(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fl-għalf tal-annimali, kif ukoll ir-raġunijiet u l-proċeduri għall-għoti u għat-tiġdid ta’ din l-awtorizzazzjoni.

(2)

Preparat tal-alfa-galattożidażi prodotta mis-Saccharomyces cerevisiae CBS 615.94 u tal-endo-1,4-beta-glukanażi prodotta mill-Aspergillus niger CBS 120604 kien ġie awtorizzat għal 10 snin bħala addittiv tal-għalf għat-tiġieġ tas-simna mir-Regolament ta’ Implimentazzjoni tal-Kummissjoni (UE) Nru 237/2012 (2), u għall-ispeċijiet minuri tal-pollam tas-simna u għat-tiġieġ imrobbija għall-bajd mir-Regolament ta’ Implimentazzjoni tal-Kummissjoni (UE) Nru 1365/2013 (3).

(3)

F’konformità mal-Artikolu 14(1) tar-Regolament (KE) Nru 1831/2003, tressqet applikazzjoni għat-tiġdid tal-awtorizzazzjoni tal-preparat tal-alfa-galattożidażi prodotta mis-Saccharomyces cerevisiae CBS 615.94 u tal-endo-1,4-beta-glukanażi prodotta mill-Aspergillus niger CBS 120604, bħala addittiv tal-għalf għat-tiġieġ tas-simna, għall-ispeċijiet minuri tal-pollam għas-simna u għat-tiġieġ imrobbija għall-bajd, li fiha ġie mitlub li l-addittiv jiġi kklassifikat fil-kategorija tal-addittivi “addittivi żootekniċi” u fil-grupp funzjonali “sustanzi li jsaħħu d-diġestibbiltà”. Mal-applikazzjoni ntbagħtu d-dettalji u d-dokumenti meħtieġa skont l-Artikolu 14(2) tar-Regolament (KE) Nru 1831/2003.

(4)

Fl-opinjoni tagħha tas-6 ta’ Lulju 2023, l-Awtorità Ewropea dwar is-Sigurtà fl-Ikel (“l-Awtorità”) (4) ikkonkludiet li l-preparat tal-alfa-galattożidażi prodotta mis-Saccharomyces cerevisiae CBS 615.94 u tal-endo-1,4-beta-glukanażi prodotta mill-Aspergillus niger CBS 120604 għadu sikur għat-tiġieġ tas-simna, għall-ispeċijiet minuri tal-pollam tas-simna u għat-tiġieġ imrobbija għall-bajd, għall-konsumaturi u għall-ambjent, skont il-kundizzjonijiet tal-użu li huma awtorizzati bħalissa. Ikkonkludiet ukoll li l-preparat tal-alfa-galattożidażi prodotta mis-Saccharomyces cerevisiae CBS 615.94 u tal-endo-1,4-beta-glukanażi prodotta mill-Aspergillus niger CBS 120604, huwa irritant tal-ġilda u tal-għajnejn u sensitizzatur dermali, u li jenħtieġ li jitqies bħala sensitizzatur respiratorju. Indikat ukoll li ma hemmx bżonn li tiġi vvalutata l-effikaċja tal-preparat tal-alfa-galattożidażi prodotta mis-Saccharomyces cerevisiae CBS 615.94 u tal-endo-1,4-beta-glukanażi prodotta mill-Aspergillus niger CBS 120604, peress li l-applikazzjoni għat-tiġdid tal-awtorizzazzjoni ma tinkludix proposta biex jiġu emendati jew issupplimentati l-kundizzjonijiet tal-awtorizzazzjonijiet oriġinali li kieku jkollhom impatt fuq l-effikaċja tal-addittiv. L-Awtorità ma qisitx li hemm il-ħtieġa ta’ rekwiżiti speċifiċi ta’ monitoraġġ ta’ wara l-introduzzjoni fis-suq.

(5)

Il-Laboratorju ta’ Referenza, stabbilit bir-Regolament (KE) Nru 1831/2003, qies li l-konklużjonijiet u r-rakkomandazzjonijiet milħuqa fil-valutazzjoni mwettqa fir-rigward tal-metodu ta’ analiżi tal-preparat tal-alfa-galattożidażi prodotta mis-Saccharomyces cerevisiae CBS 615.94 u tal-endo-1,4-beta-glukanażi prodotta mill-Aspergillus niger CBS 120604 bħala addittiv tal-għalf fil-kuntest tal-awtorizzazzjonijiet preċedenti huma validi u applikabbli għall-applikazzjoni attwali. Għalhekk, f’konformità mal-Artikolu 5(4), il-punt (c) tar-Regolament tal-Kummissjoni (KE) Nru 378/2005 (5), mhuwiex meħtieġ rapport ta’ evalwazzjoni tal-Laboratorju ta’ Referenza.

(6)

Fid-dawl ta’ dan ta’ hawn fuq, il-Kummissjoni tqis li l-preparat tal-alfa-galattożidażi prodotta mis-Saccharomyces cerevisiae CBS 615.94 u tal-endo-1,4-beta-glukanażi prodotta mill-Aspergillus niger CBS 120604 jissodisfa l-kundizzjonijiet, kif previst fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-awtorizzazzjoni ta’ dak l-addittiv tiġġedded. Barra minn hekk, il-Kummissjoni tqis li jenħtieġ li jittieħdu miżuri protettivi xierqa biex jiġu evitati effetti avversi fuq is-saħħa tal-utenti tal-addittiv. Jenħtieġ li dawk il-miżuri protettivi jkunu mingħajr preġudizzju għal rekwiżiti oħra tas-sikurezza tal-ħaddiema skont id-dritt tal-Unjoni.

(7)

Jenħtieġ li bħala konsegwenza tat-tiġdid tal-awtorizzazzjoni tal-preparat tal-alfa-galattożidażi prodotta mis-Saccharomyces cerevisiae CBS 615.94 u tal-endo-1,4-beta-glukanażi prodotta mill-Aspergillus niger CBS 120604 bħala addittiv, jitħassru r-Regolamenti ta’ Implimentazzjoni (UE) Nru 237/2012 u (UE) Nru 1365/2013.

(8)

Peress li r-raġunijiet ta’ sikurezza ma jeħtiġux l-applikazzjoni immedjata tal-modifiki tal-kundizzjonijiet tal-awtorizzazzjoni tal-preparat tal-alfa-galattożidażi prodotta mis-Saccharomyces cerevisiae CBS 615.94 u tal-endo-1,4-beta-glukanażi prodotta mill-Aspergillus niger CBS 120604, jixraq li jiġi previst perjodu ta’ tranżizzjoni ħalli l-partijiet interessati jħejju ruħhom biex jissodisfaw ir-rekwiżiti l-ġodda li jirriżultaw mit-tiġdid tal-awtorizzazzjoni.

(9)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,