(1)

Id-Direttiva 2003/87/KE ġiet emendata bid-Direttiva (UE) 2023/958 tal-Parlament Ewropew u tal-Kunsill (2) fl-2023 biex jiżdied il-kontribut tal-avjazzjoni għall-mira għat-tnaqqis tal-emissjonijiet għall-ekonomija kollha tal-Unjoni u tiġi implimentata b’mod xieraq l-Iskema ta’ Kumpens u Tnaqqis tal-Karbonju għall-Avjazzjoni Internazzjonali (CORSIA, Carbon Offsetting and Reduction Scheme for International Aviation) tal-Organizzazzjoni tal-Avjazzjoni Ċivili Internazzjonali (ICAO, International Civil Aviation Organization). Dik l-emenda żżomm il-kamp ta’ applikazzjoni tas-Sistema tal-UE għall-Iskambju ta’ Kwoti tal-Emissjonijiet għat-titjiriet intra-Ewropej u tapplika l-CORSIA għat-titjiriet li mhumiex titjiriet fiż-ŻEE u titjiriet bejn iż-ŻEE u l-Iżvizzera u r-Renju Unit.

(2)

Il-CORSIA ilha titħaddem mill-2019 għall-monitoraġġ, ir-rappurtar u l-verifika tal-emissjonijiet. Hija maħsuba biex tkun miżura bbażata fuq is-suq applikata madwar id-dinja biex tikkumpensa għall-emissjonijiet tad-diossidu tal-karbonju mill-avjazzjoni internazzjonali minn Jannar 2021. Il-linja bażi għall-2023 għall-kumpens hija l-livell tal-emissjonijiet mill-avjazzjoni tal-2019. Il-linja bażi għall-kumpens hija 85 % tal-livell tal-emissjonijiet mill-avjazzjoni tal-2019 mill-2024 ’il quddiem. Il-kumpens ’il fuq mil-linja bażi trid issir bil-kanċellazzjoni ta’ ċerti krediti tal-kumpens u bl-użu ta’ fjuwils tal-avjazzjoni, irrapportati f’konformità mad-dispożizzjonijiet tal-att delegat adottat skont l-Artikolu 28c tad-Direttiva 2003/87/KE (“fjuwils eliġibbli tal-CORSIA”).

(3)

Fis-27 ta’ Ġunju 2018, waqt l-għaxar laqgħa tal-214-il sessjoni tiegħu, il-Kunsill tal-ICAO adotta l-Ewwel Edizzjoni tal-Anness 16, il-Volum IV, tal-Konvenzjoni dwar l-Avjazzjoni Ċivili Internazzjonali ffirmata fis-7 ta’ Diċembru 1944 — il-CORSIA, li tistabbilixxi l-Istandards u l-Prattiki Rakkomandati Internazzjonali dwar il-Protezzjoni Ambjentali għall-CORSIA (SARPs għall-CORSIA). L-Unjoni u l-Istati Membri tagħha qed jimplimentaw il-CORSIA kif xieraq mill-bidu tal-2021-2023 f’konformità mad-Deċiżjoni tal-Kunsill (UE) 2020/954 (3). L-ICAO adottat it-Tieni Edizzjoni tal-SARPs għall-CORSIA fl-20 ta’ Marzu 2023. Din daħlet fis-seħħ fil-31 ta’ Lulju 2023 u saret applikabbli fl-1 ta’ Jannar 2024.

(4)

Skont l-Artikolu 28c tad-Direttiva 2003/87/KE, ir-Regolament Delegat tal-Kummissjoni (UE) 2019/1603 (4) ġie adottat biex jimplimenta l-CORSIA kif xieraq għall-monitoraġġ, ir-rappurtar u l-verifika tal-emissjonijiet mill-avjazzjoni. Ir-Regolament Delegat (UE) 2019/1603 irid jiġi aġġornat biex jirregola kif xieraq ir-rappurtar tal-fjuwils eliġibbli tal-CORSIA kif iċċertifikati mill-korpi taċ-ċertifikazzjoni tal-CORSIA u r-rappurtar u l-verifika tal-kanċellazzjoni tal-unitajiet eliġibbli għall-kumpens skont il-CORSIA.

(5)

Fis-7 ta’ Ottubru 2022, il-41 Assemblea tal-ICAO iddeċidiet li tbiddel il-linja bażi preċedenti tal-CORSIA mill-medja tal-emissjonijiet tas-CO2 tal-2019 u tal-2020 għall-perjodu mill-2021 sal-2023 għall-emissjonijiet tas-CO2 tal-2019, u għall-perjodu mill-2024 sal-2035 għal 85 % tal-emissjonijiet tas-CO2 tal-2019.

(6)

Biex jiġu kkalkulati r-rekwiżiti tal-kumpens fir-rigward tal-CORSIA, l-Istati Membri jenħtieġ li jqisu l-lista tal-Istati meqjusin li qed japplikaw il-CORSIA adottata mill-Kummissjoni skont l-Artikolu 25a(3) u ppubblikata għas-sena rilevanti. Dik il-lista tal-Istati tvarja minn dik ippubblikata mis-Segretarjat tal-ICAO għax teskludi l-pajjiżi taż-ŻEE, l-Iżvizzera u r-Renju Unit, u tqis biss lil dawk l-Istati meqjusin li qed jimplimentaw il-CORSIA għall-finijiet tad-Direttiva 2003/87/KE. Barra minn hekk, il-kalkolu jenħtieġ li ma jkunx jinkludi xi rotot eżentati skont l-Artikolu 25a(7) tad-Direttiva 2003/87/KE għal raġunijiet ta’ trattament ugwali għall-operaturi bbażati fl-Unjoni.

(7)

Skont is-SARPs għall-CORSIA, l-operaturi tal-inġenji tal-ajru li jidħlu ġodda, u l-operaturi tal-inġenji tal-ajru b’ammont żgħir ta’ emissjonijiet x’jikkumpensaw, jenħtieġ li ma jkollhom l-ebda rekwiżit tal-kumpens skont il-CORSIA, b’kumpens fakultattiv għal dawn tal-aħħar. Il-limiti għal dawn l-eżenzjonijiet huma stabbiliti biex ikunu jikkonċernaw ammont minimu ta’ emissjonijiet. L-Artikolu 12(8) tad-Direttiva 2003/87/KE jeżiġi li r-regoli li jiddefinixxu l-metodoloġija għall-kalkolu tar-rekwiżit tal-kumpens tal-CORSIA jenħtieġ li jimxu mas-SARPs għall-CORSIA sa fejn ikun possibbli fid-dawl tad-dispożizzjonijiet rilevanti ta’ din id-Direttiva. Biex l-industrija Ewropea tal-avjazzjoni tkun f’ambjent ekwu, jenħtieġ li l-istess eżenzjonijiet jiġu inklużi fl-implimentazzjoni tal-CORSIA fl-Unjoni.

(8)

F’konformità mal-Artikolu 12(7) u (9) tad-Direttiva 2003/87/KE, dan ir-Regolament jenħtieġ li jipprevedi l-kalkolu tar-rekwiżiti tal-kumpens fir-rigward tal-CORSIA rilevanti għall-emissjonijiet li jsiru bejn l-1 ta’ Jannar 2023 u l-31 ta’ Diċembru 2026. Matul dak il-perjodu, il-kalkolu tal-fattur tat-tkabbir jenħtieġ li jkun ibbażat biss fuq it-tkabbir tas-settur.

(9)

Il-miżuri previsti f’dan ir-Regolament huma f’konformità mal-opinjoni tal-Kumitat dwar it-Tibdil fil-Klima,

(1)

“titjira internazzjonali” tfisser l-operazzjoni ta’ ajruplan mill-qtugħ mill-art f’ajrudrom ta’ Stat jew it-territorji tiegħu, u l-inżul f’ajrudrom ta’ Stat ieħor jew it-territorji tiegħu;

(2)

“fjuwil eliġibbli tal-CORSIA” tfisser fjuwil tal-avjazzjoni, li ġie rrapportat f’konformità mad-dispożizzjonijiet tal-att delegat adottat skont l-Artikolu 28c tad-Direttiva 2003/87/KE u li għalhekk operatur ta’ inġenju tal-ajru jista’ juża biex ikun jista’ jnaqqas ir-rekwiżit tal-kumpens tiegħu f’konformità mal-Artikolu 3(3);

(3)

“rekwiżit tal-kumpens” tfisser l-ammont ta’ emissjonijiet tas-CO2 li jeħtieġ jiġi kkumpensat skont l-Artikolu 12(9) tad-Direttiva 2003/87/KE;

(4)

“Fattur tat-Tkabbir Settorjali” jew “SGF” tfisser multiplikatur li jiġi ppubblikat fid-dokument tal-Organizzazzjoni tal-Avjazzjoni Ċivili Internazzjonali (ICAO, International Civil Aviation Organization) bit-titolu “CORSIA Annual Sector’s Growth Factor (SGF)” u li jiġi kkalkolat mis-Segretarjat tal-ICAO skont din il-metodoloġija: