(1)

Skont ir-Regolament (UE) 2023/1230, il-Kummissjoni trid tipprevedi mudell standardizzat għall-ġbir mill-Istati Membri tad-data u tal-informazzjoni msemmija fl-Artikolu 6(5), il-punti minn (a) sa (d), ta’ dak ir-Regolament, inkluża l-informazzjoni msemmija fl-Artikolu 6(9). Tali mudell standardizzat jiżgura kundizzjonijiet uniformi għall-ġbir ta’ data u informazzjoni għall-fini taż-żieda ta’ kategorija ta’ makkinarju jew prodotti relatati mal-Anness I ta’ dak ir-Regolament jew tal-irtirar ta’ kategorija ta’ makkinarju jew prodotti relatati minn dak l-Anness.

(2)

Għalhekk huwa xieraq li jiġi stabbilit mudell li għandu jintuża mill-Istati Membri għall-ġbir ta’ dik id-data u dik l-informazzjoni. Sabiex jiġu razzjonalizzati r-rekwiżiti ta’ rapportar, il-mudell standardizzat jillimita d-data u l-informazzjoni li għandhom jiġu pprovduti għal dak li huwa strettament meħtieġ, b’mod partikolari billi jirrikjedi biss data u informazzjoni speċifiċi fir-rigward ta’ makkinarju speċifiku jew prodotti relatati u għall-finijiet speċifiċi tal-Artikolu 6(10), l-ewwel subparagrafu, tar-Regolament (UE) 2023/1230, peress li tali informazzjoni u data speċifiċi għal dawk il-finijiet speċifiċi mhumiex meħtieġa minn xi leġiżlazzjoni oħra tal-Unjoni.

(3)

Il-Kummissjoni wettqet konsultazzjonijiet xierqa matul il-ħidma preparatorja tal-mudell stabbilit f’dan ir-Regolament u kkonsultat ukoll lill-grupp ta’ esperti rilevanti.

(4)

Il-miżuri previsti f’dan ir-Regolament huma skont l-opinjoni tal-Kumitat imsemmi fl-Artikolu 48(1) tar-Regolament (UE) 2023/1230,