(1)

L-Istati Membri huma meħtieġa li jirrapportaw l-irregolaritajiet li jikkonċernaw il-Fond Agrikolu Ewropew ta’ Garanzija u l-Fond Agrikolu Ewropew għall-Iżvilupp Rurali skont l-Artikolu 50(3) tar-Regolament (UE) 2021/2116, u f’konformità mar-Regolament Delegat tal-Kummissjoni (UE) 2024/205 (2).

(2)

L-interessi finanzjarji tal-Unjoni jenħtieġ li jiġu protetti bl-istess mod irrispettivament mill-fondi użati biex jintlaħqu l-objettivi li għalihom ikunu ġew stabbiliti l-fondi. Għal dak l-għan, l-Artikolu 52(2) tar-Regolament (UE) 2021/2116 jagħti s-setgħa lill-Kummissjoni biex tadotta regoli ta’ implimentazzjoni dwar il-proċeduri relatati mal-obbligi ta’ kooperazzjoni li għandhom jinġabru mal-Istati Membri għall-implimentazzjoni tal-obbligu tal-Istati Membri li jirrappurtaw irregolaritajiet relatati mal-finanzjament tal-politika agrikola komuni. Jenħtieġ li tali regoli jkunu ekwivalenti għar-regoli dettaljati dwar ir-rapportar ta’ irregolaritajiet stabbiliti fl-Anness XII tar-Regolament (UE) 2021/1060 tal-Parlament Ewropew u tal-Kunsill (3), u f’konformità mar-regoli stabbiliti fir-Regolament ta’ Implimentazzjoni tal-Kummissjoni (UE) 2024/203 (4).

(3)

Sabiex tiġu żgurata analiżi effiċjenti u ġestjoni ġenerali tal-każijiet ta’ irregolaritajiet skont it-tifsira tal-Artikolu 1(2) tar-Regolament tal-Kunsill (KE, Euratom) Nru 2988/95 (5) u każijiet oħra ta’ nuqqas ta’ konformità mal-kundizzjonijiet stabbiliti mill-Istati Membri fil-pjanijiet strateġiċi tal-politika agrikola komuni f’dan il-kuntest, jenħtieġ li l-Istati Membri jippreżentaw lill-Kummissjoni l-informazzjoni rilevanti kollha dwar l-irregolaritajiet li jridu jiġu rrapportati skont l-Artikolu 50(3) tar-Regolament (UE) 2021/2116 u f’konformità mar-Regolament Delegat tal-Kummissjoni (UE) 2024/205, fuq bażi regolari u fil-ħin. Sabiex jiġu protetti l-interessi finanzjarji tal-Unjoni huwa meħtieġ li jiġu stabbiliti kundizzjonijiet uniformi għas-sottomissjoni ta’ dik l-informazzjoni, b’mod partikolari dwar il-frekwenza u l-għamla tagħha.

(4)

Sabiex jinkisbu l-benefiċċji massimi mill-użu ta’ mezzi elettroniċi għall-iskambju ta’ informazzjoni filwaqt li tiġi ppreservata s-sigurtà tal-iskambji, jenħtieġ li l-Istati Membri jużaw is-Sistema ta’ Ġestjoni tal-Irregolaritajiet Irregularity Management System (IMS) dedikata għan-notifika tal-irregolaritajiet.

(5)

L-Istati Membri u l-Kummissjoni jenħtieġ li jiżguraw li t-trasferiment ta’ data permezz tal-IMS jitwettaq b’mod sigur li jippermetti d-disponibbiltà, l-integrità, l-awtentiċità, u l-kunfidenzjalità ta’ informazzjoni.

(6)

Sabiex tgħin biex jiġi evitat li irregolarità jkollha riperkussjonijiet barra t-territorju tal-Istat Membru relatur, l-Istati Membri kkonċernati jenħtieġ li jirrapportaw lill-Kummissjoni kwalunkwe irregolarità ta’ dak it-tip mingħajr dewmien.

(7)

L-użu tal-euro bħala l-unika munita għall-irrapportar ta’ irregolaritajiet huwa meħtieġ biex tiġi żgurata l-komparabbiltà tal-informazzjoni rrappurtata. Fir-rigward tal-Istati Membri li ma adottawx l-euro bħala l-munita tagħhom, huwa meħtieġ li tiġi ddeterminata r-rata tal-kambju li għandha tintuża biex l-ammonti kkonċernati jiġu kkonvertiti f’euro u r-rata tal-kambju għall-konverżjoni tan-nefqa li ma tkunx ġiet irreġistrata fil-kontijiet tal-aġenzija tal-pagamenti.

(8)

Jenħtieġ li jitħassar ir-Regolament ta’ Implimentazzjoni tal-Kummissjoni (UE) 2015/1975 (6), li stabbilixxa l-frekwenza u l-format tar-rapportar tal-irregolaritajiet fil-perjodu ta’ programmazzjoni 2014–2020. Madanakollu, jenħtieġ li jkompli japplika għar-rapportar ta’ irregolaritajiet fir-rigward tal-assistenza mogħtija skont ir-Regolament (UE) Nru 1306/2013 tal-Parlament Ewropew u tal-Kunsill (7).

(9)

Peress li diġà saru l-pagamenti għall-fondi kkonċernati u jistgħu jseħħu l-irregolaritajiet, dan ir-Regolament jenħtieġ li japplika immedjatament. Għalhekk jenħtieġ li jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(10)

Il-Kontrollur Ewropew għall-Protezzjoni tad-Data ġie kkonsultat dwar dan ir-Regolament f’konformità mal-Artikolu 42(1) tar-Regolament (UE) 2018/1725.

(11)

Il-miżuri stipulati f’dan ir-Regolament huma f’konformità mal-opinjoni tal-Kumitat dwar il-Fondi Agrikoli,