(1)

Il-miżuri dettaljati għall-implimentazzjoni tal-istandards bażiċi komuni msemmija fl-Artikolu 4(3) tar-Regolament (KE) Nru 300/2008 tal-Parlament Ewropew u tal-Kunsill (2) jinkludu proċeduri għall-approvazzjoni u l-użu tat-tagħmir tas-sigurtà tal-avjazzjoni ċivili.

(2)

Abbażi ta’ dan, ir-Regolament ta’ Implimentazzjoni (UE) 2015/1998 jistabbilixxi reġim armonizzat tal-approvazzjoni għall-installazzjoni tat-tagħmir tas-sigurtà tal-avjazzjoni ċivili biex tkun żgurata l-aqwa implimentazzjoni tal-istandards bażiċi komuni fis-sigurtà tal-avjazzjoni.

(3)

Id-Deċiżjoni tal-Kummissjoni (UE) 2021/2147 (3) tistabbilixxi lista konsolidata tat-tagħmir tas-sigurtà tal-avjazzjoni ċivili approvat bl-istatus tal-immarkar “Timbru tal-UE”, għat-tagħmir ikkonfermat mill-proċess tal-evalwazzjoni komuni tal-Konferenza Ewropea tal-Avjazzjoni Ċivili, għall-fini tal-installazzjoni u tal-użu mal-Unjoni kollha.

(4)

F’konformità mar-Regolament ta’ Implimentazzjoni (UE) 2015/1998 u b’mod partikolari l-punt 12.0.4.1 tal-Anness tiegħu, meta l-Kummissjoni tirċievi informazzjoni li tindika li t-tagħmir ma jissodisfax l-istandard li għalih ikun ġie approvat, din tista’ tissospendi l-istatus tal-immarkar “Timbru tal-UE” tat-tagħmir tas-sigurtà, mingħajr avviż minn qabel, meta ssir talba mingħand l-Istati Membri jew b’inizjattiva tagħha stess. It-tagħmir tas-sigurtà li l-marka “Timbru tal-UE” tiegħu tkun ġiet sospiża ma jistax jibqa’ jintuża, u l-biċċiet diġà installati għandhom jitħaddmu biż-żieda ta’ miżuri kumpensatorji, kif xieraq.

(5)

L-informazzjoni teknika li rċeviet il-Kummissjoni turi li konfigurazzjoni speċifika tal-istandard C3 tat-tagħmir tas-Sistema tad-Detezzjoni Splussiva għall-bagalji tal-kabina (EDSCB), li bħalissa hi elenkata fil-“bażi tad-data tal-Unjoni dwar is-sigurtà tal-katina tal-provvista — it-tagħmir tas-sigurtà”, ma tissodisfax il-prestazzjoni meħtieġa fir-rigward tal-iskrinjar tal-likwidi, tal-ajrusoli u tal-ġellijiet (LAGs) li jkun hemm fil-bagalji. Din il-konfigurazzjoni tista’ tibqa’ titħaddem skont il-kunċett tal-operazzjonijiet għall-istandard C3 tal-EDSCB, iżda b’limitu tal-iskrinjar tal-volum massimu sa 330 ml għall-kontenituri individwali tal-LAGs.

(6)

Il-bażi tad-data kkonsolidata tal-Unjoni li telenka t-tagħmir permess għall-installazzjoni u għall-użu mal-Unjoni kollha jenħtieġ li tiġi aġġornata skont dan,