(10)

Wara l-analiżi mill-Aġenzija tal-informazzjoni li ħarġet mill-ispezzjonijiet fir-rampa li twettqu fuq l-inġenji tal-ajru tat-trasportaturi tal-ajru tal-Unjoni, kif ukoll mill-ispezzjonijiet ta’ standardizzazzjoni li twettqu mill-Aġenzija, u kkomplementata bl-informazzjoni li rriżultat minn spezzjonijiet u awditi speċifiċi li twettqu mill-awtoritajiet nazzjonali tal-avjazzjoni, diversi Stati Membri u l-Aġenzija, fir-rwol ta’ awtoritajiet kompetenti, ħadu ċerti miżuri korrettivi u ta’ infurzar u infurmaw lill-Kummissjoni u lill-Kumitat għas-Sikurezza tal-Ajru tal-UE dwar dawk il-miżuri.

(11)

L-Istati Membri u l-Aġenzija, fir-rwol ta’ awtoritajiet kompetenti, saħqu mill-ġdid li lesti jaġixxu kif meħtieġ f’każ li informazzjoni pertinenti dwar is-sikurezza tkun tindika li jkun hemm riskji imminenti għas-sikurezza minħabba nuqqas ta’ konformità min-naħa tat-trasportaturi tal-ajru tal-Unjoni ma’ standards tas-sikurezza rilevanti.

(12)

Qatt ma ġew inklużi trasportaturi tal-ajru ċċertifikati fl-Eġittu fl-Anness A jew B tar-Regolament (KE) Nru 474/2006.

(13)

Bħala parti mill-attivitajiet ta’ monitoraġġ kontinwu tagħha, fis-17 ta’ April 2024 il-Kummissjoni, l-Aġenzija, l-Istati Membri u r-rappreżentanti mill-Awtorità tal-Avjazzjoni Ċivili Eġizzjana (“ECAA”) kellhom laqgħa teknika.

(14)

Matul il-laqgħa, ir-rappreżentanti tal-ECAA ġew infurmati dwar l-eżitu tal-valutazzjoni tad-dokumenti li kienu ġew ipprovduti preċedentement lill-Kummissjoni fuq talba tagħha. Intbagħtu dettalji dwar it-tħassib imqajjem mir-rieżami tal-informazzjoni sottomessa, partikolarment fir-rigward tan-nuqqas ta’ implimentazzjoni ta’ Programm tas-Sikurezza tal-Istat/Pjan Nazzjonali tas-Sikurezza tal-Avjazzjoni, in-nuqqas ta’ numri verifikabbli f’termini ta’ spetturi tal-Operazzjonijiet ta’ Titjir attivi biex jissorveljaw is-16-il detentur taċ-ċertifikat tal-operatur tal-ajru Eġizzjan (“AOC”), u l-kwistjonijiet li l-ECAA qed tiffaċċja biex tippromwovi kultura robusta tas-sikurezza fost it-trasportaturi tal-ajru taħt is-sorveljanza tas-sikurezza tagħha. F’dan il-kuntest, ġie nnutat ukoll li ma kien hemm l-ebda rekord ta’ taħriġ disponibbli biex tiġi vverifikata l-valuta tat-taħriġ tal-ispetturi.

(15)

In-nuqqasijiet addizzjonali identifikati fir-rieżami jikkonċernaw in-nuqqas ta’ gwida, kemm fil-livell tat-trasportaturi tal-ajru kif ukoll fl-ECAA, fir-rigward tal-istabbiliment ta’ Programm ta’ Analiżi tad-Data tat-Titjiriet.

(16)

L-ECAA infurmat lill-parteċipanti fil-laqgħa dwar l-istat attwali tal-industrija tal-avjazzjoni Eġizzjana, u l-miżuri għat-titjib tas-sikurezza ppromulgati u ppjanati biex jindirizzaw in-nuqqasijiet identifikati fis-sorveljanza tas-sikurezza u fl-organizzazzjoni. Ġie nnutat li l-ECAA għandha l-appoġġ sħiħ tal-gvern Eġizzjan biex issegwi dawn l-inizjattivi għat-titjib tas-sikurezza.

(17)

Fir-rigward speċifiku tal-kapaċità tal-persunal u l-kapaċitajiet tal-ECAA biex tiġi żgurata sorveljanza effettiva tas-sikurezza tal-industrija tal-avjazzjoni tal-Eġittu, l-ECAA enfasizzat l-isforzi li qed isiru biex jiġu reklutati u miżmuma esperti u persunal kwalifikati permezz ta’ sistema ġdida ta’ ppremjar finanzjarju.

(18)

Minn perspettiva organizzattiva u regolatorja, l-ECAA indikat li qed isir rieżami komprensiv tal-qafas leġiżlattiv u regolatorju tagħha, filwaqt li nħolqu Direttorati ġodda għas-Sikurezza, il-Konformità, il-Valutazzjoni tar-Riskju, il-Ġestjoni tal-Bidla, u l-Ġbir u l-Ipproċessar tad-Data dwar is-Sikurezza. B’mod komplementari għal dan, l-ECAA enfasizzat l-inizjattiva tagħha li tintroduċi sorveljanza bbażata fuq ir-riskju.

(19)

Filwaqt li ġie rikonoxxut li l-ECAA bħalissa hija involuta fi proċess komprensiv ta’ ristrutturar, madankollu jidher li l-enfasi attwali tal-ECAA hija prinċipalment fuq l-indirizzar ta’ nuqqasijiet viżibbli u ovvji mingħajr analiżi robusta biżżejjed tal-kawżi ewlenin. Huma meħtieġa aktar sforzi fir-rigward tas-sorveljanza tas-sikurezza tat-trasportaturi tal-ajru Eġizzjani u kultura mtejba tas-sikurezza, kif ukoll l-implimentazzjoni xierqa ta’ azzjonijiet korrettivi u preventivi.

(20)

Il-Kummissjoni tirrikonoxxi l-isforzi li saru mill-ECAA biex ittejjeb il-livell ta’ sorveljanza tas-sikurezza fl-Eġittu. Madankollu, il-Kummissjoni indikat li biħsiebha żżomm il-proċess ta’ konsultazzjoni miftuħ. Il-kuntatti regolari u r-rapporti ta’ progress huma antiċipati bħala parti minn din l-attività ta’ monitoraġġ kontinwu, kif ukoll l-organizzazzjoni ta’ laqgħat tekniċi futuri. Il-Kummissjoni se tikkoordina mill-qrib mal-Aġenzija filwaqt li tqis l-għadd sinifikanti ta’ trasportaturi tal-ajru Eġizzjani li għandhom awtorizzazzjoni ta’ TCO.

(21)

Il-Kummissjoni enfasizzat ukoll il-ħtieġa għall-appoġġ kontinwu tal-gvern, kif ukoll l-importanza li tiġi żgurata l-istabbiltà tat-tmexxija fi ħdan l-awtorità bħala pedament għal CAA li tiffunzjona tajjeb.

(22)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li bħalissa ma hemm l-ebda raġuni biex tiġi emendata l-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni fir-rigward tat-trasportaturi tal-ajru ċċertifikati fl-Eġittu.

(23)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fl-Eġittu mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi tal-ajru, skont ir-Regolament (UE) Nru 965/2012.

(24)

Meta kwalunkwe informazzjoni pertinenti dwar is-sikurezza tiżvela riskji imminenti għas-sikurezza minħabba nuqqas ta’ konformità mal-istandards tas-sikurezza internazzjonali rilevanti, jista’ jkun li tkun meħtieġa azzjoni ulterjuri mill-Kummissjoni, f’konformità mar-Regolament (KE) Nru 2111/2005.

(25)

F’Diċembru 2016, it-trasportaturi tal-ajru ċċertifikati fil-Każakistan tneħħew mill-Anness A tar-Regolament (KE) Nru 474/2006, permezz tar-Regolament ta’ Implimentazzjoni tal-Kummissjoni (UE) 2016/2214 (6), bl-eċċezzjoni ta’ Air Astana, li kienet diġà tneħħiet mill-Anness B tar-Regolament (KE) Nru 474/2006 fl-2015, permezz tar-Regolament ta’ Implimentazzjoni tal-Kummissjoni (UE) 2015/2322 (7).

(26)

Bħala segwitu għad-deliberazzjonijiet tal-Kumitat għas-Sikurezza tal-Ajru tal-UE f’Novembru 2023, l-esperti mill-Kummissjoni, l-Aġenzija u l-Istati Membri wettqu żjara ta’ valutazzjoni fuq il-post tal-Unjoni fil-Każakistan bejn il-5 u d-9 ta’ Frar 2024 għand il-Kumitat tal-Avjazzjoni Ċivili tal-Każakistan (“CAC KZ”) u għand l-Amministrazzjoni tal-Avjazzjoni ta’ Kazakhstan Joint Stock Company (“AAK”), li kienet tinkludi l-kampjunar ta’ tliet trasportaturi tal-ajru ċċertifikati fil-Każakistan, jiġifieri Berkut, Fly Jet.KZ, u Prime Aviation.

(27)

Iż-żjara ta’ valutazzjoni ffukat l-attivitajiet tagħha fuq l-AAK, fid-dawl tar-rwol u r-responsabbiltà tagħha għall-attivitajiet ta’ sorveljanza tas-sikurezza tat-trasportaturi tal-ajru ċċertifikati fil-Każakistan. Miż-żjara ta’ valutazzjoni, jidher b’mod ċar li l-AAK għamlet titjib importanti fl-aġġornament tal-leġiżlazzjoni tagħha dwar l-avjazzjoni, inkluża l-liġi primarja dwar l-avjazzjoni u l-emendi sussegwenti tagħha, u fl-iżgurar tal-implimentazzjoni effettiva tagħha. Dawn il-bidliet leġiżlattivi ffukaw fuq it-titjib tal-użu tal-ispazju tal-ajru, iċ-ċertifikazzjoni ta’ sistemi tal-ajru mingħajr bdot abbord, it-titjib fil-proċeduri kontra l-formazzjoni tas-silġ u ta’ tneħħija tas-silġ u l-introduzzjoni tal-obbligu ta’ rapportar mandatorju u volontarju tal-okkorrenzi. L-iżviluppi ewlenin li jirfdu dawn l-elementi tekniċi kienu l-għoti ta’ setgħat awtorevoli addizzjonali lid-Direttur Ġenerali tal-AAK u lill-ispetturi tagħha, kif ukoll il-modernizzazzjoni tal-istruttura finanzjarja tal-AAK.

(28)

L-azzjonijiet tal-AAK biex tindirizza l-osservazzjonijiet u r-rakkomandazzjonijiet tal-Liċenzjar tal-Persunal li jirriżultaw miż-żjara ta’ valutazzjoni fuq il-post tal-Unjoni ta’ Ottubru 2021 wasslu għall-implimentazzjoni ta’ miżuri korrettivi effettivi. Madankollu, ġew identifikati oqsma li jeħtieġu titjib addizzjonali, partikolarment fir-rigward tas-sistema ta’ eżami teoretiku għall-bdoti u s-superviżjoni tal-eżaminaturi tat-titjiriet.

(29)

Fil-qasam tal-operazzjonijiet tal-ajru (“OPS”), l-AAK ipprovdiet evidenza verifikabbli tal-azzjonijiet meħuda biex jiġu indirizzati n-nuqqasijiet identifikati. Madankollu, l-oqsma li jeħtieġu aktar enfasi jinkludu l-monitoraġġ tal-konformità matul il-proċessi ta’ ċertifikazzjoni u l-għoti ta’ approvazzjonijiet speċjali. Konsegwentement, jenħtieġ li l-AAK tintensifika l-isforzi tagħha u tħaffef it-tisħiħ tal-kapaċitajiet tal-ispetturi tagħha. Barra minn hekk, huwa essenzjali li tingħata prijorità lit-titjib tas-sistemi interni tagħha ta’ kwalità u konformità biex l-attivitajiet tad-Dipartiment tal-Operazzjonijiet tat-Titjir jiġu allinjati mal-istandards internazzjonali tas-sikurezza.

(30)

Ġie ddeterminat progress sostanzjali fil-qasam tal-ajrunavigabbiltà, bid-determinazzjoni li attwalment qed tiġi żgurata sorveljanza effettiva tas-sikurezza. Aktar titjib fir-rigward tar-rekords ta’ sorveljanza se jikkontribwixxi għal rekord aktar dettaljat u trasparenti tal-ispezzjonijiet imwettqa.

(31)

Il-valutazzjoni mwettqa għand Fly Jet.kz iddeterminat li l-kumpanija tal-ajru żżomm Sistema tal-Ġestjoni tas-Sikurezza operazzjonali (“SMS”) u Sistema ta’ Ġestjoni tal-Kwalità (“QMS”), appoġġati minn dokumentazzjoni dettaljata, li tirrifletti impenn ċar lejn l-istandards internazzjonali tas-sikurezza. Madankollu, huma meħtieġa sforzi biex jiġi indirizzat it-tħassib dwar is-sejbiet tal-awditjar mhux solvuti fi ħdan il-QMS u dwar in-nuqqas ta’ skedi ta’ żmien ċari għar-riżoluzzjoni. Huwa importanti li dawn il-kwistjonijiet jiġu indirizzati minnufih biex jissaħħu aktar il-protokolli tas-sikurezza u l-effettività ġenerali tal-linja tal-ajru.

(32)

Il-livelli adegwati ta’ persunal u l-forniment ta’ riżorsi fid-dipartiment tal-manutenzjoni u tal-ajrunavigabbiltà ta’ Fly Jet.kz jippermettu l-manutenzjoni konsistenti tal-ajrunavigabbiltà tal-inġenji tal-ajru. Id-dokumentazzjoni f’lokha, inklużi r-rekords tal-persunal, l-inventarju komprensiv tal-ispare parts, u l-logs tal-manutenzjoni miżmuma b’mod diliġenti, ġie osservat li kienu aċċessibbli faċilment u ġestiti b’mod xieraq.

(33)

Minkejja l-aspetti msemmija hawn fuq, ġew identifikati ċerti inkonsistenzi fi ħdan id-dipartiment tal-operazzjonijiet tat-titjir ta’ Fly Jet.kz, li jeħtieġu eżami aktar mill-qrib tal-kompożizzjoni tal-ekwipaġġ u tal-prattiki tal-ġestjoni tal-ħin tax-xogħol, kif ukoll diskrepanzi fil-kwalifiki tal-ekwipaġġ u fil-kalkoli tat-tagħbija tal-inġenji tal-ajru.

(34)

L-implimentazzjoni effettiva tal-SMS ta’ Prime Aviation kienet evidenti partikolarment permezz tad-dokumentazzjoni dettaljata u ġestita tajjeb, kif ukoll il-politika tal-kumpanija li tinkoraġġixxi l-involviment tal-persunal fir-rappurtar tal-okkorrenzi. Għalkemm diġà funzjonali, hemm lok għal titjib fl-iżgurar tal-applikazzjoni konsistenti tal-miżuri tal-ġestjoni tar-riskju. Is-Sistema ta’ Ġestjoni tal-Konformità, filwaqt li hija effettiva, tista’ tkompli ttejjeb l-impatt tagħha billi tallinja l-iskedi ta’ żmien tal-implimentazzjoni mal-istandards regolatorji.

(35)

L-impenn ta’ Prime Aviation għall-kwalità huwa evidenti fil-qafas strutturat tiegħu ta’ taħriġ tal-persunal u fid-dipartiment tal-ajrunavigabbiltà mgħammar b’biżżejjed persunal, li jiżgura ajrunavigabbiltà kontinwa tal-inġenji tal-ajru. Minkejja l-vantaġġ ta’ għodod effiċjenti tas-software, ikun meħtieġ xi titjib fil-protokolli ta’ kwalifiki tal-bdoti, u fil-proċeduri ta’ approvazzjoni tal-Ispazju tal-Ajru ta’ Livell Għoli tal-Atlantiku tat-Tramuntana.

(36)

L-SMS u l-QMS ta’ Berkut jissodisfaw l-istandards internazzjonali tas-sikurezza b’mod effettiv. Madankollu, ġew identifikati opportunitajiet għal titjib minuri fiż-żewġ oqsma. Barra minn hekk, il-kumpanija tal-ajru wriet organizzazzjoni tajba u professjonaliżmu fl-imġiba operattiva tagħha, iżda ġie identifikat potenzjal għal aktar titjib, partikolarment fit-titjib tal-kontroll fl-operazzjonijiet tad-dispaċċ, fid-definizzjoni tas-sillabi tat-taħriġ, u fil-validità għal approvazzjonijiet speċjali.

(37)

Id-dipartiment tal-manutenzjoni u tal-ajrunavigabbiltà ta’ Berkut għandu persunal xieraq, li jiżgura l-ajrunavigabbiltà kontinwa tal-inġenji tal-ajru b’dokumentazzjoni komprensiva. Il-faċilità ta’ manutenzjoni tipprovdi ambjent ottimali għall-operazzjonijiet ta’ manutenzjoni.

(38)

Abbażi tal-eżitu taż-żjara ta’ valutazzjoni fuq il-post tal-Unjoni, il-Kummissjoni stiednet lis-CAC KZ u lill-AAK għal seduta ta’ smigħ quddiem il-Kumitat għas-Sikurezza tal-Ajru tal-UE fil-15 ta’ Mejju 2024.

(39)

Matul is-seduta ta’ smigħ, l-AAK ipprovdiet aġġornamenti lill-Kummissjoni u lill-Kumitat għas-Sikurezza tal-Ajru tal-UE rigward ir-riformi u l-progress fis-settur tal-avjazzjoni ċivili mill-2021, li juru l-impenn tagħhom li jtejbu s-sikurezza, l-effiċjenza operazzjonali, u l-kollaborazzjoni internazzjonali. Barra minn hekk, huma ddeskrivew il-progress fit-tisħiħ tal-istruttura organizzazzjonali u l-mekkaniżmi finanzjarji tal-AAK, inkluża t-tranżizzjoni għal mudell ta’ awtofinanzjament effettiv minn Lulju 2023. L-AAK żiedet ukoll il-forza tax-xogħol tagħha, partikolarment fid-dipartimenti operazzjonali, u rfinat il-proċessi interni biex ittejjeb il-kwalità u l-effettività tas-servizzi tagħha.

(40)

L-AAK għamlet passi evidenti fl-indirizzar u r-riżoluzzjoni tal-maġġoranza tal-osservazzjonijiet u r-rakkomandazzjonijiet li tqajmu matul iż-żjara ta’ valutazzjoni fuq il-post tal-Unjoni ta’ Frar 2024. Huma indirizzaw b’suċċess tliet osservazzjonijiet u sitt rakkomandazzjonijiet, li jindikaw titjib fil-konformità regolatorja u fl-istandards operazzjonali. Inkiseb titjib fil-proċeduri tal-awtorizzazzjoni tal-ispetturi, l-approvazzjonijiet tal-Electronic Flight Bag, u l-Operazzjonijiet b’Ħin ta’ Devjazzjoni Estiż. L-isforzi li għaddejjin biex jiġu indirizzati l-osservazzjonijiet li jifdal huma strutturati bi skadenzi ċari stabbiliti għat-tlestija sa tmiem l-2024 u l-ewwel kwart tal-2025. Dawn l-attivitajiet jiffurmaw parti minn inizjattiva strateġika usa’ biex tissaħħaħ is-sikurezza tal-avjazzjoni, filwaqt li jiġi żgurat l-allinjament mal-istandards internazzjonali tas-sikurezza.

(41)

Matul is-seduta, l-AAK iddeskriviet ukoll l-azzjonijiet korrettivi li jikkonċernaw it-trasportaturi tal-ajru Berkut, Prime Aviation, u Fly Jet.kz.

(42)

Barra minn hekk, l-AAK iddeskriviet pjanijiet ta’ żvilupp futuri għall-2024–2025, b’enfasi fuq l-iżvilupp ta’ kollaborazzjonijiet internazzjonali addizzjonali. Dawn il-pjanijiet jinkludu t-tħejjijiet għal titjiriet diretti lejn l-Istati Uniti, it-tisħiħ tal-infrastruttura diġitali, u t-tkomplija tal-investiment fir-riżorsi umani.

(43)

Filwaqt li rrikonoxxew il-progress li sar minn mindu tnedew il-konsultazzjonijiet formali fl-2020, kif muri mill-evidenza miġbura matul iż-żjara ta’ valutazzjoni fuq il-post tal-Unjoni tal-2024, u mid-dettalji pprovduti matul is-seduta ta’ smigħ, id-deliberazzjonijiet tal-Kumitat għas-Sikurezza tal-Ajru tal-UE kkonkludew li jenħtieġ li jintemmu l-konsultazzjonijiet formali, filwaqt li l-AAK tiġi mħeġġa tiskambja regolarment dwar żviluppi futuri mal-Kummissjoni, u tiżviluppa modi biex tiżgura l-kontinwazzjoni tat-tmexxija fl-AAK.

(44)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li bħalissa ma hemm l-ebda raġuni biex tiġi emendata l-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni fir-rigward tat-trasportaturi tal-ajru mill-Każakistan.

(45)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fil-Każakistan mal-istandards internazzjonali rilevanti tas-sikurezza permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi tal-ajru kollha, skont ir-Regolament (UE) Nru 965/2012.

(46)

Meta kwalunkwe informazzjoni rilevanti dwar is-sikurezza tiżvela riskji imminenti għas-sikurezza minħabba nuqqas ta’ konformità mal-istandards tas-sikurezza internazzjonali rilevanti, jista’ jkun li tkun meħtieġa azzjoni ulterjuri mill-Kummissjoni, f’konformità mar-Regolament (KE) Nru 2111/2005.

(47)

Qatt ma ġew inklużi trasportaturi tal-ajru ċċertifikati fil-Kenja fl-Anness A jew B tar-Regolament (KE) Nru 474/2006.

(48)

Bħala parti mill-attivitajiet ta’ monitoraġġ kontinwu tagħha, fl-10 ta’ April 2024 il-Kummissjoni, l-Aġenzija, l-Istati Membri u r-rappreżentanti mill-Awtorità tal-Avjazzjoni Ċivili tal-Kenja (“KCAA”) kellhom laqgħa teknika.

(49)

Matul il-laqgħa, ir-rappreżentanti tal-KCAA ġew infurmati dwar l-eżitu tal-valutazzjoni tad-dokumenti li kienu ġew ipprovduti fl-2023 fuq talba tal-Kummissjoni. Intbagħtu dettalji dwar it-tħassib imqajjem mir-rieżami tal-informazzjoni sottomessa, partikolarment fir-rigward ta’ għadd insuffiċjenti ta’ persunal ta’ spezzjoni meta mqabbel mal-volum u d-diversità tal-industrija ssorveljata. Barra minn hekk, ġew identifikati sfidi fl-effettività tal-ippjanar u l-eżekuzzjoni tas-sorveljanza tas-sikurezza, speċjalment fir-rigward tal-operazzjonijiet ‘il barra mill-bażi u l-awditjar tagħhom.

(50)

Barra minn hekk, in-nuqqasijiet identifikati jikkonċernaw in-nuqqas ta’ proċess ta’ kwalità interna ddokumentat u implimentat bis-sħiħ, għadd baxx ta’ awditi miksuba fil-qasam tal-Operazzjonijiet tat-Titjir, u t-twettiq ta’ għadd żgħir biss ta’ awditi ad hoc.

(51)

Matul dik il-laqgħa, il-KCAA pprovdiet informazzjoni ġenerali dwar is-settur tal-avjazzjoni fil-Kenja, il-persunal disponibbli għall-attivitajiet ta’ sorveljanza tas-sikurezza, u l-mod kif jitwettqu tali attivitajiet. Ġew diskussi wkoll id-diffikultajiet li ltaqgħu magħhom ċerti trasportaturi tal-ajru li joperaw barra mill-pajjiż, u n-nuqqasijiet fis-sikurezza assoċjati. Il-KCAA infurmat lill-Kummissjoni dwar il-pjan immedjat tagħha għal rieżami sħiħ tal-Att dwar l-Avjazzjoni Ċivili tal-Kenja biex ittejjeb il-kapaċità ta’ sorveljanza tas-sikurezza tal-Awtorità u tallinja d-dispożizzjonijiet tagħha mal-ħtiġijiet legali emerġenti. B’mod partikolari, il-KCAA infurmat dwar l-azzjonijiet li għaddejjin fir-rigward tal-emendi għar-regolamenti tas-sikurezza, li kienu jinkludu l-livell ta’ implimentazzjoni tal-Programm tal-Istat għas-Sikurezza tagħha.

(52)

F’termini ta’ persunal, il-KCAA indikat li l-attrazzjoni u ż-żamma ta’ persunal ikkwalifikat u mħarreġ kif xieraq kienu ta’ sfida. Ġie nnutat li qed isiru sforzi biex jittejbu l-kundizzjonijiet tal-impjieg bil-ħsieb li jiġi reklutat u miżmum tali persunal, partikolarment l-ispetturi kwalifikati tas-sorveljanza tas-sikurezza.

(53)

Fir-rigward tal-inċidenti/aċċidenti mill-2022 li jinvolvu trasportaturi tal-ajru ċċertifikati tal-Kenja li joperaw barra mill-Kenja, il-KCAA kkomunikat li s-sorveljanza tas-sikurezza u l-attivitajiet ta’ infurzar ġew instigati bil-ħsieb li tiġi evitata r-rikorrenza ta’ avvenimenti bħal dawn.

(54)

Il-Kummissjoni indikat lill-Kumitat għas-Sikurezza tal-Ajru tal-UE li, bi qbil mal-KCAA, biħsiebha żżomm il-proċess ta’ konsultazzjoni miftuħ. Il-kuntatti regolari u r-rapporti ta’ progress huma antiċipati bħala parti minn din l-attività ta’ monitoraġġ kontinwu, kif ukoll l-organizzazzjoni ta’ laqgħat tekniċi futuri.

(55)

Il-Kummissjoni enfasizzat ukoll il-ħtieġa għall-appoġġ kontinwu tal-gvern, kif ukoll l-importanza li tiġi żgurata l-istabbiltà tat-tmexxija fi ħdan l-awtorità bħala pedament biex l-Awtorità tal-Avjazzjoni Ċivilil tiffunzjona tajjeb.

(56)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li bħalissa ma hemm l-ebda raġuni biex tiġi emendata l-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni fir-rigward tat-trasportaturi tal-ajru ċċertifikati fil-Kenja.

(57)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fil-Kenja mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi tal-ajru, skont ir-Regolament (UE) Nru 965/2012.

(58)

Meta kwalunkwe informazzjoni pertinenti dwar is-sikurezza tiżvela riskji imminenti għas-sikurezza minħabba nuqqas ta’ konformità mal-istandards tas-sikurezza internazzjonali rilevanti, jista’ jkun li tkun meħtieġa azzjoni ulterjuri mill-Kummissjoni, f’konformità mar-Regolament (KE) Nru 2111/2005.

(59)

F’Marzu 2007, il-Pakistan International Airlines ġie inkluż fl-Anness B tar-Regolament (KE) Nru 474/2006 permezz tar-Regolament tal-Kummissjoni (KE) Nru 235/2007 (8) u sussegwentement tneħħa minn dak l-Anness f’Novembru 2007 permezz tar-Regolament tal-Kummissjoni (KE) Nru 1400/2007 (9).

(60)

Bħala segwitu għad-deliberazzjonijiet tal-Kumitat għas-Sikurezza tal-Ajru tal-UE ta’ Novembru 2023, l-esperti mill-Kummissjoni, l-Aġenzija u l-Istati Membri wettqu żjara ta’ valutazzjoni fuq il-post tal-Unjoni fil-Pakistan bejn is-27 u t-30 ta’ Novembru 2023 għand l-Awtorità tal-Avjazzjoni Ċivili tal-Pakistan (“PCAA”), li kienet tinkludi l-kampjunar ta’ żewġ trasportaturi tal-ajru ċċertifikati fil-Pakistan, jiġifieri Fly Jinnah u Airblue Ltd.

(61)

Iż-żjara ta’ valutazzjoni ffukat l-attivitajiet tagħha fuq il-PCAA fid-dawl tar-rwol u r-responsabbiltà tagħha fil-kuntest ta’ sorveljanza tat-trasportaturi tal-ajru ċċertifikati fil-Pakistan.

(62)

Instab li l-PCAA għandha politika stabbilita biex taderixxi mal-istandards internazzjonali tas-sikurezza, u l-persunal tagħha jikkonsisti minn persuni b’ħiliet tekniċi u professjonisti. Madankollu, ġew osservati nuqqasijiet komuni fl-organizzazzjoni kollha, bħall-enfasi fuq in-nuqqasijiet ta’ konformità, u n-nuqqas ta’ verifiki interni. Fir-rigward tal-funzjonijiet ta’ sorveljanza tas-sikurezza tal-PCAA, ġie osservat nuqqas notevoli fil-profondità ta’ skrutinju, b’mod partikolari fir-rigward tal-għeluq tas-sejbiet abbażi tal-pjanijiet ta’ azzjoni korrettiva proposti minflok l-evidenza attwali pprovduta, jew nuqqas ta’ valutazzjoni xierqa tal-azzjonijiet korrettivi proposti.

(63)

Iż-żjara żvelat devjazzjonijiet mill-proċeduri tal-PCAA, kif muri mill-fatt li xi AOCs ingħataw b’sejbiet miftuħa jew ġew ikklassifikati ħażin, jew mill-fatt li xi pjanijiet ta’ sorveljanza tas-sikurezza ma twettqux skont kif ippjanat.

(64)

Kien evidenti wkoll li fiż-żmien taż-żjara d-Direttorat tal-Istandards tat-Titjir kellu nuqqas kbir ta’ persunal f’termini ta’ persunal ikkwalifikat biżżejjed biex iwettaq il-kompiti kollha taċ-ċertifikazzjoni u tas-sorveljanza tas-sikurezza. Din is-sitwazzjoni hija aggravata mill-assenjar ta’ kompiti li mhux neċessarjament jaqgħu taħt il-mandat tal-Istandards tat-Titjir.

(65)

L-implimentazzjoni tal-SMS tinsab fl-istadji bikrija u teħtieġ titjib, u jidher ċar li l-identifikazzjoni tal-kawżi ewlenin u l-analiżi tagħhom huwa qasam li jeħtieġ li jiġi implimentat kif xieraq.

(66)

Ma ġie identifikat l-ebda tħassib partikolari fid-Direttorat tal-Ajrunavigabbiltà, u fid-Direttorat tal-Organizzazzjonijiet għall-Ħruġ tal-Liċenzji/tat-Taħriġ tal-Persunal, u t-tnejn li huma nstabu li kellhom persunal xieraq.

(67)

Ma ġiet identifikata l-ebda problema sinifikanti fit-trasportaturi tal-ajru li saritilhom żjara, għalkemm għal Fly Jinnah, ġie nnutat li ż-żamma tar-rekords tat-trasportatur tal-ajru, u l-ġestjoni tas-sejbiet, jenħtieġ li jkunu s-suġġett ta’ miżuri ta’ titjib iddedikati.

(68)

Abbażi tal-eżitu taż-żjara ta’ valutazzjoni fuq il-post tal-Unjoni, il-Kummissjoni stiednet lill-PCAA u lil Fly Jinnah għal seduta ta’ smigħ quddiem il-Kumitat għas-Sikurezza tal-Ajru tal-UE fl-14 ta’ Mejju 2024.

(69)

Fis-seduta, il-PCAA, abbażi tal-Pjan ta’ Azzjoni Korrettiva (“CAP”) ippreżentat fis-6 ta’ Mejju 2024, indirizzat kull osservazzjoni deskritta fir-rapport taż-żjara tal-UE, filwaqt li nnotat l-analiżi tal-kawżi ewlenin li tirfed il-miżuri korrettivi kollha meħuda jew ippjanati fuq perjodu qasir, medju u twil. Ġie nnutat partikolarment l-isforz li sar mill-PCAA biex tindirizza n-nuqqasijiet identifikati tal-kapaċità u l-abbiltà tagħha ta’ sorveljanza tas-sikurezza, partikolarment f’termini tal-iżgurar ta’ struttura organizzattiva xierqa, l-allokazzjoni tal-kompiti, ir-reklutaġġ u ż-żamma ta’ persunal kwalifikat, għadd proporzjonat ta’ spetturi kwalifikati, u f’termini ta’ programm ta’ taħriġ xieraq. Partikolarment fir-rigward tad-Direttorat tal-Istandards tat-Titjir, huma indikaw li żiedu l-għadd ta’ spetturi kwalifikati minn 1 għal 19, li jikkorrispondi għall-għadd meħtieġ għall-allokazzjoni riveduta tal-kompiti u l-attivitajiet assoċjati ta’ sorveljanza tas-sikurezza.

(70)

Barra minn hekk, il-PCAA indikat l-isforzi li saru biex jiġu rettifikati n-nuqqasijiet fil-ġestjoni tal-kwalità identifikati matul iż-żjara. Il-miżuri korrettivi ppreżentaw l-istabbiliment ta’ taqsima tal-Kontroll tal-Kwalità f’kull dipartiment, u dipartiment ċentrali u indipendenti tal-Assigurazzjoni tal-Kwalità għall-PCAA kollha kemm hi. Barra minn hekk, il-PCAA spjegat l-isforzi tagħha biex ittejjeb il-qafas regolatorju u proċedurali tagħha, b’mod partikolari f’termini ta’ attivitajiet immirati biex jadattaw il-leġiżlazzjoni nazzjonali tagħhom dwar l-avjazzjoni għal-leġiżlazzjoni tal-UE fl-oqsma tal-Istandards tat-Titjir u l-Liċenzjar tal-Persunal, kif diġà kien il-każ fl-Ajrunavigabbiltà.

(71)

Fir-rigward speċifiku tal-SMS tal-organizzazzjoni, il-PCAA nnotat li l-isforzi u l-iżvilupp kontinwu, għalkemm bil-mod, qed javvanzaw, peress li kemm ir-regolatur kif ukoll l-entitajiet regolati jifhmu l-importanza ta’ tranżizzjoni gradwali minn approċċ ta’ sorveljanza tas-sikurezza bbażat fuq il-konformità għal approċċ ibbażat fuq ir-riskju.

(72)

Waqt is-seduta, it-trasportatur tal-ajru Fly Jinnah ippreżenta ħarsa ġenerali tal-flotta u tar-rotot attwali tiegħu, u tar-riżorsi u l-faċilitajiet disponibbli. Dan ddeskriva sett ta’ għodod tas-software għall-ġestjoni tal-biċċa l-kbira tal-funzjonijiet ewlenin, bħall-ippjanar u t-tgħarrif tat-titjiriet, il-Monitoraġġ tad-Data tat-Titjir (“FDM”), ir-roster tal-ekwipaġġ, l-ippjanar tal-awditjar tal-QMS, u l-ġestjoni tal-ajrunavigabbiltà kontinwa. It-trasportatur tal-ajru ppreżenta l-funzjonijiet esternalizzati bħat-taħriġ tal-ekwipaġġ, l-analiżi tal-FDM, l-ippjanar u l-manutenzjoni tal-ekwipaġġ, il-biċċa l-kbira minnhom esternalizzati lill-kumpanija Air Arabia. Ġew innutati partikolarment il-proposti ppreżentati biex jiġu indirizzati l-osservazzjonijiet relatati mad-difetti identifikati fil-QMS tagħha.

(73)

Abbażi tad-deliberazzjonijiet tiegħu, il-Kumitat għas-Sikurezza tal-Ajru tal-UE kkonkluda li jenħtieġ li tingħata attenzjoni partikolari lill-monitoraġġ kontinwu tas-sitwazzjoni tas-sikurezza u tal-iżviluppi fil-Pakistan, permezz tal-organizzazzjoni regolari ta’ laqgħat tekniċi fi Brussell qabel kull Kumitat għas-Sikurezza tal-Ajru tal-UE, u tar-rappurtar regolari dwar il-progress mill-PCAA. Barra minn hekk, huwa żamm il-possibbiltà, skont il-bżonn, li jistieden lill-PCAA għal seduti ta’ smigħ addizzjonali f’laqgħat futuri tal-Kumitat għas-Sikurezza tal-Ajru tal-UE.

(74)

Il-Kummissjoni enfasizzat ukoll il-ħtieġa għall-appoġġ kontinwu tal-gvern, kif ukoll l-importanza li tiġi żgurata l-istabbiltà tat-tmexxija fi ħdan l-awtorità bħala pedament għal PCAA li tiffunzjona tajjeb.

(75)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li bħalissa ma hemm l-ebda raġuni biex tiġi emendata l-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni fir-rigward tat-trasportaturi tal-ajru ċċertifikati fil-Pakistan.

(76)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fil-Pakistan mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi tal-ajru, skont ir-Regolament (UE) Nru 965/2012.

(77)

Meta kwalunkwe informazzjoni rilevanti dwar is-sikurezza tiżvela riskji imminenti għas-sikurezza minħabba nuqqas ta’ konformità mal-istandards tas-sikurezza internazzjonali rilevanti, tista’ tkun meħtieġa azzjoni ulterjuri mill-Kummissjoni, f’konformità mar-Regolament (KE) Nru 2111/2005.

(78)

F’Novembru 2009, trasportaturi tal-ajru ċċertifikati f’São Tomé u Príncipe ġew inklużi fl-Anness A tar-Regolament (KE) Nru 474/2006, permezz tar-Regolament tal-Kummissjoni (KE) 1144/2009 (10).

(79)

Bl-ittra tad-19 ta’ Diċembru 2023, bħala parti mill-attivitajiet ta’ monitoraġġ kontinwu, il-Kummissjoni ġiet infurmata mill-Instituto Nacional de Aviação Civil de São Tomé et Príncipe , li t-trasportatur tal-ajru Africa’s Connection ma għadux iċċertifikat f’São Tomé u Príncipe.

(80)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li, fir-rigward tat-trasportaturi tal-ajru minn São Tomé u Príncipe, il-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni jenħtieġ li tiġi emendata biex Africa’s Connection jitneħħa mill-Anness A tar-Regolament (KE) Nru 474/2006.

(81)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati f’São Tomé u Príncipe mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi tal-ajru, skont ir-Regolament (UE) Nru 965/2012.

(82)

Trasportaturi tal-ajru minn Sierra Leone ġew inklużi fl-Anness A tar-Regolament (KE) Nru 474/2006.

(83)

Wara r-riżultati tal-awditu tal-Programm Universali ta’ Verifika tas-Sorveljanza tas-Sikurezza (“USOAP”) tal-ICAO tal-2006 u abbażi tar-rakkomandazzjonijiet mill-ICAO, l-Awtorità tal-Avjazzjoni Ċivili ta’ Sierra Leone (“SLCAA”) bdiet proċess biex tneħħi r-reġistrazzjoni tal-inġenji tal-ajru u tirrevoka l-AOCs maħruġa lit-trasportaturi tal-ajru minn Sierra Leone. L-SLCAA infurmat lill-Kummissjoni dwar it-tlestija ta’ dan il-proċess f’Mejju 2020.

(84)

Fil-31 ta’ Jannar 2024, fuq talba tal-Kummissjoni, l-SLCAA pprovdiet aġġornament dwar is-sitwazzjoni tal-avjazzjoni ċivili fi Sierra Leone, inklużi dettalji dwar it-titjib li sar mill-SLCAA lejn il-konformità mal-istandards internazzjonali tas-sikurezza, u l-ambizzjonijiet li jerġgħu jinbdew l-attivitajiet fir-rigward taċ-ċertifikazzjoni u s-sorveljanza tas-sikurezza tat-trasportaturi tal-ajru u tal-inġenji tal-ajru.

(85)

Minħabba n-nuqqas ta’ inġenji tal-ajru fir-reġistru nazzjonali ta’ Sierra Leone u n-nuqqas ta’ trasportaturi tal-ajru ċċertifikati mill-SLCAA, fil-25 ta’ April 2024 saret laqgħa biex jiġu diskussi l-pjanijiet tal-SLCAA, eventwalment bil-ħsieb li jiġu appoġġati l-iżviluppi futuri tal-avjazzjoni ċivili fi Sierra Leone. Din il-laqgħa involviet rappreżentanti mill-Kummissjoni, mill-Aġenzija, mill-Istati Membri, mill-SLCAA, u mill-Parlament ta’ Sierra Leone.

(86)

Matul il-laqgħa, l-SLCAA kkondividiet ir-riżultati taż-żjara tal-USOAP tal-ICAO tal-2023, iddeskriviet pjanijiet biex tkompli ttejjeb il-kapaċitajiet tagħha ta’ ċertifikazzjoni u ta’ sorveljanza tas-sikurezza, u pprovdiet informazzjoni dwar l-iffirmar f’Marzu 2024 tal-Memorandum ta’ Qbil mal-Italja bl-għan li tiġi stabbilita kooperazzjoni teknika bejn Sierra Leone u l-Italja. L-SLCAA kkonfermat ukoll li ngħatat mandat uffiċjali biex tipproċedi biċ-ċertifikazzjoni ta’ trasportaturi tal-ajru ġodda, kif ukoll bir-reġistrazzjoni tal-inġenji tal-ajru.

(87)

Il-Kummissjoni tirrikonoxxi l-isforzi tal-SLCAA biex tikkonforma mal-istandards internazzjonali tas-sikurezza u nnotat l-appoġġ kontinwu mill-Gvern ta’ Sierra Leone. Il-Kummissjoni tirrikonoxxi wkoll l-impenn tal-SLCAA li tkompli tiżviluppa, bl-appoġġ mogħti mill-Italja, il-kapaċitajiet meħtieġa biex tirreġistra l-inġenji tal-ajru, tiċċertifika t-trasportaturi tal-ajru, u tissorvelja l-attivitajiet tal-kumpaniji tal-ajru li se tiċċertifika, f’konformità mal-istandards internazzjonali tas-sikurezza.

(88)

L-aħħar informazzjoni tindika li, f’dan iż-żmien, l-SLCAA ma setgħetx turi l-kapaċitajiet meħtieġa biex tirreġistra l-inġenji tal-ajru, tiċċertifika t-trasportaturi tal-ajru, u tissorvelja l-ajrunavigabbiltà u l-operazzjonijiet tat-trasportaturi tal-ajru, skont l-istandards internazzjonali tas-sikurezza. Konsegwentement, il-Kummissjoni se tkompli l-konsultazzjonijiet mal-SLCAA u timmonitorja azzjonijiet ulterjuri meħuda mill-SLCAA biex tindirizza dawn il-kwistjonijiet. Se tingħata aktar konsiderazzjoni, kif xieraq, għat-twettiq eventwali ta’ żjara ta’ valutazzjoni fuq il-post tal-Unjoni meta jiġu ssodisfati l-kundizzjonijiet.

(89)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li bħalissa ma hemm l-ebda raġuni biex tiġi emendata l-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni fir-rigward tat-trasportaturi tal-ajru ċċertifikati fi Sierra Leone.

(90)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fi Sierra Leone mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi tal-ajru, skont ir-Regolament (UE) Nru 965/2012.

(91)

Għalhekk, ir-Regolament (KE) Nru 474/2006 jenħtieġ li jiġi emendat skont dan.

(92)

Minħabba l-implikazzjonijiet tas-sikurezza, l-Artikoli 5 u 6 tar-Regolament (KE) Nru 2111/2005 jagħrfu l-bżonn li jittieħdu deċiżjonijiet malajr u, meta jkun xieraq, b’urġenza. Għaldaqstant, huwa essenzjali li, sabiex jiġu mħarsa l-informazzjoni sensittiva kif ukoll il-pubbliku li jivvjaġġa, kull deċiżjoni fil-kuntest tal-aġġornament tal-lista tat-trasportaturi tal-ajru li huma soġġetti għal projbizzjoni jew restrizzjoni fuq l-operat fl-Unjoni tapplika minnufih wara l-adozzjoni tagħha.

(93)

Il-miżuri previsti f’dan ir-Regolament huma skont l-opinjoni tal-Kumitat għas-Sikurezza tal-Ajru tal-UE stabbilit bl-Artikolu 15 tar-Regolament (KE) Nru 2111/2005,