(1)

Il-Kapijiet ta’ Stat jew ta’ Gvern tal-UE, fil-laqgħa tagħhom f’Versailles fil-11 ta’ Marzu 2022, impenjaw ruħhom għat-tisħiħ tal-kapaċitajiet tad-difiża Ewropej minħabba l-gwerra ta’ aggressjoni tar-Russja kontra l-Ukrajna. Ftiehmu li jżidu b’mod sostanzjali in-nefqa għad-difiża, li jiżviluppaw aktar inċentivi biex jistimulaw l-investimenti kollaborattivi tal-Istati Membri fi proġetti konġunti u l-akkwist konġunt tal-kapaċitajiet tad-difiża, li jinvestu aktar fil-kapaċitajiet meħtieġa biex titwettaq il-firxa sħiħa ta’ missjonijiet u operazzjonijiet, li jrawmu s-sinerġiji u jagħtu spinta lill-innovazzjoni, u li jsaħħu u jiżviluppaw l-industrija tad-difiża tal-Ewropa, inkluż l-intrapriżi żgħar u ta’ daqs medju (SMEs).

(2)

L-invażjoni mhux ġustifikata tal-Ukrajna tar-Russja fl-24 ta’ Frar 2022 u l-gwerra ta’ aggressjoni tagħha li għadha għaddejja għamluha ċara li hu kruċjali li tittieħed azzjoni urġenti biex jiġu indirizzati n-nuqqasijiet eżistenti. Ir-ritorn ta’ gwerra b’taqbid ta’ intensità għolja u kunflitt territorjali fl-Ewropa, għandu effett negattiv fuq is-sigurtà tal-Unjoni u tal-Istati Membri u jeħtieġ żieda sinifikanti fil-kapaċità tal-Istati Membri biex ineħħu l-aktar lakuni urġenti u kritiċi, speċjalment dawk aggravati bit-trasferiment tal-prodotti tad-difiża lejn l-Ukrajna.

(3)

Il-gwerra ta’ aggressjoni tar-Russja kontra l-Ukrajna ssottolinjat b’mod drammatiku l-ħtieġa li l-Bażi Industrijali u Teknoloġika tad-Difiża Ewropea (EDTIB) tiġi adattata għal bidliet strutturali, biex jissaħħu r-riċerka u l-iżvilupp militari tal-Unjoni, biex jiġi mmodernizzat it-tagħmir militari, u biex tissaħħaħ il-kooperazzjoni fost l-Istati Membri fil-qafas tal-akkwist fil-qasam tad-difiża.

(4)

Fit-18 ta’ Mejju 2022, il-Kummissjoni u r-Rappreżentant Għoli tal-Unjoni għall-Affarijiet Barranin u l-Politika ta’ Sigurtà (“ir-Rappreżentant Għoli”) ippreżentaw “komunikazzjoni konġunta dwar “l-Analiżi tad-Diskrepanzi fl-Investimenti fid-Difiża u l-Approċċ Futur”. Il-komunikazzjoni konġunta ssottolinjat l-effetti ta’ snin ta’ nuqqas ta’ nefqa fid-difiża u l-eżistenza ta’ diskrepanzi finanzjarji, industrijali u fil-kapaċità b’rabta mas-settur tad-difiża fl-Unjoni. Il-komunikazzjoni konġunta speċifikat li r-ritorn tal-gwerra fl-Ewropa kien kixef akkumulazzjoni ta’ lakuni u nuqqasijiet fl-inventarji militari, kapaċità tal-produzzjoni industrijali mnaqqsa, u akkwist konġunt u kollaborazzjoni limitati. Il-komunikazzjoni konġunta enfasizzat ukoll lakuni li għandhom effett immedjat fuq il-libertà ta’ azzjoni tal-forzi armati tal-Istati Membri kif ukoll l-ħtieġa urġenti li ċerti ħażniet jiġu rifornuti, li jiġi sostitwit it-tagħmir militari li m’għadux validu, pereżempju t-tagħmir iddisinjat jew prodott fl-eks Unjoni Sovjetika, u li jissaħħu l-kapaċitajiet strateġiċi.

(5)

Il-komunikazzjoni konġunta pproponiet ukoll strument apposta għall-immedjat, imfassal bi spirtu ta’ solidarjetà, bħala għodda li tinċentiva lill-Istati Membri biex iwettqu, fuq bażi volontarja, akkwist komuni b’mod kollaborattiv sabiex jimlew l-aktar lakuni urġenti u kritiċi, speċjalment dawk maħluqa mir-rispons għall-gwerra ta’ aggressjoni kontra l-Ukrajna mir-Russja.

(6)

L-istrument ġdid apposta għall-immedjat propost huwa maħsub biex jikkontribwixxi għat-tisħiħ tal-akkwist komuni tad-difiża u, bil-finanzjament assoċjat tal-Unjoni, għat-tisħiħ tal-kapaċitajiet industrijali tad-difiża tal-Unjoni, inkluż billi tiżdied il-produzzjoni tal-prodotti tad-difiżi. Dan ser jikkontribwixxi wkoll għall-punt ta’ riferiment kollettiv ta’ 35 % tan-nefqa totali fuq l-akkwist ta’ tagħmir għall-akkwist kollaborattiv Ewropew tat-tagħmir identifikat mill-Bord ta’ Tmexxija tal-Aġenzija Ewropea għad-Difiża fl-2007.

(7)

Għalhekk, jenħtieġ li t-tisħiħ tal- EDTIB ikun fil-qalba ta’ dawk l-isforzi. Fil-fatt, għad hemm bosta diffikultajiet u diskrepanzi u għad hemm frammentazzjoni, li qed twassal biex ma jkunx hemm biżżejjed azzjoni kollaborattiva u interoperabbiltà bejn il-prodotti.

(8)

L-istruttura speċifika, il-kundizzjonijiet tal-eliġibbiltà u l-kriterji stabbiliti f’dan ir-Regolament huma partikolari għall-istrument apposta għall-immedjat u huma ddeterminati minn ċirkostanzi speċifiċi u s-sitwazzjoni ta’ emerġenza fil-preżent.

(9)

Fil-kuntest attwali tas-suq tad-difiża, ikkaratterizzat b’żieda fit-theddid għas-sigurtà u bi prospett realistiku ta’ kunflitt ta’ intensità għolja, l-Istati Membri qed iżidu malajr il-baġits tad-difiża tagħhom u b’miri li jwettqu xiri simili ta’ prodotti tad-difiża. Dan wassal għal livell ta’ domanda li tista’ taqbeż il-kapaċitajiet tal-manifattura tal-EDTIB, li bħalissa huma maħsuba għall-produzzjoni għaż-żminijiet ta’ paċi.

(10)

Għaldaqstant, jistgħu jiġu antiċipati inflazzjoni qawwija fil-prezzijiet, kif ukoll aktar dewmien fit-twassil tal-ordnijiet, li potenzjalment jistgħu jagħmlu ħsara lis-sigurtà tal-Unjoni u tal-Istati Membri. L-industriji tad-difiża jeħtieġ jiżguraw il-kapaċità tal-produzzjoni meħtieġa għall-ipproċessar tal-ordnijiet, kif ukoll il-materja prima kritika u s-sottokomponenti. F’dak il-kuntest, jista’ jkun li l-produtturi jagħtu preferenza lill-ordnijiet il-kbar, u potenzjalment iħallu lill-aktar pajjiżi vulnerabbli li jonqoshom id-daqs kritiku u l-mezzi finanzjarji biex jiżguraw ordnijiet kbar, esposti.

(11)

Is-sitwazzjoni ġeopolitika attwali fil-pajjiżi tal-viċinat tal-Lvant uriet li, billi jenħtieġ li jiġu evitati sforzi doppji, suq tad-difiża diversifikat jista’ jikkontribwixxi għall-varjetà ta’ prodotti li jkunu immedjatament disponibbli fis-suq u għalhekk jista’ jkun ta’ benefiċċju għall-issodisfar adegwat tal-ħtiġijiet urġenti tal-Istati Membri.

(12)

Barra minn hekk, jenħtieġ li jsiru sforzi sabiex iż-żieda fl-infiq tirriżulta f’EDTIB ferm aktar b’saħħitha fl-Unjoni kollha. Fil-fatt, żieda fl-investimenti nazzjonali, magħmula mingħajr koordinazzjoni jew kooperazzjoni, tista’ żżid il-frammentazzjoni.

(13)

Minħabba l-isfidi msemmija hawn fuq u l-bidliet strutturali relatati, jinħass il-bżonn li jitħaffef l-aġġustament tal-EDTIB, biex jissaħħu l-kompetittività u l-effiċjenza tagħha, f’konformità mal-Artikolu 173 tat-Trattat dwar il-Funzjonament tal-Unjoni Ewropea (TFUE), u b’hekk biex tikkontribwixxi għat-tisħiħ u għar-riforma tal-kapaċitajiet industrijali tad-difiża tal-Istati Membri. Jenħtieġ li waqt li jiġu indirizzati n-nuqqasijiet industrijali jiġu indirizzati malajr ukoll l-aktar lakuni urġenti.

(14)

Jenħtieġ li, b’mod partikolari, jiġu inċentivati l-investiment u l-akkwist komuni fid-difiża peress li dawn l-azzjonijiet kollaborattivi jiżguraw li l-bidla meħtieġa fl-EDTIB issir b’mod kollaborattiv, u tiġi evitata aktar frammentazzjoni u tiżdied l-interoperabbiltà.

(15)

Għal dak il-għan, jenħtieġ li jiġi stabbilit strument apposta għall-immedjat biex tiżdied il-kollaborazzjoni mill-Istati Membri fil-fażi tal-akkwist tad-difiża (l-“Istrument”). L-Istrument jenħtieġ li jinċentiva lill-Istati Membri biex iwettqu azzjonijiet kollaborattivi u, b’mod partikolari, waqt l-akkwisti biex jimlew dawk il-lakuni, li jagħmlu dan b’mod konġunt, filwaqt li jżidu l-interoperabbiltà u jsaħħu u jirriformaw il-kapaċitajiet industrijali tad-difiża tagħhom.

(16)

Mingħajr preġudizzju għall-prerogattivi tal-awtorità baġitarja, ir-riżorsi allokati għall-Istrument ser jiġu ffinanzjati fil-qafas finanzjarju multiannwali eżistenti mingħajr impatt fuq il-finanzjament li diġà ġie ddedikat għal azzjonijiet speċifiċi tal-Unjoni.

(17)

L-Istrument jenħtieġ li jikkumpensa għall-kumplessità u r-riskji assoċjati mal-akkwist komuni filwaqt li jippermetti li l-ekonomiji ta’ skala fl-azzjonijiet tal-Istati Membri jsaħħu u jimmodernizzaw l-EDTIB, b’enfasi partikolari fuq l-SMEs u l-kumpaniji b’kapitalizzazzjoni medja (mid-caps), biex b’hekk iżid il-kapaċità, ir-reżiljenza u s-sigurtà tal-provvista tal-Unjoni. L-inċentiv għall-akkwist komuni jirriżulta wkoll f’kostijiet aktar baxxi fir-rigward tal-piż amministrattiv u l-ġestjoni taċ-ċiklu tal-ħajja tas-sistemi rilevanti. Jenħtieġ li l-Istrument ikun akkumpanjat minn sforzi biex jissaħħu s-swieq, is-servizzi u s-sistemi Ewropej tad-difiża u s-sigurtà, u li joħolqu kundizzjonijiet ekwivalenti għall-fornituri mill-Istati Membri kollha. L-akkwist komuni f’suq komuni għall-EDTIB jippermetti ekonomiji ta’ skala u jiżgura l-innovazzjoni u l-effiċjenza fil-produzzjoni u t-teknoloġija.

(18)

F’konformità mal-komunikazzjoni konġunta tat-18 ta’ Mejju 2022, l-Istrument jkompli jibni u jikkunsidra l-ħidma tat-Task Force ta’ Akkwist Konġunt għad-Difiża stabbilita mill-Kummissjoni u mir-Rappreżentant Għoli u Kap tal-Aġenzija Ewropea għad-Difiża, biex tikkoordina l-ħtiġijiet tal-akkwist tad-difiża fl-immedjat u biex tinvolvi lill-Istati Membri u lill-manifatturi tad-difiża tal-Unjoni fl-appoġġ tal-akkwist konġunt għall-mili mill-ġdid tar-riżervi, b’mod partikolari minħabba l-appoġġ mogħti lill-Ukrajna.

(19)

Is-sitwazzjoni tas-sigurtà fl-Ewropa teħtieġ riflessjoni urġenti dwar kif tista’ titnaqqas il-frammentazzjoni żejda permezz ta’ inizjattivi awtonomi tal-Unjoni u dwar kif l-istrumenti rilevanti jistgħu jiġu konnessi b’mod strateġiku. L-Istrument huwa maħsub li jiżgura l-koerenza ma’ inizjattivi kollaborattivi eżistenti tal-Unjoni marbuta mad-difiża, bħall-Pjan tal-Iżvilupp tal-Kapaċitajiet, ir-Rieżami Annwali Koordinat dwar id-Difiża, il-Fond Ewropew għad-Difiża kif ukoll il-Kooperazzjoni Strutturata Permanenti, u li jiġġenera sinerġiji ma’ programmi oħra tal-Unjoni. L-Istrument hu koerenti għal kollox mal-ambizzjoni tal-Boxxla Strateġika għas-Sigurtà u d-Difiża. Fejn xieraq, il-prijoritajiet reġjonali u internazzjonali, inkluż dawk stabbiliti fil-kuntest tal-Organizzazzjoni tat-Trattat tal-Atlantiku tat-Tramuntana, jistgħu jiġu kkunsidrati wkoll, dment li dawn ikunu konformi mal-prijoritajiet tal-Unjoni u ma jwaqqfu lill-ebda Stat Membru jew pajjiż assoċjat milli jipparteċipa, filwaqt li jfittxu li jevitaw duplikazzjoni bla bżonn.

(20)

Peress li l-Istrument għandu l-għan li jtejjeb il-kompetittività u l-effiċjenza tal-industrija tad-difiża tal-Unjoni, il-kuntratti tal-akkwist komuni ser, sabiex jibbenefikaw minnu, ikun jeħtiġilhom jingħataw lil kuntratturi jew sottokuntratturi stabbiliti fl-Unjoni jew f’pajjiżi assoċjati u li mhumiex soġġetti għall-kontroll ta’ pajjiżi terzi mhux assoċjati jew ta’ entitajiet ta’ pajjiżi terzi mhux assoċjati. F’dak il-kuntest, jenħtieġ li l-kontroll fuq kuntrattur jew sottokuntrattur jinftiehem bħala l-abbiltà li tiġi eżerċitata influwenza deċiżiva fuq kuntrattur jew sottokuntrattur b’mod dirett, jew indirett permezz ta’ entità ġuridika intermedja waħda jew aktar. Minbarra dan, sabiex tkun żgurata l-protezzjoni tal-interessi tas-sigurtà u tad-difiża tal-Unjoni u tal-Istati Membri, l-infrastruttura, il-faċilitajiet, l-assi u r-riżorsi tal-kuntratturi u tas-sottokuntratturi involuti fl-akkwist komuni li jintużaw għall-finijiet ta’ dak l-akkwist jenħtieġ li jkunu fit-territorju ta’ Stat Membru jew ta’ pajjiż assoċjat.

(21)

F’ċerti ċirkostanzi, jenħtieġ li jkun possibbli li ssir deroga mill-prinċipju li l-kuntratturi u s-sottokuntratturi involuti f’akkwist komuni appoġġat mill-Istrument ma jkunux soġġetti għal kontroll minn pajjiżi terzi mhux assoċjati jew minn entitajiet ta’ pajjiżi terzi mhux assoċjati. F’dak il-kuntest, kuntrattur jew sottokuntrattur stabbilit fl-Unjoni jew f’pajjiż assoċjat u kkontrollat minn pajjiż terz mhux assoċjat jew minn entità ta’ pajjiż terz mhux assoċjat jenħtieġ li jkun jista’ jipparteċipa bħala kuntrattur jew sottokuntrattur involut fl-akkwist komuni, dment lijiġu ssodisfati l-kundizzjonijiet stretti relatati mal-interessi tas-sigurtà u tad-difiża tal-Unjoni u tal-Istati Membri tagħha, kif stabbilit fil-qafas tal-politika estera u ta’ sigurtà komuni skont it-Titolu V tat-Trattat dwar l-Unjoni Ewropea (TUE), inkluż fir-rigward tat-tisħiħ tal-EDTIB.

(22)

Barra minn hekk, il-proċeduri u l-kuntratti tal-akkwist komuni jenħtieġ ukoll li jinkludu rekwiżit li prodott tad-difiża ma jkunx soġġett għal restrizzjoni minn pajjiż terz mhux assoċjat jew minn entità ta’ pajjiż terz mhux assoċjat li tillimita l-kapaċità tal-Istati Membri li jużaw dak il-prodott ta’ difiża. F’każijiet urġenti, fejn il-kapaċità tal-EDTIB biex tindirizza l-aktar lakuni urġenti u kritiċi fil-ħażniet tal-Istati Membri ma tkunx biżżejjed jew fejn l-EDTIB ma tkunx tista’ tipprovdi l-prodotti tad-difiża meħtieġa fi żmien adegwat, jenħtieġ li dak ir-rekwiżit ma japplikax jekk il-prodotti akkwistati kienu qed jintużaw qabel l-24 ta’ Frar 2022 fil-forzi armati tal-biċċa l-kbira tal-Istati Membri li jipparteċipaw fl-akkwist komuni. Fejn tapplika dik id-deroga, jenħtieġ li l-pajjiżi li jipparteċipaw fl-akkwist komuni jistudjaw il-fattibbiltà li l-komponenti li jikkawżaw ir-restrizzjoni jiġu sostitwiti b’komponenti mingħajr restrizzjonijiet mill-Unjoni jew minn pajjiżi assoċjati.

(23)

Sabiex jinħoloq l-effett meħtieġ ta’ inċentiv, jenħtieġ li l-għotjiet provduti skont l-Istrument jieħdu l-forma ta’ finanzjament li ma jkunx marbut ma’ kost u jenħtieġ li jkunu bbażati fuq il-kisba tar-riżultati b’referenza għall-pakketti ta’ ħidma, l-istadji importanti jew il-miri tal-proċess tal-akkwist komuni.

(24)

Sabiex ikunu żgurati kundizzjonijiet uniformi għall-implimentazzjoni ta’ dan ir-Regolament, jenħtieġ li jingħataw setgħat ta’ implimentazzjoni lill-Kummissjoni fir-rigward tal-adozzjoni tal-programm ta’ ħidma pluriannali sabiex tistabbilixxi l-prijoritajiet tal-finanzjament u l-kundizzjonijiet tal-finanzjament applikabbli. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (3).

(25)

Għall-ġenerazzjoni ta’ effett ta’ inċentiv, il-livell ta’ kontribuzzjoni tal-Unjoni għal kull azzjoni jenħtieġ li jkun jista’ jiġi differenzjat abbażi ta’ fatturi bħall-kumplessità tal-akkwist komuni, il-karatteristiċi tal-kooperazzjoni jew l-għadd ta’ Stati Membri jew pajjiżi assoċjati parteċipanti, jew l-inklużjoni ta’ Stati Membri jew pajjiżi assoċjati oħra f’kooperazzjonijiet eżistenti, iżda jenħtieġ li ma jaqbiżx il-15 % tal-baġit globali tal-Istrument u jenħtieġ li jiġi limitat għal 15 % tal-valur stmat tal-kuntratt tal-akkwist komuni għal kull konsorzju ta’ Stati Membri u pajjiżi assoċjati. Minħabba l-kostijiet ogħla normalment assoċjati mat-twettiq ta’ proċeduri tal-akkwist li jinkludu għedud kbar ta’ kuntratturi, jew li jinvolvu trasferimenti ta’ tagħmir mixtri lejn pajjiżi terzi, jenħtieġ li dan il-limitu jogħla għal 20 % tal-baġit ġenerali u 20 % tal-valur stmat tal-kuntratt tal-akkwist komuni għal kull konsorzju ta’ Stati Membri u pajjiżi assoċjati, fejn l-Ukrajna jew il-Moldova jkunu wieħed mir-riċevituri ta’ kwantitajiet addizzjonali ta’ prodotti tad-difiża fl-azzjoni ta’ akkwist, jew fejn mill-inqas 15 % tal-valur stmat tal-kuntratt tal-akkwist komuni jkun allokat għal SMEs jew kumpaniji b’kapitalizzazzjoni medja (mid-caps) bħala kuntratturi jew sottokuntratturi. Jenħtieġ li l-akkwist ta’ kwantitajiet addizzjonali ta’ prodotti tad-difiża għall-Ukrajna u l-Moldova jkun possibbli bil-qbil tal-Istati Membri parteċipanti, minħabba s-sitwazzjoni partikolari tas-sigurtà ta’ dawk iż-żewġ pajjiżi kandidati tal-Unjoni fid-dawl tal-gwerra ta’ aggressjoni tar-Russja kontra l-Ukrajna.

(26)

L-Istati Membri u l-pajjiżi assoċjati jenħtieġ li jaħtru aġent tal-akkwist biex iwettaq l-akkwist komuni f’isimhom. L-aġent tal-akkwist jenħtieġ li jkun awtorità kontraenti kif definit fl-Artikolu 2(1), il-punt (1) tad-Direttiva 2014/24/UE (4) u fl-Artikolu 3(1) tad-Direttiva 2014/25/UE (5) tal-Parlament Ewropew u tal-Kunsill li hija stabbilita fi Stat Membru jew f’pajjiż assoċjat, l-Aġenzija Ewropea għad-Difiża jew organizzazzjoni internazzjonali.

(27)

F’konformità mal-Artikolu 193(2) tar-Regolament (UE, Euratom) 2018/1046 tal-Parlament Ewropew u tal-Kunsill (6) (ir-“Regolament Finanzjarju”), tista’ tingħata għotja għal azzjoni li tkun diġà bdiet, dment li l-applikant ikun jista’ juri l-ħtieġa li l-azzjoni kellha tinbeda qabel l-iffirmar tal-ftehim ta’ għotja. Il-gwerra ta’ aggressjoni tar-Russja kontra l-Ukrajna kkawżat bidla drastika fil-kundizzjonijiet tas-suq tad-difiża, li l-EDTIB trid tadatta għalihom f’ambjent ristrett miż-żmien. Minħabba l-urġenza u s-serjetà ta’ dak l-adattament kif ukoll l-eżistenza ta’ riskju ta’ aktar frammentazzjoni tas-suq intern u tal-ktajjen tal-provvista ta’ prodotti tad-difiża rilevanti, kienu immedjatament meħtieġa azzjonijiet mill-Istati Membri li taw bidu għal kooperazzjoni fl-akkwist konġunt biex jintbagħat sinjal sinifikanti lis-suq u lill-EDTIB. Konsegwentement, jenħtieġ li jkun possibbli appoġġ finanzjarju bikri mill-Unjoni. B’deroga mill-Artikolu 193 tar-Regolament Finanzjarju, jenħtieġ li għalhekk ikun possibbli, fid-deċiżjoni tal-finanzjament, li jiġu previsti kontribuzzjonijiet finanzjarji għal azzjonijiet li jkopru perjodi mill-24 ta’ Frar 2022, anke jekk bdew qabel il-preżentazzjoni tal-applikazzjoni għall-għotja, dment li ma jkunux intemmu qabel l-iffirmar tal-ftehim ta’ għotja.

(28)

Dan ir-Regolament huwa mingħajr preġudizzju għar-regoli stabbiliti fid-Direttiva 2009/81/KE tal-Parlament Ewropew u tal-Kunsill (7). Madankollu, dan ir-Regolament jipprevedi rekwiżiti ta’ eliġibbiltà aktar speċifiċi. Id-Direttiva 2009/81/KE tipprovdi li l-Istati Membri jistgħu jinkludu fil- leġiżlazzjoni tagħhom il-possibbiltà li fid-dokumentazzjoni tal-kuntratt jimponu rekwiżiti relatati mal-protezzjoni tas-sigurtà tal-provvista jew tas-sigurtà tal-informazzjoni. Dan ir-Regolament jibni fuq dawk id-dispożizzjonijiet tad-Direttiva 2009/81/KE u joħloq obbligi għall-aġenti tal-akkwist fir-rigward tar-rekwiżiti tal-eliġibbiltà li għandhom jiġu inklużi fid-dokumentazzjoni tal-kuntratt. Tali obbligi jenħtieġ li jipprevalu fuq leġiżlazzjoni konfliġġenti tal-Istat Membru u pajjiżi assoċjati fejn ikun stabbilit l-aġent tal-akkwist.

(29)

Ir-Rakkomandazzjoni tal-Kummissjoni (UE) 2018/624 (8) għandha l-għan li tiffaċilita l-aċċess transfruntier tas-suq għall-SMEs u l-kumpaniji intermedji fis-settur tad-difiża. B’mod partikolari, din tappella lill-Istati Membri jużaw il-flessibbilta’ offruta mid-Direttiva 2009/81/KE, bħal dik introdotta fl-Artikolu 21 tagħha jew dik offruta mir-rikors akbar għal lottijiet jew akkwist elettroniku. Tappella wkoll lill-Istati Membri jtaffu l-piż amministrattiv relatat mal-akkwist, b’mod partikolari, billi jżommu l-kriterji għal talbiet għal informazzjoni jew kriterji tal-għażla proporzjonati. Fil-kuntest ta’ dan ir-Regolament, jenħtieġ li l-aġenti tal-akkwist maħtura mill-Istati Membri u mill-pajjiżi assoċjati jagħmlu l-aħjar użu mir-rakkomandazzjonijiet tal-Kummissjoni fit-twettiq tal-azzjonijiet ta’ akkwist komuni sabiex jiżgura li l-SMEs ikollhom aċċess ġust għall-akkwist appoġġat.

(30)

Dan ir-Regolament jistabbilixxi pakkett finanzjarju għall-Istrument għall-perjodu mis-27 ta’ Ottubru 2023 sal-31 ta’ Diċembru 2025, li ser ikun l-ammont ta’ referenza primarja skont it-tifsira tal-punt 18 tal-Ftehim Interistituzzjonali tas-16 ta’ Diċembru 2020 bejn il-Parlament Ewropew, il-Kunsill u l-Kummissjoni Ewropea dwar id-dixxiplina baġitarja, dwar il-kooperazzjoni f’materji baġitarji u dwar il-ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali għall-introduzzjoni ta’ riżorsi proprji ġodda (9), għall-Parlament Ewropew u għall-Kunsill waqt il-proċedura baġitarja annwali.

(31)

F’konformità mar-Regolament Finanzjarju, ir-Regolament (UE, Euratom) Nru 883/2013 tal-Parlament Ewropew u tal-Kunsill (10) u r-Regolamenti tal-Kunsill (KE, Euratom) Nru 2988/95 (11), (Euratom, KE) Nru 2185/96 (12) u (UE) 2017/1939 (13), l-interessi finanzjarji tal-Unjoni jenħtieġ li jkunu protetti b’miżuri proporzjonati, inkluż miżuri relatati mal-prevenzjoni, id-detezzjoni, il-korrezzjoni u l-investigazzjoni ta’ irregolaritajiet, inkluż frodi, mal-irkupru ta’ fondi mitlufa, imħallsa bi żball jew użati b’mod skorrett, u, fejn xieraq, mal-impożizzjoni ta’ penali amministrattivi. B’mod partikolari, f’konformità mar-Regolamenti (Euratom, KE) Nru 2185/96 u (UE, Euratom) Nru 883/2013, l-Uffiċċju Ewropew ta’ Kontra l-Frodi (OLAF) għandu s-setgħa li jwettaq investigazzjonijiet, inkluż verifiki u spezzjonijiet fuq il-post, bil-ħsieb li jistabbilixxi jekk kienx hemm frodi, korruzzjoni jew xi attività illegali oħra li taffettwa l-interessi finanzjarji tal-Unjoni. L-Uffiċċju tal-Prosekutur Pubbliku Ewropew (UPPE) għandu s-setgħa, f’konformità mar-Regolament (UE) 2017/1939, li jinvestiga u jressaq għall-prosekuzzjoni reati kriminali li jaffettwaw l-interessi finanzjarji tal-Unjoni, kif previst fid-Direttiva (UE) 2017/1371 tal-Parlament Ewropew u tal-Kunsill (14). F’konformità mar-Regolament Finanzjarju, kwalunkwe persuna jew entità li tirċievi fondi tal-Unjoni trid tikkoopera bis-sħiħ fil-protezzjoni tal-interessi finanzjarji tal-Unjoni, tagħti d-drittijiet u l-aċċess meħtieġa lill-Kummissjoni, lill-OLAF, lill-Qorti tal-Awdituri u, fir-rigward ta’ dawk l-Istati Membri li jipparteċipaw f’kooperazzjoni msaħħa skont ir-Regolament (UE) 2017/1939, lill-UPPE, u tiżgura li kull parti terza involuta fl-implimentazzjoni tal-fondi tal-Unjoni tagħti drittijiet ekwivalenti.

(32)

Skont l-Artikolu 85(1) tad-Deċiżjoni tal-Kunsill (UE) 2021/1764 (15), persuni u entitajiet stabbiliti f’pajjiżi jew f’territorji extra-Ewropej huma eliġibbli għal finanzjament soġġett għar-regoli u l-objettivi tal-Istrument u għall-arranġamenti possibbli applikabbli għall-Istat Membru li magħhom il-pajjiż jew territorju rilevanti jkun marbut.

(33)

Għall-finijiet ta’ dan ir-Regolament, il-prodotti tad-difiża jenħtieġ li jinftiehmu li jfissru prodotti fil-kamp ta’ applikazzjoni tad-Direttiva 2009/81/KE, kif stabbilit fl-Artikolu 2 ta’ dik id-Direttiva, b’mod partikolari bħala tipi ta’ prodotti inklużi fil-lista ta’ armi, munizzjon u materjal tal-gwerra stabbiliti fid-Deċiżjoni tal-Kunsill 255/58 tal-15 ta’ April 1958 (16). Dik il-lista tinkludi biss tagħmir li hu ddisinjat, żviluppat u prodott għal skopijiet speċifikament militari. Madankollu, il-lista hija ġenerika u għandha tiġi interpretata b’mod wiesa’ fid-dawl tan-natura li qed tevolvi tat-teknoloġija, il-politiki tal-akkwist u r-rekwiżiti militari li jwasslu għall-iżvilupp ta’ tipi ġodda ta’ tagħmir, pereżempju fuq il-bażi tal-Lista Militari Komuni tal-Unjoni. Għall-finijiet ta’ dan ir-Regolament, jenħtieġ li l-prodotti tad-difiża għandhom jinftiehmu li jkopru wkoll prodotti li, għalkemm inizjalment kienu ddisinjati għal użu ċivili, aktar tard ġew adattati għal skopijiet militari biex jintużaw bħala armi, munizzjon jew materjal tal-gwerra.

(34)

Skont l-Artikolu 4(2) TUE, is-sigurtà nazzjonali tibqa’ r-responsabbiltà esklużiva ta’ kull Stat Membru. L-Istati Membri jiddeterminaw bejniethom l-arranġamenti applikabbli għall-protezzjoni ta’ informazzjoni klassifikata għall-finijiet tal-akkwisti komuni, f’konformità mal-liġijiet u r-regolamenti nazzjonali.

(35)

Il-Kummissjoni tipproteġi l-informazzjoni klassifikata tal-UE f’konformità mar-regoli tas-sigurtà stipulati fid-Deċiżjoni tal-Kummissjoni (UE, Euratom) 2015/444 (17). F’konformità mal-Ftehim tal-4 ta’ Mejju 2011 bejn l-Istati Membri tal-Unjoni Ewropea, imlaqqgħin fil-Kunsill, dwar il-protezzjoni ta’ informazzjoni klassifikata skambjata fl-interessi tal-Unjoni Ewropea (18) u d-Deċiżjoni tal-Kunsill 2013/488/UE (19), l-Istati Membri jipprovdu livell ekwivalenti ta’ protezzjoni għall-informazzjoni klassifikata tal-UE għal dak ipprovdut mir-regoli tas-sigurtà tal-Kunsill stipulati fid-Deċiżjoni 2013/488/UE.

(36)

Jenħtieġ li l-Kummissjoni tfassal rapport ta’ evalwazzjoni għall-Istrument u tippreżentah lill-Parlament Ewropew u lill-Kunsill sal-31 ta’ Diċembru 2026. Jenħtieġ li r-rapport ta’ evalwazzjoni jevalwa l-impatt u l-effettività tal-azzjonijiet li jittieħdu taħt l-Istrument, filwaqt li jħares ‘il quddiem b’mod kritiku dwar modi biex jiġu żgurati l-komponenti kollha fil-katina tal-provvista tad-difiża tal-Unjoni b’kunsiderazzjoni xierqa għall-importanza ta’ arranġamenti ta’ sigurtà tal-provvista u għall-funzjonament tal-EDTIB. Barra minn hekk, jenħtieġ li r-rapport ta’ evalwazzjoni jidentifika n-nuqqasijiet u d-dipendenzi kritiċi fuq pajjiżi terzi mhux assoċjati fir-rigward tal-materja prima, il-komponenti u l-kapaċitajiet ta’ produzzjoni, fejn ikompli jibni fuq il-ħidma li saret fil-kuntest tal-Osservatorju tat-Teknoloġiji Kritiċi. Jenħtieġ li r-rapport jinforma l-ħidma tal-Kummissjoni dwar pjanijiet direzzjonali għat-teknoloġija, inkluż miżuri ta’ mitigazzjoni biex jiġu indirizzati dawk in-nuqqasijiet u d-dipendenzi kritiċi.

(37)

Dan ir-Regolament huwa mingħajr preġudizzju għad-diskrezzjoni tal-Istati Membri fir-rigward tal-politika tagħhom dwar l-esportazzjoni ta’ prodotti relatati mad-difiża.

(38)

Minħabba li l-objettivi ta’ dan ir-Regolament ma jistgħux jinkisbu b’mod suffiċjenti mill-Istati Membri iżda jistgħu pjuttost jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 TUE. F’konformità mal-prinċipju ta’ proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ biex jinkisbu dawk l-objettivi.

(39)

Sabiex l-implimentazzjoni ta’ dan ir-Regolament tkun tista’ tibda mill-aktar fis possibbli, jenħtieġ li dan jidħol fis-seħħ b’urġenza,

(1)

“akkwist komuni” tfisser akkwist imwettaq b’mod konġunt minn mill-inqas tliet Stati Membri;

(2)

“kontroll” fir-rigward ta’ kuntrattur jew sottokuntrattur, tfisser il-kapaċità li teżerċita influwenza deċiżiva fuq kuntrattur jew sottokuntrattur b’mod dirett, jew b’mod indirett permezz ta’ entità ġuridika intermedja waħda jew aktar;

(3)

“struttura maniġerjali eżekuttiva” tfisser korp ta’ entità ġuridika, maħtur skont il-liġi nazzjonali, u, fejn applikabbli, li jirrapporta lill-uffiċjal kap eżekuttiv, li jkollu s-setgħa jistabbilixxi l-istrateġija, l-objettivi u d-direzzjoni ġenerali ta’ dik l-entità ġuridika, u li jissorvelja u jwettaq monitoraġġ tat-teħid ta’ deċiżjonijiet maniġerjali;

(4)

“entità ta’ pajjiż terz mhux assoċjat” tfisser entità ġuridika stabbilita f’pajjiż terz mhux assoċjat jew, fejn tkun stabbilita fl-Unjoni jew f’pajjiż assoċjat, li jkollha l-istrutturi maniġerjali eżekuttivi tagħha f’pajjiż terz mhux assoċjat;

(5)

“aġent tal-akkwist” tfisser awtorità kontraenti kif definita fl-Artikolu 2(1), il-punt (1) tad-Direttiva 2014/24/UE u fl-Artikolu 3(1) tad-Direttiva 2014/25/UE li hija stabbilita fi Stat Membru jew f’pajjiż assoċjat, l-Aġenzija Ewropea għad-Difiża jew organizzazzjoni internazzjonali u li hija deżinjata mill-Istati Membri u pajjiżi assoċjati biex twettaq akkwist komuni f’isimhom;

(6)

“prodotti tad-difiża” tfisser prodotti li jaqgħu fil-kamp ta’ applikazzjoni tad-Direttiva 2009/81/KE, kif stabbilit fl-Artikolu 2 tagħha, inkluż tagħmir mediku tal-kumbattiment;

(7)

“informazzjoni klassifikata” tfisser informazzjoni jew materjal, fi kwalunkwe forma, li l-iżvelar mhux awtorizzat tiegħu jista’ jikkawża livelli differenti ta’ preġudizzju għall-interessi tal-Unjoni, jew ta’ wieħed jew aktar mill-Istati Membri, u li jkollha marka ta’ klassifikazzjoni tal-UE jew marka ta’ klassifikazzjoni korrispondenti, kif stabbilit fil-Ftehim bejn l-Istati Membri tal-Unjoni Ewropea, imlaqqgħin fil-Kunsill, dwar il-protezzjoni ta’ informazzjoni klassifikata skambjata fl-interessi tal-Unjoni Ewropea (20).

(8)

“informazzjoni sensittiva” tfisser informazzjoni u data mhux klassifikata, li jridu jiġu protetti minn aċċess jew żvelar mhux awtorizzat minħabba obbligi stipulati fil-liġi tal-Unjoni jew dik nazzjonali, fejn applikabbli, jew sabiex titħares il-privatezza jew is-sigurtà ta’ persuna fiżika jew ġuridika,

(a)

awtoritajiet pubbliċi tal-Istati Membri;

(b)

awtoritajiet pubbliċi ta’ pajjiżi assoċjati;

(c)

aġenti tal-akkwist.