REGOLAMENT DELEGAT TAL-KUMMISSJONI (UE) 2024/490

tad-29 ta’ Novembru 2023

li jemenda r-Regolament Delegat (UE) 2017/1926 li jissupplimenta d-Direttiva 2010/40/UE tal-Parlament Ewropew u tal-Kunsill fir-rigward tal-forniment tas-servizzi ta’ informazzjoni dwar l-ivvjaġġar multimodali fl-UE kollha

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva 2010/40/UE tal-Parlament Ewropew u tal-Kunsill tas-7 ta’ Lulju 2010 dwar il-qafas għall-varar ta’ Sistemi ta’ Trasport Intelliġenti fil-qasam tat-trasport bit-triq u għall-interkonnessjonijiet ma’ modi oħrajn ta’ trasport (1), u b’mod partikolari l-Artikolu 7 tagħha,

Billi:

(1)

Il-Komunikazzjoni tal-Kummissjoni dwar Strateġija ta’ Mobbiltà Sostenibbli u Intelliġenti (2) tidentifika l-użu ta’ Sistemi ta’ Trasport Intelliġenti (“STI”) bħala azzjoni ewlenija fil-kisba ta’ mobbiltà multimodali konnessa u awtomatizzata, u għalhekk tikkontribwixxi għat-trasformazzjoni tas-sistema Ewropea tat-trasport biex jintlaħaq l-objettiv ta’ mobbiltà effiċjenti, sikura, sostenibbli, intelliġenti u reżiljenti. L-istrateġija ħabbret reviżjoni tar-Regolament Delegat tal-Kummissjoni (UE) 2017/1926 (3) biex tiġi inkluża l-aċċessibbiltà obbligatorja ta’ settijiet ta’ data dinamiċi, li hija meħtieġa biex jintlaħqu l-objettivi ta’ politika ta’ din l-istrateġija, kif ukoll valutazzjoni tal-ħtieġa ta’ azzjoni regolatorja dwar id-drittijiet u d-dmirijiet tal-fornituri ta’ servizzi diġitali multimodali.

(2)

Il-Patt Ekoloġiku Ewropew (4) jenfasizza r-rwol dejjem akbar tal-mobbiltà multimodali awtomatizzata u konnessa, flimkien ma’ sistemi intelliġenti ta’ ġestjoni tat-traffiku permessi mid-diġitalizzazzjoni, u l-objettiv li jiġu appoġġati servizzi ġodda sostenibbli tat-trasport u tal-mobbiltà li jistgħu jnaqqsu l-konġestjoni u t-tniġġis, speċjalment f’żoni urbani. Ir-Regolament Delegat (UE) 2017/1926 jappoġġa l-bidla lejn modi ta’ trasport aktar sostenibbli, inkluż l-użu ta’ modi attivi, bħall-mixi u s-sewqan tar-roti. Billi l-aċċessibbiltà ta’ settijiet ta’ data dinamiċi u ta’ settijiet ta’ data statiċi, storiċi u osservati ġodda ssir obbligatorja, kif propost mill-emendi għar-Regolament Delegat (UE) 2017/1926, is-servizzi ta’ informazzjoni dwar l-ivvjaġġar multimodali jistgħu jtejbu l-informazzjoni u s-servizz lill-passiġġier, jagħtu spinta lill-mobbiltà multimodali u jnaqqsu l-emissjonijiet, f’konformità mal-objettivi stabbiliti fil-Patt Ekoloġiku Ewropew.

(3)

L-istrateġija Ewropea għad-data (5) tiddeskrivi kif id-disponibbiltà ta’ aktar data hija essenzjali għall-indirizzar tal-isfidi relatati mas-soċjetà, mal-klima u mal-ambjent. L-istrateġija tenfasizza l-benefiċċji li se ġġib l-innovazzjoni xprunata mid-data għaċ-ċittadini u tipproponi l-ħolqien ta’ spazji tad-data komuni u interoperabbli fl-UE kollha f’setturi strateġiċi, inkluż spazju tad-data komuni Ewropew dwar il-mobbiltà. F’dak ir-rigward, ir-Regolament Delegat (UE) 2017/1926 jikkontribwixxi għaż-żieda fl-aċċessibbiltà u l-kondiviżjoni tad-data dwar l-informazzjoni dwar l-ivvjaġġar multimodali. Billi ssir obbligatorja l-aċċessibbiltà tas-settijiet ta’ data dinamiċi kif propost mill-emendi għar-Regolament Delegat (UE) 2017/1926, aktar data se ssir aċċessibbli u se tiġi kondiviża, f’konformità mal-objettivi tal-istrateġija Ewropea għad-data.

(4)

Għall-konsistenza u biex jiġu evitati d-duplikazzjonijiet mar-Regolament Delegat tal-Kummissjoni (UE) 2022/670 (6), jenħtieġ li jiżdiedu tipi speċifiċi ta’ data dwar il-parkeġġ mal-kamp ta’ applikazzjoni tar-Regolament Delegat (UE) 2017/1926 u jenħtieġ li t-tipi ta’ data dwar l-istazzjonijiet tar-riforniment u tal-iċċarġjar jitneħħew mill-kamp ta’ applikazzjoni tar-Regolament Delegat (UE) 2017/1926. Id-data dwar il-parkeġġ, bħall-post u d-disponibbiltà tal-postijiet tal-parkeġġ, fejn u kif wieħed għandu jħallas għall-parkeġġ, u l-informazzjoni dwar it-tariffi tal-parkeġġ, huma meqjusa importanti għall-iżvilupp ulterjuri ta’ servizzi affidabbli ta’ informazzjoni dwar l-ivvjaġġar, u jenħtieġ li jiġu magħmula aċċessibbli mid-detenturi tad-data, bħall-awtoritajiet tat-trasport, l-operaturi tat-trasport, il-maniġers tal-infrastruttura, il-fornituri ta’ servizzi tat-trasport fuq talba jew l-operaturi tal-parkeġġi.

(5)	Jenħtieġ li tiġi żgurata l-koerenza mar-regoli dwar id-drittijiet u l-obbligi tal-passiġġieri, bħar-regoli stabbiliti bir-Regolamenti (KE) Nru 261/2004 (7), (UE) Nru 1177/2010 (8), (UE) Nru 181/2011 (9) u (UE) 2021/782 (10) tal-Parlament Ewropew u tal-Kunsill.

(6)	Il-miżuri previsti fir-Regolament Delegat (UE) 2017/1926 jenħtieġ li, fejn xieraq, iqisu l-Att futur dwar id-Data (11).

(7)

Id-data tkompli tipprovdi l-bażi kuntestwali għall-ġenerazzjoni ta’ servizzi ta’ informazzjoni dwar l-ivvjaġġar multimodali. Hekk kif il-varar tal-STI qiegħed jaċċellera madwar l-Unjoni, dan jeħtieġ appoġġ kontinwu fil-forma ta’ aċċess akbar u mingħajr xkiel għal tipi ta’ data eżistenti u ġodda rilevanti għall-forniment ta’ servizzi ta’ informazzjoni dwar l-ivvjaġġar multimodali. Għalhekk, id-data storika dwar l-ivvjaġġar u t-traffiku, b’mod partikolari biex jiġi kkalkolat id-dewmien medju, u d-data osservata dwar id-dewmien u l-kanċellazzjonijiet, kif ukoll l-informazzjoni dwar il-parkeġġ, huma importanti u jenħtieġ li jsiru aċċessibbli biex jittejbu s-servizzi ta’ informazzjoni dwar l-ivvjaġġar multimodali u jiġi ffaċilitat l-ivvjaġġar tal-passiġġieri. Fir-rigward tad-data storika u osservata dwar l-ivvjaġġar u t-traffiku, jenħtieġ li tiġi kondiviża biss data li hija rilevanti biex jittejbu s-servizzi ta’ informazzjoni dwar l-ivvjaġġar multimodali. Id-data osservata dwar id-dewmien u l-kanċellazzjonijiet, marbuta mar-regoli dwar id-drittijiet u l-obbligi tal-passiġġieri, tista’ tippermetti wkoll lill-fornituri tas-servizzi jinfurmaw lill-passiġġieri dwar id-drittijiet tagħhom għal kumpens. F’dak il-kuntest, ir-raġuni għad-dewmien jew għall-kanċellazzjonijiet jenħtieġ li tiġi kondiviża wkoll mid-detenturi tad-data sabiex jivvalutaw id-dritt għal kumpens. Peress li l-għan tal-kondiviżjoni tad-data osservata huwa marbut mad-drittijiet tal-passiġġieri għal kumpens f’każ ta’ dewmien jew ta’ kanċellazzjoni, id-data dwar il-ħin tal-wasla jew il-ħin tat-tluq, jew it-tnejn li huma, u, meta jkun possibbli, ir-raġunijiet għad-dewmien jew għall-kanċellazzjonijiet biss jenħtieġ li jsiru aċċessibbli permezz tal-punt ta’ aċċess nazzjonali kif speċifikat fl-Artikolu 3, u mhux kwalunkwe data operazzjonali miġbura matul il-vjaġġ. Id-data jenħtieġ li tinħażen mid-detenturi tad-data għal perjodu ta’ żmien xieraq li jikkorrispondi għad-drittijiet tal-passiġġieri stabbiliti fil-leġiżlazzjoni rilevanti tal-Unjoni msemmija fil-premessa 5.

(8)

Fir-rigward tal-iskambju ta’ data statika, storika, osservata u dinamika dwar l-ivvjaġġar u t-traffiku, id-detenturi tad-data jenħtieġ li jagħmlu dik id-data aċċessibbli permezz tal-punt ta’ aċċess nazzjonali kif speċifikat fl-Artikolu 3 billi jużaw l-istandards u l-ispeċifikazzjonijiet tekniċi msemmija fl-Artikoli 4 u 5. Dan jista’ jsir ukoll fi kwalunkwe standard ieħor, fejn id-detenturi tad-data jkunu jistgħu jagħtu prova li huwa kompatibbli bis-sħiħ mal-istandards ta’ referenza, u dment li l-informazzjoni kollha mitluba tkun magħmula disponibbli. Sabiex jagħtu prova tal-kompatibbiltà, id-detenturi tad-data jistgħu jużaw konvertituri jew validaturi.

(9)	Id-Direttiva (UE) 2019/1024 tal-Parlament Ewropew u tal-Kunsill (12) li tistabbilixxi regoli minimi għall-użu mill-ġdid ta’ informazzjoni tas-settur pubbliku madwar l-Unjoni hija mingħajr preġudizzju għal dan ir-Regolament Delegat.

(10)

Huwa importanti li tingħata spinta lit-trasport multimodali, sabiex jintlaħaq l-objettiv klimatiku ġenerali tal-Unjoni. Minħabba l-aċċessibbiltà mhux sodisfaċenti kurrenti tad-data dinamika multimodali, l-aċċessibbiltà tas-settijiet ta’ data dinamika hija għalhekk meqjusa neċessarja biex tappoġġa l-iżvilupp kontinwu tas-servizzi ta’ informazzjoni dwar l-ivvjaġġar multimodali fl-Unjoni kollha u għalhekk jenħtieġ li ssir obbligatorja.

(11)

Kwalunkwe pproċessar relatat mal-forniment u mal-użu mill-ġdid ta’ data personali jenħtieġ li jitwettaq f’konformità mal-leġiżlazzjoni tal-Unjoni u tal-Istati Membri dwar il-protezzjoni ta’ data personali u l-privatezza, b’mod partikolari, ir-Regolament (UE) 2016/679 tal-Parlament Ewropew u tal-Kunsill (13) u d-Direttiva 2002/58/KE tal-Parlament Ewropew u tal-Kunsill (14), kif trasposti bid-dritt nazzjonali. Ma huwiex meħtieġ li d-data personali tiġi kondiviża permezz ta’ punti ta’ aċċess nazzjonali biex jintlaħqu l-objettivi ta’ dan ir-Regolament. Għalhekk, jenħtieġ li d-detenturi tad-data jieħdu miżuri tekniċi u organizzazzjonali xierqa biex jiżguraw li kwalunkwe data personali tiġi anonimizzata qabel ma tiġi pprovduta permezz ta’ punti ta’ aċċess nazzjonali.

(12)

L-Istati Membri u l-partijiet ikkonċernati tal-STI jenħtieġ li jikkooperaw sabiex jintlaħaq qbil dwar definizzjonijiet komuni tal-kwalità tad-data bil-għan li jintużaw indikaturi komuni għall-kwalità tad-data fil-katina kollha tal-valur tad-data dwar l-ivvjaġġar u t-traffiku, bħalma huma l-kompletezza, l-akkuratezza u l-aġġornament tad-data, kif ukoll il-verifiki tal-kwalità applikati, b’mod partikolari s-servizzi transfruntieri. Jenħtieġ li jiġu mħeġġa wkoll ikomplu jaħdmu biex jistabbilixxu l-metodi tal-kejl tal-kwalità assoċjati u l-monitoraġġ tat-tipi differenti ta’ data. L-Istati Membri jenħtieġ li jiġu mħeġġa jikkondividu ma’ xulxin l-għarfien, l-esperjenza u l-aħjar prattiki tagħhom fil-qasam tal-kwalità tad-data fil-proġetti ta’ koordinazzjoni li għaddejjin u futuri.

(13)

Is-servizzi ta’ informazzjoni dwar l-ivvjaġġar multimodali jenħtieġ li jkunu akkurati sabiex jipprovdu l-aħjar informazzjoni possibbli lill-utenti finali f’termini ta’ affidabbiltà u puntwalità. Sabiex tittejjeb il-kwalità tad-data, l-utenti tad-data u d-detenturi tad-data jenħtieġ li jiġu mħeġġa jikkooperaw biex jiżguraw li d-data hija akkurata kemm jista’ jkun, pereżempju billi jirrapportaw kwalunkwe ineżattezzi lid-detentur tad-data, li minnu toriġina d-data.

(14)

Sabiex jippermettu l-użu b’suċċess u kosteffiċjenti tal-punti ta’ aċċess nazzjonali u jippermettu lill-utenti tad-data jiskopru u jużaw is-settijiet ta’ data magħmula aċċessibbli permezz tal-punti ta’ aċċess nazzjonali kif speċifikat fl-Artikolu 3, l-Istati Membri u l-partijiet ikkonċernati tal-STI jenħtieġ li jikkooperaw biex jilħqu ftehim dwar ir-rekwiżiti tal-metadata, filwaqt li jitqiesu l-iskema tal-metadata napDCAT-AP u l-verżjonijiet sussegwenti.

(15)	L-Istati Membri jenħtieġ li jikkollaboraw biex jarmonizzaw l-approċċ tagħhom lejn il-valutazzjoni tal-konformità fil-proġetti ta’ koordinazzjoni li għaddejjin u futuri, li jgħinu fl-implimentazzjoni tar-Regolament Delegat (UE) 2017/1926.

(16)

Sabiex tkun tista’ ssir it-tħejjija meħtieġa biex is-settijiet ta’ data dinamika kollha dwar l-ivvjaġġar u t-traffiku stabbiliti f’dan ir-Regolament ikunu aċċessibbli fil-formati meħtieġa permezz tal-punti ta’ aċċess nazzjonali kif speċifikat fl-Artikolu 3, jenħtieġ li l-perjodu ta’ żmien għall-forniment ta’ tali data jiġi aġġornat. Barra minn hekk, jenħtieġ li jiġi stabbilit ukoll il-perjodu ta’ żmien għall-forniment tas-settijiet il-ġodda ta’ data statika, storika u osservata dwar l-ivvjaġġar u t-traffiku.

(17)	Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (15) u ta l-opinjoni tiegħu fil-25 ta’ Lulju 2023.

(18)	Għaldaqstant jenħtieġ li r-Regolament Delegat (UE) 2017/1926 jiġi emendat skont dan,

ADOTTAT DAN IR-REGOLAMENT:

Artikolu 1

Emendi għar-Regolament Delegat (UE) 2017/1926

Ir-Regolament Delegat (UE) 2017/1926 huwa emendat kif ġej:

(1)	fl-Artikolu 1, il-paragrafu 1 huwa sostitwit b’dan li ġej: “1. Dan ir-Regolament jistabbilixxi l-ispeċifikazzjonijiet neċessarji sabiex jiġi żgurat li s-servizzi ta’ informazzjoni dwar l-ivvjaġġar multimodali fl-UE kollha jkunu akkurati u disponibbli b’mod transfruntier għall-utenti finali.” ;

(2)

L-Artikolu 2 huwa sostitwit b’dan li ġej:

“Artikolu 2

Definizzjonijiet

Għall-finijiet ta’ dan ir-Regolament, għandhom japplikaw id-definizzjonijiet stipulati fl-Artikolu 4 tad-Direttiva 2010/40/UE u fl-Artikolu 3 tar-Regolament (UE) Nru 1315/2013.

Għandhom japplikaw ukoll id-definizzjonijiet li ġejjin, fir-rigward tal-informazzjoni dwar l-ivvjaġġar u t-traffiku multimodali:

(1)

“informazzjoni dwar l-ivvjaġġar multimodali” tfisser informazzjoni li ġejja minn kwalunkwe data statika, storika, osservata jew dinamika dwar l-ivvjaġġar u t-traffiku, jew kwalunkwe kombinament tagħhom, għall-utenti finali, ipprovduta permezz ta’ kwalunkwe mezz ta’ komunikazzjoni, li tkopri mill-anqas żewġ mezzi ta’ trasport u li permezz tagħha jistgħu jitqabblu modi tat-trasport;

(2)	“servizz ta’ informazzjoni dwar l-ivvjaġġar” tfisser servizz tal-STI, inklużi l-mapep diġitali, li jipprovdi lill-utenti tad-data, u lill-utenti finali, b’informazzjoni dwar l-ivvjaġġar u t-traffiku ta’ mill-inqas mod wieħed ta’ trasport;

(3)	“data dinamika dwar l-ivvjaġġar u t-traffiku” tfisser id-data li għandha x’taqsam ma’ modi differenti ta’ trasport li tinbidel ta’ spiss, jew data dwar avvenimenti jew ċirkostanzi mhux mistennija, kif elenkat fl-Anness;

(4)	“data statika dwar l-ivvjaġġar u t-traffiku” tfisser id-data li għandha x’taqsam ma’ modi differenti ta’ trasport li ma tinbidilx ta’ spiss, jew data dwar bidliet ippjanati, kif elenkat fl-Anness;

(5)

“data storika dwar l-ivvjaġġar u t-traffiku” tfisser data relatata mal-karatteristiċi tat-traffiku, użata biex jiġi kkalkolat id-dewmien medju, skont is-siegħa, il-jum u l-istaġun, li hija bbażata fuq kejl preċedenti, inkluża r-rata ta’ konġestjoni, il-veloċitajiet medji, u l-ħinijiet medji tal-ivvjaġġar;

(6)	“data osservata” tfisser data operazzjonali relatata mal-ivvjaġġar u t-traffiku, bħat-tul u r-raġuni għad-dewmien u l-kanċellazzjonijiet, li tirriżulta minn u tinġabar matul l-operazzjonijiet tas-servizz;

(7)

“utent tad-data” tfisser kwalunkwe entità pubblika jew privata, bħall-awtoritajiet tat-trasport, l-operaturi tat-trasport, il-fornituri tas-servizzi tal-informazzjoni dwar l-ivvjaġġar, il-produtturi tal-mapep diġitali, il-fornituri tas-servizzi tat-trasport fuq talba u l-maniġers tal-infrastruttura, jew kwalunkwe entità oħra li tuża d-data elenkata fl-Anness biex toħloq informazzjoni dwar l-ivvjaġġar multimodali, jew fejn previst mit-termini u l-kundizzjonijiet iddeterminati mid-detentur tad-data, bl-użu ta’ data għal skopijiet oħra;

(8)	“awtorità tat-trasport” tfisser kwalunkwe awtorità pubblika responsabbli għall-ġestjoni tat-traffiku jew għall-ippjanar, mill-kontroll jew mill-ġestjoni ta’ network ta’ trasport partikolari jew ta’ servizz ta’ trasport, jew it-tnejn li huma, li jaqgħu fil-kompetenza territorjali tagħha;

(9)	“operatur tat-trasport” tfisser kwalunkwe entità pubblika jew privata li hija responsabbli għall-manutenzjoni u l-ġestjoni tas-servizz tat-trasport;

(10)	“fornitur ta’ servizzi tat-trasport fuq talba” tfisser kwalunkwe fornitur pubbliku jew privat ta’ servizzi tat-trasport fuq talba lill-utenti finali;

(11)

“detentur tad-data” tfisser kwalunkwe persuna ġuridika, entità pubblika jew privata, bħall-awtoritajiet tat-trasport, l-operaturi tat-trasport, il-maniġers tal-infrastruttura jew il-fornituri ta’ servizzi tat-trasport fuq talba, li għandha d-dritt li tagħti aċċess għal jew li tikkondividi d-data taħt il-kontroll tagħha, elenkata fl-Anness, f’konformità mal-liġi applikabbli tal-Unjoni jew nazzjonali;

(12)	“servizz tat-trasport fuq talba” tfisser servizz li jeħtieġ interazzjoni bejn il-fornitur tas-servizz tat-trasport fuq talba u l-utent finali qabel jiġi fornut;

(13)	“utent finali” tfisser kwalunkwe persuna fiżika jew ġuridika li jkollha aċċess għas-servizzi tal-informazzjoni dwar l-ivvjaġġar;

(14)	“metadata” tfisser deskrizzjoni strutturata tal-kontenut tad-data li tiffaċilita s-sejbien u l-użu tad-data;

(15)	“riżultat tat-tiftix tar-rotta” tfisser l-itinerarju tal-ivvjaġġar f’format li jinqara mill-magni li jirriżulta minn talba għal vjaġġ tal-utenti finali b’referenza għall-punt jew il-punti tat-trasferiment użat(i);

(16)	“punt tat-trasferiment” tfisser l-istazzjon, il-waqfa jew il-post fejn żewġ riżultati tat-tiftix tar-rotta minn servizzi ta’ informazzjoni dwar l-ivvjaġġar huma kkollegati biex jitwettaq vjaġġ;

(17)	“punt ta’ aċċess” tfisser interfaċċa diġitali fejn mill-inqas id-data elenkata fl-Anness, flimkien mal-metadata korrispondenti, isiru aċċessibbli għall-użu mill-ġdid lill-utenti tad-data, jew fejn is-sorsi u l-metadata ta’ din id-data jsiru aċċessibbli għall-użu mill-ġdid lill-utenti tad-data;

(18)	“aġġornament tad-data” tfisser kwalunkwe modifika ta’ data eżistenti, inkluż it-tħassir tagħha jew iż-żieda ta’ elementi ġodda jew addizzjonali;

(19)	“servizz ta’ sejbien” tfisser servizz li jippermetti t-tiftix tad-data mitluba bl-użu tal-kontenut tal-metadata korrispondenti u li juri tali kontenut;

(20)	“aċċessibbiltà tad-data” tfisser il-possibbiltà li tintalab u tinkiseb id-data fi kwalunkwe ħin f’format li jinqara mill-magni;

(21)	“network komprensiv trans-Ewropew tat-trasport” jew “TEN-T” tfisser l-infrastruttura tat-trasport u l-miżuri msemmija fl-Artikolu 6(2) tar-Regolament (UE) Nru 1315/2013;

(22)	“tempestività tad-data” tfisser id-disponibbiltà ta’ data aġġornata pprovduta lill-utenti tad-data u lill-utenti finali kmieni biżżejjed biex tkun utli;

(23)	“fornitur ta’ servizzi ta’ informazzjoni dwar l-ivvjaġġar” tfisser kwalunkwe fornitur pubbliku jew privat ta’ mill-inqas informazzjoni waħda dwar l-ivvjaġġar u t-traffiku, lill-utenti tad-data u lill-utenti finali, bl-esklużjoni ta’ sempliċi konvertitur tal-informazzjoni;

(24)

“kollegament tas-servizz” tfisser il-konnessjoni tas-servizzi ta’ informazzjoni lokali, reġjonali, u nazzjonali dwar l-ivvjaġġar li huma interkonnessi permezz ta’ interfaċċi tekniċi biex jipprovdu riżultati tat-tiftix tar-rotta jew riżultati oħra ta’ interfaċċi ta’ programmar tal-applikazzjonijiet (APIs) abbażi ta’ data statika, storika, osservata u/jew dinamika dwar l-ivvjaġġar u t-traffiku;

(25)	“nodu ta’ aċċess” tfisser post iddefinit minn qabel fejn il-passiġġieri jistgħu jitilgħu abbord jew jinżlu mit-trasport skedat jew mit-trasport fuq talba.’;

(3)

L-Artikolu 3 huwa emendat kif ġej:

(a)

il-paragrafu 1 huwa sostitwit b’dan li ġej:

“1. Kull Stat Membru għandu jistabbilixxi punt ta’ aċċess nazzjonali. Il-punt ta’ aċċess nazzjonali għandu jikkostitwixxi punt uniku ta’ aċċess għall-utenti tad-data għad-data statika, storika, osservata u dinamika dwar l-ivvjaġġar u t-traffiku ta’ modi differenti ta’ trasport, inklużi aġġornamenti tad-data, kif stabbilit fl-Anness, ipprovduta mid-detenturi tad-data fit-territorju ta’ Stat Membru partikolari.”

;

(b)

il-paragrafi 3 u 4 huma sostitwiti b’dan li ġej:

“3. Il-punti ta’ aċċess nazzjonali għandhom jipprovdu servizzi ta’ sejbien lill-utenti tad-data.

4. L-Istati Membri għandhom jilħqu ftehim, f’kooperazzjoni mal-partijiet ikkonċernati rilevanti tal-STI, dwar ir-rekwiżiti tal-metadata. Id-detenturi tad-data għandhom jiżguraw li jipprovdu l-metadata abbażi ta’ dawk ir-rekwiżiti.”

;

(c)

jiżdied il-paragrafu 6 li ġej:

“6. Kwalunkwe entità li tipprovdi data permezz tal-punt ta’ aċċess nazzjonali tista’ tagħmel dan permezz ta’ prokura f’konformità mal-ftehimiet applikabbli, inkluż permezz ta’ bażi tad-data jew aggregatur ta’ partijiet terzi. Dan ma għandux jeżonera lid-detentur oriġinali tad-data mill-obbligi stabbiliti fl-Artikoli 3 sa 8.”

;

(4)

L-Artikoli 4, 5 u 6 huma sostitwiti b’dan li ġej:

“Artikolu 4

L-aċċessibbiltà, l-iskambju u l-użu mill-ġdid tad-data statika, storika u osservata dwar l-ivvjaġġar u t-traffiku

1. Id-detenturi tad-data għandhom jipprovdu, permezz tal-punt ta’ aċċess nazzjonali stabbilit f’konformità mal-Artikolu 3, aċċess għad-data statika, storika u osservata dwar l-ivvjaġġar u t-traffiku elenkata fil-punt 1 tal-Anness, tal-modi u l-mezzi differenti tat-trasport billi jużaw:

(a)	għat-trasport bit-triq, il-format standardizzat imsemmi fl-Artikolu 4 tar-Regolament Delegat (UE) 2015/962;

(b)

għal modi oħra ta’ trasport, wieħed mill-istandards u l-ispeċifikazzjonijiet tekniċi li ġejjin, jew kwalunkwe format diġitali li jinqara mill-magni, li dwaru tista’ tingħata prova li huwa kompatibbli u interoperabbli bis-sħiħ ma’ dawk l-istandards u l-ispeċifikazzjonijiet tekniċi, inkluż pereżempju permezz ta’ konvertituri u validaturi awtomatiċi:

(i)	NeTEx CEN/TS 16614 u l-verżjonijiet sussegwenti;

(ii)	l-ispeċifikazzjonijiet tekniċi stabbiliti fir-Regolament (UE) Nru 454/2011;

(iii)

id-dokumenti tekniċi ppubblikati taħt l-awtorità tal-Konferenza tas-Servizzi tal-Passiġġieri tal-IATA;

(iv)	Transmudell EN 12896 fejn ma jkun hemm l-ebda protokoll ta’ skambju ta’ referenza;

(c)	għan-network ġeografiku, ir-rekwiżiti stabbiliti fl-Artikolu 7 tad-Direttiva 2007/2/KE.

2. Id-data statika, storika u osservata dwar l-ivvjaġġar u t-traffiku elenkata fil-punt 1 tal-Anness, li għaliha japplikaw in-NeTEx u d-DATEX II, għandha tiġi rrappreżentata permezz ta’ profili minimi tal-UE jew profili nazzjonali.

3. Id-detenturi tad-data għandhom jipprovdu data statika, storika u osservata dwar l-ivvjaġġar u t-traffiku permezz tal-punt ta’ aċċess nazzjonali stabbilit f’konformità mal-Artikolu 3 fil-formati meħtieġa f’konformità mal-iskeda ta’ żmien li ġejja:

(a)	għad-data dwar l-ivvjaġġar u t-traffiku stabbilita fil-punt 1.1 tal-Anness, ħlief għall-punt 1.1(d)(ix), għan-network TEN-T komprensiv, sal-1 ta’ Diċembru 2019;

(b)	għad-data dwar l-ivvjaġġar u t-traffiku stabbilita fil-punt 1.2 tal-Anness, ħlief għall-punti 1.2(a)(i) u (iii), u l-punt 1.2(c)(ii), għan-network TEN-T komprensiv, sal-1 ta’ Diċembru 2020;

(c)	għad-data dwar l-ivvjaġġar u t-traffiku stabbilita fil-punt 1.3 tal-Anness, ħlief għall-punt 1.3(c)(iii), għan-network TEN-T komprensiv, sal-1 ta’ Diċembru 2021;

(d)

għad-data dwar l-ivvjaġġar u t-traffiku stabbilita fil-punti 1.1, 1.2 u 1.3 tal-Anness, ħlief għall-punt 1.1(d)(ix), il-punti 1.2(a)(i), (iii) u (vii), il-punt 1.2(c)(ii), il-punt 1.3(c)(iii), kif ukoll il-punt 1.2(c)(i), u l-punti 1.3(a)(ii) u (iii) għat-trasport fuq talba, għall-partijiet l-oħra tan-network tat-trasport tal-Unjoni, sal-1 ta’ Diċembru 2023;

(e)	għad-data dwar l-ivvjaġġar u t-traffiku stabbilita fil-punt 1.1(d)(ix), il-punti 1.2(a)(i), (iii) u (vii), il-punt 1.2(c)(ii), il-punt 1.3(c)(iii), il-punt 1.2(c)(i) u l-punti 1.3(a)(ii) u (iii) għat-trasport fuq talba tal-Anness, għan-network kollu tat-trasport fl-Unjoni, sal-1 ta’ Diċembru 2024;

(f)	għad-data dwar l-ivvjaġġar u t-traffiku stabbilita fil-punt 1.4 tal-Anness, għan-network kollu tat-trasport tal-Unjoni, sal-1 ta’ Diċembru 2025.

4. L-APIs li jipprovdu aċċess għal data statika, storika u osservata dwar l-ivvjaġġar u t-traffiku elenkati fl-Anness permezz tal-punt ta’ aċċess nazzjonali stabbilit f’konformità mal-Artikolu 3 għandha tkun aċċessibbli għall-pubbliku għall-utenti tad-data, fejn rilevanti soġġett għal reġistrazzjoni.

5. L-utenti tad-data u d-detenturi tad-data għandhom jikkollaboraw sabiex jiżguraw li kwalunkwe ineżattezza relatata mad-data statika, storika u osservata dwar l-ivvjaġġar u t-traffiku tiġi nnotifikata mingħajr dewmien lid-detentur tad-data li minnu toriġina d-data.

6. Id-data pprovduta mid-detenturi tad-data permezz tal-punt ta’ aċċess nazzjonali ma għandhiex tinkludi data personali kif definita fl-Artikolu 4(1) tar-Regolament (UE) 2016/679.

Artikolu 5

L-aċċessibbiltà, l-iskambju u l-użu mill-ġdid tad-data dinamika dwar l-ivvjaġġar u t-traffiku

1. Id-detenturi tad-data għandhom jipprovdu, permezz tal-punt ta’ aċċess nazzjonali stabbilit f’konformità mal-Artikolu 3, aċċess għad-data dinamika dwar l-ivvjaġġar u t-traffiku elenkata fil-punti 2.1 u 2.2 tal-Anness, tal-modi u l-mezzi differenti tat-trasport billi jużaw:

(a)	għat-trasport bit-triq, il-formati msemmija fl-Artikoli 5 u 6 tar-Regolament Delegat (UE) 2015/962;

(b)

għall-modi l-oħra tat-trasport, kwalunkwe wieħed mill-istandards u l-ispeċifikazzjonijiet tekniċi li ġejjin, jew kwalunkwe format diġitali li jinqara mill-magni li jista’ jiġi ppruvat li huwa kompatibbli u interoperabbli bis-sħiħ ma’ dawk l-istandards u l-ispeċifikazzjonijiet tekniċi, inkluż pereżempju permezz ta’ konvertituri u validaturi awtomatiċi:

(i)	SIRI CEN/TS 15531 u l-verżjonijiet sussegwenti;

(ii)	l-ispeċifikazzjonijiet tekniċi stabbiliti fir-Regolament (UE) Nru 454/2011.

2. Id-data dinamika dwar l-ivvjaġġar u t-traffiku msemmija fil-punti 2.1 u 2.2 tal-Anness, li għaliha huma applikabbli s-SIRI u d-DATEX II, għandha tiġi rrappreżentata permezz ta’ profili minimi tal-UE jew profili nazzjonali.

3. Id-detenturi tad-data għandhom jipprovdu data dinamika dwar l-ivvjaġġar u t-traffiku permezz tal-punt ta’ aċċess nazzjonali stabbilit f’konformità mal-Artikolu 3 fil-formati meħtieġa f’konformità mal-iskeda ta’ żmien li ġejja:

(a)	għas-sett tad-data dwar l-ivvjaġġar u t-traffiku stabbilit fil-punt 2.1 tal-Anness, għan-network TEN-T komprensiv, sal-1 ta’ Diċembru 2025;

(b)	għas-sett tad-data dwar l-ivvjaġġar u t-traffiku stabbilit fil-punt 2.2 tal-Anness, għan-network TEN-T komprensiv, sal-1 ta’ Diċembru 2026;

(c)	għas-sett tad-data dwar l-ivvjaġġar u t-traffiku stabbilit fil-punti 2.1 u 2.2 tal-Anness għall-partijiet l-oħra tan-network tat-trasport tal-Unjoni, sal-1 ta’ Diċembru 2028.

4. Kull Stat Membru jista’ jiddeċiedi li d-detenturi tad-data għandhom jipprovdu d-data dinamika dwar l-ivvjaġġar u t-traffiku ta’ modi differenti tat-trasport elenkati fil-punt 2.3 tal-Anness, fit-territorju ta’ dak l-Istat Membru, permezz tal-punt ta’ aċċess nazzjonali stabbilit f’konformità mal-Artikolu 3. F’dak il-każ, id-detenturi tad-data għandhom jużaw SIRI CEN/TS 15531 u verżjonijiet sussegwenti, jew kwalunkwe format diġitali li jinqara mill-magni li jista’ jiġi ppruvat li huwa kompatibbli u interoperabbli bis-sħiħ ma’ dawk l-istandards u l-ispeċifikazzjonijiet tekniċi, inkluż pereżempju permezz ta’ konvertituri u validaturi awtomatiċi.

5. L-APIs li jipprovdu aċċess għal data dinamika dwar l-ivvjaġġar u t-traffiku elenkati fl-Anness permezz tal-punt ta’ aċċess nazzjonali stabbilit f’konformità mal-Artikolu 3 għandhom ikunu aċċessibbli għall-pubbliku għall-utenti tad-data, fejn rilevanti soġġett għal reġistrazzjoni.

6. L-utenti tad-data u d-detenturi tad-data għandhom jikkollaboraw sabiex jiżguraw li kwalunkwe ineżattezza relatata mad-data dinamika dwar l-ivvjaġġar u t-traffiku tiġi nnotifikata mingħajr dewmien lid-detentur tad-data li minnu toriġina d-data.

7. Id-data pprovduta mid-detenturi tad-data permezz tal-punt ta’ aċċess nazzjonali ma għandhiex tinkludi data personali kif definita fl-Artikolu 4(1) tar-Regolament (UE) 2016/679.

Artikolu 6

Aġġornamenti tad-data

1. Is-servizzi ta’ informazzjoni dwar l-ivvjaġġar għandhom ikunu bbażati fuq l-aktar data statika, storika, osservata u dinamika reċenti aċċessibbli dwar l-ivvjaġġar u t-traffiku.

2. Meta jseħħu bidliet fid-data msemmija fil-paragrafu 1 ta’ dan l-Artikolu, id-detenturi tad-data għandhom jaġġornaw id-data statika, storika, osservata u dinamika rilevanti dwar l-ivvjaġġar u t-traffiku elenkata fl-Anness u jagħmluha aċċessibbli permezz tal-punt ta’ aċċess nazzjonali stabbilit f’konformità mal-Artikolu 3 f’perjodu ta’ żmien li jippermetti l-użu affidabbli u effettiv tad-data f’konformità mal-Artikolu 8. Meta l-bidliet ikunu magħrufa minn qabel, id-detenturi tad-data għandhom jipprovdu wkoll dawk l-aġġornamenti lill-utenti tad-data minn qabel. Dawn għandhom ukoll jikkoreġu tempestivament kull ineżattezza individwata minnhom fid-data tagħhom jew dik notifikata lilhom minn kwalunkwe utent tad-data jew utent finali.”;

(5)

fl-Artikolu 7, il-paragrafu 1 huwa sostitwit b’dan li ġej:

“1. Fuq talba, il-fornituri ta’ servizzi ta’ informazzjoni dwar l-ivvjaġġar għandhom jipprovdu lil fornitur ieħor ta’ servizzi ta’ informazzjoni dwar l-ivvjaġġar b’riżultati tat-tiftix tar-rotta bbażati fuq informazzjoni statika, storika, osservata u dinamika dwar l-ivvjaġġar u t-traffiku.”

;

(6)

fl-Artikolu 8, il-paragrafi 1 sa 4 huma sostitwiti b’dan li ġej:

“1. Id-data dwar l-ivvjaġġar u t-traffiku elenkata fl-Anness u l-metadata korrispondenti, inkluża l-informazzjoni dwar il-kwalità tagħha, għandhom ikunu aċċessibbli għall-iskambju u l-użu mill-ġdid fl-Unjoni fuq bażi mhux diskriminatorja, permezz tal-punt ta’ aċċess nazzjonali stabbilit f’konformità mal-Artikolu 3 u f’perjodu ta’ żmien li jippermetti l-użu mill-ġdid affidabbli u effettiv tad-data. Tali data għandha tkun akkurata u aġġornata u bbażata fuq rekwiżiti minimi tal-kwalità tad-data. Għal dak il-għan, l-Istati Membri f’kooperazzjoni mal-partijiet ikkonċernati rilevanti tal-STI, għandhom jilħqu ftehim dwar tali rekwiżiti minimi tal-kwalità tad-data.

2. Id-data msemmija fil-paragrafu 1 għandha tintuża mill-ġdid b’mod newtrali, mingħajr diskriminazzjoni jew preferenzi fil-konfront tad-detentur tad-data. Il-kriterji użati għall-klassifikazzjoni tal-għażliet ta’ vvjaġġar ta’ modi ta’ trasport differenti jew kombinamenti tagħhom, jew it-tnejn li huma, għandhom ikunu trasparenti u ma għandhom ikunu bbażati fuq l-ebda fattur direttament jew indirettament relatat mal-identità tal-utent tad-data jew tal-utent finali jew, jekk ikun il-każ, mal-kunsiderazzjoni kummerċjali relatata mal-użu mill-ġdid tad-data u għandhom jiġu applikati fuq bażi mhux diskriminatorja għall-utenti tad-data jew l-utenti finali kollha li jkunu qed jipparteċipaw. L-ewwel preżentazzjoni tal-itinerarju tal-vjaġġ ma għandhiex tqarraq lill-utent finali.

3. Meta d-data statika, storika, osservata u dinamika dwar l-ivvjaġġar u t-traffiku tintuża mill-ġdid, is-sors ta’ dik id-data għandu jiġi indikat, jekk id-detentur tad-data jirrikjedi hekk. Għandu jiġi indikat ukoll l-intervall ta’ aġġornament tad-data statika, storika, osservata u, fejn possibbli, dak tad-data dinamika.

4. It-termini u l-kundizzjonijiet għall-użu tad-data dwar it-traffiku u l-ivvjaġġar ipprovduti permezz tal-punt ta’ aċċess nazzjonali stabbilit f’konformità mal-Artikolu 3 jistgħu jiġu ddeterminati permezz ta’ ftehim ta’ liċenzja. Dawn il-kundizzjonijiet ma għandhomx jillimitaw mingħajr bżonn il-possibbiltajiet għall-użu mill-ġdid jew jintużaw biex jirrestrinġu l-kompetizzjoni. Il-ftehimiet għall-ħruġ ta’ liċenzji, kull meta jintużaw, għandhom fi kwalunkwe każ jimponu l-inqas restrizzjonijiet possibbli fuq l-użu mill-ġdid. Kwalunkwe kumpens finanzjarju għandu jkun raġonevoli u proporzjonat għall-kostijiet leġittimi li jirriżultaw mill-provvista u t-tixrid tad-data rilevanti dwar l-ivvjaġġar u t-traffiku.”

;

(7)

L-Artikolu 9 huwa sostitwit b’dan li ġej:

“Artikolu 9

Valutazzjoni tal-konformità

1. L-Istati Membri għandhom jivvalutaw jekk id-detenturi tad-data u l-fornituri ta’ servizzi ta’ informazzjoni dwar l-ivvjaġġar jikkonformawx mar-rekwiżiti stabbiliti fl-Artikoli 3 sa 8.

2. Sabiex iwettqu l-valutazzjoni msemmija fil-paragrafu 1, l-awtoritajiet kompetenti tal-Istati Membri jistgħu jitolbu mingħand id-detenturi tad-data u l-fornituri ta’ servizzi ta’ informazzjoni dwar l-ivvjaġġar, id-dokumenti li ġejjin:

(a)	deskrizzjoni tad-data dwar l-ivvjaġġar u t-traffiku aċċessibbli permezz tal-punt ta’ aċċess nazzjonali, l-informazzjoni dwar il-kwalità tagħha u l-kundizzjonijiet tal-użu mill-ġdid ta’ dik id-data;

(b)	deskrizzjoni tas-servizzi ta’ informazzjoni dwar l-ivvjaġġar disponibbli inklużi konnessjonijiet ma’ servizzi oħra fejn applikabbli;

(c)	dikjarazzjoni bbażata fuq l-evidenza tal-konformità mar-rekwiżiti stabbiliti fl-Artikoli 3 sa 8;

(d)	il-ftehimiet ta’ liċenzja jew kuntrattwali mal-fornituri ta’ servizzi ta’ informazzjoni dwar l-ivvjaġġar.

3. L-Istati Membri għandhom jiċċekkjaw, b’mod aleatorju, il-korrettezza tad-dikjarazzjonijiet imsemmija fil-punt (c) tal-paragrafu 2.”;

(8)

fl-Artikolu 10, il-paragrafu 2 huwa sostitwit b’dan li ġej:

“2. L-Istati Membri għandhom jipprovdu lill-Kummissjoni bl-informazzjoni li ġejja bħala parti mir-rapporti ta’ progress previsti fl-Artikolu 17(3) tad-Direttiva 2010/40/UE:

(a)	il-progress li sar f’termini tal-aċċessibbiltà u tal-iskambju tat-tipi ta’ data dwar l-ivvjaġġar u t-traffiku stabbiliti fl-Anness;

(b)	l-ambitu ġeografiku tad-data stabbilit fl-Anness aċċessibbli permezz tal-punt ta’ aċċess nazzjonali stabbilit f’konformità mal-Artikolu 3, u l-kwalità tagħhom, inklużi l-kriterji użati għad-definizzjoni ta’ din il-kwalità u l-mezzi użati għall-monitoraġġ tagħha;

(c)	il-konnessjoni tas-servizzi ta’ informazzjoni dwar l-ivvjaġġar ma’ xulxin;

(d)	ir-riżultati tal-valutazzjoni tal-konformità msemmija fil-paragrafu 1 tal-Artikolu 9;

(e)	fejn rilevanti, deskrizzjoni tal-bidliet fil-punt ta’ aċċess nazzjonali stabbilit f’konformità mal-Artikolu 3.”

;

(9)	l-Anness huwa sostitwit bit-test fl-Anness ta’ dan ir-Regolament.

Artikolu 2

Dħul fis-seħħ u applikazzjoni

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, id-29 ta’ Novembru 2023.

Għall-Kummissjoni

Il-President

Ursula VON DER LEYEN

(1) ĠU L 207, 6.8.2010, p. 1.

(2) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni “Strateġija għal Mobbiltà Sostenibbli u Intelliġenti – inqiegħdu t-trasport Ewropew fit-triq it-tajba għall-futur” (COM(2020) 789 final, 9.12.2020).

(3) Ir-Regolament Delegat tal-Kummissjoni (UE) 2017/1926 tal-31 ta’ Mejju 2017 li jissupplimenta d-Direttiva 2010/40/UE tal-Parlament Ewropew u tal-Kunsill fir-rigward tal-forniment ta’ servizzi ta’ informazzjoni dwar l-ivvjaġġar multimodali fl-UE kollha (ĠU L 272, 21.10.2017, p. 1).

(4) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni, “Il-Patt Ekoloġiku Ewropew” (COM(2019) 640 final, 11.12.2019).

(5) Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni “Strateġija Ewropea għad-data ” (COM(2020) 66 final, 19.2.2020).

(6) Ir-Regolament Delegat tal-Kummissjoni (UE) 2022/670 tat-2 ta’ Frar 2022 li jissupplimenta d-Direttiva 2010/40/UE tal-Parlament Ewropew u tal-Kunsill fir-rigward tal-forniment tas-servizzi ta’ informazzjoni dwar it-traffiku f’ħin reali fl-UE kollha (ĠU L 122, 25.4.2022, p. 1).

(7) Ir-Regolament (KE) Nru 261/2004 tal-Parlament Ewropew u tal-Kunsill tal-11 ta’ Frar 2004 li jistabbilixxi regoli komuni dwar il-kumpens u l-assistenza għal passiġġieri fil-każ li ma jitħallewx jitilgħu u ta’ kanċellazzjoni jew dewmien twil ta’ titjiriet, u li jħassar ir-Regolament (KEE) Nru 295/91 (ĠU L 46, 17.2.2004, p. 1).

(8) Ir-Regolament (UE) Nru 1177/2010 tal-Parlament Ewropew u tal-Kunsill tal-24 ta’ Novembru 2010 dwar id-drittijiet tal-passiġġieri meta jivvjaġġaw bil-baħar jew minn passaġġi fuq l-ilma interni u li jemenda r-Regolament (KE) Nru 2006/2004 (ĠU L 334, 17.12.2010, p. 1).

(9) Ir-Regolament (UE) Nru 181/2011 tal-Parlament Ewropew u tal-Kunsill tas-16 ta’ Frar 2011 dwar id-drittijiet tal-passiġġieri fit-trasport bix-xarabank u bil-kowċ u li jemenda r-Regolament (KE) Nru 2006/2004 (ĠU L 55, 28.2.2011, p. 1).

(10) Ir-Regolament (UE) 2021/782 tal-Parlament Ewropew u tal-Kunsill tad-29 ta’ April 2021 dwar id-drittijiet u l-obbligi tal-passiġġieri tal-ferroviji (ĠU L 172, 17.5.2021, p. 1).

(11) Proposta għal Regolament tal-Parlament Ewropew u tal-Kunsill dwar regoli armonizzati dwar l-aċċess ġust għad-data u l-użu tagħha (l-Att dwar id-Data) (COM(2022) 68 final).

(12) Id-Direttiva (UE) 2019/1024 tal-Parlament Ewropew u tal-Kunsill tal-20 ta’ Ġunju 2019 dwar id-data miftuħa u l-użu mill-ġdid tal-informazzjoni tas-settur pubbliku (ĠU L 172, 26.6.2019, p. 56).

(13) Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, p. 1).

(14) Id-Direttiva 2002/58/KE tal-Parlament Ewropew u tal-Kunsill tat-12 ta’ Lulju 2002 dwar l-ipproċessar tad-data personali u l-protezzjoni tal-privatezza fis-settur tal-komunikazzjoni elettronika (Direttiva dwar il-privatezza u l-komunikazzjoni elettronika) (ĠU L 201, 31.7.2002, p. 37).

(15) Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).

ANNESS

“ANNESS

KATEGORIJI TAD-DATA

(kif imsemmija fl-Artikoli 2, 3, 4, 5, 6, 8 u 10)

Diviżjoni tal-modi tat-trasport u tal-mezzi tat-trasport u tas-servizzi inklużi, bħal

Trasport skedat bħal:

It-trasport bl-ajru, il-ferroviji, inklużi l-ferroviji b’veloċità għolja, il-ferroviji konvenzjonali, il-ferroviji ħfief, il-funikulari, il-kowċis għal distanza twila, it-trasport marittimu inkluż bil-lanċa, il-passaġġi fuq l-ilma interni, il-metro, it-tramm, ix-xarabank, it-trolley-bus.

Trasport fuq talba bħal:

Shuttle bus, shuttle ferry, servizzi ta’ dial-a-ride, taksi, car-sharing, car-pooling, kiri ta’ karozzi, ride-sharing, bike-sharing, kiri ta’ roti, e-scooter sharing.

Trasport personali bħal:

Karozza, mutur, rota, scooter, mixi.

1. TIPI TA’ DATA STATIKA, STORIKA U OSSERVATA DWAR L-IVVJAĠĠAR U T-TRAFFIKU

1.1. Livell ta’ servizz 1

(a)

tiftix tal-post (l-oriġini/id-destinazzjoni):

(i)	indirizzi (in-numru tal-bini, l-isem tat-triq, il-kodiċi postali);

(ii)	postijiet topografiċi (il-belt, ir-raħal, is-subborg, l-unità amministrattiva);

(iii)

punti ta’ interess (relatati mal-informazzjoni dwar it-trasport) lejn liema jista’ jkun li jixtiequ jivvjaġġaw in-nies;

(b)	pjanijiet tal-vjaġġi: kalendarju operazzjonali, immappjar tat-tipi ta’ ġranet mad-dati tal-kalendarju;

(c)

tiftix tal-post (nodi ta’ aċċess) – għat-trasport skedat u għat-trasport fuq talba fejn rilevanti:

(i)	nodi ta’ aċċess identifikati;

(ii)	ġeometrija/struttura tal-layout tal-mappa tan-nodi ta’ aċċess;

(d)

komputazzjoni tal-pjan tal-vjaġġ – għat-trasport skedat u għat-trasport fuq talba fejn rilevanti:

(i)	konnessjoni fejn jistgħu jsiru interkambji;

(ii)	ħinijiet ta’ trasferiment prestabbiliti fl-interkambji;

(iii)

topoloġija tan-network u rotot/linji (topoloġija);

(iv)	operaturi tat-trasport;

(v)	skedi tal-ħinijiet;

(vi)	interkambji ppjanati bejn is-servizzi skedati ggarantiti;

(vii)

ħinijiet tal-operat;

(viii)

faċilitajiet tan-nodi ta’ aċċess (inkluż l-informazzjoni dwar il-pjattaforma, il-help desks/il-punti ta’ informazzjoni, il-kabini tal-biljetti, il-liftijiet/it-taraġ, il-postijiet ta’ dħul u ħruġ);

(ix)	vetturi, inkluża l-aċċessibbiltà tagħhom (bħal art baxxa, aċċessibbiltà għas-siġġijiet tar-roti, aċċessibbiltà għall-pramms) u l-aċċessibbiltà tas-servizzi abbord (bħat-tojlits);

(x)	aċċessibbiltà tan-nodi ta’ aċċess, u korsiji fi ħdan interkambju (bħall-eżistenza ta’ liftijiet, skali mobbli);

(xi)	l-eżistenza ta’ servizzi ta’ assistenza (bħall-eżistenza ta’ assistenza fuq il-post);

(e)

komputazzjoni tal-pjan tal-vjaġġ:

(i)	network tat-toroq (inklużi korsiji segregati għal karozzi tal-linja/taksis);

(ii)	network għar-roti (mogħdijiet għaċ-ċiklisti, korsiji għaċ-ċiklisti, korsiji għall-karozzi tal-linja u għaċ-ċiklisti, fit-toroq kondiviżi mal-vetturi, fil-passaġġi kondiviżi ma’ persuni bil-mixi);

(iii)

network għall-persuni bil-mixi u faċilitajiet ta’ aċċessibbiltà.

1.2. Livell ta’ servizz 2

(a)

tiftix tal-post – għat-trasport fuq talba u għat-trasport personali:

(i)	post fejn jinsabu l-parkeġġi (fit-triq u mhux fit-triq), inklużi parkeġġi aċċessibbli għall-persuni b’diżabbiltà u għall-persuni b’mobbiltà mnaqqsa;

(ii)	waqfiet tal-Park & Ride;

(iii)

waqfiet tal-Park & Drive;

(iv)	stazzjonijiet tal-bike-sharing;

(v)	stazzjonijiet tal-car-sharing;

(vi)	faċilitajiet siguri għall-parkeġġ tar-roti (bħal garaxxijiet imsakkrin għar-roti);

(vii)

żoni għall-parkeġġ tal-iscooters;

(b)

servizz ta’ informazzjoni:

(i)	fejn u kif jinxtraw il-biljetti għat-trasport skedat, inklużi l-kanali tal-bejgħ bl-imnut, il-metodi ta’ twettiq, il-metodi ta’ ħlas;

(ii)	fejn u kif tħallas għall-parkeġġ, inklużi l-kanali tal-bejgħ bl-imnut, il-metodi ta’ twettiq, il-metodi ta’ ħlas;

(c)

informazzjoni awżiljarja – għat-trasport skedat u għat-trasport fuq talba fejn rilevanti:

(i)

tariffi standard komuni bażiċi:

—	data tan-network tat-tariffi (iż-żoni tat-tariffi/il-waqfiet u l-istejġis tat-tariffi);

—	strutturi tat-tariffi standard (minn punt sa punt inklużi t-tariffi ta’ kuljum u fil-ġimgħa, it-tariffi skont iż-żona, it-tariffi fissi);

(ii)	il-faċilitajiet tal-vetturi, inklużi l-klassijiet tat-trasport, il-Wi-Fi abbord, il-kundizzjonijiet tal-kapaċità u tal-aċċess għar-roti.

1.3. Livell ta’ servizz 3

(a)

mistoqsijiet dettaljati rigward tariffi komuni standard u speċjali – għat-trasport skedat u għat-trasport fuq talba fejn rilevanti:

(i)	klassijiet tal-passiġġieri (klassijiet ta’ passiġġieri bħal adulti, tfal, anzjani, studenti, militari/veterani, passiġġieri b’diżabbiltà u passiġġieri b’mobbiltà mnaqqsa, u kundizzjonijiet ta’ kwalifika, u klassijiet tal-ivvjaġġar);

(ii)

prodotti tat-tariffi komuni (id-drittijiet ta’ aċċess bħaż-żona/minn punt sa punt inklużi l-biljetti ta’ kuljum u fil-ġimgħa/mingħajr ritorn/bir-ritorn, l-eliġibbiltà ta’ aċċess, il-kundizzjonijiet ta’ użu bażiċi bħall-perjodu ta’ validità/l-operatur/il-ħin tal-vjaġġ/l-interkambju, il-prezzijiet tat-tariffi minn punt sa punt standard għal dawk minn punt sa punt differenti inklużi t-tariffi ta’ kuljum u fil-ġimgħa/il-prezzijiet tat-tariffi skont iż-żona/il-prezzijiet tat-tariffi fissi);

(iii)

prodotti tat-tariffi speċjali (offerti b’kundizzjonijiet speċjali addizzjonali bħal tariffi promozzjonali, tariffi għal gruppi, biljetti staġunali, prodotti aggregati li jgħaqqdu flimkien prodotti differenti u prodotti supplimentari bħall-parkeġġ u l-ivvjaġġar, perjodu ta’ waqfien minimu);

(iv)	kundizzjonijiet kummerċjali bażiċi bħar-rimborż, is-sostituzzjoni, l-iskambju jew it-trasferiment;

(v)	kundizzjonijiet bażiċi tal-ibbukkjar bħal perjodi ta’ xiri, perjodi ta’ validità, restrizzjonijiet tar-rotot, tariffi għal sekwenzi żonali, perjodu ta’ waqfien minimu;

(b)	servizz ta’ informazzjoni – għat-trasport fuq talba: kif jiġu bbukkjati servizzi tat-trasport li jirrispondu għad-domanda, inklużi l-kanali tal-bejgħ bl-imnut, il-metodi ta’ twettiq, il-metodi ta’ ħlas;

(c)

pjanijiet tal-vjaġġ:

(i)	karatteristiċi dettaljati tan-network għar-roti (il-kwalità tas-superfiċje, is-sewqan tar-roti maġenb xulxin, il-kondiviżjoni tas-superfiċje, il-korsija integrata/separata mit-triq, ir-rotta panoramika, għall-mixi biss, ir-restrizzjonijiet ta’ dawrien jew aċċess, eż. kontra l-fluss tat-traffiku);

(ii)	parametri meħtieġa biex jiġi kkalkulat fattur ambjentali bħall-emissjonijiet ta’ gassijiet serra għal kull tip ta’ vettura jew għal kull mil tal-passiġġier jew għad-distanza li wieħed ikun mexa;

(iii)

parametri meħtieġa għall-kalkolu tal-konsum tal-fjuwil ta’ fjuwils konvenzjonali u alternattivi;

(d)	komputazzjoni tal-pjan tal-vjaġġ: ħinijiet stmati tal-ivvjaġġar skont it-tip ta’ ġurnata u l-faxxa tal-ħin u skont il-mod tat-trasport/il-kombinament ta’ modi tat-trasport.

1.4. Livell ta’ servizz 4

(a)	data storika dwar l-ivvjaġġar u t-traffiku dwar id-dewmien – għat-trasport skedat u għat-trasport fuq talba fejn rilevanti;

(b)

data osservata dwar id-dewmien u l-ħin tal-passaġġ – għat-trasport skedat:

(i)	tul ta’, u meta possibbli r-raġuni għal, dewmien ta’ mill-inqas 60 minuta għas-servizzi ferrovjarji tal-passiġġieri (f’konformità mal-Artikolu 19 tar-Regolament (UE) 2021/782);

(ii)	tul ta’, u meta possibbli r-raġuni għal, dewmien fit-tluq ta’ aktar minn 90 minuta għas-servizzi tal-passiġġieri bil-baħar u tal-passaġġi fuq l-ilma interni (f’konformità mal-Artikolu 18 tar-Regolament (UE) Nru 1177/2010);

(iii)

tul ta’, u meta possibbli r-raġuni għal, dewmien fit-tluq ta’ aktar minn 120 minuta minn terminal għal servizzi regolari tal-passiġġieri bix-xarabank u bil-kowċ b’distanza skedata ta’ 250 km jew aktar (f’konformità mal-Artikolu 19 tar-Regolament (UE) Nru 181/2011);

(iv)	tul ta’, u meta possibbli r-raġuni għal, dewmien fit-tluq tat-titjiriet ta’ mill-inqas 120 minuta; u dewmien fil-wasla tat-titjiriet ta’ mill-inqas 180 minuta (f’konformità mal-Artikoli 5 u 6 tar-Regolament (KE) Nru 261/2004);

(c)

data osservata dwar il-kanċellazzjonijiet – għat-trasport skedat:

(i)	kanċellazzjonijiet tas-servizzi ferrovjarji tal-passiġġieri, u meta possibbli r-raġunijiet għalihom;

(ii)	kanċellazzjonijiet tas-servizzi tal-passiġġieri bil-baħar u tal-passaġġi fuq l-ilma interni, u meta possibbli r-raġunijiet għalihom;

(iii)

kanċellazzjonijiet tas-servizzi regolari bix-xarabank u bil-kowċ b’distanza skedata ta’ 250 km jew aktar, u meta possibbli r-raġunijiet għalihom;

(iv)	kanċellazzjonijiet tat-titjiriet, u meta possibbli r-raġunijiet għalihom;

(d)	informazzjoni dwar it-tariffi tal-parkeġġ.

2. TIPI TA’ DATA DINAMIKA DWAR L-IVVJAĠĠAR U T-TRAFFIKU

2.1. Livell ta’ servizz 1

Ħinijiet tal-passaġġ, pjanijiet tal-vjaġġ u informazzjoni awżiljarja:

(i)	tfixkil, bħal għeluq u/jew devjazzjonijiet tan-network, u meta possibbli r-raġunijiet għalihom;

(ii)	informazzjoni dwar l-istatus f’ħin reali, bħall-ħinijiet stmati tat-tluq u tal-wasla tas-servizzi, dewmien, kanċellazzjonijiet, monitoraġġ tal-konnessjonijiet garantiti;

(iii)

status tal-karatteristiċi tan-nodi ta’ aċċess (inkluża informazzjoni dinamika dwar il-pjattaforma, liftijiet/skali mobbli operazzjonali, postijiet ta’ dħul u ħruġ magħluqa) – għat-trasport skedat.

2.2. Livell ta’ servizz 2

(a)	servizz ta’ informazzjoni dwar it-tariffi tal-parkeġġ – għat-trasport fuq talba u t-trasport personali;

(b)

kontroll tad-disponibbiltà u l-post – għat-trasport fuq talba u t-trasport personali fejn rilevanti:

(i)	id-disponibbiltà tal-car-sharing u l-post fejn jinsab, id-disponibbiltà tal-bike-sharing u l-post fejn jinsab, id-disponibbiltà tal-iscooter-sharing u l-post fejn jinsab, u d-disponibbiltà ta’ tipi oħra ta’ vehicle-sharing u l-post fejn jinsabu;

(ii)	spazji disponibbli għall-parkeġġ tal-karozzi (fit-triq u mhux fit-triq).

2.3. Livell ta’ servizz 3

Informazzjoni dwar l-okkupanza tal-vettura – għat-trasport skedat u għat-trasport fuq talba fejn rilevanti

”.