(1)

Skont l-Artikolu 5a(1) u (2) tar-Regolament (KE) Nru 767/2008, il-lista ta’ dokumenti tal-ivvjaġġar li jintitolaw lid-detentur jaqsam il-fruntieri esterni u li jistgħu jiġu approvati b’viża, kif stabbilit fid-Deċiżjoni 1105/2011/UE tal-Parlament Ewropew u tal-Kunsill (2) (il-“lista ta’ dokumenti tal-ivvjaġġar”), flimkien man-notifika tar-rikonoxximent jew in-nuqqas ta’ rikonoxximent tad-dokumenti tal-ivvjaġġar elenkati (it-“tabella ta’ dokumenti tal-ivvjaġġar”), għandhom jiġu integrati fis-Sistema ta’ Informazzjoni dwar il-Viża (VIS).

(2)

Skont l-istess dispożizzjoni, il-VIS għandha tipprovdi l-funzjonalità għall-ġestjoni ċentralizzata tat-tabella tan-notifiki tar-rikonoxximent jew in-nuqqas ta’ rikonoxximent tad-dokumenti tal-ivvjaġġar elenkati skont l-Artikolu 4 tad-Deċiżjoni 1105/2011/UE.

(3)

Il-konsultazzjoni tal-lista ta’ dokumenti tal-ivvjaġġar, flimkien man-notifiki tar-rikonoxximent jew in-nuqqas ta’ rikonoxximent tad-dokumenti tal-ivvjaġġar elenkati, hija element obbligatorju tal-proċedura ta’ eżami tal-viża għal soġġorn qasir. Tali konsultazzjoni permezz tal-VIS tippermetti l-verifika awtomatika tar-rikonoxximent tad-dokument tal-ivvjaġġar tal-applikant.

(4)

F’konformità mal-Artikolu 1(3) tad-Deċiżjoni 1105/2011/UE, l-Istati Membri jibqgħu kompetenti għar-rikonoxximent ta’ dokumenti tal-ivvjaġġar għall-fini tal-ħruġ ta’ viża u li jippermettu lid-detentur jaqsam il-fruntieri esterni

(5)

Skont l-Artikolu 5 tad-Deċiżjoni Nru 1105/2011/UE, il-Kummissjoni għandha tibqa’ responsabbli għall-aġġornament tal-lista ta’ dokumenti tal-ivvjaġġar. L-Istati Membri għandhom jibqgħu responsabbli biex jinnotifikaw il-pożizzjoni tagħhom dwar ir-rikonoxximent u n-nuqqas ta’ rikonoxximent ta’ tali dokumenti. Għalhekk, huwa meħtieġ li l-Istati Membri jkunu jistgħu jinnotifikaw u jaġġornaw direttament il-pożizzjoni l-ġdida tagħhom dwar l-istatus ta’ rikonoxximent fuq dokument tal-ivvjaġġar magħżul u jeditjaw it-tabella tan-notifiki tar-rikonoxximent jew in-nuqqas ta’ rikonoxximent tad-dokumenti tal-ivvjaġġar elenkati, kif integrati fil-VIS, li konsegwentement jenħtieġ li jkunu disponibbli għall-Istati Membri u għall-pubbliku permezz ta’ pubblikazzjoni elettronika aġġornata regolarment.

(6)

Sabiex taġġorna lill-Kummissjoni dwar kwalunkwe notifika tal-Istati Membri li tirrigwarda t-tabella ta’ dokumenti tal-ivvjaġġar, jenħtieġ li kull ġimagħtejn l-Aġenzija tal-Unjoni Ewropea għat-Tmexxija Operattiva tas-Sistemi tal-IT Fuq Skala Kbira fl-Ispazju ta’ Libertà, Sigurtà u Ġustizzja (eu-LISA) tislet mill-VIS it-tabella tad-dokumenti tal-ivvjaġġar u tipprovdiha lill-Kummissjoni f’format elettroniku.

(7)

L-integrazzjoni tal-lista ta’ dokumenti tal-ivvjaġġar u n-notifiki tar-rikonoxximent jew in-nuqqas ta’ rikonoxximent tad-dokumenti tal-ivvjaġġar elenkati fil-VIS tiżgura wkoll li l-VIS, wara pproċessar awtomatiku tal-fajls tal-applikazzjoni skont l-Artikolu 9a tar-Regolament (KE) Nru 767/2008, awtomatikament tibgħat lura riżultat dwar l-istatus ta’ rikonoxximent tad-dokument tal-ivvjaġġar, u b’hekk tiffaċilita l-eżami ta’ [u d-deċiżjoni dwar] applikazzjoni. Il-proċedura attwali tal-viża tittejjeb minħabba li tevita li Stat Membru joħroġ viża uniformi għal soġġorn qasir għal dokument tal-ivvjaġġar mhux rikonoxxut u l-kumplikazzjoni konsegwenti għal vjaġġatur li jasal fi Stat Membru ieħor li ma jirrikonoxxix id-dokument tal-ivvjaġġar inkwistjoni.

(8)

Il-ħidma fil-konsulati jew l-awtoritajiet ċentrali u l-awtoritajiet tal-fruntieri se tiġi ffaċilitata peress li din il-funzjonalità turi awtomatikament fil-livell ċentrali jekk dokument tal-ivvjaġġar magħżul huwiex rikonoxxut, mhux rikonoxxut jew jekk il-kundizzjonijiet relatati mar-rikonoxximent japplikawx, wara pproċessar awtomatiku tal-fajls ta’ applikazzjoni mill-VIS.

(9)

Sabiex jiġi ffaċilitat l-eżami ta’ dokument tal-ivvjaġġar mill-awtoritajiet tal-kontroll tal-fruntieri u mill-persunal konsulari, l-eu-LISA u l-Aġenzija Ewropea għall-Gwardja tal-Fruntiera u tal-Kosta jenħtieġ li jistabbilixxu konnessjoni bejn it-tabella tan-notifiki tar-rikonoxximent jew tan-nuqqas ta’ rikonoxximent tad-dokumenti tal-ivvjaġġar elenkati, kif integrata fil-VIS, u s-sistema l-ġdida tad-Dokumenti Foloz u Awtentiċi Online (FADO) stabbilita bir-Regolament (UE) 2020/493 tal-Parlament Ewropew u tal-Kunsill (3), ladarba tkun operazzjonali u jkun fiha immaġnijiet u informazzjoni oħra dwar dokumenti foloz u awtentiċi. Jenħtieġ li ma jkun hemm l-ebda pproċessar ta’ data personali operazzjonali fis-sistema tal-FADO.

(10)

Minħabba li r-Regolament (UE) 2021/1134 tal-Parlament Ewropew u tal-Kunsill (4) jibni fuq l-acquis ta’ Schengen, f’konformità mal-Artikolu 4 tal-Protokoll Nru 22 dwar il-Pożizzjoni tad-Danimarka, anness mat-Trattat dwar il-Funzjonament tal-Unjoni Ewropea, id-Danimarka nnotifikat l-implimentazzjoni tar-Regolament (UE) 2021/1134 fid-dritt nazzjonali tagħha. Għalhekk id-Danimarka hija marbuta b’din id-Deċiżjoni.

(11)

Din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen li fihom l-Irlanda ma tiħux sehem (5). Għaldaqstant l-Irlanda mhix qed tieħu sehem fl-adozzjoni ta’ din id-Deċiżjoni u mhix marbuta biha jew suġġetta għall-applikazzjoni tagħha.

(12)

Fir-rigward tal-Iżlanda u n-Norveġja, din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen fis-sens tal-Ftehim konkluż mill-Kunsill tal-Unjoni Ewropea u r-Repubblika tal-Iżlanda u r-Renju tan-Norveġja dwar l-assoċjazzjoni ta’ dawn iż-żewġ Stati mal-implimentazzjoni, l-applikazzjoni u l-iżvilupp tal-acquis ta’ Schengen (6), li jaqgħu fil-qasam imsemmi fl-Artikolu 1, il-punt B tad-Deċiżjoni tal-Kunsill 1999/437/KE (7).

(13)

Rigward l-Iżvizzera, din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen skont it-tifsira tal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen (8), li jaqgħu taħt l-oqsma msemmija fl-Artikolu 1, il-punt B tad-Deċiżjoni 1999/437/KE moqri flimkien mal-Artikolu 3 tad-Deċiżjoni tal-Kunsill 2008/146/KE (9).

(14)

Fir-rigward tal-Liechtenstein, din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen fis-sens tal-Protokoll bejn l-Unjoni Ewropea, il-Komunità Ewropea, il-Konfederazzjoni Żvizzera u l-Prinċipat tal-Liechtenstein dwar l-adeżjoni tal-Prinċipat tal-Liechtenstein mal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen (10), li jaqgħu fil-qasam imsemmi fl-Artikolu 1, il-punt B, tad-Deċiżjoni 1999/437/KE moqri flimkien mal-Artikolu 3 tad-Deċiżjoni tal-Kunsill 2011/350/UE (11).

(15)

Din id-Deċiżjoni tikkostitwixxi att li jibni fuq l-acquis ta’ Schengen jew li b’xi mod ieħor huwa relatat miegħu fis-sens tal-Artikolu 3(2) tal-Att tal-Adeżjoni tal-2003 u tal-Artikolu 4(2) tal-Att tal-Adeżjoni tal-2005 rispettivament.

(16)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (12) u ta opinjoni fid-9 ta’ Marzu 2022.

(17)

Il-miżuri previsti f’din id-Deċiżjoni huma f’konformità mal-opinjoni tal-Kumitat għall-Fruntieri Intelliġenti,