(1)

Is-servizzi ta’ kiri ta’ akkomodazzjoni għal żmien qasir offruti mill-ospitanti ilhom jeżistu għal ħafna snin bħala komplement għal servizzi oħrajn ta’ akkomodazzjoni bħal lukandi, hostels jew bed and breakfasts. Il-volum ta’ servizzi ta’ kiri ta’ akkomodazzjoni għal żmien qasir qed jiżdied b’mod sinifikanti madwar l-Unjoni bħala riżultat tat-tkabbir tal-ekonomija tal-pjattaformi. Filwaqt li s-servizzi ta’ kiri ta’ akkomodazzjoni għal żmien qasir joħolqu ħafna opportunitajiet għall-klijenti, għall-ospitanti u għall-ekosistema kollha tat-turiżmu, it-tkabbir rapidu tagħhom wassal għal tħassib u għal sfidi, b’mod partikolari għall-komunitajiet lokali u għall-awtoritajiet pubbliċi, bħall-kontribuzzjoni tagħhom għat-tnaqqis fid-disponibbiltà tal-akkomodazzjonijiet maħsuba għall-kiri għal perijodi twal u għaż-żieda fil-kirjiet u fil-prezzijiet tal-akkomodazzjoni. Dan ir-Regolament jiffoka fuq waħda mill-isfidi ewlenin, jiġifieri n-nuqqas ta’ informazzjoni affidabbli dwar is-servizzi ta’ kiri ta’ akkomodazzjoni għal żmien qasir, bħall-identità tal-ospitant, il-post fejn jiġu offruti dawk is-servizzi, u d-durata tagħhom. In-nuqqas ta’ tali informazzjoni jagħmilha diffiċli għall-awtoritajiet biex jivvalutaw l-impatt reali tas-servizzi ta’ kiri ta’ akkomodazzjoni għal żmien qasir u jiżviluppaw u jinfurzaw risponsi ta’ politika xierqa u proporzjonati.

(2)

L-awtoritajiet pubbliċi fil-livell nazzjonali, reġjonali u lokali qegħdin jieħdu dejjem aktar miżuri sabiex jiksbu informazzjoni mill-ospitanti u mill-pjattformi online ta’ kiri għal żmien qasir, billi jimponu skemi ta’ reġistrazzjoni u rekwiżiti oħrajn ta’ trasparenza, inkluż fuq pjattformi online ta’ kiri għal żmien qasir. Madankollu, l-obbligi legali rigward il-ġenerazzjoni tad-data u tal-kondiviżjoni tad-data jvarjaw b’mod konsiderevoli fi ħdan u bejn l-Istati Membri fir-rigward tal-ambitu u tal-frekwenza tagħhom, kif ukoll f’termini tal-proċeduri relatati. Il-maġġoranza l-kbira tal-pjattaformi online li jintermedjaw il-forniment ta’ servizzi ta’ kiri ta’ akkomodazzjoni għal żmien qasir jipprovdu s-servizzi tagħhom bejn il-fruntieri u, tabilħaqq, madwar is-suq intern kollu. Bħala riżultat ta’ rekwiżiti diverġenti dwar it-trasparenza u l-kondiviżjoni tad-data, l-ilħuq tal-potenzjal sħiħ tal-potenzjal tas-servizzi ta’ kiri ta’ akkomodazzjoni għal żmien qasir huwa mxekkel, u l-funzjonament xieraq tas-suq intern huwa affettwat b’mod negattiv. Sabiex jiġi żgurat il-forniment ġust, mhux ambigwu u trasparenti ta’ servizzi ta’ kiri ta’ akkomodazzjonijiet għal żmien qasir fis-suq intern, bħala parti minn ekosistema tat-turiżmu bilanċjata li tipprovdi opportunitajiet għall-pjattaformi filwaqt li tirrispetta l-objettivi tal-politiki pubbliċi, jenħtieġ li jiġi stabbilit sett ta’ regoli uniformi u mmirat fil-livell tal-Unjoni.

(3)

Għal dak l-għan, jenħtieġ li jiġu stabbiliti regoli armonizzati dwar il-ġenerazzjoni tad-data u l-kondiviżjoni tad-data għas-servizzi ta’ kiri ta’ akkomodazzjoni għal żmien qasir sabiex jitjieb l-aċċess għad-data u l-kwalità tad-data għall-awtoritajiet pubbliċi dwar il-forniment ta’ servizzi ta’ kiri ta’ akkomodazzjoni għal żmien qasir, u b’hekk jippermettu llill-awtoritajiet pubbliċi jfasslu u jimplimentaw politiki dwar servizzi bħal dawn b’mod effettiv u proporzjonat.

(4)

Jenħtieġ li jiġu stabbiliti regoli sabiex jiġu armonizzati r-rekwiżiti ta’ trasparenza għall-forniment ta’ servizzi ta’ kiri ta’ akkomodazzjoni għal żmien qasir permezz ta’ pjattformi online ta’ kiri għal żmien qasir f’każijiet li fihom l-Istati Membri jiddeċiedu li jimponu rekwiżiti ta’ trasparenza bħal dawn. Għaldaqstant, jenħtieġ li jiġu pprovduti regoli armonizzati għall-iskemi ta’ reġistrazzjoni u għar-rekwiżiti dwar il-kondiviżjoni tad-data fir-rigward tal-pjattaformi online ta’ kiri għal żmien qasir, meta l-Istati Membri jiddeċiedu li jistabbilixxu skemi jew rekwiżiti bħal dawn. Sabiex tinkiseb armonizzazzjoni effettiva u sabiex tiġi żgurata l-applikazzjoni uniformi ta’ dawk ir-regoli, jenħtieġ li l-Istati Membri ma jkunux jistgħu jilleġiżlaw dwar l-aċċess għad-data minn pjattformi online ta’ kiri għal żmien qasir barra mir-reġim speċifiku stabbilit f’dan ir-Regolament. Dan sabiex jiġi żgurat li l-Istati Membri ma jirregolawx it-talbiet dwar il-kondiviżjoni tad-data mingħajr ma jdaħħlu fis-seħħ l-iskemi ta’ reġistrazzjoni, il-bażijiet tad-data u l-punt ta’ dħul diġitali uniku neċessarji u li ffaċilitataw il-kondiviżjoni tad-data proporzjonata, konformi mal-privatezza u sigura minn pjattformi online ta’ kiri għal żmien qasir fi ħdan is-suq intern. Dan ir-Regolament ma jaffettwax il-kompetenza tal-Istati Membri li jadottaw u jżommu rekwiżiti dwar l-aċċess għas-suq relatati mal-forniment ta’ servizzi ta’ kiri ta’ akkomodazzjoni għal żmien qasir mill-ospitanti, inkluż rekwiżiti dwar is-saħħa u s-sikurezza, standards tal-kwalità minima jew restrizzjonijiet kwantitattivi, dment li t-tali rekwiżiti jkunu neċessarji u proporzjonati sabiex jiġu protetti l-objettivi ta’ interess pubbliku f’konformità mad-dispożizzjonijiet tat-Trattat dwar il-Funzjonament tal-Unjoni Ewropea u tad-Direttiva 2006/123/KE tal-Parlament Ewropew u tal-Kunsill (4). Fil-kuntest tas-servizzi tal-kiri ta’ akkomodazzjoni għal żmien qasir, il-ġlieda kontra n-nuqqas ta’ akkomodazzjoni għall-kiri ġiet rikonoxxuta mill-Qorti tal-Ġustizzja tal-Unjoni Ewropea (Qorti tal-Ġustizzja) bħala raġuni prevalenti relatata mal-interess pubbliku, li tiġġustifika l-adozzjoni ta’ miżuri li mhumiex diskriminatorji u huma proporzjonati għall-objettiv li jrid jintlaħaq. Jenħtieġ li d-disponibbiltà ta’ data affidabbli fuq bażi uniformi tappoġġa l-isforzi tal-Istati Membri fl-iżvilupp ta’ politiki u ta’ regolamenti li jikkonformaw mal-liġi tal-Unjoni. Fil-fatt, hekk kif iċċarat il-ġurisprudenza tal-Qorti tal-Ġustizzja, l-Istati Membri huma meħtieġa jiġġustifikaw ir-restrizzjonijiet possibbli għall-aċċess għas-suq għall-ospitanti fuq il-bażi tad-data u tal-evidenza.

(5)

Dan ir-Regolament mhuwiex maħsub sabiex jiżgura l-konformità mar-regoli doganali jew dwar it-tassazzjoni u ma jaffettwax il-kompetenzi tal-Istati Membri fil-qasam tar-reati kriminali. Għaldaqstant, ma jaffettwax il-kompetenza tal-Istati Membri jew tal-Unjoni f’dawk l-oqsma jew fi kwalunkwe strument tal-liġi tal-Unjoni jew dik nazzjonali adottata skont tali kompetenza dwar l-aċċess għad-data, jew il-kondiviżjoni jew l-użu tad-data f’dawk l-oqsma. Għalhekk, l-użu futur possibbli ta’ data personali proċessata skont dan ir-Regolament, għall-infurzar tal-liġi jew għal finijiet ta’ tassazzjoni u doganali, jenħtieġ li jkun konformi mal-liġi tal-Unjoni u dik nazzjonali.

(6)

Jenħtieġ li dan ir-Regolament japplika għal servizzi li jikkonsistu minn kiri għal żmien qasir ta’ akkomodazzjoni bl-għamara, ipprovduti b’remunerazzjoni, kemm jekk fuq bażi professjonali kif ukoll jekk mhux professjonali u kif definit ulterjorment skont il-liġi nazzjonali. Minħabba l-approċċi differenti li jeżistu fl-Istati Membri, servizzi ta’ kiri ta’ akkomodazzjoni għal żmien qasir jistgħu jikkonċernaw, pereżempju, kamra fir-residenza primarja jew sekondarja ta’ ospitant, jew abitazzjoni fl-intier tagħha fuq l-art jew fuq l-ilma, mikrija għal għadd limitat ta’ jiem fis-sena, jew proprjetà waħda jew aktar mixtrija mill-ospitant bħala investiment biex tinkera fuq bażi ta’ żmien qasir, tipikament għal anqas minn sena matul is-sena. Jenħtieġ li l-provvista ta’ akkomodazzjoni bl-għamara għal użu aktar permanenti, tipikament għal sena jew aktar, ma titqiesx bħala li hi provduta fuq bażi ta’ żmien qasir. Is-servizzi ta’ kiri ta’ akkomodazzjoni għal żmien qasir jenħtieġ li ma jkunux limitati għal unitajiet maħsubin għal finijiet turistiċi jew ta’ divertiment, iżda jenħtieġ li jinkludu soġġorni għal żmien qasir għal skopijiet oħrajn, bħal negozju jew studju.

(7)

Jenħtieġ li r-regoli stabbiliti f’dan ir-Regolament ma japplikawx għal-lukandi u akkomodazzjonijiet turistiċi simili oħra, inkluż lukandi resort, lukandi suites jew tal-appartamenti, hostels jew motels, peress li d-data għal dawk it-tipi ta’ akkomodazzjoni normalment tkun disponibbli u dokumentata sew. Jenħtieġ li lanqas l-akkomodazzjoni provduta għal raġunijiet ta’ kkampjar, jew f’parks ta’ vetturi għar-rikreazzjoni u f’parks tat-trejlers, bħal kampijiet, karavans jew vetturi għar-rikreazzjoni, bl-istess mod ma tkun koperta minn dawk ir-regoli, minħabba li akkomodazzjonijiet bħal dawn normalment jinsabu f’żoni dedikati, bħal siti ta’ kkampjar jew parks tal-karavans, u ma għandhomx impatt fuq l-akkomodazzjoni residenzjali, komparabbli ma’ dak tas-servizzi ta’ kiri ta’ akkomodazzjoni għal żmien qasir.

(8)

Jenħtieġ li r-regoli stabbiliti f’dan ir-Regolament japplikaw għall-pjattaformi online skont it-tifsira tal-Artikolu 3, il-punt (i), tar-Regolament (UE) 2022/2065 tal-Parlament Ewropew u tal-Kunsill (5), li jippermetti lill-klijenti jikkonkludu kuntratti mill-bogħod mal-ospitanti għall-forniment ta’ servizzi ta’ kiri ta’ akkomodazzjoni għal żmien qasir. Għalhekk, jenħtieġ li l-paġni web jew mezzi elettroniċi oħrajn li jqabbdu l-ospitanti mal-klijenti mingħajr xi rwol ieħor fil-konklużjoni ta’ tranżazzjonijiet diretti jiġu esklużi mill-kamp ta’ applikazzjoni ta’ dan ir-Regolament. Pjattaformi online li jintermedjaw il-forniment ta’ servizzi ta’ kiri ta’ akkomodazzjoni għal żmien qasir mingħajr remunerazzjoni, pereżempju, pjattaformi online li jintermedjaw l-iskambju ta’ abitazzjonijiet jenħtieġ li ma jkunux koperti minn dawn ir-regoli sakemm, minħabba l-mod speċifiku kif inhuma ddisinjati, jinvolvu remunerazzjoni, inkluż kwalunkwe forma ta’ kumpens ekonomiku.

(9)

Il-proċeduri ta’ reġistrazzjoni jippermettu lill-awtoritajiet kompetenti jiġbru informazzjoni dwar l-ospitanti u l-unitajiet relatati mas-servizzi ta’ kiri ta’ akkomodazzjoni għal żmien qasir. In-numru tar-reġistrazzjoni, li huwa identifikatur uniku ta’ unità mikrija, jenħtieġ li jiżgura li d-data miġbura u kondiviża mill-pjattaformi online ta’ kiri għal żmien qasir tkun tista’ tiġi attribwita kif xieraq lill-ospitanti u lill-unitajiet. Dak in-numru tar-reġistrazzjoni jenħtieġ li jiġi inkluż f’reġistru pubbliku li jkun faċilment aċċessibbli u jenħtieġ li l-Istati Membri jiżguraw li dak in-numru tar-reġistrazzjoni ma jinkludix data personali. L-awtoritajiet kompetenti fl-Istati Membri li jkunu imponew rekwiżit fuq il-pjattaformi online ta’ kiri għal żmien qasir biex jittrażmettu d-data jenħtieġ għalhekk li jdaħħlu fis-seħħ jew iżommu proċeduri ta’ reġistrazzjoni għall-ospitanti u l-unitajiet tagħhom. Sabiex jiġu evitati sitwazzjonijiet fejn unità tiġi attribwita aktar minn numru tar-reġistrazzjoni wieħed għal elenkar, jenħtieġ li kull unità tkun soġġetta għal proċedura ta’ reġistrazzjoni waħda biss fi Stat Membru, fil-livell nazzjonali, reġjonali jew lokali. Jenħtieġ li l-obbligi ta’ reġistrazzjoni stabbiliti skont dan ir-Regolament ikunu mingħajr preġudizzju għal obbligi ta’ informazzjoni possibbli oħra derivati mil-liġi tal-Unjoni jew dik nazzjonali, li jirriżultaw mit-tassazzjoni, iċ-ċensimenti tal-popolazzjoni u l-ġbir tal-istatistika.

(10)

Sabiex jiġi żgurat li l-awtoritajiet kompetenti jiksbu l-informazzjoni u d-data li jeħtieġu, mingħajr ma jimponu piżijiet sproporzjonati fuq il-pjattaformi online ta’ kiri għal żmien qasir u fuq l-ospitanti, huwa neċessarju li jiġi stabbilit approċċ komuni għall-proċeduri ta’ reġistrazzjoni fl-Istati Membri li jkun limitat għal informazzjoni bażika li tippermetti l-identifikazzjoni preċiża tal-unità u tal-ospitant. Għal dak l-għan, jenħtieġ li l-Istati Membri jiżguraw li, mas-sottomissjoni tal-informazzjoni u tad-dokumentazzjoni rilevanti kollha, l-ospitanti u l-unitajiet jingħataw numru tar-reġistrazzjoni. Jenħtieġ li l-ospitanti jkunu jistgħu jidentifikaw u jawtentikaw lilhom infushom bl-użu ta’ mezzi ta’ identifikazzjoni elettroniċi maħruġin skont skema ta’ identità elettronika notifikata skont ir-Regolament (UE) Nru 910/2014 tal-Parlament Ewropew u tal-Kunsill (6) sabiex jikkompletaw dawk il-proċeduri ta’ reġistrazzjoni. Jenħtieġ li fejn possibbli r-reġistrazzjoni tkun mingħajr ħlas jew bi spiża raġonevoli u proporzjonata li jenħtieġ li ma taqbiżx l-ispiża tal-proċedura amministrattiva inkwistjoni. Jenħtieġ li jkun żgurat ukoll li l-ospitanti jkunu jistgħu jissottomettu d-dokumentazzjoni kollha meħtieġa b’mod diġitali. Madankollu, jenħtieġ li jibqa’ disponibbli servizz offline biex jaqdi l-ħtiġijiet ta’ utenti b’anqas ħiliet diġitali jew mgħammra b’anqas mezzi diġitali, speċjalment l-anzjani.

(11)

Jenħtieġ li l-ospitanti jipprovdu informazzjoni dwarhom infushom, l-unitajiet li joffru għas-servizzi ta’ kiri ta’ akkomodazzjoni għal żmien qasir u informazzjoni neċessarja oħra sabiex l-awtoritajiet kompetenti jkunu jafu l-identità tal-ospitanti u d-dettalji ta’ kuntatt tagħhom, kif ukoll l-indirizz speċifiku tal-unità, it-tip (eż. dar, appartament, kamra, kamra kondiviża, jew kategorija rilevanti oħra) previst fil-liġi nazzjonali u l-karatteristiċi tal-unità. Sabiex l-unità tkun tista’ tiġi identifikata b’mod preċiż, jenħtieġ li tkun meħtieġa informazzjoni speċifika mill-ospitant, bħan-numru tal-appartament u tal-kaxxa postali, is-sular li fih tinsab l-unità, jew ir-referenza tar-reġistru tal-artijiet. Fejn rilevanti, l-ospitanti jistgħu jintalbu wkoll jindikaw jekk ikunux kisbu awtorizzazzjoni biex jipprovdu s-servizz kif imsemmi fid-Direttiva 2006/123/KE mill-awtoritajiet rilevanti, dment li tali rekwiżit ta’ awtorizzazzjoni jkun konformi mal-liġi tal-Unjoni. Jenħtieġ li l-informazzjoni dwar l-applikabbiltà ta’ skema ta’ awtorizzazzjoni, id-drittijiet tal-ospitanti f’dak li jikkonċerna l-iskema ta’ awtorizzazzjoni u, b’mod partikolari, il-mezzi ta’ rimedju disponibbli f’każ ta’ tilwim tkun faċilment disponibbli għall-ospitanti kif previst fid-Direttiva 2006/123/KE. Dan ir-Regolament huwa mingħajr preġudizzju għar-rekwiżiti tal-aċċess għas-suq li jistgħu japplikaw separatament u jaffettwaw il-forniment ta’ servizzi ta’ kiri għal żmien qasir. Il-ħruġ awtomatiku ta’ numru tar-reġistrazzjoni huwa mingħajr preġudizzju għall-valutazzjoni tal-awtoritajiet kompetenti tal-konformità tal--ospitanti mar-rekwiżiti tal-aċċess għas-suq f’konformità mal-liġi tal-Unjoni. Jenħtieġ li d-deskrizzjoni tal-karatteristiċi tal-unità tinkludi indikazzjoni ta’ jekk l-unità tkunx offruta kompletament jew parzjalment u jekk l-ospitant jużax l-unità għal skopijiet residenzjali bħala residenza primarja jew sekondarja jew għal skopijiet oħrajn. Jenħtieġ li l-ospitanti jipprovdu wkoll informazzjoni dwar l-għadd massimu ta’ sodod u klijenti li l-unità hija kapaċi takkomoda.

(12)

Jenħtieġ li jkun possibbli li l-Istati Membri jirrikjedu lill-ospitanti jissottomettu informazzjoni u dokumentazzjoni addizzjonali li jiċċertifikaw il-konformità mar-rekwiżiti stabbiliti mil-liġi nazzjonali, bħar-rekwiżiti dwar is-saħħa u s-sikurezza u dwar il-protezzjoni tal-konsumatur. L-Istati Membri jistgħu, b’mod partikolari, sabiex jiżguraw aċċess u inklużjoni ugwali, li huma essenzjali biex jippermettu lil persuni b’diżabilità jgħixu b’mod indipendenti u jieħdu sehem b’mod sħiħ fl-aspetti kollha tal-ħajja, jeħtieġu li l-ospitanti jipprovdu informazzjoni dwar l-aċċessibbiltà għall-persuni b’diżabilità tal-unitajiet offruti għal servizzi ta’ kiri ta’ akkomodazzjoni għal żmien qasir fir-rigward tar-rekwiżiti tal-aċċessibbiltà nazzjonali, reġjonali jew lokali. Jenħtieġ li l-Istati Membri jkunu jistgħu jippermettu lill-ospitanti jiddikjaraw jekk servizzi addizzjonali humiex fornuti għal remunerazzjoni. Madankollu, jenħtieġ li kwalunkwe rekwiżit jikkonforma mal-prinċipji tan-nondiskriminazzjoni u tal-proporzjonalità, li jfisser li jrid ikun xieraq u neċessarju sabiex jintlaħaq objettiv regolatorju leġittimu, u mat-Trattat dwar il-Funzjonament tal-Unjoni Ewropea u d-Direttiva 2006/123/KE. Jenħtieġ li r-rekwiżit li jiġu sottomessi informazzjoni u dokumentazzjoni addizzjonali ma jintużax biex jiġu evitati r-regoli applikabbli għall-iskemi ta’ awtorizzazzjoni skont id-Direttiva 2006/123/KE. Barra minn hekk, jenħtieġ li l-Istati Membri jkunu jistgħu jimponu rekwiżiti ta’ informazzjoni fuq ospitanti li jikkonformaw mal-liġi tal-Unjoni dwar kwistjonijiet mhux koperti minn dan ir-Regolament, bħal soġġorni mhux remunerati, inkluż fejn arranġamenti ta’ ospitar jikkonċernaw individwi vulnerabbli, bħal refuġjati jew benefiċjarji ta’ protezzjoni temporanja.

(13)

Meta l-informazzjoni u d-dokumentazzjoni pprovduti mill-ospitanti permezz tal-proċedura ta’ reġistrazzjoni jkunu validi għal perjodu ta’ żmien limitat, pereżempju fil-każ ta’ dokument tal-identità jew ċertifikat dwar it-tifi tan-nar jew ċertifikat ieħor dwar is-sikurezza, jenħtieġ li l-ospitanti jkunu jistgħu jaġġornaw l-informazzjoni jew id-dokumentazzjoni. Meta ospitant jonqos milli jissottometti l-informazzjoni u d-dokumentazzjoni aġġornati, jenħtieġ li l-awtoritajiet kompetenti jkollhom is-setgħa li jissospendu l-validità tan-numru tar-reġistrazzjoni sakemm tiġi sottomessa l-informazzjoni jew id-dokumentazzjoni aġġornata. Jenħtieġ li l-informazzjoni u d-dokumentazzjoni sottomessi mill-ospitant jinżammu għall-perjodu kollu ta’ validità tan-numru tar-reġistrazzjoni u għal perjodu massimu ta’ 18-il xahar wara t-talba tal-ospitant għat-tneħħija ta’ unità mir-reġistru, sabiex l-awtoritajiet kompetenti jkunu jistgħu jwettqu b’mod effettiv kwalunkwe kontroll rilevanti anki wara t-tneħħija tal-unità mir-reġistru, sakemm dik l-informazzjoni jew dokumentazzjoni ma tkunx meħtieġa għal finijiet oħra, kif mitlub mil-liġi, bħal proċedimenti ġudizzjarji pendenti, u soġġett għal salvagwardji tal-protezzjoni tad-data skont ir-Regolament (UE) 2016/679 tal-Parlament Ewropew u tal-Kunsill (7).

(14)

Jenħtieġ li l-informazzjoni u d-dokumentazzjoni pprovduti mill-ospitanti permezz tal-proċedura ta’ reġistrazzjoni jiġu vverifikati mill-awtoritajiet kompetenti biss wara l-ħruġ tan-numru tar-reġistrazzjoni. Huwa xieraq li l-ospitanti jkunu jistgħu, f’perjodu ta’ żmien raġonevoli li jiġi speċifikat mill-awtoritajiet kompetenti, jirrettifikaw l-informazzjoni u d-dokumentazzjoni sottomessi li awtorità kompetenti tqis li ma jkunux kompluti jew eżatti. Jenħtieġ li l-awtorità kompetenti jkollha s-setgħa li tissospendi l-validità tan-numru tar-reġistrazzjoni f’każijiet li fihom issib li hemm dubji ċari u serji fir-rigward tal-awtentiċità u tal-validità tal-informazzjoni jew tad-dokumentazzjoni pprovduta mill-ospitant. F’dawk il-każijiet, jenħtieġ li l-awtoritajiet kompetenti jinfurmaw lill-ospitanti dwar l-intenzjoni tagħhom li jissospendu l-validità tan-numru tar-reġistrazzjoni u r-raġunijiet għal tali sospensjoni.. Meta l-ospitant, b’imġiba ħażina volontarja jew negliġenza serja, ikun naqas li jirrettifika l-informazzjoni mitluba jew ikun ipprovda informazzjoni mhux awtentika jew invalida, jenħtieġ li jkun possibbli wkoll li l-awtoritajiet kompetenti jirtiraw in-numru tar-reġistrazzjoni jew jieħdu aktar azzjoni, bħal li jipprevjenu l-kummerċjalizzazzjoni ta’ unità, kif stipulat fil-liġi nazzjonali. Jenħtieġ li l-ospitanti jkollhom il-possibbiltà li jinstemgħu u, fejn xieraq, li jirrettifikaw l-informazzjoni u d-dokumentazzjoni pprovduti f’perjodu ta’ żmien raġonevoli. Fejn il-validità tan-numru tar-reġistrazzjoni tkun ġiet sospiża, jew fejn tkun ġiet irtirata, jenħtieġ li l-awtoritajiet kompetenti jkollhom is-setgħa li joħorġu ordni li titlob lill-pjattformi online ta’ kiri għal żmien qasir ineħħu, jew li jiddiżattivaw l-aċċess għal, l-elenkar relatat mal-unità inkwistjoni mingħajr dewmien żejjed. Jenħtieġ li dawk l-ordnijiet jinkludu l-informazzjoni kollha meħtieġa biex jiġi identifikat l-elenkar, inkluż il-uniform resource locator (URL) individwali tal-elenkar.

(15)

Meta tapplika proċedura ta’ reġistrazzjoni, jenħtieġ li l-ospitanti jkunu meħtieġa jipprovdu lill-pjattformi online ta’ kiri għal żmien qasir bin-numri tar-reġistrazzjoni tagħhom, juru kull numru ta’ reġistrazzjoni f’kull elenkar korrispondenti u jipprovdu lill-klijenti bin-numru tar-reġistrazzjoni tal-unità. Jenħtieġ li l-Istati Membri jiżguraw li, meta tkun tapplika proċedura ta’ reġistrazzjoni, il-liġi nazzjonali tippermetti lill-awtoritajiet kompetenti jordnaw lill-pjattaformi online ta’ kiri għal żmien qasir jipprovdu aktar informazzjoni dwar unità speċifika u jneħħu l-elenkar li jikkonċerna unitajiet offruti mingħajr numru tar-reġistrazzjoni jew b’numru tar-reġistrazzjoni invalidu, jew f’każijiet li jinvolvu użu ħażin ta’ numru tar-reġistrazzjoni. Użu ħażin ta’ numru tar-reġistrazzjoni jista’ jinftiehem bħala użu mhux xieraq ta’ numru tar-reġistrazzjoni, pereżempju l-użu ta’ numru wieħed b’rabta ma’ aktar minn unità waħda.

(16)

Bħalissa l-pjattaformi online ta’ kiri għal żmien qasir jikkostitwixxu l-mezz ewlieni biex jiġu offruti servizzi ta’ kiri ta’ akkomodazzjoni għal żmien qasir u hemm bżonn li jiġi żgurat ambjent online sikur, prevedibbli u affidabbli, kif ukoll li jingħata kontribut għall-prevenzjoni ta’ offerti illegali ta’ tali servizzi biex jiġu protetti l-konsumaturi, tiġi żgurata kompetizzjoni ġusta, u jingħata kontribut, fejn xieraq, għall-ġlieda kontra l-frodi korrispondenti. L-Artikolu 31 tar-Regolament (UE) 2022/2065 jistabbilixxi ċerti rekwiżiti ta’ diliġenza dovuta li l-fornituri ta’ pjattaformi online li jippermettu lill-konsumaturi jikkonkludu kuntratti mill-bogħod ma’ kummerċjanti għandhom jiżguraw. Dawk ir-rekwiżiti japplikaw għall-pjattformi online ta’ kiri għal żmien qasir fir-rigward tas-servizzi ta’ kiri ta’ akkomodazzjoni għal żmien qasir offruti mill-ospitanti li jikkwalifikaw bħala kummerċjanti. Madankollu, is-settur tal-kiri ta’ akkomodazzjoni għal żmien qasir huwa kkaratterizzat mill-fatt li l-ospitanti spiss ikunu individwi privati li joffru servizzi ta’ kiri ta’ akkomodazzjoni għal żmien qasir fuq bażi okkażjonali bejn il-pari, li mhux neċessarjament jissodisfaw il-kundizzjonijiet biex jiġu kkategorizzati bħala “kummerċjanti” skont il-liġi tal-Unjoni.Għalhekk, f’konformità mal-kunċett u mal-objettiv ta’ “konformità sa mit-tfassil” skont l-Artikolu 31 tar-Regolament (UE) 2022/2065, u sabiex l-awtoritajiet kompetenti jkunu jistgħu jivverifikaw jekk l-obbligi ta’ reġistrazzjoni applikabbli jkunux sodisfatti, huwa xieraq li jiġu applikati kundizzjonijiet speċifiċi għall-konformità sa mit-tfassil fil-kuntest tas-servizzi ta’ kiri ta’ akkomodazzjoni għal żmien qasir, inkluż dawk offruti minn ospitanti li ma jikkwalifikawx bħala negozjanti skont il-liġi tal-Unjoni. Jenħtieġ li l-pjattaformi online ta’ kiri għal żmien qasir jiżguraw li s-servizzi ma jiġux offruti meta ma jkun ingħata ebda numru tar-reġistrazzjoni, f’każijiet fejn ospitant jiddikjara li japplika tali numru tar-reġistrazzjoni, u li, fejn ikun ingħata numru tar-reġistrazzjoni, dak in-numru tar-reġistrazzjoni jintwera. Jenħtieġ li dak ma jfissirx obbligu għall-pjattformi online ta’ kiri għal żmien qasir sabiex jimmonitorjaw b’mod ġenerali s-servizzi offruti mill-ospitanti permezz tal-pjattaforma tagħhom, u lanqas obbligu ġenerali ta’ ġbir ta’ informazzjoni mmirat lejn il-valutazzjoni tal-akkuratezza tan-numru tar-reġistrazzjoni qabel il-pubblikazzjoni tal-offerta tas-servizzi ta’ kiri ta’ akkomodazzjoni għal żmien qasir. F’dak il-kuntest, filwaqt li jitqies li, fejn applikabbli, jenħtieġ li l-obbligi ta’ reġistrazzjoni jiġu rrispettati mill-ospitant qabel ma l-unità tiġi offruta fuq pjattaformi online ta’ kiri għal żmien qasir, u li biex jiġi kkomplementat il-qafas stipulat f’dan ir-Regolament għall-evitar ta’ elenkar li ma jkunx kompatibbli mal-liġi tal-Unjoni u dik nazzjonali applikabbli, huwa xieraq li jiġu applikati rekwiżiti addizzjonali speċifiċi fil-kuntest tas-servizzi ta’ kiri ta’ akkomodazzjoni għal żmien qasir. Jenħtieġ li l-pjattaformi online ta’ kiri għal żmien qasir, malli jirċievu l-awtodikjarazzjoni tal-ospitanti dwar jekk l-unità offruta għal servizzi ta’ kiri ta’ akkomodazzjoni għal żmien qasir tkunx tinsab f’żona fejn tkun ġiet stabbilita jew tapplika proċedura ta’ reġistrazzjoni, u qabel ma jippermettu lill-ospitant ikkonċernat juża s-servizzi tiegħu, permezz tal-listi magħmula disponibbli mill-Istati Membri u mill-punti ta’ dħul diġitali uniċi, jagħmlu l-aħjar sforzi biex jivvalutaw jekk l-awtodikjarazzjoni, li għall-akkuratezza tagħha huma responsabbli l-ospitanti għall-finijiet ta’ dan ir-Regolament, hijiex kompluta, dment li l-valutazzjoni tkun tista’ ssir b’mod proporzjonat permezz ta’ għodod awtomatizzati.

(17)

Jenħtieġ li l-awtoritajiet kompetenti fi Stati Membri li imponew rekwiżit fuq il-pjattformi online ta’ kiri għal żmien qasir biex jibagħtu data dwar l-attivitajiet tal-ospitanti u jkollhom fis-seħħ sistemi ta’ reġistrazzjoni jkunu jistgħu jiksbu data dwar l-attivitajiet mill-pjattaformi online ta’ kiri għal żmien qasir fuq bażi regolari. Jenħtieġ li t-tip ta’ data li tista’ tinkiseb tkun armonizzata b’mod sħiħ u tinkludi informazzjoni dwar l-għadd ta’ ljieli li għalihom tkun inkriet unità reġistrata, l-għadd ta’ klijentili lilhom tkun inkriet l-unità kull lejl, il-pajjiż ta’ residenza tal-klijenti, b’kont meħud ta’ bidliet possibbli għar-riservazzjoni oriġinali, l-indirizz speċifiku tal-unità, in-numru ta’ reġistrazzjoni u l-URL tal-elenkar tal-unità, sabiex ikun jista’ jiġi identifikat l-ospitant. Huma biss il-pjattaformi online ta’ kiri għal żmien qasir li ffaċilitaw b’mod effettiv il-konklużjoni ta’ tranżazzjonijiet diretti bejn l-ospitanti u l-klijenti li huma koperti mill-obbligu li jipprovdu d-data dwar l-attivitajiet, in-numru tar-reġistrazzjoni u l-URL tal-elenkar tal-unità, minħabba li dawk il-pjattaformi biss huma f’pożizzjoni li jiġbru d-data, pereżempju dwar l-għadd ta’ ljieli li għalihom tinkera unità u l-għadd ta’ klijenti li lilhom tkun inkriet l-unità għal kull lejl. Fil-każ ta’ problema teknika li taffettwa t-trażmissjoni tad-data mill-pjattaformi online ta’ kiri għal żmien qasir, jenħtieġ li l-awtorità kompetenti jkollha d-dritt titlob li l-pjattaforma online ta’ kiri għal żmien qasir terġa’ tissottometti d-data fil-pussess tagħha. Jenħtieġ li l-Istati Membri ma jżommux jew ma jintroduċux miżuri li jirrikjedu li l-pjattaformi online ta’ kiri għal żmien qasir jirrapportaw dwar il-fornituri ta’ servizzi ta’ kiri ta’ akkomodazzjoni għal żmien qasir u l-attivitajiet tagħhom li jitbiegħdu minn dawk stabbiliti f’dan ir-Regolament, sakemm ma jkunx previst mod ieħor mil-liġi tal-Unjoni.Jenħtieġ li dik l-informazzjoni tirrifletti s-sitwazzjoni reali fil-perjodu ta’ referenza, filwaqt li tqis bidliet possibbli għar-riżervazzjoni oriġinali. F’każ li unità waħda tkun offruta f’diversi pjattaformi online ta’ kiri għal żmien qasir, jenħtieġ li tkun biss il-pjattforma online ta’ kiri għal żmien qasir li fuqha jiġi konkluż il-kuntratt mal-ospitant li tkun obbligata tipprovdi l-informazzjoni msemmija qabel sabiex jiġu evitati trażmissjonijiet multipli tal-istess informazzjoni minn pjattaformi online ta’ kiri għal żmien qasir differenti. Mingħajr preġudizzju għall-eżenzjoni mir-responsabbiltà, stipulata fir-Regolament (UE) 2022/2065, jenħtieġ li l-pjattaformi online ta’ kiri għal żmien qasir jiżguraw li s-settijiet ta’ data mibgħuta lill-awtoritajiet kompetenti skont dan ir-Regolament ikunu kompluti u eżatti. Meta jagħmlu dan, jenħtieġ li jkunu bbażati fuq l-informazzjoni pprovduta mill-ospitant meta joffri l-unità fuq dawk il-pjattaformi online ta’ kiri għal żmien qasir. Filwaqt li huwa essenzjali li jiġi żgurat li l-pjattaformi online ta’ kiri għal żmien qasir ifasslu l-interfaċċi tagħhom b’mod li jiffaċilita l-għoti ta’ informazzjoni sabiex jiġi żgurat li l-ospitanti jkunu jistgħu jipprovdu l-informazzjoni rilevanti kollha qabel l-elenkar, fl-istess ħin, jenħtieġ li l-ospitanti jibqgħu responsabbli għall-konformità tal-attività tagħhom mar-regoli applikabbli.

(18)

F’konformità mar-Regolament (UE) 2016/679, sabiex jiġi żgurat li l-ipproċessar ta’ data personali jkun adegwat, rilevanti u limitat għal dak li jkun neċessarju fir-rigward tal-iskopijiet li għalih tiġi pproċessata, jenħtieġ li l-pjattaformi online ta’ kiri għal żmien qasir ma jkunux meħtieġa jirrapportaw informazzjoni addizzjonali dwar l-identità tal-ospitanti u dwar l-unitajiet, minħabba li tali informazzjoni diġà tinġabar mill-awtoritajiet kompetenti permezz tal-proċeduri ta’ reġistrazzjoni applikabbli għall-ospitanti.

(19)

Jenħtieġ li l-pjattformi online ta’ kiri għal żmien qasir li jikkwalifikaw bħala intrapriżi żgħar jew mikro skont it-tifsira tar-Rakkomandazzjoni tal-Kummissjoni 2003/361/KE (8) ma jkunux mistennijin jużaw mezzi ta’ komunikazzjoni bejn magna u oħra għall-kondiviżjoni ta’ data, dment li, fit-trimestru ta’ qabel, ma jkunux laħqu medja ta’ 4 250 elenkar fix-xahar fl-Unjoni. Il-permess li tali pjattformi online ta’ kiri għal żmien qasir jużaw mezzi manwali sabiex jikkondividu d-data mal-punt ta’ dħul diġitali uniku jnaqqas il-piż tal-konformità tagħhom u jqis ir-riżorsi finanzjarji jew tekniċi tagħhom, filwaqt li xorta jiżgura li l-awtoritajiet kompetenti jiksbu d-data rilevanti. Is-suppożizzjoni hija li l-pjattformi online ta’ kiri għal żmien qasir li huma intrapriżi żgħar jew mikro skont it-tifsira tar-Rakkomandazzjoni 2003/361/KE li jilħqu jew jaqbżu dan il-limitu diġà jenħtieġ li jkollhom fis-seħħ sistemi li jippermettu l-konformità mal-obbligi ta’ trażmissjoni bejn magna u oħra.

(20)

Jenħtieġ li l-pjattformi online ta’ kiri għal żmien qasir ikunu meħtieġa jissodisfaw l-obbligi ta’ rapportar fir-rigward tas-servizzi ta’ kiri ta’ akkomodazzjoni għal żmien qasir li huma jintermedjaw għal unitajiet li jinsabu f’żona fejn tkun ġiet stabbilita proċedura ta’ reġistrazzjoni, u dment li l-punt ta’ dħul diġitali uniku jkun ġie stabbilit mill-Istat Membru. Il-ġbir u l-kondiviżjoni ta’ dik l-informazzjoni huma neċessarji sabiex l-awtoritajiet kompetenti jkunu jistgħu jimmonitorjaw il-konformità mal-proċeduri ta’ reġistrazzjoni applikabbli għall-ospitanti u sabiex l-Istati Membri jkunu jistgħu jiżviluppaw u jinfurzaw politiki xierqa u proporzjonati fil-qasam tas-servizzi ta’ kiri ta’ akkomodazzjoni għal żmien qasir.

(21)

Sabiex jiġi evitat li l-pjattformi online ta’ kiri għal żmien qasir jiġu ffaċċjati b’rekwiżiti tekniċi diverġenti u b’varjetà ta’ punti ta’ aċċess għall-kondiviżjoni tad-data fi Stat Membru, jenħtieġ li jiġi stabbilit punt ta’ dħul diġitali uniku nazzjonali bħala gateway għat-trażmissjoni elettronika tad-data bejn il-pjattformi online ta’ kiri għal żmien qasir u l-awtoritajiet kompetenti, filwaqt li jiġu żgurati proċessi ta’ kondiviżjoni tad-data puntwali, affidabbli u effiċjenti.

(22)

Jenħtieġ li l-punti ta’ dħul diġitali uniċi jiffaċilitaw il-kapaċità tal-pjattformi online ta’ kiri għal żmien qasir li jivverifikaw b’mod aleatorju l-validità ta’ numru tar-reġistrazzjoni jew l-akkuratezza tal-awtodikjarazzjonijiet, sabiex jitnaqqsu l-iżbalji u l-inkonsistenzi fir-rigward tat-trażmissjoni tad-data u jitħaffef il-piż regolatorju tagħhom. Jenħtieġ li l-punt ta’ dħul diġitali uniku, mingħajr ma jirrikjedi l-ħżin attwali tan-numru tar-reġistrazzjoni, jippermetti li jsiru kontrolli aleatorji jew awtomatikament permezz ta’ interfaċċi għall-programmi tal-applikazzjonijiet li jippermettu l-verifika ta’ numru tar-reġistrazzjoni meta mqabbel mal-entrati partikolari fir-reġistru tal-proċeduri ta’ reġistrazzjoni individwali fi Stat Membru, jew manwalment. B’mod partikolari, meta Stat Membru jagħti aċċess għal sistema ċentralizzata, mingħajr ħlas, li tippermetti l-verifika awtomatizzata tal-oqsma koperti minn proċedura ta’ reġistrazzjoni jew tal-validità tan-numri ta’ reġistrazzjoni, l-interkonnessjoni regolari ma’ tali funzjonalitajiet u l-użu tagħhom għal kontrolli ex post, estiżi fuq bażi volontarja għall-elenkar kollu, jistgħu jiġu preżunti li jikkonformaw mal-obbligu tal-pjattaforma online ta’ kiri għal żmien qasir li twettaq valutazzjonijiet u kontrolli aleatorji skont dan ir-Regolament. Jenħtieġ li l-pjattformi online ta’ kiri għal żmien qasir ikunu liberi li jwettqu b’mod volontarju kontrolli addizzjonali permezz tal-punt ta’ dħul diġitali uniku. Jenħtieġ li l-Istati Membri jkomplu jinfurzaw l-obbligi ta’ reġistrazzjoni billi jużaw l-għodod diġà disponibbli għalihom. L-Istati Membri li ma stabbilixxewx proċedura ta’ reġistrazzjoni u/jew ma imponewx rekwiżit fuq pjattaformi online ta’ kiri għal żmien qasir li jibagħtu data lill-awtoritajiet kompetenti mad-dħul fis-seħħ ta’ dan ir-Regolament, jistgħu jagħmlu dan fi stadju aktar tard, dment li jistabbilixxu punt ta’ dħul diġitali uniku f’konformità ma’ dan ir-Regolament.

(23)

Sabiex jiġu żgurati kundizzjonijiet uniformi għall-implimentazzjoni tas-soluzzjonijiet tekniċi li jappoġġaw l-iskambju tad-data u sabiex tiġi promossa l-interoperabbiltà tal-punti ta’ dħul diġitali uniċi nazzjonali, jenħtieġ li l-Kummissjoni tingħata setgħat ta’ implimentazzjoni sabiex tistabbilixxi, fejn neċessarju, l-istandards applikabbli u r-rekwiżiti tal-interoperabbiltà. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (9). Huwa ta’ importanza partikolari li, fejn rilevanti, il-Kummissjoni twettaq konsultazzjonijiet xierqa dwar punti speċifiċi matul il-ħidma preparatorja tagħha bħala parti mill-ħidma li għandha ssir fil-qafas tal-grupp ta’ koordinazzjoni tal-punt ta’ dħul diġitali uniku.

(24)

Jenħtieġ li jiġu żgurati l-allinjament bejn id-diversi reġistri fi Stat Membru kif ukoll l-interoperabbiltà tagħhom mal-punt ta’ dħul diġitali uniku sabiex jitneħħew l-ostakli semantiċi u tekniċi għall-kondiviżjoni tad-data u sabiex jiġu żgurati proċeduri amministrattivi aktar effettivi u effiċjenti. Jenħtieġ li l-entitajiet responsabbli għall-ħolqien tal-punti ta’ dħul diġitali uniċi fil-livell nazzjonali u l-Kummissjoni jiffaċilitaw l-implimentazzjoni fil-livell nazzjonali u l-kooperazzjoni bejn l-Istati Membri.

(25)

Qafas proporzjonat, limitat u prevedibbli fil-livell tal-Unjoni huwa neċessarju għall-kondiviżjoni trasparenti tad-data dwar l-attivitajiet u tan-numri tar-reġistrazzjoni, f’konformità mar-rekwiżiti tar-Regolament (UE) 2016/679. Sabiex dak jinkiseb, jenħtieġ li l-Istati Membri jelenkaw l-awtoritajiet kompetenti fil-livell nazzjonali, reġjonali u lokali li jkunu stabbilew jew iżommu proċedura ta’ reġistrazzjoni sabiex jitolbu data dwar l-attivitajiet għall-unitajiet li jinsabu fit-territorju tagħhom. Jenħtieġ li tali data tiġi pproċessata biss għall-finijiet ta’ monitoraġġ tal-konformità mal-proċeduri ta’ reġistrazzjoni, jew ta’ implimentazzjoni u biex tiġi żgurata l-konformità mar-regoli dwar l-aċċess għal servizzi ta’ kiri ta’ akkomodazzjoni għal żmien qasir u l-forniment tagħhom. Fil-każ tal-aħħar, jenħtieġ li tali pproċessar ikun permess biss jekk ir-regoli inkwistjoni ma jiksrux il-prinċipji tan-nondiskriminazzjoni u l-proporzjonalità kif stabbiliti fil-liġi tal-Unjoni, u jekk tali regoli jikkonformaw mal-liġi tal-Unjoni, inkluż ir-regoli dwar il-moviment liberu tas-servizzi, il-libertà tal-istabbiliment, u r-regoli stabbiliti fid-Direttiva 2006/123/KE, kif interpretata mill-Qorti tal-Ġustizzja. Għall-fini ta’ konformità mal-liġi tal-Unjoni dwar il-protezzjoni tad-data, jenħtieġ li kwalunkwe regola li tikkonċerna l-aċċess għal servizzi ta’ kiri ta’ akkomodazzjoni għal żmien qasir u l-forniment tagħhom tispeċifika l-għan tal-ipproċessar tad-data rilevanti f’konformità mar-Regolament (UE) 2016/679. Id-data dwar l-attivitajiet, li ma tinkludix data personali, hija essenzjali wkoll għall-awtoritajiet li qegħdin jiżviluppaw regoli bħal dawn bħala parti mill-isforzi biex jippromwovu ekosistema tat-turiżmu bilanċjata, inkluż regoli effettivi u proporzjonati dwar l-aċċess għal servizzi ta’ kiri ta’ akkomodazzjoni għal żmien qasir u għall-forniment tagħhom. Madankollu, f’każijiet speċifiċi u sabiex l-awtoritajiet ikunu jistgħu jwettqu l-kompiti tagħhom b’mod effettiv, iġġustifikati minn objettivi ta’ interess pubbliku, jiġifieri li jippermettu valutazzjonijiet ibbażati fuq evidenza għall-iżvilupp ta’ liġijiet, regolamenti jew dispożizzjonijiet amministrattivi dwar l-aċċess għal servizzi ta’ kiri ta’ akkomodazzjoni għal żmien qasir u l-forniment tagħhom, huwa xieraq li tali awtoritajiet jingħataw ċerta informazzjoni rilevanti pprovduta mill-ospitant, li tista’ tinkludi data personali, soġġett għal salvagwardji xierqa għall-protezzjoni tad-data u f’konformità mar-Regolament (UE) 2016/679.Jenħtieġ li perjodu ta’ żamma ta’ tali data dwar l-attivitajiet ta’ massimu ta’ 18-il xahar jippermetti lill-awtoritajiet kompetenti jiżguraw b’mod effettiv il-konformità mar-regoli u mar-regolamenti applikabbli għall-ospitanti jew li jikkonċernaw l-unitajiet mikrijin u għall-iżvilupp tal-politika, sakemm dik id-data dwar l-attivitajiet ma tkunx neċessarja għal finijiet oħrajn, kif mitlub mil-liġi, bħal proċedimenti ġudizzjarji pendenti, u soġġett għas-salvagwardji għall-protezzjoni tad-data skont ir-Regolament (UE) 2016/679.

(26)

Id-data dwar l-attivitajiet hija importanti wkoll għall-kompilazzjoni tal-istatistika uffiċjali. Dik id-data, flimkien mal-informazzjoni pprovduta mill-ospitanti skont proċedura ta’ reġistrazzjoni flimkien man-numru ta’ reġistrazzjoni, jenħtieġ li tiġi trażmessa lill-uffiċċji nazzjonali, u fejn rilevanti, reġjonali tal-istatistika u lill-Eurostat kull xahar għall-finijiet tal-kompilazzjoni tal-istatistika f’konformità mar-rekwiżiti applikabbli għal fornituri oħra ta’ servizzi fis-settur tal-akkomodazzjoni kif stabbilit fir-Regolament (UE) Nru 692/2011 tal-Parlament Ewropew u tal-Kunsill (10) dwar l-istatistika Ewropea dwar it-turiżmu. Jenħtieġ li l-Istati Membri jaħtru l-entità nazzjonali responsabbli għat-trażmissjoni tad-data. Jenħtieġ li l-awtoritajiet kompetenti jkunu jistgħu jikkondividu wkoll data dwar l-attivitajiet, mingħajr kwalunkwe data li tista’ tippermetti l-identifikazzjoni ta’ unitajiet jew ta’ ospitanti individwali, bħan-numri tar-reġistrazzjoni, indirizzi speċifiċi u URLs, ma’ entitajiet u ma’ persuni meta dan ikun meħtieġ biex iwettqu attivitajiet ta’ riċerka xjentifika jew attivitajiet analitiċi, jew biex jipproduċu mudelli ta’ negozju u servizzi ġodda. Taħt l-istess kundizzjonijiet, id-data dwar l-attivitajiet tista’ ssir disponibbli permezz ta’ spazji tad-data settorjali, meta jkunu stabbiliti.

(27)

Jenħtieġ li l-Istati Membri jipprovdu l-informazzjoni meħtieġa sabiex l-awtoritajiet pubbliċi, il-pjattaformi online ta’ kiri għal żmien qasir, l-ospitanti u ċ-ċittadini jkunu jistgħu jifhmu l-liġijiet, il-proċeduri u r-rekwiżiti relatati mal-forniment ta’ servizzi ta’ kiri ta’ akkomodazzjoni għal żmien qasir fit-territorju tagħhom, inkluż. proċeduri ta’ reġistrazzjoni kif ukoll kwalunkwe rekwiżit li jikkonċerna l-aċċess għal servizzi ta’ kiri ta’ akkomodazzjoni għal żmien qasir u l-forniment tagħhom.

(28)

Sabiex tiġi ffaċilitata l-implimentazzjoni ta’ dan ir-Regolament, jenħtieġ li kull Stat Membru jaħtar awtorità li tkun responsabbli għall-monitoraġġ tal-implimentazzjoni tiegħu. Dik l-awtorità jenħtieġ li tirrapporta lill-Kummissjoni kull sentejn.

(29)

Jenħtieġ li l-Istati Membri jiżguraw l-infurzar effettiv ta’ dan ir-Regolament. Jenħtieġ li l-awtoritajiet fdati bl-infurzar tar-Regolament (UE) 2022/2065 jiżguraw li l-obbligi stabbiliti f’dan ir-Regolament għall-fornituri ta’ pjattaformi online ta’ kiri għal żmien qasir dwar id-disinn tal-interfaċċja ta’ pjattformi online ta’ kiri għal żmien qasir fir-rigward tan-numru tar-reġistrazzjoni ta’ kwalunkwe ospitant, kif definit f’dan ir-Regolament, jiġu rrispettati f’konformità mas-setgħat u l-proċeduri stabbiliti fil-Kapitolu IV tar-Regolament (UE) 2022/2065. Jenħtieġ, għalhekk, li f’konformità mar-Regolament (UE) 2022/2065, il-koordinatur tas-servizzi diġitali kompetenti jew awtoritajiet oħra kompetenti jew il-Kummissjoni, jingħataw is-setgħa li jinfurzaw l-obbligu ta’ konformità sa mit-tfassil stabbilit f’dan ir-Regolament f’konformità mal-allokazzjoni tal-kompetenzi stabbilita fil-Kapitolu IV tar-Regolament (UE) 2022/2065. Konsegwentement, jenħtieġ li l-Kummissjoni tingħata s-setgħa li tadotta miżuri ta’ infurzar diretti biss fir-rigward ta’ pjattaformi online kbar ħafna maħturin skont ir-Regolament (UE) 2022/2065.

(30)

Jenħtieġ li l-Istati Membri jiżguraw l-infurzar effettiv ta’ dan ir-Regolament fir-rigward tal-verifika mill-awtoritajiet kompetenti tar-riżultati tal-kontrolli aleatorji, l-obbligu li tiġi inkluża referenza għall-informazzjoni li għandha ssir disponibbli mill-Istati Membri dwar ir-regoli li jirregolaw il-forniment ta’ servizzi ta’ kiri ta’ akkomodazzjoni għal żmien qasir u l-obbligi ta’ kondiviżjoni tad-data ta’ pjattaformi online ta’ kiri għal żmien qasir. Minħabba n-natura speċifika ta’ dawk l-obbligi, jenħtieġ li jkun f’idejn l-awtoritajiet maħturin mill-Istat Membru tal-punt ta’ dħul diġitali uniku, li fih tinsab l-unità rilevanti, li jinfurzahom. Jenħtieġ li l-Istati Membri jistabbilixxu wkoll regoli li jistabbilixxu pieni għall-ksur ta’ dawk id-dispożizzjonijiet ta’ dan ir-Regolament li japplikaw għal pjattformi online ta’ kiri għal żmien qasir u jenħtieġ li jiżguraw li tali pieni jiġu implimentati u nnotifikati f’konformità mad-Direttiva 2000/31/KE tal-Parlament Ewropew u tal-Kunsill (11). Jenħtieġ li tali pieni jkunu effettivi, proporzjonati u dissważivi. Jenħtieġ li dawk il-pieni jiżguraw l-infurzar effettiv ta’ dan ir-Regolament, b’mod partikolari fir-rigward tal-obbligi tal-kondiviżjoni tad-data.

(31)

Sabiex iċ-ċittadini u n-negozji jkunu jistgħu jgawdu direttament mill-benefiċċji tas-suq intern mingħajr ma jġarrbu piż amministrattiv addizzjonali mingħajr bżonn, ir-Regolament (UE) 2018/1724 tal-Parlament Ewropew u tal-Kunsill (12), li jistabbilixxi l-gateway diġitali unika, jipprevedi regoli ġenerali għall-provvista online ta’ informazzjoni, ta’ proċeduri u ta’ servizzi ta’ assistenza rilevanti għall-funzjonament tas-suq intern. Jenħtieġ li r-rekwiżiti ta’ informazzjoni u l-proċeduri koperti minn dan ir-Regolament jikkonformaw mar-rekwiżiti tar-Regolament (UE) 2018/1724. B’mod partikolari, jenħtieġ li l-proċeduri li jikkonċernaw ir-reġistrazzjoni mill-ospitanti u l-ħruġ tan-numru tar-reġistrazzjoni msemmijin f’dan ir-Regolament jiġu inklużi fl-Anness II tar-Regolament (UE) 2018/1724 sabiex jiġi żgurat li kwalunkwe ospitant ikun jista’ jibbenefika minn proċeduri kompletament online. Għaldaqstant, jenħtieġ li r-Regolament (UE) 2018/1724 jiġi emendat skont dan.

(32)

Barra minn hekk, f’konformità mal-prinċipju ta’ darba biss, jenħtieġ li l-ospitanti b’unitajiet fi Stat Membru wieħed jew aktar jitħallew jużaw mill-ġdid id-data u l-evidenza li jkunu diġà ssottomettew għall-fini tal-ewwel reġistrazzjoni, biex b’hekk jitnaqqas il-piż regolatorju għall-ospitanti. Dik il-funzjonalità tista’ tiġi pprovduta bl-użu tal-infrastruttura tas-“sistema teknika ta’ darba biss” kif stabbilita bir-Regolament ta’ Implimentazzjoni tal-Kummissjoni (UE) 2022/1463. (13)

(33)

Jenħtieġ li l-Kummissjoni tevalwa perjodikament dan ir-Regolament u timmonitorja l-effetti tiegħu fuq il-forniment ta’ servizzi ta’ kiri ta’ akkomodazzjoni għal żmien qasir offruti permezz ta’ pjattformi online ta’ kiri għal żmien qasir fl-Unjoni. Jenħtieġ li dik l-evalwazzjoni tinkludi kwalunkwe effett fuq il-fornituri ta’ pjattaformi online ta’ kiri għal żmien qasir, kwalunkwe effett tad-disponibbiltà u l-użabbiltà akbar tad-data relatata mal-forniment ta’ servizzi ta’ kiri ta’ akkomodazzjoni għal żmien qasir u, b’mod speċifiku, il-grad sa fejn dik id-data tista’ tiġi aċċessata u użata għat-tfassil tal-politika u l-finijiet ta’ infurzar, kif ukoll kwalunkwe effett fuq il-kontenut u l-proporzjonalità tar-regoli nazzjonali, reġjonali u lokali relatati mal-forniment ta’ servizzi ta’ kiri ta’ akkomodazzjoni għal żmien qasir. Sabiex tinkiseb stampa wiesgħa tal-iżviluppi fis-settur, jenħtieġ li l-evalwazzjoni tqis l-esperjenzi tal-Istati Membri u tal-partijiet ikkonċernati rilevanti, inkluż l-effettività tal-kooperazzjoni transfruntiera u l-mekkaniżmi ta’ infurzar.

(34)

Sabiex l-Istati Membri jingħataw biżżejjed żmien sabiex jistabbilixxu proċeduri ta’ reġistrazzjoni, jadattaw il-proċeduri ta’ reġistrazzjoni eżistenti għal dan ir-Regolament u jistabbilixxu punti ta’ dħul diġitali uniċi, u sabiex jippermettu lill-pjattaformi online ta’ kiri għal żmien qasir u lill-ospitanti jadattaw għar-rekwiżiti l-ġodda, jenħtieġ li l-applikazzjoni ta’ dan ir-Regolament tiġi differita 24 xahar mid-data tad-dħul fis-seħħ.

(35)

Peress li l-objettiv ta’ dan ir-Regolament, jiġifieri l-kontribut għall-funzjonament xieraq tas-suq intern fir-rigward tal-forniment ta’ servizzi pprovduti minn pjattaformi online ta’ kiri għal żmien qasir ma jistax jintlaħaq b’mod suffiċjenti mill-Istati Membri, iżda jista’ pjuttost, minħabba l-iskala u l-effetti, jintlaħaq aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa neċessarju sabiex jintlaħaq dak l-objettiv.

(36)

Id-dritt fundamentali għall-protezzjoni tad-data personali huwa ssalvagwardjat b’mod partikolari mir-Regolament (UE) 2016/679. Dak ir-Regolament jipprovdi l-bażi għar-regoli u għar-rekwiżiti tal-ipproċessar ta’ data personali, inkluż meta s-settijiet ta’ data jinkludu taħlita ta’ data personali u mhux personali u tali data tkun marbuta b’mod inseparabbli. Kwalunkwe pproċessar ta’ data personali skont dan ir-Regolament irid jikkonforma mar-Regolament (UE) 2016/679. Għalhekk, jenħtieġ li l-awtoritajiet superviżorji tal-protezzjoni tad-data jkunu responsabbli għas-superviżjoni tal-ipproċessar ta’ data personali mwettaq fil-kuntest ta’ dan ir-Regolament.

(37)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (14) u ta opinjoni fis-16 ta’ Diċembru 2022 (15),