(1)

Permezz tan-notifika elettronika rreġistrata fis-16 ta’ Mejju 2018, l-Ungerija nnotifikat lill-Kummissjoni dwar l-intenzjoni tagħha li tagħti għajnuna għall-investiment reġjonali favur Samsung SDI Magyarország Zrt. (“Samsung SDI” jew “il-benefiċjarju”).

(2)

Permezz tal-ittra tal-14 ta’ Ottubru 2019 (id-“deċiżjoni tal-ftuħ”), il-Kummissjoni infurmat lill-Ungerija li kienet iddeċidiet li tibda l-proċedura stabbilita fl-Artikolu 108(2) tat-Trattat dwar il-Funzjonament tal-Unjoni Ewropea (it-“TFUE”) fir-rigward ta’ din il-miżura ta’ għajnuna għall-investiment reġjonali (il-“miżura ta’ għajnuna”) u stiednet lill-Ungerija biex tibgħat il-kummenti tagħha fi żmien xahar.

(3)

Id-deċiżjoni tal-ftuħ ġiet ippubblikata f’Il-Ġurnal Uffiċjali tal-Unjoni Ewropea (2). Fl-istess pubblikazzjoni, il-Kummissjoni stiednet lill-partijiet interessati biex jibagħtu l-kummenti tagħhom.

(4)

L-Ungerija, Samsung SDI u l-Korea t’Isfel bagħtu kummenti dwar id-deċiżjoni tal-ftuħ.

(5)

Permezz tal-ittra tad-29 ta’ Ġunju 2021, il-Kummissjoni infurmat lill-Ungerija li kienet iddeċidiet li testendi l-kamp ta’ applikazzjoni tad-deċiżjoni tal-ftuħ (id-“deċiżjoni ta’ estensjoni”) fir-rigward tal-miżura ta’ għajnuna (3). Hija stiednet lill-Ungerija biex tibgħat il-kummenti tagħha fi żmien xahar. Id-deċiżjoni ta’ estensjoni ġiet ippubblikata f’Il-Ġurnal Uffiċjali tal-Unjoni Ewropea (4) .

(6)

L-Ungerija, Samsung SDI u l-Korea t’Isfel bagħtu kummenti dwar id-deċiżjoni ta’ estensjoni. L-Ungerija pprovdiet kummenti dwar dik id-deċiżjoni permezz tal-ittra tad-9 ta’ Awwissu 2021. Samsung SDI bagħtet il-kummenti preliminari tagħha dwar dik id-deċiżjoni fit-28 ta’ Jannar 2022 u l-kummenti finali fl-14 ta’ Marzu 2022. Fit-18 ta’ Marzu 2022, il-Korea t’Isfel bagħtet il-kummenti tagħha.

(7)

Fil-21 ta’ Marzu 2022, l-Ungerija bagħtet il-kummenti tagħha dwar is-sottomissjoni ta’ Samsung SDI u kkonfermat li ma kellha l-ebda kumment dwar is-sottomissjoni tal-Korea t’Isfel.

(8)

Il-Kummissjoni bagħtet aktar talbiet għal informazzjoni lill-Ungerija, l-aktar riċenti f’Diċembru 2022, li l-Ungerija wieġbet għalihom fi żmien debitu.

(9)

Permezz ta’ ittra tas-17 ta’ Frar 2023, l-Ungerija qablet li din id-Deċiżjoni tiġi adottata u notifikata bil-lingwa Ingliża.

(10)

L-Ungerija biħsiebha tippromwovi l-iżvilupp reġjonali billi tipprovdi għajnuna reġjonali għall-estensjoni tal-kapaċità ta’ stabbiliment eżistenti ta’ Samsung SDI, li jipproduċi ċelluli tal-batteriji għall-vetturi elettriċi f’Göd, fil-Kontea ta’ Pest, l-Ungerija Ċentrali. Göd tinsab f’żona eliġibbli għall-għajnuna reġjonali skont l-Artikolu 107(3), il-punt (c) tat-TFUE, b’limitu massimu standard tal-għajnuna reġjonali ta’ 35 % skont il-mappa tal-għajnuna reġjonali Ungeriża għall-perjodu mill-2017 sal-2020 (5).

(11)

Il-benefiċjarju tal-għajnuna huwa Samsung SDI, sussidjarja bi sjieda sħiħa ta’ Samsung SDI Co. Ltd. (il-“Grupp Samsung SDI”) bl-istabbiliment prinċipali tagħha fil-Korea t’Isfel. Il-Grupp Samsung SDI huwa impriża kbira bi kważi 19 000 impjegat madwar id-dinja u fl-2016 irreġistra fatturat ta’ madwar EUR 4 biljun.

(12)

Il-Grupp Samsung SDI huwa involut fil-manifattura ta’ batteriji rikarikabbli użati fl-industrija tal-IT, il-vetturi elettriċi, u fis-sistemi tal-ħżin tal-enerġija (l-“ESS”).

(13)

Fl-2016, Samsung SDI fetħet impjant tal-batteriji għall-vetturi elettriċi f’Göd (l-“Investiment 1”) b’kapaċità massima ta’ [100 000–400 000] * (6) ċellula tal-batterija għall-vetturi elettriċi kull xahar, li hija ekwivalenti għal kapaċità annwali ta’ [0,1–0,5] GWh. Din il-faċilità ta’ manifattura bdiet il-produzzjoni ta’ prova fit-tieni trimestru tal-2017 u l-produzzjoni tal-massa f’Mejju 2018. Ma ngħatat l-ebda għajnuna mill-Istat għall-Investiment 1.

(14)

L-Ungerija kkonfermat li l-benefiċjarju mhuwiex impriża f’diffikultà skont it-tifsira tal-Linji gwida dwar l-għajnuna mill-Istat għas-salvataġġ u r-ristrutturar ta’ impriżi mhux finanzjarji f’diffikultà (7). L-Ungerija impenjat ruħha li tissospendi l-għoti u/jew il-pagament tal-għajnuna notifikata lill-benefiċjarju jekk dan ikun irċieva għajnuna illegali preċedenti ddikjarata inkompatibbli b’deċiżjoni tal-Kummissjoni sakemm il-benefiċjarju jkun ħallas lura jew ħallas f’kont separat l-għajnuna illegali u inkompatibbli u l-imgħax tal-irkupru korrispondenti.

(15)

Il-proġett appoġġjat mill-miżura ta’ għajnuna (l-“Investiment 2”) jirrigwarda estensjoni tal-kapaċità tal-faċilità ta’ produzzjoni taċ-ċelluli tal-batteriji għall-vetturi elettriċi fi stabbiliment eżistenti li huwa proprjetà tal-benefiċjarju f’Göd (jiġifieri fl-istabbiliment imwaqqaf bis-saħħa tal-Investiment 1). Bl-estensjoni prevista, il-kapaċità ta’ produzzjoni ta’ Samsung SDI fl-Ungerija kienet ippjanata li tilħaq is-6 miljun ċellula tal-batterija kull xahar fi […], li hija ekwivalenti għal kapaċità annwali ta’ [17–20] GWh (8). Samsung SDI kellha l-intenzjoni li tuża [50–90] % ta’ din il-kapaċità biex taqdi s-suq taż-Żona Ekonomika Ewropea (“ŻEE”) u [10–40]% biex taqdi […]. (9)

(16)

Il-miżura ta’ għajnuna tappoġġja investimenti f’tagħmir u makkinarju relatat mal-produzzjoni taċ-ċelluli tal-batteriji, kif ukoll fil-faċilitajiet meħtieġa għall-produzzjoni ta’ dawk iċ-ċelluli tal-batteriji. Samsung SDI kellha l-intenzjoni li tikkomplementa l-investiment fil-produzzjoni taċ-ċelluli b’investimenti addizzjonali fil-moduli tal-batteriji u fil-produzzjoni tal-pakketti tal-batteriji (10) li għalihom ma tintalab l-ebda għajnuna. L-Investiment 2 kellu jiġi implimentat f’żewġ fażijiet (11) (ara t-tabella 1, il-premessa (16) tad-deċiżjoni tal-ftuħ).

(17)

Ix-xogħlijiet fuq l-Investiment 2 bdew fl-1 ta’ Diċembru 2017, wara li l-benefiċjarju kien bagħat l-applikazzjoni għall-għajnuna rilevanti lill-Ungerija fit-13 ta’ Settembru 2017. L-investiment 2 kien mistenni li joħloq 1 200 impjieg dirett ġdid.

(18)

L-Ungerija kkonfermat li Samsung SDI ikkompletat ix-xiri tat-tagħmir meħtieġ għall-Investiment 2 sa tmiem l-2021 u li l-Investiment 2 laħaq il-kapaċità ta’ produzzjoni sħiħa f’Jannar 2022, kif ippjanat.

(19)

Skont l-Ungerija, Samsung SDI kellha l-intenzjoni li tiżviluppa u twettaq produzzjoni tal-massa ta’ ċelluli tal-batteriji għall-vetturi elettriċi bl-użu ta’ bidliet sinifikanti fit-tekniki, fit-tagħmir u fis-software.

(20)

L-għan tal-innovazzjonijiet ta’ proċessi ġodda ta’ Samsung SDI kien li jitnaqqsu ż-żmien u l-kostijiet għall-manifattura ta’ ċelluli tal-batteriji. Iċ-ċelluli tal-batteriji prodotti u xi wħud mill-materjali ta’ input użati fil-proċess tal-produzzjoni jiġu mmodifikati b’riżultat tal-implimentazzjoni tal-innovazzjonijiet tal-proċess matul iż-żewġ fażijiet tal-Investiment 2.

(21)

L-Ungerija spjegat ukoll li, fis-suq tal-batteriji għall-vetturi elettriċi, jeżistu tliet strutturi bażiċi distinti ta’ ċelluli (jiġifieri priżmatiċi — li jikkorrispondu għal dawk prodotti minn Samsung SDI f’Göd wara l-Investiment 1, ċelluli tal-borża u ċilindriċi) u li l-proċessi tal-produzzjoni sottostanti tagħhom, kif spjegat fil-premessa (17) tad-deċiżjoni tal-ftuħ, huma differenti.

(22)

L-Ungerija spjegat li l-proċess tal-produzzjoni taċ-ċelluli tal-batteriji jikkonsisti fi tliet stadji (il-premessa (18) tad-deċiżjoni tal-ftuħ) u li l-innovazzjonijiet individwali tal-proċess li għandhom jiġu appoġġjati mill-miżura ta’ għajnuna koprew dawn it-tliet stadji kollha (il-premessa (19) tad-deċiżjoni tal-ftuħ, li telenka wkoll il-proċessi ta’ innovazzjoni individwali l-aktar rilevanti skont l-Ungerija).

(23)

L-Ungerija spjegat ukoll li xi wħud minn dawn l-elementi ġodda jkunu protetti mill-privattivi, iżda essenzjalment il-Grupp Samsung SDI kien se jipproteġi l-biċċa l-kbira tal-proċess tal-produzzjoni l-ġdid permezz ta’ blackboxing (12). L-“istacking” tal-elettrodi, li kellu jiġi introdott mill-Investiment 2, kien għadu qed jiġi żviluppat u ttestjat fi […] fiż-żmien tan-notifika, iżda kien ippjanat li jiġi applikat fil-produzzjoni tal-massa fi […].

(24)

L-Ungerija qieset li l-proċessi u t-tagħmir innovattivi msemmija hawn fuq kienu se jiġu introdotti fis-settur tal-produzzjoni tal-batteriji u l-akkumulaturi għall-vetturi elettriċi għall-ewwel darba fid-dinja kollha (ara l-premessa (21) tad-deċiżjoni tal-ftuħ).

(25)

Bħala konklużjoni, l-Ungerija qieset li l-proċess il-ġdid tal-produzzjoni kien jikkwalifika bħala “innovazzjoni ta’ proċess ġdid” skont it-tifsira tal-paragrafu 15 tal-Linji Gwida dwar l-Għajnuna Reġjonali applikabbli fiż-żmien tan-notifika (13) (“ir-RAG”). L-Ungerija spjegat ukoll li, wara li sar l-investiment inkwistjoni, l-ishma mis-suq ta’ Samsung SDI huma mistennija li jiżdiedu minn [7–10] % fl-2019 għal [20–25] % fl-2023 fil-livell Ewropew u minn [7–10] % fl-2019 għal [10–13,5] % fl-2023 fil-livell globali.

(26)

Il-kostijiet totali tal-investiment eliġibbli notifikati għall-Investiment 2 jammontaw għal HUF 380,628 biljun, ittondjati (EUR 1,2 biljun (14), ittondjati) fil-valur nominali, li huwa HUF 376,540 biljun, ittondjati (EUR 1,187 biljun, ittondjati) fil-valur preżenti (15). Il-kostijiet eliġibbli jinkludu l-kostijiet tal-bini, il-makkinarju u t-tagħmir (ara t-Tabelli 2 u 3 fil-premessa (23) tad-deċiżjoni tal-ftuħ).

(27)

L-Ungerija kkonfermat li assi ġodda biss ġew aċċettati bħala nefqa eliġibbli. Il-kostijiet eliġibbli għall-Investiment 2 ma jinkludu l-ebda kost tal-assi immaterjali jew kostijiet tal-lokazzjoni (ara l-premessa (155) tad-deċiżjoni tal-ftuħ).

(28)

Il-miżura ta’ għajnuna hija għotja fi flus kontanti mhux rimborżabbli u tikkostitwixxi għajnuna ad hoc notifikabbli individwalment, li taqa’ barra mill-kamp ta’ applikazzjoni tal-eżenzjoni ta’ skema ta’ għajnuna li ġiet eżentata mill-obbligu ta’ notifika skont ir-Regolament tal-Kummissjoni (UE) Nru 651/2014 (16).

(29)

Il-bażi legali nazzjonali għan-notifika tal-miżura ta’ għajnuna hija d-Digriet tal-Gvern 210/2014 dwar l-użu tal-iskema allokata għall-promozzjoni tal-investiment. L-awtorità li tagħti l-għajnuna hija l-Ministeru għall-Affarijiet Barranin u l-Kummerċ tal-Ungerija.

(30)

L-għajnuna notifikata tammonta għal HUF 34,891 biljun, ittondjati (EUR 110 miljun, ittondjati) fil-valur nominali u HUF 34,304 biljun, ittondjati (EUR 108 miljun, ittondjati) fil-valur preżenti. L-Ungerija tat l-għajnuna, li kienet soġġetta biss għall-approvazzjoni mill-Kummissjoni, fis-27 ta’ Diċembru 2021.

(31)

Fuq il-bażi tal-kostijiet totali eliġibbli notifikati ta’ HUF 380,628 biljun, ittondjati (EUR 1 200,000 miljun, ittondjati) fil-valur nominali, il-valur skontat tan-nefqa eliġibbli totali huwa ta’ HUF 376,540 biljun, ittondjati (EUR 1 187,111 miljun, ittondjati). Filwaqt li ħadet dawk iċ-ċifri bħala bażi, u applikat il-limitu massimu standard ta’ għajnuna reġjonali ta’ 35 % għal impriżi kbar li kienu applikabbli f’Göd taħt il-mappa tal-għajnuna reġjonali għall-perjodu 2017–2021, kif ukoll ir-regoli dwar it-tnaqqis (17) tal-paragrafu 20(c), u l-paragrafu 86 tar-RAG, il-Kummissjoni kkalkulat li l-għajnuna reġjonali totali massima permissibbli għall-Investiment 2 hija ta’ HUF 49,360 biljun, ittondjati (EUR 155,616 miljun, ittondjati) fil-valur skontat, li huma ekwivalenti għal intensità tal-għajnuna massima ta’ 13,11 %.

(32)

L-għajnuna prevista ta’ HUF 34,304 biljun, ittondjati (EUR 108 miljun, ittondjati) fil-valur preżenti, għan-nefqa eliġibbli proposta ta’ HUF 376,540 biljun, ittondjati (EUR 1 187 miljun, ittondjati) fil-valur preżenti, tikkorrispondi għal intensità tal-għajnuna ta’ 9,11 %, ikkalkulata fuq il-bażi tal-kostijiet eliġibbli totali notifikati.

(33)

Fin-notifika tagħha, l-Ungerija ddikjarat li l-appoġġ finanzjarju taħt il-miżura ta’ għajnuna ma kienx se jiġi kkombinat ma’ xi appoġġ finanzjarju ieħor li kien se jiġi żborżat għall-istess kostijiet eliġibbli minn kwalunkwe sors lokali, reġjonali, nazzjonali jew tal-Unjoni Ewropea ieħor.

(34)

L-Ungerija tikkonferma li la l-ammont tal-għajnuna massimu approvat fil-valur preżenti u lanqas l-intensità tal-għajnuna approvata mhuma se jinqabżu jekk l-ammont tan-nefqa eliġibbli jiddevja mill-ammont stmat.

(35)

L-Ungerija kkonfermat li l-benefiċjarju tal-għajnuna kien se jipprovdi kontribuzzjoni finanzjarja ta’ mill-inqas 25 % tal-kostijiet eliġibbli, permezz tar-riżorsi proprji tiegħu jew permezz ta’ finanzjament estern, f’forma li ma jkun fiha l-ebda appoġġ finanzjarju pubbliku.

(36)

Il-miżura ta’ għajnuna tingħata bil-kundizzjoni li l-benefiċjarju jżomm l-investiment fir-reġjun megħjun għal perjodu minimu ta’ 5 snin wara li jkun ġie kkompletat.

(37)

Fid-deċiżjoni tal-ftuħ, il-Kummissjoni kienet tal-fehma li l-investiment ippjanat kien jikkwalifika bħala innovazzjoni ta’ proċess ġdid u għalhekk kien eliġibbli għall-għajnuna taħt ir-RAG. Madankollu, kemm fid-deċiżjoni tal-ftuħ kif ukoll f’dik ta’ estensjoni, il-Kummissjoni qajmet dubji b’mod partikolari rigward l-effett ta’ inċentiv sostantiv tal-għajnuna u l-kredibbiltà tax-xenarju ta’ investiment alternattiv fiċ-Ċina, li l-Ungerija ppreżentat (ara t-Taqsima 3.4.1.4. tad-deċiżjoni tal-ftuħ u l-premessa (3) tad-deċiżjoni ta’ estensjoni).

(38)

L-ewwel nett, il-Kummissjoni ma setgħetx teskludi l-possibbiltà li kombinament ta’ fatturi strateġiċi bħas-suq Ewropew li qed jespandi malajr, il-prossimità għall-klijenti Ewropej, ir-riskju ta’ trasferiment furzat tat-teknoloġija u l-klima politika u ekonomika ostili fiċ-Ċina fil-konfront ta’ impriżi tal-Korea t’Isfel, ma kienx se jikkostitwixxi kunsiderazzjonijiet strateġiċi prevalenti li kienu jwasslu lill-kumpanija sabiex, fi kwalunkwe każ, tillokalizza l-investiment tagħha fl-Ungerija, anke fin-nuqqas ta’ għajnuna.

(39)

It-tieni, il-Kummissjoni kienet tal-fehma preliminari li l-għajnuna reġjonali proposta ma kinitx kruċjali għal deċiżjoni pożittiva dwar il-post favur l-Ungerija. Dan kien minħabba li l-Kummissjoni kellha dubji dwar l-eżistenza u, jekk kien hemm, il-firxa tad-diskrepanza ddikjarata ta’ EUR 173 miljun fil-valur preżenti nett (net present value, NPV) tal-Investiment 2 meta mqabbel mal-investiment kontrofattwali fiċ-Ċina. Il-Kummissjoni nnutat li din id-diskrepanza kienet fil-biċċa l-kbira bbażata fuq differenzi sinifikanti fil-kostijiet tal-investiment bejn iż-żewġ postijiet ta’ investiment alternattivi, li kienu ġġustifikati mill-Ungerija u mill-benefiċjarju fuq il-bażi ta’ politika ta’ akkwist lokali (18). Madankollu, il-Kummissjoni esprimiet b’mod preċiż dubji rigward din il-politika ta’ akkwist lokali, li hija sabet li prima facie ma kinitx realistika jew kredibbli. Il-Kummissjoni qajment ukoll dubji dwar l-eżistenza ta’ allegat appoġġ pubbliku fiċ-Ċina għad-deċiżjoni dwar il-post mill-benefiċjarju, u r-rilevanza ta’ kwalunkwe appoġġ bħal dan, peress li dokumenti interni mill-Grupp Samsung SDI rigward id-deċiżjoni dwar il-post indikaw l-għajnuna mill-Ungerija bħala fattur deċiżiv għall-għażla tal-post, filwaqt li ma indikawx appoġġ pubbliku mill-awtoritajiet Ċiniżi.

(40)

Peress li kienet esprimiet dubji dwar ix-xenarju kontrofattwali u t-tqabbil tal-NPV, il-Kummissjoni qajmet ukoll dubji rigward il-proporzjonalità tal-għajnuna (ara t-Taqsima 3.4.1.5. tad-deċiżjoni tal-ftuħ). Barra minn hekk, il-Kummissjoni qajmet dubji rigward il-kontribuzzjoni tal-għajnuna għall-iżvilupp reġjonali (ara t-Taqsima 3.4.1.1. tad-deċiżjoni tal-ftuħ) u l-adegwatezza tal-forma tal-għajnuna (ara t-Taqsima 3.4.1.3. tad-deċiżjoni tal-ftuħ) (ara wkoll il-premessa (4) tad-deċiżjoni ta’ estensjoni).

(41)

Fl-aħħar nett, il-Kummissjoni identifikat il-possibbiltà ta’ effetti negattivi mhux dovuti li jirriżultaw mill-għajnuna. B’mod partikolari, ma setgħetx teskludi l-possibbiltà li l-investiment kien mill-inqas indirettament kawżali għal rilokazzjoni tal-attivitajiet ta’ produzzjoni tal-pakketti tal-batteriji tal-Grupp Samsung SDI mill-Awstrija għall-Ungerija, li tkun tikkostitwixxi effett negattiv manifest fuq il-kummerċ skont it-tifsira tal-paragrafu 122 tar-RAG (ara t-Taqsima 3.4.2.4. tad-deċiżjoni tal-ftuħ u l-premessa (4) tad-deċiżjoni ta’ estensjoni). Fid-deċiżjoni ta’ estensjoni, il-Kummissjoni qieset ukoll li l-għajnuna seta’ kellha effett kontra l-koeżjoni billi attirat investimenti lil hinn minn reġjun Pollakk inqas żviluppat, li jkun eliġibbli għall-għajnuna reġjonali skont l-Artikolu 107(3), il-punt (a), tat-TFUE (ara l-premessa (72) ta’ dik id-deċiżjoni).

(42)

Għar-raġunijiet ta’ hawn fuq, kemm fid-deċiżjoni tal-ftuħ kif ukoll f’dik ta’ estensjoni, il-Kummissjoni qajmet dubji dwar il-kompatibbiltà tal-miżura ta’ għajnuna mas-suq intern.

(43)

B’appoġġ għall-affermazzjoni tagħha li l-Investiment 2 jista’ jibbenefika minn għajnuna reġjonali, l-Ungerija invokat sitwazzjoni tax-“xenarju 2” skont it-tifsira tal-paragrafu 61 tar-RAG, billi argumentat li mingħajr il-miżura ta’ għajnuna, il-proġett ta’ investiment kien jiġi implimentat f’Xi’an (iċ-Ċina), fejn il-Grupp Samsung SDI għandu s-sjieda konġunta, f’impriża konġunta (19), ta’ faċilità ta’ produzzjoni taċ-ċelluli tal-batteriji għall-vetturi elettriċi u ta’ art ħielsa suffiċjenti biex jospita estensjoni tal-impjant. (20)

(44)

L-Ungerija argumentat li l-Investiment 2 kien jikkwalifika bħala innovazzjoni ta’ proċess ġdid u għalhekk huwa eliġibbli għall-għajnuna taħt ir-RAG. L-Ungerija nnutat li l-Kummissjoni qablet ma’ din il-konklużjoni fid-deċiżjoni tal-ftuħ tagħha.

(45)

L-Ungerija spjegat li l-investiment kien se jikkontribwixxi għall-iżvilupp reġjonali tar-reġjun tal-Ungerija Ċentrali (ara l-premessa (34) tad-deċiżjoni tal-ftuħ). Fl-2016, il-kontea ta’ Pest kellha prodott domestiku gross (il-“PDG”) per capita ta’ 54 % tal-medja tal-EU-28.

(46)

Barra minn hekk, l-Ungerija elenkat għadd ta’ effetti pożittivi li l-investiment ikun jiġġenera għall-iżvilupp tar-reġjun, inkluż il-ħolqien ta’ 1 200 impjieg dirett (ara l-premessa (35) tad-deċiżjoni tal-ftuħ).

(47)

L-Ungerija tenniet li Samsung SDI bagħtet l-applikazzjoni għall-għajnuna fit-13 ta’ Settembru 2017, filwaqt li x-xogħlijiet fuq l-Investiment 2 bdew fl-1 ta’ Diċembru 2017. L-Ungerija nnutat li l-Kummissjoni qablet li kien hemm konformità mat-test formali tal-effett ta’ inċentiv fid-deċiżjoni tal-ftuħ.

(48)

L-Ungerija u Samsung SDI argumentaw ukoll li l-għajnuna tikkonforma mat-test sostantiv tal-effett ta’ inċentiv. Madankollu, fit-tweġibiet tagħhom għad-deċiżjoni tal-ftuħ, kemm l-Ungerija kif ukoll Samsung SDI rtiraw minn ċerti dikjarazzjonijiet inizjali li jinsabu fin-notifika u pprovdew argumenti u evidenza ġodda li kienu parzjalment jikkontradixxu d-dikjarazzjonijiet preċedenti.

(49)

Il-proġett ta’ investiment f’Göd u x-xenarju kontrofattwali f’Xi’an li ġie ppreżentat fid-dokumenti ta’ notifika kienu jinkludu investimenti simili f’termini ta’ bini, makkinarju u tagħmir. B’mod partikolari, l-Ungerija kkonfermat li t-tip, il-kapaċità, u l-kwantità ta’ makkinarju u tagħmir ikunu identiċi fiż-żewġ xenarji ta’ investiment. Minkejja dan il-fatt, in-nefqa kapitali totali relatata mal-investiment tkun sinifikattivament ogħla fl-Ungerija milli fiċ-Ċina (EUR 215,3 miljun ogħla fil-valur preżenti). Filwaqt li l-kostijiet tal-bini huma kemxejn aktar baxxi fl-Ungerija meta mqabbla ma’ dawk fiċ-Ċina (peress li Samsung SDI tista’ tuża bini eżistenti għall-proġett ta’ investiment tagħha f’Göd), il-kostijiet tal-makkinarju u t-tagħmir ikunu sinifikattivament ogħla fl-Ungerija meta mqabbla ma’ dawk fiċ-Ċina. Skont l-informazzjoni li nkisbet l-ewwel mill-Ungerija fis-16 ta’ Ottubru 2018, din id-differenza hija dovuta għall-politika ta’ akkwist lokali tal-Grupp Samsung SDI, li skontha l-makkinarju u t-tagħmir jinxtraw kompletament fiż-ŻEE (li kieku l-investiment kellu jsir fl-Ungerija) jew fiċ-Ċina (li kieku l-investiment kellu jsir fiċ-Ċina).

(50)

L-Ungerija u Samsung SDI kkontestaw il-fehma preliminari tal-Kummissjoni (kif espressa fid-deċiżjoni tal-ftuħ) fejn qajmu dubji dwar l-eżistenza stess ta’ din il-politika ta’ akkwist lokali sħiħa. B’mod partikolari, huma spjegaw li, għall-Investiment 1, Samsung SDI kienet iddeċidiet, f’konformità ma’ restrizzjoni inkluża fil-politika ta’ akkwist lokali tagħha, li toqgħod fuq fornituri esperjenzati mill-Korea t’Isfel, ta’ makkinarju u tagħmir minflok fuq fornituri miż-ŻEE, sabiex jiġu minimizzati r-riskji. (21) Din iċ-ċirkostanza partikolari ma setgħetx tqajjem dubju dwar politika ta’ akkwist lokali ġenerali.

(51)

Madankollu, l-Ungerija spjegat li, għalkemm l-analiżi kontrofattwali tal-akkwist lokali ta’ Samsung SDI f’dan il-każ kienet ibbażata fuq premessa li kienet tirrifletti l-politika stabbilita tal-Grupp Samsung SDI, il-valutazzjoni ex ante tal-Kumitat tal-Investiment ta’ Samsung SDI “setgħet kienet (…) preżuntiva wisq rigward il-kapaċitajiet ta’ akkwist lokali tagħha”. (22)

(52)

L-Ungerija kkonfermat li sal-bidu tal-2019 — meta madwar [35-50] % tal-Investiment 2 ta’ Samsung SDI ġie ordnat mal-fornituri — Samsung SDI ma kinitx użat fornituri miż-ŻEE (ara l-premessa (44) tad-deċiżjoni tal-ftuħ). Minflok, il-maġġoranza l-kbira tat-tagħmir u l-makkinarju li ġew akkwistati għall-miżura ta’ għajnuna oriġinat, skont l-Ungerija, mill-Korea t’Isfel. L-Ungerija qieset, madankollu, li l-Kummissjoni ma tistax tiddependi fuq fatti ex post dwar l-akkwist reali biex tqajjem dubji dwar il-kredibbiltà tas-suppożizzjonijiet tan-negozju fiż-żmien tad-deċiżjoni dwar il-post.

(53)

L-Ungerija spjegat li l-Grupp Samsung SDI kellu jirrikorri għall-fornituri mill-Korea t’Isfel għas-sit Ungeriż — u jinjora l-pjanijiet oriġinali tiegħu li ġew ippreżentati fid-dokumenti ta’ notifika — minħabba li t-tfittxija tiegħu għal fornituri lokali xierqa fiż-ŻEE ma wasslitx ir-riżultati mistennija.

(54)

Skont l-Ungerija, it-tfittxija ta’ Samsung SDI għal fornituri miż-ŻEE kienet diġà bdiet fl-2015 u, sa Mejju 2019, kienet għadha għaddejja. Ħlief għal kuntatti bilaterali ma’ ħames produtturi tat-tagħmir miż-ŻEE fl-2015, fl-2016 u fl-2017 (li fil-każ ta’ tnejn minnhom taw riżultati) (23), it-tfittxija laħqet il-qofol tagħha b’mod essenzjali f’konferenza li ġiet organizzata b’mod konġunt mill-Grupp Samsung SDI u l-[…] (24), li saret fl-24 ta’ Frar 2017 fi […] (jiġifieri 8 xhur qabel id-deċiżjoni ta’ investiment ta’ Samsung SDI). Skont l-Ungerija, minn 24 parteċipant fil-konferenza (u ħames kumpaniji oħra, li ġew ikkuntattjati bilateralment mill-Grupp Samsung SDI wara l-konferenza), il-maġġoranza (23) tal-fornituri potenzjali miż-ŻEE ġew miċħuda għal diversi raġunijiet (25) qabel ma ttieħdet id-deċiżjoni finali li jsir investiment fl-Ungerija fis-27 ta’ Novembru 2017. Wara d-deċiżjoni ta’ investiment, id-diskussjonijiet komplew ma’ sitt fornituri potenzjali miż-ŻEE biss, iżda li setgħu jipprovdu biss tagħmir għal porzjon żgħir tal-ħtiġijiet ta’ Samsung SDI għall-Investiment 2 fl-Ungerija.

(55)

Skont l-Ungerija, fiċ-Ċina, il-Grupp Samsung SDI kellu biżżejjed esperjenza (26) u kuntatti ma’ fornituri lokali u għalhekk ma kellux bżonn - fil-fażi tal-ippjanar tal-investiment notifikat - jieħu azzjonijiet speċifiċi biex jiġbor informazzjoni dwar il-kapaċitajiet tekniċi tagħhom u l-ipprezzar tat-tagħmir standard.

(56)

L-Ungerija spjegat ukoll li, għat-tagħmir u l-makkinarju użati għall-implimentazzjoni tal-innovazzjoni ta’ proċess ġdid, il-Grupp Samsung SDI wettaq rieżamijiet tekniċi fiċ-Ċina mit-8 sat-12 ta’ Jannar 2017. Il-konklużjonijiet ta’ dawn ir-rieżamijiet tekniċi kienu li, filwaqt li l-produtturi Ċiniżi kienu għamlu titjib teknoloġiku sinifikanti meta mqabbel mas-sitwazzjoni kif kienet teżisti 2-3 snin qabel u sadanittant kienu kisbu l-kompetittività tal-prezzijiet (peress li kienu [5-30] % orħos minn dawk tal-fornituri mill-Korea t’Isfel), huma ma ssodisfawx ir-rekwiżiti tal-kwalità tal-Grupp Samsung SDI.

(57)

B’mod aktar ġenerali, l-Ungerija kkontestat id-dubji tal-Kummissjoni rigward ir-realtà tax-xenarju kontrofattwali Ċiniż.

(58)

L-ewwel nett, l-Ungerija ċaħdet l-eżistenza ta’ strateġija ta’ investiment reġjonalizzata (27), li r-riżultat tagħha kien ikun li l-proġett ta’ investiment kien fi kwalunkwe każ iseħħ fl-Ungerija. L-Ungerija tqis li dawn id-dubji huma fil-fatt ibbażati fuq l-interpretazzjoni ħażina tal-Kummissjoni tal-minuti ta’ laqgħa interna tal-Grupp Samsung SDI li saret fil-21 ta’ Settembru 2017, rigward ir-“Review for new production investment to EU&[…]” (28), li għaliha attendew bosta Maniġers tal-Grupp Samsung SDI u l-Uffiċjal Kap Finanzjarju tiegħu. L-Ungerija tinnota li, li kieku kienet teżisti din l-istrateġija, kien ikun ifisser li investiment simili kien se jsir fi […], li ma kienx il-każ.

(59)

It-tieni nett, l-Ungerija u Samsung SDI spjegaw li Samsung SDI kellha l-mezzi u l-esperjenza biex tipproteġi b’mod adegwat id-drittijiet ta’ proprjetà intellettwali (il-“PI”) tagħha fiċ-Ċina. Samsung SDI spjegat li, fiż-żmien tad-deċiżjoni dwar il-post, hija diġà kellha esperjenza sinifikanti fl-istabbiliment tal-impjanti tal-produzzjoni fiċ-Ċina (il-fabbrika ta’ Tianjin tmur lura għall-1996) u fil-protezzjoni tad-drittijiet ta’ PI tagħha. Kienu diġà ttieħdu miżuri speċifiċi, kif jintwera mill-evidenza prodotta minn Samsung SDI, biex jiġu protetti dawn id-drittijiet, bħall-blackboxing (ara l-premessa (23)), ftehimiet ta’ kunfidenzjalità għall-impjegati u għall-azzjonisti Ċiniżi u politiki stretti dwar l-aċċess għall-fabbrika (bħal skennjar tas-sigurtà, kontroll ta’ apparati elettroniċi), li fil-prattika wrew li kienu adegwati biex jiġi evitat kwalunkwe riskju ta’ ksur tal-PI. Samsung SDI pprovdiet informazzjoni addizzjonali li tagħti prova li l-amministrazzjoni Ċiniża ħabbret f’Ottubru 2017 (jiġifieri qabel id-deċiżjoni ta’ investiment) fid-19-il kungress nazzjonali tal-leġiżlazzjoni tal-partit komunista biex issaħħaħ il-protezzjoni tad-drittijiet tal-PI. L-Ungerija u Samsung SDI jsostnu li, b’riżultat ta’ dan, il-Grupp Samsung SDI ma kien ikollu l-ebda raġuni biex jeskludi investiment kontrofattwali fiċ-Ċina minħabba tħassib dwar il-PI.

(60)

It-tielet, l-Ungerija u Samsung SDI kkontestaw id-dubji preliminari tal-Kummissjoni rigward allegat ambjent ostili fiċ-Ċina fil-konfront ta’ kumpaniji mill-Korea t’Isfel. Samsung SDI kkonfermat li l-Grupp Samsung SDI kellu relazzjonijiet kummerċjali tajbin mal-awtoritajiet Ċiniżi, kif ikkonfermat mill-offerti ta’ għajnuna li rċieva b’rabta ma’ dan l-investiment jew ma’ investimenti oħra. Samsung SDI spjegat li l-allegat ambjent ostili kien jirrigwarda l-bejgħ fis-suq domestiku Ċiniż, li kien ikun irrilevanti fil-każ preżenti, peress li l-produzzjoni f’dan l-investiment kienet tkun iddedikata għas-swieq ta’ esportazzjoni. Għalhekk, id-dubji espressi mill-Kummissjoni f’dan ir-rigward ikunu infondati. Samsung SDI pprovdiet ukoll preżentazzjoni interna li tħejjiet mit-tim tal-ippjanar tad-Diviżjoni tan-Negozju tal-Karozzi u tal-ESS ta’ Samsung SDI u li ġiet ippreżentata fil-laqgħa tal-21 ta’ Settembru 2017 (ara l-premessa (58)) (“ir-rapport intern tal-21 ta’ Settembru 2017”); skont Samsung SDI, dan id-dokument (tqabbil kwalitattiv ta’ sit b’sit) juri li l-Grupp Samsung SDI ta klassifikazzjoni […] għar-relazzjoni tiegħu mal-awtoritajiet Ċiniżi.

(61)

Ir-raba’ nett, biex ma tagħtix prova tas-suppożizzjoni ġenerali li l-Investiment 1 kien ġie segwit fl-Ungerija bl-intenzjoni li dan jiżdied aktar tard, l-Ungerija bagħtet lill-Kummissjoni tabella Excel ipprovduta minn Samsung SDI li tindika li, fl-2020, il-faċilità ta’ produzzjoni ta’ Xi’an kellha biss żewġ linji ta’ produzzjoni (li jikkorrispondu għaż-żewġ linji ta’ produzzjoni oriġinali stabbiliti taħt l-Investiment 1).

(62)

L-Ungerija u Samsung SDI kkontestaw is-suppożizzjoni tal-Kummissjoni li l-Grupp Samsung SDI ma kien jakkwista l-ebda tagħmir lokalment fiċ-Ċina li kieku għażel lil Xi’an bħala l-post ta’ investiment. Huma spjegaw li l-[…] u l-kwistjonijiet ta’ kunfidenzjalità li prima facie setgħu jaffettwaw l-affidabbiltà tal-fornituri Ċiniżi (29) setgħu ġew indirizzati bl-involviment tal-awtoritajiet Ċiniżi (30) (li, madankollu, ikun possibbli biss li kieku l-investiment kellu jsir fiċ-Ċina), billi jiġi pprovdut appoġġ tekniku lill-fornituri Ċiniżi u jintbagħtu inġiniera tal-SDI mill-kwartieri ġenerali ta’ Samsung SDI fil-Korea t’Isfel biex jaħdmu mill-qrib magħhom (31) u billi jintużaw arranġamenti kuntrattwali speċifiċi u ftehimiet ta’ żvilupp konġunt mal-bejjiegħa (32). Fir-rigward tal-kwistjonijiet ta’ kunfidenzjalità, l-Ungerija argumentat ukoll li, ħlief għal magni speċifiċi, ma hemm l-ebda tħassib dwar il-kunfidenzjalità rigward il-fornituri ta’ makkinarju u tagħmir użati għad-diversi stadji fil-proċess tal-produzzjoni tal-batteriji. Fil-kummenti tagħha dwar id-deċiżjoni tal-ftuħ, l-Ungerija sostniet ukoll li, abbażi tal-kalkoli mill-ġdid ex post ta’ Samsung SDI bl-użu tad-data disponibbli fiż-żmien tad-deċiżjoni ta’ investiment, proporzjon tal-akkwist lokali ta’ tagħmir u makkinarju ugwali għal [31–35] % (33) tan-nefqa ta’ investiment eliġibbli kien ikun realistiku f’Xi’an, iċ-Ċina, fiż-żmien tad-deċiżjoni dwar il-post.

(63)

Ir-rata ta’ akkwist lokali ta’ referenza ta’ [31–35] % fiċ-Ċina kienet ibbażata fuq l-ipoteżi li l-Grupp Samsung SDI kien jakkwista:

(64)

Fil-kummenti tagħha dwar id-deċiżjoni tal-ftuħ, l-Ungerija ppreżentat żewġ argumenti oħra b’appoġġ għall-affermazzjoni tagħha li livell sinifikanti ta’ akkwist lokali fiċ-Ċina kien realistiku fiż-żmien tad-deċiżjoni ta’ investiment f’Novembru 2017.

(65)

L-ewwel nett, hija sostniet li matul il-perjodu 2015–2016 u 2018–2019, il-Grupp Samsung SDI kien kiseb proporzjon ta’ akkwist lokali ta’ makkinarju u tagħmir bejn [10–15] % u [25–30] % fl-impjant ta’ Tianjin tiegħu (bħala medja [25–30] % għall-perjodu 2015–2016 u [15–20] % fil-perjodu 2018–2019). L-Ungerija qieset li l-investiment ta’ Tianjin kien jikkostitwixxi parametru referenzjarju rilevanti għall-proġett ta’ investiment notifikat minħabba li l-linji tal-manifattura rispettivi għandhom “karatteristiċi simili” u “jiddependu fuq makkinarju u tagħmir analogu”. It-tieni, l-Ungerija ppreżentat evidenza dwar il-livell ta’ żvilupp teknoloġiku fis-suq tat-tagħmir u l-makkinarju Ċiniż fl-2017 (għas-sommarju tagħha, ara l-premessa (11) tad-deċiżjoni ta’ estensjoni).

(66)

L-Ungerija u Samsung SDI fakkru wkoll li t-tfittxija għal fornituri lokali hija proċess dinamiku li jista’ jevolvi matul iż-żmien, u b’hekk potenzjalment iwassal għal ishma tal-akkwist lokali li jkunu ogħla minn dak assigurat fiż-żmien tad-deċiżjoni ta’ investiment.

(67)

L-Ungerija u Samsung SDI qiesu wkoll li, fin-nuqqas ta’ akkwist lokali, il-benefiċjarju juża l-fornituri tiegħu mill-Korea t’Isfel. F’dan il-każ, jeħtieġ li jitqiesu elementi tal-kostijiet addizzjonali. Dawn jinkludu l-kostijiet tat-trasport fuq l-ilma tal-makkinarju u t-tagħmir lejn l-impjant fiċ-Ċina (stmati għal [2–3] % tal-kostijiet tal-makkinarju u t-tagħmir rispettivi), żieda ta’ [18–22] % biex jitqies l-involviment tal-kwartieri ġenerali tal-Grupp Samsung SDI fil-Korea t’Isfel (il-“KĠ ta’ Samsung SDI”) fil-proċess tal-akkwist (36) u d-dazji doganali ta’ 1,1 % li għandhom jitħallsu għal dan il-makkinarju u t-tagħmir li għandu jiġi importat fiċ-Ċina mill-Korea t’Isfel.

(68)

Fil-kummenti tagħha dwar id-deċiżjoni tal-ftuħ, l-Ungerija qieset li l-Kummissjoni ma kellha “l-ebda raġuni biex tiddubita li l-akkwist lokali kien suppożizzjoni ex ante kredibbli għal Samsung SDI fiż-żmien li ddeċidiet li tinvesti f’Göd”. L-Ungerija sostniet li kien “irrilevanti kif l-akkwist ta’ tagħmir u makkinarju għall-Ungerija sar ex post, meta mqabbel ma’ dak li Samsung kienet inizjalment ipprevediet f’konformità mal-politika ta’ akkwist lokali stabbilita tagħha”.

(69)

L-Ungerija spjegat li, għall-kuntrarju tal-fehmiet preliminari tal-Kummissjoni, il-Grupp Samsung SDI ma setax jakkwista tagħmir minn fornituri Ċiniżi orħos, minħabba […] (b’mod partikolari […]). Fi kwalunkwe każ, l-Ungerija nnutat li peress li l-kostijiet preżunti tal-akkwist mill-fornituri mill-Korea t’Isfel kienu virtwalment identiċi għal dawk tal-akkwist fiż-ŻEE (minbarra l-kostijiet tat-trasport fuq l-ilma, stmati għal [3–4] % tal-kostijiet tal-makkinarju u t-tagħmir rispettivi), perċentwal ta’ akkwist lokali ta’ inqas minn 100 % fl-Ungerija jkollu impatt limitat ħafna fuq l-eżitu tal-NPV ex ante tal-investiment fl-Ungerija.

(70)

Skont l-Ungerija, l-akkwist tal-makkinarju u t-tagħmir bil-KĠ ta’ Samsung SDI jaġixxu bħala intermedjarju jista’ jissostitwixxi l-isforzi tal-akkwist lokali minn Samsung SDI kull meta dawn tal-aħħar ma jkunux fattibbli. Fil-każ ta’ akkwist ċentrali permezz tal-KĠ ta’ Samsung SDI, ikunu japplikaw kostijiet tat-trasport fuq l-ilma u żieda ta’ [18–22] % (filwaqt li l-ebda dazju doganali ma jkun pagabbli).

(71)

Wara l-iskambju sussegwenti ta’ korrispondenza bejn il-Kummissjoni u l-Ungerija, l-Ungerija ppreżentat diskrepanza ikkalkulata mill-ġdid tal-NPV f’Jannar 2023, li fiha s-sehem tal-akkwist ta’ makkinarju u tagħmir minn barra ż-ŻEE għall-impjant ta’ Göd fi tmiem l-2021 kien indikat għal [94–99] %, filwaqt li s-sehem tal-akkwist miż-ŻEE kien stabbilit għal [1–1,5] %.

(72)

L-Ungerija u Samsung SDI jargumentaw li, jekk il-Kummissjoni tirrifjuta s-suppożizzjoni inizjali ta’ Samsung SDI fir-rigward ta’ akkwist kompletament lokali, abbażi tal-politika tal-Grupp Samsung SDI, il-kalkoli tal-VPN għandhom jinkludu żieda ta’ [18–22] % (37). F’konformità mal-esperjenza reali ta’ Samsung SDI, din iż-żieda tkun iġġustifikata mill-fatt li l-makkinarju u t-tagħmir l-ewwel jinxtraw mill-produtturi mill-Korea t’Isfel mill-Istabbiliment Prinċipali ta’ Samsung SDI u mbagħad it-tagħmir rispettiv jinbiegħ lil Samsung SDI fl-Ungerija jew fiċ-Ċina, wara li tiġi applikata żieda ta’ [18–22] % mal-bażi tal-kost sottostanti (li tkun tikkonsisti fil-prezz tal-akkwiżizzjoni u l-kostijiet l-oħra kollha mġarrba mill-Istabbiliment Prinċipali ta’ Samsung SDI fir-rigward tax-xiri, il-konsenja u l-istabbiliment tal-makkinarju u t-tagħmir fis-sit tal-investiment lokali sakemm il-produzzjoni tal-massa tkun tista’ titħaddem fuqu). Din iż-żieda ta’ [18–22] % tikkorrispondi għad-differenza nominali bejn il-prezzijiet tax-xiri tal-Istabbiliment Prinċipali ta’ Samsung SDI u l-prezzijiet tal-bejgħ mill-ġdid li jkunu bbażati fuq fatturi li huwa jitlob lill-affiljati lokali tiegħu. Dan ikun livell raġonevoli u xieraq għal dawn it-tranżazzjonijiet intragrupp, li mhux biss jinkludu x-xiri tat-tagħmir iżda wkoll servizzi addizzjonali pprovduti mill-KĠ ta’ Samsung SDI. L-Ungerija u Samsung SDI jargumentaw li din iż-żieda ta’ [18–22] % tkun tikkostitwixxi prezz konformi mas-suq, kif jintwera kemm minn studji qabel id-deċiżjoni dwar il-post f’dan il-każ kif ukoll minn studji prodotti lill-Kummissjoni matul l-investigazzjoni preżenti (38).

(73)

Għalkemm l-Ungerija kienet inizjalment indikat lill-Kummissjoni li l-benefiċjarju “ma rċieva l-ebda offerta ta’ sussidju” mill-Gvern Ċiniż matul il-proċess tat-teħid ta’ deċiżjonijiet (ara l-premessa (13) tad-deċiżjoni ta’ estensjoni), sussegwentement l-Ungerija ddistakkat ruħha minn din id-dikjarazzjoni.

(74)

L-Ungerija u Samsung SDI sussegwentement sostnew li għotja ta’ investiment dirett li tkopri [15–20] % tal-kostijiet tal-investiment kienet tkun disponibbli fiċ-Ċina. Huma sostnew ukoll li li kieku l-investiment kien twettaq fiċ-Ċina, probabbilment kien jibbenefika minn rata tat-taxxa korporattiva fuq l-introjtu (corporate income tax, CIT) ta’ 15 % minflok ir-rata standard ta’ 25 %.

(75)

Fir-rigward tal-għotja, l-Ungerija u Samsung SDI pproduċew offerta mhux iffirmata u mhux ittimbrata ddatata t-23 ta’ Frar 2017 mill-Gvern lokali Ċiniż, li kien fiha żewġ għażliet (ara l-premessa (16) tad-deċiżjoni ta’ estensjoni). L-Ungerija u Samsung SDI pprovdew evidenza addizzjonali, notevolment li tiddokumenta l-andament tan-negozjati bejn il-Grupp Samsung SDI u l-Gvern lokali Ċiniż minn Jannar sa Lulju 2017 (39) u offerta ta’ għajnuna aġġornata ddatata t-23 ta’ Mejju 2018. Fid-dawl ta’ din l-evidenza addizzjonali, l-Ungerija u Samsung SDI jsostnu li n-negozjati rigward għotja ta’ [15–20] % kienu serji u realistiċi; kienet biss il-possibbiltà li tinkiseb għotja saħansitra ogħla li tilħaq [25–30] % tal-kostijiet tal-investiment li mhux ċara.

(76)

Fir-rigward ta’ livell aktar baxx possibbli ta’ taxxa korporattiva fuq l-introjtu ta’ 15 %, l-Ungerija spjegat li s-suppożizzjoni inizjali tal-Grupp Samsung SDI rigward rata tas-CIT ta’ 25 % fiċ-Ċina kienet ibbażata fuq stima pjuttost konservattiva. L-Ungerija sostniet li kien ikun leġittimu għall-Grupp Samsung SDI li jieħu rata tat-taxxa ħafna aktar baxxa ta’ 15 % fiċ-Ċina bħala bażi għall-kalkoli tal-NPV tiegħu (ara l-premessi (25) u (26) tad-deċiżjoni ta’ estensjoni) (40).

(77)

L-Ungerija u l-benefiċjarju spjegaw li r-rapport intern tal-21 ta’ Settembru 2017 juri li l-Grupp Samsung SDI kien jaf bl-offerta potenzjali ta’ sussidju Ċiniż. Skont Samsung SDI, il-fatt li dawn is-sussidji ma ġewx ikkunsidrati fil-kalkoli tad-diskrepanza fil-vijabbiltà li ġew ippreżentati lill-Kumitat tal-Investiment ta’ SDI u lill-Uffiċjal Kap Eżekuttiv ta’ Samsung SDI fl-istadji suċċessivi tat-teħid ta’ deċiżjonijiet li wasslu għad-deċiżjoni dwar il-post u ta’ investiment mhuwiex rilevanti: hija politika standard tal-Grupp Samsung SDI li jikkunsidra l-għajnuna biss wara l-kalkoli tal-NPV, kif jintwera wkoll mill-fatt li l-għajnuna potenzjali mill-Ungerija lanqas ma ġiet ikkunsidrata fl-istadju tal-kalkoli tal-NPV.

(78)

Għalkemm l-Ungerija ma qablitx mad-dubji tal-Kummissjoni fir-rigward tat-tqabbil tal-NPV, hija spjegat li kienet lesta li tqabbel xi xenarji plawżibbli oħra ta’ vijabbiltà, bl-iskop li turi kif id-diskrepanza fil-vijabbiltà bejn l-Ungerija u ċ-Ċina tibqa’ sinifikanti f’dawn ix-xenarji u li, b’riżultat ta’ dan, l-għajnuna mill-Istat offruta lil Samsung SDI mill-Ungerija żżomm l-effett ta’ inċentiv tagħha. B’mod aktar speċifiku, Samsung SDI kkalkulat mill-ġdid id-diskrepanza tal-NPV wara d-deċiżjoni tal-ftuħ, filwaqt li pprevediet żewġ approċċi: approċċ “diskret”, li jinvolvi erba’ xenarji differenti, u approċċ “probabilistiku”, li jwassal għal tliet xenarji possibbli.

(79)

Taħt l-approċċ diskret, Samsung SDI kkalkulat żewġ diskrepanzi tal-NPV mingħajr l-ebda akkwist lokali fiċ-Ċina jew fl-Ungerija, iżda billi kkunsidrat jew għotja Ċiniża lokali ta’ [15–20] % tal-investiment, jew rata tas-CIT ta’ 15 %. Fiż-żewġ xenarji, Samsung SDI targumenta li d-diskrepanza fil-vijabbiltà tibqa’ komparabbli mad-diskrepanza oriġinali ta’ EUR 173 miljun jew taqbiżha. It-tielet diskrepanza tal-NPV li ġiet ikkalkulata mill-ġdid abbażi ta’ rata ta’ akkwist lokali ta’ [31–35] % għall-investiment fiċ-Ċina (u ebda akkwist lokali għall-investiment fl-Ungerija), l-ebda sussidju u rata tas-CIT ta’ 25 % għall-investiment fiċ-Ċina, tkun twassal għal diskrepanza tal-NPV li tkun aktar baxxa minn dik oriġinali iżda bl-istess ammont ta’ għajnuna mill-Istat propost mill-Ungerija. Fl-aħħar nett, ir-raba’ diskrepanza tal-NPV ikkalkulata mill-ġdid abbażi ta’ rata ta’ akkwist lokali ta’ [25–30] % għall-investiment fiċ-Ċina (u l-ebda akkwist lokali fl-Ungerija), l-ebda sussidju u rata tas-CIT ta’ 25 % għall-investiment fiċ-Ċina, tkun twassal għal diskrepanza tal-NPV li tkun aktar baxxa kemm mid-diskrepanza tal-NPV oriġinali kif ukoll mill-ammont ta’ għajnuna mill-Istat propost mill-Ungerija.

(80)

Samsung SDI argumentat li l-metodoloġija diskreta ta’ hawn fuq ma kinitx tirrifletti b’mod preċiż il-proċess tat-teħid ta’ deċiżjonijiet li wassal għall-investiment. Minflok, hija qieset li approċċ probabilistiku jkun riflessjoni aktar realistika li tikkunsidra l-fatturi kollha li kienu rilevanti għal Samsung SDI meta ddeċidiet dwar il-post tal-investiment.

(81)

It-tliet “xenarji probabilistiċi” proposti minn Samsung SDI wara d-deċiżjoni tal-ftuħ jikkombinaw it-tliet fatturi differenti (jiġifieri l-akkwist lokali ta’ [25–30] % għall-investiment fiċ-Ċina, għotja ta’ [15–20] % mill-awtoritajiet Ċiniżi, u rata tas-CIT ta’ 15 %) li għalihom jiġu applikati koeffiċjenti tal-probabbiltà differenti biex jirriflettu l-inċertezza relatata mal-materjalizzazzjoni ta’ dawn il-fatturi. Il-koeffiċjenti tal-probabbiltà proposti huma ta’ 100 % għall-fattur relatat mal-akkwist lokali konservattiv ta’ [25–30] % fiċ-Ċina għat-tliet xenarji kollha, u alternattivament ta’ 25 % jew 0 % għaż-żewġ fatturi l-oħra (f’żewġ xenarji) jew it-tnejn li huma ta’ 25 % (fit-tielet xenarju) (41). Samsung tispjega li t-tliet diskrepanzi kollha tal-NPV ikkalkulati mill-ġdid li jirriżultaw jinsabu fil-medda tad-diskrepanza tal-NPV oriġinali, u t-tlieta li huma huma ogħla mill-ammont ta’ għajnuna mill-Istat propost mill-Ungerija. Fid-dawl ta’ dan ta’ hawn fuq, l-Ungerija argumentat li l-effett ta’ inċentiv tal-ammont notifikat ta’ għajnuna jkun ikkonfermat.

(82)

L-Ungerija argumentat li l-Kummissjoni għandha tikkunsidra dan il-kalkolu mill-ġdid ex post tad-diskrepanzi tal-NPV, imwettaq fuq il-bażi ta’ data storika minkejja li ma kienx ikkunsidrat mir-riċevitur tal-għajnuna fil-mument li għażel il-post tal-investiment.

(83)

Fil-kummenti tagħhom dwar id-deċiżjoni ta’ estensjoni, l-Ungerija u Samsung SDI argumentaw li dokument intern tal-kumpanija li huwa kontemporanju għall-proċess tat-teħid ta’ deċiżjonijiet ipprovdut minn Samsung SDI jappoġġja l-affermazzjoni li l-benefiċjarju applika approċċ intrinsikament probabilistiku fl-istadju ex ante tal-valutazzjoni tal-investiment. F’dak ir-rigward, huma rreferew, b’mod aktar preċiż, għar-rapport intern tal-21 ta’ Settembru 2017.

(84)

L-Ungerija spjegat li l-miżura ta’ għajnuna fittxet li tikkumpensa — parzjalment — l-iżvantaġġ tal-kostijiet iddikjarat ta’ EUR 173 miljun sabiex tattira l-investiment lejn reġjun megħjun. L-Ungerija kkonfermat li l-Grupp Samsung SDI kien lest li jġarrab l-iżvantaġġ tal-kostijiet li jifdal ta’ EUR 65 miljun, peress li qieset li huwa jibbenefika minn ċerti vantaġġi kwalitattivi u strateġiċi tas-sit Ungeriż.

(85)

L-Ungerija u Samsung SDI tennew li, anke jekk id-diskrepanza tal-NPV tkun teħtieġ li tiġi kkalkulata mill-ġdid (ara t-Taqsima 3.2.4), l-ammont tal-għajnuna, sal-punt li jibqa’ fil-limitu ta’ din id-diskrepanza riveduta tal-NPV, jibqa’ proporzjonat.

(86)

L-Ungerija spjegat li l-ħtieġa għal għajnuna fiż-żona kkonċernata, jiġifieri l-Ungerija Ċentrali, hija kkonfermata mill-istatus tagħha bħala żona megħjuna taħt l-Artikolu 107(3), il-punt (c), tat-TFUE. Fil-passat, ir-reġjun tal-Ungerija Ċentrali bbenefika minn bosta miżuri orizzontali u mhux ta’ għajnuna, li waħidhom ma kinux suffiċjenti biex jindirizzaw l-iżvantaġġi reġjonali taż-żona. Il-Kontea ta’ Pest baqgħet partikolarment sottożviluppata meta mqabbla mal-bqija tar-reġjun tal-Ungerija Ċentrali.

(87)

L-Ungerija qieset li, skont il-prattika tal-Kummissjoni, għotja diretta tikkostitwixxi strument ta’ għajnuna xieraq sabiex jintlaħaq l-objettiv mixtieq, li huwa li l-investiment jiġi attirat lejn Göd.

(88)

L-ewwel nett, l-Ungerija nnutat li l-istess klijenti jinqdew irrispettivament minn jekk iċ-ċelluli tal-batteriji għall-vetturi elettriċi jiġux prodotti fiċ-Ċina jew fl-Ungerija. Volumi ugwali jiġu prodotti u mibjugħa bl-istess prezzijiet, biex jiġu fornuti l-istess swieq ġeografiċi (jiġifieri ż-ŻEE u […]).

(89)

It-tieni, l-Ungerija ma kkontestatx il-fatt li t-tfittxija tal-post għall-proġett ta’ investiment mhux biss kienet inkludiet it-tliet impjanti eżistenti taċ-ċelluli tal-batteriji tal-Grupp Samsung SDI fiċ-Ċina, fil-Korea t’Isfel, u fl-Ungerija (kif iddikjarat fin-notifika u matul il-fażi ta’ eżaminazzjoni preliminari), iżda li anke siti tal-investiment f’żoni ġodda kienu tqiesu fiċ-Ċina (Wuxi), fil-Polonja (Środa), fis-Slovakkja (Sereď), fl-Ungerija (Tatabánya) u fiċ-Ċekja (Most Joseph). L-Ungerija u Samsung SDI spjegaw madankollu li dawn il-possibbiltajiet l-oħra, li kienu jkunu investimenti f’żoni ġodda, ġew esklużi fi stadju bikri fil-proċess tat-teħid ta’ deċiżjonijiet. Samsung SDI fakkret li l-kapaċità tal-Grupp tagħha f’dak iż-żmien ma laħqitx il-mira tal-bejgħ tagħha fl-Ewropa u […]; għalhekk, it-tim tal-ippjanar tad-Diviżjoni tan-Negozju ta’ Samsung SDI ppropona pjan ta’ investiment biex tiżdied dik il-kapaċità malajr kemm jista’ jkun. Għaldaqstant, l-investimenti f’żoni ġodda ma kinux jilħqu dan l-objettiv. It-tim tal-ippjanar żamm biss żewġ postijiet abbandunati: Göd u Xi’an. Għalhekk, l-interpretazzjoni mill-Kummissjoni tad-dokumenti interni dwar il-laqgħa tal-21 ta’ Settembru 2017 (42) tkun skorretta.

(90)

It-tielet, fir-rigward ta’ rilokazzjoni possibbli fiż-ŻEE, l-Ungerija l-ewwel argumentat li l-attivitajiet ta’ produzzjoni fl-Awstrija (pakketti tal-batteriji) u l-attività megħjuna fl-Ungerija (ċelluli tal-batteriji) kienu materjalment u teknoloġikament differenti (il-Kummissjoni stess kienet aċċettat li l-proċess tal-produzzjoni għaċ-ċelluli tal-batteriji l-ġodda f’Göd kien jikkostitwixxi “proċess innovattiv ġdid” (ara l-premessi (89) sa (101) tad-deċiżjoni tal-ftuħ). Barra minn hekk, it-tnaqqis tal-attivitajiet fl-impjant Awstrijak tal-Grupp Samsung SDI kien jinkludi orjentazzjoni mill-ġdid tal-missjoni ta’ dak l-impjant u ma kienx jikkostitwixxi għeluq parzjali skont it-tifsira tar-RAG. Fi kwalunkwe każ, ma jkun hemm l-ebda rabta kawżali bejn it-tnaqqis tal-attivitajiet fl-Awstrija u l-għajnuna fl-Ungerija għall-espansjoni tas-sit ta’ Göd.

(91)

Fil-kummenti tagħha, il-Korea t’Isfel irrikonoxxiet l-isforzi tal-Kummissjoni biex issolvi l-kwistjonijiet irrappurtati fil-proċedura ta’ investigazzjoni formali tagħha li għaddejja bħalissa. Hija indikat ukoll li jistgħu jkunu mistennija investimenti ulterjuri ta’ Samsung SDI fl-Ewropa u deċiżjoni pożittiva meħuda mill-Kummissjoni f’dan il-każ isservi bħala katalizzatur għall-investimenti ulterjuri ta’ Samsung SDI.

(92)

L-Ungerija kkonfermat li ma kellha l-ebda osservazzjoni dwar il-kummenti mibgħuta mill-Korea t’Isfel.

(93)

Għar-raġunijiet stabbiliti fid-deċiżjoni tal-ftuħ (il-premessi (71) sa (76) tagħha), il-Kummissjoni qieset li l-miżura ta’ għajnuna kienet tikkostitwixxi għajnuna mill-Istat skont it-tifsira tal-Artikolu 107(1) tat-TFUE, peress li kienet imputabbli lill-Istat u ngħatat permezz ta’ riżorsi tal-Istat, kienet selettiva, akkwistat vantaġġ ekonomiku għal Samsung SDI, x’aktarx li kienet se taffettwa l-kummerċ bejn l-Istati Membri, u ħolqot distorsjoni jew heddet li toħloq distorsjoni għall-kompetizzjoni. Dik il-valutazzjoni tibqa’ valida, u għalhekk il-miżura inkwistjoni tikkostitwixxi għajnuna mill-Istat.

(94)

Fid-deċiżjoni tal-ftuħ (il-premessi (77) sa (80) tagħha), il-Kummissjoni fakkret li jekk l-ammont ta’ għajnuna għall-investiment reġjonali li għandu jingħata jkun jaqbeż il-livell limitu ta’ notifika stabbilit fl-Artikolu 4(1), il-punt (a), tar-Regolament (UE) Nru 651/2014, għajnuna ma tkunx koperta mill-eżenzjoni pprovduta minn dak ir-Regolament u għaldaqstant trid tiġi notifikata individwalment lill-Kummissjoni. F’dan il-każ, fiż-żona ta’ Göd, il-livell limitu applikabbli huwa ta’ EUR 26,25 miljun. Għalhekk, il-miżura ta’ għajnuna prevista ta’ EUR 108 miljun ma setgħetx tiġi eżentata min-notifika.

(95)

Barra minn hekk, skont il-paragrafu 15 tar-RAG, l-għajnuna reġjonali għall-investimenti ta’ impriżi kbar f’żoni li jkunu eliġibbli għall-għajnuna reġjonali taħt l-Artikolu 107(3), il-punt (c) tat-TFUE titqies li hija kompatibbli biss jekk tingħata għal investimenti inizjali li joħolqu attivitajiet ekonomiċi ġodda f’dawn iż-żoni, jew għad-diversifikazzjoni ta’ stabbilimenti eżistenti fi prodotti ġodda jew innovazzjonijiet ta’ proċessi ġodda. L-għajnuna għal dawn l-attivitajiet tkun notifikabbli individwalment sakemm ma tkunx tappoġġja investimenti inizjali li joħolqu attivitajiet ekonomiċi ġodda f’dawn iż-żoni. L-obbligu li l-għajnuna tiġi notifikata individwalment għad-diversifikazzjoni ta’ stabbilimenti eżistenti fi prodotti ġodda jew innovazzjonijiet ta’ proċessi ġodda japplika indipendentement mill-ammont ta’ għajnuna previst.

(96)

Fid-deċiżjoni tal-ftuħ, il-Kummissjoni kkonkludiet (fil-premessa (79) ta’ dik id-deċiżjoni) li, billi nnotifikat l-għoti ta’ din l-għajnuna li kienet soġġetta għall-approvazzjoni mill-Kummissjoni, l-Ungerija rrispettat l-obbligi tagħha taħt l-Artikolu 108(3) tat-TFUE (ara wkoll il-premessa (30) hawn fuq). Din il-valutazzjoni tibqa’ valida.

(97)

Permezz ta’ deroga mill-projbizzjoni ġenerali tal-għajnuna mill-Istat stabbilita fl-Artikolu 107(1) tat-TFUE, l-għajnuna tista’ tiġi ddikjarata kompatibbli jekk tkun tista’ tibbenefika minn waħda mid-derogi stabbiliti fit-TFUE. Peress li l-objettiv tal-miżura ta’ għajnuna huwa li tippromwovi l-iżvilupp reġjonali f’żona deżinjata bħala eliġibbli għall-għajnuna reġjonali f’konformità mal-Artikolu 107(3), il-punt (c), tat-TFUE, il-Kummissjoni se tivvaluta l-kompatibbiltà tal-miżura ta’ għajnuna fid-dawl ta’ dik id-dispożizzjoni, kif interpretata fl-RAG.

(98)

L-Ungerija tat l-għajnuna, li hija soġġetta biss għall-approvazzjoni mill-Kummissjoni, fis-27 ta’ Diċembru 2021 (il-premessa (30)). Għalhekk, l-għajnuna tiġi vvalutata taħt l-RAG, li kienu applikabbli mill-1 ta’ Lulju 2014 sal-31 ta’ Diċembru 2021. (43)

(99)

F’konformità mad-dispożizzjonijiet tal-RAG, il-Kummissjoni l-ewwel ivvalutat fid-deċiżjoni tal-ftuħ (ara l-premessa (83) tagħha) jekk l-Investiment 2, li għandu jitwettaq minn impriża kbira f’żona eliġibbli għall-għajnuna reġjonali taħt l-Artikolu 107(3), il-punt (c) tat-TFUE, u li ma jirrigwardax investiment inizjali favur attività ekonomika ġdida skont it-tifsira tal-paragrafu 20(i) tal-RAG, setax jinstab li huwa eliġibbli għall-għajnuna reġjonali, peress li l-Ungerija sostniet li l-proċess tal-produzzjoni tagħha kien ibbażat fuq innovazzjoni ta’ proċess ġdid. Il-Kummissjoni sabet ukoll li Samsung SDI ma kinitx impriża f’diffikultà (il-premessa (8) tad-deċiżjoni tal-ftuħ) (u sa issa ma għandha l-ebda informazzjoni kuntrarja). Fl-aħħar nett, il-Kummissjoni tinnota li l-Ungerija impenjat ruħha li tissospendi l-għoti u/jew il-pagament tal-għajnuna notifikata lill-benefiċjarju jekk tkun irċeviet għajnuna illegali preċedenti ddikjarata inkompatibbli b’deċiżjoni tal-Kummissjoni sakemm il-benefiċjarju jkun ħallas lura jew ħallas f’kont separat l-għajnuna illegali u inkompatibbli u l-imgħax tal-irkupru korrispondenti. Għalhekk, f’dan il-każ hemm konformità mal-paragrafi 18 u 19 tal-RAG.

(100)

Il-Kummissjoni aċċettat li l-proċess tal-produzzjoni għaċ-ċelluli tal-batteriji l-ġodda f’Göd kien jikkwalifika bħala “innovazzjoni ta’ proċess ġdid”, u għalhekk kien jikkonsisti f’investiment inizjali skont it-tifsira tal-RAG (il-premessa (37) hawn fuq u l-premessi (89) sa (101) tad-deċiżjoni tal-ftuħ). L-investigazzjoni formali tal-Kummissjoni ma identifikat l-ebda element li huwa kapaċi jikkontesta dik il-valutazzjoni. Konsegwentement, il-konklużjoni tal-Kummissjoni tibqa’ valida għall-finijiet ta’ din id-Deċiżjoni.

(101)

Għalhekk, il-Kummissjoni hija mitluba tivvaluta jekk il-miżura ta’ għajnuna tissodisfax il-kriterji stabbiliti fl-Artikolu 107(3), il-punt (c), tat-TFUE, jiġifieri jekk tikkostitwixxix “għajnuna maħsuba biex tiffaċilita l-iżvilupp (…) ta’ ċerti reġjuni ekonomiċi, basta dik l-għajnuna ma tfixkilx il-kundizzjonijiet tal-kummerċ sa grad li jkun kuntrarju għall-interess komuni”. Dik il-valutazzjoni titwettaq b’referenza għall-kriterji stabbiliti fl-RAG.

(102)

L-RAG jirrikjedu li l-Istat Membru jagħti prova f’termini konkreti tal-kontribuzzjoni reali u sostnuta tal-investiment megħjun għall-iżvilupp reġjonali tar-reġjun fil-mira. Għal dik il-fini, it-Taqsima 3.2.2. tal-RAG telenka għadd ta’ indikaturi li l-Istati Membri jistgħu jużaw sabiex juru l-kontribuzzjoni reġjonali tal-għajnuna individwali għall-investiment.

(103)

Fid-deċiżjoni tal-ftuħ, il-Kummissjoni kkonfermat li ż-żona ta’ Göd kienet eliġibbli għall-għajnuna reġjonali skont l-Artikolu 107(3), il-punt (c), tat-TFUE.

(104)

Biex jagħti prova tal-kontribuzzjoni reali u sostnuta, l-Istat Membru kellu wkoll juri li l-vijabbiltà tal-miżura ta’ għajnuna ntweriet minn kontribuzzjoni finanzjarja tal-benefiċjarju tal-għajnuna ta’ mill-inqas 25 % tal-kostijiet eliġibbli (44), ipprovduta permezz tar-riżorsi proprji tiegħu jew permezz ta’ finanzjament estern, f’forma li tkun ħielsa minn kwalunkwe appoġġ finanzjarju pubbliku. Barra minn hekk, l-investiment (l-assi megħjuna) kellu jinżamm fiż-żona kkonċernata għal perjodu minimu ta’ 5 snin wara l-ikkompletar tal-investiment (45). Il-Kummissjoni nnutat li dawk il-kundizzjonijiet ġew issodisfati (ara l-premessi (31) u (32) tad-deċiżjoni tal-ftuħ).

(105)

Fid-deċiżjoni tal-ftuħ (ara l-premessa (105) tagħha), il-Kummissjoni qajmet dubji dwar jekk l-investiment ikollux l-effetti ta’ benefiċċju kollha deskritti fid-dokumenti ta’ notifika, peress li l-politika ta’ akkwist lokali msemmija hemmhekk ma dehritx li se timmaterjalizza, tal-inqas mhux għall-akkwiżizzjoni tal-makkinarju u t-tagħmir użat fil-proġett ta’ investiment.

(106)

Madankollu, wara li vvalutat l-evidenza ġenerali fil-fajl, il-Kummissjoni tinnota li l-Ungerija invokat bosta effetti reġjonali pożittivi tal-investiment. Fost oħrajn (ara l-premessa (35) tad-deċiżjoni tal-ftuħ), il-miżura ta’ għajnuna kienet mistennija li toħloq 1 200 impjieg dirett ġdid. Minħabba l-post fejn jinsab, l-investiment għandu wkoll il-probabbiltà li jattira ħaddiema minn reġjuni ġirien li huma żoni megħjuna taħt l-Artikolu 107(3), il-punt (a) tat-TFUE. L-għadd ta’ impjiegi indiretti li nħolqu b’riżultat tal-investiment kien mistenni li jkun ta’ madwar 200 fl-Ungerija, u x-xogħlijiet ta’ kostruzzjoni kienu mistennija li jattiraw aktar minn [30-60] kumpanija tal-kostruzzjoni differenti u aktar minn [800-1 100] ħaddiem (il-premessa (46)). Il-benefiċjarju kien qed jippjana wkoll li joffri taħriġ komprensiv biex itejjeb kemm il-ħiliet ġenerali kif ukoll dawk speċifiċi tal-forza tax-xogħol tiegħu u li jikkoopera mal-istituti tal-edukazzjoni għolja Ungeriżi (u b’hekk jippromwovi t-tixrid tal-għarfien u t-trasferimenti tat-teknoloġija). L-Ungerija rreferiet ukoll għal investimenti ta’ segwitu kif ukoll għal attività ta’ riċerka, żvilupp u innovazzjoni prevista fir-reġjun. Il-Kummissjoni ssib li ma hemm l-ebda element fil-fajl li jikkontesta r-realtà ta’ dawn il-benefiċċji mistennija fiż-żmien tal-għotja kundizzjonali. Fir-rigward tad-dubji inizjali tagħha b’rabta mal-akkwist lokali, il-Kummissjoni tinnota li dawk id-dubji fl-ebda każ ma setgħu jaffettwaw ir-realtà tal-kontribuzzjoni tal-Investiment 2 għall-iżvilupp reġjonali taż-żona (kif stabbilit hawn fuq) iżda setgħu jaffettwaw biss l-ambitu tagħha.

(107)

B’riżultat ta’ dan, il-Kummissjoni tqis li hemm prova biżżejjed li l-investiment ikun jipprovdi kontribut pożittiv għall-iżvilupp tar-reġjun.

(108)

Skont it-Taqsima 3.5 tar-RAG, l-għajnuna reġjonali tista’ tinstab biss li hija kompatibbli mas-suq intern jekk ikollha effett ta’ inċentiv. Effett ta’ inċentiv ikun preżenti meta l-għajnuna tbiddel l-imġiba ta’ impriża b’mod li hija tinvolvi ruħha f’attività addizzjonali li tikkontribwixxi għall-iżvilupp ta’ żona, li fiha ma kinitx tinvolvi ruħha mingħajr l-għajnuna jew kienet tinvolvi ruħha biss f’din l-attività b’mod ristrett jew differenti jew f’post ieħor. L-għajnuna ma tridx tkun tissussidja l-kostijiet ta’ attività li impriża tkun ġarrbet fi kwalunkwe każ u ma tridx tkun tikkumpensa għar-riskju tan-negozju normali ta’ attività ekonomika.

(109)

Kif spjegat fil-premessa (116) tad-deċiżjoni tal-ftuħ, ir-rekwiżit formali tal-effett ta’ inċentiv stabbilit fil-paragrafi 64, 65 u 69 tal-RAG, jiġifieri li x-xogħlijiet jistgħu jibdew biss wara li tkun ġiet ippreżentata l-formola tal-applikazzjoni għall-għajnuna, ġie rispettat fil-każ tal-Investiment 2.

(110)

Madankollu, peress li jista’ jkun hemm ħafna raġunijiet validi sabiex kumpanija tillokalizza l-investiment tagħha f’ċertu reġjun, anke mingħajr ma tingħata l-ebda għajnuna, l-RAG jirrikjedu wkoll li l-Kummissjoni tivverifika fid-dettall li l-għajnuna hija meħtieġa biex jiġi pprovdut effett ta’ inċentiv sostantiv għall-investiment. F’dan il-kuntest, l-Istat Membru huwa meħtieġ li jispeċifika liema xenarju deskritt fil-paragrafu 61 tal-RAG japplika (id-deċiżjoni ta’ investiment — ix-xenarju 1; jew id-deċiżjoni dwar il-post — ix-xenarju 2).

(111)

L-Ungerija nnotifikat il-miżura ta’ għajnuna bħala li taqa’ fix-xenarju 2 tal-paragrafu 61 tal-RAG. Skont il-paragrafu 61 tal-RAG, ix-xenarju 2 ikun preżenti fejn l-għajnuna tagħti inċentiv biex jintgħażel li jiġi lokalizzat investiment ippjanat fiż-żona rilevanti minflok xi mkien ieħor minħabba li din tikkumpensa għall-iżvantaġġi u l-kostijiet netti marbuta ma’ post fiż-żona kkonċernata. Kif stabbilit fit-Taqsima 3.5.2 tal-RAG, f’każ tax-xenarju 2, l-Istat Membru jrid jipprovdi evidenza ċara li l-għajnuna għandha impatt reali fuq l-għażla tal-post tal-investiment. Għaldaqstant, dan ipoġġi l-oneru tal-provi rigward l-eżistenza ta’ effett ta’ inċentiv fuq l-Istat Membru. Għal dak l-għan, l-Istat Membru jrid jipprovdi deskrizzjoni komprensiva tax-xenarju kontrofattwali li fih ma tingħata l-ebda għajnuna lill-benefiċjarju minn xi awtorità pubblika fiż-ŻEE (inkluż fil-post magħżul). Il-paragrafu 71 tal-RAG jindika li għax-xenarju 2 — li l-Ungerija tirreferi għalih fil-każ preżenti - l-Istat Membru seta’ jagħti prova tal-effett ta’ inċentiv tal-għajnuna billi jipprovdi dokumenti tal-kumpanija li juru li sar tqabbil bejn il-kostijiet u l-benefiċċji tal-lokalizzazzjoni tal-investiment fiż-żona megħjuna kkonċernata u dawk fiż-żona/i alternattiva/i. Dawn id-dokumenti għandhom ikunu kontemporanji għall-proċess tat-teħid ta’ deċiżjonijiet rigward l-investiment jew l-għażla tal-post tiegħu. Għal dak l-għan, l-Istat Membru huwa mistieden joqgħod fuq dokumenti uffiċjali tal-bord, valutazzjonijiet tar-riskju, rapporti finanzjarji, pjanijiet ta’ direzzjoni tan-negozju interni, perizji kif ukoll studji u dokumenti oħra li jelaboraw fuq diversi xenarji ta’ investiment.

(112)

Il-Kummissjoni trid tivverifika jekk ix-xenarju kontrofattwali ppreżentat mill-Ungerija huwiex realistiku u kredibbli.

(113)

Skont il-paragrafu 68 tal-RAG, xenarju kontrofattwali jkun kredibbli jekk ikun ġenwin u jkun relatat mal-fatturi tat-teħid ta’ deċiżjonijiet prevalenti fiż-żmien tad-deċiżjoni mill-benefiċjarju rigward l-investiment. (46)

(114)

Fil-każ preżenti, l-Ungerija għamlet għadd ta’ argumenti u pprovdiet evidenza dokumentarja biex tappoġġja l-pożizzjoni tagħha li l-Investiment 2 issodisfa r-rekwiżiti tal-RAG bħala proġett li jaqa’ fix-xenarju 2 tal-paragrafu 61 tal-RAG. Hija argumentat diskrepanza fil-vijabbiltà tal-valur preżenti nett (NPV) ta’ EUR 173 miljun meta mqabbel ma’ post tal-investiment alternattiv f’Xi’an, iċ-Ċina. Din id-differenza rriżultat essenzjalment minn differenza sinifikanti fil-kostijiet tal-investiment ippjanati tal-miżura ta’ għajnuna fiż-żewġ postijiet alternattivi. Filwaqt li l-benefiċjarju jinvesti EUR 1,2 biljun fil-valur nominali (EUR 982 miljun fil-valur preżenti (47)) f’bini, tagħmir u makkinarju fl-Ungerija, il-kostijiet ekwivalenti fiċ-Ċina ammontaw biss għal EUR […] miljun fil-valur nominali (EUR 766,7 miljun fil-valur preżenti). Id-differenza ta’ EUR 215,3-il miljun (fil-valur preżenti) kienet dovuta esklussivament għall-kost tal-makkinarju u t-tagħmir, li skont in-notifika li kien kważi [35-50] % ogħla fl-Ungerija meta mqabbel ma’ dak taċ-Ċina.

(115)

Fid-deċiżjoni tal-ftuħ, il-Kummissjoni nnutat li d-differenza ta’ EUR 215,3-il miljun fil-kostijiet tal-investiment kienet parzjalment paċuta mill-vantaġġi netti tal-investiment Ungeriż (EUR 42,3 miljun), li rriżulta f’diskrepanza fil-vijabbiltà netta finali ta’ EUR 173 miljun bejn il-postijiet fiċ-Ċina u fl-Ungerija, għall-iżvantaġġ tal-post fl-Ungerija. Il-Kummissjoni nnutat ukoll li l-Ungerija sostniet li l-għajnuna notifikata ta’ EUR 108 miljun fil-valur preżenti kkumpensat parzjalment għall-iżvantaġġ nett ta’ EUR 173 miljun marbut mad-deċiżjoni li l-investiment jiġi lokalizzat fl-Ungerija meta mqabbel maċ-Ċina.

(116)

Kif jidher mid-deċiżjoni ta’ estensjoni (notevolment il-premessi (5) u (6)), bi tweġiba għad-deċiżjoni tal-ftuħ, l-Ungerija u Samsung SDI tbiegħdu minn ċerti dikjarazzjonijiet li saru matul il-fażi ta’ eżami preliminari u ppreżentaw pretensjonijiet u evidenza ġodda rigward is-suppożizzjonijiet li saru mill-benefiċjarju fix-xenarju kontrofattwali, li mill-inqas ikkontradixxew parzjalment id-dikjarazzjonijiet u l-pretensjonijiet preċedenti.

(117)

Fid-deċiżjoni tal-ftuħ u fid-deċiżjoni ta’ estensjoni, il-Kummissjoni esprimiet dubji dwar il-kredibbiltà tax-xenarju kontrofattwali (investiment fiċ-Ċina), peress li kunsiderazzjonijiet strateġiċi prevalenti kienu jwasslu lill-kumpanija biex tillokalizza l-investiment tagħha fl-Ungerija fi kwalunkwe każ. Hija esprimiet ukoll dubji dwar it-tqabbil tad-diskrepanza tal-VPN, li ma deherx realistiku u kredibbli fid-dawl tal-evidenza disponibbli.

(118)

Fit-Taqsima li ġejja, il-Kummissjoni tivvaluta kull wieħed mill-punti li fuqhom hija kienet esprimiet dubji fir-rigward tad-diskrepanza tal-VPN u d-deċiżjoni dwar il-post. Dawn il-punti jistgħu jiġu ggruppati taħt tliet intestaturi: l-eżistenza ta’ kunsiderazzjonijiet strateġiċi prevalenti li jannullaw mill-bidu nett il-kredibbiltà tal-post alternattiv Ċiniż; id-differenza tal-kostijiet tal-makkinarju u t-tagħmir fiż-żewġ postijiet alternattivi (u b’mod partikolari l-livelli ta’ akkwist lokali mistenni); u l-allegat appoġġ finanzjarju mill-awtoritajiet Ċiniżi favur il-post Ċiniż.

(119)

Fid-deċiżjoni tal-ftuħ, il-Kummissjoni qajmet dubji dwar il-kredibbiltà tax-xenarju kontrofattwali Ċiniż, peress li ma setgħetx teskludi li l-investiment fi kwalunkwe każ kien iseħħ fl-Ungerija għal sensiela ta’ ċirkostanzi. Dawn iċ-ċirkostanzi kienu: (i) l-ambjent ekonomiku ostili fiċ-Ċina lejn il-produtturi tal-batteriji għall-vetturi elettriċi tal-Korea t’Isfel, (ii) ir-riskju ta’ trasferiment furzat tat-teknoloġija, (iii) l-improbabbiltà li Samsung SDI tkun wettqet l-Investiment 1 f’Göd mingħajr ma tkun qieset żieda fl-investiment fi stadju aktar tard, (iv) il-vantaġġi ta’ post Ewropew, bħas-suq Ewropew li qed jespandi malajr u l-prossimità għall-klijenti Ewropej (flimkien ma’ strateġija ta’ investiment reġjonalizzata li l-Grupp Samsung SDI seta’, fil-fehma preliminari tal-Kummissjoni, segwa).

(120)

Fir-rigward tal-ambjent ekonomiku ostili fiċ-Ċina lejn il-produtturi tal-batteriji għall-vetturi elettriċi tal-Korea t’Isfel (ara l-premessa (139) tad-deċiżjoni tal-ftuħ), il-Kummissjoni tinnota li, kif evidenzjat minn dokumenti interni kontemporanji għall-proċess tat-teħid ta’ deċiżjonijiet, u kif ġie argumentat fin-notifika, l-investiment alternattiv ippjanat f’Xi’an kien iservi bħala bażi għall-esportazzjonijiet (dan ma kienx mistenni li jiġġenera bejgħ fis-suq Ċiniż (48)). B’konsegwenza ta’ dan, il-Kummissjoni taċċetta li l-fatt li ċ-Ċina kienet implimentat, fl-2016, miżuri li xekklu l-bejgħ tal-produtturi tal-batteriji għall-vetturi elettriċi tal-Korea t’Isfel fis-suq domestiku Ċiniż, ma jidhirx li ħoloq ambjent ekonomiku ostili għall-investiment inkwistjoni, li ma kienx maħsub biex jaqdi s-suq Ċiniż. Barra minn hekk, Samsung SDI ppreżentat dokumenti kontemporanji u informazzjoni disponibbli għall-pubbliku li juru r-relazzjonijiet kummerċjali tajbin li jinsabu għaddejjin bejn l-awtoritajiet Ċiniżi u l-Grupp Samsung SDI (b’mod partikolari l-offerta ta’ sussidju mill-awtoritajiet Ċiniżi tat-23 ta’ Frar 2017) u produtturi oħra tal-batteriji għall-vetturi elettriċi tal-Korea t’Isfel. Fl-aħħar nett, il-Kummissjoni tinnota li l-ebda dokument fil-fajl tal-każ ma jappoġġja l-konklużjoni li l-Grupp Samsung SDI kien qies dan l-ambjent ostili bħala fattur deċiżiv fiż-żmien tad-deċiżjoni dwar il-post. Għall-kuntrarju, ir-rapport intern tal-21 ta’ Settembru 2017 juri li, ftit qabel id-deċiżjoni ta’ investiment, il-Grupp Samsung SDI ta klassifikazzjoni […] għar-relazzjoni tiegħu mal-awtoritajiet Ċiniżi — l-istess punteġġ li ngħata lill-awtoritajiet Ungeriżi, u ogħla mir-rata attribwita lil awtoritajiet Ewropej oħra. Għalhekk, il-Kummissjoni tqis li l-proġett ta’ investiment ma kienx mhedded minn ambjent ekonomiku potenzjalment ostili fiċ-Ċina u li, fi kwalunkwe każ, l-ambjent tan-negozju fiċ-Ċina la tqies bħala li huwa negattiv u lanqas bħala fattur prevalenti mill-benefiċjarju fiż-żmien tad-deċiżjoni dwar il-post.

(121)

Fir-rigward tar-riskju potenzjali ta’ trasferiment furzat tat-teknoloġija fiċ-Ċina (ara l-premessa (138) tad-deċiżjoni tal-ftuħ), l-Ungerija u Samsung SDI pprovdew informazzjoni addizzjonali li tagħti prova li l-benefiċjarju kien ippjana għadd ta’ miżuri fix-xenarju ta’ investiment kontrofattwali sabiex jiżgura li d-drittijiet ta’ PI tiegħu jkunu protetti biżżejjed fiċ-Ċina, abbażi tal-esperjenza tiegħu fl-operat ta’ impjanti hemmhekk (il-premessa (59)). Samsung SDI spjegat ukoll li l-amministrazzjoni Ċiniża ħabbret f’Ottubru 2017 (jiġifieri qabel id-deċiżjoni ta’ investiment) leġiżlazzjoni biex tiġi rinfurzata l-protezzjoni tal-PI (il-premessa (59)). Fid-dawl ta’ dawn l-osservazzjonijiet, il-Kummissjoni tqis li d-dubji inizjali tagħha dwar trasferiment furzat possibbli tad-drittijiet ta’ PI ma kinux dawk li jeskludu post kontrofattwali fiċ-Ċina.

(122)

Argument ieħor (ara l-premessa (140) tad-deċiżjoni tal-ftuħ) li qajjem mistoqsijiet dwar il-kredibbiltà ġenerali tax-xenarju ta’ investiment kontrofattwali Ċiniż kien li, fil-fehma preliminari tal-Kummissjoni, kien improbabbli li Samsung SDI kienet tibda faċilità żgħira ta’ produzzjoni taċ-ċelluli mingħajr għajnuna, bħal dik f’Göd (jiġifieri l-Investiment 1), li kieku ma kinitx qieset li żżid l-investiment fi stadju aktar tard. Dan ikun jimplika li l-intenzjoni ta’ investiment u t-tisħiħ fil-kapaċità f’Göd kienet diġà teżisti fiż-żmien meta ġie segwit l-Investiment 1 fl-2016. Madankollu dokument intern ta’ Samsung SDI wera li l-Investiment 1 oriġinali tiegħu f’Xi’an ma kienx żdied: għalhekk kien possibbli li sit tal-produzzjoni tal-Grupp Samsung SDI ma jiġix żviluppat lil hinn mill-ewwel stadju ta’ investiment jekk tittieħed deċiżjoni dwar il-post favur is-sit kompetitur. Barra minn hekk, l-eżistenza ta’ investiment inizjali f’Göd ma tfissirx li ma kienx hemm għażla bejn Göd u Xi’an, peress li ż-żewġ siti kellhom investiment eżistenti li seta’ jiżdied. B’mod aktar ġenerali, il-Kummissjoni tirrikonoxxi li anke l-eżistenza ta’ intenzjoni impliċita jew espliċita li jiżdied sit tal-produzzjoni (bħall-fatt li kumpanija xtrat biċċa art li hija akbar minn dik meħtieġa għall-ewwel fabbrika) mhux neċessarjament tfisser li l-investiment il-ġdid se jitwettaq fi kwalunkwe każ. F’dak ir-rigward, il-Kummissjoni tinnota li ma hemm xejn fil-fajl tal-każ li juri espressament li Samsung SDI kellha l-pjanijiet li żżid l-investiment f’Göd mill-bidu nett.

(123)

Barra minn hekk, il-Kummissjoni b’mod ġenerali qieset fid-deċiżjoni tal-ftuħ (il-premessa (143) tad-deċiżjoni tal-ftuħ) li għadd ta’ vantaġġi ta’ sit tal-produzzjoni Ewropew (pereżempju, is-suq Ewropew li qed jespandi malajr u l-prossimità għall-klijenti Ewropej) setgħu kienu jikkostitwixxu kunsiderazzjonijiet strateġiċi prevalenti li kienu jwasslu lill-Grupp Samsung SDI biex fi kwalunkwe każ jillokalizza l-investiment tiegħu fl-Ungerija. Dan id-dubju ġie żviluppat aktar fid-deċiżjoni ta’ estensjoni (il-premessa (57) tad-deċiżjoni ta’ estensjoni) fejn il-Kummissjoni qieset li l-Grupp Samsung SDI seta’ segwa strateġija ta’ investiment reġjonalizzata li kienet twasslu biex jinvesti fi kwalunkwe każ f’siti tal-produzzjoni fl-Ewropa. Madankollu, għalkemm dokument intern tal-Grupp Samsung SDI (49) jissuġġerixxi li diversifikazzjoni tas-siti tal-produzzjoni f’kull kontinent “tista’ tkun ta’ għajnuna”, it-ton kawt ta’ dak id-dokument u l-kuntest ta’ dik id-dikjarazzjoni (id-diversifikazzjoni kienet sempliċiment wieħed minn bosta parametri fit-tqabbil kwalitattiv ta’ sit b’sit, flimkien ma’ kunsiderazzjonijiet oħra bħall-fluss tal-loġistika bil-ferrovija bejn is-sit ta’ Xi’an possibbli u l-Ewropa) juru li dan il-fattur ma kienx jikkostitwixxi kunsiderazzjoni strateġika prevalenti għall-Grupp Samsung SDI. Dokumenti interni kontemporanji oħra tal-Grupp Samsung SDI sempliċiment jiddikjaraw li dawn il-fatturi kwalitattivi “m’għandhomx [jiġu] injorati”. (50) L-ebda element ieħor fil-fajl tal-każ ma jippermetti li jiġi appoġġjat id-dubju mqajjem f’dak ir-rigward u l-eżistenza ta’ strateġija ta’ investiment reġjonalizzata prevalenti fiż-żmien tad-deċiżjoni ta’ investiment. B’mod partikolari, l-ebda evidenza rigward ir-raba’ u l-ħames stadju fil-proċess tat-teħid ta’ deċiżjonijiet tal-benefiċjarju (il-premessi (68) u (69) tad-deċiżjoni tal-ftuħ) — li t-tnejn li huma segwew il-laqgħa tal-21 ta’ Settembru 2017 — ma tindika xi gwida favur id-diversifikazzjoni reġjonali fil-proċess finali tad-deċiżjoni dwar il-post. Barra minn hekk, kif innutat mill-Ungerija, li kieku l-prossimità għall-klijenti kienet fattur ewlieni fl-istrateġija ta’ investiment tal-Grupp Samsung SDI fiż-żmien tad-deċiżjoni dwar il-post, kienet tibda b’mod parallel impjant tal-produzzjoni tal-batteriji għall-vetturi elettriċi fi […]. Madankollu, id-dokumenti interni tal-kumpanija juru li, biex titnaqqas id-diskrepana fil-provvista identifikata fis-suq […], tqiesu biss iż-żewġ alternattivi fl-Ungerija u fiċ-Ċina. In-nuqqas ta’ din l-istrateġija ta’ investiment reġjonalizzata prevalenti jiġi żvelat aktar mid-dokumenti interni ta’ Samsung SDI pprovduti mill-Ungerija, li skonthom kemm l-investiment inizjali f’Xi’an kif ukoll iż-żieda prevista tas-sit Xi’an kienu jaqdu swieq barranin (l-Ewropa u […], mhux is-suq domestiku Ċiniż). (51)

(124)

Fid-dawl tal-kunsiderazzjonijiet preċedenti, il-Kummissjoni tqis li l-kunsiderazzjonijiet strateġiċi identifikati hawn fuq ma kinux deċiżivi, u/jew ma ġewx ikkunsidrati (bħala tali jew bħala li huma ta’ sinifikat prevalenti) fid-deċiżjoni dwar il-post tal-proġett ta’ investiment. Għaldaqstant, il-Grupp Samsung SDI seta’ b’mod ġenerali jipprevedi b’mod realistiku dan l-investiment fiċ-Ċina.

(125)

Fin-notifika, l-Ungerija ġġustifikat id-differenza sinifikanti fil-kostijiet tal-investiment għat-tagħmir u l-makkinarju billi invokat il-politika ta’ akkwist lokali tal-Grupp Samsung SDI, li fil-prinċipju tirrikjedi li l-grupp jixtri t-tagħmir u l-makkinarju u l-inputs l-oħra meħtieġa għall-investiment minn sorsi lokali (ara l-premessi (42) u (130) tad-deċiżjoni tal-ftuħ). Fid-deċiżjoni tal-ftuħ, il-Kummissjoni qieset li l-affermazzjoni li Samsung SDI takkwista lokalment 100 % tal-makkinarju u t-tagħmir tagħha fiż-żewġ xenarji kkunsidrati (jiġifieri kemm jekk l-investiment iseħħ f’Xi’an kif ukoll f’Göd) ma kinitx kredibbli u realistika.

(126)

Fir-rigward tal-akkwist lokali tat-tagħmir għas-sit Ungeriż (jiġifieri l-akkwist mingħand fornituri miż-ŻEE), il-Kummissjoni nnutat (il-premessa (47) tad-deċiżjoni tal-ftuħ) il-passi limitati meħuda minn Samsung SDI biex tidentifika fornituri lokali (kuntatti bilaterali ma’ ħames fornituri miż-ŻEE fl-2015, l-2016 u l-2017, konferenza fi Frar 2017) u enfasizzat l-eżitu limitat ta’ dawn il-passi, peress li 23 minn 29 fornitur miż-ŻEE meqjusin ġew miċħuda għal diversi raġunijiet qabel id-deċiżjoni ta’ investiment (filwaqt li kienu għaddejjin diskussjonijiet ma’ sitt fornituri biss fiż-żmien tad-deċiżjoni ta’ investiment, li setgħu jipprovdu biss tagħmir għal porzjon żgħir tal-investiment ta’ Samsung SDI fl-Ungerija). Il-Kummissjoni nnutat ukoll (il-premessa (48) tad-deċiżjoni tal-ftuħ) li l-ebda tagħmir għall-ewwel investiment ta’ Samsung SDI (l-Investiment 1 f’żona ġdida) f’Göd ma kien ġie akkwistat minn fornituri miż-ŻEE. Samsung SDI, f’konformità ma’ restrizzjoni fil-politika ta’ akkwist lokali tagħha, ma ppruvatx tuża l-akkwist lokali f’dak iż-żmien u għaldaqstant ma żviluppatx kuntatti ma’ fornituri lokali (ara l-premessa (50) u n-nota 20 f’qiegħ il-paġna hawn fuq). L-Ungerija sempliċiment spjegat li t-tfittxija għall-fornituri miż-ŻEE hija sforz kontinwu u li, fl-aħħar mill-aħħar, xi tagħmir jista’ jiġi akkwistat mill-fornituri identifikati. Fid-dawl ta’ dan ta’ hawn fuq u tan-nuqqas ta’ kwalunkwe indikazzjoni, fiż-żmien tad-deċiżjoni ta’ investiment, li l-fornituri bbażati fiż-ŻEE kienu ġew meqjusa serjament għal kwalunkwe parti sinifikanti tal-konsenji tal-makkinarju u t-tagħmir għall-finijiet tal-Investiment 2, il-Kummissjoni ssostni l-konklużjoni tagħha li Samsung SDI ma setgħetx tassumi b’mod kredibbli li setgħet takkwista 100 % tat-tagħmir għall-impjant Ungeriż lokalment. Il-Kummissjoni tinnota li, għall-Investiment 2, Samsung SDI fil-fatt ma akkwistat kważi l-ebda tagħmir mill-fornituri miż-ŻEE. (52)

(127)

Fir-rigward tal-akkwist lokali għall-investiment alternattiv f’Xi’an, il-Kummissjoni l-ewwel tinnota li, fiż-żmien tad-deċiżjoni dwar il-post, il-Grupp Samsung SDI kien jaf li kiseb biss livell limitat ta’ akkwist lokali għall-impjant tiegħu fi Tianjin li jimmanifattura ċelluli tal-batteriji għal apparat mobbli. Skont l-evidenza (ippreżentata mill-Ungerija fit-3 ta’ Novembru 2020, il-premessa (63)(a) li setgħet kienet disponibbli fiż-żmien tad-deċiżjoni dwar il-post, fil-perjodu 2015-2016 inkiseb akkwist lokali medju ta’ [25-30] % għall-impjant ta’ Tianjin (u li kien l-ogħla sehem medju ta’ akkwist lokali rreġistrat għal dak l-impjant sa dak il-punt speċifiku fiż-żmien).

(128)

Barra minn hekk, il-Kummissjoni tinnota li, fiż-żmien tad-deċiżjoni dwar il-post, il-Grupp Samsung SDI qies li l-użu ta’ fornituri Ċiniżi jista’ b’mod ġenerali jqajjem kwistjonijiet f’termini ta’ […] u kunfidenzjalità (il-premessa (62)). Minkejja li l-Ungerija u Samsung SDI sussegwentement argumentaw li dawn il-kwistjonijiet setgħu jiġu, jew setgħu ġew, indirizzati b’bosta mezzi (ara s-Sottotaqsima 5.3.1.2.2.2.2 hawn taħt), il-Kummissjoni tqis li d-dokumenti interni tal-kumpanija ma kinux jiffukaw fuq dawk il-kwistjonijiet li kieku setgħu jiġu solvuti fil-ħin, mingħajr l-ebda kost addizzjonali u fil-każijiet kollha, għall-fornituri u l-magni kollha.

(129)

Il-Kummissjoni għaldaqstant issostni li l-Grupp Samsung SDI ma setax jassumi b’mod kredibbli li seta’ jakkwista lokalment 100 % tat-tagħmir għall-impjant Ċiniż. Dan huwa kkonfermat mill-valutazzjoni ex post tal-livell ta’ akkwist lokali li setgħet tiġi preżunta b’mod realistiku fiż-żmien tad-deċiżjoni ta’ investiment: l-ogħla proporzjonijiet ta’ akkwist lokali li ġew ippreżentati minn Samsung SDI u l-Ungerija ma jaqbżux l-[40–45] %. (53)

(130)

Fuq il-bażi ta’ dan ta’ hawn fuq, il-Kummissjoni tikkonkludi li l-politika ta’ akkwist lokali ta’ 100 % kemm f’Göd kif ukoll f’Xi’an ma kinitx kredibbli u realistika fiż-żmien tad-deċiżjoni dwar il-post. Għalhekk, l-akkwist lokali sħiħ ma setax b’mod raġonevoli jkun parti mit-tqabbil tal-NPV ta’ Samsung SDI. Konsegwentement, id-differenzjal tal-kostijiet tal-investiment iddikjarat, bejn l-Ungerija u ċ-Ċina, ta’ EUR 237,5 miljun (fil-valur preżenti) — fejn il-kostijiet tal-makkinarju u t-tagħmir fl-Ungerija kienu madwar [40-45] % ogħla minn dawk fiċ-Ċina — ma jistax jiġi ġġustifikat.

(131)

Meta jiġi kkunsidrat li l-Kummissjoni ma tiċħadx li l-benefiċjarju qies l-akkwist lokali fil-valutazzjoni tal-NPV, u li l-akkwist lokali huwa fattur rilevanti li għandu jiġi vvalutat, iżda tikkonkludi biss li s-suppożizzjoni ta’ akkwist lokali sħiħ kienet mhux kredibbli u mhux realistika, hija se tivvaluta l-punt sa fejn l-akkwist lokali seta’ jitqies bħala li kien kredibbli u realistiku fiż-żmien tad-deċiżjoni dwar il-post.

(132)

L-Ungerija u Samsung SDI argumentaw fil-kummenti tagħhom dwar id-deċiżjoni tal-ftuħ li, fid-dawl tal-politika ta’ akkwist lokali tal-Grupp Samsung SDI, u fin-nuqqas ta’ fornituri lokali adegwati, Samsung SDI tuża l-fornituri fdati tas-soltu tagħha mill-Korea t’Isfel bħala t-tieni l-aħjar għażla. Minkejja li l-Kummissjoni rrikonoxxiet dak il-punt fil-premessa (131) tad-deċiżjoni tal-ftuħ, sussegwentement (ara l-premessa (45) tad-deċiżjoni ta’ estensjoni) qajmet dubju dwar għaliex, jekk l-akkwist parzjali mill-fornituri Ċiniżi kellu jitqies realistiku, il-ħtiġijiet tal-makkinarju u t-tagħmir fl-Ungerija jenħtieġ li ma jiġux akkwistati minn fornituri Ċiniżi ferm irħas (minflok mill-Korea t’Isfel), li kienu jnaqqsu l-kostijiet tal-makkinarju u t-tagħmir fix-xenarju Ungeriż u jnaqqsu d-diskrepanza tal-VPN bejn iż-żewġ postijiet.

(133)

Madankollu, Samsung SDI spjegat fil-kummenti tagħha dwar id-deċiżjoni ta’ estensjoni li l-kwistjonijiet ta’ twaqqit (dewmien tal-konsenja) setgħu jiġu indirizzati biss bl-involviment tal-awtoritajiet Ċiniżi (il-premessi (62) u (69)). Samsung SDI sostniet li dan l-involviment seta’ jkun mistenni biss li kieku l-investiment innifsu sar fiċ-Ċina. Il-Kummissjoni taċċetta li ma kienx ikun kredibbli mill-perspettiva ta’ Samsung SDI li takkwista makkinarju u tagħmir għall-investiment fl-Ungerija mill-fornituri Ċiniżi, peress li dan kien jesponi lil Samsung SDI għall-kwistjonijiet […] li kienu jneħħu l-vantaġġ tal-prezz fuq terminu qasir prima facie. Għaldaqstant, il-Kummissjoni tqis li, għall-kuntrarju tal-affermazzjonijiet inizjali tagħha, sal-punt li l-akkwist lokali ma kien realistiku fl-ebda xenarju ta’ investiment (jiġifieri l-Ungerija u ċ-Ċina), Samsung SDI x’aktarx li kienet użat il-fornituri fdati tagħha mill-Korea t’Isfel.

(134)

Jekk, minflok ma jiġu akkwistati lokalment, il-makkinarju u t-tagħmir għall-investiment jiġu akkwistati minn fornituri mill-Korea t’Isfel, il-Kummissjoni tqis, kif aċċettat ukoll mill-Ungerija u minn Samsung SDI, li jinħolqu kostijiet addizzjonali (kostijiet tat-trasport fuq l-ilma, dazji doganali, jekk ikun hemm). Il-Kummissjoni tinnota li l-Ungerija stmat il-kostijiet tat-trasport fuq l-ilma (ara l-premessa (69) hawn fuq) mill-Korea t’Isfel għall-Ungerija għal [3–4] %, filwaqt li l-kostijiet tat-trasport fuq l-ilma mill-Korea t’Isfel għaċ-Ċina kienu stmati għal [2–3] % tal-kostijiet rispettivi tal-makkinarju u t-tagħmir (il-premessa (67) hawn fuq). Barra minn hekk, il-Kummissjoni taċċetta wkoll li (kif imsemmi fil-premessa (67) hawn fuq) dazji doganali ta’ 1,1 % jkunu japplikaw ukoll fuq tagħmir mhux akkwistat lokalment fix-xenarju li fih isir l-investiment fiċ-Ċina, filwaqt li l-ebda dazju doganali ma jiġi impost jekk l-investiment isir fl-Ungerija (il-premessa (70) hawn fuq).

(135)

Kif deskritt fil-premessi (44) u (45) tad-deċiżjoni tal-ftuħ, il-makkinarju u t-tagħmir użati sa Marzu 2019 għall-investiment f’Göd (54) ma kinux inxtraw direttament mill-benefiċjarju mingħand il-fornituri mill-Korea t’Isfel. Minflok, il-KĠ ta’ Samsung SDI kienu aġixxew bħala intermedjarju, billi xtraw il-makkinarju u t-tagħmir fil-Korea t’Isfel u biegħu mill-ġdid lil Samsung SDI fl-Ungerija, wara li applikaw żieda (mark-up) ta’ [18–22]% għall-bażi tal-kostijiet sottostanti (55). Samsung SDI spjegat li dan l-involviment tal-KĠ ta’ Samsung SDI huwa f’konformità mal-politika ta’ akkwist lokali tagħha u jippermetti b’mod partikolari li l-KĠ ta’ Samsung SDI jikkomunikaw direttament mal-fornituri mill-Korea t’Isfel u jħeġġuhom jaġixxu malajr jekk tinqala’ problema f’wieħed mis-siti tal-produzzjoni tal-Grupp Samsung SDI. Skont Samsung SDI, l-KĠ ta’ Samsung SDI kienu jkunu involuti wkoll fil-każ ta’ akkwist mhux lokali li kieku l-investiment kellu jsir fiċ-Ċina.

(136)

Il-Kummissjoni esprimiet dubji dwar jekk dawn it-tranżazzjonijiet intragrupp irriżultawx fi prezz konformi mas-suq u jekk kinux artifiċjalment żiedu l-kostijiet eliġibbli tax-xenarju li fih l-investiment kellu jkun fl-Ungerija, u għaldaqstant id-diskrepanza tal-NPV (il-premessa (136) tad-deċiżjoni tal-ftuħ u l-premessa (47) tad-deċiżjoni ta’ estensjoni).

(137)

Il-Kummissjoni l-ewwel tinnota li l-Ungerija ppreżentat mal-kummenti tagħha dwar id-deċiżjoni tal-ftuħ dokument intern ta’ Samsung SDI tal-10 ta’ Jannar 2017 li juri li ż-żieda ta’ [18–22] % kienet ibbażata fuq studju minn konsulent estern u r-riżultati tal-valutazzjoni komparattiva ta’ kumpaniji oħra li jipprovdu tagħmir. L-Ungerija kkjarifikat ukoll fil-kummenti tagħha dwar id-deċiżjoni ta’ estensjoni li l-valuri apparentement aktar baxxi ta’ [13–17] % (il-valur medjan) u [14–18] % (għal Samsung SDI), it-tnejn imsemmija minn rapport minn Deloitte f’Diċembru 2018 (li fuq il-bażi tiegħu l-Kummissjoni kienet qajmet dubji), ma kkunsidrawx il-kostijiet addizzjonali ta’ [3–4] % mġarrba mill-KĠ ta’ Samsung SDI meta xtraw it-tagħmir, li jispjega d-differenza fiż-żieda nominali ta’ [18–22] % użata fil-kalkolu mill-ġdid.

(138)

Fl-aħħar nett, Samsung SDI pprovdiet studju ieħor minn Copenhagen Economics, iddatat it-13 ta’ April 2020, (56) li vvaluta jekk ir-rimunerazzjoni tat-tranżazzjonijiet intragrupp fi ħdan il-Grupp Samsung SDI kinitx distakkata, bl-użu tal-metodoloġija tal-Linji Gwida tal-OECD (57). Dan l-istudju kkonkluda li [18–22] % jaqa’ fil-medda interkwartili tal-kost nett flimkien mal-marġni tal-kumpaniji komparabbli (jiġifieri bejn valur medjan ta’ 16,8 % u t-tielet valur kwartili ta’ 23,5 %) u għaldaqstant ikkonferma li ż-żieda applikata mill-KĠ ta’ Samsung SDI għal tranżazzjonijiet intragrupp kienet distakkata.

(139)

Fid-dawl tal-argumenti u l-evidenza addizzjonali pprovduti mill-Ungerija u minn Samsung SDI, il-Kummissjoni tqis li, sal-punt li l-makkinarju u t-tagħmir għall-investiment ma kinux jiġu akkwistati lokalment (fir-rigward taż-żewġ postijiet meqjusa), huwa realistiku u kredibbli li wieħed jassumi li dan l-akkwist mhux lokali kien jitwettaq mill-KĠ ta’ Samsung SDI u kien jinvolvi żieda konformi mas-suq ta’ [18–22] % fil-kostijiet ta’ dan il-makkinarju u t-tagħmir.

(140)

Minħabba li ż-żieda ta’ [18–22] % tkopri b’mod partikolari l-kostijiet tal-akkwist appoġġjati mill-KĠ ta’ Samsung SDI meta dawn jixtru makkinarju u tagħmir f’isem sussidjarja (fl-Ungerija jew fiċ-Ċina), il-Kummissjoni tqis li kien ikun realistiku li jiġu inklużi l-kostijiet korrispondenti tal-għoti ta’ kuntratti f’każ li t-tagħmir jiġi akkwistat lokalment (direttament mis-sussidjarja fl-Ungerija jew fiċ-Ċina). Fis-sottomissjoni tagħha ddatata l-1 ta’ Lulju 2022, Samsung SDI speċifikat li l-akkwist lokali tat-tagħmir tagħha fiċ-Ċina u fl-Ungerija jkun tabilħaqq jirriżulta f’kostijiet addizzjonali (li jikkorrispondu b’mod partikolari għall-ittestjar u l-validazzjoni). Samsung SDI spjegat li dawn il-kostijiet ikunu (loġikament) ogħla għal tagħmir ġdid milli għal tagħmir mhux ġdid (58). Peress li, skont is-suppożizzjonijiet riveduti, aktar kredibbli (ara hawn taħt), mhux it-tagħmir kollu (u b’mod partikolari l-ebda tagħmir ġdid) ma kien se jiġi akkwistat lokalment, il-kostijiet addizzjonali tal-għoti ta’ kuntratti li għandhom jiġu applikati huma relattivament limitati. Skont il-kalkoli pprovduti minn Samsung SDI, dawn il-kostijiet ikunu jirrappreżentaw [3,5–5] % tal-kost tal-makkinarju. Il-Kummissjoni ma għandha l-ebda raġuni fattwali biex tqajjem dubju dwar dan il-livell ta’ kostijiet.

(141)

Kif stabbilit fil-premessa (130) hawn fuq, għalkemm il-Kummissjoni tikkonkludi li s-suppożizzjoni li għal kwalunkwe wieħed mill-postijiet ta’ investiment, il-makkinarju u t-tagħmir kollha kemm huma jiġu akkwistati lokalment ma kinitx kredibbli u realistika, il-Kummissjoni taqbel li s-sehem tal-akkwist lokali huwa fattur rilevanti li Samsung SDI kkunsidrat fiż-żmien tad-deċiżjoni dwar il-post. Għalhekk, jeħtieġ li l-Kummissjoni tivvaluta liema sehem tal-akkwist lokali jkun jista’ jinstab li huwa kredibbli u realistiku għal kull wieħed mis-siti tal-postijiet ikkunsidrati fiż-żmien tad-deċiżjoni dwar il-post, abbażi tal-evidenza disponibbli f’dak iż-żmien. Fid-deċiżjoni tal-ftuħ, il-Kummissjoni kkunsidrat b’mod preliminari li suppożizzjoni aktar realistika — għaż-żewġ siti — kienet tkun li Samsung SDI takkwista t-tagħmir u l-makkinarju rispettivi mill-fornituri eżistenti esperjenzati u fdati tagħha fil-Korea t’Isfel.

(142)

Kif spjegat hawn fuq (ara s-Sottotaqsima 5.3.1.2.2.1), in-nuqqas ta’ kredibbiltà tal-akkwist lokali (sħiħ) fiċ-Ċina kien ibbażat b’mod partikolari fuq il-fatt li l-użu ta’ fornituri Ċiniżi jkun jista’ b’mod ġenerali jqajjem kwistjonijiet f’termini ta’ (i) […], (ii) […] u (iii) kunfidenzjalità. Il-Kummissjoni tirrikonoxxi li l-Ungerija u Samsung SDI spjegaw b’mod konvinċenti (il-premessa (62)) li Samsung SDI ppjanat li tindirizza u setgħet tindirizza dawn il-kwistjonijiet, mill-inqas sa ċertu punt, billi, rispettivament, (i) tinvolvi lill-awtoritajiet Ċiniżi (li, madankollu, ikun possibbli biss li kieku l-investiment kellu jsir fiċ-Ċina), (ii) tibgħat inġiniera tal-SDI mill-Istabbiliment Prinċipali ta’ Samung SDI tal-Korea t’Isfel biex jipprovdu appoġġ lill-fornituri Ċiniżi; u (iii) tuża arranġamenti kuntrattwali speċifiċi u ftehimiet ta’ żvilupp konġunti mal-bejjiegħa fejn kien meħtieġ (jiġifieri għal magni speċifiċi biss). L-evidenza fil-fajl għaldaqstant turi li, għall-kuntrarju tas-sejba preliminari li saret fil-premessa (131) tad-deċiżjoni tal-ftuħ, xi grad ta’ akkwist lokali jista’ jitqies kredibbli u realistiku fir-rigward tax-xenarju kontrofattwali.

(143)

Barra minn hekk, wara li l-Kummissjoni kienet adottat id-deċiżjoni tal-ftuħ, l-Ungerija u Samsung SDI ssottomettew informazzjoni li turi li, fir-rigward tal-impjant Ċiniż tal-Grupp Samsung SDI li jinsab fi Tianjin, inkisbu livelli medji sostanzjali ta’ akkwist lokali ([25–30] % fil-perjodu 2015–2016, [15–19] % fil-perjodu 2018–2019). Fid-deċiżjoni ta’ estensjoni (il-premessa (41)), il-Kummissjoni esprimiet għadd ta’ dubji, b’mod partikolari fir-rigward tal-komparabbiltà taż-żewġ sitwazzjonijiet (l-impjant ta’ Tianjin u l-impjant ippjanat f’Xi’an). L-Ungerija u Samsung SDI madankollu pprovdew spjegazzjonijiet li juru li l-akkwist lokali miksub għall-impjant ta’ Tianjin kien biċċa informazzjoni rilevanti. Huma l-ewwel fakkru li l-innovazzjonijiet fil-proċess għall-investiment ippjanat (post alternattiv f’Xi’an) jirrigwardaw, bħala regola ġenerali, il-mod li bih jintuża l-makkinarju u t-tagħmir u mhux il-makkinarju u t-tagħmir infushom. B’konsegwenza ta’ dan, il-Kummissjoni tirrikonoxxi li l-fatt li l-proċess tal-produzzjoni u l-prodotti finali fl-impjant ta’ Tianjin ikunu inqas sofistikati mhuwiex tabilħaqq rilevanti biex titwarrab l-esperjenza miksuba mix-xiri tal-makkinarju u t-tagħmir għall-impjant ta’ Tianjin (59). Barra minn hekk, il-fatt li ċ-ċifri għall-perjodu 2018–2019 ma setgħux ikunu magħrufa fiż-żmien tad-deċiżjoni dwar il-post sempliċiment iwassal għall-eżitu li l-perċentwal ogħla biss ta’ [25–30] % għall-perjodu 2015–2016 (dwar data tal-passat li setgħet kienet magħrufa fiż-żmien tad-deċiżjoni dwar il-post) ikun rilevanti. L-Ungerija kkjarifikat ukoll li dawn iċ-ċifri tal-akkwist lokali ma nkisbux wara kważi 20 sena ta’ operat tal-impjant (li seta’ kien ifisser li l-impjant ta’ Xi’an seta’ jikseb biss livelli tant sostanzjali ta’ akkwist lokali wara perjodu ta’ żmien simili) peress li l-impjant beda jimmanifattura ċ-ċelluli tal-batteriji biss fl-2008 (u anke fl-2016 għaċ-ċelluli ċilindriċi) (il-premessa (63)(a)). Fl-aħħar nett, l-Ungerija kkonfermat li l-perċentwali tal-akkwist lokali li ġew ippreżentati kienu jinkludu biss makkinarju u tagħmir u ma kinux jinkludu b’mod partikolari l-ispare parts. Fuq dik il-bażi, id-dubji espressi fid-deċiżjoni ta’ estensjoni jistgħu jitneħħew: il-Kummissjoni tirrikonoxxi li l-grad ta’ akkwist lokali miksub fl-impjant ta’ Tianjin fil-perjodu 2015–2016 jikkonferma li, fiż-żmien tad-deċiżjoni dwar il-post, il-Grupp Samsung SDI seta’ jistenna li jikseb livell sinifikanti ta’ akkwist lokali għall-investiment kontrofattwali fiċ-Ċina.

(144)

Fir-rigward b’mod aktar preċiż tal-investiment kontrofattwali f’Xi’an, il-livell ta’ akkwist lokali li, fil-fehma ta’ Samsung SDI, seta’ nkiseb b’mod kredibbli, l-ewwel ġie kkalkulat minn Samsung SDI fil-kummenti tagħha dwar id-deċiżjoni tal-ftuħ. Għal dak l-għan, Samsung SDI elenkat it-tagħmir mixtri għall-impjant ta’ Göd sa dak il-punt (l-investiment kien għadu għaddej dak iż-żmien) u vvalutat jekk, għall-investiment kontrofattwali f’Xi’an, kull biċċa tagħmir setgħetx tiġi akkwistata minn fornitur Ċiniż. Dak il-kalkolu wera proporzjon ta’ [31–35] % bejn il-valur tat-tagħmir li seta’ ġie akkwistat lokalment fiċ-Ċina u l-valur totali tat-tagħmir mixtri fiż-żmien meta sar il-kalkolu (60). Samsung SDI wriet ukoll li l-livell ta’ żvilupp teknoloġiku fil-makkinarju u t-tagħmir Ċiniż żdied matul iż-żmien (ara l-premessa (65)), li jagħmilha aktar probabbli li jintlaħaq livell ogħla ta’ akkwist lokali milli fil-passat.

(145)

Fid-deċiżjoni ta’ estensjoni (il-premessi (41) sa (44)), il-Kummissjoni esprimiet għadd ta’ dubji f’dak ir-rigward. Minbarra d-dubji ġenerali dwar jekk kienx ikun kredibbli li wieħed joqgħod fuq il-fornituri Ċiniżi ([…] u r-riskji ta’ kunfidenzjalità, diġà msemmija fid-deċiżjoni tal-ftuħ u li ġew indirizzati fil-premessa (142)), il-Kummissjoni qieset notevolment li l-kampjun użat minn Samsung SDI ma kienx rappreżentattiv, b’mod partikolari peress li kien jirrigwarda fil-biċċa l-kbira l-ewwel fażi tal-investiment f’Göd li kienet inqas innovattiva. L-Ungerija madankollu enfasizzat li l-kampjun kien jirrappreżenta aktar minn [75–80] % tal-valur totali tal-makkinarju (inklużi l-magni użati fit-tieni fażi tal-investiment) (61) u li, fi kwalunkwe każ, iż-żewġ fażijiet tal-investiment jinkludu elementi ta’ innovazzjoni ta’ proċess ġdid. (62) L-Ungerija kkjarifikat ukoll li t-teknoloġija tal-istivar għall-fażi 2 li kienet għadha qed tiġi żviluppata fiż-żmien tal-eżaminazzjoni preliminari tammonta biss għal frazzjoni żgħira ħafna (inqas minn 5 %) tal-kostijiet totali tat-tagħmir u li, anke għal xi magni użati fil-proċess ta’ stivar, setgħu jiġu previsti fornituri Ċiniżi.

(146)

Il-Kummissjoni nnutat ukoll li d-data rigward il-kapaċitajiet ta’ ċerti fornituri Ċiniżi, deskritta fil-premessi (9)(b) u (10) tad-deċiżjoni ta’ estensjoni, kienet tiddependi fuq evidenza ex post miġbura (il-premessa (42) tad-deċiżjoni ta’ estensjoni). Madankollu, kif ġie kkjarifikat mill-Ungerija, il-biċċa l-kbira mid-data kkonċernata, anke jekk ikkompilata ex post, kienet disponibbli għall-Grupp Samsung SDI fiż-żmien tad-deċiżjoni ta’ investiment. Filwaqt li parti minn dik id-data ġiet wara d-deċiżjoni ta’ investiment, l-Ungerija kkjarifikat li wieħed biss mis-sitt fornituri Ċiniżi msemmija fil-premessi (9)(b) u (10) tad-deċiżjoni ta’ estensjoni qatt ma kien ġie kkuntattjat qabel id-deċiżjoni ta’ investiment. Fir-rigward tal-fornituri l-oħra, il-laqgħat ma’ dawk il-fornituri kienu bdew qabel id-deċiżjoni ta’ investiment (anke jekk komplew minn hemm ’il quddiem). Madankollu, il-Kummissjoni tqis li fiż-żmien tad-deċiżjoni ta’ investiment, Samsung SDI setgħet tistenna b’mod raġonevoli li, kieku ntgħażel il-post Ċiniż, kien ikollha kuntatti ulterjuri jew kuntatti intensifikati jew kienet tagħmel kuntatti ġodda ma’ fornituri Ċiniżi potenzjali tat-tagħmir għall-impjant ta’ Xi’an. Dan huwa partikolarment minnu peress li, kif enfasizzat minn Samsung SDI (ara l-premessa (11) tad-deċiżjoni ta’ estensjoni), il-fornituri Ċiniżi fil-katina tal-batteriji kienu esperjenzaw evoluzzjoni pożittiva kemm f’termini kwantitattivi kif ukoll kwalitattivi, bil-konsegwenza li l-possibbiltà li jiġu identifikati fornituri adegwati żdiedet — aktar milli b’mod lineari — hekk kif għadda ż-żmien. B’riżultat ta’ dan, il-Kummissjoni tqis li l-evidenza fil-fajl tal-każ turi biżżejjed li Samsung SDI setgħet tqis b’mod kredibbli rata ta’ akkwist lokali ta’ [31–35] % li kieku l-investiment kellu jsir fiċ-Ċina.

(147)

Fl-aħħar nett, minħabba li fid-deċiżjoni ta’ estensjoni l-Kummissjoni qieset li l-esperjenza tal-Grupp Samsung SDI rigward l-akkwist lokali tal-makkinarju u t-tagħmir għall-impjant tagħha fi Tianjin tista’ ma tkunx komparabbli mal-investiment f’Xi’an, il-Kummissjoni qajmet ukoll b’mod impliċitu dubji dwar il-komponent speċifiku tar-rata ta’ akkwist lokali ta’ [31–35] % li tikkorrispondi għall-akkwist lokali li seta’ jinkiseb għal Xi’an bl-użu tal-fornituri reali tal-Grupp Samsung SDI għall-impjant ta’ Tianjin (il-komponent miġbur fil-qosor fil-premessa (9)(a) tad-deċiżjoni ta’ estensjoni). Minħabba li l-Ungerija u Samsung SDI spjegaw kif xieraq li ż-żewġ sitwazzjonijiet kienu komparabbli (il-premessa (143)), il-Kummissjoni ma għadx għandha raġunijiet biex jibqa’ jkollha dubji dwar ir-realtà ta’ dak il-komponent.

(148)

Fid-dawl ta’ dak li ntqal qabel, il-Kummissjoni tikkonkludi li livell ta’ [31–35] % tal-akkwist lokali tal-makkinarju u t-tagħmir għall-finijiet tal-investiment kontrofattwali fiċ-Ċina jista’ jitqies kredibbli u realistiku.

(149)

Fir-rigward tal-akkwist lokali (l-akkwist mill-fornituri taż-ŻEE) tal-makkinarju u t-tagħmir fil-każ tal-Investiment 2 fl-Ungerija, il-Kummissjoni diġà kkonkludiet fil-premessa (126) li suppożizzjoni ta’ sehem ta’ 100 % tal-akkwist lokali ma kinitx kredibbli u ma kinitx realistika. Il-Kummissjoni tinnota li, fiż-żmien tad-deċiżjoni dwar il-post, Samsung SDI kellha informazzjoni limitata dwar x’kien ikun il-livell realistiku ta’ akkwist lokali tal-makkinarju u t-tagħmir għall-Investiment 2. B’mod partikolari, l-Ungerija kkonfermat (il-premessa (50) hawn fuq) li għall-Investiment 1 Samsung SDI ma kinitx applikat il-politika ta’ akkwist lokali tagħha, peress li l-Investiment 1 kien l-ewwel investiment tagħha fiċ-ċelluli tal-batteriji fiż-ŻEE, li għalih kienet iddeċidiet li toqgħod fuq il-fornituri esperjenzati mill-Korea t’Isfel tal-makkinarju u t-tagħmir biex timminimizza r-riskji. L-Investiment 1, għalhekk, ma setax jipprovdi parametru referenzjarju xieraq jew jinforma l-analiżi ta’ Samsung SDI rigward l-Investiment 2.

(150)

Il-Kummissjoni tinnota li Samsung SDI bdiet tfittxija għall-fornituri lokali fl-2015. Saż-żmien tad-deċiżjoni dwar il-post, Samsung SDI kienet warrbet, għal diversi raġunijiet, 23 minn 29 fornitur potenzjali bbażati fiż-ŻEE li hija kienet identifikat u kienet biss qed tkompli diskussjonijiet mal-fornituri li kien fadal, li setgħu jipprovdu biss tagħmir għal porzjon żgħir tal-Investiment 2 (il-premessi (54), (126) u (146). Għalhekk, il-Kummissjoni tikkonkludi li sehem marġinali biss tal-makkinarju u t-tagħmir akkwistat miż-ŻEE, jekk ikun hemm, jista’ jitqies realistiku u kredibbli fil-każ tal-Investiment 2.

(151)

Din is-sejba hija korroborata wkoll mill-fatt li, għall-impjant tagħha f’Göd, Samsung SDI fil-fatt akkwistat biss ammont negliġibbli ta’ makkinarju u tagħmir fiż-ŻEE (bejn wieħed u ieħor [1–1,5] % tal-makkinarju u t-tagħmir, ara l-premessa (71)).

(152)

Għalhekk, il-Kummissjoni tikkonkludi li, fiż-żmien tad-deċiżjoni dwar il-post, Samsung SDI kellha tqis li, li kieku l-Investiment 2 kellu jsir fl-Ungerija, kienet takkwista lokalment biss b’mod marġinali. Il-Kummissjoni tqis li kien ikun realistiku u kredibbli li jitqies li sehem marġinali biss tal-magni u t-tagħmir użati fl-Investiment 2 kien jiġi akkwistat lokalment mill-fornituri taż-ŻEE. F’dan ir-rigward, peress li l-Ungerija nfisha indikat sehem ta’ akkwist lokali ta’ [1-1,5] % fit-tweġiba tagħha dwar id-diskrepanza tal-NPV ikkalkulata mill-ġdid ta’ Jannar 2023 (il-premessa (71)), li barra minn hekk tikkorrispondi għal-livell reali ta’ akkwist lokali tal-makkinarju u t-tagħmir miksub għall-Investiment 2, il-Kummissjoni se tapplika dak l-ammont biex tikkwantifika s-sehem marġinali ta’ akkwist lokali msemmi hawn fuq.

(153)

Abbażi tal-proporzjonijiet ta’ akkwist lokali ddeterminati fiż-żewġ sottotaqsimiet preċedenti (5.3.1.2.2.2.2 u 5.3.1.2.2.2.3), il-Kummissjoni tqis li tista’ tikkalkula l-kostijiet kredibbli tat-tagħmir fiż-żewġ postijiet fid-dawl tal-kunsiderazzjonijiet ġenerali stabbiliti fl-ewwel sottotaqsima (5.3.1.2.2.2.1). Dan isir billi jiġu applikati, għall-frazzjoni tal-makkinarju u t-tagħmir akkwistati lokalment, il-kostijiet tal-akkwist lokali addizzjonali u, għall-frazzjoni tal-makkinarju u t-tagħmir akkwistati mill-fornituri tal-Korea t’Isfel mill-KĠ ta’ Samsung SDI, il-kostijiet tat-trasport fuq l-ilma, id-dazji doganali u ż-żieda applikata mill-KĠ ta’ Samsung SDI.

Tabella 1

Akkwist lokali — in-notifika tal-Ungerija u l-valutazzjoni mill-Kummissjoni

(154)

Għalhekk, il-Kummissjoni rriflettiet il-bidliet ta’ hawn fuq fil-kalkoli tal-VPN ipprovduti mill-Ungerija u Samsung SDI, filwaqt li żammet l-elementi l-oħra kollha tal-VPN li dwarhom il-Kummissjoni ma kienet esprimiet l-ebda dubju mhux mibdula. Notevolment, il-Kummissjoni żżomm is-suppożizzjonijiet tal-kostijiet ippreżentati mill-Ungerija fil-kalkoli inizjali tal-VPN fir-rigward tal-kostijiet tal-akkwist tal-makkinarju u t-tagħmir fil-Korea t’Isfel (kif spjegat fil-premessi (43) tad-deċiżjoni tal-ftuħ u kif irreġistrat fil-premessa (69) hawn fuq), jiġifieri taċċetta li, minbarra l-kostijiet addizzjonali miġbura fil-qosor fit-Tabella 1, il-kostijiet tal-makkinarju u t-tagħmir kienu kważi l-istess bejn il-Korea t’Isfel u l-Ungerija). B’konsegwenza tal-bidliet imsemmija fil-premessi preċedenti, id-diskrepanza tal-NPV bejn iż-żewġ postijiet titnaqqas minn EUR 173 miljun għal EUR 89,6 miljun (fil-valuri preżenti).

(155)

Fin-notifika tagħha, l-Ungerija kkonfermat li l-ebda offerta ta’ għotja ma kienet saret formalment mill-awtoritajiet Ċiniżi għal investiment f’Xi’an (il-premessa (13) tad-deċiżjoni ta’ estensjoni). Madankollu, bi tweġiba għad-deċiżjoni tal-ftuħ, l-Ungerija tbiegħdet mid-dikjarazzjonijiet li jinsabu fin-notifika, li hija ddikjarat li kien fihom żbalji kbar, nuqqas ta’ ftehim u informazzjoni żbaljata (il-premessa (14) tad-deċiżjoni ta’ estensjoni), u argumentat li l-Grupp Samsung SDI kellu diskussjonijiet mal-awtoritajiet lokali Ċiniżi u li l-possibbiltà li l-għoti ta’ din l-għajnuna jimmaterjalizza kienet realistika.

(156)

Fid-deċiżjoni ta’ estensjoni, il-Kummissjoni esprimiet dubji kemm dwar l-eżistenza ta’ offerta ta’ għajnuna mill-awtoritajiet lokali Ċiniżi għall-proġett inkwistjoni (ara l-premessi 48–50 u 59–61 ta’ dik id-deċiżjoni) kif ukoll dwar jekk din l-għajnuna kinitx ġiet ikkunsidrata fiż-żmien tad-deċiżjoni dwar il-post (ara l-premessi (51) u (57) ta’ dik id-deċiżjoni).

(157)

Bi tweġiba għad-deċiżjoni ta’ estensjoni, l-Ungerija u Samsung SDI oġġezzjonaw għaż-żewġ punti ta’ tħassib li tqajmu mill-Kummissjoni.

(158)

Kif imsemmi fil-premessa (113) hawn fuq, xenarju kontrofattwali jkun kredibbli jekk ikun ġenwin u jkun relatat mal-fatturi tat-teħid ta’ deċiżjonijiet prevalenti fiż-żmien tad-deċiżjoni dwar il-post. Fil-każ preżenti, indipendentement minn jekk l-awtoritajiet lokali Ċiniżi kinux tabilħaqq ipprovdew offerta ta’ sussidju għall-investiment f’Xi’an, il-Kummissjoni tqis li evidenza kontemporanja għat-teħid ta’ deċiżjonijiet ma tappoġġjax l-affermazzjoni tal-Ungerija li din l-offerta ġiet ikkunsidrata f’dak il-proċess tat-teħid ta’ deċiżjonijiet fiż-żmien meta l-benefiċjarju adotta d-deċiżjoni tiegħu dwar il-post tal-investiment.

(159)

Tabilħaqq, kif innutat fil-premessa (51) tad-deċiżjoni ta’ estensjoni, il-Kummissjoni sabet li l-offerta ta’ għotja ta’ għajnuna Ċiniża ssemmiet biss fir-rapport intern tal-21 ta’ Settembru 2017. Madankollu, il-Kummissjoni nnutat li l-offerta ta’ għotja mill-awtoritajiet Ċiniżi qatt ma kienet fil-fatt inkluża fit-tqabbil tal-NPV bejn ix-xenarji ta’ investiment alternattivi. L-Ungerija u Samsung SDI, madankollu, oġġezzjonaw li fil-proċess tat-teħid ta’ deċiżjonijiet tal-benefiċjarju, il-livell ta’ għajnuna li tista’ tingħata (f’dan il-każ, jew miċ-Ċina jew mill-Ungerija) mhuwiex inkluż fil-kalkoli tal-NPV, iżda ġie kkunsidrat fi stadju sussegwenti.

(160)

Il-Kummissjoni tinnota li la s-sussidju potenzjali miċ-Ċina u lanqas l-għajnuna mill-Ungerija ma ġew inklużi fil-kalkoli tal-NPV fl-ewwel stadju ta’ tqabbil tal-proċess tat-teħid ta’ deċiżjonijiet tal-benefiċjarju. Dan jintwera mir-rapport intern tal-21 ta’ Settembru 2017: iż-żewġ slajds 8 u 9, li huma relatati ma’ ħarsa ġenerali kwantifikata, rispettivament, tal-post ta’ Xi’an u l-post ta’ Göd, jindikaw li l-ħarsa ġenerali ma tinkludix appoġġ potenzjali mill-awtoritajiet Ċiniżi lokali jew mill-awtoritajiet Ungeriżi. Madankollu, jibqa’ l-fatt li, fl-istadji li jmiss tal-proċess tat-teħid ta’ deċiżjonijiet ta’ Samsung SDI (l-istadji 4 u 5 deskritti fil-premessi (68) u (69) tad-deċiżjoni tal-ftuħ), l-offerta ta’ għajnuna ddikjarata mill-awtoritajiet Ċiniżi ma ġietx ikkunsidrata la fit-tqabbil taż-żewġ siti u lanqas fid-deċiżjoni finali dwar il-post u ma dehritx fid-dokumenti ta’ sostenn. Konsegwentement, l-Ungerija u Samsung SDI ma pprovdewx evidenza li turi li din l-offerta mill-awtoritajiet Ċiniżi tqieset fid-deċiżjoni dwar il-post.

(161)

B’kuntrast ma’ dan, kif jirriżulta mid-dokumenti interni tal-kumpanija ta’ Samsung SDI (63), l-offerta ta’ għajnuna mill-awtoritajiet Ungeriżi tqieset fl-istadji 4 u 5 tal-proċess tat-teħid ta’ deċiżjonijiet, jiġifieri ġiet inkluża fit-tqabbil finali (dokument intern tas-26 ta’ Ottubru 2017) u ġiet ippreżentata bħala fattur ewlieni li jiġġustifika d-deċiżjoni ta’ investiment f’Göd (fis-27 ta’ Novembru 2017) (ara l-premessa (59)).

(162)

Bħala konklużjoni, il-Kummissjoni tqis li l-Ungerija u Samsung SDI ma wrewx li l-offerta ta’ għotja mill-awtoritajiet Ċiniżi, jekk kien hemm, kienet tqieset bħala fattur prevalenti mid-deċiżuri u ġiet ikkunsidrata fiż-żmien tad-deċiżjoni dwar il-post. Għalhekk, l-offerta ta’ għajnuna mill-awtoritajiet Ċiniżi lokali ma tistax titqies bħala element kredibbli u realistiku tax-xenarju kontrofattwali.

(163)

Fit-tweġibiet tagħhom għad-deċiżjoni tal-ftuħ, l-Ungerija u Samsung SDI introduċew ukoll pretensjoni ġdida, li skontha l-Grupp Samsung SDI seta’ bbenefika minn rata mnaqqsa ta’ taxxa korporattiva fuq l-introjtu fiċ-Ċina li kieku l-investiment tiegħu kien jinsab f’Xi’an, fuq il-bażi tal-politiki Ċiniżi għar-reġjuni tal-Punent taċ-Ċina, jew inkella abbażi tal-possibbiltà li l-Grupp Samsung SDI seta’ bbenefika mir-reġim tal-HNTE (64) (il-premessi minn (24) sa (29) u minn (58) sa (62) tad-deċiżjoni ta’ estensjoni).

(164)

Fid-deċiżjoni ta’ estensjoni, il-Kummissjoni esprimiet dubji dwar il-kredibbiltà ta’ dan it-tnaqqis fit-taxxa (minħabba li, minn naħa, fl-2017 il-benefiċċji ta’ dan it-tnaqqis ġew irtirati b’mod mhux mistenni mill-industrija tal-batteriji għall-vetturi elettriċi fiċ-Ċina u, min-naħa l-oħra, Samsung SDI ma dehritx li qed tissodisfa l-kriterji tar-reġim tal-HNTE) u jekk din ir-rata mnaqqsa kinitx fil-fatt tqieset minn Samsung SDI fiż-żmien tad-deċiżjoni dwar il-post.

(165)

Indipendentement mill-affermazzjoni li l-Grupp Samsung SDI seta’ jassumi b’mod kredibbli li rata mnaqqsa ta’ taxxa korporattiva fuq l-introjtu kienet tkun disponibbli għalih għall-investiment tiegħu f’Xi’an, il-Kummissjoni tqis li l-ebda evidenza fil-fajl tal-każ ma tappoġġja l-affermazzjoni li l-Grupp Samsung SDI qies dan it-tnaqqis fid-deċiżjoni tiegħu dwar il-post. Bħal fil-każ tal-offerta ta’ għotja mill-awtoritajiet lokali Ċiniżi, fl-istadji finali tal-proċess tat-teħid ta’ deċiżjonijiet tal-Grupp Samsung SDI, it-tnaqqis iddikjarat tar-rata ta’ taxxa korporattiva fuq l-introjtu ma kienx ikkunsidrat la fit-tqabbil taż-żewġ siti u lanqas fid-deċiżjoni finali dwar il-post. L-Ungerija u Samsung SDI ma pprovdew l-ebda evidenza li turi li dan it-tnaqqis tqies fid-deċiżjoni dwar il-post.

(166)

B’kuntrast ma’ dan, id-dokumenti interni msemmija fil-premessa (161) juru li l-offerta ta’ għajnuna mill-awtoritajiet Ungeriżi tqieset fl-istadji 4 u 5 tal-proċess tat-teħid ta’ deċiżjonijiet, jiġifieri ġiet inkluża fit-tqabbil finali (dokument intern tas-26 ta’ Ottubru 2017) u ġiet ippreżentata bħala fattur ewlieni li jiġġustifika d-deċiżjoni ta’ investiment f’Göd (fis-27 ta’ Novembru 2017).

(167)

Għalhekk, il-Kummissjoni tqis li l-Ungerija u Samsung SDI ma wrewx li t-tnaqqis iddikjarat fit-taxxa korporattiva fuq l-introjtu, jekk kien hemm, kien tqies bħala fattur prevalenti minn min jieħu d-deċiżjonijiet u li tqies fiż-żmien tad-deċiżjoni dwar il-post. Għalhekk, it-tnaqqis fit-taxxa korporattiva fuq l-introjtu ma jistax jitqies bħala element kredibbli u realistiku tax-xenarju kontrofattwali.

(168)

Wara l-adozzjoni tad-deċiżjoni tal-ftuħ, Samsung SDI (il-premessa (34) tad-deċiżjoni ta’ estensjoni) ippreżentat bosta approċċi alternattivi (approċċi probabilistiċi u diskreti, ara l-premessi (79) u (81) hawn fuq). L-approċċ diskret ifittex li jikkalkula mill-ġdid id-diskrepanza tal-NPV bejn iż-żewġ postijiet f’erba’ xenarji differenti (filwaqt li jikkunsidra miżura ta’ appoġġ waħda jew oħra ddikjarata mill-awtoritajiet Ċiniżi, u ishma ta’ akkwist lokali riveduti għaż-żewġ postijiet). Madankollu, kif ammettiet Samsung SDI stess (ara l-premessa (80) hawn fuq), dak l-approċċ ma jirriflettix b’mod preċiż il-proċess tat-teħid ta’ deċiżjonijiet li wassal għad-deċiżjoni dwar il-post. Barra minn hekk, kif innutat fil-premessi (162) u (167) hawn fuq, ma hemm l-ebda evidenza li xi waħda mill-miżuri ta’ appoġġ iddikjarati mill-awtoritajiet Ċiniżi ġiet ikkunsidrata fiż-żmien tad-deċiżjoni dwar il-post. Barra minn hekk, l-ebda wieħed mill-erba’ xenarji differenti ma kien jinkludi l-elementi kollha tal-kostijiet li ġew ivvalutati hawn fuq fit-Taqsima 5.3.1.2, li, fil-fehma tal-Kummissjoni, jaffettwaw il-punt sa fejn id-diskrepanza tal-NPV bejn iż-żewġ postijiet tista’ tinstab li hija kredibbli. Għalhekk, dak l-approċċ ma jistax jaffettwa l-konklużjonijiet tal-Kummissjoni rigward il-preżenza u l-firxa tal-effett ta’ inċentiv li l-għajnuna mill-awtoritajiet Ungeriżi kellha fuq min jieħu d-deċiżjonijiet fil-Grupp Samsung SDI. Fir-rigward tal-approċċi probabilistiċi, dawn ġew żviluppati minn Samsung SDI fuq il-bażi ta’ stima tal-probabbiltà tal-okkorrenza ta’ ċerti avvenimenti (akkwist lokali fiċ-Ċina, għotja mill-awtoritajiet Ċiniżi, rata tas-CIT imnaqqsa fiċ-Ċina) għall-kalkolu mill-ġdid tad-diskrepanza tal-NPV. It-tliet approċċi probabilistiċi kollha rriżultaw f’diskrepanza tal-NPV ikkalkulata mill-ġdid simili għal dik oriġinarjament ippreżentata mill-Ungerija.

(169)

Il-Kummissjoni nnutat fid-deċiżjoni ta’ estensjoni li Samsung SDI ma pprovdiet l-ebda dokument intern kontemporanju li jkun jappoġġja l-affermazzjoni li dan l-approċċ ta’ ponderazzjoni tal-probabbiltà tqies fiż-żmien tad-deċiżjoni dwar il-post, aħseb u ara li l-valuri differenti ta’ dawn il-fatturi ta’ probabbiltà kienu ġew ikkunsidrati f’dak il-proċess tat-teħid ta’ deċiżjonijiet.

(170)

Sabiex turi li l-approċċ probabilistiku kellu appoġġ f’dokumenti kontemporanji, l-Ungerija, fil-kummenti tagħha għad-deċiżjoni ta’ estensjoni, argumentat li kienet diġà ppreżentat dokumenti kontemporanji biex turi li dawk li jieħdu d-deċiżjonijiet ta’ Samsung SDI kienu konxji mill-offerta ta’ sussidju mill-awtoritajiet Ċiniżi, kif ukoll mir-rata tas-CIT imnaqqsa, potenzjalment disponibbli fiċ-Ċina. Madankollu, l-għarfien ta’ dawk il-possibbiltajiet ma jfissirx li dawk li jieħdu d-deċiżjonijiet effettivament qisuhom meta ħadu d-deċiżjoni dwar il-post, aħseb u ara li assenjaw probabbiltajiet speċifiċi għal dawn l-elementi. L-Ungerija rreferiet ukoll għar-rapport intern tal-21 ta’ Settembru 2017. Dak id-dokument (li jsemmi kriterju li jirrigwarda l-“konsistenza fit-taxxi u l-politiki” u l-livelli differenti possibbli ta’ għotja mill-awtoritajiet Ċiniżi), madankollu, ma jagħtix prova li d-deċiżjoni ta’ investiment meħuda fis-27 ta’ Novembru 2017 kienet ibbażata fuq approċċ probabilistiku. Barra minn hekk, ir-rapport intern tal-21 ta’ Settembru 2017 ma jsemmi l-ebda probabbiltà fir-rigward ta’ xi wieħed mill-fatturi li għalihom Samsung SDI u l-Ungerija jissuġġerixxu ex post li jiġi applikat l-approċċ probabilistiku.

(171)

Matul l-istadji multipli tal-investigazzjoni tal-Kummissjoni, l-Ungerija u Samsung SDI għaldaqstant ma pprovdewx evidenza kontemporanja għall-proċess tat-teħid ta’ deċiżjonijiet li dan l-approċċ probabilistiku kien tqies fiż-żmien tad-deċiżjoni dwar il-post. Anzi, jidher li l-approċċ probabilistiku ġie żviluppat l-ewwel minn Samsung SDI fil-kummenti tagħha għad-deċiżjoni tal-ftuħ (il-premessa (78)).

(172)

Għalhekk, il-Kummissjoni tqis li l-Ungerija ma setgħetx tagħti prova li approċċ probabilistiku qatt tqies minn Samsung SDI matul il-proċess tat-teħid ta’ deċiżjonijiet dwar il-post tal-investiment. Għalhekk, dan l-approċċ probabilistiku ma jistax jitqies bħala element kredibbli u realistiku li jiġi kkunsidrat fit-tqabbil taż-żewġ postijiet għall-investiment.

(173)

Għalhekk, il-Kummissjoni tikkonkludi li l-Ungerija tat prova li l-miżura ta’ għajnuna kellha effetti ta’ inċentiv formali u sostantivi. Madankollu, fir-rigward ta’ dawn tal-aħħar, il-Kummissjoni tqis li l-Ungerija ma wrietx li s-suppożizzjoni li fi kwalunkwe wieħed mill-postijiet meqjusa, tinkiseb rata ta’ akkwist lokali ta’ 100 %, kienet kredibbli u realistika fiż-żmien tad-deċiżjoni dwar il-post. Fil-fehma tal-Kummissjoni, sehem aktar baxx biss ta’ akkwist lokali fiż-żewġ xenarji jista’ jitqies bħala li huwa kredibbli u realistiku, fid-dawl tal-elementi disponibbli għal min ħa d-deċiżjonijiet tal-Grupp Samsung SDI fiż-żmien meta għażlu l-post għall-investiment. Il-Kummissjoni tikkonkludi wkoll li l-Ungerija ma stabbilietx la li l-għajnuna mill-awtoritajiet Ċiniżi u lanqas il-possibbiltà li l-investiment jibbenefika minn rata mnaqqsa tas-CIT, anke jekk dawn l-elementi jistgħu jitqiesu bħala li huma kredibbli, ġew ikkunsidrati mill-Grupp Samsung SDI meta ttieħdet id-deċiżjoni dwar il-post. Fid-dawl ta’ dawn l-elementi, il-Kummissjoni tikkonkludi li l-Investiment 2 f’Göd iġarrab żvantaġġ tal-kostijiet meta mqabbel ma’ investiment fil-post alternattiv fiċ-Ċina, u għalhekk il-miżura ta’ għajnuna tista’ titqies li topera bħala inċentiv, fis-sens li, fin-nuqqas tal-miżura ta’ għajnuna, ma kienx ikun profittabbli biżżejjed għall-benefiċjarju li jagħmel dak l-investiment f’Göd. Madankollu, il-miżura ta’ għajnuna tista’ titqies biss li għandha effett ta’ inċentiv sal-punt li l-ammont tal-għajnuna ma jkunx jaqbeż l-iżvantaġġ tal-post ta’ Göd f’termini ta’ NPV, meta mqabbel mal-post kontrofattwali, eżaminat fil-kuntest li fih il-benefiċjarju ddeċieda dwar il-post tal-investiment. Il-Kummissjoni stabbiliet li din id-diskrepanza tal-NPV ma tistax tiġi kkwantifikata b’mod kredibbli għal EUR 173 miljun, kif iddikjarat mill-Ungerija fin-notifika tagħha, iżda sabitha kredibbli sal-ammont ta’ EUR 89,6 miljun. Kwalunkwe għajnuna ’l fuq minn dak l-ammont ma jkollhiex effett ta’ inċentiv għall-parti li taqbeż dak l-iżvantaġġ tal-kostijiet.

(174)

Skont it-Taqsima 3.3 tal-RAG, sabiex jiġi vvalutat jekk l-għajnuna mill-Istat hijiex meħtieġa biex jintlaħaq l-objettiv ta’ interess komuni, jeħtieġ li l-ewwel issir djanjosi tal-problema li għandha tiġi indirizzata. L-għajnuna mill-Istat jenħtieġ li tkun immirata lejn sitwazzjonijiet fejn l-għajnuna tista’ twassal għal titjib materjali li s-suq ma jistax jikseb hu stess.

(175)

Kif stabbilit fil-paragrafu 49 tal-RAG, l-intervent mill-Istat huwa meqjus li huwa ġustifikat għall-iżvilupp taż-żoni inklużi fil-mappa tal-għajnuna reġjonali. F’konformità mal-mappa tal-għajnuna reġjonali tal-Ungerija għall-perjodu 2017-2021 (ara l-premessa (10)), li kienet prevalenti fiż-żmien meta ngħatat il-miżura ta’ għajnuna (soġġetta biss għall-approvazzjoni mill-Kummissjoni) (il-premessa (30)), Göd kien eliġibbli għall-għajnuna reġjonali skont l-Artikolu 107(3), il-punt (c) tat-TFUE, li huwa f’konformità mat-Taqsima 3.3. tal-RAG. Għaldaqstant, il-Kummissjoni tikkonferma l-valutazzjoni tagħha li l-Ungerija wriet il-ħtieġa għal intervent mill-Istat f’dan il-każ.

(176)

Kif imfakkar fid-deċiżjoni tal-ftuħ, skont il-paragrafu 50 tal-RAG, il-miżura ta’ għajnuna notifikata trid tkun strument ta’ politika xieraq biex jiġi indirizzat l-objettiv ta’ politika kkonċernat. L-RAG jenfasizzaw li miżura ta’ għajnuna ma titqiesx li hija kompatibbli jekk ikunu disponibbli strumenti ta’ politika oħra b’inqas distorsjoni jew tipi oħra ta’ strumenti ta’ għajnuna b’inqas distorsjoni. It-Taqsima 3.4 tal-RAG għalhekk tintroduċi test tal-adegwatezza fuq żewġ livelli. Skont l-ewwel test tal-adegwatezza, l-Istati Membri jridu jidentifikaw l-ostakli għall-iżvilupp reġjonali u l-iżvantaġġi speċifiċi ta’ ditti li joperaw fir-reġjun fil-mira, u jikkjarifikaw sa liema punt l-ostakli għall-iżvilupp reġjonali setgħu wkoll ikunu fil-mira ta’ miżuri mhux ta’ għajnuna. Skont it-tieni test tal-adegwatezza, l-Istat Membru għandu jindika għaliex, fid-dawl tal-merti individwali tal-każ, il-forma magħżula ta’ għajnuna għall-investiment reġjonali hija l-aħjar strument biex jinfluwenza l-investiment jew id-deċiżjoni lokali.

(177)

Fir-rigward tal-ewwel livell tat-test, fid-deċiżjoni tal-ftuħ il-Kummissjoni aċċettat li l-għajnuna mill-Istat, u l-għajnuna għall-investiment reġjonali b’mod partikolari, huma forma xierqa ta’ appoġġ biex jintlaħaq l-objettiv ta’ koeżjoni għaż-żona ta’ Göd, żona eliġibbli għall-għajnuna reġjonali f’konformità mal-Artikolu 107(3), il-punt (c) tat-TFUE. Fin-nuqqas ta’ kwalunkwe evidenza kuntrarja fil-fajl, din is-sejba tibqa’ valida.

(178)

Fir-rigward tat-tieni livell tat-test, il-Kummissjoni aċċettat ukoll li għotja diretta tikkostitwixxi fil-prinċipju strument ta’ għajnuna xieraq biex titnaqqas id-diskrepanza fil-vijabbiltà (ara l-premessi (113) u (114) tad-deċiżjoni tal-ftuħ). Il-Kummissjoni, madankollu, esprimiet dubji dwar ir-realtà u l-firxa tad-diskrepanza fil-vijabbiltà u tal-kontribuzzjoni għall-iżvilupp reġjonali. Fid-dawl tal-konklużjonijiet tal-Kummissjoni dwar ir-realtà u l-firxa tad-diskrepanza fil-vijabbiltà u dwar il-kontribuzzjoni tal-miżura ta’ għajnuna għall-iżvilupp reġjonali, il-Kummissjoni tqis li l-għotja diretta lil Samsung SDI, jekk tkun limitata għall-ammont tad-diskrepanza fil-vijabbiltà msemmija fil-premessa (173), hija strument ta’ għajnuna xieraq f’dan il-każ.

(179)

Għalhekk, il-Kummissjoni tikkonkludi li l-miżura ta’ għajnuna għall-investiment reġjonali pprovduta fil-forma ta’ għotja diretta (sad-diskrepanza reali fil-vijabbiltà) tirrappreżenta forma xierqa ta’ appoġġ biex jintlaħaq l-objettiv ta’ żvilupp reġjonali taż-żona kkonċernata.

(180)

Skont it-Taqsima 3.6 tal-RAG, l-għajnuna reġjonali trid tkun limitata għall-minimu meħtieġ biex jitħeġġeġ investiment jew attività addizzjonali fiż-żona kkonċernata. Għalhekk, il-valutazzjoni tal-proporzjonalità tal-ammont tal-għajnuna tista’ titwettaq biss ladarba jiġi kkonfermat l-effett ta’ inċentiv tal-għajnuna. L-analiżi tal-proporzjonalità tal-għajnuna reġjonali għal investiment partikolari trid issir fid-data tad-deċiżjoni ta’ investiment, jiġifieri fil-kuntest li fih l-impriża li tirċievi l-għajnuna tiddeċiedi dwar il-post tal-proġett tagħha (65).

(181)

Il-valutazzjoni tal-proporzjonalità tal-għajnuna hija soġġetta għal test doppju. L-ewwel nett, bħala regola ġenerali, l-għajnuna individwali notifikata titqies li tkun limitata għall-minimu, jekk l-ammont tal-għajnuna jikkorrispondi għall-kostijiet żejda netti tal-implimentazzjoni tal-investiment fiż-żona kkonċernata, meta mqabbel max-xenarju kontrofattwali fin-nuqqas ta’ għajnuna. Skont il-paragrafu 80 tal-RAG, fis-sitwazzjonijiet tax-xenarju 2, l-ammont tal-għajnuna jenħtieġ li ma jaqbiżx id-differenza bejn l-NPV tal-investiment fil-post alternattiv u l-NPV fiż-żona fil-mira, filwaqt li jiġu kkunsidrati l-kostijiet u l-benefiċċji rilevanti kollha. It-tieni, l-għajnuna biex tikkumpensa d-differenza tal-NPV ma tridx taqbeż l-ammont massimu ta’ għajnuna li tista’ tingħata skont il-limitu massimu ta’ għajnuna reġjonali applikabbli għar-reġjun fil-mira għal proġett ta’ investiment tad-daqs partikolari (filwaqt li jiġu kkunsidrati r-regoli dwar it-tnaqqis stabbiliti fil-paragrafi 86 u 20(c) tal-RAG).

(182)

L-ewwel nett, fid-deċiżjoni tal-ftuħ tagħha, il-Kummissjoni esprimiet dubji dwar il-proporzjonalità tal-għajnuna, meta wieħed iqis id-dubji rigward il-kalkoli tad-diskrepanza fil-vijabbiltà li ġew ippreżentati mill-Ungerija fin-notifika tagħha. Tabilħaqq, il-Kummissjoni qajmet dubji dwar il-kredibbiltà tal-informazzjoni ppreżentata mill-Ungerija u b’mod preliminari qieset li d-diskrepanza tal-NPV bejn iż-żewġ postijiet ta’ investiment alternattivi ma kinitx realistika (ara l-premessa (148) tad-deċiżjoni tal-ftuħ).

(183)

Fid-deċiżjoni ta’ estensjoni, il-Kummissjoni esprimiet aktar dubji dwar ir-realtà u l-kredibbiltà tal-kalkolu tad-diskrepanza tal-NPV li ġie ppreżentat mill-Ungerija.

(184)

Meta vvalutat l-effett ta’ inċentiv (it-Taqsima 5.3.1.2.5 hawn fuq), il-Kummissjoni kkonkludiet li d-diskrepanza tal-NPV kif notifikata mill-Ungerija mhijiex ibbażata fuq informazzjoni kredibbli u ma tidhirx li hija realistika. Għar-raġunijiet dettaljati f’dik it-taqsima, il-Kummissjoni kkonkludiet li investiment f’Göd ma jġarrabx żvantaġġ tal-kostijiet meta mqabbel ma’ investiment fil-post alternattiv fiċ-Ċina ta’ EUR 173 miljun, kif iddikjarat mill-Ungerija fin-notifika tagħha, iżda pjuttost ta’ EUR 89,6 miljun. F’dan ir-rigward, l-ammont tal-għajnuna notifikata ta’ EUR 108 miljun huwa sproporzjonat. Biex jibqa’ proporzjonat għad-diskrepanza tal-NPV, l-ammont tal-għajnuna għalhekk ma għandux jaqbeż EUR 89,6 miljun.

(185)

It-tieni, fir-rigward tar-rekwiżit tal-intensità tal-għajnuna, il-Kummissjoni fakkret fid-deċiżjoni tal-ftuħ tagħha li l-limitu massimu tal-għajnuna reġjonali applikabbli fiż-żona ta’ Göd huwa ta’ 35 %. Hija fakkret ukoll li l-intensità tal-għajnuna massima għal proġetti kbar ta’ investiment trid titnaqqas bl-użu tal-mekkaniżmu stabbilit fil-paragrafu 20(c) tal-RAG, li abbażi tiegħu l-intensità massima permissibbli tal-għajnuna tilħaq it–13,11 % tal-ekwivalenti ta’ għotja gross (gross grant equivalent, GGE) għall-miżura ta’ għajnuna. Fuq dik il-bażi, il-Kummissjoni kkonkludiet li l-għajnuna notifikata ta’ EUR 108 miljun meta mqabbla man-nefqa eliġibbli totali ppjanata fil-valur preżenti għall-miżura ta’ għajnuna ta’ madwar HUF 376,540 biljun (madwar EUR 1 187 miljun) kienet tikkorrispondi għal intensità tal-għajnuna ta’ 9,11 %, li għalhekk ma kinitx ogħla mil-limiti massimi tal-għajnuna reġjonali kkoreġuti bil-mekkaniżmu ta’ tnaqqis. Meta wieħed iqis li n-nefqa eliġibbli totali ppjanata żdiedet meta mqabbla maċ-ċifri notifikati, u l-ammont tal-għajnuna meqjus kompatibbli f’din id-Deċiżjoni jitnaqqas għal EUR 89,6 miljun, l-intensità tal-għajnuna riżultanti hija inqas minn 9,11 % u għalhekk tibqa’ taħt il-limiti massimi tal-għajnuna reġjonali.

(186)

Fl-aħħar nett, il-konklużjoni tal-Kummissjoni rigward il-konformità mal-kriterji għall-eliġibbiltà tal-kostijiet stabbiliti fl-RAG, kif deskritta fil-premessi (155) u (156) tad-deċiżjoni tal-ftuħ (66), tibqa’ valida.

(187)

Abbażi ta’ dan ta’ hawn fuq, il-Kummissjoni tikkonkludi li l-miżura ta’ għajnuna hija proporzjonata, iżda unikament sal-punt li ma tkunx taqbeż id-diskrepanza tal-NPV stabbilita mill-Kummissjoni fl-ammont ta’ EUR 89,6 miljun.

(188)

Il-Kummissjoni kompliet tanalizza jekk l-għajnuna għandhiex effetti negattivi manifesti żejda fuq il-kompetizzjoni u l-kummerċ.

(189)

It-Taqsima 3.7.2 tal-RAG telenka sensiela ta’ sitwazzjonijiet fejn l-effetti negattivi fuq il-kummerċ u/jew il-kompetizzjoni jegħlbu manifestament kwalunkwe effett pożittiv li miżura ta’ għajnuna reġjonali jista’ jkollha.

(190)

Skont il-paragrafu 119 tal-RAG, effett negattiv manifest ikun jeżisti meta l-ammont tal-għajnuna propost jaqbeż, meta mqabbel man-nefqa eliġibbli (standardizzata) ta’ investiment, il-limitu massimu aġġustat tal-intensità tal-għajnuna li japplika għal proġett ta’ daqs partikolari.

(191)

Fid-deċiżjoni tal-ftuħ, il-Kummissjoni nnutat li l-kostijiet eliġibbli ġew stabbiliti f’konformità mal-RAG (il-premessa (153) tad-deċiżjoni tal-ftuħ). Fin-nuqqas ta’ kwalunkwe evidenza kuntrarja, din il-konklużjoni tibqa’ valida. Il-Kummissjoni sostniet ukoll li l-intensitajiet tal-għajnuna massimi ma nqabżux (il-premessa (157) tad-deċiżjoni tal-ftuħ). Kif imsemmi fil-premessa (185) hawn fuq, din il-konklużjoni tibqa’ a fortiori valida b’kostijiet eliġibbli ogħla u ammont tal-għajnuna stabbilit għal EUR 89,6 miljun, livell aktar baxx mill-ammont notifikat.

(192)

Skont il-paragrafu 120 tal-RAG, effett negattiv manifest jinħoloq ukoll meta l-għajnuna għall-investiment toħloq kapaċità f’suq li sejjer lura b’mod assolut, peress li din l-għajnuna x’aktarx li teskludi lill-kompetituri, jew tipprevjeni li ditti b’kostijiet baxxi jidħlu, u tirriskja li ddgħajjef l-inċentivi għall-kompetituri biex jinnovaw. Dan jirriżulta fi strutturi tas-suq ineffiċjenti, li huma wkoll ta’ ħsara għall-konsumaturi fit-tul.

(193)

Meta jitqies is-suq li mistenni jikber taċ-ċelluli tal-batteriji (kif ukoll il-moduli tal-batteriji u l-pakketti tal-batteriji), kemm fil-livell taż-ŻEE kif ukoll f’dak globali, notevolment appoġġjat minn evidenza pprovduta mill-Ungerija (il-premessa (172) tad-deċiżjoni tal-ftuħ), il-Kummissjoni tqis li, indipendentement mid-definizzjoni eżatta tal-prodott u tas-suq ġeografiku, il-miżura ta’ għajnuna x’aktarx li ma tirriżultax f’kapaċità żejda f’suq li sejjer lura. Barra minn hekk, fi kwalunkwe każ, minħabba li, irrispettivament mill-post tal-impjant (Göd jew Xi’an), dik il-faċilità ta’ produzzjoni kienet taqdi l-istess klijenti fl-istess żoni ġeografiċi (ara l-premessa (88)), l-għajnuna mhix kawżali għaż-żieda fil-provvista fis-suq (irrispettivament mid-definizzjoni ġeografika jew tal-prodott). F’konformità mal-konklużjoni tagħha fid-deċiżjoni tal-ftuħ, il-Kummissjoni għalhekk tqis li l-miżura ta’ għajnuna tikkonforma mal-paragrafu 120 tal-RAG.

(194)

Il-paragrafu 121 tal-RAG jipprojbixxi reġjun fiż-ŻEE b’vijabbiltà aktar baxxa speċifika għall-proġett milli jipparteċipa f’“tlielaq għas-sussidji” għad-detriment ta’ reġjuni daqstant dgħajfa jew agħar. (67)

(195)

Għalkemm inizjalment ma esprimiet l-ebda dubju f’dak ir-rigward fid-deċiżjoni tal-ftuħ, il-Kummissjoni ma eskludietx ir-riskju ta’ effetti kontra l-koeżjoni fid-deċiżjoni ta’ estensjoni, abbażi ta’ evidenza ġdida ppreżentata mill-Ungerija u minn Samsung SDI (ara l-premessa (72) ta’ dik id-deċiżjoni). Tabilħaqq, filwaqt li fil-fażi inizjali tal-investigazzjoni l-Ungerija kienet irreferiet biss għal post alternattiv wieħed barra miż-ŻEE (iċ-Ċina), deher ċar minn dik l-evidenza ġdida li postijiet potenzjali oħra fiż-ŻEE (il-Polonja, is-Slovakkja u r-Repubblika Ċeka) kienu wkoll tqiesu mill-Grupp Samsung SDI bħala postijiet potenzjali għall-investiment. Fil-premessa (68) tad-deċiżjoni ta’ estensjoni, il-Kummissjoni aċċettat li s-siti ta’ żoni ġodda Ċeki u Slovakki kienu ġew esklużi mill-Grupp Samsung SDI fi stadju aktar bikri tal-proċess tal-għażla, il-Kummissjoni ma setgħetx teskludi l-possibbiltà li l-għajnuna għas-sit Ungeriż f’Göd, eliġibbli għall-għajnuna reġjonali skont l-Artikolu 107(3), il-punt (c) tat-TFUE, seta’ kellha effett kontra l-koeżjoni billi tattira investiment lil hinn minn reġjun Pollakk inqas żviluppat, eliġibbli għall-għajnuna reġjonali skont l-Artikolu 107(3), il-punt (a) tat-TFUE.

(196)

Abbażi tal-argumenti pprovduti mill-Ungerija u Samsung SDI bi tweġiba għad-deċiżjoni ta’ estensjoni u fuq l-evidenza fil-fajl, il-Kummissjoni tikkonkludi li s-sit Pollakk alternattiv possibbli ġie eskluż mil-lista ta’ siti potenzjali pjuttost kmieni fil-proċess tal-għażla tal-Grupp Samsung SDI. Kif indikat fid-deċiżjoni ta’ estensjoni (il-premessa (69)), huwa ċar li l-post Pollakk ma ġiex ivvalutat taħt l-istadju li jmiss tal-proċess tal-għażla (“analiżi dettaljata tal-kandidati finali”) li jinvolvi simulazzjoni tal-profitt u t-telf, simulazzjoni tal-kronoloġija u l-potenzjal għall-espansjoni. Is-sit Pollakk, bħal siti alternattivi oħra, għadda biss minn valutazzjoni kwantitattiva u kwalitattiva preliminari. Is-sit Pollakk ikklassifika ferm taħt siti oħra fuq in-naħa kwantitattiva preliminari. Mid-dokument imsemmi mill-Kummissjoni fid-deċiżjoni ta’ estensjoni tagħha, jidher li ntgħażlu biss siti abbandunati, u li siti ta’ żoni ġodda bħas-sit Pollakk ġew esklużi (notevolment minħabba li kienu jirriżultaw f’xogħlijiet ta’ kostruzzjoni ħafna itwal). Għalhekk, kif jidher mir-rapport intern tal-21 ta’ Settembru 2017), żewġ siti biss tqiesu b’mod serju għall-istadju li jmiss u tqiesu fid-dettall, jiġifieri s-sit fil-mira f’Göd u s-sit Ċiniż f’Xi’an.

(197)

Fid-dawl ta’ dan, il-Kummissjoni tqis li, għall-kuntrarju tal-affermazzjonijiet li hija kienet qajmet fid-deċiżjoni ta’ estensjoni, l-għajnuna x’aktarx li ma jkollhiex effett kontra l-koeżjoni.

(198)

Skont il-paragrafu 122 tal-RAG, meta l-benefiċjarju jkollu pjanijiet konkreti biex jagħlaq jew effettivament jagħlaq l-istess attività jew waħda simili f’żona oħra fiż-ŻEE u jirriloka dik l-attività lejn iż-żona fil-mira, jekk ikun hemm rabta kawżali bejn l-għajnuna u r-rilokazzjoni, dan jikkostitwixxi effett negattiv li x’aktarx ma jiġix ikkumpensat minn xi elementi pożittivi.

(199)

L-Ungerija u l-benefiċjarju tal-għajnuna ddikjaraw (ara l-premessa (33) tad-deċiżjoni tal-ftuħ) li l-benefiċjarju, fil-livell tal-grupp, ma kienx għalaq l-istess attività jew waħda simili fiż-ŻEE fis-sentejn ta’ qabel l-applikazzjoni għall-għajnuna, u ma kellu l-ebda pjan konkret li jagħmel dan fi żmien sentejn wara l-ikkompletar tal-investiment.

(200)

Madankollu, il-Kummissjoni qajmet dubji f’dak ir-rigward, fid-dawl tar-rapporti tal-istampa li ssuġġerew li l-Grupp Samsung SDI kien qed jirriorganizza l-attivitajiet tiegħu fl-UE (il-premessa (179) tad-deċiżjoni tal-ftuħ). Din ir-riorganizzazzjoni tista’ twassal għar-rilokazzjoni tal-attivitajiet ta’ produzzjoni tal-pakketti tal-batteriji tas-sussidjarja tal-Grupp Samsung SDI li tinsab fl-Awstrija għall-Ungerija, u telf ta’ 100 impjieg fis-sussidjarja Awstrijaka.

(201)

Il-Kummissjoni ma setgħetx teskludi li l-għajnuna għal investiment fil-produzzjoni taċ-ċelluli tal-batteriji għall-vetturi elettriċi f’Göd ma kinitx, tal-inqas indirettament, kawżali għal kwalunkwe għeluq jew rilokazzjoni tal-istess attività jew waħda simili fiż-ŻEE.

(202)

Abbażi tas-sottomissjonijiet addizzjonali tal-Ungerija u ta’ Samsung SDI u tal-evidenza fil-fajl (il-premessa (90)), il-Kummissjoni tinnota li s-sit Awstrijak ma ngħalaqx skont it-tifsira tal-RAG. Sabiex tikkwalifika bħala għeluq għall-fini tal-paragrafu 122 tal-RAG, l-attività trid tkun għalqet kompletament jew inkella parzjalment meta dan jirriżulta f’telf sostanzjali ta’ impjiegi, jiġifieri telf ta’ mill-inqas 100 impjieg jew bħala tnaqqis fl-impjiegi ta’ mill-inqas 50 % tal-forza tax-xogħol fl-istabbiliment fid-data tal-applikazzjoni (meta mqabbel mal-impjieg medju fl-istabbiliment f’waħda mis-sentejn ta’ qabel id-data tal-applikazzjoni (il-“perjodu ta’ referenza”) (68). L-Ungerija pprovdiet evidenza li dawn il-kundizzjonijiet ma ġewx issodisfati fil-każ preżenti. It-telf skedat ta’ 140 impjegat b’livell aktar baxx ta’ edukazzjoni sal-2021, ikkumpensat parzjalment minn żieda fl-għadd ta’ ħaddiema b’livell ogħla ta’ edukazzjoni, kien mistenni li jnaqqas l-għadd totali ta’ impjegati għal għadd bejn it-397 u l-417, li għandu jitqabbel mal-impjieg medju ta’ 401–470 fil-perjodu ta’ referenza (bejn Ottubru 2015 u Settembru 2017). Għaldaqstant jintilfu inqas minn 100 impjieg. Barra minn hekk, minħabba l-forza tax-xogħol totali ta’ 401–470 fil-perjodu ta’ referenza, it-tnaqqis (gross) tal-forza tax-xogħol b’140 impjegat ikun taħt il-livell limitu ta’ 50 %.

(203)

Barra minn hekk, l-Ungerija spjegat li ma kien hemm l-ebda rilokazzjoni mill-Awstrija għall-Ungerija, peress li ċ-ċelluli tal-batteriji prodotti f’Göd huma teknoloġikament differenti miċ-ċelluli prodotti fl-impjant Awstrijak (ara l-premessa (90)).

(204)

Barra minn hekk, l-Ungerija pprovdiet dokumenti interni tal-kumpanija li juru li t-tnaqqis tal-attivitajiet fl-impjant Awstrijak ta’ Samsung SDI kien parti minn orjentazzjoni mill-ġdid ta’ dak l-istabbiliment (mill-produzzjoni tal-pakketti tal-batteriji għal attivitajiet ta’ riċerka u żvilupp, ta’ ttestjar u ta’ kontroll tal-kwalità) wara deċiżjoni mill-klijenti (ċerti manifatturi tal-karozzi) (mhux minn Samsung SDI) li juru diżinteress fil-prodotti li ġew prodotti fl-impjant Awstrijak. B’konsegwenza ta’ dan, il-Kummissjoni taċċetta li ma tistax tiġi stabbilita rabta kawżali bejn l-Investment 2 u r-riorganizzazzjoni tal-impjant Awstrijak tal-Grupp Samsung SDI.

(205)

Fid-dawl ta’ dawk l-elementi, il-Kummissjoni ma setgħetx tistabbilixxi li l-miżura ta’ għajnuna tkun kawżali għal kwalunkwe għeluq jew rilokazzjoni fiż-ŻEE.

(206)

Fid-dawl ta’ dan ta’ hawn fuq, il-Kummissjoni tikkonkludi li l-għajnuna ma għandha l-ebda effett manifestament negattiv fuq il-kompetizzjoni jew il-kummerċ skont it-tifsira tat-Taqsima 3.7.2 tal-RAG.

(207)

Minbarra t-Taqsima 3.7.2 tal-RAG, effetti negattivi bla bżonn fuq il-kompetizzjoni li għandhom jiġu kkunsidrati fil-bqija tat-test tal-ibbilanċjar jekk l-investiment isir f’kuntest tax-xenarju 2 f’żewġ swieq ġeografiċi distinti huma identifikati fil-paragrafi 114 u 115 u 132 tal-RAG. Dawn l-effetti jirrigwardaw il-ħolqien jew it-tisħiħ ta’ pożizzjoni dominanti fis-suq jew il-ħolqien jew it-tisħiħ ta’ kapaċitajiet żejda f’suq bi prestazzjoni baxxa (anki jekk dak is-suq ma jkunx sejjer lura b’mod assolut).

(208)

L-ewwel nett, l-investiment kien iwassal, bl-għajnuna jew mingħajrha, għall-istess volumi ta’ ċelluli tal-batteriji li ġew ikkonsenjati fis-suq taż-ŻEE u dak dinji (bħal jekk l-impjant kienx ikun jinsab f’Xi’an jew f’Göd, is-swieq tad-destinazzjoni mistennija huma l-istess, ara l-premessa (88)) sabiex l-għajnuna ma tkunx kawżali għal dawn l-effetti negattivi bla bżonn u mhuwiex meħtieġ li jitwettqu dawn it-testijiet addizzjonali.

(209)

Fi kwalunkwe każ, l-għajnuna mhux se toħloq jew issaħħaħ pożizzjoni dominanti fis-suq peress li l-ishma mis-suq ta’ Samsung SDI (meta jiġi kkunsidrat l-investiment inkwistjoni) kienu mistennija li jiżdiedu minn [7–10] % fl-2019 għal [20–25] % fl-2023 fil-livell Ewropew u minn [7–10] % fl-2019 għal [10–13,5] % fl-2023 fil-livell globali (ara l-premessa (25)). L-għajnuna lanqas mhi se toħloq kapaċitajiet żejda f’suq bi prestazzjoni baxxa peress li s-suq — madwar id-dinja u fil-livell taż-ŻEE — qed jikber (ara l-premessa (172) tad-deċiżjoni tal-ftuħ).

(210)

Billi tiskatta l-post tal-investiment f’reġjun megħjun, l-għajnuna tikkontribwixxi għall-iżvilupp reġjonali ta’ Göd, li jimplika sensiela ta’ effetti pożittivi għal dak ir-reġjun (ara t-Taqsima 5.3.1.1). Barra minn hekk, il-valutazzjoni stabbilita fit-taqsimiet preċedenti wriet li huwa meħtieġ intervent mill-Istat, li l-għajnuna hija xierqa u li l-għajnuna għandha effett ta’ inċentiv, sakemm ma tkunx taqbeż id-diskrepanza tal-NPV li tikkorrispondi għal ammont ta’ EUR 89,6 miljun. Il-Kummissjoni tikkonkludi wkoll li l-intervent mill-Istat huwa proporzjonat, sal-punt li jibqa’ limitat għal dik id-diskrepanza tal-NPV identifikata. Il-valutazzjoni wriet ukoll li, minkejja d-dubji li tqajmu inizjalment, l-għajnuna ma għandha l-ebda effett manifestament negattiv fuq il-kompetizzjoni u l-kummerċ. Barra minn hekk, fir-rigward ta’ effetti negattivi oħra fuq il-kompetizzjoni u l-kummerċ, l-għajnuna la toħloq jew issaħħaħ pożizzjoni dominanti fis-suq u lanqas kapaċitajiet żejda f’suq bi prestazzjoni baxxa.

(211)

Għalhekk, il-Kummissjoni tikkonkludi li l-effetti pożittivi tal-għajnuna fuq l-iżvilupp reġjonali, sal-punt li ma tkunx taqbeż EUR 89,6 miljun, jegħlbu kwalunkwe effett negattiv.

(212)

F’konformità mal-paragrafu II.2 tal-Komunikazzjoni tal-Kummissjoni dwar it-Trasparenza (69), l-Istati Membri jridu jiżguraw il-pubblikazzjoni fuq sit web komprensiv dwar l-għajnuna mill-Istat, fil-livell nazzjonali jew reġjonali, ta’ test sħiħ tal-iskema ta’ għajnuna approvata jew tad-deċiżjoni dwar l-għoti tal-għajnuna individwali u d-dispożizzjonijiet ta’ implimentazzjoni tagħha, jew link għaliha; l-identità tal-awtorità jew l-awtoritajiet li jagħtu l-għajnuna; l-identità tal-benefiċjarji individwali, il-forma u l-ammont tal-għajnuna mogħtija lil kull benefiċjarju, id-data tal-għotja, it-tip ta’ impriża (SME/kumpanija kbira), ir-reġjun li fih jinsab il-benefiċjarju (fil-livell II tan-NUTS) u s-settur ekonomiku prinċipali li fih il-benefiċjarju għandu l-attivitajiet tiegħu (fil-livell ta’ grupp tan-NACE (nomenklatura tal-attivitajiet ekonomiċi)). Din l-informazzjoni trid tiġi ppubblikata wara li tkun ittieħdet id-deċiżjoni li tingħata l-għajnuna, trid tinżamm għal mill-inqas 10 snin u trid tkun disponibbli għall-pubbliku ġenerali mingħajr restrizzjonijiet.

(213)

Il-Kummissjoni tinnota li l-Ungerija kkonfermat li r-rekwiżiti kollha dwar it-trasparenza stabbiliti fil-paragrafu II.2 tal-Komunikazzjoni dwar it-Trasparenza se jiġu rispettati (ara l-premessa (187) tad-deċiżjoni tal-ftuħ).

(214)

Min-notifika ma jirriżultax li l-għajnuna jew il-kundizzjonijiet marbuta magħha, jew l-attivitajiet ekonomiċi ffaċilitati mill-għajnuna, jistgħu jinvolvu ksur ta’ kwalunkwe dispożizzjoni rilevanti tad-dritt tal-UE. (70) B’mod partikolari, il-Kummissjoni ma bagħtitx opinjoni motivata lill-Ungerija dwar ksur possibbli tad-dritt tal-Unjoni li jkollu rabta ma’ dan il-każ. Barra minn hekk, il-Kummissjoni ma rċeviet l-ebda lment jew informazzjoni li setgħet tissuġġerixxi li l-għajnuna, il-kundizzjonijiet marbuta magħha jew l-attivitajiet ekonomiċi ffaċilitati minnha jistgħu jmorru kontra d-dispożizzjonijiet rilevanti tad-dritt tal-Unjoni.

(215)

Għalhekk, il-Kummissjoni tikkonkludi li l-miżura ta’ għajnuna, sal-punt fejn tibqa’ limitata għal ammont massimu ta’ EUR 89,6 miljun, hija kompatibbli mas-suq intern skont l-Artikolu 107(3), il-punt (c) tat-TFUE.

(216)

Għaldaqstant, il-Kummissjoni ddeċidiet li l-miżura ta’ għajnuna tkun kompatibbli mas-suq intern skont l-Artikolu 107(3), il-punt (c) tat-TFUE sal-punt li l-ammont tagħha ma jkunx jaqbeż EUR 89,6 miljun. L-għajnuna notifikata lil hinn minn dak l-ammont, sa EUR 108 miljun, hija inkompatibbli mas-suq intern.