REGOLAMENT TA’ IMPLIMENTAZZJONI TAL-KUMMISSJONI (UE) 2023/2882

tat-18 ta’ Diċembru 2023

li jissospendi l-miżuri ta’ politika kummerċjali rigward ċerti prodotti li joriġinaw mill-Istati Uniti tal-Amerka imposti bir-Regolamenti ta’ Implimentazzjoni (UE) 2018/886 u (UE) 2020/502

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 654/2014 tal-Parlament Ewropew u tal-Kunsill tal-15 ta’ Mejju 2014 dwar l-eżerċizzju tad-drittijiet tal-Unjoni għall-applikazzjoni u l-infurzar ta’ regoli kummerċjali internazzjonali u li jemenda r-Regolament tal-Kunsill (KE) Nru 3286/94 li jistabbilixxi l-proċeduri tal-Komunità fil-qasam ta’ politika kummerċjali komuni sabiex jiżgura l-eżerċizzju tad-drittijiet tal-Komunità skont ir-regoli internazzjonali tal-kummerċ, b’mod partikolari dawk stabbiliti taħt l-awspiċji tal-Organizzazzjoni Dinjija tal-Kummerċ (WTO) (1), u b’mod partikolari l-Artikolu 7(3) tiegħu,

Billi:

(1)

Fl-20 ta’ Ġunju 2018, il-Kummissjoni adottat ir-Regolament ta’ Implimentazzjoni tal-Kummissjoni (UE) 2018/886 (2) dwar ċerti miżuri ta’ politika kummerċjali rigward ċerti prodotti li joriġinaw mill-Istati Uniti tal-Amerka (l-Istati Uniti) li jipprevedi l-applikazzjoni ta’ dazji doganali addizzjonali fuq l-importazzjonijiet fl-Unjoni ta’ għadd ta’ prodotti li joriġinaw mill-Istati Uniti, kif ġej:

(a)

fl-ewwel stadju, id-dazji ad valorem addizzjonali ta’ rata ta’ 10 % u 25 % fuq l-importazzjonijiet tal-prodotti elenkati fl-Anness I ta’ dak ir-Regolament, kif speċifikat fih, daħlu fis-seħħ fil-21 ta’ Ġunju 2018 u kienu se jibqgħu japplikaw sakemm l-Istati Uniti jieqfu japplikaw il-miżuri ta’ salvagwardja tagħhom fuq prodotti mill-Unjoni;

(b)

fit-tieni stadju, id-dazji ad valorem addizzjonali ta’ rata ta’ 10 %, 25 %, 35 % u 50 % fuq l-importazzjonijiet tal-prodotti elenkati fl-Anness II ta’ dak ir-Regolament, kif speċifikat fih, kienu jibdew japplikaw mill-1 ta’ Ġunju 2021 jew malli sseħħ l-adozzjoni ta’ deċiżjoni mill-Korp għas-Soluzzjoni tat-Tilwim tad-WTO li l-miżuri ta’ salvagwardja tal-Istati Uniti huma inkonsistenti mad-dispożizzjonijiet rilevanti tal-Ftehim li jistabbilixxi l-Organizzazzjoni Dinjija tal-Kummerċ (“id-WTO”), jew malli jkun innotifikat biha, jekk dan iseħħ qabel, sakemm l-Istati Uniti jieqfu japplikaw il-miżuri ta’ salvagwardja tagħhom għal prodotti mill-Unjoni.

(2)

Fis-7 ta’ April 2020, il-Kummissjoni adottat ir-Regolament ta’ Implimentazzjoni tal-Kummissjoni (UE) 2020/502 (3) li jipprevedi l-applikazzjoni ta’ dazji doganali addizzjonali fuq l-importazzjonijiet fl-Unjoni ta’ ċerti prodotti li joriġinaw mill-Istati Uniti, kif ġej:

(a)

fl-ewwel stadju, id-dazji ad valorem addizzjonali ta’ rata ta’ 20 % u 7 % fuq l-importazzjonijiet tal-prodotti elenkati fl-Artikolu 1(2)(a), ta’ dak ir-Regolament, daħlu fis-seħħ fit-8 ta’ Mejju 2021 u kienu se jibqgħu japplikaw sakemm l-Istati Uniti jieqfu japplikaw il-miżuri ta’ salvagwardja tagħhom fuq prodotti mill-Unjoni;

(b)

fit-tieni stadju, dazji ad valorem addizzjonali ulterjuri ta’ 4,4 % fuq l-importazzjonijiet tal-prodotti speċifikati fl-Artikolu 1(2)(b), ta’ dak ir-Regolament, jenħtieġ li jiġu applikati mit-8 ta’ Frar 2023 jew malli sseħħ l-adozzjoni ta’ deċiżjoni mill-Korp għas-Soluzzjoni tat-Tilwim tad-WTO li l-miżuri ta’ salvagwardja tal-Istati Uniti huma inkonsistenti mad-dispożizzjonijiet rilevanti tal-Ftehim tad-WTO, jew malli jkun innotifikat biha, jekk dan iseħħ qabel, sakemm il-miżuri ta’ salvagwardja tal-Istati Uniti jieqfu japplikaw.

(3)

Fil-31 ta’ Mejju 2021, wara Dikjarazzjoni Konġunta bejn l-UE u l-Istati Uniti ppubblikata fis-17 ta’ Mejju 2021 li fiha l-UE u l-Istati Uniti qablu “li jħejju rotta li ttemm it-tilwimiet fid-WTO wara l-applikazzjoni mill-Istati Uniti ta’ tariffi fuq l-importazzjonijiet mill-UE skont it-taqsima 232”, il-Kummissjoni adottat ir-Regolament ta’ Implimentazzjoni tal-Kummissjoni (UE) 2021/866 (4), li ssospenda l-applikazzjoni tad-dazji ad valorem addizzjonali fuq prodotti li joriġinaw mill-Istati Uniti tal-Amerka elenkati fl-Anness II tar-Regolament ta’ Implimentazzjoni (UE) 2018/886 sat-30 ta’ Novembru 2021.

(4)

Fil-31 ta’ Ottubru 2021, l-Unjoni Ewropea u l-Istati Uniti ħabbru li kienu se jinnegozjaw fi żmien sentejn arranġament — magħruf bħala l-Arranġament Globali dwar l-Azzar u l-Aluminju Sostenibbli — biex jindirizzaw il-kapaċità żejda mhux tas-suq u l-intensità tal-emissjonijiet tal-industriji tal-azzar u tal-aluminju. Arranġament bħal dan, ladarba jiġi konkluż, kien jimplika l-eliminazzjoni tat-tariffi tal-Istati Uniti fuq l-importazzjonijiet ta’ prodotti tal-azzar u tal-aluminju tal-UE. Fil-31 ta’ Ottubru 2021, l-Istati Uniti ħabbru wkoll l-istabbiliment ta’ Kwoti Tariffarja (“TRQs”, Tariff Rate Quotas) fuq l-importazzjonijiet fl-Istati Uniti ta’ prodotti tal-azzar u tal-aluminju tal-UE sal-31 ta’ Diċembru 2023. Wara din it-tħabbira, fis-26 ta’ Novembru 2021, il-Kummissjoni adottat ir-Regolament ta’ Implimentazzjoni tal-Kummissjoni (UE) 2021/2083 (5) li ssospenda l-applikazzjoni tad-dazji ad valorem addizzjonali imposti mir-Regolamenti ta’ Implimentazzjoni (UE) 2018/886 u (UE) 2020/502 sal-31 ta’ Diċembru 2023.

(5)

Fis-Summit tal-20 ta’ Ottubru 2023, għalkemm l-Unjoni Ewropea u l-Istati Uniti ma kkonkludewx in-negozjati fir-rigward tal-Arranġament Globali dwar l-Azzar u l-Aluminju Sostenibbli, huma rrikonoxxew li kienu għamlu progress sostanzjali biex jidentifikaw is-sorsi tal-kapaċità żejda mhux tas-suq u jilħqu fehim aħjar tal-għodod biex tiġi indirizzata l-intensità tal-emissjonijiet tal-industriji tal-azzar u tal-aluminju.

(6)

Wara l-konklużjoni tas-Summit bejn l-UE u l-Istati Uniti tal-20 ta’ Ottubru 2023, l-Istati Uniti infurmaw lill-Kummissjoni li kellhom l-intenzjoni li jipprolungaw it-TRQs eżistenti fuq l-importazzjonijiet fl-Istati Uniti ta’ prodotti tal-azzar u tal-aluminju tal-UE għal perjodu ta’ żmien addizzjonali.

(7)	Il-Kummissjoni, f’isem l-Unjoni, tista’ temenda r-Regolamenti ta’ Implimentazzjoni (UE) 2018/886 (6) u (UE) 2020/502 (7), jekk tqis li dan ikun xieraq, fid-dawl ta’ kwalunkwe modifika jew emenda tal-miżuri ta’ salvagwardja tal-Istati Uniti.

(8)	Għaldaqstant, jenħtieġ li l-Unjoni tissospendi l-applikazzjoni tad-dazji ad valorem addizzjonali imposti mir-Regolamenti ta’ Implimentazzjoni (UE) 2018/886 u (UE) 2020/502 għall-perjodu sal-31 ta’ Marzu 2025.

(9)	Din is-sospensjoni hija meqjusa neċessarja fid-dawl tal-prolungament tat-TRQs mill-Istati Uniti u biex l-Unjoni u l-Istati Uniti jkunu jistgħu jmexxu ’l quddiem il-kooperazzjoni tagħhom li għaddejja bħalissa, inkluż bil-ħsieb li jeliminaw it-tariffi rispettivi tagħhom.

(10)	Jenħtieġ li l-Kummissjoni żżomm is-sospensjoni taħt rieżami fid-dawl ta’ żviluppi, bħal dawk li jistgħu jgħarrqu is-sitwazzjoni għall-esportazzjonijiet tal-Unjoni li jibqgħu soġġetti għall-miżuri ta’ salvagwardja tal-Istati Uniti, inklużi t-TRQs.

(11)	Is-sospensjoni hija mingħajr preġudizzju għall-pożizzjoni tal-Unjoni li l-miżuri ta’ salvagwardja mill-Istati Uniti jibqgħu inkompatibbli mal-Ftehim tad-WTO.

(12)	Il-miżuri previsti f’dan ir-Regolament huma skont l-opinjoni tal-Kumitat dwar l-Ostakoli għall-Kummerċ, imwaqqaf permezz tar-Regolament (UE) 2015/1843 tal-Parlament Ewropew u tal-Kunsill (8),

ADOTTAT DAN IR-REGOLAMENT:

Artikolu 1

L-applikazzjoni tad-dazji ad valorem addizzjonali ta’ rata ta’ 10 %, 25 %, 35 % u 50 % fuq l-importazzjonijiet tal-prodotti elenkati fl-Anness I u l-Anness II tar-Regolament ta’ Implimentazzjoni (UE) 2018/886 għandha tiġi sospiża mill-1 ta’ Jannar 2024 sal-31 ta’ Marzu 2025.

Artikolu 2

L-applikazzjoni tad-dazji ad valorem addizzjonali ta’ rata ta’ 20 %, 7 %, u 4,4 % fuq l-importazzjonijiet tal-prodotti elenkati fl-Artikolu 1(2), il-punti (a) u (b), tar-Regolament ta’ Implimentazzjoni (UE) 2020/502 għandha tiġi sospiża mill-1 ta’ Jannar 2024 sal-31 ta’ Marzu 2025.

Artikolu 3

Dan ir-Regolament għandu jidħol fis-seħħ fl-1 ta’ Jannar 2024.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-18 ta’ Diċembru 2023.

Għall-Kummissjoni

Il-President

Ursula VON DER LEYEN

(1) ĠU L 189, 27.6.2014, p. 50 kif emendat bir-Regolament (UE) 2021/167 tal-Parlament Ewropew u l-Kunsill tal-10 ta’ Frar 2021 (ĠU L 49, 12.2.2021, p. 1).

(2) Ir-Regolament ta’ Implimentazzjoni tal-Kummissjoni (UE) 2018/886 tal-20 ta’ Ġunju 2018 dwar ċerti miżuri ta’ politika kummerċjali rigward ċerti prodotti li joriġinaw mill-Istati Uniti tal-Amerka u li jemenda r-Regolament ta’ Implimentazzjoni (UE) 2018/724 (ĠU L 158, 21.6.2018, p. 5).

(3) Ir-Regolament ta’ Implimentazzjoni tal-Kummissjoni (UE) 2020/502 tas-6 ta’ April 2020 dwar ċerti miżuri ta’ politika kummerċjali li jikkonċernaw ċerti prodotti li joriġinaw fl-Istati Uniti tal-Amerka (ĠU L 109, 7.4.2020, p. 10).

(4) Ir-Regolament ta’ Implimentazzjoni tal-Kummissjoni (UE) 2021/866 tat-28 ta’ Mejju 2021 li jissospendi ċerti miżuri ta’ politika kummerċjali rigward ċerti prodotti li joriġinaw mill-Istati Uniti tal-Amerka imposti bir-Regolament ta’ Implimentazzjoni (UE) 2018/886 (ĠU L 190, 31.5.2021, p. 94).

(5) Ir-Regolament ta’ Implimentazzjoni tal-Kummissjoni (UE) 2021/2083 tas-26 ta’ Novembru 2021 li jissospendi ċerti miżuri ta’ politika kummerċjali rigward ċerti prodotti li joriġinaw mill-Istati Uniti tal-Amerka imposti bir-Regolamenti ta’ Implimentazzjoni (UE) 2018/886 u (UE) 2020/502 (ĠU L 426, 29.11.2021, p. 41).

(6) Il-Premessa 7 tar-Regolament ta’ Implimentazzjoni (UE) 2018/886.

(7) Il-Premessa 19 tar-Regolament ta’ Implimentazzjoni (UE) 2020/502.

(8) Ir-Regolament (UE) 2015/1843 tal-Parlament Ewropew u tal-Kunsill tas-6 ta’ Ottubru 2015 li jistabbilixxi l-proċeduri tal-Unjoni fil-qasam tal-politika kummerċjali komuni sabiex jiżgura l-eżerċizzju tad-drittijiet tal-Unjoni skont ir-regoli internazzjonali tal-kummerċ, b’mod partikolari dawk stabbiliti taħt l-awspiċji tal-Organizzazzjoni Dinjija tal-Kummerċ (kodifikazzjoni) (ĠU L 272, 16.10.2015, p. 1).