(1)

Wara l-gwerra ta’ aggressjoni mhux provokata u mhux ġustifikata tar-Russja kontra l-Ukrajna mill-24 ta’ Frar 2022, sabiex tappoġġa l-ekonomija tal-Ukrajna, l-Unjoni Ewropea, bir-Regolament (UE) 2022/870 tal-Parlament Ewropew u tal-Kunsill (3) introduċiet miżuri ta’ liberalizzazzjoni tal-kummerċ li jissupplimentaw il-konċessjonijiet kummerċjali applikabbli għall-prodotti Ukreni skont il-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ukrajna, min-naħa l-oħra (il-“Ftehim ta’ Assoċjazzjoni” (4)). Dawn il-miżuri ta’ liberalizzazzjoni tal-kummerċ ġew imġedda bir-Regolament (UE) 2023/1077 tal-Parlament Ewropew u tal-Kunsill (5) u r-Regolament 2024/1392. B’mod partikolari, l-Artikolu 1 tar-Regolament (UE) 2024/1392 (ir-“Regolament”) jipprevedi, fost l-oħrajn, is-sospensjoni tal-kwoti tariffarji kollha stabbiliti skont l-Anness I-A tal-Ftehim ta’ Assoċjazzjoni. Jipprevedi wkoll li l-prodotti koperti minn dawk il-kwoti għandhom jiġu ammessi għall-importazzjoni fl-Unjoni mill-Ukrajna mingħajr ebda dazju doganali.

(2)

L-appoġġ tal-UE lill-Ukrajna ġie kkonfermat permezz tal-estensjoni tal-miżuri ta’ liberalizzazzjoni tal-kummerċ għal sena oħra. Fl-istess ħin, hemm sitwazzjoni partikolarment prekarja fis-swieq tal-Unjoni tal-pollam, tal-bajd, taz-zokkor, tal-ħafur, tal-qamħirrum, tal-groats u tal-għasel (“il-prodotti”) li tista’ tagħmel ħsara lill-produtturi agrikoli tal-Unjoni, li kieku l-importazzjonijiet mill-Ukrajna kellhom jiżdiedu.

(3)

Għaldaqstant, l-Artikolu 4(7) tar-Regolament introduċa salvagwardja awtomatika li tikkonċerna dawn il-prodotti, li tipprevedi l-introduzzjoni mill-ġdid tal-kwota tariffarja sospiża bl-Artikolu 1(1), il-punt (b), tar-Regolament jekk jinqabżu ċerti volumi ta’ importazzjonijiet.

(4)

Sabiex jiġu mmonitorjati dawk il-volumi ta’ importazzjonijiet, l-Artikolu 4(7) tar-Regolament ta s-setgħa lill-Kummissjoni biex tadotta att ta’ implimentazzjoni li jistabbilixxi l-arranġamenti meħtieġa.

(5)

Sabiex ikun hemm monitoraġġ xieraq u f’waqtu, faċilment aċċessibbli u trasparenti tal-volumi ta’ importazzjonijiet għall-operaturi ekonomiċi, il-Kummissjoni jenħtieġ li tagħmel l-importazzjonijiet ta’ dawn il-prodotti soġġetti għall-formalità doganali stabbilita fl-Artikolu 49 tar-Regolament ta’ Implimentazzjoni tal-Kummissjoni (UE) 2015/2447 (6). B’mod partikolari, id-dikjarazzjoni tan-numru tal-ordni tkun obbligatorja.

(6)

Għall-finijiet ta’ trasparenza, l-Anness ta’ dan ir-Regolament ta’ implimentazzjoni jistabbilixxi l-medji aritmetiċi rilevanti tal-volumi tal-importazzjoni msemmija fl-Artikolu 4(7) tar-Regolament.

(7)

Dan ir-Regolament ta’ Implimentazzjoni ġie adottat f’konformità mal-Artikolu 5(4) tar-Regolament,