(1)

Id-Direttiva (UE) 2019/879 tal-Parlament Ewropew u tal-Kunsill (4) u r-Regolament (UE) 2019/877 tal-Parlament Ewropew u tal-Kunsill (5) emendaw il-qafas għar-rekwiżit minimu għal fondi proprji u obbligazzjonijiet eliġibbli (“MREL”) stabbilit fid-Direttiva 2014/59/UE tal-Parlament Ewropew u tal-Kunsill (6) u fir-Regolament (UE) Nru 806/2014 tal-Parlament Ewropew u tal-Kunsill (7), li japplika għall-istituzzjonijiet ta’ kreditu u għad-ditti ta’ investiment (“istituzzjonijiet”) stabbiliti fl-Unjoni kif ukoll għal kwalunkwe entità oħra li taqa’ fil-kamp ta’ applikazzjoni tad-Direttiva 2014/59/UE jew tar-Regolament (UE) Nru 806/2014 (“entitajiet”). Dawk l-emendi stabbilew li l-MREL intern, jiġifieri, l-MREL applikabbli għal istituzzjonijiet u entitajiet li huma sussidjarji ta’ entitajiet ta’ riżoluzzjoni iżda li mhumiex huma nfushom entitajiet ta’ riżoluzzjoni, jistgħu jiġu sodisfatti minn dawk l-istituzzjonijiet u entitajiet billi jintużaw strumenti maħruġa lil u mixtrija mill-entità ta’ riżoluzzjoni, direttament jew indirettament, permezz ta’ entitajiet oħra fl-istess grupp ta’ riżoluzzjoni.

(2)

Il-qafas tal-MREL tal-Unjoni ġie emendat aktar mir-Regolament (UE) 2022/2036 tal-Parlament Ewropew u tal-Kunsill (8), li introduċa regoli speċifiċi ta’ tnaqqis fil-każ ta’ sottoskrizzjoni indiretta ta’ strumenti eliġibbli biex jintlaħaq l-MREL intern. Dak ir-Regolament introduċa fid-Direttiva 2014/59/UE rekwiżit għall-Kummissjoni biex teżamina l-impatt tas-sottoskrizzjoni indiretta ta’ strumenti eliġibbli biex jintlaħaq l-MREL fuq kundizzjonijiet ekwi bejn tipi differenti ta’ strutturi ta’ gruppi bankarji, inkluż fejn il-gruppi bankarji jkollhom kumpanija operattiva bejn il-kumpanija azzjonarja identifikata bħala entità ta’ riżoluzzjoni u s-sussidjarji tagħha. Il-Kummissjoni ntalbet tivvaluta jekk l-entitajiet li huma stess ma jkunux entitajiet ta’ riżoluzzjoni jenħtiġux ikunu jistgħu jikkonformaw mal-MREL fuq bażi konsolidata. Barra minn hekk, il-Kummissjoni ntalbet tevalwa t-trattament, skont ir-regoli li jirregolaw l-MREL, ta’ entitajiet li l-pjan ta’ riżoluzzjoni tagħhom jipprevedi li dawk l-entitajiet għandhom jiġu stralċjati skont proċedimenti normali ta’ insolvenza. Fl-aħħar nett, il-Kummissjoni ntalbet tevalwa l-adegwatezza tal-limitazzjoni tal-ammont ta’ tnaqqis meħtieġ skont l-Artikolu 72e(5) tar-Regolament (UE) Nru 575/2013 tal-Parlament Ewropew u tal-Kunsill (9). Jenħtieġ għalhekk li d-dispożizzjonijiet il-ġodda jirrispettaw il-prinċipji tal-mandat ta’ rieżami oriġinali mogħti lill-Kummissjoni mill-Parlament Ewropew u mill-Kunsill biex jiġu żgurati l-proporzjonalità u kundizzjonijiet ekwi bejn tipi differenti ta’ strutturi ta’ gruppi bankarji.

(3)

L-eżami li sar mill-Kummissjoni sab li jkun xieraq u proporzjonat għall-objettivi tar-regoli dwar l-MREL intern li l-awtoritajiet ta’ riżoluzzjoni jkunu jistgħu jistabbilixxu l-MREL intern fuq bażi konsolidata għal firxa ta’ entitajiet li hija aktar wiesgħa mill-firxa li tirriżulta mill-applikazzjoni tad-Direttiva 2014/59/UE u tar-Regolament (UE) Nru 806/2014, fejn tali firxa aktar wiesgħa tkopri istituzzjonijiet u entitajiet li mhumiex entitajiet ta’ riżoluzzjoni huma stess, iżda li huma sussidjarji ta’ entitajiet ta’ riżoluzzjoni u li jikkontrollaw sussidjarji oħra (“entitajiet intermedji”) fl-istess grupp ta’ riżoluzzjoni. Dan ikun b’mod partikolari l-każ għal dawk il-gruppi bankarji li huma mmexxija minn kumpanija azzjonarja. F’każijiet bħal dawn, l-entitajiet intermedji jiċċentralizzaw b’mod naturali l-iskoperturi intragrupp u jinkanalaw ir-riżorsi eliġibbli għall-MREL intern prepożizzjonati mill-entità ta’ riżoluzzjoni. Minħabba din l-istruttura, tali entitajiet intermedji jistgħu jintlaqtu sproporzjonalment mir-regoli tat-tnaqqis eżistenti. Il-Kummissjoni kkonkludiet ukoll li l-qafas għall-MREL isir aktar proporzjonat billi jiġu aġġustati r-regoli dwar il-kamp ta’ applikazzjoni ta skoperturi li entità intermedja hija meħtieġa tnaqqas, fejn dawk l-iskoperturi jkunu għal entità ta’ likwidazzjoni mhux soġġetta għal deċiżjoni li tiddetermina l-MREL. F’dawk il-każijiet, mhuwiex mistenni li s-setgħat ta’ valwazzjoni negattiva u ta’ konverżjoni ser ikollhom jiġu eżerċitati fir-rigward ta’ dawk l-entitajiet ta’ likwidazzjoni. B’kuntrast ta’ dan, l-entitajiet li jifdal tal-grupp ta’ riżoluzzjoni ser ikollhom jiġu rikapitalizzati mill-entità ta’ riżoluzzjoni f’każ ta’ diffikultà jew falliment. Ir-riżorsi eliġibbli meħtieġa tal-MREL għalhekk jenħtieġ li jkunu preżenti fil-livelli kollha tal-grupp ta’ riżoluzzjoni, u d-disponibbiltà tagħhom għall-assorbiment tat-telf u r-rikapitalizzazzjoni jenħtieġ li tiġi żgurata permezz tal-mekkaniżmu ta’ tnaqqis. Għalhekk, fl-eżami tagħha, il-Kummissjoni kkonkludiet li l-entitajiet intermedji jenħtieġ li jkomplu jnaqqsu l-ammont sħiħ tal-holdings tagħhom ta’ riżorsi eliġibbli għall-MREL intern maħruġa minn entitajiet oħra mhux ta’ likwidazzjoni fl-istess grupp ta’ riżoluzzjoni.

(4)

Ċarezza dwar x’jikkostitwixxi entità ta’ likwidazzjoni hija essenzjali għall-funzjonament xieraq tal-oqfsa ta’ tnaqqis u konsolidazzjoni u għall-kalkolu tal-MREL għal entitajiet speċifiċi. Għal dak l-għan, jenħtieġ li tiġi stabbilita definizzjoni ta’ entità ta’ likwidazzjoni, li tiffoka fuq l-identifikazzjoni tal-entitajiet ta’ likwidazzjoni fl-istadju tal-ippjanar tar-riżoluzzjoni. Għalhekk, jenħtieġ li l-awtoritajiet ta’ riżoluzzjoni jwettqu valutazzjoni xierqa tal-istituzzjonijiet u l-entitajiet fil-kamp ta’ applikazzjoni tad-Direttiva 2014/59/UE u tar-Regolament (UE) Nru 806/2014 meta jfasslu pjanijiet ta’ riżoluzzjoni. Parti ċentrali ta’ dik il-valutazzjoni hija l-identifikazzjoni ta’ jekk l-istituzzjoni jew l-entità twettaqx funzjonijiet kritiċi. Mingħajr preġudizzju għall-valutazzjoni tal-importanza tal-istituzzjoni jew l-entità fil-livell nazzjonali jew reġjonali, hija mistennija li titwettaq ukoll analiżi bir-reqqa tar-rilevanza tal-entità ta’ likwidazzjoni potenzjali fi ħdan grupp ta’ riżoluzzjoni. Istituzzjoni jew entità li tirrappreżenta parti sinifikanti tal-ammont totali tal-iskopertura għar-riskju, l-iskopertura tal-proporzjon ta’ ingranaġġ jew l-introjtu operatorju ta’ grupp ta’ riżoluzzjoni fil-prinċipju jenħtieġ li ma tiġix identifikata bħala entità ta’ likwidazzjoni.

(5)

Skont l-Artikolu 45f tad-Direttiva 2014/59/UE u l-Artikolu 12g tar-Regolament (UE) Nru 806/2014, l-istituzzjonijiet u l-entitajiet għandhom jikkonformaw mal-MREL intern fuq bażi individwali. Konformità fuq bażi konsolidata hija permessa biss f’żewġ każijiet speċifiċi: għal impriżi prinċipali tal-Unjoni li mhumiex entitajiet ta’ riżoluzzjoni u li huma sussidjarji ta’ entitajiet ta’ pajjiżi terzi, u għal impriżi prinċipali ta’ istituzzjonijiet jew entitajiet eżentati milli jikkonformaw mal-MREL intern. Skont l-Artikolu 72e(5) tar-Regolament (UE) Nru 575/2013, fejn entità intermedja tikkonforma mal-MREL intern tagħha fuq bażi konsolidata, dik l-entità ma hijiex obbligata tnaqqas holdings ta’ riżorsi eliġibbli għall-MREL intern ta’ entitajiet oħra li jappartjenu għall-istess grupp ta’ riżoluzzjoni u inklużi fil-perimetru ta’ konsolidament tagħha, peress li l-konformità mal-MREL intern fuq bażi konsolidata tikseb effett simili. L-eżami mwettaq mill-Kummissjoni wera li l-entitajiet intermedji ta’ gruppi bankarji mmexxija minn kumpanija azzjonarja jenħtieġ li jitħallew jikkonformaw ukoll mal-MREL intern fuq bażi konsolidata. B’mod partikolari, jenħtieġ li jkun possibbli li jkun hemm konformità mal-MREL intern fuq bażi konsolidata fejn l-applikazzjoni tat-tnaqqis iżżid l-MREL intern b’mod sproporzjonat. Barra minn hekk, l-eżami wera li, fejn entità intermedja tkun soġġetta għal rekwiżiti ta’ fondi proprji jew għal rekwiżit ta’ riżerva kombinata fuq bażi konsolidata, il-konformità mal-MREL intern fuq bażi individwali tista’ toħloq ir-riskju li r-riżorsi eliġibbli għall-MREL intern prepożizzjonati fil-livell tal-entità intermedja ma jkunux biżżejjed biex tiġi restawrata l-konformità mar-rekwiżit ta’ fondi proprji konsolidati applikabbli wara l-valwazzjoni negattiva u l-konverżjoni ta’ dawk ir-riżorsi. Barra minn hekk, kontribut ewlieni fil-kalkolu tal-MREL għall-istituzzjoni jew għall-entità kkonċernata jkun nieqes meta r-rekwiżit ta’ fondi proprji addizzjonali jew ir-rekwiżit ta’ riżerva kombinata jkun ġie stabbiliti f’livell differenti ta’ konsolidament, u b’hekk il-kalkolu tar-rekwiżit ikun diffiċli. Bl-istess mod, is-setgħa tal-awtoritajiet ta’ riżoluzzjoni li jipprojbixxu, f’konformità mal-Artikolu 16a tad-Direttiva 2014/59/UE u mal-Artikolu 10a tar-Regolament (UE) Nru 806/2014, ċerti distribuzzjonijiet ogħla mill-ammont massimu distribwibbli relatat mal-MREL fir-rigward tas-sussidjarja individwali ssir diffiċli biex tiġi eżerċitata meta l-metrika ewlenija, jiġifieri, ir-rekwiżit ta’ riżerva kombinata, ma tkunx stabbilita fuq l-istess bażi bħall-MREL intern. Għal dawk ir-raġunijiet, jenħtieġ li l-possibbiltà ta’ konformità mal-MREL intern fuq bażi konsolidata tkun disponibbli wkoll għal tipi oħra ta’ strutturi ta’ gruppi bankarji, kull meta l-entità intermedja tkun soġġetta għal rekwiżiti ta’ fondi proprji addizzjonali fuq bażi konsolidata biss. Il-possibbiltà ta’ konformità mal-MREL intern fuq bażi konsolidata kif introdotta minn din id-Direttiva hija maħsuba biex tikkomplementa s-sitwazzjonijiet fejn dak ikun diġà possibbli skont id-Direttiva 2014/59/UE u r-Regolament (UE) Nru 806/2014, u ma tiħux post id-dispożizzjonijiet rilevanti f’dawk l-atti leġiżlattivi.

(6)

Biex jiġi żgurat li l-possibbiltà ta’ konformità mal-MREL intern fuq bażi konsolidata tkun disponibbli biss fil-każijiet rilevanti u ma twassalx għal nuqqas ta’ riżorsi eliġibbli għall-MREL intern fil-grupp ta’ riżoluzzjoni kollu, is-setgħa li l-MREL intern jiġi stabbilit fuq bażi konsolidata għal entitajiet intermedji jenħtieġ li tkun setgħa diskrezzjonali tal-awtorità ta’ riżoluzzjoni u jenħtieġ li tkun soġġetta għal ċerti kundizzjonijiet. L-entità intermedja jenħtieġ li tkun sussidjarja diretta ta’ entità ta’ riżoluzzjoni li tkun kumpanija azzjonarja finanzjarja prinċipali tal-Unjoni jew kumpanija azzjonarja finanzjarja mħallta prinċipali tal-Unjoni stabbilita fl-istess Stat Membru u parti mill-istess grupp ta’ riżoluzzjoni. Jenħtieġ li dik l-entità ta’ riżoluzzjoni ma jkollhiex direttament sussidjarji, għajr l-entità intermedja, li huma istituzzjonijiet jew li huma entitajiet soġġetti għall-MREL. B’mod alternattiv, l-entità intermedja kkonċernata jenħtieġ li tikkonforma mar-rekwiżit ta’ fondi proprji abbażi tas-sitwazzjoni konsolidata tagħha biss. Fiż-żewġ każijiet, madankollu, jenħtieġ li l-konformità mal-MREL intern fuq bażi konsolidata, fil-valutazzjoni tal-awtorità ta’ riżoluzzjoni, ma xxekkilx b’mod materjali l-kredibbiltà u l-fattibbiltà tal-istrateġija tal-grupp ta’ riżoluzzjoni u lanqas l-applikazzjoni mill-awtorità ta’ riżoluzzjoni tas-setgħa ta’ valwazzjoni negattiva jew konverżjoni ta’ strumenti kapitali rilevanti u obbligazzjonijiet eliġibbli tal-entità intermedja kkonċernata jew ta’ entitajiet oħra fil-grupp ta’ riżoluzzjoni tagħha. Sitwazzjoni waħda fejn l-istabbiliment tal-MREL intern fuq bażi konsolidata jkun ta’ ħsara għar-riżolvibbiltà tal-grupp ta’ riżoluzzjoni hija fejn l-ammont meħtieġ għall-konformità ma’ dak l-MREL ma jkunx biżżejjed biex jiżgura konformità mar-rekwiżiti ta’ fondi proprji applikabbli wara l-eżerċizzju tas-setgħat ta’ tniżżil tal-valur u konverżjoni.

(7)

Skont l-Artikolu 45f(2) tad-Direttiva 2014/59/UE u l-Artikolu 12g(2) tar-Regolament (UE) Nru 806/2014, l-entitajiet intermedji jistgħu jikkonformaw mal-MREL intern konsolidat billi jużaw fondi proprji u obbligazzjonijiet eliġibbli. Biex titwettaq b’mod sħiħ il-possibbiltà ta’ konformità mal-MREL fuq bażi konsolidata, huwa meħtieġ li jiġi żgurat li l-obbligazzjonijiet eliġibbli tal-entitajiet intermedji jiġu kkalkulati b’mod li jkun simili għall-komputazzjoni tal-fondi proprji. Il-kriterji ta’ eliġibbiltà għal obbligazzjonijiet li jistgħu jintużaw għall-konformità mal-MREL intern fuq bażi konsolidata jenħtieġ għalhekk li jqisu r-regoli dwar il-kalkolu tal-fondi proprji konsolidati stabbiliti fir-Regolament (UE) Nru 575/2013. Biex tiġi żgurata konsistenza mar-regoli eżistenti dwar l-MREL estern, dan l-allinjament jenħtieġ li jirrifletti wkoll ir-regoli eżistenti stiabbiliti fl-Artikolu 45b(3) tad-Direttiva 2014/59/UE u l-Artikolu 12d(3) tar-Regolament (UE) Nru 806/2014 għall-kalkolu tal-obbligazzjonijiet eliġibbli li l-entitajiet ta’ riżoluzzjoni jistgħu jużaw biex jikkonformaw mal-MREL konsolidat tagħhom. B’mod partikolari, huwa meħtieġ li jiġi żgurat li l-obbligazzjonijiet eliġibbli maħruġa mis-sussidjarji tal-entità soġġetta għall-MREL intern konsolidat u miżmuma mill-entità ta’ riżoluzzjoni, jew direttament inkella indirettament permezz ta’ entitajiet oħra tal-istess grupp ta’ riżoluzzjoni iżda barra mill-ambitu tal-konsolidazzjoni, jew minn azzjonisti eżistenti li ma jappartjenux għall-istess grupp ta’ riżoluzzjoni, jgħoddu għall-fondi proprji u l-obbligazzjonijiet eliġibbli tal-entità soġġetta għall-MREL intern konsolidat.

(8)

Skont il-qafas attwali, għall-entitajiet identifikati għal-likwidazzjoni, l-MREL huwa stabbilit, fil-maġġoranza tal-każijiet, fl-ammont meħtieġ għall-assorbiment tat-telf, li jikkorrispondi għar-rekwiżiti ta’ fondi proprji. F’każijiet bħal dawn, l-MREL ma jinvolvi l-ebda rekwiżit addizzjonali relatat direttament mal-qafas ta’ riżoluzzjoni għall-entità ta’ likwidazzjoni. Dan ifisser li entità ta’ likwidazzjoni tista’ tikkonforma b’mod sħiħ mal-MREL billi tikkonforma mar-rekwiżiti ta’ fondi proprji u li deċiżjoni dedikata tal-awtorità ta’ riżoluzzjoni li tiddetermina l-MREL ma tikkontribwix b’mod sinifikanti għar-riżolvibbiltà ta’ dik l-entità. Tali deċiżjoni tinvolvi ħafna obbligi proċedurali għall-awtorità ta’ riżoluzzjoni u għall-entità ta’ likwidazzjoni mingħajr benefiċċju korrispondenti f’termini ta’ riżolvibbiltà mtejba. Għal dik ir-raġuni, l-awtoritajiet ta’ riżoluzzjoni jenħtieġ li ma jiddeterminawx l-MREL għall-entitajiet ta’ likwidazzjoni. Jenħtieġ li l-qafas għall-MREL jiġi applikat abbażi ta’ kriterji li jiżguraw li entità tikkwalifika bħala entità ta’ likwidazzjoni b’mod konsistenti madwar l-Unjoni. Jenħtieġ għalhekk li l-awtoritajiet ta’ riżoluzzjoni jiżguraw applikazzjoni konsistenti tad-dispożizzjonijiet il-ġodda li jikkonċernaw l-entitajiet ta’ likwidazzjoni għal dawk l-entitajiet li huma parti minn grupp transkonfinali, b’mod partikolari fejn il-grupp ikun magħmul minn entitajiet li jinsabu ġewwa l-Unjoni Bankarja u barra minnha.

(9)

Meta jfasslu pjanijiet ta’ riżoluzzjoni u jivvalutaw ir-riżolvibbiltà tal-gruppi ta’ riżoluzzjoni, l-awtoritajiet ta’ riżoluzzjoni jistgħu jikkunsidraw li istituzzjoni jew entità sussidjarja tikkwalifika bħala entità ta’ likwidazzjoni fejn il-pjan ta’ riżoluzzjoni jipprevedi li huwa fattibbli u kredibbli li l-istituzzjoni jew l-entità tiġi stralċjata skont proċeduri normali ta’ insolvenza jew fejn il-pjan ta’ riżoluzzjoni ma jipprevedix l-eżerċizzju tas-setgħat ta’ valwazzjoni negattiva u konverżjoni fir-rigward ta’ dik l-istituzzjoni jew l-entità. Biex tqis l-ispeċifiċitajiet tal-entitajiet affiljati b’mod permanenti ma’ korp ċentrali, l-awtorità ta’ riżoluzzjoni tista’ tqis li tali entità tikkwalifika bħala entità ta’ likwidazzjoni fejn il-pjan ta’ riżoluzzjoni ma jipprevedi li għandha tittieħed ebda miżura oħra, bħal fużjoni ta’ affiljati, mill-korp ċentrali jew l-awtorità ta’ riżoluzzjoni fir-rigward ta’ tali entità. F’dawk il-każijiet, jaf ma jkunx meħtieġ li istituzzjoni jew entità sussidjarja żżomm fondi proprji u obbligazzjonijiet eliġibbli lil hinn mir-rekwiżiti ta’ fondi proprji tagħha. Sabiex tiġi żgurata r-riżolvibbiltà tal-grupp filwaqt li jiġi rrispettat il-prinċipju tal-proporzjonalità, f’xi każijiet, skont il-materjalità tal-holdings ta’ strumenti ta’ fondi proprji maħruġa minn entitajiet ta’ likwidazzjoni meta mqabbla mal-kapaċità ta’ assorbiment tat-telf tal-entità intermedja, holdings miżmuma fil-forma ta’ strumenti ta’ fondi proprji għandhom ikunu soġġetti għal tnaqqis. Biex jiġu evitati effetti ta’ preċipizju, il-proporzjon ta’ dawk il-holdings għall-kapaċità ta’ assorbiment tat-telf tal-entità intermedja jenħtieġ li jiġi kkalkulat sa mit-tmiem ta’ kull sena kalendarja bħala medja matul it-12-il xahar ta’ qabel. Madankollu, jenħtieġ li l-entità intermedja ma tkunx mitluba tnaqqas obbligazzjonijiet li jissodisfaw il-kundizzjonijiet għal konformità mal-MREL intern u li ma jikkwalifikawx bħala strumenti ta’ fondi proprji. F’każ ta’ falliment ta’ entità ta’ likwidazzjoni, il-pjan ta’ riżoluzzjoni ma jipprevedix li f’każ ta’ falliment, l-entità ta’ likwidazzjoni tiġi rikapitalizzata mill-entità ta’ riżoluzzjoni. Dan ifisser li l-upstreaming tat-telf li jaqbeż il-fondi proprji eżistenti mill-entità ta’ likwidazzjoni lill-entità ta’ riżoluzzjoni, permezz tal-entità intermedja, ma jkunx mistenni, u lanqas id-downstreaming tal-kapital fid-direzzjoni opposta. Dak l-aġġustament fl-ambitu tal-holdings li għandhom jitnaqqsu fil-kuntest tas-sottoskrizzjoni indiretta tar-riżorsi eliġibbli għall-MREL intern għalhekk ma jaffettwax is-solidità prudenzjali tal-qafas.

(10)

L-objettiv ewlieni tar-reġim ta’ permessi għat-tnaqqis tal-istrumenti ta’ obbligazzjonijiet eliġibbli stabbilit fl-Artikolu 77(2) u l-Artikolu 78a tar-Regolament (UE) Nru 575/2013, li huwa applikabbli wkoll għal istituzzjonijiet u entitajiet soġġetti għall-MREL u għall-obbligazzjonijiet maħruġa għall-konformità mal-MREL, huwa li l-awtoritajiet ta’ riżoluzzjoni jkunu jistgħu jimmonitorjaw l-azzjonijiet li jirriżultaw fi tnaqqis tal-istokk ta’ obbligazzjonijiet eliġibbli u jipprojbixxu kwalunkwe azzjoni li tammonta għal tnaqqis taħt livell li l-awtoritajiet ta’ riżoluzzjoni jqisu adegwat. Fejn l-awtorità ta’ riżoluzzjoni ma tkunx adottat deċiżjoni li tiddetermina l-MREL fir-rigward ta’ istituzzjoni jew entità, dak l-objettiv ma jkunx rilevanti. B’hekk istituzzjonijiet jew entitajiet li għalihom ma tkun ġiet adottata l-ebda deċiżjoni li tiddetermina l-MREL jenħtieġ li ma jkunux meħtieġa jiksbu l-permess minn qabel tal-awtorità ta’ riżoluzzjoni biex iwettqu s-sejħa, it-tifdija, il-ħlas lura jew ix-xiri mill-ġdid ta’ obbligazzjonijiet li jissodisfaw ir-rekwiżiti ta’ eliġibbiltà għall-MREL.

(11)

Hemm entitajiet ta’ likwidazzjoni li għalihom l-awtorità ta’ riżoluzzjoni tista’ tqis li jenħtieġ li l-MREL jaqbeż l-ammont għall-assorbiment tat-telf fejn tali ammont ogħla jkun meħtieġ biex jipproteġi l-istabbiltà finanzjarja jew biex jindirizza r-riskju ta’ kontaġju għas-sistema finanzjarja, inkluż fir-rigward tal-kapaċità ta’ finanzjament ta’ skemi ta’ garanzija tad-depożiti. Huwa biss f’dawk is-sitwazzjonijiet li jenħtieġ li awtorità ta’ riżoluzzjoni tkun tista’ tiddetermina b’mod proporzjonat l-MREL għall-entità ta’ likwidazzjoni, li jenħtieġ li jikkonsisti minn ammont suffiċjenti biex jassorbi t-telf, miżjud bl-ammont strettament meħtieġ biex jiġu indirizzati kif xieraq ir-riskji potenzjali identifikati mill-awtorità ta’ riżoluzzjoni. L-entità ta’ likwidazzjoni mbagħad jenħtieġ li tikkonforma mal-MREL u jenħtieġ li ma tkunx eżentata mir-reġim ta’ permess minn qabel stabbilit fl-Artikolu 77(2) u l-Artikolu 78a tar-Regolament (UE) Nru 575/2013. Entitajiet intermedji li jappartjenu għall-istess grupp ta’ riżoluzzjoni bħall-entità ta’ likwidazzjoni kkonċernata jenħtieġ li jibqgħu meħtieġa li jnaqqsu mir-riżorsi eliġibbli għall-MREL intern tagħhom il-holdings tagħhom ta’ riżorsi eliġibbli għall-MREL intern maħruġa minn dik l-entità ta’ likwidazzjoni. Barra minn hekk, peress li l-proċedimenti ta’ likwidazzjoni jseħħu fil-livell tal-entità ġuridika, l-entitajiet ta’ likwidazzjoni li għadhom soġġetti għall-MREL jenħtieġ li jikkonformaw ma’ dak ir-rekwiżit fuq bażi individwali biss. Fl-aħħar nett, ċerti rekwiżiti ta’ eliġibbiltà relatati mas-sjieda tal-obbligazzjoni kkonċernata mhumiex rilevanti peress li mingħajr l-eżerċizzju tas-setgħat ta’ valwazzjoni negattiva u ta’ konverżjoni, ma jkunx hemm bżonn li jiġi ppreservat il-kontroll tas-sussidjarja mill-entità ta’ riżoluzzjoni. Għalhekk, jenħtieġ li dawk ir-rekwiżiti ta’ eliġibbiltà ma japplikawx.

(12)

Skont l-Artikolu 45i tad-Direttiva 2014/59/UE, l-istituzzjonijiet u l-entitajiet għandhom jirrapportaw lill-awtoritajiet kompetenti u ta’ riżoluzzjoni tagħhom il-livelli ta’ obbligazzjonijiet eliġibbli u obbligazzjonijiet b’kapaċità ta’ rikapitalizzazzjoni interna u l-kompożizzjoni ta’ dawk l-obbligazzjonijiet, u jiddivulgaw dik l-informazzjoni lill-pubbliku, flimkien mal-livell tal-MREL tagħhom, fuq bażi regolari. Għall-entitajiet ta’ likwidazzjoni, ma huwa meħtieġ l-ebda rapportar jew divulgazzjoni bħal dawn. Madankollu, biex tiġi żgurata l-applikazzjoni trasparenti tal-MREL, dawk l-obbligi ta’ rapportar u divulgazzjoni jenħtieġ li japplikaw ukoll għall-entitajiet ta’ likwidazzjoni li għalihom l-awtorità ta’ riżoluzzjoni tiddetermina li l-MREL jenħtieġ li jkun ogħla mill-ammont suffiċjenti biex jassorbi t-telf. F’konformità mal-prinċipju tal-proporzjonalità, l-awtorità ta’ riżoluzzjoni jenħtieġ li tiżgura li dawk l-obbligi ma jmorrux lil hinn minn dak li huwa meħtieġ għall-monitoraġġ tal-konformità mal-MREL.

(13)

Biex tiġi żgurata l-konsistenza, l-emendi għar-Regolament (UE) Nru 806/2014 u l-miżuri nazzjonali li jittrasponu l-emendi għad-Direttiva 2014/59/UE jenħtieġ li japplikaw mill-istess data. Madankollu, huwa xieraq li tiġi prevista data ta’ applikazzjoni aktar bikrija fir-rigward tal-emendi għad-dispożizzjonijiet li jikkonċernaw il-possibbiltà ta’ konformità mal-MREL intern konsolidat, sabiex tinqeda l-ħtieġa li l-awtoritajiet ta’ riżoluzzjoni jadottaw deċiżjonijiet ġodda li jiddeterminaw l-MREL għal dak il-għan u biex tiżdied iċ-ċertezza legali għall-gruppi bankarji li jkunu soġġetti għal dik id-dispożizzjoni fid-dawl tal-iskadenza ġenerali tal-konformità mal-MREL tal-1 ta’ Jannar 2024 stabbilita fid-Direttiva 2014/59/UE u r-Regolament (UE) Nru 806/2014. Għal dik ir-raġuni, ir-regoli l-ġodda dwar l-MREL intern konsolidat skont ir-Regolament (UE) Nru 806/2014 jenħtieġ li japplikaw jum wara d-data tad-dħul fis-seħħ ta’ din id-Direttiva emendatorja. Dan jindika wkoll lill-gruppi bankarji u l-awtoritajiet ta’ riżoluzzjoni kollha li għalihom japplikaw id-Direttiva 2014/59/UE u r-Regolament (UE) Nru 806/2014 li jistgħu jkunu meħtieġa miżuri biex jitnaqqas il-perjodu mill-1 ta’ Jannar 2024 sad-data tal-applikazzjoni tal-miżuri nazzjonali li jittrasponu d-dispożizzjonijiet ta’ din id-Direttiva emendatorja.

(14)

Minħabba li l-objettivi ta’ din id-Direttiva, jiġifieri li jiġi aġġustat it-trattament tal-entitajiet ta’ likwidazzjoni skont il-qafas tal-MREL u l-possibbiltà li awtoritajiet ta’ riżoluzzjoni jiddeterminaw l-MREL intern fuq bażi konsolidata, ma jistgħux jintlaħqu b’mod suffiċjenti mill-Istati Membri iżda jistgħu pjuttost, billi jiġu emendati r-regoli li diġà huma stabbiliti fil-livell tal-Unjoni, jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, din id-Direttiva ma tmurx lil hinn minn dak li huwa meħtieġ sabiex jinkisbu dawk l-objettivi.

(15)

Għalhekk, id-Direttiva 2014/59/UE u r-Regolament (UE) Nru 806/2014 jenħtieġ li jiġu emendati skont dan,

(1)

fl-Artikolu 2(1), jiddaħħal il-punt li ġej:

;

(2)

l-Artikolu 45c huwa emendat kif ġej:

(3)

l-Artikolu 45f huwa emendat kif ġej:

(4)

fl-Artikolu 45i, il-paragrafu 4 huwa ssostitwit b’dan li ġej:

(5)

fl-Artikolu 45j, il-paragrafu 1 huwa ssostitwit b’dan li ġej:

(1)

fl-Artikolu 3(1), jiddaħħal il-punt li ġej:

;

(2)

l-Artikolu 12d huwa emendat kif ġej:

(3)

l-Artikolu 12g huwa emendat kif ġej: