(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fl-għalf tal-annimali u r-raġunijiet u l-proċeduri għall-għoti ta’ tali awtorizzazzjoni.

(2)

In-niaċina u n-niaċinammid kienu ġew awtorizzati għal perjodu ta’ 10 snin bħala addittivi tal-għalf għall-ispeċijiet kollha tal-annimali bir-Regolament ta’ Implimentazzjoni tal-Kummissjoni (UE) Nru 642/2013 (2).

(3)

Tressqu żewġ applikazzjonijiet, f’konformità mal-Artikolu 14(1) tar-Regolament (KE) Nru 1831/2003, għat-tiġdid tal-awtorizzazzjoni tan-niaċina u tan-niaċinammid għall-ispeċijiet kollha tal-annimali, bit-talba li l-addittivi jiġu kklassifikati fil-kategorija tal-addittivi “addittivi nutrizzjonali” u fil-grupp funzjonali “vitamini, provitamini u sustanzi definiti tajjeb kimikament li jkollhom effett simili”. Flimkien ma’ dawk l-applikazzjonijiet intbagħtu d-dettalji u d-dokumenti meħtieġa skont l-Artikolu 14(2) tar-Regolament (KE) Nru 1831/2003. Il-Kummissjoni hija tal-fehma li l-isem tal-addittiv “niaċina” użat fl-awtorizzazzjoni inizjali jenħtieġ li jiġi sostitwit bl-isem “aċidu nikotiniku” peress li t-terminu “niaċina” huwa wieħed mill-ismijiet ġeneriċi użati għall-aċidu nikotiniku iżda wkoll għal sustanzi oħra bħan-nikotinammid u d-derivattivi relatati.

(4)

Fl-opinjoni tagħha tas-26 ta’ Settembru 2023 (3), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li l-applikant ipprovda evidenza li l-aċidu nikotiniku u n-niaċinammid għadhom sikuri għall-ispeċijiet kollha tal-annimali, għall-konsumaturi u għall-ambjent skont il-kundizzjonijiet tal-użu awtorizzati bħalissa. L-Awtorità kkonkludiet li l-aċidu nikotiniku u n-niaċinammid jibqgħu effikaċi bħala sors effettiv ta’ niaċina fin-nutrizzjoni tal-annimali u li l-aċidu nikotiniku u n-niaċinammid mhumiex irritanti għall-ġilda iżda huma irritanti għall-għajnejn. L-Awtorità kkonkludiet ukoll li mhumiex sensitizzaturi tal-ġilda u li huwa probabbli li jseħħ esponiment permezz tal-inalazzjoni. Ma kinitx tal-fehma li hemm ħtieġa għal rekwiżiti speċifiċi ta’ monitoraġġ ta’ wara l-introduzzjoni fis-suq.

(5)

Il-Laboratorju ta’ Referenza stabbilit bir-Regolament (KE) Nru 1831/2003 kien tal-fehma li l-konklużjonijiet u r-rakkomandazzjonijiet milħuqa fil-valutazzjoni mwettqa fir-rigward tal-metodu ta’ analiżi tal-aċidu nikotiniku u tan-niaċinammid bħala addittivi tal-għalf fil-kuntest tal-awtorizzazzjoni preċedenti huma validi u applikabbli għall-applikazzjoni attwali. Għalhekk, f’konformità mal-Artikolu 5(4), il-punt (c) tar-Regolament tal-Kummissjoni (KE) Nru 378/2005 (4), mhuwiex meħtieġ rapport ta’ evalwazzjoni tal-Laboratorju ta’ Referenza.

(6)

Fid-dawl ta’ dan ta’ hawn fuq, il-Kummissjoni hija tal-fehma li l-aċidu nikotiniku u n-niaċinammid jissodisfaw il-kundizzjonijiet għall-awtorizzazzjoni previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-awtorizzazzjoni ta’ dawk l-addittivi tiġġedded. Barra minn hekk, il-Kummissjoni hija tal-fehma li jenħtieġ li jittieħdu miżuri protettivi xierqa biex jiġu evitati effetti avversi fuq is-saħħa tal-utenti tal-addittivi.

(7)

Billi l-applikazzjoni immedjata tal-modifiki tal-kundizzjonijiet tal-awtorizzazzjoni tal-aċidu nikotiniku mhijiex meħtieġa minħabba raġunijiet ta’ sikurezza, jixraq li jiġi previst perjodu tranżitorju biex il-partijiet interessati jħejju ruħhom biex jissodisfaw ir-rekwiżiti l-ġodda li jirriżultaw mit-tiġdid tal-awtorizzazzjoni minħabba l-bidla tal-isem tal-addittiv minn “niaċina” għal “aċidu nikotiniku”.

(8)

B’konsegwenza tat-tiġdid tal-awtorizzazzjoni tal-aċidu nikotiniku u tan-niaċinammid, jenħtieġ li r-Regolament ta’ Implimentazzjoni (UE) Nru 642/2013 jitħassar.

(9)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,