(1)

Ir-Regolament ta’ Implimentazzjoni tal-Kummissjoni (UE) Nru 686/2012 (2) jalloka l-evalwazzjoni tas-sustanzi attivi deltametrina, diflufenikan, epossikonażol, fluwossastrobin, protijokonażol u tebukonażol għall-finijiet tal-proċeduri ta’ tiġdid lill-Istati Membri rispettivi, u għal kull sustanza attiva jsemmi relatur u korelatur.

(2)

Ir-Regolament ta’ Implimentazzjoni tal-Kummissjoni (UE) 2019/150 (3) ibiddel l-allokazzjoni tal-evalwazzjoni ta’ dawk is-sustanzi attivi lil Stati Membri relaturi oħra rispettivament, wara n-notifika mressqa mir-Renju Unit bl-intenzjoni tiegħu li joħroġ mill-Unjoni skont l-Artikolu 50 tat-Trattat dwar l-Unjoni Ewropea.

(3)

L-allokazzjoni hija bbażata fuq il-kunsiderazzjoni li l-evalwazzjoni tas-sustanzi attivi kkonċernati tinsab fi stadju avvanzat u l-ħidma li għandha titwettaq mistennija li tkun minuri. Għalhekk, l-ebda Stat Membru korelatur ma huwa allokat għal dik l-evalwazzjoni.

(4)

Madankollu, fit-28 ta’ Awwissu 2023, l-Awtorità talbet, skont l-Artikolu 13(3a) tar-Regolament ta’ Implimentazzjoni tal-Kummissjoni (UE) Nru 844/2012 (4), informazzjoni addizzjonali għas-sustanza attiva deltametrina, għall-finijiet tal-valutazzjoni tal-kriterji għall-approvazzjoni stabbiliti fil-punti 3.6.5 u 3.8.2 tal-Anness II tar-Regolament (KE) Nru 1107/2009.

(5)

Billi l-Iżvezja hija l-awtorità kompetenti li tevalwa għat-tiġdid tal-approvazzjoni tas-sustanza attiva deltametrina f’konformità mar-Regolament (UE) Nru 528/2012 tal-Parlament Ewropew u tal-Kunsill (5), huwa meqjus xieraq, bil-ħsieb li jiġu ffaċilitati l-koerenza u l-effiċjenza fl-evalwazzjoni skont ir-Regolament (KE) Nru 1107/2009 u r-Regolament (UE) Nru 528/2012, li l-Iżvezja tiġi allokata bħala Stat Membru korelatur għall-finijiet tat-tiġdid tal-approvazzjoni tad-deltametrina.

(6)

Għalhekk, jenħtieġ li r-Regolament ta’ Implimentazzjoni (UE) Nru 686/2012 jiġi emendat skont dan.

(7)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,