(1)

Ir-Regolament (UE) 2016/429 jistabbilixxi, fost l-oħrajn, lista armonizzata ta’ mard trażmissibbli tal-annimali (mard elenkat), u regoli speċifiċi għall-mard għall-prevenzjoni u l-kontroll ta’ dak il-mard elenkat.

(2)

L-Artikolu 9(1) tar-Regolament (UE) 2016/429 jistabbilixxi regoli għall-prevenzjoni u l-kontroll tal-mard li għandhom jiġu applikati għal kategoriji differenti ta’ mard elenkat, inklużi regoli għall-kompartimentalizzazzjoni.

(3)

L-Artikolu 37 tar-Regolament (UE) 2016/429 jagħti lill-Istati Membri d-dritt li japplikaw għand il-Kummissjoni għar-rikonoxximent tal-istatus ta’ ħelsien mill-mard tal-kompartimenti għal ċertu mard elenkat imsemmi fl-Artikolu 9(1), il-punti (a), (b), u (c), ta’ dak ir-Regolament.

(4)

L-approċċ ta’ kompartimentalizzazzjoni previst fir-Regolament (UE) 2016/429 huwa konformi mal-istandards internazzjonali tal-Organizzazzjoni Dinjija għas-Saħħa tal-Annimali (“WOAH”), u b’mod partikolari l-Kapitoli 4.4. u 4.5. tal-Kodiċi tas-Saħħa tal-Annimali Terrestri (2) rispettivament dwar it-tqassim f’żoni u l-kompartimentalizzazzjoni, u dwar l-applikazzjoni tal-kompartimentalizzazzjoni, li huma maħsuba biex jintużaw bħala bażi mill-Membri tal-WOAH għar-regolamenti tagħhom dwar il-prevenzjoni u l-kontroll tal-mard tal-annimali.

(5)

Ir-Regolament ta’ Implimentazzjoni tal-Kummissjoni (UE) 2020/690 (3) jistabbilixxi, fl-Anness II tiegħu, il-mard elenkat li għalih jista’ jiġi stabbilit l-istatus ta’ ħelsien mill-mard tal-kompartimenti f’konformità mal-Artikolu 37 tar-Regolament (UE) 2016/429.

(6)

Ir-Regolament ta’ Implimentazzjoni tal-Kummissjoni (UE) 2018/1882 (4) jiddefinixxi “marda tal-kategorija A” bħala marda elenkata li normalment ma sseħħx fl-Unjoni u li għaliha jridu jittieħdu miżuri ta’ eradikazzjoni immedjati malli tiġi identifikata, kif imsemmi fl-Artikolu 9(1), il-punt (a), tar-Regolament (UE) 2016/429, u jelenka l-influwenza avjarja b’patoġeniċità għolja (HPAI) u l-infezzjoni bil-virus tal-marda ta’ Newcastle (NDV) bħala mard tal-kategorija A fl-Anness tiegħu.

(7)

Għalkemm l-Artikolu 37(1) tar-Regolament (UE) 2016/429 jipprevedi l-possibbiltà li Stat Membru japplika għand il-Kummissjoni għar-rikonoxximent tal-istatus ta’ ħelsien mill-mard tal-kompartimenti għall-mard elenkat imsemmi fl-Artikolu 9(1), il-punt (a), tiegħu, l-Anness II tar-Regolament ta’ Implimentazzjoni (UE) 2020/690 ma jinkludix il-mard tal-kategorija A tal-annimali terrestri.

(8)

Minħabba s-sitwazzjoni epidemjoloġika li qed tevolvi globalment tal-HPAI u tal-NDV, ir-regoli għall-prevenzjoni u l-kontroll ta’ dawn iż-żewġ mardiet elenkati fl-Unjoni jenħtieġ li jinkludu l-possibbiltà ta’ kompartimentalizzazzjoni.

(9)

Għalhekk, dawk iż-żewġ mardiet elenkati jenħtieġ li jiżdiedu mal-Anness II tar-Regolament ta’ Implimentazzjoni (UE) 2020/690.

(10)

Għalhekk, l-Anness II tar-Regolament ta’ Implimentazzjoni (UE) 2020/690 jenħtieġ li jiġi emendat skont dan.

(11)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,