(1)

It-trasformazzjoni lejn emissjonijiet żero netti diġà qed tikkawża bidliet industrijali, ekonomiċi u ġeopolitiċi enormi madwar id-dinja, li ser isiru dejjem aktar evidenti hekk kif id-dinja tavvanza fl-isforzi tagħha ta’ dekarbonizzazzjoni. Jeħtieġ li l-Unjoni tirreaġixxi għal dawk l-iżviluppi filwaqt li timplimenta t-tranżizzjonijiet enerġetiċi, klimatiċi u ambjentali. Bażi ta’ manifattura b’saħħitha hija element ewlieni fl-iżgurar tal-aċċess għal teknoloġiji b’emissjonijiet żero netti u fiż-żamma ta’ impjiegi ta’ kwalità fl-Unjoni. Dak jirrikjedi li l-Unjoni tippreserva l-kompetittività tagħha, inkluż permezz tal-innovazzjoni, b’mod partikolari fir-rigward ta’ teknoloġiji nodfa.

(2)

Minħabba l-kumplessità u l-karattru tranżnazzjonali tat-teknoloġiji b’emissjonijiet żero netti, miżuri nazzjonali mhux ikkoordinati biex jiżguraw l-aċċess għal dawk it-teknoloġiji jirriskjaw li jfixklu l-kompetizzjoni u jifframmentaw is-suq intern. Tali miżuri mill-Istati Membri jistgħu jirriżultaw fl-impożizzjoni ta’ regolamentazzjoni diverġenti fuq l-operaturi tas-suq, billi jipprovdu livelli differenti ta’ aċċess għall-provvista tat-teknoloġiji b’emissjonijiet żero netti fost l-Istati Membri, inkluż billi jiġu pprovduti livelli differenti ta’ appoġġ għal proġetti ta’ manifattura tat-teknoloġiji b’emissjonijiet żero netti, u billi jipprovdu għal regoli diverġenti u forom mhux ikkoordinati ta’ akkwist, proċessi u durati diverġenti fir-rigward tal-proċessi għall-ħruġ ta’ permessi, u għaldaqstant joħolqu ostakli għall-kummerċ transfruntier bejn l-Istati Membri u jfixklu l-funzjonament tajjeb tas-suq intern. Biex jiġi ssalvagwardat il-funzjonament tas-suq intern, huwa għalhekk neċessarju li jinħoloq qafas legali komuni tal-Unjoni biex tiġi indirizzata b’mod kollettiv dik l-isfida ċentrali billi jiżdiedu r-reżiljenza u s-sigurtà tal-provvista tal-Unjoni fil-qasam tat-teknoloġiji b’emissjonijiet żero netti.

(3)

L-Unjoni impenjat ruħha għad-dekarbonizzazzjoni aċċellerata tal-ekonomija tagħha u l-użu ambizzjuż ta’ sorsi tal-enerġija rinnovabbli sabiex tikseb newtralità klimatika, jiġifieri emissjonijiet żero netti jew emissjonijiet wara t-tnaqqis tal-assorbimenti, sal-2050. Dak l-objettiv huwa fil-qalba tal-Patt Ekoloġiku Ewropew, li huwa stabbilit fil-komunikazzjoni tal-Kummissjoni tal-11 ta’ Diċembru 2019, intitolata “Il-Patt Ekoloġiku Ewropew”, il-komunikazzjoni tal-Kummissjoni tal-5 ta’ Mejju 2021, intitolata “Aġġornament tal-Istrateġija Industrijali l-Ġdida tal-2020: Nibnu Suq Uniku aktar b’saħħtu għall-irkupru tal-Ewropa”, u huwa f’konformità mal-impenn tal-Unjoni għall-azzjoni klimatika globali skont il-Ftehim ta’ Pariġi (4). Sabiex jintlaħaq l-għan tal-Unjoni tan-newtralità klimatika, ir-Regolament (UE) 2021/1119 tal-Parlament Ewropew u tal-Kunsill (5) jistabbilixxi mira klimatika tal-Unjoni vinkolanti biex l-emissjonijiet netti ta’ gassijiet serra jitnaqqsu b’mill-inqas 55 % sal-2030 meta mqabbla mal-1990. Il-pakkett propost “Lesti għall-Mira ta’ 55 %”, li huwa stabbilit fil-komunikazzjoni tal-Kummissjoni tal-14 ta’ Lulju 2021, intitolata “Lesti għall-Mira ta’ 55 %”: nilħqu l-Mira Klimatika tal-UE għall-2030 fi Triqitna lejn in-Newtralità Klimatika", għandu l-għan li jilħaq il-mira klimatika tal-Unjoni għall-2030 u jirrevedi u jaġġorna l-liġi tal-Unjoni f’dak ir-rigward.

(4)

Barra minn hekk, il-Pjan Industrijali tal-Patt Ekoloġiku stabbilita fil-komunikazzjoni tal-Kummissjoni tal-1 ta’ Frar 2023 tistabbilixxi approċċ komprensiv biex tiġi appoġġata espansjoni tat-teknoloġija tal-enerġija nadifa abbażi ta’ erba’ pilastri. L-ewwel pilastru għandu l-għan li joħloq ambjent regolatorju li jissimplifika u jtejjeb il-proċessi għall-ħruġ tal-permessi għas-siti tal-manifattura u l-assemblaġġ ġodda tat-teknoloġiji b’emissjonijiet żero netti, u li jiffaċilita l-espansjoni tal-industrija b’emissjonijiet żero netti tal-Unjoni. It-tieni pilastru għandu l-għan li jagħti spinta lill-investiment fil-produzzjoni tat-teknoloġiji b’emissjonijiet żero netti u l-finanzjament tagħha permezz tal-Qafas Temporanju rivedut ta’ Kriżi u ta’ Tranżizzjoni għall-miżuri ta’ Għajnuna mill-Istat biex jappoġġaw l-ekonomija wara l-aggressjoni kontra l-Ukrajna mir-Russja stabbilit fil-komunikazzjoni tal-Kummissjoni tas-17 ta’ Marzu 2023 u l-ħolqien tal-Pjattaforma tat-Teknoloġiji Strateġiċi għall-Ewropa (STEP) stabbilita bir-Regolament (UE) 2024/795 tal-Parlament Ewropew u tal-Kunsill (6), biex jiġi ppreservat il-vantaġġ tal-Unjoni fuq it-teknoloġiji kritiċi u emerġenti rilevanti għat-tranżizzjonijiet ekoloġiċi u diġitali. It-tielet pilastru huwa relatat mal-iżvilupp tal-ħiliet meħtieġa biex isseħħ it-tranżizzjoni u biex jiżdied l-għadd ta’ ħaddiema tas-sengħa fis-settur tat-teknoloġija tal-enerġija nadifa. Ir-raba’ pilastru jiffoka fuq il-kummerċ u d-diversifikazzjoni tal-katina tal-provvista ta’ materja prima kritika. Dan jinkludi l-ħolqien ta’ klabb dwar il-materja prima kritika, il-ħidma ma’ sħab tal-istess fehma biex jissaħħu b’mod kollettiv il-ktajjen tal-provvista u d-diversifikazzjoni minn fornituri uniċi għal input kritiku. Dan ir-Regolament jifforma parti minn dawk il-miżuri u jikkontribwixxi għat-tisħiħ tal-argument għall-vijabbiltà tad-dekarbonizzazzjoni industrijali fl-Unjoni.

(5)

Is-suq intern jipprovdi l-ambjent xieraq biex jiġi abilitat l-aċċess fl-iskala u l-pass neċessarji għat-teknoloġiji meħtieġa biex jinkisbu l-ambizzjonijiet tal-Unjoni fir-rigward tal-klima u l-enerġija kif ukoll l-objettiv tal-Patt Ekoloġiku Ewropew li jsarraf id-dekarbonizzazzjoni f’kompetittività sostenibbli. Il-perkors lejn ekonomija newtrali għall-klima, effiċjenti fl-użu tar-riżorsi u b’emissjonijiet żero netti joħloq opportunitajiet b’saħħithom għall-espansjoni tal-industrija tal-Unjoni b’emissjonijiet żero netti, bl-użu tas-saħħa tas-suq intern, billi jippromwovi l-investiment f’teknoloġiji b’emissjonijiet żero netti u l-ktajjen tal-provvista tagħhom. Dawk it-teknoloġiji huma neċessarji biex jintlaħqu l-objettivi tal-pjanijiet nazzjonali integrati tal-Istati Membri dwar l-enerġija u l-klima skont ir-Regolament (UE) 2018/1999 tal-Parlament Ewropew u tal-Kunsill (7), jikkontribwixxu għar-reżiljenza u l-kompetittività tal-industrija tal-Unjoni u jippermettu d-dekarbonizzazzjoni tas-setturi ekonomiċi, mill-provvista tal-enerġija għall-bini, għat-trasport u għall-industrija fl-Unjoni. Industrija b’saħħitha b’emissjonijiet żero netti fl-Unjoni tista’ tgħin b’mod sinifikanti biex il-miri tal-Unjoni fir-rigward tal-klima u l-enerġija jintlaħqu b’mod effettiv, kif ukoll biex jiġu appoġġati objettivi oħra tal-Patt Ekoloġiku Ewropew, filwaqt li titrawwem bażi industrijali u għaldaqstant jinħolqu impjiegi ta’ kwalità u tkabbir sostenibbli.

(6)

Sabiex tissodisfa dawk l-impenji, l-Unjoni trid taċċellera r-ritmu tat-tranżizzjoni tagħha lejn ekonomija b’emissjonijiet żero netti, inkluż billi żżid is-sehem tal-enerġija nadifa fit-taħlita enerġetika tagħha, kif ukoll billi żżid l-effiċjenza enerġetika u s-sehem tas-sorsi tal-enerġija rinnovabbli. Dak ser jikkontribwixxi biex jintlaħqu l-miri tal-Unjoni stabbiliti fil-Pjan ta’ Azzjoni tal-Pilastru Ewropew tad-Drittijiet Soċjali għall-2030, li huwa l-kontribut tal-Kummissjoni għall-implimentazzjoni tal-Pilastru Ewropew tad-Drittijiet Soċjali pproklamat f’Gothenburg fl-2017 (il-“Pilastru”).

(7)

Il-prezzijiet ogħla tal-enerġija wara l-aggressjoni militari mhux ġustifikata u illegali tar-Russja kontra l-Ukrajna wasslu għal impetu qawwi biex tiġi aċċellerata l-implimentazzjoni tal-Patt Ekoloġiku Ewropew u tissaħħaħ ir-reżiljenza tal-Unjoni tal-Enerġija rregolata mir-Regolament (UE) 2018/1999, billi titħaffef it-tranżizzjoni lejn enerġija nadifa u tintemm kwalunkwe dipendenza fuq il-fjuwils fossili esportati mir-Russja. Il-pjan REPowerEU, stabbilit fil-komunikazzjoni tal-Kummissjoni tat-18 ta’ Mejju 2022, intitolata “Pjan REPowerEU”, għandu rwol ewlieni fir-rispons għat-tbatija u t-tfixkil fis-suq globali tal-enerġija kkawżati mill-invażjoni tal-Ukrajna mir-Russja. Dak il-pjan għandu l-għan li jaċċellera t-tranżizzjoni tal-enerġija fl-Unjoni, sabiex jitnaqqas il-konsum tal-gass u tal-elettriku tal-Unjoni u biex tingħata spinta lill-investimenti fl-implimentazzjoni ta’ soluzzjonijiet effiċjenti fl-enerġija u b’livell baxx ta’ emissjonijiet tal-karbonju.

(8)

Sabiex jintlaħqu l-miri tal-Unjoni fir-rigward tal-klima u l-enerġija, jeħtieġ li l-effiċjenza enerġetika tingħata prijorità. L-iffrankar tal-enerġija huwa l-aktar mod irħis, sikur u nadif biex jintlaħqu dawk il-miri. “L-effiċjenza enerġetika tiġi l-ewwel” huwa prinċipju ġenerali tal-politika tal-enerġija tal-Unjoni u huwa importanti kemm fl-applikazzjonijiet prattiċi tiegħu fid-deċiżjonijiet ta’ politika kif ukoll f’dawk ta’ investiment. Għalhekk, huwa essenzjali li l-kapaċità tal-manifattura tal-Unjoni tiġi estiża għat-teknoloġiji effiċjenti fl-użu tal-enerġija, bħall-pompi tas-sħana, it-tisħin u t-tkessiħ distrettwali u t-teknoloġiji tal-grilja intelliġenti li jgħinu lill-Unjoni tnaqqas u tikkontrolla l-konsum tal-enerġija tagħha.

(9)

L-objettivi tad-dekarbonizzazzjoni tal-Unjoni, is-sigurtà tal-provvista tal-enerġija, id-diġitalizzazzjoni tas-sistema tal-enerġija u l-elettrifikazzjoni tad-domanda, pereżempju fir-rigward tal-mobbiltà u l-ħtieġa ta’ punti tal-irriċarġjar addizzjonali u aktar veloċi, jirrikjedu espansjoni enormi tal-grilji tal-elettriku fl-Unjoni, kemm fil-livell tat-trażmissjoni kif ukoll fil-livell tad-distribuzzjoni. Fil-livell tat-trażmissjoni, is-sistemi ta’ kurrent dirett b’voltaġġ għoli huma meħtieġa, fost l-oħrajn, għall-konnessjoni ta’ enerġiji rinnovabbli lil hinn mill-kosta, filwaqt li fil-livell tad-distribuzzjoni, il-konnessjoni tal-fornituri tal-elettriku u l-ġestjoni tal-flessibbiltà min-naħa tad-domanda jibnu fuq l-investimenti f’teknoloġiji tal-grilja innovattivi, bħall-iċċarġjar intelliġenti tal-vetturi elettriċi, l-awtomatizzazzjoni tal-effiċjenza enerġetika tal-bini u l-industrija kif ukoll il-kontrolli intelliġenti, l-infrastruttura tal-arloġġi avvanzati u sistemi tal-ġestjoni tal-enerġija fid-dar. Jeħtieġ li l-grilja tal-elettriku tinteraġixxi ma’ ħafna atturi jew apparati abbażi ta’ livell dettaljat ta’ osservabbiltà, u għaldaqstant tad-disponibbiltà ta’ data, biex tippermetti flessibbiltà, iċċarġjar intelliġenti, bini intelliġenti bi grilji tal-elettriku intelliġenti u servizzi ta’ flessibbiltà fuq skala żgħira li jippermettu rispons fin-naħa tad-domanda mill-konsumaturi u l-adozzjoni ta’ sorsi tal-enerġija rinnovabbli. Il-konnessjoni tat-teknoloġiji b’emissjonijiet żero netti man-network tal-Unjoni tirrikjedi l-espansjoni sostanzjali tal-kapaċitajiet tal-manifattura għall-grilji tal-elettriku f’oqsma bħall-kejbils, is-substazzjonijiet u t-transformers lil hinn mill-kosta u fuq l-art.

(10)

Għalhekk, huwa neċessarju li jsir sforz addizzjonali fil-livell politiku biex l-Unjoni jkollha potenzjal qawwi għal espansjoni rapida fil-kapaċità tal-manifattura biex tappoġġa l-mira klimatika tal-Unjoni għall-2030 billi ttejjeb il-kundizzjonijiet tas-suq għal dawk it-teknoloġiji li huma kummerċjalment disponibbli, kif ukoll is-sigurtà tal-provvista għal teknoloġiji b’emissjonijiet żero netti u l-ktajjen tal-provvista tagħhom, tnaqqas il-frammentazzjoni tas-suq, u tissalvagwarda jew issaħħaħ ir-reżiljenza u l-kompetittività ġenerali tas-sistema tal-enerġija tal-Unjoni. Dan jinkludi l-aċċess għal sors sikur u sostenibbli tal-fjuwils fl-aqwa klassi tagħhom, kif imsemmi fir-Regolament Delegat tal-Kummissjoni (UE) 2022/1214 (8).

(11)

Jenħtieġ li dan ir-Regolament jikkomplementa r-Regolament (UE) 2024/1252 tal-Parlament Ewropew u tal-Kunsill (9) billi jiffoka fuq il-manifattura tat-teknoloġiji b’emissjonijiet żero netti f’termini ta’ prodotti finali, komponenti speċifiċi, u makkinarju speċifiku użat primarjament għall-produzzjoni tagħhom. Minflok, ir-Regolament (UE) 2024/1252 jiffoka fuq il-parti upstream tal-katina tal-provvista, b’mod partikolari l-materja prima kritika, u l-estrazzjoni, l-ipproċessar u r-riċiklaġġ tagħha. Dawk it-teknoloġiji huma indispensabbli għal firxa wiesgħa ta’ setturi strateġiċi fosthom l-industriji tat-teknoloġiji b’emissjonijiet żero netti, l-industrija diġitali u s-setturi l-ajruspazjali u tad-difiża. Billi jsegwu l-istess loġika tat-trawwim tal-argument għall-vijabbiltà, itejbu u jipprovdu ħiliet adegwati, u jappoġġaw l-investimenti, dan ir-Regolament u r-Regolament (UE) 2024/1252 jikkumplimentaw lil xulxin biex joħolqu sinerġiji ta’ appoġġ regolatorju tul il-katina tal-provvista kollha tal-manifattura tat-teknoloġiji b’emissjonijiet żero netti fl-Unjoni. Dan ir-Regolament ikopri wkoll materjali ipproċessati li huma komponent essenzjali tat-teknoloġiji b’emissjonijiet żero netti, bl-eċċezzjoni tal-materja prima kritika li taqa’ taħt ir-Regolament (UE) 2024/1252.

(12)

Jenħtieġ li l-prodotti finali u l-komponenti speċifiċi li huma essenzjali għall-produzzjoni ta’ teknoloġiji b’emissjonijiet żero netti jiġu elenkati f’anness b’mod mhux eżawrjenti. Dawn jinkludu l-prodotti finali u l-komponenti tagħhom li jiġu manifatturati u nnegozjati minn kumpanija, inkluż materjal ipproċessat, iżda jeskludu l-materja prima koperta mir-Regolament (UE) 2024/1252. L-għan ta’ dak l-anness huwa li jidentifika, sa fejn ikun possibbli, il-prodotti finali u l-komponenti speċifiċi li huma essenzjali għall-produzzjoni ta’ teknoloġiji b’emissjonijiet żero netti u li għalhekk b’mod raġonevoli jistgħu jitqiesu li huma dejjem użati primarjament għat-teknoloġiji b’emissjonijiet żero netti kollha elenkati f’dan ir-Regolament. Komponenti speċifiċi u makkinarju speċifiku mhux koperti f’dak l-anness xorta jistgħu jaqgħu fil-kamp ta’ applikazzjoni ta’ dan ir-Regolament fejn, abbażi tal-evidenza pprovduta lil awtorità nazzjonali kompetenti, il-promotur ta’ proġett jista’ jagħti prova, pereżempju permezz ta’ studji tas-suq jew ftehimiet tax-xiri, li l-komponenti speċifiċi jew il-makkinarju speċifiku huma użati primarjament għall-produzzjoni ta’ teknoloġiji b’emissjonijiet żero netti, bl-eċċezzjoni tal-materja prima kritika li taqa’ fil-kamp ta’ applikazzjoni tar-Regolament (UE) 2024/1252.

(13)

Ċerti komponenti speċifiċi fil-katina tal-provvista ta’ teknoloġiji b’emissjonijiet żero netti jiġu prodotti permezz ta’ proċessi ta’ produzzjoni intensivi fl-enerġija jiġifieri fis-setturi tal-azzar, tal-aluminju, tal-metalli mhux ferrużi, tas-sustanzi kimiċi bażiċi, tas-siment, tal-ġir, tal-ħġieġ, taċ-ċeramika, tal-fertilizzanti, kif ukoll tal-polpa u tal-karta. Ħafna minn dawk il-proċessi huma kkaratterizzati minn intensità għolja ta’ enerġija u karbonju, li jagħmel l-emissjonijiet tas-CO2 tagħhom normalment diffiċli li jitnaqqsu. Fl-istess ħin, ir-Regolament (UE) 2021/1119 jirrikjedi d-dekarbonizzazzjoni rapida tal-ekonomija tal-Unjoni. Fid-dawl tal-fatt li l-industriji intensivi fl-enerġija ammontaw għal 17 % tal-emissjonijiet kumplessivi ta’ gassijiet serra fl-Unjoni fl-2019, id-dekarbonizzazzjoni tagħhom hija indispensabbli biex tintlaħaq in-newtralità klimatika fl-Unjoni. Dan ifisser li s-sigurtà tal-provvista fl-Unjoni ta’ komponenti speċifiċi użati għal teknoloġiji b’emissjonijiet żero netti tiddependi wkoll fuq l-intensifikazzjoni tal-isforzi ta’ dekarbonizzazzjoni fl-industriji intensivi fl-enerġija. Il-faċilitajiet tal-industrija intensivi fl-enerġija jaqgħu fil-kamp ta’ applikazzjoni ta’ dan ir-Regolament fejn il-faċilitajiet rilevanti jipproduċu komponenti speċifiċi użati primarjament f’teknoloġiji b’emissjonijiet żero netti. Minħabba l-ħtieġa li dawk is-setturi jiġu dekarbonizzati b’mod kollettiv u sabiex tiġi żgurata d-disponibbiltà ta’ komponenti speċifiċi prodotti minnhom li jintużaw fil-ktajjen tal-provvista tat-teknoloġija b’emissjonijiet żero netti, għall-kuntrarju ta’ proġetti oħra ta’ manifattura tat-teknoloġiji b’emissjonijiet żero netti li għalihom japplika dan ir-Regolament, jenħtieġ li dan ir-Regolament japplika wkoll għal proġetti ta’ industriji intensivi fl-enerġija li jipproduċu komponenti speċifiċi li jintużaw, iżda mhux b’mod esklużiv fil-ktajjen tal-provvista ta’ teknoloġiji b’emissjonijiet żero netti. Jenħtieġ li l-inklużjoni ta’ dawn il-faċilitajiet li l-emissjonijiet tagħhom diffiċli jitnaqqsu fil-kamp ta’ applikazzjoni ta’ dan ir-Regolament tkun bil-kundizzjoni li l-proġett ikun jinkludi l-kostruzzjoni jew il-konverżjoni ta’ faċilità bħal din li twassal għal tnaqqis sinifikanti tal-emissjonijiet tas-CO2 li jirriżultaw mill-attivitajiet tal-produzzjoni. L-appoġġ għal dawk is-setturi b’mod immirat skont dan ir-Regolament jikkontribwixxi għall-iżgurar tal-aċċess għal provvista sostenibbli ta’ teknoloġiji b’emissjonijiet żero netti fis-suq intern, iżid iċ-ċertezza tal-investiment u joħloq attraenza min-naħa tad-domanda għal teknoloġiji trasformattivi u ta’ dekarbonizzazzjoni b’emissjonijiet żero netti.

(14)

Il-lista ta’ teknoloġiji b’emissjonijiet żero netti tistipula t-teknoloġiji li huma essenzjali għall-objettivi ta’ dekarbonizzazzjoni tal-Unjoni u għat-titjib tal-funzjonament tas-suq intern. Il-lista tinkludi wkoll teknoloġiji li mhux l-Istati Membri kollha jaċċettaw bħala sors ta’ enerġija nadifa u sigura. Dan huwa konformi mad-dritt tagħhom li jiddeterminaw l-għażla tagħhom bejn sorsi differenti ta’ enerġija u l-istruttura ġenerali tal-provvista tal-enerġija tagħhom kif ukoll il-politika industrijali tagħhom. Biex jiġu ssalvagwardati dawk id-drittijiet, il-lista ta’ teknoloġiji b’emissjonijiet żero netti hija mingħajr preġudizzju għall-allokazzjoni ta’ finanzjament skont il-Qafas Finanzjarju Pluriennali attwali 2021 sa 27, b’mod partikolari f’termini ta’ eliġibbiltà tal-allokazzjoni u kriterji għall-aġġudikazzjoni relatati mat-teknoloġiji tal-enerġija fil-fondi tal-Unjoni, inkluż dawk iffinanzjati permezz ta’ kwoti tas-Sistema għall-Iskambju ta’ Kwoti tal-Emissjonijiet (ETS) jew appoġġ mill-Bank Ewropew tal-Investiment (BEI). Jenħtieġ ukoll li Stat Membru ma jkunx obbligat jirrikonoxxi bħala strateġiċi proġetti li jappoġġaw katina ta’ provvista għal teknoloġija li huwa ma jaċċettax bħala parti mit-taħlita tal-enerġija tiegħu.

(15)

Sabiex jiġi żgurat li s-sistema tal-enerġija futura tal-Unjoni tkun reżiljenti, jenħtieġ li din l-espansjoni titwettaq tul il-katina tal-provvista kollha tat-teknoloġiji inkwistjoni, f’konsistenza u komplementarjetà sħiħa mar-Regolamenti (UE) 2024/1252 u (UE) 2023/1781 (10) tal-Parlament Ewropew u tal-Kunsill.

(16)

Sabiex jiġu indirizzati l-problemi marbuta mas-sigurtà tal-provvista filwaqt li jingħata kontribut għall-appoġġ tar-reżiljenza tas-sistema tal-enerġija tal-Unjoni u tal-isforzi ta’ dekarbonizzazzjoni u modernizzazzjoni, il-kapaċità tal-manifattura tat-teknoloġiji b’emissjonijiet żero netti fl-Unjoni jeħtieġ li tespandi. Jeħtieġ li l-Unjoni tiżgura li l-ambjent regolatorju għall-manifatturi tat-teknoloġiji fotovoltajċi (PV) jippermettilhom iżidu l-vantaġġ kompetittiv tagħhom u jtejbu l-perspettivi tas-sigurtà tal-provvista, billi jimmiraw li jilħqu mhux inqas minn 30 gigawatt tal-kapaċità operazzjonali tal-manifattura tal-PV sal-2030 tul il-katina tal-valur kollha tal-PV, f’konformità mal-għanijiet stabbiliti fl-Alleanza Ewropea għall-Industrija Fotovoltajka Solari, li hija appoġġata fl-ambitu tal-Istrateġija tal-Unjoni dwar l-Enerġija Solari stabbilita bil-Komunikazzjoni tal-Kummissjoni tat-18 ta’ Mejju 2022. Jeħtieġ li l-Unjoni tiżgura li l-ambjent regolatorju għall-manifatturi tat-teknoloġiji tar-riħ u tal-pompi tas-sħana jippermettilhom jikkonsolidaw il-vantaġġ kompetittiv tagħhom u jżommu jew jespandu l-ishma attwali tagħhom tas-suq matul is-snin 2020, f’konformità mal-projezzjonijiet tal-implimentazzjoni tat-teknoloġija tal-Unjoni li jilħqu l-miri tagħha tal-enerġija u tal-klima għall-2030. Dan jissarraf f’kapaċità tal-manifattura tal-Unjoni għar-riħ ta’ mhux inqas minn 36 GW u għall-pompi tas-sħana ta’ mhux inqas minn 31 GW sal-2030. Jeħtieġ li l-manifatturi tal-batteriji u l-elettrolizzaturi tal-Unjoni jsibu ambjent regolatorju li jippermettilhom jikkonsolidaw it-tmexxija teknoloġika tagħhom u jikkontribwixxu b’mod attiv għat-tiswir ta’ dawk is-swieq. Għat-teknoloġiji tal-batteriji, dak ikun ifisser li jsir kontribut għall-objettivi tal-Alleanza Ewropea tal-Batteriji u li l-għan ikun li kważi 90 % tad-domanda annwali tal-batteriji tal-Unjoni tiġi ssodisfata mill-manifatturi tal-batteriji tal-Unjoni, li jfisser kapaċità tal-manifattura tal-Unjoni ta’ mhux inqas minn 550 GWh sal-2030. Għall-manifatturi tal-elettrolizzaturi tal-Unjoni, il-pjan REPowerEU jipproġetta 10 miljun tunnellata ta’ produzzjoni domestika ta’ idroġenu rinnovabbli u sa 10 miljun tunnellata oħra ta’ importazzjonijiet ta’ idroġenu rinnovabbli sal-2030. Sabiex jiġi żgurat li t-tmexxija teknoloġika tal-Unjoni tissarraf fi tmexxija kummerċjali, kif appoġġat fl-ambitu tad-Dikjarazzjoni Konġunta dwar l-Elettrolizzaturi tal-Kummissjoni u tal-Alleanza Ewropea għall-Idroġenu Nadif, jenħtieġ li l-manifatturi tal-elettrolizzaturi tal-Unjoni jkunu jistgħu jkomplu jżidu l-kapaċità tagħhom, sabiex il-kapaċità installata kumplessiva ta’ elettrolizzaturi li tkun qed tiġi implimentata tilħaq mhux inqas minn 100 GW idroġenu sal-2030. Il-pjan RePowerEU jistabbilixxi wkoll objettiv li tiżdied il-produzzjoni sostenibbli tal-bijometan għal 35 biljun metru kubu sal-2030. Bil-katina tal-provvista tiegħu li llum il-ġurnata fil-biċċa l-kbira hija bbażata fl-Ewropa, il-bijometan diġà jikkontribwixxi għar-reżiljenza tal-Unjoni u jenħtieġ li jiġi promoss aktar. Jenħtieġ li l-manifatturi tal-Unjoni tal-fjuwils għas-settur tal-avjazzjoni u dak marittimu jkomplu jiżviluppaw, jipproduċu u jespandu l-fjuwils alternattivi sostenibbli sabiex jikkontribwixxu b’mod sinifikanti għat-tnaqqis tal-emissjonijiet ta’ gassijiet serra tas-settur tat-trasport b’90 % fl-2050, kif ukoll biex jissodisfaw l-obbligi stabbiliti fir-Regolament (UE) 2023/2405 tal-Parlament Ewropew u tal-Kunsill (11) u r-Regolament (UE) 2023/1805 tal-Parlament Ewropew u tal-Kunsill (12). Dak it-tnaqqis huwa appoġġat bis-sħiħ wkoll mill-Alleanza Industrijali tal-Katina tal-Valur tal-Fjuwils Rinnovabbli u b’Livell Baxx ta’ Emissjonijiet tal-Karbonju. Jenħtieġ li l-Unjoni tiżgura li l-ambjent regolatorju u l-qafas ta’ appoġġ għall-produtturi ta’ teknoloġiji ta’ fjuwils alternattivi sostenibbli għas-settur tal-avjazzjoni u dak marittimu jippermettulhom iżidu l-kapaċitajiet ta’ produzzjoni tagħhom tul il-katina tal-valur sħiħa tal-fjuwils, mill-ġbir u l-provvista tal-materja prima sat-taħlit, inkluż il-kapaċitajiet ta’ konverżjoni u raffinar.

(17)

Meta jitqiesu dawk l-objettivi flimkien, filwaqt li jittieħed kont ukoll li għal ċerti elementi tal-katina tal-provvista, bħal invertituri, kif ukoll iċ-ċelloli solari, il-wafers, u l-ingotti għall-PV jew katodi u anodi għall-batteriji, il-kapaċità tal-manifattura tal-Unjoni hija waħda baxxa. Sabiex jgħin fl-indirizzar tat-tħassib dwar id-dipendenza u l-vulnerabbiltà fir-rigward tal-importazzjoni u jiġi żgurat li jintlaħqu l-miri tal-Unjoni fir-rigward tal-klima u l-enerġija, jenħtieġ li jiġi stabbilit parametru referenzjarju ġenerali għall-kapaċità tal-manifattura għal prodotti ta’ teknoloġija b’emissjonijiet żero netti fl-Unjoni, filwaqt li jsir sforz biex jinkiseb parametru referenzjarju simili għal teknoloġiji b’emissjonijiet żero netti. Jenħtieġ li l-kapaċità annwali tat-teknoloġiji b’emissjonijiet żero netti tal-Unjoni jkollha l-għan li toqrob lejn jew tilħaq parametru referenzjarju annwali ġenerali tal-manifattura ta’ mhux inqas minn 40 % tal-ħtiġijiet annwali tal-implimentazzjoni sal-2030 għat-teknoloġiji b’emissjonijiet żero netti meqjusa fl-intier tagħhom.

(18)

Fl-istess ħin, il-prodotti ta’ teknoloġija b’emissjonijiet żero netti ser jikkontribwixxu għar-reżiljenza u s-sigurtà tal-provvista tal-enerġija nadifa tal-Unjoni. Provvista sigura ta’ enerġija nadifa hija prerekwiżit għall-iżvilupp ekonomiku, kif ukoll għall-ordni pubbliku u s-sigurtà pubblika. Il-prodotti ta’ teknoloġija b’emissjonijiet żero netti ser jagħtu wkoll benefiċċji lil setturi ekonomiċi strateġikament importanti oħra, bħall-biedja u l-produzzjoni tal-ikel, billi jiżguraw aċċess għal enerġija nadifa u makkinarju bi prezzijiet kompetittivi, u b’hekk jikkontribwixxu b’mod sostenibbli għas-sigurtà tal-ikel tal-Unjoni u jipprovdu żbokk dejjem akbar għal alternattivi b’bażi bijoloġika permezz tal-ekonomija ċirkolari. Bl-istess mod, it-twettiq tal-ambizzjonijiet klimatiċi tal-Unjoni ser iwassal kemm għal tkabbir ekonomiku kif ukoll benesseri soċjali.

(19)

Is-suq globali tat-teknoloġiji ewlenin tal-enerġija nadifa li huma manifatturati bil-massa ser ikun jiswa madwar USD 650 biljun fis-sena sal-2030, li huwa aktar minn tliet darbiet il-livell attwali. Globalment, l-industrija b’emissjonijiet żero netti qed tikber b’rata dejjem akbar. L-industrija tal-Unjoni tista’ tipprovdi prosperità għaċ-ċittadini tal-Unjoni fil-każ biss li tkun kompetittiva fis-suq globali u miftuħa għalih. Settur tat-teknoloġija b’emissjonijiet żero netti tal-Unjoni li jkun kompetittiv globalment ser jipprovdi appoġġ għall-iżvilupp ta’ kapaċità tal-manifattura b’saħħitha tal-Unjoni ta’ teknoloġiji b’emissjonijiet żero netti. Barra minn hekk, l-industriji tal-Unjoni li huma globalment kompetittivi f’segmenti tal-ktajjen tal-provvista tat-teknoloġiji b’emissjonijiet żero netti ser jikkontribwixxu għar-reżiljenza ġenerali tal-ktajjen tal-provvista tat-teknoloġiji b’emissjonijiet żero netti tal-Unjoni, u jtejbu l-aċċess tal-Unjoni għal teknoloġiji b’emissjonijiet żero netti.

(20)

Il-manifattura ta’ teknoloġiji b’emissjonijiet żero netti tiddependi fuq ktajjen tal-valur kumplessi u interkonnessi globalment. Sabiex tinżamm il-kompetittività u jitnaqqsu d-dipendenzi strateġiċi attwali fuq l-importazzjoni ta’ prodotti ta’ teknoloġija b’emissjonijiet żero netti u l-ktajjen tal-provvista tagħhom, filwaqt li tiġi evitata l-formazzjoni ta’ oħrajn ġodda, jeħtieġ li l-Unjoni tkompli ssaħħaħ il-bażi industrijali b’emissjonijiet żero netti tagħha u ssir aktar kompetittiva u miftuħa għall-innovazzjoni. Flimkien ma’ miżuri oħra biex isaħħu l-kompetittività tal-Unjoni, il-miżuri biex tiżdied il-kapaċità tal-manifattura fl-Unjoni jenħtieġ li jiżguraw ukoll li l-Unjoni jkollha rwol dominanti f’partijiet strateġiċi tal-katina tal-valur globali, inkluż il-prodotti finali, biex jiġi żgurat il-livell ta’ sigurtà tal-provvista li l-Unjoni teħtieġ sabiex tikseb l-objettivi tagħha fir-rigward tal-klima u l-enerġija. Għalhekk, jenħtieġ li jiġi stabbilit it-tieni parametru referenzjarju globali. Jenħtieġ li l-kapaċità tal-manifattura tal-Unjoni għal teknoloġiji b’emissjonijiet żero netti jkollha l-għan li tikseb sehem akbar tal-produzzjoni dinjija, bil-ħsieb li tikseb 15 % tal-produzzjoni dinjija fil-valur sal-2040, abbażi tal-monitoraġġ kif previst f’dan ir-Regolament. Jenħtieġ li dak it-tieni parametru referenzjarju ma japplikax meta ż-żieda fil-kapaċità tal-manifattura tal-Unjoni tkun ogħla b’mod sinifikanti mill-ħtiġijiet tal-implimentazzjoni tal-Unjoni għat-teknoloġiji korrispondenti neċessarji biex jintlaħqu l-miri tal-Unjoni fir-rigward tal-klima u l-enerġija.

(21)

Sabiex il-proġetti ta’ manifattura tat-teknoloġiji b’emissjonijiet żero netti, inkluż proġetti strateġiċi b’emissjonijiet żero netti, jiġu implimentati jew estiżi malajr kemm jista’ jkun biex tiġi żgurata s-sigurtà tal-provvista tal-Unjoni għal teknoloġiji b’emissjonijiet żero netti, huwa importanti li tiġi żgurata l-effiċjenza fl-ippjanar u ċ-ċertezza tal-investiment billi l-piż amministrattiv fuq il-promoturi ta’ proġetti jinżamm f’livell minimu. Għal dik ir-raġuni, jenħtieġ li jiġu ssimplifikati l-proċessi għall-ħruġ tal-permessi tal-Istati Membri għal proġetti ta’ manifattura tat-teknoloġiji b’emissjonijiet żero netti, inkluż proġetti strateġiċi b’emissjonijiet żero netti, filwaqt li jiġi żgurat li dawn il-proġetti jkunu sikuri, siguri, ambjentalment sostenibbli u jikkonformaw mar-rekwiżiti ambjentali, soċjali u tas-sikurezza. Il-liġi ambjentali tal-Unjoni tistabbilixxi kundizzjonijiet komuni għall-proċess u l-kontenut tal-proċessi nazzjonali għall-ħruġ tal-permessi, u b’hekk tiżgura livell għoli ta’ ħarsien tal-ambjent. Jenħtieġ li l-għoti tal-istatus ta’ proġett strateġiku b’emissjonijiet żero netti jkun mingħajr preġudizzju għal kwalunkwe kundizzjoni applikabbli għall-ħruġ ta’ permessi għall-proġetti rilevanti, inkluż dawk stabbiliti fid-Direttivi 2000/60/KE (13), 2004/35/KE (14), 2010/75/UE (15), 2011/92/UE (16) u 2012/18/UE (17) tal-Parlament Ewropew u tal-Kunsill u d-Direttiva tal-Kunsill 92/43/KEE (18).

(22)

Jenħtieġ li l-Istati Membri jkunu jistgħu, fid-dawl tal-organizzazzjoni interna tagħhom, jagħżlu jekk jistabbilixxux jew jiddeżinjawx il-punti uniċi ta’ kuntatt tagħhom fil-livell lokali, reġjonali jew nazzjonali, jew fi kwalunkwe livell amministrattiv rilevanti ieħor. Barra minn hekk, jenħtieġ li l-awtoritajiet kompetenti rilevanti jispeċifikaw u jqiegħdu għad-dispożizzjoni tal-punt uniku ta’ kuntatt ir-rekwiżiti u l-firxa tal-informazzjoni rikjesta minn promotur ta’ proġett qabel ma jibda l-proċess għall-ħruġ tal-permessi. Jenħtieġ li l-punt uniku ta’ kuntatt ikun responsabbli għall-komunikazzjoni ta’ dik l-informazzjoni lill-promotur ta’ proġett. Jenħtieġ li l-punt uniku ta’ kuntatt, fir-rwol tiegħu ta’ koordinatur, jiffaċilita l-għoti ta’ informazzjoni lill-awtoritajiet kompetenti, b’mod partikolari biex tiġi evitata d-duplikazzjoni ta’ kwalunkwe talba għal proċess għall-ħruġ tal-permessi. Talbiet bħal dawn jistgħu jinkludu studji, permessi jew awtorizzazzjonijiet.

(23)

Sabiex titnaqqas il-kumplessità u jiżdiedu l-effiċjenza u t-trasparenza fil-proċess għall-ħruġ tal-permessi, jenħtieġ li l-promoturi ta’ proġetti ta’ manifattura ta’ teknoloġiji b’emissjonijiet żero, inkluż proġetti strateġiċi, ikunu jistgħu jinteraġixxu ma’ punt uniku ta’ kuntatt li jkun responsabbli għall-faċilitazzjoni u l-koordinazzjoni tal-proċess għall-ħruġ tal-permessi kollu. Għal dak il-għan, jenħtieġ li l-Istati Membri jistabbilixxu jew jiddeżinjaw punt uniku ta’ kuntatt wieħed jew aktar, filwaqt li jiżguraw li l-promoturi ta’ proġetti jkollhom jinteraġixxu biss ma’ punt ta’ kuntatt wieħed. Jenħtieġ li jkun f’idejn l-Istati Membri biex jiddeċiedu jekk punt uniku ta’ kuntatt ikunx ukoll awtorità li tieħu deċiżjonijiet dwar il-ħruġ ta’ permessi. Sabiex tiġi żgurata l-implimentazzjoni effettiva tar-responsabbiltajiet tagħhom, jenħtieġ li l-Istati Membri jipprovdu biżżejjed persunal u riżorsi lill-punti uniċi ta’ kuntatt tagħhom, kif ukoll lil kwalunkwe awtorità involuta fil-proċess għall-ħruġ tal-permessi.

(24)

Sabiex in-negozji u l-promoturi ta’ proġetti, inkluż għal proġetti transfruntieri, ikunu jistgħu jgawdu direttament mill-benefiċċji tas-suq intern mingħajr ma jġarrbu piż amministrattiv addizzjonali mhux neċessarju, ir-Regolament (UE) 2018/1724 tal-Parlament Ewropew u tal-Kunsill (19) li stabbilixxa l-Gateway Diġitali Unika, jipprevedi regoli ġenerali għall-forniment online ta’ informazzjoni, proċeduri u servizzi ta’ assistenza rilevanti għall-funzjonament tas-suq intern. L-informazzjoni li jeħtieġ li tiġi sottomessa lill-kwalunkwe awtorità nazzjonali permezz tal-punt uniku ta’ kuntatt ikkonċernat bħala parti mill-proċessi għall-ħruġ tal-permessi skont dan ir-Regolament hija koperta fl-Anness I tar-Regolament (UE) 2018/1724, u l-proċeduri relatati huma inklużi fl-Anness II ta’ dak ir-Regolament sabiex jiġi żgurat li l-promoturi ta’ proġetti jkunu jistgħu jibbenefikaw minn proċeduri kompletament online u mis-Servizzi tas-Sistema Teknika ta’ Darba Biss. Punti uniċi ta’ kuntatt stabbiliti jew iddeżinjati skont dan ir-Regolament huma inklużi fil-lista ta’ servizzi ta’ assistenza u ta’ soluzzjoni tal-problemi fl-Anness III tar-Regolament (UE) 2018/1724.

(25)

Il-proġetti ta’ manifattura tat-teknoloġiji b’emissjonijiet żero netti jgħaddu minn proċessi twal u kumplessi għall-ħruġ tal-permessi li jistgħu jdumu minn sentejn sa seba’ snin, skont l-Istat Membru, it-teknoloġiji u s-segment tal-katina tal-valur. Meta jitqies id-daqs tal-investimenti meħtieġa, b’mod partikolari għal proġetti ta’ daqs gigafactory li huma meħtieġa biex jintlaħqu l-ekonomiji ta’ skala mistennija, proċessi għall-ħruġ tal-permessi li ma jkunux adegwati joħloqu ostaklu addizzjonali u ta’ spiss detrimentali biex tiżdied il-kapaċità tal-manifattura tat-teknoloġiji b’emissjonijiet żero netti fl-Unjoni. Sabiex il-promoturi ta’ proġetti u investituri oħra jiġu pprovduti bis-sigurtà u ċ-ċarezza meħtieġa biex jiżdied l-iżvilupp ta’ proġetti ta’ manifattura tat-teknoloġiji b’emissjonijiet żero netti, jenħtieġ li l-Istati Membri jiżguraw li l-proċess għall-ħruġ tal-permessi relatat ma’ dawn il-proġetti ma jaqbiżx il-limiti ta’ żmien stabbiliti minn qabel. Għal proġetti strateġiċi b’emissjonijiet żero netti, jenħtieġ li t-tul ta’ żmien tal-proċess għall-ħruġ tal-permessi ma jaqbiżx it-12-il xahar għal faċilitajiet b’output annwali ta’ produzzjoni ta’ 1 GW jew aktar, disa’ xhur għal dawk b’output annwali ta’ produzzjoni ta’ inqas minn 1 GW, jew 18-il xahar għall-permessi kollha meħtieġa biex jitħaddem sit strateġiku ta’ ħżin tas-CO2 u l-iskjerament ta’ proġetti relatati mal-qbid tas-CO2 u t-trasport tas-CO2. Għal proġetti ta’ manifattura tat-teknoloġiji b’emissjonijiet żero netti, jenħtieġ li t-tul ta’ żmien tal-proċess għall-ħruġ tal-permessi ma jaqbiżx it-18-il xahar għal faċilitajiet b’output annwali ta’ produzzjoni ta’ 1 GW jew aktar, u t-12-il xahar għal dawk b’output annwali ta’ produzzjoni ta’ inqas minn 1 GW. Għal teknoloġiji b’emissjonijiet żero netti li għalihom il-metrika tal-GW mhijiex rilevanti, bħal grilji u teknoloġiji tal-qbid u ħżin tal-karbonju (CCS) jew teknoloġiji għat-trasport u l-użu tas-CO2, jenħtieġ li japplikaw il-limiti massimi ta’ dawk l-iskadenzi. Madankollu, l-ewwel pass tal-valutazzjoni tal-impatt fuq l-ambjent skont id-Direttiva 2011/92/UE, li jikkonsisti fit-tħejjija ta’ rapport ta’ valutazzjoni tal-impatt ambjentali, spiss jitwettaq b’mod predominanti mill-promotur ta’ proġett. Għalhekk, jenħtieġ li dak il-pass ma jiġix integrat fl-iskedi ta’ żmien li l-Istati Membri huma marbuta bihom kif imsemmi fil-proċess għall-ħruġ tal-permessi. Għal dak il-għan, jenħtieġ li l-punt uniku ta’ kuntatt jinnotifika d-data sa meta l-promotur ta’ proġett jenħtieġ li jissottometti r-rapport ta’ valutazzjoni tal-impatt ambjentali, u jenħtieġ li kwalunkwe perjodu bejn dik id-data notifikata u s-sottomissjoni effettiva tar-rapport ma jiġix ikkunsidrat bħala parti mill-iskeda taż-żmien. Jenħtieġ li japplika l-istess prinċipju meta, wara l-konsultazzjonijiet meħtieġa, il-punt uniku ta’ kuntatt jinnotifika lill-promotur ta’ proġett dwar l-opportunità li jissottometti informazzjoni addizzjonali biex jitlesta r-rapport ta’ valutazzjoni tal-impatt ambjentali. F’każijiet eċċezzjonali relatati man-natura, il-kumplessità, il-post jew id-daqs tal-proġett propost, jenħtieġ li l-Istati Membri jkunu jistgħu jestendu l-iskedi ta’ żmien. Każijiet eċċezzjonali bħal dawn jistgħu jinkludu ċirkostanzi mhux previsti li jwasslu għall-ħtieġa li jiżdiedu jew jitlestew valutazzjonijiet ambjentali relatati mal-proġett, jew dewmien minħabba l-proċessi ta’ esproprjazzjoni meta jkunu meħtieġa.

(26)

Huwa possibbli li xi proġetti speċifiċi ta’ manifattura b’emissjonijiet żero netti jiġu rikonoxxuti bħala proġetti strateġiċi b’emissjonijiet żero netti. Dawn iġibu benefiċċji addizzjonali, b’mod partikolari fir-rigward tat-tnaqqis tad-dipendenzi tal-Unjoni jew il-kisba tal-Unjoni tal-Enerġija u tal-għanijiet klimatiċi. Il-proġetti ta’ manifattura b’emissjonijiet żero netti jistgħu jikkontribwixxu għat-tisħiħ tar-reżiljenza teknoloġika u industrijali tal-Unjoni billi jżidu l-kapaċità tal-manifattura għal segment ewlieni ta’ katina tal-provvista. B’mod partikolari, iż-żieda fil-kapaċità tal-manifattura għas-setturi li għalihom il-kapaċità tal-manifattura tal-Unjoni tirrappreżenta sehem sinifikanti tal-produzzjoni dinjija, u li għandhom rwol kruċjali fir-reżiljenza tal-Unjoni, tagħmilha possibbli li tissaħħaħ il-pożizzjoni tal-Unjoni fil-katina tal-provvista globali tal-manifattura b’emissjonijiet żero netti u tgħin biex jiġi indirizzat it-tħassib dwar il-vulnerabbiltà tal-importazzjoni. Barra minn hekk, dawk il-proġetti jistgħu jġibu benefiċċji addizzjonali f’termini ta’ żvilupp tal-ħiliet u kompetittività kif ukoll jappoġġaw l-għanijiet ta’ dekarbonizzazzjoni tal-Unjoni permezz tal-implimentazzjoni ta’ prattiki ta’ manifattura ċirkolari u sostenibbli. Fid-dawl ta’ tali benefiċċji addizzjonali, jenħtieġ li dawk il-proġetti jintgħażlu bħala proġetti strateġiċi mill-Istati Membri u jenħtieġ li jibbenefikaw minn qafas li jippermetti l-implimentazzjoni aktar rapida tagħhom, b’mod partikolari permezz ta’ status prijoritarju u limiti ta’ żmien iqsar fil-proċess għall-ħruġ tal-permessi. Jenħtieġ li l-promoturi ta’ proġetti li jixtiequ jirċievu l-istatus ta’ proġett strateġiku b’emissjonijiet żero netti japplikaw formalment għal dan l-istatus mal-Istat Membru rilevanti f’konformità mal-kriterji ta’ applikazzjoni u rikonoxximent stabbiliti f’dan ir-Regolament.

(27)

Il-valutazzjonijiet u l-awtorizzazzjonijiet ambjentali meħtieġa skont id-dritt tal-Unjoni, inkluż fir-rigward tal-ilma, il-ħamrija, l-arja, l-ekosistemi, il-ħabitats, il-bijodiversità u l-għasafar, huma parti integrali mill-proċess għall-ħruġ tal-permessi għal proġett ta’ manifattura tat-teknoloġiji b’emissjonijiet żero netti u salvagwardja essenzjali biex jiġi żgurat li jiġu evitati jew minimizzati l-impatti ambjentali negattivi. Madankollu, biex jiġi żgurat li l-proċessi għall-ħruġ tal-permessi għal proġetti ta’ manifattura tat-teknoloġiji b’emissjonijiet żero netti jkunu prevedibbli u f’waqthom, jenħtieġ li titwettaq kwalunkwe simplifikazzjoni potenzjali tal-valutazzjonijiet u l-awtorizzazzjonijiet meħtieġa, filwaqt li ma jitnaqqasx il-livell ta’ ħarsien tal-ambjent. F’dak ir-rigward, il-valutazzjonijiet neċessarji jenħtieġ li jinġabru flimkien biex tiġi evitata d-duplikazzjoni bla bżonn u l-promoturi ta’ proġetti u l-awtoritajiet rilevanti jenħtieġ li jaqblu b’mod espliċitu dwar l-ambitu tal-valutazzjoni miġbura qabel ma titwettaq il-valutazzjoni biex jiġi evitat segwitu bla bżonn.

(28)

Il-kunflitti dwar l-użu tal-art jistgħu joħolqu ostakli għall-implimentazzjoni ta’ proġetti ta’ manifattura tat-teknoloġiji b’emissjonijiet żero netti. Jenħtieġ li pjanijiet imfassla tajjeb, inkluż il-pjanijiet ta’ ġestjoni tat-territorju u t-tqassim f’żoni, iqisu jekk għandhomx jiġu introdotti proġetti possibbli ta’ manifattura tat-teknoloġija b’emissjonijiet żero netti, filwaqt li jitqiesu r-riżultati tal-konsultazzjonijiet pubbliċi u l-impatti ambjentali potenzjali. Dawk il-pjanijiet għandhom il-potenzjal li jgħinu l-ibbilanċjar tal-interess pubbliku u l-ġid komuni, inaqqsu l-potenzjal għall-kunflitt u jaċċelleraw l-implimentazzjoni sostenibbli ta’ proġetti ta’ manifattura tat-teknoloġiji b’emissjonijiet żero netti fl-Unjoni. Għalhekk, jenħtieġ li l-awtoritajiet nazzjonali, reġjonali u lokali rilevanti jiġu mħeġġa jinkludu, fejn xieraq, dispożizzjonijiet għal proġetti ta’ manifattura tat-teknoloġiji b’emissjonijiet żero netti, inkluż proġetti strateġiċi b’emissjonijiet żero netti, meta jiżviluppaw xi pjani.

(29)

Ir-raggruppament tal-attività industrijali diretta lejn is-simbjożi industrijali jimminimizza l-impatt ambjentali tal-attivitajiet u jipprovdi kisbiet fl-effiċjenza għall-atturi industrijali involuti. Ir-raggruppament jista’ jikkontribwixxi b’mod sostanzjali biex jinkisbu l-objettivi ta’ dan ir-Regolament. F’dak ir-rigward, dan ir-Regolament jippromwovi l-iżvilupp ta’ Widien ta’ Aċċellerazzjoni b’emissjonijiet żero netti (il-“Widien”). L-objettivi tal-Widien huma li joħolqu raggruppamenti ta’ attività industrijali b’emissjonijiet żero netti sabiex iżidu l-attraenza tal-Unjoni bħala post għall-attivitajiet ta’ manifattura u li jissimplifikaw aktar il-proċeduri amministrattivi għall-ħolqien ta’ kapaċitajiet tal-manifattura b’emissjonijiet żero netti. Jenħtieġ li l-Widien ikunu limitati fl-ambitu ġeografiku u teknoloġiku sabiex jippromwovu simbjożi industrijali. Meta jiddefinixxu l-kamp ta’ applikazzjoni, jenħtieġ li l-Istati Membri jqisu l-ħtieġa li jiffavorixxu użi multipli tal-oqsma identifikati biex jiżguraw l-espansjoni, ir-riindustrijalizzazzjoni jew il-ħolqien tar-raggruppamenti industrijali tat-teknoloġija b’emissjonijiet żero netti tal-Unjoni u d-disponibbiltà tal-infrastruttura tat-trasport u tan-network rilevanti, il-ħżin u għodod oħra ta’ flessibbiltà. Jenħtieġ li l-istabbiliment tal-Widien jikkorrispondi għal kwalunkwe riżerva ta’ proġetti ppjanati jew eżistenti u l-potenzjal li jiġu aċċessati jew organizzati opportunitajiet ta’ edukazzjoni u taħriġ biex tiġi żgurata d-disponibbiltà ta’ ħaddiema tas-sengħa. Jenħtieġ li l-Widien jiġu ddeżinjati mill-Istati Membri u kull deżinjazzjoni jenħtieġ li tkun akkumpanjata minn pjan li jistabbilixxi miżuri nazzjonali konkreti biex tiżdied l-attraenza tal-Wied bħala post għall-attivitajiet ta’ manifattura. Jenħtieġ li l-Widien, b’mod partikolari, jintużaw bħala għodda għat-tisħiħ tal-attivitajiet industrijali b’emissjonijiet żero netti fir-reġjuni, filwaqt li titqies it-tranżizzjoni ġusta u l-objettivi tagħha, b’mod partikolari fir-reġjuni tal-faħam fi tranżizzjoni.

(30)

Jenħtieġ li l-Istati Membri jkunu jistgħu jiddeżinjaw u jappoġġaw il-Widien. Meta jiddeżinjaw Wied, jenħtieġ li l-Istati Membri jfasslu pjan li jispeċifika liema attività tal-manifattura b’emissjonijiet żero netti tkun ser tiġi koperta fil-Wied (il-“Pjan”). Jenħtieġ li l-Istati Membri jwettqu wkoll valutazzjonijiet tal-impatt ambjentali kif meħtieġ għall-attivitajiet tal-manifattura b’emissjonijiet żero netti li jkunu ser jitwettqu fil-Wied. Dawn il-valutazzjonijiet tal-impatt jillimitaw b’mod sostanjali l-ħtieġa li l-impriżi jwettqu dawk il-valutazzjonijiet għall-permessi għall-attivitajiet tal-manifattura b’emissjonijiet żero netti fil-konfini tal-Wied. Jenħtieġ li l-Pjan jinkludi r-riżultati tal-valutazzjonijiet tal-impatt ambjentali kif ukoll il-miżuri nazzjonali li għandhom jittieħdu biex jiġi minimizzat jew mitigat kwalunkwe impatt ambjentali negattiv. Jenħtieġ li l-Pjan jinkludi wkoll miżuri nazzjonali konkreti biex tiġi appoġġata l-attività industrijali fil-konfini tal-Wied. Jenħtieġ li dawk il-miżuri jinkludu miżuri biex isir investiment jew jiġi xprunat investiment privat fl-infrastruttura diġitali, tal-enerġija u tat-trasport, kif ukoll miżuri biex titnaqqas in-nefqa operazzjonali għall-industrija fil-Wied, bħal kuntratti għad-differenza fil-prezzijiet tal-enerġija. Miżuri oħra li għandhom jitqiesu jinkludu dawk immirati biex isaħħu l-protezzjoni tal-proprjetà intellettwali, jistabbilixxu ċentru tal-innovazzjoni fil-Wied u jattiraw negozji ġodda lejn il-Wied. Sabiex tiġi pprovduta s-sigurtà tal-investiment għall-industrija tal-Unjoni, jenħtieġ li l-Pjan jispeċifika wkoll it-tul ta’ żmien tal-miżuri ta’ appoġġ.

(31)

L-Istati Membri huma mħeġġa jiddeżinjaw Widien f’reġjuni inqas żviluppati u dawk fi tranżizzjoni, kif ukoll f’żoni megħjuna. L-investimenti li għandhom l-għan li jistabbilixxu Widien, biex jgħammruhom b’infrastruttura xierqa, jikkonvertu siti abbandunati u jiżviluppaw il-ħiliet lokali, jistgħu jibbenefikaw minn għajnuna finanzjarja pubblika, inkluż permezz ta’ fondi b’ġestjoni kondiviża, jiġifieri l-Fond Ewropew għall-Iżvilupp Reġjonali u l-Fond ta’ Koeżjoni stabbiliti bir-Regolament (UE) 2021/1058 tal-Parlament Ewropew u tal-Kunsill (20), il-Fond għal Tranżizzjoni Ġusta stabbilit bir-Regolament (UE) 2021/1056 tal-Parlament Ewropew u tal-Kunsill (21), u l-Fond Soċjali Ewropew Plus (FSE+) stabbilit bir-Regolament (UE) 2021/1057 tal-Parlament Ewropew u tal-Kunsill (22). F’konformità mar-regoli li jirregolaw kull fond u fid-diskrezzjoni tal-awtoritajiet ta’ ġestjoni rilevanti, dawk l-investimenti jistgħu jirċievu l-ogħla rati ta’ kofinanzjament possibbli permessi minn kull fond.

(32)

Minħabba r-rwol tal-Widien fl-aggregazzjoni u l-ġbir flimkien tar-riżorsi li huma rilevanti għall-awtonomija strateġika miftuħa tal-Unjoni, u l-kontribut tagħhom għas-sigurtà tal-provvista tal-Unjoni għal teknoloġiji b’emissjonijiet żero netti, kif ukoll it-tranżizzjoni ekoloġika u diġitali, jenħtieġ li l-awtoritajiet tal-ħruġ tal-permessi rilevanti jqisu l-Widien bħala fl-interess pubbliku. Dik il-miżura tikkonsisti fl-introduzzjoni ta’ dispożizzjoni li tispeċifika li l-proġetti fil-Widien huma ta’ interess pubbliku għall-finijiet tal-liġi ambjentali rilevanti tal-Unjoni. Jenħtieġ li dawk il-proġetti ma jkollhomx effetti negattivi kbar fuq l-ambjent li ma jkunux jistgħu jiġu mitigati jew ikkumpensati. Abbażi ta’ valutazzjoni ex ante, l-awtorità tal-ħruġ tal-permessi rilevanti tista’ tikkonkludi li l-interess pubbliku moqdi mill-proġetti f’Wied jipprevali fuq l-interessi pubbliċi relatati mal-ħarsien tan-natura u tal-ambjent u li, konsegwentement, il-proġetti jistgħu jiġu awtorizzati, dment li jiġu ssodisfati l-kundizzjonijiet kollha stabbiliti fid-Direttiva 2000/60/KE, id-Direttiva 2009/147/KE tal-Parlament Ewropew u tal-Kunsill (23), id-Direttiva 92/43/KEE u l-atti leġiżlattivi tal-Unjoni dwar ir-restawr tan-natura.

(33)

In-nuqqas ta’ prevedibbiltà, il-kumplessità u, xi drabi, it-tul eċċessiv tal-proċessi nazzjonali għall-ħruġ ta’ permessi jipperikolaw is-sigurtà tal-investiment neċessarja għall-iżvilupp effettiv ta’ proġetti ta’ manifattura tat-teknoloġija b’emissjonijiet żero netti, inkluż proġetti strateġiċi b’emissjonijiet żero netti. Għalhekk, sabiex tiġi żgurata u aċċellerata implimentazzjoni effettiva, jenħtieġ li l-Istati Membri japplikaw proċessi ssimplifikati u effiċjenti għall-ħruġ ta’ permessi. Barra minn hekk, jenħtieġ li l-Istati Membri jikkunsidraw miżuri innovattivi f’dak il-qasam. Barra minn hekk, jenħtieġ li l-proġetti strateġiċi b’emissjonijiet żero netti jitqiesu bħala urġenti fil-livell nazzjonali u għaldaqstant jenħtieġ li jingħataw status prijoritarju sakemm u sal-punt li l-liġi nazzjonali tipprevedi tali proċeduri ta’ urġenza fil-proċeduri ġudizzjarji u ta’ soluzzjoni ta’ tilwim kollha relatati magħhom, filwaqt li jiġi żgurat ir-rispett għad-drittijiet tad-difiża, jekk u sal-punt li l-liġi nazzjonali tipprevedi tali proċeduri ta’ urġenza. Dan jenħtieġ li jsir mingħajr ma l-awtoritajiet kompetenti jkunu preklużi milli jissimplifikaw il-proċessi għall-ħruġ ta’ permessi għal, fost l-oħrajn, proġetti oħra ta’ manifattura tat-teknoloġija b’emissjonijiet żero netti li ma jkunux proġetti strateġiċi b’emissjonijiet żero netti.

(34)

Sabiex jintlaħqu l-objettivi tal-2030, hija meħtieġa enfasi partikolari fuq proġetti strateġiċi b’emissjonijiet żero netti, anke fid-dawl tal-kontribut sinifikanti tagħhom għall-perkors lejn emissjonijiet żero netti ta’ CO2 sal-2050. Dawk il-proġetti jaqdu rwol ewlieni fl-awtonomija strateġika miftuħa tal-Unjoni, filwaqt li jiżguraw li ċ-ċittadini jkollhom aċċess għal enerġija nadifa, affordabbli u sigura. Minħabba r-rwol tagħhom, jenħtieġ li dawk il-proġetti jibbenefikaw minn proċeduri saħansitra aktar simplifikati u effiċjenti għall-ħruġ tal-permessi, jiksbu l-istatus tal-ogħla sinifikanza nazzjonali possibbli skont il-liġi nazzjonali u jibbenefikaw minn appoġġ addizzjonali biex jattiraw l-investimenti, filwaqt li xorta jissodisfaw l-obbligi tal-Unjoni u dawk internazzjonali skont id-Direttivi 2009/147/KE, 92/43/KEE, l-atti leġiżlattivi tal-Unjoni dwar ir-restawr tan-natura u l-Konvenzjoni tal-Kummissjoni Ekonomika għall-Ewropa tan-Nazzjonijiet Uniti dwar l-Aċċess għall-Informazzjoni, il-Parteċipazzjoni tal-Pubbliku fit-Teħid ta’ Deċiżjonijiet u l-Aċċess għall-Ġustizzja fi Kwistjonijiet Ambjentali, iffirmata f’Aarhus fil-25 ta’ Ġunju 1998, kif ukoll obbligi applikabbli fl-oqsma tal-liġi soċjali u tax-xogħol stabbiliti mil-liġi tal-Unjoni jew nazzjonali.

(35)

Minħabba r-rwol tagħhom fl-iżgurar tas-sigurtà tal-provvista tal-Unjoni għal teknoloġiji b’emissjonijiet żero netti, u l-kontribut tagħhom għall-awtonomija strateġika miftuħa tal-Unjoni u t-tranżizzjoni ekoloġika u diġitali, jenħtieġ li l-awtorità tal-ħruġ tal-permessi rilevanti tqis li l-proġetti strateġiċi b’emissjonijiet żero netti jkunu fl-interess pubbliku. Fuq il-bażi tal-valutazzjoni tagħha ta’ każ b’każ, awtorità tal-ħruġ ta’ permessi tista’ tikkonkludi li l-interess pubbliku moqdi mill-proġett jipprevali fuq l-interessi pubbliċi relatati mal-ħarsien tan-natura u tal-ambjent u li konsegwentement il-proġett jista’ jiġi awtorizzat, dment li jiġu sodisfatti l-kundizzjonijiet rilevanti kollha stabbiliti fid-Direttiva 2000/60/KE, 2009/147/KE jew 92/43/KEE, jew fl-atti leġiżlattivi tal-Unjoni dwar ir-restawr tan-natura.

(36)

Huwa neċessarju wkoll li jiġu previsti miżuri biex tintlaħaq il-mira tal-Unjoni ta’ 50 miljun tunnellata ta’ kapaċità operazzjonali annwali tal-injezzjoni tas-CO2 sal-2030, u b’hekk tiġi appoġġata d-dekarbonizzazzjoni tal-industriji tal-Unjoni u jiġi miġġieled it-tibdil fil-klima.

(37)

Fl-2020, il-Kummissjoni adottat strateġija tal-UE għall-integrazzjoni tas-sistema tal-enerġija. Dik l-istrateġija tistabbilixxi viżjoni dwar kif għandha aċċellerata t-tranżizzjoni lejn sistema tal-enerġija aktar integrata li tappoġġa ekonomija newtrali għall-klima bl-aktar kost baxx fis-setturi kollha. Din tinkludi tliet kunċetti komplementari u li jsaħħu lil xulxin b’mod reċiproku: l-ewwel, sistema tal-enerġija aktar “ċirkolari”, bl-effiċjenza enerġetika fil-qalba tagħha; it-tieni, elettrifikazzjoni diretta akbar tas-setturi tal-użu finali; it-tielet, l-użu ta’ fjuwils rinnovabbli u b’livell baxx ta’ emissjonijiet tal-karbonju, inkluż l-idroġenu. Il-kunsiderazzjonijiet relatati mal-integrazzjoni tas-sistema tal-enerġija jirreferu għal soluzzjonijiet għall-integrazzjoni sħiħa tal-elettriku kollu ġġenerat mill-installazzjonijiet tal-enerġija rinnovabbli fis-sistema usa’ tal-enerġija. Dak jinkludi l-adozzjoni ta’ soluzzjonijiet tekniċi li jippermettu l-integrazzjoni ta’ elettriku żejjed iġġenerat minn installazzjonijiet tal-elettriku rinnovabbli, inkluż permezz tal-ħżin u mill-espansjoni fil-grilja tas-sorsi tal-enerġija mingħajr fossili li jistgħu jiġu ppjanati, fid-diversi forom tiegħu u l-ġestjoni tad-domanda.

(38)

Is-CCS hija teknoloġija li ser tikkontribwixxi għall-mitigazzjoni tat-tibdil fil-klima. Din tikkonsisti mill-qbid tas-CO2 mill-installazzjonijiet industrijali, it-trasport tiegħu sa sit tal-ħżin u l-injezzjoni tiegħu f’formazzjoni ġeoloġika taħt l-art xierqa għall-finijiet ta’ ħżin permanenti.

(39)

L-iżvilupp ta’ soluzzjonijiet tas-CCS għall-industrija qed jiffaċċa falliment fil-koordinazzjoni. Minn naħa waħda, minkejja l-fatt li s-sinjal tal-prezz tas-CO2 ipprovdut mill-ETS jagħmel tali investimenti ekonomikament vjabbli, industriji li jinvestu fil-qbid tal-emissjonijiet tas-CO2 jiffaċċjaw riskju sinifikanti li ma jkunux jistgħu jaċċessaw sit ta’ ħżin ġeoloġiku permess. Min-naħa l-oħra, l-investituri fl-ewwel siti tal-ħżin tas-CO2 jiffaċċjaw kostijiet inizjali biex jidentifikawhom, jiżviluppawhom u jivvalutawhom anke qabel ma jkunu jistgħu japplikaw għal permess għall-ħżin regolatorju. It-trasparenza dwar il-kapaċità potenzjali ta’ ħżin tas-CO2 f’termini tal-adegwatezza ġeoloġika taż-żoni rilevanti u d-data ġeoloġika eżistenti kollha, inkluż data mhux ipproċessata u data dwar il-mudell, b’mod partikolari mill-esplorazzjoni tas-siti ta’ produzzjoni tal-idrokarburi, tista’ tappoġġa lill-operaturi tas-suq biex jippjanaw l-investimenti tagħhom. Jenħtieġ li l-Istati Membri, filwaqt li jqisu l-kunfidenzjalità, is-sigurtà nazzjonali u s-sensittivitajiet kummerċjali kif ukoll kumpens adegwat għal data ġġenerata privatament u dik li hija proprjetà privata, jagħmlu tali data eżistenti disponibbli għall-pubbliku u jirrapportaw regolarment minn perspettiva li tħares ‘il quddiem dwar kwalunkwe progress fl-iżvilupp ta’ siti tal-ħżin tas-CO2 u l-ħtiġijiet korrispondenti għall-kapaċitajiet ta’ injezzjoni u ħżin, sabiex tintlaħaq kollettivament il-mira għall-Unjoni kollha għall-kapaċità tal-injezzjoni tas-CO2. Dawk l-obbligi ta’ trasparenza huma mingħajr preġudizzju għad-dritt tal-Istati Membri li ma jawtorizzawx jew li jillimitaw l-implimentazzjoni tal-kapaċità tal-ħżin tas-CO2 fit-territorju tagħhom.

(40)

Sabiex jiġu evitati assi mhux rekuperabbli u sabiex jiġi żgurat li l-kapaċità tal-injezzjoni ekonomikament vijabbli twassal għal tnaqqis tas-CO2, jenħtieġ li jinbena argument għall-vijabbiltà tul il-katina tal-valur sħiħa. Għalhekk, jeħtieġ li jiġu stabbiliti sal-2030 ktajjen tal-valur tas-CCS sħaħ u individwali inkluż il-qbid, it-trasport u l-ħżin permezz ta’ politiki nazzjonali u tal-Unjoni effettivi b’regolamenti xierqa li jiggarantixxu l-kompetizzjoni u l-aċċess miftuħ.

(41)

Ostaklu ewlieni għall-investimenti fil-qbid tal-karbonju li llum qed isiru dejjem aktar ekonomikament vijabbli huwa d-disponibbiltà ta’ siti tal-ħżin tas-CO2 operattivi fl-Unjoni, li jifirdu l-inċentivi dderivati mid-Direttiva 2003/87/KE tal-Parlament Ewropew u tal-Kunsill (24). Sabiex tiżviluppa t-teknoloġija u tespandi l-kapaċitajiet tal-manifattura ewlenin tagħha, jenħtieġ li l-Unjoni tiżviluppa provvista li tħares ‘il quddiem ta’ siti ta’ ħżin ġeoloġiku permanenti tas-CO2 permessi f’konformità mad-Direttiva 2009/31/KE tal-Parlament Ewropew u tal-Kunsill (25) kif ukoll infrastrutturi tat-trasport tas-CO2. Billi tiġi definita mira tal-Unjoni ta’ 50 miljun tunnellata ta’ kapaċità tal-injezzjoni tas-CO2 operazzjonali annwali sal-2030, f’konformità mal-kapaċitajiet mistennija meħtieġa sal-2030, u filwaqt li jitqiesu l-kumpaniji li joperaw primarjament fl-Istati Membri b’kapaċità ta’ ħżin limitata ħafna minħabba restrizzjonijiet legali, ġeoloġiċi, ġeografiċi, tekniċi jew tas-suq, is-setturi rilevanti jistgħu jikkoordinaw l-investimenti tagħhom lejn katina tal-valur Ewropea tat-trasport u tal-ħżin tas-CO2 b’emissjonijiet żero netti li l-industriji jistgħu jużaw biex jiddekarbonizzaw l-operazzjonijiet tagħhom. Din l-implimentazzjoni inizjali ser tappoġġa wkoll aktar ħżin tas-CO2 f’perspettiva tal-2050. Skont l-istimi tal-Kummissjoni, l-Unjoni jista’ jkollha bżonn taqbad sa 550 miljun tunnellata ta’ CO2 kull sena sal-2050 biex tilħaq l-objettiv ta’ emissjonijiet żero netti, inkluż għall-assorbimenti tal-karbonju. Dan l-objettiv ta’ kapaċità ta’ ħżin fuq skala industrijali tal-ewwel tip tiegħu ser ineħħi r-riskju mill-investimenti fil-qbid tal-emissjonijiet tas-CO2 bħala għodda importanti biex tinkiseb in-newtralità klimatika. Meta dan ir-Regolament jiġi inkorporat fil-Ftehim dwar iż-Żona Ekonomika Ewropea, il-mira tal-Unjoni ta’ 50 miljun tunnellata ta’ kapaċità operazzjonali annwali tal-injezzjoni tas-CO2 sal-2030 ser tiġi aġġustata kif xieraq. Biex tiġi żgurata l-kisba tal-mira tal-Unjoni, jenħtieġ li l-Istati Membri jieħdu l-miżuri neċessarji biex jiffaċilitaw u jinċentivaw l-implimentazzjoni ta’ proġetti tas-CCS. Jenħtieġ li dawn il-miżuri jinkludu wkoll miżuri li jinċentivaw lill-emittenti biex jaqbdu l-emissjonijiet u appoġġ għall-investiment għall-investituri għall-infrastrutturi għat-trasport tas-CO2 biex jittrasportaw is-CO2 lejn is-siti tal-ħżin.

(42)

Jenħtieġ li kwalunkwe ftehim internazzjonali relatat mal-ħżin permanenti tas-CO2 tal-Unjoni f’pajjiżi terzi jipprevedi kundizzjonijiet ekwivalenti biex jiġi żgurat il-ħżin ġeoloġiku b’mod permanenti u sikur għall-ambjent tas-CO2 maqbud u jiżgura li l-ħżin tas-CO2 tal-Unjoni ma jintużax biex tiżdied il-produzzjoni tal-idrokarburi u jikkorrispondi għal tnaqqis ġenwin tal-emissjonijiet.

(43)

Permezz tad-definizzjoni ta’ siti ta’ ħżin tas-CO2 u kwalunkwe proġett relatat mal-qbid tas-CO2 u ta’ infrastruttura tas-CO2 li jikkontribwixxi għall-mira tal-Unjoni għall-2030 bħala proġett strateġiku b’emissjonijiet żero netti, l-iżvilupp ta’ siti ta’ ħżin tas-CO2 jista’ jiġi aċċellerat u ffaċilitat, u d-domanda industrijali dejjem akbar għas-siti ta’ ħżin tista’ tiġi indirizzata lejn is-siti ta’ ħżin l-aktar kosteffettivi. Volum dejjem akbar ta’ siti tat-tħaffir għall-gass u ż-żejt li qed jiġu eżawriti u li jistgħu jiġu kkonvertiti f’siti tal-ħżin sikuri tas-CO2 jinsabu fi tmiem il-ħajja tal-produzzjoni utli tagħhom. Barra minn hekk, l-industrija taż-żejt u tal-gass affermat id-determinazzjoni tagħha li tibda tranżizzjoni tal-enerġija u għandha l-assi, il-ħiliet u l-għarfien meħtieġa biex tesplora u tiżviluppa siti ta’ ħżin addizzjonali. Sabiex tintlaħaq il-mira tal-Unjoni ta’ 50 miljun tunnellata ta’ kapaċità operazzjonali annwali tal-injezzjoni tas-CO2 sal-2030, jeħtieġ li s-settur jiġbor il-kontributi tiegħu biex jiżgura li s-CCS bħala soluzzjoni klimatika tkun disponibbli qabel id-domanda. Sabiex jiġi żgurat żvilupp tas-siti ta’ ħżin tas-CO2 f’waqtu u kosteffettiv fl-Unjoni kollha f’konformità mal-objettiv tal-Unjoni għall-kapaċità tal-injezzjoni, jenħtieġ li d-detenturi tal-liċenzja tal-produzzjoni taż-żejt u tal-gass fl-Unjoni jikkontribwixxu għal dik il-mira fuq bażi pro rata tal-kapaċità tagħhom tal-manifattura taż-żejt u tal-gass, filwaqt li jiġu pprovduti flessibbiltajiet biex jikkooperaw u jitqiesu kontributi oħra ta’ partijiet terzi. Jenħtieġ li jitrawwem approċċ ta’ katina tal-valur mill-azzjonijiet meħuda kemm fil-livell tal-Unjoni kif ukoll f’dak nazzjonali. Għaldaqstant, jenħtieġ li d-detenturi tal-liċenzja tal-produzzjoni taż-żejt u tal-gass fl-Unjoni jwettqu l-investimenti neċessarji u jappoġġaw l-iżvilupp ta’ mudelli kummerċjali vijabbli għall-katina tal-valur tad-diossidu tal-karbonju kollha.

(44)

Sabiex jikkontribwixxu għall-objettiv tal-kapaċità tal-injezzjoni tas-CO2 tal-Unjoni, l-entitajiet obbligati jistgħu jidħlu fi ftehimiet ma’ entitajiet mhux obbligati biex jissodisfaw l-obbligu kollu tagħhom jew parti minnu. Dawk il-ftehimiet jistgħu jkunu parti minn ftehim ta’ impriża konġunta li jistabbilixxi sit tal-ħżin jew jitwettqu separatament bejn il-partijiet biex jissodisfaw il-kontribut tal-entità obbligata. Meta tali impriżi konġunti jkunu ġew stabbiliti qabel id-data tad-dħul fis-seħħ ta’ dan ir-Regolament, il-kapaċità sħiħa tal-injezzjoni tal-proġett konġunt rilevanti ta’ ħżin tas-CO2 tista’ tintuża biex jiġu ssodisfati l-obbligi tal-partijiet obbligati.

(45)

Sabiex jiġi żgurat li s-siti tal-ħżin jiġu żviluppati f’kundizzjonijiet tas-suq tajbin, jenħtieġ li l-Kummissjoni twettaq valutazzjoni li tħares lejn ir-relazzjoni bejn id-domanda konkreta għall-kapaċità tal-injezzjoni għal proġetti ta’ qbid tas-CO2 u l-infrastruttura ewlenija neċessarja għat-trasport tas-CO2 li jkun għaddej jew li jkun ippjanat li jkun operazzjonali sal-2030 u l-obbligi tal-kapaċità tal-ħżin tal-2030.

(46)

Id-derogi mill-obbligu huma għodda essenzjali għall-prevenzjoni ta’ assi mhux rekuperabbli f’dawn iċ-ċirkostanzi. Biex japplikaw dawn id-derogi b’mod effettiv, jenħtieġ li l-Istati Membri u l-Kummissjoni jinvolvu ruħhom bis-sħiħ mal-entitajiet awtorizzati rilevanti fi kwalunkwe valutazzjoni tal-ħtieġa għal deroga, b’mod partikolari fil-każ fejn entità awtorizzata tindika l-ħtieġa għal deroga. Għall-fini li jintlaħaq l-objettiv tal-Unjoni fir-rigward tal-kapaċità tal-injezzjoni tas-CO2, fejn, abbażi tal-valutazzjoni tal-Kummissjoni, ma tingħata l-ebda deroga, jew meta l-Istat Membru rilevanti ma jkunx talab deroga, il-Kummissjoni u l-Istat Membru ser jinvolvu ruħhom mal-entitajiet awtorizzati rilevanti biex jgħinu fis-soluzzjoni tal-ostakli u d-diffikultajiet sabiex tiġi ffaċilitata l-kisba tal-obbligu.

(47)

Huwa essenzjali li jsir sforz politiku addizzjonali biex tiġi żgurata l-implimentazzjoni tal-ippjanar tal-infrastruttura transfruntiera. L-aċċessibbiltà u l-konnettività tal-firxa sħiħa ta’ arranġamenti għat-trasport tas-CO2 għandhom rwol kruċjali għall-implimentazzjoni ta’ proġetti ta’ CCS u ta’ qbid u użu tal-karbonju. Dawn l-arranġamenti jkopru l-vapuri, il-barkuni, il-ferroviji u t-trakkijiet kif ukoll il-faċilitajiet fissi għall-konnessjoni u għat-trakkar, għal-likwefazzjoni, għall-ħżin bafer u għall-konvertituri tas-CO2 bil-ħsieb tat-trasport ulterjuri tiegħu minn ġol-pipelines u f’modi ddedikati ta’ trasport.

(48)

Jenħtieġ li jkun possibbli li l-Istati Membri jiffurmaw, jew jipprovdu appoġġ għall-formazzjoni ta’ entitajiet li jkollhom l-objettiv li joħolqu networks tat-trasport tas-CO2 inkluż il-kostruzzjoni ta’ infrastruttura jew il-forniment ta’ bastimenti jew mezzi oħra ta’ trasferiment.

(49)

Il-qbid, l-użu u l-ħżin tas-CO2 inevitabbilment ser ikunu parti mill-futur dekarbonizzat tal-Unjoni inkluż l-assorbimenti. Suq li jiffunzjona sew fl-Unjoni kollha għas-CO2 maqbud, għas-servizzi tal-injezzjoni tas-CO2, għas-servizzi tat-trasport tas-CO2 u għall-attivitajiet tal-użu tal-karbonju huwa neċessarju. Jenħtieġ li dan is-suq jagħti riżultati tanġibbli fir-rigward ta’ ċerti objettivi fil-qasam tal-ordni pubbliku bl-aktar mod ekonomikament vantaġġuż. Objettiv ġenerali huwa d-dekarbonizzazzjoni sostenibbli u kosteffettiva tal-industrija tal-Unjoni billi jiġi żgurat li kwalunkwe emissjoni tas-CO2 li ma tistax titnaqqas b’mezzi tekniċi, jew fejn ma jkunx ekonomikament vijabbli li titnaqqas dik l-emissjoni, tkun tista’ tinqabad u tinħażen jew tintuża, filwaqt li jiġu evitati emissjonijiet ittardjati. Jenħtieġ li dak is-suq jiżgura wkoll is-sikurezza, is-sostenibbiltà u l-permanenza tal-ħżin ġeoloġiku tas-CO2 maqbud u li s-CO2 maqbud ikun disponibbli għall-attivitajiet tal-użu tal-karbonju f’konformità mal-objettivi klimatiċi tal-Unjoni. Jenħtieġ li suq li jiffunzjona sew għas-CO2 ikun mirfud ukoll minn network ta’ infrastruttura tat-trasport tas-CO2 b’impronta ambjentali minima li jkun aċċessibbli għall-atturi tas-suq b’kundizzjonijiet ġusti, miftuħa u nondiskriminatorji. Jenħtieġ li s-suq jikkonforma mal-istandards ambjentali tal-Unjoni.

(50)

L-użu tas-CO2 maqbud f’ċerti proċessi tal-produzzjoni jista’ jaħżen is-CO2 b’mod permanenti jew jikkontribwixxi għat-tnaqqis tad-dipendenza tal-Unjoni fuq il-fjuwils fossili. Għalhekk, jenħtieġ li l-entitajiet kollha involuti fil-katina tal-valur tal-attivitajiet tal-injezzjoni tas-CO2 stabbiliti f’dan ir-Regolament jiġu mħeġġa jikkunsidraw jekk is-CO2 li għandu jinħażen jistax jinħażen b’mod permanenti fi prodotti ġodda jew jistax jappoġġa l-objettivi tal-Unjoni li tnaqqas id-dipendenza tagħha fuq il-fjuwils fossili.

(51)

L-Unjoni għenet fil-bini ta’ sistema ekonomika globali bbażata fuq kummerċ miftuħ, trasparenti u bbażat fuq ir-regoli, għamlet pressjoni favur ir-rispett u l-avvanz tal-istandards ta’ sostenibbiltà soċjali u ambjentali u dawk għat-tranżizzjoni klimatika, u hija impenjata bis-sħiħ għal dawk il-valuri. L-Unjoni għandha l-għan li toħloq kundizzjonijiet ekwivalenti ta’ kompetizzjoni billi tirriforma l-Organizzazzjoni Dinjija tal-Kummerċ (WTO), tibni sħubijiet ġodda u tiġġieled kontra prattiki kummerċjali inġusti u kapaċità żejda tal-produzzjoni, biex tiżgura ambjent kompetittiv ġust għall-industrija tal-Unjoni, inkluż permezz ta’ Sħubijiet Industrijali b’Emissjonijiet Żero Netti, li jipprovdu impjiegi ta’ kwalità għall-ħaddiema.

(52)

Sabiex jiġi żgurat l-aċċess tal-Unjoni għal provvista sigura u sostenibbli ta’ teknoloġiji b’emissjonijiet żero netti neċessarji biex tiġi ssalvagwardata r-reżiljenza tal-Unjoni u sabiex jintlaħqu l-miri tagħha fir-rigward tan-newtralità klimatika, jeħtieġ li s-suq intern jkun ambjent ta’ appoġġ biex isseħħ l-innovazzjoni f’teknoloġiji b’emissjonijiet żero netti. L-innovazzjoni ser tkun fattur kruċjali biex tiġi żgurata l-kompetittività tal-Unjoni kif ukoll biex jintlaħqu l-objettivi ta’ emissjonijiet żero netti mill-aktar fis possibbli. Minħabba l-iżviluppi rapidi fit-teknoloġiji b’emissjonijiet żero netti kif ukoll il-gwida regolatorja sinifikanti pprovduta għat-tranżizzjoni ekoloġika, huwa tal-akbar importanza, sabiex jintlaħqu l-objettivi ta’ dan ir-Regolament, li l-impatti potenzjali tal-liġi tal-Unjoni u tal-inizjattivi politiċi tagħha fuq l-innovazzjoni jitqiesu matul it-tħejjija, ir-rieżami u r-reviżjoni tagħhom permezz tal-applikazzjoni tal-prinċipju tal-innovazzjoni.

(53)

Sabiex jiġu riflessi l-objettivi ta’ dan ir-Regolament, il-Kummissjoni tista’ tikkunsidra jekk taġġornax il-Perkorsi ta’ Tranżizzjoni li qed jiġu żviluppati wara l-komunikazzjoni tal-Kummissjoni ta’ Mejju 2021 u li jistgħu jidentifikaw faċilitaturi kif ukoll ostakli għat-tranżizzjoni u l-kompetittività tal-industrija tal-Unjoni, jew jekk tqisx dan ir-Regolament fi kwalunkwe inizjattiva futura bħal din.

(54)

Skont l-ewwel pilastru tal-Pjan Industrijali tal-Patt Ekoloġiku, l-Unjoni trid tiżviluppa u żżomm bażi industrijali għall-forniment ta’ soluzzjonijiet ta’ teknoloġiji b’emissjonijiet żero netti biex tiżgura l-provvista tal-enerġija tagħha, filwaqt li tilħaq ukoll l-ambizzjonijiet tagħha dwar in-newtralità klimatika. Sabiex jiġi appoġġat dak l-għan u jiġu evitati d-dipendenzi għall-provvista ta’ teknoloġiji b’emissjonijiet żero netti li jdewmu l-isforzi tal-Unjoni għat-tnaqqis tal-emissjonijiet ta’ gassijiet serra jew li jpoġġu f’riskju s-sigurtà tal-provvista tal-enerġija, jenħtieġ li dan ir-Regolament jistabbilixxi dispożizzjonijiet biex iħeġġu d-domanda għal teknoloġiji b’emissjonijiet żero netti li jkunu sostenibbli u reżiljenti.

(55)

L-applikazzjoni ta’ rekwiżiti obbligatorji minimi tiżgura li l-ingranaġġ tal-infiq pubbliku biex tingħata spinta lid-domanda għal akkwist bi prestazzjoni aħjar għal prodotti b’emissjonijiet żero netti fil-qasam tas-sostenibbiltà ambjentali jiżdied b’mod strutturat li jista’ jiġi implimentat mill-awtoritajiet kontraenti u l-entitajiet kontraenti. Jenħtieġ li xi eċċezzjonijiet jiżguraw li l-awtoritajiet kontraenti u l-entitajiet kontraenti jevitaw konsegwenzi speċifiċi mhux mixtieqa. Dawk l-eċċezzjonijiet huma relatati ma’ sitwazzjonijiet ta’ monopolju, fallimenti speċifiċi tas-suq jew sitwazzjonijiet fejn l-awtoritajiet kontraenti jew l-entitajiet kontraenti jistgħu jiffaċċaw kostijiet sproporzjonati jew inkompatibbiltajiet tekniċi. L-awtoritajiet kontraenti u l-entitajiet kontraenti jenħtieġ li jibqgħu liberi li jinkludu rekwiżiti minimi addizzjonali fid-dokumenti tal-akkwist tagħhom, dment li dawn jikkonformaw mad-Direttivi 2014/23/UE (26), 2014/24/UE (27) jew 2014/25/UE (28) tal-Parlament Ewropew u tal-Kunsill u mal-liġi settorjali applikabbli. Jenħtieġ li jibqgħu wkoll liberi, taħt l-istess kundizzjonijiet, li jużaw, barra minn hekk, kriterji tal-għoti għall-identifikazzjoni tal-aktar offerta ekonomikament vantaġġuża bħall-prezz, il-kost jew kriterji oħra.

(56)

Għal kuntratti ta’ xogħolijiet u konċessjonijiet ta’ xogħlijiet li jaqgħu fil-kamp ta’ applikazzjoni ta’ dan ir-Regolament, jenħtieġ li l-awtoritajiet kontraenti u l-entitajiet kontraenti jagħżlu kundizzjoni, rekwiżit jew obbligu kuntrattwali speċifiku wieħed jew aktar biex tgħin fil-kisba ta’ diversi objettivi, bħall-indirizzar ta’ kunsiderazzjonijiet soċjali jew relatati mal-impjiegi sabiex jinkiseb eżitu soċjali pożittiv, b’kont meħud b’mod effettiv tat-tħassib dwar iċ-ċibersigurtà, fejn rilevanti, jew il-kisba ta’ assigurazzjoni suffiċjenti li l-prodotti rilevanti ser jitwasslu fil-ħin. Dawk l-aspetti huma importanti wkoll biex titrawwem ir-reżiljenza. Jenħtieġ li l-eċċezzjonijiet relatati ma’ sitwazzjonijiet ta’ monopolju, fallimenti speċifiċi tas-suq jew sitwazzjonijiet fejn l-awtoritajiet kontraenti jew l-entitajiet kontraenti jistgħu jiffaċċaw kostijiet sproporzjonati jew inkompatibbiltajiet tekniċi.

(57)

F’xi każijiet jenħtieġ li tingħata attenzjoni lill-kontribut tal-offerta għar-reżiljenza fir-rigward ta’ ċerti pajjiżi terzi. Jekk il-Kummissjoni tkun iddeterminat li l-proporzjon ta’ teknoloġija b’emissjonijiet żero netti jew il-komponenti speċifiċi ewlenin tagħha li joriġinaw f’pajjiż terz jammonta għal aktar minn 50 % tal-provvista ta’ dik it-teknoloġija speċifika jew ta’ dawk il-komponenti fl-Unjoni, jenħtieġ li l-awtoritajiet kontraenti u l-entitajiet kontraenti jkunu obbligati jinkludu diversi kundizzjonijiet fid-dokumenti tal-akkwist tagħhom sabiex jinkiseb eżitu reżiljenti. B’dak il-mod, il-valur tat-teknoloġija speċifika b’emissjonijiet żero netti jew tal-komponenti speċifiċi ewlenin tat-teknoloġija speċifika b’emissjonijiet żero netti li joriġinaw mill-pajjiż terz ikkonċernat jenħtieġ li ma jaqbiżx limitu ta’ 50 % taħt kundizzjonijiet speċifiċi. Barra minn hekk, jekk il-Kummissjoni tkun iddeterminat li l-proporzjon tal-provvista fl-Unjoni ta’ dawk il-prodotti jew komponenti li joriġinaw f’pajjiż terz ikun żdied b’mill-inqas 10 punti perċentwali bħala medja għal sentejn konsekuttivi u jkun laħaq mill-inqas 40 % tal-provvista fl-Unjoni, jenħtieġ li japplika l-istess mekkaniżmu. Dan ser jippermetti lill-Unjoni tqis id-dipendenzi li qed jevolvu b’mod effiċjenti. Għal kuntratti koperti mill-Appendiċi I tal-Unjoni għall-Ftehim dwar l-Akkwist Pubbliku (GPA) tal-Organizzazzjoni Dinjija tal-Kummerċ jew minn ftehimiet internazzjonali rilevanti oħra li l-Unjoni hija marbuta bihom, jenħtieġ li l-awtoritajiet kontraenti u l-entitajiet kontraenti ma japplikawx dawk ir-rekwiżiti għal teknoloġiji b’emissjonijiet żero netti jew il-komponenti speċifiċi ewlenin tagħhom li joriġinaw minn sorsi ta’ provvista li huma firmatarji ta’ dawk il-ftehimiet.

(58)

Fil-każ ta’ nuqqas ta’ osservanza ta’ dawk ir-rekwiżiti ta’ reżiljenza, jenħtieġ li l-awtoritajiet kontraenti u l-entitajiet kontraenti jirrikjedu wkoll, fid-dokumenti tal-akkwist tagħhom, li l-kuntrattur ewlieni jkun obbligat iħallas imposta proporzjonata lill-awtorità kontraenti jew lill-entità kontraenti kkonċernata ta’ mill-inqas 10 % tal-valur tat-teknoloġiji speċifiċi b’emissjonijiet żero netti tal-kuntratt, sabiex jiġi żgurat li l-mekkaniżmu jiġi rrispettat.

(59)

Jenħtieġ li l-Istati Membri ma jiddiskriminawx kontra, jew ma jagħtux trattament differenti mhux iġġustifikat lil, fornitur ta’ teknoloġiji b’emissjonijiet żero netti minn Stat Membru ieħor. Dak l-obbligu jirrifletti l-obbligu diġà eżistenti għall-awtoritajiet kontraenti u l-entitajiet kontraenti, f’konformità mad-Direttivi 2014/23/UE, 2014/24/UE u 2014/25/UE, li jittrattaw lill-operaturi ekonomiċi b’mod ugwali u mingħajr diskriminazzjoni u li jsegwu r-regoli proċedurali stabbiliti f’dawk id-Direttivi biex jiżguraw li l-prinċipji ta’ trattament ugwali u nondiskriminazzjoni jingħataw effett prattiku u li l-proċeduri ta’ akkwist pubbliku jinfetħu għall-kompetizzjoni.

(60)

Mingħajr preġudizzju għal-liġi tal-Unjoni applikabbli għal teknoloġija speċifika, inkluż skont ir-Regolament (UE) 2024/1781 tal-Parlament Ewropew u tal-Kunsill (29) u r-Regolament (UE) 2023/1542 tal-Parlament Ewropew u tal-Kunsill (30), u dment li ma jkunx indikat mod ieħor fihom, meta jevalwaw is-sostenibbiltà ambjentali tas-soluzzjonijiet b’emissjonijiet żero netti akkwistati abbażi ta’ dan ir-Regolament, jenħtieġ li l-awtoritajiet kontraenti u l-entitajiet kontraenti jkunu jistgħu jqisu diversi elementi b’impatt fuq il-klima u l-ambjent.

(61)

Jenħtieġ li l-Kummissjoni tingħata setgħat ta’ implimentazzjoni biex tistabbilixxi prinċipji gwida għall-awtoritajiet kontraenti u l-entitajiet kontraenti biex jispeċifikaw l-ispeċifikazzjonijiet tekniċi, ir-rekwiżiti, u l-kundizzjonijiet tal-prestazzjoni tal-kuntratti relatati mas-sostenibbiltà ambjentali għall-kuntratti pubbliċi. Dan jenħtieġ li jkun mingħajr preġudizzju għal-liġi tal-Unjoni applikabbli għal teknoloġiji speċifiċi, inkluż skont ir-Regolament (UE) 2024/1781 u r-Regolament (UE) 2023/1542.

(62)

Sabiex, fi ħdan proċedura ta’ akkwist pubbliku jew irkant, titqies il-ħtieġa li jiġu appoġġati l-produzzjoni jew il-konsum ta’ enerġija minn sorsi rinnovabbli u l-ħtieġa li jiġu ddiversifikati s-sorsi tal-provvista ta’ teknoloġiji b’emissjonijiet żero netti lil hinn minn sorsi uniċi ta’ provvista, u mingħajr preġudizzju għall-impenji internazzjonali tal-Unjoni, jenħtieġ li l-provvista titqies bħala mhux diversifikata biżżejjed tal-anqas meta t-teknoloġija speċifika b’emissjonijiet żero netti jew il-komponenti speċifiċi ewlenin tagħha joriġinaw minn pajjiż terz uniku u jirrappreżenta aktar minn 50 % ta’ dik il-provvista fi ħdan l-Unjoni.

(63)

Sabiex jippromwovu l-imġiba kummerċjali responsabbli tal-offerenti, iċ-ċibersigurtà u s-sigurtà tad-data tat-teknoloġiji użati, il-proġetti u l-infrastrutturi relatati u biex jippromwovu t-twassil ta’ proġetti bis-sħiħ u fil-ħin, l-awtoritajiet pubbliċi li jfasslu l-irkantijiet għall-użu tal-enerġija minn sorsi rinnovabbli jenħtieġ li jinkludu kriterji ta’ prekwalifikazzjoni relatati ma’ mġiba kummerċjali responsabbli, iċ-ċibersigurtà u s-sigurtà tad-data u l-kapaċità li l-proġett jitwettaq bis-sħiħ u fil-ħin.

(64)

Biex jappoġġaw l-għan li tiġi żviluppata u tinżamm bażi industrijali għall-provvista ta’ teknoloġiji tal-enerġija rinnovabbli biex tiġi żgurata l-provvista tal-enerġija tal-Unjoni u biex jiġu evitati dipendenzi għall-provvista ta’ dawn it-teknoloġiji li jdewmu l-isforzi tal-Unjoni għat-tnaqqis tal-emissjonijiet ta’ gassijiet serra jew ipoġġu s-sigurtà tal-provvista tal-enerġija f’riskju, jenħtieġ li l-awtoritajiet pubbliċi li jfasslu l-irkantijiet għall-użu tal-enerġija minn sorsi rinnovabbli jżidu s-sostenibbiltà u r-reżiljenza tal-provvista ta’ dawk it-teknoloġiji fl-Unjoni. Jenħtieġ li l-Istati Membri jivvalutaw il-kontribut tal-irkantijiet għas-sostenibbiltà billi jeżaminaw is-sostenibbiltà ambjentali tal-offerti, il-kontribut tagħhom għall-innovazzjoni u l-kontribut tagħhom għall-integrazzjoni tas-sistema tal-enerġija. Għal dak il-għan, jenħtieġ li l-Istati Membri jkollhom l-għażla li jintroduċu kriterji ta’ prekwalifikazzjoni jew ta’ għoti fit-tfassil tal-irkant. Filwaqt li l-kriterji ta’ prekwalifikazzjoni jenħtieġ li jiġu ssodisfati mill-proġetti kollha tal-offerenti sabiex ikunu jistgħu jipparteċipaw fl-irkant, il-kriterji tal-għoti għandhom l-għan li jevalwaw u jikklassifikaw il-proġetti differenti li jipparteċipaw f’irkant.

(65)

Meta jqisu s-sostenibbiltà ambjentali tal-offerti, jew fil-forma ta’ kriterji ta’ prekwalifikazzjoni jew ta’ kriterji tal-għoti, l-awtoritajiet pubbliċi li jfasslu l-irkantijiet għall-użu tal-enerġija minn sorsi rinnovabbli jistgħu jqisu diversi elementi b’impatt fuq il-klima u l-ambjent. Dawk l-elementi jistgħu jinkludu d-durabbiltà u l-affidabbiltà tas-soluzzjoni; il-faċilità ta’ tiswija u manutenzjoni u l-aċċess għal tali servizzi; il-faċilità ta’ titjib u ta’ rinnovazzjoni; il-faċilità u l-kwalità tar-riċiklaġġ; l-użu ta’ sustanzi; il-konsum tal-enerġija, tal-ilma u ta’ riżorsi oħra fi stadju wieħed jew aktar taċ-ċiklu tal-ħajja tal-prodott; il-piż u l-volum tal-prodott u l-imballaġġ tiegħu; l-inkorporazzjoni ta’ materjali rinnovabbli, jew ta’ komponenti riċiklati jew użati; il-kwantità, il-karatteristiċi u d-disponibbiltà ta’ oġġetti tal-konsum neċessarji għall-użu u l-manutenzjoni kif suppost; l-impronta ambjentali tal-prodott u l-impatti ambjentali taċ-ċiklu tal-ħajja tiegħu; l-impronta tal-karbonju tal-prodott; ir-rilaxx tal-mikroplastik; l-emissjonijiet fl-arja, fl-ilma jew fil-ħamrija rilaxxati fi stadju wieħed jew aktar taċ-ċiklu tal-ħajja tal-prodott; l-ammonti ta’ skart iġġenerat; u l-kundizzjonijiet għall-użu.

(66)

Sabiex jiġu appoġġati d-disinn u l-produzzjoni ta’ teknoloġiji tal-enerġija rinnovabbli aktar innovattivi u avvanzati, il-kontribut tas-sostenibbiltà tal-offerti jista’ jqis, jew fil-forma ta’ kriterji ta’ prekwalifikazzjoni jew kriterji tal-għoti, il-kontribut għall-innovazzjoni billi jipprevedi kriterji ta’ prekwalifikazzjoni jew ta’ għoti li jippromwovu l-użu ta’ soluzzjonijiet kompletament ġodda jew it-titjib ta’ soluzzjonijiet komparabbli tal-ogħla livell ta’ żvilupp tekniku.

(67)

Biex tiġi appoġġata l-integrazzjoni tal-enerġija minn sorsi rinnovabbli fis-sistema tal-enerġija tal-Unjoni u l-benefiċċji tagħha għad-dekarbonizzazzjoni kosteffettiva, il-kontribut tal-offerti għas-sostenibbiltà jista’ jqis il-kontribut għall-integrazzjoni tas-sistema tal-enerġija permezz ta’, pereżempju, il-ħżin tal-enerġija, l-irkupru tas-sħana u tal-kesħa mormija u l-produzzjoni tal-idroġenu rinnovabbli.

(68)

Sabiex tiżdied ir-reżiljenza tal-provvista ta’ teknoloġiji tal-enerġija rinnovabbli b’emissjonijiet żero netti u biex tiġi evitata dipendenza eċċessiva fuq pajjiżi b’konċentrazzjoni għolja ta’ provvista fl-Unjoni, jenħtieġ li l-awtoritajiet pubbliċi, permezz ta’ kriterji ta’ prekwalifikazzjoni u ta’ għoti, iqisu l-kontribut tar-reżiljenza tal-proġetti differenti li jipparteċipaw fl-irkantijiet għall-użu ta’ enerġija minn sorsi rinnovabbli, filwaqt li jqisu l-ħtieġa li tiġi diversifikata l-provvista ta’ teknoloġiji tal-enerġija rinnovabbli, mingħajr preġudizzju għall-impenji internazzjonali tal-Unjoni. Meta japplikaw il-kriterju tar-reżiljenza, jenħtieġ li l-awtoritajiet pubbliċi jqisu li l-provvista jenħtieġ li tal-anqas titqies mhux diversifikata biżżejjed meta aktar minn 50 % tad-domanda fl-Unjoni għal teknoloġija speċifika b’emissjonijiet żero netti jew għall-komponenti speċifiċi ewlenin tagħha toriġina minn pajjiż terz wieħed.

(69)

Meta tiġi applikata bħala kriterju għall-aġġudikazzjoni, il-ponderazzjoni tal-kriterji dwar il-kontribut għas-sostenibbiltà u r-reżiljenza tal-offerta fir-rigward tal-irkantijiet għall-użu tal-enerġija minn sorsi rinnovabbli hija mingħajr preġudizzju għall-possibbiltà li l-awtoritajiet li jfasslu dawk l-irkantijiet jistabbilixxu livell limitu ogħla għall-kriterji relatati mas-sostenibbiltà ambjentali, l-innovazzjoni u l-integrazzjoni tas-sistema tal-enerġija meta dan ikun kompatibbli ma’ kwalunkwe limitu għall-kriterji mhux marbuta mal-prezz stabbiliti skont ir-regoli dwar l-għajnuna mill-Istat. Fi kwalunkwe każ, l-applikazzjoni ta’ dawn il-kriterji u l-piż minimu u kkombinat tagħhom fl-irkantijiet jenħtieġ li jiżguraw li l-irkantijiet jibqgħu kompetittivi u jikkonformaw mal-Artikoli 107 u 108 tat-Trattat dwar il-Funzjonament tal-Unjoni Ewropea (TFUE).

(70)

Sabiex tiżdied il-provvista tal-Unjoni ta’ teknoloġiji tal-enerġija rinnovabbli biex jintlaħqu l-ħtiġijiet ġenerali annwali tal-parametru referenzjarju tal-manifattura sal-2030 fl-Unjoni, jenħtieġ li f’dan ir-Regolament jiġi previst sehem speċifiku tal-volum irkantat li għalih jiġu applikati kriterji mhux tal-prezz. Dan is-sehem jenħtieġ li jiġi vvalutat kull sentejn mill-Kummissjoni sabiex jiġi ddeterminat l-impatt tal-kriterji mhux tal-prezz fuq l-iżvilupp tal-manifattura annwali tal-Unjoni tat-teknoloġiji tal-enerġija rinnovabbli u l-użu tal-enerġija minn sorsi rinnovabbli, inkluż l-impatt finanzjarju tagħhom u l-impatt tagħhom fuq il-veloċità tal-użu, filwaqt li jitqiesu wkoll il-prattiċità u ċ-ċarezza tas-sistema għall-iżviluppaturi tal-proġetti. Jekk il-valutazzjonijiet juru li l-applikazzjoni tal-kriterji ta’ reżiljenza u sostenibbiltà tikkontribwixxi b’mod pożittiv għas-sigurtà tal-provvista tal-Unjoni għal teknoloġiji b’emissjonijiet żero netti, b’mod partikolari billi żżid il-kapaċità tal-manifattura fl-Unjoni għat-teknoloġiji tal-enerġija rinnovabbli, u ma xxekkilx b’mod sinifikanti l-ilħuq tal-miri għall-enerġija rinnovabbli stabbiliti fid-Direttiva (UE) 2018/2001 tal-Parlament Ewropew u tal-Kunsill (31), inkluż l-użu f’kull Stat Membru, jenħtieġ li l-applikazzjoni ta’ dawk id-dispożizzjonijiet tiżdied gradwalment. Jenħtieġ li kull pass ikun soġġett għal valutazzjoni tal-impatt biex jiġi żgurat li ishma ogħla jkomplu jikkontribwixxu b’mod pożittiv għas-sigurtà tal-provvista tat-teknoloġiji tal-enerġija rinnovabbli u li dawk il-benefiċċji jegħlbu l-effetti fuq il-kost u l-veloċità tal-użu tal-enerġija minn sorsi rinnovabbli. Jenħtieġ li d-determinazzjoni tas-sehem tal-volum irkantat, jekk ikun xieraq u fattibbli, tipprova tilħaq żieda globali gradwali bil-ħsieb li tikkontribwixxi għall-ilħuq tal-objettivi ġenerali ta’ dan ir-Regolament u biex jintlaħaq 50 % sa tmiem l-2029.

(71)

Skont l-għanijiet tagħhom għall-użu tal-enerġija minn sorsi rinnovabbli u l-istrateġiji nazzjonali ta’ dekarbonizzazzjoni tagħhom, l-Istati Membri jistgħu jiġu affettwati b’mod differenti ħafna mill-applikazzjoni tal-kriterji ta’ reżiljenza u sostenibbiltà. Meta tivvaluta l-impatt ta’ dawk il-kriterji fuq l-użu tal-enerġija minn sorsi rinnovabbli, jenħtieġ għalhekk li l-Kummissjoni teżamina l-impatt finanzjarju ġenerali u l-effetti fuq l-użu fl-Unjoni kif ukoll l-impatt fuq l-Istati Membri u partijiet ikkonċernati rilevanti oħra, inkluż l-unitajiet domestiċi u l-kumpaniji. Sabiex jiġi ddeterminat l-impatt fuq l-użu tal-enerġija minn sorsi rinnovabbli u jitqiesu l-esperjenzi prattiċi bl-applikazzjoni ta’ kriterji mhux tal-prezz, jenħtieġ li l-Kummissjoni tikkonsulta, bħala parti mill-valutazzjoni tagħha u b’mod strutturat u trasparenti, lill-awtoritajiet nazzjonali li jwettqu l-irkantijiet.

(72)

Il-kriterji għall-irkantijiet jistgħu jżidu piż eċċessiv għall-promoturi ta’ proġetti tal-enerġija rinnovabbli b’kapaċità żgħira. Sabiex jiġi limitat l-impatt ta’ dan ir-Regolament fuq l-irkantijiet biex jiġu appoġġati proġetti b’kapaċità massima ta’ 10 megawatt, jenħtieġ li l-Istati Membri jkunu jistgħu jeskludu dawk l-irkantijiet mill-kalkolu tal-volum totali tal-kapaċità rkantata fis-sena.

(73)

Meta ma jkunx hemm biżżejjed konkorrenza għall-irkantijiet li għalihom jiġu applikati l-kriterji ta’ prekwalifikazzjoni, ta’ reżiljenza u ta’ sostenibbiltà, jenħtieġ li l-użu tal-enerġija minn sorsi rinnovabbli ma jitnaqqasx billi l-Istati Membri jiġu obbligati japplikaw dawk il-kriterji għas-sehem li ma jkunx hemm biżżejjed konkorrenza għalih tal-volum tal-irkant. Għalhekk, jenħtieġ li l-Istati Membri jkunu jistgħu jeskludu s-sehem tal-volum tal-irkant li ma jkunx hemm biżżejjed konkorrenza għalih mir-rekwiżiti għall-irkantijiet. Jitqies li ma jkunx hemm biżżejjed konkorrenza għal irkant meta l-offerti ppreżentati għal dak l-irkant ikopru volum li jkun inqas mill-volum totali tal-kapaċità rkantata.

(74)

Għall-fini tal-istabbiliment ta’ skemi li jkunu ta’ benefiċċju għall-unitajiet domestiċi, għan-negozji jew għall-konsumaturi li jinċentivaw ix-xiri ta’ prodotti finali ta’ teknoloġija b’emissjonijiet żero netti, u mingħajr preġudizzju għall-impenji internazzjonali tal-Unjoni, jenħtieġ li l-provvista titqies mhux diversifikata biżżejjed meta sors wieħed jipprovdi aktar minn 50 % tad-domanda totali għal teknoloġija speċifika b’emissjonijiet żero netti fl-Unjoni. Sabiex tiġi żgurata applikazzjoni konsistenti, jenħtieġ li l-Kummissjoni tippubblika lista, fid-data tal-applikazzjoni ta’ dan ir-Regolament u kull sena wara, tad-distribuzzjoni tal-oriġini ta’ prodotti finali tat-teknoloġiji b’emissjonijiet żero netti li jaqgħu taħt din il-kategorija, imqassma skont is-sehem tal-provvista tal-Unjoni li toriġina minn sorsi differenti fl-aħħar sena li għaliha hija disponibbli d-data.

(75)

Id-Deċiżjoni tal-Kunsill 2014/115/UE (32) approvat, fost l-oħrajn, l-emenda tal-“GPA”. L-għan tal-GPA huwa li jistabbilixxi qafas multilaterali ta’ drittijiet u obbligi bbilanċjati marbuta mal-kuntratti pubbliċi bil-għan li jinkisbu l-liberalizzazzjoni u l-espansjoni tal-kummerċ dinji. Għal kuntratti koperti mill-Appendiċi I tal-Unjoni għall-GPA, kif ukoll minn ftehimiet internazzjonali rilevanti oħra li bihom hija marbuta l-Unjoni, inkluż il-ftehimiet ta’ kummerċ ħieles u l-Artikolu III:8(a) tal-Ftehim Ġenerali dwar it-Tariffi u l-Kummerċ tal-1994 għall-akkwist minn aġenziji governattivi ta’ prodotti mixtrija bil-ħsieb ta’ bejgħ mill-ġdid kummerċjali jew bil-ħsieb li jintużaw fil-produzzjoni ta’ oġġetti għall-bejgħ kummerċjali, jenħtieġ li l-awtoritajiet kontraenti u l-entitajiet kontraenti ma japplikawx ir-rekwiżiti għal teknoloġiji b’emissjonijiet żero netti jew il-komponenti speċifiċi ewlenin tagħhom li joriġinaw minn sorsi ta’ provvista li huma firmatarji ta’ dawk il-ftehimiet.

(76)

L-applikazzjoni tad-dispożizzjonijiet dwar ir-reżiljenza fil-proċeduri tal-akkwist pubbliku skont dan ir-Regolament jenħtieġ li tkun mingħajr preġudizzju għall-Artikolu 25 tad-Direttiva 2014/24/UE u l-Artikoli 43 u 85 tad-Direttiva 2014/25/UE, u f’konformità mal-komunikazzjoni tal-Kummissjoni tal-24 ta’ Lulju 2019 bit-titolu “Gwida dwar il-parteċipazzjoni ta’ offerenti ta’ pajjiżi terzi u oġġetti fis-suq tal-akkwist tal-UE”. B’mod simili, jenħtieġ li d-dispożizzjonijiet dwar l-akkwist pubbliku jkomplu japplikaw għal xogħlijiet, provvisti u servizzi soġġetti għal dan ir-Regolament, inkluż l-Artikolu 67(4) tad-Direttiva 2014/24/UE u kwalunkwe miżura ta’ implimentazzjoni li tirriżulta mir-Regolament (UE) 2024/1781.

(77)

Sabiex jiġi limitat il-piż amministrattiv li jirriżulta mill-ħtieġa li jitqiesu r-rekwiżiti relatati mal-kontribut tal-offerta għas-sostenibbiltà u r-reżiljenza, b’mod partikolari għal xerrejja pubbliċi iżgħar u għal kuntratti ta’ valur aktar baxx li ma għandhomx impatt importanti fuq is-suq, l-applikazzjoni tad-dispożizzjonijiet rilevanti ta’ dan ir-Regolament jenħtieġ li tiġi differita għal sentejn għax-xerrejja pubbliċi li ma humiex korpi ċentrali għall-akkwisti u għal kuntratti ta’ valur ta’ inqas minn EUR 25 miljun.

(78)

Għall-finijiet tal-applikazzjoni tad-dispożizzjonijiet relatati mal-proċeduri tal-akkwist pubbliku skont dan ir-Regolament, meta prodott ikun kopert minn att delegat adottat skont ir-Regolament (UE) 2017/1369 tal-Parlament Ewropew u tal-Kunsill (33), jenħtieġ li l-awtoritajiet kontraenti u l-entitajiet kontraenti jixtru biss il-prodotti li jikkonformaw mal-obbligu stabbilit fl-Artikolu 7(2) ta’ dak ir-Regolament.

(79)

L-unitajiet domestiċi, in-negozji u l-konsumaturi finali huma parti essenzjali mid-domanda tal-Unjoni għal prodotti finali tat-teknoloġiji b’emissjonijiet żero netti u skemi ta’ appoġġ pubbliku biex jinċentivaw ix-xiri ta’ tali prodott mill-unitajiet domestiċi, b’mod partikolari għal unitajiet domestiċi u konsumaturi vulnerabbli b’introjtu baxx u medju inferjuri, huma għodod importanti biex titħaffef it-tranżizzjoni ekoloġika. Skont l-inizjattiva għall-bjut solari mħabbra fil-komunikazzjoni tal-Kummissjoni tat-18 ta’ Mejju 2022, jenħtieġ li l-Istati Membri pereżempju jistabbilixxu programmi nazzjonali biex jappoġġaw l-użu massiv tal-enerġija solari fuq il-bjut. Fil-pjan REPowerEU, il-Kummissjoni talbet lill-Istati Membri jagħmlu użu sħiħ mill-miżuri ta’ appoġġ li jħeġġu l-bdil għall-pompi tas-sħana. Skemi ta’ appoġġ bħal dawn stabbiliti fil-livell nazzjonali mill-Istati Membri jew lokalment mill-awtoritajiet lokali jew reġjonali jenħtieġ li jikkontribwixxu wkoll għat-titjib tas-sostenibbiltà u r-reżiljenza tat-teknoloġiji tal-Unjoni b’emissjonijiet żero netti. Jenħtieġ li l-awtoritajiet pubbliċi pereżempju jipprovdu kumpens finanzjarju ogħla lill-benefiċjarji għax-xiri ta’ prodotti finali ta’ teknoloġija b’emissjonijiet żero netti li ser jagħtu kontribut ogħla għar-reżiljenza fl-Unjoni. L-awtoritajiet pubbliċi jistgħu jagħmlu l-eliġibbiltà tal-iskemi kundizzjonali fuq il-kontribut għas-sostenibbiltà u r-reżiljenza. Meta jagħmlu dan, l-Istati Membri huma mħeġġa jqisu l-aċċessibbiltà tal-iskema għaċ-ċittadini li jgħixu fil-faqar enerġetiku. Jenħtieġ li l-awtoritajiet pubbliċi jiżguraw li l-iskemi tagħhom ikunu miftuħa, trasparenti u mhux diskriminatorji, sabiex jikkontribwixxu għaż-żieda fid-domanda għal prodotti ta’ teknoloġija b’emissjonijiet żero netti fl-Unjoni. Jenħtieġ ukoll li l-awtoritajiet pubbliċi jillimitaw il-kumpens finanzjarju addizzjonali għal tali prodotti sabiex ma jnaqqsux l-użu tat-teknoloġiji b’emissjonijiet żero netti fl-Unjoni. Sabiex tiżdied l-effiċjenza ta’ skemi bħal dawn, jenħtieġ li l-Istati Membri jiżguraw li l-informazzjoni tkun faċilment aċċessibbli kemm għall-konsumaturi kif ukoll għall-manifatturi tat-teknoloġiji b’emissjonijiet żero netti fuq sit web bla ħlas. L-użu mill-awtoritajiet pubbliċi tal-kontribut għas-sostenibbiltà u r-reżiljenza fi skemi mmirati lejn il-konsumaturi jew l-unitajiet domestiċi jenħtieġ li jkun mingħajr preġudizzju għar-regoli dwar l-għajnuna mill-Istat u għar-regoli tad-WTO dwar is-sussidji.

(80)

Meta jfasslu skemi ta’ benefiċċju għall-unitajiet domestiċi, għan-negozji jew għall-konsumaturi li jinċentivaw ix-xiri ta’ prodotti finali ta’ teknoloġija b’emissjonijiet żero netti, l-Istati Membri, l-awtoritajiet reġjonali jew lokali, il-korpi rregolati bil-liġi pubblika jew l-assoċjazzjonijiet iffurmati minn tali awtorità waħda jew aktar jew tali korp wieħed jew aktar irregolati bil-liġi pubblika, jenħtieġ li jiżguraw ir-rispett tal-impenji internazzjonali tal-Unjoni, inkluż billi jiżguraw li dawn l-iskemi ma jilħqux daqs li jikkawża preġudizzju serju għall-interess tal-membri tad-WTO.

(81)

Jenħtieġ li l-Kummissjoni tkun tista’ tassisti wkoll lill-Istati Membri fit-tfassil ta’ skemi mmirati lejn l-unitajiet domestiċi, in-negozji u l-konsumaturi biex jibnu sinerġiji u jiskambjaw l-aħjar prattiki. Jenħtieġ li l-Pjattaforma għal Ewropa b’Emissjonijiet Żero Netti (il-“Pjattaforma”) jkollha wkoll rwol importanti fl-aċċellerazzjoni tal-implimentazzjoni tal-kontribut għas-sostenibbiltà u r-reżiljenza mill-Istati Membri u mill-awtoritajiet pubbliċi fil-prattiki tagħhom relatati mal-proċeduri tal-akkwist pubbliku u tal-bejgħ bl-irkant. Jenħtieġ li l-Kummissjoni, wara li tikkonsulta l-Pjattaforma, tadotta att ta’ implimentazzjoni li jispeċifika l-kriterji għall-valutazzjoni tal-kontribut għas-sostenibbiltà u r-reżiljenza. Dak l-att jenħtieġ li jagħti attenzjoni partikolari lill-intrapriżi żgħar u ta’ daqs medju (SMEs), li jenħtieġ li jkollhom opportunità ġusta li jipparteċipaw fis-suq sostanzjali għall-akkwist pubbliku. Jenħtieġ li jiżgura wkoll li r-rekwiżiti fir-rigward tas-sostenibbiltà u r-reżiljenza jiġu applikati b’mod li jiżgura kompetizzjoni ġusta u ugwali fost l-atturi tas-suq irrispettivament mill-istruttura tas-sjieda tagħhom.

(82)

Sabiex jiġi żgurat li l-proċeduri tal-akkwist pubbliku u l-irkanti għall-fini tal-użu ta’ sorsi tal-enerġija rinnovabbli jikkontribwixxu verament għar-reżiljenza tal-Unjoni, dawk l-attivitajiet jeħtieġ li jkunu prevedibbli għall-industrija. Biex l-industrija tkun tista’ taġġusta l-produzzjoni tagħha fil-ħin, l-awtoritajiet kontraenti u l-entitajiet kontraenti jenħtieġ li jinfurmaw lis-suq minn qabel dwar il-ħtiġijiet stmati tagħhom ta’ akkwist għal prodotti ta’ teknoloġija b’emissjonijiet żero netti.

(83)

Minbarra l-miżuri orjentati lejn id-domanda pubblika u tal-unitajiet domestiċi, l-Unjoni tista’ tikkunsidra azzjoni biex tiffaċilita l-użu ta’ teknoloġiji b’emissjonijiet żero netti fil-ktajjen tal-valur industrijali tal-Unjoni b’attenzjoni partikolari għall-SMEs, b’mod partikolari billi tiffaċilita l-konnessjoni bejn il-provvista u d-domanda mill-industrija.

(84)

Kif indikat fil-Komunikazzjoni dwar Pjan Industrijali tal-Patt Ekoloġiku, l-ishma mis-suq tal-industrija tal-Unjoni jinsabu taħt pressjoni qawwija minħabba sussidji f’pajjiżi terzi li jimminaw il-kundizzjonijiet ekwivalenti ta’ kompetizzjoni. Dik is-sitwazzjoni toħloq sfida kompetittiva għall-Unjoni biex iżżomm u tiżviluppa l-industrija tagħha stess u toħloq ħtieġa għal reazzjoni rapida u ambizzjuża mill-Unjoni fl-immodernizzar tal-qafas legali tagħha.

(85)

Meta jitqies l-għan tal-Unjoni li tnaqqas id-dipendenzi strateġiċi fuq pajjiżi terzi għal teknoloġiji b’emissjonijiet żero netti, huwa kruċjali li l-mekkaniżmi ta’ appoġġ pubbliku, bħall-proċeduri tal-akkwist pubbliku u l-irkanti, ma jaggravawx tali dipendenza. Għalhekk, fejn meħtieġ u xieraq, jenħtieġ li jiġu stabbiliti limitazzjonijiet ġustifikati fuq il-proporzjon ta’ prodotti f’kuntratti ta’ provvista miksuba minn pajjiżi terzi jekk il-Kummissjoni tkun iddeterminat li l-kundizzjonijiet marbuta mar-reżiljenza stabbiliti f’dan ir-Regolament ikunu ssodisfati. Barra minn hekk, jenħtieġ li jsiru sforzi biex jiġu indirizzati b’mod effettiv is-sussidji inġusti minn pajjiżi terzi li jimminaw il-kundizzjonijiet ekwivalenti ta’ kompetizzjoni, pereżempju billi jintużaw il-miżuri kollha possibbli previsti fir-Regolamenti (UE) 2022/1031 (34) u (UE) 2022/2560 (35) tal-Parlament Ewropew u tal-Kunsill.

(86)

L-aċċess għall-finanzjament pubbliku u privat huwa kruċjali biex tiġi żgurata l-awtonomija strateġika miftuħa tal-Unjoni u biex tiġi stabbilita bażi solida u kompetittiva tal-manifattura għal teknoloġiji b’emissjonijiet żero netti u għall-ktajjen tal-provvista tagħhom madwar l-Unjoni. Il-maġġoranza tal-investimenti meħtieġa biex jintlaħqu l-objettivi tal-Patt Ekoloġiku Ewropew ser jiġu minn kapital privat, attirat kemm mill-potenzjal tat-tkabbir tal-ekosistema b’emissjonijiet żero netti kif ukoll minn qafas tal-politika stabbli u ambizzjuż. Għalhekk, swieq kapitali li jiffunzjonaw tajjeb, profondi u integrati ser ikunu essenzjali biex jinġabru u jiġu diretti l-fondi neċessarji għat-tranżizzjoni ekoloġika u għall-proġetti ta’ manifattura ta’ teknoloġija b’emissjonijiet żero netti. Għalhekk, huwa meħtieġ progress rapidu lejn l-Unjoni tas-Swieq Kapitali biex l-Unjoni tilħaq l-objettivi tagħha ta’ emissjonijiet żero netti. L-aġenda dwar il-finanzi sostenibbli (u l-finanzi mħallta) għandha wkoll rwol kruċjali fl-espansjoni tal-investimenti fit-teknoloġiji b’emissjonijiet żero netti tul il-ktajjen tal-valur, filwaqt li tiggarantixxi l-kompetittività tas-settur. Kif indikat fid-Dokument ta’ Ħidma tal-Persunal li jakkumpanja dan ir-Regolament, il-ħtiġijiet ta’ investiment jammontaw għal madwar EUR 92 biljun tul il-perjodu 2023 sa 2030, b’firxa li tvarja bejn madwar EUR 52 biljun sa madwar EUR 119-il biljun li jiddependu fuq diversi xenarji, li jirriżultaw f’rekwiżiti ta’ finanzjament pubbliku ta’ EUR 16-il biljun sa 18-il biljun. Meta wieħed iqis li din il-valutazzjoni tqis biss sitt teknoloġiji speċifiċi, il-ħtieġa reali ta’ investiment x’aktarx li hija ogħla b’mod sinifikanti.

(87)

L-investiment privat minn kumpaniji u investituri finanzjarji huwa essenzjali. Meta l-investiment privat waħdu ma jkunx biżżejjed, l-introduzzjoni effettiva ta’ proġetti ta’ manifattura ta’ teknoloġija b’emissjonijiet żero netti tista’ teħtieġ appoġġ pubbliku, pereżempju fil-forma ta’ garanziji, self jew investimenti ta’ ekwità jew kważi ekwità, filwaqt li tiġi evitata d-distorsjoni fis-suq intern. Meta dak l-appoġġ pubbliku jiġi fil-forma ta’ għajnuna mill-Istat, tali għajnuna jenħtieġ li jkollha effett ta’ inċentiv u tkun meħtieġa, immirata, temporanja, xierqa u proporzjonata, filwaqt li tippreserva l-kompetizzjoni u l-koeżjoni fis-suq intern. Il-linji gwida eżistenti dwar l-għajnuna mill-Istat li dan l-aħħar għaddew minn reviżjoni fil-fond f’konformità mal-objettivi ta’ tranżizzjoni doppja, jipprovdu possibbiltajiet kbar biex jiġu appoġġati l-investimenti għal proġetti fil-kamp ta’ applikazzjoni ta’ dan ir-Regolament soġġetti għal ċerti kundizzjonijiet. L-Istati Membri jista’ jkollhom rwol importanti fl-iffaċilitar tal-aċċess għall-finanzjament għal proġetti ta’ manifattura ta’ teknoloġija b’emissjonijiet żero netti billi jindirizzaw il-fallimenti tas-suq permezz ta’ appoġġ immirat u temporanju għall-għajnuna mill-Istat. Il-Qafas Temporanju ta’ Kriżi u ta’ Tranżizzjoni adottat fid-9 ta’ Marzu 2023 għandu l-għan li jiżgura kundizzjonijiet ekwivalenti ta’ kompetizzjoni fis-suq intern li huma mmirati lejn dawk is-setturi fejn ġie identifikat riskju ta’ delokalizzazzjoni ta’ pajjiżi terzi u li huma proporzjonati f’termini ta’ ammonti ta’ għajnuna. Dan jippermetti lill-Istati Membri jistabbilixxu miżuri li jappoġġaw investimenti ġodda f’faċilitajiet ta’ produzzjoni f’setturi definiti b’emissjonijiet żero netti, inkluż permezz ta’ benefiċċji tat-taxxa. L-ammont ta’ għajnuna permess jista’ jiġi modulat b’intensitajiet ogħla ta’ għajnuna u limiti massimi tal-ammont tal-għajnuna jekk l-investiment ikun jinsab f’żoni assistiti, biex ikun jista’ jikkontribwixxi għall-għan ta’ konverġenza bejn l-Istati Membri u r-reġjuni. Sabiex tiġi evitata l-frammentazzjoni tas-suq intern, hemm ħtieġa għal kundizzjonijiet xierqa biex jiġu vverifikati r-riskji konkreti ta’ devjazzjoni tal-investiment barra miż-ŻEE u li ma jkun hemm l-ebda riskju ta’ rilokazzjoni fiż-ŻEE. Biex jimmobilizzaw ir-riżorsi nazzjonali għal dak l-għan, l-Istati Membri huma mħeġġa jonfqu, f’konformità mal-Artikolu 10(3) tad-Direttiva 2003/87/KE, 25 % tad-dħul tal-ETS li l-Istati Membri jiġbru kull sena mill-irkantijiet tal-ETS.

(88)

Kwalunkwe mobilizzazzjoni addizzjonali ta’ għajnuna mill-Istat jenħtieġ li tkun immirata, temporanja u konsistenti mal-objettivi tal-politika tal-Unjoni bħall-Patt Ekoloġiku Ewropew u l-Pilastru. Jenħtieġ li tali finanzjament ma jwassalx għal disparitajiet addizzjonali fost l-Istati Membri, f’konformità mal-politiki ta’ kompetizzjoni u ta’ koeżjoni tal-Unjoni.

(89)

Jenħtieġ li l-appoġġ pubbliku jintuża biex fallimenti tas-suq jew investimenti subottimali speċifiċi identifikati jiġu indirizzati b’mod proporzjonat, u jenħtieġ li l-azzjonijiet ma jidduplikawx jew jeskludu l-finanzjament privat jew jgħawġu l-kompetizzjoni fis-suq intern. Jenħtieġ li l-azzjonijiet ikollhom valur miżjud ċar għall-Unjoni. L-investiment pubbliku jista’ jiffoka b’mod partikolari fuq l-investimenti infrastrutturali meħtieġa, fuq it-trawwim tal-innovazzjoni u fuq it-tkabbir ta’ teknoloġiji rivoluzzjonarji.

(90)

Diversi programmi ta’ finanzjament tal-Unjoni, bħall-Faċilità għall-Irkupru u r-Reżiljenza stabbilita bir-Regolament (UE) 2021/241 tal-Parlament Ewropew u tal-Kunsill (36), InvestEU stabbilit bir-Regolament (UE) 2021/523 tal-Parlament Ewropew u tal-Kunsill (37), il-programmi tal-politika ta’ koeżjoni jew il-Fond għall-Innovazzjoni stabbilit skont id-Direttiva 2003/87/KE tal-Parlament Ewropew u tal-Kunsill (38), huma disponibbli wkoll biex jiffinanzjaw investimenti fi proġetti ta’ manifattura ta’ teknoloġija b’emissjonijiet żero netti. Barra minn hekk, STEP ser tgħin biex il-fondi eżistenti tal-Unjoni jiġu diretti aħjar lejn investimenti kritiċi li għandhom l-għan li jappoġġaw l-iżvilupp jew il-manifattura ta’ teknoloġiji kritiċi, inkluż teknoloġiji nodfa.

(91)

Ir-Regolament (UE) 2023/435 (39) jagħmel disponibbli EUR 20 biljun addizzjonali ta’ appoġġ mhux ripagabbli lill-Istati Membri sabiex tiġi promossa l-effiċjenza enerġetika u jiġu ssostitwiti l-fjuwils fossili, fost l-oħrajn, permezz tal-proġetti tal-industrija tal-Unjoni b’emissjonijiet żero netti. Kif ġie rrimarkat fil-Gwida tal-Kummissjoni dwar il-kapitoli REPowerEU, l-Istati Membri huma mħeġġa jinkludu fil-kapitolu REPowerEU tal-pjanijiet għall-irkupru u r-reżiljenza tagħhom, miżuri li jappoġġaw l-investimenti fil-manifattura ta’ teknoloġija b’emissjonijiet żero netti u fl-innovazzjoni industrijali, f’konformità mar-Regolament (UE) 2021/241 tal-Parlament Ewropew u tal-Kunsill (40).

(92)

InvestEU huwa l-programm ewlieni tal-Unjoni biex jagħti spinta lill-investiment, speċjalment it-tranżizzjoni ekoloġika u diġitali, billi jipprovdi finanzjament u assistenza teknika, pereżempju permezz ta’ mekkaniżmi ta’ taħlit. Approċċ bħal dan jikkontribwixxi biex jinġabar kapital pubbliku u privat addizzjonali. Barra minn hekk, l-Istati Membri huma mħeġġa jikkontribwixxu għall-kompartiment tal-Istat Membru tal-InvestEU biex jappoġġaw prodotti finanzjarji disponibbli għall-manifattura ta’ teknoloġija b’emissjonijiet żero netti, mingħajr preġudizzju għar-regoli applikabbli dwar l-għajnuna mill-Istat.

(93)

L-Istati Membri jistgħu jipprovdu appoġġ mill-programmi tal-politika ta’ koeżjoni, f’konformità mar-Regolament (UE) 2021/1060 tal-Parlament Ewropew u tal-Kunsill (41), biex jinkoraġġixxu l-adozzjoni ta’ proġetti strateġiċi b’emissjonijiet żero netti kif ukoll proġetti ta’ manifattura ta’ teknoloġija b’emissjonijiet żero netti fir-reġjuni kollha, speċjalment f’reġjuni anqas żviluppati, f’reġjuni fi tranżizzjoni u f’territorji tal-Fondi għal Tranżizzjoni Ġusta, permezz ta’ pakketti ta’ investiment ta’ infrastruttura, investiment produttiv fl-innovazzjoni, fil-kapaċità tal-manifattura fl-SMEs, fis-servizzi u f’miżura ta’ taħriġ u ta’ titjib tal-ħiliet, inkluż l-appoġġ għat-tisħiħ tal-kapaċitajiet tal-awtoritajiet pubbliċi u tal-promoturi. L- Istrument ta’ Appoġġ Tekniku stabbilit bir-Regolament (UE) 2021/240 tal-Parlament Ewropew u tal-Kunsill (42) jista’ jgħin lill-Istati Membri u lir-reġjuni jħejju strateġiji ta’ tkabbir b’emissjonijiet żero netti, itejbu l-ambjent tan-negozju, inaqqsu l-burokrazija u jaċċelleraw il-proċessi tal-għoti ta’ permessi. Jenħtieġ li l-Istati Membri jiġu mħeġġa jippromwovu s-sostenibbiltà ta’ proġetti b’emissjonijiet żero netti billi jinkorporaw dawn l-investimenti fil-ktajjen tal-valur tal-Unjoni, filwaqt li jibnu b’mod partikolari fuq networks ta’ kooperazzjoni interreġjonali u transfruntiera. L-adozzjoni ta’ tali miżuri jenħtieġ li tiġi kkunsidrata b’mod partikolari fir-rigward tal-Widien.

(94)

Il-Fond għall-Innovazzjoni jipprevedi wkoll mezz promettenti u kosteffiċjenti ħafna biex tiġi appoġġata ż-żieda fil-manifattura u l-użu tal-idroġenu nadif u teknoloġiji oħra b’emissjonijiet żero netti fl-Unjoni, u b’hekk tissaħħaħ is-sovranità tal-Unjoni f’teknoloġiji ewlenin għall-azzjoni klimatika u s-sigurtà tal-enerġija.

(95)

Biex jingħelbu l-limitazzjonijiet tal-isforzi frammentati attwali tal-investimenti pubbliċi u privati u biex jiġu ffaċilitati l-integrazzjoni u r-redditu fuq l-investiment, jenħtieġ li l-Kummissjoni u l-Istati Membri jikkoordinaw u joħolqu aħjar sinerġiji bejn il-programmi ta’ finanzjament eżistenti fil-livell tal-Unjoni u dak nazzjonali, kif ukoll jiżguraw koordinazzjoni u kollaborazzjoni aħjar mal-industrija u mal-partijiet ikkonċernati ewlenin tas-settur privat. Il-Pjattaforma għandha rwol ewlieni x’taqdi biex tinbena perspettiva komprensiva tal-opportunitajiet ta’ finanzjament disponibbli u rilevanti u biex jiġu diskussi l-ħtiġijiet ta’ finanzjament individwali ta’ proġetti strateġiċi b’emissjonijiet żero netti. Bil-ħsieb li tiġi inċentivata l-produzzjoni ta’ teknoloġiji b’emissjonijiet żero netti fl-Unjoni, il-Pjattaforma tista’ tiddiskuti kif għandhom jiġu indirizzati l-finanzjament, il-qafas regolatorju kif ukoll il-garanziji ta’ investiment u ta’ lokalizzazzjoni.

(96)

Barra minn hekk, minħabba l-importanza ta’ proġetti tal-manifattura ta’ teknoloġija u proġetti strateġiċi b’emissjonijiet żero netti għall-provvista tal-enerġija tal-Unjoni, ċerti restrizzjonijiet amministrattivi jenħtieġ li jitneħħew parzjalment jew jiġu ssimplifikati biex titħaffef l-implimentazzjoni ta’ proġetti bħal dawn.

(97)

Id-data u s-servizzi spazjali derivati mill-Programm Spazjali tal-Unjoni stabbilit bir-Regolament (UE) 2021/696 tal-Parlament Ewropew u tal-Kunsill (43), b’mod partikolari Copernicus, għandhom jintużaw sa fejn ikun possibbli biex tiġi pprovduta informazzjoni dwar il-ġeoloġija, il-bijoloġija, l-ekoloġija, l-iżvilupp soċjoekonomiku, u d-disponibbiltà tar-riżorsi għall-valutazzjonijiet u l-awtorizzazzjonijiet ambjentali. Tali data u servizzi, b’mod partikolari l-kapaċità antropoġenika ta’ monitoraġġ u verifika tal-emissjonijiet tas-CO2 ta’ Copernicus, huma rilevanti għall-valutazzjoni tal-impatt tal-proġetti tal-industrija u l-impatt tal-bjar antropoġeniċi tas-CO2 fuq il-konċentrazzjonijiet u l-flussi globali tal-gassijiet serra.

(98)

Jenħtieġ li l-Kummissjoni, kif previst fl-Artikolu 10(1) tar-Regolament (UE) Nru 1025/2012 tal-Parlament Ewropew u tal-Kunsill (44), titlob lil organizzazzjoni Ewropea waħda jew aktar tal-istandardizzazzjoni biex jabbozzaw standards Ewropej b’appoġġ għall-objettivi ta’ dan ir-Regolament.

(99)

Il-Widien tal-Idroġenu b’applikazzjonijiet industrijali għall-użu finali għandhom rwol importanti fid-dekarbonizzazzjoni tal-industriji intensivi fl-enerġija. Ir-REPowerEU jistabbilixxi l-objettiv li jiġi rduppjat l-għadd ta’ Widien tal-Idroġenu fl-Unjoni. Sabiex jintlaħaq dan l-objettiv, jenħtieġ li l-Istati Membri jaċċelleraw l-għoti ta’ permessi u jenħtieġ li jikkunsidraw l-istabbiliment ta’ ambjenti ta’ esperimentazzjoni regolatorja għal teknoloġiji b’emissjonijiet żero netti u jagħtu prijorità lill-aċċess għall-finanzjament. Sabiex tissaħħaħ ir-reżiljenza b’emissjonijiet żero netti, l-Istati Membri jenħtieġ li jiżguraw l-interkonnessjoni tal-Widien tal-Idroġenu bejn il-fruntieri tal-Unjoni. L-installazzjonijiet industrijali li jipproduċu l-enerġija tagħhom stess, u li jistgħu jipprovdu kontribut pożittiv għall-produzzjoni tal-elettriku, jenħtieġ li jiġu mħeġġa jikkontribwixxu għall-grilja enerġetika intelliġenti bħala produtturi tal-enerġija billi jissimplifikaw ir-rekwiżiti regolatorji.

(100)

L-ambjenti ta’ esperimentazzjoni regolatorja għal teknoloġiji b’emissjonijiet żero netti jistgħu jkunu għodda importanti għall-promozzjoni tal-innovazzjoni fil-qasam tat-teknoloġiji b’emissjonijiet żero netti u tat-tagħlim regolatorju. Jeħtieġ li l-innovazzjoni tiġi ffaċilitata permezz ta’ spazji ta’ esperimentazzjoni peress li l-eżiti xjentifiċi jeħtieġ li jiġu ttestjati f’ambjent ikkontrollat ta’ dinja reali. Jenħtieġ li jiġu introdotti ambjenti ta’ esperimentazzjoni regolatorja għal teknoloġiji b’emissjonijiet żero netti biex jiġu ttestjati teknoloġiji innovattivi b’emissjonijiet żero netti jew teknoloġiji innovattivi oħra bil-potenzjal li jippermettu t-tranżizzjoni lejn ekonomija ekoloġika b’impatt newtrali fuq il-klima u nadifa u biex inaqqsu d-dipendenzi strateġiċi, f’ambjent ta’ ħajja reali kkontrollat għal ammont limitat ta’ żmien, u b’hekk jissaħħu t-tagħlim regolatorju u l-espansjoni potenzjali u l-użu usa’. Huwa xieraq li jinstab bilanċ bejn iċ-ċertezza legali għall-parteċipanti fl-ambjenti ta’ esperimentazzjoni regolatorja għal teknoloġiji b’emissjonijiet żero netti u l-kisba tal-objettivi tal-liġi tal-Unjoni. Jenħtieġ li l-Istati Membri jkunu jistgħu jipprevedu derogi ta’ ambjenti ta’ esperimentazzjoni regolatorja għal teknoloġiji b’emissjonijiet żero netti filliġi nazzjonali filwaqt li jiżguraw il-konformità mad-dritt tal-Unjoni u mar-rekwiżiti essenzjali dwar it-teknoloġija b’emissjonijiet żero netti stabbiliti fil-liġi nazzjonali. Fl-2023, il-Kummissjoni ppubblikat dokument ta’ Gwida għall-Ambjenti ta’ Esperimentazzjoni Regolatorja kif imħabbar fl-Aġenda Ewropea Ġdida għall-Innovazzjoni biex tappoġġa lill-Istati Membri fit-tħejjija tal-ambjenti ta’ esperimentazzjoni regolatorja għal teknoloġiji b’emissjonijiet żero netti. Dawk it-teknoloġiji innovattivi jistgħu eventwalment ikunu essenzjali biex jintlaħaq l-objettiv tan-newtralità klimatika tal-Unjoni u biex jiġu żgurati s-sigurtà tal-provvista u r-reżiljenza tas-sistema tal-enerġija tal-Unjoni.

(101)

Il-Pjan Strateġiku tal-Unjoni għat-Teknoloġija tal-Enerġija (Pjan SET) rivedut fil-komunikazzjoni tal-Kummissjoni tal-20 ta’ Ottubru 2023, jappoġġa l-iżvilupp ta’ teknoloġiji tal-enerġija nodfa, effiċjenti u kost-kompetittivi permezz tal-koordinazzjoni u l-kollaborazzjoni fir-riċerka u l-innovazzjoni fil-qasam tal-enerġija nadifa, li jlaqqgħu flimkien l-industrija Ewropea, l-organizzazzjonijiet tar-riċerka u r-rappreżentanti tal-gvern mill-pajjiżi tal-Pjan SET (45). Ir-reviżjoni tal-Pjan SET għandha l-għan li tallinja l-objettivi strateġiċi tal-Pjan SET oriġinali mal-Patt Ekoloġiku Ewropew, mar-REPowerEU u mal-Pjan Industrijali tal-Patt Ekoloġiku, b’mod partikolari dan ir-Regolament. Għandu l-għan li jippromwovi approċċ unifikat lejn l-ilħuq tal-għanijiet ta’ dekarbonizzazzjoni tal-Ewropa, jappoġġa t-teknoloġiji Ewropej b’emissjonijiet żero netti, u jibni futur tal-enerġija sostenibbli u reżiljenti. Il-Pjan SET kellu effett ta’ strutturar fuq azzjonijiet konġunti ta’ Riċerka u Innovazzjoni (R&I), u għenhom iwettqu objettivi komuni tar-riċerka u t-teknoloġija tal-enerġija b’aktar ħeffa u effettività. Il-Pjan SET ikkontribwixxa għall-allinjament tal-isforzi tar-R&I u għall-ingranaġġ tal-finanzjament pubbliku nazzjonali tal-pajjiżi parteċipanti biex jappoġġaw il-prijoritajiet maqbula b’mod konġunt tar-R&I permezz tas-Sħubija għat-Tranżizzjoni lejn Enerġija Nadifa u s-Sħubija għat-Tmexxija tat-Tranżizzjonijiet Urbani taħt Orizzont Ewropa, stabbilit bir-Regolament (UE) 2021/695 tal-Parlament Ewropew u tal-Kunsill (46), bħala eżempju ta’ kooperazzjoni transsettorjali tal-Unjoni ta’ suċċess. Il-Pjan SET għandu rwol ċentrali fl-implimentazzjoni tad-dimensjoni tar-riċerka, l-innovazzjoni u l-kompetittività tal-Unjoni tal-Enerġija tal-pjanijiet nazzjonali għall-enerġija u l-klima. Madankollu, sa mill-bidu tiegħu fl-2007, il-Pjan SET kien forum mhux uffiċjali. Dan ir-Regolament jipprovdi momentum biex tissaħħaħ ir-rabta bejn l-innovazzjoni Ewropea u l-manifattura ta’ teknoloġiji innovattivi ġodda.

(102)

Huma meħtieġa ħaddiema tas-sengħa addizzjonali sabiex ikunu jistgħu jsiru t-tranżizzjonijiet ekoloġiċi u diġitali u t-tkabbir sostenibbli u l-kompetittività tal-Unjoni, l-espansjoni fil-ktajjen tal-provvista tal-industriji ta’ teknoloġija b’emissjonijiet żero netti tal-Unjoni u ż-żamma ta’ impjiegi ta’ kwalità fl-Unjoni. Dan jimplika ħtiġijiet importanti ta’ investiment fit-taħriġ mill-ġdid u fit-titjib tal-ħiliet, inkluż fil-qasam tal-edukazzjoni u t-taħriġ vokazzjonali.. It-tranżizzjoni tal-enerġija ser teħtieġ żieda sinifikanti fl-għadd ta’ ħaddiema tas-sengħa f’firxa ta’ setturi, inkluż l-enerġija rinnovabbli u l-ħżin tal-enerġija u materja prima, u għandha potenzjal kbir għall-ħolqien ta’ impjiegi ta’ kwalità. Il-ħtiġijiet tal-ħiliet għas-sottosettur taċ-ċelloli tal-fjuwil tal-idroġenu fil-manifattura biss huma stmati għal 180 000 ħaddiem, persunal tekniku u inġiniera mħarrġa sas-sena 2030, skont il-Pjan SET. Fis-settur tal-enerġija solari fotovoltajka, ser ikunu meħtieġa mhux inqas minn 66 000 impjieg fil-manifattura biss. Għalhekk huwa tal-akbar importanza li l-impjiegi fit-teknoloġiji b’emissjonijiet żero netti jsiru attraenti u aċċessibbli u li jiġi indirizzat in-nuqqas ta’ tlaqqigħ l-ispariġġ attwali bejn il-ħiliet tal-ħaddiema u l-ħtiġijiet tal-kumpaniji.

(103)

Peress li t-tisħiħ tal-kapaċità tal-manifattura ta’ teknoloġiji ewlenin b’emissjonijiet żero netti fl-Unjoni mhux ser ikun possibbli mingħajr forza tax-xogħol imdaqqsa b’ħiliet għolja, huwa meħtieġ li jiġu introdotti miżuri biex tingħata spinta lill-integrazzjoni u l-attivazzjoni ta’ aktar persuni fis-suq tax-xogħol, b’mod partikolari n-nisa, iż-żgħażagħ barra mill-edukazzjoni, impjieg jew taħriġ (NEETs), persuni bi sfond ta’ migrazzjoni, persuni akbar fl-età u persuni b’diżabilità. Barra minn hekk, dan jenħtieġ li jinkludi ħaddiema minn pajjiżi terzi peress li l-Unjoni tattira biss sehem żgħir ta’ migranti kwalifikati. F’konformità mal-objettivi tar-Rakkomandazzjoni tal-Kunsill dwar l-iżgurar ta’ tranżizzjoni ġusta lejn in-newtralità klimatika, huwa importanti appoġġ speċifiku għat-tranżizzjoni minn impjieg għall-ieħor għall-ħaddiema f’setturi li ġew iddikjarati żejda u li qed jonqsu. Dan ifisser investiment fil-ħiliet għal kulħadd, filwaqt li jkun hemm approċċ immirat lejn gruppi vulnerabbli u reġjuni fi tranżizzjoni. L-objettiv aħħari jenħtieġ li jkun il-ħolqien ta’ impjiegi ta’ kwalità fl-Unjoni meħtieġa għal teknoloġiji b’emissjonijiet żero netti f’konformità mal-miri għall-impjiegi u t-taħriġ previsti fil-Pilastru, inkluż pagi ġusti u adegwati, it-titjib tal-kundizzjonijiet tal-għajxien u tax-xogħol u l-iżgurar ta’ postijiet tax-xogħol sikuri u tajbin għas-saħħa kif ukoll id-dritt għal tagħlim tul il-ħajja ta’ kwalità. In-nuqqas ta’ ħiliet u ta’ ħaddiema jista’ jkun ukoll ir-riżultat ta’ impjiegi mhux attraenti u kundizzjonijiet tax-xogħol ħżiena. It-titjib tal-kwalità tal-impjiegi fis-setturi u l-kumpaniji b’kundizzjonijiet tax-xogħol ħżiena huwa għalhekk element importanti biex jiġu attirati l-ħaddiema. Filwaqt li jibnu fuq inizjattivi eżistenti u waqt li jitqiesu bis-sħiħ dawn l-inizjattivi bħall-Patt tal-UE għall-Ħiliet, l-attivitajiet fil-livell tal-Unjoni fir-rigward tal-informazzjoni dwar il-ħiliet u t-tbassir tagħhom, bħal dawk miċ-Ċentru Ewropew għall-Iżvilupp ta’ Taħriġ Vokazzjonali (Cedefop) u l-Awtorità Ewropea tax-Xogħol, u l-Pjanijiet ta’ azzjoni għall-kooperazzjoni settorjali dwar il-ħiliet, l-objettiv huwa li jiġu mmobilizzati l-atturi kollha biex tiġi żgurata r-rilevanza u jiżdied l-użu tal-programmi tat-taħriġ, inkluż l-awtoritajiet tal-Istati Membri, inkluż fil-livelli reġjonali u lokali, il-fornituri tal-edukazzjoni u t-taħriġ, is-sħab soċjali u l-industrija, b’mod partikolari l-SMEs, kif ukoll it-tipi kollha ta’ universitajiet, sabiex jidentifikaw il-ħtiġijiet b’rabta mal-ħiliet, jiżviluppaw programmi ta’ edukazzjoni u taħriġ u jużawhom fuq skala kbira b’mod rapidu u operazzjonali. Il-proġetti strateġiċi b’emissjonijiet żero netti għandhom rwol ewlieni x’jaqdu f’dan ir-rigward. Jenħtieġ li l-Istati Membri u l-Kummissjoni jiżguraw appoġġ finanzjarju rilevanti inkluż permezz tal-ingranaġġ tal-possibbiltajiet tal-baġit tal-Unjoni permezz ta’ strumenti bħall-FSE+, InvestEU, il-Fond għal Tranżizzjoni Ġusta, Orizzont Ewropa, il-Fondi Ewropej għall-Iżvilupp Reġjonali, il-Faċilità għall-Irkupru u r-Reżiljenza, il-Fond għall-Modernizzazzjoni stabbilit skont l-Artikolu 10d tad-Direttiva 2003/87/KE, REPowerEU, il-Programm tas-Suq Uniku u l-iSTEP. L-appoġġ finanzjarju jenħtieġ li jinkludi finanzjament ta’ avvjament li għandu jiġi pprovdut mill-Kummissjoni biex tistabbilixxi l-Akkademji Ewropej tal-Industrija b’Emissjonijiet Żero Netti (l-“Akkademji”) u biex tippermetti l-funzjonament tagħhom bil-ħsieb li jsiru finanzjarjament sostenibbli tliet snin wara l-istabbiliment tagħhom, inkluż billi tirċievi kontribuzzjonijiet finanzjarji mis-settur privat.

(104)

Jenħtieġ li l-Akkademji jitnedew biex jiġu żviluppati programmi ta’ edukazzjoni u taħriġ, kontenut u materjal, kif ukoll il-kredenzjali li juru li ġie żviluppat programm ta’ tagħlim minn waħda mill-Akkademji, biex itejbu l-ħiliet ta’ persuni ta’ kull età tax-xogħol u t-taħriġ mill-ġdid tagħhom, li huma meħtieġa għal ktajjen tal-valur ewlenin tat-teknoloġija b’emissjonijiet żero netti u biex joffru dawk il-programmi, il-kontenut u l-materjal lil fornituri xierqa tal-edukazzjoni u t-taħriġ u atturi oħra involuti fit-titjib tal-ħiliet u fit-taħriġ mill-ġdid fl-Istati Membri għall-użu volontarju tagħhom. Jenħtieġ li l-Akkademji jkollhom rwol ta’ faċilitazzjoni, b’rispett sħiħ tar-responsabbiltà tal-Istati Membri għall-kontenut tat-tagħlim u l-organizzazzjoni tas-sistemi edukattivi u għall-kontenut u l-organizzazzjoni tat-taħriġ vokazzjonali. Meta jagħmlu dan, jenħtieġ li l-Akkademji jikkontribwixxu għall-objettiv fit-tul li simultanjament jindustrijalizzaw mill-ġdid u jiddekarbonizzaw l-Unjoni, waqt li jirrispondu għan-nuqqas kritiku ta’ ħiliet, kif ukoll jikkontribwixxu għall-awtonomija strateġika miftuħa tagħha u jindirizzaw il-ħtieġa għal teknoloġiji b’emissjonijiet żero netti magħmula mill-Unjoni, billi jsaħħu l-kapaċità tagħha ta’ innovazzjoni u ta’ produzzjoni. Jenħtieġ li l-Akkademji jitnedew abbażi ta’ valutazzjoni mill-Kummissjoni tan-nuqqas ta’ ħiliet, li tiddependi fuq studji eżistenti u oġġettivi, f’industriji tat-teknoloġija b’emissjonijiet żero netti ewlenin għat-trasformazzjoni industrijali u d-dekarbonizzazzjoni. Kull Akkademja jenħtieġ li tiżviluppa pjan ta’ azzjoni li jistabbilixxi l-istadji importanti u l-miri, inkluż f’termini tal-għadd ta’ studenti li għandhom ikunu bbażati fuq il-valutazzjoni tan-nuqqas ta’ ħiliet.

(105)

Jenħtieġ li l-Akkademji jinkoraġġixxu t-tagħlim ta’ ħiliet trażversali li jiffaċilitaw il-mobbiltà okkupazzjonali, flimkien ma’ ħiliet oħra meħtieġa. Jenħtieġ li l-Akkademji jagħmlu l-kontenut tat-tagħlim tagħhom disponibbli f’lingwi differenti sabiex il-programmi ta’ tagħlim ikunu jistgħu jiġu aċċessati minn kemm jista’ jkun studenti. Jenħtieġ li jipprovdu taħriġ fil-livelli kollha tal-ħiliet sal-punt meħtieġ, u b’hekk jimmiraw il-livelli kollha tal-edukazzjoni u l-kwalifiki tul il-katina tal-valur tas-setturi kkonċernati. Il-fornituri tal-edukazzjoni u t-taħriġ fl-Istati Membri jistgħu jikkomplementaw il-kontenut u l-materjal tal-edukazzjoni u t-taħriġ żviluppati mill-Akkademji b’informazzjoni rilevanti addizzjonali mħejjija fil-livell tal-Istati Membri u li tirrifletti, pereżempju, il-liġi nazzjonali dwar id-drittijiet tax-xogħol u soċjali, il-ftehimiet kollettivi applikabbli jew ir-rekwiżiti territorjali jew speċifiċi għas-settur, bl-involviment tas-sħab soċjali u ekonomiċi fejn rilevanti. Il-kontenut tat-tagħlim jenħtieġ li jkollu wkoll fil-mira l-impjegati fl-amministrazzjonijiet nazzjonali u lokali, b’mod partikolari dawk responsabbli għall-ħruġ ta’ permessi, il-valutazzjoni tal-impatt u r-regolamenti ta’ teknoloġiji ġodda, u b’hekk jikkontribwixxi għat-tisħiħ tal-kapaċitajiet fost l-amministrazzjonijiet nazzjonali u għat-tnaqqis tad-disparitajiet fost l-Istati Membri.

(106)

Sabiex jiġu żgurati t-trasparenza u l-portabbiltà tal-ħiliet u l-mobbiltà tal-ħaddiema, l-Akkademji ser jiżviluppaw u jippromwovu l-użu tal-kredenzjali mill-fornituri tal-edukazzjoni u t-taħriġ, inkluż, jekk xieraq, il-mikrokredenzjali li jkopru l-kisbiet tat-tagħlim. Il-kredenzjali żviluppati mill-Akkademji jistgħu jinħarġu minn fornituri tal-edukazzjoni u t-taħriġ, jew il-korpi aġġudikanti fl-Istati Membri, fejn programm ta’ edukazzjoni u taħriġ żviluppat mill-Akkademji jkun tlesta b’suċċess. Jenħtieġ li l-kredenzjali jinħarġu fil-format tal-kredenzjali diġitali Ewropej għat-tagħlim u jistgħu jiġu integrati fil-Europass u, fejn rilevanti u fattibbli, inklużi fl-Oqfsa Nazzjonali tal-Kwalifiki. In-network tas-servizzi Ewropej tax-xogħol (EURES), li jipprovdu informazzjoni, pariri u reklutaġġ jew kollokament għall-benefiċċju tal-ħaddiema u tal-impjegaturi madwar l-Unjoni, jista’ jkollhom rwol sinifikanti fil-pubblikazzjoni ta’ pożizzjonijiet vakanti relatati ma’ teknoloġiji b’emissjonijiet żero netti u, fejn xieraq, fl-użu ta’ profili ta’ okkupazzjoni Ewropej.

(107)

Jenħtieġ li l-Pjattaforma tipprovdi assistenza biex tiggwida l-ħidma tal-Akkademji, filwaqt li tiżgura li l-kontenut tagħhom jindirizza n-nuqqasijiet ta’ ħiliet identifikati fil-valutazzjoni tal-Kummissjoni u tipprovdi superviżjoni. L-Istati Membri jenħtieġ li jiżguraw li r-rappreżentant nazzjonali maħtur ikun jista’ jaġixxi bħala pont bejn il-ministeri nazzjonali rilevanti u l-awtoritajiet kompetenti tal-Istati Membri kif ukoll is-sħab soċjali nazzjonali u r-rappreżentanti tal-industrija. Jenħtieġ li l-Pjattaforma timmonitorja l-progress li sar mill-Akkademji differenti, tanalizza l-kawżi ewlenin tan-nuqqas ta’ ħiliet u tidentifika sa liema punt l-użu tal-programmi ta’ taħriġ tal-Akkademji jindirizza n-nuqqas ta’ ħiliet fl-industriji tat-teknoloġija b’emissjonijiet żero netti u jikkomplementa l-opportunitajiet ta’ taħriġ eżistenti f’teknoloġiji b’emissjonijiet żero netti fl-Istati Membri. Jenħtieġ li l-Pjattaforma tirrapporta dwar l-użu tal-programmi ta’ tagħlim, inkluż permezz ta’ rapport ta’ progress li għandu jiġi ppreżentat tliet snin wara l-istabbiliment ta’ kull Akkademja u li jispeċifika l-għadd ta’ studenti li jibbenefikaw mill-programmi tal-Akkademji diżaggregati skont is-setturi industrijali, il-ġeneru, l-età, u l-livelli ta’ edukazzjoni u kwalifika.

(108)

Fin-nuqqas ta’ dispożizzjonijiet speċifiċi filliġi tal-Unjoni li jintroduċu rekwiżiti minimi ta’ taħriġ għall-aċċess għal professjoni regolata jew l-eżerċitar tagħha, id-deċiżjoni dwar jekk u kif għandha tiġi rregolata professjoni hija l-kompetenza tal-Istati Membri. Madankollu, jenħtieġ li r-regoli nazzjonali li jorganizzaw l-aċċess għall-professjonijiet regolati ma jikkostitwixxux ostaklu mhux ġustifikat jew sproporzjonat għall-eżerċitar ta’ dawk id-drittijiet fundamentali. Il-kompetenza għar-regolamentazzjoni tal-aċċess għal professjoni trid tiġi eżerċitata fil-limiti tal-prinċipji tan-nondiskriminazzjoni u tal-proporzjonalità, f’konformità mad-Direttiva (UE) 2018/958 tal-Parlament Ewropew u tal-Kunsill (47). Fil-valutazzjoni tagħhom, jenħtieġ li l-Istati Membri jqisu kwalunkwe effett detrimentali li r-regolament jew il-professjonijiet jista’ jkollhom fuq id-disponibbiltà ta’ ħiliet fl-Industrija b’Emissjonijiet Żero Netti u jfittxu li jillimitaw ir-regolament f’dawn l-oqsma sa fejn ikun possibbli.

(109)

Meta l-Istati Membri jiddeterminaw li l-programmi ta’ taħriġ żviluppati mill-Akkademji huma ekwivalenti għall-kwalifiki speċifiċi meħtieġa mill-Istat Membru ospitanti biex ikun hemm aċċess għal attivitajiet regolati fl-ambitu ta’ professjoni b’interess partikolari fl-industrija b’emissjonijiet żeri netti f’dak l-Istat Membru, jenħtieġ li l-Istati Membri, fil-kuntest tal-aċċess għal professjoni regolata u sabiex tiġi ffaċilitata l-mobilità fi professjonijiet fl-industrija b’emissjonijiet żero netti, jitrattaw dawk il-kredenzjali bħala prova suffiċjenti ta’ kwalifiki formali, f’konformità mal-Artikolu 11 tad-Direttiva 2005/36/KE tal-Parlament Ewropew u tal-Kunsill (48).

(110)

Il-kontribut ta’ teknoloġiji b’emissjonijiet żero netti għall-objettivi ta’ dekarbonizzazzjoni tal-Unjoni jista’ jimmaterjalizza biss meta dawk it-teknoloġiji jibdew jintużaw. Dak l-użu, sa ċertu punt, x’aktarx li jseħħ f’unitajiet domestiċi privati, iżda l-biċċa l-kbira tad-dekarbonizzazzjoni x’aktarx li tiġi mid-dekarbonizzazzjoni tal-proċessi industrijali. Sabiex jiġi żgurat li l-investimenti għal tali dekarbonizzazzjoni jitwettqu fl-Unjoni, li huwa essenzjali biex jiġu żgurati impjiegi ta’ kwalità u prosperità fl-Unjoni kif ukoll biex jiġu ssodisfati l-objettivi ta’ dekarbonizzazzjoni tal-Unjoni, huwa kruċjali li dan ir-Regolament jikkontribwixxi għal titjib fil-klima tal-investiment għall-industrija fl-Unjoni.

(111)

Fil-livell tal-Unjoni, jenħtieġ li tiġi stabbilita Pjattaforma, magħmula mill-Istati Membri u ppreseduta mill-Kummissjoni. Il-Pjattaforma tista’ tagħti pariri u tassisti lill-Kummissjoni u lill-Istati Membri dwar mistoqsijiet speċifiċi u tipprovdi korp ta’ referenza, li fih il-Kummissjoni u l-Istati Membri jikkoordinaw l-azzjoni tagħhom u jiffaċilitaw l-iskambju ta’ informazzjoni dwar kwistjonijiet relatati ma’ dan ir-Regolament. Barra minn hekk, jenħtieġ li l-Pjattaforma twettaq il-kompiti stabbiliti f’dan ir-Regolament, b’mod partikolari b’rabta mal-ħruġ ta’ permessi, inkluż punti ta’ kuntatt uniku, proġetti strateġiċi b’emissjonijiet żero netti, il-koordinazzjoni tal-finanzjament, l-aċċess għas-swieq, il-ħiliet, ambjenti ta’ esperimentazzjoni regolatorja għal teknoloġiji b’emissjonijiet żero netti kif ukoll l-assistenza lill-Kummissjoni fil-valutazzjoni tal-fattibbiltà u l-proporzjonalità tal-proposta ta’ miżuri jekk il-Kummissjoni tikkonkludi li x’aktarx ma jintlaħqux l-objettivi ġenerali tar-Regolament. Fejn ikun neċessarju, il-Pjattaforma tista’ tistabbilixxi sottogruppi permanenti jew temporanji u tistieden lil partijiet terzi, bħal esperti jew rappreżentanti minn industriji b’emissjonijiet żero netti.

(112)

Fejn xieraq u siewi, jenħtieġ li l-Pjattaforma tfittex kollaborazzjoni mill-qrib ma’ inizjattivi, pjattaformi u gruppi rilevanti oħra tal-Kummissjoni, sabiex tfittex sinerġiji, taqsam għarfien espert, tiskambja informazzjoni u trawwem l-involviment tal-partijiet ikkonċernati, filwaqt li tevita d-duplikazzjoni u r-ripetizzjoni. Il-Pjattaforma ser tinvolvi ruħha mal-alleanzi industrijali eżistenti tal-Unjoni, u b’hekk tikkontribwixxi għall-ħidma tal-alleanzi billi tinvolvi lill-Istati Membri. Alleanzi ewlenin għall-kollaborazzjoni mal-Pjattaforma huma l-Alleanza Ewropea tal-Batteriji, l-Alleanza Ewropea tal-Industrija Fotovoltajka Solari, l-Alleanza Ewropea għall-Idroġenu Nadif, l-Alleanza għal Avjazzjoni b’Emissjonijiet Żero, l-Alleanza Industrijali dwar il-Proċessuri u t-Teknoloġiji tas-Semikondutturi u l-Alleanza Industrijali tal-Katina tal-Valur tal-Fjuwils Rinnovabbli u b’Livell Baxx ta’ Karbonju. Setturi li bħalissa mhumiex rappreżentati f’alleanzi industrijali jgawdu bl-istess mod mill-qafas strutturat li tipprovdi l-Pjattaforma. Fir-rigward ta’ sħubijiet strateġiċi b’emissjonijiet żero netti, hija prevista kollaborazzjoni mill-qrib mal-Bord għall-Materja Prima Kritika fejn rilevanti.

(113)

It-tnaqqis tal-piż regolatorju u amministrattiv u l-eżistenza ta’ qafas regolatorju xieraq huma partikolarment importanti biex l-industriji jaġġustaw b’mod effettiv għat-tranżizzjonijiet fl-oqsma tal-klima u l-enerġija. Għalhekk, jenħtieġ li l-Unjoni jkollha l-għan li sal-2030 tikseb tnaqqis sinifikanti fil-piż regolatorju ġenerali fuq l-industrija, b’mod partikolari għat-tqegħid ta’ prodott ġdid fis-suq intern. Jenħtieġ li dawk l-isforzi, b’mod partikolari, isiru fil-qafas tar-Regolamentazzjoni Aħjar u mingħajr preġudizzju għall-istandards tal-Unjoni fir-rigward tal-ambjent u x-xogħol. Jenħtieġ li l-Kummissjoni tinforma lill-Pjattaforma dwar l-iżviluppi rigward il-piż regolatorju u amministrattiv għall-industriji tat-teknoloġiji b’emissjonijiet żero netti fl-Unjoni abbażi tar-Rapport tal-Kummissjoni tal-24 ta’ Ottubru 2023 intitolat “Progress dwar il-Kompetittività fir-rigward tat-Teknoloġiji tal-Enerġija Nadifa” u l-Istħarriġ tal-Piż Annwali 2022 tal-Kummissjoni. Sabiex tiġi ffaċilitata l-ħidma tal-istituzzjonijiet tal-Unjoni biex il-piż regolatorju għall-industriji tat-teknoloġiji b’emissjonijiet żero netti jinżamm f’livell minimu, dan ir-Regolament jistabbilixxi Grupp Konsultattiv Xjentifiku dwar il-Piż Regolatorju fir-rigward tal-Emissjonijiet Żero Netti (il-“Grupp Konsultattiv Xjentifiku”). Jenħtieġ li l-Grupp Konsultattiv Xjentifiku jiżviluppa pariri bbażati fuq ix-xjenza fir-rigward tal-impatt tal-piż regolatorju fl-Unjoni fuq l-industriji b’emissjonijiet żero netti, billi juża metodoloġija bbażata fuq ix-xjenza, u fejn xieraq billi jieħu kont tal-Istrumenti għal Regolamentazzjoni Aħjar, għall-valutazzjoni tal-impatt tal-piżijiet regolatorji. Il-ħidma tal-Grupp Konsultattiv Xjentifiku hija mingħajr preġudizzju għall-prerogattivi tal-istituzzjonijiet tal-Unjoni.

(114)

Ir-Regolament (UE) 2018/1999 jipprevedi li l-Istati Membri jissottomettu abbozzi aġġornati tal-pjanijiet nazzjonali tagħhom għall-enerġija u l-klima għall-2021 sal-2030. Kif enfasizzat fil-Gwida tal-Kummissjoni lill-Istati Membri għal dawk l-aġġornamenti, il-pjanijiet nazzjonali aġġornati għall-enerġija u l-klima jenħtieġ li jiddeskrivu l-objettivi u l-politiki tal-Istati Membri biex jiffaċilitaw l-espansjoni tal-proġetti ta’ manifattura ta’ teknoloġiji, tagħmir u komponenti ewlenin effiċjenti fl-użu tal-enerġija u b’livell baxx ta’ emissjonijiet tal-karbonju disponibbli kummerċjalment fit-territorju tagħhom. Dawk il-pjanijiet jenħtieġ li jiddeskrivu wkoll l-objettivi u l-politiki tal-Istati Membri biex tinkiseb dik l-espansjoni permezz ta’ sforzi ta’ diversifikazzjoni f’pajjiżi terzi, u biex l-industriji tagħhom ikunu jistgħu jaqbdu, jittrasportaw u jaħżnu l-emissjonijiet tas-CO2 b’mod permanenti f’siti tal-ħżin ġeoloġiku. Jenħtieġ li dawk il-pjanijiet jiffurmaw il-bażi li fuqha tiġi ddeterminata l-ħtieġa għal teknoloġiji b’emissjonijiet żero netti. Meta jqisu dan ir-Regolament fit-tħejjija tal-pjanijiet nazzjonali tagħhom għall-enerġija u l-klima, jenħtieġ li l-Istati Membri jikkunsidraw kemm il-kompetittività ġenerali kif ukoll ir-riċerka u l-innovazzjoni fil-qasam tal-industriji b’emissjonijiet żero netti fit-tul.

(115)

Bħala parti mill-Pjan Industrijali tal-Patt Ekoloġiku, il-Kummissjoni ħabbret l-intenzjoni tagħha li tikkonkludi Sħubijiet Industrijali b’Emissjonijiet Żero Netti li jkopru teknoloġiji b’emissjonijiet żero netti, filwaqt li żżid l-isforzi tagħha biex tingħaqad mas-sħab impenjati għall-Ftehim ta’ Pariġi. Il-kooperazzjoni permezz ta’ tali Sħubijiet x’aktarx li tippromwovi l-adozzjoni ta’ teknoloġiji b’emissjonijiet żero netti globalment u li tappoġġa sħubijiet ta’ tisħiħ reċiproku bejn l-Unjoni u pajjiżi terzi, inkluż investimenti sostenibbli u assistenza teknika. Jenħtieġ li s-Sħubijiet Industrijali b’Emissjonijiet Żero Netti jkunu ta’ benefiċċju reċiproku għall-Unjoni u s-sħab tagħha, u jenħtieġ li jikkontribwixxu għall-kisba tal-objettivi klimatiċi globali. Dawk is-Sħubijiet jistgħu jikkontribwixxu wkoll għad-diversifikazzjoni u r-reżiljenza tal-provvista tal-Unjoni ta’ teknoloġiji b’emissjonijiet żero netti u l-komponenti tagħhom, isaħħu l-kondiviżjoni tal-informazzjoni bejn l-Unjoni u s-sħab tagħha dwar l-iżvilupp ta’ teknoloġiji b’emissjonijiet żero netti u jappoġġaw l-industriji tal-Unjoni b’emissjonijiet żero netti biex jaċċessaw is-suq globali tal-enerġija nadifa, filwaqt li jappoġġaw l-industriji emerġenti fil-qasam tat-teknoloġiji tal-enerġija nadifa f’pajjiżi terzi b’vantaġġi komparattivi ċari. Il-Kummissjoni u l-Istati Membri jistgħu jikkoordinaw is-Sħubijiet Industrijali b’Emissjonijiet Żero Netti fi ħdan il-Pjattaforma, jiddiskutu s-sħubijiet u l-proċessi rilevanti eżistenti, bħas-sħubijiet ekoloġiċi, id-djalogi dwar l-enerġija u forom oħra ta’ arranġamenti kuntrattwali bilaterali eżistenti, kif ukoll sinerġiji potenzjali ma’ ftehimiet bilaterali rilevanti tal-Istati Membri ma’ pajjiżi terzi.

(116)

Jenħtieġ li l-Unjoni jkollha l-għan li tiddiversifika u tistimula l-kummerċ u l-investiment internazzjonali f’teknoloġiji b’emissjonijiet żero netti u tibni sħubijiet ta’ tisħiħ reċiproku, filwaqt li tippromwovi standards soċjali, tax-xogħol u ambjentali globalment għoljin. Dak jenħtieġ li jsir b’kooperazzjoni mill-qrib u fi sħubija ma’ pajjiżi tal-istess fehma permezz ta’ ftehimiet eżistenti jew impenji strateġiċi ġodda. Bl-istess mod, jenħtieġ li tiġi segwita kooperazzjoni internazzjonali dwar sforzi aktar b’saħħithom ta’ riċerka u innovazzjoni biex jiġu żviluppati u implimentati teknoloġiji b’emissjonijiet żero netti b’kooperazzjoni mill-qrib ma’ pajjiżi sħab b’mod miftuħ u bbilanċjat, u abbażi tar-reċiproċità u interessi komuni.

(117)

Sabiex jiġu identifikati u mmitigati r-riskji potenzjali tal-provvista relatati ma’ teknoloġiji b’emissjonijiet żero netti, jenħtieġ li jkun possibbli li jiġu mmonitorjati, fuq bażi kontinwa, l-indikaturi relatati max-xejriet tas-suq, il-kapaċitajiet tal-manifattura, l-innovazzjoni, l-impjiegi u l-ħiliet, iż-żminijiet għall-ħruġ ta’ permessi ta’ teknoloġiji b’emissjonijiet żero netti, u l-kapaċitajiet ta’ injezzjoni tas-CO2. Madankollu, bħalissa ma hemmx biżżejjed data ta’ kwalità għolja disponibbli għall-monitoraġġ ta’ dawk l-indikaturi. Peress li l-kompiti previsti f’dan ir-Regolament jiddependu fuq id-disponibbiltà ta’ data ta’ kwalità, huwa meħtieġ li l-Kummissjoni tipprijoritizza, fil-monitoraġġ tagħha, fost it-teknoloġiji b’emissjonijiet żero netti abbażi tal-importanza tagħhom fl-Unjoni filwaqt li taħdem fuq it-titjib tad-disponibbiltà ta’ tali data. Il-Kummissjoni ser taħdem ukoll mill-qrib mal-Eurostat, l-awtorità tal-istatistika tal-Unjoni, biex tiżviluppa kodiċijiet komuni għal teknoloġiji b’emissjonijiet żero netti meħtieġa għal rapportar u statistika ta’ kwalità għolja u fit-tul.

(118)

Meta s-setgħa li tadotta atti f’konformità mal-Artikolu 290 TFUE tiġi ddelegata lill-Kummissjoni skont dan ir-Regolament, huwa ta’ importanza partikolari li l-Kummissjoni twettaq konsultazzjonijiet xierqa matul il-ħidma preparatorja tagħha, inkluż fil-livell ta’ esperti, u li dawk il-konsultazzjonijiet jitwettqu f’konformità mal-prinċipji stabbiliti fil-Ftehim Interistituzzjonali dwar it-Tfassil Aħjar tal-Liġijiet tat-13 ta’ April 2016 (49). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(119)

Sa fejn kwalunkwe waħda mill-miżuri previsti minn dan ir-Regolament tikkostitwixxi għajnuna mill-Istat, id-dispożizzjonijiet li jikkonċernaw tali miżuri huma mingħajr preġudizzju għall-applikazzjoni tal-Artikoli 107 u 108 TFUE.

(120)

Minħabba li l-objettiv ta’ dan ir-Regolament ma jistax jinkiseb b’mod suffiċjenti mill-Istati Membri iżda jista’ pjuttost, minħabba l-iskala jew l-effetti tal-azzjoni, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-objettiv,