REGOLAMENT TA’ IMPLIMENTAZZJONI TAL-KUMMISSJONI (UE) 2024/1611

tas-6 ta’ Ġunju 2024

li jawtorizza l-introduzzjoni fis-suq tat-trab tal-iżomaltulożju bħala ikel ġdid u li jemenda r-Regolament ta’ Implimentazzjoni (UE) 2017/2470

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2015/2283 tal-Parlament Ewropew u tal-Kunsill tal-25 ta’ Novembru 2015 dwar ikel ġdid, li jemenda r-Regolament (UE) Nru 1169/2011 tal-Parlament Ewropew u tal-Kunsill u li jħassar ir-Regolament (KE) Nru 258/97 tal-Parlament Ewropew u tal-Kunsill u r-Regolament tal-Kummissjoni (KE) Nru 1852/2001 (1), u b’mod partikolari l-Artikolu 12(1) tiegħu,

Billi:

(1)	Ir-Regolament (UE) 2015/2283 jipprevedi li l-ikel il-ġdid awtorizzat u inkluż fil-lista tal-Unjoni tal-ikel ġdid biss jista’ jiġi introdott fis-suq fl-Unjoni.

(2)	Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni tal-ikel ġdid.

(3)

Fit-30 ta’ April 2018, il-kumpanija Evonik Operations GmbH (“l-applikant”) ressqet applikazzjoni lill-Kummissjoni f’konformità mal-Artikolu 10(1) tar-Regolament (UE) 2015/2283 biex tintroduċi l-ġulepp tal-iżomaltulożju (niexef) fis-suq tal-Unjoni bħala ikel ġdid. L-applikant talab biex l-ikel il-ġdid jintuża bħala sostitut għas-sukrożju fl-ikel kollu maħsub għall-popolazzjoni ġenerali minbarra fil-formula tat-trabi u fil-formula tal-prosegwiment, fl-ikel ipproċessat biċ-ċereali u fl-ikel tat-trabi, kif iddefinit fir-Regolament (UE) Nru 609/2013 tal-Parlament Ewropew u tal-Kunsill (3).

(4)	Fil-21 ta’ Marzu 2019, il-Kummissjoni talbet lill-Awtorità Ewropea dwar is-Sigurtà fl-Ikel (“l-Awtorità”) twettaq valutazzjoni tal-ġulepp tal-iżomaltulożju (niexef) bħala ikel ġdid.

(5)	Fid-29 ta’ Novembru 2023, l-Awtorità adottat l-opinjoni xjentifika tagħha bit-titolu “Safety of isomaltulose syrup (dried) as a novel food pursuant to Regulation (UE) 2015/2283” (4) f’konformità mal-Artikolu 11 tar-Regolament (UE) 2015/2283.

(6)

Fl-opinjoni xjentifika tagħha, l-Awtorità kkonkludiet li l-ikel il-ġdid, il-ġulepp tal-iżomaltulożju (niexef), huwa sikur skont il-kundizzjonijiet tal-użu proposti. Għalhekk, l-opinjoni xjentifika tal-Awtorità tagħti biżżejjed raġunijiet biex jiġi stabbilit li t-trab tal-iżomaltulożju, skont il-kundizzjonijiet tal-użu proposti, jissodisfa l-kundizzjonijiet għall-introduzzjoni tiegħu fis-suq f’konformità mal-Artikolu 12(1) tar-Regolament (UE) 2015/2283. Peress li l-ikel il-ġdid huwa f’għamla ta’ trab, il-Kummissjoni hija tal-fehma li l-isem l-aktar xieraq li jirrifletti n-natura vera tal-ikel jenħtieġ li jkun trab tal-iżomaltulożju.

(7)	Jenħtieġ li t-trab tal-iżomaltulożju jiġi inkluż fil-lista tal-Unjoni tal-ikel ġdid stabbilita fir-Regolament ta’ Implimentazzjoni (UE) 2017/2470. Għalhekk, jenħtieġ li l-Anness tar-Regolament ta’ Implimentazzjoni (UE) 2017/2470 jiġi emendat kif xieraq.

(8)	Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1

(1) It-trab tal-iżomaltulożju huwa awtorizzat li jiġi introdott fis-suq fl-Unjoni.

It-trab tal-iżomaltulożju għandu jiġi inkluż fil-lista tal-Unjoni tal-ikel ġdid stabbilita fir-Regolament ta’ Implimentazzjoni (UE) 2017/2470.

(2) L-Anness tar-Regolament ta’ Implimentazzjoni (UE) 2017/2470 huwa emendat f’konformità mal-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-6 ta’ Ġunju 2024.

Għall-Kummissjoni

Il-President

Ursula VON DER LEYEN

(1) ĠU L 327, 11.12.2015, p. 1, ELI: http://data.europa.eu/eli/reg/2015/2283/oj.

(2) Ir-Regolament ta’ Implimentazzjoni tal-Kummissjoni (UE) 2017/2470 tal-20 ta’ Diċembru 2017 li jistabbilixxi l-lista tal-Unjoni tal-ikel ġdid skont ir-Regolament (UE) 2015/2283 tal-Parlament Ewropew u tal-Kunsill dwar ikel ġdid (ĠU L 351, 30.12.2017, p. 72, ELI: http://data.europa.eu/eli/reg_impl/2017/2470/oj).

(3) Ir-Regolament (UE) Nru 609/2013 tal-Parlament Ewropew u tal-Kunsill tat-12 ta’ Ġunju 2013 dwar ikel maħsub għat-trabi u t-tfal żgħar, ikel għal skopijiet mediċi speċjali, u bħala sostitut tad-dieta kollha għall-kontroll tal-piż u li jħassar id-Direttiva tal-Kunsill 92/52/KEE, id-Direttivi tal-Kummissjoni 96/8/KE, 1999/21/KE, 2006/125/KE u 2006/141/KE, id-Direttiva 2009/39/KE tal-Parlament Ewropew u tal-Kunsill u r-Regolamenti tal-Kummissjoni (KE) Nru 41/2009 u (KE) Nru 953/2009 (ĠU L 181, 29.6.2013, p. 35, ELI: http://data.europa.eu/eli/reg/2013/609/2023-03-21).

(4) EFSA Journal 2024;22:e8491.

ANNESS

L-Anness tar-Regolament ta’ Implimentazzjoni (UE) 2017/2470 huwa emendat kif ġej:

(1)

fit-Tabella 1 (Ikel ġdid awtorizzat), tiddaħħal l-entrata li ġejja:

Ikel ġdid awtorizzat

Kundizzjonijiet li fihom jista’ jintuża l-ikel ġdid

Rekwiżiti tat-tikkettar speċifiċi oħrajn

Rekwiżiti oħrajn

Protezzjoni tad-data

“Trab tal-iżomaltulożju

Kategorija tal-ikel speċifikat

Livelli massimi

1.	Id-denominazzjoni tal-ikel il-ġdid fuq it-tikkettar tal-oġġetti tal-ikel li fihom minn dan l-ikel għandha tkun ‘trab tal-iżomaltulożju’.

2.	Id-denominazzjoni tal-ikel il-ġdid fuq it-tikkettar għandu jkollha magħha indikazzjoni li ‘L-iżomaltulożju huwa sors ta’ glukożju u ta’ fruttożju’.”

L-ikel kollu, minbarra l-ikel u x-xorb maħsub speċifikament għat-trabi u għat-tfal żgħar

(2)

fit-Tabella 2 (Speċifikazzjonijiet), tiddaħħal l-entrata li ġejja: [

Ikel ġdid awtorizzat

Speċifikazzjonijiet

“Trab tal-iżomaltulożju

Deskrizzjoni/Definizzjoni:

L-ikel il-ġdid huwa trab tal-iżomaltulożju prodott mis-sukrożju permezz ta’ proċess mikrobijoloġiku bl-użu tas-Serratia plymuthica. Il-kontenut ta’ materja niexfa huwa taħlita ta’ monosakkaridi u disakkaridi, magħmula prinċipalment mill-iżomaltulożju (≥ 75 %) u mit-trealulożju (≤ 13 %) u, sa ċertu punt, mill-glukożju, mill-fruttożju, mis-sukrożju u mill-oligosakkaridi (traċċi).

Karatteristiċi/kompożizzjoni:

Iżomaltulożju (% DM): ≥ 75

Trealulożju (% DM): ≤ 13

Glukożju (% DM): ≤ 3

Fruttożju (% DM): ≤ 4

Sukrożju (% DM): ≤ 5

Ndewwa (%): ≤ 7

Rmied (%): ≤ 0,05

Proteini (%): < 0,1

Identità kimika tal-iżomaltulożju:

Isem kimiku (IUPAC): α-D-glukopiranosil-(1 → 6)-D-fruttofuranożju

Isem komuni: Iżomaltulożju

Numru CAS: 13718–94-0

Formula molekulari: C12H22O11

Piż molekulari: 342,30 g/mol

Identità kimika tat-trealulożju:

Isem kimiku (IUPAC): α-D-glukopiranosil-(1 → 1)-D-fruttofuranożju

Isem komuni: Trealulożju

Numru CAS: 51411–23-5

Formula molekulari: C12H22O11

Piż molekulari: 342,30 g/mol

Metalli tqal:

Ċomb (mg/kg): ≤ 0,1

Kriterji mikrobijoloġiċi:

Għadd totali ta’ mikrobi aerobiċi: < 100 CFU/g

Għadd totali ta’ ħmira u ta’ moffa: < 100 CFU/g

E. coli: < 10 CFU/g

Enterobacteriaceae: < 100 CFU/g

Salmonella: mhux individwata f’25 g

CFU: unitajiet li jifformaw kolonji

DM: materja niexfa”