REGOLAMENT TA’ IMPLIMENTAZZJONI TAL-KUMMISSJONI (UE) 2024/2044

tad-29 ta’ Lulju 2024

li jemenda r-Regolament ta’ Implimentazzjoni (UE) 2017/2470 fir-rigward tal-ispeċifikazzjonijiet u tal-kundizzjonijiet tal-użu tal-ikel il-ġdid il-bijomassa tal-ħmira tal-Yarrowia lipolytica

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2015/2283 tal-Parlament Ewropew u tal-Kunsill tal-25 ta’ Novembru 2015 dwar ikel ġdid, li jemenda r-Regolament (UE) Nru 1169/2011 tal-Parlament Ewropew u tal-Kunsill u li jħassar ir-Regolament (KE) Nru 258/97 tal-Parlament Ewropew u tal-Kunsill u r-Regolament tal-Kummissjoni (KE) Nru 1852/2001 (1), u b’mod partikolari l-Artikolu 12(1) tiegħu,

Billi:

(1)	Ir-Regolament (UE) 2015/2283 jipprevedi li l-ikel il-ġdid awtorizzat u inkluż fil-lista tal-Unjoni tal-ikel ġdid biss jista’ jiġi introdott fis-suq fl-Unjoni.

(2)	Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni tal-ikel ġdid.

(3)	Il-lista tal-Unjoni stabbilita fl-Anness tar-Regolament ta’ Implimentazzjoni (UE) 2017/2470 tinkludi l-bijomassa tal-ħmira tal-Yarrowia lipolytica bħala ikel ġdid awtorizzat.

(4)

Ir-Regolament ta’ Implimentazzjoni tal-Kummissjoni (UE) 2019/760 (3) awtorizza l-introduzzjoni fis-suq tal-bijomassa tal-ħmira tal-Yarrowia lipolytica bħala ikel ġdid biex jintuża fis-supplimenti tal-ikel kif iddefinit fid-Direttiva 2002/46/KE tal-Parlament Ewropew u tal-Kunsill (4), minbarra fis-supplimenti tal-ikel għat-trabi u għat-tfal żgħar.

(5)

Ir-Regolament ta’ Implimentazzjoni tal-Kummissjoni (UE) 2023/938 (5) awtorizza l-bidla tal-kundizzjonijiet tal-użu tal-ikel il-ġdid il-bijomassa tal-ħmira tal-Yarrowia lipolytica, b’mod partikolari l-estensjoni tal-użu tal-ikel il-ġdid għas-sostituti tal-ikliet għall-kontroll tal-piż maħsubin għall-popolazzjoni adulta.

(6)

Fil-5 ta’ Lulju 2020, il-kumpanija Skotan S.A. (“l-applikant”) ressqet applikazzjoni lill-Kummissjoni f’konformità mal-Artikolu 10(1) tar-Regolament (UE) 2015/2283 biex jinbidlu l-kundizzjonijiet tal-użu tal-ikel il-ġdid il-bijomassa tal-ħmira tal-Yarrowia lipolytica. B’mod partikolari, l-applikant talab li l-użu tal-bijomassa tal-ħmira tal-Yarrowia lipolytica jiġi estiż għal għadd ta’ ikel.

(7)	Fid-9 ta’ Novembru 2020, il-Kummissjoni talbet lill-Awtorità Ewropea dwar is-Sigurtà fl-Ikel (“l-Awtorità”) twettaq valutazzjoni tal-estensjoni tal-użu tal-bijomassa tal-ħmira tal-Yarrowia lipolytica bħala ikel ġdid.

(8)	Fis-26 ta’ Ottubru 2023, l-Awtorità adottat l-opinjoni xjentifika tagħha bit-titolu “Safety of an extension of use of Yarrowia lipolytica yeast biomass as a novel food pursuant to Regulation (EU) 2015/2283” (6) f’konformità mal-Artikolu 11 tar-Regolament (UE) 2015/2283.

(9)

Fl-opinjoni xjentifika tagħha, l-Awtorità kkonkludiet li l-estensjoni tal-użu proposta tal-ikel il-ġdid il-bijomassa tal-ħmira tal-Yarrowia lipolytica hija sikura skont il-kundizzjonijiet tal-użu proposti, u għaldaqstant jixraq li jiġu emendati l-kundizzjonijiet tal-użu tal-bijomassa tal-ħmira tal-Yarrowia lipolytica.

(10)	Fl-opinjoni xjentifika tagħha, l-Awtorità nnotat li minħabba l-użi ġodda proposti tal-ikel il-ġdid, jenħtieġ li mal-ispeċifikazzjonijiet jiżdiedu l-limiti għaċ-ċomb, għall-merkurju, għall-kadmju u għall-arseniku.

(11)

L-informazzjoni pprovduta fl-applikazzjoni u fl-opinjoni tal-Awtorità tagħti biżżejjed raġunijiet biex jiġi stabbilit li l-bidliet fl-ispeċifikazzjonijiet u fil-kundizzjonijiet tal-użu tal-ikel il-ġdid huma f’konformità mal-kundizzjonijiet tal-Artikolu 12 tar-Regolament (UE) 2015/2283 u jenħtieġ li jiġu approvati.

(12)

Jixraq li l-bidliet fil-kundizzjonijiet tal-użu tal-ikel il-ġdid ikunu jinkludu l-informazzjoni msemmija fl-Artikolu 9(3) tar-Regolament (UE) 2015/2283. F’dan ir-rigward, meta jitqiesu l-użi addizzjonali tal-ikel il-ġdid, jixraq li jinbidel ir-rekwiżit speċifiku tat-tikkettar dwar l-użu tal-ikel il-ġdid fis-supplimenti tal-ikel.

(13)	Għalhekk, jenħtieġ li l-Anness tar-Regolament ta’ Implimentazzjoni (UE) 2017/2470 jiġi emendat kif xieraq.

(14)	Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1

L-Anness tar-Regolament ta’ Implimentazzjoni (UE) 2017/2470 huwa emendat f’konformità mal-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, id-29 ta’ Lulju 2024.

Għall-Kummissjoni

Il-President

Ursula VON DER LEYEN

(1) ĠU L 327, 11.12.2015, p. 1, ELI: http://data.europa.eu/eli/reg/2015/2283/oj.

(2) Ir-Regolament ta’ Implimentazzjoni tal-Kummissjoni (UE) 2017/2470 tal-20 ta’ Diċembru 2017 li jistabbilixxi l-lista tal-Unjoni tal-ikel ġdid skont ir-Regolament (UE) 2015/2283 tal-Parlament Ewropew u tal-Kunsill dwar ikel ġdid (ĠU L 351, 30.12.2017, p. 72, ELI: http://data.europa.eu/eli/reg_impl/2017/2470/oj).

(3) Ir-Regolament ta’ Implimentazzjoni tal-Kummissjoni (UE) 2019/760 tat-13 ta’ Mejju 2019 li jawtorizza t-tqegħid fis-suq tal-bijomassa tal-ħmira tal-Yarrowia lipolytica bħala ikel ġdid skont ir-Regolament (UE) 2015/2283 tal-Parlament Ewropew u tal-Kunsill u li jemenda r-Regolament ta’ Implimentazzjoni tal-Kummissjoni (UE) 2017/2470 (ĠU L 125, 14.5.2019, p. 13, ELI: http://data.europa.eu/eli/reg_impl/2019/760/oj)

(4) Id-Direttiva 2002/46/KE tal-Parlament Ewropew u tal-Kunsill tal-10 ta’ Ġunju 2002 dwar l-approssimazzjoni tal-liġijiet tal-Istati Membri dwar is-supplimenti tal-ikel (ĠU L 183, 12.7.2002, p. 51, ELI: http://data.europa.eu/eli/dir/2002/46/oj).

(5) Ir-Regolament ta’ Implimentazzjoni tal-Kummissjoni (UE) 2023/938 tal-10 ta’ Mejju 2023 li jemenda r-Regolament ta’ Implimentazzjoni (UE) 2017/2470 rigward il-kundizzjonijiet tal-użu tal-ikel ġdid il-bijomassa tal-ħmira tal-Yarrowia lipolytica (ĠU L 125, 11.5.2023, p. 16, ELI: http://data.europa.eu/eli/reg_impl/2023/938/oj).

(6) EFSA Journal. 2023;21:e8416.

ANNESS

L-Anness tar-Regolament ta’ Implimentazzjoni (UE) 2017/2470 huwa emendat kif ġej:

(1)

fit-Tabella 1 (Ikel ġdid awtorizzat), l-entrata għall-“bijomassa tal-ħmira tal-Yarrowia lipolytica” hija sostitwita b’dan li ġej:

Ikel ġdid awtorizzat

Kundizzjonijiet li fihom jista’ jintuża l-ikel ġdid

Rekwiżiti tat-tikkettar speċifiċi oħrajn

Rekwiżiti oħrajn

Protezzjoni tad-data

“Bijomassa tal-ħmira tal-Yarrowia lipolytica

Kategorija tal-ikel speċifikat

Livelli massimi

1.	Id-denominazzjoni tal-ikel il-ġdid fuq it-tikkettar tal-oġġetti tal-ikel li fihom minn dan l-ikel għandha tkun ‘bijomassa tal-ħmira tal-Yarrowia lipolytica’.

2.	Jenħtieġ li s-supplimenti tal-ikel li fihom l-ikel il-ġdid ikollhom dikjarazzjoni li ma għandhomx jiġu kkunsmati jekk fl-istess jum jiġi kkunsmat ikel ieħor miżjud bil-bijomassa tal-ħmira tal-Yarrowia lipolytica.”

Supplimenti tal-ikel kif iddefinit fid-Direttiva 2002/46/KE, minbarra s-supplimenti tal-ikel għat-trabi u għat-tfal żgħar

6 g kuljum għat-tfal minn 10 snin ’il fuq, għall-adolexxenti u għall-popolazzjoni adulta ġenerali

3 g kuljum għat-tfal ta’ bejn it-3 snin u d-9 snin

Sostituti tal-ikliet għall-kontroll tal-piż għall-popolazzjoni adulta

3 g kull ikla (massimu ta’ żewġ ikliet kuljum sa massimu ta’ 6 g kuljum)

Ikel għal skopijiet mediċi speċjali kif

iddefinit fir-Regolament (UE) Nru 609/2013

F’konformità mar-rekwiżiti nutrizzjonali partikolari tal-persuni li għalihom huma maħsuba l-prodotti, iżda fi kwalunkwe każ mhux aktar minn 6 g kuljum

Sostituti tad-dieta kollha għall-kontroll tal-piż kif iddefinit fir-Regolament (UE) Nru 609/2013

6 g kuljum

Prodotti tal-ħalib mhux aromatizzati

5 g/kg

Prodotti tal-ħalib iffermentat aromatizzati

10 g/kg

Ġobon u prodotti tal-ġobon; (minbarra d-deżerti)

10 g/kg

Pejsts tal-ġewż

30 g/kg

Prodotti tal-patata pproċessati

10 g/kg

Ħlewwiet tal-kawkaw u taċ-ċikkulata

10 g/kg

Ħbub u ċereali tal-kolazzjon

20 g/kg

Prodotti bbażati fuq l-għaġin u noodles

10 g/kg

Ċereali msajra minn qabel jew ipproċessati

10 g/kg

Ħobż u bziezen

6 g/kg

Prodotti fini tal-forn

15 g/kg

Prodotti tal-laħam ittrattati bis-sħana

15 g/kg

Ħxejjex aromatiċi u ħwawar; taħwir tal-ikel u kondimenti

50 g/kg

Sopop u brodi

5 g/kg

Zlazi

10 g/kg

Insalati u spreads tas-sandwiches b’bażi mielħa

30 g/kg

Ħmira u prodotti tal-ħmira

30 g/kg

Prodotti tal-proteina, minbarra l-analogi tal-ħalib u s-sostituti tal-ħalib li jitħalltu max-xarbiet biex ibajduhom

30 g/kg

Xarbiet aromatizzati

10 g/l

Kafè, estratti tal-kafè

20 g/kg

Xarbiet mhux alkoħoliċi oħrajn

10 g/l

Snacks ibbażati fuq il-patata, fuq iċ-ċereali, fuq id-dqiq jew fuq il-lamtu

300 g/kg

Ġewż ipproċessat

20 g/kg

(2)

fit-Tabella 2 (Speċifikazzjonijiet), l-entrata għall-“bijomassa tal-ħmira tal-Yarrowia lipolytica” hija sostitwita b’dan li ġej:

Ikel ġdid awtorizzat

Speċifikazzjonijiet

“Bijomassa tal-ħmira tal-Yarrowia lipolytica

Deskrizzjoni/Definizzjoni:

L-ikel il-ġdid huwa l-bijomassa tal-ħmira tal-Yarrowia lipolytica mnixxfa u meqruda bis-sħana.

Karatteristiċi/Kompożizzjoni:

Proteini: 45-55 g/100 g

Fibra: 24-30 g/100 g

Zokkor: < 1 g/100 g

Xaħam: 7-10 g/100 g

Rmied totali: ≤ 12 %

Kontenut tal-ilma: ≤ 5 %

Kontenut ta’ materja niexfa: ≥ 95 %

Kriterji mikrobijoloġiċi:

Għadd totali ta’ mikrobi aerobiċi: ≤ 5 × 103 CFU/g

Għadd totali ta’ ħmira u ta’ moffa: ≤ 102 CFU/g

Ċelloli vijabbli tal-Yarrowia lipolytica (a): < 10 CFU/g (jiġifieri l-limitu ta’ detezzjoni)

Koliformi: ≤ 10 CFU/g

Salmonella spp.: Mhux individwata f’25 g

Kontaminanti:

Ċomb: ≤ 0,1 mg/kg

Merkurju: ≤ 0,1 mg/kg

Kadmju: ≤ 0,1 mg/kg

Arseniku: ≤ 0,15 mg/kg

Abbrevjazzjonijiet: CFU, unitajiet li jifformaw kolonji

(a)	Għandhom jiġu ttestjati immedjatament wara l-istadju tat-trattament bis-sħana. Għandu jkun hemm miżuri fis-seħħ biex tiġi evitata l-kontaminazzjoni kroċjata maċ-ċelloli vijabbli tal-Y. lipolytica waqt l-imballaġġ u/jew il-ħżin tal-ikel ġdid.”