(1)

Il-Valutazzjoni ta' Theddid mill-Kriminalità Serja u Organizzata (SOCTA) tal-Europol għall-2021 issottolinjat it-theddida dejjem tikber mill-kriminalità organizzata u l-infiltrazzjoni kriminali. Xprunata mid-dħul kbir iġġenerat mill-kriminalità organizzata, li jammonta għal mill-anqas EUR 139 biljun kull sena, u li qed jiġi rriċiklat dejjem aktar permezz ta' sistema finanzjarja parallela sotterranja, id-disponibbiltà ta' rikavat minn attivitajiet kriminali toħloq theddida sinifikanti għall-integrità tal-ekonomija u tas-soċjetà, li ddgħajjef l-istat tad-dritt u d-drittijiet fundamentali. Skont il-Komunikazzjoni mill-Kummissjoni tal-14 ta’ April 2021 dwar l-Istrateġija tal-UE biex tiġi miġġielda l-Kriminalità Organizzata 2021-2025, dik l-istrateġija għandha l-għan li tindirizza l-isfidi ppreżentati mill-kriminalità organizzata billi tippromwovi l-kooperazzjoni transfruntiera u l-iskambju ta' informazzjoni, tappoġġa investigazzjonijiet effettivi tan-networks kriminali, telimina r-rikavat minn attivitajiet kriminali, u tagħmel l-infurzar tal-liġi u l-ġudikatura adatti għall-era diġitali.

(2)

Il-motiv ewlieni għall-organizzazzjonijiet kriminali li joperaw b’mod transfruntier, inkluż in-networks kriminali ta' riskju għoli, huwa l-gwadann finanzjarju. Sabiex tiġi indirizzata t-theddida serja maħluqa mill-kriminalità organizzata, huwa importanti li l-awtoritajiet kompetenti, għaldaqstant, jingħataw kapaċità operazzjonali akbar u l-mezzi neċessarji biex jittraċċaw u jidentifikaw, jiffriżaw, jikkonfiskaw u jimmaniġġaw b'mod effettiv il-mezzi strumentali u r-rikavat mill-kriminalità jew il-proprjetà li tirriżulta minn attivitajiet kriminali.

(3)

L-organizzazzjonijiet kriminali normalment jinvestu mill-ġdid parti mill-profitti tagħhom minn attivitajiet kriminali biex joħolqu bażi finanzjarja li tippermettilhom ikomplu tali attivitajiet. Barra minn hekk, l-organizzazzjonijiet kriminali spiss jirrikorru għal vjolenza, theddid, intimidazzjoni jew korruzzjoni sabiex jiksbu l-kontroll ta' kumpaniji, jiksbu konċessjonijiet, awtorizzazzjonijiet, offerti jew għotjiet, jiksbu profitti jew vantaġġi illeċiti, jew jinfiltraw infrastrutturi ewlenin bħal ċentri loġistiċi. Tali organizzazzjonijiet għalhekk jaffettwaw b'mod negattiv il-libertà tal-kompetizzjoni, jew jinfluwenzaw id-deċiżjonijiet tal-awtoritajiet pubbliċi, u jheddu l-istat tad-dritt u d-demokrazija. L-organizzazzjonijiet kriminali saru operaturi ekonomiċi dinjin b'għanijiet intraprenditorjali. Il-fatt li l-kriminali jiġu miċħuda mill-profitti illeċiti huwa essenzjali biex jiġu mfixkla l-attivitajiet tagħhom u biex ma jitħallewx jinfiltraw l-ekonomiji leġittimi.

(4)

Il-kriminalità ekonomika u finanzjarja, b'mod partikolari l-kriminalità organizzata, ħafna drabi ssir permezz ta' persuni ġuridiċi, u r-reati kriminali inklużi fil-kamp ta' applikazzjoni ta' din id-Direttiva jistgħu jitwettqu fl-interess ta' tali persuni ġuridiċi jew għall-benefiċċju tagħhom. Għalhekk, l-ordnijiet ta' ffriżar u ta' konfiska jistgħu jinħarġu wkoll kontra persuni ġuridiċi f'konformità mal-liġi nazzjonali.

(5)

Sistema effettiva għall-irkupru tal-assi tirrikjedi t-traċċar u l-identifikazzjoni rapidi tal-mezzi strumentali u tar-rikavat mill-kriminalità, u tal-proprjetà suspettata li tkun ta' oriġini kriminali. Talirikavat mezzi strumentali, rikavat jew proprjetà jenħtieġ li jiġu ffriżati sabiex jiġi evitat l-għajbien tagħhom, u wara dan jenħtieġ li dawn jiġu kkonfiskati mal-ħruġ tal-ordni ta' konfiska fil-qafas tal-proċedimenti f'materji kriminali. Sistema effettiva għall-irkupru tal-assi tirrikjedi wkoll il-ġestjoni effettiva tal-proprjetà ffriżata u kkonfiskata sabiex iżżomm il-valur ta’ dik il-proprjetà għall-Istat jew għar-restituzzjoni għall-vittmi.

(6)

Il-qafas legali attwali tal-Unjoni dwar it-traċċar u l-identifikazzjoni, l-iffriżar, il-konfiska u l-ġestjonirikavat tal-mezzi strumentali, tar-rikavat jew tal-proprjetà, u dwar l-uffiċċji għall-irkupru tal-assi, jikkonsisti fid-Direttiva 2014/42/UE tal-Parlament Ewropew u tal-Kunsill (3), id-Deċiżjoni tal-Kunsill 2007/845/ĠAI (4) u d-Deċiżjoni Kwadru tal-Kunsill 2005/212/ĠAI (5). Il-Kummissjoni evalwat id-Direttiva 2014/42/UE u d-Deċiżjoni 2007/845/ĠAI, u kkonkludiet li l-qafas kurrenti ma kisibx b'mod sħiħ l-objettiv ta' politika tal-ġlieda kontra l-kriminalità organizzata permezz tal-irkupru tal-profitti tagħha.

(7)

Jenħtieġ li l-qafas legali eżistenti jiġi aġġornat, sabiex jiġu ffaċilitati u żgurati sforzi effettivi għall-irkupru u l-konfiska tal-assi madwar l-Unjoni. Għalhekk, jenħtieġ li din id-Direttiva tistabbilixxi regoli minimi dwar it-traċċar u l-identifikazzjoni, l-iffriżar, il-konfiska u l-ġestjoni ta' proprjetà fil-qafas ta' proċedimenti ta' materji kriminali. F'dan il-kuntest, il-proċediment ta' reat kriminali huwa kunċett awtonomu tal-liġi tal-Unjoni interpretat mill-Qorti tal-Ġustizzja tal-Unjoni Ewropea, minkejja l-ġurisprudenza tal-Qorti Ewropea tad-Drittijiet tal-Bniedem. Din id-Direttiva hija mingħajr preġudizzju għall-proċeduri li l-Istati Membri jistgħu jużaw biex jiffriżaw u jikkonfiskaw il-proprjetà. Jeħtieġ li tissaħħaħ il-kapaċità tal-awtoritajiet kompetenti li jċaħħdu lill-kriminali mir-rikavat minn attivitajiet kriminali. Għal dak il-għan, jenħtieġ li jiġu stabbiliti regoli biex jissaħħu t-traċċar u l-identifikazzjoni tal-assi, kif ukoll il-kapaċitajiet ta' ffriżar, biex tittejjeb il-ġestjoni tal-proprjetà ffriżata u kkonfiskata sad-disponiment tagħha wara ordni ta' konfiska finali, biex jissaħħu l-istrumenti għall-konfiska tal-mezzi strumentali u tar-rikavat mill-kriminalità u l-proprjetà derivata mill-attivitajiet kriminali tal-organizzazzjonijiet kriminali, u biex tittejjeb l-effiċjenza ġenerali tas-sistema tal-irkupru tal-assi.

(8)

Din id-Direttiva jenħtieġ li tiffaċilita l-kooperazzjoni transfruntiera billi tipprovdi lill-awtoritajiet kompetenti s-setgħat u r-riżorsi meħtieġa biex jirrispondu b'mod rapidu u effettiv għat-talbiet minn awtoritajiet fi Stati Membri oħra. Id-dispożizzjonijiet li jistabbilixxu regoli dwar it-traċċar u l-identifikazzjoni bikrija, azzjoni urġenti għall-iffriżar, jew ġestjoni effiċjenti jikkontribwixxu għat-titjib tal-possibbiltajiet għall-irkupru tal-assi bejn il-fruntieri. Minħabba n-natura globali tal-kriminalità organizzata, u l-kapaċità tagħha li tittrasferixxi assi kriminali malajr bejn il-fruntieri, jenħtieġ li l-kooperazzjoni ma' pajjiżi terzi tissaħħaħ ukoll fil-qafas legali internazzjonali.

(9)

Minħabba n-natura polikriminali ta', u l-kooperazzjoni sistemika u orjentata lejn il-profitt fost organizzazzjonijiet kriminali involuti f'firxa wiesgħa ta' attivitajiet illeċiti fi swieq differenti, ġlieda effettiva kontra l-kriminalità organizzata tirrikjedi li jkunu disponibbli miżuri ta' ffriżar u ta' konfiska biex ikopru l-profitti mir-reati kriminali kollha li fihom il-gruppi kriminali organizzati jkunu attivi. Tali reati jinkludu l-oqsma tal-kriminalità elenkati fl-Artikolu 83(1) tat-Trattat dwar il-Funzjonament tal-Unjoni Ewropea (TFUE). Minbarra r-reati elenkati fl-Artikolu 83(1) TFUE, jenħtieġ li l-kamp ta' applikazzjoni ta’ din id-Direttiva jkopri wkoll ir-reati kollha li huma armonizzati fil-livell tal-Unjoni, inkluż il-frodi kontra l-interessi finanzjarji tal-Unjoni fid-dawl tal-involviment dejjem akbar tal-gruppi tal-kriminalità organizzata f’tali reati. Jenħtieġ li l-kamp ta' applikazzjoni ta' din id-Direttiva jinkludi wkoll reati ambjentali li huma attività ewlenija għall-gruppi tal-kriminalità organizzata u spiss huma marbuta mal-ħasil tal-flus jew jikkonċernaw skart u residwi prodotti fil-kuntest tal-produzzjoni u t-traffikar tad-droga. Il-faċilitazzjoni ta' dħul u residenza mhux awtorizzati tikkostitwixxi attività ewlenija għall-gruppi kriminali organizzati u hija tipikament konnessa mat-traffikar tal-bnedmin. Ir-reat kriminali tal-iffaċilitar ta' dħul u residenza mhux awtorizzati jenħtieġ li jinftiehem skont it-tifsira tad-Direttiva tal-Kunsill 2002/90/KE (6) u d-Deċiżjoni Qafas tal-Kunsill 2002/946/ĠAI (7). Id-Deċiżjoni Qafas 2002/946/ĠAI tipprevedi l-possibbiltà li l-pieni kriminali jiġu akkumpanjati bil-konfiska tal-mezzi tat-trasport użati biex jitwettaq ir-reat, waqt li tistabbilixxi b'mod ċar li d-dispożizzjonijiet tagħha japplikaw mingħajr preġudizzju għall-protezzjoni mogħtija lir-refuġjati u lil dawk li jfittxu l-ażil sabiex tingħata assistenza umanitarja f'konformità mal-liġi internazzjonali.

(10)

Minbarra r-reat ta' parteċipazzjoni f'organizzazzjoni kriminali skont it-tifsira tal-Artikolu 2 tad-Deċiżjoni Kwadru tal-Kunsill 2008/841/ĠAI (8), jenħtieġ li jiġu inklużi fil-kamp ta' applikazzjoni ta' din id-Direttiva reati kriminali oħra kif imsemmija fl-Artikolu 1(1) tad-Deċiżjoni Kwadru 2008/841/ĠAI u kif definiti fil-liġi nazzjonali sa fejn jitwettqu fil-qafas ta' organizzazzjoni kriminali, kif definita fl-Artikolu 1(1) tad-Deċiżjoni Kwadru 2008/841/ĠAI u kif definita fil-liġi nazzjonali, bil-ħsieb li jinqabad qligħ illeċitu li jirriżulta minn attivitajiet kriminali tipikament imwettqa minn organizzazzjonijiet kriminali. L-Istati Membri huma mħeġġa b'mod partikolari biex jiżguraw li r-reati tal-kontrafazzjoni u l-piraterija ta' prodotti, it-traffikar illeċitu ta' oġġetti kulturali, il-falsifikazzjoni u t-traffikar ta' dokumenti amministrattivi, il-qtil jew offiżi gravi fuq il-persuna, il-kummerċ illeċitu ta' organi u tessuti umani, il-ħtif ta' persuni, iż-żamma illegali jew it-teħid ta' ostaġġi, is-serq organizzat jew armat, ir-rikattar u l-estorsjoni, it-traffikar ta' vetturi misruqa, ir-reati fiskali relatati mat-taxxi diretti u t-taxxi indiretti, il-ħruq doluż, il-frodi u t-truffa, it-traffikar illeċitu ta' materjali nukleari jew radjuattivi u r-reati li jaqgħu taħt il-ġuriżdizzjoni tal-Qorti Kriminali Internazzjonali jkunu inklużi fil-kamp ta' applikazzjoni ta' din id-Direttiva. Madankollu, din id-Direttiva ma tobbligax lill-Istati Membri biex jintroduċu jew iżommu kwalunkwe reat kriminali.

(11)

Sabiex tiġi żgurata l-implimentazzjoni effettiva tal-miżuri restrittivi tal-Unjoni, huwa meħtieġ li l-kamp ta' applikazzjoni ta' din id-Direttiva jiġi estiż għar-reati kriminali koperti mid-Direttiva (UE) 2024/1226 tal-Parlament Ewropew u tal-Kunsill (9).

(12)

Sabiex tiġi koperta l-proprjetà li tista' tiġi ttrasformata u ttrasferita sabiex tinħeba l-oriġini tagħha, u sabiex jiġu żgurati l-armonizzazzjoni u ċ-ċarezza tad-definizzjonijiet madwar l-Unjoni, il-proprjetà li tista' tkun soġġetta għal iffriżar u konfiska jenħtieġ li tiġi ddefinita b'mod wiesa'. Jenħtieġ li hija tkopri d-dokumenti jew l-istrumenti legali, inkluż f'forma elettronika jew diġitali, li jagħtu prova tat-titolu jew tal-interess fi proprjetà soġġetta għal iffriżar u konfiska inkluż, pereżempju, strumenti finanzjarji, trusts, jew dokumenti li jistgħu jwasslu għal pretensjonijiet tal-kredituri u li normalment jinstabu fil-pussess tal-persuna affettwata mill-proċeduri rilevanti. Din id-Direttiva hija mingħajr preġudizzju għall-proċeduri nazzjonali eżistenti għaż-żamma ta' dokumenti jew strumenti legali li jagħtu evidenza tat-titolu jew tal-interess fi proprjetà, kif inhuma applikati mill-awtoritajiet jew il-korpi pubbliċi kompetenti nazzjonali f'konformità mal-liġi nazzjonali. Jenħtieġ li d-definizzjoni tal-proprjetà tkopri l-forom kollha ta' proprjetà, inkluż il-kriptoassi.

(13)

Sabiex tiġi koperta l-proprjetà li tista' tiġi ttrasformata u ttrasferita sabiex tinħeba l-oriġini tagħha, u sabiex jiġu żgurati l-armonizzazzjoni u ċ-ċarezza tad-definizzjonijiet madwar l-Unjoni, jenħtieġ li tiġi prevista definizzjoni wiesgħa tar-rikavat mill-kriminalità, li tinkludi r-rikavat dirett minn attivitajiet kriminali u l-benefiċċji indiretti kollha, inkluż l-investiment mill-ġdid jew it-trasformazzjoni sussegwenti tar-rikavat diretti, f'konformità mad-definizzjonijiet fir-Regolament (UE) 2018/1805 tal-Parlament Ewropew u tal-Kunsill (10). Ir-rikavat għalhekk jenħtieġ li jinkludi kwalunkwe proprjetà, inkluż proprjetà li tkun ġiet ittrasformata jew ikkonvertita, kompletament jew parzjalment, fi proprjetà oħra, u propjetà li tkun tħalltet ma' proprjetà akkwistata minn sorsi leġittimi, sal-valur ivvalutat tar-rikavat imħallat. Dan jenħtieġ li jinkludi wkoll id-dħul jew benefiċċji oħra li jirriżultaw mir-rikavat mill-kriminalità, jew minn proprjetà li fiha jew biha seta' ġie ttrasformat, ikkonvertit jew imħallat tali rikavat.

(14)

It-traċċar u l-identifikazzjoni tal-proprjetà fi stadju bikri ta' investigazzjoni kriminali huma essenzjali biex tiġi żgurata l-identifikazzjoni fil-pront ta' mezzi strumentali, rikavat jew proprjetà li jistgħu sussegwentement jiġu kkonfiskati, inkluż proprjetà relatata ma' attivitajiet kriminali li jinsabu f'ġuriżdizzjonijiet oħra, u b'hekk tiġi ffaċilitata l-kooperazzjoni transfruntiera. Biex jiġi żgurat li l-investigazzjonijiet finanzjarji jingħataw prijorità suffiċjenti fl-Istati Membri kollha, sabiex jiġi indirizzat reat ta' natura transfruntiera, huwa meħtieġ li l-awtoritajiet kompetenti jintalbu jniedu t-traċċar tal-assi mill-mument li jkun hemm suspett ta' attività kriminali li x'aktarx tiġġenera benefiċċju ekonomiku sostanzjali. Meta jiddeterminaw jekk il-benefiċċju ekonomiku jkunx possibbilment sostanzjali, jenħtieġ li l-Istati Membri jkunu jistgħu jistabbilixxu limiti minimi għall-valur tar-rikavat mistenni jew jippermettu valutazzjoni każ b'każ mill-awtoritajiet kompetenti. Sabiex ikun hemm biżżejjed flessibbiltà fit-tnedija ta' investigazzjonijiet finanzjarji jenħtieġ li l-Istati Membri jkunu jistgħu jillimitaw il-kamp ta' applikazzjoni għal investigazzjonijiet dwar reati kriminali li possibbilment ikunu twettqu fil-qafas ta' organizzazzjoni kriminali. Għall-fini li jiġu żgurati investigazzjonijiet finanzjarji effettivi, jenħtieġ li l-Istati Membri jipprovdu r-riżorsi finanzjarji, tekniċi u umani meħtieġa.

(15)

Biex tiżgura l-applikazzjoni effettiva tal-miżuri restrittivi tal-Unjoni, l-Unjoni stabbiliet regoli minimi komuni dwar id-definizzjonijiet ta' mġiba kriminali li tikser il-miżuri restrittivi tal-Unjoni. Sabiex jiġi ffaċilitat is-sejbien ta' reati kriminali marbuta mal-ksur ta' miżuri restrittivi tal-Unjoni, huwa importanti li l-uffiċċji għall-irkupru tal-assi jingħataw is-setgħa li jintraċċaw u jidentifikaw il-proprjetà ta' persuni u entitajiet soġġetti għal dawk il-miżuri, fuq talba mill-awtoritajiet nazzjonali kompetenti abbażi ta' indikazzjonijiet u raġunijiet raġonevoli li jwasslu biex wieħed jemmen li twettqu tali reati kriminali. Dawk is-setgħat jenħtieġ li jkunu mingħajr preġudizzju għar-rekwiżiti proċedurali u s-salvagwardji stabbiliti skont il-liġi nazzjonali, inkluż ir-regoli dwar il-bidu ta' proċedimenti kriminali jew, fejn meħtieġ, ir-rekwiżit li tinkiseb awtorizzazzjoni ġudizzjarja.

(16)

Meta jitqies li t-traċċar u l-identifikazzjoni effettivi tal-proprjetà jistgħu jirrikjedu t-traċċar u l-identifikazzjoni ta' miżuri li jeħtieġu intervent minn awtoritajiet oħra, huwa importanti li l-uffiċċji għall-irkupru tal-assi jkunu jistgħu jitolbu l-kooperazzjoni tal-awtoritajiet rilevanti. Il-kundizzjonijiet għal talbiet bħal dawn huma soġġetti għal-liġi nazzjonali. L-Istati Membri jistgħu jinkludu rappreżentanti kemm mill-awtoritajiet tal-infurzar tal-liġi kif ukoll dawk ġudizzjarji fil-persunal tal-uffiċċji għall-irkupru tal-assi tagħhom jew jistabbilixxu uffiċċji għall-irkupru tal-assi kemm f’awtoritajiet tal-infurzar tal-liġi kif ukoll fil-ġudikatura.

(17)

Minħabba n-natura tranżnazzjonali tal-finanzi użati mill-gruppi tal-kriminalità organizzata, l-informazzjoni li tista' twassal għall-identifikazzjoni tal-mezzi strumentali u tar-rikavat mill-kriminalità u ta' proprjetà oħra li tkun ta' kriminali jenħtieġ li tiġi skambjata malajr bejn l-Istati Membri. Għal dak il-għan, jeħtieġ li l-uffiċċji għall-irkupru tal-assi jingħataw is-setgħa li jittraċċaw u jidentifikaw proprjetà li tista' sussegwentement tiġi kkonfiskata, biex jiġi żgurat li jkollhom aċċess għall-informazzjoni meħtieġa taħt kondizzjonijiet ċari, u li jiġu stabbiliti regoli dwar l-iskambju rapidu ta' informazzjoni ma' xulxin, b'mod spontanju jew fuq talba. F'każijiet urġenti fejn ikun hemm riskju tal-għajbien tal-proprjetà, it-tweġibiet għat-talbiet ta’ informazzjoni jenħtieġ li jsiru kemm jista' jkun malajr u fi żmien tmien sigħat. Ir-rekwiżit li l-uffiċċji għall-irkupru tal-assi jittraċċaw u jidentifikaw il-mezzi strumentali, ir-rikavat jew il-proprjetà li hija jew li tista' ssir l-oġġett ta' ordni ta' ffriżar jew ta' konfiska maħruġa minn Stat Membru ieħor għandu l-għan li jiffaċilita t-tħejjija jew l-eżekuzzjoni ta' ordnijiet ta' ffriżar minn Stati Membri oħra, iżda ma jimplikax obbligu li tali ordnijiet jiġu rikonoxxuti skont ir-Regolament (UE) 2018/1805.

(18)

Sabiex iwettqu investigazzjonijiet effettivi għat-traċċar tal-assi, u biex jirrispondu malajr għat-talbiet transfruntieri, l-uffiċċji għall-irkupru tal-assi jenħtieġ li jkollhom aċċess għall-informazzjoni li hija meħtieġa biex jistabbilixxu l-eżistenza, is-sjieda jew il-kontroll ta' proprjetà li hija jew li tista' ssir is-suġġett ta' ordni ta' ffriżar jew ta' konfiska. Għalhekk, jenħtieġ li l-uffiċċji għall-irkupru tal-assi jkollhom aċċess immedjat u dirett għad-data rilevanti bħall-informazzjoni dwar il-proprjetà immobbli, iċ-ċittadinanza nazzjonali u r-reġistri tal-popolazzjoni, il-bażijiet tad-data kummerċjali u l-bażijiet tad-data ta' vetturi minbarra l-aċċess għall-informazzjoni tal-kontijiet tal-bank skont id-Direttiva (UE) 2019/1153 tal-Parlament Ewropew u tal-Kunsill (11) u s-sjieda benefiċjarja skont id-Direttiva (UE) 2015/849 tal-Parlament Ewropew u tal-Kunsill (12). Jenħtieġ li l-aċċess u t-tiftix jiġu kkunsidrati bħala immedjati u diretti, fost l-oħrajn, meta l-awtoritajiet nazzjonali li joperaw reġistru jibagħtu b'mod rapidu l-informazzjoni permezz ta' mekkaniżmu awtomatizzat lill-awtoritajiet kompetenti, dment li l-ebda istituzzjoni intermedjarja ma tkun tista' tinterferixxi fir-rigward tad-data mitluba jew l-informazzjoni li għandha tiġi pprovduta. Barra minn hekk, jenħtieġ li l-Istati Membri jiżguraw li l-uffiċċji għall-irkupru tal-assi jkollhom aċċess rapidu, jew immedjatament u direttament jew fuq talba, għal informazzjoni oħra li tista' tkun ta' valur biex tiġi identifikata l-proprjetà rilevanti, bħal informazzjoni dwar ipoteki u self, data doganali jew informazzjoni dwar trasferimenti telegrafiċi u bilanċi tal-kontijiet, kif ukoll data fiskali, data tas-sigurtà soċjali u informazzjoni dwar l-infurzar tal-liġi. Fir-rigward tad-data fiskali, id-data tas-sigurtà soċjali nazzjonali u l-informazzjoni dwar l-infurzar tal-liġi, jenħtieġ li jkun possibbli għall-Istati Membri li jiddeċiedu li jagħtu aċċess għal tali informazzjoni lill-uffiċċji għall-irkupru tal-assi abbażi ta' talbiet motivati, u li jippermettu lill-awtoritajiet li jkollhom tali informazzjoni jiċħdu l-aċċess għal tali informazzjoni taħt ċerti kundizzjonijiet, sabiex tiġi żgurata l-integrità tal-investigazzjonijiet, il-kunfidenzjalità tal-informazzjoni pprovduta minn Stat Membru ieħor jew pajjiż terz kif ukoll il-proporzjonalità tat-talbiet għal informazzjoni fir-rigward tal-interessi leġittimi ta' persuna fiżika jew ġuridika. Jenħtieġ li l-aċċess għall-informazzjoni jkun soġġett għal salvagwardji speċifiċi li jipprevjenu l-użu ħażin tad-drittijiet ta' aċċess. Tali salvagwardji jikkomplementaw ir-rekwiżiti li jipprevedu reġistrazzjonijiet tal-attivitajiet ta’ aċċess u ta’ tfittxija skont l-Artikolu 25 tad-Direttiva (UE) 2016/680 tal-Parlament Ewropew u tal-Kunsill (13). L-għoti ta’ aċċess għal dik l-informazzjoni ma jimpedixxix lill-Istati Membri milli jagħmlu l-aċċess soġġett għal salvagwardji proċedurali kif stabbilit skont il-liġi nazzjonali filwaqt li jittieħed kont xieraq tal-ħtieġa li l-uffiċċji għall-irkupru tal-assi jkunu jistgħu jwieġbu malajr għat-talbiet transfruntieri. L-implimentazzjoni tas-salvagwardji proċedurali jenħtieġ li ma taffettwax il-kapaċità tal-uffiċċji għall-irkupru tal-assi li jwieġbu għat-talbiet minn Stati Membri oħra, speċjalment fil-każ ta' talbiet urġenti.

(19)

Biex tiġi żgurata s-sigurtà tal-informazzjoni kondiviża bejn l-uffiċċji għall-irkupru tal-assi, jenħtieġ li l-uffiċċji għall-irkupru tal-assi kollha jkun jista' jkollhom aċċess għall-Applikazzjoni ta' Network għall-Iskambju Sikur ta' Informazzjoni (SIENA), ġestita mill-Europol f'konformità mar-Regolament (UE) 2016/794 tal-Parlament Ewropew u tal-Kunsill (14). SIENA jew, fejn xieraq fuq bażi eċċezzjonali, kanali siguri oħrajn, jenħtieġ li jiġu użati għall-komunikazzjoni kollha bejn l-uffiċċji għall-irkupru tal-assi skont din id-Direttiva. Jista' jkun neċessarju li jintuża kanal sigur ieħor f'każijiet eċċezzjonali, pereżempju fejn l-urġenza tat-talba għal informazzjoni tirrikjedi l-użu temporanju ta' kanal ta' komunikazzjoni ieħor jew fejn l-iskambju ta' informazzjoni jirrikjedi l-involviment ta' pajjiżi terzi jew organizzazzjonijiet internazzjonali jew fejn ikun hemm raġunijiet oġġettivi biex wieħed jemmen li tali involviment ser ikun meħtieġ fi stadju aktar tard. Jenħtieġ li r-referenza għal SIENA tinqara bħala li tapplika wkoll għas-suċċessur tagħha, fil-każ li SIENA tiġi sostitwita.

(20)

Meta titqies il-ħeffa li biha l-kriminali jittrasferixxu l-assi kriminali bejn il-ġuriżdizzjonijiet, jenħtieġ li l-Istati Membri jiżguraw li l-uffiċċji għall-irkupru tal-assi jiskambjaw malajr l-informazzjoni meħtieġa għat-twettiq tal-kompiti tagħhom. F'każijiet eċċezzjonali, jista' jkun oġġettivament ġustifikat li l-uffiċċji għall-irkupru tal-assi jirrifjutaw li jipprovdu informazzjoni lil uffiċċju għall-irkupru tal-assi rikjedenti ieħor jekk dan ikun ta' ħsara għall-interessi tas-sigurtà nazzjonali tal-Istat Membru li fih ikun jinstab l-uffiċċju għall-irkupru tal-assi li li jkun irċieva t-talba, jipperikola l-investigazzjonijiet li jkunu għaddejjin jew l-operazzjonijiet ta' intelligence kriminali, ikun ta' theddida imminenti għall-ħajja jew għall-integrità fiżika ta' persuna jew ikun b'mod ċar sproporzjonat jew irrilevanti fir-rigward tal-finijiet li għalihom tkun intalbet l-informazzjoni. Meta jivvalutaw il-konformità mal-prinċipji tan-neċessità u tal-proporzjonalità, l-uffiċċji għall-irkupru tal-assi jenħtieġ li jeżerċitaw diliġenza dovuta, inkluż fir-rigward tar-rispett tad-drittijiet fundamentali.

(21)

L-iffriżar u l-konfiska skont din id-Direttiva huma kunċetti awtonomi, li jenħtieġ li ma jipprevjenux lill-Istati Membri milli jimplimentaw din id-Direttiva bl-użu ta' strumenti li, f'konformità mal-liġi nazzjonali, jitqiesu bħala sanzjonijiet jew tipi oħra ta' miżuri.

(22)

Il-konfiska twassal għaċ-ċaħda definittiva minn proprjetà. Madankollu, il-preservazzjoni tal-proprjetà tista' tkun prerekwiżit għall-konfiska u ħafna drabi hija essenzjali għall-eżekuzzjoni effettiva ta' ordni ta' konfiska. Il-proprjetà tiġi ppreservata permezz ta' ffriżar. Sabiex jiġi evitat l-għajbien tal-proprjetà, jenħtieġ li l-awtoritajiet kompetenti għall-Istati Membri, li jistgħu jinkludu uffiċċji għall-irkupru tal-assi, jingħataw is-setgħa li jieħdu azzjoni immedjata, li tista' tkun fis-sura ta' ordni, biex jiksbu dik il-proprjetà sakemm tinħareġ ordni ta' ffriżar. Minħabba n-natura eċċezzjonali ta' din l-azzjoni, jenħtieġ li l-Istati Membri jillimitaw il-validità temporanja tagħha.

(23)

Meta l-awtoritajiet kompetenti ma jkunux jistgħu jieħdu azzjoni immedjata, jenħtieġ li l-Istati Membri jippermettu lill-uffiċċji għall-irkupru tal-assi jieħdu din l-azzjoni. Tali azzjoni tista' tkun neċessarja b'mod partikolari meta uffiċċju għall-irkupru tal-assi, wara talba minn uffiċċju għall-irkupru tal-assi fi Stat Membru ieħor, ikun ittraċċa u identifika assi li jistgħu jisparixxu malajr ħafna, bħal kriptoassi, u meta l-awtoritajiet kompetenti tal-Istati Membru li fih ikun jinstab l-uffiċċju għall-irkupru tal-assi li jkun irċieva t-talba ma jkunux jistgħu jieħdu azzjoni immedjata fin-nuqqas ta' investigazzjoni kriminali f'dak l-Istat Membru. Jenħtieġ li l-uffiċċji għall-irkupru tal-assi jkunu jistgħu jiżguraw l-assi sakemm tkun possibbli li tinħareġ ordni ta' ffriżar Ewropea skont ir-Regolament (UE) 2018/1805.

(24)

Minħabba l-interferenza fil-liġi għall-proprjetà kkawżata mill-ordnijiet ta' ffriżar, jenħtieġ li dawn il-miżuri proviżorji ma jinżammux għal aktar żmien milli neċessarju biex tiġi ppreservata d-disponibbiltà tal-proprjetà bil-ħsieb ta' konfiska sussegwenti possibbli. Iż-żamma ta’ tali miżura proviżorji tista’ teħtieġ rieżami minn qorti nazzjonali sabiex jiġi żgurat li l-għan tal-prevenzjoni tal-għajbien tal-proprjetà jibqa' validu.

(25)

Jenħtieġ li l-miżuri ta' ffriżar ikunu mingħajr preġudizzju għall-possibbiltà li proprjetà speċifika titqies bħala evidenza matul il-proċedimenti, dment li fl-aħħar mill-aħħar din issir disponibbli għal eżekuzzjoni effettiva tal-ordni ta' konfiska. Fil-kuntest ta' proċedimenti kriminali, il-proprjetà tista' tiġi ffriżata wkoll bil-ħsieb tar-restituzzjoni sussegwenti possibbli tagħha jew sabiex jiġi ssalvagwardjat il-kumpens għad-dannu kkawżat minn reat kriminali.

(26)

Minbarra l-miżuri ta' konfiska li jippermettu lill-awtoritajiet iċaħħdu lill-kriminali mir- mill-mezzi strumentali jew mir-rikavat, soġġett għal kundanna finali, huwa neċessarju li tiġi permessa l-konfiska ta' proprjetà ta' valur ekwivalenti għal rikavattali mezzi strumentali jew rikavat sabiex tinqabad proprjetà ta' valur ekwivalenti għall-mezzi strumentali u għar-rikavat ta' reat, meta jkun impossibbli li jiġu kkonfiskati rikavattali mezzi strumentali u rikavat. L-Istati Membri huma liberi li jiddefinixxu l-konfiska ta' proprjetà ta' valur ekwivalenti bħala sussidjarja jew alternattiva għall-konfiska ta' rikavatmezzi strumentali u rikavat, kif xieraq f'konformità mal-liġi nazzjonali.

(27)

Meta din id-Direttiva tiġi implimentata fir-rigward tal-konfiska ta' proprjetà li l-valur tagħha jkun jikkorrispondi għall-mezzi strumentali, jenħtieġ li d-dispożizzjonijiet rilevanti jkunu applikabbli fejn, minħabba ċ-ċirkostanzi partikolari tal-każ, din il-miżura tkun proporzjonata, wara li jitqies partikolarment il-valur tal-mezzi strumentali kkonċernati. L-Istati Membri jistgħu wkoll jieħdu f'kunsiderazzjoni jekk u sa fejn il-persuna kkundannata tkun responsabbli għall-fatt li jkun impossibbli li ssir il-konfiska tal-mezzi strumentali.

(28)

Il-prattika minn persuna suspettata jew akkużata li tittrasferixxi l-proprjetà jew ir-rikavat lil parti terza kompliċi bil-ħsieb li tiġi evitata l-konfiska hija komuni u mifruxa. L-akkwist minn parti terza jirreferi għal sitwazzjonijiet fejn, pereżempju, il-proprjetà tkun ġiet akkwistata, direttament jew indirettament, bħal permezz ta' intermedjarju, mill-parti terza mingħand persuna suspettata jew akkużata, anki meta r-reat kriminali jkun twettaq f'isimha jew għall-benefiċċju tagħha, u meta persuna akkużata ma jkollhiex proprjetà li tista' tiġi kkonfiskata. Jenħtieġ li din il-konfiska tkun possibbli mill-inqas f'każijiet fejn ikun ġie stabbilit li l-partijiet terzi rilevanti kienu jafu jew kellhom ikunu jafu li l-għan tat-trasferiment jew tal-akkwist kien li tiġi evitata l-konfiska. Jekk parti terza kellha jew kellu jkollha tali għarfien jenħtieġ li jiġi evalwat abbażi ta' fatti u ċirkostanzi konkreti, inkluż li t-trasferiment twettaq mingħajr ħlas jew għal ammont sproporzjonat b'mod sinifikanti għall-valur tas-suq, li l-propjetà ġiet ittrasferita lil partijiet relatati mill-qrib jew li hija baqgħet taħt il-kontroll effettiv tal-persuna suspettata jew akkużata. Trasferimenti lil partijiet relatati mill-qrib mal-persuna suspettata jew akkużata jistgħu jinkludu trasferimenti lil membri tal-familja jew lil persuni fiżiċi li għandhom arranġamenti legali, jew kwalunkwe relazzjoni kummerċjali mill-qrib oħra, mal-persuna suspettata jew akkużata, jew trasferimenti lil entitajiet ġuridiċi li fihom il-persuna suspettata jew akkużata jew membru tal-familja jkunu jinsabu fil-korpi amministrattivi, maniġerjali jew superviżorji. Jenħtieġ li r-regoli dwar il-konfiska ta' parti terza jestendu kemm għall-persuni fiżiċi kif ukoll għal dawk ġuridiċi, mingħajr preġudizzju għad-dritt tal-partijiet terzi li jinstemgħu, inkluż id-dritt li jitolbu s-sjieda tal-proprjetà kkonċernata. Fi kwalunkwe każ, jenħtieġ li d-drittijiet ta' partijiet terzi in bona fide jkunu protetti skont il-liġi nazzjonali.

(29)

L-organizzazzjonijiet kriminali jinvolvu ruħhom f'firxa wiesgħa ta' attivitajiet kriminali. Sabiex l-attivitajiet kriminali organizzati jiġu indirizzati b'mod effettiv, huwa possibbli li jkun hemm sitwazzjonijiet fejn ikun xieraq li kundanna kriminali għal reat kriminali li jista' jwassal għal benefiċċju ekonomiċu tiġi segwita mill-konfiska mhux biss tal-proprjetà assoċjata ma' reat speċifiku, inkluż ir-rikavat minn reat jew il-mezzi strumentali tiegħu, iżda wkoll ta' proprjetà addizzjonali li l-qorti tiddetermina li tkun derivata minn imġiba kriminali. Jenħtieġ li tali konfiska estiża tkun possibbli meta l-qorti tkun sodisfatta li l-proprjetà inkwistjoni tkun irriżultat minn imġiba kriminali, mingħajr l-ebda rekwiżit ta' kundanna għal tali imġiba kriminali. L-imġiba kriminali rilevanti tista' tikkonsisti fi kwalunkwe tip ta' reat. Ir-reati kriminali individwali ma għandhomx għalfejn jiġu ppruvati, iżda l-qorti trid tkun sodisfatta li l-proprjetà inkwistjoni tkun ġejja minn dik l-imġiba kriminali. F'dan il-kuntest, il-qorti għandha tqis iċ-ċirkostanzi speċifiċi tal-każ, inkluż il-fatti u l-evidenza disponibbli li abbażi tagħhom tkun tista' tittieħed deċiżjoni dwar il-konfiska estiża. Il-fatt li l-proprjetà tal-persuna tkun sproporzjonata mad-dħul legali ta’ dik il-persuna jista' jkun fost il-fatti li jwasslu għal konklużjoni mill-qorti li l-proprjetà tkun ġejja minn imġiba kriminali. L-Istati Membri jistgħu jistabbilixxu wkoll rekwiżit għal ċertu perjodu ta' żmien li fih ikun ppossibbli li l-proprjetà tista' titqies li tkun oriġinat minn imġiba kriminali.

(30)

Jenħtieġ li l-konfiska tkun possibbli meta kundanna finali mhix possibbli minħabba l-mard, il-ħarba jew il-mewt tal-persuna suspettata jew akkużata. Jenħtieġ li l-konfiska tkun possibbli wkoll meta l-perjodi ta’ preskrizzjoni preskritti skont il-liġi nazzjonali għar-reati kriminali rilevanti jkunu ta’ inqas minn 15-il sena jew ikunu skadew wara li l-proċedimenti kriminali jkunu bdew. Jenħtieġ li l-konfiska f’dawn il-każijiet tkun permessa biss meta seta’ kien possibbli għall-proċedimenti kriminali li jwasslu għal kundanna finali għal reat kriminali fin-nuqqas ta’ tali ċirkostanzi, mill-inqas għal reati li jistgħu jwasslu, direttament jew indirettament, għal benefiċċju ekonomiku sostanzjali, u fejn il-qorti tkun sodisfatta li l-mezzi strumentali, ir-rikavat jew il-proprjetà li għandhom jiġu kkonfiskati huma derivati mir-reat kriminali jew marbuta direttament jew indirettament miegħu. F'każijiet ta' mard jew ħarba, jenħtieġ li l-eżistenza ta' proċedimenti in absentia fi Stati Membri tkun biżżejjed biex ikun hemm konformità mal-obbligu li tippermetti tali konfiska. Huwa importanti li jitfakkar li l-korpi internazzjonali indikaw il-potenzjal ta’ konfiska fin-nuqqas ta' kundanna biex jiġu indirizzaw l-ostakli għall-konfiska ta' qligħ illeċitu minħabba l-immunità u l-amnestija.

(31)

Għall-finijiet ta' din id-Direttiva, jenħtieġ li l-mard jinftiehem bħala l-inkapaċità tal-persuna suspettata jew akkużata li tattendi l-proċedimenti kriminali għal perjodu estiż, u li minħabba f'hekk ikun hemm riskju li l-limiti ta' żmien stabbiliti fil-liġi nazzjonali għar-responsabbiltà kriminali jiskadu u dawk il-proċedimenti ma jkunux jistgħu jitkomplew.

(32)

F'sitwazzjonijiet fejn il-miżuri ta' konfiska fl-Artikoli 12 sa 15 ma jiġux applikati għal raġunijiet legali jew fattwali ddeterminati mil-liġi nazzjonali, jenħtieġ li xorta jkun possibbli li tiġi kkonfiskata proprjetà li tkun ġiet identifikata jew, fejn is-sistema legali nazzjonali tirrikjedi l-iffriżar, iffriżata fil-kuntest ta' investigazzjoni fir-rigward ta' reat kriminali abbażi ta' indikazzjonijiet li l-proprjetà setgħet tiġi derivata minn imġiba kriminali. Jenħtieġ li dik il-proprjetà tiġi kkonfiskata meta l-qorti tkun sodisfatta li l-proprjetà tkun derivata minn imġiba kriminali mwettqa fil-qafas ta' organizzazzjoni kriminali u fejn din l-imġiba tista' twassal, direttament jew indirettament, għal benefiċċju ekonomiku sostanzjali. Meta jistabbilixxu jekk imġiba kriminali tistax twassal għal benefiċċju ekonomiku sostanzjali, l-Istati Membri jistgħu jqisu ċ-ċirkostanzi rilevanti kollha inkluż il-modus operandi, pereżempju jekk xi kundizzjoni għar-reat tkun li dan twettaq fil-kuntest ta' kriminalità organizzata jew bil-ħsieb li jiġu ġġenerati profitti regolari minn reati kriminali. Jenħtieġ li l-Istati Membri jippermettu l-konfiska ta' dak il-ġid mhux ġustifikat meta l-investigazzjoni li fiha tkun ġiet identifikata l-proprjetà tikkonċerna reat li jaqa' fil-kamp ta' applikazzjoni ta' din id-Direttiva li jkun punibbli biċ-ċaħda tal-libertà ta' massimu ta' mill-inqas erba' snin. Dik il-kundizzjoni tiżgura li l-possibbiltà ta' konfiska ta' ġid mhux ġustifikat tinħoloq f'investigazzjonijiet kriminali ta' reati kriminali li jissodisfaw ċertu limitu ta' serjetà.

(33)

Meta japplikaw ir-regoli nazzjonali li jimplimentaw din id-Direttiva, l-awtoritajiet kompetenti nazzjonali jistgħu jagħżlu li ma jordnawx jew jeżegwixxu konfiska ta' ġid mhux ġustifikat meta, fil-każ inkwistjoni, l-applikazzjoni tar-regoli stabbiliti f'dik id-Direttiva tkun manifestament irraġonevoli jew sproporzjonata. L-Istati Membri jistgħu jistabbilixxu wkoll rekwiżit għal ċertu perjodu ta' żmien li fih il-proprjetà tista' titqies li tkun oriġinat minn dik l-imġiba kriminali. Jenħtieġ li l-Istati Membri jiżguraw li d-drittijiet proċedurali xierqa tal-persuna affettwata jiġu rrispettati. Jenħtieġ li d-drittijiet ta' partijiet terzi in bona fide jkunu protetti skont il-liġi nazzjonali.

(34)

Minkejja li l-fatt li r-reati individwali jiġu ppruvati ma għandux ikun prekundizzjoni għall-konfiska ta' ġid mhux ġustifikat, irid ikun hemm biżżejjed fatti u ċirkostanzi biex il-qorti tkun sodisfatta li l-proprjetà inkwistjoni tkun derivata minn imġiba kriminali. L-imġiba kriminali rilevanti tista' tikkonsisti fi kwalunkwe tip ta' reat imwettaq fil-qafas ta' organizzazzjoni kriminali u li jista' jwassal għal benefiċċju ekonomiku sostanzjali, u b'hekk ikun ta' natura serja. Meta jkunu qegħdin jiddeterminaw jekk il-proprjetà għandhiex tiġi kkonfiskata, jenħtieġ li l-qrati nazzjonali jqisu ċ-ċirkostanzi rilevanti kollha tal-każ, inkluż l-evidenza disponibbli u l-fatti speċifiċi, bħall-fatt li l-valur tal-proprjetà ikun sostanzjalment sproporzjonat għall-introjtu legali tal-persuna. Fattur rilevanti ieħor jista’ jkun in-nuqqas ta’ sors leċitu plawżibbli tal-proprjetà, peress li l-provenjenza ta’ proprjetà akkwistata legalment normalment tista’ tiġi identifikata. Il-konnessjoni tal-persuna ma’ attivitajiet ta’ organizzazzjoni kriminali tista’ wkoll tkun ta’ rilevanza, kif jistgħu jkunu ċirkostanzi bħas-sitwazzjoni li fiha tkun instabet il-proprjetà jew indikazzjonijiet ta' parteċipazzjoni f'attivitajiet kriminali. Jenħtieġ li l-valutazzjoni ssir fuq bażi ta' każ b'każ skont iċ-ċirkostanzi tal-każ. Jenħtieġ li jkun possibbli għall-Istati Membri li jiddeċiedu li jippermettu l-konfiska ta' ġid mhux ġustifikat meta l-proċedimenti kriminali jitwaqqfu jew li tiġi ordnata tali konfiska separatament mill-proċedimenti kriminali għar-reat.

(35)

Din id-Direttiva ma żżommx lill-Istati Membri milli jadottaw miżuri li jippermettu l-konfiska ta' ġid mhux ġustifikat għal reati jew ċirkostanzi oħra. I s-suġġett ta' din id-Direttiva huwa limitat għal proċedimenti f'materji kriminali, u għaldaqstant din id-Direttiva ma tapplikax għal miżuri ta' konfiska fi proċedimenti f'materji ċivili li l-Istati Membri setgħu implimentaw.

(36)

Jenħtieġ li t-traċċar u l-identifikazzjoni ta' proprjetà li trid tiġi ffriżata u kkonfiskata jkunu possibbli anke wara kundanna definittiva għal reat kriminali, jew wara proċedimenti li jinvolvu konfiska mhux ibbażata fuq kundanna. Dak l-obbligu ma jwaqqafx lill-Istati Membri milli jistabbilixxu limiti ta' żmien raġonevoli wara kundanna finali jew deċiżjoni finali fi proċedimenti li jinvolvu konfiska mhux ibbażata fuq kundanna, li wara l-iskadenza tagħha t-traċċar u l-identifikazzjoni ma jibqgħux possibbli.

(37)

Meta jitqies li l-attivitajiet kriminali jistgħu jikkawżaw ħsara kbira lill-vittmi, huwa essenzjali li jiġu protetti d-drittijiet tagħhom, inkluż id-drittijiet għall-kumpens u r-restituzzjoni. Għalhekk, jenħtieġ li l-Istati Membri jieħdu miżuri xierqa biex jiżguraw li t-talbiet tal-vittmi għal restituzzjoni u kumpens kontra l-persuna li tkun soġġetta għal miżura ta' konfiska bħala riżultat ta' reat kriminali jitqiesu fil-proċedimenti tat-traċċar, l-iffriżar u l-konfiska tal-assi, inkluż f'każijiet transfruntiera. Barra minn hekk, sabiex jiġi ffaċilitat il-kumpens u r-restituzzjoni ta' proprjetà lill-vittmi, huwa neċessarju li jiġi ffaċilitat it-traċċar ta' proprjetà li tista' ssir l-oġġett ta' talbiet bħal dawn kif ukoll l-iskambju ta' informazzjoni bejn l-awtoritajiet kompetenti għat-traċċar tal-assi u l-awtoritajiet kompetenti biex jiddeċiedu dwar talbiet minn vittmi jew biex jeżegwixxu tali deċiżjonijiet.

(38)

L-użu mill-ġdid soċjali tal-proprjetà kkonfiskata jibgħat messaġġ viżibbli lis-soċjetà inġenerali rigward l-importanza ta' valuri bħall-ġustizzja u l-legalità, jafferma mill-ġdid il-prevalenza tal-istat tad-dritt f’-komunitajiet affettwati b'mod aktar dirett mill-kriminalità organizzata, u jibni r-reżiljenza ta' dawk il-komunitajiet kontra l-infiltrazzjoni kriminali fin-nisġa soċjali u ekonomika tagħhom, kif osservat f’dawk l-Istati Membri li diġà adottaw tali miżuri ta’ użu mill-ġdid soċjali. Għalhekk, l-Istati Membri huma mħeġġa jieħdu l-miżuri neċessarji biex jippermettu l-possibbiltà li jużaw il-proprjetà kkonfiskata għal skopijiet ta' interess pubbliku jew skopijiet soċjali, sabiex il-proprjetà kkonfiskata tkun tista' tinżamm bħala proprjetà tal-Istat għall-finijiet tal-ġustizzja, l-infurzar tal-liġi, is-servizz pubbliku, soċjali jew ekonomiċi jew biex jittrasferixxu tali proprjetà kkonfiskata lill-awtoritajiet mill-muniċipalità jew ir-reġjun fejn tkun tinsab sabiex dawk l-awtoritajiet ikunu jistgħu jużawha għal dawn il-finijiet, inkluż għal assenjazzjoni lil organizzazzjonijiet li jwettqu xogħol ta' interess soċjali. L-użu ta' proprjetà kkonfiskata għal dawn il-finijiet huwa mingħajr preġudizzju għall-awtonomija baġitarja tal-Istati Membri.

(39)

Jenħtieġ ukoll li jkun possibbli għall-Istati Membri li jużaw il-proprjetà kkonfiskata biex jikkontribwixxu għal mekkaniżmi li jappoġġaw lil pajjiżi terzi affettwati minn sitwazzjonijiet li b'reazzjoni għalihom ikunu ġew adottati miżuri restrittivi tal-Unjoni, sa fejn ir-reat imwettaq ikun direttament jew indirettament marbut ma’ dik is-sitwazzjoni. Jenħtieġ li l-Kummissjoni tiffaċilita l-kooperazzjoni bejn l-Istati Membri u l-pajjiżi terzi u tista’ tipprovdi gwida dwar il-proċeduri u l-mekkaniżmi finanzjarji l-aktar effettivi disponibbli biex jappoġġaw lil dawn il-pajjiżi terzi bil-ħsieb li jiġi promoss l-użu ta' mezzi strumentali, rikavat jew proprjetà kkonfiskati għal dak l-għan.

(40)

L-Istati Membri huma mħeġġa jieħdu miżuri xierqa biex jipprevjenu li l-proprjetà tiġi akkwistata, direttament jew indirettament, matul id-disponiment tagħha permezz ta' ordni ta' konfiska, minn persuni kkundannati fil-proċedimenti kriminali li fihom il-proprjetà tkun ġiet iffriżata. Tali miżuri jistgħu jkunu limitati għal proprjetà li taqbeż ċertu valur u jistgħu jinkludu l-esklużjoni ta' ċerti tipi ta' entitajiet milli jipparteċipaw fil-bejgħ tal-proprjetà, ir-rekwiżit ta’ dokumentazzjoni mix-xerrej jew il-valutazzjoni ta’ kwalunkwe rabta tax-xerrej mal-persuna kkundannata. L-Istati Membri jistgħu japplikaw dawn il-miżuri wkoll għall-bejgħ ta' proprjetà ffriżata.

(41)

Biex jiġi żgurat li proprjetà li tkun jew tista' ssir l-oġġett ta’ ordni ta' ffriżar jew ta' konfiska żżomm il-valur ekonomiku tagħha, jenħtieġ li l-Istati Membri jistabbilixxu miżuri ta' ġestjoni effettivi. Dawk il-miżuri jinkludu l-ġestjoni effiċjenti ta' entitajiet, bħal impriżi, li jenħtieġ li jiġu ppreservati bħala negozju avvjat, filwaqt li jittieħdu l-miżuri neċessarji biex jiġi żgurat li l-persuna suspettata jew akkużata ma tibbenefikax direttament jew indirettament mill-operazzjonijiet ta’ tali entità li jkunu għaddejjin jew, fejn xieraq, mill-miżuri ta' superviżjoni fir-rigward tal-kontroll ta’ tali entità.

(42)

Meta ġustifikat min-natura tal-proprjetà, inkluż il-valur tagħha jew il-ħtieġa għal kundizzjonijiet speċifiċi ta' ġestjoni jenħtieġ li titwettaq valutazzjoni ta' kif jiġu minimizzati l-kostijiet tal-ġestjoni u jiġi ppreservat il-valur tal-proprjetà meta titħejja l-ordni ta' ffriżar jew, l-aktar tard, mingħajr dewmien żejjed wara, l-eżekuzzjoni tagħha. L-objettiv tal-valutazzjoni huwa li tipprovdi lill-awtoritajiet kompetenti bil-kunsiderazzjonijiet rilevanti li għandhom jitqiesu qabel, matul jew wara l-adozzjoni jew l-eżekuzzjoni tal-ordni ta' ffriżar. L-Istati Membri jistgħu jipprovdu gwida dwar kif titwettaq tali valutazzjoni b'kont meħud taċ-ċirkostanzi tal-proprjetà li trid tiġi ffriżata u filwaqt li jiġi żgurat li l-valutazzjoni ma tipperikolax l-eżekuzzjoni f'waqtha tal-ordni ta' ffriżar.

(43)

F'sitwazzjonijiet fejn huwa raġonevolment preżunt li l-proprjetà ffriżata titħassar jew tiddeprezza malajr, jiġifieri li l-kostijiet tal-manutenzjoni tagħha jkunu sproporzjonati għall-valur mistenni tagħha fil-mument tal-konfiska, li jkun diffiċli wisq biex tiġi amministrata jew li tkun tista' tiġi sostitwita faċilment, l-Istati Membri jenħtieġ li jippermettu l-bejgħ ta' tali proprjetà qabel ordni ta' konfiskafinali. F'konformità mal-liġi nazzjonali, id-deċiżjoni dwar il-bejgħ ta' proprjetà ta' natura speċifika tista' tkun soġġetta għal approvazzjoni minn qabel minn awtorità kompetenti nazzjonali. Qabel ma jieħdu tali deċiżjoni, jenħtieġ li l-Istati Membri jiżguraw li l-persuna affettwata, għajr f'każijiet fejn il-persuna affettwata tkun ħarbet jew ma tkunx tista' tinstab, tiġi nnotifikata u, għajr f'każijiet ta' urġenza, tingħata l-opportunità li tinstema' qabel il-bejgħ. Jenħtieġ li l-Istati Membri jipprevedu l-possibbiltà ta' appell minn ordni għal bejgħ interlokutorju. Jenħtieġ li l--Istati Membri jipprevedu l-possibbiltà li qorti tissospendi l-eżekuzzjoni ta' tali ordni, pereżempju fejn meħtieġ għas-salvagwardja tal-interessi leġittimi tal-persuna affettwata, b'mod partikolari fejn ikun hemm riskju ta' dannu irreparabbli. L-Istati Membri jistgħu wkoll jipprevedu l-possibiltà li jagħtu effett sospensiv lill-appell bil-liġi. Jenħtieġ li-Istati Membri jkunu jistgħu jirrikjedu l-ħlas tal-kostijiet tal-ġestjoni tal-proprjetà ffriżata mis-sid jew mis-sid benefiċjarju tal-proprjetà, pereżempju bħala alternattiva għall-ordni ta' bejgħ interlokutorju, u fil-każ ta' kundanna finali.

(44)

Jenħtieġ li l-Istati Membri jistabbilixxu jew jaħtru awtorità kompetenti waħda jew aktar biex jiffunzjonaw bħala uffiċċji għall-ġestjoni tal-assi bil-għan li jistabbilixxu awtoritajiet speċjalizzati inkarigati mill-ġestjoni ta' proprjetà ffriżata u kkonfiskata sabiex jimmaniġġjaw b'mod effettiv il-proprjetà ffriżata qabel il-konfiska u jippreservaw il-valur tagħha, sakemm tittieħed deċiżjoni finali dwar il-konfiska u d-disponiment tal-proprjetà abbażi ta' tali deċiżjoni. Mingħajr preġudizzju għall-istrutturi amministrattivi interni tal-Istati Membri, l-uffiċċji għall-ġestjoni tal-assi jenħtieġ li jkunu jew l-unika awtorità li timmaniġġja l-proprjetà ffriżata u kkonfiskata, jew jenħtieġ li jipprovdu appoġġ lill-atturi deċentralizzati skont l-istrutturi ta' ġestjoni nazzjonali, u jappoġġaw lill-awtoritajiet rilevanti fl-ippjanar. Din id-Direttiva ma tiddeterminax in-natura legali jew istituzzjonali tal-uffiċċji għall-ġestjoni tal-assi, u hija mingħajr preġudizzju għas-sistemi istituzzjonali fl-Istati Membri.

(45)

Din id-Direttiva tirrispetta d-drittijiet fundamentali u tosserva l-prinċipji rikonoxxuti mill-Karta tad-Drittijiet Fundamentali tal-Unjoni Ewropea (“il-Karta”) u l-Konvenzjoni Ewropea għall-Protezzjoni tad-Drittijiet tal-Bniedem u tal-Libertajiet Fundamentali (“il-KEDB”), kif interpretati fil-ġurisprudenza tal-Qorti Ewropea tad-Drittijiet tal-Bniedem. Din id-Direttiva jenħtieġ li tiġi implimentata f'konformità ma' dawk id-drittijiet u l-prinċipji.

(46)

L-ordnijiet ta' ffriżar u ta' konfiska jaffettwaw b'mod sostanzjali d-drittijiet tal-persuni suspettati u akkużati, u f'ċerti każijiet id-dritt ta' partijiet terzi jew persuni oħra li ma jkunux qed jiġu pproċessati. Din id-Direttiva jenħtieġ li tipprevedi salvagwardji u rimedji ġudizzjarji speċifiċi sabiex tiġi ggarantita l-protezzjoni tad-drittijiet fundamentali ta’ tali persuni fl-implimentazzjoni ta' din id-Direttiva f'konformità mad-dritt għal proċess ġust, id-dritt għal rimedju effettiv u l-preżunzjoni tal-innoċenza kif minquxa fl-Artikoli 47 u 48 tal-Karta.

(47)

L-ordnijiet ta' ffriżar, ta' konfiska u ta' bejgħ interlokutorju jenħtieġ li jiġu kkomunikati lill-persuna affettwata mingħajr dewmien żejjed. Madankollu, jenħtieġ li l-Istati Membri jkunu jistgħu jipprevedu dritt għall-awtoritajiet kompetenti li jipposponu l-komunikazzjoni tal-ordnijiet ta' ffriżar lill-persuna affettwata minħabba l-ħtiġijiet tal-investigazzjoni. L-għan tal-komunikazzjoni ta' tali ordnijiet huwa, fost l-oħrajn, li l-persuna affettwata tkun tista' tikkontestahom. Għalhekk, jenħtieġ li tali komunikazzjoni, bħala regola ġenerali, tindika r-raġuni jew ir-raġunijiet għall-ordni kkonċernata. Meta l-identità jew il-post fejn tinsab persuna affettwata ma jkunx magħruf jew meta komunikazzjoni lil kull waħda mill-persuni affettwati tkun tinvolvi piż sproporzjonat fuq awtorità kompetenti, jenħtieġ li jkun possibbli biex tikkomunika permezz ta' avviż pubbliku.

(48)

Il-persuna affettwata jenħtieġ li jkollha l-possibbiltà effettiva li tikkontesta ordnijiet ta' ffriżar, ta' konfiska u ta' bejgħ interlokutorju. Fil-każ ta' ordnijiet ta' konfiska fejn ikunu preżenti l-elementi kollha tar-reat kriminali iżda kundanna kriminali tkun impossibbli, il-konvenut jenħtieġ li jkollu l-possibbiltà li jinstema' ma tinħareġ l-ordni, fejn possibbli. Fil-każ ta' ordnijiet ta' konfiska skont id-dispożizzjonijiet dwar il-konfiska estiża u l-konfiska ta' ġid mhux ġustifikat, iċ-ċirkostanzi li jistgħu jiġu kkontestati mill-persuna affettwata meta tikkontesta l-ordni ta' konfiska quddiem qorti jenħtieġ li jinkludu wkoll fatti speċifiċi u evidenza disponibbli li abbażi tagħhom il-proprjetà kkonċernata titqies bħala proprjetà li tkun ġejja minn imġiba kriminali.

(49)

Meta jimplimentaw din id-Direttiva, l-Istati Membri jistgħu jipprevedu li, f'ċirkostanzi eċċezzjonali, il-konfiska m'għandhiex tiġi ordnata jew eżegwita, sa fejn din, f'konformità mal-liġi nazzjonali, tkun tirrappreżenta tbatija żejda għall-persuna affettwata, abbażi taċ-ċirkostanzi tal-każ individwali rispettiv.

(50)

Filwaqt li l-Istati Membri huma obbligati jiżguraw li l-persuni li l-proprjetà tagħhom tkun affettwata mill-miżuri previsti f'din id-Direttiva jkollhom id-dritt ta' aċċess għas-servizzi ta' avukat matul il-proċedimenti ta' ffriżar u ta' konfiska, din id-Direttiva ma taffettwax ir-regoli applikabbli għall-għoti mingħajr ħlas ta’ għajnuna legali.

(51)

Jenħtieġ li din id-Direttiva tiġi implimentata mingħajr preġudizzju għad-Direttivi 2010/64/UE (15), 2012/13/UE (16), 2012/29/UE (17), 2013/48/UE (18), 2014/60/UE (19), (UE) 2016/343 (20), (UE) 2016/800 (21) u (UE) 2016/1919 tal-Parlament Ewropew u tal-Kunsill. (22).

(52)

Huwa partikolarment importanti li tiġi żgurata l-protezzjoni tad-data personali, f'konformità mal-liġi tal-Unjoni, b'rabta mal-ipproċessar tad-data skont din id-Direttiva. Id-dispożizzjonijiet ta' din id-Direttiva għalhekk jenħtieġ li jiġu allinjati mad-Direttiva (UE) 2016/680. B'mod partikolari, jenħtieġ li jiġi speċifikat li kwalunkwe data personali skambjata mill-uffiċċji għall-irkupru tal-assi għandha tibqa' limitata għall-kategoriji tad-data elenkati fit-Taqsima B, il-punt 2, tal-Anness II tar-Regolament (UE) 2016/794. Id-Direttiva (UE) 2016/680 tapplika għall-ipproċessar ta' data personali mill-awtoritajiet nazzjonali kompetenti, b'mod partikolari l-uffiċċji għall-irkupru tal-assi, għall-finijiet ta' din id-Direttiva.

(53)

Huwa partikolarment importanti li tiġi żgurata l-protezzjoni tad-data personali, f'konformità mal-liġi tal-Unjoni, b'rabta mal-iskambji kollha ta' informazzjoni skont din id-Direttiva. Għal dak l-għan, sa fejn jikkonċerna l-ipproċessar ta' data personali għall-finijiet tal-prevenzjoni, l-investigazzjoni, id-detezzjoni jew il-prosekuzzjoni ta' reati kriminali jew l-eżekuzzjoni ta' pieni kriminali, ir-regoli dwar il-protezzjoni tad-data kif stipulati fid-Direttiva (UE) 2016/680 huma applikabbli fir-rigward tal-miżuri meħuda skont din id-Direttiva. Id-Direttiva (UE) 2016/680 tistabbilixxi r-regoli relatati mal-protezzjoni ta' persuni fiżiċi fir-rigward tal-ipproċessar ta' data personali mill-awtoritajiet kompetenti għall-finijiet tal-prevenzjoni, l-investigazzjoni, id-detezzjoni jew il-prosekuzzjoni ta' reati kriminali jew l-eżekuzzjoni ta' pieni kriminali, f'konformità ma' sett ta' prinċipji relatati mal-ipproċessar ta' data personali, b'mod partikolari l-legalità, il-ġustizzja u t-trasparenza, il-limitazzjoni tal-iskop, il-minimizzazzjoni tad-data, il-preċiżjoni, il-limitazzjoni tal-ħżin, l-integrità u l-kunfidenzjalità, kif ukoll l-akkontabbiltà. Fejn rilevanti, b'mod partikolari fir-rigward tal-ipproċessar ta' data personali mill-uffiċċji għall-ġestjoni tal-assi għall-finijiet tal-ġestjoni tal-proprjetà, huma applikabbli r-regoli dwar il-protezzjoni tad-data kif stipulati fir-Regolament (UE) 2016/679 tal-Parlament Ewropew u tal-Kunsill (23).

(54)

Sistema ta' rkupru effettiva tirrikjedi l-isforzi maqbula ta' firxa wiesgħa ta' awtoritajiet, inkluż l-infurzar tal-liġi, inkluż l-awtoritajiet doganali, l-awtoritajiet tat-taxxa u l-awtoritajiet tal-irkupru tat-taxxa sa fejn dawn ikunu kompetenti b’rabta mal-irkupru tal-assi, l-uffiċċji għall-irkupru tal-assi, l-awtoritajiet ġudizzjarji u l-awtoritajiet għall-ġestjoni tal-assi, inkluż l-uffiċċji għall-ġestjoni tal-assi. Sabiex tiġi żgurata azzjoni koordinata mill-awtoritajiet kompetenti kollha, jeħtieġ li jiġi stabbilit approċċ aktar strateġiku għall-irkupru tal-assi u li tiġi promossa kooperazzjoni akbar bejn l-awtoritajiet rilevanti, u li tinkiseb ħarsa ġenerali ċara tar-riżultati tal-irkupru tal-assi. Huwa meħtieġ ukoll li tiġi żgurata kooperazzjoni aktar mill-qrib u aktar effettiva bejn l-uffiċċji għall-irkupru tal-assi u l-uffiċċji għall-ġestjoni tal-assi u l-kontropartijiet tagħhom fi Stati Membri oħra. Għal dak il-għan, l-Istati Membri jenħtieġ li jadottaw u jirrieżaminaw b'mod regolari strateġija nazzjonali dwar l-irkupru tal-assi biex tiggwida l-azzjonijiet fir-rigward tal-investigazzjonijiet finanzjarji, l-iffriżar u l-konfiska, il-ġestjoni ud-disponiment finali tal-mezzi strumentali, ir-rikavat jew il-proprjetà rilevanti. L-Istati Membri jistgħu jiddeċiedu dwar il-format xieraq ta' tali strateġija u jieħdu kont tal-qafas kostituzzjonali tagħhom. Din id-Direttiva jenħtieġ li tistabbilixxi l-elementi li għandhom jiġu inklużi f’tali strateġija, bħal deskrizzjoni tar-rwoli u r-responsabbiltajiet tal-awtoritajiet kompetenti kollha involuti fl-irkupru tal-assi, u l-arranġamenti għall-koordinazzjoni u l-kooperazzjoni bejniethom, mingħajr ma tiddetermina t-tip konkret ta' informazzjoni li trid tiġi inkluża f’dik l-istrateġija. Barra minn hekk, l-Istati Membri jenħtieġ li jipprovdu lill-awtoritajiet kompetenti bir-riżorsi meħtieġa biex ikunu jistgħu jwettqu l-kompiti tagħhom b'mod effettiv. L-awtoritajiet kompetenti jenħtieġ li jinftiehmu bħala l-awtoritajiet inkarigati bit-twettiq tal-kompiti kif deskritti f'din id-Direttiva u f’konformità mal-oqfsa nazzjonali.

(55)

Jenħtieġ li l-Istati Membri jiżguraw li l-uffiċċji għall-ġestjoni tal-assi, u meta jkun xieraq l-uffiċċji għall-irkupru tal-assi u awtoritajiet kompetenti oħra li jwettqu kompiti skont din id-Direttiva, ikunu jistgħu jiksbu malajr l-informazzjoni meħtieġa għall-ġestjoni effiċjenti tal-proprjetà ffriżata u kkonfiskata. Għal dak l-għan, l-Istati Membri jenħtieġ li jistabbilixxu għodod effiċjenti bħal reġistru wieħed jew aktar ta' proprjetà ffriżata u kkonfiskata skont din id-Direttiva.

(56)

Sabiex jiġu evalwati l-effettività u l-effiċjenza tal-qafas tal-irkupru tal-assi, tal-ġestjoni tal-assi u tal-konfiska, jeħtieġ li jinġabar u jiġi ppubblikat sett minimu komparabbli ta' data statistika xierqa dwar l-iffriżar, il-ġestjoni u l-konfiska tal-proprjetà.

(57)

Sabiex il-Kummissjoni tiġi appoġġata fir-rigward tal-implimentazzjoni ta' din id-Direttiva u tiġi ffaċilitata l-kooperazzjoni fost l-uffiċċji għall-irkupru tal-assi u l-uffiċċji għall-ġestjoni tal-assi kif ukoll biex jiġu skambjati l-aħjar prattiki, jenħtieġ li jiġi stabbilit network ta’ kooperazzjoni dwar l-irkupru u l-konfiska tal-assi. Jenħtieġ li dak in-network ikun magħmul minn rappreżentanti mill-uffiċċji għall-irkupru tal-assi u mill-uffiċċji għall-ġestjoni tal-assi u jenħtieġ li jkun kopresedut mill-Kummissjoni u, fejn xieraq, mill-Europol. Il-Kummissjoni tista' tistieden lir-rappreżentanti mill-Eurojust, l-Uffiċċju tal-Prosekutur Pubbliku Ewropew (l-“UPPE”), u, meta jkun xieraq, l-Awtorità għall-Ġlieda Kontra l-Ħasil tal-Flus biex jipparteċipaw fil-laqgħat ta’ dak in-network.

(58)

Il-gruppi tal-kriminalità organizzata joperaw bejn il-fruntieri u qed jakkwistaw dejjem aktar proprjetà fi Stati Membri minbarra dawk li jkunu bbażati fihom u f'pajjiżi terzi. Minħabba d-dimensjoni tranżnazzjonali tal-kriminalità organizzata, il-kooperazzjoni internazzjonali hija essenzjali biex jiġu rkuprati l-profitti u jiġu kkonfiskati l-assi finanzjarji li jippermettu lill-kriminali joperaw. Għalhekk, jenħtieġ li l-Istati Membri jiżguraw li kemm l-uffiċċji għall-irkupru tal-assi kif ukoll l-uffiċċji għall-ġestjoni tal-assi jikkooperaw, kemm jista' jkun, mal-kontropartijiet tagħhom f'pajjiżi terzi biex jittraċċaw, jidentifikaw u jimmaniġġjaw il-mezzi strumentali, ir-rikavat jew il-proprjetà li tkun jew tista' ssir is-suġġett ta' ordni ta' ffriżar jew ta' konfiska fil-qafas ta' proċedimenti f'materji kriminali. Huwa importanti li l-Istati Membri jagħmlu użu mill-oqfsa eżistenti għall-kooperazzjoni u huma mħeġġa jiżviluppaw jew jaġġustaw ftehimiet bilaterali eżistenti jew jaderixxu ma' konvenzjonijiet multilaterali eżistenti jew, meta ma jkun hemm l-ebda arranġament ieħor fis-seħħ, jistabbilixxu ftehimiet bilaterali ġodda. Ir-regoli dwar il-protezzjoni tad-data stipulati fid-Direttiva (UE) 2016/680 u, fejn rilevanti, fir-Regolament (UE) 2016/679 huma applikabbli fir-rigward tal-miżuri meħuda f'dak ir-rigward.

(59)

L-uffiċċji għall-irkupru tal-assi u l-uffiċċji għall-ġestjoni tal-assi jenħtieġ li jikkooperaw mill-qrib ukoll mal-korpi u l-aġenziji tal-Unjoni, inkluż il-Europol, il-Eurojust u l-UPPE, fil-kompetenzi rispettivi tagħhom u f'konformità mal-qafas legali applikabbli, sa fejn ikun meħtieġ li l-proprjetà tiġi ttraċċata u identifikata fl-investigazzjonijiet transfruntieri appoġġati mill-Europol u mill-Eurojust jew fl-investigazzjonijiet imwettqa mill-UPPE. Jenħtieġ li l-Istati Membri, f'konformità mal-obbligi rispettivi tagħhom skont ir-Regolament tal-Kunsill (UE) 2017/1939 (24), jiżguraw li l-uffiċċji għall-irkupru tal-assi tagħhom jissodisfaw l-obbligi rilevanti stipulati fir-Regolament (UE) 2017/1939.

(60)

Sabiex jiġi żgurat li jkun hemm fehim komuni u standards minimi għat-traċċar u l-identifikazzjoni, l-iffriżar, il-konfiska u l-ġestjoni tal-assi, din id-Direttiva jenħtieġ li tistabbilixxi regoli minimi għall-miżuri rilevanti kif ukoll għas-salvagwardji relatati. L-adozzjoni ta' regoli minimi ma timpedixixxix lill-Istati Membri milli jagħtu setgħat aktar estensivi lill-uffiċċji għall-irkupru tal-assi jew lill-uffiċċji għall-ġestjoni tal-assi, milli jipprevedu regoli aktar estensivi dwar l-iffriżar u l-konfiska, jew milli jipprevedu salvagwardji addizzjonali skont il-liġi nazzjonali, dment li tali miżuri u dispożizzjonijiet nazzjonali ma jimminawx l-objettiv ta' din id-Direttiva.

(61)

Minħabba li l-objettiv ta' din id-Direttiva, jiġifieri li tiġi ffaċilitata l-konfiska ta' proprjetà fi proċedimenti f'materji kriminali, ma jistax jinkiseb b'mod suffiċjenti mill-Istati Membri iżda jista' jinkiseb aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju tas-sussidjarjetà kif stipulat fl-Artikolu 5 tat-Trattat dwar l-Unjoni Ewropea (TUE). F'konformità mal-prinċipju ta' proporzjonalità, kif stipulat f'dak l-Artikolu, din id-Direttiva ma tmurx lil hinn minn dak li huwa meħtieġ sabiex jintlaħaq dak l-objettiv.

(62)

Peress li din id-Direttiva tipprevedi sett komprensiv ta' regoli, li jikkoinċidu ma' strumenti legali diġà eżistenti, jenħtieġ li din tissostitwixxi l-Azzjoni Konġunta tal-Kunsill 98/699/ĠAI (25), id-Deċiżjoni Kwadru tal-Kunsill 2001/500/ĠAI (26), id-Deċiżjoni Kwadru 2005/212/ĠAI, id-Deċiżjoni 2007/845/ĠAI, u d-Direttiva 2014/42/UE fir-rigward tal-Istati Membri marbuta b'din id-Direttiva.

(63)

F'konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-TUE u mat-TFUE, id-Danimarka mhijiex qiegħda tieħu sehem fl-adozzjoni ta' din id-Direttiva u mhijiex marbuta biha jew soġġetta għall-applikazzjoni tagħha.

(64)

F'konformità mal-Artikoli 1 u 2 u l-Artikolu 4a(1) tal-Protokoll Nru 21 dwar il-pożizzjoni tar-Renju Unit u l-Irlanda fir-rigward tal-ispazju ta' libertà, sigurtà u ġustizzja, anness mat-TUE u mat-TFUE, u mingħajr preġudizzju għall-Artikolu 4 ta' dak il-Protokoll, l-Irlanda mhijiex qiegħda tipparteċipa fl-adozzjoni ta' din id-Direttiva u mhijiex marbuta biha jew soġġetta għall-applikazzjoni tagħha.

(65)

Il-Kontrollur Ewropew għall-Protezzjoni tad-Data ġie kkonsultat f'konformità mal-Artikolu 42(1) u (2) tar-Regolament (UE) 2018/1725 tal-Parlament Ewropew u tal-Kunsill (27) u ppreżenta opinjoni fid-19 ta' Lulju 2022 (28),