(1)

Permezz tar-Regolament (UE) 2024/1392, il-Parlament Ewropew u l-Kunsill adottaw miżuri temporanji ta’ liberalizzazzjoni tal-kummerċ li jissupplimentaw il-konċessjonijiet kummerċjali applikabbli għall-prodotti Ukreni. L-Artikolu 1(1)(b), ta’ dak ir-Regolament issospenda l-kwoti tariffarji kollha stabbiliti skont l-Anness I-A tal-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna, min-naħa l-oħra u dment li l-prodotti koperti minn dawk il-kwoti kellhom jiġu ammessi għall-importazzjoni fl-Unjoni mill-Ukrajna mingħajr ebda dazju doganali.

(2)

L-Artikolu 4(7) tar-Regolament (UE) 2024/1392 jipprevedi miżura awtomatika ta’ salvagwardja għall-bajd, għall-pollam, għaz-zokkor, għall-ħafur, għall-qamħirrum, għall-ħbub imfesdqa misħuqa u għall-għasel li għandha tiġi attivata jekk il-volumi kumulattivi tal-importazzjoni ta’ kwalunkwe wieħed minn dawk il-prodotti mill-1 ta’ Jannar 2024 f’perjodu speċifiku jilħqu l-medja aritmetika rispettiva tal-volumi tal-importazzjoni rreġistrati fil-perjodu mill-1 ta’ Lulju sal-31 ta’ Diċembru 2021, fl-2022 u fl-2023.

(3)

Il-volumi kumulattivi tal-importazzjoni taz-zokkor mill-1 ta’ Jannar 2024 laħqu l-medja aritmetika rispettiva msemmija fl-Artikolu 4(7) tar-Regolament (UE) 2024/1392, li hija inqas mill-volum tal-kwota tariffarja korrispondenti sospiża f’konformità mal-Artikolu 1(1)(b), ta’ dak ir-Regolament. Għalhekk, jenħtieġ li l-kwota tariffarja sospiża bin-numru tal-ordni 09.6704 tiġi introdotta mill-ġdid sal-31 ta’ Diċembru 2024 u li mill-1 ta’ Jannar 2025 tiġi introdotta kwota tariffarja ugwali għal 5 partijiet minn kull tnax ta’ dik il-medja aritmetika.

(4)

Jenħtieġ li l-kwota tariffarja stabbilita fl-Anness ta’ dan ir-Regolament tiġi ġestita abbażi tal-ordni kronoloġika tad-dati ta’ aċċettazzjoni tad-dikjarazzjonijiet doganali għar-rilaxx għaċ-ċirkolazzjoni libera (ħielsa) taz-zokkor f’konformità mar-regoli dwar il-ġestjoni tal-kwoti tariffarji stabbiliti fir-Regolament ta’ Implimentazzjoni tal-Kummissjoni (UE) 2015/2447 (2).

(5)

F’konformità ma l-Artikolu 4(8) tar-Regolament (UE) 2024/1392, il-kwantità importata matul is-sena kalendarja 2024 jenħtieġ li titqies fil-ġestjoni ta’ dawk il-kwoti tariffarji sal-31 ta’ Diċembru 2024.

(6)

Sabiex tittieħed azzjoni sal-iskadenza stabbilita fl-Artikolu 4(7) tar-Regolament (UE) 2024/1392, jenħtieġ li dan ir-Regolament jidħol fis-seħħ fil-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(7)

Ir-Regolament (UE) 2024/1392 japplika sal-5 ta’ Ġunju 2025, għalhekk jenħtieġ li dan ir-Regolament japplika sal-istess data,