(1)

Ir-rekwiżiti ta’ rapportar għandhom rwol fundamentali fl-iżgurar tal-monitoraġġ xieraq u l-infurzar korrett tal-leġiżlazzjoni. Madankollu, huwa importanti li dawk ir-rekwiżiti jiġu ssimplifikati, sabiex jiġi żgurat li jissodisfaw l-għan li għalih kienu previsti u li jillimitaw il-piż amministrattiv.

(2)

Ir-Regolament (KE) Nru 999/2001 fih għadd ta’ rekwiżiti ta’ rapportar fil-qasam tas-saħħa tal-annimali, li għalhekk jenħtieġ li jiġu ssimplifikati, f’konformità mal-Komunikazzjoni tal-Kummissjoni dwar “Il-kompetittività fit-tul tal-UE: inħarsu lil hinn mill-2030 (2)”.

(3)

Ir-Regolament (KE) Nru 999/2001 jistabbilixxi r-regoli għall-prevenzjoni, il-kontroll u l-eradikazzjoni ta’ ċertu enċefalopatija sponġiformi li tinxtered (TSE) f’annimali bovini, ovini u kaprini.

(4)

L-Artikolu 6a tar-Regolament (KE) Nru 999/2001 jipprevedi li l-Istati Membri jistgħu jintroduċu programmi ta’ tnissil biex jagħżlu annimali reżistenti għat-TSE fil-popolazzjonijiet ovini tagħhom (il-programmi ta’ tnissil). Skont l-Artikolu 6a(3) ta’ dak ir-Regolament, l-Istati Membri li jintroduċu programmi ta’ tnissil huma meħtieġa jippreżentaw rapporti regolari lill-Kummissjoni (ir-rapporti).

(5)

L-Anness VII, il-Kapitolu C, il-Parti 5 tar-Regolament (KE) Nru 999/2001 jesiġi li r-rapporti jiġu ppreżentati lill-Kummissjoni fuq bażi annwali.

(6)

L-emenda proposta se tissimplifika r-rekwiżiti ta’ rapportar għall-Istati Membri billi timxi minn rapportar annwali sistematiku għal rapportar meta jkun hemm ħtieġa ċara, jiġifieri meta jkunu saru bidliet fil-programmi ta’ tnissil. L-emenda proposta mhux se jkollha impatt fuq l-objettiv ewlieni ta’ politika li huwa li jiġi żgurat li l-Istati Membri jkomplu jimmonitorjaw u jirrapportaw dwar is-sitwazzjoni epidemjoloġika tagħhom fir-rigward tat-TSEs.

(7)

Għalhekk, jenħtieġ li r-Regolament (KE) Nru 999/2001 jiġi emendat skont dan.

(8)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,