REGOLAMENT TA’ IMPLIMENTAZZJONI TAL-KUMMISSJONI (UE) 2024/355

tat-23 ta’ Jannar 2024

li jemenda r-Regolament ta’ Implimentazzjoni (UE) 2021/2266 fir-rigward tar-referenza għaċ-ċertifikat għal produtturi żgħar indipendenti ta’ xorb alkoħoliku u l-awtoċertifikazzjoni minn dawk il-produtturi fid-dokumenti amministrattivi

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 92/83/KEE tad-19 ta’ Ottubru 1992 dwar l-armonizzazzjoni tal-istrutturi tat-taxxi tas-sisa fuq l-alkoħol u x-xorb alkoħoliku (1), u b’mod partikolari l-Artikolu 23a(4) tagħha,

Billi:

(1)

Skont l-Artikolu 23a(1) tad-Direttiva 92/83/KEE, l-Istati Membri, fuq talba, huma meħtieġa jipprovdu ċertifikat annwali lill-produtturi żgħar indipendenti stabbiliti fit-territorju rispettiv tagħhom, li jikkonferma l-produzzjoni totali annwali tal-produtturi kif ukoll il-konformità tagħhom mal-kriterji stabbiliti f’dik id-Direttiva. Skont l-Artikolu 23a(2) tad-Direttiva 92/83/KEE, huwa possibbli għall-Istati Membri li jippermettu produtturi żgħar indipendenti jiċċertifikaw huma stess il-produzzjoni annwali totali tagħhom u l-konformità mal-kriterji stabbiliti f’dik id-Direttiva. Ir-Regolament ta’ Implimentazzjoni tal-Kummissjoni (UE) 2021/2266 (2) jispeċifika l-informazzjoni li għandha tiġi inkluża fid-dokumenti amministrattivi li għandhom jirreferu għal dak iċ-ċertifikat jew dik l-awtoċertifikazzjoni għall-moviment tal-oġġetti skont il-Kapitolu IV jew il-Kapitolu V tad-Direttiva tal-Kunsill (UE) 2020/262 (3).

(2)

Ir-Regolament Delegat tal-Kummissjoni (UE) 2022/1636 (4) jistabbilixxi l-istruttura u l-kontenut tad-dokumenti skambjati fil-kuntest tal-moviment ta’ oġġetti soġġetti għas-sisa. Dak ir-Regolament għandu jiġi emendat bir-Regolament Delegat tal-Kummissjoni (UE) 2024/296 (5) biex jinkludi element tad-data ġdid li jirreferenzja ċ-ċertifikazzjoni u l-awtoċertifikazzjoni fid-dokumenti amministrattivi għall-moviment tax-xorb alkoħoliku prodott minn produtturi żgħar indipendenti ċċertifikati u awtoċertifikati. Għalhekk, ir-referenzi fir-Regolament ta’ Implimentazzjoni (UE) 2021/2266 għall-element tad-data eżistenti jenħtieġ li jiġu sostitwiti b’referenzi għall-element tad-data l-ġdid, li huwa speċifiku għad-dikjarazzjoni tal-produtturi żgħar indipendenti.

(3)

L-istruttura u l-kontenut tad-dokumenti amministrattivi elettroniċi skambjati permezz tas-sistema kompjuterizzata huma stabbiliti fir-Regolament tal-Kummissjoni (KE) Nru 684/2009 (6), li ġie sostitwit bir-Regolament Delegat (UE) 2022/1636 b’effett mit-13 ta’ Frar 2023. Għalhekk, għal raġunijiet ta’ ċarezza, jenħtieġ li r-referenzi għar-Regolament (KE) Nru 684/2009 fin-noti ta’ spjegazzjoni tal-Anness tar-Regolament ta’ Implimentazzjoni (UE) 2021/2266 jiġu sostitwiti b’referenzi għar-Regolament Delegat (UE) 2022/1636.

(4)	L-Artikolu 6 tar-Regolament ta’ Implimentazzjoni (UE) 2021/2266 tħassar bir-Regolament ta’ Implimentazzjoni tal-Kummissjoni (UE) 2023/157 (7). Għalhekk, għal raġunijiet ta’ konsistenza u ċarezza, jenħtieġ li r-referenza għall-Artikolu 6 fir-Regolament ta’ Implimentazzjoni (UE) 2021/2266 titħassar.

(5)	Għaldaqstant, jenħtieġ li r-Regolament ta’ Implimentazzjoni (UE) 2021/2266 jiġi emendat skont dan.

(6)	Peress li l-element tad-data l-ġdid stabbilit fir-Regolament Delegat (UE) 2022/1636 għandu japplika mit-13 ta’ Frar 2024, jenħtieġ li l-applikazzjoni ta’ dan ir-Regolament tiġi differita għal dik id-data.

(7)	Il-miżuri previsti f’dan ir-Regolament huma skont l-opinjoni tal-Kumitat dwar id-Dazju tas-Sisa,

ADOTTAT DAN IR-REGOLAMENT:

Artikolu 1

Ir-Regolament ta’ Implimentazzjoni (UE) 2021/2266 huwa emendat kif ġej:

(1)	fl-Artikolu 2, il-punt (a), il-parti introduttorja hija sostitwita b’dan li ġej: “fil-kaxxa 17v: “ Il-prodott deskritt ġie prodott minn ” segwit minn, kif applikabbli, wieħed mit-termini li ġejjin:”;

(2)

L-Artikolu 4 huwa sostitwit minn dan li ġej:

“Artikolu 4

Awtoċertifikazzjoni minn produtturi żgħar indipendenti

Meta produtturi żgħar indipendenti jaqgħu taħt id-definizzjonijiet stabbiliti fl-Artikolu 4(2), l-Artikolu 9a(2), l-Artikolu 13a(4), l-Artikolu 18a(3) jew l-Artikolu 22(2) tad-Direttiva 92/83/KEE, u l-Istati Membri jippermettu lill-produtturi żgħar indipendenti stabbiliti fit-territorju rispettiv tagħhom jiċċertifikaw huma stess, l-istatus tal-produtturi kif ukoll il-produzzjoni annwali tagħhom għandhom jiġu ddikjarati fid-dokument amministrattiv f’konfmormità mal-Artikolu 5 ta’ dan ir-Regolament.”;

(3)

L-Artikolu 5 huwa emendat kif ġej:

(a)

fil-paragrafu 1, il-parti introduttorja hija sostitwita b’dan li ġej:

“Fid-dokumenti amministrattivi msemmija fl-Artikoli 20, 26, 36 u 38 tad-Direttiva (UE) 2020/262, l-istatus tal-produtturi żgħar indipendenti għandu jiġi ddikjarat fil-kaxxa 17v, kif stabbilit fit-Tabella 1 tal-Anness I tar-Regolament Delegat (UE) 2022/1636, fit-termini li ġejjin: “ Huwa b’dan iċċertifikat li l-prodott deskritt ġie prodott minn ” segwit minn, kif applikabbli, wieħed mit-termini li ġejjin:”;

(b)

fil-paragrafu 2, l-ewwel subparagrafu huwa sostitwit b’dan li ġej:

“Meta l-konsenjatur tax-xorb alkoħoliku ma jkunx il-produttur żgħir indipendenti awtoċertifikat, in-numru fis-sistema għall-iskambju tad-data tas-sisa msemmija fl-Artikolu 19(1) tar-Regolament tal-Kunsill (UE) Nru 389/2012 (*1) (“in-numru SEED”) jew in-numru tat-taxxa fuq il-valur miżjud (“in-numru tal-VAT”) tal-produttur għandu jiġi ddikjarat ukoll fil-kaxxa 17v.

(*1) Ir-Regolament tal-Kunsill (UE) Nru 389/2012 tat-2 ta’ Mejju 2012 dwar kooperazzjoni amministrattiva fil-qasam tad-dazji tas-sisa u li jħassar ir-Regolament (KE) Nru 2073/2004 (ĠU L 121, 8.5.2012, p. 1).”;"

(4)

fl-Anness, in-noti ta’ spjegazzjoni huma emendati kif ġej:

(a)

il-punt 5 huwa sostitwit b’dan li ġej:

“5.

In-numru tas-serje għandu jkun magħmul minn 14-il ċifra. Għandu jibda bin-numru b’żewġ ċifri li jirreferi għas-sena li fiha jinħareġ iċ-ċertifikat; segwit minn identifikatur tal-Istat Membru b’kodiċi b’żewġ ittri għall-pajjiż emittenti f’konformità mal-punt 3 tal-Anness II tar-Regolament Delegat (UE) 2022/1636; segwit minn identifikatur uniku ta’ numru nazzjonali alfanumeriku b’10 ċifri, assenjat mill-Istat Membru fejn huwa stabbilit il-produttur żgħir indipendenti. Eżempju ta’ numru tas-serje bħal dan huwa: 22ES01ABCD234E.”;

(b)

il-punt 8 huwa sostitwit b’dan li ġej:

“8.	Fil-kaxxa 3 taċ-ċertifikat, għandha tiġi indikata d-data rilevanti meħtieġa għall-identifikazzjoni tal-awtorità kompetenti, inkluż in-Numru ta’ Referenza tal-Uffiċċju tad-Dwana, fejn applikabbli, kif stabbilit fil-punt 4 tal-Anness II tar-Regolament Delegat (UE) 2022/1636.”.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mit-13 ta’ Frar 2024.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-23 ta’ Jannar 2024.

Għall-Kummissjoni

Il-President

Ursula VON DER LEYEN

(1) ĠU L 316, 31.10.1992, p. 21.

(2) Ir-Regolament ta’ Implimentazzjoni tal-Kummissjoni (UE) 2021/2266 tas-17 ta’ Diċembru 2021 li jistabbilixxi regoli għall-applikazzjoni tad-Direttiva tal-Kunsill 92/83/KEE fir-rigward taċ-ċertifikazzjoni u l-awtoċertifikazzjoni ta’ produtturi żgħar u indipendenti ta’ xorb alkoħoliku għall-iskop tad-dazju tas-sisa (ĠU L 455, 20.12.2021, p. 26).

(3) Id-Direttiva tal-Kunsill (UE) 2020/262 tad-19 ta’ Diċembru 2019 li tistabbilixxi l-arranġamenti ġenerali għad-dazju tas-sisa (ĠU L 58, 27.2.2020, p. 4.).

(4) Ir-Regolament Delegat tal-Kummissjoni (UE) 2022/1636 tal-5 ta’ Lulju 2022 li jissupplimenta d-Direttiva tal-Kunsill (UE) 2020/262 billi jistabbilixxi l-istruttura u l-kontenut tad-dokumenti skambjati fil-kuntest tal-moviment tal-oġġetti soġġetti għas-sisa, u li jistabbilixxi limitu għat-telf minħabba n-natura tal-oġġetti (ĠU L 247, 23.9.2022, p. 2).

(5) Ir-Regolament Delegat tal-Kummissjoni (UE) 2024/296 tad-9 ta’ Novembru 2023 li jemenda r-Regolament Delegat (UE) 2022/1636 fir-rigward tal-messaġġi dwar l-oġġetti soġġetti għas-sisa li qed jiġu esportati taħt sospensjoni tad-dazju tas-sisa (ĠU L, 2024/296, 22.1.2024, ELI: http://data.europa.eu/eli/reg_del/2024/296/oj)

(6) Ir-Regolament tal-Kummissjoni (KE) Nru 684/2009 tal-24 ta’ Lulju 2009 li jimplimenta d-Direttiva tal-Kunsill 2008/118/KE fir-rigward tal-proċeduri kompjuterizzati għall-moviment ta’ prodotti tas-sisa taħt sospensjoni tad-dazju tas-sisa (ĠU L 197, 29.7.2009, p. 24).

(7) Ir-Regolament ta’ Implimentazzjoni tal-Kummissjoni (UE) 2023/157 tat-23 ta’ Jannar 2023 li jemenda r-Regolament ta’ Implimentazzjoni (UE) 2021/2266 fir-rigward tar-referenza għaċ-ċertifikat u għall-awtoċertifikazzjoni tal-produtturi żgħar u indipendenti tax-xorb alkoħoliku fid-dokument amministrattiv simplifikat elettroniku (ĠU L 22, 24.1.2023, p. 12).