(1)

Il-ġidri tan-nagħaġ u l-ġidri tal-mogħoż huma marda virali infettiva li taffettwa lill-annimali kaprini u ovini u li jista’ jkollha impatt serju fuq il-popolazzjoni tal-annimali kkonċernati u fuq il-profittabbiltà tal-biedja, u dan jikkawża tfixkil fil-movimenti tal-kunsinni ta’ dawk l-annimali u tal-prodotti tagħhom fi ħdan l-Unjoni u fl-esportazzjonijiet lejn pajjiżi terzi. Fil-każ ta’ tifqigħa ta’ dik il-marda fl-annimali kaprini u ovini, hemm riskju serju li tista’ tinfirex fi stabbilimenti oħra li jżommu dawk l-annimali.

(2)

Fir-Regolament ta’ Implimentazzjoni tal-Kummissjoni (UE) 2018/1882 (2), il-ġidri tan-nagħaġ u l-ġidri tal-mogħoż huma ddefiniti bħala marda tal-kategorija A. Barra minn hekk, ir-Regolament Delegat tal-Kummissjoni (UE) 2020/687 (3) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c) tar-Regolament (UE) 2016/429, u ddefinit bħala mard tal-kategoriji A, B u C fir-Regolament ta’ Implimentazzjoni (UE) 2018/1882. B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta fil-każ ta’ tifqigħa ta’ marda tal-kategorija A, inkluż il-ġidri tan-nagħaġ u l-ġidri tal-mogħoż, u ċerti miżuri għall-kontroll tal-mard li għandhom jiġu applikati fiha. Barra minn hekk, l-Artikolu 21(1) ta’ dak ir-Regolament Delegat jipprevedi li ż-żona ristretta għandha tinkludi żona ta’ protezzjoni, żona ta’ sorveljanza, u jekk ikun meħtieġ, żoni ristretti ulterjuri madwar iż-żoni ta’ protezzjoni u ta’ sorveljanza jew maġenbhom.

(3)

Id-Deċiżjoni ta’ Implimentazzjoni tal-Kummissjoni (UE) 2023/2725 (4) tistabbilixxi ċerti miżuri ta’ emerġenza wara tifqigħat ikkonfermati tal-ġidri tan-nagħaġ u tal-ġidri tal-mogħoż fil-Bulgarija u fil-Greċja.

(4)

B’mod aktar partikolari, id-Deċiżjoni ta’ Implimentazzjoni (UE) 2023/2725 tipprevedi li ż-żoni ristretti li għandhom jiġu stabbiliti mill-Bulgarija u mill-Greċja, wara li jkollhom tifqigħat tal-ġidri tan-nagħaġ u tal-ġidri tal-mogħoż, f’konformità mar-Regolament Delegat (UE) 2020/687, għandhom ikunu jinkludu mill-inqas iż-żoni elenkati fl-Anness ta’ dik id-Deċiżjoni ta’ Implimentazzjoni. Barra minn hekk, id-Deċiżjoni ta’ Implimentazzjoni (UE) 2023/2725 tistabbilixxi ċerti miżuri li għandhom jiġu applikati fiż-żoni ristretti ulterjuri, flimkien mal-miżuri għall-kontroll tal-mard stabbiliti fir-Regolament Delegat (UE) 2020/687.

(5)

Fil-Bulgarija ma ġiet irrapportata l-ebda tifqigħa ġdida tal-ġidri tan-nagħaġ u tal-ġidri tal-mogħoż sa mill-konferma, fis-16 ta’ Settembru 2023, ta’ tifqigħa unika fil-provinċja ta’ Burgas. B’riżultat ta’ dan, iż-żoni ristretti kollha f’dak l-Istat Membru ilhom li tneħħew mit-30 ta’ Novembru 2023.

(6)

Wara l-adozzjoni tad-Deċiżjoni ta’ Implimentazzjoni (UE) 2023/2725, il-Greċja nnotifikat lill-Kummissjoni b’żewġ tifqigħat addizzjonali tal-ġidri tan-nagħaġ u tal-ġidri tal-mogħoż fi stabbilimenti fejn kienu jinżammu l-annimali ovini, li jinsabu fl-unità reġjonali ta’ Phthiotis, fir-reġjun tal-Greċja Ċentrali. B’riżultat ta’ dan, iż-żoni elenkati bħala żoni ta’ protezzjoni u ta’ sorveljanza, kif ukoll iż-żoni elenkati bħala żoni ristretti ulterjuri għall-Greċja, fl-Anness tad-Deċiżjoni ta’ Implimentazzjoni (UE) 2023/2725, ġew emendati bid-Deċiżjoni ta’ Implimentazzjoni tal-Kummissjoni (UE) 2023/2892 (5).

(7)

Mill-adozzjoni tad-Deċiżjoni ta’ Implimentazzjoni (UE) 2023/2892, il-Greċja nnotifikat lill-Kummissjoni b’żewġ tifqigħat addizzjonali tal-ġidri tan-nagħaġ u tal-ġidri tal-mogħoż fi stabbilimenti fejn kienu jinżammu n-nagħaġ, li jinsabu fl-unità reġjonali ta’ Phthiotis, fir-reġjun tal-Greċja Ċentrali, viċin il-fruntiera li tissepara ż-żoni ta’ protezzjoni u ta’ sorveljanza li diġà huma stabbiliti f’dak ir-reġjun.

(8)

L-awtorità kompetenti tal-Greċja infurmat lill-Kummissjoni dwar is-sitwazzjoni attwali tal-ġidri tan-nagħaġ u tal-ġidri tal-mogħoż fit-territorju tagħha, wara t-tifqigħat reċenti ta’ dik il-marda fl-unità reġjonali ta’ Phthiotis, u ħadet il-miżuri meħtieġa għall-kontroll tal-mard f’konformità mar-Regolament Delegat (UE) 2020/687.

(9)

Sabiex jiġi evitat kwalunkwe xkiel bla bżonn fil-kummerċ fi ħdan l-Unjoni u biex jiġu evitati ostakli mhux ġustifikati għall-kummerċ minn pajjiżi terzi, jeħtieġ li fil-livell tal-Unjoni, b’kollaborazzjoni ma’ dan l-Istat Membru, jiġu identifikati malajr iż-żoni ristretti għall-ġidri tan-nagħaġ u għall-ġidri tal-mogħoż, li jinkludu ż-żoni ta’ protezzjoni u ta’ sorveljanza, kif ukoll iż-żoni ristretti ulterjuri fil-Greċja. Barra minn hekk, fid-dawl tas-sitwazzjoni epidemjoloġika attwali, jeħtieġ jiġu estiżi d-daqs u/jew it-tul taż-żmien ta’ dawn iż-żoni, inkluż iż-żona ristretta ulterjuri stabbilita qabel fil-gżira ta’ Lesbos.

(10)

Għalhekk, jenħtieġ li ż-żoni identifikati bħala żoni ta’ protezzjoni u ta’ sorveljanza u żoni ristretti ulterjuri fil-Greċja, fl-Anness tad-Deċiżjoni ta’ Implimentazzjoni (UE) 2023/2725, jiġu emendati kemm fl-ispazju kif ukoll fil-ħin, filwaqt li titqies is-sitwazzjoni epidemjoloġika attwali fir-rigward tal-ġidri tan-nagħaġ u tal-ġidri tal-mogħoż fir-reġjun tal-Greċja Ċentrali.

(11)

Filwaqt li titqies is-sitwazzjoni epidemjoloġika attwali fl-Unjoni fir-rigward tal-ġidri tan-nagħaġ u tal-ġidri tal-mogħoż, jenħtieġ li l-perjodu tal-applikazzjoni tad-Deċiżjoni ta’ Implimentazzjoni (UE) 2023/2725 jiġi estiż, u jenħtieġ li japplika sat-30 ta’ April 2024. Jenħtieġ li din id-Deċiżjoni tkun mingħajr preġudizzju għad-dati tal-bidu tal-applikazzjoni msemmija fid-Deċiżjoni ta’ Implimentazzjoni (UE) 2023/2892.

(12)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

1.

L-Artikolu 5 huwa sostitwit b’dan li ġej:

2.

l-Anness huwa emendat f’konformità mal-Anness ta’ din id-Deċiżjoni.