(1)

F’konformità mal-Artikolu 9(1)(a) tar-Regolament (UE) Nru 528/2012, il-kolekalċiferol ġie approvat bħala sustanza attiva għall-użu fil-prodotti bijoċidali tat-tip ta’ prodott 14 soġġett għall-kundizzjonijiet stabbiliti fl-Anness tar-Regolament ta’ Implimentazzjoni tal-Kummissjoni (UE) 2019/637 (2).

(2)

L-approvazzjoni tal-kolekalċiferol għall-użu fil-prodotti bijoċidali tat-tip ta’ prodott 14 (“l-approvazzjoni”) se tiskadi fit-30 ta’ Ġunju 2024. Fit-22 ta’ Diċembru 2022, tressqet applikazzjoni f’konformità mal-Artikolu 13(1) tar-Regolament (UE) Nru 528/2012 għat-tiġdid tal-approvazzjoni (“l-applikazzjoni”).

(3)

Fis-7 ta’ Awwissu 2023, l-awtorità kompetenti tal-evalwazzjoni tal-Iżvezja infurmat lill-Kummissjoni li skont l-Artikolu 14(1) tar-Regolament (UE) Nru 528/2012, kienet iddeċidiet li ma kinitx meħtieġa evalwazzjoni sħiħa tal-applikazzjoni. Skont l-Artikolu 14(2), it-tieni subparagrafu, ta’ dak ir-Regolament, l-awtorità kompetenti tal-evalwazzjoni trid twettaq evalwazzjoni tal-applikazzjoni fi żmien 180 jum minn meta l-Aġenzija Ewropea għas-Sustanzi Kimiċi (“l-Aġenzija”) taċċetta l-applikazzjoni.

(4)

Fi żmien 90 jum minn meta tirċievi rakkomandazzjoni mingħand l-awtorità kompetenti tal-evalwazzjoni, l-Aġenzija trid tħejji u tippreżenta opinjoni lill-Kummissjoni dwar it-tiġdid tal-approvazzjoni tas-sustanza attiva f’konformità mal-Artikolu 14(3) tar-Regolament (UE) Nru 528/2012.

(5)

Fit-3 ta’ Novembru 2023, l-Aġenzija infurmat lill-Kummissjoni li l-awtorità kompetenti tal-evalwazzjoni biħsiebha tippreżenta r-rapport tal-evalwazzjoni tagħha lill-Aġenzija f’Diċembru 2023, peress li l-awtorità kompetenti tal-evalwazzjoni kellha bżonn tqis ukoll l-informazzjoni li ġejja minn konsultazzjoni pubblika (bejn it-8 ta’ Settembru u s-7 ta’ Novembru 2023 (3)) dwar kandidati potenzjali għas-sostituzzjoni organizzata mill-Aġenzija f’konformità mal-Artikolu 10(3) tar-Regolament (UE) Nru 528/2012. L-Aġenzija biħsiebha tippreżenta l-opinjoni tagħha dwar it-tiġdid tal-approvazzjoni tal-kolekalċiferol lill-Kummissjoni f’Marzu 2024.

(6)

Il-kolekalċiferol jitqies li għandu proprjetajiet li jfixklu s-sistema endokrinali li jistgħu jikkawżaw effetti avversi fil-bnedmin f’konformità mar-Regolament ta’ Implimentazzjoni tal-Kummissjoni (UE) 2019/637, u għalhekk jissodisfa l-kriterju tal-esklużjoni stabbilit fl-Artikolu 5(1), il-punt (d), tar-Regolament (UE) Nru 528/2012. Peress li l-eżami biex jiġi deċiż jekk mill-inqas waħda mill-kundizzjonijiet tal-ewwel subparagrafu tal-Artikolu 5(2) ta’ dak ir-Regolament hijiex issodisfata, u jekk l-approvazzjoni tal-kolekalċiferol tistax għalhekk tiġġedded, se jitwettaq ladarba l-Aġenzija tippreżenta l-opinjoni tagħha lill-Kummissjoni, mhux se jkun possibbli li dan l-eżami jitlesta qabel l-iskadenza attwali tal-approvazzjoni.

(7)

Għaldaqstant, għal raġunijiet li mhumiex fil-kontroll tal-applikant, l-approvazzjoni tal-kolekalċiferol għall-użu fil-prodotti bijoċidali tat-tip ta’ prodott 14 x’aktarx li se tiskadi qabel ma tittieħed deċiżjoni dwar it-tiġdid tagħha. Għalhekk, jixraq li l-iskadenza tal-approvazzjoni tiġi posposta għal perjodu twil biżżejjed biex tkun tista’ titlesta l-proċedura sħiħa tal-eżami tal-applikazzjoni. Filwaqt li jitqies iż-żmien meħtieġ biex il-Kummissjoni tiddeċiedi jekk iġġeddidx l-approvazzjoni tal-kolekalċiferol għall-użu fil-prodotti bijoċidali tat-tip ta’ prodott 14, jenħtieġ li d-data tal-iskadenza tiġi posposta għall-31 ta’ Diċembru 2025.

(8)

Wara l-posponiment tad-data tal-iskadenza tal-approvazzjoni, il-kolekalċiferol jibqa’ approvat għall-użu fil-prodotti bijoċidali tat-tip ta’ prodott 14 soġġett għall-kundizzjonijiet stabbiliti fl-Anness tar-Regolament ta’ Implimentazzjoni tal-Kummissjoni (UE) 2019/637,