(1)

Ir-Regolament (UE) 2015/2283 jipprevedi li huwa biss ikel ġdid awtorizzat u inkluż fil-lista tal-Unjoni li jista’ jitqiegħed fis-suq tal-Unjoni.

(2)

Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni ta’ ikel ġdid.

(3)

Il-lista tal-Unjoni stabbilita fl-Anness tar-Regolament ta’ Implimentazzjoni (UE) 2017/2470 tinkludi l-lattitol bħala ikel ġdid awtorizzat.

(4)

F’konformità mar-Regolament (KE) Nru 258/97 tal-Parlament Ewropew u tal-Kunsill (3), id-Deċiżjoni ta’ Implimentazzjoni tal-Kummissjoni (UE) 2017/450 (4) awtorizzat it-tqegħid fis-suq tal-lattitol bħala ikel ġdid biex jintuża f’forma ta’ kapsuli jew pilloli f’supplimenti tal-ikel kif definit fid-Direttiva 2002/46/KE tal-Parlament Ewropew u tal-Kunsill (5) u maħsub għall-popolazzjoni adulta.

(5)

Ir-Regolament ta’ Implimentazzjoni tal-Kummissjoni (UE) 2018/1293 (6) awtorizza estensjoni tal-użu tal-ikel ġdid lattitol f’forma ta’ trab fil-livell massimu awtorizzat eżistenti f’konformità mar-Regolament (UE) 2015/2283.

(6)

Fl-31 ta’ Ottubru 2023, il-kumpanija H.C. Clover Productos y Servicios, S.L. ressqet applikazzjoni lill-Kummissjoni biex jinbidlu l-kundizzjonijiet tal-użu tal-ikel ġdid lattitol f’konformità mal-Artikolu 10(1) tar-Regolament (UE) 2015/2283. L-applikant talab li jiġu inklużi ampolli ta’ likwidi, flixkien tal-qtar, u forom simili oħra ta’ likwidi, bħala forom permessi ta’ lattitol, biex jintużaw fis-supplimenti tal-ikel.

(7)

Il-Kummissjoni hija tal-fehma li mhuwiex probabbli li l-aġġornament mitlub tal-lista tal-Unjoni jkollu effett fuq is-saħħa tal-bniedem, u li mhijiex meħtieġa evalwazzjoni tas-sikurezza mill-Awtorità Ewropea dwar is-Sigurtà fl-Ikel (“l-Awtorità”) f’konformità mal-Artikolu 10(3) tar-Regolament (UE) 2015/2283. Il-valutazzjoni tas-sikurezza li tirfed l-awtorizzazzjoni tal-lattitol f’livell massimu ta’ 20 g kuljum fis-supplimenti tal-ikel mhijiex marbuta ma’ forma speċifika li fiha s-supplimenti tal-ikel jitqiegħdu għad-dispożizzjoni tal-konsumatur u għalhekk, il-forma ma taffettwax il-profil tas-sikurezza tal-ikel ġdid. Fiż-żmien tal-awtorizzazzjoni, il-forom ta’ dan l-ikel ġdid kienu limitati għal kapsuli, pilloli jew trabijiet sempliċiment minħabba li dawn kienu l-forom proposti mill-applikant rispettiv. Peress li l-użi proposti f’din l-applikazzjoni jikkonċernaw biss forom f’ampolli ta’ likwidi, flixkien tal-qtar, u forom simili oħra ta’ likwidi, filwaqt li jinżammu l-livelli massimi awtorizzati ta’ lattitol fis-supplimenti tal-ikel, il-Kummissjoni tqis li l-kundizzjonijiet tal-użu tal-lattitol jenħtieġ li jkunu limitati għar-referenza ġenerika għas-supplimenti tal-ikel u l-forom tagħhom definiti fl-Artikolu 2 tad-Direttiva 2002/46/KE. Dan se jkun konsistenti mal-awtorizzazzjonijiet l-oħra ta’ ikel ġdid użat fis-supplimenti tal-ikel li għalihom il-forma tas-suppliment tal-ikel mhijiex ta’ rilevanza għas-sikurezza tal-ikel ġdid.

(8)

L-informazzjoni pprovduta fl-applikazzjoni tagħti biżżejjed raġunijiet biex jiġi stabbilit li l-bidliet mitluba fil-kundizzjonijiet tal-użu tal-ikel ġdid lattitol billi tiġi inkluża kwalunkwe forma permessa ta’ lattitol biex tintuża fis-supplimenti tal-ikel huma f’konformità mal-Artikolu 12 tar-Regolament (UE) 2015/2283, u jenħtieġ li jiġu approvati.

(9)

Għalhekk, l-Anness tar-Regolament ta’ Implimentazzjoni (UE) 2017/2470 jenħtieġ li jiġi emendat skont dan.

(10)

Il-miżuri stipulati f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,