(1)

Permezz tar-Regolament (KE) Nru 1193/2008, (2) il-Kunsill impona dazji anti-dumping fuq l-importazzjonijiet tal-aċidu ċitriku mir-Repubblika tal-Poplu taċ-Ċina (“ir-RPĊ”, “iċ-Ċina” jew “il-pajjiż ikkonċernat”) (“il-miżuri oriġinali”). Il-miżuri kellhom l-għamla ta’ dazju ad valorem li jvarja minn 6,6 % sa 42,7 %.

(2)

Permezz tar-Regolament ta’ Implimentazzjoni (UE) 2015/82 (3), il-Kummissjoni estendiet il-miżuri anti-dumping definittivi fuq l-importazzjonijiet tal-aċidu ċitriku li joriġinaw fir-RPĊ għall-ħames snin b’segwitu għal rieżami ta’ skadenza skont l-Artikolu 11(2) tar-Regolament tal-Kunsill (KE) Nru 1225/2009 (4) u rrevediet il-miżuri b’segwitu għal rieżami interim parzjali skont l-Artikolu 11(3) tar-Regolament (KE) Nru 1225/2009.

(3)

Permezz tar-Regolament ta’ Implimentazzjoni (UE) 2021/607 (5), il-Kummissjoni estendiet il-miżuri anti-dumping definittivi fuq l-importazzjonijiet tal-aċidu ċitriku li joriġinaw fir-RPĊ kif estiżi għall-importazzjonijiet tal-aċidu ċitriku kkonsenjati mill-Malażja, kemm jekk iddikjarati bħala li joriġinaw mill-Malażja kif ukoll jekk le, għall-ħames snin b’segwitu għal rieżami ta’ skadenza.

(4)

Fil-31 ta’ Jannar 2023, permezz tar-Regolament ta’ Implimentazzjoni (UE) 2023/185 (6) (“ir-Regolament ta’ Tnedija”), il-Kummissjoni nediet rieżami ta’ “esportatur ġdid” fir-rigward tal-produttur esportatur Seven Star Lemon Technology co., Ltd (“Seven Star”) f’konformità mal-Artikolu 11(4) tar-Regolament bażiku. Skont l-Artikolu 1 ta’ dak ir-Regolament, Sever Star kien ġie assenjat il-kodiċi addizzjonali TARIC A023.

(5)

Barra minn hekk, skont l-Artikolu 3 tar-Regolament ta’ Tnedija, l-awtoritajiet doganali ngħataw ordnijiet biex jieħdu l-passi meħtieġa sabiex jirreġistraw, mid-data tad-dħul fis-seħħ tar-Regolament ta’ Tnedija, l-importazzjonijiet definiti fl-Artikolu 1 tal-istess Regolament. Skont l-Artikolu 5 tar-Regolament ta’ Tnedija, daħal fis-seħħ l-għada tal-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea. Ladarba r-Regolament ta’ Tnedija ġie ppubblikat fit-30 ta’ Jannar 2023, l-importazzjonijiet rilevanti kellhom jiġu rreġistrati sal-31 ta’ Jannar 2023.

(6)

Permezz tar-Regolament ta’ Implimentazzjoni (UE) 2023/2180 (7), il-Kummissjoni kkonkludiet ir-rieżami ta’ “esportatur ġdid” ta’ hawn fuq u żiedet lil Seven Star mal-lista tal-kumpaniji b’rati ta’ dazju individwali. Skont l-Artikolu 1 ta’ dak ir-Regolament, il-kodiċi addizzjonali TARIC A032 ġie attribwit b’mod żbaljat lil Seven Star. Il-kodiċi addizzjonali TARIC it-tajjeb jenħtieġ li jkun A023.

(7)

L-Artikolu 2 tar-Regolament ta’ Implimentazzjoni (UE) 2023/2180 ta struzzjonijiet lill-awtoritajiet doganali biex iwaqqfu l-importazzjonijiet tal-prodott ikkonċernat li joriġina fir-RPĊ prodott minn Seven Star u biex jimponu retroattivament ir-rata tad-dazju anti-dumping. L-Artikolu 2 indika b’mod żbaljat li l-applikazzjoni retroattiva tad-dazju jenħtieġ li tibda tgħodd mit-30 ta’ Jannar 2023. Id-data t-tajba għall-applikazzjoni retroattiva tad-dazju anti-dumping jenħtieġ li tkun il-31 ta’ Jannar 2023.

(8)

Għaldaqstant, il-Kummissjoni ddeċidiet li tikkoreġi l-Artikolu 1 u l-Artikolu 2 tar-Regolament ta’ Implimentazzjoni (UE) 2023/2180 sabiex tirrettifika l-iżbalji msemmija fil-premessi (6) u (7). Din il-korrezzjoni jenħtieġ li ssir effettiva mid-dħul fis-seħħ tar-Regolament ta’ Implimentazzjoni (UE) 2023/2180, jiġifieri t-18 ta’ Ottubru 2023.

(9)

Il-miżuri previsti f’dan ir-Regolament huma f’konformità mal-opinjoni tal-Kumitat stabbilit permezz tal-Artikolu 15(1) tar-Regolament bażiku,