(1)

Ir-Regolament ta’ Implimentazzjoni tal-Kummissjoni (UE) Nru 193/2014 (2) approva s-sustanza attiva amisulbrom sat-30 ta’ Ġunju 2024. Ir-Regolament ta’ Implimentazzjoni tal-Kummissjoni (UE) Nru 151/2014 (3) approva s-sustanza attiva aċidu S-abxissiku sat-30 ta’ Ġunju 2024. Ir-Regolament ta’ Implimentazzjoni tal-Kummissjoni (UE) Nru 145/2014 (4) approva s-sustanza attiva tijenkarbażon sat-30 ta’ Ġunju 2024. Ir-Regolament ta’ Implimentazzjoni tal-Kummissjoni (UE) Nru 144/2014 approva s-sustanza attiva valifenalat sat-30 ta’ Ġunju 2024 (5).

(2)

Is-sustanzi attivi amisulbrom, aċidu S-abxissiku, tijenkarbażon u valifenalat huma elenkati fil-Parti B tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (6).

(3)

Ir-Regolament ta’ Implimentazzjoni tal-Kummissjoni (UE) 2020/2007 (7) jestendi il-perjodu ta’ approvazzjoni tas-sustanzi attivi amisulbrom, aċidu S-abxissiku, tijenkarbażon u valifenalat sat-30 ta’ Settembru 2024.

(4)

L-applikazzjonijiet u d-dossiers supplimentari għat-tiġdid tal-approvazzjonijiet ta’ kull waħda minn dawk is-sustanzi attivi ġew sottomessi f’konformità mar-Regolament ta’ Implimentazzjoni tal-Kummissjoni (UE) 2020/1740 (8) 3 snin qabel id-data tal-iskadenza estiża tas-sustanzi attivi. Fit-3 ta’ Mejju 2023, fil-11 ta’ April 2022, fit-28 ta’ Ġunju 2022 u fl-4 ta’ Lulju 2022, l-Istati Membri relaturi tal-amisulbrom, tal-aċidu S-abxissiku, tat-tijenkarbażon u tal-valifenalat rispettivament infurmaw lill-Kummissjoni li kienu vverifikaw l-ammissibbiltà, b’mod partikolari l-kompletezza u t-tempestività, ta’ kull waħda minn dawn l-applikazzjonijiet, u kkonkludew li kienu ammissibbli.

(5)

Għas-sustanzi attivi tijenkarbażon u valifenalat, il-valutazzjoni tar-riskju skont l-Artikolu 11 tar-Regolament ta’ Implimentazzjoni (UE) 2020/1740 għadha ma ġietx iffinalizzata mill-Istati Membri relaturi rispettivi.

(6)

Għas-sustanzi attivi amisulbrom u aċidu S-abxissiku, l-Awtorità Ewropea dwar is-Sigurtà fl-Ikel (“l-Awtorità”) teħtieġ żmien addizzjonali biex tasal għal konklużjoni, u meta xieraq, tkun tesiġi konsultazzjoni mal-esperti. Huwa meħtieġ aktar żmien biex il-Kummissjoni tadotta d-deċiżjoni li tirriżulta dwar il-ġestjoni tar-riskju.

(7)

Għalhekk huwa probabbli li l-ebda deċiżjoni dwar it-tiġdid tal-approvazzjoni ta’ dawn is-sustanzi attivi mhi se tkun tista’ tittieħed qabel l-iskadenza tal-perjodi tal-approvazzjoni rispettivi tagħhom fit-30 ta’ Settembru 2024, u minħabba li r-raġunijiet għad-dewmien fil-proċeduri tat-tiġdid mhumiex fil-kontroll tal-applikanti rispettivi, jenħtieġ li l-perjodi tal-approvazzjoni ta’ dawk is-sustanzi attivi jiġu estiżi sabiex ikunu jistgħu jitlestew il-valutazzjonijiet meħtieġa u sabiex jiġu ffinalizzati l-proċeduri rispettivi għat-tiġdid tal-approvazzjoni.

(8)

Għas-sustanzi attivi tijenkarbażon u valifenalat, peress li l-valutazzjoni tar-riskju għadha ma ġietx iffinalizzata mill-Istati Membri relaturi u fid-dawl taż-żmien meħtieġ biex jitlestew il-passi li fadal f’kull proċedura tat-tiġdid, id-durata tal-estensjoni tal-perjodi ta’ approvazzjoni jenħtieġ li tiġi stabbilita għal 29 xahar.

(9)

Għas-sustanzi attivi amisulbrom u aċidu S-abxissiku, peress li l-Awtorità teħtieġ żmien addizzjonali biex tasal għal konklużjoni dwar il-valutazzjoni tar-riskju tagħhom, id-durata tal-estensjoni tal-perjodu ta’ approvazzjoni għal dawn is-sustanzi attivi jenħtieġ li tiġi stabbilita għal 23 xahar u ġimagħtejn.

(10)

Għaldaqstant jenħtieġ li r-Regolament ta’ Implimentazzjoni (UE) Nru 540/2011 jiġi emendat kif xieraq.

(11)

F’każ li l-Kummissjoni tadotta Regolament li jipprevedi li l-approvazzjoni ta’ sustanza attiva msemmija fl-Anness ta’ dan ir-Regolament ma tiġġeddidx, il-Kummissjoni tiffissa d-data tal-iskadenza fid-data tad-dħul fis-seħħ ta’ dak ir-Regolament jew fl-istess data kif kienet qabel l-adozzjoni ta’ dan ir-Regolament, skont liema data tiġi l-aħħar. F’każ li l-Kummissjoni tadotta Regolament li jipprevedi t-tiġdid tal-approvazzjoni ta’ sustanza attiva msemmija fl-Anness ta’ dan ir-Regolament, il-Kummissjoni tistabbilixxi l-eqreb data ta’ applikazzjoni possibbli kif ikun xieraq skont iċ-ċirkostanzi.

(12)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,