(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fl-għalf tal-annimali, kif ukoll ir-raġunijiet u l-proċeduri għall-għoti u għat-tiġdid ta’ din l-awtorizzazzjoni.

(2)

It-tawmatina ġie awtorizzat għal 10 snin bħala addittiv fl-għalf għall-ispeċijiet kollha tal-annimali bir-Regolament ta’ Implimentazzjoni tal-Kummissjoni (UE) Nru 869/2012 (2).

(3)

F’konformità mal-Artikolu 14(1) tar-Regolament (KE) Nru 1831/2003, tressqet applikazzjoni għat-tiġdid tal-awtorizzazzjoni tat-tawmatina bħala addittiv fl-għalf, bit-talba li l-addittiv fl-għalf jiġi kklassifikat fil-kategorija tal-addittivi “addittivi sensorjali” u fil-grupp funzjonali “komposti aromatizzanti”. L-applikazzjoni kienet tinkludi proposta biex jiġu emendati l-kundizzjonijiet tal-awtorizzazzjoni oriġinali. Din kienet tikkonsisti f’modifika tal-ispeċifikazzjonijiet għan-nitroġenu u għall-proteina fl-addittiv, sabiex jiġu allinjati mal-ispeċifikazzjonijiet għat-tawmatina meta jintuża bħala addittiv fl-ikel (mhux inqas minn 15,1 % ta’ nitroġenu (N) fuq bażi mnixxfa u mhux inqas minn 93 % ta’ proteina). Mal-applikazzjoni ntbagħtu d-dettalji u d-dokumenti meħtieġa skont l-Artikolu 14(2) tar-Regolament (KE) Nru 1831/2003.

(4)

Fl-opinjoni tagħha tal-11 ta’ Mejju 2023 (3), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li t-tawmatina jibqa’ sikur għall-ispeċijiet kollha tal-annimali, għall-konsumaturi u għall-ambjent fil-kundizzjonijiet tal-użu awtorizzati bħalissa. B’mod partikolari, hija kkonkludiet li l-modifika proposta tal-ispeċifikazzjonijiet tal-addittiv ma tkun iżżid l-ebda periklu għal dawk li diġà ġew ivvalutati u ma titqiesx li għandha impatt fuq l-effikaċja tas-sustanza. L-Awtorità kkonkludiet ukoll li l-esponiment tal-utenti għat-tawmatina permezz tan-nifs huwa probabbli u li, minħabba n-natura proteinaċja tiegħu, it-tawmatina jitqies bħala sensitizzatur respiratorju. Skont l-Awtorità, it-tawmatina mhuwiex irritant tal-ġilda jew tal-għajnejn. Fin-nuqqas ta’ data, l-Awtorità ma setgħetx tasal għall-konklużjoni dwar il-potenzjal tas-sensitizzazzjoni kutanja tat-tawmatina.

(5)

Il-Laboratorju ta’ Referenza stabbilit bir-Regolament (KE) Nru 1831/2003 qies li l-konklużjonijiet u r-rakkomandazzjonijiet milħuqa fil-valutazzjoni mwettqa fir-rigward tal-metodu ta’ analiżi tat-tawmatina bħala addittiv fl-għalf fil-kuntest tal-awtorizzazzjoni preċedenti huma validi u applikabbli għall-applikazzjoni attwali. Għalhekk, f’konformità mal-Artikolu 5(4)(c) tar-Regolament tal-Kummissjoni (KE) Nru 378/2005 (4), mhuwiex meħtieġ rapport ta’ evalwazzjoni tal-Laboratorju ta’ Referenza.

(6)

Fid-dawl ta’ dan ta’ hawn fuq, il-Kummissjoni tqis li t-tawmatina jissodisfa l-kundizzjonijiet, kif previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li l-awtorizzazzjoni ta’ dak l-addittiv tiġġedded. Barra minn hekk, il-Kummissjoni jidhrilha li jenħtieġ li jittieħdu miżuri protettivi xierqa sabiex jiġu evitati effetti avversi fuq saħħet l-utenti tal-addittiv. Jenħtieġ li dawk il-miżuri protettivi jkunu mingħajr preġudizzju għal rekwiżiti oħra tas-sikurezza tal-ħaddiema skont id-dritt tal-Unjoni.

(7)

Jenħtieġ li jiġu previsti ċerti kundizzjonijiet għal kontroll aħjar. B’mod partikolari, jenħtieġ li jiġi indikat kontenut massimu rakkomandat fuq it-tikketta tal-addittiv. Meta dan il-kontenut jinqabeż, jenħtieġ li ċerta informazzjoni tiġi indikata fuq it-tikketta tal-premixxeli.

(8)

B’konsegwenza tat-tiġdid tal-awtorizzazzjoni tat-tawmatina bħala addittiv fl-għalf, jenħtieġ li r-Regolament ta’ Implimentazzjoni (UE) Nru 869/2012 jitħassar.

(9)

Billi l-applikazzjoni immedjata tal-modifiki tal-kundizzjonijiet tal-awtorizzazzjoni tat-tawmatina mhijiex meħtieġa minħabba raġunijiet ta’ sikurezza, jixraq li jiġi previst perjodu tranżitorju biex il-partijiet interessati jħejju rwieħhom biex jissodisfaw ir-rekwiżiti l-ġodda li jirriżultaw mit-tiġdid tal-awtorizzazzjoni.

(10)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,