(1)

“mikroplastik” tfisser oġġett diskret żgħir li huwa solidu, insolubbli fl-ilma u huwa parzjalment jew kompletament magħmul minn polimeri sintetiċi jew polimeri naturali modifikati kimikament;

(2)

“partikola” tfisser parti żgħira ħafna ta’ materjal b’limiti fiżiċi definiti;

(3)

“partikola mikroplastika” tfisser oġġett mikroplastiku li d-dimensjonijiet tiegħu huma ta’ 5 mm jew inqas u li l-proporzjon tat-tul mal-wisa’ tiegħu huwa ta’ 3 jew inqas;

(4)

“fibra tal-mikroplastik” tfisser oġġett mikroplastiku li t-tul tiegħu huwa ta’ 15 mm jew inqas u li l-proporzjon tat-tul mal-wisa’ tiegħu huwa akbar minn 3;

(5)

“polimeru” tfisser sustanza li tikkonsisti f’molekuli kkaratterizzati mis-sekwenza ta’ tip wieħed ta’ unità monomerika jew aktar. Tali molekuli għandhom ikunu distribwiti fuq medda ta’ piżijiet molekulari fejn id-differenzi fil-piż molekulari jkun attribwibbli primarjament għad-differenzi fl-għadd ta’ unitajiet monomeriċi. Polimeru jkun fih dan li ġej:

(6)

“unità monomerika” tfisser il-forma tal-monomeru li ġiet suġġetta għal reazzjoni f’polimeru;

(7)

“polimeru sintetiku” tfisser polimeru li huwa materjal magħmul mill-bniedem u li jirriżulta minn proċess ta’ polimerizzazzjoni li ma seħħx fin-natura;

(8)

“konċentrazzjoni tal-mikroplastiks” tfisser il-kwantità ta’ mikroplastiks preżenti fl-ilma, espressa bħala l-għadd ta’ oġġetti mikroplastiks (partikoli u/jew fibri) għal kull metru kubu ta’ ilma;

(9)

“polimeru naturali” tfisser polimeru li jirriżulta minn proċess ta’ polimerizzazzjoni li jkun seħħ fin-natura u li ma jkunx modifikat kimikament;

(10)

“daqs tal-partikoli tal-mikroplastik” tfisser id-dijametru ekwivalenti għall-erja ddeterminat minn immaġni ottika jew kimika tal-mikroplastik;

(11)

“dijametru ekwivalenti għall-erja” tfisser id-dijametru ta’ ċirku li jkollu l-istess erja bħall-projezzjoni bidimensjonali tal-immaġnijiet kimiċi ottiċi jew iperspettrali tal-partikoli;

(12)

“daqs tal-fibra tal-mikroplastik” tfisser il-valur medju tal-wisa’ projettata tal-fibra tal-mikroplastik;

(13)

“polimeru insolubbli” tfisser polimeru li għandu solubbiltà ta’ inqas minn 2 g/L fl-ilma f’kundizzjonijiet termali u kimiċi rilevanti għall-ilma maħsub għall-konsum mill-bniedem;

(14)

“polimeri ta’ prijorità” tfisser il-polimeri li ġejjin li għandhom jitqiesu fl-identifikazzjoni tal-mikroplastiks:

(15)

“klassifikazzjoni tal-polimeri” tfisser partikoli analizzati kklassifikati skont it-tliet kategoriji li ġejjin:

(16)

“klassifikazzjoni tad-daqs” tfisser klassifikazzjoni skont id-dijametru ekwivalenti għall-erja tal-partikoli tal-mikroplastiks f’waħda mill-meded li ġejjin:

(17)

“kaskata tal-filtri” tfisser sekwenza ta’ filtri mqiegħda f’serje biex jiġbru partikoli minn likwidu li jgħaddi minn ġol-filtri;

(18)

“inbjank proċedurali” tfisser kampjun li għadda mill-proċedura kollha tal-kampjunar, tal-ipproċessar u tal-kejl u li jiġi analizzat bl-istess mod bħal kampjun normali iżda mingħajr ma jkun ġie espost għall-analita;

(19)

“spettroskopija vibrazzjonali” tfisser teknika użata biex titkejjel l-interazzjoni tar-radjazzjoni viżibbli u infrared mal-materja bl-assorbiment, it-tixrid, jew ir-riflessjoni;

(20)

“Spettroskopija Raman” tfisser teknika spettroskopika użata biex tiddetermina l-modalitajiet vibrazzjonali tal-molekuli f’solidi, likwidi u gassijiet u bbażata fuq l-illuminazzjoni ta’ kampjun b’sors tad-dawl monokromatiku qawwi u wara jitkejjel il-porzjon tad-dawl mifrux inelastikament mill-materjal;

(21)

“Spettroskopija Infrar-Red (IR)” tfisser teknika spettroskopika użata biex jiġu ddeterminati l-modalitajiet vibrazzjonali tal-molekuli f’solidi, likwidi u gassijiet u bbażata fuq il-kejl tal-interazzjoni tar-radjazzjoni infrared mal-materja permezz ta’ assorbiment jew riflessjoni;

(22)

“Mikrospettroskopija Infra-Red Fourier Transform(μ-FTIR)” tfisser varjazzjoni tal-ispettroskopija infrared (IR) li tikkombina spettrometru FTIR ma’ sistema ta’ mikroskopju għall-akkwist ta’ spettri IR riżolti spazjalment u għat-twettiq ta’ immaġnijiet kimiċi;

(23)

“Mikrospettroskopija Raman (μ-Raman)” tfisser varjazzjoni tal-ispettroskopija Raman li tikkombina spettrometru Raman ma’ sistema ta’ mikroskopju għall-akkwist ta’ spettri riżolti spazjalment u għat-twettiq ta’ immaġnijiet kimiċi;

(24)

“Mikroskopija tal-Quantum Cascade Laser (QCL) -IR” tfisser varjazzjoni tal-mikroskopija Infra-Red (IR) li tuża QCL aġġustabbli bħala s-sors IR għall-akkwist ta’ spettri IR riżolti spazjalment u għat-twettiq ta’ immaġnijiet kimiċi.

(1)

Il-kampjuni għandhom jinġabru permezz ta’ filtrazzjoni billi l-ilma maħsub għall-konsum mill-bniedem jgħaddi minn kaskata ta’ erba’ filtri. Il-filtri jenħtieġ li jiġu mmuntati f’kontenituri tal-filtri adattati biex jaħdmu taħt pressjoni pożittiva. L-ewwel filtru, denominat (a), għandu jkollu valur ta’ limitu ta’ 100 μm u t-tieni filtru, denominat (b), għandu jkollu valur ta’ limitu ta’ 20 μm. It-tielet filtru, denominat (c), għandu jkollu valur ta’ limitu ta’ 100 μm u r-raba’ filtru denominat (d) għandu jkollu valur ta’ limitu ta’ 20 μm. Il-filtri (a) u (b) għandhom iservu biex jiġbru l-materja sospiża mill-ilma maħsub għall-konsum mill-bniedem. Il-filtri (c) u (d) għandhom jintużaw, fejn meħtieġ, biex jipproduċu inbjanki proċedurali biex jivvalutaw il-livelli ta’ kontaminazzjoni tal-mikroplastiks, partikolarment minn tagħmir tal-laboratorju, reaġenti u l-atmosfera tal-madwar, li jseħħu matul l-istadji tat-teħid tal-kampjuni, tat-trattament u tal-analiżi. Sabiex tiġi minimizzata l-kontaminazzjoni atmosferika tal-kampjuni, jenħtieġ li l-volum meħtieġ tal-ilma jitwassal direttament mill-punt ta’ kampjunar għal ġol-kaskata tal-filtri mingħajr l-użu ta’ kontenitur intermedju ta’ ġbir jew ta’ ħżin. Ir-reċipjenti intermedji tal-ġbir/tal-ħżin jistgħu jintużaw biss meta l-filtrazzjoni immedjata u diretta permezz tal-kaskata tkun impossibbli jew imprattikabbli fil-punt ta’ kampjunar, partikolarment għal raġunijiet tekniċi jew ta’ sikurezza.

(2)

Matul il-passi kollha tal-ġbir, it-trattament, il-ħżin u l-analiżi tal-kampjuni, għandhom jittieħdu l-prekawzjonijiet raġonevoli kollha biex tiġi evitata l-kontaminazzjoni tal-kampjuni minn partikoli tal-plastik estranji mill-ambjent tal-madwar, it-tagħmir personali protettiv jew tagħmir tal-laboratorju. Il-likwidi kollha użati fl-ipproċessar tal-kampjuni għandhom jiġu ffiltrati (0,45 μm jew inqas) qabel l-użu.

(3)

Għandu jittieħed kampjun ta’ volum minimu ta’ 1 000 (elf) litru ta’ ilma. Il-volum totali tal-ilma mgħoddi mill-kaskata tal-filtri għandu jitkejjel u jiġi rreġistrat.

(4)

Analiżi tal-kampjun permezz ta’ mikrospettroskopija vibrazzjonali tista’ ssir direttament fuq il-filtri tal-ġbir oriġinali, jekk dawn ikunu kompatibbli mal-metodu analitiku użat. L-inkompatibbiltà tal-filtru tal-ġbir oriġinali tista’ tkun minħabba nuqqas ta’ livellar tal-wiċċ tal-filtru, interferenza minn sinjali mxerrda mill-filtru, fluworexxenza jew assorbiment ta’ sinjali ottiċi meta jintużaw fit-trażmissjoni.

(5)

Jekk analiżi tal-kampjun ma tkunx tista’ ssir direttament fuq il-filtru tal-ġbir, il-materjali partikolati jistgħu jiġu sospiżi mill-ġdid f’likwidu u trasferiti għal appoġġ alternattiv għal analiżijiet sussegwenti. Jekk meħtieġ, jistgħu jiġu applikati miżuri ta’ separazzjoni tad-densità u/jew ta’ trattament kimiku/enżimatiku biex titnaqqas il-preżenza ta’ materjali mhux tal-plastik bħal minerali, ossidi tal-metall u materja organika naturali.

(6)

Għandhom jitwettqu verifiki sperimentali biex jiġi vvalutat l-irkupru tal-materjal fuq kull wieħed mill-filtri (a) u (b) meta tiġi applikata l-metodoloġija kif implimentata mill-utent. Dan jista’ jsir billi l-fluss tal-ilma fil-kampjun tal-kaskata tal-filtri jiġi spiked bi kwantità magħrufa ta’ mikroplastiks identifikabbli b’mod ċar u tiġi vverifikata l-kwantità rkuprata skont il-proċedura tal-analiżi. L-ispikes għandhom jinkludu partikolati b’daqsijiet, densitajiet u għadd xierqa għall-valutazzjoni tal-irkupru fuq il-filtri (a) u (b). Huwa rrakkomandat li jintużaw partikoli spike fil-medda ta’ daqs minn 120 sa 200 μm biex jiġi vvalutat l-irkupru fuq il-filtru (a). Biex jiġi vvalutat l-irkupru fuq il-filtru (b) huwa rrakkomandat li jintużaw partikoli fil-medda ta’ daqsijiet minn 30 μm sa 70 μm. L-irkupru għandu jiġi vvalutat bl-użu ta’ partikoli ta’ mill-inqas tnejn mill-polimeri ta’ prijorità. Il-polimeri użati għandhom jinkludu mill-inqas waħda b’densità ogħla mill-ilma (eż., PET) u mill-inqas waħda b’densità aktar baxxa mill-ilma (eż., PE). F’kull każ, l-għadd ta’ partikoli spike għandu jkun fil-medda ta’ 50 sa 150. Il-proċedura ta’ analiżi għandha titqies aċċettabbli jekk ir-rata ta’ rkupru tkun fil-medda ta’ 100 % sa +/- 40 %.

(7)

Meta l-materjal jiġi ttrasferit mill-filtri tal-ġbir (a) jew (b) għal appoġġ analitiku alternattiv (filtru sekondarju jew superfiċe xieraq ieħor) dan preferibbilment għandu jsir mingħajr sottokampjunar. Jekk il-proċedura analitika tinkludi passi ta’ sottokampjunar, allura l-kampjun finali analizzat għandu jirrappreżenta mill-inqas 10 % tal-materjal irkuprat mill-volum oriġinali ta’ ilma kkampjunat. L-analiżi għandha ssir separatament fuq il-materjali miġbura fuq kull wieħed mill-filtri (a) u (b).

(8)

Il-filtri (c) u (d) għandhom jintużaw biex jipproduċu inbjank proċedurali. L-inbjank proċedurali prodott bil-filtru (c) għandu jikkonsisti f’filtru ta’ 100 μm u għandu jkun soġġett għall-istess passi ta’ pproċessar u analiżi bħall-filtru tal-ġbir (a). L-inbjank proċedurali prodott bil-filtru (d) għandu jikkonsisti f’filtru ta’ 20 μm u għandu jkun soġġett għall-istess passi ta’ pproċessar u analiżi bħall-filtru tal-ġbir (b). Sabiex jiġu kkwantifikati l-livelli tipiċi ta’ kontaminazzjoni fl-isfond li jseħħu matul il-prestazzjoni tal-proċeduri analitiċi, huwa rrakkomandat li jinġabru, jiġu pproċessati u analizzati minimu ta’ għaxar inbjanki proċedurali ta’ kull tip ta’ filtru. Dawn il-valuri għandhom jintużaw biex tiġi kkalkulata l-medja (μ) u d-devjazzjoni standard (σ) tal-kontaminazzjoni tal-mikroplastiks fl-isfond. Sussegwentement, aktar inbjanki proċedurali għandhom jinġabru perjodikament u jiġu analizzati sabiex jiġu mmonitorjati l-varjazzjonijiet fil-livell ta’ kontaminazzjoni fl-isfond. Jekk xi inbjank perjodiku jaqbeż il-kontaminazzjoni medja fl-isfond (μ) b’aktar minn tliet darbiet id-devjazzjoni standard (σ), il-laboratorju għandu jinvestiga s-sors tal-kontaminazzjoni miżjuda u jieħu miżuri biex inaqqasha.

(9)

Qabel ma jsiru analiżijiet permezz ta’ spettroskopija vibrazzjonali, għandhom jintużaw il-mikroskopija ottika jew l-immappjar kimiku biex jitkejjel jew jiġi stmat l-għadd ta’ partikoli ġeneriċi (≥ 20 μm) fuq il-filtru sħiħ jew l-appoġġ tal-kampjun. Meta l-għadd totali ta’ partikoli ġeneriċi fuq il-filtru jkun għoli wisq biex jitkejjel fi żmien prattiku, l-operatur jista’ jillimita l-analiżi għal suberja iżgħar waħda jew aktar tal-filtru: l-għażla tal-erja għandha ssegwi strateġiji xierqa ta’ sottokampjunar li jżommu kampjun rappreżentattiv. Is-sottokampjunar għandu jkopri mill-inqas 20 % tal-erja tal-appoġġ tal-kampjun jew tal-filtru. Fejn jintużaw subżoni tal-filtru, l-operatur għandu janalizza l-partikoli u l-fibri kollha fil-medda ta’ daqs ta’ ≥ 20 μm.

(10)

L-analiżi tal-kompożizzjoni tal-partikoli u tal-fibri tal-mikroplastiks għandha titwettaq bl-użu ta’ metodi spettroskopiċi vibrazzjonali bħal μ-FTIR, μ-Raman jew varjazzjonijiet ekwivalenti bħal QCL-IR. L-istrumenti għandhom ikunu kapaċi jakkwistaw spettri IR/Raman minn partikoli fil-medda ta’ daqsijiet ta’ 20 μm jew inqas. Għandhom jintużaw immaġnijiet ottiċi jew mapep kimiċi biex jiġi ddeterminat id-daqs tal-partikoli u l-fibri tal-mikroplastik. L-immaġnijiet ottiċi għandhom jinkisbu bl-użu ta’ objettiv ta’ tkabbir ta’ mill-inqas 4x. Il-klassifikazzjoni tad-daqs tal-partikoli għandha tkun ibbażata fuq dijametru ekwivalenti għall-erjakull meta din l-għażla tkun disponibbli għall-operatur tal-istrument. Miżuri alternattivi ta’ dijametru għandhom jintużaw biss jekk din l-għażla ma tkunx disponibbli. Għandu jiġi rrapportat it-tip ta’ dijametru alternattiv.

(11)

L-identifikazzjoni ta’ partikoli u fibri minn spettri akkwiżiti għandha titwettaq b’paragun ma’ spettri ta’ materjali magħrufa li jinsabu f’librerija spettrali. Il-librerija spettrali użata għall-identifikazzjoni għandu jkun fiha eżempji tal-polimeri ta’ prijorità kollha u għandu jkun fiha wkoll eżempji ta’ proteini u minerali u polimeri naturali bħaċ-ċelluloża li normalment jistgħu jkunu preżenti fl-ilma maħsub għall-konsum mill-bniedem.

(12)

Meta jintużaw proċeduri ta’ identifikazzjoni awtomatizzati, għandha titwettaq verifika sperimentali biex jiġu vvalutati l-kriterji xierqa ta’ aċċettazzjoni pożittiva għat-tqabbil tal-ispettru. Il-verifika għandha tqis il-karatteristiċi speċifiċi tal-istrumentazzjoni applikata, il-librerija spettrali u l-istrateġija ta’ identifikazzjoni. Din tista’ ssir bl-użu ta’ mikropartikoli ta’ polimeri puri, iżda l-evalwazzjoni trid tkopri l-meded tad-daqsijiet rilevanti li għandhom jinżammu mill-filtri tal-kampjunar, b’mod partikolari, (a) > 100 μm u (b) 20-100 μm. Ladarba l-livell minimu ta’ kwalità applikat għall-identifikazzjoni spettrali pożittiva jkun ġie stabbilit, dak il-livell għandu jibqa’ ffissat għall-protokoll applikat mil-laboratorju analitiku.

(13)

Id-data għandha tiġi rreġistrata separatament mill-materjali miġbura fuq kull wieħed miż-żewġ filtri tal-ġbir (valur ta’ limitu ta’ 100 μm u 20 μm). Fejn jinġabru kampjuni inbjank proċedurali, id-data għandha tiġi rreġistrata separatament mill-materjali miġbura fuq kull wieħed mill-filtri inbjank (valur ta’ limitu ta’ 20 μm jew ta’ 100 μm).

(14)

Rekwiżiti tal-kejl: il-filtru jew is-suberja tal-filtru għandhom jiġu analizzati sabiex jiġu eżaminati l-partikoli u l-fibri tal-mikroplastik kollha kif definiti fil-meded tad-daqsijiet dettaljati fil-punti (3) u (4) tat-Taqsima 1.

(15)

Id-data miksuba dwar il-partikoli u l-fibri tal-mikroplastik għandha tiġi elaborata biex kull oġġett jiġi kkategorizzat abbażi tad-daqs, l-għadd, il-forma u l-kompożizzjoni tiegħu kif ġej:

(16)

Jekk l-analiżi tal-materjali fuq il-filtri jew l-appoġġ tal-kampjun ma jindirizzawx il-partikoli miġbura kollha (eż., minħabba s-sottokampjunar) fil-medda tad-daqs rilevanti, id-data għandha tiġi skalata b’mod xieraq sabiex tirrappreżenta b’mod korrett il-konċentrazzjoni tal-mikroplastiks fil-kampjun oriġinali tal-ilma maħsub għall-konsum mill-bniedem. Il-kontenut tal-mikroplastiks fl-ilma maħsub għall-konsum mill-bniedem għandu jiġi espress bħala l-għadd ta’ partikoli jew fibri tal-mikroplastik għal kull metru kubu.

(17)

L-utenti ta’ din il-metodoloġija għandhom jiżguraw li l-informazzjoni addizzjonali kollha li ġejja tiġi rreġistrata fir-rigward ta’ kull kampjun miġbur u mkejjel:

(18)

Meta tintuża din il-metodoloġija, għandhom japplikaw regoli standard dwar is-sikurezza ambjentali u tal-laboratorju.