(2)

Il-prodott soġġett għar-reġistrazzjoni huwa tagħmir għall-aċċess mobbli awtopropulsiv iddisinjat għall-irfigħ ta’ persuni, li għandu għoli massimu ta’ operat ta’ sitt metri jew aktar, u li l-biċċiet tiegħu huma magħqudin minn qabel jew lesti biex jingħaqdu, esklużi l-komponenti individwali meta jiġu ppreżentati separatament, u eskluż tagħmir għall-irfigħ ta’ persuni mmuntat fuq vetturi tal-Kapitolu 86 u l-Kapitolu 87 tas-Sistema Armonizzata li joriġina mir-Repubblika tal-Poplu taċ-Ċina (“il-prodott ikkonċernat”).

(3)

Il-prodott bħalissa huwa kklassifikat, għall-MAE, taħt il-kodiċijiet NM ex 8427 10 10, ex 8427 20 19, ex 8428 90 90 u, għas-sezzjonijiet immuntati minn qabel jew lesti għall-immuntar tal-MAE, taħt ex 8431 20 00 u ex 8431 39 00 (kodiċijiet TARIC: 8427101010, 8427201910, 8428909020, 8431200060 u 8431390010). Il-kodiċijiet NM u TARIC huma mogħtija għall-informazzjoni biss u bla ħsara għal bidla sussegwenti fil-klassifikazzjoni tariffarja.

(4)

Fil-15 ta’ Jannar 2024 u fit-12 ta’ Marzu 2024, l-ilmentatur ippreżenta talbiet għar-reġistrazzjoni skont l-Artikolu 14(5) tar-Regolament bażiku. L-ilmentatur talab li l-importazzjonijiet tal-prodott ikkonċernat isiru soġġetti għar-reġistrazzjoni sabiex sussegwentement ikunu jistgħu jiġu applikati miżuri kontra dawk l-importazzjonijiet mid-data tar-reġistrazzjoni.

(5)

Fit-22 ta’ Jannar 2024, il-Kamra tal-Kummerċ taċ-Ċina għall-Importazzjoni u l-Esportazzjoni ta’ Makkinarju u Prodotti Elettroniċi (“CCCME”), ippreżentat kummenti dwar l-ewwel talba għar-reġistrazzjoni tal-15 ta’ Jannar 2024, bl-argument li din it-talba ma kienx fiha biżżejjed evidenza ta’ żieda fl-importazzjonijiet, speċjalment fir-rigward tal-importazzjonijiet ta’ wara l-bidu miċ-Ċina, li l-istaġjonalità tad-domanda ma tqisitx u li s-suq tal-MAE xprunat mid-domanda ma jippermettix importazzjonijiet addizzjonali mhux mistennija jew akkumulazzjoni ta’ ħażniet, li jimmina l-effett rimedjali tad-dazju. Il-Kummissjoni ċaħdet dawn il-kummenti tas-CCCME peress li t-tieni talba għar-reġistrazzjoni ppreżentata mill-ilmentatur fit-12 ta’ Marzu 2024 kien fiha biżżejjed evidenza dwar iż-żieda fl-importazzjonijiet wara l-bidu, inkluż meta titqies l-istaġjonalità tad-domanda.

(6)

Skont l-Artikolu 14(5) tar-Regolament bażiku, il-Kummissjoni tista’ titlob lill-awtoritajiet tad-dwana jieħdu l-passi meħtieġa għar-reġistrazzjoni tal-importazzjonijiet, sabiex il-miżuri jkunu jistgħu jiġu sussegwentement applikati fuq dawk l-importazzjonijiet mid-data ta’ dik ir-reġistrazzjoni. L-importazzjonijiet jistgħu jsiru soġġetti għar-reġistrazzjoni wara talba mill-industrija tal-Unjoni li jkun fiha biżżejjed evidenza biex tiġġustifika din l-azzjoni.

(7)

Skont l-ilmentatur, ir-reġistrazzjoni hija ġġustifikata peress li l-prodott ikkonċernat qed ikun oġġett ta’ dumping u l-importazzjonijiet bi prezz baxx jikkawżaw dannu sinifikanti lill-industrija tal-Unjoni.

(8)

Il-Kummissjoni eżaminat it-talba fid-dawl tal-Artikolu 10(4) tar-Regolament anti-dumping bażiku.

(9)

Il-Kummissjoni vverifikat jekk l-importaturi kinux konxji, jew jekk kellhomx ikunu konxji, mid-dumping fir-rigward tal-livell tad-dumping u d-dannu allegat jew misjub. Hija analizzat ukoll jekk kienx hemm żieda oħra sostanzjali fl-importazzjonijiet li, fid-dawl ta’ meta seħħet u l-volum u ċirkostanzi oħra, x’aktarx iddgħajjef serjament l-effett ta’ rimedju tad-dazju antidumping definittiv li għandu jiġi applikat.

(10)

Fir-rigward tad-dumping, fl-ilment l-ilmentatur ipprovda evidenza li l-importazzjonijiet mir-RPĊ kienu qed ikunu oġġett ta’ dumping. L-ilment ipprovda wkoll biżżejjed evidenza tad-dannu allegat.

(11)

L-avviż ta’ bidu għal dan il-proċediment, ippubblikat fit-13 ta’ Novembru 2023, kien fih sommarju tal-evidenza pprovduta. Permezz tal-pubblikazzjoni tagħha f’Il-Ġurnal Uffiċjali tal-Unjoni Ewropea, dik l-informazzjoni tqiegħdet għad-dispożizzjoni tal-pubbliku, u l-ilment kien aċċessibbli għall-importaturi kollha. Għaldaqstant, il-Kummissjoni qieset li, l-aktar tard f’dak il-mument, l-importaturi kienu konxji, jew kellhom ikunu konxji, mill-prattiki allegati ta’ dumping, il-portata tagħhom u d-dannu allegat.

(12)

Fit-talbiet tiegħu għar-reġistrazzjoni, l-ilmentatur ipprovda l-informazzjoni disponibbli dwar is-suq li skontha, wara l-bidu tal-proċedimenti, l-importazzjonijiet fl-Unjoni tal-prodott ikkonċernat żdiedu b’10 % sa 90 % skont it-tip ta’ prodott.

(13)

Il-Kummissjoni vverifikat l-istatistika (Sorveljanza) għall-importazzjonijiet tal-prodott ikkonċernat, abbażi tal-informazzjoni disponibbli għat-tliet kodiċijiet TARIC identifikati fin-Notifika ta’ Bidu għal MAE (ara l-premessa (3)) (3). Abbażi tal-volumi importati taħt il-kodiċijiet TARIC speċifiċi maħluqa fil-bidu għall-prodott li qed jiġi investigat, l-ewwel stabbiliet il-volum tal-importazzjonijiet tal-MAE għal perjodu wara l-bidu (Diċembru 2023 sa Marzu 2024). Peress li l-importazzjonijiet taħt il-kodiċijiet NM eżistenti matul il-perjodu ta’ investigazzjoni (mill-1 ta’ Ottubru 2022 sat-30 ta’ Settembru 2023) kien fihom ukoll prodotti oħra, il-Kummissjoni aġġustat il-volumi bis-sehem perċentwali tal-prodott ikkonċernat mill-importazzjonijiet taħt il-kodiċijiet NM, abbażi tal-proporzjon misjub tal-prodott investigat mill-kodiċi NM totali fid-data ta’ wara l-bidu. Il-Kummissjoni mbagħad qabblet dawn il-volumi mal-volumi tal-importazzjonijiet tal-MAE għall-istess perjodu (Diċembru 2022 sa Marzu 2023) li kien parti mill-perjodu ta’ investigazzjoni.

(14)

Fuq din il-bażi, il-Kummissjoni stabbiliet li fil-perjodu wara l-bidu (Diċembru 2023 sa Marzu 2024), il-volum tal-importazzjonijiet żdied b’ 16,2 % meta mqabbel mal-volum tal-importazzjonijiet matul l-istess perjodu s-sena ta’ qabel.

Tabella 1

Importazzjonijiet mir-RPĊ minn Diċembru sa Marzu imqabbla mas-sena ta’ qabel

(15)

Il-Kummissjoni qieset tali żieda fl-importazzjonijiet bħala sostanzjali. Għalkemm, matul l-istess perjodu ta’ tqabbil, il-prezz medju żdied bi ftit, kien għadu taħt il-prezz medju matul il-perjodu ta’ investigazzjoni.

(16)

Fid-dawl taż-żmien, il-volum tal-importazzjonijiet oġġett ta’ dumping u ċirkostanzi oħra (bħat-tnaqqis fil-bejgħ, il-fatturat, l-impjiegi u l-profitt tal-industrija tal-Unjoni evidenzjat fl-ilment u fit-talbiet għar-reġistrazzjoni) x’aktarx li jimminaw serjament l-effett rimedjali ta’ kwalunkwe dazju definittiv. Barra minn hekk, minħabba t-tnedija tal-proċedimenti attwali, huwa raġonevoli li wieħed jassumi li l-importazzjonijiet tal-prodott ikkonċernat jistgħu jiżdiedu ulterjorment qabel l-adozzjoni ta’ miżuri provviżorji, jekk ikun hemm minnhom, u l-importaturi jistgħu jibnu l-istokks b’mod rapidu.

(17)

Għaldaqstant, il-Kummissjoni kkonkludiet li hemm biżżejjed evidenza sabiex tiġġustifika li l-importazzjonijiet tal-prodott ikkonċernat ikunu soġġetti għar-reġistrazzjoni f’konformità mal-Artikolu 14(5) tar-Regolament bażiku.

(18)

Il-partijiet interessati kollha huma mistiedna jippreżentaw il-fehmiet tagħhom bil-miktub u jipprovdu evidenza ta’ sostenn. Barra minn hekk, il-Kummissjoni tista’ tisma’ lill-partijiet interessati, dment li jippreżentaw talba bil-miktub u juru li hemm raġunijiet partikolari għalfejn jenħtieġ li jinstemgħu.

(19)

Skont l-Artikolu 14(5) tar-Regolament bażiku l-importazzjonijiet tal-prodott ikkonċernat jenħtieġ li jkunu soġġetti għar-reġistrazzjoni bl-iskop li jiżguraw li, f’każ li l-investigazzjoni tirriżulta f’konklużjonijiet li jwasslu għall-impożizzjoni ta’ dazji anti-dumping, dawk id-dazji jistgħu, jekk il-kundizzjonijiet neċessarji jkunu ssodisfati, jiġu imposti b’mod retroattiv fuq l-importazzjonijiet irreġistrati skont id-dispożizzjonijiet legali applikabbli.

(20)

Kull obbligazzjoni fil-futur tiġi mill-konklużjonijiet tal-investigazzjoni anti-dumping.

(21)

L-allegazzjonijiet fl-ilment li jitlob il-bidu ta’ investigazzjoni anti-dumping jistmaw marġni medju tad-dumping li jvarja minn 178 % sa 275,9 % u marġni medju tal-bejgħ taħt il-prezz ta’ 57,5 % għall-prodott ikkonċernat. L-ammont ta’ responsabbiltà possibbli fil-futur huwa stabbilit fil-livell tal-bejgħ taħt il-prezz stmat fuq il-bażi tal-ilment, jiġifieri 57,5 % ad valorem fuq il-valur tal-importazzjoni CIF tal-prodott ikkonċernat.

(22)

Kull data personali miġbura fil-kuntest ta’ din ir-reġistrazzjoni se tiġi trattata f’konformità mar-Regolament (UE) 2018/1725 tal-Parlament Ewropew u tal-Kunsill (5),