Il-Ġurnal Uffiċjali |
MT Is-serje L |
2024/1040 |
2.4.2024 |
REGOLAMENT TA’ IMPLIMENTAZZJONI TAL-KUMMISSJONI (UE) 2024/1040
tat-27 ta’ Marzu 2024
li jimponi dazju anti-dumping definittiv fuq l-importazzjonijiet ta’ ċertu polietilentereftalat li joriġinaw mir-Repubblika tal-Poplu taċ-Ċina
IL-KUMMISSJONI EWROPEA
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2016/1036 tal-Parlament Ewropew u tal-Kunsill tat-8 ta’ Ġunju 2016 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Unjoni Ewropea, u b’mod partikolari l-Artikolu 9(4) tiegħu,
Billi:
1. PROĊEDURA
1.1. Bidu
(1) |
Fit-30 ta’ Marzu 2023, il-Kummissjoni Ewropea (“il-Kummissjoni”) bdiet investigazzjoni anti-dumping fir-rigward tal-importazzjonijiet tal-polietilentereftalat (“PET”) li joriġinaw mir-Repubblika tal-Poplu taċ-Ċina (“il-pajjiż ikkonċernat” jew “ir-RPĊ”) fuq il-bażi tal-Artikolu 5 tar-Regolament (UE) 2016/1036 tal-Parlament Ewropew u tal-Kunsill (“ir-Regolament bażiku”) (1). Hija ppubblikat Notifika tal-Bidu f’Il-Ġurnal Uffiċjali tal-Unjoni Ewropea (2) (“in-Notifika tal-Bidu”). |
(2) |
Il-Kummissjoni bdiet l-investigazzjoni wara lment ippreżentat fl-14 ta’ Frar 2023 minn PET Europe (“l-ilmentatur”). L-ilment sar f’isem l-industrija tal-Unjoni tal-PET fis-sens tal-Artikolu 5(4) tar-Regolament bażiku. L-ilment kien fih evidenza ta’ dumping u tat-theddida ta’ dannu li tirriżulta li kienet biżżejjed sabiex tiġġustifika l-bidu tal-investigazzjoni. |
1.2. Reġistrazzjoni
(3) |
Kif stabbilit fil-premessi (3) u (4) tar-Regolament provviżorju, il-Kummissjoni ddeċidiet li ma tirreġistrax l-importazzjonijiet tal-PET li joriġinaw mir-RPĊ skont l-Artikolu 14(5) u 14(5a) tar-Regolament bażiku. |
(4) |
Fil-kummenti tiegħu dwar id-divulgazzjoni provviżorja, l-ilmentatur argumenta li, fil-premessa (3) tar-Regolament provviżorju, il-Kummissjoni fixklet id-deċiżjoni dwar ir-reġistrazzjoni mal-applikazzjoni retroattiva. Bħala raġuni għaliex ma imponietx reġistrazzjoni, il-Kummissjoni tat in-nuqqas ta’ żieda fl-importazzjonijiet. L-ilmentatur argumenta li dan huwa kriterju rilevanti għall-Artikolu 10(4) (impożizzjoni retroattiva) u mhux għall-Artikolu 14(5) tar-Regolament bażiku. Għalhekk, fil-fehma tal-ilmentatur, il-Kummissjoni żbaljat fl-applikazzjoni tar-Regolament bażiku. |
(5) |
Ta’ min jinnota li tabilħaqq, l-Artikolu 14(5) tar-Regolament bażiku ma jagħmilx referenza espliċita għall-Artikolu 10(4) tar-Regolament bażiku. Madankollu, l-Artikolu 14(5) jindika b’mod ċar li l-għan tar-reġistrazzjoni tal-importazzjonijiet huwa li l-miżuri jkunu jistgħu sussegwentement jiġu applikati kontra dawk l-importazzjonijiet. Għalhekk, biex tiġi ġġustifikata r-reġistrazzjoni tal-importazzjonijiet skont l-Artikolu 14(5), irid ikun hemm biżżejjed evidenza li l-kundizzjonijiet tal-Artikolu 10(4) tar-Regolament bażiku jistgħu jkunu ssodisfati. Il-pretensjoni tal-ilmentatur hija għalhekk miċħuda. |
1.3. Miżuri provviżorji
(6) |
F’konformità mal-Artikolu 19a tar-Regolament bażiku, fil-31 ta’ Ottubru 2023, il-Kummissjoni pprovdiet lill-partijiet b’sommarju tad-dazji provviżorji proposti u bid-dettalji dwar il-kalkolu tal-marġnijiet tad-dumping u tal-marġnijiet adegwati sabiex jitneħħa d-dannu għall-industrija tal-Unjoni. Il-partijiet interessati ġew mistiedna jikkummentaw dwar l-akkuratezza tal-kalkoli fi żmien 3 ijiem tax-xogħol. Ma wasal l-ebda kumment dwar il-preċiżjoni tal-kalkoli. |
(7) |
Fis-27 ta’ Novembru 2023, il-Kummissjoni imponiet dazji anti-dumping provviżorji fuq l-importazzjonijiet tal-PET li joriġinaw mir-RPĊ permezz tar-Regolament ta’ Implimentazzjoni tal-Kummissjoni (UE) 2023/2659 (3) (“ir-Regolament provviżorju”). |
1.4. Proċedura sussegwenti
(8) |
Wara d-divulgazzjoni tal-fatti u l-kunsiderazzjonijiet essenzjali li fuq il-bażi tagħhom ġew imposti miżuri anti-dumping provviżorji (“divulgazzjoni provviżorja”), l-ilmentatur, il-produtturi esportaturi u l-assoċjazzjoni tagħhom, l-utenti u importatur mhux relatat ippreżentaw kummenti. |
(9) |
Il-partijiet li talbu li jinstemgħu ngħataw din l-opportunità. Saru seduti ta’ smigħ ma’ Svepol u PET Europe. |
(10) |
Il-Kummissjoni kompliet tfittex u tivverifika l-informazzjoni kollha li qieset bħala neċessarja għas-sejbiet finali tagħha. Meta waslet għas-sejbiet definittivi tagħha, il-Kummissjoni kkunsidrat il-kummenti preżentati mill-partijiet interessati u rrevediet il-konklużjonijiet proviżorji tagħha meta kien xieraq. Sabiex ikollha għad-dispożizzjoni tagħha data aktar komprensiva dwar il-prezzijiet tal-bejgħ, il-kost tal-produzzjoni u l-profittabbiltà tal-Unjoni fil-perjodu ta’ wara l-investigazzjoni, il-produtturi tal-Unjoni inklużi fil-kampjun intalbu jipprovdu data addizzjonali. Il-produtturi kollha tal-Unjoni inklużi fil-kampjun ipprovdew l-informazzjoni mitluba. |
(11) |
Wara d-divulgazzjoni provviżorja kif ukoll id-divulgazzjoni finali, UNESDA (4), assoċjazzjoni tal-utenti, sostniet li l-Kummissjoni kellha ttemm l-investigazzjoni ladarba deher ċar li l-ilment ma wera l-ebda dannu u li mhuwiex preċiż u mhux komplut bid-data dwar is-segment tal-PET riċiklat (“rPET”). |
(12) |
Ta’ min ifakkar li l-ilment allega theddida ta’ dannu aktar milli l-eżistenza ta’ dannu materjali u l-allegazzjonijiet li saru fl-ilment ġew ikkonfermati mill-investigazzjoni sussegwenti. Kif stabbilit fil-premessa (204) tar-Regolament provviżorju, biex il-Kummissjoni timponi dazji anti-dumping, huwa biżżejjed li l-investigazzjoni tikkonkludi li hemm theddida ta’ dannu materjali skont l-Artikolu 3(9) tar-Regolament bażiku. Kif stabbilit fil-premessa (15) tar-Regolament provviżorju, il-Kummissjoni qieset id-data stmata dwar l-industrija tar-rPET bħala evidenza suffiċjenti fl-istadju tal-ilment. Għalhekk, il-pretensjonijiet tal-UNESDA ġew miċħuda. |
(13) |
L-UNESDA sostniet li r-Regolament proviżorju ġie adottat bi ksur tad-drittijiet proċedurali dovuti. L-UNESDA rreferiet għall-fatt li d-data dwar id-dannu ġiet mibdula f’Ottubru 2023 u d-deċiżjoni li jiġu imposti dazji proviżorji ttieħdet meta l-partijiet interessati ma setgħux aktar jipprovdu kummenti. L-UNESDA ddikjarat li l-utenti ġew miċħuda l-opportunità li jipprovdu kummenti wara l-preżentazzjoni tad-data dwar id-dannu mill-ilmentatur f’Ottubru 2023. L-UNESDA tenniet l-argument tagħha fit-tweġiba għad-divulgazzjoni finali. |
(14) |
L-ewwel nett, ta’ min jinnota li d-data finali dwar id-dannu dwar l-indikaturi makroekonomiċi ġiet ipprovduta biss f’Ottubru 2023, peress li l-Kummissjoni għamlet analiżi supplimentari tas-segment tar-rPET, li hija dinamika ħafna u tikkonċerna aktar minn 50 produttur ta’ daqsijiet li jvarjaw u b’kapaċitajiet li jinbidlu ta’ spiss, ipproċessat serje ta’ sottomissjonijiet magħmula minn partijiet interessati u wettqet proċess estensiv ta’ defiċjenza mal-ilmentatur biex tasal għal indikaturi makroekonomiċi stabbiliti b’mod oġġettiv u rappreżentattivi għall-industrija kollha tal-PET, inkluż is-segment tar-rPET. Barra minn hekk, kemm l-utenti kif ukoll partijiet interessati oħra ngħataw biżżejjed opportunitajiet biex jeżerċitaw kif xieraq id-drittijiet proċedurali tagħhom matul il-proċedimenti, inkluż permezz ta’ seduta ta’ smigħ mas-servizzi tal-Kummissjoni, għadd kbir ta’ sottomissjonijiet bil-miktub li saru sa Ottubru 2023 u kummenti għar-Regolament provviżorju. Barra minn hekk, id-data dwar id-dannu ppreżentata f’Ottubru 2023 kienet riflessa fid-divulgazzjoni provviżorja, li dwarha l-partijiet interessati kollha ntalbu jikkummentaw. Tabilħaqq, l-UNESDA pprovdiet kummenti dwar din id-data. L-allegazzjoni li l-UNESDA ġiet miċħuda opportunità li tipprovdi kummenti għalhekk tqieset bħala żbaljata u mhux sostanzjata. |
(15) |
Il-Kummissjoni infurmat lill-partijiet interessati kollha dwar il-fatti u l-kunsiderazzjonijiet essenzjali li abbażi tagħhom kien beħsiebha timponi dazju anti-dumping definittiv fuq l-importazzjonijiet ta’ PET li joriġinaw mir-RPĊ (“divulgazzjoni finali”). Il-partijiet kollha ngħataw perjodu li matulu setgħu jikkummentaw dwar id-divulgazzjoni finali. |
(16) |
Il-partijiet li talbu dan ingħataw ukoll l-opportunità li jinstemgħu wara d-divulgazzjoni finali. Saret seduta ta’ smigħ ma’ Svepol fid-29 ta’ Frar 2024. |
(17) |
Fit-tweġiba tagħha għad-divulgazzjoni finali, Svepol iddikjarat li żewġ aspetti tal-imġiba tal-Kummissjoni f’din l-investigazzjoni kisru d-drittijiet tad-difiża ta’ Svepol u ta’ partijiet interessati oħra. |
(18) |
L-ewwel nett, Svepol ikkontestat ir-rilaxx tad-Dokument ta’ Divulgazzjoni Ġenerali (GDD) filgħaxija qabel il-bidu tal-vaganza Ċiniża tas-Sena l-Ġdida, minkejja li ma kien hemm l-ebda restrizzjoni ta’ żmien proċedurali immedjata u urġenti biex isir dan. Skont Svepol, il-perjodu ta’ btala pubblika Ċiniża interferixxa b’mod sinifikanti u llimita l-kapaċità ta’ Svepol u tal-produtturi esportaturi li jeżerċitaw id-dritt tagħhom li jinstemgħu u li jissottomettu evidenza bil-miktub dwar il-GDD fil-perjodu ta’ żmien ipprovdut mill-Kummissjoni. |
(19) |
Il-Kummissjoni fakkret li l-investigazzjonijiet mibdija skont l-Artikolu 5 tar-Regolament bażiku jeħtieġ li jitlestew fi ħdan skadenzi legali stretti preskritti mir-Regolament bażiku li jinvolvu wkoll għadd ta’ passi proċedurali interni u esterni. Il-Kummissjoni osservat li f’dan il-każ l-iskadenza minima ta’ 10 ijiem biex isiru kummenti dwar id-divulgazzjoni finali prevista fl-Artikolu 20(5) tar-Regolament bażiku ġiet irrispettata kif xieraq. Fl-istess ħin, skont l-istess Artikolu, l-iskadenza għandha tiġi stabbilita “b’kunsiderazzjoni xierqa għall-urġenza tal-kwistjoni”. L-iffissar tal-iskadenza għat-tweġibiet għall-GDD mill-partijiet interessati għandu jitqies f’dan l-isfond. |
(20) |
Barra minn hekk, iċ-ċirkostanzi li fihom il-partijiet interessati jistgħu jiffaċċjaw restrizzjonijiet fir-rispett tal-iskadenzi stabbiliti mill-Kummissjoni huma debitament riflessi u jingħataw estensjonijiet għall-iskadenzi, fejn debitament ġustifikati. Dan ġie spjegat fil-punt 9 tan-Notifika ta’ Investigazzjoni li jipprevedi li “(r)igward il-limiti ta’ żmien għall-preżentazzjoni ta’ informazzjoni oħra speċifikata fin-Notifika ta’ Bidu, l-estensjonijiet se jkunu limitati għal 3 ijiem dment li ma jintweriex li hemm ċirkostanzi eċċezzjonali.” . (5) F’dan il-każ, Svepol ingħatat estensjoni ta’ 3 ijiem abbażi tal-ġustifikazzjoni pprovduta u fin-nuqqas ta’ ċirkustanzi eċċezzjonali. Il-Kummissjoni pproċediet kompletament f’konformità man-Notifika ta’ Bidu u l-prattika standard tagħha. Għaldaqstant, il-pretensjoni li l-Kummissjoni kienet tikser id-drittijiet tad-difiża ta’ Svepol jew ta’ partijiet interessati oħra ma kinitx fondata u kellha tiġi miċħuda. |
(21) |
It-tieni, Svepol ikkritikat il-fatt li sommarji mhux kunfidenzjali sinifikanti tal-kwestjonarji ta’ wara l-PI tal-produtturi tal-Unjoni saru disponibbli biss għall-partijiet interessati wara t-talba ta’ Svepol u xahrejn wara s-sottomissjoni tad-data sensittiva applikabbli mill-produtturi tal-Unjoni. Barra minn hekk, skont Svepol, il-fatt li l-partijiet interessati ngħataw biss is-sommarji mhux kunfidenzjali sinifikanti tal-informazzjoni sensittiva – li ġiet invokata u msemmija mill-Kummissjoni fil-GDD – erbat ijiem wara l-pubblikazzjoni tal-GDD, neċessarjament affettwa l-kapaċità tal-partijiet interessati li jippreżentaw evidenza u li jikkummentaw dwar il-GDD fil-perjodu ta’ żmien ipprovdut mill-Kummissjoni. |
(22) |
Huwa osservat li, l-ewwel nett, il-GDD ipprovda d-data aggregata preċiża tal-produtturi tal-Unjoni fil-kampjun dwar il-prezz tal-bejgħ, il-kost tal-produzzjoni u l-profittabbiltà filwaqt li s-sommarji mhux kunfidenzjali sinifikanti tat-tweġibiet għall-kwestjonarju kien fihom biss indiċijiet jew firxiet dwar din l-informazzjoni sensittiva u speċifika għall-kumpaniji. It-tieni, kif iddikjarat minn Svepol, in-nuqqas ta’ sommarji sinifikanti ġie rrimedjat erbat ijiem wara d-divulgazzjoni tal-GDD, u ħalla lil Svepol 9 ijiem biex tikkunsidrah u tinkludi l-osservazzjonijiet rilevanti fil-kummenti tagħha dwar id-divulgazzjoni finali. It-tielet, kif stabbilit fil-premessa (20), Svepol ingħatat estensjoni ta’ 3 ijiem għal tweġiba għad-divulgazzjoni finali. Għalhekk, peress li dan l-aspett proċedurali ġie rrimedjat mingħajr dewmien, ma jistax jaffettwa d-drittijiet proċedurali tal-partijiet interessati f’dan il-każ u l-argumenti ta’ Svepol kellhom jiġu miċħuda skont dan. |
1.5. Kampjunar
(23) |
Ma wasal l-ebda kumment dwar il-kampjunar. Għalhekk, ġew ikkonfermati l-konklużjonijiet fil-premessi minn (18) sa (27) tar-Regolament provviżorju. |
2. PRODOTT IKKONĊERNAT U PRODOTT SIMILI
(24) |
Il-premessa (33) tar-Regolament provviżorju stipulat id-definizzjoni tal-prodott ikkonċernat. Il-prodott li qed jiġi investigat huwa l-polietilentereftalat (“PET”), li għandu viskożità ta’ 78 ml/g jew ogħla, skont l-Istandard ISO 1628-5. Wara d-determinazzjoni tal-viskożità, in-numru ta’ viskożità tal-PET jitkejjel fuq soluzzjoni ta’ PET f’ċertu solvent. L-istandard ISO jispeċifika ħames kombinazzjonijiet differenti ta’ solventi li jistgħu jintużaw għall-kejl:
|
(25) |
Filwaqt li kull wieħed mis-solventi użati jista’ jagħti numru ta’ viskożità kemxejn differenti, jistgħu jintużaw formuli matematiċi biex jikkonvertu n-numru ta’ viskożità miksub f’solvent wieħed għan-numru ta’ viskożità li kien jinkiseb bl-użu ta’ solvent ieħor. |
(26) |
Ta’ min jinnota li skont l-istandard DIN 53728 applikabbli qabel, sostitwit bl-ISO 1628-5, saret referenza biss għas-solvent fenol/1,2-diklorobenżen (50/50), elenkat taħt (a) fil-premessa (24) hawn fuq. |
(27) |
Għalhekk, għal raġunijiet ta’ ċarezza, applikazzjoni uniformi mill-awtoritajiet doganali tal-Istati Membri u ta’ konsistenza mal-istandard industrijali preċedenti, huwa ċċarat aktar għall-finijiet ta’ dawn il-proċedimenti li l-viskożità tal-PET għandha titkejjel fis-solvent fenol/1,2-diklorobenżen (50/50) jew tiġi konvertita għalih. |
(28) |
Fir-rigward tal-ambitu tal-prodott, bi tweġiba għad-divulgazzjoni provviżorja, il-produttur esportatur Ceville, appoġġat mill-produttur esportatur INCOM Resources Recovery (Tianjin) Co., Ltd, tenna t-talba tiegħu għall-esklużjoni tal-rPET mill-ambitu tal-prodott tal-investigazzjoni, kif stabbilit fil-premessa (38) tar-Regolament provviżorju. Iż-żewġ partijiet interessati rreferew għal ipprezzar differenti għall-rPET meta mqabbel mal-PET verġni (“vPET”), għall-objettivi ta’ sostenibbiltà tal-Unjoni marbuta ma’ żieda fl-użu tal-rPET u mal-fatt li bħalissa ma hemm l-ebda importazzjoni ta’ rPET mir-RPĊ lejn l-Unjoni. |
(29) |
Il-prodott ikkonċernat kif definit mill-Kummissjoni kopra kemm l-importazzjonijiet tal-vPET kif ukoll tal-rPET mir-RPĊ, li jikkompetu mal-vPET u l-rPET prodotti mill-industrija tal-Unjoni. Il-fatt li żewġ tipi ta’ prodotti jista’ jkollhom ipprezzar differenti ma jiġġustifikax esklużjoni mill-ambitu ta’ investigazzjoni. Il-Kummissjoni sabet li ż-żewġ tipi għandhom l-istess karatteristiċi fiżiċi, tekniċi u kimiċi, li jikkompetu ma’ xulxin u li hemm grad ta’ interkambjabbiltà bejn il-vPET u l-rPET (ara, pereżempju, il-premessi (254) u (293) tar-Regolament provviżorju). Dawn is-sejbiet mhumiex imqiegħda f’dubju minn differenza fl-ipprezzar. Għalhekk, ma jkunx xieraq u jkun ineffettiv li l-rPET jiġi eskluż mill-ambitu tal-investigazzjoni. Barra minn hekk, l-allegazzjoni li ma kienx hemm importazzjonijiet ta’ rPET ma hijiex korretta. Anki jekk matul il-perjodu tal-investigazzjoni l-importazzjonijiet tal-rPET mir-RPĊ kienu limitati, dawn kienu preżenti. Fi kwalunkwe każ, kif innotat hawn fuq, il-Kummissjoni kkonkludiet li ż-żewġ tipi ta’ prodotti kienu f’kompetizzjoni. Għalhekk, l-importazzjonijiet li huma l-oġġett ta’ dumping tal-PET mir-RPĊ, irrispettivament jekk humiex rPET jew vPET, instabu li jwasslu għal theddida ta’ dannu għall-produtturi tal-PET tal-Unjoni. |
(30) |
Fin-nuqqas ta’ kwalunkwe kumment ieħor dwar l-ambitu tal-prodott u l-prodott simili, il-konklużjonijiet milħuqa fil-premessi minn (33) sa (39) tar-Regolament proviżorju huma kkonfermati. |
3. DUMPING
(31) |
Wara d-divulgazzjoni provviżorja, produttur esportatur wieħed fil-kampjun, Sanfame Group, u importatur wieħed, Svepol, ikkummentaw dwar is-sejbiet provviżorji tad-dumping. |
3.1. Valur normali
(32) |
Id-dettalji tal-kalkolu tal-valur normali ġew stabbiliti fil-premessi minn (40) sa (138) tar-Regolament provviżorju. |
3.1.1. Eżistenza ta’ distorsjonijiet sinifikanti
(33) |
Wara l-pubblikazzjoni tal-miżuri provviżorji, is-Sanfame Group ippreżenta kummenti dwar l-applikazzjoni tal-Artikolu 2(6a) tar-Regolament bażiku fl-investigazzjoni attwali. Sanfame Group argumenta li xi fatturi ta’ produzzjoni għall-produzzjoni tal-PET kienu parzjalment importati minn pajjiżi terzi għajr ir-RPĊ li mhumiex affettwati minn distorsjonijiet u li l-Kummissjoni għalhekk missha użat il-prezzijiet attwali tal-importazzjoni mħallsa mill-produttur għall-materja prima importata minflok ma applikat parametru referenzjarju għal dawn il-kostijiet, peress li l-kostijiet reali kienu jirriflettu prezzijiet li ma humiex distorti peress li huma xprunati mill-forzi tas-suq. |
(34) |
Il-Kummissjoni rrifjutat dan l-argument. Għalkemm il-grupp Sanfame indika fit-tweġiba tiegħu għall-kwestjonarju li huwa importa xi materja prima użata għall-produzzjoni tal-PET minn pajjiżi oħra minbarra r-RPĊ, ma indikax b’mod ċar u konsistenti liema parti minn dawn il-kostijiet tinkiseb minn barra r-RPĊ u liema minn dawn il-kostijiet ma humiex soġġetti għal distorsjonijiet. Għalhekk, il-Grupp Sanfame naqas milli jissostanzja b’evidenza xierqa l-pretensjoni tiegħu li jqis il-prezzijiet attwali għal ċerti ammonti ta’ materja prima importata skont il-kundizzjonijiet tas-suq. Għalhekk, fin-nuqqas ta’ evidenza li l-materja prima importata ntużat għall-produzzjoni tal-PET għall-importazzjonijiet lejn l-Unjoni, il-Kummissjoni ddeċidiet li tuża prezzijiet referenzjarji għall-kwantitajiet kollha tal-materja prima użata fil-produzzjoni tal-PET u ċaħdet il-pretensjoni tal-kumpanija. |
3.1.2. Sorsi użati biex jiġu stabbiliti l-SG&A u l-profitt mingħajr distorsjoni
(35) |
Wara l-pubblikazzjoni tal-miżuri provviżorji, Sanfame Group u Svepol ippreżentaw kummenti dwar l-għażla tal-Kummissjoni li tuża d-data tal-kumpanija MPI Polyester Industries (“MPI”) biex tiddetermina l-parametru referenzjarju għall-SG&A u l-profitt fil-pajjiż rappreżentattiv tal-Malażja. |
(36) |
Sanfame Group u Svepol tennew il-kummenti tagħhom għat-tieni nota dwar is-sorsi użati għad-determinazzjoni tal-valur normali. B’żieda mal-argumenti preċedenti, Sanfame Group u Svepol argumentaw li n-natura integrata tal-produzzjoni ta’ Recron għamlitha indikatur aktar rappreżentattiv minn MPI. Svepol sostniet ukoll li Recron bdiet il-produzzjoni tagħha mill-paraksilen, b’mod simili għall-produtturi Ċiniżi inklużi fil-kampjun u dan għamel l-SG&A ta’ Recron indikattiv ta’ dak tal-produtturi Ċiniżi. |
(37) |
Barra minn hekk, Svepol sostniet li l-Kummissjoni ma ssostanzjatx għalfejn id-data finanzjarja ta’ MPI u Recron kellha tiġi ttrattata b’mod differenti. Svepol argumentat li għall-kuntrarju tal-konklużjonijiet provviżorji tal-Kummissjoni, ma kien hemm l-ebda indikazzjoni mis-sit web ta’ Recron li l-fokus ewlieni tagħha kien prodotti derivattivi kumplessi tal-poliester. Barra minn hekk, minbarra l-indikazzjoni tal-kapaċità tal-produzzjoni, is-sit web tal-MPI ma indikax li n-negozju ewlieni tagħha f’termini ta’ valur jew kost kien ir-reżina tal-PET. Pjuttost, is-sit web iddikjara li kemm l-impjant tar-reżina kif ukoll il-fabbrika tal-għażil kienu ġestiti b’mod attiv flimkien. Svepol argumentat ukoll li qatt ma semgħet b’MPI qabel din l-investigazzjoni, filwaqt li Recron kien produttur magħruf sew fl-industrija. |
(38) |
Barra minn hekk, Svepol sostniet li billi kkonkludiet b’mod provviżorju li l-livell tal-profitt u SG&A ta’ Recron ma kienx raġonevoli, il-Kummissjoni ma vvalutatx id-data b’mod oġġettiv. |
(39) |
Kif Sanfame Group ammetta fis-sottomissjoni tiegħu, l-informazzjoni disponibbli għall-pubbliku ta’ Recron ma ppermettietx li tiġi ddeterminata b’mod preċiż ir-rilevanza tal-PET, meta mqabbla mal-fatturat totali tal-kumpanija. Fi kliem ieħor, id-data faċilment disponibbli ma kinitx speċifika għan-negozju tal-PET. Il-Kummissjoni fittxet l-eqreb indikatur faċilment disponibbli, inkluża informazzjoni konsolidata tal-produttur(i) attiv(i), fost l-oħrajn, fin-negozju li jkopri l-prodott li qed jiġi investigat. Filwaqt li Recron tabilħaqq hija kumpanija fuq skala kbira, fuq is-sit web tagħha (6) hija indikat li hija fost l-akbar kumpaniji integrati tal-poliester u tat-tessuti fid-dinja, b’enfasi fuq prodotti derivattivi kumplessi tal-poliester. Min-naħa l-oħra, MPI hija ffukata l-aktar fuq il-manifattura tar-reżina tal-PET, kif indikat fuq is-sit web tagħha (7). Għalhekk, il-Kummissjoni kkonkludiet li MPI hija l-eqreb indikatur disponibbli faċilment u ddeċidiet li ma tużax id-data ta’ Recron. L-argument il-ġdid li n-natura integrata ta’ Recron kienet eqreb għan-natura tal-produtturi esportaturi Ċiniżi inklużi fil-kampjun ma bidilx din il-valutazzjoni. Kif diġà ġie deskritt, l-integrazzjoni testendi wkoll għal prodotti derivattivi kumplessi li huma l-fokus tal-attivitajiet ta’ Recron u li ma humiex parti mill-prodott li qed jiġi investigat u għalhekk l-istruttura tal-produzzjoni integrata ma kinitx ta’ natura komparabbli ma’ dik ta’ manifattur tar-reżina tal-PET. |
(40) |
Il-Kummissjoni għalhekk ikkonfermat id-deċiżjoni tagħha li tuża d-data ta’ MPI għad-determinazzjoni ta’ ammont raġonevoli ta’ SG&A u profitt u għall-kalkolu tagħha tal-valur normali. |
3.1.3. Prezz tal-esportazzjoni
(41) |
Id-dettalji tal-kalkolu tal-prezz tal-esportazzjoni ġew stabbiliti fil-premessi minn (139) sa (140) tar-Regolament provviżorju. Billi ma wasal l-ebda kumment, il-Kummissjoni kkonfermat is-sejbiet provviżorji tagħha. |
3.1.4. Tqabbil
(42) |
Id-dettalji dwar it-tqabbil tal-valur normali u l-prezz tal-esportazzjoni ġew stabbiliti fil-premessi minn (141) sa (142) tar-Regolament proviżorju. Billi ma wasal l-ebda kumment, il-Kummissjoni kkonfermat is-sejbiet provviżorji tagħha. |
3.1.5. Marġnijiet tad-dumping
(43) |
Wara li ċaħdet il-pretensjonijiet deskritti fil-premessi (33) u (35) hawn fuq, il-Kummissjoni kkonfermat il-kalkolu tal-marġni tad-dumping kif spjegat fil-premessa (144) tar-Regolament provviżorju. |
(44) |
Il-marġnijiet tad-dumping definittivi, espressi bħala perċentwal tal-prezz tal-kost, assigurazzjoni u nol (cost, insurance and freight, CIF) fil-fruntiera tal-Unjoni, bid-dazju mhux imħallas, huma kif ġej:
|
4. DANNU
4.1. Definizzjoni tal-industrija tal-Unjoni u tal-produzzjoni tal-Unjoni
(45) |
Fin-nuqqas ta’ kwalunkwe kumment fir-rigward tad-definizzjoni tal-industrija tal-Unjoni u l-produzzjoni tal-Unjoni, il-konklużjonijiet stipulati fil-premessi minn (150) sa (151) tar-Regolament proviżorju ġew ikkonfermati. |
4.2. Konsum tal-Unjoni
(46) |
Fin-nuqqas ta’ kummenti fir-rigward tal-konsum tal-Unjoni, il-konklużjonijiet stabbiliti fil-premessi minn (152) sa (155) tar-Regolament provviżorju ġew ikkonfermati. |
4.3. Importazzjonijiet mill-pajjiż ikkonċernat
(47) |
Fin-nuqqas ta’ kwalunkwe kumment fir-rigward tal-volum, is-sehem mis-suq u l-prezzijiet tal-importazzjonijiet mill-pajjiż ikkonċernat, il-Kummissjoni kkonfermat il-konklużjonijiet tagħha stipulati fil-premessi minn (156) sa (164) tar-Regolament provviżorju dwar dawn il-punti. |
4.4. Sitwazzjoni ekonomika tal-industrija tal-Unjoni
4.4.1. Rimarki ġenerali
(48) |
Ma wasal l-ebda kumment dwar din il-parti tar-Regolament proviżorju. |
4.4.2. Indikaturi makroekonomiċi
(49) |
Wara d-divulgazzjoni provviżorja, l-ilmentatur ipprovda verżjoni riveduta tad-data makroekonomika għall-ewwel trimestru tal-2023 (it-Tabella 14 tar-Regolament provviżorju), li tirrifletti l-aġġornamenti li saru għad-data sottostanti dwar il-produzzjoni tal-rPET mill-esperti tal-industrija ta’ Wood Mackenzie, li minnha ġew estrapolati ċ-ċifri tal-bejgħ tal-rPET. Din il-modifika wasslet għal tnaqqis fiċ-ċifri li jirrappreżentaw il-produzzjoni tal-PET tal-industrija tal-Unjoni b’madwar 33 700 tunnellata u tnaqqis fiċ-ċifri li jirrappreżentaw il-volum tal-bejgħ tal-PET tal-industrija tal-Unjoni b’aktar minn 32 100 tunnellata fi Q1 2023. Dan imbagħad irriżulta fi tnaqqis korrispondenti fiċ-ċifri li jirrappreżentaw il-konsum tal-Unjoni f’dak it-trimestru, ippreżentat fit-Tabella 14 tar-Regolament provviżorju. Madankollu, din il-modifika ma biddlitx ix-xejriet li ġew osservati u għalhekk ma affettwatx l-eżitu tal-valutazzjoni tal-Kummissjoni. Tabilħaqq, wara l-aġġornament fiċ-ċifri tal-importazzjoni għal Q1 2023 mill-Eurostat (minn 134 604 tunnellata għal 127 608 tunnellata), is-sehem mis-suq tal-industrija tal-Unjoni naqas b’madwar punt perċentwali wieħed fl-ewwel trimestru tal-2023 (minn 63 % għal 62 %), filwaqt li s-sehem mis-suq tal-importazzjonijiet Ċiniżi baqa’ fl-istess livell. |
(50) |
Skont l-UNESDA, id-data pprovduta mill-ilmentatur f’Ottubru 2023 (“id-data ta’ Ottubru”) u użata mill-Kummissjoni għad-determinazzjoni provviżorja tad-dannu injorat id-data fil-fajl, ipprovduta mill-UNESDA. L-UNESDA indikat differenzi sinifikanti fid-data pprovduta mill-ilmentatur matul l-investigazzjoni. |
(51) |
L-ewwel nett, id-data ta’ Ottubru pprovduta mill-ilmentatur irrappreżentat it-tweġiba finali tal-ilmentatur għall-kwestjonarju tal-Kummissjoni dwar il-makroindikaturi, li segwa għadd ta’ talbiet indirizzati lill-ilmentatur biex jiġu rettifikati d-defiċjenzi fid-data identifikati mill-Kummissjoni. Huwa enfasizzat li t-talbiet minħabba defiċjenza irriżultaw minn aktar ġbir ta’ informazzjoni mill-Kummissjoni u diversi sottomissjonijiet li saru matul l-investigazzjoni mill-partijiet interessati, prinċipalment mill-UNESDA. |
(52) |
It-tieni, id-data ta’ Ottubru rriflettiet data vverifikata fir-rigward tal-kumpaniji li kkooperaw u l-aħjar data disponibbli u b’bażi soda rigward il-produtturi tal-rPET tal-Unjoni. L-UNESDA naqset milli tissostanzja għal liema raġunijiet jenħtieġ li d-data ta’ Ottubru titqies bħala mhux korretta jew mhux rappreżentattiva. Hija naqset milli tispjega għaliex il-Kummissjoni jenħtieġ li minflok tirrikorri għall-użu ta’ data oħra, jew sa liema punt id-data msemmija mill-UNESDA kienet aktar dettaljata jew preċiża mid-data ta’ Ottubru. |
(53) |
Wara d-divulgazzjoni provviżorja kif ukoll dik finali, l-UNESDA qajmet dubji dwar ir-reviżjonijiet li saru għad-data makroekonomika u indikat li l-ilmentatur issottovaluta l-bejgħ, il-produzzjoni u l-konsum tal-Unjoni billi uża informazzjoni minn diversi sorsi, irdoppja l-użu ristrett u ħallat id-data għall-vPET u l-rPET għal dak l-għan. |
(54) |
L-allegazzjonijiet tal-UNESDA ta’ manipulazzjoni tad-data kienu bla bażi. Il-Kummissjoni għamlet sforz kbir biex tindirizza d-defiċjenzi li nstabu fid-data makroekonomika, prinċipalment fir-rigward tal-rPET. Il-partijiet interessati kollha pprovdew il-fehmiet u d-data tagħhom u l-Kummissjoni ddeċidiet li tuża d-data minn Wood Mackenzie u PRE (Plastic Recyclers Europe – assoċjazzjoni umbrella tal-produtturi tal-rPET) rispettivament għar-raġunijiet stabbiliti fil-premessi (56)-(57) hawn taħt. Il-korrezzjonijiet li rriżultaw fl-aġġornament ta’ Ottubru ntalbu mill-Kummissjoni biex jiġi żgurat li d-data użata kienet tirrifletti t-tweġibiet permanenti u/jew id-data vverifikata tal-produtturi tal-Unjoni inklużi fil-kampjun. |
(55) |
Barra minn hekk, l-UNESDA rreferiet għar-Rapport dwar is-Suq tal-PET tal-2022 u r-rata operattiva tal-produtturi tal-rPET inkluża fih bħala bażi għall-istima tal-produzzjoni u kkontestat l-użu tad-data ta’ Wood Mackenzie għall-istima tal-produzzjoni tal-rPET. |
(56) |
Il-Kummissjoni qieset kif xieraq id-diversi sorsi eżistenti, filwaqt li fittxet li tidentifika l-aktar indikatur affidabbli u oġġettiv fin-nuqqas ta’ data preċiża dwar l-rPET. L-użu tar-Rapport dwar is-Suq tal-PET tal-2022 instab li ma kienx xieraq għal żewġ raġunijiet: Huwa uża biss l-2020 bħala s-sena ta’ referenza għall-istabbiliment tal-kapaċità operattiva, u inkludiet data għar-Renju Unit, l-Iżvizzera u n-Norveġja. Min-naħa l-oħra, id-data ta’ Wood Mackenzie kienet tinkludi ċifri annwali għall-konsum tal-frak (jiġifieri l-produzzjoni tal-rPET) u kienet tikkonċerna speċifikament il-produzzjoni tal-industrija tal-Unjoni. Wood Mackenzie saħansitra għamlet distinzjoni bejn il-produzzjoni ta’ rPET ta’ grad alimentari, mhux ta’ grad alimentari, u r-riċiklaġġ kimiku u għalhekk b’mod ġenerali tqieset bħala sors ta’ informazzjoni aktar affidabbli u b’bażi soda. Fi kwalunkwe każ, anki jekk ir-Rapport dwar is-Suq tal-PET jintuża għal stima tal-produzzjoni tal-rPET, l-impatt fuq l-indikaturi jkun minimu (8) u ma jibdilx il-konklużjonijiet li waslet għalihom il-Kummissjoni għall-finijiet tad-determinazzjoni tat-theddida ta’ dannu f’dan il-każ. |
(57) |
Barra minn hekk, l-UNESDA sostniet li l-Kummissjoni ma kkunsidratx informazzjoni dettaljata dwar il-produtturi tal-rPET fl-Unjoni, inkluża l-identifikazzjoni tal-kumpaniji u l-kapaċità tal-produzzjoni tagħhom għall-perjodu kkunsidrat. Madankollu, l-UNESDA kkontradixxiet lilha nnifisha billi sostniet li l-informazzjoni annwali aggregata dwar il-kapaċità tal-produzzjoni fl-Unjoni li pprovdiet PRE (9), u li fl-aħħar mill-aħħar intużat mill-Kummissjoni fil-valutazzjoni tagħha, kienet taqbel eżattament mad-data pprovduta mill-utenti. Kif stabbilit qabel, il-Kummissjoni evalwat diversi sorsi u ddeċidiet li tuża dik li kienet meqjusa bħala l-aktar affidabbli – li fil-każ tal-kapaċità tal-produzzjoni tal-rPET kienet id-data ta’ assoċjazzjoni umbrella li tirrappreżenta l-produtturi tal-rPET (PRE). |
(58) |
Fin-nuqqas ta’ kummenti oħra, il-konklużjonijiet stipulati fil-premessi minn (170) sa (182) tar-Regolament provviżorju ġew ikkonfermati. |
4.4.3. Indikaturi mikroekonomiċi
(59) |
Fin-nuqqas ta’ kummenti dwar l-indikaturi mikroekonomiċi, il-konklużjonijiet stabbiliti fil-premessi minn (183) sa (198) tar-Regolament provviżorju ġew ikkonfermati. |
4.4.4. Żviluppi fil-perjodu tal-investigazzjoni u fil-perjodu ta’ wara l-investigazzjoni
(60) |
Wara l-valutazzjoni deskritta fil-premessa (197) tar-Regolament provviżorju, il-Kummissjoni analizzat id-data ta’ wara l-perjodu tal-investigazzjoni (“wara l-PI”), kif deskritt fit-Tabella 1 hawn taħt (il-prezzijiet tal-bejgħ tal-Unjoni, il-kost tal-produzzjoni tal-Unjoni, il-profittabbiltà tal-Unjoni, u l-volumi u l-prezzijiet tal-importazzjonijiet Ċiniżi għat-tieni u t-tielet trimestru tal-2023). Tabella 1 Prezzijiet tal-bejgħ tal-Unjoni/kost tal-produzzjoni/profittabbiltà u volumi/prezzijiet tal-importazzjonijiet Ċiniżi Q2-Q3 2023
|
(61) |
Barra minn hekk, bi tweġiba għall-argumenti tal-partijiet interessati (b’mod partikolari deskritti fil-premessi (82), (93) u (125)), il-Kummissjoni ddeskriviet id-data dwar l-indikaturi mikroekonomiċi (il-prezz tal-bejgħ tal-Unjoni kif ukoll il-kost tal-produzzjoni tal-Unjoni) f’livell aktar granulari u trimestrali, għall-perjodu tal-investigazzjoni fit-Tabella 2 hawn taħt. Tabella 2 Prezzijiet tal-bejgħ u kost tal-produzzjoni fl-Unjoni matul il-perjodu tal-investigazzjoni u fi Q1 2023
|
4.4.5. Konklużjoni dwar id-dannu
(62) |
Il-Kummissjoni kkonkludiet b’mod definittiv li l-industrija tal-Unjoni kienet affettwata b’mod negattiv mill-importazzjonijiet mir-RPĊ, speċjalment fi tmiem il-perjodu tal-investigazzjoni, iżda mhux sal-punt li l-industrija tal-Unjoni ġarrbet dannu materjali matul il-perjodu kkunsidrat skont it-tifsira tal-Artikolu 3(5) tar-Regolament bażiku. |
(63) |
Għalhekk, il-Kummissjoni pproċediet bl-analiżi ta’ theddida ta’ dannu materjali f’konformità mal-Artikolu 3(9) tar-Regolament bażiku. |
5. THEDDIDA TA’ DANNU
5.1. Introduzzjoni
(64) |
Kif indikat fil-premessa (197) tar-Regolament provviżorju, il-Kummissjoni kompliet l-analiżi prospettiva tagħha wara l-impożizzjoni tal-miżuri provviżorji, billi ġabret data mit-tieni u t-tielet trimestri tal-2023, b’mod partikolari għall-profittabbiltà tal-produtturi tal-Unjoni, għall-prezzijiet tal-bejgħ u l-kost tal-produzzjoni tal-produtturi tal-Unjoni inklużi fil-kampjun meta mqabbla mal-prezzijiet tal-importazzjoni mir-RPĊ (ara t-Tabella 1). Il-Kummissjoni mbagħad analizzat jekk din id-data addizzjonali tikkonfermax jew tinvalidax is-sejbiet abbażi tad-data mill-perjodu tal-investigazzjoni u l-ewwel trimestru tal-2023 (ara b’mod partikolari l-premessi (96), (79), (96), (119) u (126) għal aktar dettalji dwar is-sejbiet li saru). |
(65) |
Fit-Taqsima 5.3, il-Kummissjoni tindirizza l-kummenti kollha li rċeviet wara l-impożizzjoni ta’ miżuri anti-dumping provviżorji li kienu għadhom pertinenti wara r-rieżamijiet u l-analiżi addizzjonali mwettqa matul l-istadju definittiv. |
5.2. Valutazzjoni definittiva
5.2.1. Aġġornament tad-data ta’ wara l-PI dwar l-importazzjonijiet Ċiniżi
(66) |
Kif stipulat fil-premessa (210) tar-Regolament provviżorju, l-importazzjonijiet mill-pajjiż ikkonċernat żdiedu b’mod sinifikanti minn 192 941 għal 305 055 tunnellati bejn l-2019 u l-perjodu tal-investigazzjoni. |
(67) |
Id-data disponibbli għall-perjodu addizzjonali minn Lulju sa Settembru 2023 uriet li l-importazzjonijiet oġġett ta’ dumping Ċiniżi bdew jonqsu meta mqabbla mal-perjodu tal-investigazzjoni (“PI”) u l-perjodu ta’ wara l-PI sa Ġunju 2023, meta espressi fuq il-bażi ta’ medji ta’ kull xahar. Tabella 3 Il-volumi tal-importazzjonijiet Ċiniżi fil-perjodu ta’ wara l-investigazzjoni
|
(68) |
Għalhekk, il-Kummissjoni sabet li x-xejra taż-żieda fil-volumi kienet waqfet wara t-tieni trimestru tal-2023. Madankollu, meta vvalutat is-sinifikat u l-affidabbiltà ta’ dawn iċ-ċifri għall-konferma jew l-invalidazzjoni tal-analiżi tat-theddida ta’ dannu, il-Kummissjoni osservat ukoll li t-tnaqqis fil-volumi medji tal-importazzjonijiet Ċiniżi fix-xahar minn Lulju sa Settembru 2023 (meta mqabbel mal-2022) jista’ jiġi attribwit għall-effett dissważiv ta’ (i) il-bidu tal-proċediment attwali fit-30 ta’ Marzu 2023 b’possibbiltà distinta ta’ adozzjoni ta’ miżuri proviżorji fil-perjodu ta’ mhux aktar minn 8 xhur u (ii) it-talba għar-reġistrazzjoni mill-ilmentatur ippreżentata fil-31 ta’ Mejju 2023. Fi kliem ieħor, id-data tal-perjodu ta’ wara l-investigazzjoni sa Ġunju 2023, eżatt wara li t-talba għar-reġistrazzjoni tal-importazzjonijiet ġiet ippreżentata mill-ilmentatur, tikkonferma r-rata sinifikanti ta’ żieda tal-importazzjonijiet oġġett ta’ dumping osservata matul il-perjodu kkunsidrat. It-tnaqqis sinifikanti fil-volum tal-importazzjonijiet minn Ġunju 2023 ma jiċħadx din il-konklużjoni peress li huwa effett probabbli tat-talba għar-reġistrazzjoni tal-importazzjonijiet bil-ħsieb tal-applikazzjoni retroattiva tad-dazji. Tali talba, speċjalment meta jitqies li f’dak il-punt ma kien hemm l-ebda indikazzjoni dwar il-livell ta’ dazji potenzjali li jistgħu jiġu imposti, kellha effett dissważiv inevitabbli fuq il-volum tal-importazzjonijiet. Minn dan isegwi li r-rata sinifikanti ta’ żieda fl-importazzjonijiet mill-2021 ’il quddiem, kif ikkonfermat mid-data tal-perjodu ta’ wara l-investigazzjoni, tindika l-probabbiltà ta’ żieda sostanzjali fl-importazzjonijiet skont it-tifsira tal-Artikolu 3(9)(a) tar-Regolament bażiku. |
(69) |
Fit-tweġiba tagħhom għad-divulgazzjoni finali, l-UNESDA affermat li abbażi tad-data tal-Eurostat, l-importazzjonijiet miċ-Ċina naqsu b’20 % fl-2023 u ma hemm l-ebda raġuni biex wieħed jassumi li se jmorru għal-livelli tal-2022. Kif deskritt fil-premessa (68), filwaqt li x-xejra ta’ żieda fil-volumi tal-importazzjonijiet Ċiniżi kienet waqfet wara t-tieni trimestru tal-2023, il-bidu ta’ din l-investigazzjoni kif ukoll it-talba għar-reġistrazzjoni kellhom effett dissważiv inevitabbli fuq il-volum tal-importazzjonijiet. Għalhekk, il-pretensjoni tas-UNESDA ġiet miċħuda. |
(70) |
Wara d-divulgazzjoni finali, is-CPCIF qajmet ukoll l-argumenti li ġejjin fir-rigward tal-“effett dissważiv” stabbilit mill-Kummissjoni fil-premessa (68). |
(71) |
Is-CPCIF sostniet li t-tnaqqis sinifikanti fl-importazzjonijiet fi Q4 tal-PI jenfasizza li t-tnaqqis fir-ritmu ekonomiku fil-volumi tal-importazzjonijiet Ċiniżi kien diġà għaddej qabel ma seta’ jseħħ kwalunkwe “effett dissważiv” allegat. Il-Kummissjoni nnotat li l-eżistenza ta’ effett dissważiv kienet tirreferi għall-perjodu ta’ wara l-PI u li tnaqqis temporanju fl-importazzjonijiet matul l-aħħar trimestru tal-PI ma jaffettwax il-validità tal-konklużjoni milħuqa fil-premessa (68). Fil-fatt, l-importazzjonijiet Ċiniżi kienu żdiedu b’mod sinifikanti matul il-perjodu sħiħ ikkunsidrat u t-tnaqqis fl-importazzjonijiet fi Q4 2022 segwa żieda kontinwa u qawwija fl-importazzjonijiet oġġett ta’ dumping fit-trimestri ta’ qabel, u ġie segwit minn żieda ulterjuri fl-ewwel trimestru wara l-perjodu ta’ investigazzjoni. Għalhekk, tnaqqis bħal dan fi Q4 2022 ma setax jinvalida s-sejbiet tal-Kummissjoni fir-rigward ta’ żidiet ulterjuri fl-importazzjoni fil-futur qrib, jekk ma jiġux adottati miżuri. |
(72) |
Barra minn hekk, is-CPCIF argumentat fir-rigward tal-“effett dissważiv” ta’ din l-investigazzjoni li r-raġunament tal-Kummissjoni jrid jiġi ssostanzjat b’evidenza konkreta aktar milli b’sempliċi konġettura. Skont is-CPCIF, is-sempliċi konklużjoni li tnaqqis fil-volum tal-importazzjonijiet huwa “effett probabbli” tal-bidu ta’ investigazzjoni jew talba għal reġistrazzjoni ma tikkostitwixxix evidenza pożittiva jew eżami oġġettiv. |
(73) |
L-ewwel nett, kif jirriżulta b’mod ċar mill-premessa (68) kkunsidrata fl-intier tagħha, il-Kummissjoni stabbiliet effett dissważiv tal-bidu tal-proċedura attwali kif ukoll tat-talba għar-reġistrazzjoni fuq il-volum tal-importazzjonijiet. It-tieni nett, il-konklużjoni milħuqa hija bbażata fuq valutazzjoni oġġettiva ta’ informazzjoni pożittiva, affermattiva u verifikabbli dwar l-importazzjonijiet ippubblikata mill-Eurostat. Huwa biss loġiku li l-bidu ta’ investigazzjoni, segwit minn possibbiltà ta’ reġistrazzjoni ta’ importazzjonijiet bil-ħsieb ta’ impożizzjoni retroattiva ta’ dazji potenzjali ta’ kobor mhux magħruf ikollu effett dissważiv fuq l-importaturi tal-PET fl-Unjoni. Dan l-effett huwa osservat b’mod ċar fl-istatistika tal-importazzjoni. Barra minn hekk, kif spjegat hawn taħt, il-partijiet interessati ma pprovdew l-ebda spjegazzjoni valida oħra għal volumi ta’ importazzjoni ferm aktar baxxi wara l-bidu tal-investigazzjoni u t-talba għar-reġistrazzjoni tal-importazzjonijiet. Għalhekk, din il-pretensjoni ġiet miċħuda. |
(74) |
Fl-aħħar nett, is-CPCIF sostniet li x-xejriet tal-importazzjoni tal-passat (li jirreferu għal tnaqqis fl-importazzjonijiet Ċiniżi tal-PET matul l-2018 jew l-2021) juru li t-tnaqqis sostnut fl-importazzjonijiet mhuwiex relatat mal-bidu ta’ investigazzjonijiet anti-dumping; għalhekk, skont is-CPCIF, l-affermazzjoni ta’ “effett dissważiv” li jirriżulta mill-bidu tal-investigazzjoni attwali u t-talba għar-reġistrazzjoni hija infondata. Ma kienx ikkontestat li filwaqt li mhuwiex eskluż li fatturi oħra, mhux relatati mal-investigazzjoni anti-dumping (bħaż-żieda drammatika fir-rati tat-trasport tal-merkanzija osservata fl-2021) wasslu għal tnaqqis fl-importazzjonijiet fil-passat. Madankollu, għall-perjodu ta’ wara l-PI, is-CPCIF naqset milli tissottometti xi evidenza li turi li fatturi oħra kienu jkunu responsabbli għat-tnaqqis fil-każ inkwistjoni u li dan tal-aħħar mhuwiex attribwibbli għall-bidu ta’ din l-investigazzjoni u għall-preżentazzjoni ta’ talba għar-reġistrazzjoni, kif spjegat fil-premessa (68) u. Għalhekk, il-pretensjonijiet magħmula minn CPCIF ġew miċħuda. |
(75) |
Wara d-divulgazzjoni finali, Svepol argumentat li kwalunkwe tnaqqis fil-volumi tal-importazzjoni pperċepit għall-ewwel darba f’Ġunju 2023 mill-Kummissjoni neċessarjament huwa r-riflessjoni ta’ xejra kummerċjali li bdiet diversi xhur qabel il-bidu tal-investigazzjoni preżenti, jiġifieri r-ritorn tal-kostijiet tat-trasport tal-kontejners għal-livelli normali li jwasslu għall-waqfien ta’ trasport ta’ vjeġġi ta’ merkanzija li titgħabba individwalment. F’dan il-kuntest, Svepol irreferiet għad-dewmien konsiderevoli bejn in-negozjar tal-bejgħ, jiġifieri, iż-żmien li l-prodott jiġi ordnat mir-RPĊ, u l-importazzjoni fl-Unjoni. Svepol fakkret ukoll li ż-żmien medju mit-tqegħid ta’ ordni għal vjeġġ ta’ merkanzija li titgħabba individwalment sal-wasla tiegħu fl-UE kien ivarja bejn 4 xhur u 6 xhur. |
(76) |
Kif stabbilit fil-premessa (68), diġà kien il-bidu tal-proċediment attwali fit-30 ta’ Marzu 2023 li kellu effett dissważiv fuq l-importazzjonijiet Ċiniżi fil-perjodu ta’ wara l-PI. Barra minn hekk, filwaqt li ż-żmien ta’ tranżitu jista’ jkun itwal għal vjeġġi ta’ merkanzija li titgħabba individwalment, dawn ma tkomplewx wara n-normalizzazzjoni tar-rati tat-trasport tal-merkanzija u fil-perjodu ta’ wara l-PI. Iż-żmien tipiku tat-trasport għall-konsenji tal-kontejners standard ma jkunx ta’ aktar minn 2-3 xhur (10) u għalhekk, anki wara li jitqies l-intervall ta’ żmien bejn in-negozjar tal-bejgħ u l-importazzjoni reali, u anki meta jitqies li l-aħħar vjeġġ ta’ merkanzija li titgħabba individwalment wasal f’Marzu 2023 (ara l-premessa(103)), il-konsenji f’kontejners standard ikunu responsabbli għal volumi għoljin ta’ importazzjoni fi Q2 2023. Minn dan isegwi li t-tnaqqis fl-importazzjonijiet f’Ġunju 2023 ikun ikkawżat minn avvenimenti ta’ April 2023. Għalhekk, it-tnaqqis fil-volumi tal-importazzjonijiet Ċiniżi f’Ġunju 2023 jista’ jiġi spjegat mill-effett dissważiv tal-bidu tal-investigazzjoni fl-aħħar ta’ Marzu 2023, aktar milli mill-bidla minn vjeġġi ta’ merkanzija li titgħabba individwalment għal kontejners normali. Volumi sinifikanti ta’ importazzjonijiet miċ-Ċina komplew jaslu bil-kontejners f’April u Mejju 2023, jiġifieri wara l-aħħar konsenja bl-ingrossa f’Marzu, u għalhekk it-tnaqqis fil-volum tal-importazzjonijiet miċ-Ċina minn Ġunju 2023 ’il quddiem ma setax ġie kkawżat minn dik il-bidla. |
(77) |
Fir-rigward tas-sinifikat tal-vjeġġi tal-merkanzija li titgħabba individwalment u r-relazzjoni tagħhom mal-ġarr tal-merkanzija fil-kontejners, fil-kummenti tagħha dwar id-divulgazzjoni finali, Svepol argumentat li analiżi fattwalment korretta kienet turi li ż-żieda fl-2022 kienet ir-riżultat tal-fatt li ċ-Ċina kienet l-uniku pajjiż esportatur, wara ż-żieda fil-kostijiet tat-trasport tal-kontejners, li kien kapaċi jagħmel vjeġġi ta’ merkanzija li titgħabba individwalment lejn l-UE, u b’hekk kiseb vantaġġ kompetittiv fuq pajjiżi esportaturi tal-PET oħrajn. Ladarba l-ispejjeż tat-trasport tal-kontejners reġgħu lura għal-livelli normali, iċ-Ċina tilfet dan il-vantaġġ li loġikament wassal għal tnaqqis fil-volumi tal-importazzjoni miċ-Ċina u żieda fl-importazzjonijiet minn sorsi oħra. Skont dan ir-raġunament, il-volumi tal-importazzjoni ta’ qabel il-kriżi mill-pajjiżi esportaturi l-oħra tal-PET kienu jinqabdu (sa ċertu punt) miċ-Ċina fl-2022, minħabba l-kapaċitajiet tagħha ta’ trasport ta’ merkanzija li titgħabba individwalment, u mbagħad reġgħu ġew irkuprati mill-pajjiżi terzi inkwistjoni wara li għaddiet il-kriżi u wara li ċ-Ċina tilfet il-vantaġġ kompetittiv tagħha. Din l-analiżi mhijiex sostnuta mill-fatti tal-każ. Kif muri mit-Tabella 16 fir-Regolament Proviżorju, u mhux ikkontestat minn Svepol, il-pajjiżi esportaturi ewlenin tal-PET, l-Eġittu, it-Turkija u l-Vjetnam kollha kisbu sehem mis-suq aktar milli tilfu fl-2022. B’hekk, it-teorija li biha ċ-Ċina qed titlef l-effetti tal-vantaġġ kompetittiv tagħha fit-trasport tal-merkanzija fit-tielet kwart tal-2023 u s-suq li qabel kien ittieħed mingħand pajjiżi terzi qed jittieħed lura hija żbaljata. Iċ-Ċina qatt ma ħadet sehem mis-suq mingħand dawn il-pajjiżi. Kif muri fit-Tabella 14 tar-Regolament Proviżorju l-uniku tellief sinifikanti tas-sehem mis-suq bejn l-ewwel trimestru tal-2022 u l-ewwel trimestru tal-2023 kien l-Industrija tal-Unjoni, li tilfet 11-il punt perċentwali ta’ sehem mis-suq matul dak il-perjodu. Minn dan isegwi li t-tnaqqis fl-importazzjonijiet tal-PET Ċiniż minn Ġunju 2023 ’il quddiem ma kienx ikkawżat mill-kisba lura minn pajjiżi esportaturi oħra tal-PET ta’ ishma mis-suq li qatt ma tilfu fl-2022, iżda mill-bidu tal-investigazzjoni anti-dumping kontra l-importazzjonijiet miċ-Ċina tliet xhur qabel. |
5.2.2. Elementi oħrajn: il-profittabbiltà u indikaturi ekonomiċi oħrajn
(78) |
Kif stabbilit fil-premessi (230), (231) u (233) kif ukoll fit-Tabella 14 tar-Regolament provviżorju, il-profittabbiltà tal-produtturi tal-Unjoni inklużi fil-kampjun laħqet livelli mhux sostenibbli ta’ - 12 % u - 11 % fir-raba’ trimestru tal-2022 u fl-ewwel trimestru tal-2023 rispettivament, meta l-pressjoni tal-prezzijiet Ċiniżi nħasset l-aktar wara ż-żieda kontinwa fl-importazzjonijiet. |
(79) |
L-informazzjoni addizzjonali miġbura għall-perjodu ta’ wara l-PI stabbiliet il-kontinwazzjoni tax-xejra negattiva tal-profittabbiltà tal-produtturi tal-Unjoni (ara t-Tabella 1), b’livelli fejn kien qed isir telf stabbiliti għal - 11 % u - 13 % fit-tieni u t-tielet trimestru tal-2023 rispettivament. |
(80) |
Skont Svepol, il-fatt li l-importazzjonijiet mir-RPĊ ma kkawżawx it-tnaqqis fil-profittabbiltà tal-industrija tal-Unjoni fi Q4 2022 u Q1 2023 ġie kkonfermat mill-fatt li l-profittabbiltà tal-produttur tal-Unjoni kompliet tonqos fl-2023, minkejja li l-volum tal-importazzjonijiet mir-RPĊ naqas b’mod sinifikanti minn Ġunju 2023. |
(81) |
Il-Kummissjoni ma taqbilx mal-interpretazzjoni tal-fatti minn Svepol. Il-Kummissjoni sabet (abbażi ta’ spjegazzjonijiet ipprovduti mill-partijiet interessati) li hemm intervall ta’ żmien konsiderevoli bejn in-negozjar tal-bejgħ, jiġifieri ż-żmien li l-prodott jiġi ordnat mir-RPĊ, u l-importazzjoni fl-Unjoni. Huwa fil-mument meta l-bejgħ jiġi nnegozjat li l-bejgħ Ċiniż u l-bejgħ tal-Unjoni jikkompetu. Barra minn hekk, kif spjegat fil-premessa (68), it-tnaqqis sinifikanti fil-volum tal-importazzjonijiet minn Ġunju 2023 ’il quddiem huwa relatat mal-investigazzjoni anti-dumping u b’mod partikolari talba għar-reġistrazzjoni aktar milli kwalunkwe forza partikolari tas-suq. It-tnaqqis fil-volum tal-importazzjonijiet osservat minn Ġunju 2023 irrifletta l-ispinta probabbli tal-importaturi biex jillimitaw l-esponiment tagħhom għal dazji anti-dumping retroattivi potenzjali iżda ma eliminax il-pressjoni fuq il-prezzijiet tal-importazzjonijiet Ċiniżi oġġett ta’ dumping, li f’dak il-punt, ma kienet imxekkla minn ebda miżura. Għalhekk, ma huwiex sorprendenti li anki meta l-istatistika wriet tnaqqis fl-importazzjonijiet oġġett ta’ dumping, l-industrija tal-Unjoni baqgħet tagħmel it-telf u ma rkupratx immedjatament. |
5.3. Il-kummenti tal-partijiet interessati wara l-miżuri provviżorji
(82) |
Fil-kummenti tagħha dwar id-divulgazzjoni provviżorja, is-CPCIF (l-assoċjazzjoni tal-produtturi Ċiniżi tal-PET) issottomettiet li l-Kummissjoni ma pprovdiet l-ebda data trimestrali dwar il-prezzijiet tal-industrija tal-Unjoni matul il-PI, u lanqas ma pprovdiet xi informazzjoni ta’ wara l-PI dwar il-prezzijiet tal-Unjoni u b’riżultat ta’ dan il-Kummissjoni ma eżaminatx b’mod oġġettiv il-prezzijiet u l-effetti fuq il-prezzijiet abbażi ta’ evidenza pożittiva. Is-CPCIF issottomettiet ukoll li l-ebda informazzjoni għal wara l-PI ma ġiet ipprovduta fir-Regolament provviżorju dwar l-importazzjonijiet mir-RPĊ li saru mill-kumpaniji tal-industrija tal-Unjoni li lmentaw. |
(83) |
Kif stabbilit fil-premessa (231) tar-Regolament provviżorju, l-industrija tal-Unjoni kienet qed tbigħ taħt il-kost tal-produzzjoni fl-aħħar trimestru tal-PI u fl-ewwel trimestru ta’ wara l-PI. Għalhekk, il-Kummissjoni eżaminat b’mod oġġettiv, abbażi ta’ evidenza pożittiva, l-effetti tal-importazzjonijiet Ċiniżi oġġett ta’ dumping fuq il-prezzijiet tal-Unjoni. Il-fatt li d-data speċifika dwar il-prezzijiet tal-bejgħ tal-Unjoni trimestrali tal-PI u ta’ wara l-PI, il-kost tal-produzzjoni u l-prezzijiet tal-importazzjoni tal-Unjoni u l-volumi tal-importazzjoni li jirrikonoxxu l-importazzjonijiet mill-produtturi tal-Unjoni li lmentaw (li issa għal raġunijiet ta’ kompletezza u ċarezza huma ppreżentati fit-Tabella 1 u fit-Tabella 2 rispettivament) qabel ma ġietx deskritta fir-Regolament provviżorju ma kienx jinvalida l-konklużjoni li finalment waslet għaliha l-Kummissjoni. |
(84) |
Is-CPCIF sostniet li l-valutazzjoni tal-Kummissjoni fir-Regolament provviżorju kienet ibbażata fuq data tal-importazzjoni mhux preċiża. Skont is-CPCIF, l-Eurostat irrapporta l-volum tal-importazzjonijiet Ċiniżi fl-ewwel nofs tal-2023 bħala 216 560 tunnellata, b’kuntrast mal-affermazzjoni tal-Kummissjoni ta’ 223 558 tunnellata. Bl-istess mod, l-importazzjonijiet irreġistrati għall-perjodu korrispondenti fl-2022 kienu ta’ 144 706 tunnellata, differenti mis-sejba tal-Kummissjoni ta’ 139 672 tunnellata. Konsegwentement, iż-żieda sena wara sena fl-importazzjonijiet Ċiniżi tkun inqas minn 50 %, minflok is-60 % affermati mill-Kummissjoni. |
(85) |
Il-valutazzjoni tal-Kummissjoni fir-Regolament provviżorju kienet ibbażata fuq id-data tal-importazzjoni rrapportata fiż-żmien tal-estrazzjoni tad-data għall-istadju provviżorju tal-investigazzjoni. Id-differenza bejn id-data użata mill-Kummissjoni u d-data estratta mis-CPCIF kienet fil-mument meta ġiet estratta d-data mill-Eurostat. Dan huwa dovut għad-diversi aġġornamenti li saru minn żmien għal żmien għad-data rrappurtata fl-Eurostat. Irrispettivament minn dan, id-data riveduta fi kwalunkwe każ ma tkunx kapaċi tinvalida jew inkella tibdel il-valutazzjoni tal-Kummissjoni u s-sejba li saret fil-premessa (210) tar-Regolament provviżorju tibqa’ l-istess fis-sustanza, jiġifieri li ġiet stabbilita rata sinifikanti ta’ żieda fl-importazzjonijiet oġġett ta’ dumping fis-suq tal-Unjoni li tindika l-probabbiltà ta’ żieda sostanzjali fl-importazzjonijiet. |
(86) |
Svepol u UNESDA sostnew li ż-żieda marġinali ta’ 1 sa 1,5 % fis-sehem mis-suq tal-importazzjonijiet Ċiniżi matul il-perjodu kkunsidrat ma setgħetx tifforma l-bażi ta’ sejba ta’ theddida ta’ dannu. Svepol kompliet tagħmel paragun bejn l-evoluzzjoni tas-sehem mis-suq bejn l-importazzjonijiet Ċiniżi u importazzjonijiet oħra ta’ pajjiżi terzi, b’referenza għas-sehem mis-suq li qed jiżdied b’mod rapidu tat-Turkija, tal-Vjetnam u tal-Eġittu (żieda aggregata fis-sehem mis-suq ta’ 5 punti perċentwali. |
(87) |
L-ewwel nett, iż-żieda ta’ 1 sa 1,5 % fis-sehem mis-suq Ċiniż irreferiet għas-sehem mis-suq wara t-tnaqqis tal-importazzjonijiet Ċiniżi mill-industrija tal-Unjoni. F’dan il-kuntest, mhuwiex ċar x’kien il-proporzjon tal-importazzjonijiet minn pajjiżi terzi oħra magħmula mill-industrija tal-Unjoni u l-kumpaniji relatati tagħhom u għalhekk it-tqabbil li sar minn Svepol ma jistax jitqies ġust u oġġettiv. Barra minn hekk, Svepol aggregat it-tkabbir tas-sehem mis-suq għall-pajjiżi esportaturi l-kbar l-oħra u qabblet din iċ-ċifra aggregata mal-importazzjonijiet Ċiniżi. |
(88) |
Irrispettivament minn dan ta’ hawn fuq, għall-kuntrarju ta’ dak li argumentaw il-partijiet, fid-determinazzjoni tar-rata sinifikanti ta’ żieda fl-importazzjonijiet oġġett ta’ dumping, il-Kummissjoni ma bbażatx esklużivament fuq iż-żieda fis-sehem mis-suq tal-importazzjonijiet Ċiniżi matul il-perjodu kollu kkunsidrat. Approċċ bħal dan ma jkunx xieraq meta jitqiesu l-fatti ta’ dan il-każ u b’mod partikolari li t-theddida ta’ dannu saret viżibbli biss fi tmiem il-PI. Kif stabbilit fil-premessa (210) tar-Regolament provviżorju, twettqet analiżi aktar granulari, li tivvaluta l-evoluzzjoni tas-sehem mis-suq tal-importazzjonijiet oġġett ta’ dumping matul il-perjodi rilevanti, jiġifieri t-tqabbil tal-2021 mal-PI u l-ewwel nofs tal-2022 mal-ewwel nofs tal-2023. Din il-valutazzjoni wriet rata sinifikanti ta’ żieda, li tindika l-probabbiltà ta’ żieda sostanzjali fl-importazzjonijiet mir-RPĊ. Għalhekk, l-argument ta’ Svepol u UNESDA ġie miċħud. |
(89) |
Wara d-divulgazzjoni finali, l-UNESDA argumentat (b’referenza għall-fatt li 45-62 % taż-żieda fl-importazzjonijiet miċ-Ċina li seħħet fil-PI saret mill-ilmentatur) li jekk l-industrija tal-Unjoni ma terġax tibda l-importazzjonijiet miċ-Ċina, ma hemm l-ebda raġuni biex wieħed jassumi li l-importazzjonijiet se jerġgħu jiżdiedu b’mod sinifikanti. F’dan ir-rigward, huwa osservat li s-sejba ta’ theddida dannuża ma tiddependix fuq l-importazzjonijiet mill-industrija tal-Unjoni u kif stabbilit fil-premessa (252) tar-Regolament provviżorju, dawn l-importazzjonijiet ma jaffettwawx l-analiżi tad-dannu tal-Kummissjoni. |
(90) |
Is-CPCIF ikkontestat l-allegata sejba tal-Kummissjoni li l-impożizzjoni ta’ miżuri għad-difiża tal-kummerċ minn ċerti pajjiżi għamlitha kompletament imprattikabbli biex l-esportaturi Ċiniżi jiksbu aċċess għal dawn is-swieq. Is-CPCIF sostniet ukoll li l-Kummissjoni naqset milli teżamina swieq tal-esportazzjoni alternattivi fil-PI jew fil-perjodu ta’ wara l-PI. Is-CPCIF irreferiet għal swieq bħall-Indoneżja, l-Indja, jew il-Ġappun u l-kapaċità sinifikanti ta’ importazzjoni tagħhom u/jew l-importazzjonijiet imdaqqsa tagħhom mir-RPĊ f’Settembru 2023 minkejja l-eżistenza ta’ miżuri għad-difiża tal-kummerċ. Is-CPCIF tenniet l-argument tagħha wara d-divulgazzjoni finali. |
(91) |
L-ewwel nett, il-Kummissjoni ma kkonkludietx li l-impożizzjoni ta’ miżuri għad-difiża tal-kummerċ minn ċerti pajjiżi għamlitha kompletament imprattikabbli biex l-esportaturi Ċiniżi jiksbu aċċess għal dawn is-swieq. Hija pjuttost iddikjarat fil-premessa (217) tar-Regolament provviżorju li ċerti swieq saru dejjem aktar diffiċli biex jiġu aċċessati (madankollu, mhux kompletament imprattikabbli) għall-produtturi esportaturi Ċiniżi. It-tieni, għall-kuntrarju tal-pretensjoni tas-CPCIF, is-swieq tal-esportazzjoni għall-PET Ċiniż ġew eżaminati kif xieraq. Kif spjegat fil-premessa (220) tar-Regolament provviżorju, l-ebda destinazzjoni oħra ta’ esportazzjoni Ċiniża għall-PET, minbarra l-Federazzjoni Russa, ma kienet qrib il-volum tal-esportazzjoni li sar matul il-PI lejn l-Unjoni. Barra minn hekk, din ix-xejra kompliet ukoll fil-perjodu ta’ wara l-PI, fl-ewwel nofs tal-2023. L-istatistika wriet li l-Unjoni hija d-destinazzjoni primarja tal-esportazzjoni tal-PET tar-RPĊ, u proporzjon kbir tal-kapaċità żejda Ċiniża, fin-nuqqas ta’ miżuri, x’aktarx li jiġi dirett għall-esportazzjoni lejn l-Unjoni. Il-partijiet interessati ma ressqu l-ebda argument sostanzjat li jinvalida din is-sejba. Barra minn hekk, għall-finijiet ta’ din l-analiżi, iċ-ċifri tal-esportazzjoni Ċiniżi lejn l-Unjoni u t-tqabbil tagħhom mal-esportazzjonijiet lejn swieq oħra mit-tieni nofs tal-2023 tqiesu mhux rappreżentattivi minħabba l-effett dissważiv li din l-investigazzjoni kellha fuq il-livell tal-importazzjonijiet Ċiniżi (ara l-premessa (68)). Il-Kummissjoni rreferiet ukoll għall-valutazzjoni li saret fil-premessi (221) u (247) tar-Regolament provviżorju, li baqgħet valida. |
(92) |
Bi tweġiba għad-divulgazzjoni finali, is-CPCIF sostniet li billi tinvoka l-effett dissważiv, il-Kummissjoni essenzjalment qed tannulla l-għan tal-Artikolu 3(9)(b) tar-Regolament bażiku dwar id-disponibbiltà ta’ swieq oħra tal-esportazzjoni biex jassorbu kwalunkwe esportazzjoni addizzjonali, meta tivvaluta l-probabbiltà ta’ żieda sostanzjali fl-esportazzjonijiet oġġett ta’ dumping lejn l-Unjoni. Ġie mfakkar li l-Kummissjoni analizzat kif xieraq id-disponibbiltà ta’ swieq oħra tal-esportazzjoni, b’mod partikolari fil-perjodu deċiżiv għall-istabbiliment ta’ theddida dannuża u indirizzat kwalunkwe kumment sostantiv li sar f’dan ir-rigward (ara l-premessi (217), (220)-(221) tar-Regolament provviżorju kif ukoll il-premessa (91)). Kif jirriżulta b’mod ċar mill-premessa (91), ir-referenza għall-effett dissważiv hija limitata għall-perjodu ta’ wara l-PI tat-tieni nofs tal-2023 u ma tirrappreżentax l-unika ġustifikazzjoni għas-sejbiet magħmula mill-Kummissjoni fir-rigward tal-Artikolu 3(9)(b) tar-Regolament bażiku. |
(93) |
Svepol enfasizzat li d-determinazzjoni ta’ theddida ta’ dannu materjali trid tiġi stabbilita matul il-perjodu li għalih hija allegata, jiġifieri Q4 2022 u Q1 2023. Svepol argumentat li l-Kummissjoni ma pprovdiet l-ebda evidenza ta’ twaqqigħ tal-prezz mill-produtturi esportaturi Ċiniżi fi Q4 2022 u Q1 2023 u li tali twaqqigħ allegat tal-prezz wassal biex il-prezzijiet u l-profittabbiltà tal-industrija tal-Unjoni jonqsu. Svepol sostniet ukoll li anki jekk il-Kummissjoni kellha tistabbilixxi t-twaqqigħ tal-prezzijiet fi Q4 2022 u Q1 2023, hija ma stabbilietx li kien hemm tnaqqis fil-prezzijiet jew soppressjoni tal-prezzijiet bħala riżultat tal-importazzjonijiet tal-PET mir-RPĊ matul il-perjodu kkunsidrat, fil-PI, u speċjalment għal Q4 2022 u Q1 2023, minkejja li kkonkludiet b’mod provviżorju li dan kien il-każ. |
(94) |
Wara d-divulgazzjoni finali, Svepol sostniet li f’analiżi tat-theddida ta’ dannu, il-Kummissjoni għandha tqis jekk kienx hemm twaqqigħ tal-prezz sinifikanti mill-importazzjonijiet oġġett ta’ dumping meta mqabbel mal-prezz ta’ prodott simili tal-industrija tal-Unjoni, jew jekk l-effett ta’ tali importazzjonijiet huwiex li b’mod ieħor iwaqqa’ l-prezzijiet sa grad sinifikanti jew jipprevjeni żidiet fil-prezzijiet, li kieku kienu jseħħu, sa grad sinifikanti. Fit-tweġiba tagħha għad-divulgazzjoni finali, is-CPCIF sostniet ukoll li l-aħħar data minn Q3 2023, kruċjali għall-analiżi tat-theddida ta’ dannu tal-Kummissjoni, tindika li l-prezzijiet tal-importazzjonijiet Ċiniżi ma jwaqqgħux il-prezzijiet tal-bejgħ tal-Unjoni. |
(95) |
Il-Kummissjoni ma taqbilx li kienet meħtieġa tikkalkula t-twaqqigħ tal-prezz għal perjodi trimestrali fil-perjodu ta’ investigazzjoni. Fil-fatt, kif innotat mill-Qorti f’Giant Electric (11), il-Kummissjoni mhijiex meħtieġa skont l-Artikolu 3(3) tar-Regolament bażiku li tiddetermina t-twaqqigħ tal-prezz u tista’ tibbaża l-analiżi tad-dannu tagħha u, għalhekk, ir-rabta kawżali, fuq fenomeni oħra tal-prezzijiet elenkati fl-Artikolu 3(3) tar-Regolament bażiku, bħal tnaqqis sinifikanti fil-prezzijiet tal-industrija tal-Unjoni jew il-prevenzjoni taż-żidiet fil-prezzijiet sa ċertu punt notevoli. Il-Kummissjoni ma taqbilx ukoll li l-analiżi tal-prezzijiet tagħha ma kinitx dettaljata biżżejjed, billi qieset mhux biss l-informazzjoni għall-perjodu tal-investigazzjoni iżda vvalutat ukoll is-sitwazzjoni kemm tal-importazzjonijiet oġġett ta’ dumping kif ukoll tal-industrija tal-Unjoni fuq bażi trimestrali għall-perjodu tal-investigazzjoni u l-perjodu ta’ wara l-investigazzjoni. Il-Kummissjoni eżaminat ukoll l-informazzjoni trimestrali dwar il-volumi u l-prezzijiet tal-importazzjonijiet Ċiniżi, kif ukoll il-produzzjoni, il-bejgħ, il-prezzijiet u l-kostijiet tal-industrija tal-Unjoni (ara t-Tabella 14 tar-Regolament provviżorju u t-Tabella 1 kif ukoll it-Tabella 2 ta’ dan ir-Regolament). Kif kien diġà ċar mid-data u mill-analiżi fil-premessi (222) sa (224) tar-Regolament provviżorju, il-Kummissjoni kkonkludiet li, minħabba l-influss kbir ta’ importazzjonijiet Ċiniżi oġġett ta’ dumping fil-perjodu tal-investigazzjoni bi prezzijiet li jwaqqgħu l-prezzijiet tal-industrija tal-Unjoni, l-industrija tal-Unjoni kienet imġiegħla tbaxxi l-prezzijiet tagħha fl-aħħar trimestru tal-perjodu tal-investigazzjoni u fl-ewwel trimestru wara l-perjodu tal-investigazzjoni, li rriżulta f’sitwazzjoni ta’ telf f’dawk iż-żewġ trimestri. Il-volum kbir li għadu għaddej tal-importazzjonijiet Ċiniżi bi prezzijiet li qed jonqsu wara l-perjodu ta’ investigazzjoni, b’mod partikolari fi Q1 2023, wera bidla ulterjuri lejn dawn l-importazzjonijiet oġġett ta’ dumping bi prezzijiet li rażżnu b’mod sinifikanti l-prezzijiet tal-produtturi tal-Unjoni. |
(96) |
L-iżvilupp ta’ dawn ix-xejriet negattivi huwa osservat aktar meta wieħed iħares lejn id-data ta’ wara l-PI għal Q2 u Q3 2023 dwar il-prezzijiet tal-bejgħ, il-kost tal-produzzjoni u l-profittabbiltà (ara t-Tabella 1). Il-prezzijiet medji tal-bejgħ kif ukoll il-kost tal-produzzjoni tal-produtturi tal-Unjoni inklużi fil-kampjun urew li, għall-kuntrarju tal-ewwel tliet trimestri tal-PI, mill-aħħar trimestru tal-PI sa Q3 2023, il-prezzijiet tal-bejgħ tal-produtturi tal-Unjoni ġew pressati ’l isfel taħt il-livell tal-kost tal-produzzjoni mill-importazzjonijiet Ċiniżi. |
(97) |
Barra minn hekk, tqabbil tad-data tal-bejgħ tal-Unjoni mal-prezzijiet tal-esportazzjoni tal-produtturi esportaturi inklużi fil-kampjun għal Q4 2022 wera li l-prezzijiet Ċiniżi kienu qed iwaqqgħu b’mod sinifikanti l-prezzijiet tal-Unjoni bi 8 %. Għalhekk, l-industrija tal-Unjoni kellha tħabbat wiċċha ma’ twaqqigħ tal-prezz sinifikanti mhux biss matul il-PI kollu kemm hu, iżda wkoll fi tmiem il-PI meta feġġet it-theddida ta’ dannu. |
(98) |
Wara d-divulgazzjoni finali, is-CPCIF sostniet li l-Kummissjoni naqset milli tiġġustifika għaliex attribwiet it-tnaqqis fil-prezzijiet għall-importazzjonijiet oġġett ta’ dumping, speċjalment meta wieħed iqis li t-tnaqqis fil-prezzijiet minn Q4 2022 kien jirrifletti mill-qrib it-tnaqqis fil-kostijiet tal-industrija domestika. Kif spjegat fil-premessa (96) hawn fuq, mill-aħħar trimestru tal-PI sa Q3 2023, il-prezzijiet tal-bejgħ tal-produtturi tal-Unjoni ġew pressati ’l isfel taħt il-livell tal-kost tal-produzzjoni mill-importazzjonijiet Ċiniżi. Filwaqt li l-prezzijiet tal-bejgħ tal-industrija tal-Unjoni setgħu naqsu b’rata simili għall-kost tal-produzzjoni, din ix-xejra ma tispjegax għaliex il-prezzijiet tal-bejgħ baqgħu taħt il-kost tal-produzzjoni. |
(99) |
Is-CPCIF ikkontestat is-sejba tal-Kummissjoni li saret fir-Regolament provviżorju li “l-importazzjonijiet Ċiniżi wrew żieda sostanzjali matul il-perjodu kkunsidrat, iżda wkoll li din ix-xejra ma twaqqfitx jew treġġgħet lura matul il-perjodu ta’ wara l-investigazzjoni”, u rreferiet għal tnaqqis sinifikanti fl-importazzjonijiet minn Ġunju 2023. Is-CPCIF tenniet l-argument tagħha wara d-divulgazzjoni finali, filwaqt li żiedet li għall-kuntrarju tar-Regolament provviżorju, il-Kummissjoni ammettiet li x-xejra ta’ żieda fil-volumi kienet waqfet wara t-tieni trimestru tal-2023. |
(100) |
It-tnaqqis fil-volumi tal-importazzjonijiet Ċiniżi minn Ġunju 2023 jista’ jiġi spjegat mill-effett dissważiv ta’ din l-investigazzjoni msemmi fil-premessa (68). Dan it-tnaqqis fil-volumi tal-importazzjoni huwa temporanju, u din ix-xejra titreġġa’ lura jekk ma tiġi imposta l-ebda miżura. Barra minn hekk, ma hemm l-ebda diskrepanza bejn is-sejbiet li saru fir-Regolament provviżorju (fejn hija eżaminata t-tendenza sa Q1 2023) u s-sejbiet definittivi li saru hawnhekk, filwaqt li jiġi osservat li x-xejra ta’ żieda fil-volumi kienet waqfet wara t-tieni kwart tal-2023. Għalhekk, il-pretensjoni tas-CPCIF ġiet miċħuda. |
(101) |
Is-CPCIF affermat ukoll li d-data ta’ wara l-PI pprovduta fir-Regolament provviżorju, b’mod partikolari x-xejra pożittiva fil-produttività, il-volumi tal-bejgħ tal-Unjoni u l-profittabbiltà fi Q1 2023 meta mqabbla ma’ dik fi Q4 2022, ma kinitx tikkostitwixxi bażi evidenzjarja għad-dikjarazzjoni tat-theddida ta’ dannu minħabba l-importazzjonijiet Ċiniżi tal-PET. |
(102) |
Filwaqt li l-indikaturi deskritti mis-CPCIF urew xejra pożittiva, l-indikaturi jridu jitqiesu f’kuntest usa’ u jitqabblu prinċipalment mas-sitwazzjoni fil-perjodu ta’ qabel l-istabbiliment ta’ theddida ta’ dannu (ara l-premessa (238) tar-Regolament provviżorju). Analiżi bħal din, appoġġata ulterjorment minn data addizzjonali għal Q2 u Q3 2023 dwar il-profittabbiltà (ara t-Tabella 1) uriet b’mod ċar li l-industrija tal-Unjoni kienet fi stat fraġli li jista’ jinbidel f’dannu materjali immedjatament fin-nuqqas ta’ miżuri. |
(103) |
Svepol sostniet li r-Regolament provviżorju ma indirizzax l-impatt tal-bidla mill-produtturi esportaturi Ċiniżi għal vjeġġi ta’ merkanzija li titgħabba individwalment matul il-PI. Skont Svepol, iż-żieda fil-kostijiet tat-trasport bil-baħar matul l-aħħar parti tal-2021 u matul il-maġġoranza tal-PI wasslet biex l-utenti u l-importaturi tal-PET tal-Unjoni jirrikorru għal vjeġġi ta’ merkanzija li titgħabba individwalment minflok ma jużaw trasport standard tal-kontejners, u b’hekk żiedu l-volumi tal-importazzjoni mir-RPĊ. Svepol sostniet li l-vantaġġ kompetittiv tal-vjeġġi Ċiniżi ta’ merkanzija li titgħabba individwalment kien biss wieħed temporanju li minn dak iż-żmien għeb bin-normalizzazzjoni tal-kostijiet tat-trasport bil-baħar tal-kontejners — fatt li ntwera b’mod partikolari mit-tnaqqis fl-importazzjonijiet tal-PET mir-RPĊ fi Q2 2023 wara l-aħħar vjeġġ ta’ merkanzija li titgħabba individwalment f’Marzu 2023 (12). Wara d-divulgazzjoni finali, l-UNESDA argumentat ukoll li peress li l-kostijiet tat-trasport tal-merkanzija reġgħu lura għan-normal u l-importazzjonijiet bl-ingrossa ma rnexxewx, ma kienx iġġustifikat li wieħed jassumi li kien hemm probabbiltà ta’ żieda mġedda fl-importazzjonijiet miċ-Ċina. |
(104) |
Filwaqt li huwa rikonoxxut li parti kbira mill-vjeġġi tal-PET mir-RPĊ fl-2022 waslu f’bastimenti b’merkanzija li titgħabba individwalment, kif innotat fir-Regolament proviżorju (ara l-premessa (228)), il-kostijiet tat-trasport bdew jiġu normalizzati wara l-quċċata li damet sa nofs l-2022. Madankollu, ġiet osservata żieda qawwija fl-importazzjonijiet Ċiniżi sat-tieni nofs tal-2023 (13), u għalhekk ħafna wara li l-kostijiet tat-trasport bil-baħar reġgħu lura għal-livelli normali u wara l-approvazzjoni tal-aħħar vjeġġ allegat ta’ merkanzija li titgħabba individwalment . Għalhekk, il-Kummissjoni sabet li anki mingħajr il-vjeġġi ta’ merkanzija li titgħabba individwalment, l-importazzjonijiet Ċiniżi waslu fl-Unjoni fi kwantitajiet kbar. Barra minn hekk, kif stabbilit fil-premessa (68), it-tnaqqis fil-volumi tal-importazzjonijiet Ċiniżi lejn tmiem Q2 2023 jista’ jiġi spjegat mill-effett dissważiv ta’ din l-investigazzjoni, aktar milli mill-bidla minn vjeġġi ta’ merkanzija li titgħabba individwalment għal kontejners normali. Għalhekk, anki jekk kien hemm koinċidenza bejn l-użu ta’ vjeġġi ta’ merkanzija li titgħabba individwalment u ż-żieda fl-importazzjonijiet Ċiniżi matul l-2021 u għal parti mill-2022, din iċ-ċirkostanza ma setgħetx tinvalida l-valutazzjoni tal-Kummissjoni magħmula fir-Regolament proviżorju. |
(105) |
Is-CPCIF sostniet, wara d-divulgazzjoni provviżorja li s-sejbiet ta’ Q4 2022 tal-PI bix-xejra ċara ta’ tnaqqis fl-importazzjonijiet lejn tmiem il-PI ma indikawx dannu “prevedibbli” jew “imminenti”, u lanqas ma indikaw theddida ta’ dannu “imminenti”. Is-CPCIF argumentat ukoll li jekk kien hemm theddida ta’ dannu fi Q4 2022, huwa impossibbli li din tista’ tiġi attribwita għall-importazzjonijiet Ċiniżi. Barra minn hekk, skont is-CPCIF, il-fatt li l-industrija tal-Unjoni kienet kapaċi żżid b’mod sinifikanti l-profitti netti, il-bejgħ u l-prezzijiet tal-bejgħ tagħha matul il-perjodu kkunsidrat meta l-importazzjonijiet Ċiniżi kienu sostanzjalment ogħla milli fi Q4 tal-PI jenħtieġ li jiġi debitament rikonoxxut u eżaminat b’mod oġġettiv mill-Kummissjoni. Is-CPCIF tenniet il-pożizzjoni tagħha wara d-divulgazzjoni finali, u ssuġġeriet b’mod żbaljat li l-Kummissjoni żammet lura milli tindirizza dan l-argument imressaq minn CPCIF. |
(106) |
L-ewwel nett, is-sejbiet ta’ Q4 2022 dwar il-livell tal-importazzjonijiet ma setgħux jiġu ttrattati b’mod iżolat għad-determinazzjoni tat-theddida ta’ dannu. It-tieni, kif deskritt fil-premessa (237) tar-Regolament provviżorju, l-importazzjonijiet Ċiniżi kienu żdiedu b’mod sinifikanti matul il-perjodu sħiħ ikkunsidrat, it-tnaqqis fl-importazzjonijiet fi Q4 2022 segwa żieda kontinwa u qawwija fl-importazzjonijiet oġġett ta’ dumping fit-trimestri ta’ qabel u kien segwit minn żieda ulterjuri fl-ewwel trimestru ta’ wara l-perjodu tal-investigazzjoni. Dawn l-iżviluppi ġew ivvalutati fl-intier tagħhom u flimkien mal-effett soppressiv tal-importazzjonijiet Ċiniżi oġġett ta’ dumping fuq il-prezzijiet tal-Unjoni lejn tmiem il-PI u fil-perjodu ta’ wara l-PI indikaw il-bidla fiċ-ċirkostanzi li ħolqot sitwazzjoni dannuża kkawżata mill-importazzjonijiet Ċiniżi oġġett ta’ dumping, li kienet prevista b’mod ċar u imminenti. |
5.4. Konklużjoni dwar it-theddida ta’ dannu
(107) |
Kif stabbilit fir-Regolament provviżorju, filwaqt li l-industrija tal-Unjoni kienet sejra tajjeb sat-tielet trimestru tal-2022, kważi l-indikaturi kollha tad-dannu bdew jonqsu b’mod drammatiku matul l-aħħar trimestru tal-2022 u din is-sitwazzjoni negattiva kompliet matul l-ewwel trimestru tal-2023. |
(108) |
Investigazzjoni ulterjuri fl-istadju definittiv ikkonfermat li l-industrija tal-Unjoni għadha fi stat fraġli u li x-xejra negattiva tal-produtturi tal-Unjoni stabbilita fir-Regolament provviżorju kompliet fi Q2-Q3 2023. B’mod aktar speċifiku, il-prezzijiet tal-bejgħ kif ukoll il-kost tal-produzzjoni tal-produtturi tal-Unjoni inklużi fil-kampjun għall-perjodu msemmi juru li, b’mod konsistenti mat-tmiem tal-PI u ma’ Q1 2023, l-importazzjonijiet Ċiniżi oġġett ta’ dumping baqgħu jeżerċitaw soppressjoni tal-prezzijiet fuq il-prezzijiet tal-bejgħ tal-Unjoni fi Q2-Q3 2023. Il-prezzijiet tal-bejgħ tal-produtturi tal-Unjoni baqgħu taħt il-livell tal-kost tal-produzzjoni u s-sitwazzjoni tat-telf tal-industrija tal-Unjoni kompliet bi -11 % u -13 % fit-tieni u t-tielet trimestru tal-2023 rispettivament. |
(109) |
Għalhekk, il-Kummissjoni kkonfermat il-konklużjonijiet tagħha dwar l-eżistenza ta’ theddida ta’ dannu prevedibbli b’mod ċar u imminenti għall-industrija tal-Unjoni fi tmiem il-perjodu tal-investigazzjoni kif stabbilit fil-premessi (238) sa (242) tar-Regolament provviżorju. |
6. KAWŻALITÀ
6.1. Valutazzjoni
(110) |
Fis-sejbiet provviżorji tagħha, il-Kummissjoni ddistingwiet u sseparat l-effetti tal-fatturi magħrufa kollha (importazzjonijiet mill-ilmentaturi u kumpaniji relatati lill-ilmentaturi, żieda fl-użu tal-PET riċiklat mill-utenti tal-PET, importazzjonijiet minn pajjiżi terzi, il-prestazzjoni tal-esportazzjoni tal-industrija tal-Unjoni, żidiet fil-kostijiet tal-materja prima u l-prezzijiet tal-enerġija, żieda fil-kostijiet tal-investiment u preferenzi tax-xiri tal-klijenti) fuq is-sitwazzjoni tal-industrija tal-Unjoni mill-effetti dannużi tal-importazzjonijiet oġġett ta’ dumping. Madankollu, l-effett ta’ dawn il-fatturi l-oħra fuq l-iżviluppi negattivi tal-industrija tal-Unjoni nstab li, jekk kien jeżisti, kien biss wieħed limitat, u ma naqqasx ir-rabta kawżali bejn l-importazzjonijiet oġġett ta’ dumping u t-theddida ta’ dannu. |
(111) |
Wara l-aġġornament tad-data ta’ wara l-PI fl-istadju definittiv, id-data trimestrali dwar il-kost tal-produzzjoni u l-prezzijiet tal-bejgħ tal-produtturi tal-Unjoni fi Q2 u Q3 2023 (deskritta fit-Tabella 1) turi li l-produtturi tal-Unjoni komplew jiġu sfurzati jbigħu taħt il-kost bħala riżultat tal-pressjoni li ġejja mill-importazzjonijiet Ċiniżi oġġett ta’ dumping, u b’hekk tappoġġa s-sejbiet provviżorji tal-Kummissjoni. Dwar dan il-punt, Svepol sostniet fit-tweġiba tagħha għad-divulgazzjoni finali li mhuwiex spjegat kif it-treġġigħ lura fil-kundizzjonijiet tal-importazzjoni fi Q4 2022-Q3 2023 ma taffiex l-allegata pressjoni fuq il-produtturi tal-Unjoni. |
(112) |
Fir-rigward tal-aktar data reċenti dwar l-importazzjoni (għal Q2-Q3 2023) miċ-Ċina u minn pajjiżi terzi oħra, minkejja t-tnaqqis fl-importazzjonijiet Ċiniżi fil-perjodu msemmi minħabba effett dissważiv tal-bidu ta’ din l-investigazzjoni (ara l-premessa (68)), il-produtturi tal-Unjoni komplew ibatu minħabba l-effetti ta’ soppressjoni tal-prezzijiet mhux mitigata mill-produtturi esportaturi Ċiniżi, li impediet lill-produtturi tal-Unjoni milli jistabbilixxu l-prezzijiet tagħhom ogħla mill-kostijiet tal-produzzjoni tagħhom. |
(113) |
Fid-dawl ta’ dan ta’ hawn fuq u b’mod konsistenti mat-Taqsima 6.1 tar-Regolament provviżorju, il-Kummissjoni kkonfermat il-konklużjoni tagħha li l-importazzjonijiet Ċiniżi oġġett ta’ dumping kellhom impatt negattiv fuq is-sitwazzjoni tal-industrija tal-Unjoni u kienu qed jikkawżaw theddida ta’ dannu materjali lill-industrija tal-Unjoni filwaqt li fatturi oħra ma kinux kapaċi jnaqqsu din ir-rabta kawżali. |
6.2. Il-kummenti tal-partijiet interessati wara l-miżuri provviżorji
(114) |
Is-CPCIF iddikjarat li l-Kummissjoni naqset milli tistabbilixxi rabta kawżali bejn l-importazzjonijiet oġġett ta’ dumping u t-theddida ta’ dannu minn dawk l-importazzjonijiet oġġett ta’ dumping. Skont is-CPCIF (u mingħajr analiżi dettaljata dwar dan il-punt), ir-Regolament Provviżorju kien nieqes minn analiżi sinifikanti u ma pprovda l-ebda element ta’ kawżalità sostnut minn biżżejjed evidenza li turi li l-volum u/jew il-livelli tal-prezzijiet kienu responsabbli għal impatt negattiv fuq l-industrija tal-Unjoni. Is-CPCIF tenniet l-argument tagħha wara d-divulgazzjoni finali. |
(115) |
Il-Kummissjoni rreferiet għat-Taqsima 6 tar-Regolament provviżorju u spjegat ir-raġunijiet għall-konklużjoni li l-kawżalità ġiet stabbilita skont l-istandard legali meħtieġ. |
(116) |
Svepol sostniet li l-Kummissjoni ma kinitx uriet l-eżistenza ta’ relazzjoni kawżali pożittiva bejn l-allegati “prezzijiet baxxi tal-importazzjonijiet Ċiniżi” fi Q4 2022 u fi Q1 2023 u s-soppressjoni tal-prezzijiet tal-industrija tal-Unjoni li rriżultat fid-deterjorament sinifikanti tal-profittabbiltà tal-industrija tal-Unjoni fl-aħħar trimestru tal-PI u l-bqija tat-telf fi Q1 2023. Fit-tweġiba tagħha għad-divulgazzjoni finali, Svepol sostniet li l-Kummissjoni naqset milli tispjega kif, meta l-volumi tal-importazzjoni kienu fl-ogħla livell tagħhom u l-prezzijiet tal-importazzjoni kienu baxxi matul l-ewwel tliet trimestri tal-2022, il-produtturi tal-Unjoni kienu kapaċi jiksbu l-aħjar prestazzjoni tagħhom u jiddefendu ruħhom kontra s-soppressjoni tal-prezzijiet. Minkejja l-analiżi stabbilita fil-premessa (117), is-CPCIF issuġġeriet ukoll fit-tweġiba tagħha għad-divulgazzjoni finali li l-fatt li l-prezzijiet fis-suq tal-PET tal-Unjoni għadhom taħt pressjoni ’l isfel minħabba tkomplija ta’ domanda dgħajfa ma huwa rifless imkien fl-analiżi tal-Kummissjoni. |
(117) |
Kif stabbilit fil-premessa (249) tar-Regolament provviżorju, il-livell tal-produzzjoni u l-utilizzazzjoni tal-kapaċità tal-industrija tal-Unjoni wrew tnaqqis sinifikanti matul il-perjodu tal-investigazzjoni, eżatt wara perjodu fejn seħħet żieda sinifikanti fl-importazzjonijiet Ċiniżi. Filwaqt li l-industrija tal-Unjoni kienet kapaċi tirreżisti l-volum dejjem jiżdied ta’ importazzjonijiet Ċiniżi oġġett ta’ dumping fl-ewwel tliet trimestri tal-PI billi żammet operazzjonijiet ta’ PET profittabbli u volumi ta’ bejgħ relattivament stabbli tal-Unjoni, dan kien dovut għal żieda fid-domanda tal-klijenti li dehret fl-ewwel nofs tal-PI. Madankollu, hekk kif id-domanda u l-volumi tal-bejgħ tal-Unjoni bdew jonqsu u r-rati operattivi tal-Unjoni naqsu drastikament, il-pressjoni mill-importazzjonijiet Ċiniżi oġġett ta’ dumping laħqet livelli mhux sostenibbli u wasslet għal aggravazzjoni tas-sitwazzjoni tal-produtturi tal-Unjoni fi tmiem il-PI u fil-perjodu ta’ wara l-PI (ara l-premessa (223) tar-Regolament provviżorju), li rriflettiet prezzijiet tal-bejgħ baxxi u profittabbiltà negattiva. Għalhekk, ir-relazzjoni kawżali pożittiva bejn l-importazzjonijiet Ċiniżi u d-deterjorament sinifikanti tal-industrija tal-Unjoni ġiet stabbilita kif xieraq u l-pretensjoni ta’ Svepol ġiet miċħuda. |
(118) |
Is-CPCIF sostniet li d-determinazzjoni tat-theddida ta’ dannu tal-Kummissjoni bbażat fuq is-sejbiet tagħha matul Q4 2022 u l-perjodu ta’ wara l-PI, distinti mis-sejbiet tagħha għall-perjodu kkunsidrat fejn ma ġie identifikat l-ebda dannu. Madankollu, meta ġew evalwati l-effetti tal-importazzjonijiet Ċiniżi mill-produtturi tal-Unjoni, skont is-CPCIF il-valutazzjoni qabblithom max-xejriet ġenerali tal-importazzjoni matul il-perjodu kkunsidrat, minflok ma ffukat speċifikament fuq Q4 2022 u l-perjodu ta’ wara l-PI. Is-CPCIF tenniet l-argument tagħha wara d-divulgazzjoni finali. |
(119) |
Il-pretensjoni ta’ CPCIF kienet żbaljata. L-ewwel nett, kif segwa mit-Taqsima 5 u t-Taqsima 6 tar-Regolament provviżorju (b’mod partikolari l-premessi (210), (212), (213), (222), (223), (230), (233), (244)-(247), (252), (255)), huwa evidenti li d-determinazzjoni ta’ theddida ta’ dannu kienet tiddependi fuq l-eżami tax-xejriet fil-perjodu tal-investigazzjoni b’enfasi partikolari fuq l-iżviluppi trimestrali. Fl-istess ħin, f’konformità mal-premessa (207) tar-Regolament provviżorju, il-Kummissjoni rrieżaminat ukoll id-data għall-perjodu kkunsidrat għal fehim aħjar tas-sitwazzjoni tal-industrija tal-Unjoni fuq perjodu itwal, li wassal għall-istabbiliment ta’ theddida ta’ dannu. It-tieni, speċifikament fir-rigward tal-importazzjonijiet mir-RPĊ mill-kumpaniji li lmentaw, għall-kuntrarju tal-pretensjoni tas-CPCIF, kif stabbilit fil-premessa (252) tar-Regolament provviżorju, il-Kummissjoni evalwat is-sitwazzjoni fir-rigward tal-PI kif ukoll ta’ Q4 2022. Barra minn hekk, kif deskritt fit-Tabella 14 tar-Regolament provviżorju u fit-Tabella 1 ta’ dan ir-Regolament, iċ-ċifri ta’ Q1 - Q2 2023, li wrew li l-importazzjonijiet mill-industrija tal-Unjoni ammontaw għal [10 - 20] % tal-importazzjonijiet Ċiniżi kumplessivi ma kinux kapaċi jnaqqsu r-rabta kawżali. Għalhekk, il-pretensjoni tas-CPCIF ġiet miċħuda. |
(120) |
Wara l-impożizzjoni tal-miżuri provviżorji, is-CPCIF fittxet li turi bidla minn PET verġni għal PET riċiklat billi qabblet iċ-ċifri trimestrali għall-perjodu Q4 2022 - Q1 2023 għaż-żewġ segmenti. Is-CPCIF reġgħet stqarret dan wara d-divulgazzjoni finali. L-UNESDA tenniet ukoll l-argument tagħha dwar is-sostituzzjoni tal-vPET għall-rPET, li wassal għat-telf tal-bejgħ mill-produtturi tal-vPET. |
(121) |
L-ewwel nett, il-Kummissjoni rreferiet għall-konklużjonijiet li saru fil-premessa (254) tar-Regolament provviżorju, li jibqgħu validi. It-tieni, kif spjegat fil-premessa (49), iċ-ċifri tal-produzzjoni tal-rPET għal Q1 2023 ġew aġġornati filwaqt li tqieset l-aħħar data ta’ Wood Mackenzie disponibbli b’aġġustamenti ’l isfel magħmula għall-produzzjoni tal-rPET. It-tielet, anki meta jitqiesu ċ-ċifri oriġinali, adozzjoni temporanja fil-produzzjoni tal-rPET xprunata mill-isforzi ta’ sostenibbiltà tal-UE ma tistax timmina b’mod plawżibbli l-analiżi tat-theddida ta’ dannu f’dan il-każ u lanqas tnaqqas ir-rabta kawżali fid-dawl tad-daqs tas-segment tal-industrija tal-Unjoni tal-rPET u l-impatt tiegħu fuq l-indikaturi ekonomiċi fil-perjodu kkunsidrat, matul il-PI jew fil-perjodu ta’ wara l-PI. Fi kwalunkwe każ, is-CPCIF u l-UNESDA naqsu milli juru kif kontrobilanċ temporanju tat-tnaqqis fil-produzzjoni għall-vPET permezz ta’ żieda fil-produzzjoni tal-rPET fil-perjodu li fih diġà ġiet stabbilita t-theddida ta’ dannu kien b’xi mod jaffettwa l-kawżalità f’dan il-każ. |
(122) |
Svepol argumentat li l-Kummissjoni kienet ivvalutat biss il-volumi u l-prezzijiet tal-importazzjoni minn pajjiżi terzi għall-PI kollu kemm hu, mingħajr ma analizzat is-sitwazzjoni għal dawn l-importazzjonijiet f’termini ta’ prezzijiet u volumi għal Q4 2022 u Q1 2023. Skont Svepol, ma kien hemm l-ebda raġuni biex jiġi konkluż li l-importazzjonijiet minn pajjiżi terzi ma naqqsux ir-rabta kawżali bejn l-importazzjonijiet mir-RPĊ u t-theddida ta’ dannu għall-industrija tal-Unjoni. B’appoġġ għal din il-pretensjoni, Svepol sostniet li l-importazzjonijiet mit-Turkija, mill-Vjetnam, u mill-Eġittu żdiedu matul il-perjodu minn Q4 2022 sa Q1 2023 u kienu b’mod kumulattiv 80 000 tunnellata ogħla mill-importazzjonijiet mir-RPĊ matul il-perjodu msemmi. Svepol tenniet l-argumenti tagħha wara d-divulgazzjoni finali, filwaqt li żiedet li l-Kummissjoni jenħtieġ li tikkunsidra wkoll data dwar l-importazzjonijiet minn pajjiżi terzi għal Q2-Q3 2023. Bl-istess mod, skont is-CPCIF, il-Kummissjoni missha kkunsidrat id-data dwar l-importazzjoni għal Q4 2022 u data ta’ wara l-PI fil-valutazzjoni tagħha tal-importazzjonijiet minn pajjiżi terzi. Fl-analiżi tagħha, is-CPCIF irreferiet għal żieda sinifikanti fl-importazzjonijiet mill-Eġittu fl-2023 u għal data reċenti dwar l-importazzjoni (Ġunju – Settembru 2023) li turi li l-volum u r-rata ta’ żieda fl-importazzjonijiet minn diversi pajjiżi terzi oħra qabżu b’mod sostanzjali dawk attribwiti għar-RPĊ. Is-CPCIF tenniet l-argument tagħha wara d-divulgazzjoni finali. L-UNESDA argumentat ukoll wara d-divulgazzjoni finali li fl-2023, erbgħa mill-pajjiżi fornituri ewlenin (l-Indoneżja, il-Pakistan, il-Vjetnam u l-Oman) li jammontaw għal 29,5 % tal-importazzjonijiet tal-Unjoni kellhom prezzijiet tal-importazzjoni aktar baxxi mill-prezz tal-importazzjonijiet miċ-Ċina (li jammontaw għal 19,7 % tal-importazzjonijiet tal-Unjoni). Għalhekk, skont l-UNESDA, il-livelli tal-prezzijiet tal-Unjoni ma setgħux jiġu attribwiti liċ-Ċina. |
(123) |
Fil-kuntest tad-determinazzjoni tat-theddida ta’ dannu, l-importazzjonijiet minn pajjiżi esportaturi kbar għajr ir-RPĊ għandhom jiġu vvalutati mhux biss għall-PI kollu, iżda wkoll f’livell aktar granulari u fuq bażi trimestrali matul u wara l-PI. |
(124) |
F’dan l-isfond, fil-perjodu tal-ewwel tliet trimestri tal-2022, li wassal għall-istabbiliment tat-theddida ta’ dannu u s-soppressjoni tal-prezzijiet tal-Unjoni, dawn l-importazzjonijiet minn pajjiżi terzi ġew ipprezzati ogħla b’ammont sinifikanti minn dawk li joriġinaw mir-RPĊ. Barra minn hekk, l-ebda wieħed minn dawn il-prezzijiet tal-importazzjonijiet ta’ “pajjiżi terzi oħra” ma kien taħt il-prezzijiet tal-Unjoni fit-tielet trimestru, immedjatament qabel id-deterjorament sinifikanti tal-industrija tal-Unjoni. Barra minn hekk, filwaqt li l-ishma mis-suq ta’ dawn l-importazzjonijiet kienu relattivament stabbli matul il-perjodu tal-2022 sa Q1 2023, is-sehem mis-suq tal-importazzjonijiet Ċiniżi, minbarra l-importazzjonijiet magħmula mill-industrija tal-Unjoni, żdied għal [12–13] % fi Q1 2023 (meta mqabbel ma’ [4,5–5,5] % li deher fi Q1 2022 jew fi Q4 2022), meta t-theddida ta’ dannu kienet diġà preżenti. Għalhekk, b’kunsiderazzjoni tal-livell tal-prezzijiet u tal-istabbiltà tal-ishma mis-suq tal-importazzjonijiet minn pajjiżi terzi oħra matul il-perjodu mill-2022 sa Q1 2023 meta mqabbla mal-importazzjonijiet Ċiniżi, instab li l-importazzjonijiet minn pajjiżi terzi (it-Turkija, l-Eġittu u l-Vjetnam) ma setgħux inaqqsu r-rabta kawżali bejn l-importazzjonijiet Ċiniżi oġġett ta’ dumping u t-theddida ta’ dannu għall-industrija tal-Unjoni kif stabbilit fil-premessa (259) tar-Regolament provviżorju. Fir-rigward tal-analiżi tal-aktar data riċenti dwar l-importazzjoni mwettqa mis-CPCIF u mill-UNESDA, effett dissważiv tal-bidu ta’ din l-investigazzjoni (ara l-premessa (68) ta’ dan ir-Regolament) wassal biex l-analiżi ta’ tali data reċenti, meta mqabbla maċ-ċifri tal-importazzjonijiet Ċiniżi fl-Unjoni u l-effett fuq il-prezzijiet tal-Unjoni ma tkunx rappreżentattiva. Għalhekk, il-pretensjonijiet imressqa minn Svepol u UNESDA ġew miċħuda. |
(125) |
Is-CPCIF sostniet li l-Kummissjoni ma pprovdiet l-ebda data trimestrali dwar il-kost tal-produzzjoni tal-industrija tal-Unjoni matul il-PI u l-perjodu sussegwenti ta’ wara l-PI u, konsegwentement, l-analiżi tal-kawżalità f’dan ir-rigward kienet spekulattiva u nieqsa minn evidenza pożittiva. Barra minn hekk, is-CPCIF sostniet li qabel Q4 2022, il-kostijiet tal-produzzjoni tal-PET esperjenzaw żieda bla preċedent, li għamlitha impossibbli għall-produtturi tal-Unjoni li jallinjaw il-prezzijiet tal-bejgħ tagħhom, b’mod partikolari fid-dawl tat-tnaqqis simultanju fid-domanda. Insostenn tal-pretensjoni tagħha, is-CPCIF irreferiet għal eskalazzjoni f’daqqa u straordinarja fil-prezzijiet tal-elettriku, tal-gass u tal-PTA f’Settembru 2022. |
(126) |
L-ewwel nett, id-data trimestrali dwar il-kost tal-produzzjoni tal-produtturi tal-Unjoni fil-PI u fil-perjodu sussegwenti ta’ wara l-PI deskritta fit-Tabella 1 u fit-Tabella 2 appoġġat is-sejbiet tal-Kummissjoni li saru fil-premessa (265) tar-Regolament provviżorju. L-analiżi trimestrali wriet li għalkemm il-kost tal-produzzjoni fi Q2 u Q3 2022 żdied kważi għal-livelli li dehru fi Q4, il-produtturi tal-Unjoni setgħu jistabbilixxu l-prezzijiet tal-bejgħ f’dak il-perjodu (Q2 - Q3 2022) ferm ogħla mil-livell tal-kost tal-produzzjoni tagħhom. Madankollu, fi Q4 2022 u fi Q1 - Q3 2023, il-produtturi tal-Unjoni kienu mġiegħla jbigħu taħt il-kost bħala riżultat tal-pressjoni li ġejja mill-importazzjonijiet Ċiniżi oġġett ta’ dumping. It-tieni nett, l-argument ta’ CPCIF li kien hemm żieda f’daqqa u notevoli fil-prezzijiet tal-materja prima u tal-enerġija eżatt qabel jew fil-bidu ta’ Q4 2022 ma sabx appoġġ fid-data vverifikata dwar il-kost tal-produzzjoni. Il-kost tal-produzzjoni tal-industrija tal-Unjoni bilkemm inbidel bejn Q3 u Q4 tal-2022 (żieda ta’ 4 %), li għamel l-argument tas-CPCIF ineffettiv. |
6.3. Konklużjoni dwar il-kawżalità
(127) |
Il-konklużjonijiet milħuqa fil-premessi (270) sa (271) tar-Regolament provviżorju ġew ikkonfermati. |
7. LIVELL TAL-MIŻURI
7.1. Marġni tad-dannu
(128) |
B’referenza għall-premessa (163) tar-Regolament provviżorju, u l-aġġustament tal-prezz CIF tal-esportaturi għall-kostijiet ta’ wara l-importazzjoni, Svepol staqsiet lill-Kummissjoni għaliex il-kostijiet ta’ wara l-importazzjoni tagħha ma kinux rappreżentattivi f’din l-investigazzjoni. Huwa osservat li Svepol iddikjarat bħala kostijiet ta’ wara l-importazzjoni l-SG&A tal-kumpanija kif ukoll il-kost tat-trasport lill-klijenti mġarrba wara l-iżdoganar. Madankollu, l-ebda kategorija tal-kostijiet elenkati minn Svepol ma setgħet titqies bħala kostijiet li għalihom isir aġġustament fil-kuntest tal-kalkolu tat-twaqqigħ tal-prezz u tal-marġni tad-dannu. |
(129) |
PET Europe qieset li l-użu tal-profitt fil-mira minimu ma kienx raġonevoli u tenniet l-argument tagħha wara d-divulgazzjoni finali. Filwaqt li l-profitt fil-mira ta’ 6 % applikat huwa minimu legali, kif stabbilit fil-premessa (275) tar-Regolament provviżorju), skont PET Europe, dan ma kienx jirrifletti l-ħtiġijiet tal-industrija tal-Unjoni li hija intensiva fil-kapital. L-ilmentatur irrefera għat-tracker tas--CSI Market, li abbażi tiegħu l-profittabbiltà fis-settur tas-sustanzi kimiċi kienet ta’ 14,73 % (marġni ta’ qabel it-taxxa) u nnota li għall-finijiet tal-kostruzzjoni tal-valur normali f’dan il-każ, il-Kummissjoni applikat marġni ta’ profitt ta’ 14,84 %. PET Europe sussegwentement ikkonkludiet li marġni ta’ profitt fil-mira ta’ mill-inqas 14 % huwa xieraq għall-finijiet ta’ din l-investigazzjoni. |
(130) |
L-ewwel nett, il-PET jitqies bħala komodità, kif imfakkar ukoll fil-miżuri l-oħra li jkopru l-importazzjonijiet ta’ dan il-prodott – ara l-premessa (170) tar-Regolament (UE) 2019/1286 (14), u l-produtturi tal-Unjoni tipikament jiksbu profittabbiltà taħt il-minimu legali. Dan intwera miċ-ċifri mill-ewwel sentejn tal-perjodu kkunsidrat (2,9 % fl-2019 u 0,3 % fl-2020) kif ukoll mill-investigazzjoni tal-passat, fejn il-profittabbiltà tal-industrija tal-Unjoni laħqet 3 % fl-2017 u 3,7 % rispettivament fil-perjodu minn April 2017 sa Marzu 2018 (ara l-premessa (160) tar-Regolament (UE) 2019/1286). Barra minn hekk, id-data dwar il-profittabbiltà mit-tracker tas-CSI Market kienet tikkonċerna s-settur tal-manifattura tal-kimika aktar milli s-settur tal-industrija tal-plastik u tal-gomma, li għalih il-profittabbiltà hija ta’ 5,13 % għal Q3 2023 (il-perjodu msemmi minn PET Europe). Fl-aħħar nett, il-marġni ta’ profitt użat għall-bini tal-valur normali kien jikkonċerna l-profitt li sar fil-pajjiż rappreżentattiv identifikat skont l-Artikolu 2(6a) tar-Regolament bażiku, li ma jistax jintuża bħala parametru referenzjarju għall-profitt fil-mira tal-produtturi tal-industrija tal-Unjoni. Fid-dawl ta’ dak li ntqal hawn fuq, il-pretensjoni ta’ PET Europe ġiet miċħuda. |
(131) |
Kif previst fl-Artikolu 9(4), it-tielet subparagrafu, tar-Regolament bażiku, u minħabba li l-Kummissjoni ma rreġistratx l-importazzjonijiet matul il-perjodu ta’ qabel id-divulgazzjoni, din analizzat l-iżvilupp tal-volumi tal-importazzjoni biex tistabbilixxi jekk kienx hemm żieda sostanzjali ulterjuri fl-importazzjonijiet soġġetti għall-investigazzjoni matul il-perjodu ta’ qabel id-divulgazzjoni u b’hekk tirrifletti d-dannu addizzjonali li jirriżulta minn din iż-żieda fid-determinazzjoni tal-marġni tad-dannu. |
(132) |
Abbażi tad-data mill-bażi tad-data Surveillance 3, il-volumi tal-importazzjonijiet mir-RPĊ matul il-perjodu ta’ 4 ġimgħat tad-divulgazzjoni minn qabel kienu 42 % inqas mill-volumi tal-importazzjoni fil-perjodu tal-investigazzjoni matul l-istess perjodu ta’ 4 ġimgħat. Fuq dik il-bażi, il-Kummissjoni kkonkludiet li ma kienx hemm żieda sostanzjali fl-importazzjonijiet soġġetti għall-investigazzjoni matul il-perjodu ta’ qabel id-divulgazzjoni. |
(133) |
Għalhekk, il-Kummissjoni ma aġġustatx il-livell ta’ eliminazzjoni tad-dannu f’dan ir-rigward u fin-nuqqas ta’ kummenti, il-premessa (279) tar-Regolament provviżorju hija kkonfermata. |
7.2. Konklużjoni dwar il-livell ta’ miżuri
(134) |
Wara l-valutazzjoni ta’ hawn fuq, id-dazji anti-dumping definittivi jenħtieġ li jiġu stabbiliti kif ġej f’konformità mal-Artikolu 7(2) tar-Regolament bażiku:
|
8. INTERESS TAL-UNJONI
8.1. Interess tal-industrija tal-Unjoni
(135) |
Minbarra l-valutazzjoni pprovduta fir-Regolament provviżorju, ta’ min jinnota li wara l-PI, fl-2023 diversi produtturi tal-Unjoni naqqsu temporanjament jew waqqfu għal kollox il-produzzjoni tagħhom bħala reazzjoni għas-sitwazzjoni diffiċli kkawżata mill-importazzjonijiet oġġett ta’ dumping. Għalhekk, fin-nuqqas ta’ miżuri, mhux biss l-eżistenza tal-industrija tal-PET fl-Unjoni tiġi pperikolata serjament, iżda bl-istess mod l-istabbiltà tal-provvista tal-PET għall-utenti tal-PET tkun ipperikolata. |
(136) |
Fin-nuqqas ta’ kummenti rigward l-interess tal-industrija tal-Unjoni, il-konklużjoni li ntlaħqet fil-premessa (284) tar-Regolament proviżorju hija kkonfermata. |
8.2. L-interess tal-utenti u tal-importaturi mhux relatati
(137) |
Fit-tweġiba tagħhom għad-divulgazzjoni provviżorja, l-utenti tennew li l-fatti li ġejjin iridu jitqiesu fl-analiżi tal-Interess tal-Unjoni: (i) il-PET bħala perċentwal tal-kost tal-produzzjoni varja bejn 30 % u 60 % għall-produtturi tal-ilma fil-fliexken u bejn 14 % u 30 % għall-produtturi ta’ soft drinks, u b’hekk kellu impatt għoli fuq l-operazzjonijiet u l-profittabbiltà tal-utenti, (ii) ir-rekwiżiti li jirriżultaw mid-Direttiva dwar il-Plastik li Jintuża Darba Biss (Single Use Plastic, “SUP”), jiġifieri tappijiet imwaħħlin minn Lulju 2024 u l-inkorporazzjoni ta’ 25 % ta’ rPET fil-fliexken tax-xorb tal-plastik mill-2025 li jiżdiedu għal 30 % sal-2030) u r-Regolament dwar l-Imballaġġ u l-Iskart mill-Imballaġġ (Packaging & Packaging Waste Regulation, PPWR) assoċjati ma’ kost ogħla tal-rPET billi l-prezz tal-rPET isegwi l-prezz tal-vPET iżda huwa sostanzjalment ogħla u (iii) il-fatt li t-tkabbir tal-industrija tal-rPET huwa protett mill-kompetizzjoni mal-PET mir-RPĊ, minħabba l-qafas regolatorju eżistenti u futur bħad-Direttiva SUP u l-approvazzjonijiet tal-EFSA (15) għall-rPET ta’ grad alimentari. Fit-tweġiba tagħhom għad-divulgazzjoni finali, l-UNESDA argumentat li l-impożizzjoni tad-dazji anti-dumping tkun projbittiva għall-importazzjonijiet tal-PET miċ-Ċina, b’referenza għall-impożizzjoni ta’ tariffa tan-nazzjon l-aktar iffavorit (MFN) ta’ 6,5 % fuq l-Indja fl-2022 u l-għajbien sussegwenti tal-importazzjonijiet tal-PET Indjani fl-2023. |
(138) |
Il-Kummissjoni rrikonoxxiet li l-PET huwa l-uniku komponent tal-akbar kost għall-utenti tal-PET. Madankollu, f’konformità mal-premessa (294) tar-Regolament provviżorju, id-dazji imposti huma stabbiliti f’livell li jippermetti lill-utenti u lill-importaturi jkomplu jimportaw il-PET mir-RPĊ bi prezzijiet raġonevoli. Peress li d-dazji huma stabbiliti f’livell baxx sa 6,6 %, anki jekk il-PET kien jammonta għal 14 sa 60 % tal-kost tal-produzzjoni tal-utenti, il-livell tad-dazji ma għandux ikollu effett projbittiv jew jaffettwa materjalment l-implimentazzjoni u l-kisba tal-objettivi ta’ sostenibbiltà u jista’ jiġi assorbit mill-utenti li jixtiequ jkomplu jakkwistaw il-materjal mir-RPĊ. Barra minn hekk, il-provvisti jistgħu jiġu żgurati minn produtturi oħra, bħall-industrija tal-Unjoni u pajjiżi terzi oħra bħat-Turkija, il-Vjetnam, u l-Eġittu. Fir-rigward tat-tqabbil mill-UNESDA mal-introduzzjoni tat-tariffa MFN għall-importazzjonijiet Indjani li rriżulta fl-eliminazzjoni tal-importazzjonijiet tal-Unjoni, ġie nnutat li l-importazzjonijiet Ċiniżi tal-PET kienu diġà soġġetti għad-dazju doganali komuni ta’ 6,5 % qabel din l-investigazzjoni li ma waqqafhomx milli jieħdu sehem sinifikanti mis-suq fl-Unjoni. |
(139) |
Il-Kummissjoni ma kkontestatx lanqas li l-utenti downstream tal-PET joperaw f’ambjent regolatorju u makroekonomiku diffiċli, u jkollhom jagħmlu investimenti addizzjonali jew iġarrbu kostijiet addizzjonali biex jikkonformaw mar-rekwiżiti u jimplimentawhom fost l-oħrajn b’rabta mad-Direttiva SUP u l-PPWR. Madankollu, l-eżistenza ta’ dawn ir-rekwiżiti regolatorji, simili għal fatturi oħra li huma ta’ piż fuq il-kost tal-PET (eż. il-prezz tal-materja prima jew il-pressjoni mix-xerrejja) ma setgħetx tipperikola kundizzjonijiet ekwi fis-suq upstream tal-Unjoni għall-PET billi tindirizza s-sitwazzjoni tad-dumping dannuż, b’mod partikolari meta l-effett negattiv tad-dazji anti-dumping fuq l-utenti jitqies bħala minuri. |
(140) |
Fir-rigward tas-segment tal-rPET, filwaqt li kien segment li qed jikber ukoll minħabba r-rekwiżiti ta’ sostenibbiltà leġiżlati tal-Unjoni, ċertament ma kienx protett minn xi kompetizzjoni Ċiniża inġusta. Il-qafas regolatorju ma pprekludiex l-rPET Ċiniż oġġett ta’ dumping milli jidħol fl-Unjoni – għall-kuntrarju, l-aġenda ta’ sostenibbiltà tkun biss tinkoraġġixxi l-influss ta’ rPET Ċiniż u l-esportaturi Ċiniżi ma jinżammux milli japplikaw (u jiksbu) approvazzjonijiet regolatorji mill-EFSA. |
(141) |
Barra minn hekk, l-utenti enfasizzaw li l-kundizzjonijiet tal-kompetizzjoni se jiġu affettwati ħażin bl-istabbiliment ta’ dazji anti-dumping f’dan il-każ, peress li min-naħa tal-fornitur is-suq huwa ddominat mill-produttur tal-Unjoni Indorama u l-miżuri jneħħu l-uniku pajjiż terz kbir mhux iddominat minn Indorama. L-UNESDA tenniet l-argument wara d-divulgazzjoni finali, filwaqt li żiedet li l-impatt fuq il-prezzijiet tal-miżuri anti-dumping se jkun akbar minħabba l-oligopolju tal-istruttura tas-suq. Fit-tweġiba tagħha għad-divulgazzjoni finali, Svepol argumentat ukoll li l-impożizzjoni ta’ dazji anti-dumping minbarra d-dazju doganali komuni timpedixxi l-aċċess għas-suq tal-Unjoni għall-esportaturi Ċiniżi, speċjalment fid-dawl tal-importazzjonijiet bi prezz baxx minn pajjiżi terzi oħra. |
(142) |
L-ewwel nett, l-importazzjonijiet Ċiniżi bi prezz ġust mhux se jinżammu milli jidħlu fl-Unjoni. It-tieni, l-industrija tal-PET tal-Unjoni tikkonsisti f’mill-inqas tmien operaturi indipendenti involuti fil-produzzjoni tal-vPET u aktar minn ħamsin produttur tal-rPET, li, għall-kuntrarju tal-argument tal-UNESDA, ma jistgħux jitqiesu bħala struttura tas-suq oligopolistika. Barra minn hekk, filwaqt li Indorama jista’ jkollha bażi b’saħħitha fl-Unjoni u fis-suq globali tal-PET, pajjiżi esportaturi kbar bħall-Vjetnam, il-Korea t’Isfel jew it-Turkija u l-produtturi tagħhom joħolqu kompetizzjoni b’saħħitha għall-entitajiet ta’ Indorama. Barra minn hekk, l-utenti ma pprovdew l-ebda evidenza sostanzjata li dawk il-pajjiżi ma jkunux jistgħu jissodisfaw id-domanda li ġejja mill-utenti u l-importaturi tal-Unjoni. |
(143) |
Fit-tweġiba tagħha għad-divulgazzjoni finali, Svepol sostniet li s-swieq tal-esportazzjoni alternattivi ma jkunux jistgħu jeżerċitaw pressjoni kompetittiva fuq id-dominanza tas-suq ta’ Indorama fl-Unjoni. Bl-istess mod, l-UNESDA argumentat li l-importazzjonijiet mill-Vjetnam u l-Korea ma jkunux biżżejjed biex jikkumbattu l-konċentrazzjoni tas-suq li qed tinħoloq. Il-pretensjonijiet ma kienu appoġġati minn ebda fatt, b’mod partikolari fid-dawl tal-istatistika dwar l-importazzjoni għall-2023 li turi bħala eżempju li l-importazzjonijiet tal-Vjetnam fl-Unjoni kienu 5 punti perċentwali ogħla minn dawk tat-Turkija (suq fejn Indorama hija preżenti wkoll, iżda mhux esklużivament) u perċentwal ta’ 5,6 ogħla mill-importazzjonijiet mill-Eġittu (suq iddominat minn Indorama). Din l-istatistika turi b’mod ċar il-kompetizzjoni b’saħħitha li s-swieq tal-esportazzjoni alternattivi joħolqu għall-kumpaniji ta’ Indorama. Għaldaqstant, l-argument ta’ Svepol kellu jiġi miċħud. |
(144) |
L-utenti rreferew ukoll għall-impjiegi fis-settur tax-xorb bħala wieħed mill-elementi ewlenin għall-kunsiderazzjoni u tennew dik il-pożizzjoni fit-tweġiba tagħhom għad-divulgazzjoni finali. L-industrija tal-utenti sostniet li huma f’sitwazzjoni vulnerabbli b’(i) livelli ta’ impjieg affettwati wara ż-żidiet sinifikanti fil-kostijiet fl-2022, (ii) l-irduppjar tal-prezz tal-PET meta mqabbel mal-kostijiet l-oħra kollha, u (iii) l-istaġnar tal-prezzijiet tal-bejgħ (ta’ prodotti mballati bil-PET). Saret enfasi partikolari fuq l-SMEs, li jammontaw għal 95 % tas-settur tal-ilma fil-fliexken li min-naħa tiegħu kien jirrappreżenta 37 % tal-konsum tal-PET tal-grad alimentari u li huma aktar vulnerabbli għall-inflazzjoni u jiffaċċjaw proporzjon ogħla ta’ kost tal-PET fuq il-kost globali tal-produzzjoni. Svepol sostniet ukoll li l-impożizzjoni ta’ dazji anti-dumping twassal għal konsegwenzi diżastrużi għall-industrija downstream tal-Unjoni, li jpoġġi eluf ta’ impjiegi tal-Unjoni f’periklu, u għall-konsumaturi tal-UE peress li dan iwassal għal żieda fil-prezzijiet tax-xarbiet fil-fliexken fil-kuntest ta’ kriżi tal-għoli tal-ħajja u inflazzjoni għolja, filwaqt li s-sitwazzjoni tal-produtturi tal-PET x’aktarx li ma titjiebx wara l-adozzjoni tal-miżuri anti-dumping, anke minħabba li l-profittabbiltà tal-produtturi tal-Unjoni kompliet tonqos minkejja l-importazzjonijiet Ċiniżi baxxi ħafna. Fit-tweġiba tagħha għad-divulgazzjoni finali, Svepol sostniet li l-Kummissjoni naqset milli tispjega għaliex qed tagħti aktar piż lill-għadd komparattivament żgħir ta’ impjiegi fl-industrija tal-PET tal-Unjoni, filwaqt li tiċħad ir-riskju għall-impjieg ta’ 300 000 persuna fl-industrija utenti tal-Unjoni. |
(145) |
L-effett negattiv tad-dazji anti-dumping fuq l-impjiegi fl-industrija tax-xorb tqies bħala minuri għar-raġunijiet stabbiliti fil-premessa (138) hawn fuq. Riskju remot u li ma jistax jitkejjel għall-impjiegi fl-industrija tal-utenti ma setax jegħleb l-interess li tiġi indirizzata s-sitwazzjoni speċifika ta’ dumping dannuż misjub fis-suq upstream tal-PET. Fir-rigward tal-interess tal-konsumaturi tal-Unjoni, filwaqt li ma ġiex ikkontestat li huma qed jiffaċċjaw inflazzjoni u żieda fl-għoli tal-ħajja, huwa diffiċli li wieħed jara kif iħossu l-impatt tad-dazju anti-dumping jew f’sitwazzjoni fejn il-prezz tal-materja prima għall-imballaġġ tal-PET jonqos jew fejn, kif argumentaw l-utenti tal-PET, dan tal-aħħar ma jkunx jista’ jgħaddi kwalunkwe żieda fil-prezz, inkluża żieda ipotetika xprunata mill-impożizzjoni ta’ dazju anti-dumping) fuq ix-xerrejja, bħall-ktajjen tal-bejgħ bl-imnut. |
(146) |
L-utenti sostnew ukoll li l-livell ta’ profittabbiltà tal-produtturi tal-vPET kien sostanzjalment ogħla mil-livelli ta’ profittabbiltà tal-utenti. L-UNESDA tenniet l-argument wara d-divulgazzjoni finali u b’referenza għall-perjodu 2019-2022. Madankollu, din il-pretensjoni ma kenitx sostanzjata fir-rigward tat-tmiem tal-PI u tal-perjodu ta’ wara l-PI u ma setgħetx tiġi sostnuta fil-kuntest tas-sitwazzjoni attwali ta’ telf li qegħdin fiha l-produtturi tal-Unjoni. |
(147) |
L-utenti rreferew ukoll għal kwistjonijiet u tfixkil fil-konsenji tal-PET miksuba mill-produtturi tal-PET tal-Unjoni matul il-perjodu kkunsidrat bħala wieħed mill-elementi li għandhom jiġu vvalutati bħala parti mill-analiżi tal-interess tal-Unjoni. Wara d-divulgazzjoni finali, l-UNESDA affermat li t-tfixkil kien relatat mal-istruttura ta’ oligopolju tas-suq. Il-Kummissjoni sabet li l-istabbiltà tal-industrija tal-PET tal-Unjoni flimkien ma’ importazzjonijiet bi prezz ġust minn pajjiżi terzi huma kruċjali biex tiġi żgurata l-istabbiltà tal-provvista għall-industrija tal-utenti u għall-mitigazzjoni tal-effetti ta’ kwalunkwe inċident futur ta’ force majeure jew kwistjonijiet oħra bil-konsenji tal-PET. Barra minn hekk, l-industrija tal-PET tal-Unjoni għandha mill-inqas tmien operaturi indipendenti involuti fil-produzzjoni tal-vPET u aktar minn ħamsin produttur tal-rPET, li, għall-kuntrarju tal-argument tal-UNESDA, ma jistgħux jitqiesu bħala struttura tas-suq oligopolistika. |
(148) |
L-utenti rreferew ukoll għall-impossibbiltà li jgħaddu ż-żidiet bla preċedent fil-prezzijiet tal-PET lill-klijenti tagħhom u l-impatt negattiv fuq il-profittabbiltà diġà baxxa jew saħansitra negattiva tagħhom, li kienet marbuta mal-pressjoni biex tiġi evitata aktar inflazzjoni fis-settur tal-prodotti għall-konsumatur. Wara d-divulgazzjoni finali, l-UNESDA sostniet li l-miżuri anti-dumping se jwasslu għal żieda fil-prezz tal-vPET u l-rPET fl-Unjoni, kif ukoll għaż-żieda fl-importazzjonijiet tal-vPET, iddominati minn Indorama. |
(149) |
Kif stabbilit fil-premessa (291) tar-Regolament proviżorju, jeżistu sorsi alternattivi ta’ provvista għall-utenti tal-PET. Barra minn hekk, filwaqt li l-prezz tal-PET fl-Unjoni jista’ jiżdied bħala riżultat tal-miżuri anti-dumping, hemm bosta fatturi oħra li huma ta’ piż kbir fuq l-evoluzzjoni tal-prezz tal-PET, bħall-fluttwazzjoni tal-prezz taż-żejt mhux maħdum li huwa l-bażi għall-prezz tal-PTA, il-materja prima ewlenija għall-PET, il-prezz tal-utilitajiet jew it-tneħħija tal-istokkijiet tal-PET. U kif innutat f’dan il-każ, il-prezz tal-PET varja fiż-żewġ direzzjonijiet, bil-prezzijiet tal-2023 ikunu mill-inqas 15 sa 30 % orħos mill-prezzijiet tal-2022. Fid-dawl ta’ dawn il-fluttwazzjonijiet u l-prezz attwali tal-PET, l-argument kellu jiġi miċħud. |
(150) |
Bħala konklużjoni, l-analiżi ta’ hawn fuq tad-diversi elementi li kellhom impatt fuq l-industrija utenti indirizzat it-tħassib espress mill-industrija utenti u partijiet interessati oħra dwar l-ambigwità potenzjali, in-nuqqas ta’ ċarezza jew l-ommissjonijiet ta’ ċerti fatti fir-Regolament provviżorju. |
(151) |
Skont Svepol, jenħtieġ li l-Kummissjoni tqis il-kummenti dwar l-interess tal-Unjoni ppreżentati mill-partijiet interessati qabel ma tadotta kwalunkwe miżura definittiva. Svepol żiedet ukoll li l-Kummissjoni ddikjarat b’mod żbaljat fil-premessi (288) u (291) tar-Regolament provviżorju li r-reżina tal-PET tammonta għal 15 % tal-kost finali tal-preforma. |
(152) |
L-ewwel nett, fir-rigward tal-premessi (288) u (291) tar-Regolament provviżorju, il-Kummissjoni rreferiet għal informazzjoni li toriġina direttament minn sottomissjoni magħmula mill-assoċjazzjoni tal-utenti (UNESDA). It-tieni, il-Kummissjoni indirizzat kif xieraq il-kummenti kollha tal-partijiet interessati f’dan ir-Regolament u fir-Regolament provviżorju, filwaqt li enfasizzat l-aspetti wiesgħa tal-interess tad-diversi partijiet ikkonċernati u waslet għal konklużjoni ċara u motivata identika għal dik stabbilita fil-premessi minn (294) sa (297) tar-Regolament provviżorju. |
8.3. Konklużjoni dwar l-interess tal-Unjoni
(153) |
Il-konklużjonijiet milħuqa fil-premessi (294) sa (297) tar-Regolament provviżorju ġew ikkonfermati. |
9. MIŻURI ANTI-DUMPING DEFINITTIVI
9.1. Miżuri definittivi
(154) |
Fid-dawl tal-konklużjonijiet milħuqa fir-rigward tad-dumping, tad-dannu, tal-kawżalità, tal-livell tal-miżuri u tal-interess tal-Unjoni, u f’konformità mal-Artikolu 9(4) tar-Regolament bażiku, jenħtieġ li jiġu imposti miżuri anti-dumping definittivi sabiex ma jiġix ikkawżat dannu ulterjuri lill-industrija tal-Unjoni mill-importazzjonijiet oġġett ta’ dumping tal-prodott ikkonċernat. |
(155) |
Abbażi ta’ dak li ntqal hawn fuq, ir-rati tad-dazju anti-dumping definittivi, espressi skont il-prezz CIF fil-fruntiera tal-Unjoni, bid-dazju doganali mhux imħallas, jenħtieġ li jkunu kif ġej:
|
(156) |
Ir-rati tad-dazju anti-dumping tal-kumpaniji individwali speċifikati f’dan ir-Regolament ġew stabbiliti abbażi tas-sejbiet ta’ din l-investigazzjoni. Għalhekk, dawn jirriflettu s-sitwazzjoni li nstabet matul din l-investigazzjoni fir-rigward ta’ dawn il-kumpaniji. Għalhekk dawn ir-rati tad-dazju huma applikabbli esklużivament għall-importazzjonijiet tal-prodott li qed jiġi investigat li joriġina mill-pajjiż ikkonċernat u mmanifatturat mill-entitajiet legali msemmija. L-importazzjonijiet tal-prodott ikkonċernat immanifatturat minn kwalunkwe kumpanija oħra mhux imsemmija b’mod speċifiku fil-parti operattiva ta’ dan ir-Regolament, inklużi entitajiet relatati ma’ dawk imsemmija b’mod speċifiku, ma jistgħux jibbenefikaw minn dawn ir-rati u jenħtieġ li jkunu soġġetti għar-rata ta’ dazju applikabbli għall-“kumpaniji l-oħrajn kollha”. |
(157) |
Kumpanija tista’ titlob l-applikazzjoni ta’ dawn ir-rati tad-dazju anti-dumping individwali jekk hija sussegwentement tbiddel l-isem tal-entità tagħha. It-talba trid tiġi indirizzata lill-Kummissjoni (16). It-talba jrid ikun fiha l-informazzjoni rilevanti kollha li turi li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax id-dritt tagħha li tibbenefika mir-rata tad-dazju li tapplika għaliha, jiġi ppubblikat regolament dwar il-bidla tal-isem f’Il-Ġurnal Uffiċjali tal-Unjoni Ewropea. |
(158) |
Sabiex jiġu mminimizzati r-riskji ta’ ċirkomvenzjoni minħabba d-differenza fir-rati tad-dazju, hemm bżonn ta’ miżuri speċjali biex tiġi żgurata l-applikazzjoni xierqa tad-dazji anti-dumping individwali. Il-kumpaniji b’dazji anti-dumping individwali jridu jippreżentaw fattura kummerċjali valida lill-awtoritajiet doganali tal-Istati Membri. Il-fattura trid tikkonforma mar-rekwiżiti stabbiliti fl-Artikolu 1(3) ta’ dan ir-Regolament. L-importazzjonijiet li ma jkunux akkumpanjati minn dik il-fattura jenħtieġ li jkunu soġġetti għad-dazju anti-dumping applikabbli għall-“kumpaniji l-oħrajn kollha”. |
(159) |
Filwaqt li l-preżentazzjoni ta’ din il-fattura hija meħtieġa biex l-awtoritajiet doganali tal-Istati Membri jkunu jistgħu japplikaw ir-rati tad-dazju anti-dumping individwali fuq l-importazzjonijiet, ma hijiex l-uniku element li għandu jitqies mill-awtoritajiet doganali. Tabilħaqq, anke jekk jiġu ppreżentati b’fattura li tissodisfa r-rekwiżiti kollha stabbiliti fl-Artikolu 1(3) ta’ dan ir-Regolament, l-awtoritajiet doganali tal-Istati Membri jenħtieġ li jwettqu l-verifiki tas-soltu tagħhom u jistgħu, bħal fil-każijiet l-oħrajn kollha, jirrikjedu dokumenti addizzjonali (dokumenti tat-tbaħħir, eċċ.) sabiex ikunu jistgħu jivverifikaw l-akkuratezza tad-dettalji li jkun hemm fid-dikjarazzjoni u jiżguraw li l-applikazzjoni sussegwenti tar-rata tad-dazju tkun iġġustifikata, f’konformità mal-liġi doganali. |
(160) |
Jekk l-esportazzjonijiet minn waħda mill-kumpaniji li jibbenefikaw minn rati ta’ dazju individwali aktar baxxi jiżdiedu b’mod sinifikanti fil-volum, b’mod partikolari wara l-impożizzjoni tal-miżuri kkonċernati, tali żieda fil-volum tista’ titqies bħala waħda li fiha nnifisha tikkostitwixxi bidla fix-xejra tal-kummerċ minħabba l-impożizzjoni ta’ miżuri skont it-tifsira tal-Artikolu 13(1) tar-Regolament bażiku. F’dawn iċ-ċirkostanzi, tista’ tinbeda investigazzjoni kontra ċ-ċirkomvenzjoni, dment li jiġu ssodisfati l-kundizzjonijiet biex din issir. Din l-investigazzjoni tista’, fost l-oħrajn, teżamina l-ħtieġa tat-tneħħija ta’ rata/rati tad-dazju individwali u l-impożizzjoni konsegwenti ta’ dazju għall-pajjiż kollu. |
(161) |
Sabiex jiġi żgurat infurzar xieraq tad-dazji anti-dumping, id-dazju anti-dumping għall-kumpaniji l-oħrajn kollha jenħtieġ li japplika mhux biss għall-produtturi esportaturi li ma kkooperawx f’din l-investigazzjoni, iżda wkoll għall-produtturi li ma kellhomx esportazzjonijiet lejn l-Unjoni matul il-perjodu tal-investigazzjoni. |
(162) |
Jenħtieġ li l-produtturi esportaturi li ma esportawx il-prodott ikkonċernat lejn l-Unjoni matul il-perjodu tal-investigazzjoni jkunu jistgħu jitolbu lill-Kummissjoni sabiex tkun soġġetta għar-rata tad-dazju anti-dumping għall-kumpaniji li kkooperaw mhux inklużi fil-kampjun. Jenħtieġ li l-Kummissjoni tilqa’ talba bħal din dment li jiġu ssodisfati tliet kundizzjonijiet. Il-produttur esportatur il-ġdid ikollu juri li: (i) ma esportax il-prodott ikkonċernat lejn l-Unjoni matul il-PI; (ii) ma huwiex relatat ma’ produttur esportatur li għamel dan; u (iii) esporta l-prodott ikkonċernat wara dan jew daħal f’obbligu kuntrattwali irrevokabbli sabiex jagħmel dan fi kwantitajiet sostanzjali. |
9.2. Rilaxx tad-dazji provviżorji
(163) |
Fid-dawl tas-sejbiet fil-każ preżenti u minħabba li ma setax jiġi stabbilit b’mod pożittiv li fin-nuqqas ta’ miżuri provviżorji, it-theddida ta’ dannu kienet tiżviluppa f’dannu materjali, il-Kummissjoni tqis li, skont l-Artikolu 10(2) tar-Regolament bażiku, l-ammonti garantiti permezz tad-dazju anti-dumping provviżorju, impost mir-Regolament provviżorju, jenħtieġ li jiġu rilaxxati. |
10. DISPOŻIZZJONI FINALI
(164) |
Fid-dawl tal-Artikolu 109 tar-Regolament 2018/1046 (17), meta ammont ikun irid jiġi rrimborżat wara sentenza tal-Qorti tal-Ġustizzja tal-Unjoni Ewropea, l-imgħax li jrid jitħallas jenħtieġ li jkun ir-rata applikata mill-Bank Ċentrali Ewropew għall-operazzjonijiet ta’ rifinanzjament ewlenin tiegħu, kif ippubblikat fis-serje C ta’ Il-Ġurnal Uffiċjali tal-Unjoni Ewropea fl-ewwel jum kalendarju ta’ kull xahar. |
(165) |
Il-Kumitat stabbilit permezz tal-Artikolu 15(1) tar-Regolament (UE) 2016/1036 ma ta l-ebda opinjoni dwar il-miżuri previsti f’dan ir-Regolament. |
ADOTTAT DAN IR-REGOLAMENT:
Artikolu 1
1. Dazju anti-dumping definittiv huwa impost fuq l-importazzjonijiet tal-polietilentereftalat (“PET”), b’numru ta’ viskożità ta’ 78 ml/g jew ogħla, skont l-Istandard ISO 1628-5, imkejjel skont, jew ikkonvertit għas-solvent fenol/1,2-diklorobenżen (50/50), li bħalissa jaqa’ taħt il-kodiċi NM ex 3907 61 00 (kodiċi TARIC 3907610010) u li joriġina mir-Repubblika tal-Poplu taċ-Ċina.
2. Ir-rata tad-dazju anti-dumping definittiv applikabbli għall-prezz nett, frank fil-fruntiera tal-Unjoni, qabel id-dazju, tal-prodott deskritt fil-paragrafu 1 u mmanifatturat mill-kumpaniji elenkati hawn taħt, għandha tkunu kif ġej:
Pajjiż ta’ oriġini |
Kumpanija |
Dazju anti-dumping definittiv |
Kodiċi addizzjonali TARIC |
||||||||||
|
Sanfame Group:
|
6,6 % |
899V |
||||||||||
|
Wankai New Materials Group:
|
1 0,7 % |
899W |
||||||||||
|
|
1 7,2 % |
899X |
||||||||||
Ir-Repubblika tal-Poplu taċ-Ċina |
Kumpaniji oħrajn li kkooperaw |
1 1,1 % |
Ara l-anness |
||||||||||
Ir-Repubblika tal-Poplu taċ-Ċina |
Il-kumpaniji l-oħrajn kollha |
2 4,2 % |
8999 |
3. L-applikazzjoni tar-rati ta’ dazju individwali speċifikati għall-kumpaniji elenkati fil-paragrafu 2 għandha tkun kundizzjonali fuq il-preżentazzjoni ta’ fattura kummerċjali valida lill-awtoritajiet doganali tal-Istati Membri, li fuqha tidher dikjarazzjoni ddatata u ffirmata minn uffiċjal tal-entità li toħroġ din il-fattura, identifikat b’ismu u bil-kariga tiegħu, abbozzata kif ġej: “Jien, is-sottoskritt, niċċertifika li l-(volum) tal-(prodott ikkonċernat) mibjugħ sabiex jiġi esportat lejn l-Unjoni Ewropea kopert minn din il-fattura ġie mmanifatturat minn (l-isem u l-indirizz tal-kumpanija) (kodiċi addizzjonali TARIC) fi [pajjiż ikkonċernat]. Jiena niddikjara li l-informazzjoni pprovduta f’din il-fattura hija kompluta u korretta.” Jekk ma tiġix ippreżentata fattura bħal din, għandu japplika d-dazju applikabbli għall-kumpaniji l-oħrajn kollha.
4. Sakemm ma jkunx speċifikat mod ieħor, għandhom japplikaw id-dispożizzjonijiet fis-seħħ dwar id-dazji doganali.
Artikolu 2
L-ammonti ggarantiti bħala dazji antidumping proviżorji skont ir-Regolament ta’ Implimentazzjoni tal-Kummissjoni (UE) 2023/2659 għandhom jiġu rilaxxati b’mod definittiv.
Artikolu 3
L-Anness imsemmi fl-Artikolu 1(2) jista’ jiġi emendat biex iżid produtturi esportaturi ġodda mir-Repubblika tal-Poplu taċ-Ċina u jagħmilhom soġġetti għar-rata tad-dazju anti-dumping medja ponderata xierqa għall-kumpaniji li kkooperaw mhux inklużi fil-kampjun. Produttur esportatur ġdid għandu jipprovdi evidenza li huwa:
(a) |
ma esportax l-oġġetti deskritti fl-Artikolu 1(1) matul il-perjodu tal-investigazzjoni (l-1 ta’ Jannar 2022 - il-31 ta’ Diċembru 2022); |
(b) |
ma huwiex relatat ma’ esportatur jew produttur soġġett għall-miżuri imposti minn dan ir-Regolament, u li seta’ kkoopera fl-investigazzjoni oriġinali; u |
(c) |
li effettivament esporta l-prodott ikkonċernat jew daħal f’obbligu kuntrattwali irrevokabbli sabiex jesporta kwantità sinifikanti lejn l-Unjoni wara t-tmiem tal-perjodu tal-investigazzjoni. |
Artikolu 4
Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, 27 ta’ Marzu 2024.
Għall-Kummissjoni
Il-President
Ursula VON DER LEYEN
(1) ĠU L 176, 30.6.2016, p. 21.
(2) Avviż ta’ bidu ta’ proċediment anti-dumping li jikkonċerna l-importazzjonijiet ta’ ċertu polietilentereftalat (“PET”) li joriġina mir-Repubblika tal-Poplu taċ-Ċina (ĠU C 115, 30.3.2023, p. 5).
(3) IR-REGOLAMENT TA’ IMPLIMENTAZZJONI TAL-KUMMISSJONI (UE) 2023/2659 tas-27 ta’ Novembru 2023 li jimponi dazju anti-dumping provviżorju fuq l-importazzjonijiet ta’ ċertu polietilentereftalat li joriġinaw mir-Repubblika tal-Poplu taċ-Ċina, (ĠU L, 28.11.2023, ELI: http://data.europa.eu/eli/reg_impl/2023/2659/oj).
(4) European Soft Drinks Industry association (UNESDA); Kwalunkwe referenza għas-sottomissjonijiet tal-UNESDA f’dan ir-Regolament tinkludi sottomissjonijiet magħmula f’isem il-membri tagħha Natural Mineral Waters Europe (MNWE), Forum Natürliches Mineralwasser (l-Awstrija); Il-Federazzjoni Belġjana tal-Produtturi tal-Ilma Bottiljat u tas-Soft Drinks -FIEB-VIWF- (il-Belġju); L-assoċjazzjoni Bulgara tas-Soft Drinks (il-Bulgarija); GIUPPH
(Il-Kroazja); L-Assoċjazzjoni Ċeka tas-Soft Drinks (Rappreżentanza Ċeka); L-Assoċjazzjoni Daniża tal-Produtturi tal-Birra u
Bryggeriforeningen (id-Danimarka); BRF, Maison des Eaux Minérales Naturelles -MEMN- ; Syndicat des
Eaux des Sources et des Eaux Minérales Naturelles -SESEMN- (Franza); Verband Deutscher
Mineralbrunnen e.V. -VDM- u Wafg (il-Ġermanja); L-Assoċjazzjoni Griega tal-Ilma Naturali Minerali -SEFYMEN-
(il-Greċja); L-Assoċjazzjoni Ungeriża tal-Ilma Minerali, tal-Frott u tal-Meraq, (l-Ungerija); Irish Beverage
Council -IBEC-(Ireland); L-Assoċjazzjoni Taljana tal-Ilma Minerali Naturali -MINERACQUA- u ASOBIBE
(L-Italja); Il-Federazzjoni tal-Industrija Lussemburgiża, tal-Ilmijiet u x-Xarbiet Mhux Alkoħoliċi -FICEB-
(Il-Lussemburgu); L-Assoċjazzjoni Netherlandiża tas-Soft Drinks, l-Ilmijiet u l-Meraq -FWS- (in-Netherlands); Krajowa Izba
Gospodarcza (KIGPR), il-Polonja); Águas Minerais e de Nascente de Portugal -APIAM- u PROBEB
(Il-Portugall); L-Assoċjazzjoni Rumena tal-Ilma Minerali (APEMIN), ir-Rumanija; L-Assoċjazzjoni Slovena
tax-Xorb (ZIP), is-Slovenja; Asociación de Aguas Minerales de España (ANEABE) u ANFABRA
(Spanja) kif ukoll Danone, Nestle, Coca-Cola Europack Partners, Refresco, Spadel, Fontecelta, Polska Woda, Sp. Z o.o, u Nałęczów Zdrój.
(5) ĠU C 115, 30.3.2023, p. 5.
(6) https://www.recronmalaysia.com/, “Recron Malaysia toffri firxa wiesgħa ta’ prodotti innovattivi li jinkludu l-poliester, il-fibri, ir-raden, id-drappijiet kif ukoll ċipep tal-PET tal-ogħla kwalità. Il-faċilità estensiva tat-tessuti tinkludi l-innittjar, l-insiġ, iż-żbigħ u l-finitura.”
(7) http://www.mpipi.com.my/profile.htm, “Prodotti: Aħna noffru l-aħjar fil-Manifattura tar-Reżina tal-PET kif ukoll fil-prodotti tal-fabbrika tal-għażil. L-impjant tar-Reżina tal-PET tagħna bħalissa għandu kapaċità annwali ta’ 38 000 MT ta’ ċipep ta’ kwalità, Reżini tal-Co - PET u Homo - PET biex isiru l-preforom u l-fliexken, flimkien ma’ Reżina tal-A - PET għat-tipi kollha ta’ imballaġġ riġidu bħal tilari, għotjien u għatiet.”
(8) Bħala eżempju, id-differenza fil-livell ġenerali tal-produzzjoni tal-PET fl-2022 tkun ta’ madwar 2 %.
(9) Plastic Recyclers Europe – assoċjazzjoni umbrella tal-produtturi tal-rPET.
(10) Kif ikkonfermat mill-ilment, il-paragrafu 226. Ara wkoll https://www.maersk.com/logistics-explained/transportation-and-freight/2023/09/27/sea-freight-guide għaż-żmien tat-tranżitu tal-bastimenti tal-kontejners miċ-Ċina lejn l-Ewropa.
(11) Is-sentenza fil-Kawża T-242/19, Giant Electric Vehicle Kunshan Co. Ltd vs Il-Kummissjoni, il-punt 102, EU:T:2022:259
(12) Bi tweġiba għad-divulgazzjoni finali, Svepol issuġġeriet li l-vjeġġi ta’ merkanzija li titgħabba individwalment jaslu fl-Unjoni u jiġu rilaxxati mid-dwana sa Mejju 2023. Madankollu, tali pretensjoni mhijiex sostanzjata u ma hija sostnuta minn ebda evidenza fil-fajl. Tabilħaqq, fil-kummenti tagħha dwar id-divulgazzjoni proviżorja, Svepol stess argumentat li l-aħħar vjeġġ tagħha ta’ merkanzija li tiġi mgħobbija individwalment kien ikklerjat mid-dwana f’Marzu 2023.
(13) Il-livell tal-importazzjonijiet Ċiniżi fi Q2 2023 (88 952 tunnellata) saħansitra qabeż il-livelli ta’ importazzjoni ta’ Q2 2022 (84 906 tunnellata).
(14) IR-REGOLAMENT TA’ IMPLIMENTAZZJONI TAL-KUMMISSJONI (UE) 2019/1286 tat-30 ta’ Lulju 2019 li jimponi dazju kumpensatorju definittiv fuq l-importazzjonijiet ta’ ċertu polietilentereftalat (PET) li joriġina mill-Indja wara rieżami ta’ skadenza skont l-Artikolu 18 tar-Regolament (UE) 2016/1037 tal-Parlament Ewropew u tal-Kunsill (ĠU L 202/81 ELI: http://data.europa.eu/eli/reg_impl/2019/1286/oj).
(15) L-Awtorità Ewropea dwar is-Sigurtà fl-Ikel, EFSA | Xjenza, ikel sikur, sostenibbiltà (europa.eu).
(16) Il-Kummissjoni Ewropea, id-Direttorat Ġenerali għall-Kummerċ, id-Direttorat G, Wetstraat 170 Rue de la Loi, 1040 Brussels, Belgium.
(17) Ir-Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni Nru 541/2014/UE u li jħassar ir-Regolament (UE, Euratom) Nru 966/2012 (ĠU L 193, 30.7.2018, p. 1).
Anness
Produtturi esportaturi li kkooperaw imma mhux inklużi fil-kampjun
Pajjiż |
Isem |
Kodiċi addizzjonali TARIC |
Ir-Repubblika tal-Poplu taċ-Ċina |
SINOPEC YIZHENG CHEMICAL FIBRE LIMITED LIABILITY COMPANY |
899Y |
Ir-Repubblika tal-Poplu taċ-Ċina |
Dragon Special Resin (XIAMEN) Co., Ltd. |
899Z |
Ir-Repubblika tal-Poplu taċ-Ċina |
Far Eastern Industries (Shanghai) Ltd. |
89AA |
Ir-Repubblika tal-Poplu taċ-Ċina |
Jiangsu Ceville New Materials Technology Co., Ltd. |
89AB |
ELI: http://data.europa.eu/eli/reg_impl/2024/1040/oj
ISSN 1977-074X (electronic edition)