konklużjonijiet, sa mhux iktar tard minn ġimgħa wara l-preżentazzjoni tagħhom, jew qabel id-deċiżjoni li l-kawża tinqata’ mingħajr il-fażi orali tal-proċedura. Id-deċiżjoni ta’ riferiment għandha tittieħed mil-laqgħa plenarja.

Artikolu 208

Kawżi magħquda

1. Meta diversi kawżi għal deċiżjoni preliminari jkollhom l-istess suġġett, dawn il-kawżi jistgħu, f’kull ħin, jintgħaqdu minħabba konnessjoni għall-finijiet, alternattivament jew kumulattivament, tal-fażi bil-miktub jew tal-fażi orali tal-proċedura jew tad-deċiżjoni li tagħlaq l-istanza.

2. Il-President għandu jiddeċiedi dwar it-tgħaqqid tal-kawżi, wara li jinstema’ l-Avukat Ġenerali.

3. Kawżi magħquda jistgħu jerġgħu jinfirdu, fil-kundizzjonijiet previsti fil-paragrafu 2.

4. It-talba għal deċiżjoni preliminari, flimkien mat-traduzzjonijiet tagħha jew mat-traduzzjonijiet tas-sunt tat-talba, kif ukoll l-osservazzjonijiet tal-partijiet interessati msemmija fl-Artikolu 23 tal-Istatut għandhom jiġu nnotifikati lill-partijiet interessati msemmija fl-Artikolu 23 tal-Istatut fil-kawża magħquda, skont il-modalitajiet previsti fl-Artikolu 198.

Artikolu 209

Sospensjoni u tkomplija tal-proċedura

1. Il-proċedura tista’ tiġi sospiża:

(a)	fil-każijiet previsti fit-tielet paragrafu tal-Artikolu 54 tal-Istatut, permezz ta’ digriet tal-Qorti Ġenerali, wara li jinstema’ l-Avukat Ġenerali;

(b)	fil-każijiet l-oħra kollha, meta dan ikun meħtieġ mill-amministrazzjoni tajba tal-ġustizzja, permezz ta’ deċiżjoni tal-President, wara li jinstema’ l-Avukat Ġenerali.

2. Il-proċedura tista’ titkompla permezz ta’ digriet jew ta’ deċiżjoni mogħtija skont l-istess modalitajiet.

3. Is-sospensjoni tal-proċedura tidħol fis-seħħ fid-data indikata fid-digriet jew fid-deċiżjoni ta’ sospensjoni jew, fin-nuqqas ta’ tali indikazzjoni, fid-data ta’ dan id-digriet jew deċiżjoni.

4. Matul il-perijodu ta’ sospensjoni, ebda terminu proċedurali ma jiddekorri fir-rigward tal-partijiet interessati msemmija fl-Artikolu 23 tal-Istatut.

5. Meta d-digriet jew id-deċiżjoni ta’ sospensjoni ma jiffissawx meta għandha tintemm is-sospensjoni, din tintemm fid-data indikata fid-digriet jew fid-deċiżjoni ta’ tkomplija tal-proċedura jew, fin-nuqqas ta’ tali indikazzjoni, fid-data ta’ dan id-digriet jew deċiżjoni.

6. Mid-data tat-tkomplija tal-proċedura wara sospensjoni, it-termini proċedurali interrotti għandhom jiġu ssostitwiti b’termini ġodda li jibdew jiddekorru mid-data ta’ din it-tkomplija.

Artikolu 210

Miżuri ta’ organizzazzjoni tal-proċedura

1. Minbarra l-miżuri li jistgħu jiġi deċiżi skont l-Artikolu 24 tal-Istatut, il-partijiet interessati msemmija fl-Artikolu 23 tal-Istatut jistgħu jiġu mistiedna sabiex iwieġbu għal ċerti mistoqsijiet bil-miktub jew matul is-seduta għas-sottomissjonijiet orali. Meta tinżamm seduta għas-sottomissjonijiet orali, il-Qorti Ġenerali, meta jkun possibbli, għandha tistieden lill-parteċipanti f’din is-seduta sabiex jikkonċentraw is-sottomissjonijiet tagħhom fuq mistoqsija jew mistoqsijiet partikolari.

2. Il-miżuri ta’ organizzazzjoni tal-proċedura msemmija fil-paragrafu 1 għandhom jiġu deċiżi mill-Qorti Ġenerali, wara li jinstema’ l-Avukat Ġenerali.

3. L-Imħallef Relatur jew l-Avukat Ġenerali jistgħu jitolbu lill-partijiet interessati msemmija fl-Artikolu 23 tal-Istatut jissottomettu, fit-terminu stabbilit, l-informazzjoni kollha dwar il-fatti, id-dokumenti kollha jew il-punti kollha li huma jqisu li huma rilevanti. Huma jistgħu wkoll jibgħatulhom mistoqsijiet sabiex iwieġbuhom matul is-seduta.

Artikolu 211

Miżuri istruttorji

1. Il-Qorti Ġenerali, wara li jinstema’ l-Avukat Ġenerali, tista’ tadotta l-miżuri istruttorji li hija tqis xierqa fost dawk previsti fl-Artikolu 91(a), (b), (d), (e) u (f), skont il-modalitajiet u r-regoli ta’ parteċipazzjoni stabbiliti fl-Artikolu 92(1), (4), (5) u (6), u għandha twettaqhom skont il-modalitajiet stabbiliti fl-Artikoli 93 sa 102.

2. Il-partijiet interessati msemmija fl-Artikolu 23 tal-Istatut jistgħu jassistu għall-miżuri istruttorji u għandhom jipparteċipaw fl-implimentazzjoni tagħhom skont il-modalitajiet previsti għall-partijiet fid-dispożizzjonijiet imsemmija fil-paragrafu 1.

Artikolu 212

Talba għal kjarifiki

Bla ħsara għall-miżuri ta’ organizzazzjoni tal-proċedura u għall-miżuri istruttorji previsti f’dawn ir-Regoli, il-Qorti Ġenerali tista’, wara li jinstema’ l-Avukat Ġenerali, titlob kjarifiki mingħand il-qorti tar-rinviju fit-terminu ffissat minnha.

Kapitolu V

FUQ IL-FAŻI ORALI TAL-PROĊEDURA

Artikolu 213

Seduta għas-sottomissjonijiet orali

1. Eventwali talbiet motivati għal seduta għas-sottomissjonijiet orali għandhom jitressqu f’terminu ta’ tliet ġimgħat li jiddekorri min-notifika lill-partijiet interessati msemmija fl-Artikolu 23 tal-Istatut tal-għeluq tal-fażi bil-miktub tal-proċedura. Il-President jista’ jipproroga dan it-terminu.

2. Fuq proposta tal-Imħallef Relatur u wara li jinstema’ l-Avukat Ġenerali, il-Qorti Ġenerali tista’ tiddeċiedi li ma ssirx seduta għas-sottomissjonijiet orali jekk tqis, minn qari tan-noti jew tal-osservazzjonijiet ippreżentati matul il-fażi bil-miktub tal-proċedura, li għandha biżżejjed informazzjoni sabiex tkun tista’ tiddeċiedi.

3. Il-paragrafu preċedenti ma japplikax meta titressaq talba motivata għal seduta għas-sottomissjonijiet orali minn parti interessata msemmija fl-Artikolu 23 tal-Istatut li ma tkunx ipparteċipat fil-fażi bil-miktub tal-proċedura.

Artikolu 214

Seduta komuni għas-sottomissjonijiet orali

Il-Qorti Ġenerali tista’ tiddeċiedi li torganizza seduta għas-sottomissjonijiet orali li tkun komuni għal diversi kawżi għal deċiżjoni preliminari meta x-xebh bejniethom jippermetti dan.

Artikolu 215

Data tas-seduta għas-sottomissjonijiet orali

1. Jekk il-Qorti Ġenerali tiddeċiedi li torganizza seduta għas-sottomissjonijiet orali, id-data għal din is-seduta għandha tiġi stabbilita mill-President.

2. F’każijiet eċċezzjonali, il-President jista’, ex officio jew fuq talba motivata ta’ parti interessata msemmija fl-Artikolu 23 tal-Istatut, jiddifferixxi d-data tas-seduta għas-sottomissjonijiet orali.

Artikolu 216

Parteċipazzjoni f’seduta permezz ta’ videokonferenza

1. Meta raġunijiet sanitarji, raġunijiet ta’ sigurtà jew raġunijiet serji oħra jipprekludu lir-rappreżentant ta’ parti interessata msemmija fl-Artikolu 23 tal-Istatut jew lil parti fil-kawża prinċipali awtorizzata tidher quddiem qorti mingħajr l-assistenza ta’ avukat milli jipparteċipaw fiżikament f’seduta għas-sottomissjonijiet orali, dan ir-rappreżentant jew din il-parti jistgħu jiġu awtorizzati jipparteċipaw f’din is-seduta permezz ta’ videokonferenza.

2. It-talba għall-parteċipazzjoni f’seduta permezz tal-videokonferenza għandha titressaq permezz ta’ att separat hekk kif issir magħrufa l-kawża tal-impediment u għandha tindika, b’mod preċiż, in-natura ta’ dan l-impediment.

3. Il-President għandu jiddeċiedi dwar din it-talba fl-iqsar żmien possibbli.

4. L-użu tal-videokonferenza huwa eskluż fil-każ ta’ deċiżjoni li seduta tinżamm bil-magħluq meħuda mill-Qorti Ġenerali taħt l-Artikolu 217.

5. Il-kundizzjonijiet tekniċi li għandhom ikunu ssodisfatti għall-parteċipazzjoni fis-seduti permezz tal-videokonferenza għandhom jiġu speċifikati fid-dispożizzjonijiet prattiċi msemmija fl-Artikolu 243.

Artikolu 217

Seduta bil-magħluq

1. Il-Qorti Ġenerali tista’ tiddeċiedi li s-seduta tinżamm bil-magħluq meta jkun hemm raġunijiet serji.

2. Id-deċiżjoni li s-seduta tinżamm bil-magħluq tinkludi projbizzjoni fir-rigward tal-pubblikazzjoni tat-trattazzjoni.

Artikolu 218

Żvolġiment tas-seduta għas-sottomissjonijiet orali

1. Il-President għandu jiftaħ u jmexxi t-trattazzjoni u għandu jżomm il-bon ordni waqt is-seduta.

2. Matul is-seduta għas-sottomissjonijiet orali, il-Membri tal-kulleġġ ġudikanti u l-Avukat Ġenerali jistgħu jagħmlu mistoqsijiet lir-rappreżentanti tal-partijiet interessati msemmija fl-Artikolu 23 u, fiċ-ċirkustanzi previsti fl-Artikolu 203(3) ta’ dawn ir-Regoli, lill-partijiet fil-kawża prinċipali.

Artikolu 219

Xandir tas-seduti

1. Is-seduti tal-Qorti Ġenerali jistgħu jixxandru. Dan ix-xandir għandu jsir f’ħin reali fil-każ tal-għoti ta’ sentenzi jew tal-preżentazzjoni ta’ konklużjonijiet, u għandu jsir f’ħin iddifferit fil-każ tas-sottomissjonijiet orali tal-partijiet interessati msemmija fl-Artikolu 23 tal-Istatut f’kawża mibgħuta quddiem l-Awla Manja, l-Awla Intermedja, jew, f’każijiet eċċezzjonali, meta dan ikun iġġustifikat mill-interess fil-kawża, quddiem awla kkostitwita minn ħames Imħallfin sedenti.

2. Meta l-Qorti Ġenerali jkollha l-intenzjoni xxandar seduta għas-sottomissjonijiet orali, il-partijiet interessati msemmija fl-Artikolu 23 tal-Istatut għandhom jiġu informati dwar dan mir-Reġistratur, flimkien mas-sejħa għal din is-seduta.

3. Jekk parti interessata msemmija fl-Artikolu 23 tal-Istatut tqis li s-seduta li għaliha ssejħet ma għandhiex tixxandar, hija għandha tinforma b’dan lill-Qorti Ġenerali fl-iqsar żmien possibbli filwaqt li tispjega, fid-dettall, iċ-ċirkustanzi ta’ natura li jiġġustifikaw l-assenza ta’ xandir.

4. Il-Qorti Ġenerali għandha tiddeċiedi dwar din it-talba fl-iqsar żmien possibbli.

5. Ir-reġistrazzjoni video tas-seduti għas-sottomissjonijiet orali li jkunu s-suġġett ta’ xandir għandha tibqa’ disponibbli fis-sit internet tal-Qorti tal-Ġustizzja tal-Unjoni Ewropea għal perijodu ta’ mhux iktar minn xahar wara l-għeluq tas-seduta għas-sottomissjonijiet orali.

6. Jekk parti interessata msemmija fl-Artikolu 23 tal-Istatut tqis li r-reġistrazzjoni video ta’ seduta għas-sottomissjonijiet orali li fiha tkun ipparteċipat għandha titneħħa mis-sit internet imsemmi iktar ’il fuq, hija għandha tinforma b’dan lill-Qorti Ġenerali fl-iqsar żmien possibbli filwaqt li tispjega ċ-ċirkustanzi ta’ natura li jiġġustifikaw din it-tneħħija.

7. Il-President għandu jiddeċiedi dwar din it-talba mill-ewwel, wara li jinstema’ l-Avukat Ġenerali.

Artikolu 220

Għeluq tas-seduta għas-sottomissjonijiet orali

Wara li jinstemgħu s-sottomissjonijiet orali tal-partijiet interessati msemmija fl-Artikolu 23 tal-Istatut, il-President għandu jiddikjara magħluqa s-seduta għas-sottomissjonijiet orali.

Artikolu 221

Preżentazzjoni tal-konklużjonijiet tal-Avukat Ġenerali

1. Meta tkun inżammet seduta għas-sottomissjonijiet orali, il-konklużjonijiet tal-Avukat Ġenerali għandhom jiġu ppreżentati wara l-għeluq tagħha, fid-data mħabbra mill-Avukat Ġenerali.

2. Fl-assenza ta’ seduta għas-sottomissjonijiet orali, il-konklużjonijiet tal-Avukat Ġenerali għandhom jiġu ppreżentati fid-data mħabbra mill-Avukat Ġenerali.

3. Il-preżentazzjoni tal-konklużjonijiet tal-Avukat Ġenerali tagħlaq il-fażi orali tal-proċedura.

Artikolu 222

Ftuħ jew ftuħ mill-ġdid tal-fażi orali tal-proċedura

Il-Qorti Ġenerali tista’, f’kull ħin, wara li jinstema’ l-Avukat Ġenerali, tordna l-ftuħ jew il-ftuħ mill-ġdid tal-fażi orali tal-proċedura, b’mod partikolari meta tqis li ma għandhiex informazzjoni biżżejjed jew meta waħda mill-partijiet interessati msemmija fl-Artikolu 23 tal-Istatut tippreżenta, wara l-għeluq ta’ din il-fażi, fatt ġdid ta’ natura li jeżerċita influwenza deċiżiva fuq id-deċiżjoni tal-Qorti tal-Ġustizzja, jew inkella meta l-kawża jkollha tiġi deċiża fuq il-bażi ta’ argument li ma kienx indirizzat mill-partijiet interessati msemmija fl-Artikolu 23 tal-Istatut.

Artikolu 223

Proċess verbal tas-seduta

1. Ir-Reġistratur għandu jħejji proċess verbal għal kull seduta. Dan il-proċess verbal għandu jiġi ffirmat mill-President u mir-Reġistratur. Il-proċess verbal huwa att awtentiku.

2. Il-partijiet interessati msemmija fl-Artikolu 23 tal-Istatut jistgħu jikkonsultaw il-proċess verbal fir-Reġistru u jistgħu jiksbu kopja tiegħu.

Artikolu 224

Reġistrazzjoni awdjo tas-seduta

Il-President tal-Qorti Ġenerali jista’, fuq talba debitament ġustifikata, jawtorizza lil parti interessata msemmija fl-Artikolu 23 tal-Istatut li pparteċipat fil-fażi bil-miktub jew fil-fażi orali tal-proċedura sabiex tisma’, fil-bini tal-Qorti Ġenerali, ir-reġistrazzjoni awdjo tas-seduta għas-sottomissjonijiet orali fil-lingwa użata mill-kelliema matul is-seduta.

Kapitolu VI

FUQ IS-SENTENZI U FUQ ID-DIGRIETI

Artikolu 225

Nuqqas ta’ kompetenza jew inammissibbiltà manifesti

Meta l-Qorti Ġenerali manifestament ma jkollhiex kompetenza sabiex tieħu konjizzjoni ta’ kawża jew meta talba tkun manifestament inammissibbli, il-Qorti tal-Ġenerali tista’, f’kull ħin u wara li jinstema’ l-Avukat Ġenerali, tiddeċiedi permezz ta’ digriet motivat, mingħajr ma tkompli l-proċedura.

Artikolu 226

Risposta permezz ta’ digriet motivat

Meta domanda preliminari magħmula tkun identika għal domanda li dwarha l-Qorti tal-Ġustizzja jew il-Qorti Ġenerali jkunu diġà ddeċidew, meta r-risposta għal tali domanda tkun tista’ tiġi dedotta b’mod ċar mill-ġurisprudenza jew meta r-risposta għad-domanda preliminari ma tħalli lok għal ebda dubju raġonevoli, il-Qorti Ġenerali tista’, f’kull ħin, fuq proposta tal-Imħallef Relatur u wara li jinstema’ l-Avukat Ġenerali, tiddeċiedi permezz ta’ digriet motivat.

Artikolu 227

Talba mressqa quddiem il-Qorti Ġenerali

1. Il-Qorti Ġenerali tibqa’ adita b’talba għal deċiżjoni preliminari sakemm il-qorti li tkun ressqitha ma tirtirahiex. L-irtirar ta’ talba jista’ jittieħed inkunsiderazzjoni san-notifika tad-data tal-għoti tas-sentenza lill-partijiet interessati msemmija fl-Artikolu 23 tal-Istatut.

2. Madankollu, il-Qorti Ġenerali tista’, f’kull ħin u bla ħsara għall-Artikolu 207, tikkonstata li l-kundizzjonijiet li fuqhom hija bbażata l-ġurisdizzjoni tagħha ma għadhomx sodisfatti.

Artikolu 228

Spejjeż tal-proċedura għal deċiżjoni preliminari

Hija l-qorti tar-rinviju li għandha tiddeċiedi dwar l-ispejjeż tal-proċedura għal deċiżjoni preliminari.

Artikolu 229

Data tal-għoti tas-sentenza

Il-partijiet interessati msemmija fl-Artikolu 23 tal-Istatut għandhom jiġu informati dwar id-data tal-għoti tas-sentenza.

Artikolu 230

Kontenut tas-sentenza

Is-sentenza għandha tinkludi:

(a)	l-indikazzjoni li tkun qiegħda tingħata mill-Qorti Ġenerali;

(b)	l-indikazzjoni tal-kulleġġ ġudikanti;

(c)	id-data tal-għoti tagħha;

(d)	l-ismijiet tal-President u tal-Imħallfin li pparteċipaw fid-deliberazzjonijiet, b’indikazzjoni tal-Imħallef Relatur;

(e)	l-isem tal-Avukat Ġenerali;

(f)	l-isem tar-Reġistratur;

(g)	l-indikazzjoni tal-partijiet interessati msemmija fl-Artikolu 23 tal-Istatut li jkunu pparteċipaw fil-proċedura;

(h)	l-ismijiet tar-rappreżentanti tagħhom;

(i)	jekk ikun il-każ, id-data tas-seduta għas-sottomissjonijiet orali;

(j)	l-indikazzjoni li l-Avukat Ġenerali nstema’ u, jekk ikun il-każ, id-data tal-konklużjonijiet tiegħu;

(k)	espożizzjoni fil-qosor tal-fatti;

(l)	ir-raġunijiet;

(m)	id-dispożittiv.

Artikolu 231

Għoti u notifika tas-sentenza

1. Is-sentenza għandha tingħata fil-qorti bil-miftuħ.

2. L-oriġinal tas-sentenza, iffirmat mill-President, mill-Imħallfin li pparteċipaw fid-deliberazzjonijiet u mir-Reġistratur, għandu jiġi ssiġillat u ddepożitat fir-Reġistru. Kopja tas-sentenza għandha tiġi nnotifikata lill-qorti tar-rinviju, lill-partijiet interessati msemmija fl-Artikolu 23 tal-Istatut u lill-Qorti tal-Ġustizzja.

Artikolu 232

Kontenut tad-digriet

1. Id-digriet għandu jinkludi:

(a)	l-indikazzjoni li jkun qiegħed jingħata, skont il-każ, mill-Qorti Ġenerali jew mill-President;

(b)	jekk ikun il-każ, l-indikazzjoni tal-kulleġġ ġudikanti;

(c)	id-data tal-adozzjoni tiegħu;

(d)	l-indikazzjoni tal-bażi legali li fuqha jkun ibbażat;

(e)	l-isem tal-President u, jekk ikun il-każ, l-ismijiet tal-Imħallfin li pparteċipaw fid-deliberazzjonijiet, b’indikazzjoni tal-Imħallef Relatur;

(f)	l-isem tal-Avukat Ġenerali;

(g)	l-isem tar-Reġistratur;

(h)	l-indikazzjoni tal-partijiet interessati msemmija fl-Artikolu 23 tal-Istatut li jkunu pparteċipaw fil-proċedura;

(i)	l-ismijiet tar-rappreżentanti tagħhom;

(j)	l-indikazzjoni li l-Avukat Ġenerali nstema’;

(k)	id-dispożittiv.

2. Fil-każijiet li dawn ir-Regoli jipprovdu li digriet għandu jkun motivat, id-digriet għandu jinkludi wkoll:

(a)	espożizzjoni fil-qosor tal-fatti;

(b)	ir-raġunijiet.

Artikolu 233

Firma u notifika tad-digriet

L-oriġinal tad-digriet, iffirmat mill-President u mir-Reġistratur, għandu jiġi ssiġillat u ddepożitat fir-Reġistru. Kopja tad-digriet għandha tiġi nnotifikata lill-qorti tar-rinviju, lill-partijiet interessati msemmija fl-Artikolu 23 tal-Istatut u lill-Qorti tal-Ġustizzja.

Artikolu 234

Dħul fis-seħħ tas-sentenzi u tad-digrieti

Is-sentenzi u d-digrieti jidħlu fis-seħħ fil-kundizzjonijiet previsti fit-tieni paragrafu tal-Artikolu 62b tal-Istatut.

Artikolu 235

Rettifika tas-sentenzi u tad-digrieti

1. L-iżbalji tal-pinna jew ta’ kalkolu jew l-ineżattezzi evidenti li jista’ jkun hemm fis-sentenzi u fid-digrieti jistgħu jiġu rrettifikati mill-Qorti Ġenerali ex officio jew fuq talba minn parti interessata msemmija fl-Artikolu 23 tal-Istatut sakemm din it-talba titressaq f’terminu ta’ ġimagħtejn li jiddekorri mill-għoti tas-sentenza jew min-notifika tad-digriet.

2. Il-Qorti Ġenerali għandha tiddeċiedi wara li jinstema’ l-Avukat Ġenerali.

3. L-oriġinal tad-digriet ta’ rettifika għandu jiġi anness mal-oriġinal tad-deċiżjoni rrettifikata. Fil-marġni tal-oriġinal tad-deċiżjoni rrettifikata għandu jsir notament dwar id-digriet ta’ rettifika.

Artikolu 236

Interpretazzjoni tad-deċiżjonijiet preliminari

1. L-Artikolu 168 ta’ dawn ir-Regoli, dwar l-interpretazzjoni tas-sentenzi u tad-digrieti, ma huwiex applikabbli għad-deċiżjonijiet mogħtija b’risposta għal talba għal deċiżjoni preliminari.

2. Huma l-qrati nazzjonali li għandhom jevalwaw jekk deċiżjoni preliminari tagħtihomx biżżejjed kjarifiki jew jekk jidhrilhomx li jkun neċessarju li jressqu talba ġdida għal deċiżjoni preliminari.

Kapitolu VII

FUQ IL-PROĊEDURA MĦAFFA GĦAL DEĊIŻJONI PRELIMINARI

Artikolu 237

Proċedura mħaffa

1. Meta n-natura tal-kawża teżiġi li tiġi ttrattata f’qasir żmien, il-President jista’, fuq talba tal-qorti tar-rinviju jew, f’każijiet eċċezzjonali, ex officio, u wara li jinstema’ l-Avukat Ġenerali, jiddeċiedi li r-rinviju għal deċiżjoni preliminari għandu jiġi suġġett għal proċedura mħaffa li tidderoga mid-dispożizzjonijiet ta’ dawn ir-Regoli.

2. F’dan il-każ, il-President għandu jiffissa minnufih id-data għas-seduta, li għandha tiġi kkomunikata lill-partijiet interessati msemmija fl-Artikolu 23 tal-Istatut, flimkien man-notifika tat-talba għal deċiżjoni preliminari.

3. Il-partijiet interessati msemmija fil-paragrafu preċedenti jistgħu, f’terminu ffissat mill-President li ma jistax ikun inqas minn 15-il jum, jippreżentaw noti jew osservazzjonijiet bil-miktub. Il-President jista’ jistieden lil dawn il-partijiet interessati jillimitaw in-noti jew l-osservazzjonijiet bil-miktub tagħhom għall-punti ta’ liġi essenzjali mqajma mit-talba għal deċiżjoni preliminari.

4. In-noti jew l-osservazzjonijiet bil-miktub eventwalment ippreżentati għandhom jiġu kkomunikati lill-partijiet interessati kollha msemmija fl-Artikolu 23 tal-Istatut qabel is-seduta.

5. Il-Qorti Ġenerali għandha tiddeċiedi wara li jinstema’ l-Avukat Ġenerali.

Artikolu 238

Trażmissjoni tal-atti proċedurali

1. L-atti proċedurali previsti fl-artikolu preċedenti għandhom jitqiesu li ġew ippreżentati bit-trażmissjoni lir-Reġistru, permezz ta’ e-Curia jew ta’ mezz ta’ trażmissjoni elettronika użat mill-Qorti Ġenerali, ta’ kopja tal-oriġinal iffirmat u tal-annessi u d-dokumenti invokati insostenn tal-att flimkien mal-iskeda msemmija fl-Artikolu 205(2). L-oriġinal tal-att u tal-annessi msemmija iktar ’il fuq għandhom jintbagħtu minnufih lir-Reġistru meta l-kopji tagħhom ikunu ġew ikkomunikati permezz ta’ mezz ta’ trażmissjoni elettronika użat mill-Qorti Ġenerali.

2. In-notifiki u l-komunikazzjonijiet previsti fl-artikolu preċedenti għandhom jsiru permezz ta’ trażmissjoni ta’ kopja tad-dokument permezz ta’ e-Curia jew ta’ mezz ta’ trażmissjoni elettronika użat mill-Qorti Ġenerali.

Kapitolu VIII

FUQ L-GĦAJNUNA LEGALI

Artikolu 239

Talba għal għajnuna legali

1. Jekk parti fil-kawża prinċipali ma tkunx tista’ tħallas l-ispejjeż kollha tal-istanza jew parti minnhom, hija tista’, f’kull ħin, titlob il-benefiċċju tal-għajnuna legali.

2. It-talba għal għajnuna legali għandha tinkludi l-informazzjoni u d-dokumenti ta’ sostenn kollha li permezz tagħhom tkun tista’ tiġi evalwata s-sitwazzjoni ekonomika tal-persuna li qed tressaqha, bħal ma jista’ jkun ċertifikat maħruġ minn awtorità nazzjonali kompetenti li jattesta din is-sitwazzjoni ekonomika.

3. Jekk il-parti li tressaq it-talba tkun diġà kisbet l-għajnuna legali quddiem il-qorti tar-rinviju, hija għandha tipproduċi d-deċiżjoni ta’ din il-qorti u għandha tippreċiża xi jkopru l-ammonti li diġà rċeviet.

Artikolu 240

Deċiżjoni dwar it-talba għal għajnuna legali

1. Id-deċiżjoni dwar it-talba għal għajnuna legali għandha tittieħed mill-President, wara li jinstema’ l-Avukat Ġenerali, permezz ta’ digriet.

2. Fil-każ li l-benefiċċju tal-għajnuna legali jiġi rrifjutat kompletament jew parzjalment, id-digriet għandu jkun motivat.

Artikolu 241

Ammonti li għandhom jitħallsu bħala għajnuna legali

Fil-każ li jingħata l-benefiċċju tal-għajnuna legali, il-kaxxier tal-Qorti Ġenerali għandu jħallas, jekk ikun il-każ fil-limiti stabbiliti mill-President, l-ispejjeż marbuta mal-assistenza u mar-rappreżentanza quddiem il-Qorti Ġenerali tal-parti li tkun ressqet it-talba għal għajnuna legali. Fuq talba minn din tal-aħħar jew mir-rappreżentant tagħha, jista’ jsir ħlas bil-quddiem fir-rigward ta’ dawn l-ispejjeż.

Artikolu 242

Irtirar tal-għajnuna legali

1. Jekk il-kundizzjonijiet li wasslu sabiex jingħata l-benefiċċju tal-għajnuna legali jinbidlu matul l-istanza, il-President jista’, ex officio jew fuq talba, u wara li tinstema’ l-parti kkonċernata, jirtira dan il-benefiċċju.

2. Id-digriet li permezz tiegħu tiġi rtirata l-għajnuna legali għandu jkun motivat u ma jistax jiġi kkontestat.”

44)	L-Artikolu 224, attwalment fis-seħħ, huwa nnumerat mill-ġdid u jsir l-Artikolu 243.

45)	Fl-Artikoli 75, 107a u 189, ir-riferiment għall-“Artikolu 224” huwa ssostitwit b’riferiment għall-“Artikolu 243”.

46)	L-Artikolu 225, attwalment fis-seħħ, huwa nnumerat mill-ġdid u jsir l-Artikolu 244.

47)	L-Artikolu 226, attwalment fis-seħħ, huwa nnumerat mill-ġdid u jsir l-Artikolu 245.

48)

L-Artikolu 227, attwalment fis-seħħ, huwa nnumerat mill-ġdid u jsir l-Artikolu 246. Dan l-artikolu huwa emendat kif ġej:

a)	Il-paragrafu 3 huwa mħassar u huwa ssostitwit bit-test segwenti: “3. Id-dispożizzjoni tal-Artikolu 86(1) hija applikabbli biss meta t-terminu previst fl-Artikolu 86(2) jibda jiddekorri wara l-1 ta’ Settembru 2024.”

b)	Il-paragrafu 4 huwa emendat kif ġej: “Id-dispożizzjoni tal-Artikolu 139(b) hija applikabbli biss għar-rikorsi ppreżentati quddiem il-Qorti Ġenerali wara d-dħul fis-seħħ ta’ dawn ir-Regoli.”

c)	Il-paragrafu 5 huwa mħassar u huwa ssostitwit bit-test segwenti: “Id-dispożizzjonijiet tal-Artikoli 110a u 219 huma applikabbli biss mid-dħul fis-seħħ tad-deċiżjoni msemmija, rispettivament, fl-Artikolu 110a(4) u fl-Artikolu 219(4).”

Il-paragrafu 6 huwa emendat kif ġej:

“6. Id-dispożizzjonijiet tal-Artikolu 115(1) u tal-Artikolu 116(6) tar-Regoli tal-Proċedura tal-Qorti Ġenerali tat-2 ta’ Mejju 1991, kif emendati l-aħħar fid-19 ta’ Ġunju 2013, jibqgħu applikabbli għar-rikorsi ppreżentati quddiem il-Qorti Ġenerali qabel id-dħul fis-seħħ ta’ dawn ir-Regoli.”

Il-paragrafu 7 huwa emendat kif ġej:

“7. L-elezzjoni tal-ewwel Imħallfin mistennija jeżerċitaw il-funzjonijiet ta’ Avukat Ġenerali għat-trattament tat-talbiet għal deċiżjoni preliminari għandha tinżamm immedjatament wara l-1 ta’ Settembru 2024. Il-mandat tagħhom jintemm meta jsir it-tibdil parzjali previst fit-tieni paragrafu tal-Artikolu 254 TFUE.”

Artikolu 2

Dawn l-emendi tar-Regoli tal-Proċedura, li huma awtentiċi fil-lingwi msemmija fl-Artikolu 44 ta’ dawn ir-Regoli, għandhom jiġu ppubblikati f’Il-Ġurnal Uffiċjali tal-Unjoni Ewropea u għandhom jidħlu fis-seħħ fl-1 ta’ Settembru 2024.

Magħmul fil-Lussemburgu, l-10 ta’ Lulju 2024.

V. DI BUCCI

Ir-Reġistratur

M. VAN DER WOUDE

Il-President

(1) ĠU L, 2024/2019, 12.8.2024, ELI: http://data.europa.eu/eli/reg/2024/2019/oj.

(2) ĠU L 105, tat-23.4.2015, p. 1, kif emendati fit-13 ta’ Lulju 2016 (ĠU L 217, tat-12.8.2016, p. 71; ĠU L 217, tat-12.8.2016, p. 72; ĠU L 217, tat-12.8.2016, p. 73), fil-11 ta’ Lulju 2018 (ĠU L 240 tal-25.9.2018, p. 68), fil-31 ta’ Lulju 2018 (ĠU L 240, tal-25.9.2018, p. 67), u fit-30 ta’ Novembru 2022 (ĠU L 44, tal-14.2.2023, p. 8).