(1)

L-approvazzjoni tal-aċibenżolar-s-metil ġiet imġedda bir-Regolament ta’ Implimentazzjoni tal-Kummissjoni (UE) 2016/389 (2).

(2)

Ir-Regolament tal-Kummissjoni (UE) 2018/605 (3) emenda r-Regolament (KE) Nru 1107/2009 billi introduċa kriterji ġodda għall-identifikazzjoni ta’ sustanzi attivi li jfixklu s-sistema endokrinali, li saru applikabbli fl-10 ta’ Novembru 2018. Dan kien jirrikjedi li l-applikant jenħtieġ li jressaq lill-Kummissjoni, lill-Istati Membri u lill-Awtorità Ewropea dwar is-Sigurtà fl-Ikel (“l-Awtorità”) informazzjoni ta’ konferma dwar il-proprjetajiet ta’ tfixkil tas-sistema endokrinali tal-aċibenżolar-s-metil.

(3)

L-applikant ippreżenta dossier aġġornat, kif ukoll informazzjoni addizzjonali, fi Frar 2019.

(4)

Fit-8 ta’ Lulju 2021, l-Awtorità ppubblikat rieżami bejn il-pari tal-valutazzjoni tar-riskju tal-pestiċidi għas-sustanza attiva aċibenżolar-s-metil (4) relatata mad-data ta’ konferma ppreżentata mill-applikant, fejn irrapportat li l-valutazzjoni tal-proprjetajiet ta’ tfixkil tas-sistema endokrinali tal-aċibenżolar-s-metil ma setgħetx tiġi ffinalizzata abbażi tad-data disponibbli kemm għall-bnedmin kif ukoll għall-organiżmi mhux fil-mira, u identifikat data ulterjuri meħtieġa biex tiġi ffinalizzata l-valutazzjoni.

(5)

Għalhekk, il-Kummissjoni nediet rieżami tal-approvazzjoni eżistenti tas-sustanza attiva f’konformità mal-Artikolu 21 tar-Regolament (KE) Nru 1107/2009. L-applikant ġie mistieden jippreżenta, sal-aħħar ta’ Ġunju 2025, l-informazzjoni addizzjonali meħtieġa biex jiġi evalwat jekk l-aċibenżolar-s-metil għadhiex tissodisfa l-kriterji għall-approvazzjoni stipulati fil-punt 3.6.5 tal-Anness II ta’ dak ir-Regolament.

(6)

Fit-8 ta’ Settembru 2023, l-applikant informa lill-Kummissjoni dwar il-waqfien ta’ studji ulterjuri b’rabta mal-attributi ta’ tfixkil tas-sistema endokrinali tal-aċibenżolar-s-metil u dwar id-deċiżjoni tiegħu li jikklassifika dik is-sustanza bħala tossika għar-riproduzzjoni tal-kategorija 1B (R1B) skont ir-Regolament (KE) Nru 1272/2008 tal-Parlament Ewropew u tal-Kunsill (5).

(7)

Għaldaqstant, ma ġiex stabbilit li l-kriterji ta’ approvazzjoni previsti fl-Artikolu 4 tar-Regolament (KE) Nru 1107/2009 huma ssodisfati. Għalhekk, il-Kummissjoni jidhrilha li l-aċibenżolar-s-metil ma għadhiex tissodisfa l-kriterji għall-approvazzjoni stipulati fil-punt 3.6.5 tal-Anness II ta’ dak ir-Regolament.

(8)

Għalhekk jixraq li l-approvazzjoni tal-aċibenżolar-s-metil tiġi rtirata.

(9)

Għalhekk ir-Regolament ta’ Implimentazzjoni tal-Kummissjoni (UE) Nru 540/2011 (6) jenħtieġ li jiġi emendat skont dan u r-Regolament ta’ Implimentazzjoni (UE) 2016/389 jenħtieġ li jitħassar.

(10)

Jenħtieġ li l-Istati Membri jingħataw biżżejjed żmien biex jirtiraw l-awtorizzazzjonijiet għall-prodotti għall-protezzjoni tal-pjanti li fihom l-aċibenżolar-s-metil.

(11)

Għall-prodotti għall-protezzjoni tal-pjanti li fihom l-aċibenżolar-s-metil, meta jingħata xi perjodu ta’ grazzja mill-Istati Membri f’konformità mal-Artikolu 46 tar-Regolament (KE) Nru 1107/2009, jenħtieġ li dak il-perjodu jkun qasir kemm jista’ jkun u li jiskadi mhux aktar tard minn 12-il xahar wara d-data tad-dħul fis-seħħ ta’ dan ir-Regolament.

(12)

Dan ir-Regolament ma jipprevjenix is-sottomissjoni ta’ applikazzjoni ġdida għall-approvazzjoni tal-aċibenżolar-s-metil skont l-Artikolu 7 tar-Regolament (KE) Nru 1107/2009.

(13)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,