(1)

Ir-Regolament (UE) 2015/2283 jipprevedi li l-ikel il-ġdid awtorizzat u inkluż fil-lista tal-Unjoni tal-ikel ġdid biss jista’ jiġi introdott fis-suq fl-Unjoni.

(2)

Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni ta’ ikel ġdid.

(3)

Il-lista tal-Unjoni stipulata fl-Anness tar-Regolament ta’ Implimentazzjoni (UE) 2017/2470 tinkludi l-oleoreżina li fiha ħafna astaksantina mill-algi Haematococcus pluvialis bħala ikel ġdid awtorizzat.

(4)

L-oleoreżina li fiha ħafna astaksantina mill-algi Haematococcus pluvialis ġiet awtorizzata skont l-Artikolu 5 tar-Regolament (KE) Nru 258/97 tal-Parlament Ewropew u tal-Kunsill (3) għall-użu fis-supplimenti tal-ikel kif definit fid-Direttiva 2002/46/KE tal-Parlament Ewropew u tal-Kunsill (4) intenzjonati għall-popolazzjoni ġenerali.

(5)

Ir-Regolament ta’ Implimentazzjoni tal-Kummissjoni (UE) 2021/1377 (5) emenda l-kundizzjonijiet tal-użu tal-ikel ġdid oleoreżina li fiha ħafna astaksantina mill-algi Haematococcus pluvialis. B’mod partikolari, l-użu tal-ikel ġdid oleoreżina li fiha ħafna astaksantina mill-algi Haematococcus pluvialis fis-supplimenti tal-ikel f’livelli ta’ sa 8,0 mg/jum ta’ astaksantina ġie ristrett għall-adulti u għall-adolexxenti li għandhom aktar minn 14-il sena.

(6)

Ir-Regolament ta’ Implimentazzjoni tal-Kummissjoni (UE) 2023/1581 (6) emenda ulterjorment il-kundizzjonijiet tal-użu tal-ikel ġdid oleoreżina li fiha ħafna astaksantina mill-algi Haematococcus pluvialis. B’mod partikolari, estenda l-użu tal-ikel ġdid għas-supplimenti tal-ikel maħsuba għat-tfal li għandhom minn 3 snin sa inqas minn 10 snin għal livelli ta’ 23 mg/jum ta’ oleoreżina (li jikkorrispondu għal mhux aktar minn 2,3 mg/jum ta’ astaksantina), u fis-supplimenti tal-ikel maħsuba għall-adolexxenti li għandhom minn 10 sa inqas minn 14-il sena għal 57 mg/jum ta’ oleoreżina (li jikkorrispondu għal mhux aktar minn 5,7 mg/jum ta’ astaksantina).

(7)

Fl-20 ta’ Ġunju 2022, il-kumpanija Astareal AB (“l-applikant”) ressqet applikazzjoni lill-Kummissjoni f’konformità mal-Artikolu 10(1) tar-Regolament (UE) 2015/2283 għal bidla fl-ispeċifikazzjonijiet tal-ikel ġdid oleoreżina li fiha ħafna astaksantina mill-algi Haematococcus pluvialis. L-applikant talab li jiġu modifikati l-livelli tal-kontenut għal diversi parametri fl-ispeċifikazzjonijiet. Dan jikkonċerna l-modifika tal-firxa għall-monoesteri tal-astaksantina fl-oleoreżina minn 79,8–91,5 % w/w tal-karotenojdi (totali) għal 66,7–91,5 % w/w tal-karotenojdi (totali), il-modifika tal-firxa ta’ diesteri tal-astaksantina minn 0,16–19,0 % w/w tal-karotenojdi (totali) għal 0,16 sa 32,5 % w/w tal-karotenojdi (totali), il-modifika tal-firxa għall-isterjoisomeru tal-astaksantina 9-cis minn 0,3–17,3 % w/w tal-karotenojdi (totali) għal 0,3–30,0 % w/w tal-karotenojdi (totali), u l-modifika tal-firxa tal-kontenut ta’ proteina minn 0,3–4,4 % għal 0,0–4,4 %.

(8)

F’konformità mal-Artikolu 10(3) tar-Regolament (UE) 2015/2283, fis-26 ta’ Settembru 2022, il-Kummissjoni kkonsultat lill-Awtorità Ewropea dwar is-Sigurtà fl-Ikel (“l-Awtorità”), u talbitha tagħti opinjoni xjentifika dwar il-bidla fl-ispeċifikazzjonijiet tal-ikel ġdid oleoreżina li fiha ħafna astaksantina mill-algi Haematococcus pluvialis.

(9)

Fis-26 ta’ Settembru 2023, l-Awtorità adottat l-opinjoni xjentifika tagħha “Safety of a change in specifications of the novel food oleoresin from Haematococcus pluvialis containing astaxanthin pursuant to Regulation (EU) 2015/2283” (7) f’konformità mal-Artikolu 11 tar-Regolament (UE) 2015/2283.

(10)

Fl-opinjoni xjentifika tagħha, l-Awtorità kkonkludiet li l-ikel ġdid oleoreżina li fiha ħafna astaksantina mill-algi Haematococcus pluvialis huwa sikur skont il-bidliet proposti fl-ispeċifikazzjonijiet, u għalhekk jixraq li dawk jiġu emendati.

(11)

L-informazzjoni pprovduta fl-applikazzjoni u fl-opinjoni tal-Awtorità tagħti biżżejjed raġunijiet biex jiġi stabbilit li l-bidliet fl-ispeċifikazzjonijiet tal-użu tal-ikel ġdid huma f’konformità mal-kundizzjonijiet tal-Artikolu 12 tar-Regolament (UE) 2015/2283 u jenħtieġ li jiġu approvati.

(12)

Għalhekk, l-Anness tar-Regolament ta’ Implimentazzjoni (UE) 2017/2470 jenħtieġ li jiġi emendat skont dan.

(13)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,