IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2016/2031 tal-Parlament Ewropew u tal-Kunsill tas-26 ta’ Ottubru 2016 dwar il-miżuri protettivi kontra pesti tal-pjanti, li jemenda r-Regolamenti (UE) Nru 228/2013, (UE) Nru 652/2014 u (UE) Nru 1143/2014 tal-Parlament Ewropew u tal-Kunsill u li jħassar id-Direttivi tal-Kunsill 69/464/KEE, 74/647/KEE, 93/85/KEE, 98/57/KE, 2000/29/KE, 2006/91/KE u 2007/33/KE (1), u b’mod partikolari l-Artikolu 28(1) tiegħu,

Billi:

(1)	Ir-Regolament ta’ Implimentazzjoni tal-Kummissjoni (UE) 2020/1201 (2) ilu japplika minn Awwissu tal-2020 bil-għan li jipprevjeni l-introduzzjoni u t-tixrid ulterjuri fl-Unjoni tal-Xylella fastidiosa (Wells et al.) (“il-pest speċifikat”).

(2)

Wara l-istħarriġ li twettaq skont l-Artikolu 10 tar-Regolament ta’ Implimentazzjoni (UE) 2020/1201, l-Italja kkonfermat li l-eradikazzjoni tal-pest speċifikat fil-muniċipalitajiet ta’ Alberobello, Castellana Grotte, Monopoli, Polignano a Mare u Putignano fil-provinċja ta’ Bari u fil-muniċipalità ta’ Fasano fil-provinċja ta’ Taranto ma għadhiex possibbli.

(3)	Għalhekk, jenħtieġ li dawk il-muniċipalitajiet jiżdiedu mal-lista rispettiva ta’ żoni infettati taħt trażżin, kif stabbilit fl-Anness III tar-Regolament ta’ Implimentazzjoni (UE) 2020/1201, fir-rigward tal-provinċji ta’ Taranto u Bari.

(4)	Għaldaqstant, jenħtieġ li r-Regolament ta’ Implimentazzjoni (UE) 2020/1201 jiġi emendat skont dan.

(5)	Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1

Emendi għar-Regolament ta’ Implimentazzjoni (UE) 2020/1201

L-Anness III tar-Regolament ta’ Implimentazzjoni (UE) 2020/1201 huwa emendat f’konformità mal-Anness ta’ dan ir-Regolament.

Artikolu 2

Dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.