(1)

Skont l-Artikolu 3 tar-Regolament ta’ Implimentazzjoni tal-Kummissjoni (UE) 2017/39 (2), l-Istati Membri li jixtiequ jieħdu sehem fl-iskema ta’ għajnuna tal-Unjoni għall-provvista ta’ frott u ħxejjex għall-iskejjel, u ħalib għall-iskejjel fl-istabbilimenti edukattivi (l-iskema tal-iskejjel), għandhom jippreżentaw it-talba tagħhom lill-Kummissjoni sal-31 ta’ Jannar ta’ kull sena għall-għajnuna tal-Unjoni b’rabta mas-sena skolastika li jmiss, u jekk applikabbli, jaġġornaw it-talba għall-għajnuna tal-Unjoni b’rabta mas-sena skolastika attwali.

(2)

Sabiex tiġi żgurata l-implimentazzjoni effettiva tal-iskema tal-iskejjel, jenħtieġ li tiġi ffissata l-allokazzjoni tal-għajnuna tal-Unjoni għall-frott u l-ħxejjex għall-iskejjel u għall-ħalib għall-iskejjel fost l-Istati Membri parteċipanti, abbażi tal-ammonti indikati fit-talba għall-għajnuna tal-Unjoni minn dawk l-Istati Membri u billi jitqiesu t-trasferimenti bejn l-allokazzjonijiet indikattivi tal-Istati Membri msemmija fl-Artikolu 23a(4), il-punt (a), tar-Regolament (UE) Nru 1308/2013 tal-Parlament Ewropew u tal-Kunsill (3).

(3)

L-Istati Membri kollha nnotifikaw lill-Kummissjoni bit-talba tagħhom għall-għajnuna tal-Unjoni għall-perjodu bejn l-1 ta’ Awwissu 2024 u l-31 ta’ Lulju 2025, billi speċifikaw l-ammont ta’ għajnuna mitluba għall-frott u l-ħxejjex għall-iskejjel jew għall-ħalib għall-iskejjel, jew għaż-żewġ partijiet tal-iskema. Fil-każ tal-Belġju, ta’ Malta, tan-Netherlands u tal-Iżvezja, l-ammonti mitluba qiesu t-trasferimenti bejn l-allokazzjonijiet indikattivi.

(4)

Sabiex jiġi massimizzat il-potenzjal sħiħ tal-fondi disponibbli, jenħtieġ li l-għajnuna tal-Unjoni li ma tintalabx tiġi allokata mill-ġdid lill-Istati Membri li jieħdu sehem fl-iskema tal-iskejjel, u li fit-talba tagħhom għall-għajnuna tal-Unjoni jindikaw li huma lesti jużaw aktar mill-allokazzjoni indikattiva tagħhom, dejjem jekk ikunu disponibbli riżorsi addizzjonali.

(5)

Fit-talba tagħha għall-għajnuna tal-Unjoni għall-perjodu bejn l-1 ta’ Awwissu 2024 u l-31 ta’ Lulju 2025, l-Iżvezja talbet anqas mill-allokazzjoni indikattiva għall-frott u l-ħxejjex għall-iskejjel. Il-Bulgarija, iċ-Ċekja, id-Danimarka, il-Ġermanja, l-Estonja, l-Irlanda, Spanja, il-Kroazja, Ċipru, il-Latvja, il-Litwanja, il-Lussemburgu, l-Ungerija, Malta, in-Netherlands, l-Awstrija, il-Polonja, is-Slovenja u s-Slovakkja nnotifikaw li huma lesti jużaw aktar mill-allokazzjoni indikattiva għall-frott u l-ħxejjex fl-iskejjel. Il-Bulgarija, iċ-Ċekja, id-Danimarka, il-Ġermanja, l-Estonja, l-Irlanda, Spanja, il-Kroazja, Ċipru, il-Latvja, il-Litwanja, il-Lussemburgu, l-Awstrija, il-Polonja, is-Slovenja u s-Slovakkja u l-Iżvezja nnotifikaw li huma lesti jużaw aktar mill-allokazzjoni indikattiva għall-ħalib għall-iskejjel. Madankollu, l-ebda Stat Membru ma talab anqas mill-allokazzjoni indikattiva għall-ħalib għall-iskejjel.

(6)

Abbażi tal-informazzjoni notifikata mill-Istati Membri, jenħtieġ li tiġi ffissata l-allokazzjoni definittiva tal-għajnuna tal-Unjoni għall-frott u l-ħxejjex fl-iskejjel u għall-ħalib fl-iskejjel għall-perjodu bejn l-1 ta’ Awwissu 2024 u l-31 ta’ Lulju 2025.

(7)

Id-Deċiżjoni ta’ Implimentazzjoni tal-Kummissjoni (UE) 2023/655 (4) tistabbilixxi l-allokazzjoni definittiva tal-għajnuna tal-Unjoni għall-frott u l-ħxejjex fl-iskejjel u għall-ħalib fl-iskejjel fost l-Istati Membri li jixtiequ jieħdu sehem fl-iskema għall-iskejjel għall-perjodu bejn l-1 ta’ Awwissu 2023 u l-31 ta’ Lulju 2024.

(8)

Fin-notifiki mressqa sal-31 ta’ Jannar 2024 skont l-Artikolu 3 tar-Regolament ta’ Implimentazzjoni (UE) 2017/39, xi Stati Membri aġġornaw it-talba tagħhom għall-għajnuna tal-Unjoni b’rabta mas-sena skolastika 2023/2024. Il-Ġermanja, l-Ungerija u Malta nnotifikaw it-trasferimenti bejn l-allokazzjoni definittiva għall-frott u l-ħxejjex għall-iskejjel u l-allokazzjoni definittiva għall-ħalib għall-iskejjel. Spanja talbet inqas mill-allokazzjoni definittiva għall-frott u l-ħxejjex għall-iskejjel. Iċ-Ċekja, l-Estonja, l-Irlanda, il-Latvja, il-Litwanja, il-Lussemburgu, Malta, in-Netherlands, l-Awstrija, u s-Slovakkja nnotifikaw li huma lesti jużaw aktar mill-allokazzjoni definittiva għall-frott u l-ħxejjex għall-iskejjel. Spanja u n-Netherlands talbu anqas mill-allokazzjoni definittiva għall-ħalib għall-iskejjel. Iċ-Ċekja, il-Ġermanja, l-Estonja, l-Irlanda, il-Latvja, il-Litwanja, il-Lussemburgu, l-Awstrija, ir-Rumanija, is-Slovakkja u l-Iżvezja nnotifikaw li huma lesti jużaw aktar mill-allokazzjoni definittiva għall-ħalib għall-iskejjel.

(9)

Għalhekk jenħtieġ li d-Deċiżjoni ta’ Implimentazzjoni (UE) 2023/655 tiġi emendata skont dan.

(10)

Il-miżuri previsti f’din id-Deċiżjoni huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,