REGOLAMENT DELEGAT TAL-KUMMISSJONI (UE) 2024/1682

tal-4 ta’ Marzu 2024

li jemenda r-Regolament (UE) 2019/1009 tal-Parlament Ewropew u tal-Kunsill fir-rigward taż-żieda ta’ demel ipproċessat bħala materjal komponent fil-prodotti fertilizzanti tal-UE

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2019/1009 tal-Parlament Ewropew u tal-Kunsill tal-5 ta’ Ġunju 2019 li jistabbilixxi regoli dwar it-tpoġġija għad-dispożizzjoni fis-suq ta’ prodotti fertilizzanti tal-UE u li jemenda r-Regolamenti (KE) Nru 1069/2009 u (KE) Nru 1107/2009 u li jħassar ir-Regolament (KE) Nru 2003/2003 (1), u b’mod partikolari l-Artikolu 42(1) tiegħu,

Billi:

(1)

Ir-Regolament (UE) 2019/1009 jistabbilixxi regoli dwar it-tpoġġija għad-dispożizzjoni fis-suq ta’ prodotti fertilizzanti tal-UE. Il-prodotti fertilizzanti tal-UE jista’ jkun fihom prodotti derivati skont it-tifsira tar-Regolament (KE) Nru 1069/2009 tal-Parlament Ewropew u tal-Kunsill (2). F’konformità mal-Artikolu 5 tar-Regolament (KE) Nru 1069/2009, il-punt aħħari fil-katina tal-manifattura għad-demel ipproċessat ġie ddeterminat fir-Regolament Delegat tal-Kummissjoni (UE) 2023/1605 (3).

(2)	F’konformità mal-Artikolu 42(5), it-tieni subparagrafu, tar-Regolament (UE) 2019/1009, iċ-Ċentru Konġunt tar-Riċerka tal-Kummissjoni (JRC) ivvaluta d-demel ipproċessat fir-rigward tal-aspetti rilevanti li ma tqisux għall-fini tad-determinazzjoni ta’ punt finali fil-katina tal-manifattura (4).

(3)

Id-demel ipproċessat għandu l-potenzjal li jkun soġġett għal kummerċ sinifikanti fis-suq intern peress li huwa prodott derivat użat b’mod komuni fil-fertilizzanti organiċi u fit-tejjieba tal-ħamrija. L-istabbiliment tar-rekwiżiti għall-markatura CE tal-prodotti fertilizzanti tal-UE li jkun fihom demel ipproċessat jiffaċilita l-kummerċ ta’ prodotti bħal dawn fis-suq intern. Il-JRC ikkonkluda li l-introduzzjoni ta’ demel ipproċessat fil-Kategorija tal-Materjal Komponenti 10 fl-Anness II tar-Regolament (UE) 2019/1009 tiffaċilita wkoll l-implimentazzjoni tad-Direttiva tal-Kunsill 91/676/KEE (5) billi tippromwovi t-trasferiment ta’ demel ipproċessat minn reġjuni b’densità għolja ta’ nutrijenti għal dawk b’densità baxxa.

(4)	Id-demel ipproċessat fih materja u nutrijenti organiċi, b’mod partikolari, in-nitroġenu u l-fosforu, tnejn mit-tliet makronutrijenti primarji stabbiliti fir-Regolament (UE) 2019/1009. Wera l-valur agronomiku tiegħu matul storja twila ta’ użu.

(5)

Sabiex jiġi żgurat li prodott fertilizzanti tal-UE li jkun fih demel ipproċessat iżomm il-kontenut tan-nutrijenti tiegħu maż-żmien, li l-kontenut tiegħu ta’ żrieragħ tal-ħaxix selvaġġ jew propaguli tal-pjanti vijabbli jkun limitat u li jitnaqqsu l-emissjonijiet tan-nutrijenti fl-ambjent matul il-ħżin, huwa neċessarju li jkun rikjest ipproċessar flimkien ma’ dak meħtieġ biex jintlaħaq il-punt ta’ tmiem fil-katina tal-manifattura. Għalhekk, id-demel ipproċessat jenħtieġ li jkompli jiġi pproċessat biex jgħaddi minn għarbiel b’toqob iżgħar mid-dimensjonijiet magħrufa taż-żrieragħ tal-ħaxix selvaġġ, jew jiġi granulat jew ippelletizzat f’ċerti kundizzjonijiet li jiżguraw li ż-żrieragħ tal-ħaxix selvaġġ ma jibqgħux vijabbli. Kwalunkwe pproċessar ieħor jista’ jintuża wkoll sakemm jiżgura li l-kontenut ta’ żrieragħ tal-ħaxix selvaġġ vijabbli jkun limitat. Bħala alternattiva, id-demel ipproċessat jista’ wkoll ikompli jiġi pproċessat biex jikkonforma ma’ wieħed mill-kriterji ta’ stabbiltà stipulati għall-kompost tal-Kategorija tal-Materjal Komponenti 3. Dan jiżgura li l-materjal li jirriżulta jkun stabbli, li d-dekompożizzjoni ma tkomplix wara li l-prodott jitqiegħed fis-suq u li ż-żrieragħ tal-ħaxix selvaġġ ma jibqgħux vijabbli wara l-proċess ta’ kompostjar.

(6)

Jenħtieġ li jiġi stabbilit kriterju ta’ sikurezza addizzjonali biex jiġi limitat il-kontenut tas-16-il idrokarbur aromatiku poliċikliku (PAH 16) (6) li jista’ jiġi ġenerat matul il-proċessar tad-demel. Ir-Regolament (UE) 2019/1021 tal-Parlament Ewropew u tal-Kunsill (7) jistipula rekwiżiti għat-tnaqqis fl-emissjonijiet għall-PAH 16 bħala sustanzi prodotti b’mod mhux intenzjonat matul il-proċessi tal-manifattura, iżda ma jintroduċix valur ta’ limitu f’tali każijiet. Minħabba r-riskji għoljin iġġenerati mill-preżenza ta’ tali sustanzi niġġiesa fil-prodotti fertilizzanti, huwa xieraq li jiġu introdotti rekwiżiti aktar stretti minn dawk stipulati fir-Regolament (UE) 2019/1021. Tali valur ta’ limitu jenħtieġ li jiġi stabbilit fil-livell ta’ materjal komponenti, biex tiġi żgurata l-koerenza mar-Regolament (UE) 2019/1021 u jenħtieġ li japplika flimkien mal-kriterji tas-sikurezza stabbiliti fl-Anness I tar-Regolament (UE) 2019/1009 għall-kategorija funzjonali tal-prodott korrispondenti. Sabiex tiġi ffaċilitata l-proċedura tal-valutazzjoni tal-konformità u jiġu evitati kostijiet mhux meħtieġa, jenħtieġ li tiġi introdotta l-possibbiltà li wieħed jassumi konformità ma’ dan ir-rekwiżit mingħajr ittestjar, meta jkun ċar mill-proċess tal-manifattura li dan il-valur ta’ limitu jiġi ssodisfat.

(7)

Id-demel ipproċessat jista’ jgħaddi minn ipproċessar addizzjonali biex ikompli jittejjeb il-valur agronomiku tiegħu jew is-sikurezza tiegħu. Il-metodi tal-ipproċessar li bħalissa jintużaw ħafna, bħas-separazzjoni solidu-likwidu, it-tnixxif, il-pelitizzazzjoni, u l-irkupru tan-nutrijenti, jenħtieġ li jiġu inklużi fil-Kategorija tal-Materjal Komponenti 10 fl-Anness II tar-Regolament (UE) 2019/1009. Madankollu, il-passi tal-ipproċessar tad-demel jenħtieġ li ma jinkludux proċessi ta’ konverżjoni termokimiċi f’temperaturi jew pressjonijiet għoljin, bħal-likwefazzjoni, il-karbonizzazzjoni idrotermali, il-piroliżi, il-gassifikazzjoni jew il-kombustjoni, peress li tali proċessi huma koperti skont kategoriji ta’ materjali komponenti oħra minħabba n-natura speċifika tal-proċess ta’ trasformazzjoni tal-materjal.

(8)

Bħala miżura ta’ sikurezza addizzjonali, l-addittivi meħtieġa fl-ipproċessar tad-demel jenħtieġ li jiġu rreġistrati abbażi tar-Regolament (KE) Nru 1907/2006 tal-Parlament Ewropew u tal-Kunsill (8), fil-kundizzjonijiet estensivi diġà stabbiliti fir-Regolament (UE) 2019/1009 għal addittivi f’kategoriji oħrajn ta’ materjali komponenti. Dan jiżgura li l-manifatturi jqisu l-użu tal-addittivi fi prodott fertilizzanti huma u jwettqu l-valutazzjoni tar-riskju skont ir-Regolament (KE) Nru 1907/2006 u li r-reġistrazzjoni ssir ukoll għall-materjali b’tunnellaġġ baxx.

(9)

Barra minn hekk, id-demel ipproċessat jista’ jkun disponibbli fis-swieq lokali fi kwantitajiet li jaqbżu d-domanda. Sabiex jiġi żgurat li l-ħżin fit-tul tiegħu f’kundizzjonijiet subottimali ma jwassalx għal impatti ambjentali negattivi, huwa xieraq li jiġi limitat iż-żmien li matulu jkun jista’ jintuża bħala materjal komponent għall-prodotti fertilizzanti tal-UE.

(10)

Jenħtieġ li jiġi introdott rekwiżit ta’ tikkettar ġenerali għall-prodotti fertilizzanti tal-UE li jkun fihom demel ipproċessat biex tingħata informazzjoni lill-utenti finali dwar l-impatti potenzjali tar-rilaxx tal-ammonijaka mill-użu tad-demel ipproċessat fuq il-kwalità tal-arja u biex jistedinhom japplikaw miżuri xierqa biex inaqqsu dawn l-impatti.

(11)

Id-demel ipproċessat jista’ jkun fih amminopiralid jew kloripalid, sustanzi li għalihom il-livelli massimi ta’ residwi għall-ikel u l-għalf huma stabbiliti f’konformità mar-Regolament (KE) Nru 396/2005 tal-Parlament Ewropew u tal-Kunsill (9). Għalhekk, l-utenti tal-prodotti fertilizzanti tal-UE li jkun fihom tali demel ipproċessat jenħtieġ li jiġu infurmati bis-sħiħ fir-rigward tal-preżenza ta’ dawk is-sustanzi, sabiex jieħdu l-miżuri neċessarji biex jiżguraw li l-għalla li tirriżulta tikkonforma mal-livelli massimi ta’ residwi.

(12)	Għaldaqstant, jenħtieġ li r-Regolament (UE) 2019/1009 jiġi emendat skont dan,

ADOTTAT DAN IR-REGOLAMENT:

Artikolu 1

Ir-Regolament (UE) 2019/1009 huwa emendat kif ġej:

(1)	l-Anness II huwa emendat f’konformità mal-Anness I ta’ dan ir-Regolament;

(2)	L-Anness III huwa emendat f’konformità mal-Anness II ta’ dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, l-4 ta’ Marzu 2024.

Għall-Kummissjoni

Il-President

Ursula VON DER LEYEN

(1) ĠU L 170, 25.6.2019, p. 1, ELI: http://data.europa.eu/eli/reg/2019/1009/oj.

(2) Ir-Regolament (KE) Nru 1069/2009 tal-Parlament Ewropew u tal-Kunsill tal-21 ta’ Ottubru 2009 li jistabbilixxi regoli tas-saħħa li jirrigwardaw prodotti sekondarji tal-annimali jew derivati minnhom mhux maħsuba għall-konsum mill-bniedem u li jħassar ir-Regolament (KE) Nru 1774/2002 (ĠU L 300, 14.11.2009, p. 1, ELI: http://data.europa.eu/eli/reg/2009/1069/oj).

(3) Ir-Regolament Delegat tal-Kummissjoni (UE) 2023/1605 tat-22 ta’ Mejju 2023 li jissupplimenta r-Regolament (KE) Nru 1069/2009 tal-Parlament Ewropew u tal-Kunsill fir-rigward tad-determinazzjoni ta’ punti ta’ tmiem fil-katina tal-manifattura ta’ ċerti fertilizzanti organiċi u materjali li jtejbu l-ħamrija (ĠU L 198, 8.8.2023, p. 1, ELI: http://data.europa.eu/eli/reg_del/2023/1605/oj).

(4) Huygens, D., Technical proposals for processed manure as a component material for EU Fertilising Products.

(5) Id-Direttiva tal-Kunsill 91/676/KEE tat-12 ta’ Diċembru 1991 dwar il-protezzjoni tal-ilma kontra t-tniġġis ikkawżat min-nitrati minn sorsi agrikoli (ĠU L 375, 31.12.1991, p. 1, ELI: http://data.europa.eu/eli/dir/1991/676/oj).

(6) Is-somma ta’ naftalen, aċenaftilen, aċenaften, fluworen, fenantren, antraċen, fluworanten, piren, benżo[a]antraċen, krisen, benżo[b]fluworanten, benżo[k]fluworanten, benżo[a]piren, indeno[1,2,3-cd]piren, dibenżo[a,h]antraċen u benżo[ghi]perilen.

(7) Ir-Regolament (UE) 2019/1021 tal-Parlament Ewropew u tal-Kunsill tal-20 ta’ Ġunju 2019 dwar il-pollutanti organiċi persistenti (ĠU L 169, 25.6.2019, p. 45, ELI: http://data.europa.eu/eli/reg/2019/1021/oj).

(8) Ir-Regolament (KE) Nru 1907/2006 tal-Parlament Ewropew u tal-Kunsill tat-18 ta’ Diċembru 2006 dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta’ sustanzi kimiċi (REACH), li jistabbilixxi Aġenzija Ewropea għas-Sustanzi Kimiċi, li jemenda d-Direttiva 1999/45/KE u li jħassar ir-Regolament (KEE) Nru 793/93 tal-Kunsill u r-Regolament (KE) Nru 1488/94 tal-Kummissjoni kif ukoll id-Direttiva 76/769/KEE tal-Kunsill u d-Direttivi 91/155/KEE, 93/67/KEE, 93/105/KE u 2000/21/KE tal-Kummissjoni (ĠU L 396, 30.12.2006, p. 1, ELI: http://data.europa.eu/eli/reg/2006/1907/oj).

(9) Ir-Regolament (KE) Nru 396/2005 tal-Parlament Ewropew u tal-Kunsill tat-23 ta’ Frar 2005 dwar il-livelli massimi ta' residwu ta' pestiċidi fi jew fuq ikel u għalf li joriġina minn pjanti u annimali u jemenda d-Direttiva tal-Kunsill 91/414/KEE (ĠU L 70, 16.3.2005, p. 1, ELI: http://data.europa.eu/eli/reg/2005/396/oj).

ANNESS I

Fil-Parti II tal-Anness II tar-Regolament (UE) 2019/1009, is-CMC 10 huwa sostitwit b’dan li ġej:

“ CMC 10: PRODOTTI DERIVATI FIS-SENS TAR-REGOLAMENT (KE) NRU 1069/2009

Prodott fertilizzanti tal-UE jista’ jkun fih prodotti derivati fis-sens tar-Regolament (KE) Nru 1069/2009 meta jilħaq il-punt aħħari fil-katina tal-manifattura kif iddeterminat skont dak ir-Regolament, u li huma elenkati fit-tabella li ġejja u kif speċifikat fiha:

Nru

Il-materjal ta’ komponenti

Rekwiżiti addizzjonali

Demel ipproċessat li jissodisfa l-kundizzjonijiet fl-Artikolu 3(d) tar-Regolament Delegat (UE) 2023/1605 (1)

1.1.

Prodott fertilizzanti tal-UE jista’ jkun fih demel ipproċessat biss jekk ikun ġie ttrattat biex jintlaħaq punt tat-tmiem skont ir-Regolament (KE) Nru 1069/2009 mhux aktar tard minn 36 xahar qabel l-iffirmar tad-dikjarazzjoni ta’ konformità tal-UE għall-prodott rispettiv u l-materjal ikun għadda minn ipproċessar addizzjonali sabiex tiġi ssodisfata mill-inqas waħda mill-kundizzjonijiet li ġejjin:

(a)	mill-inqas 90 % skont il-piż niexef tal-materjal ikun jista’ jgħaddi minn għarbiel b’malja ta’ 0,25 mm;

(b)

il-materjal ikun ġie granulat taħt pressjoni, pelletizzat, imnixxef f’temperaturi ogħla minn 100 °C jew ikun għadda minn kwalunkwe proċess ekwivalenti li jiżgura li l-kontenut ta’ żrieragħ tal-ħaxix ħażin u ta’ propaguli tal-pjanti vijabbli fid-demel ipproċessat ma jkunx aktar minn 3 unitajiet/l; jew

(c)	il-materjal jissodisfa mill-inqas wieħed mill-kriterji ta’ stabbiltà stabbiliti fil-punt 5 ta’ CMC 3.

1.2.

Il-materjal imsemmi fil-punt 1.1 jista’ jgħaddi minn wieħed jew aktar mill-proċessi addizzjonali li ġejjin:

(a)	il-metodi tal-ipproċessar imsemmija f’CMC 2;

(b)	it-trattament bijoloġiku li jinvolvi n-nitrifikazzjoni u d-denitrifikazzjoni;

(c)	is-separazzjoni mekkanika tal-frazzjonijiet solidi u likwidi;

(d)	il-proċessi għall-irkupru ta’ nutrijenti u/jew karbonju organiku, mingħajr l-intenzjoni li l-materjal jiġi modifikat mod ieħor;

(e)	l-ipproċessar kimiku biex jiġi mmodifikat il-pH mingħajr l-intenzjoni li l-materjal jiġi modifikat mod ieħor;

(f)	l-ipproċessar fiżiku biex jitneħħa l-ilma u biex il-materjal jiġi ttrasformat fi trab, granuli jew pellets, mingħajr l-intenzjoni li l-materjal jiġi modifikat mod ieħor.

1.3.

L-addittivi meħtieġa fl-ipproċessar imsemmi fil-punti 1.1 u 1.2 jistgħu jintużaw sakemm:

(a)	l-addittiv jikkonforma mar-rekwiżit stabbilit fil-punt 2 tas-CMC 1;

(b)	il-konċentrazzjoni tal-addittivi meħtieġa f’kull wieħed mill-proċessi ma taqbiżx il-5 % tal-piż tad-demel proċessat jew tal-frazzjoni użata bħala input fil-proċess rispettiv.

1.4.	Id-demel proċessat ma għandux ikun fih iktar minn 6 mg/kg piż niexef ta’ PAH16 (2).

1.5.	Id-demel ipproċessat li se jintuża bħala materjal komponenti fi prodott fertilizzanti tal-UE għandu jinħażen b’mod li jipproteġih kontra l-preċipitazzjoni u d-dawl tax-xemx dirett.

Fejn il-konformità mar-rekwiżit stipulat fil-punt 1.4 issegwi b’mod ċert u inkontestabbli min-natura jew l-ipproċessar tal-materjal komponenti jew il-proċess ta’ manifattura tal-prodott fertilizzanti tal-UE, tali konformità tista’ tiġi preżunta fil-proċedura ta’ valutazzjoni tal-konformità mingħajr verifika (bħall-ittestjar), taħt ir-responsabbiltà tal-manifattur.”.

(1) Ir-Regolament Delegat tal-Kummissjoni (UE) 2023/1605 tat-22 ta’ Mejju 2023 li jissupplimenta r-Regolament (KE) Nru 1069/2009 tal-Parlament Ewropew u tal-Kunsill fir-rigward tad-determinazzjoni ta’ punti ta’ tmiem fil-katina tal-manifattura ta’ ċerti fertilizzanti organiċi u materjali li jtejbu l-ħamrija (ĠU L 198, 8.8.2023, p. 1).

(2) Is-somma ta’ naftalen, aċenaftilen, aċenaften, fluworen, fenantren, antraċen, fluworanten, piren, benżo[a]antraċen, krisen, benżo[b]fluworanten, benżo[k]fluworanten, benżo[a]piren, indeno[1,2,3-cd]piren, dibenżo[a,h]antraċen u benżo[ghi]perilen.